KAMANJENAK

KAMANJENAK

¹ Kamanjenak kati Yensa Apakenaau Áamakau, kan Atijamit asenoomi man áyiisen kurokaool waatumi kabajoak nan piyout. Yensa nabomboñ maleekaay yoola bee di arokaool Yohan man emanjenuwo. ² Yohan náyiisenyiisen wan ajukumi di furimaf fati Atijamit di poop wan ajammi mati Yensa Apakenaau Áamakau wan akammi di wan aregumi. ³ Anoosani aliikenumi kurimak kati kamanjenak uku tebo jakoojak, di poop anoosani áyentenkomi ban nakaan waciikimi jakoojak, mati nanan nírindiiŋ. ⁴ Ínje Yohan niciciik letaraay bee di kujojak futokey di kugabaak kammi di mofam mati Asia. Emitey ekaan majakam di kásuumaay uru di kaan dooluul kápurumul Atijamit Ákonau ati iñeme, ati noo, di aatumi bee ebiley, di poop kápurumul di Úyegetaw Wátienaaw futokey di ugabaaw wammi man ujuume di fáculey yati ejunkutey yoola yati jáyiaj, ⁵ di poop kápurumul di Yensa Apakenaau Áamakau akammi áyiisena afiumaay, amondumi áyitoul di kacetumi, áyi ati kúyiak kati dúniyaay búrom. Namaŋolaamaŋ, ban napakenolaami di kánkumak kati majakutolaal ñátum di fúsimaf foola nan acetumi nan búsimen. ⁶ mati mo’omu nakaanolaami jáyi jati kúsimenaak kamiiceelaetemi di bújonlenab bati Atijamit Ampaool. Moo kaane Emitey ekaan Atijamit awul Yensa Apakenaau Áamakau kálebienak di kánkumak bee bándoorey. Amen. ⁷ Jíyenten, oo oomu nábileul di kurolaak, ban jícil janoosani panjijukool, hani kaheelenoomi. Fiil fanoosani fammi di dúniyaay pánfuciiŋit mati oo. Malegen moo pambajo! Amen. ⁸ Atijamit Akiiyaau naane, “Ínje eenomi Fúcitumaf di Fúwuŋenumaf,” Ákonau ati iñeme, ati noo, di aatumi bee ebiley. Ínje Atijamit ati Kánkum. ⁹ Ínje Yohan, atiuul, an unaamoorumi di Yensa búyiikab, di jáyiaj, di erum fubil di kamuuten. Ínje kusofansof kukulom di fúrinkaf fati Patomos mati man íriiŋenumi furimaf fati Atijamit ban nisankenumi mati Yensa. ¹⁰ Di funakaf fati kálebienak, Búyegetab Bátienaab bookaam, ban nijammi bálamukom furim facibuloe fan sinaame nan kayel kati kábiil, ¹¹ man foone, “Ciik wan ujukumi di búka ban nuboñ bee di kujojak futokey di kugabaak, fati Efes, fati Sumuruna, fati Peregam, fati Tuturo, fati Sadis, fati Filadeefia di fati Laodik.” ¹² Nítiiwoorumi bee ejukey ammi di kasankenom. Nan ítiiwoorumi nijukumi kújuumenuma kati síwuŋenuma kooni futok di kugaba kati sáni. ¹³ Ban titoorey yati kújuumenumaak kati síwuŋenumaas nijukumi an, an kuyesoor di añiilau ati anau, akaanoe kaloa kabaake ban napiinoor kapandaŋ kati sáni káfimenumi búsusool. ¹⁴ Fúko’ool di walool di fútienumi lec nan perekaan. Kúcilool kukankaan nan bújeek bati sambun. ¹⁵ Úkamunool di ukammi ñiliñil nan mulap máyeme nan sambun sikuurene di múreŋenuma, di poop furimool fasuuŋut nan lonkos yáamak. ¹⁶ Di kañenool kúridak naakenumi soot sooni futok di sigaba, ban esagalaŋ di épurumul di butumool. Buulool di buwuŋenumi pararar nan bala’ab nan bufijijenemi. ¹⁷ Ínje di ejukooley ceb, nilomi kúfima di úkamunool yeleb nan biiŋ. Bare narembenumi kañenool kúridak títiom man aane, “Takumbi úkoli, ínje eenomi fúcitumaf di fúwuŋenumaf. ¹⁸ Ínje aroŋaau, niceteencet, bare iñeme nirondoŋ bee bándoorey. Ínje eekumi síkulumaas sati Ecetey di Esuney. ¹⁹ Ñaa uciik wan ujukumi, wati iñeme di waatumi bee kabajoak. ²⁰ Wan sootas sooni futokey di sigabaas san ujukumi di kañenom kúridak, di poop kújuumenumaak kati síwuŋenumaas sooni futokey di sigabaas uwe sifelumi. Sootas sooni futokey di sigabaas soo eenomi simaleekaas sati kujojak kooni futok di kugabaak, ban kújuumenumaak kati síwuŋenumaas sati sáni sooni futok di sigabaas soo eenomi kujojak kooni futokey di kugabaak.

¹ “Ciik letaraay uye bee di maleekaay yati fujojaf fati Efes. Kurimak kápurumul di akila aakumi sootas sooni futok di sigabaas di kañenool kúridak, ban ajaatoorumi titoorey yati kújuumenumaak kati síwuŋenumaas futokey di sigabaas sajoonenimi ñátum sánaay. ² “‘Ínje nimammanj burokab booluul, burokab báamakab, di erum fubil di kamuuten kooluul. Nimammanj man jilatumi mati bukanak kajakutak ban ninsi jímeeloemi kakaanemi kúkoiil kúriiŋena bare kukaanut mo, ban jimanjumi mati koo kulepooraak. ³ Nimammanj buu joom di kamuutenak di bugaalab mati bálamukom, bare jilaañut bálamuk. ⁴ Bare wákon úsuumutammi di muyuul, woo eenomi kamaŋak kútiyaarak kan jibajeenumi noo jibetembeten ko iñeme. ⁵ Jiwoolo kamaŋak kútiyaarak kooluul tan kulakoeenumi di jaat tan kommi. Jítiiwoor jikat bálamuk majakutam mooluul man jílaañul bee di kamaŋak kan jibajeenumi. Kaanutumojaat, panibil ban nípuren éjuumenumaay yati síwuŋenumaas sooluul tan sommi di kujojak. ⁶ Bare babaj wákon nubaje, jilalat yém wan kuriibaak kati Nikolaiton kukammi, nan man ínje ilatuwomi eeno. ⁷ Anoosani abajumi uwos újamuma, najam wan Búyegetab Bátienaab bommi di eregey bee di kati kujojak. Ampi aŋoolenumi kánkumak kati Seetaanaay, panisen buruŋ man ari búbaarab bati eroŋey, bammi di bukinab bajakaab bati Atijamit.’ ⁸ “Ciik letaraay uye bee di maleekaay yati fujojaf fati Sumuruna: ‘Kurimak kápurumul di akila akammi Fúcitumaf di Fúwuŋenumaf, aceteenumi ban nálaañul bee di eroŋey. ⁹ “‘Ínje nimammanj búyiikab ban jommi di bo, di poop bulekab booluul (bare muyuul jibabaj fubaj)! Ínje nimammanj kasuulenak kati kaanemi koo Kúyahuud bare lee ko, bare koo kukankaan nan fukob fati Seetaanaay. ¹⁰ Mante jíkoliut bugaalab baatumi ébajuley iñemeeñeme. Jíyenten, Seetaanaay ejonjoojonjoor eban bee eleeb kuceen di muyuul dán bukanak kukuleimi, mambi jiyinki, ban bee wáriiŋe kunak kooni uñen joote kalako di búyiikab. Joote ekaan bukan kufiumaay handeneen di jijonkoor di ecetey, jikammojaat, pambi’isenuul bacaamab bati eroŋey. ¹¹ Anoosani abajumi uwos újamuma, najam wan Búyegetab Bátienaab bommi di eregey bee di kati kujojak. Ampi aŋoolenumi kánkumak kati Seetaanaay waaf letubajool wati ecetey egabunteney yan eenomi ecetey yati bándoorey.’ ¹² “Ciik letaraay uye bee di maleekaay yati fujojaf fati Peregam: ‘Kurimak kápurumulo di akila aakumi esagalaŋey yayabaay. ¹³ “‘Ínje nimammanj ésukey yáamakey yooluul, ban Seetaanay erungumi nan áyi. Jirulenrulen di esofey kareesak kúmboom lit, ban jípurut di kafiumak kooluul di ínje, hani nan Antipas, áyiisenaom afiumaay, abujimi di ésukey yáamakey yooluul, ban Seetaanaay yommi. ¹⁴ Bare uceen upinaay úsuumutammi di muyuul. Kuceen di muyuul kuriibenriiben man kukaan mukaanaam mati kaliikitenak kati Balaam, aliikitenumi Balak mampi akammi Kuisiraelak kutatagoor kulo ñátum di ekaaney man kuri muria másimenimi bee di sínaati ban ninsi kufinto di kan kuyaboorutumi. ¹⁵ Moo mákonam, di bajumi kuceen di muyuul kuriibeneriiben kaliikitenak kati Nikolaiton. ¹⁶ Kama jítiiwoor jikat bálamuk majakutam mooluul. Leejaat mo, ínje eete ebil ériiŋuluul iñeme nan piyout man itiikeniil ñátum di esagalaŋey yápurumulomi di butumom. ¹⁷ Anoosani abajumi uwos újamuma, najam wan Búyegetab Bátienaab bommi di eregey bee di kati kujojak. Ampi aŋoolenumi kánkumak kati Seetaanaay, ínje eete esenool manna yaayu yayofimi. Di poop panisenool ekooba yátiene lec, tan karees kunkul kuciiki, kan an aatut emanj rino di ayabuyomi.’ ¹⁸ “Ciik letaraay bee di maleekaay yati fujojaf fati Tuturo: ‘Kurimak kati Añiilau ati Atijamit, abajumi kúcilak kaanomi nan bújeek bati sambun, ban úkamunool waanomi ñiliñil nan mulap máyeme maposi fiit. ¹⁹ “‘Ínje nimammanj burokab booluul, di kamaŋak kooluul, di kafiumak kooluul, di erum fubil di kamuuten, ban burokab bati iñeme bufaŋumi man buje’e fácul wuuj bati mútiyaaram. ²⁰ Bare wákon úsuumutammi di muyuul. Mati aseekau Yesabel jikatookat man akaan wásuumoomi, awonkooromi aboña ati Atijamit. Ñátum di kaliikitenak koola nabuntemi kurokaom man kukaan kayenetak di poop man kuri muria másimenimi bee di sínaati. ²¹ Nisenoosen nanan man átiiwoor akat bálamuk majakutam moola, bare nalatumi yém man akammo. ²² Jíyenten, pánitekumool di ekaanool man ásumut, ban bukaaku kafintoemi di oo pánitekumiil ñátum di búyiik báamak, leejaat kútiiwootiiwoor kukat bálamuk majakutam di poop fúraaraf fan kukammi di aseekau umu, ²³ ban ínje poop panibuj kuriibaool, moo kati kujojak búrom koote emanj mati ínje eenomi áninguloora ati sísigiras di úyegetaw wati bukanak, ban panicaamuul riiboor di wan anoosani arokumi. ²⁴ Bare ínje nisankensanken di karinomi di Tuturo, kaleemi di eriib kaliikitenak kajakutak. Ban poop jiliikenut wan bukaaku koonemi waaf wásankie wati Seetaanaay. Ínje eem di ereguul mati letirooken bugaal buceen di muyuul. ²⁵ Bare jisof líŋ wan jookumi, bee nampi ílaañuumi. ²⁶ Ampi aŋoolenumi kánkumak kati Seetaanaay ban nakaan burokab búmboom bee di fúbanumaf, panisenool kánkum kati erungey yati mof majuupoe, ²⁷ panarung mofam búrom ñátum di egol yati mulap, ban nafumiil nan mubik. Pankubaj kánkumak kákonak kan iyabumi di Ampaom. ²⁸ Ban panisenool yootey yati waradabaw. ²⁹ Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’

