1 PETER

¹ Ínje Peter, áriiŋena ati Yensa Apakenaau Áamakau, eem di eciik letaraay uye. Eciikiciik bee di bukanak Kayiisoorumi bee di mofam múbutoam mati Ponto, Galatia, Kapadokia, Asia, Bitunia. ² Atijamit Ampaau nasofeensof di fumanjaf foola man amukenuumi ban Búyegetab Bátienaab boola man bukaanuul bukan káliroore. Mati mo’omu, jikokob Yensa Apakenaau Áamakau ban fúsimaf foola futiluluul man jítien. Emitey ekaan Atijamit asenuul majakam di kásuumaay faŋ man juupoe di muyuul. ³ Kálebienak kooku di Atijamit, Ampaau ati Akiiyaolaal Yensa Apakenaau Áamakau! Mati káboteniak káamakak koola, wulaal núwolaaliwol inki bee di fúgolum faroŋe kápurumul di káyitoulak kati Yensa Apakenaau Áamakau di kacetumi, ⁴ ban fúgolumaf fati bulaañab bayofimi di bukinab bajakaab bee mati muyuul, ban káñoeriitumi, síkoeriitumi, púreriitumi. ⁵ Mati jibabaj káyinen di Atijamit, muyuul jooju di kánkumak koola bee nampi ebiley yati epakey yaatumi érajuley di funakaf fúlamukaaf. ⁶ Mati mo’omu jimaayoor, handeneen cenceeŋ man jigaal fáculey jayiinkun. ⁷ Bugaalab ubu bukankaan kámeelo káyinenak kooluul ceb, manteer koo kankaan malegen. Hani sáni, yakajeneimi émeeloimeelo di sambunas. Káyinenak kooluul kafaŋumi man kubaje fúkaw sáni, moo mákonam koo koote kámeeloi di kásuutukenak. Moo pambijiyab kasalak, di mawuŋam, di kálebienak di funak fan Yensa Apakenaau Áamakau aatumi érajuley. ⁸ Hani man jijukutooñaa jimaŋoomaŋ, hani man jijukutooñaa iñeme jíyinenyinen di oo, ban di jilako kamaayoor káamak kan kurimak kuŋoolenutumi kúyiisen tan kure’e, ⁹ mati jooju jayabe epakey yati suutas sooluul kápurumul di káyinenak kooluul. ¹⁰ Mati epakey uye, kuboña bukaaku kañesemi ban di kúmeelo máamak. Bukoo kúriiŋenriiŋen mati majakam mati epakey uye mábileuumi bee di muyuul. ¹¹ Búyegetab Bátienaab bati Apakenaau Áamakau bulakolako di bukoo ban di buregiimi buu Apakenaau Áamakau aatumi egaal di poop buu koote esenool kálebien káamak. Ñaa di kuliikumi eñes bee emanj ai aatumi ekaan akila di poop nanan nei eete kabajo. Riiboor di wan Búyegetab Bátienaab bati Apakenaau Áamakau bammi di bukoo baregiimi buu Apakenaau Áamakau aatumi egaal di poop buu koote esenool kálebien káamak. ¹² Atijamit náyiiseniiyiisen kurimak uke mati burokab booliil lee mati karamben kúkoiil, bare bee mati muyuul, nan man kusankenumi mati mo’omu man jijameñaa iñeme kápurumul di kuboñaak karegenumi furimaf fajakaaf ñátum di kánkumak kati Búyegetab Bátienaab bápurumulo di bukinab bajakaab. Hani simaleekaas simammaŋ man sílaul mati mo’omu. ¹³ Moo kaane úyegetuul ujonjoor, ganlouul, jijuumen kúgolumak kooluul di majakam maatumi ebiley bee di muyuul di élaañuley yati Yensa Apakenaau Áamakau. ¹⁴ Jikob Atijamit mati muyuul kuñoolool. Takum