1 KORINT

¹ Ínje Paul, an Atijamit amukenumi di kamaŋak koola man ikaan áriiŋena ati Apakenaau Áamakau, eem di eciik letaraay uye di atiolaal ariiba Sosuten. ² Eciikiciik bee di kati fujojaf fati Atijamit di ésukey yati Korint. Muyuul kan Atijamit amukenumi jikaani bukanool kálirooraak, ban di jimiiceelaetool di kareesak koola, nan man wúli di bukaaku búrom kawonkeoomi Akiiyaau. ³ Emitey ekaan Atijamit Ampaolaal di Akiiyaau Yensa Apakenaau Áamakau kuwuluul majakam di kásuumaay. ⁴ Ínje oomu di esal Atijamit nanoosani bee mati muyuul, mati majakam man asenuumi kápurumul di Apakenaau Áamakau Yensa. ⁵ Atijamit nakaanuumi man jibaj waaf wajake juup di Apakenaau Áamakau ñátum di kawulak kati kasanken kanoosani di fumanj fanoosani. ⁶ Mati wan úyiisenuumi mati Apakenaau Áamakau ubibil ukaan malegen di titooruul. ⁷ Bajut kawulak kápurumul di Búyegetab Bátienaab bati Atijamit hani kákon kan jiyabut, man jommi ñaa di ekobey élaañuley yati Akiiyaolaal Yensa Apakenaau Áamakau. ⁸ Pánaliŋenuul bee di fúbanumaf, ban leejibaj kabet di funakaf fati Akiiyaolaal Yensa Apakenaau Áamakau. ⁹ Atijamit afiumaay, áwonkuluumi man jibaj bapaalaayab di Añoolool Yensa Apakenaau Áamakau, Akiiyaolaal. ¹⁰ Kutiom, nilawuulaw máamak di kareesak kati Akiiyaolaal Yensa Apakenaau Áamakau, man jikaan dákon di wan jisankenoorumi, manteer takumbi kápajuloor kulako titooruul. Jikaan túu man jikaan tákon síwoonooras sooluul sákonas di wákonaw. ¹¹ Mati kuceen kápurumul di fiilaf fati Kuloe kureganreg mati babaj mulobaam muyitoyito di titooruul, muyuul kúpaalumom kuriibaak. ¹² Wan ínje emmi di eregey woo eenomi mo’omu, anoosani di muyuul aan, “Ínje Paul neem di eriib,” aceen poop naan, “Ínje Apolo neem di eriib,” mba “Ínje Kefa neem di eriib,” mba “Ínje Apakenaau Áamakau neem di eriib.” ¹³ Mante kama Apakenaau Áamakau kugaba room? Mante ínje Paul, ifaaŋeenimi bee mati muyuul? Mba mante ai di myuul átiigulenimi di kareesak kati Paul? ¹⁴ Ínje nisasal Atijamit mati bajut an ítiigulene di muyuul leejaat Kirisipo di Gayos. ¹⁵ Moo takum an areg mati muyuul di kareesak kúmboom jibaje kátiigulak. ¹⁶ (Nítiigulentiigulen poop kati bajamab bati Sitefan. Leejaat buko’oku iwoolout aceen an ítiigulene ínki.) ¹⁷ Mati Apakenaau Áamakau aboñutom bee kátiigulen bukan bare man íriiŋen furimaf fajakaaf, báyiisenut malinlo múmboom, mati takumbi ecetey yati Yensa di ébaarey yati búpinab ekaan ñaañaaña. ¹⁸ Ínje nimammanj tíen mati káriiŋenak kurimak mati ébaarey yati búpinab koo kukankaan kayesasoor bee di bukanak kájimmi, bare wulaal kapakumi kankaan kánkumak kati Atijamit. ¹⁹ Mati ciikiciik, “Panikajen fumanjaf fati kalinlomi, ban panikajen malinlaam mati kalinloaak, ²⁰ Alinlaau oomei? Amanjaau oomei? Añoosaau ati jaat oomei? Mante lee Atijamit alaañenumi malinlaam mooluul mati dúniyaay mukaan mafuuri? ²¹ Mati Atijamit di malinlaam moola, nakammi bukanak takumbi kuŋoolen kumanjool ñátum di malinlaam mooliil. Bare Atijamit nasofumi bee kapaken kafiummi ñátum di káriiŋenak kóololi kan bukanak koonemi kayesasoor. ²² Mati Kúyahuud koone bee ejuk wajamurerutimi man tíen, ban di Kúgirik koone man kuñes malinlaam. ²³ Bare mati wúli, núriiŋenriiŋen mati Apakenaau Áamakau an kufaaŋenumi di ébaarey yati búpinab. Kúyahuudak kajuupoe kumaŋut rebo bee ejam mati káriiŋenak, Kakaanutumi Kúyahuudak kajuupoe kusosof káriiŋenak kukila kukankaan kayesasoor. ²⁴ Bare kan Atijamit awonkulomi bee mati epakey, Kúyahuudak di Kakaanutumi Kúyahuudak, Apakenaau Áamakau oo eenomi kánkumak kati Atijamit di poop malinlaam mati Atijamit. ²⁵ Mati waaf wakammi nan mafuuri mati Atijamit múkoyume malinlaam mati anau, ban kálaamoak kati Atijamit koo kufaŋe éliŋey yati anau. ²⁶ Kutiom, jiwoolo man joonoeenumi noo eeno nan Atijamit amukeneenumi. Bukanak kati dúniyaay kusofeenumi kupinaay di muyuul ceb kulinloe, mba kubabaj kánkum, mba kati fiil fajamoe. ²⁷ Bare Atijamit namukenumi wan bukanak kati dúniyaay kusofumi ubajut fúkaw man apuñen kalinlomi. Atijamit namukenumi kálaamomi di dúniyaay man apuñen káliŋumi. ²⁸ Atijamit namukenumi wan bukanak kati dúniyaay kujikeremi tentaam ban di kuheelen, bare namukenumi man akajen wan bukanak kati dúniyaay kusofumi wabaje fúkaw. ²⁹ Atijamit nakammomi mati an letaŋoolen á’aamakalenoor di bújonlenab boola. ³⁰ Bare Atijamit eenomi kátukak kati eroŋey yooluul di Apakenaau Áamakau Yensa. Kápurumul di akila Atijamit nasenolaami malinlaam moola fúkoumo, nasofolaami bukan kajoone, nakaanolaami nan bukanool, ban napakenolaal. ³¹ Moo kaane, nan man ciikimi, “Ampi amaŋumi bee ká’aamakalenoor, mbi á’aamakalenoor wan Akiiyaau akaanumi.”

¹ Kutiom, nan ijaweenulomi mútiyaaram bee di muyuul bee káriiŋen malegenam mayofoaam mati Atijamit, íjawumulout di magonlo mba di malinlo. ² Mati nan ilakomi di muyuul, niwoonoorumi man ikanto búyegetom man íriiŋenuul mati Yensa Apakenaau Áamakau di ecetey yoola di ébaarey yati búpinab. ³ Nan ijawulomi bee di muyuul, eniiley yúmboom man elaaboe tololol di kaleleben di kákoli. ⁴ Ban nan ilakomi káriiŋenak furimaf fajakaaf yíisenut waaf ñátum di kurim kati malinlo mati an, bare di kúmanjum koo kúliŋenumi mati Búyegetab Bátienaab bammi di burokab di kánkum káamak. ⁵ Nikankaan mo’omu manteer mbi jifium di kánkumak kati Atijamit lee di malinlo mati anau. ⁶ Bare nan ilakoemi titoorey yati kuriiba káliŋe, nisankenesanken kurim kati malinlo, bare kaanut malinlaam maanoe nan mati dúniyaay uye mba kaanut kánkum kaanoe nan karungumi dúniyaay uye, kan mooliil moote eban. ⁷ Bare malinlaam man usankenumi moo malinlaam mayofoaam mati Atijamit, man asofeenumomi bee mati mawuŋam moololaal bala’a butuukab bati dúniyaay. ⁸ Bajut an ákon di kurungaak kati iñeme álaulemo, mati kaaneenjaat kúlauleenlaul leekufaaŋeneen Akiiyaau ati mawuŋam. ⁹ Bare ciikiciik, “Wan jícil jijukurerutumi mba wan kawos kujamurerutumi, wan búyeget bati an buŋoolenutumi buwoonooruwo, wo’owu woo Atijamit ajonjoorumi bee ewun bukanak kamaŋoomi,” ¹⁰ Atijamit náyiisolaayiis wanoosani ñátum di Búyegetab Bátienaab boola. Boo búningulooninguloor wanoosani, ban di búyiisenolaami wayofomi wásankimi di ésigirey yati Atijamit. ¹¹ Ai aŋoolene amanj síwoonoor sati an rino búyegetab ceb bammi di oo? Moo mákonam, bajut hani an amanje síwoonooras sati Atijamit rino Búyegetab Bátienaab bati Atijamit. ¹² Bare Atijamit nasenolaasen Búyegetab Bátienaab boola lee bati dúniyaay mambi úlaulaal kawulak kan Atijamit asenolaami. ¹³ Kama ñaa nan ulakomi kasankenak mati mo’omu, úsankenumut kurim kaliikitenolaami kápurumul di malinlo mati an, bare kurim kaliikitenolaami kápurumul di Búyegetab Bátienaab bati Atijamit, nan man oomaami kábatulak malegenam mápurulomi di Búyeget Bátienaab bati Atijamit bee di kabajumi Búyegetab Bátienaab bati Atijamit. ¹⁴ Moo kaane anau an Búyegetab Bátienaab bati Atijamit buleemi di oo, áŋooleneriit ayab kawulak kápurumulomi di Búyegetab Bátienaab bati Atijamit. Anau aanomi mo’omu áŋooleneriit álaul ko. Asofut kawul karoŋe bee di akila mati abajumi Búyegetab Bátienaab bati Atijamit ceb aŋoolenumi álaul waa eenomi Búyegetab Bátienaab bati Atijamit. ¹⁵ Ampi abajumi Búyegetab Bátienaab naŋooleŋŋoolen akaan kagamen kanoosani, bare hani an ákon aŋoolenut agamenool. ¹⁶ Furimaf fati Atijamit fuceeŋumi, “Ai amanje búyegetab bati Akiiyaau? Ai aŋoolene ájaatikenool?” Bare wulaal bukan kabaje búyegetab bati Apakenaau Áamakau.

