AGALATIYA

AGALATIYA

¹ Ni mimi P’aulo muhumwa wa Jeso K’irisito niriye na widimi yehendaolohewa ni ye Jeso mwenye, na Baba Mulungu yemufufula ye Jeso kulaa kuzimu, ela ts’itsagulirwe ni at’u, hebu kufunzwa ni mut’u kwa nikale muhumwa wa Jeso. ² Mimi na o enehu a chijeso osi hurio phamwenga phapha, hunamwandikira mwimwi ajeso a makanisa ga Galatiya. ³ Baba Mulungu na Bwana Jeso K’irisito naamuhats’e muno, na amuhende musagale na reri yao. ⁴ Yiye Jeso K’irisito ndiye yedzelavira kufa kwa dzulu ya madambi gehu, kwa ta ahutivye siswi huriche maazo mai na mwendo ui urio na at’u a dunia, na gago gáhendeka kwakukala, vivyo ndivyo vyokala Abayehu Mulungu upanga. ⁵ Naalikwe ta kare na kare! Amina. ⁶ Mimi ta ninaangalazwa ni vyo mumurichavyo maruru Mulungu yemwiha mupate wokofu kwa mbazi za K’irisito. Mwimwi vivi munatuwa kare mafunzo manjine ⁷ garigo ts’igo yo Nguma Mbidzo kamare. Ao ni at’u fulani tu anamwangaisha akili, na anahenza agaluze yiyat’u Nguma Mbidzo ya jeri dzulu ya K’irisito. ⁸ Bee mimi vivi ninamwambira kukala, ta mumwenga wehu siswi ahumwa a Jeso a widimi, hebu malaika wa Mulungu, chisha achidzamusumurira manjine kurichisa yiyat’u Nguma Mbidzo huriyomusumurira kare, Mulungu naamulani ta kare na kare! ⁹ Siswi hwámwambira kare, na vivi ninamwambira kahiri kukala, mut’u achikala unamusumurira manjine kurichisa yiyat’u Nguma Mbidzo muriyoyiphokera kulaa kwehu, Mulungu naamulani ta kare na kare! ¹⁰ Mimi vivi vyodzogomba ts’i kwamba ninatsakula kulikwa ni at’u, ela rangu nihenzaro ni nilikwe ni Mulungu. Mimi kala nicheri na uo wa kuhenza kulikwa ni at’u, ts’ingakalire vivi nádzilavira tsetsetse kukala muhendikazi wa K’irisito. ¹¹ Enehu a chijeso, mimi ninamuhenza mumanye kukala, yiyo Nguma Mbidzo niriyomusumurira bee ts’i ya mudamu. ¹² Maana, mimi yiyo ts’iyipatire kulaa kwa mut’u yeyosi, na ts’iyifunzirwe ni mut’u, its’iphokala náhendayifunulirwa ni Jeso K’irisito. ¹³ Mwimwi mwágasikira gogahenda mimi niriphokala nicheri kutuwiriza shariya za dini yehu ya Chiyahudi. Mimi nákala nichiahendera mauku muno o at’u a Mulungu, na náheza ta kwahangamiza kamare ao. ¹⁴ Kati ya marika gangu ga Chiyahudi, nákala ni mbere kwa kutuwa dini yehu, na chisha nákala nidzidzilavira tsetsetse kugwira ada za akare ehu. ¹⁵ Ela Mulungu yenoloha hangu nicheri ndanini mwa mayo, wániiha kwa mbazize mwenye, na achona ni vidzo ¹⁶ anifunulire Mwanawe, kwa ta nisumurire Nguma Mbidzo dzuluye kwa at’u a makabila manjine. Ndo yiye ariphonifunulira ye Mwanawe, mimi ts’iuzire utumia mut’u, ¹⁷ na ts’endere mudzi wa Jerusalemu kwa okala ni ahumwa a Jeso a widimi kare. Its’iphokala, mino nákwenda maruru nyika ya Warabuni, na niripholaa kuko, nichiuya mudzi wa Damasiko. ¹⁸ Yiriphochira myaka mihahu kulaira Mulungu ariphonifunulira ye Mwanawe, ndipho nichikot’a kwenda Jerusalemu kwendamanyana na P’etero, na násagala naye kwa ts’iku kumi na ts’ano (15) tu. ¹⁹ Dzulu ya gago gosi wahi, muhumwa wa Jeso wa widimi munjine yemona ni Jakobo nduguye Bwana wehu tu, ela o anjine ts’iaonere. ²⁰ Na gaga nimwandikirago, bee ni ga jeri ta Mulungu unamanya. ²¹ Niriphosagala zizo ts’iku kumi na ts’ano (15) ko Jerusalemu, náuka nichenda maboma fulani ga majimbo ga Siriya, na Kilikiya. ²² Ukati uo, ajeso a makanisa ga ye K’irisito ko jimbo ra Judea akala k’aadzangwe kunona mimi mwenye mwiri. ²³ Ao ákala ahendasikira na at’u tu kukala, "Ye mut’u yekala achihuhendera mauku kwa hunayikuluphira Nguma Mbidzo, vivi naye unasumurira dzulu ya riro kuluphiro rokala uhenza arihangamize pho mwanzo!" ²⁴ Ndo o akuluphiri ákala achimulika Mulungu muno kwa gokala nidzihenderwa mimi.

