2 KORINT

¹ Ínje Paul, an Atijamit amukenumi man ikaan áriiŋena ati Apakenaau Áamakau Yensa, eem di eciik letaraay uye di Timoti atiolaal ariiba. Eciikiciik lee bee di fujojaf fammi di ésukey yáamakey yati Korint ceb, bare poop bee di bukanak búrom kati Atijamit kammi di kapanak búrom kati Akaia. ² Emitey ekaan Atijamit Ampaolaal di Akiiyaau Yensa Apakenaau Áamakau kuwuluul majakam mooliil di poop kásuumaayak kooliil di úyegetuul. ³ Jisalaal Atijamit, Ampaau ati Akiiyaolaal Yensa Apakenaau Áamakau! Oo eenomi Ampaau abonketeolaami kabonket di poop oo eenomi Atijamit añabeolaami úsusolaal nanoosani. ⁴ Atijamit añabeolaami úsusolaal nan ulakaami di bugaalab boololaal búrom, mambi uŋoolenaal bukaaku uñabaal úsusiil di bugaal. Nampi bukaaku kulakomi di bugaalab, panuŋoolenaal usenaaliil eñabey yákoney yati úsusiil yan Atijamit akammi di wulaal. ⁵ Nan man wulaal man ufaŋaami man unaamooraale di bugaal bájakaatie bati Apakenaau Áamakau, Atijamit nafaŋ man añabolaal kápurumul di Apakenaau Áamakau. ⁶ Ulakojaat di bugaalab, moo bee mati muyuul panjiñabi úsusuul ban di jipak. Eenojaat úsusoli uñabiñab, muyuul poop panjiñabi. Ban panjiŋoolen jimuuten ríiŋ bugaalab bákonab ban wúli ubajumi. ⁷ Fúgolumaf fóololi bee mati muyuul fúlinliŋ máamak. Numammanj nan man jinaamoor di bugaalab bákonab di wúli, panjinaamoor poop di eñabey yati úsusoli yan Atijamit ásenolimi. ⁸ Kutiom, wúli umaŋut man muyuul jímanjaati mati bugaalab ban ubajeenumi di mofam mati Asia. Nubajeembaj bo bugaal báamak ban síñunduoli jaheemeen sikaaneene sire bo. ⁹ Malegen, wúli nusofeensof mati waaf urinout manteer ecetey. Bare mo’omu múkaanolimi takum úgolum kúko’oli bare mbi úgolum di Atijamit ceb aŋoolenumi áyitenul kacetumi. ¹⁰ Atijamit nápakenolipaken di búyiikab bati ecetey. Ban nubabaj fúgolum fátiene di oo mati panarulen kápakenoli. ¹¹ Muyuul poop joote kárambenoli di kúlawak. Jikammojaat, bukan kajuupoe pankusal Atijamit mati kúlawak kooluul kúyiiŋiyiiŋ mati epakey yóololi. ¹² Wákon wakammi man itebenooro, woo eenomi káyiisenak kati síwoonooras sóololi. Mati wúli núwambuloewambulo úyegetoli ban nulegenolegeno di wan ukaanemi. Wúli núgolungolum di majakam mati Atijamit, lee di malinlaam mati dúniyaay. Moo man ukaane di eroŋey yóololi bee di anoosani, ban nufaŋ man ukaane bee di muyuul. ¹³ Mati wúli ulee di eciik wan jootutumi kaliiken mba jílaulaati. Nibabaj kágolum mati jílaulaul wátiene, ¹⁴ handeneen jílaulut búrom iñeme mati wúli. Funak fákon nampi Akiiyaau Yensa alaañulomi inki, panjiŋoolen jiteben sileekuul mati wúli, wúli poop nuteben síleekoli mati muyuul. ¹⁵ Mati mo’omu tíenantien, mutooŋandam ínje nisofeensof bee ebil ijukuul, mbi jibajeen kawul kati bujukoor ñagaba kápurumul di ínje. ¹⁶ Nimaŋeemmaŋ bee ejukuul nampi ilakomi ejaay bee Makedonia, di poop élaañuley yúmboom di kajaaburuŋ kukila. Muyuul poop mbi jiŋooleneene jiramben ejaay yúmboom bee Yúdea. ¹⁷ Mante muyuul jisosof mati ínje iŋoolenut isof wan eetumi ekaan? Mba mante ínje neeno nan bukan bukaaku kati dúniyaay kaanemi éey ban kaanut malegen? ¹⁸ Nan man Atijamit akammi arega malegen, ínje ikaanut nan bukan kukila. Eenjaat éey, numanj éey. ¹⁹ Mati Añiilau ati Atijamit, Yensa Apakenaau Áamakau, an ommi káriiŋenuulak moola, Sila, di Timoti, ínje di fúko’om. Akila akaanut éey ati éey mba a’a ati a’a. Di oo nanoosani éey ceb. ²⁰ Mati oo álirenumi báligab búrom bati Atijamit. Moo kaane kápurumul di Apakenaau Áamakau oonaale “Amen” man Atijamit pánalebieni. ²¹ Atijamit oo di fúko’ool anaamoore wúli di muyuul man ujuumaal líŋ di Apakenaau Áamakau nakaanolaakaan man usofooraal líŋ di Apakenaau Áamakau. Atijamit oo di fúko’ool amukenolaal, ²² ban nakaanolaal fúmanjumaf foola bee di wulaal man áyiisen oo akilolaal. Ban nasenolaasen Búyegetab Bátienaab man bucin di sísigirolaal nan kapanak kútiyaarak kati wanoosani panasenolaal. ²³ Atijamit ceb amanje, wakammi ilaañut bee Korint woo eenomi takum jibaj kamandoor di ínje. ²⁴ Kaanut nan wúli kurungaak kaatumi bee ereguuley wan jootumi kafium. Wúli kooku bo burokab di muyuul dákon bee ekaan súumuul, mati kafiumak kooluul kúlinliŋ.

