AEFESO

AEFESO

¹ Ni mimi P’aulo, muhumwa wa Jeso K’irisito niriye na widimi yeolohewa ni Mulungu. Ninamwandikira mwimwi ajeso a Efeso, murio mu anafunzi a Jeso K’irisito a kukuluphirika. ² Abayehu Mulungu na Bwana Jeso K’irisito naamuhats’e, na amuhende musagale na reri yao. ³ Naalikwe Mulungu Abaye Bwana wehu Jeso K’irisito! Maana, wáhwajaliya manoso gosi ga chiroho galaago dzulu, kuchirira K’irisito, ⁴ na ta chisha, Mulungu wáhutsagula hangu phokala k’adzangwe kuwumba ta o urumwengu, hukale at’ue kwa njira ya kumukuluphira Jeso K’irisito kwa ta hukale atakatifu, na ots’o ila yoyosi mbereze. Gago gosi wáhuhendera, kwakukala, unahuhenza. ⁵ Chisha, Mulungu wáamula hangu pho p’indi kuhuhenda hukale anae, na Jeso K’irisito achidzagachimiza gago. Gago ndigokala Mulungu unagahenza, na ganamuhamira. ⁶ Ndo nahumulikeni Mulungu kwa vyohwonyesa unahuhenza muno kuchirira Mwanawe amuhenzaye. ⁷ Siswi hwákombolwa kuchirira yo milatso ya Mwanawe, yaani, dambi zehu zásamehewa, na gago ganaonyesa kukala, Mulungu unahuhenza jeri. ⁸ Mulungu wáhwonyesa unaswi mbazi, na achihup’a hekima yosi na kumanya. ⁹ Yiye wáhufunulira garat’u gokala k’akuna agamanyaye. Gago ndigokala Mulungu udzamula kugahenda kuchirira Jeso K’irisito. ¹⁰ Maneno goamulwa kuhendwa ni Mulungu, garigo undagamala ts’ikuye yichifika, ni kuvireha phamwenga vyumbe vyosini vya mbinguni na vya duniani vitawalwe ni Jeso K’irisito. ¹¹ Maneno gosi gahendwa kutuwiriza Mulungu aojavyo, na aamulavyo. Siswi Mulungu wáhutsagula hukale at’ue kuchirira kumukuluphira Jeso K’irisito, na gago wáamula kugahenda hangu pho p’indi, maana, ndigokala unagahenza. ¹² Ndo siswi oanza kumukuluphira Jeso K’irisito, hunahenzwa humulike Mulungu kwa ubomuwe. ¹³ Mwimwi namwi vivi mwáusikira o udzumbe wa jeri, yaani Nguma Mbidzo yimuhendayo mutiye. Na muriphomukuluphira K’irisito, Mulungu wámupiga mola wa konyesa mu at’ue kuchirira kumup’a Rohowe yekala ulaga. ¹⁴ Mulungu wáhup’a ye Rohowe dza muzamana kukala, undahup’a gosi golaga at’ue, na neno riro rinahuhenda hukale na kanuni kukala, Mulungu undaakombola osi ario ni akwe. Nahumulikeni Mulungu kwa ubomuwe! ¹⁵ - ¹⁶ Enehu a chijeso, mimi ninamulavira mumvera Mulungu ukati wosi kwa gomuhendera mwimwi. Gago nágaanza kulaira niriphosikira munamukuluphira Bwana Jeso, na munaahenza ajeso anzienu osi. Ndo mimi chila nivoyapho, ninamuvoyera ta mwimwi ¹⁷ kukala, Mulungu wa Bwana wehu Jeso K’irisito, ariye ndiye Abayehu wa widimi unji, amup’e Rohowe. Yiye Rohowe ndiye yendemufunulira mumanye maneno ga chiroho, na ujeri dzulu ya Mulungu, kwa ta mumumanye jeri. ¹⁸ Ninamuvoyera mwidimiswe kumanya ujeriwe, na phapho mugamanye go maneno madzo arigo wámwiha kwa mugalolere, na chisha phapho ndipho mundamanya ubomu wa manoso golaga kwap’a at’ue. ¹⁹ Na mumanye kukala, o widimi wa Mulungu uhendao kazi mwehu ndani siswi hukuluphirao, bee ni unji muno yenye. Widimi uu uhwavizao siswi ajeso, bee unga dza o urio ²⁰ Mulungu wáuhumira kumufufulira Jeso K’irisito kulaa kuzimu, na achimuzagaza mukonowe wa kulume ko mulunguni atawale. ²¹ Ndo Jeso K’irisito kuko dzulu unatawala na widimi unji muno kuchira chila mutawali, mwenye widimi, mwenye cheo, chila chilongozi, na chila chit’u kwenye urumwengu uu, na ta o udzao. ²² Mulungu wáika vit’u vyosi ts’ini za utawali wa Jeso, na achimulavya ye mutawali wa vyosi, akale chitswa cha kanisa. ²³ Na ro kanisa ririro ni mwiriwe, richimizwa ni K’irisito ariye ndiye achimizaye chila chit’u, chila phat’u.

