AFILIPI

AFILIPI

¹ Ni mimi P’aulo na T’imoti, ahendikazi a Jeso K’irisito. Ninamwandikira baruwa mwimwi ajeso mosi a Filipi, murio munamulola Jeso K’irisito tu mwenu mazagazini, phamwenga na vilongozi enu, na atumia enu a makanisa. ² Abayehu Mulungu na Bwana Jeso K’irisito naamuhats’e, na amuhende musagale na reri yao. ³ - ⁴ Enehu a chijeso, mimi chila nimuvoyerapho mosi, ninavoya na raha, na ninamulavira mumvera Mulungu wangu chila nimwazapho, ⁵ kwa vyodzonaaviza yiyi kazi ya kusumurira Nguma Mbidzo kulaira yiyat’u ts’iku ya kwanza muriphokuluphira ta rero. ⁶ Na chisha, ninamulavira mumvera Mulungu wangu kwakukala, wáanza kuhenda kazi mbidzo mwenu ndani, na nina kanuni kukala, undaenderera kumwaviza ta ayimale kazi yiyo, ts’iku yiyat’u yiriyo Jeso K’irisito undauya. ⁷ Mimi nina haki ya kwamba vivyo dzulu yenu mwimwi mosi kwakukala, ninamuhenza muno ta k’amulaa mwangu moyoni! Mimi na mwimwi Mulungu ukala naswi mo mwehu kusumurirani Nguma Mbidzo, hangu phokala ts’idzangwe kufungwa ninahehera Nguma Mbidzo na kung’aza kukala ni ya jeri, na unahuhats’a ta vivi nirivyo chifungoni. ⁸ Mimi ninatamani muno nimone mosi, kwa vyo nimuhenzavyo bee vinga dza vyo muhenzwavyo ni Jeso K’irisito, na neno riri ni ra jeri ta Mulungu unamanya. ⁹ Ninamuvoyera mino kukala, mukaze kuhenzana muno na kuno munamanya ujeri, na kuhenda akili ya kulamulat’o, ¹⁰ kwa ta mwidime kumanya idzo muno ni riphiro. Endererani kugahenda gaga, namwi mundakala at’u adzo ots’o ila ta Jeso K’irisito auye. ¹¹ Na ninamuvoyera kukala, Jeso K’irisito amwidimise kuhenda madzo gosi, kwa ta Mulungu ahewe nguma, na alikwe. ¹² Enehu a chijeso, ninamuhenza mumanye kukala, kufungwa kwangu bee k’akuzizire Nguma Mbidzo, ta kuts’iphokala, kwáahenda at’u anji ayisikire. ¹³ Vivi o shikari osi a dzumba ra utawali, phamwenga na anjine osi phapha anamanya kukala, mimi ni jela kwa ninamuhikirahikira Jeso K’irisito. ¹⁴ Na chisha, kufungwa kwangu kudziatiya moyo akuluphiri asena anji amukuluphire Bwana, na ta anakaza kusumurira muno udzumbe wa Mulungu phots’o woga. ¹⁵ Anjine kati yao anasumurira udzumbe dzulu ya Jeso K’irisito kwa ana chidzitso na anashindana nami, ela anjine o anausumurira na myazo midzo. ¹⁶ Aa a myazo midzo, anahenda vivyo kwa ananihenza na anamanya kukala, Mulungu wánip’a kazi yiyi ya kuyihehera Nguma Mbidzo. ¹⁷ Ela o a chidzitso, anasumurira udzumbe dzulu ya Jeso K’irisito na myazo mii achona kukala, shenene yindakaza kunirya kuku jela. ¹⁸ Ndo gago gosi mino bee ts’inago ut’u, na ta gananihamira kwakukala, udzumbe dzulu ya Jeso unasumurirwa kwa chila njira, bee vikale ni kwa myazo midzo, hebu mii. Na nindaenderera kuhamirwa vivyo, ¹⁹ maana, ninamanya kukala, gaga ganipatago vivi gandauswa ni mavoyo genu, na wavizi wa Roho wa Jeso K’irisito ta nirichwe tsare. ²⁰ Rangu nirihenzaro na niriloleraro ni kukala, nihende kazi yangu t’ot’ot’o ta niyimale phots’oona waibu, na ninavoya nits’ife moyo ukati wosi ta uu ukati wa ndai, kwa ta gangu gosi gondogahenda mwangu mazagazini, vivi nirivyo ni moyo na