¹ Ínje nisosof mo’omu bee ílaañul takumbi ikaan man úyegetuul ugaal. ² Mati ikaanjaat úyegetuul ugaal, ai aate ekaan súumom? ³ Moo kaane ínje niciciik letaraay ekila bee di muyuul, ínje imaŋut bee ebil bee di muyuul mbi jikaanom súumaatiom muyuul kan ceeŋumi man jísuumenom. Nibabaj kágolum di muyuul búrom, nimammanj mati kásuumaayak kúmboom kásuumaayak kooluul. ⁴ Niciikuuciik di bugaal di mátaañi di éyu mukul, wan isofeenumi woo eenomi takumbi ikaanuul man jibaj mátaañi, bare mbi ikaanuul man jílaul man imaŋuumi eeno. ⁵ Bare ampi anoosani arembenammi bugaal bee di aamu, akila agaalenut ínje bare kati fujojaf nagaalene wuuj. Ínje isankene mo’omu mati imaŋut bee kagaalen an. ⁶ Reooreoor di mo’omu mati anau ume aanumi kajuupoe kati fujojaf kugamenoogamen ban di kúpurenool mati kakurak. ⁷ Nanan une joote kabonketool ban di jiñabool búsusool, takumbi alaañ bálamuk mbi áŋoolenaati ajuum. ⁸ Ínje nilawuulaw man jíyiisenool lanken kamaŋak kooluul tíen. ⁹ Ínje niciikuuciik letaraay ekila mati nimammaŋ man ijuk buu joote ejuum líŋ di ekob wan íjaatikenuumi. ¹⁰ An muyuul jibonketumi wan akammi, ínje poop panibonketool. Ban nampi ibonketoomi, wanoosani wan ceeŋumi panibonketuwo. Nikankaan mo ñátum di fujuumaf fati Apakenaau Áamakau bee mati wampi wajakuumi, ¹¹ takumbi kánkumak kati Seetaanaay kufaŋ man kugooyenolaal. Mati numanjaamanj waa Seetaanaay esofumi bee ekaan di wulaal. ¹² Nampi ijawulomi bee di ésukey yati Turaad man íriiŋen furimaf fajakaaf fati Apakenaau Áamakau, Akiiyaau nasenansen buruŋ báwambuloe. ¹³ Bare uwosom ujunjuum mati atiolaal ariiba Tiito áriiŋulo’oorutubo kápurumul di muyuul. Ñaa nukatoorumi bukanak kati bo ban nijawumi bee di mofam mati Makedonia. ¹⁴ Kasalak kooku di Atijamit! Atijamit ákaanolimi bukanak kasofimi koola ban nárungolimi ujawoor di karuukenak mati kaŋoolenak kati Apakenaau Áamakau. Atijamit poop nárambenoliramben man ufeten fumanjaf mati Apakenaau Áamakau bee banoosani. Fumanjaf fukila fukankaan nan kaput kati mumelam maputemi súum. ¹⁵ Mati wúli nukankaan nan kaputak kásuumaak kan Apakenaau Áamakau asenumi bee di Atijamit. Kaputak uke kajukimi kunaamut bee di kaatumi epakey di poop kaatumi éjimey. ¹⁶ Bee di kaatumi éjimey kaput kásuumut kúŋareuumi ecetey, bare bee di kaatumi epakey kaput kásuume kúŋareuumi eroŋey. ¹⁷ Wúli ukaanut nan bukan kuceen kajuupoe káriiŋenemi furimaf fati Atijamit ban kukankaan múbajuma sígodi. Bare mati Atijamit násenolisen, wúli úriiŋenufomi di malegenam di fujuumaf fati Yensa Apakenaau Áamakau. Mati numammanj Atijamit áboñulolimi jícilool jooju di wúli.

¹ Mante kama mo’omu room inki usalooro? Mba wúli, kankaan nan bukaaku, cenceeŋ man ubaj siletara sati kasal mati kúko’oli bee di muyuul mba kápurumul di muyuul. ² Muyuul di kúkouul eenomi siletaraas sóololi sati káyiisenak, waciikimi di sísigiruul, manteer anoosani aliiken man amanj. ³ Ban joonosoono nan letara kápurumul di Apakenaau Áamakau bee di wúli man úriiŋenuyo. Letara yan umanje éciikumuti ñátum di úciikuma, bare ñátum di Búyegetab bati Atijamit aroŋaau. Eciikuti di kúlankiin kalempi bare eciikiciik di sísigiras sati bukanak. ⁴ Wúli uregumi mo’omu tíen mati nufiunfium di Atijamit kápurumul di Apakenaau Áamakau. ⁵ Wúli ubajut bakooŋ man ureg mati nukankaan burokab ube ñátum di kúko’oli. Bare Atijamit ákaanolimi man uŋoolen ukammo. ⁶ Atijamit ákaanolimi man uŋoolen ukaan kurokaak kati kasofoor kunkul, kaanut baciike bammi di sílingaas bare kápurumul di Búyegetab Bátienaab baŋarulomi eroŋey. ⁷ Sílingaas sati Muusa siciikiciik di kúlankiin kalempimi soo síjeetumemi bee di ecetey, bare sisenisen di maŋwuŋam nan tooŋumi bukanak kati Isirael kuŋoolenut kujiker buulab bati Muusa mati bukaanekaan ñiliñil, handeneen mawuŋam man mommi di kagumbulak. ⁸ Mante ootutaal emaŋ mawuŋam mafaŋumi man múkalaae nampi Búyegetab Bátienaab busenolaami eroŋey? ⁹ Kaanjaat kasofoorak kafanlenaak kájeetumeuumi ecetey, koo kúriiŋuloriiŋ di mawuŋam, kama ñaa mawuŋam mati kasofoorak kunkulak kakaaneolaami man ujoonaal di Atijamit, mante lee mufaŋ man muwuŋe. ¹⁰ Malegen, kasofoorak kunkulak kubabaj fúkaw manteer Sílingaas sati Muusa takum sibaj mawuŋam. ¹¹ Mati sílingaas sasenimi ñátum mawuŋam maatumi kagumbuloak. Bare mawuŋam mati kasofoorak kunkulak mufaŋe kákalaa, mati mawuŋam mooliko leemugumbulorer. ¹² Mati wulaal ubajaami fúgolumaf faanomi mo’omu, nootaale ebaj kapeeto. ¹³ Wúli kaanut nan Muusa, aŋarumi fúbuur áyin buulool takumbi bukanak kati Isirael kujuk mawuŋam man moote ebaney jaj. ¹⁴ Bare úyegetaw wati bukanak usasay, mati fúbuuraf fákonaf foofu bo bee funakaf fati jaat nampi kuliikumi kasofoorak kafanlenaak. Mati kápurumul di Apakenaau Áamakau fúbuuraf foote kápureni. ¹⁵ Malegen, hani bee jaat nampi anoosani aliikumi sílingaas sati Muusa, fúbuur fukila fúyineyin di úyegetiil. ¹⁶ Bare nampi anoosani átiiwoore bee di Akiiyaau, fúbuuraf fukila pánfupureni. ¹⁷ Iñeme, Akiiyaau oo eenomi Búyegetab Bátienaab, ban Búyegetab Bátienaab bati Akiiyaau bommi, boo kafeloak kommi. ¹⁸ Wulaal búromolaal kan wuulaw úyinutimi di fúbuur man oomaami éyiisuwo mawuŋam mákonam mati Akiiyaau. Nan man Búyegetab Bátienaab bati Akiiyaau bukaanolaami ufaŋaal man uyesooraal di Akiiyaau.

