KÚHIBURAK

KÚHIBURAK

¹ No’ona Atijamit nasankeneenesanken bee di kufannaaniŋolaal ñameeŋe di uruŋ wajuupoe ñátum di kuboñaak. ² Bare ñaa di kunakak kúlamukaak uke, Atijamit nájaatikenolaami kápurumul di Añoolool. Atijamit natuukumi wanoosani wammi di dúniyaay kápurumul di akila. Moo kaane, di múlamukaam, Atijamit namukenoomi man akil wanoosani. ³ Akila kuyesoorumi di mawuŋam mati Atijamit ban poop náyiisolaami Atijamit man aanomi eeno. Ñátum di furimaf fabajumi kánkum nasofumi wanoosani wammi dúniyaay. Nan acetumi man atilulolaami di majakutolaal aban, nalakomi di báridab bati Atijamit Afaŋumi Kákalaa ammi di bukinab bajakaab. ⁴ Mo’omu múyiisenumi mati Añiilau akaanimi afaŋ katebo simaleekaas, nan man kareesak kan Atijamit asenoomi kufaŋumi katebo ureesaw wooliso búrom. ⁵ Mati Atijamit aanderut hani maleeka yákon, “Au Añoolom, jaat ínje di fúko’om eenomi ampai.” Ban Atijamit nalaañ ammi, “Ínje eete ekaan Ampaool, ban oo aate ekaan añoolom.” ⁶ Ban inki, nan Atijamit alakomi éboñuley yati Añoolool ániinaau átiyaarau bee di dúniyaay, nammi, “Simaleekaas sati Atijamit soote kákuntaajen man simiiceelaetool.” ⁷ Nan Atijamit asankenumi mati simaleekaas nammi, “Ai akaane simaleekaool nan járus, ban kurokaool nan bújeek bati sambun.” ⁸ Bare mati Añiilau nammi, “Wóoy Atijamit, ejunkutey yooli yati jáyiaj panejaw fáculey bee bándoorey. ban majoonam pammukaan egoley yati jáyiaj jooli. ⁹ Au numammaŋ wajoone ban nulatumi waŋonde. Moo kaane Atijamit, Atijamit ooli, namukenimi ñátum di káyueni túleey man asenimi kásuumaak wuuj kupaali kabajukomi.” ¹⁰ Ban, “Akiiyaau, kabiñoo di fúcitumaf au utuukumi fúlakenumaaf fati dúniyaay, ban di uñeni nurokumi bukinab bajakaab. ¹¹ Do’odu búrom pandibao, bare pánoomi di wúli bee nanoosani. Do’odu búrom pandifanlen nan fuloaay. ¹² Panubooñ doo búrom nan fuloaay fafanlene. Pandikaan nan kurookal kéele. bare au ákonau úruŋuloeriit, simitas sooli síbaneriit.” ¹³ Bare maleeka yati Atijamit yei naandere, “Lako di báridom, bee nampi ikammi kulatoori fútobojumaaf fati úkamuni.” ¹⁴ Mante lee simaleekaas úyeget ceb? Soo sáboñulimi man sirok di kaje’emi bee epakey kajom.

¹ Moo kaane wulaal ootaale efaŋ man usofaal lit malegenam man ujamaami, takumbi an alaañ bálamuk di mo. ² Kurimak kati Atijamit kan simaleekaas siregenumi bee di kufannaaniŋolaal di kúyiisenumi mati kukankaan malegen, ban anoosani añoosukomi mba nalat ekaaney wan kuregoomi nababaj kútek. ³ Kama uñoosaajaat kapakenak kákalaamiñaa remo, buu nootaale epak? Kapakenak uke Akiiyaau di fúko’ool aregenumi futooŋandaf, ban kajamoomi kuregolaami mati koo kukankaan malegen. ⁴ Nanan nákonan Atijamit di fúko’ool náyiisenyiisen mati kurimak koola kukankaan malegen ñátum di ekaaney kúmanjum di mukaanaam máamakam máriiŋumi síwoonoor, di poop wajamurerutimi wajuupoe. Nasensen poop kawulak kati Búyegetab Bátienaab boola riiboor di kamaŋak koola. ⁵ Lee simaleekaas Atijamit amukenusomi man sirung dúniyaay yábileuumi, yan oomaañaa di kasankenak. ⁶ Bare babaj tan ticeen di furimaf fati Atijamit, “Wóoy Atijamit, kama anau waa nayaje man oote kawoonoor moola? mba añiilau ati anau waa nayaje man oote kacookoor moola? ⁷ Let au ukaanoomi fujuumaf foola fuwalo nanan nátemie fuwuuj fati simaleekaool, nuloopenoomi bompoŋab bati áyi ñátum di mákalaam di kálebienak, ⁸ ban nakammi waafaw búrom di fútobojumaaf fati fátaamool.” Di ekaaney mo’omu, bajut wan Atijamit akate bálamuk man arunguwo. Manoosani, hani bee iñeme wulaal ujukoorutaal man arungewo. ⁹ Bare wan ujukaami woo eenomi Yensa, an Atijamit akaanumi fujuumaf foola fuwalo nanan nátemie fuwuuj fati simaleekaool, nabilumi aloopenool bompoŋab bati áyi ñátum di mákalaam di kálebienak mati nagagaal biyok acet. Kápurumul kamaŋak kati Atijamit Yensa nagagaal biyok acet bee mati anoosani. ¹⁰ Kankaan bakooŋ mati Atijamit natutuuk wanoosani di poop wanoosani watuukimi mati oo, Atijamit aate kájeetumul kuñoolool man kunaamoor di mawuŋam moola. Kápurumul di bugaalab bati Yensa, Atijamit oo namondumi akaan arunga áliroore man abaj bakooŋ man ájeetumiil bee di epakey. ¹¹ Mati atilulemi bukanak kápurumul di majakutiil, oo di katilulimi koo búrom Ampaiil ákon. Moo kaane Yensa kaanutool kapuñ bee ewonkiil kutiom. ¹² Nammi Atijamit: “Paniteben kareesi di bújonlenab bati kutiom, titoorey yati kati fujojaf fooliil too poop panisali.” ¹³ Oo poop nalaañ aane, “Pánigolum di Atijamit.” Ban nalaañ aane, “Ínje oome di kuñiilak kan Atijamit asenumi.” ¹⁴ Mati kuñiilak kati Atijamit koo bukan, kátuukumimi eniil di fúsim, Yensa oo di fúko’ool poop nabilumi akaan búyesoorab bati an. Kápurumul di ecetey yoola mambi akajen jaj Seetaanaay yabajumi kánkumak kati ecetey di kañenuyo. ¹⁵ Ban di mo’ome panaŋoolen apaken kalakomi di famiiceelaetaf fati kákoliak ecetey di eroŋey yooliil búrom. ¹⁶ Tíenolaatien mati Yensa burokab boola lee bee karamben simaleekaas, bare malegen nabilumi bee karamben úwoloorumaw wati Iburehima. ¹⁷ Moo kaane cenceeŋ man Yensa aateene ekaani nan ákon di wulaal, mambi abilumi akaan ásimena áamak abaje kabonket ban nakaan afiumaay di ekaaney burokab bati Atijamit, manteer mbi majakutam mati bukanak mubonketi. ¹⁸ Mati oo di fúko’ool nababaj buyinkool ban nagaalumi, naŋooleŋŋoolen aramben buku kan Seetaanaay yommi di eyinkey.