ta chifo changu, chisha virehere nguma Jeso K’irisito. ²¹ Na nichigomba vivyo ni ninaamba, wa halahala mwangu mazagazini ni K’irisito, na nichifa nindapata ut’u udzo muno. ²² Ela nichikala nichenderera kusagala phapha duniani nindaidima kumuhikirahikira Bwana, bee ts’imanya nitsagule riphiro. ²³ Gaga mairi gananiyuga moyo: mimi ninahenza nife, kwakukala, nichifa, ninendakala phamwenga na K’irisito, neno ririro ni idzo muno. ²⁴ Ela ninahenzeka muno nenderere kukala moyo, kwa nimwavize mwimwi. ²⁵ Nina kanuni kukala, mucheri na haja ya wavizi wangu, na kwa vivyo ninamanya kukala, nindaenderera kukala phamwenga namwi mosi, kwa ta o ujeri nimufunzao, na urio ndio muukuluphirao ukaze kumukomaza chiroho, na umuhende muhamirwe. ²⁶ Ndo vivi nichiuya kwenu kahiri, vivyo vindamuhenda mumulike Jeso K’irisito muno. ²⁷ Enehu a chijeso, ra halahala muhenzwaro murihende ni, musagale kutuwirizana na gaambavyo mafunzo garigo Ngumani Mbidzo ya K’irisito. Hendani vivyo kwa ta niidimapho kudza, hebu ta nishindwapho, chisha mino nisikire mosi mwimire kudina na lengo mwenga, na mudzigwirana chivimwenga vyo mubagalikavyo kufunza kukala, Nguma Mbidzo ni ya jeri. ²⁸ Na ts’iaogopheni kamare o at’u amupingao, na vivyo vindaamanyisa kukala, ao andahangamizwa ni Mulungu, namwi mutivywe. ²⁹ Siswi hunamanya kukala mundativywa, kwakukala, Mulungu wámup’a nafasi ya kumuhikirahikira Jeso K’irisito, na vivyo ts’i kwa kukuluphira hicheye, ela ta kushononeswa nako kwa dzuluye. ³⁰ Ndo mwimwi namwi vivi munashononeswa dza nirivyokala nichishononeswa phokala ni ko kwenu, na vivi mucheri kusikira ninashononeswa vivyo kwa dzuluye.

¹ Enehu a chijeso, mwimwi mutiywa moyo ni Jeso K’irisito, na mungolwangolwa ni kukala, Jeso K’irisito unamuhenza. Na chisha, muna ushirika na Roho wa Mulungu, na Mulungu unamushononekera, na unamonera mbazi. ² Ndo ninamuvoya mino muhenzane, mwerekezane, na mukale na lengo mwenga, namwi phapho munihamye tsetsetse. ³ Mino ninamuhenza chila mumwenga akale murumwengu kwa munziwe ukati wosi, ats’idzone ni chit’u, amone ye munziwe ni chit’u, ela muts’ikale achoyo, hebu at’u a kudziunula. ⁴ Kuko nakuts’ikale mut’u wa kulola gakwe hicheye tu, ela naalole ta ga anzie nao. ⁵ Mwimwi kalani na mwimo dza okala na Jeso K’irisito: ⁶ Yiye wákala unga dza Mulungu kamare, na kuko kukalakwe sawa na Mulungu, k’akuhwalirire ni ut’u wa kuhendera gakwe ahenzago. ⁷ Ela gago gosi wágaricha kwa henzore mwenye, kwa kuvyalwa na umbo dza ra mudamu, na achihikirahikira at’u dza mugulwa muhumiki. ⁸ Na ariphokala phapha duniani dza mudamu, yiye wádziika murumwengu kwa kumogopha Mulungu ta achifa chifo cha kukot’wa misumari musalabani. ⁹ Ndo kwakukala, Jeso K’irisito wámogopha Mulungu, Mulungu naye achimuunula, na achimwika kut’u kwa chibomu, na achimup’a ubomu urio k’auna mut’u. ¹⁰ Mulungu wágahenda gago, kwa ta vyumbe vyosi vya mulunguni, duniani na kuzimu vidze vimit’e mavindi mbereze kumwishima ye Jeso K’irisito. ¹¹ Na chila mut’u undakubali kukala, Jeso K’irisito ndiye Bwana, na vivyo vimup’e