¹ Kutiom, nan ilakoeenumi di muyuul, ínje iŋooleneenut isankenuul nan man ceeŋeenumi man isankenuul nan kuriibaak káliŋe. Ínje eeteene kasankenuul nan bukanak kati dúniyaay mba nan muñiil mammi di karaaf di Apakenaau Áamakau. ² Ínje eeteene karaanenuul miil, lee sinaaŋ, mati muyuul jíriiŋoorut mati so, ³ mati muyuul bee mo iñeme jikatenoorut síwoonooras sati bukanak kati dúniyaay. Wau kaane kalatoorak di kóomi titooruul ban ninsi jilob. Mante lee mo’omu múyiisenumi mati muyuul kagorooro nan bukanak kati dúniyaay. ⁴ Mati ákon di muyuul aane, “Ínje oo Paul neem di eriib” aamu naane, “Ínje Apolo neem di eriib,” mante mo’omu kaanut siwoonoor sati bukanak kati dúniyaay? ⁵ Kama Apolo oo eenomi ai? Paul oo eenomi ai? Wulaal kuroka kati Atijamit ceb. Kápurumul di wulaal Atijamit akaanuumi man jifium. ⁶ Ínje ilukumi, ban Apolo náyuenumi, bare Atijamit aliilene. ⁷ Ñaa alukumi mba áyuenumi koo lee waaf, bare Atijamit ceb akammi man liil. ⁸ Alukumi di áyuenumi koo kurere cererer, anoosani aate eyab bacaamool nan man arokumi eeno. ⁹ Mati wulaal nukaanaakaan kurokoor bee mati burokab bati Atijamit, ban muyuul jikankaan kalaakak kati Atijamit di poop nan kalimbisak kati Atijamit. ¹⁰ Ínje ninennen fúlakenumaaf ñátum di majakam mati Atijamit, nan ateepa akooñe áamak. Iñeme ñaa di fúlakenumaaf fukila fan bukaaku kommi di kateep. Bare anoosani ammi di kateep di fo mbi ákaanum buu naatumi eteepey eeno. ¹¹ Mati bajut fúlakenuma fuceen fuje’e bee kajooneni inki kaanutujaat fúlakenumaaf ufe fan wúli ujoonenumi, foo eenomi Yensa Apakenaau Áamakau. ¹² Iñeme anoosani ateepumi di fúlakenumaaf fukila ñátum di sáni mba gódifori mba bamaal buceen bajooŋoore, mba ubabar mba kugol kasaye, mba di ejalaboora. ¹³ Bare anoosani burokab boola leebuyofo, mati funakaf fáje’euumi bee káyiisen burokab baanoe buu nakaane. Mati funak fukila sambun pánsiyiisen anoosani burokab boola, sambunas sije’emi bee kámeeloak anoosani burokab boola man boonomi eeno. ¹⁴ Burokooburok ban sambunas sikajenutumi, an akila panayab búgalenab boola. ¹⁵ Bare burokooburok ban sambunas sireemenumi, an akila burokab boola bukañokaño máamak. Bare oo di fúko’ool panapak, handeneen kankaan nan ápurenulo di bújeek bati sambun. ¹⁶ Mante jimanjut muyuul eenomi fukobaf fáñiiaaf fati Atijamit fan Búyegetab Bátienaab bati Atijamit bommi? ¹⁷ Anoosani akajenumi fukobaf fáñiiaaf fati Atijamit, Atijamit panakajenool. Mati fukobaf fáñiiaaf fati Atijamit fúlirooliroor, ban fukobaf fáñiiaaf fukila foo eenomi muyuul. ¹⁸ Takumbi an abuntooro. Anoosani di muyuul awoonoorumi mati oo an alinloe di fujuumaf fati dúniyaay uye iñeme, naate ekaan égot mbi alinlo. ¹⁹ Atijamit nasofumi mati malinlaam mati dúniyaay moo mukankaan nan mafuuriaam. Mati ciikiciik, “Atijamit nasofesof kalinloaak ñátum di malinlaam mooliil.” ²⁰ Di poop foone, “Akiiyaau namammanj mati síwoonooras sati bukanak kalinloaak, soo járus ceb.” ²¹ Moo kammi takum an á’aamakalenoor mati ariiba ati arunga aceen ábutoe. Muyuul jikile wanoosani. ²² Paul mba Apolo mba Kefa mba dúniyaay uye mba eroŋey di ecetey, nanan une mba nanan nábileul, wanoosani woo wooluul, ²³ ban muyuul koo kati Apakenaau Áamakau, Apakenaau Áamakau oo ati Atijamit.

¹ Muyuul joote ésofoli nan kuroka kati Apakenaau Áamakau kan abilenumi di malegenam mayofoaam mati Atijamit. ² Moo kaane, wan ceeŋumi di kurokaak kukila woo eenomi koote ekaan kufiumaay. ³ Ínje butumom bulee bo hani jayiinkun kaanjaat ínje nigamenigamen mba fugamenaf fati sílingaas. Ínje di fúko’om ígamenooroeriit. ⁴ Ínje múmboom mútientien, bare moo mukaanutom man ijoon. Ínje Akiiyaau agameneaam. ⁵ Moo kaane takum jigamen an bala’a nanan nasofumi níriiŋ, jikob bee nampi Akiiyaau alaañulomi. Oo aate kájeetumul wanoosani wayofomi di érimey bee di mawuŋam ban narajen wammi di ésigirool! Ban noo anoosani panayabumi kasalak koola kan ceeŋumi kápurumul di Atijamit. ⁶ Kutiom, ínje nirokerok mukaanaam ume búrom bee di ínje di Apolo, mambi jibaj ró waaf, mbi jiriiben kútaagulak kóololi. Ban di jíliikitenummi wúli mati “Takumbi jíyuur waciikimi! Hani ákon di muyuul takumbi á’aamakalenoor man aheelen apaalool. ⁷ Ai akaanuul man jitebo wuuj bukaaku? Mante lee Atijamit asenuumi wanoosani wan jibajumi? Kaanjaat jiyayab wanoosani di Atijamit, wau kaane di jitebenelenoor wan jibajumi nan lee kawul? ⁸ Súm muyuul iñeme jiñesut waaf! Súm muyuul jibabaj jiban! Jikankaan kúyi, hani wúli balee dó! Pánsuumeenom man jikaaneen kúyi, timaa muyuul di wúli nure’enaal di erungey dákon di furung fukila. ⁹ Mati ínje di ejukey yúmboom mati Atijamit nákaanolikaan kúriiŋenaak kaate kálamuko, nukankaan nan bukan kasofimi di futiik man kurungeniimi, nan bukan kaate ebuji tan kubujemi. Mati simaleeka di bukanak kati dúniyaay uye kúluuolaal. ¹⁰ Wúli sígot mati núyinenyinen di Apakenaau Áamakau, bare jilinlolinlo man jisofoor jak di Apakenaau Áamakau. Wúli núlanlaam bare muyuul jílinliŋ. Wúli uheeleni bare muyuul di jílebieni. ¹¹ Hani bee mo jaat wúli bacaarab di baraanab búsofolisof, ban mutugenam músofolisof manteer kurookal ceb. Kuceen di kúsuutukenoli ban ubajut bampi ucin, ¹² ban wúli bukooke karoker ñátum uñenaw wóololi. Nampi bukanak kúnumolimi wúli nooniil Emit ekatuul. Nampi bukanak kúsuutukenolimi, wúli nubaj kamuuten. ¹³ Nampi bukanak kasuulenumi mati wúli, wúli nulaañeniil súum. Bare bee mo tan oomaañaa iñeme, bukanak kúsofolisof nan waaf wajakut di dúniyaay uye. ¹⁴ Ínje iciikut mo’omu bee kapuñuul, bare bee kájaatikenuul nan kuñoolom kan imaŋe. ¹⁵ Handeneen nubabaj kuliikitena kameeŋe kan umanje letuŋoolen upin di Apakenaau Áamakau, bare ínje ceb eenomi ampauul. Mati di Apakenaau Áamakau Yensa, muyuul úwoloorumaw wúmboom ceb kápurumul di káriiŋenak kati furimaf fajakaaf. ¹⁶ Moo kaane ínje nilawuulaw máamak, man jibonket wey jiriibenom man ikaanemi. ¹⁷ Moo kaane níboñuluul Timoti, añoolom ati búsusom ban afiumaay di Akiiyaau. Akila panawoolenuul buruŋab búmboom di Apakenaau Áamakau, nan man iliikiteniimi banoosani di fujojaf fanoosani. ¹⁸ Bukaaku di muyuul bukan kapooñe, mati kaaniikaan nan ínje íje’eriit bee ebil bo’obu. ¹⁹ Súumujaat di Akiiyaau, pániriiŋ bo iñemeeñeme, ban pánimeelo kánkumak kan bukanak buke kapooñumi kubajumi, lee wan kusankenemi ceb. ²⁰ Mati jáyiaj jati Atijamit let kasankenak cebuko, bare mati kánkumak. ²¹ Waa jimaŋe man ikaan nampi ibilumi bee di muyuul? Mante ibil bee di muyuul esankiley di yóro, mba ñátum di kamaŋak di kajinlenak kúmboom?

¹ Bukan kuceen kúregolireg mati babaj fúraar di kan jiyaboorutumi kuceen di muyuul. Di kaan bújakaataab ube ban umanje hani kamanjutumi Atijamit kúkoiil leekukaan bo, mati ániine ebot aseekau ati ampaool man kufinto. ² Muyuul bukan kapooñe! Wau kaane leejilako búlok? Wau kaane anau o’omu jicesoorutool ápur di muyuul? ³ Handeneen ínje di fumuumom imaatut, bare ínje oomu di muyuul di Búyegetab Bátienaab. Ínje nitinting bagamab iban kankaan nan ínje oomu di muyuul, ⁴ nan jijojumi di kareesak kati Akiiyaolaal Yensa mati ániinaau ume. Ínje oomu di muyuul di kawoonoorak kúmboom ban kánkumak kati Akiiyaau Yensa pánkoomi di muyuul. ⁵ Muyuul joote kacesoor ániinaau ume di fujojaf fooluul ban di jikatool bo di kañenak kati Seetaanaay, man eniilool ekajeni, bare yuutool mbi eŋoolen epak di funakaf fati élaañuley yati Yensa Apakenaau Áamakau. ⁶ Ká’aamakalenoorak kooluul kujakut! Mante jimanjut mati múliitenuma hani jasiinkun múliitenemi galab fúmeelaf? ⁷ Jípuren jibeten múliitenumaam mafanlenaam. Jikammojaat, muyuul jikankaan nan fúmeel funkul fabajutumi múliitenuma, malegen muyuul súm moo joonomi eeno. Mati Apakenaau Áamakau, an eenomi jisahaaj joololaal jati káaningak kati Ewuujey yati Njalayiri, jísimenisimen jiban. ⁸ Moo kaane, nampi ulakoaami karuuken káaningak koololaal, takum ukaanaal ñátum di bújakaati di poop mukaana majakut, moo mukankaan nan mbúur yabajumi múliitenuma. Bare jifaŋ man jikaane mukaana mátiene di malegen, moo mukankaan nan mbúur yabajutumi múliitenuma. ⁹ Nan iciikumi letaraay noo, nireguumi mati takum jimaŋ man jiriiboor di kakaanemi fúraaraf di kan kuyaboorutumi. ¹⁰ Bare iregut mati bukanak kati dúniyaay uye. Bukoo káraadiemi di kan kuyaboorutumi kati dúniyaay uye, mba kúfeketa, mba kúkuu, mba kukoba sínaati. Joonjaat bee etey moo eenomi joote épur di dúniyaay uye jáng. ¹¹ Bare wan ilobumi muyuul woo eenomi takum jiriiboor di aanooromi oo ariiba bare akammi fúraari di kan kuyaboorutumi, mba áfeketa, mba akoba sínaati, mba atema, mba ákalia, mba ákuu. Takum jiri dákon di anau aanomi nan mo’omu. ¹² Mante butumom bombo di etingey bagamab bee mati kammi téeŋey yati fujojaf? Mante lee muyuul joote kagamen bukanak kammi di fujojaf kakaanemi majakut nan mo’omu? ¹³ Atijamit panagamen bukanak kalakomi téeŋey yati fujojaf. Nan man furimaf fati Atijamit furegumi, “Muyuul joote kacesoor anau ájakaatiaau titooruul.”