¹ Kutiom, muyuul poop kan Atijamit awonkumi bukanak koola kálirooraak. Jijuumen síwoonooruul di Yensa an wulaal ufelaami úyegetolaal man uregaami mati oo, Atijamit aboñoomi man akaan Ásimena Áamakau. ² Yensa nakankaan afiumaay bee di Atijamit, amukenoomi man akaan burokab ube, nan man Muusa poop akaaneenumi afiumaay di burokab boola di eluupey yati Atijamit búrom. ³ Bare Yensa nacenceeŋ kálebien kawuuje Muusa, nan man ateepaau ati eluupey abajumi kálebien wuuj eluupey. ⁴ (Mati eluupey yanoosani babaj ateepeyo, bare ateepaau ati wanoosani búrom oo eenomi Atijamit.) ⁵ Muusa nakaaneenkaan afiumaay di eluupey yati Atijamit búrom, bare oo aroka ceb. Burokab boola bukankaan nan káyiisen kati malegenam man Atijamit aate kasanken fáculey. ⁶ Bare man Apakenaau Áamakau oo nakankaan Añiil afiumaay arungumi fiilaf fati Atijamit búrom. Wulaal eenomi bukanool, úkoliutaajaat ban nubajaal fúgolumaf di Apakenaau Áamakau. ⁷ Moo kaane, nan man Búyegetab Bátienaab buregumi eeno, “Jaat, nampi jijammi furimool, ⁸ takum jisayen úyegetuul nan man kufannaaniŋuul kalateenumi, nanan nati kayinkoorak di baŋaanab. ⁹ Boo kufannaaniŋuul kuyinkammi ban di kujukumi barokerab búmboom bati simit bukan kugaba. ¹⁰ Moo kaane mooliil di muriom matatat, ban nemmi, ‘Úyegetiil ulee di ínje man kulatumi ekaaney wan iregeiimi.’ ¹¹ Ínje di riammi ban nibaat kabaat, ‘Kootut kanokender bee di fuyoolaaf fúmboom.’” ¹² Kutiom, jíkaanum! Takum hani ákon di muyuul abaj kawoonoor kájakaatie mba úyeget ugaba waatumi ekaanooley man akat bálamuk Atijamit aroŋaau. ¹³ Joote káliŋenoor funakoofunak, funak fanoosani farabumi takum hani ákon di muyuul búyegetool busay man majakutam mubuntooruul. ¹⁴ Mati wulaal búrom unampooraale di Apakenaau Áamakau, usofaajaat lit fúgolumaf fan ubajaami kabiñoo di fúcitumaf bee di fúbanumaf. ¹⁵ Nan man furimaf fati Atijamit furegumi, “Jaat, nampi jijammi furimool, takum jisayen úyegetuul, nan kalateenumi. ¹⁶ Bukei ma, kajammi furimaf fati Atijamit ban kulateenoomi? Mante lee buku Muusa arungeenumi kápurumul di mofam mati Misira? ¹⁷ Di bukei Atijamit rioomi wáriiŋe simit bukan kugaba? Mante lee buku kakammi majakut, wiiŋaw wooliil wommi di baŋaanab? ¹⁸ Kama bukei ma kan Atijamit abaatumi man aanumi kootut kanokender fuyoolaaf foola? Mante lee buku kañoosoomi? ¹⁹ Ñaa nujukaajuk mati bukan kukila kuŋoolenut kunoken mati káfiumaataak kooliil.

¹ Fuyoolaaf fan Atijamit áligeenumi foofu bo bee jaat, moo kaane nootaale kákaanum, takumbi an ágaloor man ábajaati fuyoolaaf fukila. ² Mati nujamaajam furimaf fajakaaf ufe, nan man koo kujameenumi eeno. Bare furimaf ufe fubilut fubaj fúkaw bee di bukoo. Mati kujameenjam fo bare kubilut kúyinen di fo. ³ Wulaal káyinenumi ceb ootaale kanoken fuyoolaaf fukila. Nan man Atijamit ammi, “Ínje di riammi ban nibaat yém, ‘Kootut kanokender bee di fuyoolaaf fúmboom,’” handeneen burokab boola bubamban káŋarum no’ona di butuukab bati dúniyaay. ⁴ Mati nasankensanken ticeen mati funakaf futokey di fugabuntenaf fati di funoomaf, nammi, “Ban nayoolomi di funakaf futokey di fugabuntenaf di burokab boola búrom.” ⁵ Ban nalaañumi aregumi inki mati, “Kootut kanokender fuyoolaaf fúmboom.” ⁶ Mo’omu mufelumi mati bukaaku koote kanoken dó di fo. Bare katooŋeenumi kujam furimaf fajakaaf ufe kuyabut fuyoolaaf fukila, mati kúyinenutufo. ⁷ Ñaa Atijamit alaañumi ajuumen funak fuceen fan eenomi, “Jaat”. Simit sajuupoe nan púrutomi Atijamit násankenumumi Dauda mati mo’omu, nan man furimaf fan iregenumi iban, “Jaat, nampi jijammi furimool, takum jisayen úyegetuul.” ⁸ Kaaneenjaat Yahosua aseneenumi bukanak kayoolo, Atijamit letasankeneen niceen mati funak fuceen fati kayoolo. ⁹ Moo manoosani, babaj funak fuceen fati kayoolo faate ebil bee mati bukanak kati Atijamit. ¹⁰ Mati anoosani ampi anokenumi di fuyoolaaf fati Atijamit panayoolo di burokab boola, nan man Atijamit ayoolomi eeno di boola. ¹¹ Moo kaane, mbi uraagalaal man unokenaal fuyoolaaf fukila, takumbi an alo nan man kañoosemi kukaaneenumi. ¹² Furimaf fati Atijamit furondoŋ ban fulegenolegeno, muyabam moolifo mufaŋe mati esagalaŋ. Foo fujisejis ban di funoken súj ban suutas di úyegetaw sommi, ban poop ban súukas di ucembaw poop sommi, bee nampi furimaf foola fumanjumi wan bukanak kuwoonoorumi di wan kumaŋumi di sísigiriil. ¹³ Bajut di butuukab búrom bampi baŋoolene buyofo di Atijamit. Wanoosani woowu di baŋaanab pararar di bújonlenab boola. Wulaal búrom ootaale eregool wan ukaanaami. ¹⁴ Moo kaane, wulaal ubajaami Ásimena Áamak ájawumulomi di bukinab bajakaab Yensa, Añiilau ati Atijamit, mbi uŋoonaal lit wan ufelaami úyegetolaal man uregenaami mati oo. ¹⁵ Ásimenaau ume oo letaŋoolen áyiisen kabonket kati kálaamo’olaal. Mati nayinkiyink di buruŋ banoosani nan wulaal, bare akaanderut majakut. ¹⁶ Moo kaane ñátum di fúgolum mbi úriiŋaal di ejunkutey yati majakam, mambi ubajaal kabonketak di majakam moola bee karambenolaal di nanan nan ceeŋumi. nolaal di nanan nan ceeŋumi.

¹ Ásimena áamak anoosani amukenimi man aramben bukaaku di eseney kawulak di búsimenab booliil bee di Atijamit mati majakutiil. ² Akila aŋoolenumi abuntoor jak kamanjutumi di poop kañoosemi. Mati oo di fúko’ool nálaamolaamo nan kukila. ³ Moo kaane naate esen búsimen, bee mati majakutool di fúkoumo di bee mati bukanak. ⁴ An letaŋoolen asenooro kálebien man alako di fujuumaf fati ásimena áamak. Atijamit ceb awonkulomi akila, nan man awonkulomi Aaruna eeno. ⁵ Moo mákonam, Apakenaau Áamakau asenoorout kálebien kukila man abil akaan ásimena áamak. Bare Atijamit amukenool, aanoomi, “Au Añoolom, jaat ínje di fúko’om eenomi ampai.” ⁶ Atijamit nalaañ areg ticeen mati, “Au nukankaan ásimena áamak ati bándoorey, riiboor nan Melikisedek.” ⁷ Nan Yensa alakomi baabe di dúniyaay, ninsi nalaw, naceeŋ di móro di búruurenab báamak Atijamit, aŋoolenumi apakenool di ecetey. Atijamit nayayab kúlawak koola, mati kákoliak kan abajumi bee di oo. ⁸ Handeneen man akammi Añiilau ati Atijamit, naliikenumi ekaaney wan Atijamit amaŋumi kápurumul di bugaalab boola. ⁹ Ñátum di mo’omu, Atijamit nakaanoomi Ásimena Áamak áliroore, ban nabilumi akaan múpakuma mati epakey yati bándoorey bee di bukanak búrom kakaanemi wan aregumi. ¹⁰ Atijamit amukenoomi di ekaanool Ásimena Áamak riiboor nan fiilaf fati Melikisedek. ¹¹ Babaj wajuupoe wan oote ereguul mati mukaanaam ume. Bare mútaañitaañi bee efelumo mati jiwaakenut kálaul. ¹² Iñeme muyuul súm jooteene ekaan kuliikitena, bare hani bee iñeme cenceeŋ man jibaj aceen aate kaliikitenuul sílingaas sítiyaaras kápurumul di furimaf fati Atijamit. Cenceeŋ man jiraaf miil lee sinaaŋ. ¹³ Anoosani ároŋumemi ñátum di miil, an akila fumanjaf foola fati furimaf fati majoonam fúloiut, mati oo añiil ceb oomu bo karaaf. ¹⁴ Bare sinaaŋ kunifaan kukiluso, mati kaliikitenimi man kumanj majoonam di majoonutam.