nguma Baba Mulungu. ¹² Enehu a chijeso nimuhenzao, zirat’u ts’iku zangu zokala namwi, bee mwákala munamogopha Mulungu. Na ninamuvoya mino kukala, ta vivi nirivyo ts’iko kuko, chisha mwi endererani kuumanyirira wokofu wenu kwa kumwishima na kumogopha Mulungu muno, ¹³ maana, Mulungu ukati wosi unahenda kazi mwenu ndani. Yiye ndiye ye amuhendaye muhenze kuhenda gaga gamuhamirago yiye, na ndiye ye amup’aye widimi wa kugahenda. ¹⁴ - ¹⁵ Enehu a chijeso, phapha duniani hunasagala kati ya at’u odzobanangika, na ni adambi. Ndo genu gosi muhendago, gahendeni phots’o h’uh’u, hebu k’ani kwa ta mukale ana a Mulungu adzo ots’o ila, hebu kosa rorosi. Mahendo genu kati yao nagakale madzo dza virat’u nyenyezi zing’alavyo dzizani, ¹⁶ vyo mwasumuriravyo neno ra Mulungu rireharo uzima. Muchigahenda gaga, mimi nindakudzahenda ngulu kwa mwimwi ts’iku ya kuuyakwe Jeso K’irisito kwakukala, mazagazi genu gandakala ganaonyesa kukala, kazi yangu yomuhendera na chadi k’ayikalire ya bule. ¹⁷ Ajeso asena, vyo mumuhikiravyohikiravyo Mulungu, na vyo mumukuluphiravyo bee vinga dza sadaka yilaviwayo ni kuhani kwakwe. Mimi nami ta nikakala ni nife kwa nichimize yiyo sadaka yenu, chisha mino nindakala na raha na nihamirwe phamwenga namwi. ¹⁸ Ndo mwimwi namwi, kalani na raha na muhamirwe phamwenga nami. ¹⁹ Bwana Jeso achihenza, nindamuhuma T’imoti adze kwenu sambi, na nindahamirwa muno achiuya kudzanambira mwendereravyo. ²⁰ Nindamuhuma yiye kwakukala, yiye hicheye ndiye yedzelavira tsetsetse dza mimi kumuhikirahikira mwimwi. ²¹ Ela anjine osi o, adziika mbere gao genye kuriko ga Jeso. ²² Ta mwimwi enye munamanya kukala, T’imoti udzinaaviza muno. Yiye hudzisumurira hosi Nguma Mbidzo na chadi dza mut’u na mwanawe. ²³ Ndo vivi Bwana achihenza, na nichimanya maneno gangu gandakaladze tu, nindamuhuma kare adze ko kwenu. ²⁴ Na ta mimi mwenye nami, ninakuluphira kukala, Bwana undaniidimisa ta nidze kuko kwenu sambi. ²⁵ Vivi ninaona ni vidzo nimuhume kare Epafuradito adze kuko kwenu. Yuyu ni muhendikazi na shikari wa Jeso musena, na ndiye yemuhuma mwimwi adze anavize nipate gangu nirigo nago haja. ²⁶ Yiye vivi unashononeka kwakukala, mwásikira wákala mukongo na k’amudzangwe kumona. Ndo unatamani amone mosi kwa amuuse chimoyomoyo. ²⁷ Ndo dzulu ya o ukongowe, yiye wákala mukongo jeri ta achikala unalolerwa moyo. Ela Mulungu wámonera mbazi, na phapho achikala udzinonera mbazi ta mimi kwa vyo nishononekavyo kare bee vits’onjezwe na kufakwe. ²⁸ Ndo ninahenza muno nimuhume kuko kwenu, kwa ta muchimona maroho genu gatserere, na mimi nami chimoyomoyo changu chiphunguke. ²⁹ Ndo afikapho kwenu, muphokereni na raha muno, kwakukala, vivyo ndivyo at’u amukuluphirao Bwana Jeso K’irisito ahenzwavyo aphokerane. Na aishimeni at’u osi amuhikiraohikirao Jeso K’irisito t’ot’ot’o dza yiye. ³⁰ Yiye mwishimeni kwakukala, wázinza rohoye ta achikala utsuma kufa kwa dzulu ya kazi ya K’irisito, na kuko wáfiswa tu kwakukala, wákala unanaaviza mimi, maana, mwimwi mwákala mu kure, na vivyo muchikala k’amwidima kunaviza.