¹ Mati kápurumul káboteniak kati Atijamit, násenolimi burokab ube, wúli létupur to. ² Mati wúli nulalat mukaanaam mayofimi mati kapuñak káamak koolimo. Úbunteriit anoosani mba útiteriit furimaf fati Atijamit. Atijamit ceb namammanj mati wúli nuregereg malegenam ceb, man bukaaku mbi tíeniil mati kukila pankuŋoolen kúfiumoli. ³ Bare handeneen furimaf fajakaaf foololaal fan úriiŋenumi, foo fuyofoiyofo bee di bukanak kaatumi kakañoak ceb. ⁴ Seetaanaay, emitey yarungumi dúniyaay uye, érimenumi úyegetaw wati káyinenutumi. Takum kuŋoolen kujuk mawuŋam mati furimaf fajakaaf mati mákalaam mati Apakenaau Áamakau. ⁵ Wúli ulet di káriiŋenuul mati kúko’oli. Bare núriiŋenriiŋen mati Yensa Apakenaau Áamakau nan Akiiyaau. Wan uregumi mati kúko’oli woo eenomi wúli kumiiceeluul mati wan Yensa akammi di wúli. ⁶ Mati Atijamit oo ammi, “Mawuŋam muwuŋen di érimey,” Atijamit ákonau ákaanolimi mawuŋam moola man muwuŋen di sísigiroli, man áŋarulolimi man úlaul mati mawuŋam moola muwuŋenumi di buulab bati Yensa Apakenaau Áamakau. ⁷ Bare wúli noonosoono nan múruum dán kawulak uke kuyofimi. Kánkumak kalegenak kúpurumulopurum di Atijamit lee di wúli. ⁸ Numingenimingen di bugaal banoosani, bare unakasuti, umanjut waa noote ekaan, bare létupururer to. ⁹ Wúli núsuutukenisuutuken, bare ájimutoli. Kútekolitek kubet máamak bare uceturerut. ¹⁰ Banoosani nuje’e wúli nujuudoojuudoor di síniiloli ecetey yan Yensa acetumi, manteer eroŋey yan Yensa aroŋenumi mbi ejuki poop di síniiloli. ¹¹ Mati Yensa, wúli karoŋumi búrom nanoosani Atijamit ásenolimi bee mo di búyiikab bati ecetey kammojaat manteer eroŋey yati Yensa mbi ejuki di síniiloli. ¹² Mati mo’omu wúli nujuudoojuudoor di ecetey, bare páneŋaruluul eroŋey yati bándoorey. ¹³ Furimaf fati Atijamit di fommi, “Ínje nifiunfium, ban moo kammi nisanken.” Wúli poop nufiunfium, ban moo kammi nusanken. ¹⁴ Wúli numammanj mati Atijamit, ayitenumi Yensa Apakenaau Áamakau, oo poop pánayitenuloli di Yensa ban wúli di muyuul pánajeetumolaal bee di bújonlenool. ¹⁵ Mo’omu búrom mukaanikaan bee mati muyuul. Ban nan man majakam mati Atijamit múriiŋumi bukan kufaŋ man kujuupoe, kama ñaa bukan kafaŋumi man kujuupoe kusal Atijamit. Ban mo’omu pammusen kálebien kufaŋ man kúkalaae bee di Atijamit. ¹⁶ Létupururer to. Handeneen siniilas sóololi soosu di ecet jayiinkun jayiinkun. Bare úyegetoli woo man úliŋeni hani bee iñeme. ¹⁷ Mati bugaalab bóololi bahiiliaab ban ubajeñaa kájeetumoli mawuŋam máamakam mati bándoorey, moo mufaŋe man múkalaae bugaalab ube. ¹⁸ Moo kammi, wúli újikereriit, wan jícilaj jijukemi, bare wan jíjukeriitumi. Mati wan jícilaj jijukemi iñeme, woo bee ewuuj, bare wan jíjukeriitumi woo bee bándoorey.

¹ Mati wulaal numanjaamanj mati siniilolaal sikankaan nan síguut san ootaale ecin dó di dúniyaay uye. Bare síguutas sikila numanjaamanj mati Atijamit panasenolaal anoosani tan aate ecin. Tan tikila letikaan tan tati tateepi ñátum di kañenak kati an, bare tootu di bukinab bajakaab. ² Malegen di anoosani baabe di dúniyaay oomu di éliil, ban namammaŋ máamak man akaano tan tati bukinab bajakaab nan kaloa kunkul. ³ Numammaŋ bee kakaano to nan kaloa kunkul takumbi an alako búliŋet. ⁴ Nan ucinooraami di síguutas use sikankaan bugaal báamak, ban núliil. Bare kaanutumo mati numammaŋ bee épur di siniilas use saatumi ecetey. Mati numammaŋ bee kakaanoaal tan tati bukinab bajakaab mambi siniil saatumi ecetey simeri ñátum di eroŋey yati bándoorey. ⁵ Atijamit di fúko’ool ajuumenolaami fujuumaf ufe, nasenolaasen Búyegetab Bátienaab boola man áyiisenolaami tíen mati panakammo. ⁶ Moo kaane núgolumaalegolum, handeneen wulaal numanjaamanj mati nan oomaami di siniilas use núloiaaloi di Akiiyaau. ⁷ Moo kaane let wan ujukaale bare wan ufiumaami, úgolumaami di wo nújawumaalemi. ⁸ Nubajaabaj fúgolum fátiene, ban panfaŋ man súumolaal man ukataal siniilas soololaal baabe mambi ulakoaal sísindo’olaal di Akiiyaau. ⁹ Moo kammi manteer wulaal bukooke baabe mba baaba, wakilumi fúkaaf woo eenomi ekaaney wan Akiiyaau yeoomi. ¹⁰ Mati wulaal búrom anoosani aate ejuum di bújonlenab bati Apakenaau Áamakau man agameni. Wulaal búrom anoosani panayab wan ceeŋumi riiboor di wanoosani wan akammi di eniiley di eroŋey yoola baabe di dúniyaay, wajake mba wajakut. ¹¹ Mati wulaal numanjaamanj waa eenomi kákoli Akiiyaau, ban nuraagalaaleraagal bee kábuntoorul bukaaku. Atijamit namammanj tíen wúli bukan kúmanum, ban nígolummi mati jimammanj poop di úyegetuul wúli bukan kúmanum. ¹² Ulet di katebenooro úbandoli bee di muyuul inki. Bare wúli numammaŋ man kumeruul kubaak mati wúli, nampi jommi di kajoonutumi di katebenelenoorumi mati man bukaaku kuwoonooremi mati bukoo. ¹³ Kaanjaat wulaal bukan kakaayene kagono, moo búrom titoorolaal di Atijamit. Bare kaanjaat úyegetoli ujunjuum cek, moo bee mati muyuul. ¹⁴ Kamaŋak kati Apakenaau Áamakau kúrungoli. Nubabaj káyinen mati ákon nácetuncetum bee mati anoosani, moo búromolaal poop ucetaale. ¹⁵ Ban Yensa malegen nácetuncetum bee mati anoosani. Nácetuncetum manteer karoŋumi takumbi kúroŋum bee mati kúkoiil, bare bee mati acetumi ban náyitenuli bee di eroŋey bee mati kukila. ¹⁶ Moo kammi, kápurum iñeme takum ujiker an ñátum di fujuumaf foola. Handeneen noo mati di mo’omu mákonam nujikeraami Akiiyaau eeno, bare iñeme ujikerutaalool mo. ¹⁷ Moo kammi, anoosani ammi di Apakenaau Áamakau, an akila batuuke bunkul, mafanlenaam mujajaw man munkulam mubil. ¹⁸ Uru búrom di Atijamit jáwumulomi, asukenumi bapaalaayab boololaal di fúko’ool kápurumul di wan Apakenaau Áamakau akammi. Ban nasenolaami burokab bati ekaaney kasukenak bapaalaayab titoorey yati oo di bukanak. ¹⁹ Mati Atijamit ammi di Apakenaau Áamakau, asukenumi bapaalaayab di kati dúniyaay man kubaj kásuumaay di fúko’ool, bajikerut bakaaneriil majakut. Bare nábilenolimi kurimak kati kasukenak kati bapaalaayab. ²⁰ Moo kammi wúli nuboñiboñ man usanken mati Apakenaau Áamakau, kankaan nan Atijamit di fúko’ool ammi di elawuul mambi jíyenten kápurumul di wúli. Wúli bukooku di elawuul máamak mati Apakenaau Áamakau, jikat man Atijamit asuken bapaalaayab booluul di fúko’ool. ²¹ Apakenaau Áamakau akaanderut majakut. Bare mati wulaal Atijamit akammi Apakenaau Áamakau man anaamoor di majakutolaal manteer akila mbi aŋoolen akaanolaal unaamoor di majoonam mati Atijamit.

