GALATIA

GALATIA

¹ Ínje Paul, áriiŋena ati Yensa, emmi di eciik letaraay uye. Kayooŋ kuceen kati bukan mba kati fujuumaf fati ansansan, kumukenutom man ikammo, bare kati Yensa Apakenaau Áamakau di Atijamit Ampaau, ayitenumi Yensa di kacetumi. ² Ínje di kuriiba búrom nunampoonampoor man úboñul kasaafak bee di muyuul búrom kammi di kukobak kati Galatia. ³ Emitey ekaan Atijamit Ampaau di Akiiyaolaal Yensa Apakenaau Áamakau majakam mooliil di kásuumaayak kooliil. ⁴ Apakenaau Áamakau oo asenooromi fúko’ool nan búsimen mati majakutolaal mambi apakenolaal di dúniyaay uye yajakutey yan oomaamiñaa, nan man Ampaolaal Atijamit amaŋumi eeno. ⁵ Usalaal Atijamit bee bándoorey. Amen. ⁶ Wáaloanwaalo mati épurey yooluul di Atijamit yaŋ, awonkuumi ñátum di majakam mati Apakenaau Áamakau ban di jilaañ jísoful furim fuceen. ⁷ Malegen furimaf fuceenaf foo karees ceb fubaje. Babaj bukan kuceen kálaamenuul takumbi úyegetuul usof úlaul mati malegenam mati Apakenaau Áamakau. ⁸ Bare anoosani, handeneen wúli mba maleeka yápurulo di bukinab bajakaab, man ériiŋenuul furim fúbuto fanaamutumi di fan úriiŋenuumi, Atijamit mbi anum an akila mba maleeka ekila. ⁹ Nan man uregeenuumi noo eeno, ban panilaañumi isanken mo. Kaanjaat nan babaj an aceen aam di káriiŋenuul furim fúbuto fanaamut di fan wúli úriiŋenuumi, mbi anumi bee di sambunas sáceteriitumi. ¹⁰ Mante ínje kúcilak kati bukanak neem di eñesey mba mante kati Atijamit? Mante ínje eem di ekaan man bukanak súumiil ceb? Ikammojaat hani bee iñeme letikaaneen amiiceel ati Yensa. ¹¹ Kutiom, ínje eete ekaan man tíenuul mati furimaf fajakaaf fan íriiŋenuumi kaanut furim fati an. ¹² Mati furimaf fukila an asenutom fo ban poop an aliikitenutomufo, bare Yensa Apakenaau Áamakau asenammifo. ¹³ Mati muyuul búrom bajut ajamut man eenomi noo eeno nan ilakomi di buruŋab bati Kúyahuudak. Nikammi man kúsuutukenumi kati fujojaf fati Yensa eeno ñátum di kamingen ban hani niliikeenliik bee kakajeniil. ¹⁴ Kafiumak kúmboom di buruŋab bati Kúyahuudak, di kubilumi kúkalaa manteer kuwuuj kati kupaalom búrom kan uremi ban nibabaj fuuñ fati emaŋ man iraagal wan iŋoolenumi búrom bee kariiben mukaanaam mati kufannaaniŋolaal. ¹⁵ Bare Atijamit ápajulammi kabiñoo nan atuukammi, ban nawonkammi iyiiŋ ñátum di majakam moola. ¹⁶ Súumoosuum man áyiisenammi Añiilau oola, mambi iŋoolen íriiŋen furimaf fajakaaf mati oo bee di Kakaanutumi Kúyahuudak. Iceeŋut an man aregom waa neete ekaan. ¹⁷ Ijawut bee Yerusalem bee ejuk kúriiŋenaak bukaaku kamondammi, bare bajoonene taac bee Arabia mbi inki ilaañumi íbookoul bee Damasukos. ¹⁸ Bajumi simit sífeegiir, mbi kiti ijawumi bee Yerusalem bee bujukoor di Peter. Boo nilakomi wáriiŋe kunak bútinken. ¹⁹ Benento, úkamboorut hani ákon di kúriiŋena bukaaku leejaat Yankuba, Akiiyaolaal atiool. ²⁰ (Wan emmi di eciikuuley, titoorom di Atijamit lee fugaajoor!) ²¹ Nan púrutomi, niwuujumi bee di upanaw wati Siria di Kilikia. ²² Nanan nikila kuriibaak kati kujojak kammi Yúdea kuyahoorutom jícil. ²³ Koo mo’omu kujame di kureg, “Ansi ásuutukenolaami iñeme inki oo ammi di káriiŋenak kafiumak ko’oku kansi araagalumi bee kakajen.” ²⁴ Koo búrom di kulaañenumi Atijamit kasalak mati mákalaam moola mati ínje.