¹ Yiriphochira myaka kumi na mine (14), mimi nákot’a kahiri nichenda Jerusalemu, na ukati uo nákwenda na Barinaba na Tito. ² Kuko, mimi nákwenda, maana, Mulungu wákala udzinifunulira kukala nende. Niriphokala ni kuko, náhenda monano na vilongozi a kanisa amanyikanao tu, na phapho nichiaambira dzulu ya yo Nguma Mbidzo niyisumurirayo at’u a makabila manjine. Mimi náhenda vivyo kwa ao aniunge mukono, kwa ta yiyat’u kazi yokala nidziyihenda, na yo nihendayo yits’ikale ya bule. ³ Ndo ta Tito yekala hu hosi na wákala k’abit’irwets’i kwa ni Muyunani, k’agaramishirwe abit’wets’i. ⁴ Gaga ninagahadza tu, maana, at’u anjine okala adzidzihenda ni akuluphiri na achiphenya duu ra akuluphiri kuko, ákala anahenza amubit’ets’i. At’u ao ákala adzidzitiya duu rehu ra ajeso tu kwa ákala anaheza auhangamize utsare wehu hurio nao kwa hunamukuluphira K’irisito Jeso, na ahuhende hukale agulwa ahumiki a Shariya. ⁵ Ela sino go gao k’ahugakubalire kamare ta vichache, kwa mwimwi mwenderere kuukuluphira ujeri wa Nguma Mbidzo. ⁶ Na ta ao okala anaambwa ni vilongozi, k’aakalire na ra konjeza dzulu ya yiyi Nguma Mbidzo niyisumurirayo. Na bee akale eri ni vilongozi amanyikanao, gago kwangu mino ts’i chit’u, kwakukala, Mulungu k’aapima at’u kwa vyo aonekavyo. ⁷ Chit’u ni kwamba tu, ao ákubali kukala, Mulungu wákala udzinoloha nisumurire Nguma Mbidzo kwa at’u a makabila manjine, dza virat’u arivyomoloha P’etero ayisumurire kwa Ayahudi. ⁸ Chisha, ao ámanya kukala, Mulungu yemuhenda P’etero akale muhumwa wa Jeso wa widimi kwa Ayahudi, ndiye yiye yenihenda mimi nikale muhumwa wa Jeso wa widimi kwa at’u a makabila manjine. ⁹ Ndo o ano Jakobo, P’etero na Johana okala anaonewa ni at’u kukala ndio vilongozi abomu, ariphomanya kukala, Mulungu wánip’a chipaji cha kuhenda kazi yiyo, áhup’a mikono mimi na Barinaba konyesa kukala, ákubali mafunzo gehu. Ao phapho akubali kukala, mimi na Barinaba hwenderere kusumurira Nguma Mbidzo kwa at’u a makabila manjine, na o nao kwa Ayahudi. ¹⁰ Chit’u chohuvoya ao ni chimwenga tu kukala, hwenderere kwaaviza akuluphiri ario ni achiya, maneno gokala ninagahenda kare na chadi. ¹¹ Ela P’etero ariphokala u mudzi wa Anitiyokiya, námuchemera jamani kwakukala, wákala una makosa. ¹² Maana, yiye pho mwanzo aripholoka ko Anitiyokiya, wákala k’ana neno ta achikala achirya phamwenga na akuluphiri a makabila manjine. Ela ariphokudza Ayahudi kulaa kanisa ra Jerusalemu okala ahumwa ni Jakobo, achiricha achikala k’enzi kurya nao kahiri kwa kogopha o Ayahudi okala anaamba ni seti mut’u abit’wets’i ndipho akale mukuluphiri jeri. ¹³ Ndo akuluphiri a Chiyahudi anjine achituwa o ulumakwiri wa P’etero, na ta Barinaba naye achilembwa na achituwa ulumakwiri wao. ¹⁴ Ndo mino niriphoaona ao k’aatuwa ujeri wa Nguma Mbidzo, námuchemera P’etero phapho jamani, na nichimwambira kukala, "Uchikala uwe uriye u Muyahudi mwenye tu, unasagala dza mut’u wa kabila rinjine ela ts’i dza Muyahudi asagalavyo, sambi unaidimadze kwagaramisha vivyo o at’u a makabila manjine atuwe jadi za Ayahudi? ¹⁵ Siswi hu Ayahudi chihumbo