¹ Wulaal ootaale ekat bálamuk kaliikitenak kútiyaarak mati Apakenaau Áamakau, bare nuja’aal bee di kaliikitenak káriiŋaak di kálaulak koololaal. Ootutaal enen fúlakenuma fuceen fati kátiiwoor kápurumul di burok bujand di fati eneney yati kafiumak koololaal di Atijamit. ² Wulaal ootutaal kalanlanken di kaliikitenak mati mukaanaam mati kátiigulenak, di karembenak kati uñenaw, mati káyitoulak di kacetumi, ban mati kagamenak kati bándoorey. ³ Wo’owe woo nuja’aalemi bee ekaaney súumujaat di Atijamit. ⁴ Bare leeŋoolen kaan man an aŋoolen álaañenul kakatumi kafiumak kooliil bálamuk man kútiiwoor kukat bálamuk majakutiil inki? Kalakoeenumi mawuŋam mati Atijamit kuban, ban di kujaken kawulak kati bukinab bajakaab, ban poop kuyabumi bucaab bati Búyegetab Bátienaab. ⁵ Kujakenjaken majakam mati furimaf fati Atijamit di wánkumaw wati nanan nábileuumi, ⁶ ban kulaañumi bálamuk di Atijamit. Leeŋoolen kaan man kútiiwoor kukat majakutam, mati buku kufaaŋenumi Añiilau ati Atijamit di ébaarey yati búpinab ban di kupuñenool di fáculey yati bukanak. ⁷ Kalaak kan emitey elubenemi manteer kúsuum ewañ ban di kuliilen muriaay majake bee di kuwañaak. Kalaakak kukila koo Atijamit atoopenemi. ⁸ Bare kaanjaat kalaakak koo kaliilenumi úlind di utanja ceb, koo kubajut fúkaw, koo pambienumi. Di múlamukaam, kalaakak pambikureemeni. ⁹ Kúpaalumom, handeneen wúli man usankenemiñaa mo’omu, nubabaj kágolum mati muyul bukooku di fujuum fákoyume faate éŋaruluul epakey. ¹⁰ Atijamit álaañeriit di an. Létajimurer burokab ban jikaaneenumi mba kamaŋak kan jíyiisenumi bee mati akila di epebey yan jipebumi kupaaluul kuriiba, nan man jikammi bee mo iñeme. ¹¹ Wúli numammaŋ man anoosani di muyuul mbi abaj fuuñ fati eliim di káyiisen bee mo di fúbanumaf, manteer waafaw wan jígolummi mbi ubil ukaan malegen. ¹² Wúli numammaŋ muyuul takumbi jílaamo, bare mbi joono nan káyinenumi di kamuutenumi, mbi jiyab wan Atijamit áligumi. ¹³ Nan Atijamit áligeenumi Iburehima, mati abajut afaŋumi kákalaa di oo ampi ábaatumumi, ñaa nábaatumumi di fúko’ool, ¹⁴ nammi, “Malegen paniwuluul kásuumaayak ñátum di eseni úwoloorum wajuupoe.” ¹⁵ Iburehima nalako ekobey di kamuuten, nayayab wan Atijamit áligeenoomi. ¹⁶ Malegen bukanak kúbaatumebaatum ñátum di kareesak kati afaŋiimi katebo di kúkoiil. Ban kabaatak kukila koo kubanemi siñoosooras. ¹⁷ Ñaa nan Atijamit amaŋumi man áyiisen faŋ kátien mati wan áligumi bukanool woo léturuŋuli, ñaa nabenenumi di báligab ñátum di kabaatak. ¹⁸ Atijamit násenolisen báligab boola di kabaatak koola. Ure rigabaar ríruŋulooreriit mati leeŋoolen kaan man Atijamit agaajoor. Moo kammi, wulaal kajawemi bee di oo di eñes kákolokoto, nootaale ebaj káliŋen kunkul, mati panuŋoolenaal usofaal báligab boola ñátum di fúgolum. ¹⁹ Fúgolumaf ufe fukankaan nan éjuumenuma yati suutolaal. Fúgolumaf ufe fúlinliŋ ban di fútien faatumi kájeetumolaal man unokenaal ñátum di kaful káyini kati di bukinab bajakaab bee di síndeneey yati fukobaf fáñiiaaf fati Atijamit. ²⁰ Mati Yensa di fúko’ool ataatumi anoken dó, ban nabilumi akaan ásimena áamak ati bándoorey riiboor nan Melikisedek.

¹ Melikisedek ume akaaneenumi áyiau ati Salem di poop ásimena áamak ati Atijamit Afaŋumi Katebo. Akila kúkamboorumi di Iburehima nawuloomi kásuumaayak koola, nan Iburehima alaañulomi di ebujey kúyiak di futiikaf. ² Iburehima nápurenumi jakaay yati wanoosani asen Melikisedek di wan abajulomi di futiikaf. Kareesak wan kufelumi woo eenomi, áyi ati majoonam, ban oo eenomi áyi ati Salem, yoo eenomi, áyi ati kásuumaay. ³ Akila abajut ampaay abajut iñaayaay, abajut kátuk. An amanjut nan awoli mba nan acete. Oo naanosaano nan Añiilau ati Atijamit, panarulen di ekaan ásimena bee bándoorey. ⁴ Ñaa nujukaajuk buu nákalaami eeno! Afannaaniŋolaal Iburehima an ajamomiñaa remo, asenoomi jakaay di wan abajulomi di futiikaf. ⁵ Kúsimenaak kan eenomi úwoloorumaw ukila wati Lewi, sílingaas sati Muusa síjaatikeniijaatiken man kuyab jakaay di bukanak kati Isirael búrom, kan eenomi kuti’iil, handeneen man kuwooguñaa ban koo poop úwoloorumaw wati Iburehima. ⁶ Bare Melikisedek ume an umanje kuwoogut waaf di buku, nabilumi ayab jakaay di Iburehima ban nawuloomi kásuumaayak koola bee di Iburehima aseneenimi báligab. ⁷ Bajut kamanteer mati anau asenumi kásuumaay oo afaŋumi kákalaa ayabukomi. ⁸ Kúsimenaak kuyabeyab jakaay di bukanak kaatumi ecet. Bare mati Melikisedek oo narondoŋ ban nayabumi jakaay. ⁹ Benento, panuŋoolenaal uregaal mati úwoloorumaw wati Lewi, kayabemi jakaay, di kucammi Melikisedek jakaay kápurumul di afannaaniŋiil Iburehima. ¹⁰ Mati nan Melikisedek kúkamboorumi di Iburehima, Lewi oo bawolooruti. ¹¹ Di múlamukaam, kápurumul di úwoloorumaw wati kúsimenaak kati Lewi sílingaas sisenisen bee di bukanak kati Isirael. Ñaa kaanjaat burokab bati kúsimenaak kukila búlirenliren moo leebajeen ásimena aceen aate épurul, kápurumul