¹ “Ciik letaraay bee di maleekaay yati fujojaf fati Sadis: ‘Kurimak kápurumulomi di akila aakumi Úyegetaw Wátienaaw wati Atijamit wooni futokey di ugabaaw di sootas sooni futokey di sigabaas di kañenool kúridak. “‘Ínje nimammanj burokab booluul, karees ceb jooke kati muyuul bukan karoŋe, bare muyuul wiiŋ. ² Jíyilo! Jiunkulen di kánkumak karinomi jayiinkun di muyuul, leejaat mo pankucet yos. Mati ijukut burokab booluul bajakaab di bújonlenab bati Atijamit. ³ Jiwoolo wan jiliikitenumi di wan jijammi. Jijuum lit man jítiiwoor jikat bálamuk majakutuul. Jíyiloutujaat, pánijawumuluul nan ákuu ban jootut emanj nanan nei neete káloumuul bíp. ⁴ Hani moo babaj bukan kupinaay di muyuul kammi Sadis, kamokentumi wañaw wooliil. Bukoo pambiujawoor di ínje, bakaanoer wañ wafiite, mati koo bukan kayaje mo. ⁵ Ampi aŋoolenumi kánkumak kati Seetaanaay pambiakaano wañ wafiite lec, ban leebi’iyuuy kareesool di búkaay yati eroŋey. Panifel búyegetom man ireg moola di bújonlenab bati Ampaom di simaleekaool. ⁶ Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’ ⁷ “Ciik letaraay bee di maleekaay yati fujojaf fati Filadeefia: ‘Kurimak kápurumul di akila áliroore, ati malegenam, aakumi ékulumaay yati Dauda. Áwambulemi ban aceen letaŋoolen awamben, ban akulemi ban aceen letaŋoolen áwambul. ⁸ “‘Ínje nimammanj burokab booluul. Jíyenten, ínje níwambuluuwambul butumab ban letaŋoolen awambenubo. Nimammanj mati jibabaj kánkumak bare kuyajut, iñeme jisosof furimom faregumi ban jíñooseriit kareesom. ⁹ Jíyenten, panikaan kammi di fukobaf fati Seetaanaay man koone kukila Kúyahuud ban lee mo, bare bukoo kulepooraak. Jíyenten, pániroogeniil di úkamunuul mbi kúlaul mati kamaŋak kúmboom di muyuul kommi. ¹⁰ Mati jisosof furimaf fúmboom di erum fubil di kamuuten, panikaanuul jipak di nanan nati buyinkab bábileuumi bee eyinkey bukanak kati dúniyaay búrom. ¹¹ Ínje oomu níbileul iñemeeñeme, jisof líŋ di wan jookumi, takumbi an abot bacaamab booluul. ¹² Ampi aŋoolenumi, ínje eete ekaanool ésaguma di fukobaf fáñiiaaf fati Atijamit úmboom, létapurer dó. Ban ínje eete eciik kareesak kati Atijamit úmboom di akila, di kareesak kati ésukey yáamakey yati Atijamit úmboom, yan eenomi Yerusalem yunkuley yápurumul di Atijamit úmboom di bukinab bajakaab, di kareesom kunkulak fúkouko. ¹³ Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’ ¹⁴ “Ciik letaraay bee di maleekaay yati fujojaf fati Laodik. Kurimak uke kápurumul di an koonemi Amen, an afiumaay di áyiisenaau alegenau, ácitaau ati wanoosani wan Atijamit atuukumi. ¹⁵ “Ínje nimammanj burokab booluul. Muyuul jijinlenut mba jíboliut. Panifaŋeen man imaŋe jijinleneen mba jíbolieen! ¹⁶ Bare mati muyuul jooju titoor jijinlenut mba jíboliut, ínje eete kápuulenuul di butumom. ¹⁷ Mati joonesoon, ‘Ínje abaja. Ínje nifelofelo, iceeŋut hani wákon!’ Bamanjut mati muyuul bukan kábotenie, kaleke, kápuume, ban sírumpun sítiikaar. ¹⁸ Moo kaane ínje neem di kagamenuul mbi jinoom sáni di ínje yan sambun sikuurene, mambi jibaj fubaj. Jinoom di ínje wañ wafiite man jikaano jífimen kapuñak kati sírumpunuul sítiikaaras takum an ajuk. Jinoom poop bubeebenab bati kúcilak man jiŋoolen jijuk tá. ¹⁹ Kan imaŋumi, koo nimandooremi ban nikuriil. Moo kammi jibaj kuuñ ban di jítiiwoor jikat bálamuk majakutam mooluul. ²⁰ Jíyenten, ínje oome man ijuume di butumab mansi ikongen. Ampi ajammi furimom man áwambulom, paninoken bee di oo man iri di oo, ban poop oo nari di ínje. ²¹ Ampi aŋoolenumi kánkumak kati Seetaanaay, ínje panisenool buruŋ man ulako tákon di ejunkutey yúmboom yati jáyiaj, nan man ínje di fúko’om iŋooleneenuyomi ban nulakomi tákon di Ampaom di ejunkutey yoola yati jáyiaj. ²² Anoosani abajumi uwos újamuma, najam wan Búyegetab Bátienaab bommi di eregey bee di kati kujojak.’” egey bee di kati kujojak.’”

¹ Nan púrutomi, niluenumi fatiya nijukumi, butum báwambuloe di bukinab bajakaab wáay! Furimaf fútiyaaraf fan ijammi man fúsankenulammi nan yiiŋoor nan kábiil, di foonammi, “Jó’ol bee etaat man íyiiseni waatumi kabajoak fáculey.” ² Yaŋ too galab Búyegetab Bátienaab di bookammi. Wáay, nijujuk ejunkut yati jáyiaj man ejuume típ di bukinab bajakaab, man anau alakoe to. ³ Alakomi ejunkutey yati jáyiaj nawuŋen ñiliñil nan bakooba bajooŋoore baanoe nan étuuru di báyeme wúk, funaabaf faanomi di fuŋomenuyomi nan étuuru. ⁴ Sijunkut siceen sati jáyiaj sooni kabanan di sibakiir silakolako siŋomen ejunkutey ekila yati jáyiaj. Di soo kunifaanak kooni kabanan di kubakiir kulakomi. Bakaanoe wañ wafiite ban di kookenumi wompoŋ wati sáni wati jáyiaj di uñeniil. ⁵ Di bajumi kálint kírititi kírititi di ñofen di liboor wij wij, ban káliliŋenoorak kati yentaam roo rípurumul di ejunkutey yati jáyiaj. Di bújonlenab bati ejunkutey yati jáyiaj sífitikenuma futokey di sigabaas, san eenomi Úyegetaw Wátienaaw wati Atijamit futokey di ugabaaw. ⁶ Di bújonlenab booliyo waanoe nan fal fati siweer sátiene, nan éjuudooruma. Di bajumi waroŋe watuukimi wooni ubakiir ubabaj kúcilak fáculey di poop bálamukab bati wo wajuume di báridab di bamayab bati ejunkutey yati jáyiaj. ⁷ Waroŋaaw wo’owu watuukimi útiyaaraw ukankaan nan jimukoor, ugabuntenaw ukankaan nan fúmuuna, úfeegintaw ukankaan nan buul bati an, ban ubakindenaw ukankaan nan bíibi. ⁸ Waroŋaaw watuukimi ubakiiraw, di do’odu dibakiirad daaraara ebabaj ulega wooni futok di kákon, ban ulegaaw wooliwo umemmeeŋ di kúcil barebare síndeneey di téeŋeraay. Fuk di balay síyooloeriit écimey. “Líroor, líroor, líroor, eenoomi Akiiyaolaal Atijamit ati Kánkum, ati noo, ati iñeme, di aatumi bee ebiley!” ⁹ Nanoosani waroŋaaw watuukimi ubakiiraw ulakomi esaley, di kálebienak, di eseney kasalak bee di alakomi di ejunkutey yati jáyiaj joola, aroŋumi bee bándoorey. ¹⁰ Nanan nákonan kunifaanak kooni kabananey di kubakiirak di kulomi kúfima di bújonlenab bati alakomi di ejunkutey yati jáyiaj. Nan man kumiiceelaetumi aroŋumi bee bándoorey, di kuleebumi wompoŋiil wati jáyiaj di fáculey yati ejunkutey yati jáyiaj, di écimey di yóro, ¹¹ “Au núrindiiŋ kamiiceelaet Atijamit Akiiyaolaal, man bukanak kuregi mákalaam mooli, kúlebieni, ban di kusali mati kánkumak kooli, mati au utuukumi wanoosani búrom, ban ñátum di kamaŋak kooli wanoosani utuukituuk ban di ubajo.”

¹ Nijukumi di kañen kúridak kati umu alakomi di ejunkutey yati jáyiaj man aakene kayitak kaciiki fáculey di bálamukab, ban di kunapenimi unapen ñooni futok di ugaba ñátum buraacen. ² Nijukumi maleeka yabajumi kánkum di ecibulo, “Ai ayajumi bee kánapul kayitak kabooñimi uke man áfetul unapenaw wooliko?” ³ Bare bajut hani ákon dóo di bukinab bajakaab, mba baabe di dúniyaay, mba dúniyaay yati tentaamaraay aŋoolene ánapul kayit kabooñimi mba ajiker wammi di ko. ⁴ Di kaanammi búruuren manteer ilikij mati bajut ayaje kánapul kayit kabooñimi mba najiker wammi di ko. ⁵ Ákon di kunifaanak buku naanammi, “Takum úruuren, Jimukoorey yati fiilaf fati Yúda, Fufaaraf fati Dauda, naŋooleŋŋoolen, manteer mbi ánapul kayitak kabooñimi ban unapenaw futokey di ugabaaw wooliko.” ⁶ Nijukumi Jisaha man jijuume titoorey yati ejunkutey yati jáyiaj jaŋomeni di waroŋaaw watuukimi wooni ubakiiraw di kunifaanak. Jisahaaj joo jikankaan nan járaamuleeni. Ban jibabaj usiin futok di ugaba di kúcil futok di kugaba, doo eenomi Úyegetaw Wátienaaw wati Atijamit wooni futokey di ugabaaw, waboñimi bee di dúniyaay búrom. ⁷ Jisahaaj jijaw jiyab kayitak kabooñimi di kañenak kúridak kati umu alakomi di ejunkutey yati jáyiaj. ⁸ Nan ayabumi kayit kabooñimi aban, waroŋaaw watuukimi wooni ubakiiraw di kunifaanak kabananey di kubakiirak di kulo kúfima di bújonlenab bati Jisahaaj. Kunifaanak kabananey di kubakiirak anoosani naakennaaken suusa di mubool mati sáni mameeŋumi tep búsiifetab bati bubaliinab bakooreneimi, ban eenomi kúlawak kati bukanak kati Atijamit. Waroŋaaw watuukimi woo poop moo mákonam. ⁹ Di kúcimmi kácim kunkul man koone, “Au uyaje eyabey kayitak kabooñimi man únapul unapenaw wooliko, mati au núraamuleeniraamul bee kásimen ban ñátum di fúsimi nunoomumi man upaken bukanak bee mati Atijamit kápurumul fiiloofiil di kasankenookasanken di mofoomof. ¹⁰ Nukaaniikaan jáyi di kúsimenaak bee di Atijamit oololaal. ban koote erung baabe di dúniyaay. ¹¹ Ñaa nilaañumi ijiker, ban nijammi kurimak kati simaleeka síwiliwilaas di similimiliyoŋas saŋomenumi ejunkutey yati jáyiaj, ¹² ban soo di bukinab bajakaab sommi di écimey cibulo, “Jisahaaj jan jíraamulumi jírindiiŋ eyab kánkum, fubaj, malinlo, kákalaa, kálebien, mawuŋ di kasal.” ¹³ Nijammi butuuk banoosani di bukinab bajakaab, di baabe di dúniyaay, di dúniyaay yati tentaamaraay, di falaf, di wándomi búrom di aaney, “Kasal, kálebien, mawuŋ, di kákalaa bee bándoorey bee di ammi di ejunkutey yati jáyiaj di bee di Jisahaaj!” ¹⁴ Waroŋaaw watuukimi ubakiiraw di wommi, “Amen!” ban kunifaanak di kulo kúfima man kumiiceelaetujomi.