¹ Enehu a chijeso, p’indi mwimwi mwákala mudzefa chiroho, maana, mwákala k’amumogopha Mulungu, na mu adambi. ² Ukati uo mwimwi mwákala munahenda mai dza go gahendwago ni ataifa, mwákala mogopha ye mutawali mui atawalaye mapepo ga dzulu, na yiye vivi ndiye ahendaye kazi myoyoni mwa at’u ots’omogopha Mulungu. ³ Na ta siswi hosini hwákala hunga dza ao ataifa, hwákala hu chimwiri, na hwákala huhenda go huhumwago ni miiri, na akili zehu. Ndo kwakukala, hwákala hu adambi dza vyo arivyo ataifa osi, Mulungu wákala undahutiya akili dza chila mut’u. ⁴ Ela Mulungu una mbazi muno, na unahuhenza muno. ⁵ Ndo ta huripho hwákala hudzefa chiroho kwa go madambi gehu, Mulungu wáhufufula phamwenga na Jeso K’irisito. Mwimwi nimumanye kukala, Mulungu wámutivya kwa una mbazi muno. ⁶ Mulungu wáhufufula ko chifoni cha chiroho, dza vyomufufula Jeso kulaa kuzimu, na achihup’a chihi cha utawali na Jeso K’irisito ko mulunguni, maana, siswi na yiye hu chit’u chimwenga. ⁷ Mulungu gago wágahenda kwa adze aamanyise at’u zo ts’iku zidzazo kukala, una mbazi nyinji kwa vyohuhenza siswi muno kuchirira Jeso K’irisito. ⁸ - ⁹ Mwimwi nimumanye kukala, Mulungu wámutivya kwa una mbazi nyinji, na kuchirira kuluphiro renu. Yiye ts’i kwamba wámutivya kwa phanjine mwákala mudzihenda chadi cha mutiye, ta ye ni wámunosa tu kwa ats’idze mut’u akadziunula na o wokofu. ¹⁰ Mulungu wáhupangira huhende maneno madzo, na husagale vyo ahuhenzavyo husagale ts’iku zosi. Gago ndigotuma ta achimuhuma K’irisito Jeso achidzahuhenda hukale vivi hurivyo. ¹¹ Ela ta vivyo, muts’inyale mwimwi kukala, mwákala mu at’u a makabila manjine chihumbo. Mwimwi mwákala mwihiwa "At’u ots’obit’wats’i" ni Ayahudi ario ákala ana ngulu na ko kubit’wats’i kwao, ta kuripho kwákala kuzuru miiri yao tu, ela ts’i myoyo yao. ¹² Mwimwi pho p’indi mwákala k’amumumanya K’irisito ni ani, mwákala k’amu kati ya Aiziraeli ario ni at’ungwa a Mulungu, na mwákala k’amuvimanya vyo vilagane vyokala Mulungu udziap’a at’ue. Mwimwi phapha duniani mwákala musegere phots’omumanya Mulungu, na phots’ololera chochosi, ¹³ ela vivi mu at’u a K’irisito Jeso. Na ta muripho pho p’indi mwákala mu kure na Mulungu, ela vivi mwárehewa phephi naye ni yo milatso ya K’irisito. ¹⁴ Yiye Jeso K’irisito mwenye wáhuhenda husagaleni na reri, kwa kuhuhenda siswi Ayahudi na mwimwi at’u a makabila manjine, hukaleni amwenga. P’indi Ayahudi na at’u a makabila manjine ákala k’aakala phamwenga ta wamba pho kati-kati yao phákala phana dzikuta rodzoagavya. Ela Jeso K’irisito ariphofa musalabani, uhadui uo okala unga dza dzikuta achiwusa. ¹⁵ Shariya ya Ayahudi yákala yina malagizo manji, na maada manji. Ela Jeso K’irisito achidzayiusa, kwa ta aahende Ayahudi na at’u a makabila manjine akale at’u a chivimwenga amukuluphirao yiye, na vivyo ndivyohenda at’u asagale na reri. ¹⁶ Jeso K’irisito ariphofa musalabani, o uhadui wa Ayahudi na at’u a makabila manjine wáwusa, achiahenda akale at’u amwenga, na achiahenda atseke na Mulungu. ¹⁷ Ndo Jeso K’irisito wáreha yiyo Nguma Mbidzo ya kwahenda at’u asagale na