2 TIMOTI

¹ Ínje Paul, áriiŋena ati Apakenaau Áamakau Yensa ñátum di kamaŋak kati Atijamit, aboñimi man íriiŋen mati eroŋey yan áligumi kápurumul di kafiumak di Apakenaau Áamakau Yensa, eem di eciik letaraay uye. ² Eciikiciik bee di Timoti, au nukankaan nan añiilau ati búsusom: Emitey ekaan Atijamit Ampaau di Apakenaau Áamakau Yensa Akiiyaolaal kúyiiseni majakam mooliil, di kubaj di au kabonketak kooliil, di kuseni kásuumaayak kooliil. ³ Ínje nisasal Atijamit, an eem di kamiiceelaet di búyeget bátiene, nan man kufannaaniŋom kukaanemi eeno. Fuk di balay, nisaloosal mati nan man iwooloimi nanoosani di kúlawak kúmboom. ⁴ Nan man iwooloimi man mukuli musotumi, niraanoiraano máamak fuk di balay. Kammojaat mbi súumom máamak. ⁵ Ínje poop niwoolowoolo mati kafiumak kooli kalegenak kan ubajumi, kafiumak ko’oku kaanomi nan kati iñaayi afaan Loidi di iñaayi Yunike kubajumi. Tíenantien au poop nubabajuko. ⁶ Moo kaane ínje kawooleni man uroŋ di esof jak kawulak kan Atijamit asenimi nan irembenumi uñenom di au. ⁷ Mati Búyegetab Bátienaab ban Atijamit asenolaami bukaanutolaal man úkoofiaal. Bare bumeeŋolaameeŋ di kánkum, di kamaŋ, di kasofooro. ⁸ Takum upuño, eregey yati káyiisenak kooli bee di bukaaku mati Akiiyaolaal. Takum upuño mati ínje poop, handeneen ínje oomu dán bukanak kukuleimi mati Apakenaau Áamakau. Bare di kánkumak kan Atijamit asenimi, unaamoor di ínje di bugaalab bee mati káriiŋenak kati furimaf fajakaaf. ⁹ Atijamit apakenolaami ban nawonkolaami man ukaanaal bukanool, lee mati wan ukaanaalemi, bare mati wan asofumi di majakam moola. Bala’a dúniyaay etuuki nasosof man áyiisolaal majakam mukila kápurumi di Apakenaau Áamakau Yensa. ¹⁰ Bare ñaa iñeme narajulolaami kápurumul di ebiley yati Apakenolaal, Apakenaau Áamakau Yensa. Akila nakajenumi kánkumak kati ecetey ban kápurumul di furimaf fajakaaf aŋarulomi eroŋey yati bándoorey. ¹¹ Ban Atijamit namukenammi nan áriiŋena di aliikitena man íriiŋen furimaf fajakaaf. ¹² Moo kaane ínje neem di egaal. Bare ínje ipuñouturer, mati nimammanj an ifiummi, ban tíenantien mati naŋooleŋŋoolen apooyom wan abilenammi bee nampi funak fukila fúriiŋumi. ¹³ Sof lit kurimak kalegenak kan iliikitenimi. Ban oote karulen di kafiumak di kamaŋak kan ubajumi di Apakenaau Áamakau Yensa. ¹⁴ Jisof lit malegenam ume man Atijamit abilenimi ñátum di karambenak kati Búyegetab Bátienaab bammi di au. ¹⁵ Nan man umanjumi eeno, kuriibaak búrom kápurumulomi Asia kukatankat bálamuk, hani Fugel di Herumogen koo di búkoro. ¹⁶ Emitey ekaan Atijamit áyiisen kabonketak bee di fiilaf fati Onesifor, mati ñameeŋe náliŋeneanliŋen, apuñoutom mati bakuleromab. ¹⁷ Nan áriiŋulomi Róoma, natooŋumi añesom biyok ajukom. ¹⁸ Emitey ekaan Akiiyaau áyiisool kabonketak koola di Funakaf fukila. Numammanj tíen man arambenammi búrom di ésukey yati Efes.