¹ Ñaa nijukumi Jisahaaj di jínapul bunapen bákon di unapenaw futokey di ugabaaw, ban nijammi wákon di waroŋaaw watuukimi ubakiiraw di wammi furim facibuloe nan kapajaak, “Bil!” ² Nijikerumi nijukumi epiling étumpaay pul. Ateyenaau ooliyo man aakene fuŋaajen, naloopenimi bompoŋ bati jáyiaj. Nateyenuyomi ápur man ajaw nan érimbaan man aŋoolen futiik fanoosani. ³ Nan Jisahaaj jínapulumi bunapenab bugabuntenab, nijammi waroŋaaw watuukimi ugabuntenaw di woonaam, “Bil!” ⁴ Epiling yiceen yáyeme pús di épurul fús. Ateyenaau ooliyo asenimi kánkumak kati kayiten futiik baabe di dúniyaay, man bukanak kubujoor. Nasenimi jilibaaj jabaakaaj. ⁵ Nan Jisahaaj jínapulumi bunapenab búfeegintenab, nijammi waroŋaaw watuukimi úfeegintenaw waanammi, “Bil!” Ban nijukumi epiling yalaene tir. Ateyenaau ooliyo man aakene múyinkuma di kañenool. ⁶ Nijammi wayesoore nan furim kápurumul di titoorey yati waroŋaaw watuukimi ubakiir waane, “Ekilo yákon yati emaanaay panjicaam edenaari yákon, di sikilo sífeegiir sati bálutab panjicaam edenaari yákon bare takum jikajen butum burioe túleey yati úbaar Uwoliiw di wayiney yati Ureseŋ.” ⁷ Ñaa jisahaaj di jilaañ jínapul bunapenab bubakindenab, nijammi furimaf fati waroŋaaw watuukimi ubakindenaw man woonaam, “Bil!” ⁸ Jíyenten, nijukumi epiling éfumpaŋ ban ateyenayo nasenimi kareesak koo eenomi Ecetey, di Esuney di eriibenoomi bálamukool. Sibabaj kánkum kati ebujey bucaab bákon di ucaabaw ubakiiraw wati dúniyaay, ñátum di jiliba jabaake, di bacaar, di kásumut kátipooremi, di sínukuruŋ sákoolenie sati karambaak kati dúniyaay uye. ⁹ Nan Jisahaaj jínapulumi bunapenab butokenab jiban, nijukumi di fátaamaf fati fúsimenaf káraamuleenimi mati káriiŋenak kati furimaf fati Atijamit ban di kurulen ekaan kúyiisena kufiumaay. ¹⁰ Di kucibulomi man koone, “Akiiyaau ati Kánkum, Áliroorumi ban nulegeno. Noonei nuje’e bee kagamen bukanak kati dúniyaay ban nutek kábujolimi?” ¹¹ Ñaa anoosani di bukoo nasenimi kaloaay káamak kafiite púl ban di kújaatikenimi mati kukob jayiinkun, bee nampi kúlirenumi butumab bati kupaaliil kurokaak di kuriibaak kuti’iil kan koote ebuji, nan man kubujeenimi. ¹² Nan Jisahaaj jínapulumi bunapenab futokey di bákonab. Jíyenten, nijukumi di bajumi káliliŋenoor kati yentaamey káamak. Nijukumi bala’ab di bubilumi boono nan furookal falaene tir, fuleeŋaf fubilumi fúyem foono nan fúsim. ¹³ Bootab insi búloul pálalal nan muñiil mati búbaar moom di kayoŋo nan fárusaf funage ñaa fútutut. ¹⁴ Fatiya di éjimmi meej nan kayit kabooñimi. Ban fúlankiin di fúrink fanoofani sípureni di tan silako. ¹⁵ Kúyiak kati dúniyaay, bukanak káamakak, kurungaak kutiikaak, kubajaak, di kabajumi kánkumak, di karinomi búrom, kumiiceel di kakaanutumi kumiiceel, di kuyofomi di úhorahor wati kúlankiin. ¹⁶ Ban di kucibulomi kúlankiinak di kukoobaak, “Jíloul títi di wúli ban di jíyofoli di anau ammi di ejunkutey, ban jíyofoli di kañuumulak kati Jisahaaj. ¹⁷ Mati funakaf fáamakaf fati kañuumulak kooliil fúrindiiŋ. Ai aate kapeeto bee ejuum di bújonlenab bati Atijamit di Jisahaaj?”

¹ Nan mo’omu múpurutomi, nijukumi simaleeka sibakiir yanooyani man ejuume di égoolen yákon yati sígoolenas sibakiiras sati dúniyaay. Soo di silookumi járusey yati sígoolenas sibakiiras sati dúniyaay, takumbi járusey enag di dúniyaay mba di fal mba hani búbaar bákon. ² Nilaañumi ijuk maleeka yiceen man eyitoulo fús ban búrabumemi man yookenulo bunapenab bati Atijamit aroŋaau. Ban di ecibulomi ewonk simaleekaas sibakiiras saseneenimi kánkum kati kakajen yantaamey di falaf. ³ Man yoonso, “Takum jikajen dúniyaay, falaf, mba úbaaraw, bee nampi wúli ukammi fúmanjum di kúriiŋak kati kurokaak kati Atijamit óololi.” ⁴ Nijammi butumab bati kakaanimi kúmanjumak di kúriiŋiil. Koo kooni síwili sooni ceme di bukan kugaba di kubakiir kápurumulomi di kiilak uñeney di kugabaak kati Isirael, ⁵ síwili uñen di sigaba kápurumulomi di fiilaf fati Yúda, síwili uñen di sigaba kápurumulomi di fiilaf fati Ruben, síwili uñen di sigaba kápurumulomi di fiilaf fati Gad, ⁶ síwili uñen di sigaba kápurumulomi di fiilaf fati Aser, síwili uñen di sigaba kápurumulomi di fiilaf fati Nefutali, síwili uñen di sigaba kápurumulomi di fiilaf fati Manase, ⁷ síwili uñen di sigaba kápurumulomi di fiilaf fati Simeon, síwili uñen di sigaba kápurumulomi di fiilaf fati Lewi, síwili uñen di sigaba kápurumulomi di fiilaf fati Yesakar, ⁸ síwili uñen di sigaba kápurumulomi di fiilaf fati Sabulon, síwili uñen di sigaba kápurumulomi di fiilaf fati Esufa, di síwili uñen di sigaba kápurumulomi di fiilaf fati Beniamin, ⁹ Nan mo’omu múpurutomi nijukumi, jameeŋ yati bukan, yan an amanjut buu ere’e, bukoo kápurumulomi di mofoomof, di fiiloofiil, di bukanoobukan, di kasankenookasanken, bajuume kujonlen fáculey yati ejunkutey yati jáyiaj di Jisahaaj. Bukoo man kukaanoe uloaay wafiite púl, anoosani man átuke kóot. ¹⁰ Ban di kucibulo máamak di aaney, “Kapakenak di Atijamit oololaal kúpurumulo alakomi di ejunkutey yati jáyiaj, di poop kúpurumulo di Jisahaaj!” ¹¹ Simaleekaas búrom di sijummi siŋomenumi ejunkutey yati jáyiaj, di kunifaanak, di waroŋaaw watuukimi ubakiiraw. Kunifaanak búrom di kulo kúfima di bújonlenab bati ejunkutey yati jáyiaj man kumiiceelaet Atijamit, moo poop simaleekaas di waroŋaaw watuukimi sikammi. ¹² Di aaney, “Amen! Kasalak, mawuŋam, malinlaam, esaley, kálebienak, kánkumak di kákalaak búrom kooku di Atijamit oololaal bee bándoorey! Amen.” ¹³ Ákon di kunifaanak kukila naceeŋammi, “Buku bukei, kakaanoñaa uloa wafiite púl? Boobei kúpurumulo?” ¹⁴ Ínje neenoomi, “Arungaom, au numammanj.” Naanammi, “Buku koo eenomi kápurumulomi di búyiikab báamakab. Kupopos uloaiil útien púl ñátum di fúsimaf fati Jisahaaj. ¹⁵ Moo kaane di kujummi di fáculey yati ejunkutey yati Atijamit, ninsi kumiiceelaetoomi nan kúsimena fuk di balay di fukobaf fáñiiaaf foola, ban ampi alakomi di ejunkutey yati jáyiaj aate epooyiil di bújonlenool. ¹⁶ Bacaar mba baraan leebusofureriil, bala’ab leebuyahureriil mba ebola yáamak poop letegorureriil. ¹⁷ Mati Jisahaaj jammi di titoorey yati ejunkutey yati jáyiaj, panjikaan amataiil, ban panjirungiil bee di síbula sasenemi eroŋey, ban Atijamit panayuuy jikul janoojani jammi di kúciliil.”

¹ Nan Jisahaaj jinapulomi bunapenab futokey di bugabuntenab, bukinab bajakaab butunoorumi sii wáriiŋe bútingum bati erig yákon. ² Nimbi ijukumi simaleekaas futokey di sigabaas sajuumene di fáculaf fati Atijamit, ban úbiil wooni futok di ugaba usenimi bee di kukila. ³ Maleeka yiceen di ebilumi ejuum di fáculey yati fúsimenaf man yooken múrokuma majoonenimi ñátum sáni. Maleekaay ekila esenisen búsiifetab bati bubaliinab juup bee kanaamoor di kúlawak kati bukanak kati Atijamit, bee esen bee di jirembaj jati sáni tan búsiifetab bati bubaliinab bukooreenimi di bújonlenab bati ejunkutey yati jáyiaj. ⁴ Fakooraf fati búsiifetab bati bubaliinab di siyito’oorumi di kúlawak kati bukanak kati Atijamit bee di Atijamit kápurumul di kañenak kati maleekaay. ⁵ Maleekaay di eŋarumi múyabenumaam ban di emeeŋenumi sambun sati fúsimenaf ban di éleebuusomi bee di dúniyaay. Di bajumi kálint kírititi kírititi di ñofen di liboor wij wij, ban di baj káliliŋenoorak kati yentaam. ⁶ Simaleekaas futokey di sigabaas saakumi úbiilaw futokey di ugabaaw di sijonjoorumi bee elituwo. ⁷ Maleekaay étiyaarey di elitumi kábiilak kooliyo. Di bajumi bataala di sambun sigaasoore di fúsim man síloumumi bee di dúniyaay. Bucaab bákon di ucaabaw úfeegiiraw wati dúniyaay di bureemumi, ban bucaab bákon di ucaabaw úfeegiiraw wati úbaaraw di bureemumi, ban étuuru búrom di ereemumi. ⁸ Maleekaay egabunteney di elitumi kábiilak kooliyo. Di bajumi waaf wakaane nan fúlankiin fáamak di fuyabumi bul sambun, ban fuleebimi bee di falaf. ⁹ Bucaab bákon di ucaabaw úfeegiiraw wati falaf fáamakaf di bubilumi bukaan fúsim, bucaab bákon di ucaabaw úfeegiiraw wati waroŋaaw wati falaf fáamakaf bucetumi, ban bucaab bákon di ucaabaw úfeegiiraw wati usaanaaw di bukañomi. ¹⁰ Maleekaay éfeegintey di elitumi kábiilak kooliyo. Yoot yáamak di eloulomi kápurumul di fatiya, man eyabumi wájajaj nan éfitikenuma. Di elomi di bucaab bákon di ucaabaw úfeegiiraw wati kalak di síbula sati mumelam. ¹¹ Kareesak kati yootey koo eenomi Táli. Bucaab bákon di ucaabaw úfeegiiraw wati mumelam di mubilumi mútali. Bukan kajuupoe di kucetumi di mumelam mukila mati mubibil mútali. ¹² Maleekaay ebakindeney di elit kábiilak kooliyo. Bucaab bákon di ucaabaw úfeegiiraw wati bala’ab di butekimi, ban bucaab bákon di ucaabaw úfeegiiraw wati fuleeŋaf, di wati bootab, búrom wo di úrimen túk. Bucaab bákon di ucaabaw úfeegiiraw wati fukaf di bala’ab di rímen túk poop. ¹³ Nimbi iluenumi, ban nijammi bíibi fatiya di éyit di elok máamak yoone, “Búyiik, búyiik, búyiik bee di kacinumi baabe di dúniyaay uye. Mati simaleekaas siceenas sífeegiiras sajonjooruñaa bee elitey úbiilaw wooliso!”