¹ Nan laañumi wuuj simit uñen di sibakiir ínje di Banaabas nulaañumi inki bee Yerusalem. Tiito oo poop síñakon nujawoore. ² Ujukujaat ínje ejaay bee bo, kankaan nan Atijamit náyiisenanyiisen man ijaw (bare nan íriiŋubomi nujukoorumi di kurungaak kati fujojaf síceboli, ban nimaŋumi man kúlaul) furimaf fajakaaf fan íriiŋenumi buku Kakaanutumi Kúyahuudak. Wan iteyutomi woo emmi takumbi waaf wóololi uwuujoor man burokab búmboom bulaañ bálamuk. Kammojaat pankaanom burok bati mée. ³ Tiito di fúko’ool arokoorom, hani man akaanumi Ágirik, an afafarenutool man atampi. ⁴ Bare mati kúyinenaak kubuntaak di kubuuyulomi kúnokenul títooroli di kúmeelo ban di kujuk kafeloak kammi di Apakenaau Áamakau Yensa. Di kumaŋumi kámingenoli nan kumiiceel man uriiben sílingaas sati Kúyahuudak. ⁵ Bare usenutiil buruŋ hani jasiinkun. Numammaŋ bee epooy malegenam mati furimaf fajakaaf mati muyuul. ⁶ Kurunga kuceen di fujojaf kusosof mati koo kubabaj fúkaw. (Bare ínje butumom bulee bo bukei eenomi bukoo mati Atijamit ápajuleriit.) Hani ákon di buku kubenenut to kurim bee di wan íriiŋeniimi. ⁷ Kujujuk mati Atijamit nasenansen fujuumaf man íriiŋen furimaf fajakaaf foola Kakaanutumi Kúyahuudak, nan man asenumi Peter man áriiŋen Kúyahuudak. ⁸ (mati Atijamit ammi károketumak Peter bee di Kúyahuudak oo ákonau ammi károketumak ínje bee di Kakaanutumi Kúyahuudak). ⁹ Ban Yankuba, Peter, di Yohan kan eenomi kukankaan nan sísagumaas sapebumi fujojaf fati kuriibaak. Nan kurungaak uke kujukumi mati Atijamit nasenansen kánkumak kati ekaaney burokab bukila, koo búrom di kúkaanolimi kurokooriil, Banaabas di ínje. Nujamoorumi mákon mati wúli panujaw úriiŋen furimaf fajakaaf ban Kakaanutumi Kúyahuudak kommi man kukila kujaw kúriiŋenufo ban Kúyahuudak kommi. ¹⁰ Wan kumaŋumi éregoli woo eenomi takumbi újim karambenak kalekaak. Ban mo’omu poop mulakolako di búyegetom. ¹¹ Bare nan Peter áriiŋulomi Antiok, niñoosooñoos bujuudoor, mati wan alakoeenumi ekaaney woo jakut jáng. ¹² Mati nalakoeenlako furi dákon di kúyinena Kakaanutumi Kúyahuudak, nan kuceen kan Yankuba aboñulomi kúriiŋulomi ceb, nayitomi galab apum ápajulo di bukoo, mati nákolikoli kúyinenaak Kúyahuudak kukila katampimi. ¹³ Kúyinena Kúyahuudak karinobomi koo poop di kukammi mamisam nan akila. Hani Banaabas di fúko’ool aŋoolenut apak di ekaaney mo’omu. ¹⁴ Bare nan ijukumi mati kulet di kariiben malegenam mati furimaf fajakaaf, niwonkumi man eenumi Peter di bújonleniil, “Au akammi Áyahuud di kawoliak, ukaanjaat nan au ukaanut Áyahuud. Ñaa kama buu panuŋoolen umingen Kakaanutumi Kúyahuudak man kukaan nan man Kúyahuudak kukaanemi eeno?” ¹⁵ Wulaal di kuko’olaal Kúyahuudak fák di kawoliak, ukaanutaal kukaana majakut nan Kakaanutumi Kúyahuud. ¹⁶ Bare numanjaamanj mati Atijamit ásoferiit an nan ajoone mati nariibenriiben wan sílingaas siceeŋumi, bare di kafiumak di Yensa Apakenaau Áamakau. Wulaal poop nubajaal kafiumak di Apakenaau Áamakau Yensa koo kukammi man Atijamit asofolaal nan bukan kajoone, bare lee mati kariibenak sílingaas. Mati Atijamit ásoferiit hani an ákon ajoone ñátum di