YANKUBA

YANKUBA

¹ Ínje Yankuba, amiiceel ati Atijamit di ati Akiiyaau Yensa Apakenaau Áamakau, eem di eciik letaraay uye. Kasaafoorak bee di kuriibaak kati Yensa kan eenomi kiilak uñeney di kugabaak kafasoorumi di mofam búrom. ² Kutiom, jisofooro nan muyuul jakuujak nampi jommi di bugaal di kayinkoor, táañi manoosani. ³ Mati jimammanj nan jommi di bugaalab bukila, ban di jiroŋ man jíyinene di Akiiyaau Yensa nan no’ona, mo’omu múŋareuumi man jibaj kamuuten. ⁴ Bare joote kamuuten manoosani, mambi jikaan bukan kalegenoe ban di kúliroor, babajut warinoe di muyuul. ⁵ Ampi abajutumi malinlaam, mbi alaw Atijamit, panasenool báfirenutool, ban panasenool mo. ⁶ Bare nampi alawumi aate káyinen ban takumbi abaj úyeget ugaba. Mati anoosani abajuwomi oo nakankaan nan lonkos yati fal fáamak yanagemi banoosani. ⁷ An akila aatut esof panabaj waaf di Akiiyaau Atijamit hani jasiinkun. ⁸ Oo nababaj úyeget ugaba nanoosani ban abajut tan asofe. ⁹ Ariibaau ati Yensa awalenooromi aate kamaayoor, man Atijamit atebenoomi. ¹⁰ Bare ariibaau ati Yensa abajumi aate kamaayoor man Atijamit awalenoomi. Oo pánajim nan man búrumpenab buyoŋoemi. ¹¹ Bala’ab buraberab man búboli wút man bukaan mafosam mulalaben, ban búrumpenab di buyoŋen ban majakam moolibo di mukaño jaj. Moo mákonam, abajaau pánajim meej bee bándoorey ñátum di kaliiliwoorak koola. ¹² Ampi amuutenumi di kayinkoorak di bugaal panjakool, mati nampi púrutomi panabaj bacaamab bati eroŋey yan Atijamit áligumi bee di kamaŋoomi búrom. ¹³ Nampi kayinkoorak kubilumi mo’omu bee di an takum aane, “Atijamit ayinkaam”, mati Atijamit an letaŋoolen ayinkool man akaan waaf wajakut di poop oo di fuko’ool áyinkeriit an. ¹⁴ Bare anoosani nayinkeiyink ñátum di emaŋey yoola ekaaney majakutam esofeoomi eruuool bee di mo. ¹⁵ Emaŋey yajakutey yoola ewolenemi majakutam, majakutam múliipujaat, moo múŋareuumi ecetey. ¹⁶ Kutiom kati di búsusom, takum jimaŋ man kubuntuul. ¹⁷ Kawul kanoosani kajake di káliroore koo búrom kújawumulojawum bati Ampaolaal Atijamit, atuukumi mawuŋam manoosani di bukinab bajakaab. Oo áruŋulooreriit nan kañoogoon. ¹⁸ Oo di fúko’ool amaŋe man akaanolaal ubajaal eroŋey yalegenaay, yajawulomi ñátum di furimaf foola fati malegenam. Nakankaan mo’omu mambi uŋoolenaal ukaanaal kútiyaar kati butuukab búrom. ¹⁹ Kutiom kati di búsusom, jiwoolo uwe anoosani aate kawaaken di káyenten, bare takum awaaken kasanken, takum abaj fuuñ galab. ²⁰ Mati kañuumulak kati anau kúŋareriit mukaanaam maanomi nan man Atijamit amaŋumi. ²¹ Moo kaane mbi jikat bálamuk mukaana masikoe manoosani manaamutumi búrom, ban poop mukaana májakaatie manoosani. Jiwalenooro man jisof furimaf fan Atijamit akammi di úyegetuul, manteer di fuŋoolen fupaken suutas sooluul. ²² Jikaan kukaana wan furimaf fati Atijamit furegumi! Takum jibuntooro man jire di káyentenak fo ceb. ²³ Ampi áyentenufomi ban ákaaneriit wan furegumi, oo naanosaano nan anau ammi kajuudooro. ²⁴ Nakooñaamooro jak aban nakat bálamuk, yaŋ too galab nájim man aanomi eeno. ²⁵ Bare anau ákaanumumi jak sílingaas sálirooraas sati Atijamit, sabajumi kánkum bee kapaken bukanak, aban nasofuyo lit. Ampi areutumi di káyentenak ceb ban nájim, bare nakammi wan siregumi. O’omu panjakool di wanoosani wan akaanemi búrom. ²⁶ Ampi asofooromi oo an ati buruŋab bati Atijamit ban aŋoolenut asof butumool, oo kabuntooro ban buruŋab boola bubajut fúkaw. ²⁷ Kariibenak buruŋab balegenab di bálirooraab di bújonlenab bati Ampaolaal Atijamit koo emmi buke: kacookoorak kati kúsukateen di kuseek kati kújima di bugaalab booliil, di poop káloienak kúkoiil takum majakutam mati dúniyaay uye mukaaniil kusiko.