jitaalen bálamuk bee di eroŋey yooluul yati noo, yati ekaaney majakutam, mati noo jimanjut wajake. ¹⁵ Bare muyuul joote káliroor di wanoosani wan jikaanemi, nan man Atijamit, awonkuumi man jikaan kuñoolool, oo áliroorumi. ¹⁶ Mati ciikiciik, “Muyuul joote káliroor, mati ínje nílirooliroor.” ¹⁷ Jiwonkewonk Atijamit Ampauul nan jilakomi kúlawak, agamenemi wan anoosani akammi ban álaañeriit di an. Moo kaane joote kagoroor tíen ñátum di kákoli nan jilakomi di mofam múbutoam nan kujaaburuŋ. ¹⁸ Jimammanj mati Atijamit nacancaam mbi jipak di eroŋ yátiikaare yan jibajumi di kufannaaniŋuul. Wan acammi kaanut nan waaf waate kakaño nan sáni mba gódifori, ¹⁹ bare nacancaam ñátum di fúsimaf fabajumi fúkaw fati Apakenaau Áamakau, kankaan nan fati jisaha jabajutumi kabet mba kúyokum. ²⁰ Atijamit namukenoomuken mati mo’omu bala’a butuukab bati dúniyaay bubajo, bare mati muyuul, Atijamit narajenulorajen Apakenaau Áamakau iñeme kunakak kúlamukaak. ²¹ Kápurumul di Apakenaau Áamakau jibabaj fúgolum di Atijamit. Mati Atijamit áyitenulo’oomi di kacetumi ban nasenoomi mawuŋam máamakam. Moo kaane, káyinenak di fúgolumaf fooluul foo fulako di Atijamit. ²² Iñeme jítientien suutuul kápurumul di ekobey yati malegenam mambi jibaj kamaŋak káriiŋe bee mati kutiuul kuriiba, jimaŋoor máamak kápurumul di sísigiruul. ²³ Jiwoliwol inki kápurumul di furimaf fati Atijamit faroŋumi bee bándoorey, kaanut di ewoli di kuwolaak kaatumi ecet. ²⁴ mati “Bukanak búrom kukankaan nan mafos, ban mawuŋam mooliil mukankaan úrumpen wati mafos. Mafosam di muyoŋen ban úrumpenaw woolimo di ulo, ²⁵ bare furimaf fati Akiiyaau panfucin bee bándoorey.” Furimaf fukila foo eenomi furimaf fajakaaf fan kúriiŋenumi bee muyuul.

¹ Moo kaane, jikat kaleetoor, kabuntoor, kagaajoor, búlatoor, kasuulenoor búrom. ² Jimaŋ máamak miilam mápurumulomi di Búyegetab Bátienaab nan muñiil mayiinkun mamaŋumi karaafak máamak, man jiŋoolen jibaak biyok jíriiŋ di epakey yooluul. ³ Mati númeelomeelo majakam mati Akiiyaau. ⁴ Jibil bee di Apakenaau Áamakau, oo eenomi fukoobaaf faroŋaaf fan bukanak kulateenumi, bare Atijamit amukenufomi ban fubabaj fúkaw máamak bee di oo. ⁵ Muyuul kakammi kukooba karoŋe kaate eŋari bee eteep fukobaf fati Búyegetab Bátienaab bati Atijamit. Muyuul poop kayooŋ kati kúsimena káliroore, man jisen búsimen bápurumulomi di Búyegetab Bátienaab bati Atijamit ban Atijamit amaŋumi mati wan Yensa Apakenaau Áamakau akammi. ⁶ Mati furimaf fati Atijamit foone: “Jíyenten, ínje oomu di enen fukooba di Sion, famukenimi ban fubabaj fúkaw bee mati égooleney yasofumi líŋ kukukak kati eluupey, ban anoosani áyinenumi di oo letapuñeni.” ⁷ Moo kaan bee di muyuul káyinenumi, nababaj fúkaw. Bare mati káyinenutumi, “Fukoobaaf