¹ Maleekaay etokeney di elitumi kábiilak kooliyo. Nijukumi yoot yaloulomi fatiya bee di dúniyaay. Esenisen ékulumaay yati busunab básankimi babajutumi tan búkabe. ² Yootey di ékululumi busunab bukila, fakooraf ninsi fúpurumul dó rím bututut nan fúur fáamak. Bala’ab di járusey sírimen túk. ³ Fábangund fajuupoe di fúpurumul di fakooraf fúfimenumi dúniyaay. Di fusenimi kánkum kan sire’e di kánkumak kati balankuurab bati dúniyaay. ⁴ Fújaatikenimi takum fukajen étuureey, úbaaraw mba muliila muceen. Bare mbi fuŋoolen fukajen bukan kabajutumi fúmanjumaf fati Atijamit di kúriiŋiil. ⁵ Fábangundaf fusenimi kánkum man fúsuutukeniil kuleeŋ futok babujutiil. Ban jariey yati kásuutukenak sirere di jariey yati katafak kati elankuur di an. ⁶ Di kuleeŋ kukila bukanak pankuñes ecetey bare leekuŋoolen kubajuyo. Pankuraano man kucet bare ecetey paneteyiil. ⁷ Fábangundaf fukila funokoonokoor nan sipiling sajonjoore bee ejaw futiik. Di kúkaak koolifo baloopene waanoe nan wompoŋ wati jáyiaj wati sáni, ban wuulaw woolifo ukankaan nan wuul wati bukan. ⁸ Walaw woolifo ukankaan nan wal wati kuseek, ban úñiiŋaw woolifo ukankaan nan wati simukoor. ⁹ Úsusaw woolifo ubabaj uwel nan múkaruma mati mulap. Kayelak kati ulegaaw woolifo nan kálint kati sisareet sati sipiling sajuupoe sammi di ejaay futiik. ¹⁰ Foo fubabaj kúloj katafemi nan balankuur, ban di kúlojak kooliko kubabaj kánkumak kati kásuutukenak káriiŋe muleeŋam futok. ¹¹ Foo fubabaj áyi arungumi fo, an eenoomi maleekaay yaakumi busunab básankimi babajutumi tan búkabe. Kareesak kooliyo di kasankenak kati Kúhiburak kooneyo Abadon di kasankenak kati Kúgirikak kooneyo Apolon. ¹² Búyiikab butooŋandab buwuwuuj buban, man rinomi úyiik ugaba waate ebil. ¹³ Maleekaay etokeney di yákoney di elitumi kábiilak kooliyo. Nijammi furim fasankenulo di wahaw unokoorumi nan usiinaw ubakiiraw wati di sígoolenas sibakiiras sati jirembaj jati sáni tan búsiifetab bati bubaliinab bukooreenimi di bújonlenab bati Atijamit. ¹⁴ Furimaf fusankenumi bee di maleekaay etokeney di yákoney di foonuyomi, “Jikaten simaleekaas sibakiiras sakokimi di falaf fáamakaf fati Efurate.” ¹⁵ Ñaa simaleekaas sibakiiras sikatenikaten, sakokeenimi sammi man sijonjooreenimi bee mati di erig uye, funakaf ufe, fuleeŋaf ufe, emitey uye man sibuj bucaab bákon di ucaabaw úfeegiiraw wati bukanak búrom baabe di dúniyaay. ¹⁶ Man ijammi eeno, wuwuuj similiyoŋ siceme sigaba sati sipilingas sitiikaas. ¹⁷ Mo’ome moo nijukumi eeno sipilingas di waaf nan sáautas súmboom. Kuteyenaak kooliso kukaanokaano múkarumaam mati úsusaw máyeme nan sambun, di mabulore, di majiilaete. Kúkaak kati sipilingas koonokoono nan kúkaak kati simukooras. Di utumaw wooliso dihi sípurenul sambun, fakoor, di godoroŋ. ¹⁸ Bucaab bákon bati ucaabaw úfeegiir wati bukanak di bubujimi ñátum di úyiik úfeegiir nan sambunas, fakooraf, di godoroŋey. ¹⁹ Mati kánkumak kati sípilingaas kooku di utumaw wooliso di kúlojak kooliso. Kúlojak kooliso koonokoono nan siyela sabaje kúkaak kabajumi kánkumak man kúsuutukenumi bukanak. ²⁰ Karinobomi, kabujutimi ñátum di úyiikaw uwu, hani moo di kulatumi kátiiwoorak kukat bálamuk di majakutiil. Di kurulenumi kamiiceelaetak kati úgun di sínaati sajoonenimi ñátum di sáni, di gódifori, di mulap máyeme, di kúlankiin di poop ubabar, san umanjumi síjukeriit, síjameriit, mba di sijaw. ²¹ Kútiiwoorut kukat bálamuk majakutam man kukammi nan jabujaj, mukaana mati fáliimaetaf, káraadiak mba jákuutaj.

¹ Nilaañumi ijuk maleeka yiceen yati kánkum káamak di éwaloul di bukinab bajakaab. Furola fuguubeneyo, ban funaabaf foom di fúkaaf fooliyo, buuluyo nan bala’ab, ban úkamunuyo nan sísaguma sati sambun. ² Man yooke jayit jáfetuli di kañenuyo. Kákamunuyo kúridak kooku man ejuumene di falaf fáamakaf, kaaku téeŋey, ³ ban di ewonkumi cibulo nan búciiŋit bati jimukoor. Nan ecibulomi upajaaw futokey di ugabaaw di uyabumi man úlint. ⁴ Nan upajaaw futokey di ugabaaw uyabumi uban, nan ilakomi bee eciikey ceb, bare nijammi furim kápurumul di bukinab bajakaab man foone, “Sof butumi takum ureg an wan upajaaw futokey di ugabaaw uregimi, ban takum poop uciikuwo.” ⁵ Maleekaay yan ijukumi bajuumerab di falaf fáamakaf di téeŋey, di etebenumi kañenuyo kúridak bee fatiya. ⁶ Ban ebaat kabaat di kareesak kati Atijamit, aroŋumi bee bándoorey, atuukumi dúniyaay, di bukinab bajakaab, di falaf fáamakaf, wanoosani wándomi búrom. Maleekaay yoone, “Waaf úje’eriit bee ekobi! ⁷ Bare nampi maleekaay etokeney di egabunteney elitumi kábiilak kooliyo, wayofoaaw wan Atijamit asofeenumi di búyegetool pánuliroor, nan man áligeenumi kurokaool kan eenomi kuboñaak. ⁸ Ñaa furimaf fan ijameenumi kápurumul di bukinab bajakaab di fulaañ fusankenom foone, “Jaw, yab jayitaj jáfetulimi di kañenak kati maleekaay yammi bajuumene kákamun kaaku di falaf, kaaku téeŋey.” ⁹ Nijajaw bee di maleekaay man ireguyomi esenom jayitaj jabooñimi. Yoo di yoonammi, “Yab utokoñ pántali di fari, bare di butumi pánsuum nan múkum.” ¹⁰ Niyabumi jayitaj jabooñimi di kañenak kati maleekaay itokoñ. Di súmmi nan múkum di butumom, bare nan imerumi di bilumi táli di farom. ¹¹ Ban nijammi mo’ome, “Noote káriiŋen inki kamanjen mati wábileuumi bee di bukan kajuupoe, di mof majuupoe, di usanken wajuupoe, di kúyi kajuupoe.”

¹ Niyabumi egol éliikuma, ban di koonammi, “Yito man ujaw uliik fukobaf fáñiiaaf fati Atijamit di fúsimenaf, ban nupin bukanak kándomi kamiiceelaetumi dó. ² Bare takum uliik fankaf fammi téeŋeraay yati fukobaf fáñiiaaf, mati fusenisen bee di kamanjutumi Atijamit. Pankutampoor ésukey yáamakey yálirooraay wáriiŋe muleeŋ bukan kugaba di mugaba. ³ Pániboñul kúyiisenaom kugabaak, kakaanoe wañaw wati kurookal man kumanjen di kánkum wáriiŋe kunak éwili yákon di siceme sigaba di bukan kúfeegiir.” ⁴ Buku kúyiisenaom kugabaak eenomi úbaaraw Uwoliiwaw ugabaaw di újuumenumaaw wati síwuŋenumaas sigabaas woo ujuumeimi di bújonlenab bati Akiiyaau ati dúniyaay búrom. ⁵ Ampi ágaloore bee kábukeniil, sambunas sípureupur di utumaw wooliil man simer kulatooriil. Mo’ome moo ampi ágaloore bee kábukeniil aate ecet. ⁶ Kubabaj kánkum kati man kuwamben fatiya, takumbi emitey elub káfiren kalubak di kunakak kati kamanjenak. Kubabaj kánkum kati káruŋul mumelam mulaañ fúsim, ban di kubaj kánkum kati éŋarul kásumut kanoosani nanoosani nan súumiimi. ⁷ Nan kubanumi káyiisenak kooliil, énukuruŋey yákooleniaay yaatumi épuruley di busunab básankimi babajutumi tan búkabe pambieŋooleniil ban di ebujiil. ⁸ Ban wiiŋiil pánwoomi bafintoe di buruŋab bati ésukey yáamakey, ésukey ekila karees kúgunenuma kan koonemi Sodom mba Misira, ésukey yan Akiiyaiil afaaŋeneenimi di ébaarey yati búpinab. ⁹ Wáriiŋe kunak kúfeegiir di bútingum, bukanak búrom, fiiloofiil, kasankenookasanken, ban mofoomof koote ebil kujuum man kujiker wiiŋiil. An letabaj buruŋ man afokiil. ¹⁰ Bukanak kati dúniyaay pánsuumiil mati ecetey yati buku kugabaak. Pankukaan karuukenak, ban di kukaan káaning man kusenoor muwula, mati kuboñaak kugabaak kalakoeenumi kásuutukeniil. ¹¹ Bare kunak kúfeegiir di bútingum nan kubanumi, fuyiif fasenemi eroŋey fápurumulomi di Atijamit man funokeniil, ban di kuyitomi kujuum jaj. Ban anoosani ajukiimi yaaley yoola di ejisumi cúj. ¹² Ñaa kuboñaak kugabaak di kujammi furim facibuloe fápurumulo di bukinab bajakaab man foone, “Jíremboorul taate!” Di fáculaf fati kulatooriil, di kuremboorumi bee di bukinab bajakaab di furola. ¹³ No’onu di bajumi káliliŋenoor kati yentaamey káamak, bucaab bákon di ucaabaw uñeney wati ésukey yáamakey di bulomi wúp bukaño. Bukanak kooni síwili futok di sigaba di kucetumi di káliliŋenoorak kati yentaamey. Kapakumi saalas sooliil di sijisumi máamak ban di kusal wan úyegetiil ufelumi mati mákalaam mati Atijamit ati bukinab bajakaab. ¹⁴ Búyiikab bugabuntenab buwuwuuj. Jíyenten, búyiikab búfeegintenab bábileuumi iñemeeñeme. ¹⁵ Maleekaay etokeney di egabunteney di elitumi kábiilak kooliyo. Di bajumi furim fateboe di bukinab bajakaab, man foone, “Jáyiaj jati dúniyaay jibilumi jikaan jáyiaj jati Akiiyaolaal di jati Apakenaau Áamakau oola, ban naate erung bee bándoorey.” ¹⁶ Ban kunifaanak kabananey di kubakiirak, kalakoemi di sijunkutiil sati jáyiaj di bújonlenab bati Atijamit di kulomi kúfima kuyahumi wuuliil tentaam man kumiiceelaetumi Atijamit, ¹⁷ di aaney, “Wúli kooku bo esali, Akiiyaau Atijamit ati Kánkum, ati iñeme di ati noo, mati nuŋaŋŋar kánkumi káamakak ban nutontooŋ bee erung. ¹⁸ Bukanak kamanjutumi Atijamit kuñuumuñuumul di au, bare iñeme nanan nooli nati kañuumulak níriiŋuloriiŋ, nanan nati kagamenak kacetumi di nati ecaamey kurokai. Panucaam kuboñai di bukani, ban kákolimi kareesi, añiil anifaan, ban panukajen kukajenaak kati dúniyaay. ¹⁹ Ñaa fukobaf fáñiiaaf fati Atijamit fammi di bukinab bajakaab di fúwambulimi, ban jiceesaj jati kasofoorak dóo di fukobaf fáñiiaaf foola. Di bajumi kálint kírititi kírititi di ñofen di liboor wij wij, ban káliliŋenoor kati yentaam, di bataala báamak di búloumumi.

¹ Ínje nijujuk fúmanjum fáamak farajulomi di fatiya, aseek agaayoore bala’ab ban najummi di fuleeŋaf. Naloopimi bompoŋ babajumi soot uñen di sigaba. ² Man aakene búrooko, ban nacibulomi fatiya di jariey nan alakomi kawalen búrooko. ³ Fúmanjum fuceen furajulomi di fatiya. Jíyenten, eyela yajuudiitimi yáamak yáyeme, yati kúkaak futok di kugaba di usiin uñen, di fúkaaf fooliyo fanoofani baloopene bompoŋ bati jáyi. ⁴ Fúlojaf fooliyo di fuñakumi bucaab bákon di ucaabaw úfeegiiraw wati bootab bammi di kátula, ebetulomi bee di dúniyaay. Eyelaay yajuudiitimi di ejuum di fáculey yati aseekau oo aje’emi bee ebaj añiilau, mambi emer jiñiilaj joo di ewoliey tac. ⁵ Aseekau nabilumi aroŋ jiñiil jíniine jaatumi bee erung mofam búrom mati dúniyaay ñátum egol yati mulap. Bare jiñiilaj joola di jiyalenimi fak di jíjeetumimi bee di Atijamit di ejunkutey yoola yati jáyiaj. ⁶ Aseekau nateyumi bee di baŋaanab, tan Atijamit ajonjoorumi bee mati akila, tan aatumi kacookooriak wáriiŋe kunak éwili yákon di siceme sigaba di bukan kúfeegiir. ⁷ Di bajumi futiik dóo di bukinab bajakaab. Mikael oo di simaleekaool di sitiikenumi eyelaay yajuudiitimi, yoo di simaleekaas sooliyo di sigalenumi. ⁸ Bare eyelaay yajuudiitimi di eŋoolenimi di futiik fukila, yoo di simaleekaas sooliyo búrom sicesoorimi sípur jáng di bukinab bajakaab. ⁹ Eyelaay yajuudiitimi di ébetulimi tentaamey, yoo eenomi eyelaay yáamakey yati naaniŋ yawonkeimi, Bágun di poop Seetaanaay, yabuntemi dúniyaay, yaleebimi bee di dúniyaay di simaleekaas sooliyo. ¹⁰ Nijanjam furimaf facibuloe di bukinab bajakaab man foone, “Iñeme kapakenak kati Atijamit kúriiŋuloriiŋ! Atijamit náyiisenyiisen kánkumool nan Áyi. Apakenaool náyiisenyiisen fujuumool! Mati Seetaanaay yakammi ataakenaau ati bukanolaal di fáculey yati Atijamit fuk di balay, iñeme ébetulibet. ¹¹ Bukanolaal kuŋoolenuyomi mati fúsimaf fati Jisahaaj di mati káyiisenak kooliil, ban kúkoliut ecetey. ¹² Jimaayoor, wóoy bukinab bajakaab! Muyuul búrom kácindomi, jimaayoor! Bare búyiikab bulako di dúniyaay di falaf fáamakaf, mati Seetaanay ébetulibet bee di dúniyaay! Emammanj mati nanan nooliyo níloiut ban eñuumuñuumul máamak.” ¹³ Nan eyelaay yajuudiitimi ejukumi mati ébetulibet bee baabe di dúniyaay, di esofumi kacesoorak kati aseekau aroŋumi jiñiilaj jíniinaaj. ¹⁴ Bare aseekau nasenimi ulegaaw ugaba wati bíibiey yáamakey manteer mbi aŋoolen áyit apak di eyelaay yajuudiitimi uyu bee di baŋaanab, tan tikila naate kacookoori wáriiŋe simit sífeegiir di bútingum, takum yoo ébukenool. ¹⁵ Eyelaay yajuudiitimi épuulenumi mumelam nan fal mambi mújeetumool taac. ¹⁶ Bare yentaamey di erambenumi aseekau ume. Yoo di ejisomi wáj man emer mumelam mati falaf ufu búrom mápurulomi di eyelaay yajuudiitimi. ¹⁷ Eyelaay yajuudiitimi di efuuñetumi di aseekau, man elaañumi bee katiiken kuñoolool, kasofumi kájaatikenak kati Atijamit ban di kukaan kúyiisenaak kati Yensa. ¹⁸ Eyelaay ekila di ejummi ekoben di kásikak.