¹ Kutiom, takum jípajul bukanak, muyuul nan man jookumiñaa káyinenak Akiiyaolaal Yensa Apakenaau Áamakau, Akiiyaau ati mawuŋam. ² Kaanjaat ániine aceen akaanoe músupa mati sáni ban nakaroor wañ walegen abile bee di fujojaf fooluul, di poop ániine aleke abile bee di fo man akaanoe kaloaay kati furookal. ³ Ñaa di jijuumen úyegetuul di akaroorumi jak wañaw walegenaw ban di joon, “Bonket bil ulako taate.” Ban di joon alekaau, “Juum uba,” mba, “Lako tentaamey ulof úkamunom,” ⁴ mante lee mo jípajuloopajuloor titooruul, ban di jikaan kugamena kati kawoonoor kajakut? ⁵ Jíyentenom, kutiom kati búsusom. Mante lee Atijamit oo di fúko’ool amukenumi kalekumi di dúniyaay uye, mambi akaaniil kubaja di káyinenak, ban nakaaniil kuyaba bulaañab bati jáyiaj joola, nan man áligeenumi kamaŋoomi? ⁶ Bare muyuul jiheelenemi kalekumi! Kámingeneuumi man kuruueuumi bee di kugamenaak, bukoo lee kubajaak? ⁷ Mante lee bukoo di kúkoiil kasankeneñaa ñíi kareesak kalegenak kan jiwonkumi. ⁸ Jisofujaat jak sílingaas sati jáyiaj jati Atijamit di furimaf fati Atijamit foone, “Noote emaŋ alaoori nan man umaŋumi fúkoi eeno.” Moo malegen jikaane. ⁹ Bare jípajuloorujaat, moo emmi jikankaan majakut, ban sílingaas sisofuusof mati jítataasuso. ¹⁰ Ampi akammi wan sílingaas siregumi búrom ban nalo di yákon ceb, moo oo nalolo di soo búrom. ¹¹ Mati Atijamit ammi, “Takum usang aseek mba ániine ati an,” oo ammi poop, “Takum ubuj an.” Usangutujaat di aseek mba di ániine ati an bare nukaan abuja, au nútataas sílingaas búrom. ¹² Moo jisanken ban di jikaan nan bukan kaate kagameni ñátum di sílingaas so’osu sampi sapakenolaami di majakutam. ¹³ Mati di funakaf fati kagamenak Atijamit letabonket anoosani ábonketeriitumi bukaaku, bare hani di funakaf fati kagamenak Atijamit pánayiisen abonketemi bukaaku. ¹⁴ Kutiom, kama waa baje fúkaw, anau aanjaat nababaj káyinen ban áyiisenut ko di bakaanerool? Mante káyinenak kaanomi mo’omu pankuŋoolen kupakenool room? ¹⁵ Kaanjaat ati’i mba áliini ariiba mutugen musofe mba abajut wampi ari funakoofunak, ¹⁶ ákon di muyuul naanool, “Ukatooraal, jaw di kásuumaay, mbi ukaano jak ban nuri upooñ tep,” basenutool wan ceeŋumi man abaj di eroŋey yoola. Waa jakumi di kasankenak mo’omu? ¹⁷ Moo mákonam, kammi di káyinenak kariiboorutumi di bakaanerab ban Atijamit aregumi, koo káyinen kacete dak. ¹⁸ Bare aceen panaane, “Au nubabaj káyinen, ínje nibabaj bakaaner.” No’onu ínje paneene, “Yíisom káyinenak kooli kariiboorutumi di bakaanerab man ínje íyiiseni káyinenak kúmboom ñátum di bakaanerab. ¹⁹ Núyinenyinen mati Atijamit ákon ceb abajoe pat, moo jajak. Hani úgunaw úyinenyinen mo ban di úkoli di kaleleben. ²⁰ Au áliŋutumi di káyinenak, mante numammaŋ man íyiisi, mati káyinenak káyiisenutumi bakaanerab, koo káyinen kacete? ²¹ Mante lee afannaaniŋolaal Iburehima Atijamit asofumi an ajoone ñátum di bakaanerab boola? Mati nájeetunjeetum añoolool Siyaaka bee ekaaneenool búsimen di fúsimenaf bee kálebien Atijamit. ²² Nujujuk mati káyinenak koola di bakaanerab siriibooriiboor ban káyinenak koola di kukammi káliroore ñátum di wan akaanumi. ²³ Ban wan kuciikumi Furimaf fati Atijamit di ukaanimi fúliroor di aaney, “Iburehima