FILEMONI
11 Ni mimi P’aulo na ndugu yehu wa chijeso T’imoti. Mimi vivi ni jela kwa dzulu ya Jeso K’irisito. Ninakwandikira baruwa uwe Filemoni muhendikazi wa Bwana munziwehu hukuhenzaye. 2 Nilamusira akuluphiri avoyao kwako nyumbani, kamwe ndugu yehu wa chijeso wa chiche Afiya, na Arikipo shikari wa Bwana munziwehu. 3 Abayehu Mulungu na Bwana Jeso K’irisito naamuhats’e, na amuhende musagale na reri yao. 4 Filemoni mwenehu wa chijeso, mimi chila nichikuvoyera, ninamulavira mumvera Mulungu wangu, 5 kwakukala, ninasikira uwe unaahenza at’u a Mulungu anzio osi, na unamukuluphira Bwana Jeso jeri. 6 Rangu nendereraro kurivoyera ni kwamba; washuhudiye anzio cho chako ukuluphiracho, na vivyo vindakuhenda ugamanye t’ot’ot’o go manoso gosi arigo Mulungu unaap’a at’u kuchirira Jeso K’irisito. 7 Mwenehu wa chijeso, mimi niriphosikira kukala unaahenza akuluphiri anzio osi, na kwahenda ahamirwe, vivyo vyánihamira muno ta vichinitiya moyo mimi nami. 8 Filemoni, mimi dza muhumwa wa Jeso K’irisito niriye na widimi, nina haki ya kukulagiza uhende go uhenzwago uhende, 9 ela mino ninahendakuvoya kwakukala, hunahenzana. Ndo mimi mutumia P’aulo, niriye ta vivi ni jela kwa dzulu ya Jeso K’irisito, 10 nina voyo dzulu ya mugulwao Onesimo, ariye vivi ni mwanangu wa chiroho. Yiye hwáonana kuku jela, na nichimushuhudiyira dzulu ya Bwana ta achimukuluphira. 11 Ko hulaako, yiye wákala k’akwaviza na chochosi, ela vivi unanaaviza muno mimi, na ta uwe nawe undakwaviza vivyo. 12 Yiye vivi ninamuudza kwako, ela unauka na roho rangu. 13 Mimi vivi ni jela kwakukala, nákala ninasumurira Nguma Mbidzo, na ningehenza muno akale kuku kwa ta ahwale nafasiyo na anavize. 14 Ela ta vivyo, ts’enzi kukugaramisha unaavize kwa kumwika yiye phapha phots’o kuvoya uwe. Mino ninahenza uwe unaavize kwa henzoro mwenye. 15 Nikwenda akakala mugulwao Onesimo wáhendwa ni Mulungu akutoroke ts’iku ch’ach’e, kwa yiyo yikale njiraye ya kumukuluphira Jeso, na adze asagale nawe ta kare na kare. 16 Yiye vivi una tende muno kuchira mugulwa, kwakukala, ni ndugu yehu wa chijeso humuhenzaye. Mimi ninamuhenza muno, na uwe undamuhenza muno yenye kwakukala, ni mugulwao, na ni nduguyo wa chijeso. 17 Ndo uwe Filemoni, uchikala unanona mimi ni muhendikazi wa Bwana munzio jeri, muphokere Onesimo dza vyo urivyo ungari kuniphokera mimi. 18 Achikala Onesimo wákukosa, hebu unamwisa chochosi, gago niisa mimi. 19 Na maneno gaga ninagaandika na mukono wangu mwenye mimi P’aulo kukala, "Chochosi umwisacho Onesimo, nindakuripha mimi," na go ga kukala ta mimi ninakwisa kwa uo uzimao wa chiroho, ts’indagahadza. 20 Ndo ninakuvoya mwenehu wa chijeso kukala, unihendere gago kwa dzina ra Bwana, na phapho bee unihende nihamirwe muno mimi nduguyo wa chijeso. 21 Mimi yiyi baruwa ninayandika na kanuni kukala, undagahenda gago godzokuvoya, na ta ninamanya kukala, undahenda manji genye. 22 Na chisha, niikira chumba chondokudzasagala mimi, kwakukala, ninakuluphira kukala, Mulungu undagasikira go mavoyo genu mosi ta aniidimise kudza kwenu. 23 Epafura ariye hu jela hosi kwa dzulu ya Jeso K’irisito unakulamusa. 24 Mariko, Arisitako, Dema na Luka ario ni ahendikazi a Bwana asena, anakulamusa vivyo nao. 25 Bwana Jeso K’irisito naenderere kuhats’a roho zenu.