¹ Ínje nijukumi waaf nan sáaut énukuruŋ yákoolenie man épurulomi fús di falaf fáamakaf. Man yooke kúkaak futok di kugaba, di usiin wooni uñen, di wompoŋ wooni uñen wati jáyiaj waloopimi di usiinaw wooliyo, ban di fúkaaf fanoosani ciikiciik karees káñiie mati Atijamit. ² Énukuruŋey ekila yan ijukumi yoonoyoono nan esaama, bare úkamunuyo woonowoono nápaj nan wati tímba, butumuyo boonoboono nan bati jimukoor. Eyelaay yajuudiitimi di esenumi kánkumak kooliyo, di ejunkutey yooliyo yati jáyiaj, di fujuumaf fooliyo bee di énukuruŋey ekila. ³ Fúko fákon fati kúkaak kooliyo fubabaj musont mampi maŋoolen mubujuyo, bare iñeme di mukoyumi. Kati dúniyaay búrom di wáaloiimi man kuriibenuyomi. ⁴ Bukanak di kumiiceelaetumi eyelaay yajuudiitimi, mati man esenumi énukuruŋey uyu fujuumaf fooliyo. Bukanak kulaañumi kumiiceelaet énukuruŋey poop, eceeŋey di yóro mati, “Ai anokoore nan énukuruŋey uye? Ai aŋoolene atiikenuyo?” ⁵ Énukuruŋey uyu esenisen buruŋ man esanken máamak kurim káñiie máamak mati Atijamit. Esenisen buruŋ di fujuum wanoosani wan emaŋumi bee ekaaney wáriiŋe muleeŋ mooni bukan kugaba di mugaba. ⁶ Di etooŋumi kásaabul man esanken kurim káñiie máamak mati Atijamit, di kareesak kooliyo, di ban acinumi, di kácindomi búrom di bukinab bajakaab. ⁷ Esenisen kánkum kati katiiken bukanak kati Atijamit ban di eŋooleniil. Di esenimi buruŋ bee di fiiloofiil, bukanoobukan, kasankenookasanken di mofoomof. ⁸ Bukanak búrom kacinumi di dúniyaay uye pankumiiceelaet énukuruŋey ekila, buku búrom kan ureesiil uciikutimi di búkaay yati eroŋey yati Jisahaaj járaamulimi bala’a butuukab bati dúniyaay.” ⁹ Anoosani abajumi uwos újamuma, najam! ¹⁰ Ampi Atijamit ammi panasofi oo panasofi, koo koote esofi kújeetummi. Ampi Atijamit ammi panabuji di jilibaaj jabakaaj oo panabuji di jo Mo’omu eenomi bukanak kati Atijamit koote kamuuten di ekaan bukan kufiumaay. ¹¹ Nijukumi énukuruŋ yiceen man épurulo fús di tentaamey. Ebabaj usiin ugaba waanoe nan wati jisaha bare di esankenumi nan eyela yajuudiitimi. ¹² Di eŋarumi fujuumaf fati énukuruŋey yátiyaaraay di bújonlenab booliyo, ban di éjaatikenumi bukanak kati dúniyaay man kumiiceelaet énukuruŋey étiyaaraay, yan musontam mooliyo mukoyeenimi. ¹³ Énukuruŋey egabunteney ekammi wajamurerutimi wajuupoe, di ekaanumi biyok sambun síwaloul fatiya bee di dúniyaay di fáculey yati bukanak búrom. ¹⁴ Énukuruŋey egabunteney di ebuntumi bukanak kati dúniyaay búrom ñátum di ekaaney yati wajamurerutimi di fáculey yati énukuruŋey étiyaaraay. Emingenumi bukanak kati dúniyaay man kujoonen ebaŋoot siyesoor di énukuruŋey étiyaaraay yábukeneenimi ñátum di jilibaaj bare ecetut. ¹⁵ Énukuruŋey egabunteney esenisen buruŋ man éfuuten fuyiif bee di ebaŋootey yati énukuruŋey étiyaaraay man eŋoolen esanken. Ebaŋootey di eregumi ampi alatumi bee amiiceelaetumi oo naate ebuji. ¹⁶ Énukuruŋey ekila emingenumi bukanak búrom, añiil anifaan, kabajumi di kabajutumi, kumiiceel di kakaanutumi kumiiceel, man kubaj fúmanjum di uñeniil úridaw mba di kúriiŋiil. ¹⁷ Takumbi an aŋoolen anoom mba anoomen leejaat nababaj fúmanjumaf fati énukuruŋey yo’oyu, kareesak ko’oku mba eciikey epinaay. ¹⁸ Mambi an álaul mo’ome cenceeŋ ebaj malinlo. Ampi abajumi kálaulak naate kálaul wan eciikey epinaay efelumi yati énukuruŋey ekila, mati epinaay éyiisenyiisen kareesak kati an. Koo eenomi siceme futok di yákon bukan kúfeegiir di futok di yákon bee mati an (666).

¹ Nijukumi jisahaaj bajuume fatiyaay yati fúlankiinaf fati Sion! Joo di bukan kooni síwili ceme di bukan kugaba di kubakiir kabajumi kareesak koolijo di kati Ampaijo baciike di kúriiŋak kooliil. ² Nijammi kayel kápurumulo di bukinab bajakaab kaanoe nan kasuuŋut kati mumel falaf fáamakaf di poop nan emitey elakoe eyah upaja pajajaj pajajaj di eñofen. Inki poop nijammi kayel kanaame nan bukan kulakoe enag sisuusaiil. ³ Di kúcimmi kácim kunkul di bújonlenab bati ejunkutey yati jáyiaj, di waroŋaaw watuukimi ubakiiraw, di kunifaanak. Bajut an aŋoolenumi ácim kácimak uku leejaat buku síwil cemaay di bukan kugaba di kubakiir kapakenimi di dúniyaay. ⁴ Kúniinaak buku kúkaaneriit kanaare’etak, mati kumanjut kuseek. Di kuriibenumi Jisahaaj banoosani jije’e. Bukanak buku kupakenipaken di bukanak kati dúniyaay búrom nan búsimen búbuto bee di Atijamit di poop bee di Jisahaaj. ⁵ An amanjutiil di kagaajoor ban poop tan mokene di kukila. ⁶ Nilaañumi ijuk maleeka yiceen man yoom di éyit fatiyaay, man yooke furimaf fajakaaf bee karegen bukanak búrom kati dúniyaay uye, bee di mofoomof, fiiloofiil, kasankenookasanken, di bukanoobukan. ⁷ Di ecibulomi man yommi, “Jílebien Atijamit ban di jisal mákalaam moola! Mati nanan nati kagamenak koola nírindiiŋ. Jíkuntaajen man jimiiceelaetool atuukumi fatiya di tentaam, falaf fáamakaf di síbula sati mumelam.” ⁸ Maleeka yiceen egabunten di ériibenul, man yoone, “Elolo! Elolo Babilon yákalaami elolo! Ésukey ekila ekankaan man mofam búrom kúkali di bunuk bati kayenetak koola.” ⁹ Maleeka yiceen éfeeginten yoo poop di eriibenumi sítiyaaras, di ecibulo man yoone, “Ampi amiiceelaetumi énukuruŋey yákooleniaay di ebaŋootey ekila, ban nabaj fúmanjumaf fooliyo di fúriiŋool mba di kañenool, ¹⁰ an akila aate eraan wayiney yati kañuumulak kati Atijamit. Pánasuutukenumi sambunas di godoroŋ di bújonlenab bati simaleekaas sálirooraas di Jisahaaj. ¹¹ Fakooraf fati sambunas sásuutukeniimi fuyitoyito bee bándoorey. Kúyooloeriit fuk di balay, mati man kumiiceelaetumi énukuruŋey yákooleniaay di ebaŋootey yooliyo, ban di kubaj fúmanjumaf fati kareesuyo.” ¹² Mbi ure líŋen bukanak kati Atijamit man kumuuten kásuutukenak ban di kujuum líŋ, kasofumi kájaatikenak kati Atijamit ban kabajumi kafium di Yensa. ¹³ Nijammi furim kápurumul di bukinab bajakaab man foone, “Ciik ure. Kaatumi enen síñunduiil káŋarum iñeme di burokab bati Atijamit, jakiijak!” “Éey malegen!” Búyegetab Bátienaab di buyiiŋumi. “Pankubaj kayoolo kásuume kápurumul di burokab booliil barioaab, mati bacaamab bati burokab booliil pankujawoor.” ¹⁴ Nilaañ ijuk di bajumi furola fafiite, an ayesoore nan añiil ániine ati anau di fo, man aloopeni bompoŋ bati jáyiaj di fúkaaf foola, di poop naakene éjituma yayabe serere di kañenool. ¹⁵ Maleeka yiceen di épurumul di fukobaf fáñiiaaf, mansi ewonk cibulo bee di umu ammi balakoe di furolaaf, “Ŋar éjitumai man ujit, mati nanan nati kajit nírindiiŋ. Mati kúwaagenak kúrindiiŋ ñaj baabe di dúniyaay.” ¹⁶ Ñaa umu ammi balakoerab di furolaaf nasofumi éjitumaool man ajit dúniyaay búrom, dúniyaay búrom di ejitimi nan mulukiin. ¹⁷ Maleeka yiceen di épurumul di fukobaf fáñiiaaf di bukinab bajakaab, ban yoo poop man yookene éjituma yayabe serere. ¹⁸ Maleeka yiceen yaakenumi fujuumaf fati sambunas, di épurumulomi di fúsimenaf. Di maleekaay uyu di ewonkumi ecibulo aakenumi éjitumaay yayabaay serere, “Ŋar éjitumai man ujit, fútukusaf fati kureseŋak kati dúniyaay mati kaasaal.” ¹⁹ Ñaa maleekaay di eŋarulomi éjitumaay man égaawul dúniyaay ban di ejit ejojenuko búrom, ban di éleebukoromi fuñaafenaf fáamakaf fati kañuumulak kati Atijamit. ²⁰ Di kureseŋak kutobojimi kunaluj di fuñaafenaf fammi di téeŋey yati ésukey yáamakey, fúsim futeyulo di fuñaafenaf wáriiŋe síkilomeetar siceme sífeegiir kabaakak, kásankiak koolibo símeetar sigaba.