¹ Nampi ákon di muyuul kubajoorumi di apaalool ariiba, mante panapuun ájeetumool bee di kati bagam kajoonutumi, lee bee di bukanak kati Atijamit? ² Mante muyuul jimanjut mati bukanak kati Atijamit panjiting bagamab bati dúniyaay? Ban kaanjaat muyuul bee ejaw eting bagamab bati dúniyaay, kama ñaa moo jiyajut bee katingooro bagamab bati kabajoorak kasiinkunak kammi titooruul room? ³ Mante jimanjut room mati wulaal ootaale bee etingey yati bagamab bati simaleekaas? Kammojaat, buu panfaŋ man uŋoolenaale etingey yati bagamab bati mukaanaam mati eroŋey uye? ⁴ Moo kaane jibajujaat titooruul kabajoor kaanoe mo’omu, wau kaane di jíjeetumuko bee di bukan kaleemi di fujojaf? ⁵ Ínje niciciik furimaf ufe bee kapuñenuul. Waa di muyuul búrom bajut hani ákon ampi aŋoolen agamen titooruul, muyuul kati di fujojaf? ⁶ Bare ákon di muyuul kubajoorujaat di apaalool ariiba, mante cenceeŋ man kakaanutumi kufiuma man kugamenool? ⁷ Malegen mati jibabaj bagamab bajuupoaab titooruul boo fúkoubo kankaan muyuul búromuul man jilo búp. Waa kaane letuŋar kabetak? Waa kaane letumaŋ man aguuñi? ⁸ Bare muyuul di kúkouul jilolo ban di jiguuñoor manteer bee mo muyuul kándomi di fujojaf! ⁹ Mante jimanjut mati bukanak kajoonutak leekuŋoolen kuyab bulaañab bati jáyiaj jati Atijamit? Takum jimaŋ man an abuntuul. Lee bukanak kakammi fúraari di kan kuyaboorutumi, lee kukoba sínaati, lee kasangemi aseek mba ániine ati an, lee kúniine kayabooremi, ¹⁰ lee kúkuu, lee kúfeketa, lee kúkalia, lee kakammi jatem, mba lee kúlaputa koo búromiil leekuyab bulaañab bati jáyiaj jati Atijamit. ¹¹ Kuceen di muyuul no’ona koo poop moo koonomi eeno. Bare muyuul jiñooiñoo jitiluli mati majakutuul, jisenimi bukanak kati Atijamit, ban jikaanimi jijoon di Atijamit, mati wan Akiiyaau Yensa Apakenaau Áamakau di Búyegetab Bátienaab bati Atijamit oololaal ukammi di muyuul. ¹² Bukaaku timaa pankureg, “Ínje waaf úfirentom,” bare lee waafaw búrom urambene. “Ínje waaf úfirentom,” bare íje’eriit bee ekaan fúleeñ fati wanoosani. ¹³ Bukaaku pankoone, “Muria bee mati faraf, ban faraf bee mati muria” Malegen, bare balay bákon Atijamit panakajen uru búrom. Eniiley yati anau ejoonenuti bee mati fúraar di kan kuyaboorutumi. Bare ejoonenijoonen bee mati Akiiyaau, ban Akiiyaau acookoorumi eniiley yati anau. ¹⁴ Atijamit nayitenyiten Akiiyaau di kacetumi, ban poop panayitenolaal di kacetumi ñátum di kánkumak koola. ¹⁵ Mante jimanjut mati siniiluul soo sati upanaw wati eniiley yati Apakenaau Áamakau? Mante paniŋar kapan kákon kati eniiley yati Apakenaau Áamakau ban nikaanuko kapakenak kati eniiley yati áraadia! Letujamuder! ¹⁶ Mante jimanjut mati anaamoorumi di áraadia kubilebil kukaan eniil yákon? Mati nan man ciikimi, “Bukanak kugabaak koote ebil kukaan eniil yákon.” ¹⁷ Bare anoosani di fúko’ool anaamoorumi di Akiiyaau, abil akaan búyegetab bákon di Akiiyaau. ¹⁸ Tey fúraar di kan jiyaboorutumi. Majakut maamu man an akaanemi di eniiley yoola, bare anau akaanemi fúraar di kan kuyaboorutumi moo mukankaan majakut makajenumi eniiley yoola fúkouyo. ¹⁹ Mante umanjut mati eniili eenomi fukobaf fáñiiaaf fati Búyeget Bátienaab ban ubajumi kápurumul di Atijamit? Au ukiloorout. ²⁰ Mati Atijamit banoome au ñátum di ecaamey butum barioe. Moo kaane úlebien Atijamit ñátum di eniili. mit ñátum di eniili.

¹ Mati kúceeŋak kan jiciikumi di letaraay yooluul. Jajak ániine kalakaak mo’omu baakenut aseek. ² Bare mati babaj kayinkoorak kati ekaaney fúraar di kan jiyaboorutumi, ániine anoosani naate eyab aseekool, aseek anoosani naate kayabo di ániineool. ³ Ániinaau di aseekau koote kajamoor di búyabaab. ⁴ Mati eniiley yati aseekau ániineool akileyo, moo mákonam, eniiley poop yati ániineool aseekool akileyo. ⁵ Takum jilatoor búyabaab, leejaat jilakolako man jijamoor mati mo di nanan nátemie, mbi jibaj nan joote elaw. Banjaat jibil jinampoor tákon inki, takum Seetaanaay eŋoolen eyinkuul ñátum di káŋoolenaataak jisofooro. ⁶ Mo’omu kawoonoorak kúmboom ceb wan joote ekaan, bare lee kájaatikenuul. ⁷ Wan ifaŋumi man imaŋe di muuyuul búrom man muyuul búrom joono nan ínje. Bare anoosani nababaj kawulak kábutoaak kápurumul di Atijamit aamu nababaj kawul uke, aamu uka. ⁸ Bee di kayabo’oorutumi di poop kuseek kati kújima, ínje neene jajak bee di bukoo man kulako bayabout nan ínje man emmi. ⁹ Bare kuŋoolenutujaat kusofooro, koote kayabo. Mati kayabo kóyume man ulako mo’omu man úyegetuul ugaal mati búyabaab. ¹⁰ Mati kayabomi, ínje nibabaj kájaatiken koo let kápurumul di ínje bare kápurumul di Akiiyaau. Aseekau takum aban búyabo. ¹¹ (bare akammojaat, mbi alako bayabout mba nalaañ man kusanken di ataool man kulaañ) di moo mákonam ániinaau senut man akaten aseekool. ¹² Bee di karinomi di muyuul ínje neene, let Akiiyaau. Kaanjaat atiolaal ariiba abaje aseek akaanut ariiba ban aseekau akila namammaŋ man kulako, takumbi akatenool. ¹³ Kaanjaat áliinolaal ariiba anoosani ániineool akaanut ariiba, ban ániinaau akila namammaŋ man kulako, takumbi akatenool. ¹⁴ Mati ániinaau akaanutumi ariiba iñeme nabil akaan an ati Atijamit kápurumul di aseekool ariibaau, ban aseekau akaanutumi ariiba iñeme nabil akaan an ati Atijamit kápurumul di ániineool ariibaau. Leemojaat, kuñooluul pankukaan nan kamanjutumi Atijamit bare iñeme bukoo kati Atijamit. ¹⁵ Moo, ániinaau mba aseekau akaanutumi ariiba asofumi man búyabaab buban, kat man buban. Di mo’omu atiolaal mba áliinolaal ariiba napapak di kukila. Mati nawonkolaawonk bee di kásuumaay. ¹⁶ Bare aseek ariiba, buu noote emanj mati panupaken atai? Mba, ániine ariiba, buu noote emanj mati panupaken aseeki? ¹⁷ Manoosani, anoosani aate ejaw di eroŋ nan man Akiiyaau aanoomi man akaan eeno, ban narulen di ekaan nan noo káŋarum no’ona nan Atijamit awonkoomi. Mo’omu moo níjaatikenumi bee di fujojaf fanoosani búrom koote ekaan. ¹⁸ Kaanjaat ániine súm atampimi nan Atijamit awonkoomi, takum añes kápuren kúyokumak kati etampey. Kaanjaat ániine atamputimi nan Atijamit awonkoomi, takum koone bee eñes mbi atampi. ¹⁹ Mati ániine natampitamp mba atamputi, uru búrom lee waaf. Bare wabajumi fúkaw woo eenomi ekaaney nan man Atijamit ájaatikenumi eeno. ²⁰ Anoosani naate kalako fujuumaf foola fan ajuumeenumi nan Atijamit awonkoomi. ²¹ Kaaneenjaat noo au amiiceel nan uwonkimi. Moo lee waaf. Bare ubajujaat buruŋ bati épur di famiiceelaetaf, nuŋarubo. ²² Mati amiiceel an Akiiyaau awonkumi, oo an apake mati Akiiyaau. Moo mákonam, akaanutumi amiiceel an Atijamit awonkumi, an akila nakankaan amiiceel ati Apakenaau Áamakau. ²³ Atijamit nanoomuunoom di butum barioe, moo kaane takum jikaan kumiiceel kati bukan. ²⁴ Kutiom, anoosani di muyuul aate kalako bapaalaayab di Atijamit di fujuumaf fákonaf fan ajuumenoomi nan Atijamit awonkoomi. ²⁵ Iñeme mati kúmajira kayaborerutumi, ínje ibajut kájaatikenak kápurumul di Akiiyaau bee mati kukila. Bare ínje paniseniil kawoonoorak kúmboom nan an afiumaay kápurumul di kabonketak kati Atijamit. ²⁶ Ujikeraajaat bugaalab bammi di éjawuley di funakaf fati jaat, kójiut man ulako bayabout. ²⁷ Uyabujaat aseek, takum uban búyabaab. Uyabutujaat aseek, takumbi ugaalenoor eñes aseek. ²⁸ Bare uyabutujaat, moo lee majakut nukaane, ban ámajira ayabojaat, moo lee majakut nukaane. Moo manoosani, kayabomi pankubaj bugaalab bati dúniyaay, ban ínje boo nimaŋumi man upak. ²⁹ Kutiom, wan eem di eregey woo eenomi nanan nifaŋe elof no’ona. Moo kammi káŋarum iñeme, kayabumi kuseek, di kukaan nan kuyabout. ³⁰ Bukan kammi di búŋanab di kaaniil nan kulee di bo, kammi di kamaayoorak, di kaaniil nan kulee di ko, kammi di enoom munoomena, di kaaniil nan kubajutumo, ³¹ Mo’omu mukaanut man náamaati majakam mati dúniyaay man jibajumi mba man jimaŋ. Dúniyaay uye nan man jimanjumi iñeme yooyu bo ewuuj. ³² Ínje nimaŋuumaŋ man jipak di bugaalab bati úyegetuul. Ániinaau ayabutumi naŋareŋar búyegetool ajuumen di mukaanaam mati Akiiyaau, mampi akammi man akaan Akiiyaau súumool. ³³ Bare ániinaau ayabumi oo naŋareŋar búyegetool ajuumenubo di mukaanaam mati dúniyaay, mampi akammi man akaan aseekool súumool, ³⁴ ban kamaŋak koola kucaabooricaaboor. Moo mákonam, aseekau mba ámajiraau ayaboutumi naŋareŋar búyegetool ajuumenubo di mukaanaam mati Atijamit, mambi asenooro bee di Atijamit wan akammi di wan asofumi di búyegetool. Bare aseekau ayabomi naŋareŋar búyegetool ajuumenubo di mukaanaam mati dúniyaay, mampi akammi man akaan ataool súumool. ³⁵ Ínje oomu di kasanken mo’omu bee karambenuul. Ínje kaanut éñakuluul bálamuk. Bare nimammaŋ man jikaan wajoone di wáliroore ban di jisen kúkouul búrom bee ekaan burokab banoosani bati Akiiyaau ñátum búyeget bákon. ³⁶ Bare kaanjaat ániine di ámajiraool nan kubanumi ekokey búyabaab, ániinaau akila najukumi mati letaŋoolen asofooro mba nakob piyo ámajiraool. Ñaa moo ániinaau nasosof koote ekaan fuyabaf, oo naate ekaan nan man amaŋumi eeno. Jikatiil man kuyaboor, majakut mulee dó. ³⁷ Bare kaanjaat ániinaau awoonoorumi jak mati letayab ban di áliimeriit ámajiraau ume ban naŋooleŋŋoolen asofooro. Ániinaau o’omu poop majake nakaane. ³⁸ Moo kammi ániinaau ayabumi ámajiraool wajake nakaane, bare umu ayabutumi ámajiraau majakam moola mufaŋe kákalaa. ³⁹ Aseek kanew koom titoorool di ataool manteer bee nampi Atijamit aŋarujaat ataool. Ataool acetujaat kanewak kutingotingo ban naŋooleŋŋoolen ayabo di ániine aceen an súumool, bare ániine naate ekaan ariiba ati Yensa. ⁴⁰ Bare akila alaañutujaat ayabo, moo búyegetool pambufaŋumi man bufintoe. Moo ínje di ejukey yúmboom, ban nisosof Búyegetab Bátienaab bati Atijamit poo

