EFES

EFES

¹ Ínje Paul, an Atijamit amukenammi kápurumul di kamaŋak koola man ikaan áriiŋena ati Apakenaau Áamakau Yensa, eem di eciik letaraay uye. Eciikiciik bee di bukanak kati Atijamit kati Efes kakammi kufiumaay di Yensa Apakenaau Áamakau. ² Emitey ekaan Atijamit Ampaolaal di Akiiyaau Yensa Apakenaau Áamakau kusenuul majakam di kásuumaay kooliil. ³ Usalaal Atijamit, Ampaau ati Akiiyaolaal Yensa Apakenaau Áamakau asenolaami kawulak kanoosani kan Búyegetab Bátienaab busenumi kawulak ñátum di bálamukab bati Apakenaau Áamakau, kápurumulomi di bukinab bajakaab. ⁴ Bala’a butuukab bati dúniyaay, Atijamit namukenolaamuken aban man ukaanaal koola di Apakenaau Áamakau mambi úlirooraal ban takumbi ubajaal kabet di bújonlenool. ⁵ Atijamit nasofeensof ekaanolaal nan kuñoolool kápurumul di Yensa Apakenaau Áamakau. Moo eenomi kamaŋak koola di wásuumoomi máamak. ⁶ Usalaal Atijamit mati majakam málirooraam moola. Mati man asenolaami kawulak kabajutumi bacaam di Añoolool ati búsusool. ⁷ Di Apakenaau Áamakau nubajaami epakey kápurumul di fúsimool, moo eenomi majakutolaal mubonketibonket. Riiboor di majakam máamakam mati Atijamit, ⁸ man asenolaami ríiŋ. ⁹ Atijamit namanjenolaamanjen kamaŋak koola kayofimi, riiboor di wan asofeenumi no’ona di Apakenaau Áamakau. ¹⁰ Nampi nanan níriiŋumi, Atijamit aate káliren wan asofeenumi no’ona. Woo eenomi Atijamit panajojen wanoosani watuukimi búrom tákon, wanoosani wammi fatiya di wammi tentaam, ñátum di Apakenaau Áamakau man akaan áfacula ati wo. ¹¹ Wanoosani wakaanimi riiboor di wan Atijamit asofeenumi. Ban Atijamit namukenolaami ukaanaal bukanak koola man usofolaal di Apakenaau Áamakau ñátum di wan asofeenumi no’ona di fúcitumaf. ¹² Wulaal katooŋumi úgolumaal di Apakenaau Áamakau, nootaale esal Atijamit oololaal ati mawuŋam. ¹³ Di Apakenaau Áamakau, muyuul poop kajamemi furimaf fajakaaf fati malegenam, faŋarulomi epakey yooluul. Nan man jifiummi di Apakenaau Áamakau, Atijamit akaanuumi fúmanjumaf foola ñátum di esenuuley Búyegetab Bátienaab ban áligeenuumi. ¹⁴ Búyegetab Bátienaab bukammi tíenolaal panuyabaal wan Atijamit áligumi bee di bukanak koola. Moo Atijamit panapakenolaal, ban nálebieni di poop nasali. ¹⁵ Moo kammi, kabiñoo nan ijammi kafiumak kooluul di Akiiyaau Yensa di kamaŋak kooluul bee di bukanak kati Atijamit, ¹⁶ itamburerut ikat esaley yati Atijamit bee mati muyuul. Niwooloeuuwoolo di kúlawak kúmboom. ¹⁷ Nilalaw Atijamit ati Akiiyaolaal Yensa Apakenaau