1 YOHAN

¹ Wúli núciikuluuciik mati furimaf fati Atijamit fabajoeenumi biñoo di fúcitumaf. Nujanjam fo ban nujujuk tá ñátum di kúciloli. Nujikerufomi ban nugorufomi ñátum di úñenoli mati Furimaf fati Eroŋey. ² Eroŋey uye érajuloliraj, nujujuk yo ban núyiisenuyo, nuregenuul mati eroŋey yati bándoorey, yalakoeenumi di Ampaau ban érajuloliraj. ³ Wúli nuregenuuregen mati wan ujukumi di wan ujammi, mambi poop jibaj bapaalaay di wúli nan man wúli ubajumi bapaalaay di Ampaau di Añoolool Yensa Apakenaau Áamakau. ⁴ Wúli nuciciik mo’ome mambi kásuumaayak koololaal kúliroor. ⁵ Kurimak uke kan ujammi kápurumul di oo ban nuregenuufo, mati Atijamit mawuŋe ban di oo érim elee dó jáng. ⁶ Uregaajaat mati wulaal nubajaabaj bapaalaay di oo ban ninsi nuja’aal di érimey, moo kagaajoor ban uletaal di malegenam. ⁷ Bare ujawaajaat di mawuŋam, nan man akila ammi di mawuŋam, panubajooraal bapaalaay, ban fúsimaf fati Yensa Apakenaau Áamakau an emmi Añoolool fukaanolaakaan útienaal di majakutam búrom. ⁸ Oonaajaat majakut mulet di wulaal, nubuntooroaabuntooro, ban malegenam mulet di wulaal. ⁹ Ufelaajaat úyegetolaal man uregaal wan ukaanaami majakut, Atijamit oo afiumaay ban najoon, panabonket majakutolaal ban nakaanolaal útienaal di májoonaataam búrom. ¹⁰ Uregaajaat mati ukaanutaal majakut, nukaanaalookaan alepoora, ban furimaf foola fulet di wulaal.

¹ Kuñoolom, ínje oome di éciikuluul ure takumbi jikaan majakut. Bare kaanjaat ampi akammomi, nubabaj atitoora di Ampaau, an eenomi Yensa Apakenaau Áamakau, Ajoonaau. ² Oo di fúko’ool eenomi búsimenab boololaal mambi majakutolaal mubonketi, ban reut di moololaal cebumo, bare bee mati dúniyaay búrom. ³ Mo’ome mbi tíenolaal mati numanjaaloomanj, kaanjaat panusofaal kájaatikenak koola. ⁴ Ampi aregumi, “Ínje nimanjoomanj” bare nañoos kájaatikenak koola oo alepoora, ban malegenam mulet di oo, ⁵ bare ampi asofumi furimaf foola, di oo kamaŋak kati Atijamit kúlirooliroor di akila máamak. Mo’ome mbi tíenolaal mati wulaal bukooku di oo. ⁶ Anoosani ammi oomu di oo naate ejaw di buruŋab bákonab ban akila ajawumi. ⁷ Kúpaalumom, ilet di éciikuluul kájaatiken kunkul, bare kájaatiken kéele kan jipiimi di jijam kabiñoo di fúcitumaf, kájaatikenak kéelaak kukila koo eenomi furimaf fan jipiimi di jijam. ⁸ Bare ínje oomu di éciikuluul kájaatikenak kunkul inki kan eenomi malegen di oo di muyuul, mati érimey yooyu bo ewuuj nep man mawuŋam mati malegenam moomu di eŋar fulakoyo. ⁹ Ampi ammi akila di mawuŋam naam, ban nalat atiool ariiba, oo ápuroorut di érimey. ¹⁰ Ampi amaŋumi atiool ariiba oo di mawuŋam naam, ban katatagoor kulet di oo. ¹¹ Bare ampi alatumi atiool ariiba oo di érimey naam, ban najawumi di érimey, ámanjeriit ban aje’emi beet mati érimey émimiip kúcilool. ¹² Kuñiilak, ínje eem di éciikuluul, mati majakutuul