¹ Iñeme kúceeŋak kan jiciikumi mati muria másimenimi bee di sínaati. Numammanj nan man jiregumi, “Wulaal búrom nubajaabaj fumanj.” Fumanjaf fukaanemi anau man atebenelenoor bare kamaŋak koo kúkaanolimi man úliŋen bukaaku. ² Ampi awoonooroumi mati namammanj kapan kaaku kati fumanj, akila malegen amanjoorut nan man aate emanj. ³ Bare kaanjaat anau amaŋumi Atijamit, Atijamit namanjoomanj. ⁴ Handeneen muria másimenimi sínaati, wulaal búrom numanjaamanj mati náati yaam di dúniyaay uye eroŋut. Múlamukaam, Atijamit ákon ceb abajoe. ⁵ Handeneen babaj waaf wajuupoe wawonkeimi simit sammi di fatiya mba baabe tentaam, malegen babaj kan kuwonkemi “simit” sajuupoe di “kukiiya” kajuupoe. ⁶ Bare numanjaamanj mati Atijamit ákon abajoe ceb, Ampaau, atuukumi wanoosani, ban nuroŋaaroŋ mati oo. Ban babaj Akiiyaau ákon abajoe ceb, Yensa Apakenaau Áamakau, kápurumul di oo Atijamit atuukumi wanoosani di poop nubajaami eroŋey yoololaal. ⁷ Moo manoosani, lee kuriibaak búrom kookene fumanjaf ufe. Bukaaku bee mo iñeme kufiunfium mati sínaati waaf waroŋe. Nan kulakoemi furiaf muria másimenimi bee di sínaati, di kusof mati kamiiceelaet sínaati waaf waroŋe, ban síwoonooriil sílaamolaamo, ban di kusof mati muriaam mukila musikeniimi. ⁸ Malegen, muria leemuŋoolen mulofenolaal Atijamit. Nuriaari mo, uriutaal mo, moo mákonam kajenutolaal waaf. ⁹ Jíkaanum, manoosani, mati kafeloak uke kooluul takum kukaan kálaamoe di kafiumak kooliil kulo di majakut. ¹⁰ Kaanjaat an síwoonoorool sílaamomi mati mukaanaam ume najuke, an kuwonkemi abaja “fumanj”, furiaf di báciinab bati náati. Mante lee mo’omu moo mubuntoorool man ari muria másimenimi bee di sínaati? ¹¹ Ñaa mati fumanjaf fooli an síwoonoorool sílaamomi panakajen, atiolaal ariibaau mati oo Apakenaau Áamakau acetumi. ¹² Di ekaaney mo’omu, panukaan majakut bee di Apakenaau Áamakau ñátum di ekaaney majakut bee di kuriiba bukaaku kan síwoonooriil síliŋutumi di poop panukaaniil síwoonooriil sílaamo. ¹³ Moo kammi, kaanjaat wan irimi woo ukammi man ariiba aamu alo, letilaañ irirer eluw takumbi ikaan ariiba aamu alo poop.

¹ Mante ínje let amiiceel? Mante ínje let áriiŋena ati Yensa? Mante ínje let nijujuk Yensa Akiiyaolaal ban nirunguul man jibaj kafiumak di oo? ² Handeneen bukaaku kasofutammi nan áriiŋena, malegen muyuul jisofansof áriiŋena. Muyuul di kúkouul kúyiisenaak mati jirondoŋ kasofoorak di Akiiyaau moo múyiisenumi ínje áriiŋena. ³ Moo eenomi kalaañenak kúmboom bee di kaceeŋammi fujuumaf fúmboom nan áriiŋena. ⁴ Ínje di fúko’om di Banaabas, mante wúli ubajut bakooŋ man uyab muriaam di baraanab bóololi bee mati búrokoli? ⁵ Mante wúli ubajut bakooŋ man anoosani kuriiboor di aseekool ariiba, nan man kúriiŋena, kutiaak kati Akiiyaolaal di Peter man kukammi eeno. ⁶ Mante kama Banaabas di ínje céboli oote eñes burok buceen bee mati eroŋey yóololi? ⁷ Atiika ai aate ecaamooro bacaamab bee mati burokab boola? Awaña ai ariut kureseŋ kápurumul di úbaar ureseŋ wan alukumi aban di kalaakak koola? Amata ai áfireni takum araan míilam maamu kápurumul di kamatak kati síbaas soola? ⁸ Mante ínje di fúredimpom neem di kásankenum? Mante lee sílingaas sati Atijamit moo mákonam siregumi? ⁹ Mati ciikiciik di sílingaas sati Muusa, “Takum uloop fúmuuna kasoop nampi fulakomi eyoosey.” Mante jisosof mati kúmuuna Atijamit asankenumi? ¹⁰ Mante lee wúli nasankenumi? Malegen mati ciikiciik bee mati wúli. Awaña áruugenumi di ajalumi aate ekaan burokab booliil bati ewañey di fúgolumaf fati ebajey bucaab bati muriaam. ¹¹ Wúli nululuk di úyegetuul waaf nan etuukal yajake yápurumulo di Búyegetab Bátienaab bati Atijamit. Mante juupojuupo wúli uyabujaat waaf wati kárambenoli? ¹² Kaanjaat bukaaku kubabaj bakooŋ man kuyab waaf di muyuul, mante bóololi leebufaŋ room? Moo manoosani, wúli úyiisenderutuul bákooŋoli eeno moo. Bare wúli numuutemmuuten di wanoosani takumbi ukaan múlokuma di buŋarab bati furimaf fajakaaf mati Apakenaau Áamakau. ¹³ Mante jimanjut mati karokemi di fukobaf fáamakaf muriaam mooliil dóo mommi? Bukanak karokemi di fúsimenaf koo poop kubajebaj bucaab di kawulak kati búsimenab. ¹⁴ Moo mákonam, Akiiyaau nájaatikenjaatiken mati káriiŋenumi koote karambenooro kápurumul di káriiŋenak furimaf fajakaaf ufe. ¹⁵ Bare ínje íyiisenderutuul bakooŋab ube. Ban poop ínje iciikut bee ereguuley man ítaatumumi eeno bee mati fúko’om. Icet kóyume man ikammo. Bajut an bee káruŋul man itebenumi sileekom woo tíikaar. ¹⁶ Ínje ibajut bakooŋ man iteb sileekom mati ínje oomu di káriiŋen furimaf fajakaaf ceb. Káriiŋenak koo Atijamit amingenaam man ikammo. Íriiŋutufojaat, búyiikab bulako di ínje. ¹⁷ Kaanjaat pániriiŋenufomi ñátum kamaŋak kúmboom, paniyab man iyab bacaam. Bare lee mati ínje imaŋe, Atijamit abilenaam burokab ube. ¹⁸ Kama bacaamab bati waa neete eyab? Di káriiŋenak kúmboom furimaf fajakaaf bacaam bulee dó, ban iceeŋurerut an mati bakooŋab búmboom nan áriiŋena. ¹⁹ Ínje ikaanut amiiceel ati hani an, bare ínje nikankaan fúko’om amiiceel bee di anoosani, mambi ígaawuliil bee di Apakenaau Áamakau. ²⁰ Nan ilakomi di Kúyahuudak, ínje ibilumi ikaan nan ákon di Kúyahuudak mambi iŋoolen ígaawuliil bee di Apakenaau Áamakau. Nan ilakomi di kariibumi sílingaas sati Kúyahuudak, nikaanekaan nan kukila, handeneen ínje di fúko’om man iriibenutusomi, bare mambi iŋoolen ígaawuliil bee di Apakenaau Áamakau. ²¹ Moo mákonam, nan ilakomi di Kakaanutumi Kúyahuudak kabajutumi sílingaas sati Kúyahuudak, ínje ibilumi ikaan ákon di kukila. Wan ikammomi mambi iŋoolen ígaawuliil bee di Apakenaau Áamakau. Bare ilatut ekaan sílingaas sati Atijamit bare ínje oomu di kariiben wan sílingaas sati Apakenaau Áamakau siceeŋumi, mambi ígaawuliil. ²² Nan ilakomi di kálaamomi di kafiumak, nibilumi ikaan nan ákon di kukila kálaamomi, mambi iŋooleniil ipaken kuceen bee di Apakenaau Áamakau. Ínje nikaanekaan wanoosani di anoosani mambi ipaken kuceen bee di Apakenaau Áamakau. ²³ Mo’omu búrom nikaanekaan bee kafeten furimaf fajakaaf mati Yensa, ban mbi iyab bucaab di kawulak kati fo. ²⁴ Mante jimanjut mati di kafannoor kanoosani kuteyaak kujuupoejuup, bare ákon arungemi aatumi eyab kawulak? Jitey, jíteyaj jan umanje panumond úriiŋ. ²⁵ Ateya anoosani ajawumi kafannoorak naate karaagal man ábolien eniilool di kasofooro jak. Kukaanekaan mo bee eyab kawulak kan kaatumi ejaw di érusey, bare wan ukaanaalemi woo eenomi bee eyab kawul kati ecin bee bándoorey. ²⁶ Moo kammi ilee di etey jíteyaj jati falaamaat. Ínje ikaanut nan an atiika anagemi érusey. ²⁷ Nikurekur eniilom nan an aate kanoken kafannoorak, ekuruyo mbi epulen wan ceeŋumi man ekaan. Leejaat, ínje níkolikoli nampi íriiŋen furimaf fati Atijamit bee di bukaaku iban, ínje ijukooromi man íjime.