¹ Nijukumi fúmanjum fuceen fáamak di fatiya, foo fúkalaakalaa ban fúrindiiŋ síwoonoor. Di bajumi simaleeka sooni futok di sigaba saaken úsumut wooni futok di ugaba, wan eenomi úlamukaw. Mati woo eenomi fúmanjumaf fúlamukaaf fati Atijamit. ² Nijukumi waanomi nan fal fati siweer sátiene sanaamoore di sambun. Ñaa buku kaŋoolenumi énukuruŋey yákooleniaay, di ebaŋootey yooliyo, di eciikey epinaay yati kareesak kooliyo, man kujuume kupano di falaf fati siweer man kookene sisuusaas sati Atijamit. ³ Man kulakoeene écim kácimak kati Muusa, arokaau ati Atijamit, di kácimak kati Jisahaaj, “Wóoy au Akiiyaau Atijamit ati Kánkum! Mukaanai múkalaakalaa ban múrindiiŋ síwoonoor máamak, Wóoy au, Áyi ati bándoorey! wanoosani wan ukaanemi ujonjoon ban di ulegeno. ⁴ Wóoy Akiiyaau, ai aatut kákoli ban nálebien kareesak kooli? Mati au ceb úliroorumi. Mofam búrom moote ebil man mumiiceelaeti, mati mukaanai majoonaam múyiiseniyiisen.” ⁵ Mo’omu múpurutomi, nilaañumi ijuk fukobaf fáñiiaaf fammi di bukinab bajakaab, foo eenomi Éguutey Yálirooraay yati Atijamit, man fúwambuloe! ⁶ Simaleekaas sooni futokey di sigabaas saakumi úyiikaw wooni futokey di ugabaaw sípurulomi di fukobaf fáñiiaaf fukila. Bakaanoerab wañ wafiite nañ ban di sikaren úsususo úmarufa wati sáni. ⁷ Ñaa wákon di waroŋaaw watuukimi ubakiiraw di usenumi simaleekaas futokey di sigabaas sibiin sati sáni sooni futok di sigaba sameeŋe di kañuumulak kati Atijamit, aroŋumi bee bándoorey. ⁸ Fukobaf fáñiiaaf di fúrimi túk di fakooraf kápurumul di mawuŋam mati Atijamit di kápurumul di mákalaam moola. An aŋoolenut anoken di fukobaf fáñiiaaf bee nan úyiikaw wooni futokey di ugabaaw wati simaleekaas sooni futokey di sigabaas uwuujumi.

¹ Nijammi furim facibuloe dóo di fukobaf fáñiiaaf man foone simaleekaas sooni futokey di sigabaas, “Jijaw bee di dúniyaay man jíyu sibiinas sooni futokey di sigabaas sati kañuumulak kati Atijamit.” ² Ñaa maleekaay étiyaarey di ejawumi éyu ebiiney yooliyo di dúniyaay. Musonta majakut mákoolenie di múpurulomi di bukanak kaakumi fúmanjumaf fati énukuruŋey yákooleniaay ekila ban di kumiiceelaetumi ebaŋootey yooliyo. ³ Maleekaay egabunteney di éyumi ebiiney yooliyo di falaf fáamakaf. Mumelam di mulaañoorumi nan fúsimaf fati an acete, ban wanoosani waroŋumi dó, di ucetumi. ⁴ Maleekaay éfeeginteney di éyumi ebiiney yooliyo di kalak di síbulaas sati mumelam, ban di mulaañoorumi fúsim. ⁵ Nijammi maleekaay yati mumelam man yoone, “Nujonjoon di kagamenak uke kooli, au, Atijamit Álirooraau, ati iñeme di ati noo! ⁶ Mati buku kúyuyu fúsimaf fati bukani di fati kuboñai, ban nuseniimi fúsimaf man kuraan, ban poop koo karaanaiil.” ⁷ Nijammi furimaf fúpurumulomi di fúsimenaf man foone, “Akiiyaau Atijamit ati Kánkum! Kagamenak kooli kulegenolegeno ban kujonjoon.” ⁸ Maleekaay ebakindeney yoo di éyumi ebiiney yooliyo di bala’ab, ban di busenimi buŋar man bubol bukanak nan sambun. ⁹ Ebolaay yáamakey di eboliimi, biyok kunum kareesak kati Atijamit, aakumi kánkum kati úyiikaw uwu. Bare kumaŋut kútiiwoor kukat bálamuk majakutam mooliil ban di kusal mati mákalaam moola. ¹⁰ Maleekaay etokeney di éyumi ebiiney yooliyo di ejunkutey yati énukuruŋey yákooleniaay, ban jáyiaj jooliyo di jírimenumi túk. Kati jáyiaj jooliyo di kutooŋ erumey kubilak kooliil, ¹¹ ban di kunummi Atijamit ati bukinab bajakaab mati jári’iil di musontaiil, ban kumaŋut kátiiwoor kukat bálamuk majakutiil. ¹² Maleekaay etokeney di yákoney yoo di éyumi ebiiney yooliyo di falaf fati Efurate. Nan kammomi mumelam mati falaf di muyondumi rat, bee kajoonen buruŋ bati kúyiak kápurumul di ban bala’ab búrabumemi. ¹³ Nilaañumi ijuk úgun wooni úfeegiir wasikoe waanoe nan sifool. Woo di épurul di butumab bati eyelaay yajuudiitimi, di bati énukuruŋey yákooleniaay, di bati aboñaau abuntaau. ¹⁴ Mati uwu ukankaan nan úgun, wakaanemi wajamurerutimi. Úgunaw uwe úfeegiiraw woo uje’emi bee di kúyiak kati dúniyaay búrom ujojeniil tákon bee mati futiikaf di funakaf fáamak fati Atijamit ati Kánkum. ¹⁵ (”Jíyenten, ínje oomu di éjawuley nan ákuu! Anau ámooriutumi ban nakaanomi wañaw woola jakoojak, manteer takumbi alako búliŋet man apuño di bukanak!”) ¹⁶ Úgunaw ujojenumi kúyiak tákon, tanat tan koonemi Amagedon di kasankenak kati Kúhiburak ¹⁷ Maleekaay etokeney di egabunteney yoo di éyumi ebiiney yooliyo di járusey. Ñaa dóo di fukobaf fáñiiaaf nijammi furim facibuloe kápurumul di ejunkutey yati jáyiaj man foone, “Kaanikaan ban!” ¹⁸ Di bajumi kálint kírititi kírititi di ñofen di liboor wij wij. Káliliŋenoorak kati yentaam kabajorerut kabiñoo di fúcitumaf nan anau atobojumi tentaam. Malegen káliliŋenoorak uke kati yentaamey kufaŋ man kújakaatie wuuj kati noo. ¹⁹ Ésukey yáamakey yati Babilon yákalaami di ejisomi upan úfeegiir, sísukas sáamakas sati mofam búrom mati dúniyaay di silo. Atijamit nawoolomi ésukey yáamakey yati Babilon yákalaami ban nakaanuyomi man eraan kápurumul di éraanumaay yoola yameeŋenimi di kañuumulak koola. ²⁰ Fúrink fanoosani di fújim meej, hani fúlankiin fateboe leefuŋoolen fujuki. ²¹ Di bajumi kalub kati bataala báamak, ban kálebiak kooliko kúriiŋe síkilo bukan kugaba di uñen, búloumumi títi bukanak kanumimi Atijamit mati búyiikab bati bataalaab ube, mati búyiik bákoolenie máamak.

¹ Maleeka yákon di simaleekaas sooni futokey di sigabaas saakumi sibiinas sooni futokey di sigabaas di ebilumi bee di ínje man yoonomi, “Bil, pániyiiseni kagamenak kati aseekau ayenetaau áamakau ammi balakoe di kalak kajuupoe. ² Kúyi kati dúniyaay kakaanemi kaseeketak di aseekau ume, bukanak kati dúniyaay uye di kubilumi kúkali ñátum di eraaney yati wayiney yakammi búlaputab bati kúraadiaak koola. ³ Búyegetab Bátienaab bati Atijamit di bookomi, man maleekaay di eŋarammi bee di baŋaan. Boo nitookumi aseek man alakomi di bálamukab bati énukuruŋ yákoolenie yáyeme. Di eniiley yooliyo baciike urees wáñiie mati Atijamit. Énukuruŋ ebabaj kúkaak futok di kugaba di usiin wooni uñen. ⁴ Aseekau wañaw wan akaanomi wakaayene éyem di wáyeme wúk, ban múkarenuma mati sáni, di simaal sapincoe, di mukaan wij wij di eniilool. Éraanumaay yati sáni naake man emeeŋe fuc di wajakutaw di majiteniaam mati kúraadiaak koola. ⁵ Di fúriiŋool baciike karees wan kufelumi wayofoe, “Babilon yákalaami, iñaayaau ati kuyenetaak di kúlaputaak kati dúniyaay.” ⁶ Nijukumi aseekau ákalie ñátum di fúsimaf fati bukanak kati Atijamit di fúsimaf fati kabujimi mati Yensa. Nan ijukoomi di wáaloammi máamak. ⁷ Bare no’onu maleekaay di yoonammi, “Waa nusofe butumi? Kob man iregi wayofimi di aseekau akila, di poop énukuruŋey yákooleniaay yabajumi kúkaak kooni futokey di kugabaak di usiinaw uñeney wateboomi. ⁸ Énukuruŋey ekila yákooleniaay yan ujukeenuñaa malegen noo ebajoeembajo, bare iñeme elet. Yoote elaañ épurul di busunab básankimi babajutumi tan búkabe ban panejaw bee tan yootumi kakajeniak. Bukanak kacinumi baabe di dúniyaay kan ureesiil uciikutimi di búkaay yati eroŋey káŋarum no’ona di butuukab bati dúniyaay, pánwooloiil nampi kujukumi énukuruŋey ekila. Mati noo eroŋeenroŋ, bare iñeme elet ban panelaañ épurul. ⁹ “Anoosani abajumi malinlo mbi álaul. Kúkaak futokey di kugabaak kooliyo koo emmi kúlankiinak futokey di kugabaak kati ésukey ekila kan aseekau alakoeenumi erungey. ¹⁰ Babaj poop kúyi kooni futok di kugaba, kooni futok di kukila kulolo, karinomi kubiloorut, nampi kubilumi koote kalako jayiinkun ceb. ¹¹ Ban énukuruŋey yákooleniaay yaroŋeenumi bare iñeme elet, yoo fúkouyo eenomi áyi atoken di áfeegintenau. Énukuruŋey ekila yoonoyoono nan kúyiak futokey di kugabaak bukaaku, bare yoo poop yoote kakajen bee bándoorey. ¹² Usiinaw uñeney wan ujukumi woo kúyi uñen kutooŋoorut bee erung, bare pankuyab fujuum fati kúyi wáriiŋe erig yákon pat bukoo di énukuruŋey yákooleniaay. ¹³ Buke uñeney koo búromiil búyeget bákon, ban pankusen kánkumiil di fujuumiil bee di énukuruŋey ekila. ¹⁴ Pankutiiken Jisahaaj, ban panjiŋooleniil mati Jisahaaj Akiiyaau ati kukiiyaak di Áyiau ati kúyiak, ban kalakomi di Jo kuwonkiwonk, kumukenimuken, ban kukankaan kufiumaay.” ¹⁵ Maleekaay di eregammi, “Kalak káamakak kan jijukumiñaa, kan aseekau ayenetaau áamakau álakoumumi, koo kúyiisenumi jameeŋey yati bukanak kati mofoomof di kasankenookasanken. ¹⁶ Usiinaw uñeney wan ujukumiñaa, woo di énukuruŋey yákooleniaay panulat aseekau ayenetaau áamakau. Panutuutul wañool ñátum di kamingen man alako búliŋet, panutokoñ kupeetool ban nukajenool ñátum sambun. ¹⁷ Mati Atijamit árude di úyegetiil mambi kukaan nan man asofeenumi eeno. Koo búrom koote kajamoor man kusen kujuumak kooliil bee di énukuruŋey yáyemaay, moo kaane kurimak kati Atijamit koote káliroor. ¹⁸ Aseekau umu an ujukuñaa waaf nan sáaut, oo eenomi ésukey yáamakey yarungumi kúyiak kati dúniyaay búrom.”