Áamakau, Ampaau ati mawuŋam, man asenuul Búyeget Bátienaab baatumi ekaanuul man jilinlo ban di búyiisenuul mati Atijamit, manteer mbi jimanjool. ¹⁸ Kúlawak kúmboom koo eenomi mawuŋam mbi mufitiken úyegetuul, mambi jílaul waa eenomi fúgolumaf fan Atijamit áligumi kan awonkumi man kuriiben. Moo ñaa nimammaŋ man jílaul waa eenomi bulaañab balegenab báamakab báriiŋumi síwoonoor ban áligumi man asen bee di bukanak koola. ¹⁹ Nimammaŋ man jílaul waa eenomi kákalaak káamakak kati kánkumak koola karokenemi di wulaal káyinenoomi. Kánkumak kukila koo kufanfaŋ kawoonoorak kati anau ²⁰ nan ayitenumi Apakenaau Áamakau di kacetumi ban nalakenoomi di keñenak kúridak koola di bukinab bajakaab. ²¹ Apakenaau Áamakau arungumi ñátum fujuumaf foola fafaŋe kákalaa di kurungaak búrom, kujuumak búrom, wánkum búrom, jáyi búrom jati fatiya, di kareesak kanoosani kasenimi. Ban erungey yoola kaanut dúniyaay uye ceb bare poop dúniyaay yábileuumi. ²² Atijamit nakankaan waafaw búrom di fútobojumaaf fati fátaamool ban nakaanoomi áfaculaau ati wanoosani wati di fujojaf. ²³ Ban fujojaf foo eenomi eniiley yati Apakenaau Áamakau, ban káliroorak koola akila, oo di fúko’ool álirene wanoosani di banoosani.

¹ No’ona jiceteencet mati jikankaan majakut ban jilat Atijamit. ² Nanan nikila muyuul jiriibenriiben mukaanaam májakaatiaam mati dúniyaay uye. Ban di jiriibenumi man jikaan wan arungaau ájakatiaau arungemi úgunaw wammi fatiya. Úgunaw woola iñeme woowu bo waroke titoorey yati bukanak kalatumi Atijamit. ³ Wulaal búrom noo nukaaneaakaan nan bukoo ban nuroŋaal riiboor di emaŋey yájakaatiaay, di ekaaney wásuumolaami di wan kawoonoorak koololaal kumaŋumi. Mati wulaal nuwolaaliwol di majakut moo kaan wulaal bukooku di kañuumulak kati Atijamit nan anoosani. ⁴ Bare kabonketak kati Atijamit kúkalaakalaa, ban kamaŋak koola bee di wulaal kúkalaakalaa, ⁵ handeneen man uceteenaami mati majakuteenolaal, nakaanolaal uroŋaal tákon di Apakenaau Áamakau (kápurumul di majakam moola wulaal nupakaapak), ⁶ Atijamit áyitenulolaami di kacetumi di Apakenaau Áamakau Yensa, ban nasenolaami tan ulakaami lofoor di Yensa Apakenaau Áamakau di bukinab bajakaab. ⁷ Atijamit nakankaan mo manteer kajom dúniyaay, mbi áyiisenolaal man mákalaam mati majakam moola, di kamaŋak kan áyiisenolaami di Yensa Apakenaau Áamakau. ⁸ Atijamit ñátum di majakam moola napakenuupaken nan jifiummi. Muyuul di kúkouul jikaanooroutumo, bare kápurumul di kawul kati Atijamit. ⁹ Epakey