2 PETER

¹ Ínje Simon Peter, aroka ban áriiŋena ati Yensa Apakenaau Áamakau, eem di eciik letaraay uye. Eciikiciik bee di kan unaamoorumi kafiumak kákonak kabajumi fúkaw kápurumul di majoonam mati Atijamit oololaal di Yensa Apakenaau Áamakau. ² Emitey ekaan Atijamit asenuul majakam di kásuumaay kufaŋ man kubenenoe bee di muyuul mati jibilumi jimanj mati Atijamit di Yensa Akiiyaolaal. ³ Atijamit kápurumul di kánkumak koola nasenolaami búrom wan ceeŋumi man uroŋaal nan man buruŋab balegenab boololaal buceeŋumi man uroŋaal eeno. Ñátum di emanjey yoololaal nawonkolaami bee kanaamoor di mákalaam moola di majakam moola. ⁴ Di mo’ome, nasenolaami báligab boola báamakab babajumi fúkaw, kápurumul di bo mambi jipak di emaŋey yajakutey yakajenemi yammi di dúniyaay uye, ban mambi jibil jinaamoor di búyesoorab boola. ⁵ Mati mo’ome, jikaan túu man jibenen majakam bee di kafiumak kooluul, jibenen fumanjaf bee di majakam mooluul. ⁶ Jibenen kasofooroak bee di fumanjaf fooluul, jibenen kamuutenak bee di kasofooroak, jibenen ekaaney wan Atijamit amaŋuumi bee di kamuutenak kooluul. ⁷ Jibenen kamaŋoorak di kutiuul kuriiba bee di ekaaney wan Atijamit amaŋumi eeno. ⁸ Ubajujaat kawulak uku búrom ban nurokenuko, panjibaak di éliŋ di fumanjaf mati Akiiyaolaal Yensa Apakenaau Áamakau. ⁹ Bare ampi abajutumi kawulak uku oo áŋooleneriit ajuk lói mba ájukeriit, ban nájinjim mati majakutool mati noo mubonketibonket. ¹⁰ Kutiom, moo kaane, jifaŋ man jibaje fuuñ fati emaŋ man tíenuul mati kawonkak kooluul di kamukenak kooluul, jikammojaat leejilorer. ¹¹ Di mo’omu panjibaj kawalen kajake di kanokenak kati jáyiaj jíbaneriitumi jati Akiiyaolaal di Yensa Apakenaau Áamakau. ¹² Moo kaane nisosof bee kawoolenuul uru nanoosani, handeneen jimammanj mo jiban ban poop di jifaŋ man jíliŋe di malegenam man jiyabumi. ¹³ Nisosof mati panjak di muyuul man ninsi niwoolenuul ínje bacetoorut. ¹⁴ Ínje nimammanj leepiyo panikat eniiley uye, nan man Akiiyaolaal Yensa Apakenaau Áamakau aregammi tíen. ¹⁵ Moo kaane panikaan túu man tíen mati nampi icetumi panjiŋoolen jiwoolo uru búrom. ¹⁶ Mati nan ulakomi kamanjenuulak mati kánkumak di éjawuley yati Akiiyaau Yensa Apakenaau Áamakau, ulakout kariiben ureg wati kayayapoorak. Bare wúli kúyiisenaak kati mákalaam moola. ¹⁷ Nan Atijamit Ampaau asenoomi kálebienak di mawuŋam, furimaf fújawulomi bee di akila kápurumul Mawuŋam Máamakam, di aaney, “Ume eenomi Añoolom ati búsusom, di oo ínje súumansuum máamak.” ¹⁸ Wúli di kúko’oli nujanjam furimaf ufe fápurumulomi di bukinab bajakaab, nan ulakoeenumi di akila di furembooraf fálirooraaf. ¹⁹ Mati mo’omu, wúli nufanfaŋ man ubaje fúgolum di kurimak kan kuboñaak kúriiŋenumi. Pánjikooñaam jak wan kuciikumi, mati kurimak kooliil kukankaan nan éwuŋenuma yawuŋene di érimey, bee nampi funakaf fukila fúriiŋumi nampi yootey yati waradabaw erajulomi di sísigiras sooluul. ²⁰ Bare mútiyaaram, joote kálaul mo’ome an létalaul ban letaŋoolen áfasul hani kamajen kákon di furimaf fati Atijamit. ²¹ Mati bajut kamanjenak kajawulo kápurumul di kamaŋak kati anau. Bare bukanak kan Búyegetab Bátienaab bookumi kusankensanken kurimak kápurumul di Atijamit.