fo’ofu fan kuteepaak kulateenumi, foo fulaañumi fulako di égooleney yasofumi líŋ kukukak kati eluupey,” ⁸ ban “Ekooba yaatumi ekaaney man bukanak kutatagoor, fukooba faate ekaaney man kulo”, mati kutatagooretatagoor di kuñoosumi furimaf, nan man Atijamit amaŋumi eeno man kaan. ⁹ Bare muyuul eenomi fiil famukenimi. Muyuul kayooŋ kati kúsimena kati Áyi, kati mof máliroore. Muyuul bukanak kati Atijamit, kamukenimi mambi jíriiŋen tíen mukaanaam máriiŋumi síwoonoor mati Atijamit, áwonkuluumi di érimey bee di mawuŋam moola máriiŋumi síwoonoor. ¹⁰ No’ona jikaaneenut bukan, bare iñeme jikankaan bukanak kati Atijamit. No’ona jiyabeenut káboteniak kati Atijamit bare iñeme jiyayabuko. ¹¹ Kúpaalumom, nilawuulaw máamak nan muyuul kujaaburuŋ mba kúkolokotoaak di dúniyaay uye. Takum jikaan wati kamaŋak kooluul waatumi katiikenak suutas sooluul. ¹² Muyuul joote kákaanum di bagoroorerab booluul titoorey yati Kakaanutumi Kúyahuudak. Handeneen kutaakenuutaaken koone muyuul bukan kájakaatie, bukoo pankujuk bagoroorerab booluul bajakaab ban di kufiumuul, pankusal Atijamit di funakaf fati élaañuley yoola. ¹³ Mati Akiiyaau, jisen kúkouul bee di kati kujuumak kati dúniyaay búrom, bee di Áyiau Áamakau, an eenomi anifaanau ati mofam, ¹⁴ mba bee di kurunga, mati Áyiau Áamakau naseniisen man kúsuutuken kálaputumi ban di kusal kakaanemi wajake. ¹⁵ Mati Atijamit namammaŋ man jitonk sígotas di kamanjutumi waaf ñátum di ekaaney jak. ¹⁶ Muyuul lee kumiiceel, muyuul jifelofelo. Bare takum jiŋar kafeloak man jikaan múfimenuma majakutam, mbi jiroŋ man kumiiceel kati Atijamit. ¹⁷ Jílebien bukanak búrom. Jimaŋ batiaay. Jíkoli Atijamit. Jílebien Áyiau Áamakau. ¹⁸ Kumiiceel muyuul joote esen kúkouul bee di kurungauul di kálebieniil, lee bee di kakaanemi jak ban di kuwoolo, bare poop bee di kátaañimi. ¹⁹ Atijamit acaamuul mati mo’omu, jimuutenjaat jariey yakaanutumi yooluul di bugaalab mati muyuul jíkaanumookaanum. ²⁰ Kaanjaat nukankaan majakut pankutekuul ban numuuten di mo, letubajuro hani waaf. Bare kaanjaat nukankaan wajakaaw ban nubaj bugaal, ban numuuten di mo, Atijamit panacaamuul di mo. ²¹ Mati di mo’ome jíwonkulimi, mati Apakenaau Áamakau poop di mo’ome nagaalumi bee mati muyuul, nakatuukat káyiisen manteer muyuul poop mbi jiriiben kútaagulak koola. ²² Oo akaanderut majakut, ban furim fati kabunt fúpurerut di butumool. ²³ Nan kujeloomi alaañenutiil, nan kúsuutukenoomi akoolenutiil, bare nafiunfium di akila agamenumi joon. ²⁴ Oo di fúko’ool atebumi majakutolaal bee di ébaarey, mambi ucetaal bee di majakut ban nuroŋaal di majoonam. Kápurumul bábukoerab boola nubajaami ekoy. ²⁵ Mati muyuul joonojoono nan sisaha sayiisoore, bare jilaañulolaañ bee di Amataau di Apooyaau ati suutas sooluul.