mubonketibonket ñátum bálamukab boola. ¹³ Kumpaak, ínje eem di éciikuluul mati muyuul jimanjoomanj oo ati kabiñoo di butuukab. Kúpuraak kúniinaak, ínje eem di éciikuluul mati muyuul jiŋoolene Seetaanaay. Kuñiilak, ínje eem di éciikuluul mati muyuul jimammanj Ampaau. ¹⁴ Kumpaak, ínje eem di éciikuul, mati muyuul jimammanj oo ati kabiñoo noo di fúcitumaf. Kúpuraom kúniinaak, ínje eem di éciikuluul mati muyuul jílinliŋ, ban furimaf fati Atijamit foofu di muyuul, ban muyuul jiŋoolene Seetaanaay. ¹⁵ Takumbi jimaŋ dúniyaay mba waafaw wooliyo. Anoosani amaŋumi dúniyaay, oo an akila kamaŋool kulet di Ampaau. ¹⁶ Mati waafaw búrom wati dúniyaay, wan anau amaŋumi, di wan kúcilak kumaŋumi, di bukan ká’aamakalenoor di wan abajumi di wan akaanumi, dooru búrom lee dati Ampaau, bare dati dúniyaay. ¹⁷ Ban dúniyaay di kamaŋak kooliyo kooku di ewuuj, bare anau akaanemi wan Atijamit amaŋumi, panacin bee bándoorey. ¹⁸ Kuñoolom, wulaal bukooku di nanan nílamukaan. Nan man jijammi mati alatooraau ati Apakenaau Áamakau oomu nábileul. Iñeme kulatoora kajuupoe kati Apakenaau Áamakau kúriiŋuloriiŋ. Moo kaane, numanjaamanj mati nanan nílamukaan níriiŋuloriiŋ. ¹⁹ Bukanak buke kúpupur di wulaal, bare koo kulet di wulaal. Kaaneenjaat di wulaal koomeen, pankulakoeen di wulaal. Bare épurey yooliil di wulaal, yoo éyiisenyiisen mati hani ákon di bukoo alee di wulaal jáng. ²⁰ Bare muyuul Álirooraau Ákonau anaanenuumi ñátum di Búyegetab Bátienaab, ban muyuul búrom jílaulaul malegenam. ²¹ Ínje eem di éciikuluul, let mati muyuul jimanjut malegen, bare mati jimammanj mati kagaajoor léekupurumul di malegenam. ²² Ai eenomi agaajooraau áamakau? Oo eenomi añoosumi mati Yensa eenomi Apakenaau Áamakau. Ume eenomi alatooraau ati Apakenaau Áamakau, añoosumi Ampaau di Añoolool. ²³ Anoosani añoosumi Añiilau oo Ampaau nañoose. Anoosani ampi amaŋumi Añiilau oo Ampaau namaŋe. ²⁴ Moo kaane jíkaanum di wan jijammi kabiñoo di fúcitumaf mbi ucin di muyuul. Kammojaat muyuul joote ecin di Añiilau di Ampaau. ²⁵ Ban wan oo di fúko’ool áligolaami woo eenomi eroŋey yati bándoorey. ²⁶ Ínje eem di éciikuluul uru bee di muyuul mati kampi kamaŋumi bee ebuntuul. ²⁷ Bare muyuul Apakenaau Áamakau anaanenumi ñátum di Búyegetab Bátienaab, ban jiyabumi boobu di muyuul, man kaan muyuul ceeŋut eñes aceen man aliikitenuul. Mati Búyegetab Bátienaab boola buliikitenuuliikiten wanoosani, ban wan buliikitenumi malegen, kulee fugaajoor. Jimaŋ kaliikitenak kati Búyegetab Bátienaab, jirulen eciney di Apakenaau Áamakau. ²⁸ Kuñoolom, iñeme jirulen di ecin di Apakenaau Áamakau timaa arajulojaat, nubajaal éliŋ di fáculool ban letubajaal kapuñ di funakaf fati élaañuley yoola. ²⁹ Mati numanjaamanj mati Atijamit najonjoon nanoosani, di poop tíenolaatien mati anoosani akammi wajoonaaw nawoliwol di Atijamit.