di fiilaf fati Melikisedek, kaanut fiilaf fati Aaruna. ¹² Nan kúsimenaak kutitimi, kama poop cenceeŋ man sílingaas sititi. ¹³ An moola oomaami di kasankenak oo ati di fiil fuceen nápurumulo, fan umanje bajurerut di fiil fukila kamiiceelaet nan ásimena hani ákon di fúsimenaf. ¹⁴ Wulaal búrom numanjaamaj mati Akiiyaolaal oo ati di fiilaf fati Yúda nápurumulo, ban Muusa aregurerut fiilaf fukila mati kúsimena pánkupurumul. ¹⁵ Wáyiisenumi wafaŋumi man útiene, nan ásimena aceen ajawulo di búyesoorab bati Melikisedek. ¹⁶ Akila abilumi akaan ásimena, riiboorut di wan sílingaas siceeŋumi oo aate ekaan an ati di fiilaf fati Lewi, bare kápurumul kánkumak kati eroŋey yoola yati bándoorey. ¹⁷ Mati furimaf fati Atijamit foone, “Au eenomi ásimena ati bándoorey, riiboor nan fiilaf fati Melikisedek.” ¹⁸ Ujikerujaat dáare, kájaatikenak kufaanak kupanenipanen mati man kúliŋutumi ban poop kubajut fúkaw. ¹⁹ (mati sílingaas sati Muusa siŋoolenut sikaan waaf úliroor.) Ulaañaajaat ujikerumaal dáaru, babaj fúgolum fafaŋe man fujake fampi fáñakulolaal úpumulaal ulofaal Atijamit. ²⁰ Benento, babaj kabaatak kan Atijamit aregumi. Bajut kabaatak kaanoe mo’omu kajuumeni nan bukaaku kubilumi kukaan kúsimena. ²¹ Bare Yensa ceb najuumenijuumen man akaan ásimena ñátum di kabaat nan akila Atijamit ammi, “Ínje, Akiiyaau, nibabaat ban letiwoonoor uceen! ‘Au ásimena ati bándoorey.’” ²² Mati kabaatak uke, Yensa nabilumi akaan aate ejuum mati kasofoorak kafaŋumi man kubaje fúkaw. ²³ Bajeembaj kúsimenaak kawuuje kujuupoe, mati aamu acetujaat aamu naŋar fujuumaf foola. ²⁴ Bare Yensa panasof fujuumaf foola fati ásimena bee bándoorey, ban burokool di bukaan ásimena bootut étip bee di aceen. ²⁵ Moo kammi naŋooleŋŋoolen bee kapaken bukanak bee nanoosani kalofumi Atijamit kápurumul di oo. Mati narondoŋ bee bándoorey di ekaan alawa atitoora bukanak di Atijamit. ²⁶ Fanfaŋ man jake man ubajaal ásimena aanoe mo’omu. Mati oo áliroorumi, abajut kabet. Oo ápajuloorimi di kukaana majakut, ban natebenimi bee di bukinab bajakaab. ²⁷ Aceeŋut bee ekaan búsimen funakoofunak nan kúsimenaak bukaaku man kukaanemi eeno. Mútiyaaram ásimenaau anoosani nakankaan búsimenab bee mati majakutool, mbi kiti bee mati majakutam mati bukanak. Bare Yensa násimenooromi bee mati majakutiil ñákon ban kare, nan asenooromi man acetumi. ²⁸ Malegen, sílingaas sijuumenijuumen bukan káliroorutumi man kukaan kúsimena. Bare Atijamit ñátum di furimaf fati kabaatak koola, fabilumi múlamukaam sílingaas, najuumenumi Añoolool. Akila abilumi akaan ásimenaau áamakau álirooraau bee bándoorey.

¹ Fúkaaf fati wan isankeneñaa foo eenomi, mati nubajaabaj ásimena áamak aanoe nan akila, ammi man alakoe di báridab bati ejunkutey yati Atijamit Afaŋumi Katebo di bukinab bajakaab. ² Ban namiiceelaetumi di fukobaf fáñiiaaf, foo eenomi éguutey yalegenaay yan an ajuumenut leejaat Atijamit. ³ Mati ásimena áamak anoosani najuumeneijuumen bee ekaan búsimen di poop esen kawul. Cenceeŋ man ásimenaau áamakau ume poop man asen waaf di wan abajumi. ⁴ Kaanjaat oo oomu baabe di dúniyaay uye, letayajen bee ekaan ásimena jáng. Mati baabe babaj kúsimenaak kasenemi kawulak nan man sílingaas sati Muusa siregumi eeno. ⁵ Handeneen fukobaf fáñiiaaf tan kumiicelaetumi foo fuyesooyesoor ban fukankaan nan yáalinda ceb di fati bukinab bajakaab. Moo kaane nan Muusa ajonjoorumi bee kajuumenak kati Éguutey Yáliroorey, Atijamit ájaatikenoomi man aanoomi, “Úkaanum man ujoonenuyo siyesoor di yan íyiisimi di fúlankiinaf “ ⁶ Bare iñeme, Apakenaau Áamakau amukenimi man akaan burok bafaŋumi man bubaje fúkaw bati bukan kamiiceelaetumi di sílingaas sati noo. Mati oo atitooraau ati kasofoor kákoyume mati kujuumenijuumen di bálig bákoyume. ⁷ Kaaneenjaat kasofoorak kútiyaarak kubajut kabet, leeceeŋeen man kubaj kasofoorak kugabuntenak. ⁸ Bare Atijamit oo di fúko’ool najujuk kabet di bukanool nan ammi, “Kunakak pánkuriiŋ, Akiiyaau nammi, nampi ijuumenumi kasofoor kunkul di bukanak kati Isirael, di bukanak kati Yúda, ⁹ Kasofoorak uke leekuyesoor di kasofoorak kan ikammi di kufannaaniŋiil funakaf fan isofiimi ñátum di kañenom man irungiil ípuren di mofam mati Misira. Mati koo kuñoñoos kasofoorak, ban ínje poop nikatiibomi, Akiiyaau nammi. ¹⁰ Kasoofoorak uke koo nije’emi bee kajuumenak di bukanak kati Isirael di kunak kukila kubanumi, Akiiyaau nammi. Ínje panikaan sílingaas súmboom di úyegetiil, ban niciikuso di sísigiriil Panikaani Atijamit ooliil koo koote ekaan bukanom. ¹¹ Ban kootut kaliikitenoor kupaaliil mba aceen di atiool, nammi, ‘Manj Akiiyaau,’ mati bukanak búrom koote emanjom, kápurumul bukanak kasofutimi di waaf bee di kasofimi di waaf. ¹² Mati ínje eete ebaj kabonketak bee di majakutiil, ban letiwoolourer majakutiil. ¹³ Nan asankenumi mati kasofoor kunkul, moo yíisenyiisen kasofoorak kútiyaarak kubamban. Ban wafanlenumi ban ubajut fúkaw woo pánujim meej.