ekaaney wan sílingaas siceeŋumi ¹⁷ Nan wulaal Kúyahuudak ulakaami eñesey buruŋ bampi Atijamit asofolaal nan bukan kajoone ñátum di kasofoor di Apakenaau Áamakau, man ujukaami wulaal poop kukaana majakut nan Kakaanutumi Kúyahuudak. Mante mo’omu múyiisenolaami mati Apakenaau Áamakau akaanolaami man ukaanaal majakut? A’a, lee mo! ¹⁸ Bare sílingaas sati noo san ikateenumi kafiumak iban nilaañ íŋarul so igalo, ikammojaat níyiisenooroyiisenooro áyuura ati so. ¹⁹ Mati ínje, sílingaas di fúkouso sikaanankaan man ícetum di so ban sibajut kánkum di ínje, manteer mbi ibaj eroŋ di Atijamit. ²⁰ Kankaan nan ínje di Apakenaau Áamakau kufaaŋenoorumi man icet di ébaarey yati búpinab, lee ínje di fúko’om eem man iroŋe bare Apakenaau Áamakau aam man aroŋe ríiŋ di ínje. Eroŋey yan emmi di iñeme ñátum di kafiumak di Añiilau ati Atijamit, amaŋammi manteer asen eroŋey yoola bee mati ínje. ²¹ Ínje ilatut kabeten majakam mati Atijamit. Kaanjaat an Atijamit panasofool nan ajoone mati akila nariibenriiben wan sílingaas siceeŋumi, moo kama ecetey yati Yensa ekankaan ñaañaaña.

¹ Muyuul, kati Galatia kañuloutuñaa! Asaay ai arokuul? Mati noo nireguureg tíen buu Yensa Apakenaau Áamakau afaaŋenimi di ébaarey yati búpinab nan wan kúciluul kujuke. ² Jikatom man iceeŋuul wákon pat! Mante jiyabuloyab Búyegetab Bátienaab mati jiriibenriiben wan sílingaas sati Muusa siceeŋumi? Mba mante jiyabuloyab bo mati jifiunfium furimaf fajakaaf? ³ Muyuul kañuloutuñaa! Muyuul katooŋumi di eroŋey yunkuley ñátum di Búyegetab Bátienaab, buu kaane di jimaŋ inki bee kágolum di kánkumak kooluul? ⁴ Waa kama bugaalab booluul mbi kaan ñaañaaña? Bare isofutumo! ⁵ Atijamit áboñeuumi Búyegetab Bátienaab boola bee di muyuul, nalaañ akaan wajamurerutimi titooruul mati jiriibenriiben wan sílingaas sati Muusa siceeŋumi? Mba mante mati jijanjam di kafiumak mati wan jijammi furimaf fajakaaf mati Yensa Apakenaau Áamakau. ⁶ Moo mákonam eem di Iburehima, furimaf fati Atijamit foone, “Iburehima nanennen kafiumak koola di Atijamit, mati kafiumak kukila Atijamit nasofoomi an ajoone.” ⁷ Panjijuk mati kafiummi di Atijamit, koo eenomi kuñiilak kalegenak kati Iburehima. ⁸ Furimaf fati Atijamit fúregaaliregaali mati Atijamit beebi esof Kakaanutumi Kúyahuudak nan bukan kajoone mati kafiumak kooliil kukila. Moo kaane Atijamit náligumi Iburehima furimaf fajakaaf ufe naanoomi, “Bukanak kati dúniyaay búrom pankubaj kásuumaay ñátum di bálamukab booli.” ⁹ Bee mo jaat, kanenumi kafiumak kooliil di Atijamit, nan man Iburehima aneneenukomi, bukoo pankuyab kásuumaay kákonak kan Iburehima ayabeenumi no’ona kápurul di Atijamit. ¹⁰ Mati anoosani anajomi sílingaas oo nanuminum. Mati ciikiciik, “Bunumab bati Atijamit boobu di an añoosumi kariibenak waciikimi búrom di búkaay yati sílingaas.” ¹¹ Fiitolaafiit mati Atijamit asofut an ajoone mati nariibenriiben sílingaas. Mati furimaf fati Atijamit foone, “Anau an Atijamit asofoomi ajoone aate károŋum di kafiumak koola.” ¹² Bare sílingaas sírudoorut waaf di kafiumak. Mati furimaf fati Atijamit foone, “Ampi akammi wan sílingaas