kamare, na k’ahunga dza at’u a makabila manjine ario ni adambi. ¹⁶ Ela ta vivyo, siswi akuluphiri a Chiyahudi hwámanya kukala, mut’u k’aphokerwa ni Mulungu dza mwenye haki kwa kuhenda gahenzwago ni Shariya, ela ni kwa kumukuluphira Jeso K’irisito. Gago ndigotuma ta siswi Ayahudi naswi huchimukuluphira ye K’irisito Jeso, kwa huphokerwe ni Mulungu dza enye haki kwa njira ya kumukuluphira ye K’irisito, ela ts’i kwa kuhenda gahenzwago ni Shariya. Maana, k’akuna aphokerwaye ni Mulungu dza mwenye haki kwa kutuwa Shariya. ¹⁷ Siswi kwahivira vivi hulola kuphokerwa ni Mulungu dza enye haki kwa kumukuluphira K’irisito, Ayahudi bee anahwona hu adambi dza at’u a makabila manjine. Ndo vino vikale vinaimanisha kukala, ye K’irisito wáhuhenda huhende dambi wahi? H’a-a, ts’igo kamare gago! ¹⁸ Ela mimi nichiuya kukubali go maneno gogaricha ga kukala, mut’u unaidima kuphokerwa ni Mulungu dza mwenye haki kwa kuhenda gahenzwago ni Shariya, bee nindakala ninahenda dambi. ¹⁹ Ta mimi pho p’indi nákala nisagala kutuwiriza yo Shariya, ela nichiricha kusagala kutuwiriza Shariya kwa ta nisagale mazagazi ga kumuhamira Mulungu. Jeso ariphofa musalabani, mazagazi gangu ga p’indi gáfa nago, ²⁰ na vivi ts’isagala dza vyo nirivyokala nichisagala, maana, Jeso K’irisito unasagala mwangu ndani. Mazagazi nisagalago vivi, ni mazagazi ga kumukuluphira ye Mwana wa Mulungu, ariye wánihenza muno ta achidzilavira kufa kwa anitivye. ²¹ Mulungu unahutivya kwa mbazize mwenye tu, ela ts’i kwa kuhenda gahenzwago ni Shariya, na phapho ts’indapharicha ta mukanihendadze! Kala at’u ákala anaidima kuphokerwa ni Mulungu dza enye haki kwa kuhenda gahenzwago ni Shariya, bee chifo cha Jeso K’irisito musalabani kwa dambi zehu, chingari kukala ni cha bule."

¹ Mwi Agalatiya a kuphuphizwa! Ni ani yemubananga vino? Samba mwi námwambira lwazu-lwazu, chisha jamani kukala, Jeso K’irisito wáfa kwa kukot’wa misumari musalabani kwa dzulu yenu? ² H’a vivi bee, ninahenza munambire chit’u chimwenga tu, nacho ni: mwi ye Roho wa Mulungu mwámuphokera kwa kuhenda gahenzwago ni Shariya, hebu kwa kukuluphira Nguma Mbidzo niriyomusumurira? ³ Heka mwi ta munaphuphizwavyo? Mwimwi mwáanzat’o kwa kulongozwa ni Roho wa Mulungu, ela heka vino mutsuma kumarigiza kwa kulongozwa ni maazo ga chidamu? ⁴ Kuno kuturika koturika mwi, munahenza munambe kwákala kwa bule? Mimi nina kanuni kukala, k’akukalire kwa bule kuko! ⁵ Yuno Mulungu vino amup’avyo Rohowe na kuhenda vilinge kati yenu, akale go bee unagahenda kwa munatuwa Shariya ya Chiyahudi, hebu ni kwakukala, munakuluphira Nguma Mbidzo yoyisumurirwa? ⁶ Hebu lilikanani dzulu ya Burahimu. Maandiko ga Mulungu ganaamba, "Yiye wámukuluphira Mulungu, ndipho achiphokerwa dza mwenye haki kwa kuko." ⁷ Ndo mwimwi nimumanye kukala, at’u a mudzungu wa Burahimu jeri, bee ni arat’u amukuluphirao Mulungu. ⁸ Maandiko ga Mulungu gásema chimbere kukala, at’u a chila chiryomo phapha duniani ákala andaphokerwa ni Mulungu dza enye haki kwa kumukuluphira. Nguma Mbidzo yiyi hunayona ukati Mulungu ariphoyambira Burahimu kukala, "At’u