¹ Kasofoorak kútiyaarak kubabaj sílinga bee kamiiceelaet Atijamit di éguut yáliroore yammi di dúniyaay poop moo. ² Babaj upan ugaba di yo, kapanak kútiyaarak kati yo kan kuwonkemi tan líroore, babaj dó éjuumenuma yati síwuŋenumaas, taabuley, di poop kúmbuur káñiie kanenimi bújonlenab bati Atijamit. ³ Bálamukab bati kaful káyine di éguutey, kapanak kugabuntenak kan kuwonkemi tan faŋumi man líroore. ⁴ Di tan tálirooruñaa babaj dó jiremb jati sáni tan búsiifet bati bubaliin bukooreneimi, di fucees fati kasofoorak fakarenimi sáni babaj dó, jiruum jati sáni dán manna yaayu yommi, di egoley yati Aaruna éjaatoorumaay yareebumi, ban di kukoobaak kugabaak kubampuñak kati kasofoorak kuciikimi. ⁵ Fatiyaay yati fuceesaf, di bajumi watuukimi wan koonemi Cerubim. Ulegaw wooliwo wáyinumi káfinumaak kati fuceesaf fati kasofoorak. Bare letuŋoolenaal man uregaal uruñaa dákon-dakon. ⁶ Nan do’odu búrom dílakodomi, ásimenaau kiti nanoken nápur di kapanak kútiyaarak kati éguutey di ekaaney burokab booliil bati kamiiceelaetak nan man buruŋab booliil buceeŋumi eeno. ⁷ Bare kapanak kugabuntenak kati éguutey ásimenaau áamakau cebool pat ñákon di emit, ban áje’eriit dó bájeetumut fúsim. Fúsimaf fukila foo násimenemi bee mati majakutool di poop bee mati kakaanemi majakutam banoonut. ⁸ Búyegetab Bátienaab búyiisenyiisen tíen kápurumul di mo’omu mati buruŋab bajawumi bee kapanak kugabuntenak kati éguutey leebubaj, kaanjaat kapanak kútiyaarak kuwambenwamben. ⁹ (uru búrom kankaan káyiisen kaatumi bee kabajoak jaat). Mo’omu múyiisenumi mati kawulak di búsimenab bakaaneimi bee di Atijamit buŋoolenut butilul búyegetab bati amiiceelaeta búliroor. ¹⁰ Kájaatikenak uke kujunjuum di ekaaney mati muria, muraana di eposey yanooyani yati katilulak. Soo búrom kankaan mukaanaam mati téeŋey salakobomi sifanlen bala’a sunkulas sibil. ¹¹ Bare Apakenaau Áamakau ajawulomi nan ásimena áamak ati waafaw wajakaaw wajawulomi. Nanokenumi di éguutey yammi di bukinab bajakaab yafaŋumi man ékalaae ban di éliroor, (yan an ajoonenut ñátum di kañen, yéele di butuukab bati dúniyaay) ¹² Apakenaau Áamakau nánokenunnokenum ñákon ban kare bee di tan faŋumi man líroore, bare lee di fúsimaf fati sijaameen di mint. Naŋarumi fúsimool ñátum di fo náŋarulolaami epakey yati bándoorey. ¹³ Káliisenak kati fúsimaf fati sijaameen, kúmuuna, di kábump kati jiyaan kutilulumi kasikomi, manteer mbi kuŋoolen kútien. ¹⁴ Jiwoonooraal jak buu fúsimaf fati Apakenaau Áamakau fafaŋumi man fubaje kánkum panfutilul úyegetolaal kápurumul di mukaanaolaal máŋareuumi ecetey man uŋoolenaal umiiceelaetaal Atijamit aroŋaau. Mati kápurumul di kánkumak kati Búyegetab Bátienaab bati bándoorey, Apakenaau Áamakau násimenoorosimenooro bee di Atijamit nan búsimen báliroore bee mati majakatolaal. ¹⁵ Moo kaane oo eenomi atitoora ati kasofoor kunkul, manteer kawonkimi búrom bee di oo mbi kuyab bulaañab báligimi bati bándoorey. Mati Apakenaau Áamakau nacecet bee kapaken di kúnagak kati majakutam man kukaaneenumi nan kulakomi kariiben kasofoorak kafanlenaak. ¹⁶ An aciikujaat buu fubajaf foola foote ebaaji oo bacetoorut, fubaj fukila leefubaaji manteer acetujaat. ¹⁷ Wan aciikumi woo ubajut kánkum mati aciikumi oo boo man aroŋe. ¹⁸ Moo kaane hani kasofoorak kútiyaarak kujuumenijuumen ñátum di fúsim. ¹⁹ Nan Muusa di fúko’ool áriiŋenumi bukanool mati sílingaas búrom sati Atijamit, naŋarumi fúsimaf fati mint di fati sijaameen nagaasoorumi di mumel, ban náliisenumi búkaay yati sílingaas sati Atijamit di bukanak búrom ñátum di buful báyeme di waan wati etojey yati hisop. ²⁰ Nammi, “Ure eenomi fúsimaf fati kasofoorak fan Atijamit ájaatikenuumi.” ²¹ Moo mákonam nalaañumi aŋarufo man alanjen éguutey búrom yo di wambaraw wándomi wacookooreimi di kamiiceelaetak kati Atijamit. ²² Malegen, panuŋoolenaal uregaal mo’omu, nan man sílingaas sati Muusa siceeŋumi, wajuupoe ñátum di fúsim utiluleimi. Éyuey yati fúsimaf ebajoutujaat kabonketak kati majakutam leekubajorer jáng. ²³ Moo kaane éguutey yammi di dúniyaay uye di wanoosani wándomi siyesooyesoor di wammi di bukinab bajakaab, wooteene katiluli ñátum di fúsimaf fati sínukuruŋas. Bare wálirooraaw wammi di bukinab bajakaab wooteene katiluli ñátum di búsimen bákoyume fúsimaf fati sínukuruŋas. ²⁴ Mati Apakenaau Áamakau anokenut bee di éguut yan an ajoonene di kañen, yesoor di yalegenaay. Bare nanokennoken bee di bukinab bajakaab fúkoubo, boo iñeme narajulolaaraj di bújonlenab bati Atijamit. ²⁵ Kaanut poop nan Apakenaau Áamakau beesi éyu fúsimool nanoosani nan man ásimenaau áamakau ammi di dúniyaay anokenemi tan lírooraay emitooemit ban náyu fúsimaf fakaanut foola. ²⁶ Kaaneemmojaat Apakenaau Áamakau panaceteen nanoosani káŋarum no’ona di butuukab bati dúniyaay. Bare lee mo, narajuloraj ñákon ban kare, di fúbanumaf fati dúniyaay bee kápuren kánkumak kati majakut bee bándoorey ñátum di ecetey yoola nan búsimenab bee mati wulaal. ²⁷ Nan man Atijamit áligumi eeno, anau mbi acet ñákon, ban najuum bújonlenab bati bagamab. ²⁸ Moo mákonam Apakenaau Áamakau nacecet ñákon nan búsimen bee kápuren majakutam mati bukanak kajuupoe. Pánalaañul lee mati ekaaney waaf di majakutolaal. Bare pánajeetumul epakey bee di kammi di ekobooley. bee di kammi di ekobooley.

¹ Sílingaas sati Muusa sikankaan nan yáalinda yati waaf walegenoe wáje’euumi. Yáalindaay fúkouyo ekaanut waafaw walegenaw, mati búsimenab bakaaneimi emitooemit, leebuŋoolender busen katilul káliroore kalofumi man kumiiceelaetemi Atijamit. ² Buŋooleneenjaat, búsimenab bukila pankuyooloeen ekaaney yati bo, mati kamiiceelaetumi pankutiluleeni ñákon ban kare, kawoonoor kati mukaanaam mooliil majakutam pánkupurenieen di bukoo. ³ Bare moo manoosani búsimenab bakaaneimi emitooemit búwolenuma mati majakutiil. ⁴ Mati fúsimaf fati kúmuuna mba sijaameen leefuŋoolen fúpurender majakutam. ⁵ Moo kammi, nan Apakenaau Áamakau abilumi bee di dúniyaay uye, nammi, “Búsimen di kawul doo lee wan umaŋumi, bare nutuukammi eniil mambi ikaan wan umaŋumi. ⁶ Au súumeriit bee di búsimen bareemeni di kawul kaseneimi. ⁷ Ñaa ínje nemmi, ‘Wóoy Atijamit, ínje nijawulojaw bee ekaan wan umaŋumi,’ nan man ciikimi mati ínje di búkaay yati sílingaas sati Muusa. ⁸ Apakenaau Áamakau aregumi, “Au umaŋut búsimen di kawul