2 TESALONIKA

¹ Ínje Paul eem di eciik letaraay uye banaamoorerab di Sila, di Timoti. Eciikiciik bee di kati fujojaf fati Tesalonika kammi di Atijamit Ampaolaal di Akiiyaolaal Yensa Apakenaau Áamakau. ² Emitey ekaan Atijamit Ampaau di Yensa Apakenaau Áamakau kuwuluul majakam di kásuumaay. ³ Kútioli, wúli cenceeŋ man usal Atijamit nanoosani mati muyuul. Jajak man oote ekaan mo’omu, mati kafiumak kooluul kooku bo kabenenoe máamak ban kamaŋoorak kan jibajumi bee di bukaaku kooku bo kabeneno. ⁴ Moo kaane wúli di kúko’oli nutebenteben síleekoli mati muyuul di kujojak kati Atijamit. Mati man jirulenumi di kamuuten di kafium di kásuutukenak kanoosani di bugaalab ban jommi di bo. ⁵ Bare mo’omu búrom múyiisenuuyiisen mati kagamenak kati Atijamit kujonjoon. Mati panakaanuul bukan kabaje fúkaw mati Jáyiaj joola, mati moo jommi di égaalumey. ⁶ Atijamit panakaan wajoone, pánajeetumuul bugaalab bee di bukanak kakaanumi man jigaal, ⁷ ban nasenuul kayoolo muyuul kammi di bugaalab. Pankammo, nampi Akiiyaolaal Yensa arajulomi di bukinab bajakaab di simaleekaool sati kánkum, di bújeek bati sambun. ⁸ Akiiyaool Yensa panatek kamanjutumi Atijamit di kalatumi furimaf fajakaaf fati Akiiyaolaal Yensa. ⁹ Atijamit panatekiil kútek kati bándoorey, ban nápajuliil di bújonlenab bati Akiiyaau di poop mákalaam moola máriiŋumi síwoonoor, ¹⁰ nampi ajawulomi di funak fukila, bukanool búrom mbi kusalool anoosani afiumoomi mbi álebienool. Muyuul poop panjinaamoor di kukila dó, mati jifiunfium wan úyiisenuumi. ¹¹ Moo kaane nulawelaw bee mati muyuul. Emitey ekaan Atijamit mbi akaanuul man jibaj eroŋey elegeney yaj yan awonkuumi beet. Emitey ekaan Atijamit mbi áliren ñátum di kánkumak koola kamaŋak kooluul kati ekaaney wajake di burokab booluul bati kafiumak. ¹² Emitey ekaan kareesak kati Akiiyaolaal Yensa mbi kúlebieni di muyuul, muyuul poop mbi jílebieni di oo kápurumul di majakam mati Atijamit oololaal di Akiiyaau Yensa Apakenaau Áamakau.

¹ Iñeme mati élaañuley yati Akiiyaolaal Yensa Apakenaau Áamakau di man aatumi kajojenolaalak bee di fúko’ool man úkambooraal. Ñaa kútioli nilawuulaw, ² takum jiwaaken kayennoor di úyegetuul galab mba di sayuul mati bukaaku koone funakaf fati Akiiyaau súm fúriiŋuloriiŋ. Timaa kusosof mati wúli nurereg uru nan ulakomi kamanjenak, mba káriiŋen furimaf, mba nuciciik mati mo’omu di letara. ³ Takum jimaŋ man an abuntuul di manoosani. Mati funakaf fukila leefubil bee nampi katiikenoorak kubajomi titoorolaal di Atijamit, ban ájakaatiaau pánarajuli, ajuumenimi man akajeni jákaati di sambunas sáceteriitumi. ⁴ Panatebenooro ban nañoos wanoosani wawonkeimi emit mba wamiiceelaeteimi manteer aŋar ejunkutey yati Atijamit di fukobaf fáñiiaaf, mambi areg akila eenomi Atijamit. ⁵ Mante jiwoolout mati niregeenuureg mo’omu nan ilakoeenumi di muyuul? ⁶ Jimammanj wasofumomi ájakaatiaau umu bálamuk bee nampi funakaf fan aatumi ebiley fúriiŋumi. ⁷ Mati kánkumak kayofoaak kati ájakaatiaau kooku bo karoke, bare aceen oomu man asofeko. Ájakaatiaau létarajul bee nampi an akila ápurenimi di buruŋab. ⁸ Moo ñaa ájakaatiaau pánarajul, bare nampi Akiiyaau Yensa alaañulomi panabujool ñátum di fuyiifaf foola. Ban panakajeni jaj ñátum di mákalaam mati érajuley yoola. ⁹ Élaañuley yati ájakaatiaau yoo ekankaan burokab bati Seetaanaay. Ban panekaanalenoor man ekaan mukaanaam búrom máriiŋumi síwoonoor di wajamurerutimi. ¹⁰ Panakaan wanoosani wati kabunt kájakaatie mambi abunt kammi di buruŋab booliil bati kakañoak mati kulalat kafiumak malegenam maatumi bee kapakeniilak. ¹¹ Moo kaane Atijamit pánaboñuliil kabunt káamak, mambi kúyinen di kagaajoorak kanoosaniak. ¹² Koo búrom pánkufireni mati kufanfaŋ man kukaane májakaatie di kafiumak kati malegenam. ¹³ Bare wulaal ootaale esal Atijamit nanoosani mati muyuul, bare kútioli muyuul kan Akiiyaau amaŋumi. Mati Atijamit amukenuumi káŋarum di fúcitumaf mambi jikaan kaate etooŋ kupak. Búyegetab Bátienaab boola bukaanuumi man jíliroor tíen, ban di jikammi kafiumak kooluul di malegenam. ¹⁴ Atijamit náwonkuluumi bee di epakey nan úriiŋenuumi furimaf fajakaaf. Iñeme muyuul jinaamoor di mawuŋam mati Akiiyaolaal Yensa Apakenaau Áamakau. ¹⁵ Kútioli, moo kaane jijuum líŋ ban di jiriiben ríiŋ di wan uliikitenuumi ñátum di kurim kati bukan mba di siletara. ¹⁶ Emitey ekaan Akiiyaolaal Yensa Apakenaau Áamakau di fúko’ool, ban Atijamit Ampaolaal, amaŋolaami ban kápurumul di majakam moola nasenolaal eñab úsusolaal yati bándoorey di fúgolum falegen. ¹⁷ Panañab úsusuul ban narambenuul nanoosani man jikaan majake ban di jireg wajake.