¹ Kutiom, ínje nimammaŋ muyuul man jiwoolo mati kufannaaniŋolaal búrom ebuuney yati fúmigenaf epooyiieempooy, man kuŋooleneenumi kútip Falaf Fáyemaaf. ² Mo’omu mukankaan nan kuyabumi kátiigulenak di fúmigenaf di falaf, nan kuriibaak kati Muusa. ³ Koo búrom poop kuriri muriaam mákonam man Atijamit asenumi ñátum di kánkumak kákonak koola ban di kuraan mumelam makaanutumi ñaañaaña ⁴ ban di kuraan mumelam man Atijamit asenumi ñátum di kánkumak kákonak koola. Di kuraanumi kápurumul di Fúlankiinaf fansi fariiboorumi di kukila, Fúlankiinaf fukila foo eenomi Apakenaau Áamakau. ⁵ Bare handeneen di mo’omu búrom, kajuupoe di kukila Atijamit mooliil di múyeaatiool, ban Atijamit akaaniimi man kucet di baŋaanab ban nabeten wiiŋiil bo. ⁶ Wabajoeenumi bee di bukoo ukankaan nan kagamen bee di wulaal, takumbi úyegetolaal umaŋ máamak ekaan wájakaatie nan man kukammi eeno. ⁷ Takum umiiceelaetaal sínaati nan kuceen di kukila mansi kukammi eeno. Mati ciikiciik, “Bukanak kalakomi di karuuken man kommi furiaf di baraanab, ban di kuyitomi jíboomaj.” ⁸ Takum ukaanaal fúraar di kan uyaboorutaami, nan kuceen di kukila mansi kukammi eeno, ban funak fákon bukan kooni síwili kabanan di sífeegiir kucete. ⁹ Takum uyinkaal Akiiyaau nan kuceen di kukila mansi kukammi eeno, ban di kubujimi mati siyela sapitiimi. ¹⁰ Takum úkuulujaal, nan kuceen di kukila mansi kukammi eeno, ban Atijamit náboñul Njalayiri man ebujiil. ¹¹ Wabajoeenumi búrom bee di bukoo ukankaan nan kagamen bee di wulaal. Woo uciikiciik mambi ukaan kájaatikenak bee di wulaal, mati wulaal bukooke di nanan nati fúbanumaf fati dúniyaay. ¹² Ampi asofumi oo ammi di bajuume líŋ, nakanto búyegetool ban nákaanum takum alo. ¹³ Bare bajut kayinkoor kabile bee di muyuul kan an ajuuderut. Atijamit afiumaay, akila letakatuul man kayinkoorak kufaŋuul kánkumuul. Nampi kayinkoorak kubajuumi, Atijamit panasenuul kánkum man jimuuten di mo ban náyiisuul buruŋ búpakuma. ¹⁴ Kutiom, moo kammi, jíloiyoor di kamiiceelaetak kati sínaati. ¹⁵ Ínje oomu di kasanken di muyuul nan bukan kan úyeget utote. Jigamenooro di wan iregumi. ¹⁶ Káraanumaak kan úraanumaalemi di Káliimenak kati Akiiyaau ban koo nusenaalemi kasalak bee di Atijamit. Nampi uraanooraami di ko, wulaal bukooku di kacaaboor di fúsimaf fati Apakenaau Áamakau. Ban mbúurey yan utingooraami. Man uriaal yo, wulaal bukooku di kacaaboor di eniiley yati Apakenaau Áamakau. ¹⁷ Mati babaj fúmbuur fákon, handeneen man ujuupoaami, wulaal eniil yákon, mati búromolaal nutigooraatingoor di fúmbuuraf fákonaf. ¹⁸ Jijiker ma bukanak kati Isirael, lee bukanak kariemi wasenimi wati búsimen bee di Atijamit di kunaamoor burokab bati Atijamit di fúsimenaf? ¹⁹ Buu neete ekaan man jílaul tíen? Iregut mati muriaam mukila masenimi sínaati manteer mukankaan malegen mba náati ekankaan malegen. ²⁰ A’a! Hani waaf. Wan ireguumi woo eenomi búsimenab ube básimenimi bee mati úgun bare lee bee mati Atijamit. ²¹ Leejiŋoolen jiraan di káraanumaak kati Atijamit ban poop jiraan di kati úgunaw. Leejiŋoolen man jirioor di Akiiyaau ban poop di jirioor dákon di úgunaw. ²² Mante numaŋaamaŋ man Atijamit abaj búlat ñátum di ekaaney mo’omu? Mante nusofaalesof wulaal ufaŋaale éliŋ Atijamit? ²³ Kuceen di muyuul koone, “Wúli nuŋooleŋŋoolen ukaan wanoosani wan umaŋumi!” Bare lee wanoosani ujajak bee di kukila. Kuceen di muyuul koone, “Wúli nuŋooleŋŋoolen ukaan wanoosani wan umaŋumi!” Bare lee wanoosani panuramben kukila. ²⁴ Takumbi an añes waaf wati di fúko’ool ceb bare wati di kulaoorool poop. ²⁵ Mbi jiri eluwey yanoosani yanoomenimi di funoomenaf. Takumbi jibaj kúceeŋak kati úyeget ugaba mati yo. ²⁶ Mati “Dúniyaay di wanoosani wándomi Akiiyaau akile.” ²⁷ Kaanjaat ákon di káyinenutumi abemuumi ban di jiwoonoor ejaw, mbi jiri wampi agabuumi. Takumbi jibaj kúceeŋak kati úyeget ugaba mati wo. ²⁸ (Bare an aceen alobuul, “Muriaam ume masenimi sínaati,” ñaa takum jiri mati anau man areguumomi nababaj úyeget ugaba. ²⁹ Wan ireguumi, lee muyuul jibajumi úyeget ugaba, bare nababaj úyeget ugaba—takum jiri.) Aceen di muyuul poop naceeŋ, “Wau kaane letiŋoolen ikaan wan imaŋumi mati man aceen awoonoorumi eeno? ³⁰ Kaanjaat nisasal Atijamit mati muriaom, wau kaane an pánafirenom mati muria man isalumi Atijamit iban? ³¹ Ñaa neene manteer jiri mba jiraan, mba jikaan waaf uceen, jikaan wanoosani man Atijamit álebieni. ³² Takum jíŋarul bugaal man Kúyahuud kulo mba Kúgirik mba kati fujojaf fati Atijamit. ³³ Jikaan nan man ikammi eeno man anoosani yeool di wanoosani wan ikammi búrom, bajikerut to wajakumi bee di ínje bare wajakumi bee di bukan kajuupoe, mambi kubaj epak.

¹ Jiriiben man jikaan nan man ínje iriibenumi Apakenaau Áamakau eeno. ² Ínje oomu di esaluul mati jiwooloeanwoolo ban di jiriibenumi wan iliikiteneenuumi. ³ Bare nimammaŋ man jílaul mati Apakenaau Áamakau oomu di fáculaf fati ániine anoosani, fúkaaf fati aseek foo eenomi ataool, fúkaaf fati Apakenaau Áamakau foo eenomi Atijamit. ⁴ Ániine anoosani áfimenumi fúkaaf foola man aam di elawey mba di káriiŋen kurimak di fáculey yati bukanak, oo álebienut Apakenaau Áamakau an eenomi fúkaaf foola. ⁵ Bare aseek anoosani ámuuroutumi man aam di elawey mba di káriiŋen kurimak di fáculey yati bukanak, oo álebienut fúko’ool, yesooyesoor nan funangund náciikoe. ⁶ Kaanjaat aseek anoosani alatumi kámuuro, ñaa oo aate káciiko walool. Mati aseek áciikoe funangund mba namiin walool témi moo puñenipuñen, kama ñaa naate kámuuro. ⁷ Ániine aatut kámuuro, mati Atijamit atuukumi ániine di búyesoorab bati fúko’ool, di poop mawuŋam mati Atijamit, ban anaare anoosani mawuŋam mati ániine. ⁸ (Mati ániine atuukuti kápurumul di anaare, bare anaare atuukimi kápurumul di ániine. ⁹ Ániine atuukutimi bee mati anaare, bare anaare atuukimi bee mati ániine.) ¹⁰ Moo kammi anaare naate kámuuro man áyiisen mati akila nalakolako di kañenak kati fujuumaf fati ataool mati simaleekaas soosu bo kajikerool. ¹¹ (Moo manoosani, di bújonlenab bati Akiiyaau ániine letaŋoolen alako anaare balet, anaare poop letaŋoolen alako cebool ániine balet. ¹² Handeneen anaare atuukie kápurumul di ániine, bare ániine anoosani nawoliwol di aseek biñoo no’ona. Ban Atijamit oo ácite wabajumi wanoosani.) ¹³ Jigamenooro titooruul maa bagamab. Mante jajak man aseek alaw Atijamit fúko’ool fútiikaar? ¹⁴ Mante wulaal di kúko’olaal umanjutaal mati jakut man ániine akaten walaw baak? ¹⁵ Bare mati aseek kankaan búkaroor, walool wabaake woo ukankaan múfimenumaool. ¹⁶ Bare kaanjaat anoosani amaŋe kañakoorak wan ireguuñaa, wulaal ubajutaal mukaana muceen wuuj mukaanaam ume, ban kuriibaak búrom kati kujojak kati Atijamit kusosof buruŋab bákonab mati mo. ¹⁷ Manoosani, di kájaatikenak uke kariiboorak, ínje letiŋoolen isaluul. Mati nampi jijojumi tákon fujoj fukila jikaanekaan jákaati. ¹⁸ Mútiyaaram, kuceen di muyuul kureganreg mati kama muyuul nan jijojeñaa di fujojaf fooluul úyegetuul úlakoeriit tákon, bukaaku kujuumujaat maa bukaaku maa. Nibabaj kafium mati mo’omu waaf wabajoe. ¹⁹ Bajut kamanteer mati kañakoorak koote kayito titooruul man kuceen di muyuul kammi di malegen kumanj tíen. ²⁰ Nan jijojemi tákon, lee káliimenak kati Akiiyaau jiriemi. ²¹ Kuceen di muyuul kureganreg bukaaku di muyuul kuliimeliim man kuri muriaam mooliil bacaabut di bukaaku. Moo kammi, bukaaku man kucaarecaaret, bukaaku man kúkalie. ²² Waa? Mante jibajut sísindouul dampi jiri di jiraan jíkali? Mba mante jimammaŋ man jiheelene fujojaf fati Atijamit ban ninsi jipuñen bukaaku kabajutumi waaf? Jikammojaat, ínje waa neete ereguul? Mante jimammaŋ man isaluul? A’a, letiŋoolen ikammo. ²³ Mati ínje poop wan ibajumi di Akiiyaau di fúko’ool, woo nemmi di kaliikitenuul man jiriiben. Fukaf fukila nan Akiiyaau Yensa bukanak kápurum di oo, baŋare fúmbuur fákon, ²⁴ ban nan asalumi aban, namiinufo, man ammi, “Ure eniilom bee mati muyuul. Jikammo man jiwoolom.” ²⁵ Moo mákonam poop nan kurimi káliimenak kuban, naŋarumi éraanumaay man ammi, “Éraanumaay uye eenomi kasoofoorak kunkulak kan Atijamit ajuumenumi di muyuul ñátum di fúsimaf fúmboom. Nanoosani nampi jiraanumomi kápurumul di yo, jikammo man jiwoolo’om. ²⁶ Mati nanoosani nan jirimi mbúurey uye ban di jiraan kápurumul di éraanumaay uye, muyuul jireg mati ecetey yati Akiiyaau bee nampi alaañulomi. ²⁷ Moo kammi, ampi arimi mbúurey mba naraan kápurumul di éraanumaay uye yati Akiiyaau bálebienut, an akila nakankaan majakut eniiley di fúsimaf fati Akiiyaau. ²⁸ Moo kaane, anoosani ámeelo’ooro jak, mbi kiti ari di poop naraan di éraanumaay. ²⁹ Mati anoosani arimi naraan bálebienut wafelumi eniiley yati Akiiyaau, Atijamit panatek nan arimi naraan. ³⁰ Moo kammi kajuupoe di muyuul kúliŋut, kúju’ut ban bukaaku koo kucecet. ³¹ Di mútiyaaram úmeelo’ooroaajaat tíen, wulaal ootutaal kagameni. ³² Bare nampi Akiiyaau agamenolaami ban nakurolaal, létufirenaali di kati dúniyaay. ³³ Kutiom, moo kammi nampi jibilumi jijoj tákon bee furi, mbi jikoboor. ³⁴ An acaaretujaat akila naate furi waaf síndo’ool, takumbi jibaj kúnagak kati Atijamit nan jijojumi tákon. Nampi íriiŋubomi, pánijaatikenuul mati waafaw uceenaw wan jiciikumi.