yoo kaanut bacaam bati wan jikammi wajake, ñaa moo hani an ákon letatebenelenoor. ¹⁰ Atijamit najuumenolaajuumen mambi ukaanaal mukaanaam majakaam, ban namaŋ iñeme man ucinaal nan man amaŋumi eeno. Moo kaane náboñul Apakenaau Áamakau Yensa man akaanolaal nan man oomaamiñaa jaat. ¹¹ Jiwoolo mati no’ona muyuul jiwolimi nan Kakaanutumi Kúyahuudak. Kúyahuudak, kawonkooroemi katampimi kuwonkeuul bukanak katamputimi, woo waaf wan umanje kañenak kukaanewomi. ¹² Jiwoolo no’ona muyuul jimanjut ai eenomi Apakenaau Áamakau. Jikaaneenkaan kujaaburuŋ ban lee kati bukanak kan Atijamit amukenumi. Muyuul jibajut kapan di kasoofoorak kan Atijamit áligumi kan amukenumi. Muyuul jilakoeenlako di dúniyaay uye babajut fúgolum di poop babajut Atijamit. ¹³ Handeneen muyuul noo jíloieenloi Atijamit, bare iñeme muyuul kati Apakenaau Áamakau Yensa. Mati iñeme jíjeetumulijeetum jilofool kápurumul di fúsimaf fati Apakenaau Áamakau. ¹⁴ Mati Apakenaau Áamakau di fúko’ool eenomi kásuumaayak koololaal. Wúli Kúyahuud di muyuul Kakaanutumi Kúyahuudak man ukaanaal bukan kákon, ban nakajenumi wajakutaw wammi titoorey nan kulatoor. ¹⁵ Ñátum di ecetey yoola nawambenumi mukaanaam mati sílingaas sati Kúyahuudak búrom Fujuumaf foola foo eenomi bee kajuumen kásuumaay titoorey yati Kúyahuud di Kakaanutumi Kúyahuud, mambi atuuk di fúko’ool an ákon unkul kápurumul di kujuumak kugabaarak, ¹⁶ ban fujuumaf foola foo eenomi poop mambi asuken bapaalaayab titoorey yati kujuumak kugabaarak bee di Atijamit di eniil yákon ñátum di ecetey yoola di ébaarey yati búpinab, ban mambi kalatoorak koololaal kammi titoorolaal kukajeni. ¹⁷ Apakenaau Áamakau nabilumi man áriiŋenumi furimaf fajakaaf fati kásuumaay bee muyuul Kakaanutumi Kúyahuudak, káloimi di Atijamit, ban bee di wúli Kúyahuudak, kalofumi di oo. ¹⁸ Kápurumul di oo wulaal búrom mambi ubajaami buruŋ bee di Ampaau ñátum di Búyegetab Bátienaab bákonab. ¹⁹ Moo kaane iñeme muyuul jikaanut kujaaburuŋ mba bukan kúbuto. Muyuul jikankaan bukan kákon kacinoore di bukanak kati fiilaf fati Atijamit. ²⁰ Muyuul jikankaan nan kalimbis kateepimi di fúlakenumaaf fati kúriiŋena di kuboña, ban égooleney yooliko yoo eenomi Yensa Apakenaau Áamakau di fúko’ool. ²¹ Akila asofumi kalimbisak búrom tákon man kubil kukaan fukob fáliroore bee mati Akiiyaau. ²² Kápurumul di oo, muyuul Kakaanutumi Kúyahuud di kúnaamoorul tákon nan kapan kákon kati kalimbisak kukila kan Atijamit acinumi kápurumul di Búyegetab boola.

