2 YOHAN

¹ Letaraay uye kápurumul di anifaanau, bee di anaaraau amukenimi di kuñoolool kan imaŋumi di malegenam. Kaanut ínje cebom bare kamanjumi malegenam poop kumaŋuumaŋ. ² Mati malegenam mammi di wulaal moo pammulako di wulaal bee bándoorey. ³ Emitey ekaan Atijamit Ampaau di Yensa Apakenaau Áamakau, Añoolool kusenolaal majakam, di káboteniak, di kásuumaay bee di wulaal. Emitey ekaan uru búrom dilako di wulaal kammi di malegenam di kamaŋak. ⁴ Nimaayoomaayoor máamak di ejuk mati kuñooluul kuceen kooku di kariiben malegenam, nan man Ampaau ájaatikenolaami eeno. ⁵ Aseekau iñeme ñaa nilawilaw, mati nootaale kamaŋoor. Ure lee kájaatiken kunkul, bare kákonak kan ujamaami kabiñoo di fúcitumaf. ⁶ Waa eenomi kamaŋ, woo eenomi mati wulaal nootaale kariiben wan ájaatikenolaami. Nájaatikenolaami nan man ujammi kabiñoo di fúcitumaf, mati joote kariiben kamaŋ. ⁷ Bukan kabuntemi kuyiisooyiisoor di dúniyaay, bukan kaatut emaŋ ebiley yati Yensa Apakenaau Áamakau ñátum di eniilool oo abuntaau ban alatooraau ati Apakenaau Áamakau. ⁸ Jíkaanumooro, takumbi burokab booluul bukaan mée, bare mbi jibaj bacaam báriiŋe ñaj. ⁹ Anoosani alomi fácul ban ákaanumut kaliikitenak kati Apakenaau Áamakau, oo Atijamit alet di oo. Anoosani ammi di ko, oo nababaj Ampaau di Añiilau. ¹⁰ Ampi ajawulomi bee di muyuul ban ájeetumulout kaliikitenak uke, takumbi uwalenool mba di jisaafoor. ¹¹ Mati ampi asaafoomi pankucaaboor burokab boola bájakaatiaab. ¹² Nibabaj wajuupoe wan eete eciik bee di muyuul, bare eetut bee eciik wo di kayit. Bare nifaŋ man ígolume bee ebil man ujuudooraal úmikaal, manteer kásuumaayak koololaal mbi kúliroor. ¹³ Kuñiilak kati áliini an Atijamit amukenumi, kúsaafuli.