¹ Moo mákonam muyuul kuseekak joote esen kúkouul bee di kutauul hani kufiumut di furimaf fati Atijamit. Bagoroorerab booluul búyiisen handeneen jiregut furim, panjiŋoolen jíjeetumuliil bee di kafiumak, ² mati pankukooñaamuul man kujuk bagoroorab booluul buu búlebienumi Atijamit bajut úyeget ugaba. ³ Takum jikaan kawoonoorak kooluul búrom di búkaroorab nan kubuŋ kati kakaren kuwuujuto, kakaanoak sáni banoobani, di poop wañaw wan butumab burimi. ⁴ Jijooŋoor di sísigiruul ñátum di kajinlen katunoore. Kajooŋoorak kaanomi mo’omu kootut ecet. Di kapanak kati Atijamit koo waaf wabaje fúkaw. ⁵ No’ona kuseekak kukobaak káamakak kágolumumi di Atijamit ninsi kukaanooro man kujooŋooro ñátum di eseney kúkoiil bee di kutaiil, ⁶ nan man Sirah akobumi Iburehima man awonkool akiiyaool. Muyuul iñeme kuñoolool jikaanjaat wajoone, moo lee jíkoli hani waaf. ⁷ Moo mákonam muyuul kúniinaak jibaj kalako kajake di kuseekuul. Jikaaniil jak di kálebieniil, mati kukila kúliŋut nan muyuul ban di jinaamoor kawulak kati Atijamit di eroŋey yunkuley. Jikaanutumojaat, waaf letukajen kúlawak kooluul. ⁸ Di múlamukaam, muyuul búrom jikaan úyegetuul tákon, di jibaj káboteni di kamaŋoor. Muyuul joote kabonketoor di kawalenoor. ⁹ Takum jilaañen majakut bee di majakut mba kajel bee di kajel, bare jilaañeniil wajake. Mati woo jíwonkumimi mambi Atijamit awuluul kásuumaayak koola. ¹⁰ Mati furimaf fati Atijamit foone, “Anoosani amaŋumi eroŋey ban najuk kunak kajake, mbi asof fúredimpool eregey wajakutaw ban nakat kasanken furim fati kabunt. ¹¹ Oo aate kátiiwoor akat majakut man akaan majake, ban naate eñes kásuumaay ban nariibenuko. ¹² Mati kúcilak kati Akiiyaau kooku di kajoonumi, ban uwosool úwambulowambulo bee di kúlawak kooliil. Bare nakatumi bálamuk kakammi majakut.” ¹³ Iñeme ai panaŋoolen agaalenuul kaanjaat jibabaj fuuñ fati emaŋ ekaan joon? ¹⁴ Bare handeneen panjilako di bugaalab mati ekaaney wajoonaaw, Atijamit panacaamuul mati mo’omu. Moo kaane takum jíkoli’iil ban takum gaalenuul. ¹⁵ Bare muyuul joote kálebien Apakenaau Áamakau nan Akiiyaau ati eroŋey yooluul. Jijonjoojonjoor nanoosani mbi jilaañen anoosani abajumi kúceeŋ kati fúgolumaf fan jibajumi, bare jikaan di majinlene di kálebien. ¹⁶ Bare muyuul joote ekaan síwoonooruul sítien, nampi kujeluumi ban di kusanken bagorooreruul bajakaab nan man jikammi kuriibaak kati Apakenaau Áamakau, pankubil kupuño wan kukammi jatemaj. ¹⁷ Kaanjaat kamaŋak kati Atijamit, jigaal man jikaan wajoonaaw kóyume ekaan wajoonutaw. ¹⁸ Apakenaau Áamakau poop nacecet mati makajutolaal ñákon ban kare, ajoonumi acetumi bee mati kajoonutumi, mambi ájeetumolaal bee di Atijamit. Nan bukanak kubujumi Apakenaau Áamakau, bare Búyegetab Bátienaab bati Atijamit di bukaanoomi man aroŋe inki. ¹⁹ Di bukila najawumi karegen poop bee di úyegetaw wakokenimi. ²⁰ Úyegetaw ukila wati kañoosemi no’ona, nan Atijamit aroŋumi di ekob di kamuuten di kunakak kati Nuha, di nanan nati kajoonenak kati busaanaab báamakab, ban umanje bukan kooni futok di kúfeegiir kúpakumumi di eyoomey kápurumul di mumelam máamakam. ²¹ Mumelam mukila múyiisenyiisen fujuumaf fati kátiigulenak, ñátum di ko jibilumi jibaje epakey. Kátiigulenak koo kaanut eposey yati eniiley yamokenumi, bare elawey ekaanimi bee di Atijamit kápurumul síwoonoor sajake. Kátiigulenak kújeetumeuumi epakey ñátum di káyitoulak di ecetey yati Yensa Apakenaau Áamakau. ²² Oo najajaw bee di bukinab bajakaab ban man alakoe báridab bati Atijamit. Nalakomi erung simaleekaas búrom, di kujuumak kammi di fatiya di wánkum.