¹ Enehu a chijeso, rangu rinjine ririro ninahenza nimwambire mwimwi ni kwamba, hamirwani kwakukala, munamukuluphira Bwana. Mimi kuuyira kumwandikira garat’u gomwandikira kare k’akuniyuga, na gago gandamulongozat’o. ² Mwimwi dzimanyirireni na at’u odzodina kwamba at’u niabit’wets’i ndipho aphokerwe ni Mulungu dza enye haki. Ao anahenda mai, na anga dza madiya. ³ Ndo ninamuhenza mumanye mino kukala, at’u obit’wats’i jeri bee ni siswi, ela ts’i ao; maana, sino hunamwabudu Mulungu kwa kulongozwa ni Rohowe, na hunahamirwa kwakukala, hulola Jeso tu mwehu mazagazini, ela k’ahukuluphira maneno hugahendago siswi adamu. ⁴ Mimi ningari kugakuluphira gago maneno hugahendago siswi adamu, na kuchikala kuna mut’u munjine ariye una chisingwa chimuhendacho agakuluphire gago, bee mimi nami, nina vinji vyenye vya kunihenda naze vivyo. ⁵ Maana, mino nábit’wats’i mutsana wa nane, avyazi angu ni Ayahudi enye, mbari yangu ni ya Benjameni, na ninagomba Chiburania dza akare angu. Dzulu ya kutuwiriza malagizo ga Shariya, nákala ta ni Mufarisayo, ⁶ na náhenda chadi cha kwahendera mauku at’u a makanisa, na ndo nákala ninatuwiriza malagizo gosi ga Shariya ya Musa ta nichikala ts’ina kosa rorosi. ⁷ Ela gago gosi gokala nichigaona gana tende, vivi ts’igaona dza ni ut’u kwa dzulu ya Jeso K’irisito. ⁸ Na ts’i gago hicheye bee, ela ni vit’u vyosi vyokala nichivyona vina tende, vivi ts’ivyona dza ut’u nichivihwalanisha na kumumanya Jeso K’irisito Bwana wangu, neno ririro rina tende muno. Ndo mino vivi náricha gosi tsetsetse kwa dzuluye, na ta ninagaona gago gosi k’agana tende kamare kwa nimukuluphire Jeso K’irisito, ⁹ na nimulole yiye tu mwangu mazagazini. Mimi ts’itsakula kahiri kuphokerwa ni Mulungu dza mwenye haki kwa kutuwiriza malagizo ga Shariya. Mino vivi náphokerwa ni Mulungu dza mwenye haki kwa njira ya kumukuluphira Jeso K’irisito, na haki yiyo yilaa kwa Mulungu, na nidziyipata kwa kumukuluphira Jeso K’irisito. ¹⁰ Gangu nigahenzago vivi ni kumumanya Jeso K’irisito, na nihende widimi omufufula kulaa kuzimu mwangu mazagazini; nishononeke dza arivyoshononeka yiye, na Mulungu anihende nikale kwete