¹ Mati wan Atijamit akammi Kúyahuudak di Kakaanutumi Kúyahuudak man kúnaamoorul tákon ínje di fúko’om, Paul, an kusofe kukul mati Yensa Apakenaau Áamakau, mambi iŋoolen iramben muyuul Kakaanutumi Kúyahuudak. ² Tíenantien muyuul malegen jijanjam jiban, mati Atijamit di majakam moola nasenansen burokab ube, man iramben muyuul Kakaanutumi Kúyahuudak. ³ Nan man iciikumi di letaraay uye, buu Atijamit di fúko’ool akaanammi man imanj wan asofumi bukanak kumanjut. ⁴ Nampi jiliikenumi wan iciikumi di yo, panjiŋoolen jijuk kálaulak kúmboom mati wayofimi wati Apakenaau Áamakau. ⁵ Atijamit áyiisenutumi wayofimi uwe bee di úwoloorumaw wawuujumi, bare iñeme náyiisenyiisen wo bee di kúriiŋenaool di kuboñaool kálirooraak ñátum di Búyegetab Bátienaab. ⁶ Wayofimi kukila woo eenomi kápurumul di furimaf fajakaaf Kakaanutumi Kúyahuud kubabaj kapan kákon di Kúyahuud di wan Atijamit awuleiimi. Koo búromiil kukankaan eniiley yákoney, ban di kunaamoor di báligab ban Atijamit akammi kápurumul di Apakenaau Áamakau Yensa. ⁷ Nikaanikaan aroka ati furimaf fajakaaf ufe ñátum di kawulak kápurumul di majakam mati Atijamit kasenimi bee di ínje ñátum di burokab bati kánkumak koola. ⁸ Ínje hani man ifaŋumi man kusofutammi di waaf di bukanak kati Atijamit, majakam ume musenisen man íriiŋen Kakaanutumi Kúyahuudak mati ebajey yati Apakenaau Áamakau ébaneriitumi. ⁹ Atijamit, atuukaau ati wanoosani, amukenammi man íyiisen anoosani man ajuk wan asofumi wayofimi kabiñoo di fúcitumaf. ¹⁰ Wan Atijamit asofumi nanan une, kápurumul di kujojak malinlaam moola manoosaniam mbi mumanjeni bee di kurungaak di kati kujuumak búrom kammi di bukinab bajakaab. ¹¹ Atijamit nakammomi riiboor di wan asofumi biñoo no’ona, ban iñeme wo’owu ukaanikaan kápurumul di Apakenaau Áamakau Yensa Apakenaolaal. ¹² Mati Apakenaau Áamakau di kafiumak koololaal kan ubajaami di oo, panuŋoolenaal ubilaal di fúgolummi bee di bújonlenab bati Atijamit bákoliut. ¹³ Moo kaane ínje nilawuulaw, takum úyegetuul ugaal mati man nemmi di bugaalab bee mati muyuul, moo kaane mbi jílebieni ban di jíliŋeni. ¹⁴ Mati mo’omu ínje oomu man íkuntaajene di kúlawak bee di Ampaau, ¹⁵ kápurumul di akila fiil fanoosani fammi di bukinab bajakaab di baabe dúniyaay nabetufo kareesak. ¹⁶ Emitey ekaan Atijamit kápurumul di kawulak koola káamakak kábaneriitumi manteer mbi akaanuul man úyegetuul úliŋ kápurumul di Búyegetab Bátienaab. ¹⁷ Emitey ekaan Apakenaau Áamakau mbi acin di sísigiruul nan man jifiummi di oo, ¹⁸ mbi jibaj kánkum kati kálaul buu kamaŋak kati Apakenaau Áamakau kúkalaami, kuwuŋenumi, kúsankimi, di kubakumi eeno bee mati muyuul. ¹⁹ Ban mbi jimanj kamaŋak kati Apakenaau Áamakau, handeneen man kufaŋumi fumanjaf fooluul, manteer mbi jimeeŋ ríiŋ di búyesoorab bati Atijamit. ²⁰ Atijamit naŋooleŋŋoolen akaan wuuj wan uŋoolenaami ulawaal mba hani wan uwoonooraami, mati kánkumak koola kooku di burok titoorolaal. ²¹ Emitey ekaan Atijamit asali máamak kápurumul di Apakenaau Áamakau di kati fujojaf bee bándoorey. Amen.