mba ñátum di kawul kareemenimi di kawul kakaanimi bee mati majakutam” (handeneen sílingaas sati Muusa wan siceeŋumi). ⁹ Nabenentomi man ammi, “Wóoy Atijamit, ínje nijawulojaw bee ekaan wan umaŋumi.” Nafalenfalen kasofoorak kútiyaarak man ajuumen kasofoorak kugabuntenak. ¹⁰ Mati Yensa Apakenaau Áamakau akammi wan Atijamit amaŋumi, wulaal búrom utilulaalimi di majakutolaal ñátum di asenooromi nan búsimen ñákon ban kare. ¹¹ Balayoobalay ásimena anoosani oomu man ajuume di ekaan burokab bati kamiiceelaet, ban narulen di esen búsimenab bákonab. Bare búsimenab bo’obu buŋoolenut búpuren majakut. ¹² Bare Apakenaau Áamakau ásimenooromi ñákon bee mati majakutam mati bukanak ban nalako di báridab bati Atijamit. ¹³ Too nammi man alakoe ekob bee nampi Atijamit akammi kulatoorool fútobojumaaf fati úkamunaw woola. ¹⁴ Ñátum di búsimenab boola bákonab ceb nálirenumi katilulimi ñátum di bo nanoosani. ¹⁵ Búyegetab Bátienaab poop búyiisenolaami. Mútiyaaram nammi, ¹⁶ “Ure eenomi kasofoorak kan eetumi kajuumenak ínje di bukoo nampi nanan nikila niwuujumi, Akiiyaau nammi, Ínje eete ekaan sílingaas súmboom di sísigiriil, ban niciikuso di úyegetiil,” ¹⁷ ban nabenentomi nammi, “Ínje letiwoolourer majakutiil di bakaaneriil bajakut.” ¹⁸ Iñeme nan majakutam mubonketimi, moo ceeŋut bee ekaan búsimenab inki. ¹⁹ Kutiom, moo kaane wulaal nubajaami fúgolum bee kanoken tan faŋumi káliroor ñátum di fúsimaf fati Yensa. ²⁰ Náwambulolaawambul buruŋ bunkul, buruŋ baroŋe, kápurumul kafulak káyinimi, kan eenomi eniiley yoola fák. ²¹ Wulaal nubajaabaj ásimena áamak arungumi eluupey yati Atijamit búrom. ²² Moo kaane mbi ulofaal di bújolenab bati Atijamit, di úyegetolaal walegen di fúgolum fáliŋe fati kafium di oo. Mati úyegetolaal wasikomi síwoonoorolaal sajakutas sitilulitilul di poop siniilolaal sitilulitilul púl di melam mamokenut. ²³ Mbi uŋoonaal lit di fúgolumaf fan uregaami nubajaabaj, mati Atijamit afiumaay ban panakaan wan áligumi. ²⁴ Mbi uwoonooraal jak buu nootaale káliŋenoor di kamaŋ di poop di bakaaner bajake. ²⁵ Takumbi umoosaal ejojey tákon, nan man kupulenumi ekaaney. Bare jipebooraal líŋ man jijuumaal rat, mati numanjaamanj élaanuley yati Akiiyaau éloiut. ²⁶ Unoonaajaat man ukaanaal majakut bamanjerab malegenam ubanaal, búsimen buceen bulee bo bampi báfimen majakutam ume. ²⁷ Bare warinomi búrom woo eenomi ekobey di kákoli kagamen kábileuumi di bújeek bati sambun saatumi kakajen kalatumi Atijamit. ²⁸ Anau akajenumi sílingaas sati Muusa acetemi babajut kabonket nan agamenimi kaanjaat bukan kugaba mba kúfeegiir kumaate di wan akaanumi. ²⁹ Buu panfaŋ man kútekak kúkoolenie kálebienutumi Añiilau ati Atijamit? Kaheelenumi fúsimaf fati kasofoorak fakaanolaami úlirooraal. Mo’omu kankaan wajakut di kajel bee di Búyegetab Bátienaab, báyiisenolaami kabonketak. ³⁰ Mati numammanj aanomi, “Ínje emmi agalenaau, ban panigalen.” Ban nalaañ areg, “Akiiyaau pangamen bukanool.” ³¹ Kóolenikooleni máamak anau eloey di kañenak kati Atijamit aroŋaau. ³² Jiwoolo no’ona di kunakak kukila nan Atijamit akaanumi úyegetuul ufelo. Jimuutemmuuten bugaal báamak di mátaañie. ³³ Niceen kuceen di muyuul di kupuñeniil ban di kúsuutukeniil di fácul jameeŋey, ban niceen jinaamoor di bugaalab bati bukaaku. ³⁴ Jibabaj káboteniak bee di kakulimi dán bukanak kukuleimi, ban di súumuul man kubot fubajaf fooluul búrom, mati jimammanj tíen jibabaj fubaj fákoyume faate ecin bee bándoorey. ³⁵ Moo kaane takum jibeten fúgolumaf fooluul, fabajumi búgalen báamak. ³⁶ Muyuul joote kamuuten manteer mbi jikaan wan Atijamit amaŋumi ban di jiyab wan áliguumi. ³⁷ “Mati rinorino jasiinkun ceb man aatumi ebiley panabil ban letapiyen. ³⁸ Bare ajoonaau úmboom naate eroŋ mati kafiumak koola, ban nalaañumi bálamuk, yuutom elee di oo ban moola léemusuumom.” ³⁹ Bare wulaal unaamutaal di kalaañumi bálamuk di Atijamit ban di kújim. Nubajaabaj kafium káyiisenolaami tíen mati nupakaapak.

¹ Kafiumak kukaaneolaami tíenolaal mati wan úgolumaami, ban di kusenolaami káyiisenak kati wan uŋoolenutaami ujukooroaal. ² Mati kubabaj kafium, kufannaaniŋolaal kufiunfium Atijamit, náyiisenumi mati mooliil muyeoomi. ³ Mati nubajaabaj kafium, núlaulaalaul mati Atijamit nátuukuntuukum dúniyaay ñátum di furimool, wan ujukaaleñaa úpurumulout di wan ootaale kaŋoolen ujukaal wo. ⁴ Mati Abel nababaj kafium, nasenumi búsimen bee di Atijamit bafaŋumi man búriiŋe bati Kain. Atijamit di fúko’ool naŋarumi kawulak koola man áyiisen mati oo an ajoone. Handeneen Abel man acetumi nan piyoe, hani bee jaat nasankenesanken di wulaal mati kafiumak koola. ⁵ Mati Enok nababaj kafium, naŋarimi bee di bukinab bajakaab, takumbi ajaken ecetey. Moo kaane an ajukut biiŋool, mati Atijamit aŋaroomi. Furimaf fati Atijamit fúyiisenolaayiisen mati bala’a Enok aŋarimi, nakaanekaan wayeumi Atijamit. ⁶ Moo kaane kábajaataak kati kafiumak leekuŋoolen kukaan Atijamit man yeool. Mati anoosani ájo’ol alof di Atijamit naate abaj kafium mati nabajobajo ban oo asenumi kañeseoomi. ⁷ Mati Nuha nababaj kafium koo kukaanoomi man áyenten wan Atijamit agamoomi mati waatumi kabajoak fácul wan aŋoolenutumi ajukooro. Nakammi wan Atijamit aregoomi, ban najoonenumi busaana, ban oo di aseekool kúpakumumi. Ñaa karinomi di dúniyaay búrom kúfirenimi, ban Atijamit nasofoomi an ajoone mati kafiumak koola. ⁸ Mati Iburehima nababaj kafium, Iburehima nakankaan nan Atijamit awonkoomi man ajaw bee di mof múbuto man Atijamit áligumi esenool nan bulaañab boola, ban nápurumi ajaw bamanjut ban aate. ⁹ Mati Iburehima nababaj kafium, nacinumi nan ajaaburuŋ di mofam mábutoaam man Atijamit áligeenoomi. Nacinumi di éguut, nan man Siyaaka di Yankuba kucineenumi di yo eeno, koo kuyabumi báligab bákonab di Atijamit. ¹⁰ Iburehima nakankaan mo’omu, mati kúcilak koola kulakolako di ésukey yáamakey yan Atijamit di fúko’ool awoonoorumi ban nateepumi, yoo ebabaj kúlakenuma kati bándoorey. ¹¹ Mati Sirah nababaj kafium, oo di fúko’ool ayabumi kánkumak kati eŋarey búrooko, handeneen man afanlenumi remo. Nafiunfium Atijamit panakaan báligab boola. ¹² Moo kaane kápurumul di an ákon ceb, an moola mubanumi. Bare nabilumi abaj úwoloorum wajuupoe nan bootab bammi di kátula di poop nan kaluusak kammi di kafintak. ¹³ Bukanak búrom kafiummi di