¹ Wúli bukooku karokoor di Atijamit, wúli bukooku di elawuul kayabumi majakam mati Atijamit takum jikammo mée. ² Mati naane, “Nanan nan íriiŋumi nijamijam, ban nirambenimi di funakaf fati epakey” Yénten, iñeme eenomi nanan nikila nírindiiŋ. Iñeme eenomi funakaf fati epakey. ³ Wúli umaŋut man an ajuk kabet di búrokoli, moo kammi nuliliik takum ukaan waate ebet an. ⁴ Bare, di wanoosani wan ukammi, núyiisenooroyiisenooro mati wúli legen kuroka kati Atijamit. Wúli numuutemmuuten handeneen ulakomi di bugaal báamak, mátaañie, di búyiik. ⁵ Wúli nutekitek, nukulimi dán bukanak kukuleimi, núbukomi di káguuloor. Nurorok máamak burok bawuuje kúko’oli di kámooriaati mba kacaaret. ⁶ Bare núyiisenooroyiisenooro mati wúli legen kuroka kati Atijamit ñátum di úyeget wátiene di fumanj, kamuuten di ekaan jak. Ñátum di kánkumak kati Búyegetab Bátienaab di kamaŋ kalegen, ⁷ di káriiŋen kalegenak, di kánkumak kati Atijamit. Wúli nubabaj majoonam nan mútiikumaoli di kañen kúrid bee mati katiiken di kañen kumay bee mati kapaken. ⁸ Manteer wúli úlebieni mba úlebienuti, usaleni mba úsalenuti, nusankensanken malegenam handeneen bukanak kúsofolisof nan bukan kagaajooremi. ⁹ Umanjout di bukaaku, bare di muyuul numanjomanjo tíen. Wúli bukan kakaayene ucet, bare hani bee iñeme nurondoŋ. Bukanak kútekolitek bare uceturerut, ubujireruti. ¹⁰ Handeneen núboteniboteni, nulakoelako di kamaayoor. Wúli bukan nan bukan kaleke, bare nukankaan kajuupoe man kubaj fubaj. Wúli poop bukan nan kaakenut waaf, bare nookennooken wanoosani. ¹¹ Kúpaalumom, muyuul kati Korint! Wúli nusankensanken láulo ban sísigiroli síwambulowambulo bee di muyuul. ¹² Kaanut mati sísigiroli silee di muyuul, bare muyuul sísigiruul sileemi di wúli. ¹³ Ínje neem di kasankenuul nan kuñoolom iñeme. Jíwambul úyegetuul bee di wúli. ¹⁴ Jitey bukanak kan umanje káyinenutumi di Apakenaau Áamakau. Mati bukan kajoone di kajoonut, buu koote kapaalaay eeno? Érimey di mawuŋam buu soote kapaalaay eeno? ¹⁵ Yensa Apakenaau Áamakau di Seetaanaay bapaalaay baano buu boote kalako titooriil? Mba áyinena di áyinenutumi, waa koote kapaalaay titooriil? ¹⁶ Fukobaf fáñiiaaf fati Atijamit waa sipaalaay di sínaati? Mati wulaal eenomi fukobaf fáñiiaaf fati Atijamit aroŋaau nan man Atijamit ammi, “Ínje eete ecin di bukoo, ban nujawoor di bukoo tirooriil, Ínje eete ekaan Atijamit ooliil, ban bukoo koote ekaan bukanak kúmboom. ¹⁷ Moo kammi jípur di bukoo, ban di jípajulooro di bukoo, Akiiyaau aregumi. Takum jigor waaf wasikoe, ban ínje eete kawalenuul jak. ¹⁸ Ínje eete ekaan ampauul, ban muyuul joote ekaan kuñoolom kúniine di kunaare, Akiiyaau ati Kánkum moo naregumi eeno.

¹ Kúpaalumom, mati nubajaabaj báligab ube, mbi utiluloaal di wanoosani wasiko’olaami kapanookapan di siniilolaal mba úyegetolaal. Moo kaane, nusenaal kúko’olaal búrom bee di Atijamit mati núlebienolaalebien. ² Jíwambul úyegetuul bee di wúli. Bajut an uloe di farool, bajut an ukaane kóji, ban bajut poop an uguuñe. ³ Ínje iregut mo’omu bee káfirenuul. Bare nan man iregumi no’ona, mati muyuul jooju di sísigiroli, manteer nucetaal mba nuroŋaal tákon. ⁴ Nibabaj fúgolum fáamak di muyuul, nitebenteben ubandom máamak mati muyuul! Muyuul jiñabumi búsusom máamak. Jikaanankaan súumom handeneen nan wúli ulakomi di bugaalab. ⁵ Hani nan úriiŋumi Makedonia, wúli ubajut kayookulo, ban nubabaj bugaal banaamut kapanookapan. Nubabaj mulobaay di kúlatooroli kati téeŋey yati fujojaf, ban di kákoliak di úyegetoli. ⁶ Bare Atijamit, añabemi úsusaw wati kammi di bugaalab, moo mákonam, nakammi nan aboñulomi Tiito bee di wúli. ⁷ Ban lee ebiley yoola cebuyo éñabolimi, bare poop wan áregolimi buu jiñaboomi búsusool man bufinto eeno. Náregolireg man jiraanoammi, man jibajumi káboteni, di poop man jisofammi jak eeno. Moo kaane ínje di faŋ man súumaam máamak iñeme. ⁸ Handeneen yémuuyem di letaraay ekila yan isenuumiñaa. Kaanutom kapotoj iñeme mati yo (handeneen nipotojeempotoj mati yo), mati nimammanj tíen letaraay yo’oyu ekaanuukaan úsusuul úboli, handeneen nanan nátemie ceb. ⁹ Ínje iñeme súumansuum, lee mati man ikaanuumi úsusuul úboli. Lee mati kariak kukila bare mati kariak kukaanuumi man jítiiwoor jikat bálamuk majakutuul. Kariak kan jibajumi moo Atijamit akaanuumi man jibaj, ban di jibilumi jimanj mati wúli ukaanutuul wákojie. ¹⁰ Nan Atijamit akaanuumi man jibaj kariak karambenuumi jítiiwoor jikat bálamuk majakutuul moo panjipak, ñaa takum jibaj síwoonoor sajakut mati moo. Bare kati dúniyaay uye kukaanuumi man jibaj kariak, koo kuŋooleŋŋoolen kukaan bukanak man kújim. ¹¹ Jijiker wan Atijamit akaanuumi man jibaj kariak. Muyuul jimammaŋ máamak bee káyiisen mati muyuul bukan kakaanut hani waaf. Riuuri ban goruugor. Jilinliim bee ejuk mati majoonam mujuumenijuumen. Jíyiisenyiisen mati muyuul jikonkooŋ máamak di mukaanaam ume. ¹² Handeneen man iciikumi bee di muyuul, ikaanut bee mati kataaken alomi mba an álusoomi. Bare niciikuuciik, manteer Atijamit mbi áyiisuul man jísofolimi jak eeno. ¹³ Moo kaane wúli núliŋeniliŋen máamak. Lee mati wúli úliŋeni ceb, ban poop súumolisuum man ujuk man jirambenumi Tiito man búyegetool bufinto. ¹⁴ Nitebenteben sileekas bee di oo mati muyuul, bare muyuul jípurut di ínje. Wúli nanoosani nusankeneuusanken malegenam bee di muyuul, moo mákonam, katebenak kati sileekas kan ukaanemi bee di Tiito kúyiisenyiisen malegen. ¹⁵ Ban Tiito nafaŋ man áyiisenuumi kamaŋak koola, náyiisenumi kamaŋak nan awooloemi man jisofoomi jak eeno búrom, man jiwalenoomi ñátum di kálebien káamak. ¹⁶ Ínje súumansuum máamak iñeme mati nibabaj fúgolum fáriiŋe ñaj di muyuul.