náyinenyinen Atijamit, moo kaane nasofoomi nan an ajoone.” Ban Iburehima nabilumi akaan Atijamit apaalool. ²⁴ Nujukaajuk mati Atijamit nasofesof an najonjoon ñátum di bakaanerab boola bare lee mati káyinenak ceb. ²⁵ Lee di moo mákonam, Atijamit asofumi poop aseek ayenetaau Rahab an ajoone ñátum di bakaanerab boola? Mati Rahab nawalenwalen kúmeeloaak kan Kuyisiraelak kuboñeenumi, fugoogo aban naseniil buruŋ buceen man kupak? ²⁶ Nan man eniiley yabajutumi yuutey ekammi eniil yacete, moo mákonam, káyinenak kariiboorutumi di bakaanerab kukammi káyinen kacete. boorutumi di bakaanerab kukammi káyinen kacete.

¹ Kutiom, kajuupoe di muyuul takum jimaŋ di ekaan kuliikitena. Nan man jimanjumi mati wulaal kaliikitenemi ootaale efaŋ man ubajaale kagamen kátaañie wuuj bukaaku búrom. ² Wulaal búrom nuloaalelo di uruŋ wajuupoe. Bare anoosani aloutujaat di wan asankenemi, oo nálirooliroor ban naŋoolen asofooro funkool búrom. ³ Ulaabaajaat epilingey man ukaanaal yo man ekaan wan umaŋaami mo panuŋoolenaal ookenaal funkaf fooliyo búrom. ⁴ Jijiker busaanaab báamakab poop. Moo manoosani búkalaakalaa ban fárusaf fupentenepenten bo, banoosani man butey, bare ñátum di éweenuma yatiitie yan ateyenaau alakomi di fulamaf panaŋomenubo nan man amaŋumi eeno. ⁵ Moo mákonam, fúredimpaf foo fufaŋumi man futiitie di upanaw wati eniiley, bare foo furegemi waaf wáamak. Jipemb jati sambun jíyabeneuumi karamba káamak! ⁶ Fúredimpaf fukankaan nan sambun. Kánkumak kati májakaataam kammi di fo, pankuŋoolen kusiken eniiley yoololaal búrom ban di kureemen eroŋey yoololaal búrom ñátum di sambunas sáceteriitumi. ⁷ Anau naŋooleŋŋoolen akur sínukuruŋas man sijamool: sínukuruŋ sati karambaak, di bánaakayita, di wáfulooremi di siwolas. Ban nakukur ro eeno mo. ⁸ Bare bajurerut an ampi aŋoolen akur fúredimpaf. Foo fúyooloeriit di májakaataam, ban foo fumemmeeŋ di busik. ⁹ Ñátum di fo nusalaalemi Ampaolaal Akiiyaau, ñátum di fo fákonaf poop nunumaalemi bukanak, kan Atijamit atuukumi di búyesoorab boola. ¹⁰ Kápurumul di butumab bákonab nusalaalemi Atijamit ban nunumaalemi bukanak. Kutiom, mo’omu anau aatut ekammo. ¹¹ Mante ébulaay yákoney paneŋoolen épurenuul tákonat mumel másuume di mafire? ¹² Kutiom, mante búpunduun pambuwol kuwoliiw mba búbaar buwoliiw pambuwol kuwoliiw? Leeŋoolen kaan man ébulaay yati mumel mafire épurenul mumel másuume. ¹³ Ai di muyuul abaje malinlaam mba kálaulak? Áyiisen bakaanerool ñátum di eroŋey yoola yajakaay di kawalenooro kájawumulomi di malinlaam di bakaanerool búrom. ¹⁴ Bare jibajujaat búlat báamak di emaŋey yati kabotoorak di eyab fácul di úyegetuul takum jitebenelenooro ban di jimoos malegenam. ¹⁵ Malinlaam mo’omu múpurumulout di bukinab bajakaab, bare mati bukanak kati dúniyaay, mati Seetaanaay. ¹⁶ Mati tanootani búlatab di emaŋey yati kabotoorak eloey fácul, too pambaj kájiisoor di májakaati manoosani. ¹⁷ Bare malinlaam mápurumulomi di Atijamit, moo kásuumaay, kamuuten, kajinlen, káwambulo úyeget, kabonket káriiŋe, di mukaana majake, ban múpajuloeriit mba kalegenoe nanoosani. ¹⁸ Kafokemi sambun titoorey yati bukanak kukankaan nan kuwaña kulegen kalukemi kásuumaay ban di kujal majake.