siceeŋumi, eroŋey yoola too yommi.” ¹³ Bare Yensa napakenolaapaken di bunumab ban sílingaas sooteenumi ekaan man uyabaal, nan Yensa acetumi di ébaarey yati búpinab. Mati ciikiciik, “Anoosani afaaŋenimi di ébaar, oo bunumab bati Atijamit boobu di an akila” ¹⁴ Wakilumi mo’omu woo eenomi kásuumaayak kan Atijamit áligeenumi Iburehima koote ériiŋ Kakaanutumi Kúyahuudak kápurumul burokab bati Apakenaau Áamakau Yensa, mambi uyabaal ñátum di kafiumak Búyegetab Bátienaab báligeenimi no’ona. ¹⁵ Kutiom, eenojaat bukan kugaba kukokenjaat furim ban di kujuumenufo an ábuto letaŋoolen abil ápurenufo to mba nabenento waaf. ¹⁶ Atijamit nálilig Iburehima di búwoloorumab boola aban. Furimaf fati Atijamit foonut, “Di úwoloorum,” wan eenomi wawuuje bákon. Bare foone, “Di búwoloorumab booli,” ban eenomi bákon, oo eenomi Apakenaau Áamakau. ¹⁷ Wan imaŋumi bee eregey woo eenomi, mati Atijamit najuumeneenjuumen kasofoorak titoorey yati oo di Iburehima ban náligeenumi mati panakaanuko. Sílingaas san Atijamit ápurenulomi simit siceme sibakiir di kabanan di uñen fácul. Hani moo sílingaas siŋoolenut sípuren kasofoorak di báligab bukila. ¹⁸ Kaanjaat wan Atijamit áligumi bee esen bukanool mati kuriibenriiben sílingaas, kama ñaa ceeŋut man asenuwo mati báligab boola. Moo manoosani, naseneensen wo’owu Iburehima mati Atijamit báligab boola. ¹⁹ Kama ñaa élingaay yoo bee mati waa? Nasensenuyo mati bee káyiisen waa eenomi majakut, ban élingaay ekila paneroketumi bee mo nan funak fan búwoloorumab bati Iburehima búriiŋumi, bee di oo Atijamit áligeenumi. Atijamit asenumi élingaay yoola simaleeka esenumi Muusa an eenomi atitoora. ²⁰ Ujamujaat atitoora lee ákon ceb, bare Atijamit eenomi Atijamit ákon pat. ²¹ Mante kama élingaay di báligab bati Atijamit ejamoorut? Lee mo jáng! Mati kaaneenjaat élinga esenisen yaŋoolenumi ekaan man an aroŋ, Atijamit panasofeen akila nan an ajoone ñátum di kariibenakuyo. ²² Bare furimaf fati Atijamit foone mati kánkumak kati majakutam kúroroog kati dúniyaay búrom. Buruŋ buceen bulet bampi uyab wan Atijamit áligeenumi leejaat káyinen di Yensa Apakenaau Áamakau. ²³ Noo kafiumak uke báriiŋoorulout, sílingaas silitenolaaliten rap ñátum di kájaatikenak kooliso bee mo nampi ubajaami kafiumak. ²⁴ Man kammi, sílingaas soo sikankaan nan aliikitenaolaal afaan bee nampi Apakenaau Áamakau ajawulomi, mambi Atijamit asofolaal bukan kajoone ñátum kafiumak. ²⁵ Bare iñeme kafiumak kubajobajo, ceeŋut kariiben sílingaas nan aliikitenaolaal afaan. ²⁶ Mati Apakenaau Áamakau Yensa muyuul búrom kuñiilak kati Atijamit kápurumul di kafiumak. ²⁷ Mati anoosani átiigulenimi di kareesak kati Yensa Apakenaau Áamakau, moo náyiisenyiisen mati oo di Yensa kákonak, nukaanokaano Apakenaau Áamakau nan oo kaloa káamak. ²⁸ Moo kaane, bajut kápajuloor umu Áyahuud mba Akaanut Áyahuud, bajut umu amiiceel mba akaanut amiiceel, bajut umu ániine mba anaare, kápajuloor kulet titooruul kammi di Apakenaau Áamakau Yensa. ²⁹ Kaanjaat muyuul kati Apakenaau Áamakau, moo emmi muyuul úwoloorum wati Iburehima. Muyuul bukan kaate eyab wan Atijamit áligeenumi.