¹ Kutiom, wúli numammaŋ man jimanj mati majakam mati Atijamit máyiisenimi bee di kuriibaak kati kujojak kammi Makedonia. ² Handeneen man kújawumumi di búyinkoor báamak bati bugaal, kásuumaak kooliil kúkalaakalaa man kusen kawul kákalaae kápurumul di úsusiil, handeneen man kulekumiñaa. ³ Paniŋoolen íyiisen mati kusenesen wan kuŋoolenumi kusen, hani wawuujutomi. Kápurumulo di kamaŋak kooliil. ⁴ Kúlawolilaw máamak man ukatiil kucaab di kawulak kápurumul di úyegetiil man kuramben bukanak kati Atijamit kammi Yúdea. ⁵ Kukankaan wuuj wan úgolumeenumi, mútiyaaram kusensen kúkoiil bee di Akiiyaau, púrutomi bee di wúli poop, nan man Atijamit amaŋiimi man kukaan. ⁶ Moo kaane wúli nulawumi máamak Tiito, atooŋumi burokab ube kabiñoo di fúcitumaf, akila aate karulen di karambenuul man jifabel burokab bukila búbutoab bati kamaŋak. ⁷ Nan man kareesuul kúsummi di wanoosani wan ubajumi, kafium, kasanken, fumanj, fuuñ fati emaŋ di kamaŋak kan jibajumi bee di wúli. Muyuul kareesuul kúsummi di burokab ube bati kamaŋak. ⁸ Eenut joote ekammo ñátum di kamingen. Bare ínje ereguul buu bukaaku kubajumi fuuñ fati emaŋ karamben. Ínje oomu di kámeelo kamaŋak kooluul manteer kalegen. ⁹ Jimammanj tíen majakam mati Akiiyaolaal Yensa Apakenaau Áamakau. Handeneen nakankaan abaja bare mati di bálamukab booluul nabilumi akaan aleke, mbi jikaan kubaja kápurumul di balekerab boola. ¹⁰ Di mo’omu, kagamenak kúmboom bee di muyuul kooke. Jifabel iñeme wan jitooŋumi sunken. Mati muyuul eenomi kútiyaarak katooŋumi, lee ekaaney ceb bare mati jimammaŋ mo. ¹¹ Iñeme muyuul joote karulen man jifabel di wan jitooŋumi. Jibaj fuuñ fati emaŋ bee kafabel wo nan man jisofuwomi noo, ban jisen kápurumul di wan jibajumi iñeme. ¹² Kaanjaat jibabaj fuuñ fati emaŋ man jisen, Atijamit namammaŋ man jisen kápurumul di wan jibajumi, kaanut kápurumul di wan jibajutumi. ¹³ Eenut búrookaab booluul mbi bufaŋ bati bukaaku, neene mbi jikaan jire’en cererer. ¹⁴ Tan oomaañaa iñeme jibabaj juup panjiŋoolen jirambeniil. Niceen pankuŋoolen kurambenuul wan jiceeŋumi, mbi poopuul anoosani abaj wan ceeŋumi. ¹⁵ Nan man ciikimi, “Ajojenumi juup ábajeriit warinoe di oo. Man ajojenumi jayiinkun, panabaj yaj. ¹⁶ Bare kasalak kooku di Atijamit, akammi di ésigirey yati Tiito man asen kacookoorak kajakaak kákonak kan ubajaañaa. ¹⁷ Mati lee Tiito amaŋumi man ukaanaal wan ulawaaoomi, bare reooreoor búyegetool man bumaŋumi máamak, poop man busofe bee ebil bee di muyuul. ¹⁸ Di oo wúli kooku di éboñuluul atiolaal ariiba aceen. Akila an ajamoe máamak di fujojaf fanoosani titoorey yati kujojak mati káriiŋenak kati furimaf fajakaaf. ¹⁹ Reoorut to, bukanak kati kujojak kumukemmuken ariibaau ume man kujawoor bee karamben burokab ube bati kamaŋak. Ñátum di bo wúli núlebienlebien Atijamit di fúko’ool, ban núyiisen kamaŋak kóololi bee karamben. ²⁰ Wúli umaŋut mbi káreesoli kukaño mati man ootumi esofey kawulak uke káriiŋaak. ²¹ Wan umaŋumi woo eenomi ekaaney wajoonaaw lee di kapanak kati Akiiyaau ceb bare di poop kapanak kati bukanak. ²² Ban di bukoo wúli poop kooku bo éboñuley atiolaal ariiba aceen, an úmeelomi moola tíen ban náyiisenoliyiisen emaŋey yoola yáamak bee karamben di mukaana majuupoe. Iñeme nafaŋ man amaŋe karamben mati kágolumak koola kan abajumi di muyuul. ²³ Mati Tiito, oo arokoorom, an urokemi di ínje bee karambenuul. Mati kutiolaal kuriiba bukaaku kugabaak kaboñimi di oo, jáwumulojawum di kareesak kati kujojak ban bee kálebienak Apakenaau Áamakau. ²⁴ Moo kammi mbi jíyiisen kamaŋak kooluul bee di kukila, mambi bukanak kati kujojak kujukuko tíen ban di kumanj wau kaane nutebenumi úbandoli mati muyuul.