¹ Kutiom, iñeme kúceeŋak kan jiciikumi di letaraay mati kawul kápurumul di Búyegetab Bátienaab bati Atijamit, imaŋut muyuul jilako bamanjut. ² Fiituufiit mati nan jimanjuteenumi Atijamit kújimeneenuujimen man jimiiceelaet sínaati sísankeneriitumi. ³ Moo kammi nimammaŋ man jílaul mati an létasankenum di Búyegetab Bátienaab bati Atijamit man anum Yensa, ban an letaŋoolen areg Yensa emmi Akiiyaau kaanutujaat ñátum di Búyegetab Bátienaab. ⁴ Iñeme babaj kawul kanaamutumi kápurumulomi di Búyegetab Bátienaab, kawulak koo búrom kúpurulopur di Búyegetab Bátienaab bákonab. ⁵ Babaj uruŋ wanaamutumi wati kamiiceelaetak di fujojaf, bare Akiiyaau ákonau numiiceelaetaale. ⁶ Babaj urokaw wanaamutumi wati kamiiceelaetak di eroŋey yoololaal, bare Atijamit ákonau narokerok di anoosani. ⁷ Kawul kápurumul di Búyegetab Bátienaab kasenimi kurokemi di anoosani man aramben fujojaf foololaal. ⁸ Búyegetab Bátienaab buwul ákon kawulak kati kasanken di malinlaam, aamu kawulak kati kasanken di fumanjaf. ⁹ Búyegetab bákonab buwul aamu kafium kábutoe, ban aamu kánkumak kati kasonten káju’utak, ¹⁰ aamu kánkumak kati bee ekaan wajamurerutimi, aamu kawulak kati káriiŋenak kurimak, aamu kaŋoolenak kati eregey mati titoorey yati kawulak kanaamutumi manteer koo bati Búyegetab Bátienaab kúpurumulo mba kukaanut mo, aamu kawulak kati kasanken di usanken uceen wálauleriiti, aamu kawulak kati káfasuloorak mati usanken wanaamutumi uceen wálauleriiti. ¹¹ Búyegetab Bátienaab bákonab boo ceb busenemi kawulak uke búrom. Boo ceb busofemi kawul kei an aate eyab. ¹² Eniiley yati anau ebajumi upan wajuupoe bare upanaw wajuupoaaw ukammi eniil yákon ceb, handeneen upan wanaamut ukammi eniiley yákoney. Moo mákonam di eniiley yati Apakenaau Áamakau. ¹³ Moo mákonam di wulaal, manteer Kúyahuud mba Kakaanutumi Kúyahuud, manteer kumiiceel mba kakaanutumi kumiiceel, wulaal búrom nuyabaayab kátiigulenak kákonak di Búyegetab Bátienaab bákonab. Ban Atijamit nasenolaasen Búyegetab Bátienaab boola bákonab di úyegetolaal. ¹⁴ Eniil ebabaj upan wajuupoe bare elet di kapan kákon ceb. ¹⁵ Kákamunak koonjaat, “Mati ínje ikaanut kañen, ínje ikaanut kati eniiley,” moo kaanut man kákamun kúkaanaati kapan kati eniiley. ¹⁶ Kawosak poop koonjaat, “Mati ínje ikaanut jícil, ínje ikaanut jati eniiley,” moo kaanut man jícil jíkaanaati jati eniiley. ¹⁷ Kaaneenjaat eniiley búrom jícil, buu paneŋoolen éyenten? Kaanjaat eniiley búrom kawos káamak kákon, buu paneŋoolen ejam kaputak? ¹⁸ Bare di kammi malegen, Atijamit najuumenjuumen kapanookapan kati eniiley nan man kilumi eeno. ¹⁹ Kaanjaat woo búrom kapan kákon, kama ñaa eniiley bee yommi? ²⁰ Melegen, babaj upanaw wajuupoe, bare eniil yákon ceb. ²¹ Jícilaj leejiŋoolen man joone kañenak, “Au di ínje uwoogutaal,” ban poop fúkaaf leefuŋoolen fureg úkamunaw man foone, “Au di ínje uwoogutaal.” ²² Malegen, upanaw uceen wati yo ukankaan nan úliŋaati ban di úbajaati fúkaw di waawu, bare woo ufaŋe man uceeŋumi. ²³ Ban upanaw ukila wati yo wan usofaami tiiti woo nusenaalemi kacookoor kalegenak. Upanaw ukila wati yo umaŋutaal man bukanak kujikeruwo. ²⁴ Bare upan waawu uceeŋut kacookoorak kábutoaak kukila. Atijamit di fúko’ool akammi upanaw man uwoogoor ukaan eniiley yákon. Upanaw ukila wan usofumi ubajut fúkaw hani jayiinkun, usenisen kálebien di kacookoor kábutoe káamak, ²⁵ takumbi kápajuloorak kubajo di eniiley, bare kapan kati eniiley kanoosani kucenceeŋ kacookoor. ²⁶ Kaanjaat kapan kákon di eniiley kubabaj mátaañie, upanaw woo búrom ulako mátaañie, kaanjaat kapan kákon kúlebieni, woo búrom ulakoemi kamaayoor. ²⁷ Iñeme, muyuul búrom eenomi eniiley yati Apakenaau Áamakau, ban di jikammi anoosani ati eniiley ekila. ²⁸ Atijamit namukemmuken bukanak man kulako di fujuumaf fati fujojaf. Kútiyaarak kúriiŋena, kagabuntenak kuboña, káfeegintenak kuliikitena, ñaa kakaanemi wajamurerutimi, kabajumi kawulak kati kasontenak, kaŋoolenumi karamben, kaŋoolenumi kubaj kurokoor man kurok tákon, kaŋoolenumi kasankenak kati usanken uceen wálauleriiti. ²⁹ Mante buku búromiil kúriiŋena room? Mante buku búromiil kuboña room? Mante buku búromiil kuliikitena room? Mante buku búromiil kukaana wajamurerutimi room? ³⁰ Mante búromiil kubabaj kawulak kati kasontenak room? Mante buku búromiil kubabaj kasankenak kati usanken uceen wálauleriiti room? Mante buku búromiil kurokerok wajamurerutimi room? ³¹ Bare mbi jibaj fuuñ fati emaŋ yáamak yati ebajey kawulak kafaŋe man kubaje fúkaw. Manoosani, panilaañ íyiisuul buruŋ bafaŋe man bujake. afaŋe man bujake.

¹ Iŋoolenjaat isanken, hani usankenaw wati bukan mba wati simaleeka, bare ibajutujaat kamaŋak, ínje nikankaan nan kayel kati balenseŋ ceb mba kayel kati etalaŋ. ² Ibajujaat kaŋoolenak kati bee káriiŋen furimaf fati Atijamit di wánkum, ban ílaulujaat di fumanjaf mati mayofoaam búrom mábileuumi. Ibajujaat kafium káamak káriiŋe man iŋoolen íkabul kúlankiin, bare ibajutujaat kamaŋ, ínje lee waaf. ³ Isenujaat fubajaf fúmboom búrom bee di kaceeŋumi, ban nisen fúko’om man eniilom ereemeni bare ibajutujaat kamaŋ bajut ró hani waaf. ⁴ Kamaŋak koo eenomi kamuuten di ejak. Kamaŋak lee búlat mba ká’aamakalenoor, ⁵ mba kamaŋak lee mapooñ mba máyuo. Kamaŋak kújuumeriit rat wan kumaŋumi ceb. Kamaŋak kúñuumuleriit galab, kúsoferiit waaf di faruko. ⁶ Kamaŋak súumenooreriit di wajakutaw, bare kúsuumenooresuumenoor di malegenam. ⁷ Kamaŋak kúlaañurerut bálamuk, ban di kufium wahaw búrom, di kúgolum wahaw búrom, di kumuuten wahaw búrom. ⁸ Kamaŋak kúbaneriit bee bándoorey. Bare káriiŋenak kati furimaf fati Atijamit pankuwuuj, kasankenak kati usanken uceen wálauleriiti koo pankuwuuj, fumanj poop foo panfuwuuj. ⁹ Mati fumanjaf foololaal di káriiŋenak kati furimaf fati Atijamit doo búrom líroorut. ¹⁰ Bare nampi wálirooraaw ubilumi, wáliroorutaw panujaw wuuj. ¹¹ Nan ínje ikammi añiil, nisankenesanken nan añiil, niwoonoorewoonoor nan añiil. Nan inifaanomi, nikatumi fañiilaetaf. ¹² Iñeme, malegen ejukey yoololaal ekankaan nan di éjuudooruma yárime, bare panujukooroaal tíen nampi ujuudooraami. Iñeme wan imanjumi woo kapan, ban pámbiuliroor búrom fáculey, nan man Atijamit amanjammi eeno iñeme. ¹³ Waaf úfeegiir woo urinom: kafiumak, kágolumak di kamaŋak. Bare wafaŋumi man úkalaae búrom wo