¹ Mati au, añoolom, mbi úliŋ ñátum di majakam man Atijamit asenimi di Apakenaau Áamakau Yensa. ² Nujanjam wan iliikitenimi di fáculey yati bukan kajuupoe kamaatumi. Liikiten malegenam ume bee di bukan kufiumaay kaate kaŋoolen kuliikitenumo bukaaku poop. ³ Naamoor bugaalab di ínje, nan atiika alegen ati Yensa Apakenaau Áamakau. ⁴ Atiika ammi di burokool letakaten man arok burok buceen bati téeŋey, mati namammaŋ man akaan arungaool yeool. ⁵ Ampi alakomi kafannoor di jíteyaj letaŋoolen awuuj leejaat nasosof sílingaas búrom sati jo. ⁶ Awañaau arokumi máamak aate etooŋ eyab bucaab bati muriaay. ⁷ Woonoor mati wan isankenumi. Akiiyaau panarambeni man úlaul wo tíen. ⁸ Woolo Yensa Apakenaau Áamakau, áyitenulimi di kacetumi, búwolum bati Dauda. Ure eenomi furimaf fajakaaf fan íriiŋenumi. ⁹ Mati káriiŋenak kati furimaf fajakaaf ufe, ínje oomu di bugaalab ban hani kukokenankoken nan álaputa. Bare furimaf fati Atijamit, an letaŋoolen akokenufo. ¹⁰ Mati mo’omu ínje neem di kamuuten wanoosani mati bukanak kan Atijamit amukenumi, man Atijamit apakeniil kápurumul di Apakenaau Áamakau Yensa, ban pankulako di Atijamit bee bándoorey, mbi aseniil kálebienak di mákalaam moola. ¹¹ Furimaf ufe fúrindiiŋ kafium. Ucetaajaat síñakon di oo, wulaal poop panuyitoaal síñakon di oo. ¹² Urulenaajaat di kamuutenak, wulaal poop panurungaal di oo, uñoosaaloojaat, oo poop panañoosolaal. ¹³ Ukaanutaajaat bukan kufiumaay, oo panarulen ekaan afiumaay. mati oo letaŋoolen añoosooro. ¹⁴ Mbi urulen kawooleniil mati mo’omu. Jáatikeniil di bújonlenab bati Akiiyaau takum kuñoosoor mati kurim. Mo’omu moo jakut, mati pammukajen káyentenemi. ¹⁵ Kaan túu man úyiisen fúkoi di bújolenab bati Atijamit, nan aroka alegen apuñoutumi mati burokool ban naliikitenemi joon mati furimaf fati malegenam. ¹⁶ Tey kasanken kútiikaar, mati koo pankurungen bukanak kufaŋ man kukatoore buruŋab bati Atijamit. ¹⁷ Kaliikitenak kaanomi nan mo’omu kukankaan nan musonta máliipe. Kúniinaak kugabaak kaliikitenumi mukaanaam maanomi mo’omu koo eenomi Hemene di Filet. ¹⁸ Koo kulanjomi di malegenam, man koone Atijamit káyitenulak koola bukanak di kacetumi kuwuwuuj kuban, ban di kukajenumi káyinenak kati bukaaku. ¹⁹ Bare malegenam mati Atijamit mukankaan nan fúlakenuma fáliŋe, mujunjuum líŋ, di foo kurimak uke kuciikimi: “Akiiyaau namammanj kakammi koola,” ban, “Anoosani aregumi oo an ati Akiiyaau aate ekat majakutool.” ²⁰ Di síndeneey yati eluup yáamak babaj dó sibool lee sati sáni mba sati gódifori ceb bare poop sati ukunaŋ mba sati bukap. Di soo saasu síriuma, saasu síbetenuma majakut. ²¹ Ampi akaanooro átien kápurumul di bújakaataab ube, oo panakaan nan saasu sati wáaning, Atijamit pananenool bee di waaf búto. Mati eroŋey yoola esenisen ebabaj fúkaw bee di arungaool, kajonjoor bee ekaan burok bajake banoosani. ²² Tey emaŋey yajakutey yati kúpura, bare mbi umaŋ usof líŋ di ekaaney majoonam, kafium, kamaŋ, di kásuumaay. Au oote ekaan uru di kamiiceelaetemi Akiiyaau ñátum di úyeget wákon. ²³ Bare tey kañoosoorak kañuloutumi di kabajutumi fúkaw, mati jimammanj mo’omu moo múŋareuumi mulobaam ceb. ²⁴ Au arokaau ati Atijamit aatut ekaan an ati muloba, bare aate ekaan jak bee di anooani. Au oote ekaan aliikitena ajake ban numuuten, ²⁵ ban nawalenooro joc nampi alakomi kaliikitenak kañoosemi malegenam. Atijamit pánaruŋul úyegetiil man kútiiwoor kukat majakutiil man kubil kumanj malegenam. ²⁶ Timaa mbi kubil ganloiil ban di kuŋoolen kupak di kañenak kati Seetaanaay, yasofiimi mbi kukaan kamaŋak kooliyo.