¹ Ceeŋutom man íciikuul mati kawulak uke kan jiwoonoorumi bee eseney bukanak kati Atijamit kammi Yúdea. ² Mati nijujuk man jimaŋumi máamak eeno bee karamben, ban nitebenumi ubandom mati muyuul bee di kupaalolaal kuriibaak kati Makedonia. Nirereg mati muyuul kuriibaak kammi Akaia jijonjoorumi bee karamben kabiñoo sunken. Fuuñuul fati kamaŋ ewul fugorengoren kajuupoe di kukila bee etooŋ karambenak. ³ Bare ínje oomu éboñuluul kutiolaal kuriibaak buke, manteer katebenolaal uband mati muyuul takumbi kukaan ñaañaaña di mukaanaam mo’ome. Bare, nan man eenumi, panjijonjoor di baleebab booluul nan man ireguumi. ⁴ Manoosani, kaanjaat bukaaku kápurumulomi Makedonia koote ebil di ínje, biyok kujuk mati jijonjoorut di baleebab booluul nan man ínje ilobiimi eeno, pánkaanoli kapuñ, ban muyuul poop panjipuño. ⁵ Moo kammi ínje nisosof mati cenceeŋ man ilaw máamak Tiito di kutiolaal kuriibaak buke man kulo fáculom, man kurambenuul jijonjoor kawulak kan jíligumi. Pankujonjoori nampi íriiŋubomi, takumbi kaan kawul kati kamingen bare mbi kaan kawul kati sísigiruul. ⁶ Wakilumi fúkaaf woo eenomi uwe: awaña anoosani alukumi jayiinkun, panajal jayiinkun. Bare awañaau alukumi juup, panajal juup poop. ⁷ Anoosani aate eleeb nan man búyegetool busofumi eeno, takum ríiŋaati di ésigirool mba takumbi kaan kamingen. Mati Atijamit namammaŋ awulemi di búyegetool báwambuloe. ⁸ Ban Atijamit naŋooleŋŋoolen asenuul kawul kanoosani kajuupoe mambi jibaj yaj di wanoosani ban mambi jicookoori di wajuupoe bee mati burok bajake banoosani. ⁹ Nan man ciikimi, “Asenemi juup di ésigirool bee di kalekumi, majoonam moola pammucin bee bándoorey.” ¹⁰ Asenemi etuukal kuwañaak ban naseneiil mbúur bee mati furiaf fooliil. Oo poop panasenuul etuukal yan jiceeŋumi ban panaliilenuyo panjibaj muria majake kápurumul di wasenimi juup di sísigiruul. ¹¹ Panakaanuul man jibaj fubaj juup di wanoosani yaj biyok jifaŋ man jiŋoolene jiwul. Ñaa bukan kajuupoe pankusal Atijamit mati kawulak kooluul kan jiyabumi kápurumul di wúli. ¹² Mati burokab ube ban jikammi lee kawulak bee di bukanak kati Atijamit wan kuceeŋumi ceb, bare poop bukaanekaan man bukanak kusal máamak Atijamit. ¹³ Muyuul jíyiisenyiisen kúkouul ñátum di burokab ube, pámbujeetum kálebienak di kasalak bee di Atijamit. Jifiummi furimaf fajakaaf mati Apakenaau Áamakau, ban jisosofufo ñátum di karambenoorak kápurumul di sísigiruul di bukanak kati Atijamit di anoosani. ¹⁴ Iñeme bukooku di elawuul Atijamit, ban poop kuraanouuraano, mati majakam máriiŋaam mati Atijamit man áyiisenolimi kápurumul di muyuul. ¹⁵ Kasalak kooku di Atijamit mati kawulak koola kan umanje letuŋoolen usankenaal.

¹ Ínje Paul di fúko’om eem di elawuul. Ínje nilawuulaw ñátum di kawalenoor di kajinlen kan Apakenaau Áamakau abajumi. Handeneen kuceen di muyuul kuregumi mati ínje an ákoofie nan ujuudooraami, bare ínje nibilumi ipeeto nan úloiyooraami ceb. ² Bukaaku koone wúli kágorooroli kuriibooriiboor di mukaanaam mati dúniyaay uye. Moo kaane nampi íriiŋubomi, panikaan táañi di bukan kukila. ³ Malegen wúli bukan ceb nucincin di dúniyaay uye, bare ulee di futiik faanomi nan man bukanak kati dúniyaay kukaanemi eeno. ⁴ Mútiikumaam man utiikumi di móro, moo lee mati dúniyaay uye. Bare mútiikumaam mati Atijamit mabajumi kánkum káamak bee kakajen jaj kánkumak kan kúlatooroli. ⁵ Ñátum di mútiikumaam mukila wúli nukajenkajen kañakoorak kati kumanjaak katebenelenooremi koo kúfirenemi bukanak emanjey yati Atijamit. Ñátum di mútiikumaam ume, wúli nuŋooleŋŋoolen kawoonoor kajakut kanookani kati bukanak, ban uliikiteniil man kujamoor di Apakenaau Áamakau. ⁶ Ban nampi jijamoomi tíen, panutek anoosani alatumi ejamool. ⁷ Jijiker wammi fáculuul. Kaanjaat anoosani ágolumumi mati oo ati Apakenaau Áamakau. Mbi jikaanool man awoolenooro, mati wúli poop kati Apakenaau Áamakau nan kukila. ⁸ Ínje letipuñorer, handeneen nifaŋ man itebenooro sileekom mati fujuumaf fan Akiiyaau ásenolimi. Fujuumaf fukila foo bee káliŋen kafiumak kooluul, lee kakajenuko. ⁹ Takum jijikerom nan ínje an amaŋe kakoolenuul ñátum di siletaraas súmboom. ¹⁰ Bukaaku koone, “Paul siletaraas soola sítaañitaañi ban sibabaj kánkum, bare nan ujuudooraami akila nálaamolaamo, ban kurimak koola kubajut fúkaw.” ¹¹ Bukanak kukila kasankenemi mo’omu koote kálaul tíen mati bajut búpajuloor di wan uciikulomi di siletara wúli balee to di wan ootumi ekaan wúli bamaaterab di muyuul. ¹² Wúli letupuun bee karekelen kúko’oli di bukaaku kasofooromi bukan kateboe. Bare kukila kágotete, di karekelenoor kúkoiil, kubajut kálaul. ¹³ Bare ootutaal katebenooro síleekolaal wuujuto mati fujuumaf fan ubajut. Bare panutebenooro ceb mati burokab ban Atijamit ájuumenolimi man ukaan, ban muyuul eenomi kapan kaaku kati burokab bukila. ¹⁴ Wúli di kúko’oli letuteben síleekoli wuujuto. Ban wúli umondumi újeetumuluul furimaf fajakaaf mati Apakenaau Áamakau. ¹⁵ Wúli letuteben síleekoli mati burokab ban bukaaku kurokumi. Bare núgolungolum mati kafiumak kooluul pánkukalaa ban mati burokab bóololi titooruul panfaŋ man búkalaae. ¹⁶ Mambi úriiŋen furimaf fajakaaf bee di mof múbuto man jílingoorumi, ban aleemi di burok. Leebaj kúceeŋ di kapan kati ai noom di burok. ¹⁷ Bare furimaf fati Atijamit di fommi, “Ampi amaŋumi katebenelenoor aate katebenelenoor mati wan Akiiyaau akammi ceb.” ¹⁸ Mati let anau asalooroemi oo abaje kasal, bare anau an Akiiyaau asalumi oo abajemi kasalak.