¹ Jiraagal bee ebaj kawulak kati kamaŋak, ban di jimaŋ poop ebaj kawul kápurumulomi di Búyegetab Bátienaab bati Atijamit, ban di jifaŋ man jimaŋe ebaj kawulak kati káriiŋenak kati furimaf fati Atijamit. ² Mati an abajumi kawulak kati kaŋoolenak man asanken kasanken kuceen kálauleriiti, panasanken bee di Atijamit lee bee di bukan. Mati leebikuŋoolen kúlaulool, bare panasanken malegenam mayofoaam mati Atijamit kápurumul di kánkumak kati Búyegetab Bátienaab. ³ Bare ampi áriiŋenumi bukaaku furimaf fati Atijamit pánarambeniil, pánaliŋeniil, ban nañab úsusiil. ⁴ Ampi asankenemi kasanken kuceen kálauleriiti náliŋenooroliŋenooro di Akiiyaau, bare áriiŋenemi furimaf fati Atijamit man aramben kati fujojaf búrom. ⁵ Iñeme ínje nimammaŋ man muyuul búrom jisanken usanken uceen wálauleriiti, bare wan ifaŋuumi man imaŋe woo eenomi man jiŋoolen jíriiŋen furimaf fati Atijamit. Ampi asankenumi furimaf fajakaaf fati Atijamit oo nafaŋe asankemmi usanken uceen wálauleriiti, leejaat aceen aate káfasul wasankenimi mambi kati fujojaf búrom kubaj karamben. ⁶ Kutiom, iñeme ijawulojaat isankenuul di usanken uceen wálauleriiti, waa urambene muyuul? Hani jayiinkun, leejaat níjeetumulojeetum kamanjen kaaku kan Atijamit áyiisenammi, mba fumanj faafu fábutoe, mba káriiŋen kaaku kati furim faafu, mba kaliikiten kaaku. ⁷ Handeneen múboomuma mabajutumi suut, nan fuyila mba suusa, soo búrom sikankaan nan kayel kákon, buu panjimanj yei eyele? ⁸ Kayelak kati kábiilak kúpajuloutujaat ai aate kajonjoor bee ejaay futiik. ⁹ Moo mákonam di muyuul. Jisankenjaat kasankenak kuceen kálauleriiti, buu pankukaan man kúlaul wan umaŋumi kasanken eeno? Mati muyuul kasanken fahaalut. ¹⁰ Numanjaamanj mati usanken unaamut wajuupoe ubajoe di dúniyaay, ban kasankenookasanken kubabaj wan kúbatule. ¹¹ Bare ílaulutujaat wan kasankenak kúbatulumi, ínje panikaan ajaaburuŋ bee di kusankenaak kati kasankenak kukila, buku pankukaan kujaaburuŋ bee di ínje. ¹² Moo mákonam bee di muyuul. Nan man jimaŋumi bee ebaj kawulak kan Búyegetab Bátienaab buwulumi, kama jiraagal man jiyab kawulak kafaŋumi man kurambene kati fujojaf fati kuriibaak kati Yensa. ¹³ Moo manoosani, anoosani asankenumi di usanken uceen wálauleriiti aate elaw poop mambi aŋoolene ábatul wasankenimi. ¹⁴ Mati nampi ilawumi di usanken uceen wálauleriiti, Búyegetab Bátienaab bulawumi di ínje, bare ríiŋut di búyegetom wan emmi di elawey. ¹⁵ Waa neete ekaan? Niceen ínje neete elaw riiboor di Búyegetab Bátienaab bulawumi di ínje di poop niceen ínje neete elaw di búyegetom. Niceen ínje neete écim riiboor di Búyegetab Bátienaab búcimumi di ínje di poop niceen ínje neete écim di búyegetom. ¹⁶ Mati usalujaat Atijamit riiboor di wan Búyegetab Bátienaab busalumi di au ceb, kalakomi kunaamoor di fujojaf kálaulutumi wan usankenumi, buu pankuŋoolen kureg “Amen” bee di elawey yooli yati esaley Atijamit? ¹⁷ Malegen elawey yooli yati esaley Atijamit timaa jajak máamak, bare kupaali úliŋenut úyegetaw wati kupaaliil. ¹⁸ Ínje nisasal Atijamit mati ínje nifaŋ man isankene usanken uceen wálauleriiti muyuul búrom. ¹⁹ Bare di fujojaf foololaal, mbi isanken kasanken kurim kooni futok kampi bukanak kúlaul koo kúkoyumaam kasanken kurim kooni síwili uñen kati kasanken di usanken uceen wálauleriiti wan bukanak kuŋoolenut kúlaul. ²⁰ Kutiom, jibeten síwoonooras sati fañiilaetaaf. Mbi jikaan nan muñiil kapanak kati majakutam bare jibaj síwoonooras sooluul sati kunifaan. ²¹ Atijamit di furimaf foola, nammi, “Kápurumul di bukan kabajumi kawulak kati usanken uceen wálauleriiti, panisanken bee di bukanak kúmboom, panisanken kápurumul di kúredimpak kati kujaaburuŋak. Handeneen moo bukanak kúmboom léekuyentenom.” ²² Kama, kawulak kati kasanken usanken uceen wálauleriiti woo ukankaan fúmanjum bee di káyinenutumi, bare káriiŋenak kati furimaf fati Atijamit koo fúmanjum bee di káyinenumi, lee bee di káyinenutumi. ²³ Moo kaane, kaanjaat kati fujojaf búrom kujojumi tákon man koom di kusanken di usanken uceen wálauleriiti, ban bukaaku kammi téeŋey yati fujojaf mba káyinenutumi di kunokenumi, mante leekureg muyuul jigonogono? ²⁴ Bare muyuul búrom jíriiŋenemi furimaf fati Atijamit nan aceen nampi káyinenumi mba kammi téeŋey yati fujojaf di kunokenumi, pankujamufo ban di kúlaul koo kukaana majakut. Ban kugameni kápurumul di wan jíriiŋenumi. ²⁵ Ñaa wayofumi di úyegetiil panuraji ban panalo kúfima man kumiiceelaet Atijamit, man kureg mati Atijamit malegen oomu di muyuul. ²⁶ Kutiom, fúwuŋenaf foofe di wan isankenumi taate. Nampi jijojumi tákon man jikaan kamiiceelaet Atijamit, ákon pánacim, aamu panaliikiten, aamu panareg kamanjenak kápurumul di Atijamit, aamu panasanken di kasanken kuceen kálauleriiti, mba aamu panaŋoolen ábatul ko. Wanoosani woote ekaani, warambene kati fujojaf. ²⁷ Kaanjaat ákon di muyuul asanken di kasanken kuceen kálauleriiti, bukan kugaba mba kúfeegiir ceb koote kasanken eeno, ákon asankenujaat aban, aamu naŋar, ban mbi baj ampi ábatul. ²⁸ Bare kaanjaat bajut ábatula, kukila anoosani aate katunten ban nasankenooro kasanken bee di fúko’ool, mba bee di Atijamit. ²⁹ Jikat man bukan kugaba mba kúfeegiir kuyabujaat furimaf fati Atijamit koote káyiisen, ban jikat karinomi di kúyenten mansi kúmeelo wasankenimi. ³⁰ Bare kaanjaat ákon ammi balakoe di fujojaf ayabujaat furimaf fati Atijamit, aamu alakomi kasanken aate katunten. ³¹ Di buruŋab ube, anoosani ákon-akon panaŋoolen áriiŋen furimaf fati Atijamit, mambi anoosani ayab kájaatiken ban náliŋeni. ³² Áriiŋena áriiŋenumi furimaf fati Atijamit oo aate emaŋ kasofooro kawulak koola. ³³ Mati Atijamit eenomi lee Atijamit ati kájiisoorak bare ati kásuumaay ceb. Nan man eenomi di kujojak kaaku búrom kati bukanak kati Atijamit, ³⁴ kunaaraak koote katunten di kujojak. Mati kusenutiil buruŋ bati kasanken, bare di kusen kúkoiil nan man sílingaas sati Kúyahuudak siregumi eeno. ³⁵ Kaanjaat babaj waaf wan kumaŋumi bee emanjuwo, mbi kuceeŋ kutaiil di sísindoiil. Puñenipuñen man anaare ajuum di fujojaf man asanken. ³⁶ Waa! Mante furimaf fati Atijamit di muyuul fúcitummi? Mba muyuul cebuul fúriiŋumi? ³⁷ Kaanjaat ampi asofooromi mati akila aboña, mba nababaj kawulak kan Búyegetab Bátienaab buwulumi, oo aate emanj mati wan iciikeñaa woo kápurumul kájaatikenak kati Akiiyaau. ³⁸ Kaanjaat ampi alatumi ban namoos wan iciikeñaa, wan aregumi woo panumoosi. ³⁹ Kutiom, moo kaane, jimaŋ máamak man jíriiŋen furimaf fati Atijamit. Takum jífiren an asankenumi di usanken uceen wálauleriiti. ⁴⁰ Bare tíenuul, mati jikaan wanoosani wakaani nan man ceeŋumi eeno ban di riiboor.