Atijamit kucecet, bayabut wan áligeneeniimi. Bare di kulakomi kamaayoor nan man kujukuwomi kápurumul ban lóie. Ban di kusofooromi mati koo kujaaburuŋ ceb di poop kúkolokotoaak di dúniyaay uye. ¹⁴ Bukanak kukila kasankenumi mo’omu kúyiisenyiisen mati koo kooku bo eñesey mof man umanje pankuŋoolen kukilumo. ¹⁵ Kulakoeenjaat kawoonoor mati mofam man kúpurumulomi, moo pankubajeen buruŋ bee elaañ bóot. ¹⁶ Bare, di kuraanomi mof muceen mákoyume, moo eenomi mof mati bukinab bajakaab. Moo kaane Atijamit apuñout man kuwonkool Atijamit ooliil, mati najooneniijoonen ésuk yáamak bee mati kukila. ¹⁷ Mati Iburehima nababaj kafium, nan Atijamit ayinkoomi, nasensen añoolool Siyaaka nan búsimen. Iburehima nayabeenumi báligab, ban najonjoorumi bee esen añoolool ákonau. ¹⁸ Handeneen Atijamit áligeenumi, “Siyaaka kápurumul di oo panubaj úwoloorumaw.” ¹⁹ Iburehima tíenootien mati Atijamit naŋooleŋŋoolen ayiten bukanak koo baceterab kuban. Panuŋoolenaal uregaal, Iburehima malegen nayabuloyab Siyaaka di kacetumi. ²⁰ Mati Siyaaka nafiunfium Atijamit, ban nalawumi Atijamit man asen kásuumaayak bee di Yankuba di Esau bee mati kajom yooliil. ²¹ Mati Yankuba nababaj kafium, nalawumi Atijamit man asen kásuumaayak bee di kuñoolool kúniinaak kati Esufa bala’a acet. Nároogomi di egoley éjaatoorumaay yoola ban namiiceelaetumi Atijamit. ²² Mati Esufa nababaj kafium, bala’a acet nasankenumi mati elaañey yati Kuisiraelak kápurumul mofam mati Misira. Tíenootien mati mo’omu, nájaatikeniimi man kootumi ekaaney woolaw woola eeno. ²³ Mati kafiumak kukammi man Muusa kuwolaool kuyofoomi wáriiŋe kuleeŋ kúfeegiir. Kujujuk añiilau najooŋoojooŋoor máamak, kaanutiil kákoli wan áyiau aregumi kukaan. ²⁴ Mati Muusa nababaj kafium, nan anifaanomi, nalatumi man bukanak kuwonkool añiilau ati Firauna añoolool anaaraau. ²⁵ Namaŋumi man kunaamoorumi di kásuutukenak kati bukanak kati Atijamit kóyume ebaj kásuumaak kati majakut. ²⁶ Muusa namammanj tíen mati emaŋ man agaal mati Apakenaau Áamakau yoo ékoyume ekil fubajaf fati mofam mati Misira, mati kúcilool kulakolako di wan Atijamit aatumi bee ecaamooley. ²⁷ Mati kafiumak koola, Muusa nápurumi di mofam mati Misira, bákoliut kañuumulak kati áyiau. Narulenrulen di kamuuten di enen fúgolumool di Atijamit ájukeriitimi. ²⁸ Kafiumak koola poop kukaanoomi ninsi naruuken káaningak kati Ewuujey yati Njalayiri. Náliisenumi fúsimaf fati sínukuruŋ di ucegaw, takumbi Njalayiri ebuj kuñiilak kútiyaarak kúniinaak kati Isirael. ²⁹ Mati kafiumak kooliil, bukanak kujawumi kútipumumi ñátum úkamunaw bee di kapan kaaku kati Falaf Fáyemaaf nan kommi di ejaay ban sayaay. Bare nan Kumisira kúliikenumomi di kúyoomudomi jaj. ³⁰ Bukanak kati Atijamit kubabaj kafium, nan kújawumumi kuŋooben ésukey yati Yeriko funoomaf búrom fo kuban, kukukak kati yo di kulomi jaj. ³¹ Mati ayeneta Rahab nafiunfium Atijamit, nawanlenumi kúmeeloaak kati Isirael jak. Moo kaane kubujutool di kañoosumi Atijamit. ³² Ñaa kama, waa neete elaañ ireg? Ibajeenut bee kasanken mati Gideon, Barak, Sanson, Yafet, Dauda, Samuel, di kuboñaak búrom. ³³ Mati bukanak buke kubabaj kafium, di kuŋoolenumi jáyiaj janoosani, ban di kurung di majoonam, ban di kujukumi mati báligab bati Atijamit búlirooliroor. Di kukammi simukooras takum sísaabul, ³⁴ di kukammi sambun sájeeke man sijinlen yem, ban di kúpakumumi di ebujiey di mulibaam. Kálaamoak kooliil di kubilumi kukaan káliŋe. Di kufaŋumi man kubaje kánkum di futiikaf ban di kucesoorumi kutiika kábutoe kutey kúpur. ³⁵ Kuseek bukaaku kacetumi kooliil di kúyitenulimi kúlaañenuliil bee di eroŋey inki. Bukaaku kúsuutukenisuutuken, ban di kulatumi kakateniil manteer mbi kúyitoul di kacetumi bee di eroŋ yákoyume. ³⁶ Bukaaku di kúnarulimi ban di kuteki ñátum di sisankil sábolie, ban di kukokenimi ñiwujañ ban di kunenimi dán bukanak kukuleimi. ³⁷ Man bukaaku di kuleebimi bakooba bee nan kuloe kucet. Bukaaku di kujisimi wáj, bukaaku di kubujimi ñátum muliba mabaake. Bukaaku di kukaanomi ubaŋ wati sisaha mba sijaameen, kulelek kugagaal ban di kúsuutukenimi. ³⁸ Dúniyaay uye eyajut man ewaleniil. Buku koo kúkolokotoa di baŋaanab di kúlankiin ban di kuyofo di úhorahoraw. ³⁹ Buku búrom Atijamit mooliil muyeoomi mati kafiumak kooliil. Bare kucecet bayabut wan Atijamit áligeeniimi. ⁴⁰ Mati Atijamit nasofeensof waaf wákoyume bee mati wulaal. Wan Atijamit amaŋumi wootut ekaan úliroor leejaat di wulaal.

¹ Mati wulaal, nubajaabaj kúyiisena kajuupoe kaŋoobenumi wulaal. Kama ñaa mbi úpurenaal wanoosani títiolaal kálaamoak di majakutam maŋoonolaami lit, mbi uteyaal di kamuuten kafannoorak kati jíteyaj jan kujuumenolaami. ² Wulaal ootaale kajuumen kúcilolaal di Yensa, mati oo ácitaau di álirenaau ati kafiumak koololaal. Namuutemmuuten kapuñak kati kafaaŋenoolak di ébaarey yati búpinab man acetumi. Wakammomi woo eenomi namammanj mati fáculey letapotoj. Ñaa iñeme oomu balakoe di báridab bati ejunkutey yati Atijamit. ³ Uwoonooraal di wanoosani wan amuutenumi búlatab ban kukaana majakut kukaanoomi takumbi úyegetiil újiisoor man jilaañ bálamuk. ⁴ Hani an ákon abujooruti di karaagalak kooluul mambi jipak di majakutuul. ⁵ Mante ñaa jíjinjim furimaf fati kabuntoorak fan Atijamit asankenumi bee di muyuul, kuñoolool? Nammi, “Añoolom, takum jimoos kakurak kati Akiiyaau, ban takum úyeget újiisoor nampi alakomi emakuuley. ⁶ Mati Akiiyaau nakurekur an amaŋumi, ban nateketek an asofumi nan añoolool.” ⁷ Joote kamuuten kakurak kati Akiiyaau, mati Atijamit nasofeuusof nan kuñoolool. Añiil alee bo ampi ampaool aatut ekur? ⁸ Kaanjaat muyuul bakate jikuruti, nan man kuñiilak koola búrom kukurimi, kama ñaa muyuul káatum ban muyuul lee kuñoolool. ⁹ Benento, wulaal nubajaabaj kumpaak baabe di dúniyaay kakurolaami ban núlebienaaliimi. Mante letufaŋaal man usofaale líŋ Ampaolaal ammi di bukinab bajakaab akaaneolaami uroŋaal bee bándoorey. ¹⁰ Kumpaolaal baabe di dúniyaay kukureolaakur di nan nátemie nan man kusofumi jajak. Bare Ampaolaal Atijamit oo nakureolaakur mambi rambenolaal, manteer mbi unaamooraal di káliroorak koola. ¹¹ Nan ubajaami kakurak, wulaal nusofaami koo kufaŋ man kútaañie kásuumaak. Bare di fáculey kakurimi ñátum di kútekak kaanoe mo’omu pankuŋar bacaam bati eroŋey yabajumi kásuumaay di man ukaanaal