¹ Wan ilakomi ereguuley woowe. Nan kammi añiilau aatumi beebi eŋarey yati fubajaf fati ampaool, mati natiititiiti bajut wan kukatoore di amiiceel, hani man kammi oo akile fubajaf búrom. ² Bee jaat oo oomu di kaakoomi di kan kujuumenumi bee kajiker fubajool bee nanan nampi ampaool ajuumenumi mbi aŋarufo níriiŋumi. ³ Moo mákonam di wulaal poop. Noo wulaal bukan nan ukaaneenaami di fañiilaetaf foololaal, wulaal ukaaneenaami kumiiceel kánkumak kati mukaanaam mati dúniyaay búrom. ⁴ Bare nan nanan níriiŋumi, Atijamit naboñulolaami Añoolool. Oo awolimi di aseek, ban awolimi di sílingaas, ⁵ mambi apaken kariibenumi sílingaas, mambi uyabaal fujuumaf fati ekaan Atijamit kuñoolool. ⁶ Mati muyuul kuñiilak kati Atijamit iñeme, Atijamit naboñulolaaboñ Búyegetab Bátienaab bati Añoolool bee di sísigirolaal, di bucibulo, “Ampaom! Ampaom!” ⁷ Moo kaane, muyuul jikaanut kumiiceel bare kuñoolool, ukaanjaat añoolool, au aŋara ati bulaañab ban Atijamit áligumi. ⁸ Nan jimanjeenutumi Atijamit, muyuul kukaaneenumi di famiiceelaetaf simit sati urees ceb bare sibajout. ⁹ Bare iñeme di jibilumi jimanj Atijamit, mba Atijamit nabilumi amanj muyuul. Buu jiŋoolene jilaañ bee kamiiceelaet kánkumak kati mukaanaam mati dúniyaay uye. Mante jimammaŋ ekaan kumiiceelak kooliko inki? ¹⁰ Muyuul jiraagaleraagal bee ekaan man mooluul músuum Atijamit ñátum di kálebienak kati kunak kuceen, di muleeŋ muceen, di kéel kuceen, di simit siceen. ¹¹ Há! Ínje níkolikoli mati kama burokab búmboom di muyuul fúko’om nigaalene mée. ¹² Kutiom, ínje nilawuulaw wey man jibonket jibil jinaam di ínje, nan ínje man ibilumi inaam di muyuul. Bajut wan jikajene bee di ínje. ¹³ Wakilumi mútiyaaram ínje káriiŋenuulak furimaf fajakaaf fati Apakenaau Áamakau mati ínje noo di kásumut. ¹⁴ Handeneen kásumutom kukila kuyinkuul man jiŋooleneene jijiipom mba jilatom, bare jikaanutumo! Di jiwalenammi jak nan ínje maleeka yati Atijamit, mba nan ínje Yensa Apakenaau Áamakau di fúko’ool. ¹⁵ Noo muyuul kásuumaak kanokeneenumi di sísigiruul iñeme kookei? Ínje noo fiitanfiit mati eeneenjaat jiŋooleneene, pájilookuleen kúciluul jisenom. ¹⁶ Waa yaŋ nilanlaañ ikaan eyen di eñeru yooluul, mati ínje oomu ereguuley malegenam? ¹⁷ Bukanak kukila bukooku karaagale bee égaawuluul bee di kukila, bare