¹ Nan púrutomi mo’omu, nilaañumi ijuk maleeka yiceen di éwaloul di bukinab bajakaab. Man yooke fujuum fáamak, dúniyaay búrom éwuŋenimi pasasas ñátum mawuŋam mooliyo. ² Di ecibulo máamak man yoone, “Elolo! Elolo Babilon yákalaami elolo! Di ebilumi ekaan dán úgunaw di úyegetaw wájiteniaaw, di poop dán énaakayita yanoosani yajakutey, ³ Mati bukanak kati mofam búrom kurandaan wayiney yati emaŋey yooliyo yajakutey ekaan káraadiaak, kúyiak kati dúniyaay kusensen kúkoiil di yo mati kaseeketak, ban kunoomenaak kanoosani baabe di dúniyaay kukankaan kubaja káamak mati emaŋey yásuumaay yooliyo.” ⁴ Nilaañumi ijam furim fuceen di bukinab bajakaab man foone, “Bukanom jípur di yo, takum jinaamoor di majakutam mooliyo, takum jinaamoor di úyiikaw wooliyo. ⁵ Mati majakutam mooliyo murembenoorembenoor múriiŋ bukinab bajakaab, ban Atijamit nawoolowoolo bújakaataab booliyo. ⁶ Kaan nan man ekammi au, galenuyo ñooni ñagaba di wan ekammi. Senuyo faŋ man tálie ñooni ñagaba wuuj wan esenimi. ⁷ Nan man élebienooromi ñátum di eroŋey yásummi, Ñaa senuyo bugaalab di mátaañiam mákonam. Mati di búyeget booliyo boonesoon, ‘Ínje áyi di ejunkutey yúmboom, ínje lee aseekau ati ájimaau, ban letimanjurer kagamoor.’ ⁸ Mati mo’omu, di funak fákon úyiikaw wooliyo woote éloumuyo ban di uŋoolenuyo, úsumut watipooremi, kagamoor, di bacaar báamak, mati yoote kareemeni jororor di sambun, mati Akiiyaau Atijamit ati Kánkum, panagamenuyo.” ⁹ Kúyiak kati dúniyaay kaseeketemi ban di kumaŋ eroŋey yoola yásuumaay di fubajaf fooliyo, pánkuruuren kugamoor mati yo, nampi kujukumi fakooraf fati sambun sammi kareemenakuyo. ¹⁰ Mati kákoliak, man kujuum lói di aaney, “Wow! Wow! Ésukey yáamakey, Babilon ésukey ekila yákalaami remo! Yaŋ tootooto kagamenak kati Atijamit títi di yo.” ¹¹ Kunoomenaak káamakak kati dúniyaay pánkuruuren di kugamoor bee mati yo, mati an aatut enoom mútebuma mati munoomenaam mooliyo. ¹² Hani an ákon letanoom mútebuma mati sáni, gódifori, búkarooruma di umaal wapincoe, wañ walegen, wañ wáñubimi ñátum di wakaayene éyem di wañ wáyeme wúk, ubabar waputemi súum, wajooneimi di úsaliŋ, wajoonenimi di ubabar wan butum burioe, mulap máyeme di bakooba bajooŋoore. ¹³ Mútebuma mati waputemi súum nan sinaamon, etoj, ubabar, di melam maputemi súum nan sumurun di libano, wayin, túlu yati Uwoliiw, epor yalegen yati busereŋ, síbe di sisaha, sipiling di sisareet, di kumiiceel, ban di suutas sati bukanak. ¹⁴ Kunoomenaak káamakak koonuyomi, “Wajakaaw búrom wan uraaneenumi máamak woo ukañokano búrom di au. Fubajaf fooli di majakam mooli fújinjim nel, letubajurer inki!” ¹⁵ Kunoomenaak káamakak, kubilumi kukaan kubajaak káamakak ñátum di kanoomenak di ésukey yáamakey ekila, pankujuum lói di yo, mati kúkolikoli kanaamoor di kásuutukeniak kooliyo. Pánkuruuren di kugamoor cibulo, ¹⁶ “Wow, wow, mati ésukey yáamakey yakareneimi di wañ walegen wakaayene éyem di wáyeme wúk, yákarooromi ñátum di sáni, búkarooruma, di umaal wapincoe. ¹⁷ Yaŋ tootooto fubajaf ufu fákalaami remo di fújimmi meej!” Kurungaak kati usaanaaw di kujawaak búrom, di kurokaak kati dó, di károŋumemi di falaf, koo búrom di kujummi lói di yo. ¹⁸ Nan kujukumi fakooraf fati sambun sammi di kareemenakuyo, pankureg, “Bajorerut ésukey yaanoe nan ésukey yáamakey uyu?” ¹⁹ Di kuŋarumi mof man kufoonoor di kúkaak kooliil di kúruuren di kugamoor, man koone, “Wow, wow, mati ésukey yáamakey yákalaami yan usaanaaw wáamakaw búrom wommi di falaf fáamakaf di ebilumi ekaan ésuk yabaje. Yaŋ tootooto fubajaf ufu fákalaami remo di fújimmi meej. ²⁰ Wóoy bukinab bajakaab maayoor mati yo! Wóoy bukan kati Atijamit, di kúriiŋena, di kuboña, mati Atijamit nagamengamen yo mati wan ekaanuumi! ²¹ Maleeka yati kánkum di eŋarumi fukooba fan siyesoor di fukooba fúnegenuma fáamak man eleebufo di falaf fáamakaf eban di yoone, “Babilon yákalaami mo’ome panebetimi jákaati eeno, ban letelaañ ejuumenderi, ²² ban kayelak kati suusa di kúcima, kulita kati fuyila, di kati úbiil, leekujamurer di yo! Aroka ati burok banoosani aatut elaañ ajukureri di yo. ban kayelak kati fukoobaaf fúnegenumaaf kootut elaañ kuyelureri di yo. ²³ Mawuŋam mati éwuŋenuma mootut elaañ muwuŋenderi, ban furimaf fati ániine di anaare kaate kayaboor, footut elaañ fujamureri di yo, mati kunoomenaak kooliyo kukankaan bukan kabaje kánkum di dúniyaay, ban kati mofam búrom kammi di dúniyaay kubuntibunt ñátum di fáliimaetaf fooliil. ²⁴ Babilon ebabaj kútek mati fúsimaf fati kuboñaak di fati bukanak kati Atijamit fáyuimi di ésukey yáamakey ekila. Malegen, fúsimaf fati bukanak búrom kabujimi di dúniyaay uye.

¹ Mo’omu múpurutomi, nijammi waanomi nan furim fucibuloulo di jameeŋ yati bukan di bukinab bajakaab, “Haleluya, epakey, mawuŋam di kánkumak bee di Atijamit oololaal, ² mati kagamenak koola kankaan malegen di majoone. Nagamengamen aseekau ayenetaau áamakau asikenemi dúniyaay uye ñátum di kayenetak koola, ban Atijamit nagalengalen bee di oo mati man abujumi kurokaak koola.” ³ Di kulaañumi kucibulo man kommi, “Haleluya, usalaal Atijamit! Fakooraf fúpurumulomi di ésukey fukoorumi di fuyitomi fatiya bee bándoorey.” ⁴ Kunifaanak kabananey di kubakiirak di kulomi kúfima man kumiiceelaetumi Atijamit ammi balakoe ejunkutey yoola, waroŋaaw watuukimi woo poop moo mákonam, di aaney, “Amen! Haleluya, usalaal Atijamit!” ⁵ Kápurumul di ejunkutey yati jáyiaj, furimaf di fúpurulomi fammi, “Usalaal Atijamit oololaal, kurokaak koola búrom, muyuul kákolioomi añiil anifaan.” ⁶ Ñaa nijammi waanomi nan furimaf fati jameeŋey yáamak yati bukan kajuupoe, fukankaan nan busuuŋut bati falaf fáamakaf di kapaja káamak, di kacibulomi man foone, “Haleluya, usalaal Atijamit! Mati Akiiyaolaal Atijamit ati Kánkum, oo eenomi Áyiau! ⁷ Umaayooraal di kateben man usalaalool mati mákalaam moola, mati fuyabaf fati Jisahaaj fúriiŋuloriiŋ, ban Ámajiraau ati Jo najonjooromi di fúko’ool. ⁸ Nasenisen bakooŋ man akaano wañ walagen wafiite púl man uñiliñil” mati wañaw walegenaw úyiisenyiisen mukaanaam majoonam moola mati bukanak koola. ⁹ Maleekaay di yoonammi, “Ciik ure. Panjak bee di bukanak kan kubemumi bee di káliimenak kati fuyabaf fati Jisahaaj.” Di ebenento di yoone, “Ure eenomi kurimak kalegenak kati Atijamit.” ¹⁰ Nilommi di úkamunaw wooliyo bee kamiiceelaetuyo, bare di yoonammi, “Takumbi ukammo! Ínje poop apaali aroka ati Atijamit ceb nan au di kuti’i kuriibaak búrom káyiisenumi mati Yensa. Miiceelaet Atijamit!” Mati Búyegetab Bátienaab bukammi bukanak kati Atijamit man kúriiŋen malegenam man Yensa áyiisenumi. ¹¹ Nijukumi bukinab bajakaab man búwambuloe, jíyenten, epiling étumpaay! Oo ammi balakoe di yo kooneool Afiumaay ban Malegen. Mati nagamengamen joon ban najawejaw futiikaf. ¹² Kúcilak koola koonokoono nan bújeek bati sambun, ban naloopenloopen wompoŋ wati kúyi wajuupoe di fúkaaf foola. Babaj karees kákon kaciiki títi di oo, bare hani an aceen amanjut koo eenomi waa leejaat oo. ¹³ Ateyenaau kaloa káamak nakaanoe kálumeni di fúsim, ban kareesak koola koo eenomi Furimaf fati Atijamit. ¹⁴ Kutiikaak kati bukinab bajakaab, di kuriiboomi balakoe di sipiling sítumpaas di kukaanoemi wañ walegen waluulie wafiite. ¹⁵ Jiliba jabaake jayabe tul di jípurumi di butumool, ñátum di joo pánaŋoolenumumi dúniyaay búrom. Panarungiil ñátum di egol yati mulap, ban panatobojiil analuj nan kureseŋ di fúñaafenuma fati kañuumulak káamakak kati Atijamit ati Kánkum. ¹⁶ Di kaloaool káamakak koo di fuboŋool karees kákon kuciikiciik to, “Áyi ati kúyi di Akiiya ati kukiiya”. ¹⁷ Nijukumi maleeka yiceen man ejuume di bala’ab, ban di ewonk ecibulo bee di bánaakayitaab bammi di fatiya búrom, man yoonubomi, “Jibil jijoj tákon bee mati káliimenak káamakak kati Atijamit, ¹⁸ man jitokoñ kupeetak kati kúyi, kupeetak kati kurunga kutiika di kutiikaiil kati kánkum, kupeetak kati sipiling di kuteyenaak kooliso, kupeetak kati bukanak búrom, kumiiceel di kakaanutumi kumiiceel, añiil anifaan!” ¹⁹ Ñaa nijukumi énukuruŋey yákooleniaay di kúyiak kati dúniyaay di kutiikaiil man kujonjoore bee katiiken ateyenaau ati epilingey ekila di katiiken di kutiikaool. ²⁰ Ban énukuruŋey ekila esofisof, yoo di aboñaau abuntaau kukuloorimi, ansi akaaneenumi wajamurerutimi di bújonlenab booliyo. Ñátum di wo nabuntumi bukanak búrom kabajumi fúmanjumaf fati énukuruŋey yákooleniaay ban dihi kumiiceelaet ebaŋootey yooliyo. Yoo di aboñaau abuntaau ooliyo di búrom maroŋe leebi di sambunas sájeekaas sanaamooremi godoroŋey. ²¹ Kutiikaiil búromiil kubujimi ñátum jilibaaj jabaakaaj jápurumulomi di butumab bati anau alakomi kateyen epilingey étumpaay. Ñaa sígutumas búrom sati dúniyaay di silikuloorimi sipoñ teb.

¹ Nijukumi maleeka yiceen yooyu di kawaloulo di bukinab bajakaab, man yooke ékulumaay yati busunab básankimi babajutumi tan búkabe, di poop man yooke ñiwuj ñáamak. ² Di ejontumi eyelaay yajuudiitimi yan eenomi eyelaay yati naaniŋ, yoo eenomi Seetaanaay ekokimi bee simit wíleey. ³ Maleekaay ekila di eleebuyomi bee di busunab básankimi babajutumi tan búkabe. Di ewamben ban di ekul, takum Seetaanaay ebunt mofam búrom bee nampi simitas wíleey sibanumi. Nampi púrutomi mbi ekateni jayiinkun. ⁴ Ñaa nijukumi sijunkut sati jáyi, ban kalakomi di so kusenisen fujuum fati bee kagamen. Nijukumi suutas sati káraamulimi mati káyiisenak kooliil Yensa, mati káriiŋenak kati furimaf fati Atijamit. Nijukumi suutas sati kámiiceelaeteriitumi énukuruŋey yákooleniaay mba ebaŋoot yooliyo, mba di kuyab fúmanjumaf fooliyo di kúriiŋiil mba di uñeniil. Di sibilumi siroŋ, ban di kurungumi di Apakenaau Áamakau síñakon bee simit wíli. ⁵ Kacetumi bukaaku karinomi, koo kuyitoulo’oorut bee di eroŋey bee nan simitas wíleey sibanumi. Uru eenomi káyitoulak kútiyaarak di kacetumi! ⁶ Ampi amaatumi kayitoulak kútiyaarak di kacetumi bee di eroŋey, jakoojak ban pánaliroor. Ecetey egabunteney ebajut kánkum di oo, bare pankoote ekaan kúsimena kati Atijamit di kati Apakenaau Áamakau, ban pankoote erung nan kúyi di Yensa bee simit wíli. ⁷ Nampi simitas sooni wíleey sibanumi, Seetaanaay pánekatenuli dán ekulimi, ⁸ ban pánepur bee ebuntey bukanak kati mofam manoosani búrom mammi di sígoolenas soolimo sibakiiras, san eenomi Gog di Magog, ban di ejojeniil tákon bee futiik. Kajuupoak kooliil kukankaan nan kaluusak kammi di kásikak. ⁹ Di kuyiisoorumi kapanookapan kati dúniyaay bee mo nan kujuume kufiken kaŋoobenumi bukanak kati Atijamit di ésukey yáamakey yan amaŋumi. Bare sambunas sápurumulomi fatiya di sireemeniimi jororor. ¹⁰ Seetaanaay yabuntiimi di eleebimi bee di sambunas sájeekaas sanaamooremi godoroŋey, dán énukuruŋey yákooleniaay di aboñaau abuntaau ooliyo, yaŋ di kuleebimi, ban pánkusuutukeni fuk di balay bee bándoorey. ¹¹ Ñaa nijukumi ejunkut étumpaay yáamak yati jáyiaj an balakoe to. Di bújonlenab boola dúniya di fatiya búrom di síjimmi nel, bare babajut tan soote kalako. ¹² Nilaañ ijukumi kacetumi, añiil anifaan bajuume di bújonlenab bati ejunkutey yati jáyiaj. Ban síbuka di síwambulimi, di poop búka yiceen éwambulimi yan eenomi búkaay yati eroŋey. Kacetumi kugamenigamen riiboor di waciikimi di síbukaas, di poop riiboor di wan kukaaneenumi. ¹³ No’ona kacetumi di falaf fáamakaf di fúlaculiimi, ban Ecetey di Esuney di sikatenulomi kándomi, ban anoosani nagamenimi riiboor di wan akaaneenumi. ¹⁴ Ecetey, yoo di Esuney, soo sileebimi bee di sambunas sájeekaas. Uru eenomi ecetey egabunteney. ¹⁵ Ban anoosani kareesool kuleemi di búkaay yati eroŋey, panaleebi bee di sambunas sájeekaas.