¹ Kuboñaak kubuntaak poop kurajuloraj di bukanak, di mákonam kuliikitenaak kubuntaak pánkurajul di muyuul. Buku kaatumi bee éŋaruluul ñátum di kutunt kaliikitenak kati kabuntak kaatumi bee kakajenak mati Atijamit. Ban di kuñoos Arungaau apakeniimi di bacaam báamak, ñaa moo di kújeetumooro kakañoak kawaakenumi bee di kúkoiil. ² Hani moo, kajuupoe pankunoken kayenet, ban mati wan kukaanemi, bukaaku ereg kagaajoor mati buruŋab balegenab. ³ Ban di máfeketam mooliil kuliikitenaak uke pankureguul kurim kati kayayapoorak bee ebaj waaf di muyuul. Bare Atijamit nagameneengamen no’ona, kakañoak kooliil kooku bo kábileul. ⁴ Mati Atijamit abonketut hani simaleeka sakammi majakut, nasenumi buruŋ man sileebi di busun babajut tan búkabe, boo sikokenimi man silakomi di érimey bee nampi funakaf fati kagamenak fúriiŋumi. ⁵ Atijamit abonketut poop bukanak kati naaniŋ kamanjutoomi, ban naŋarulomi mumelam máamakam bee di kukila. Bare napakenumi Nuha ceb áriiŋumi mati majoonam, oo di bukanak kuceenak kooni futok di kugaba. ⁶ Atijamit aŋarulomi akajen sísukas sáamakas sati Sodom di Gomora sikankaan kábump ban náfirenuso ban nájimenuso. Ban akaaniimi káyiisen bee di kamanjutumi Atijamit. ⁷ Bare nanan nákonan, Atijamit napakenumi Luut ániine ajoone, agaalumi máamak mati kanokenumi kayenetak di kájakaatimi búrom kambomi. ⁸ (mati ániinaau akila ajoonaau alakoemi titooriil, funakoofunak nagaalegaal máamak nan man ajukemi di man ajamemi búlaputab booliil), ⁹ ñaa Akiiyaolaal namammanj man apakenemi kajoonumi di bugaalab, di poop man asofemi kajoonutumi di kútekak bee mo funakaf fati kagamenak. ¹⁰ Oo nafaŋ man átaañie bee di kariibenumi emaŋey yooliil yajakutey yasikomi ban di kuheelenumi kati kujuumak. Bukanak kukila kúaamakalenoor ban di kupooñ, kúkoliut bee ejel wahaw wáliroorumi wati bukinab bajakaab. ¹¹ Handeneen simaleeka safaŋumi man sibaje kákalaa di kánkum di kuliikitenaak kubuntaak, leesitaakenderiil ñátum di ujel di bújolenab bati Akiiyaau. ¹² Bare buke kukaanekaan nan sínukuruŋ sati karamba sabajutumi úyeget, saje’emi nan man síwoonoorumi eeno, sawolimi man sisofi ban di sibuji. Kujelejel wanoosani wan kúlaulutumi. Pankukajeni nan sínukuruŋ sati karamba. ¹³ Pankucaami di wajakutaw wan kukammi. Ekaaney búlaput di kajuum balaraay yoo kusofumi kásuumaak kooliil. Nan kulakoemi furi tákon di muyuul kukankaan nan mamoke titooruul, hani moo kurulen di ekaaney jabuntaj jooliil. ¹⁴ Wan kuwoonooremi búrom basang di aseek mba ániine ati an, búlaputab booliil bubajut tan bureulo. Kubuntebunt káliŋutumi galab, ban máfeketam mumemmeeŋ di úyegetiil. Bare kujonlenumi bunumab bati Atijamit! ¹⁵ Kukatenkaten buruŋab bajoonaab man kújimmi di baŋondaab. Kuriibooriiboor di Balaam, Beor añoolool, nan man átaagulumi eeno, amaŋumi máamak ebajey sígodaas ñátum di ekaaney búlaputab. ¹⁶ Bare Balaam namandoorimi mati majakutool. Hani erohaool di esankenoomi nan an ban di éfirenoomi takum aboñaau akaan kagonoak koola. ¹⁷ Buke kakammi nan síbula sayonde mba kákumba kan fárusaf funagemi baabaaba. Atijamit najuumenjuumen tan tárimen túk bee mati kukila. ¹⁸ Mati man kusankenumi kasankenak kati ká’aamakalenoor di mafuuraam, ban kuñakiil ñátum di kayenetak kooliil nan ékab man kúsoful katooŋumi epakey di kakammi di eroŋey ejakutey. ¹⁹ Di kúligiil epakey, bare tooke kukila di kúkoiil kumiiceel kati kasikoak. Mati an amiiceel ati wanoosani waŋoolenoomi. ²⁰ Bukanak kupakujaat di masikoam mati dúniyaay ñátum di fumanjaf fooliil mati Akiiyaolaal di Apakenaolaal Yensa Apakenaau Áamakau. Bare di kulaañumi kulo ró di masikoam, bukanak kukila iñeme kufaŋumi man kukaane masiko wuuj mutooŋandam. ²¹ Panfaŋ man jake bee di kukila kaaneenjaat kumanjuturer buruŋab bati majoonam man kuroŋ di emanjiiley bo ban di kukat bálamuk kájaatikenak kálirooraak kabilenumi bee di bukoo. ²² Di kaaniimi kúregak uke malegen, “Eyen elac eban di ebooko eri wan elacumi,” ban “Ekumba eposimi eban di elaañ ejaw efinto di bukapab.”