¹ Ínje, nan ikammi an akuli mati burokab bati Akiiyaau, nilawuulaw man jilako di eroŋ yáriiŋe nan bukan kan Atijamit awonkene akaaniil koola. ² Jiwalenooro joc man jiyin tem, jibajoor kamuuten. Jíyiisen kamaŋak ñátum di kamuuten. ³ Jiraagal man jikat Búyegetab Bátienaab man bukaan úyegetuul tákon. Jikaan ñátum di kacinoor di kásuumaay. ⁴ Muyuul búromuul eniil yákon, jibabaj Búyegetab Bátienaab bákonab, nan man jisenimi fúgolum fákon nan jiwonkimi jikaan bukan kati Atijamit. ⁵ Akiiyaau ákon, kafium kákon, di poop kátiigul kákon, ⁶ Atijamit di Ampaau ákon ati wulaal búrom, afaŋumi katebo búrom, kápurumul di wanoosani, di poop ammi di wanoosani. ⁷ Bare majakam masenimi bee di anoosani riiboor di man kawulak kan Apakenaau Áamakau aliikumi re. ⁸ Moo kaane furimaf fati Atijamit di foone, “Nan aŋarimi bee fatiya tan faŋumi katebo, naŋarumi jameeŋ yati bukan kasofimi. ban nasenumi kawul bee di bukan.” ⁹ (Di aaney “Naŋarimi fatiya,” mante yoo eenomi Apakenaau Áamakau mútiyaaram nawaloulowalo bee dúniyaay uye? ¹⁰ Awaloulomi oo ákonau aŋarimi ban faŋumi katebo bukinab bajakaab mambi aŋoolen alako banoosani.) ¹¹ Akila asenumi kawul uke oo amukenumi bukaaku man kukaan kúriiŋena, kuboña, kufetena, kupooya, di kuliikitena. ¹² Búrookaab booliil boo eenomi bee kajonjooren bukanak kati Atijamit man kukaan burokool ban di kúliŋen kati fujojaf, foo eenomi eniiley yati Apakenaau Áamakau. ¹³ Mo’omu pammurulen bee nampi wulaal búromolaal ukaanaami tákon di kafiumak di kálaulak koololaal mati Añiilau ati Atijamit. Panubilaal nan bukan kanke nan man Apakenaau Áamakau aanoemi, panubilaal oonoaal nan akila. ¹⁴ Wulaal ootaale ekataal mukaanaam mati kuñiil. Takum ukaanaal bukan nan kan járusey enagemi baabaaba mati kujamujaat kaliikitenak kanoosani kápurumul kuliikitenaak kati ebuntey. Kukila koo kukaanemi bukaaku man kújim ñátum di ebuntey yan koo kukammi. ¹⁵ Wulaal ootaale esof malegenam di kamaŋak, wulaal nufaŋaal man oonoaale nan Apakenaau Áamakau di wanoosani, an eenomi fúkaaf fati eñiiley yoola, fujojaf. ¹⁶ Kápurumul di oo, eniiley búrom enampenimi jak. Kapanookapan kati yo di kubilumi kusukoor tákon ñátum di súukas. Kapanookapan kurokumi wan ceeŋumi man kukaanuwo eniil búrom panebaak di éliŋ kápurumul di kamaŋ. ¹⁷ Di kareesak kati Akiiyaau, nigamenuugamen, takum jirulen di eroŋ nan bukanak kamanjutumi Atijamit, kan síwoonooras sooliil sikammi ñaañaaña. ¹⁸ Úyegetiil ucecet, koo kúloiloi máamak di eroŋey yápurumulomi di Atijamit, mati kámanjaataak kammi di bukoo di poop úyegetiil usasay waŋ nan ekooba. ¹⁹ Kapuñak kulaañutibo ban kusen kúkoiil man kunoken kayenet di poop di kubajumi