¹ Nilaañ ijukumi fatiya di tentaam yunkul. Mati fatiyaay di tentaamey sítiyaaras síjinjim meej, di poop falaf fáamakaf. ² Nijukumi ésukey yálirooraay, yoo eenomi Yerusalem yunkuley, di éwaloul bati Atijamit di bukinab bajakaab, yaanomi nan ámajira an kúfimenulo di búkaroor bajake bee bati ataool. ³ Nijammi furim facibuloe kápurumul di ejunkutey yati jáyiaj, di aaney, “Jíyenten, fulakaaf fati Atijamit foofu di bukanak. Nacin di bukoo ban koote ekaan bukanak koola, ban Atijamit fúko’ool pánaami di bukoo. ⁴ Pambiayuuy jikuloojikul di kúciliil. Ecetey letebajorer mba kagamoor mba búruuren mba jari. Mati wanoosani wati noo woo uwuwuuj.” ⁵ Alakoeenumi di ejunkutey yati jáyiaj naanumi, “Jíyenten, ínje iñeme niunkulenunkulen wanoowani!” Nalaañumi aan, “Ciik ure, mati kurimak uke kubabaj fúkaw ban kukankaan malegen.” ⁶ Naanammi, “Kankaan ban! Ínje eenomi Fúcitumaf di Fúwuŋenumaf. Bee di kan baraanab busofumi paniwuliil kuraan mumelam mati ébulaay masenemi eroŋey ban bacaam bulee to. ⁷ Ampi aŋoolenumi aate eŋar do’odu búrom. Panikaan Atijamit oola ban oo poop panakaan añoolom. ⁸ Bare kákoofiak, kakaanutumi kufiumaay, di kúlaputaak, di kabujemi, di kúniine’etaak mba kuseeketaak, di kakaanemi fáliimaetaf, di kamiiceelaetemi sínaati, di kulepooraak búrom. Koo búrom bacaamab booliil boo eenomi sambunas sájeekaas sanaamooremi di godoroŋey, ure eenomi ecetey egabunteney.” ⁹ Ñaa maleeka yákon di simaleekaas sooni futokey di sigabaas saakumi sibiinas sooni futokey di sigabaas sameeŋumi di úyiikaw wooni futokey di ugabaaw, di yoonammi, “Bil, pániyiiseni Ámajira Aatumi bee kayabo, aseekau ati Jisahaaj.” ¹⁰ Búyegetab Bátienaab bookomi man maleekaay éjeetumammi lói bee di fatiyenaay yati fúlankiin fateboe máamak. Ban di éyiisenammi ésukey yáamakey yálirooraay yati Yerusalem di éwaloulomi di bukinab bajakaab bati Atijamit. ¹¹ Ésukey ekila man ewuŋene pasasas ñátum di mawuŋam mati Atijamit, ban kájakakenak kooliyo koonokoono nan bakooba bábutoe baanoe nan étuuru di báyeme, kátienak kooliyo nan weer. ¹² Fukukaf fooliyo faŋoobenimi fúkalaakalaa ban di fubaak. Babaj dó kúlamutak koone uñen di kugaba ban fúlamut fanoosani babaj maleeka yanto di kapooyak. Fúlamutoofulamut baciike ureesaw wati kiilak uñeney di kugabaak kati bukanak kati Isirael. ¹³ Babaj kúlamut kúfeegiir ban bala’ab búrabumemi, bamoyab kúfeegiir, báridab kúfeegiir, ban bala’ab bújonumemi kúfeegiir. ¹⁴ Fukukaf fati ésukey yáamakey fubabaj kúlakenumaak kooni uñeney di kugabaak, di kukila kuciikiciik ureesaw wati kúriiŋenaak kati Jisahaaj kooni uñen di kugaba. ¹⁵ Maleekaay yasankenammi yookenyooken egol yati sáni éliikuma bee eliik ésukey yáamakey, kúlamutak di kukukak kooliyo. ¹⁶ Ésukey yáamakey ekila ufeefaw ubakiiraw, wooliyo urere cererer. Maleekaay ekila eliliik ésukey yáamakey di egoley éliikumaay yooliyo, kabaakak kati kafeefak wáriiŋe síkilomeetar sooni síwili sigaba di siceme sibakiir. Kawuŋak di kabaakak fatiya koo poop mákonam. ¹⁷ Maleekaay di éliikumumi fukukaf fooliyo, kabaakak fatiya kooliyo símeetar bukan kúfeegiir, riiboor di káliikuma kati an, kan maleekaay eliikumi. ¹⁸ Fukukaf fúteepumiteepum bakoobaab baanomi nan étuuru di báyeme, ésukey yáamakey fúkouyo ejoonenijoonen ñátum di sáni yalegen, kátienak kooliyo koonokoono nan weer. ¹⁹ Kúlakenumaak kati kukukak kati ésukey ekila kukarenikaren ñátum di bakooba bapincomi banaamut. Fúlakenumaaf fútiyaaraf faanoe nan étuuru di máyeme wúk, fugabuntenaf faanoe nan mábuloore di majiilaete, fúfeegintenaf faanoe nan mátumpe di mof, fubakindenaf faanoe nan étuuru. ²⁰ Futokey faanoe nan máyeme, futokey di fákon faanoe nan máyeme mba máyeme di mátumpe, futokey di fugabuntenaf faanoe nan étuuru di ejiila, futokey di fúfeegintenaf faanoe nan mábuloore di étuuru, futokey di fubakindenaf faanoe nan ejiila, uñeney faanoe nan étuuru di ejiila, uñeney di fákon faanoe nan étuuru di mábuloor, uñeney di fugabuntenaf faanoe nan inkey. ²¹ Kúlamutak uñeney di kugabaak kujoonenijoonen ñátum di bamaal bapincoe. Fúlamutoofulamut fújoonenumijoonenum emaal yákon ébuto, ban buruŋab báamakab bati ésukey yáamakey ñátum sáni yalegen bujoonenimi, boo bukankaan nan weer. ²² Bare ijukut dó fukob di ésukey yáamakey, mati fukobaf fáñiiaaf fooliyo foo eenomi Akiiyaolaal Atijamit ati Kánkum di Jisahaaj. ²³ Ésukey yáamakey eceeŋut bala’ab mba jileeŋ bee kawuŋen di yo, mati mawuŋam mati Atijamit muwuŋenwuŋen di yo, ban Jisahaaj joo eenomi éwuŋenumaay yooliyo. ²⁴ Bukanak kati dúniyaay koote ejaw di kálebienak kukila, ban kúyiak kati dúniyaay pánkujeetumul fubajaf fooliil bee dó. ²⁵ Kúlamutuyo leekuwambenderi, mati fuk footut kabajo dó ²⁶ Bukanak kati dúniyaay pánkujeetumul mákalaam mooliil di fubajaf fooliil di kálebienak kooliil bee di ésukey yáamakey yooliil. ²⁷ Bare waaf wasikomi letunokender dó, mba ampi amiiceelaetumi náati di aleepoora, leejaat kan ureesiil uciikimi di búkaay yati eroŋey yati Jisahaaj.

¹ Maleekaay di éyiisenammi falaf fati mumelam masenemi eroŋey, mátiene nan weer, di múteyul kápurumul di fátaamenaaf fati ejunkutey yati Atijamit di poop yati Jisahaaj. ² Di mutey di titoorey yati buruŋab báamakab bati ésukey yáamakey ekila. Kapanookapan kati falaf kubabaj búbaarab bati eroŋey buwolewol ñooni uñen di ñagaba di emit, jileeŋoojileeŋ buwol ñákon. Etojey yoolibo panekaan bubeeben bati kiilak búrom. ³ Bunumab bati Atijamit bootut bee kabajorer dó. Ejunkutey yati Atijamit di yati Jisahaaj sootumi kalako’oorak di ésukey, ban kurokaak koola pankumiiceelaetool. ⁴ Pankujuudoor kúcil kubakiir, ban kareesool pankuciiki di kúriiŋiil. ⁵ Fuk leefubajorer, inki kuceeŋut mawuŋam mati éwuŋenuma mba mawuŋam mati bala’ab. Akiiyaau Atijamit aatumi ekaaney mawuŋam mooliil. Ban buku pankurungubo nan kúyi bee bándoorey. ⁶ Maleekaay di yoonammi, “Kurimak uke kuyayaj kafium ban kukankaan malegen. Ban Akiiyaau Atijamit asenemi Búyegetab Bátienaab boola bee di kuboñaak, oo aboñumi maleekaool man éyiisen kurokaool waa woote kabajoak iñemeeñeme.” ⁷ Yensa nammi, “Jíyenten, ínje oomu nílaañeul iñemeeñeme! Ampi asofumi mati kurimak kati kamanjenak wan kuregumi di búkaay uye, jakoojak!” ⁸ Ínje, Yohan, ajammi ban nijukumi uru búrom. Nan ijamuwomi ban nijukuwomi, nilomi kúfima di úkamunaw wati maleekaay di úkamunaw wati maleekaay éyiisammi uruñaa, ⁹ bare di yoonammi, “Takumbi ukammo! Ínje poop apaali aroka ati Atijamit ceb nan man au di kuti’i kuboñaak, ban kasofumi kurimak kati búkaay uye. Miiceelaet Atijamit!” ¹⁰ Di elaañumi yoonammi, “Takum uyof kurimak kati kamanjenak di búkaay uye, mati nanan nilolof nan mo’omu búrom eetumi kabajoak. ¹¹ Akammi búlaput katool man arulen di bo. Abajumi búyeget bamokene katool man arulen di bo. Akammi an alegen katool man arulen di bo. Ampi áliroorumi, katool man arulen di mo.” ¹² “Jíyenten, ínje oomu nílaañeul iñemeeñeme! Búgalenab boo neekumi, ban panigalen anoosani di wan akammi. ¹³ Ínje eenomi Fúcitumaf di Fúwuŋenumaf, átiyaarau di álamukaau. ¹⁴ Kaposumi tíen uloaiil wáamakaw, mbi kubaj buruŋab bee di búbaarab bati eroŋey ban di kuŋoolen poop kújawumum di kúlamutak bee di ésukey. ¹⁵ Bare téeŋeraay karinobomi koo eenomi siyen, kakaanemi fáliimaet, kayenet, kubuja, kamiiceelaetemi sínaati, kamaŋumi ninsi kukaan mukaanaam mati kagaajoor. ¹⁶ “Ínje, Yensa, aboñulomi maleekaay yúmboom man eregen káyiisenak uke muyuul bee di kujojak. Ínje eenomi fufaaraf ban búwolumab bati Dauda. Ínje eenomi yootey yarajulomi di waradabaw.” ¹⁷ Búyegetab Bátienaab di Ámajira aatumi kayabo koone, “Bil!” Anoosani ajamemi nareg kajamutumi, “Jibil.” Anoosani baraanab busofumi nabil. Ban anoosani súmmi, naŋar mumelam mati eroŋey di butum batiitie. ¹⁸ Ínje, Yohan, igameññaa ajammi kurimak kati kamanjenak di búkaay uye. Ampi abenentomi furim, Atijamit panabenen kútekak koola ñátum di úyiikaw wáyiisenimi di búkaay uye. ¹⁹ Ban ampi agumbulumi kurimak kati kamanjenak kápurumul di búkaay uye, Atijamit pánagumbul bucaabab boola di búbaarab bati eroŋey di ésukey yálirooraay, wáyiisenimi di búkaay uye. ²⁰ Ampi áyiisenumi uru búrom mbi aane, “Éey, Ínje oomu nílaañeul iñemeeñeme.” Amen. Láañul, Akiiyaau Yensa! ²¹ Emit ekaan majakam mati Akiiyaau Yensa móomi di bukanak kati Atijamit búrom. Amen.