a viryomo vyosi phapha duniani, andahats’wa kuchirira uwe." ⁹ Ndo osi amukuluphirao Mulungu anahats’wa dza vyo arivyohats’wa yiye Burahimu, yemukuluphira Mulungu. ¹⁰ Maandiko ga Mulungu ganaamba, "At’u osi ots’enderera kutuwiriza chila lagizo roandikwa chitabu cha Shariya, bee ana lana ra Mulungu." Kwa vivyo, at’u atsakulao kuphokerwa ni Mulungu dza enye haki kwa kuhenda mahendo gahenzwago ni Shariya, ana lana ra Mulungu. ¹¹ Ndo vi lwazu kukala, k’akuna mut’u aphokerwaye ni Mulungu dza mwenye haki kwa kutuwa Shariya. Maana, ta Maandiko manjine ga Mulungu ganaamba, "Mut’u yedzephokerwa ni Mulungu dza mwenye haki kwa kumukuluphira yiye, undakala na uzima." ¹² Kutuwiriza Shariya, k’akutakiya ukale unamukuluphira Mulungu. Ela ni dza Maandiko ga Mulungu gaambavyo kukala, "Ye atuwaye malagizo ga Shariya, undakala na uzima." ¹³ K’irisito wáhukombola kulaa kukalani ts’ini ya lana ukati aripholaniwa yiye kwa dzulu yehu. Hunamanya kukala Jeso wálaniwa kwakukala, Maandiko ga Mulungu ganaamba, "Mut’u aulagwaye kwa kukot’wa misumari muhini, wálaniwa ni Mulungu." ¹⁴ Ndo gago ga kuhendwa ni K’irisito Jeso, gáahenda at’u a chila chiryomo phapha duniani aidime kupata manoso golagwa Burahimu, na chisha siswi akuluphiri huphokere Roho wa Mulungu yekala udzihulaga kwa njira ya kuluphiro. ¹⁵ Enehu a chijeso, nahuhwaleni mufano wa mazagazi gehu ga chila ts’iku. At’u airi aerekezanapho dzulu ya ut’u ta achiandikirana, h’aya k’aphana mut’u aidimaye kugatsamula, hebu kugagaluza, na vivyo ndivyo virivyo kwa ro lagano ra Mulungu. ¹⁶ Ndo lagano riro ra Mulungu rálagwa Burahimu na mut’u wa mudzunguwe. Na dzulu ya riro lagano, Maandiko ga Mulungu k’agaamba, "Na at’u a mudzunguo," dza kwamba unahadza at’u anji, ela go ganaamba, "Na mut’u wa mudzunguo," konyesa kukala, wákala unahadza mut’u mumwenga tu, na ni ye K’irisito. ¹⁷ Ndo rangu nambaro ni kwamba: Mulungu wámulaga lagano Burahimu p’indi yenye hiko phokala ta k’adzangwe kulavya Shariya. Ndo lagano riro k’ariidima kuvunzwa ni Shariya yokudzayilavya phokala ta yichira myaka magana mane na mirongo mihahu (430) kulaira ririphoikirwa. ¹⁸ Kalapho Mulungu unosa at’u wokofu kwa kutuwa Shariya, angari k’aanosa kwa rirat’u lagano. Ela vino Mulungu kwa mbazize mwenye wámunosa Burahimu kwa rirat’u lagano rokala udzimulaga. ¹⁹ Ndo swali ni, kwadze yino Shariya nayo yálaviwa? Shariya yálaviwa kwa at’u ákala anahenda dambi kwenda, na yáikwa yihende kazi ta ukati okala undakudzira ye mut’u wa mudzungu wa Burahimu, yekala ulagwa ro lagano. Mulungu wálavya Shariya kuchirira malaika ario ámwambira Musa yekala unatsanganya at’u na yiye. ²⁰ Ela ta vivyo, mutsanganyi uhenzeka tu phachikala phana at’u airi, ela Mulungu una widimi wa kuhenda ut’u hicheye. ²¹ Ndo swali rinjine ni, yino Shariya yikale yi chinyume cha chilagane cha Mulungu? Ng’o ts’ivyo! Maana, kala Shariya yálaviwa kwa yiahende at’u apate uzima, at’u angari áidima kuphokerwa ni Mulungu dza enye haki kwa kuyituwiriza yiyo Shariya. ²² Ela vino Maandiko ga Mulungu ganaamba, dunia yosi yisagalirwa ni