máwus mati ekaaney mukaanaam masikoaam nanoosani. ²⁰ Bare kaanut mo’omu moo wan jilakomi kaliikenak mati Apakenaau Áamakau. ²¹ Kabiñoo nan jijammi moola búrom ban di jiliikenumi malegenam mammi di Yensa. ²² Jikat bálamuk mukaanaam mooluul mafanlenaam nan man jipiimi di jiroŋ no’ona. Mukaanaam mukila búrom musikosiko ñátum di emaŋey yajakutey yooluul. ²³ Jikat man Búyegetab Bátienaab bu’unkulen sísiriguul di úyegetuul. ²⁴ Joote káyiisen úyeget unkul mati muyuul bukan kunkul, mati jituukituuk di búyesoorab bati Atijamit, ban di jikaan joon di jíliroor. ²⁵ Moo kaane jípur di kagaajoorak! Anoosani di muyuul mbi jiregoor malegenam. Mati wulaal búrom kákonak. ²⁶ Takum jimaŋ man kañuumulak kukaanuul jikaan majakut. Ban takum jiñuumul yok bala’ab bujon. ²⁷ Takum jimaŋ man Seetaanaay ebaj buruŋ di muyuul. ²⁸ Ákuutemi takum arulen di jákuut, bare mbi arok, ekaaney burok balegen ñátum uñenool, mambi aŋoolen aramben kan ceeŋumi. ²⁹ Takum jimaŋ man kurimak kajakutak kúpurumul di utumuul. Bare jireg kurimak kajakaak nanan nan ceeŋumi mbi kuramben bukaaku. ³⁰ Takum jikaan Búyegetab Bátienaab súumaatibo. Mati Búyegetab Bátienaab buguubenuumi di fúmanjum bee mati funak fati epakey. ³¹ Jikat kaleetoorak, kañuumulak káamakak, fuuñaf, kurimak kajakutak, di kasuulenak. ³² Bare jirambenoor di wajake, kábotenioor ban di jibonketoor, nan man Atijamit abonketeuumi eeno mati Apakenaau Áamakau.

¹ Moo kaane jiriiben wanoosani wan Atijamit akaanemi, nan kuñiilak kati Atijamit di búsusool. ² Jiroŋ di eroŋey yati kamaŋak, nan man Apakenaau Áamakau amaŋolaami eeno ban nasenumi fúko’ool bee mati wulaal nan kawul kati kaput kásuume di búsimen bati kaput básuume, woo úsuumenumi Atijamit. ³ Bare kaseeketak di kániine’etak, fúraar, mahaŋ woo jootut kasanken titooruul, mati muyuul bukanak kati Atijamit. ⁴ Takum jireg kurim kajakut mba kabajutumi fúkaw mba kaleemomi, bare jisanken wampi wasenuumi kasalak bee di Atijamit. ⁵ Mbi jimanj tíen, mati álaputa mba átienutumi, mba abajumi mahaŋ (yoo eenomi amiiceelaetemi náati), an akila letabaj bulaañab di jáyiaj jati Atijamit di jati Apakenaau Áamakau. ⁶ Takum an abuntuul ñátum di kasankenak kabajutumi fúkaw. Mati wo’owu úŋareuumi kañuumulak kati Atijamit pankubil bee di bukanak kañooseoomi búrom. ⁷ Takum jibajoor waaf di an akila anokoorumi mo’omu. ⁸ Noo muyuul jilakoeenelako di érimey, bare iñeme muyuul bukanak kati Akiiyaau, moo kaane muyuul bukooku di mawuŋam. Joote kagoroor nan bukanak kammi di mawuŋam. ⁹ (mati mawuŋam ume mammi di muyuul mukammi wajake, wajoone, di walegen) ¹⁰ Jiraagal man jimanj wayeumi Atijamit. ¹¹ Takum jiriiben di ekaaney