¹ Jijikeruma kamaŋak kan Ampaolaal asenolaami, kan ootaami ewonki kuñiilak kati Atijamit, ban moo noonoaami eeno. Wakammi dúniyaay emanjutolaal woo emmi yoo emanjut Atijamit. ² Jimaŋoor, wulaal iñeme kuñiil kati Atijamit, tíenoorut buu nootaale kaano. Bare numanjaamanj mati nampi arajulomi panoonoaal nan akila, ban poop panujukaalool nan man aanomi eeno. ³ Anoosani abajumi kágolumak di Apakenaau Áamakau, oo an akila pánatien nan man Apakenaau Áamakau átienumi eeno. ⁴ Anoosani akammi majakut oo nakajenkajen sílingaas sati Atijamit, mati majakut manoosani mukajenkajen sílingaas sati Atijamit. ⁵ Jimammanj mati Apakenaau Áamakau narajuloraj bee kápuren majakut di wulaal, ban majakut mulet di oo jáng. ⁶ Anoosani ammi di oo letarulen ekaan majakut. Arulenumi di ekaaney majakutam, oo ajukurerutool mba amanjutool. ⁷ Kuñiilak, takumbi jimaŋ man an abuntuul. Anoosani akaanemi majoone, oo an ajoone, nan Apakenaau Áamakau. ⁸ Oo arulenumi akaan majakut oo ati Seetaanaay, mati ekankaan majakut kabiñoo di fúcitumaf. Wakilumi man Añiilau ati Atijamit abil, woo eenomi man akajen burokab ube bati Seetaanaay. ⁹ An áwoleriiti ati Atijamit mbi ihi akaan majakut, mati búyesoorab bati Atijamit boobu di oo letaŋoolen akaan majakut mati oo Atijamit awolool. ¹⁰ Mo’ome pántienolaal bukei emmi kuñiilak kati Atijamit di bukei emmi kuñiilak kati Seetaanaay. Ampi akaanutumi joon mba amaŋutumi atiool ariiba oo let ati Atijamit. ¹¹ Kurimak uke koo jijammi kabiñoo di fúcitumaf koo eenomi nootaale kamaŋoor. ¹² Wulaal takumbi unokooraal nan Kain, oo ati Seetaanaay abujumi atiool. Ban pipi wau kaane man abujool? Mati Kain mukaanaam moola man akammi mujakut, bare mukaanaam man atiool akaanumi mujonjoon. ¹³ Kutiom, takumbi kaanuul síwoonoor mati man dúniyaay elatuumi. ¹⁴ Wulaal numanjaamanj mati nútipaatip ecetey bee di eroŋey, mati wulaal numaŋaamaŋ kutiolaal kuriiba. Abajutumi kamaŋ oo di ecetey naam. ¹⁵ Anoosani alatumi atiool ariiba oo abuja, ban muyuul jimammanj fiit mati abuja letabaj eroŋey yati bándoorey. ¹⁶ Wulaal numanjaamanj waa eenomi kamaŋ kalegenoe mati Apakenaau Áamakau nacecet bee mati wulaal. Wulaal poop nootaale ecet bee mati kutiolaal kuriibaak. ¹⁷ Bare kaanjaat anoosani abaje fubaj fati baabe di dúniyaay, ban najuk mati atiool nacenceeŋ karamben ban nalat karamben. Buu pan kamaŋak kati Atijamit kulako di oo? ¹⁸ Kuñiilak, takumbi joonaal emaŋ ñátum butumab cebubo, bare ñátum di mukaanaam malegenam. ¹⁹ Mo’ome moo nuja’aalemi bee emanjey mati wulaal bukan kati malegenam, ban nubebenaal úyegetolaal di bújonlenool, ²⁰ nampi úyegetolaal úfirenolaami. Mati Atijamit afaŋe kánkum úyegetolaal, ban namammanj wanoosani búrom. ²¹ Kúpaalumom, kaanjaat úyegetolaal létufirenolaal, nubajaabaj fúgolum di Atijamit, ²² ban panuyabaal wanoosani wan ulawaaloomi, mati nusofaasof kájaatikenak koola ban nukaanaal wásuumoomi. ²³ Mo’ome moo eenomi kájaatikenak koola, mati nootaale kafium di kareesak kati Añoolool Yensa Apakenaau Áamakau ban numaŋooraal, nan man ájaatikenolaami eeno. ²⁴ Kasofumi kájaatikenak koola kooku di oo, ban oo poop oomu di bukoo. Numanjaamanj mati Atijamit oomu di wulaal mati Búyegetab Bátienaab ban asenolaami boobu di wulaal.