wakilumi koo ekaaney mo’omu di úyegetiil ujakut. Wanoosani búrom wan kumaŋumi ekaanuul man jilatom, mambi jilaañ jimaŋiil. ¹⁸ Bee iñee kankaan waaf walegen jisofujaat di úyegetuul bee ekaan wajake, handeneen nan ileemi di muyuul. ¹⁹ Kuñoolom! Ínje man nokoorammi di muyuul eeno kankaan nan aseek ammi di kawalen búrooko inki, jariey yákoney nemmi di yo bee mati muyuul bee nampi jinokoorumi di Yensa Apakenaau Áamakau. ²⁰ Panimaŋeen kalako di muyuul, moo letisankeneen táli, mati búyegetom bugagaal mati muyuul. ²¹ Kama jiregom, bukaaku di muyuul kamaŋumi man kulako di búroogumab bati sílingaas bee jaat. Mante kumammanj wan sílingaas siregumi? ²² Mati ciikiciik Iburehima kuñiil kúniine kugaba nabaje. Ákon iñaayool amiiceel, aamu iñaayool let amiiceel. ²³ Añiilau ati amiiceelau oo nawoliwol nan bukanak búrom, bare añiilau aamu ati aseekau akaanutumi amiiceel, oo nawoliwol kápurumul di báligab. ²⁴ Furimaf ufe fukankaan nan kúreg. Kuseekak buke kukankaan búyiisenum bati kasofoorak kugabaak wan Atijamit akammi di bukanool. Hajara, aseekau amiiceelau, nakankaan búyiisenum bati kasofoorak kan Atijamit ajuumenumi di fúlankiinaf fati Sinai. Anoosani awolimi di fiilaf foola oo amiiceel. ²⁵ Hajara búyiisenumab bati fúlankiinaf fati Sinai fammi Arabia. Oo búyiisenumab bati Yerusalem yati jaat, mati oo di kuñoolool di famiiceelaet. ²⁶ Bare Sirah, akaanutumi amiiceel, oo eenomi búyiisenumab bati Yerusalem yammi bukinab bajakaab. Oo akammi iñaayolaal! ²⁷ Mati ciikiciik, “Maayoor, au aseekau amanjutumi fufaan. Rigoor búrigoor bati kamaayoor, handeneen man ubajurerutumi añiil! Mati aseekau an ataool asofutumi di waaf panafaŋen kuñiil an ataool asofumi jak.” ²⁸ Kutiom, muyuul eenomi kuñiilak kan Atijamit áligeneenumi nan Siyaaka. ²⁹ Di kunakak ko’oka añiilau awolimi nan bukanak búrom násuutukeneenumi añiilau awolimi di Búyegetab Bátienaab. Mo’omu mubajomi bee iñeme. ³⁰ Bare furimaf fati Atijamit waa furege? Furimaf foone, “Cesoor amiiceelau di añiilau ániinaau, mati añiilau ániinaau ati amiiceelau leekucaaboor bulaañab ban Atijamit áligeenumi di añiilau ániinaau ati akaanutumi amiiceel.” ³¹ Kutiom, kama ñaa wulaal let kuñiilak kati aseekau amiiceelau, bare kuñiilak kati aseekau akaanutumi amiiceelau. aanutumi amiiceelau.