mukaana mútiikaar mati érimey nan man bukaaku kukaanemi bare mbi jíyiisen buu koomeenimi eeno. ¹² Puñenipuñeni máamak man mukaanaam mukila makaaneimi di érimey musankeni. ¹³ Ñaa mawuŋam pámmuyiisen mukaanaam ume buu moonomi eeno. ¹⁴ Moo kaane di koone, “Wáay ámooriaau, yílo! Man upak di ecetey, ban Apakenaau Áamakau aate eseni mawuŋ.” ¹⁵ Moo kaane mbi jíkaanum man jommi di eroŋey eeno, takum jiroŋ nan bukan káyilout, bare nan káyiloe. ¹⁶ Jíkaanum máamak di buruŋab báwambulomi di wan jibajumi, mati wulaal bukooku di kunakak kajakutak. ¹⁷ Takumbi jígotet, bare mbi jiñes wan Akiiyaau amaŋumi man jikaan. ¹⁸ Takumbi jikaan kúkalia mati dooru pankajen eroŋey yooluul. Bare jikob man Búyegetab Bátienaab bumeeŋuul. ¹⁹ Nampi jijojumi tákon, jícim jábuura, úcimaw wati kasalak, di úcimaw kápurumul di Búyegetab Bátienaab bee titooruul, nan man jisenemi kasalak bee di Akiiyaau ñátum di úyegetuul búrom. ²⁰ Ban panjisal Atijamit Ampaau mati wanoosani di kareesak kati Akiiyaolaal Yensa Apakenaau Áamakau. ²¹ Ban jisenoor kúkouul mati kálebienak kati Yensa Apakenaau Áamakau. ²² Kuseekak, jisen kúkouul kutauul nan man jikaanemi bee di Akiiyaau. ²³ Mati ániine oo eenomi fúkaaf fati aseekau nan man Apakenaau Áamakau akammi fúkaaf fati eniiley yan eenomi fujojaf. Apakenaau Áamakau oo eenomi malegen Apakenaau ati eniiley ekila. ²⁴ Nan man fujojaf fusenumi fúkoufo Apakenaau Áamakau, moo mákonam muyuul kuseekak jisen kúkouul kutauul. ²⁵ Kúniinaak, muyuul joote emaŋ kuseekuul, nan man Apakenaau Áamakau amaŋumi fujojaf eeno, ban nasen eroŋey yoola bee mati fo. ²⁶ Nakankaan mo’omu mambi fujojaf fúliroor ban di fútien, naposufomi di mumelam di furimaf foola. ²⁷ Apakenaau Áamakau nakankaan mo’omu mambi áyiisen fujojaf bee di fúko’ool di majakam moolifo, nan fujoj fáliroore ban fubajut hani kabet, mba májakaatie mba waaf uceen wajakut. ²⁸ Moo mákonam, kúniinaak koote emaŋ kuseekiil nan man kumaŋumi siniilas sooliil eeno. Mati ániinaau amaŋumi aseekool malegen fúko’ool namaŋe. ²⁹ Mati bajut di wulaal hani ákon alate eniilool, bare namaŋuyo ban nacookooruyo jak, nan man Apakenaau Áamakau acookoorufomi eeno. ³⁰ Ban wulaal eenomi upanaw wati eniiley yoola. ³¹ Nan man furimaf furegumi eeno, “Mati mo’ome ániine panakat ampaool di iñaayool man kunampoor di aseekool, man koo kugabaarak kubil kukaan eniil yákon.” ³² Babaj waaf wayofoe taate woo eenomi malegen mákalaae di furimaf fajakaaf ufe, wan ílaulumi woo eenomi Apakenaau Áamakau di fujojaf koo kákon. ³³ Moo mákonam, ániine anoosani aate emaŋ aseekool nan man amaŋumi fúko’ool eeno, ban aseekau poop aate kálebien ataool. oop aate kálebien ataool.