dambi. Kwa vivyo, uzima uphya wa kare na kare olagwa upatwa ni mut’u kwa kumukuluphira Jeso K’irisito, na undahewa arat’u amukuluphirao tu. ²³ Siswi hosi hwákala hu afungwa ts’ini ya Shariya ta ukati kuluphiro ririphong’azwa. ²⁴ Ndo yiyo Shariya yákala yinahumanyirira ta phokudzira K’irisito, na vivi huphokerwa ni Mulungu dza enye haki kwa njira ya kuluphiro. ²⁵ Na kwakukala, vino hunamukuluphira Jeso K’irisito, Shariya ts’iyo yihumanyirirayo kahiri. ²⁶ Mwimwi mosini mu ana a Mulungu vivi kwa kumukuluphira K’irisito Jeso. ²⁷ Mwimwi muriphobatizwa kwa mukale at’u a K’irisito, mwákala dza kwamba munamuvala ye K’irisito. ²⁸ Ndo vivi k’akuna kahiri ga yuno ni Muyahudi, hebu yuno ni mut’u wa kabila rinjine, yuno ni mugulwa muhumiki hebu yuno ni mut’u ariye tsare, yuno ni muche hebu yuno ni mulume, maana, mosi mudzikala amwenga kwa munamukuluphira K’irisito Jeso. ²⁹ Ndo kwahivira mwimwi mu at’u a K’irisito, vivi bee mu ana a Burahimu chiroho, na mundapata go manoso kulaa kwa Mulungu, ariye pho mwanzo wágalaga Burahimu.

¹ Enehu a chijeso, rangu nambaro ni kukala, mwana achikala ucheri mudide, bee unga dza mugulwa. Yiye ta aripho miyo ya abaye ni yakwe, ² ela ni kukala u ts’ini za arat’u amumanyirirao ta ufike o ukati okala upangirwa ni ye abaye. ³ Ndo dza siswi akuluphiri naswi. Siswi huriphokala k’ahudzangwe kukombolwa ni K’irisito, hwákala dza anache adide, na hwákala huchituwa shariya za chidunia dza agulwa ahumiki. ⁴ Ela ukati okala upangwa ni Mulungu uriphofika, Mulungu wámuhuma Mwanawe, na yiye wávyalwa ni muchet’u dza siswi adamu, na chisha achisagala ts’ini ya Shariya, ⁵ kwa ta ahukombole siswi okala hu ts’ini ya Shariya, na phapho siswi hosini hukale ana a Mulungu. ⁶ Ndo kwahivira mwimwi vivi mu ana a Mulungu, yiye wáhuhumira Roho wa Mwanawe mwehu myoyoni siswi hosini, na yiye Roho unagomba unaamba, "Baba." ⁷ Ndo mwimwi vivi k’amu agulwa ahumiki kahiri, ela mu ana a Mulungu. Na kwakukala, mu ana a Mulungu, Mulungu undamup’a garat’u gosi arigo wálaga kwap’a anae. ⁸ Akuluphiri asena, mwimwi pho p’indi phokala k’amumumanya Mulungu wa jeri, mwákala mu agulwa ahumiki a milungu ya ulongo. ⁹ Ela vivi munamumanya ye Mulungu wa jeri, hebu baha nambe yiye unamumanya. Ndo heka sambi munahenza muuyire kutuwa kukala agulwa ahumiki a shariya za chidunia, zirizo k’azina widimi, na k’azaviza na chochosi? ¹⁰ Vivi mudziima muhenza mupate wokofu kwa kutuwa maada ga ts’iku, majuma ga myezi, na virimo. ¹¹ Bee, gago genu muhendago gananihenda nikale chimoyomoyo kwakukala, yo kazi yangu yosi yoyihenda na chadi kwa dzulu yenu, bee yitsuma kukala yákala ya bule. ¹² Bee k’amona enehu a chijeso, mimi ninamuvoya muriche kukala ts’ini ya Shariya dza mimi vyoricha, maana, mimi náricha kukala ts’ini ya Shariya dza mwimwi murivyokala. Mimi p’indi násagala kwenu, na mwimwi k’amunikosere. ¹³ Mwimwi mucheri kukumbikira kukala, nákudzamusumurira Nguma Mbidzo lwa kwanza, kwakukala, mwiri wangu wákala k’auna mukotse. ¹⁴ Mimi yo hali yangu ya chinyonge yokala, yákala ni yimutiye majezoni ga kuniphurya, hebu