TITO

TITO

¹ Ni mimi P’aulo, muhendikazi wa Mulungu, na muhumwa wa widimi wa Jeso K’irisito. Mimi nátsagulwa na nichihumwa ni Mulungu kwa niahende at’ue oatsagula yiye mwenye amukuluphire, na niafunze amanye ujeri ulongozao at’u kumwabudu Mulungu, na kumogopha kwa njira ya haki. ² Ujeri uo unaahenda at’u osi akuluphirao, alolere na kanuni kuupata uzima uphya wa kare na kare, urio Mulungu yets’egomba ulongo, wáhulaga phokala urumwengu ta k’audzangwe kuumbwa. ³ Na ukati okala udziupanga uriphofika, achiung’aza lwazu-lwazu kwenye nenore. Ndo mimi náhewa neno riro nirisumurire kutuwirizana na lagizo ra Mulungu, ariye ni Mutivyi wehu. ⁴ Ninakwandikira uwe Tito, mwanangu wa chiroho, hurio hosi hunamukuluphira Mulungu. Baba Mulungu na K’irisito Jeso Mutivyi wehu naakuhats’e, na akuhende usagale na reri yao. ⁵ Tito, uwe nákuricha chisiwa cha Kirete, kwa ta ugamarigize garat’u maneno gokala k’agadzangwe kusira, na wachize vilongozi a makanisa, kwenye chila kanisa ra mudzi, kutuwirizana na gaga malagizo gangu gokup’a. ⁶ Mimi nákwamba, chilongozi wa kanisa unahenzwa akale ni mut’u yets’e ila, mwenye muche mumwenga tu, anae anahenzwa akale ni ajeso, na akale anamanyikana kukala, ts’i ai, hebu ots’o lau. ⁷ Chilongozi wa kanisa ni mwimirizi wa kazi ya Mulungu, na ndiyo maana, unahenzwa akale ni mut’u yets’e ila. Unahenzwa ats’ikale mut’u wa chimvute, wa kutsukirwa maruru, munwadzi, wa rabusha, hebu wa chipherephere na p’esa. ⁸ Kurichisa hivyo, unahenzwa akale mut’u wa karibu, ahenzaye maneno madzo, murumwengu, mut’u aahenderaye anzie ga haki, mutakatifu, na ariye unaidima kuzuliya t’amaaze na mahendoge. ⁹ Na chisha, ni seti aenderere kukuluphira jeri udzumbe wa kukuluphirika ofunzwa. Chilongozi wa kanisa achikala u vivyo, ndipho undaidima kwaaviza at’u atuwe mafunzo ga jeri, na ang’aze makosa ga arat’u aremao kutuwa go mafunzo. ¹⁰ Mimi nidzamba vivyo maana, kuko Kirete kuna at’u anji apingao kutuwa mafunzo ga jeri, at’u aayazao at’u anjine kwa kwafunza maneno gots’o tende, na alembi Anji a at’u ao, ni arat’u ahenzao ajeso osi atuwe shariya za Ayahudi, na kamwe shariya ya kubit’wats’i. ¹¹ Dza mutumia wa kanisa, unahenzwa achiamanya at’u dza ao, aakomese kwakukala, anaabananga at’u osi kwa kufunza maneno garigo k’aahenzwa afunze. Ao anafunza maneno gago kulemba at’u tu kwa apate p’esa. ¹² Ta mumwenga wa at’u ao yekala achisema chimbere maneno, wáamba, "Akirete agomba ulongo ts’iku zosi, anga dza nyama ai, alaphe na akaha!" ¹³ Ndo yiye wágomba ujeri, na kwa vivyo, achemere muno o a Akirete atuwao mafunzo ga ulongo, kwa ta akuluphire mafunzo ga jeri dzulu ya Jeso. ¹⁴ Ela naats’enderere kugwiririra ngano zotungwa ni alimu a Chiyahudi, na malagizo ga chidamu galaago kwa at’u orema ujeri. ¹⁵ Chila chit’u ni chidzo kwa at’u ario myoyo yao ni midzo. Ela k’akuna chiricho chidzo kwa at’u ario ts’i adzo, na ots’okuluphira, kwakukala, akili zao na myoyo yao yábanangwa. ¹⁶ At’u dza ao nikudzidai akaamba anamumanya Mulungu, ela go mahendo gao mai ahendago ganaonyesa kukala, k’aamukubali Mulungu. Ao k’aahenzwa ni at’u, k’aana lau, na gao ahendago bee ni mai maphuphu.