kufa dza vyomuhenda Jeso. ¹¹ Gaga gosi ninahenza ganipate kwa ta nichimize lengo rangu ra kufufuka kulaa kuzimu. ¹² Gago ndigo gangu nihenzago enehu a chijeso, ela vivyo ts’i kwamba nidzamba vivi nágapata kare, hebu ts’ina ila yoyosi mbere za Mulungu. Gago mino ts’idzangwe kugapata, ela ninenderera kuhenda vyangu vyosi niidimavyo ta nichire, na ndipho nipate manoso gago. Vivyo ndivyo K’irisito Jeso anihenzavyo nihende, na ndivyotuma ta achinihenda nikale wakwe. ¹³ Gago mimi ts’iidima kwamba nágapata kare enehu a chijeso, ela nina phat’u phamwenga tu phodzophagwiririra, napho ni; mimi vivi ts’ilola nyuma kahiri mwangu mazagazini ta ni maironi kukazira garigo mbere. ¹⁴ Ndo nidzidina ta nichire na nipate garat’u manoso garigo Mulungu wáhulaga phohwiha humukuluphire Jeso K’irisito husagale mazagazi maphya ko dzulu mulunguni. ¹⁵ Siswi hosini hurio hudzikomala chiroho, hunahenzwa hukale na mwimo uo wa kukazira garigo mbere. Na ta mwendapho maazo genu k’agandatuwana na gangu dzulu ya neno rorosi, Mulungu undamung’azira ujeri dzulu ya neno riro. ¹⁶ Ndo ra kuhenda halahala ni kwenderera kutuwa urat’u ujeri odzokala huchiutuwa. ¹⁷ Enehu a chijeso, mwimwi sagalani dza vyo nisagalavyo mimi. Siswi hwámonyesa jisi ya kusagalat’o, na kwa vivyo, tuwani mufano wa o ario anasagala vivyo kare. ¹⁸ Mimi námwambira kare k’ano nyinji, na vivi ninamwambira kahiri na kuno ta matsozi gananirengereka kukala, kuna at’u anji adzambao ni ajeso, ela menenzi gao ganaonyesa anarema kukala, Jeso K’irisito wáfa musalabani kwa ause madambi gao. ¹⁹ At’u ao gago ahendago gandaahenda akatsuphwe mohoni, kwakukala, ao k’aamuhikirahikira Mulungu ta ni at’u tu ahendao garat’u gaahamirago ao enye. Ao anahenda maneno ga waibu, na gago nago anagahendera ngulu. At’u ao alilikana dzulu ya maneno ga chidunia tu. ²⁰ Ela sino kwehu ni mulunguni, na vivi hunalolera na hamu bomu Mutivyi wehu, ariye ni Bwana Jeso K’irisito auye kulaa ko mulunguni. ²¹ Yiye undakudzayigaluza yiyi miiri yehu minyonge, na ayihende yikale dza o wakwe wenye nguvu za chimulungu kwa kuhumira o widimi ario unauhumira ta unatawala vyumbe vyosi.