¹ Di múlamukaam, kútioli, mbi jilaw bee mati wúli, mambi kurimak kati Atijamit kurulen di efet galab man kuyabi di kálebien, nan man kuyabimi di muyuul. ² Jilaw, poop, mbi wúli upakeni di kañenak kati bukanak kájakaatimi di kálaputumi, mati kaanut anoosani abaje kafium. ³ Bare Akiiyaau afiumaay, pánaliŋenuul ban napooyuul di kañenak kati Seetaanaay. ⁴ Wúli nubabaj fúgolum di Akiiyaau mati muyuul, ban tíenolitien mati muyuul jooju bo kariiben ban panjikaan wan uliikitenuumi. ⁵ Emitey ekaan Akiiyaau ájaatiken úyegetuul bee mati kamaŋak kati Atijamit di kamuutenak kápurumulomi di Akiiyaau Yensa. ⁶ Kútioli, wúli bukooku di kájaatikenuul, di kareesak kati Akiiyaolaal Yensa Apakenaau Áamakau, mati jitey átioli ariiba anoosani ayuunooremi amaŋut burokab ban nalatumi kariiben kájaatikenak kanoosani kan usenoomi. ⁷ Mati muyuul di kúkouul jimammanj mati buu joote ekaan wan wúli ukammi. Nan wúli ulakomi di muyuul ukaanderut bukan kuyuunooraak kamaŋut burokab. ⁸ Wúli nulalat eyabey sinaaŋ sati an basenutool waaf. Ban nurokerok fuk di balay ujeen tac man uri takumbi ugaalen hani an di muyuul. ⁹ Nukankaan mo’omu, kaanut mati ubajut bakooŋ bukila man uceeŋ man kusen waaf wati karamben, bare mbi kaanuul káyiisen kan joote kariiben. ¹⁰ Mati hani nan ulakoeenumi di muyuul, nusenuusen kájaatiken uke, ampi amaŋutumi burok takum ari. ¹¹ Mati nujanjam mati bukaaku di muyuul kuyuunooraak kamaŋutumi burok, kayalenak kasankenak kati bukanak mba mameesam. ¹² Di kareesak kati Yensa Apakenaau Áamakau, wúli kooku di kájaatiken ban di elaw bukanak buke mbi kuroŋ joon ban di kurok man kubaj wan kootumi éroŋumey. ¹³ Kútioli, muyuul jootut egaal di ekaaney jak. ¹⁴ Ampi alatumi ekob wan uregumi di letaraay uye. Mbi jíkaanumool ban jimoosool mambi apuño. ¹⁵ Takum jisof akila nan alatooruul, bare mbi jigamenool nan apaaluul ariiba. ¹⁶ Emitey ekaan Akiiyaau ati kásuumaay oo di fuko’ool aseneuumi kásuumaay nanoosani di banoosani. Emitey ekaan Akiiyaau áami di muyuul. ¹⁷ Ínje Paul eem di eciik kasaafak ñátum di kañenak kúmboom bee di muyuul. Mo’omu eenomi fúmanjum fan ikaanemi letaraay yúmboom yanoosani. Mo’ome moo níbanumeyomi eeno. ¹⁸ Emitey ekaan majakam mati Akiiyaolaal Yensa Apakenaau Áamakau móomi di muyuul.