¹ Kuñiilak, jikob kuwolauul mati muyuul kati Akiiyaau, mati mo’ome moo jootumi ekaaney. ² “Lébien ampai di iñaayi” (yoo eenomi élingaay étiyaarey yabajumi bálig.) ³ “Mambi jak bee di au di nubaj fuyiif fabaake baabe di dúniyaay.” ⁴ Kumpaak, takum jikaan kuñooluul táañi’iil ban di bóli’iil, bare mbi jibaakeniil kakurak di kájaatikenak kati Akiiyaau. ⁵ Kumiiceelak, jikob kan eenomi kúfaculaak kooluul baabe di dúniyaay, jílebieniil ban di jikobiil tíen. Jirok di úyegetuul wákonaw, nan man jikaanemi eeno bee di Apakenaau Áamakau. ⁶ Jirok máamak, takum kaan muyuul bee erok nan kúciliil kommi di muyuul ceb mambi mooluul músuumiil. Bare muyuul nan kumiiceel kati Apakenaau Áamakau, joote ekaan wan Atijamit amaŋumi man jikaan di úyegetaw wooluul búrom, ⁷ jirok bee mati kúfaculaak kooluul ñátum di úyeget wáwambuloe nan burok di Akiiyaau jommi di bo kaanut bukanak. ⁸ Muyuul jimammanj mati Akiiyaau panacaam anoosani wajakaaw wan akammi handeneen nakankaan amiiceel mba akaanut amiiceel. ⁹ Kúfaculaak, muyuul joote kariten kumiiceelak kooluul joon, ban takum jikooleniil. Jiwoolo mati muyuul búromuul jibabaj áfaculaau ákonau di bukinab bajakaab, ban oo alaañut di an. ¹⁰ Di fúwuŋenaf, mbi jíliŋ di Akiiyaau ñátum di kánkumak kati mákalaam moola. ¹¹ Jikaano mútiikumaam mati Atijamit búrom, mambi jiŋoolen jitiiken makooñam mati Seetaanaay. ¹² Mati wulaal uletaal di futiik fati fúsim di eniil, bare di futiik fati kurungaak kájakaatiaak di kati kujuumak kati dúniyaay yájukeriitumi, di wánkumaw wáamakaw wati di érimey warokemi di dúniyaay uye, ban úgun wájakaatimi fatiya di érimey. ¹³ Moo kaane jikaano mútiikenumaam mati Atijamit mambi jiŋoolen jijuum líŋ di funakaf fajakutaf, moo panjijuk hani di fúbanumaf fati futiikaf pánjoomi man jijuume líŋ. ¹⁴ Jijuum líŋ di malegenam nan kálil jipiinoore di ukampauul, di jikaano majoonam nan múkaruma búsus. ¹⁵ Jikaano usamati di úkamunuul nan furimaf fajakaaf fati kásuumaay, man usenuul fútobojuma fáliŋe. ¹⁶ Benento di mo’omu búrom, joote kaaken múkaruma mati káyinenak, di múkaruma mukila jootumi epebey simeeraas sati sambunas sápurumulomi bati Seetaanaay. ¹⁷ Jikaano bompoŋab bati epakey, di jooken jilibaaj jati Búyeget Bátienaab jan eenomi furimaf fati Atijamit. ¹⁸ Jikaan mo’omu búrom di kúlawak, jilaw man Atijamit arambenuul. Jilaw nanoosani nan man Búyegetab Bátienaab burunguumi. Mati mo’omu jíkaanumumi ban di jirulen kúlawak mbi jilaw poop bee di bukanak kati Atijamit banoosani. ¹⁹ Ban poop mbi jilawom, manteer Atijamit mbi asenom kurim kan ceeŋumi man isanken bákoliut man íriiŋen bukanak mati malegenam mayofoaam mati furimaf fajakaaf. ²⁰ Mati furimaf fajakaaf, di kukaanammi aboña ammi bakuleriab ñátum di ñiwuj. Bare mbi jilawom manteer mbi isanken bákoliut mati furimaf fajakaaf nan man ceeŋumi man ikaan. ²¹ Tukiko, atiom ariiba an ifaŋumi man imaŋe an umanje abaje káyinen di arambenaom di burokab bati Akiiyaau, ban panareguul buu nemmi di ejaay di burokab eeno. ²² Moo kaane ínje nemmi di éboñulool bee di muyuul man areguul buu nommi di ejaay eeno, ban pánaliŋenuul. ²³ Emitey ekaan Atijamit Ampaau di Akiiyaau Yensa Apakenaau Áamakau asenuul kásuumaay, kamaŋ, di káyinenak bee di ariiba anoosani. ²⁴ Emitey ekaan majakam mati Atijamit móomi di anoosani di karulen kamaŋak Akiiyaolaal Yensa Apakenaau Áamakau.