¹ Moo kaane, mati Apakenaau Áamakau eniilool egagaal máamak, muyuul joote kakoonoor lit di síwoonooras sákonas, mbi jijonjoor bee mati bugaalab poop. Mati bugaalab búyiisenumi mati nukakat majakut. ² Muyuul eroŋey yooluul búrom leejikaanuyo kateyoorak kati emaŋey yajakutey, bare pánjikaanum ekaaney wan Atijamit amaŋumi. ³ Ban biñoo noo jilakoeenlako ekaaney wan kamanjutumi Atijamit kukaanemi. Jikaanekaan di eroŋey yooluul kayenet, emaŋey wawuujuto, kákali, káaning kati ekaaney wawuujutomi, baraan di kurigoor, kamiiceelaet sínaati, uru búrom reooreoor di muyuul. ⁴ Kupaaleenuul pánwaaloiil mati iñeme jilee di kanaamoor di bukoo ekaaney majamutam man kukaanemi, ban di ihi kujeluul. ⁵ Bare pankoote ereg tíen Atijamit aatumi kagamenak karoŋumi di kacetumi. ⁶ Moo kaane furimaf fajakaaf fúriiŋeniriiŋen hani bee mo kacetaak poop, handeneen siniiliil sigamenigamen sicet nan man anoosani agamenimi. Foo fúriiŋeniriiŋen bee di bukoo mambi kuŋoolen kuroŋ di úyegetaw nan man Atijamit aroŋumi eeno. ⁷ Fúbanumaf fati dúniyaay foofu di ériiŋul galab. Moo kaane jiwoonoor jak man ganlouul mambi jiŋoolen jilaw. ⁸ Wafaŋumi man ubaje fúkaw woo eenomi kamaŋoorak kábaneriitumi, mati kamaŋ kúfimenefimen majakut majuupoe. ⁹ Jiraagal man jiwalen kujaaburuŋ di sísindouul ban takum jíkuumoor mati mo. ¹⁰ Atijamit nasensen kawul kanaamutumi anoosani di muyuul. Muyuul joote karokenuko jak nan man jiyabukomi ñátum di karamben bukaaku. ¹¹ Ampi áriiŋenumi furimaf naate káriiŋ furimaf fákonaf fati Atijamit, ampi amiiceelaetumi bukanak naate kamiiceelaet ñátum di kánkumak kan Atijamit asenoomi, di wanoosani wan jikammi mbi tíenuul man jikaan bukanak kusal Atijamit kápurumul di Yensa Apakenaau Áamakau. Atijamit akilemi mawuŋam di kánkumak bee bándoorey. Amen ¹² Kúpaalumom, takum wáalouul bugaalab báamakab balomi di muyuul kámeelouul, kan nan waaf wan jitamburerut jijuk wan di ebajuul. ¹³ Bare jimaayoor mati man jommi di kanaamoor di bugaalab bati Apakenaau Áamakau mbi jimaayoor ban di súumuul nampi bukanak kujukumi mákalaam moola. ¹⁴ Jijelijaat mbi súumuul mati kareesak kati Apakenaau Áamakau, jakuujak, mati mákalaam mati Búyegetab Bátienaab bati Atijamit boobu títi muyuul. ¹⁵ Bare takum jigaal nan abuja, mba ákuu, mba álaputa, mba an asuulena bukan. ¹⁶ Ubajujaat kásuutuken man ukammi ariibaau ati Apakenaau Áamakau, takumbi kaani kapuñ mati mo’omu. Bare jisal Atijamit mati