¹ Bei mulobaam di futiikaf titooruul sípurumeuumi? Mante lee di emaŋey yooluul yajakutey yátiikeneuumi nanoosani di úyegetuul? ² Jimammaŋ ebaj bare jibajut, ñaa di jibuj an. Di jibaj búlat di wan bukaaku kukilumi ban jiŋoolenut jibajuwo, ban jiyiten mulobaam man jitiik. Jibajut wan jimaŋumi, mati jilawut Atijamit. ³ Kuceen di muyuul kalawumi Atijamit ban kubajut, mati kúlaweriit jak, wan kúlawumemi roo búrom bee wásuumiimi ceb. ⁴ Muyuul kafiumutumi Atijamit! Mante jimanjut mati bapaalaayab di dúniyaay moo kakatoor di Atijamit? Moo kaane anoosani amaŋumi bapaalaayab di dúniyaay oo alatoora ati Atijamit. ⁵ Mba mante jisosof mati malegenam mulee di furimaf fati Atijamit fammi, “Búyegetab Bátienaab ban Atijamit akammi di wulaal man ubajaal fuuñ fati ekaan kufiumaay.”? ⁶ Bare Atijamit panafaŋ man áyiisenolaal majakam moola. Nan man furimaf fati Atijamit furegumi foone, “Atijamit nalatelat ká’aamakalenooremi, bare náyiiseneyiisen majakam moola bee di kawalenooroemi.” ⁷ Moo kaane jisen kúkouul bee di Atijamit. Jilat Seetaanaay moo panetey éloiuul. ⁸ Jilof Atijamit, oo poop panalofuul. Jipos uñenuul, muyuul kukaanaak majakutam. Jítilul úyegetuul, muyuul kabajumi úyeget ugaba. ⁹ Jibotenoor, jíruuren ban jisuuŋut. Karenkenak kooluul di kulaañ búruuren, man kamaayoorak kooluul kulaañ kabotenelenoor. ¹⁰ Jiwalenooro di bújonlenab bati Akiiyaau Atijamit, moo panatebenuul fatiyaay. ¹¹ Kutiom, takum jikajenoor urees. Anoosani akajenumi atiool karees mba agamenoomi, moo sílingaas sati Atijamit nakajene ban nagamenuso. Bare ugamenjaat sílingaas use, au lee akaana wan sílingaas siregumi bare nukankaan agamenaso. ¹² Atijamit ceb asenemi sílingaas use, oo poop agamenemi. Oo ceb aŋoolenumi ápakenoli ban poop naŋoolen ákajenoli. Bare kamañaa au, ai aŋoolenumi agamen alaoori? ¹³ Jíyenten, muyuul kaanemi, “Jaat mba kajom panuja’aal bee di ésuk yiceen uye mba uya mbi ulakoaal bo emit yákon, ban nukaanaal bo funoom di kanoomen manteer mbi ubajaal búrembenab.” ¹⁴ Bare pipi jimanjut eroŋey yooluul kajom buu yoote kanokoor! Joonojoono nan kamon karajulo leekupiyo di kújim meej. ¹⁵ Wan jootumi ereg woo emmi, “Súumujaat di Akiiyaau, panuroŋaal panukaanaal uwe mba uwa!” ¹⁶ Bare muyuul ká’aamakalenooremi man jisanken nan jimammanj wábileuumi. Ká’aamakalenoorak ko’oku koonokoono nan mukaana majakut. ¹⁷ Moo, anoosani amanjumi majakam man aatumi ekaan ban akaanutumo, oo nakankaan majakut. o, oo nakankaan majakut.