¹ Kúpaalumom, takum insi jifium búyeget banoosani, bare mbi jímeelo man jimanj manteer úyeget ukila wati Atijamit. Mati kuboña kubunta kajuupoe kooku bo di dúniyaay. ² Mo’ome moo jootumi émanjumey kaanjaat kubabaj Búyegetab Bátienaab bati Atijamit. Kaanjaat aboña afelumi búyegetool man areg mati Yensa Apakenaau Áamakau abilumi nan an, an akila nababaj Búyegetab Bátienaab bati Atijamit. ³ Bare aboña alatumi man aregumo mati Yensa, oo ápurumulout di Atijamit. An akila nababaj búyeget bati Alatooraau ati Apakenaau Áamakau. Muyuul jijanjam mati alatooraau akila panabil bee di dúniyaay, ban súm náriiŋuloriiŋ. ⁴ Kuñoolom, muyuul kati fiilaf fati Atijamit, ban muyuul jiŋooleŋŋoolen kuboña kubunta, mati an ammi di muyuul afaŋe kákalaa an ammi di bukanak kati dúniyaay. ⁵ Bukanak buke kati dúniyaay ekila, moo kaane wan kuliikitenemi wati dúniyaay, moo kaane dúniyaay ihi ejanteniil. ⁶ Bare wulaal bukan kati Atijamit. Ampi amanjumi Atijamit oo pánayentenolaal, ban ampi aleemi di Atijamit oo létayentenolaal. Mo’ome moo nootaami émanjumey kaanjaat nababaj Búyegetab Bátienaab bati malegenam mba búyegetab bati kagaajoorak. ⁷ Kúpaalumom, mbi umaŋooraal, mati kamaŋak kápurumul di Atijamit. Ampi áyiisenumi kamaŋ, oo nawoliwol di Atijamit ban namanjoomanj. ⁸ Ampi áyiisenutumi kamaŋ oo amanjut Atijamit, mati Atijamit oo kamaŋ. ⁹ Mo’ome moo númanjumaalemi kamaŋak kati Atijamit titoorolaal. Atijamit naboñuloboñ Añoolool Ákonau pat bee di dúniyaay mambi wulaal nubajaal eroŋ ñátum bálamukab boola. ¹⁰ Mo’ome moo eenomi kamaŋak kulegenak. Lee wulaal umaŋaami Atijamit bare Atijamit amaŋumi wulaal biyok áboñulolaal Añoolool nan búsimen mambi majakutolaal mubonketi. ¹¹ Kúpaalumom, kaanjaat Atijamit namaŋolaamaŋ, wulaal poop cenceeŋ man umaŋooraal. ¹² Hani an ajukurerut Atijamit, umaŋooraajaat Atijamit oomu di wulaal ban kamaŋak koola pánkuliroor di wulaal. ¹³ Mo’ome moo nootaami émanjumey mati wulaal oomaami di Atijamit ban oo di wulaal, mati nasenolaasen Búyegetab Bátienaab boola di fúko’ool. ¹⁴ Ban wulaal di kúko’olaal nujukaajuk man uregaal bukaaku mati Ampaau naboñuloboñ Añoolool man akaan Apakenaau Áamakau ati dúniyaay. ¹⁵ Ampi afelumi búyegetool man areg mati Yensa oo Añiilau ati Atijamit, Atijamit oomu di oo, ban oo poop oomu di Atijamit. ¹⁶ Ñaa wulaal numanjaamanj ban nubajaabaj kafium di kamaŋak kati Atijamit bee mati wulaal. Atijamit kamaŋ, ñaa oo ammi di kamaŋ oomu di Atijamit, ban Atijamit oomu di oo. ¹⁷ Mo’ome moo kamaŋ kúliroorumi eeno di wulaal, mbi ubajaal kágolum di funakaf fati bagamab, mati wulaal nunokooraami nan Apakenaau Áamakau. ¹⁸ Di kamaŋak kákoli kulee bo, man pipi kamaŋ káliroore kucesoorecesoor kákoli búrom. Mati kákoli di kútekak sijawooremi, ban anoosani ákolimi oo abajut kamaŋ káliroore. ¹⁹ Wulaal numaŋaaloomaŋ, mati oo amonde amaŋolaal. ²⁰ Bare kaanjaat anoosani ammi, “Nimammaŋ Atijamit,” ban nalat atiool ariiba, oo agaajoora. Mati amaŋut atiool ariiba an ajukumi letaŋoolen amaŋ Atijamit an ajukutumi. ²¹ Ban kájaatikenak uke kan Apakenaau Áamakau asenolaami mati ampi amaŋumi Atijamit naate emaŋ atiool ariiba poop. tiool ariiba poop.