man bukanak kuwonkimi ariibaau ati Apakenaau Áamakau. ¹⁷ Mati nanan nati kagamenak nírindiiŋ nati etooŋ di fiilaf fati Atijamit, táatumulojaat di wulaal, waa woote bee ekaan bee di kañoosumi furimaf fajakaaf fati Atijamit? ¹⁸ Ban “Táañijaat man kajoonaak kupak, kama, waa woote kabajo bee di kamanjutumi Atijamit di kukaana majakut?” ¹⁹ Ñaa kama, kammi di bugaal riiboor di kamaŋak kati Atijamit, karulenak di ekaaney joon, ban koote kágolum di kúkoiil di Atuukaau ooliil afiumaay.

¹ Ínje di fúko’om eenomi anifaan ati fujojaf, oomu di elaw kupaalom kunifaanak kati fujojaf titooruul. Ínje nikankaan áyiisena mati bugaalab bati Apakenaau Áamakau. Ban paninaamoor di mákalaam maate karajeni. ² Jimat kamat kati Atijamit kan abilenuumi ñátum di emaŋey yooluul nan man Atijamit amaŋuumi eeno. Bare takumbi kaan nan numingenimingen. Jicookooruko kaanut mambi jibajuro waaf bare mbi jikaan bee mati Atijamit. ³ Takum jimingen bukanak kammi di kañenuul, mbi jikaan káyiisen kajake bee di bukoo. ⁴ Nampi Amataau Áamakau arajulomi, panjiyab bompoŋab bati áyi ban mawuŋam moolibo mootut kagumbulo. ⁵ Moo mákonam, muyuul kúpuraak kúniinaak, joote esen kúkouul bee di kunifaanuul. Muyuul búrom joote kawalenooro, mati “Atijamit nalalat katebenooromi, bare náyiisenyiisen majakam bee di kawalenooromi.” ⁶ Jiwalenooro di kañenak kati Atijamit kabajumi kánkum, manteer mbi atebenuul di nanan noola. ⁷ Jisen bugaalab booluul bee di oo, mati nacookooreuucookoor. ⁸ Ganlouul, jíkaanum! Seetaanaay yakammi alatooruul nan jimukoor yammi di káciiŋit, di eñes ampi emer búcol. ⁹ Bare joote elatuyo man jijuum líŋ di kafiumak kooluul. Jimammanj mati kutiuul kuriiba kammi banoosani di dúniyaay kooku di bugaalab bákonab. ¹⁰ Nampi jigaalumi jayiinkun, Atijamit ati majakam búrom, pánawonkuluul bee di mawuŋam moola mati bándoorey mammi di Apakenaau Áamakau. Panalaañenuul ban najuumenuul líŋ ban nasenuul kánkumak. ¹¹ Bee di oo akilumi kánkumak bee bándoorey. Amen. ¹² Ínje niciciik letara yátemie bee di muyuul ñátum di karambenak kati Sila, an isofumi nan atiom ariiba afiumaay. Mati ínje nimammaŋ kabuntooruul ban níyiisenuul buu Atijamit ajakumi eeno manteer mbi jirulen di kafiumoolak di ejuum líŋ. ¹³ Kuriibaak kammi di fujojaf fati Babilon kúsaafuluul, moo mákonam añoolom Maruk ásaafuluul. ¹⁴ Jisaafoor jak di kupaaluul di kamaŋak. Kásuumaay kóomi di muyuul búromuul kammi di Apakenaau Áamakau.