wajoone ban di ucinaal di kásuumaay. ¹² Moo kammi jijuum sem! Takum kújuuluul kuleleben. ¹³ Jirulen di ejaay di buruŋ bajoone, kabakomi takumbi kufaŋ man kugaale, bare di kusonteni. ¹⁴ Jipiinoor lit man jilako di kásuumaay di anoosani, ban jiñes man jiroŋ eroŋ yáliroore, mati anoosani áliroorutumi, letajuk Akiiyaau. ¹⁵ Jíkaanum an takum ágaloor man ábajaati majakam mati Atijamit. Jíkaanum takum an aano nan kufaar kati búraan koote éŋaruley bugaal bajuupoe mampi kusiken eroŋey yati anoosani. ¹⁶ Jíkaanum takum an akaan nan áraadia mba amanjutumi Atijamit nan Esau, anoomenumi fanifaanaetaf foola bee mati furi fákon ceb. ¹⁷ Nan man jimanjumi eeno, di múlamukaam, handeneen namaŋeemaŋ bee eyab kawulak kati ampaool, náfirenimi. Mati bajut wan aate ekaan man mukaanaam múruŋuloor, handeneen man alawumi ampaool di búruurenab di bóro. ¹⁸ Jíriiŋoorut, nan bukanak kati Isirael káriiŋumi, bee di waaf wan jiŋoolen jijuk ban di jigor, bee di fúlankiinaf fati Sinai tanat tan tabajumi bújeek bati sambun, di kurola kárimmi, di fárus, ¹⁹ di kayelak kati kasiin, di kálintak kati furim. Bukanak di kujammi furimaf di fusanken. Bare di kulawumi Atijamit man akatubo takum asanken inki, ²⁰ mati kuŋoolenut kumuuten kájaatiken karegimi, “Kaanjaat hani énukuruŋ yákon egore fúlankiinaf yoote eleebi sikooba ecet.” ²¹ Muusa wan kúcilak koola kujukumi ukoolenookoolen biyok aane, “Níkolikoli manteer insi ileleben.” ²² Bare jíriiŋuloriiŋ di fúlankiinaf fati Sion, bee di ésukey yáamakey yati Atijamit aroŋaau, bee di Yerusalem yammi di bukinab bajakaab, ban simaleeka similimiliyoŋas sijojenoorumi tákon. ²³ Jijawulojaw bee di fujojaf fati kuñiilak kútiyaarak kati Atijamit, kan ureesiil uciikimi di bukinab bajakaab. Jijawulojaw bee di Atijamit fúko’ool, an eenomi agamenaau ati bukanak búrom di poop bee di kajoonaak kálirenimi. ²⁴ Jijawulojew bee di Yensa, atitooraau ati kasofoorak kunkulak, an fúsimool fusankenumi wafaŋumi man úkoyume fati Abel. ²⁵ Jíkaanum takum jilat ejamey furimaf fati ammi di kasankenuulak. Kalatumi káyentenak anau áriiŋenumi kurimak kápurumulomi di Atijamit bee di dúniyaay, kupakenut. Ulataajaat anau ammi di kasankenak kápurumulomi di bukinab bajakaab, ootutaal epak. ²⁶ No’onu furimaf fati Atijamit di fúliliŋenumi yentaam, bare iñemeñaa nálilig mati, “Bare ñaa pánililiŋen lee re dúniyaay cebuyo, bare bee mo bukinab bajakaab.” ²⁷ Furimaf ufe fati “Bare lee re,” wan fufelumi woo eenomi wanoosani wati dúniyaay pánuliliŋeni, man wáliliŋeneriitimi urino. ²⁸ Moo kaane usalaal Atijamit mati nuyabuloyab jáyi jaatut bee káliliŋeni, ban mbi usenool kamiiceelaetak kalegenoaak, ñátum di kálebienak di kákoliak. ²⁹ Atijamit oololaal sambun sareemenemi jaj.

¹ Jirulen kamaŋoor nan man jikammi kuriibaak kati Akiiyaau. ² Takum jilat kawalenak kati kujaaburuŋ jak di sísindouul, mati di mo’omu kuceen kuwalenewalen simaleeka bamanjut. ³ Jiwoolo kammi bakuleriab dán bukanak kukuleimi, nan muyuul di bukoo jinaamoonaamoor di bo. Jiwoolo kásuutukenimi, nan muyuul di bukoo jinaamoonaamoor di ko. ⁴ Muyuul joote kálebien búyabaab, ban anoosani aate ere di aseekool mba ataool takum jisik bacaacab. Mati Atijamit panagamen kúraadia di kafintoemi kan kuyaboorutumi. ⁵ Takum jijuumen úyegetuul di emaŋ yati sígodi, jire di wan jibajumi. Mati Atijamit naane, “Létipururer di au ban poop letikatureri bálamuk.” ⁶ Moo kaane wulaal panuŋoolenaal uregaal di kágolum, “Akiiyaau eenomi arambenaom, ínje eetut kákoli, waa an aate kaŋoolen di ínje?” ⁷ Takum jíjim kurungauul, kaliikitenuumi furimaf fati Atijamit. Jiwoolo buu kuroŋenumi eeno, ban jiriiben fútaagul fati di kafiumak kooliil. ⁸ Yensa Apakenaau Áamakau oo eenomi ákonau fuken, jaat, bee bándoorey. ⁹ Takum jimaŋ man kaliikitenak kati kabuntak kanoosani kariiboorutumi di furimaf fajakaaf kuñakuul bee di mafos. Mati kóyume man jíliŋeni sísigiruul ñátum di majakam mati Atijamit, lee ñátum di kariiben sílingaas sati mati muria. Kasofemi sílingaas use rambenutiil. ¹⁰ Wulaal nubajaabaj fúsimen, fan umanje hani kúsimenaak kamiiceelaetumi éguutey kubajut bakooŋ man kuri bo. ¹¹ Ásimenaau áamakau ájeetummi fúsimaf fati sínukuruŋ bee di tan faŋumi man líroore nan búsimen bati majakut, bare sínukuruŋ sabujimi bee kareemeni téeŋey yati ban bukanak kucinumi. ¹² Mati mo’omu Yensa poop nababaj bugaal ban nacet téeŋey yati fúlamutaf fati ésukey man atilul bukanool ñátum di fúsimool. ¹³ Moo kaane mbi jija’aal bee di oo ban ammi téeŋey ban bukanak kucinumi, man unaamooraal kapuñak koola. ¹⁴ Mati baabe di dúniyaay wulaal ubajutaal ésuk yáamak yati ecin bee bándoorey, bare wulaal eñes ésukey yáamakey yaatumi bee ebiley. ¹⁵ Ñátum di karambenak kati Yensa, mbi urulenaal di esal Atijamit nan búsimenolaal, boo eenomi eregey yati mákalaam mati kareesool di fáculey yati bukanak. ¹⁶ Takum jiyoolo ekaaney majakam di poop kacaaboor di wan jibajumi, mati búsimenab bukila baanomi mo’omu búsuumesuum Atijamit. ¹⁷ Jikob kurungauul ban di jisen kúkouul bee di bukoo. Burokiil boo eenomi epooy yati suutuul. Mati koo bukan kaate eceeŋi di burokiil. Jikatiil man kukaan di kásuumaay, lee di bugaalab. Kaanutumojaat leerambenuul. ¹⁸ Mbi jirulen di élawoli, mati tíenolitien mati nubabaj úyeget wajoone, mati numammaŋ ekaaney waafaw wajoonaaw nanoosani. ¹⁹ Ínje oomu di elaw máamak man jibenen kúlawak kooluul bee mati ínje manteer mbi Atijamit áboñulom bee di muyuul iñemeeñeme. ²⁰ Emitey ekaan Atijamit ati kásuumaay, aŋoolenumi ayitenulomi Akiiyaolaal Yensa di kacetumi, amataau áamakau ati sisahaas, ñátum di fúsimaf fati kasofoor kati bándoorey. ²¹ Emitey ekaan Atijamit akaanuul jijonjoor di wanoosani wajakumi wan ceeŋumi mambi jikaan kamaŋak koola, ban mbi arok di muyuul man jikaan wampi wayeoomi kápurumul di kánkumak kati Yensa Apakenaau Áamakau. Mbi úlebienaal Apakenaau Áamakau bee bándoorey. ²² Kutiom, nilawuulaw máamak man jíkaanum wan iregeuuñaa di letara yátemie yan íciikuluumi. ²³ Muyuul joote kálaul mati atiolaal Timoti kúkatenulookaten dán bukanak kukuleimi. Áriiŋaaliujaat baabe pambiubil síñakon bee ejukuuley. ²⁴ Jisaafom kurungauul di bukanak kati Atijamit búrom. Kápurulomi di mofam mati Italia poop kusaafuul. ²⁵ Emitey ekaan Atijamit awuluul majakam moola bee di muyuul búrom. Amen.