¹ Nimammaŋ muyuul mbi jimuuten di ínje handeneen man ígotetumi jayiinkun. Jibonket jimuuten. ² Nibabaj búlat di muyuul ñátum di búlatab bati Atijamit fúko’ool. Mati níliguulig nan ámajira amanjutumi ániine bee di ániine ákon, oo eenomi Apakenaau Áamakau. ³ Bare níkolikoli mati nan man eyelaay ebuntoorumi Hawa, kawoonoorak kooluul pánkujimenuul man jikat kamaŋak kalegenak di kálirooraak kooluul bee di Apakenaau Áamakau. ⁴ Mati an aceen abilujaat man áriiŋen mati Yensa ábuto ban náriiŋen mati akaanutumi Yensa an úriiŋenuumi, mba nuyab búyeget búbuto kápurumul di anau an jiyabumi, mba jiyabujaat furimaf fajakaaf fanaamutumi kápurumul di anau an jiyabumi, muyuul súumuusuum man jisenooro kúkouul bee di oo. ⁵ Ínje isofut mati man ifaŋumi man itiitie kan joonemi kúriiŋenaak buke káamakak kooluul. ⁶ Malegen, ekooñey yati kasankenak yoo ikooñut, mba ilee di fumanjaf. Bare nanoosani numanjenuumanjen mati malegenam máriiŋaam. ⁷ Nampi íriiŋenumi furimaf fajakaaf fati Atijamit baceeŋutuul hani jikopori. Ínje niwalenooromi mambi jílebieni. Mante moo nikajenkajen? ⁸ Nigunguuñ kujoj kaaku ñátum di eyabey baleebab booliil bee ekaan burokab bee mati muyuul. ⁹ Nan ilakoeenumi di muyuul, eekenut hani waaf, bare igaalenut an man arambenom. Mati kutiolaal kuriiba bukaaku kápurumulomi Makedonia di kújeetumulo wan iceeŋumi. Ínje igaalenutuul man jirambenom noo, ban poop letigaalenderuul. ¹⁰ Nan man malegenam mati Yensa mammi di ínje, letiyoolo jáng kateben sileekom di upanaw búrom wati Akaia búrom wo. ¹¹ Wau? Mante ínje imaŋutuul? Atijamit namammanj mati nimaŋuumaŋ! ¹² Panirulen di ekaan wan eem di ekaaney iñeme, takum kúriiŋenaak kuceen mbi kúaamakalenoor di eregey man wúli úrokum moo kúrokum. ¹³ Kúniinaak kukila kaanomi mo’omu kukaanut kúriiŋena kulegen, koo kúriiŋenaak kubuntaak, kagaajooremi mati burokab booliil ban di kukaanalenoor nan kúriiŋena kalegen kati Apakenaau Áamakau. ¹⁴ Bare laañutom bo, mati hani Seetaanaay di fúkouyo kakaanalenooro nan maleeka yati mawuŋ. ¹⁵ Laañutom bo, ñaa, kaanjaat kuriibaak kooliyo kakaanalenoor nan kuroka kajoone. Di múlamukaam mooliil pankubaj wan kuñesemi. ¹⁶ Panilaañ ireguul tíen, takumbi an asof mati ínje égot. Bare kaanjaat panjisof eeno mo, mbi iŋoolen ibaj jasiinkun katebenelenoor. ¹⁷ (Wan isankenumi iñeme, kaanut wan Akiiyaau amaŋumi man isanken. Di mukaanaam man itebenelenooreñaa nisankensanken nan égot. ¹⁸ Bare mati bukan kajuupoe bukooku di katebenelenoor nan man bukanak kati dúniyaay kukaanemi eeno, ínje poop panitebenelenoor!) ¹⁹ Muyuul di kúkouul kasofooromi jilinlolinlo máamak, joote kamuuten di sígot! ²⁰ Muyuul jimuutenemuuten di anoosani akaanuumi kumiiceelool, mba nároogenuumi, mba naguuñuumi, mba násofaatiuumi di waaf, mba atancuumi di karabak kooluul. ²¹ Nipuñopuño man ireguul mati wúli úliŋut máamak bee ekammo! Bare wanoosani an apuune man atebenelenoor di wo, ínje asankeneñaa nan égot, ínje niŋooleŋŋoolen poop itebenelenoor. ²² Mante kukila Kúhibur? Ínje poop moo. Mante kukila Kuisirael? Ínje poop moo. Mante kukila úwoloorumaw wati Iburehima? Ínje poop moo. ²³ Mante kukila kuroka kati Apakenaau Áamakau? Ínje oomu di kasanken nan égot bare ínje ifaŋe man ikaane aroka! Ínje ifaŋe man iroke wuuj kukila, ínje ifaŋe man ilakoeene dán bukanak kukuleimi wuuj kukila, ínje ifaŋe man ibaje kútek wuuj kukila, ínje ifaŋe man ilofe ecetey wuuj kukila. ²⁴ Kúyahuudak kusofansof ñooni futok ban kasofaookasofa kunageannag ñátum di esankil yati kabaŋ ñákon rinoe bukan kugaba. ²⁵ Kúroomanak kunagannag ñátum di sigol bee ñooni ñáfeegiir. Kulatoorom di kuleebammi sikooba ñákon. Busaanaab di busayumi di ínje ñooni ñáfeegiir. Di fuk di balay ínje oomu ró di mumelam narende. ²⁶ Di ejaay yúmboom kajaaburuŋak ñajuupoe nibabaj bugaalab, ninokennoken di búyiik di kal, kúkuu, bukanom, Kakaanutumi Kúyahuudak, sísuk sáamak, baŋaan, fal fáamak di kuriiba kubunta. ²⁷ Nilakolako di burok di bugaal báamak, kámooriom kúsuumut, nicaarecaaret, baraanab di busofom, ñameeŋe íbajeriit furi, ñonkañ ñisofeansof mati mutugenam. ²⁸ Uru búrom balee to, nibajebaj bugaalab funakoofunak bati buu kujojak kombomi eeno. ²⁹ Nampi bukaaku kúlaamomi, ínje poop nílaamoelaamo. Nampi bukaaku kulomi di majakut, di riom matatat. ³⁰ Kaanjaat neete katebenelenoor, panitebenelenoor mati pambaj wáyiisenumi man ílaamomi eeno. ³¹ Atijamit, oo eenomi Ampaau ati Akiiyaolaal Yensa, panasali bee bándoorey, namammanj mati ígaajooreriit. ³² Nan ilakomi Damasukos, anifaanau ati bo di nanan nati áyiau Areta ajuumenumi kupooya di kúlamutak kati bo, man kusofom to. ³³ Bare di kúyuunammi di katekel kápurumul di étoofeney man ípakumumi di kañeniil.