kunirema, ela mwi k’amuhendere hivyo, its’iphokala, mwániphokera t’ot’ot’o dza mwidimavyo kumuphokera malaika wa Mulungu, hebu Jeso K’irisito mwenye. ¹⁵ Ndo mwanzwadze ta vino k’amuna raha yokala munayo ts’iku zizo? Mimi ninamwambira kukala, ukati uo mwákala mu kwete kuhenda rorosi kwa munaavize. Na kala vyákala vinaidimikika, mungari mwáshungulula ta matso genu mukanip’a. ¹⁶ Ndo nikale vino nidzikala mudawa wenu kwa ninamwambira ujeri? ¹⁷ Bee ninamwambira mino kukala, ao odzomudinira kwa mutuwe mafunzo gao, lengo rao ts’i idzo. Ao anahenza mutoke na siswi, mudzilavire tsetsetse kutuwa go gao. ¹⁸ Ni vidzo kudzilavira kutuwa ut’u, bora tu ro lengo rikale ni idzo, na mwenderere kuhenda vivyo ukati wosi, ts’i ukati nichikala ni phamwenga namwi tu hicheye. ¹⁹ Anangu a chiroho nimuhenzao, mimi vivi ninasikira utsungu kahiri kwa dzulu yenu dza muchet’u avyalaye, na utsungu uo nindasala nao ta mukale dza K’irisito tsetsetse. ²⁰ Mimi vivi ninaaza kala ni phamwenga namwi, na phapho niidime kumwambira t’ot’ot’o, maana, vivi mudzinangalaza. ²¹ Hebu nisirikisani mwi Agalatiya muhenzao kukala ts’ini za Shariya. Mukale munayimanya vyo yambavyo jeri yo Shariya mwimwi? ²² Yiyo yinaamba kukala, Burahimu wákala una ana airi a chilume. Mumwenga wámuvyala na musichana yekala ni mugulwa muhumiki, na ye munjine achimuvyala na muchewe mwenye yekala u tsare. ²³ Yuyat’u mwanawe yevyalwa ni ye mugulwa muhumiki, wávyalwa kuchirira t’amaa za chimwiri. Ela ye mwanawe yevyalwa ni muchewe mwenye yekala u tsare, wávyalwa kutuwirizana na chilagane chokala Burahimu ulagwa ni Mulungu. ²⁴ Ndo aa achet’u airi hunaidima kwahwalanisha na go malagano mairi ga Mulungu. Lagano mwenga ni rirat’u ririrolaviwa ni Mulungu Mulima wa Sinai, na muchet’u ariye unga dza lagano riri ni Hajiri, yevyala ana ugulwani uhumiki. ²⁵ Ndo Hajiri unahwalanishwa na Shariya yolaviwa ko Mulima wa Sinai ko Warabuni, na chisha unga dza at’u asagalao pho Jerusalemu ya ts’iku zizi, maana, ao osi a ugulwani uhumiki. ²⁶ Ela yo Jerusalemu ya dzulu yinga dza muchet’u ariye tsare, na ndiyo yiriyo dza ameyehu. ²⁷ Dzulu ya yiyo Jerusalemu ya dzulu, Maandiko ga Mulungu ganaamba, "Hamirwa uwe muchet’u t’asa yets’evyala, piga njerejere kwa raha uwe uriye k’usikirire utsungu wa uvyazi. Maana, ye muchet’u yerichwa ni mulume, ndiye yendevyala ana anji kuchira yuyat’u ariye na ye mulume." ²⁸ Ndo mwimwi enehu a chijeso vivi mu anangwa a Mulungu kulairirana na chilaganeche dza Isaka. ²⁹ Ela vivi maneno ganga dza virat’u vyokala ukati wa Burahimu na o anae airi a chilume. Yuyat’u yevyalwa kuchirira t’amaa za chimwiri, wámuhendera mauku yuyat’u yevyalwa kwa widimi wa Roho wa Mulungu. ³⁰ Ela Maandiko ga Mulungu ganaambadze dzulu ya maneno go? Gago ganaamba, "Muvuguze na mwanawe ye muchet’u ariye ni mugulwa muhumiki, kwakukala, yiye mwanawe k’ana chondopata phapho. Ufa undahwalwa ni yuyat’u mwana yemuvyala na mucheo mwenye ariye u tsare." ³¹ Ndo enehu a chijeso, siswi k’ahu ana a ye muchet’u yekala ni mugulwa muhumiki, ela hu ana a ye muchet’u ariye u tsare.