¹ Ela uwe Tito, a-aambire akuluphiri maneno garigo ganagwa sawa na mafunzo ga jeri dzulu ya kumukuluphira Jeso K’irisito. ² Ndo a-aambire atumia akale na chihezo, akale at’u na ishima zao, akale arumwengu, akale na kuluphiro ra kudina, menzwa ya jeri, na avumiriri jeri. ³ Achet’u akomu nao, a-aambire asagale mazagazi garigo gandamuhamira Mulungu, ats’itsune, hebu ats’ikale anwadzi. Ao anahenzwa asagale mazagazi ga vivyo, kwa ta akale chelelezo cha kwafunza anjine kuhenda maneno madzo. ⁴ Na achihenda vivyo, andaabaza achet’u mvuka kwahenza alume ao, na ana ao, ⁵ aahende akale arumwengu, atakatifu, atsunzet’o maneno gao ga madzumbani, akale at’u adzo, na adziike ts’ini za alume ao, kwa ta neno ra Mulungu rits’idze rikaphurywa. ⁶ Atana nao, a-aambire vivyo aidime kudzidinisa kwa ta ats’ihende dambi. ⁷ Uwe mwenye unahenzwa uhende maneno madzo kwa ta ukale chelelezo. Mafunzogo ganahenzwa gagwe sawa na go uhendago, ukale mut’u na ishimazo, ⁸ na funza mafunzo ga jeri ukati wosi, kwa ta uts’ilamulwe ni mut’u yeyosi kukala una makosa, na phapho adawao andagwirwa ni haya, maana, andakala k’aana ra kuhuhadzira. ⁹ A-aambire agulwa ahumiki kukala, adziike ts’ini za abomu ao ukati wosi, aahamye, ats’ihenderane k’ani nao, ¹⁰ na ats’iaiyire vit’u vyao. Kurichisa vivyo, niaaonyese abomu ao kukala, ni at’u adzo, na ni at’u a kukuluphirika ts’iku zosi. Na at’u achona uo mwendo wao udzo, andahamirwa ni mafunzo ga Mulungu, Mutivyi wehu. ¹¹ Uwe afunze ajeso akale na mwendo udzo, maana, Mulungu wáafunulira at’u osi mbazize, kwa kwap’a njira ya kupatira wokofu. ¹² Zizo mbazi za Mulungu zinahufunza huriche njira mbii za at’u ots’ohenza Mulungu, na njira mbii za at’u ahamirwao ni ga chidunia. Na zinahufunza kusagala mazagazi ga kudzidinisa huts’ihende dambi phapha duniani, garigo ga sawa mbere za Mulungu, na gamuhamirago. ¹³ Na gaga nihwenderereni kugahenda, vivi huloleravyo kupata manoso ga kwangalaza o ukati wa kuuya Jeso K’irisito ariye ni Mulungu wehu mubomu, na Mutivyi. ¹⁴ Yiye wádzilavya mwenye achifa kwa dzulu yehu, kwa ta ahukombole huriche mai gosi, na phapho achihutakasa kwa hukale at’ue kamare, at’u ario ana chadi cha kuhenza kuhenda madzo ts’iku zosi. ¹⁵ Ndo maneno gago ndigo uhenzwago ugafunze at’u. Humira widimio wosi kwatiya moyo at’u agatuwe maneno gago, na kwagombera ots’ogatuwa. Na uts’ikubali kuphurywa ni mut’u yeyosi.

¹ Tito, akumbikize akuluphiri kuko kukala, adziike ts’ini za atawali, na vilongozi, aaogophe, na akale kwete kuhenda maneno madzo gosi. ² Ao a-aambire kukala, ats’itsune mut’u yeyosi, asagale na reri na at’u, na aaonere mbazi, na akale arumwengu na ap’ore kwa chila mut’u. ³ Ao a-aambire ahende vivyo, maana, ta siswi hosini phokala k’ahudzangwe kukuluphira, hwákala k’ahuzimanya njira za Mulungu, hwákala k’ahumogopha Mulungu, at’u áhulemba huchihenda mai, na hwákala hu agulwa ahumiki a t’amaa mbii zosi, na mahendo makolo gosi. Siswi hwásagala mazagazi mai, na hwákala huna chidzitso. At’u áhumena, naswi huchimenana. ⁴ Ela ta vivyo, Mulungu ariye ndiye Mutivyi wehu wákala unahuhenza. Ndo yiye wáhufunulira mbazize na menzwaye, na phapho achihutivya. ⁵ Na Mulungu ts’i kwamba wáhutivya kwa phanjine hwákala hudzihenda neno idzo, ela wáhutivya kwa mbazize tu. Yiye wáhutakasa o ukati huriphovyalwa luphya, na achihup’a uzima uphya kuchirira Rohowe. ⁶ Na Mulungu wáhutserezera Rohowe na moyo umwenga kwa gohendwa ni Jeso K’irisito Mutivyi wehu. ⁷ Ndo Mulungu wáhuphokera dza enye haki kwa mbazize mwenye, na vivi huna kanuni kukala, hundapata uzima uphya wa kare na kare. ⁸ Tito, maneno gaga godzokwambira bee, ni ga jeri kamare, na ninakuhenza ugadinire kugafunza kwa ta o amukuluphirao Mulungu, adzilavye kwenderera kuhenda madzo. Maneno gago ni madzo, na ganda-aaviza at’u osi. ⁹ Ela uwe uts’igwirikane na at’u ahenzao kuuza maswali gots’o ganjira, at’u atarao-tarao k’olo zao nyire, at’u a k’ani, na ahehao kwa dzulu ya Shariya ya Musa yifunzavyo. Maana, maneno gago k’agana tende, na k’aga-aaviza at’u. ¹⁰ Mut’u achifunza mafunzo ga ulongo gatsamulago at’u, mukanye. Achitiya phiri mukanye vivyo. Ela uchimona unaenderera, h’aya mutenge. ¹¹ Uwe unamanya kukala, mut’u wa vivyo k’afunza at’u maneno ga jeri, na una dambi. Na zo dambize ndizo zimulamulazo kukala, una makosa. ¹² Mimi nikwenda nikamuhuma Aritema, hebu Tukiko, adze kuko. Ndo ye mut’u yendemuhuma achifika kuko, henda widimavyo udze mudzi wa Nikopoli udze unone. Maana, mimi nidzilamula kusagala kuko uu ukati wa p’eho. ¹³ Wakili Zena na Apolo andakala na charo. Ndo uwe henda widimavyo waavize, na wone kukala, ana chila chit’u aricho anacho haja. ¹⁴ Afunze akuluphiri kuko adzibaze kudzilavya kwenderera kuhenda madzo. Achihenda vivyo, andaaviza kwap’a anziao go arigo anago haja ga halahala, na phapho ao andakala ana lengo ra tende. ¹⁵ Akuluphiri osi ario phamwenga nami kuku, anakulamusa. Na uwe nawe hulamusire ajeso anziehu hwahenzao. Mulungu naamuhats’e mosi.