¹ Au oote emanj poop mo’ome, Timoti, mati di kunakak kúlamukaak kábileuul pambaj mátaañie máamak. ² Mati bukanak pankumaŋ kúkoiil ceb di sígodi’iil. Di kukaan ká’aamakalenoor di kupooñumi, di kusanken ñíi mati Atijamit, di leekukob kuwolaiil. Leekusal karambeneiimi ban leekumanj Atijamit, ³ leekumaŋ bukan, leekubonketoor, di kukaan kusuulena bukan ban leekubaj kasofooro. Pankukaan bukan kákoolenie ban di kulat wanoosani wajake. ⁴ Pankukoolen kupaaliil, di ekaaney wañuloutumi, di ká’aamakalenoor. Pankumaŋ wásummi bee di kúkoiil ceb wuuj Atijamit. ⁵ Pankukaanalenoor nan buruŋab boololaal koom, bare pankuñoos kánkumak kalegenak koolibo. Jitey bukanak kaanomi mo’omu. ⁶ Bukaaku di bukan kukila pankubuuto kunoken di ujam uceen búrom ban di kooken kuseek kuceen kágotete, kuseek karookoe di majakut ban di kumaŋ wanoosani wásuume di kúkoiil. ⁷ Kuseekak kaanomi mo’omu kooku di kariiben kaliikitenak kunkulak nanoosani, bare kúlauleriit malegenam. ⁸ Nan man Yannes di Yambures kulatumi Muusa eeno, moo poop bukanak buku kulatumi malegenam, bukan kan úyegetiil ulaene tir, ban kafiumak kooliil kulegenout. ⁹ Bare léekuloi máamak, mati mafuuraam mooliil pammujuki tíen di fáculey yati bukanak búrom, nan man bajoeenumi bee di kúniinaak bukaaku kugabaak. ¹⁰ Bare au nuriibenriiben kaliikitenak kúmboom, baroŋerab búmboom, di wan isofumi mati eroŋey, kafiumak kúmboom, kamuutenak kúmboom, kamaŋak kúmboom, ban wan iŋoolenumi imuuten noo, ¹¹ di kásuutukenomak, di bugaalab búmboom. Numammanj tíen uru búrom wabajammi Antiok, di Ikoni, di Lusutura bare Akiiyaau napakenammi di woo búrom. ¹² Di malegenam, anoosani amaŋumi esen eroŋey yoola di Apakenaau Áamakau Yensa nan ariibaool, pánasuutukeni. ¹³ Bare bukan kajakut di kubunta pankurulen di ekaan man újakaatie. Pankufaŋ man kújakaatie noo, ban kubuntaak di kubuntooro. ¹⁴ Bare mati au, urulen di esofey di wan iliikitenimi ban nufium ríiŋ. Numammanj bukei eenomi kuliikenai. ¹⁵ Ban nuwoolo mati kápurumul di fañiilaeti, au numammanj furimaf fálirooraaf fati Atijamit, fakaanimi man ubaj malinlaam marungenimi bee di epakey kápurum di kafiumak di Apakenaau Áamakau Yensa. ¹⁶ Atijamit akaane Furimaf foola búrom man furoŋ ñátum di Búyegetab boola. Furimaf búrom fubabaj fúkaw bee kaliikiten malegenam, bee kamandoor kafiummi wajoonutumi, káyiisen wajakut, ban bee kájaatiken bukan man kuroŋ joon, ¹⁷ manteer anau ati Atijamit mbi aŋoolen akaan burok banoosani bajake.