¹ Kutiom, ínje eete kawoolenuul mati furimaf fajakaaf fan íriiŋeneenuumi. Furimaf fajakaaf fan jiyabumi, ban jijummi di fo líŋ. ² Ñátum di fo jipakenipaken, kaanjaat jisosof fo líŋ. Bare leemojaat, kafiumak kooluul koo lee waaf. ³ Nireguureg waaf wafaŋe ebaj fúkaw di poop wan iyabumi, woo eenomi Apakenaau Áamakau nácetuncetum mati majakutolaal, nan man furimaf fati Atijamit furegumi eeno. ⁴ Di kufokoomi, ban di funakaf fúfeegintenaf nayitoulomi di kacetumi nan man furimaf fati Atijamit furegumi eeno. ⁵ Apakenaau Áamakau narajuloraj bee di Peter, ban bee di kúriiŋenaak uñeney di kugabaak. ⁶ Mo’omu múpurutomi, narajulomi áyiisenumi fúko’ool bee di bukan kawuuje siceme futok di nanan nákonan, ban kajuupoe bukooku bo kuroŋe bee jaat, handeneen bukaaku kucecet. ⁷ Ñaa áyiisenooromi bee di Yankuba, púrutomi náyiisenooro bee di kúriiŋenaak búromiil. ⁸ Di múlamukaam, narajulomi di ínje poop. Handeneen ínje nikankaan nan an aroŋimi báriiŋut. ⁹ Mati ínje ifaŋumi man itiitie di kúriiŋenaak búrom. Malegen ínje iyajut man kuwonkom áriiŋena ati Yensa, ujikerujaat man ísuutukeneenumi kuriiba kati fujojaf fati Atijamit. ¹⁰ Bare ñátum di majakam mati Atijamit ínje eenomi ínje, majakam moola bee di ínje mukaanut ñaañaaña. Moo manoosani ínje nifaŋ man iroke kúriiŋena karinomi, handeneen kaanut ínje bare Atijamit alakomi burok kápurumul di ínje ñátum di majakam moola. ¹¹ Moo lee waaf manteer ínje íriiŋenumi furimaf fati Atijamit mba manteer bukoo! Ufe foo núriiŋenemi, foo jifiummi. ¹² Iñeme úriiŋenaajaat mati Atijamit nayitenuloyiten Apakenaau Áamakau di kacetumi, buu kaane kuceen di muyuul koone káyitoulak di kacetumi kubajout? ¹³ Kaanjaat, káyitoulak di kacetumi kubajout, kama Apakenaau Áamakau áyitenulouti di kacetumi? ¹⁴ Kaanjaat Apakenaau Áamakau áyitenulouti di kacetumi, káriiŋenak koololaal furimaf fati Atijamit kukankaan ñaañaaña di poop kafiumak kooluul koo poop ñaañaaña. ¹⁵ Wúli kúriiŋenaak kalepoor nurege mati núyiisenyiisen mati Atijamit, man uregumi mati Atijamit áyitenulomi Apakenaau Áamakau di kacetumi. Bare moo lee kaan malegen, kaanjaat káyitoulak di kacetumi kubajout. ¹⁶ Kaanjaat káyitoulak di kacetumi kubajout, ñaa Apakenaau Áamakau ayitenulouti. ¹⁷ Kaanjaat Apakenaau Áamakau ayitenulouti di kacetumi, ñaa kafiumak kooluul lee waaf, ban muyuul bee mo jaat bukooku di majakutuul. ¹⁸ Moo emmi poop kacetumi búrom di káyinenak di Apakenaau Áamakau, koo bukan kájime jáng. ¹⁹ Kaanjaat fúgolumaf foololaal di Apakenaau Áamakau di dúniyaay uye ceb fure’e, moo wulaal ufaŋaami man ukaanaale bukan kábotenie di bukanak búrom kati dúniyaay. ²⁰ Bare tan fugaajoor fuletumi, Atijamit nayitenuloyiten Apakenaau Áamakau di kacetumi, mo’omu mukankaan nan fúmanjum nakaanolaal man tíen mati kúyinena di kacetumi kaatumi káyitenuliak bee di eroŋey inki. ²¹ Nan man jijukuñaa eeno, ecetey man éjawumulo di ákon, Adama, iñeme moo poop káyitoulak di kacetumi kújawumulomi di aamu, Apakenaau Áamakau. ²² Di Adama anoosani panacet, moo mákonam di Apakenaau Áamakau anoosani panaroŋ eroŋ yunkul. ²³ Bare aamaama di nanan noola, Apakenaau Áamakau oo Atijamit amondumi áyitenulool, nampi Apakenaau Áamakau alaañulomi, bukanool búrom pánkuyitenuli. ²⁴ Banjaat ebaney yati dúniyaay di ebil. Apakenaau Áamakau panakajen furungaf fanoofani, di fujuumaf fanoofani, di kánkumak kanookani, ban nalaañen jáyiaj bee di Atijamit Ampaau. ²⁵ Mati Apakenaau Áamakau aate erung bee nampi Atijamit aŋoolenumi kulatooraak ban naneniimi búrom di akammi kulatooraak fútobojumaaf fati úkamunool. ²⁶ Alatooraau álamukau an aatumi kakajeniak oo eenomi ecetey. ²⁷ Mati furimaf fati Atijamit foone, “Atijamit akammi waafaw búrom di fútobojumaaf fati úkamunool.” Malegen nan fommi, “Waafaw búrom di fútobojumaaf fati úkamunool,” di furimaf ufe mufelumi mati Atijamit di fúko’ool alee dó mati akila akammi wanoosani di fútobojumaaf fati Apakenaau Áamakau. ²⁸ Nan waafaw búrom ukaanimi di fútobojumaaf fati úkamunool, kama, Atijamit Añoolool di fúko’ool, panasenooro bee di Ampaool Atijamit akammi waafaw búrom di fútobojumaaf fati úkamunool, mambi Atijamit akaan afaŋ man ateboe wanoosani banoosani búrom. ²⁹ Leejaat, kátiigulak bee mati kacetumi bee waa? Kaanjaat kacetumi léekuyitenuli inki jáng, wau kaane bukanak di kukammo? ³⁰ Wau kaane nurulenaal enen to síñunduolaal funakoofunak? ³¹ Kutiom, ínje oomu di ecetey funakoofunak. Nibabaatumo ñátum di wan itebenumi sileekas súmboom di muyuul, mati di Apakenaau Áamakau Akiiyaolaal. ³² Kaanjaat kawoonoorak kúmboom nan an, waa neete ebaj nan itiikenumi sínukuruŋ sati karamba sákoolenie sammi di Efes? Kaanjaat kacetumi léekuyitenuli, nan man kupiimi di ereg mo’omu, “Jiriaal súum nuraanaal ŋooŋ, mati kajom panucetaal.” ³³ Takum jimaŋ man an abuntuul. Kajawoorak di bukan kajakut pankurunguul man jikaan wajakut. ³⁴ Jitoten úyegetuul, man jikat ekaaney majakut. Joote kapuñeni mati bukaaku di muyuul hani bee iñeme kumanjut Atijamit. ³⁵ Bare aceen panaceeŋ, “Buu kacetumi koote kayito eeno? Siniilas sooliil buu soote kanokoor?” ³⁶ Au aluuliñaa! Ulukujaat élut di kalaak, létecumbul leejaat emond ecet. ³⁷ Ban wan ulukumi élut lee futikoon, bare élut ceb, élut yati busereŋ mba sílut siceen. ³⁸ Bare Atijamit akammi élut ebaj futikoon nan man amaŋumi eeno, élut yanoosani ebabaj fumuumuyo. ³⁹ Kumuumak búrom lee kákon, faafu bukan, faafu sínukuruŋ, di faafu siwol búrom kunaamut. ⁴⁰ Babaj poop fumuum fammi fatiya di fumuum fammi tentaam. Majakam mati fumuum fammi fatiya di fumuum fammi tentaam munaamut. ⁴¹ Bala’ab boonout nan jileeŋ, ban jileeŋ joonout nan bootab, mati bootab bubabaj majakam moolibo, handeneen majakam munaamut titoorey yati bootab búrom. ⁴² Moo mákonam pammubajo nampi kacetumi kúyitenuli bee di eroŋey. Nampi bíiŋab bufokimi, boo bucecet, nampi bíiŋab búyitenulimi pamburoŋ bee bándoorey. ⁴³ Nampi bíiŋab bufokimi, bukankaan wákojie di wálaamoe, bare nampi búyitenulimi eniil yajooŋoore ban di éliŋ. ⁴⁴ Nan bíiŋ bufokimi, boo eniil. Nan búyitenulimi, eniil yoo yápurulomi Búyegetab Bátienaab. Nan man bajumi eniil yati an, moo mákonam, bajumi eniil yápurumulomi di Búyegetab Bátienaab. ⁴⁵ Mati ciikiciik mo’omu, “Anau átiyaarau, Adama nabilumi akaan abajumi fuyiif.” Bare Adama álamukaau nabilumi akaan Búyegetab Bátienaab man asen fuyiif bee di wanoosani man uroŋ. ⁴⁶ Malegen wamondumi ubil woo eenomi eniiley yati anau, mbi kiti eniiley yápurumulomi di Búyegetab Bátienaab bati Atijamit. ⁴⁷ Anau átiyaarau atuukimi ñátum di bukap, dúniyaay uye nápurulo. Aamu agabuntenau oo bukinab bajakaab nápurumulo. ⁴⁸ Anoosani ammi di dúniyaay nababaj eniil nan eniiley yati anau atuukimi ñátum di bukap. Anoosani ammi di bukinab bajakaab nababaj eniil nan eniiley yati anau ápurumul di bukinab bajakaab. ⁴⁹ Nan man wulaal uwoliaami di búyesoorab bati anau atuukimi ñátum di bukap, ootaale eŋar ugaloaal poop búyesoorab bati anau ápurulomi di bukinab bajakaab. ⁵⁰ Kutiom, ínje eem di ereguul tíen, mati eniil di fúsim leesiŋoolen sinaamoor di jáyiaj jati Atijamit. síyabul bulaañab bati bukinab bajakaab, ban wakañoemi letuŋoolen wooken wákañoeriitumi. ⁵¹ Jíyeten! Ínje eem di ereguul malegenam mayofoaam ume man Atijamit arajenumi bee di wulaal. Wulaal búrom ootutaal ecet, bare búromolaal siniilolaal pansiwuloor. ⁵² pankaan nan kamoyenak di kajikerak, nampi kábiilak kúlamukaak kulitumi. Kábiilak pankulit, nampi kuriibaak kacetumi kúyitenulimi ban leekuceturer inki, ban wulaal búrom núbookulooraal. ⁵³ Siniilas soololaal saatumi ecet ban di siput pánsibookuloori bee di siniilas saatut ecet mba saatut eput. ⁵⁴ Ban nampi mo’omu mubajomi, siniilolaal saatumi ecet ban di siput pánsibookuloori bee di siniilas saatut ecet mba saatut eput, furimaf fati Atijamit panfukaan malegen: “Ecetey ekajenikajen, kaŋoolenak kúlirooliroor.” ⁵⁵ “Wáay ecetey, kaŋoolenak kooli kookei? Wáay ecetey, kánkumak kati katafak kooli kookei?” ⁵⁶ Ecetey ebabaj kánkumak kati katafak kooliyo kápurumul di majakut, ban majakut mubabaj kánkumak koolimo kápurumul di sílingaas. ⁵⁷ Bare usalaal Atijamit man asenemi kaŋoolenak kápurumul Akiiyaolaal Yensa Apakenaau Áamakau. ⁵⁸ Kutiom kan imaŋumi, jijuum líŋ bare takum jigoroor. Jirulen di burokab bati Akiiyaau. Mati jimammanj wanoosani wan jikaane mati oo woo ubabaj fúkaw.

¹ Iñeme mati kúceeŋak kan jiciikumi di letaraay nimammaŋ kasanken bee mati baleebab man jiramben bukanak kati Atijamit kammi Yúdea. Muyuul joote ekaan nan man íjaatikenumi bee di kuriibaak kati kujojak kammi Galatia man kukaan eeno. ² Fula’a fútiyaaraf fati funoomoofunoom, anoosani aate kápuren sígodi anen kapan kaaku di wan abajemi di burokab boola man asen kawulak uke. Takum akob bee nampi íriiŋulomi mbi kiti joone bee kajojen baleeb síñakon. ³ Nampi íriiŋumi, paniciik siletara sati káyiisenak bee mati kuriiba kan jimukeniimi jiseniil fujuumaf fati kájeetumak baleebab bati sígodaas bee di Yerusalem. ⁴ Kaanjaat jajak di muyuul man ijaw di kukila, kama panujawoor síñakon. ⁵ Panibil ijukuul nampi ípurumulomi kapanak kati Makedonia, mati nisosof bee kájawum kapanak kati Makedonia. ⁶ Ban timaa panilako di muyuul mba ŋooleŋŋoolen man ilako hani di nanan nati ñonkañ, banjaat jiŋoolen jiboñom mambi jirambenom man irulen di ejaay ban eetumi. ⁷ Ínje imaŋut bee ejukuul iñeme nan emmi di ewuujey. Nimammaŋ panilaañ man ilako di muyuul piyo, súumujaat di Atijamit. ⁸ Bare panilako taate di ésukey yati Efes bee nampi karuukenak kati káaningak kati Pentekosut kúriiŋumi. ⁹ Mati babaj buruŋ báamak búwambulowambulo bee mati burok bákalaae ban di bubaj fúkaw, handeneen nibabaj kulatoora kajuupoe. ¹⁰ Nampi Timoti áriiŋuluumi, mbi jiwalenool jak takumbi baj waje’e bee kagaalenool. Oo oomu bo burokab bati Akiiyaau, nan ínje. ¹¹ Moo kammi takum jimaŋ man an aheelenool. Bare jiyiirenool di kásuumaay man aŋoolen áriiŋulom baabe. Oo neem di ekobey di kuriiboorool kutiolaal bukaaku. ¹² Mati atiolaal Apolo, nilawoolaw máamak manteer mbi ajaw bujukoor di muyuul di kuriiba kutiolaal bukaaku, bare lee emaŋey yoola man ajawubo iñeme. Panabil nampi abajenumi. ¹³ Jíkaanum, ban jijuum líŋ di wan jifiummi. Jipeeto ban di jíliŋ. ¹⁴ Wanoosani wan jikaanemi, di jikaanuwo ñátum di kamaŋak. ¹⁵ Kutiom, jimammanj mati Sitefan di bukanak kati bajamab boola koo kubilumi kukaan kuriibaak kútiyaarak di kapanak kati Akaia, koo di kúkoiil wan kuŋoolenumi kukaan burokab bee mati bukanak kati Atijamit. ¹⁶ Nilawuulaw máamak mbi jisen kúkouul bee di kurunga kaanomi nan kukila ban di jikaan mákonam bee di karokemi máamak di muyuul. ¹⁷ Sitefan, Forotunato di Akaiko, ebiley yooliil efintenanfinten búyegetom. Mati koo kuŋaŋŋar fujuumaf fooluul bee karambenom. ¹⁸ Kukaanankaan súumom nan man kukaanuumi eeno. Bukanak kaanomi mo’omu muyuul joote kálebien. ¹⁹ Kuriibaak kati kujojak baabe di kapanak kati Asia kooku di esaafuul. Akula di Pirisika, di poop kuriibaak kati fujojaf fammi sísindoiil, buke búrom kooku di esaafuul máamak di Akiiyaau anaamoorolaal. ²⁰ Kutiolaal kuriibaak búrom kúsaafuluul. Jisaafoor kasaafoor kásuume ñaj. ²¹ Ínje Paul eem di eciik kasaafak uke ñátum di kañenak kúmboom. ²² Kaanjaat an abajut kamaŋ bee di Akiiyaau, an akila anumi. Akiiyaolaal, mbi ubil! ²³ Emitey ekaan majakam mati Akiiyaau Yensa móomi di muyuul. ²⁴ Kamaŋak kúmboom mbi kulako di muyuul búrom di Apakenaau Áamakau Yensa. Amen.