¹ Siswi hwáikwa tsare ni K’irisito kwa hwenderere kukala tsare. Ndo mwimwi imani kudina muts’iuye kahiri kufungwa ni ugulwa uhumiki. ² Gahegereni masikiro gaga maneno gangu! Mimi P’aulo ninamwambira kukala, mwimwi muchikubali kubit’wats’i kwa muphokerwe ni Mulungu dza enye haki, bee go ga kuhendwa ni ye K’irisito k’agandamunufaisha kamare. ³ Ninamwambira kahiri chila mut’u mino kukala, mut’u yendekubali kubit’wats’i, h’aya ni seti atuwe malagizo gosi ga Shariya. ⁴ Yeyosi kati yenu ahenzaye kuphokerwa ni Mulungu dza mwenye haki kwa kutuwa Shariya, naamanye kukala, wátosa uhusiyanowe na K’irisito, na k’aonerwa mbazi kahiri ni Mulungu. ⁵ Mimi ninaamba vivi kwakukala, Roho wa Mulungu unahuhenda hulolere na kanuni kukala, hundaphokerwa ni Mulungu dza enye haki kwa kumukuluphira K’irisito. ⁶ Maana, at’u achikala anamukuluphira K’irisito Jeso, k’akuna tafauti ya yebit’wats’i na ye ariye k’abit’irwets’i. Ra halahala ni kumukuluphira yiye, na malairiroge ni menzwa. ⁷ Mwimwi mwákala munaenderera kukula chiroho t’ot’ot’o. Ndo ni ani yemulemba ta muchiricha kutuwa ujeri? ⁸ Bee, mafunzo ga ao a kumulemba k’agalaa kwa Mulungu amwihaye mukale anae. ⁹ Ndo dzimanyirireni mwimwi, maana, gago ganagot’a dza hamira ch’ach’e yikoleavyo unga wosi yitsanganywapho na unga wa nganu. ¹⁰ Ela ta vivyo, ninakuluphira Bwana kukala, mwimwi mundakala na ono dza ro rangu, na yiye amwangaishaye akili undatiywa akili ni Mulungu ta akakala ni ani! ¹¹ Enehu a chijeso, mimi nami kala nicheri kufunza at’u kukala, ni seti abit’wets’i ndipho aphokerwe ni Mulungu dza enye haki, bee ningari ts’ihenderwa mauku ni o Ayahudi. Kala mimi nami nicheri kufunza gago, ta ts’isumurira dzulu ya musalaba, bee ningari kukala ts’iakosa o Ayahudi. ¹² At’u ao amuyugao na maneno ga kubit’wats’i, ninaaza kala anahendadzitosa tsetsetse! ¹³ Enehu a chijeso, mwimwi mwáihiwa mukale tsare, ela ts’ikuhwaleni ko kukala kwenu tsare mukakuhenda chisingwa cha kuchimizira t’amaa zenu za chimwiri, its’iphokala, hikirananihikiranani kwa kuhenzana. ¹⁴ Maana, ta yo Shariya yosi yigwiririra lagizo mwenga rambaro, "Muhenze munzio dza vyo udzihenzavyo uwe mwenye." ¹⁵ Ela muchikala mundahakanana, na kutsunana ukati wosi, bee dzimanyirireni muts’idze mukahangamizana. ¹⁶ Ndo ninamwambira mino, mwimwi mazagazi genu gosi nagalongozwe ni Roho wa Mulungu, na phapho ndipho mwimwi k’amundatuwa t’amaa za chimwiri. ¹⁷ Maana, gahenzwago ni t’amaa za chimwiri ndigo gots’ohenzwa ni Roho wa Mulungu. Na gahenzwago ni Roho wa Mulungu, ndigo gots’ohenzwa ni t’amaa za chimwiri. Ndo ye Roho wa Mulungu, na t’amaa za chimwiri, vinapingana kwa ta muts’iidime kuhenda go mugahenzago. ¹⁸ Na kwahivira munalongozwa ni Roho wa Mulungu, k’amu ts’ini ya Shariya. ¹⁹ Mahendo ga t’amaa za chimwiri k’agatangwatangwa. Gago ni uzinzi, mahendo makolo, udiya, ²⁰ kuvoya milungu ya vinyago, utsai, kumenana, kugomberana, kulaiwa ni matso kwa vya at’u, kutsukirwa kwenda, moyo wa kudziunula, mutsamukano, kusikizana na o akubalio go gako tu bahi, ²¹ chidzitso, unwadzi, mahendo makolo gosi gahendwago shuhulini za ataifa, na manjine dza gaga. Bee, ninamukanya mino dza vyomukanya kare phokala hu hosini kukala, at’u ao endererao kuhenda maneno gaga, k’aandaphenya Ufalumeni kwa Mulungu. ²² Ela galaviwago ni Roho wa Mulungu ni kuhenzana, raha, reri, kuvumirira, mbazi, kuhenda madzo, kukuluphirika, ²³ up’ore na kudzidinisa kwa ta uts’ihende dambi, na maneno gago hakika k’aga chinyume cha shariya. ²⁴ At’u amukuluphirao K’irisito Jeso ágaulaga kwa kugakot’a misumari musalabani go ga chimwiri na t’amaaze mbii. ²⁵ Kwahivira siswi hwáhewani uzima uphya wa kare na kare ni Roho wa Mulungu, nahumutuweni yiye mwehu mazagazini. ²⁶ Na nahuts’idziunuleni, huts’inyet’eraneni, hebu konerana chidzitso.