¹ Enehu a chijeso, mwimwi ninamuhenza muno, na ninatamani muno nimone. Mwimwi ndimwi munihendao nihamirwe, na ta nina ngulu kwa mwimwi. Ndo enehu a chijeso nimuhenzao, endererani kugwiririra kuluphiro renu kinyi. ² Na dzulu ya gago wahi, ninaavoya ndugu zehu a chijeso a chiche, Eudiya na Sunitike aerekezane kwakukala, vivyo ndivyo ahenzwavyo akale at’u amukuluphirao Bwana Jeso. ³ Ndo uwe Sizigasi ukuluphirikaye, ninakuvoya wahende auye kutseka ao ndugu zehu a chijeso a chiche. Ao, Kilemeniti na ahendikazi asena anjine osi ario madzina gao gáandikwa chitabuni cha uzima, ánaviza muno kuyisumurira Nguma Mbidzo. ⁴ Enehu a chijeso, hamirwani ts’iku zosi kwakukala, munamukuluphira Bwana. Nidzigomba kare, ela ninauyira kahiri; hamirwani mwimwi! ⁵ Na kalani arumwengu kwa at’u osi kwakukala, Bwana u phephi na kuuya. ⁶ Mwimwi muts’ibabaishwe ni ut’u wowosi. Ela genu gosi mumanyiseni na muvoyeni Mulungu na mumulavire mumvera. ⁷ Muchimuvoya, Mulungu undamup’a reriye yiriyo k’akuna mut’u aidimaye kuyimanya tsetsetse, nayo yindahuriza myoyo yenu na akili zenu, na yimuhende mwenderere kumukuluphira Jeso K’irisito. ⁸ Enehu a chijeso, rangu ra konjeza ni kwamba, lilikanani dzulu ya maneno ga jeri, maneno ga ishima, maneno ga haki, maneno gots’o ila, gahenzwago ni at’u na t’abiya mbidzo, na mugatuwe, maana, ni madzo, na ganamup’a mut’u nguma mbidzo. ⁹ Gago ndigo nirigomufunza na muchigaphokera, na ndigo gokala muchigaona nichigahenda, na gogasikira nichigagomba. Ndo gatuweni, naye Mulungu ahuhendaye husagale na reri, undakala phamwenga namwi. ¹⁰ Enehu a chijeso, Bwana unanihenda nihamirwe muno, kwakukala, ta yiripho ni p’indi, ela vino mwápata nafasi kahiri ya konyesa kukala, munanimanya gangu nirigo nago haja. Nichigomba vivyo ts’i kwamba ninaamba mwákala mudzinitsupha, maana, ninamanya kukala, ni mwákala k’amupata nafasi ya konyesa kunimanya kwenu gangu nirigo nago haja tu. ¹¹ Na vivi ts’i kwamba nidzigomba vivyo kwa phanjine nidziphungukirwa ni chochosi, maana, mino nádzifunza kuvumirira chivyovyosi. ¹² Chikala ni ga kutsowa ninagamanya, na ta ga kukala na vit’u mayamaya ninagamanya vivyo. Mino nidzidzifunza kuvumirira chivyovyosi ta vivi ninaidima kukala na nzala, hebu nidzimvuna, na chinji, hebu na chichache. ¹³ Na ninaidima kukala chivyovyosi kwakukala, Jeso K’irisito unaniidimisa. ¹⁴ Ela ta vivyo, mwáhendat’o kunaviza ukati okala ninaturika. ¹⁵ Mwimwi Afilipi munamanya t’ot’ot’o kukala, niriphouka ko jimbo ra kwenu Makedonia zo ts’iku za mwanzo wa kumusumurira Nguma Mbidzo, ni mwimwi hichiyenu tu onaviza kupata gangu nirigo nago haja. ¹⁶ Na ta niriphokala ni mudzi wa Tesalonike nako, názongekwa k’ano nyinji, namwi muchinaaviza vivyo. ¹⁷ Bee enehu a chijeso, ts’oneni ninamwamba vivyo kumulembalemba kwa mwenderere kunaviza, ela mino ninahenza none munakaza kuhats’wa kwa munalavya. ¹⁸ Vivi chila chit’u nichihenzacho chi mayamaya kwakukala, Epafuradito wánirehera kare manoso genu. Manoso gaga ganga dza sadaka zodzocherwa Mulungu, na zina k’ungu mbidzo. Mulungu unazikubali, na zinamuhamira. ¹⁹ Mulungu wangu undamup’a genu murigo nago haja gosi kuchirira Jeso K’irisito kwakukala, ni tajiri wa chila chit’u. ²⁰ Mulungu ariye ndiye Abayehu, naalikwe ta kare na kare! Amina. ²¹ Nilamusirani at’u a Mulungu osi amukuluphirao Jeso K’irisito. Akuluphiri asena nirio nao phapha nao anamulamusa. ²² Na akuluphiri osi kuku, kamwe arat’u ahendikazi a Kaisari, anamulamusa. ²³ Bwana Jeso K’irisito naenderere kuhats’a roho zenu.