¹ Anoosani áyinenumi mati Yensa eenomi Apakenaau Áamakau, oo añiil ati Atijamit. Anoosani amaŋumi kuwolaak oo añiilau namaŋe. ² Di mo’omu nootaami émanjumey mati wulaal numaŋaamaŋ kuñiilak kati Atijamit, nampi umaŋaami Atijamit ban nusofaal kájaatikenak koola. ³ Mo’ome eenomi kamaŋak kati Atijamit, mati nusofaasof kájaatikenak koola. Ban kájaatikenak koola kugaalenutolaal. ⁴ Mati anoosani awolimi kápurumul di Atijamit oo naŋooleŋŋoolen dúniyaay. Ban káŋoolenumak uke kan ubajaami kati dúniyaay ñátum di kafiumak koololaal. ⁵ Ai panaŋoolenumi dúniyaay? Anau áyinenumi mati Yensa eenomi Añiilau ati Atijamit. ⁶ Yensa Apakenaau Áamakau najawulojaw ñátum di mumelam di fúsimaf. Najawulojaw let di mumelam ceb, bare mumelam di fúsimaf. Búyegetab Bátienaab di fúkoubo búyiisenumi mo’ome mulegenolegeno, mati Búyegetab Bátienaab boo eenomi malegen. ⁷ Di bajumi waaf úfeegiir wáyiisenumi mati ⁸ Búyegetab Bátienaab, di mumelam, di fúsimaf. Doo búrom di jamoojamoor bee esen káyiisenak kákonak. ⁹ Mati nufiumaafium káyiisenak kati bukanak, bare káyiisenak kati Atijamit koo kufaŋe kákalaa, mati Atijamit di fuko’ool áyiisene. Ban nasensen káyiisenak uke mati Añoolool. ¹⁰ Ampi áyinenumi di Añiilau di Atijamit oo nababaj káyiisenak di fuko’ool di búyegetool. Ampi áyinenutumi di Atijamit, Atijamit nakaanookaan agaajoora, mati áyinenut káyiisenak wan Atijamit aregumi mati Añoolool. ¹¹ Mo’ome moo eenomi káyiisenak kan Atijamit asenolaami. Nasenolaasen eroŋey yati bándoorey, ban eroŋey ekila yooyu di Añoolool. ¹² Ampi abajumi Añiilau oo nababaj eroŋey, ampi abajutumi Añiilau ati Atijamit abajut eroŋey. ¹³ Ínje eem di éciikuluul uru káyinenumi di kareesak kati Añiilau ati Atijamit, mbi jiŋoolen jimanj mati jibabaj eroŋey yati bándoorey. ¹⁴ Ban súm fúgolumaf ufe foo nubajaami di oo, mati wanoosani nuceeŋaalool kápurumul di kamaŋak koola, panajamolaal. ¹⁵ Umanjaajaat mati wanoosani nuceeŋaaloomi najameolaajam, moo ñaa numanjaal nayayab kúlawak koololaal. ¹⁶ Ampi ajukumi atiool ariiba di ekaan majakut máriiŋut man acet, oo naate elaw Atijamit, asenemi eroŋey. Ínje oomu di ereg buku kan umanje majakutiil múriiŋut man kucet. Bare babaj majakut máriiŋumi man anau acet. Iregut mo’omu mati muyuul joote elaw bee di kakammi majakut mukila. ¹⁷ Búlaput banoosani bukankaan majakut, bare lee majakut manoosani múŋareuumi ecetey. ¹⁸ Numanjaamanj mati anoosani awolimi di Atijamit áruleneriit di ekaaney majakutam, bare oo awolimi di Atijamit, oo aguubeneoomi takum Seetaanaay egorool. ¹⁹ Numanjaamanj mati wulaal bukan kati Atijamit, ban dúniyaay búrom yooyu di kánkumak kati Seetaanaay. ²⁰ Numanjaamanj mati Añiilau ati Atijamit nabibil ban nakaanolaakaan man úlaulaal, ban numanjaal an eenomi malegenam. Ban wulaal bukooku di akila ati malegenam di Añoolool Yensa Apakenaau Áamakau. Oo eenomi Atijamit Alegenau di eroŋey yati bándoorey. ²¹ Kuñiilak, muyuul di kúkouul jikat sínaati.