¹ Enehu a chijeso, mumwenga wenu achigafilika na ahende dambi, arat’u ario a chiroho jeri kati yenu, naakamuudze kutuwa ujeri. Ela ta vivyo, gago naagahende kwa njira ya up’ore, na adzimanyirire ta ao ats’idze nao akajezwa ahende dambi. ² Avizanani mizigo yimumemerezerayo, na phapho mundakala munachimiza lagizo ra K’irisito. ³ Mut’u achidzona una tende na kumba k’ana tende, bee yiye unadzilemba mwenye. ⁴ Ndo chila mut’u naalaule mahendoge mwenye, achigaona ni madzo, h’aya naahende ngulu kwa gago, ela naats’igahwalanishe na ga at’u anjine. ⁵ Maana, chila mut’u niatsukule muzigo wa mazagazige mwenye. ⁶ At’u afunzwao neno ra Mulungu, na-aagavye alimu ao miyo yao yosi midzo. ⁷ Muts’idzilembe mwimwi enehu a chijeso! K’akuna mut’u aidimaye kumuphuphiza Mulungu. Mimi ninaamba vivi kwakukala, mut’u uguwa chirat’u aphandacho. ⁸ Mut’u aphandaye mai kwa kutuwa t’amaaze mbii za chimwiri, undaguwa kuhangamizwa kwa kutuwa zo t’amaaze mbii za chimwiri. Ela aphandaye madzo kwa kutuwa ga Roho wa Mulungu, undaguwa uzima uphya wa kare na kare kwa kutuwa ga ye Roho wa Mulungu. ⁹ Siswi nahuts’itsokeni kuhenda madzo kwakukala, hundakudzaguwa mavunoge o ukati opangwa ni Mulungu, huchikala k’ahurichire kuhenda madzo. ¹⁰ Ndo hupatapho ukati, nahuhendeni madzo kwa at’u osi, na kamwe akuluphiri anziehu. ¹¹ Enehu a chijeso, gaga ninagaandika mimi P’aulo mwenye, chisha na harufu bomu-bomu. ¹² Ao at’u adina kumugaramisha mubit’wets’i, maana, anahenza aahamye at’u, na gago anagahenda tu kwa anamanya achisumurira dzulu ya kukala, K’irisito wáfa musalabani kwa ativye at’u, andahenderwa mauku. ¹³ Na ta ao obit’wats’i chisha, k’aachimiza malagizo gosi ga yo Shariya, ta ni o anahenza mwimwi namwi mubit’wets’i, h’aya o adzivunye kwa Ayahudi anziao kwa ko kubit’wats’i kwenu. ¹⁴ Chiphangu mimi P’aulo, ts’indadzivunya na chit’u chinjine, its’iphokala kwa kukala K’irisito wáfa musalabani kwa dzulu yehu siswi, na gago ndigo gatumago ta ts’igaona gana tende kahiri go maneno ga dunia yiyi. ¹⁵ Vivi rangu ra halahala ni mut’u avyalwe luphya akale chumbe chiphya, ela ts’i ga yuno wábit’wats’i, hebu k’abit’irwets’i. ¹⁶ Mulungu naaonere mbazi na aahende asagale na reriye o at’u osi atuwao maneno gago, maana, ao bee ndio at’u a Mulungu jeri. ¹⁷ Kwanzira vivi, naphats’ilairire mut’u akaniyuga kahiri kwakukala, mumu mwangu mwirini bee mu tele makuphyu ga p’igwa, na gago ganaonyesa kukala, mimi ni muhendikazi wa Jeso jeri. ¹⁸ Bwana wehu Jeso K’irisito nenderere kuhats’a roho zenu mwimwi enehu a chijeso. Amina!