¹ Yensa Apakenaau Áamakau napakenolaapaken. Moo kaane jijuum líŋ, ban takum jimaŋ man kulaañenuul jikaan kumiiceelak kati sílingaas. ² Jíyenten! Ínje, Paul eem di ereguul wan isofumi mati jimaŋujaat man jitampi, moo eenomi wan Apakenaau Áamakau akammi di muyuul ubajut fúkaw. ³ Man ilaañ íyiisen anoosani di fúko’ool amaŋumi man kutampool, oo naate kariiben wan sílingaas sati Muusa siceeŋumi búrom. ⁴ Muyuul jooju di eñesey buruŋ man Atijamit asofuul nan bukan kajoone mati jiriibenriiben sílingaas. Jikajenkajen wan jisofoorumi di Yensa Apakenaau Áamakau di majakam moola. ⁵ Bare Búyegetab Bátienaab bukaanolaakaan tíenolaal mati Atijamit panasofolaal nan bukan kajoone mati kafiumak koololaal di Apakenaau Áamakau. ⁶ Mati nampi usofooraami di Apakenaau Áamakau Yensa, katampimi mba katamputimi kápajuloor kulee di Atijamit. Bare wabajumi fúkaw woo eenomi kafiumak kammi di burok kápurumul di kamaŋak. ⁷ Noo jijaweenjaw jak! Ai akaane man jikat malegenam? ⁸ Abuntooraau aaneuuñaa jikat oo lee Atijamit, awonkeuuñaa man jipak. ⁹ Múliitenuma mayiinkun múliitenemi epor yáciigimi búrom yo. ¹⁰ Ínje nígolungolum di Akiiyaau mati leejiyab kawoonoor kuceen kanaamut di kúmboom. Ampi akammi man jibaj kájiisoor titooruul, Atijamit panatek an akila. ¹¹ Kutiom, bare kaanjaat ínje eroŋ di káriiŋen mati koote etampiil, wau kaane man kuroŋ di kásuutukenom? Kaaneenumojaat, kama káriiŋenak kúmboom mati wafelumi ecetey yati Akiiyaau di ébaarey yati búpinab, koo kuŋoolenut kúŋarul búlatoor di an. ¹² Kájiisoorumi titooruul, panimaŋeen bukanak kukila kujaw kutampooro, ban di kuceekooro moo mufaŋe man jake di kukila. ¹³ Kutiom, muyuul kawonkimi man jipak, Atijamit amaŋut jikaan kumiiceel kati wanoosani. Jíkaanum takum jisof mati panjiŋoolen jikat kúkouul bee ekaan wásuumuumi. Jíyiisenoor kamaŋak kooluul ñátum di karambenoor. ¹⁴ Mati sílingaas búrom, jajaw laañulolaañ furim fákon ceb: “Noote emaŋ alaoori nan man umaŋumi fúkoi eeno.” ¹⁵ Bare ñaa man joom di karumoor di karufoor nan siyen, kama moo jikanto úyegetuul takumbi jikajenoor. ¹⁶ Wan eem di kagamenak woo eenomi ure, mbi jirungen Búyegetab Bátienaab di eroŋey yooluul. Kammojaat, takum jiriiben wan emaŋey yooluul eceeŋumi ceb. ¹⁷ Mati wan úyegetuul umaŋumi di wan Búyegetab Bátienaab bumaŋ sijamoorut. Uwu ugabaaw ulatoolatoor, moo múyiisenumi letuŋoolen ukaanaal wan úyegetuul umaŋumi ekaan. ¹⁸ Bare Búyegetab Bátienaab burunguujaat, muyuul jilee di búroogumab bati sílingaas. ¹⁹ Wan búyegetab bati anau bumaŋemi ekaaney, woo eenomi di kaseeketak di kániine’etak, fúraar, kayenet, ²⁰ kamiiceelaet sínaati, kakaanemi di fáliimaet, kalatoor, kasanken muloba, búlat, kañuumul, kabotoor eloey fácul, kápajuloor, di poop kajuumoor muyooŋ bee di muyooŋ, ²¹ kaleetoor, kákali máamak di kuri kúfaafen di wáaning, ban di ekaaney bújakaati buceen nan wo’owu. Ínje eem di ereguuley nan man iregeenuumi no’ona mati kakaanemi mukaanaam muceenaw manokoorumi mo’omu kootut ebaj jáyiaj jati Atijamit. ²² Bare Búyegetab Bátienaab bukammi man jibaj woo eenomi, kamaŋ, kamaayoor, kásuumaay, kamuutenoor, kalegeno, majak, kakammi kufiumaay, ²³ búyeget bajinlene, di kasofooro. Bajut sílinga sáfirene wo’owu búrom. ²⁴ Kammi di Yensa Apakenaau Áamakau kucetooraacetoor di emaŋey yati kúkoiil ceb di emaŋey yajakutey búrom kankaan nan kufaaŋenifaaŋen di wo’owu di ébaarey yati búpinab. ²⁵ Kaanjaat Búyegetab Bátienaab bukaanolaami man ubajaal eroŋey yalegenaay, man ulaañ urungenaal bo di fútaagulumaaf fati eroŋey yoololaal. ²⁶ Takum utebenooroaal, mba nurienooraal, mba nuleetooraal bee di bukaaku.