¹ Ínje eete kateben sileekom, handeneen ibajut waaf di mo, bare nirulen kasanken mati Akiiyaau náyiisenanyiisen waaf nan sáaut man ijuk di poop nakaanammi man imanj wayofoe di ésigirom. ² Simit uñen di sibakiir bálamuk, nimammanj ariiba aceen ati Apakenaau Áamakau naŋariŋar bee di bukinab bajakaab búfeegintenab. Ínje imanjut manteer funkool fuje’e mba yuutool eje’e, Atijamit amanje ceb. ³ Ban nimammanj mati ániinaau umu naŋariŋar bee bukinab bajakaab, manteer di funkool fuje’e mba yuutool eje’e, ínje imanjut bare Atijamit amanje ceb. ⁴ Ban najanjam kurim kuceen kan aŋoolenut areg. ⁵ Mati ániinaau ume panitebenooro, mati ínje d fúko’om letitebenooro, rino di kálaamoak kúmboom. ⁶ Handeneen nimammaŋ bee katebenelenoor, letikaan égot di ekammo, mati malegenam ceb nirege. Bare letitebenelenoor, mati ínje imaŋut an aceen asofaam tan ínje íriiŋut di wan ajammi di wan ajukumi di ínje. ⁷ Handeneen man iyabumi wayofoaaw wáfasulooriammi di Atijamit. Ínje nibabaj kayah di eniilom, koo eenomi aboña ati Seetaanaay, man agaalenom takum itebenelenoor. ⁸ Ñooni ñáfeegiir nilalaw Atijamit mati mo’ome man ápurenuko di ínje. ⁹ Bare Atijamit nalaañenammi, “Majakam múmboom muyajiyaj, mati kánkumak kúmboom mbi kujuki kúliroor di bálaamoerab booli.” Panfaŋ man súume man iteben sileekom mati kálaamoak kúmboom, mbi kánkumak kati Apakenaau Áamakau mbi kulako di ínje. ¹⁰ Mati bálamukab bati Apakenaau Áamakau, súumansuum di kálaamo, kajel, bugaal, kásuutuken, mba búyiik. Mati nan ílaamoemi, noo níliŋeni. ¹¹ Nikankaan égot! Bare muyuul jimingenammi man ikammo. Muyuul joote eciik kurim kati káyiisen mati ínje. Ínje lee waaf bare kúriiŋenaak kan jommi kúriiŋenaak kooluul kúkoyumutom. ¹² Nan ilakomi di muyuul, níyiisenuuyiisen tíen káyiisenak kanoosani kareguumi mati ínje áriiŋena alegen áboñulimi kápurumul di Atijamit di fúko’ool. Mati nimuutemmuuten ikaan káyiisen titooruul di kúmanjum kajuupoe, di wajamurerutimi, di mukaanaam máamakam máriiŋumi síwoonoor. ¹³ Ñaa waaf wákon wan ikaanutumi di muyuul, woo nikankaan wo di kujojak kaaku. Woo eenomi igaalenutuul. Kaanutumojaat mbi jibonketom. ¹⁴ Iñeme ínje nijonjoojonjoor bee ebil bujukoor di muyuul inki ñaa kákamun kúfeeginten. Ban letigaalenuul hani waaf, mati ilee di kariiben wan ubajumi, bare muyuul di kúkouul ceb niriibene. Kuñiilak kúkuumeneriit kuwolaiil, bare kuwolaiil kúkuumeneiimi. ¹⁵ Súumansuum man ikaan wanoosani wan ibajumi bee karambenuul. Mante panjimaŋom jayiinkun mati man imaŋuuñaa máamak? ¹⁶ Kuceen di muyuul pankumaŋ mati igaalenutuul. Bare bee iñeme kuceen kusosof mati nikonkooñ ban nibuntooruul man ibaj waaf. ¹⁷ Bare buuma? Mante kan íboñuluumi kuguuñuuguuñ? ¹⁸ Ínje nilalaw máamak Tiito man ajaw, ban niboñool di atiolaal ariiba aceen síñakon. Mante room kama Tiito naguuñuuguuñ? Mante room kama wulaal úrokumutaal ñátum di Búyegetab Bátienaab bákonab? Mante room kama wulaal útaagulutaal kátaagulak kákonak? ¹⁹ Timaa jisosof wúli nusankensanken uru búrom mati kapooyooro? Moo leti. Wúli nurereg mati ure nan kuroka kati Apakenaau Áamakau, ban wúli numammanj mati Atijamit oomu di káyenten. Kúpaalumom, wanoosani wan ukammi, woo búrom wajake di muyuul. ²⁰ Mati níkolikoli nampi íriiŋubomi takum ítookuluul di wan isofutumi panjikaanuwo, ban muyuul poop leejijukom di wo. Ínje níkolikoli kuceen di muyuul man kulako kañoosoorak mba kalatoorak mba féenaaf titoorey, mba kabotoorak di eloey fácul, mba kasuulenoor, mba káyiisenoor kupooñ, mba kájamooraati. ²¹ Ínje níkolikoli nampi ilaañumi íriiŋubo inki, Atijamit úmboom mbi awalenom joc fáculuul, ban ínje mbi kaanom búlok mati kajuupoe di muyuul kakammi majakut ban kútiiwoorut kukat bálamuk majakutiil mati noo, masikomi, di kaseeket di kániine’et, di kayenet. ’et, di kayenet.

¹ Nanan une eenomi kákamunom kúfeeginten, éjawuley yúmboom bee di muyuul. Furimaf fati Atijamit di fommi, “Anoosani ampi kútibumi di ekaan majakut, malegenam pambimujuumeni ñátum di emaatey yati bukan kugaba mba kúfeegiir.” ² Nigameneengamen kalakomi ekaaney majakut di poop bukaaku búrom nan oomueenumi di kákamunom kugabuntenak. Ínje níloiuuloi, bare iñeme panilaañ igameniil nan man ikaaneenumi. Nampi ilaañumi íriiŋubo nanan une, leejipak di kakurak. ³ Mati jimammaŋ bee emanjey manteer legen ínje di fúredimpaf fati Apakenaau Áamakau nísankenumemi. Nampi akuruumi panjijoon tul, akila álaamoeriit, bare pánayiisenuul kánkumak koola di titooruul. ⁴ Handeneen nálanlaam nan kufaaŋenoomi di ébaarey yati búpinab, iñeme narondoŋ ñátum di kánkumak kati Atijamit. Wulaal poop núlaamoaalaamo di oo nan man Apakenaau Áamakau álaameenumi eeno. Bare panuroŋaal di oo ñátum di kánkumak kati Atijamit, nan man Apakenaau Áamakau akammi eeno. ⁵ Jíningulooro man jijuk manteer jooju di esofey kafiumak kooluul. Jímeelo’ooro. Tíenuutien muyuul jijujuk mati Yensa Apakenaau Áamakau oomu di muyuul? Leejaat jilolo pám kámeeloak uke. ⁶ Nígolungolum mati panjiñes man jimanj wúli ulout pám. ⁷ Kúlawak kóololi bee di Atijamit takumbi jikaan majakut. Wúli ulawut mo’ome mbi úyiisen bukanak kukila mati wúli nuŋooleŋŋoolen ujaw fácul, bare mambi jikaan joon, handeneen wúli nukankaan nan bukan kaloe pám. ⁸ Mati wúli uŋoolenut ukaan wan siriiboorutumi di malegenam, bare malegenam ceb. ⁹ Handeneen núlaamolaamo, wúli súumeolisuum mati muyuul jílinliŋ. Wúli wan ulawemi woo eenomi muyuul mbi jifaŋuto. ¹⁰ Ínje oomu di eciikuul uru bala’a íriiŋubo. Kammojaat ínje oomu di kágolum mati letikaan táañiuul nampi íriiŋubomi. Mati nimammaŋ ekaaney burokab di fujuumaf fan Akiiyaau asenammi man íliŋenuul, bare lee kakajenuul. ¹¹ Kutiom, jikatooraal bee niceen! Jisofoor jak ban jíyenten wan ilawumi, jimaŋoor, jilako di kásuumaay titooruul, ban kamaŋak di kásuumaay kati Atijamit pánkoomi di muyuul ¹² Jisaafoor kasaafoor kásuume ñaj. ¹³ Bukanak kati Atijamit kammi baabe kúsaafuluul búrom. ¹⁴ Emitey ekaan majakam mati Akiiyaau Yensa Apakenaau Áamakau, di kamaŋak kati Atijamit, ban bapaalaayab bati Búyegetab Bátienaab pámboomi di muyuul búrom.