¹ Ínje iseni kájaatikenak uke di bújonlenab bati Atijamit di Yensa Apakenaau Áamakau, aatumi kagamen karoŋumi di kacetumi nampi alaañumi inki bee erung nan áyi. ² Ríiŋen furimaf fati Atijamit, di elat yém di ejuk mati núriiŋenriiŋen fo di nanan nan ceeŋumi mba nan ceeŋutumi di ekaaney mo. Noote káyiisen wan kukammi wajakut ban numakiil mati majakutiil. Bare noote káliŋeniil poop nan man uliikitenemi di kamuutenak máamak. ³ Nanan pánniriiŋ nan bukan kootutumi káyentenak kaliikiten kalegen. Bare pankuriiben emaŋey yooliil, ban pankuñes kuliikitena kufaŋ man kujuupoe kaatumi bee kaliikiteniilak wan kumaŋumi ejamey. ⁴ Pankukat bálamuk malegenam man kulanjo ban di kujuumen úyegetiil di ureg wati kayayapoorak. ⁵ Bare mati au, noote kasofooro, ban numuuten di bugaal banoosani, ríiŋen furimaf fajakaaf, ban núliren buroki. ⁶ Mati ínje, nanan númboom nírindiiŋ nati ekaanom búsimen, mati ecetey yúmboom érindiiŋ eban. ⁷ Nititiik futiik falegen, nibamban jíteyaj, ban nirulen di kafiumak kúmboom. ⁸ Iñeme kawulak kati kafannoorak kooku bo kakoberom kan eenomi fúbuur fáwaanie fati majoonam fan Akiiyaau, agamenaau ajoonaau, agalo’ommi di funakaf fáamakaf fati élaañuley yoola. Kawulak uke lee bee di ínje ceb, bare poop bee di kakoboomi élaañuley yoola ñátum di kamaŋak kooliil. ⁹ Kaan túu iñeme man ubil galab bee di ínje. ¹⁰ Demas, narookorooko dúniyaay, man akatom bálamuk man ajawumi bee Tesalonika, Keresens najawumi bee Galatia ban Tiito oo najawumi bee Dalumatia. ¹¹ Luuk cebool aam di ínje. Ŋárul Maruk man újeetumulool bee di ínje, mati oo panaŋoolen arambenom jak di burokab. ¹² Nibomboñ Tukiko bee Efes. ¹³ Nampi ulakomi ebiley, mbi úŋarulom kaloaom káamakak kan ikatulomi di kañenak kati Karupo di ésukey yati Turaad di poop síbukaas, bare takum újimul múciikumaam muceenam mati kabaŋ. ¹⁴ Alesandar afaañaau narieenanri máamak ñajuupoe. Emitey ekaan Atijamit acaamool wan akammi búrom. ¹⁵ Au di fúkoi káanumool, mati nalatelat yém wan uregumi. ¹⁶ Di bagamab bútiyaarab, bajut hani an alaañe di ínje ijuumoore di fúko’om. Anoosani nakatankat bálamuk. Emitey ekaan Atijamit takum asofiil di waaf. ¹⁷ Bare Akiiyaau najuumanjuum ban náliŋenom, man íriiŋen furimaf fajakaaf bee di Kakaanutumi Kúyahuud búromiil man kujam. Ñaa napakenammi di butumab bati jimukoorey. ¹⁸ Akiiyaau panapakenom di wajakut wanoosani búrom aban nájeetumom jak bee di jáyiaj joola jammi di bukinab bajakaab. Mbi bukanak kusalool bee bándoorey. Amen. ¹⁹ Usaafom Pirisika di Akula, di bajamab bati Onesifor. ²⁰ Erasutos arinoulomi Korint, ban ínje nikatulokat Turofim di ésukey yati Mileto man áju’uteene. ²¹ Kaan túu man úriiŋul baabe bala’a nanan nati ñonkañ. Ebulus di Pudes, Lino, Kuladia di kuriiba bukaaku búrom poop kúsaafulisaaf. ²² Emitey ekaan Atijamit acin di búyegeti. Emitey ekaan Atijamit asenuul majakam moola.