¹ Kúpaalumom, uye panekaan letaraay egabunteney yan íciikuluumi. Di so’osu sigabaas níliŋenuul man jíyil úyegetiil di kawoonoor kátiene. Ínje imaŋut man jíjim ure. ² Muyuul joote kawoolo di kálaul wan kuboñaak kálirooraak kuregeenumi di wan Akiiyaolaal Apakenaolaal ájaatikenumi kápurumul di kúriiŋenauul. ³ Di mútiyaaram, joote kálaul mo’ome, mati di kunakak kúlamukaak bukan kuceen kufiila pankuraj kan umanje pankuriiben emaŋey yajakutey yooliil, ⁴ di aaney, “Báligab boola boobei bati élaañuley yoola? Kufannaaniŋolaal kucecet, bare mukaanaam búrom pammurulen nan man mulakomi noo di fúcitumaf.” ⁵ Kuwowot man kuñoos ure, Atijamit natuukumi fatiya kápurumul di furimaf foola, ban nápurenulomi yentaam di mumelam ban naŋomenuyomi ñátum mumel. ⁶ Ban ñátum di mumelam máamakam ume, dúniyaay étiyaarey ekajenikajen. ⁷ Atijamit poop ñátum di kájaatikenak kákonak tentaam di fatiya yati iñeme pansikajeni di sambunas di funakaf fati kagamenak, nan kamanjutumi Atijamit koote kagameni ban di kukajeni. ⁸ Bare takum jíjim wákonaw uwe, kúpaalumom! Funak fákon di Akiiyaau simit wíli, simit wíli di Akiiyaau funak fákon. ⁹ Akiiyaau álaamout di kálirenak wan áligumi mati élaañuley yoola, nan man kuceen kusofumi eeno. Bare namuutemmuuten di muyuul mati amaŋut hani ákon mbi akaño, bare namammaŋ anoosani aate kátiiwoor akat bálamuk majakutam. ¹⁰ Bare funakaf fati Akiiyaolaal pánfuriiŋul nan ákuu. Ban funak fukila fatiyaay pánejim nel di kayel káamak, wánkum uceen di yo ureŋeni di sambun, ban tentaamey di wanoosani wándomi panurajeni di kagamenak. ¹¹ Wanoosani búrom ureemeni nan mo’omu. Kama muyuul buu joote ekaan man jirok di jílebien Atijamit di eroŋey yooluul. ¹² Joote ekob máamak funakaf fati Atijamit ban jikaan man fúriiŋ galab. Funakaf fukila fatiyaay panfukaño ñátum di sambun, ban wanoosani wándomi búrom panureŋeni di bújeekab bati sambunas. ¹³ Bare bukooku di ekobey wan áligumi fatiya yunkul di tentaam yunkul, boo anoosani panajoonumi di Atijamit. ¹⁴ Moo kaane, kúpaalumom, nan jilakomi di ekobey mati mo’ome, mbi jibaj fuuñ fati emaŋ mbi araŋenuul mbi átookuluul man jítiene babajut kabet, ban jilako di kásuumaay. ¹⁵ Jiwoolo mati kamuutenak kati Atijamit oololaal koo eenomi epakey yoololaal. Ñaa nan man Paul atiolaal an umaŋaami áciikuluumi poop riiboor di malinlaam man Atijamit asenoomi. ¹⁶ Paul násankenuluumi ure di siletaraas soola búrom. Babaj uceen wándomi wásuumut kálaul. Bukaaku kámanjaatimi di kabajutumi fujuum koo kukajenooromi ñátum di káruŋulak wan asankenumi. Di kukaan moo mákonam ñátum di kapan kaaku kati furimaf fati Atijamit. ¹⁷ Kúpaalumom, muyuul súm jimammanj mo’omu. Kama ñaa jíkaanum, takumbi jimaŋ man kúlaputaak káruŋulemi wan asankenumi kuñakuul man jilo. ¹⁸ Bare jibaak di majakam di fumanjaf fati Akiiyaolaal di Apakenaolaal Yensa Apakenaau Áamakau. Jisal Yensa kabiñoo iñeme bee bándoorey. Amen.