¹ Muyuul kubajaak, jíyentenom! Jíruuren di jíciiŋit mati búyiikab baatumi ebiley bee di muyuul! ² Fubajaf fooluul fukañokaño ban bulol busosof wañuul. ³ Sánaay di gódiforaay yooluul komoŋey esosof búrom. Komoŋey yo’oyu páneyiisen wajakutaw wan jikaaneenumi ban paneri siniiluul nan sambun. Bare muyuul karulen di etafey kubajak kooluul bee mati kunakak kúlamukaak kati eroŋey yooluul. ⁴ Jijanten! Bacaamab, ban jilatumi ecaamey bee di karokuumi, boo boobu bo báruurene bee di muyuul. Búruudenab bati kujalaak búrindiiŋ bati Akiiyaau ati Kánkum. ⁵ Jicincin baabe di dúniyaay di eroŋ yásuume di ekaan wásuumuumi. Jiriri man jiruuk nan sínukuruŋ bee mo di funakaf fan jootumi káraamuliak. ⁶ Jífirenfiren ban di jibuj kajoonaak, kabajutumi kánkum kati kapakenooro. ⁷ Kutiom, muyuul joote kamuuten, bee nampi Akiiyaau alaañulomi. Jíyenten, awañaau panaluk man akoben muriaam mabajumi fúkaw mati tentaam, panamuuten biñoo mumelam mútiyaaram bee di múlamukaam. ⁸ Muyuul poop joote kamuuten ban di jibeben mati ebiley yati Akiiyaau elolof. ⁹ Kutiom, takum jíkuumoor titooruul, jikammojaat panjigameni. Jíyenten, Agamenaau oomu man ajuume akobenuul di utumuul. ¹⁰ Kutiom, muyuul joote ekaan nan man kuboñaak káriiŋenumi kareesak kati Akiiyaau Atijamit kukaaneenumi eeno. Buku kumuutemmuuten di bugaalab. ¹¹ Noonaalesoon koo jakiijak mati kumuutemmuuten di bugaalab. Nujamaajam man Yuuba amuuteneenumi eeno di bugaalab, ban nujamaajam nan púrutomi buu Atijamit Akiiyaau akaaneenumi di oo. Mati namemmeeŋ di kabonket di poop káboteni káamak. ¹² Kutiom, di mo’omu búrom takum jipuun man jibaat ñátum di bukinab bajakaab di ñátum di dúniyaay uye, mba ñátum di ubaat uceen. Éey yooluul ekaan éey mba a’a yooluul di ekaan a’a, manteer takumbi jigameni. ¹³ Mante aceen di muyuul abaje bugaal? Aate elaw. Mante aceen abaje kásuumaak? Aate écim úcimaw man asal Atijamit. ¹⁴ Mante aceen di muyuul áju’ut? Aate eboñ ewonk kunifaanak kati di fujojaf fati kuriibaak, kaatumi elawool koote kanaanen túleey di fúkaaf foola di kareesak kati Akiiyaau. ¹⁵ Kúlawak kooliil kakaanemi di káyinen pankusonten káju’utumi. Akiiyaau panayitenool, ban kaanjaat nakaaneenkaan majakut, panabonketi. ¹⁶ Moo kaane jifel úyegetuul man jiregoor wan jikammi wajakutaw ban di jilawoor, mambi Atijamit asontenuul. Kúlawak kati an ajoone kubabaj kánkum káamak ban di kúlirenuko. ¹⁷ Eliya nakaaneenkaan anau nan wulaal. Nalalaw di kánkum káamak takum emitey elub, ban wáriiŋe simit sífeegiir di bútingum elubut. ¹⁸ Ban nalaañumi alaw, di elubumi ban muriaam di muliil. ¹⁹ Kutiom, ampi ápurumi di buruŋab balegenab bati Atijamit mbi apaalool ágaawulool, ²⁰ jiwoolo mati uwe, ampi akammi man akaana majakut atiiwoor akat majakutam mukila, namanj mati panapakenool di ecetey man majakutool majuupoe manoosani mubonketi.