¹ Kutiom, ariiba aceen akaanjaat majakut, muyuul kaakumi Búyegetab Bátienaab bati Atijamit di eroŋey yooluul joote kanoonen di oo man jílaañenulool jak di kabet kukila bee di buruŋab bajoonaab. Bare mbi jikanto úyegetuul muyuul di kúkouul takumbi jilo di busunab bákonab. ² Jimuutenoor di karambenoor bugaalab, di ekaan mo’omu pánjiliren sílingaas sati Apakenaau Áamakau. ³ Anoosani asofooromi an alegenoe, ban lee mo, oo fúko’ool nabunte. ⁴ Bare anoosani aate kajikerooro bakaanerool. Kaanjaat bujajak, panaŋoolen á’aamakalenooro. Bare ceeŋut ajiker bakaanerab bati kupaalool bukaaku. ⁵ Mati anoosani aate eteb bútebab boola oo cebool. ⁶ Anoosani aliikenumi mati furimaf fati Atijamit, aate esen aliikitenaool bucaab bati waafool wajakaaw wanoosani búrom. ⁷ Takumbi jimaŋ man an abuntooruul. Atijamit áhaaruleriiti, mati anoosani wan alukumi, woo naje’emi bee ejaley. ⁸ Anoosani alukumi wásummi di búyegetool, panabaj ecetey. Bare anoosani alukumi wásummi di Búyegetab Bátienaab, kápurumul di Búyegetab Bátienaab panabaj eroŋey yati bándoorey. ⁹ Moo takumbi ugaalaal di elukey yati wajakaaw, mati funak pánfuriiŋ fan jootumi eyabey bacaamab booluul, kaanjaat leejilaañ bálamuk. ¹⁰ Kammojaat, nan ubajaami buruŋ, nootaale ekaaney wajakaaw bee di bukanak búrom, man faŋ man jake bee di kufiumaak kammi buruŋab bákonab bati Yensa. ¹¹ Jijiker baciikerom man búkalaami eeno ban iciikeuñaa bee di muyuul ñátum di kañenom. ¹² Bukanak kamaŋumi kamingenuul man jitampi koo eenomi kamaŋumi man kúaamakalenoor ban di kutebenelenoor ñátum di mukaanaam mukila. Manoosani kukankaan mo takumbi kúsuutukeni mati ébaarey yati búpinab yati Apakenaau Áamakau. ¹³ Hani bukanak katampeimiñaa, kukila di kúkoiil kulatumi kariiben sílingaas. Bare kumaŋuumaŋ man kukaanuul jitampi mambi kuŋoolen kúaamakalenoor mati man jitampimi nan man kumingenuumi man jitampi. ¹⁴ Atijamit are’eten mo lói mati ínje eetut ká’aamakalenoor waaf uceen rino ébaarey yati búpinab yati Yensa Apakenaau Áamakau. Mati ecetey yoola di ébaarey yati búpinab ekammi man ikaan nan an acete bee di dúniyaay, mukaanaam mati dúniyaay uye poop mukankaan nan wacete bee di ínje. ¹⁵ Wakilumi fúkaaf fák fák woo lee manteer anau atampimi mba atamputimi. Wakilumi fúkaaf woo eenomi mati eroŋey yunkuley yan Atijamit asenolaami. ¹⁶ Emitey ekaan Atijamit awul kásuumaayak di kabonketak koola bee di kariibenemi kájaatikenak uke, hani bee di Kuyisiraelak kati Atijamit. ¹⁷ Di fúwuŋenaf, kápurum jaat jootut kagaalenom, mati kúyokumak kammi di eniilom koo kúyiisenyiisen mati Yensa reooranreoor. ¹⁸ Kutiom, Emitey ekaan Akiiyaolaal Yensa Apakenaau Áamakau majakam moola móomi di muyuul. Amen.