reri, kwa at’u osi; kwenu mwimwi at’u a makabila manjine muriokala mu kure na Mulungu, na kwa Ayahudi okala a phephi na Mulungu kare. ¹⁸ Ndo vivi siswi Ayahudi na mwimwi at’u a makabila manjine hunaidima kudza phephi na Baba Mulungu kwa wavizi wa ye Rohowe mumwenga, kwa gohenderwani ni K’irisito. ¹⁹ Ndo kulairirana na gaga, mwimwi at’u a makabila manjine k’amu ajeni kahiri na at’u a Mulungu. Maana, mwátsanganywa phamwenga nao, na vivi hosini hu at’u a mudzi umwenga, urio ni wa Mulungu. ²⁰ Mwimwi namwi munga dza nyumba yoanzwa ni ahumwa a Jeso okala na widimi na agomvi a Mulungu, na ye Jeso K’irisito ndiye ariye dza mulongohi wa nyumba yiyo. ²¹ Yiye Jeso K’irisito ndiye yedzehugwizanya phamwenga siswi akuluphiri hosini, na unahukuza ta hukale hekalu takatifu ra Bwana. ²² Ndo kwakukala, munamukuluphira Jeso K’irisito, mwimwi namwi vivi munajengwa phamwenga na o ajeso anjine osi, kwa ta mukale pharat’u phat’u aripho Roho wa Mulungu unasagala.

¹ Mimi P’aulo vivi ni jela, kwakukala, ni muhendikazi wa Jeso K’irisito asumuriraye yiyo Nguma Mbidzo kwa mwimwi at’u a makabila manjine. ² Na nina kanuni mwásikira kukala, Mulungu kwa mbazize mwenye, wánip’a kazi yiyi ya kumusumurira mwimwi Nguma Mbidzo. ³ Mulungu wánifunulira mupangowe okala k’akuna aumanyaye. (Mimi nidzandika kwa ufuti dzulu ya uo mupango, ⁴ na mwimwi muchigasoma gago godzogaandika kare, mundamanya kukala, ninaumanya uo mupango wa Mulungu, urio vivi K’irisito wáuhenda umanywe.) ⁵ Phapho p’indi, at’u ákala k’aaumanya uo mupango, ela vivi Mulungu wáufunulira ahumwa a widimi, na agomvie atakatifu kuchirira Rohowe. ⁶ Ndo gokala k’akuna agamanyaye pho p’indi ni kwamba, Nguma Mbidzo yáahenda at’u a makabila manjine na Ayahudi, osi apate manoso ga Mulungu; osi akale vilungo vya mwiri umwenga, na osi andapata manoso golagwa ni Mulungu kuchirira kumukuluphira Jeso K’irisito. ⁷ Mulungu wánip’a kazi yiyi ya kusumurira Nguma Mbidzo, kuchirira mbazize mwenye, na widimiwe. ⁸ Kati ya at’u osi a Mulungu, mimi ndimi wa ts’ini. Ela Mulungu wánip’a chipaji cha kwasumurira at’u a makabila manjine utajiri wa K’irisito ots’osika. ⁹ Na chisha, niaambire at’u osi dzulu ya uo mupango, urio Mulungu ariye ndiye muumbi wa vit’u vyosi, wákala udziafitsa kulaa pho mwanzo. ¹⁰ Na lengore rákala ni, vivi aonyese hekimaye nyinji kwa atawali na enye widimi ko mulunguni, kuchirira kanisare. ¹¹ Mulungu wáhenda vivi kwakukala, vivyo ndivyokala upanga hangu pho mwanzo, na gago achidzagachimiza kuchirira Bwana wehu Jeso K’irisito. ¹² Siswi vivi hunaidima kumusengerera Mulungu phots’o woga, kwakukala, hulola Jeso K’irisito tu mo mwehu mazagazini. ¹³ Ndo ninamuvoya muts’ife moyo kwa mimi ninashononeka kwa dzulu yenu, maana, kuko kundamwaviza mwimwi. ¹⁴ Enehu a chijeso, gago gohenderwani ni Baba Mulungu, bee gananihenda nimit’e mavindi kumuvoya yiye Baba Mulungu, ariye ¹⁵ ndiye abaye midzungu yosi ya at’u a chila phat’u. ¹⁶ Mulungu una utajiri wosi. Ndo naamuhende mukomale chiroho kuchirira Rohowe, kulairirana na uo utajiriwe ario nao. ¹⁷ Na kukala, Jeso K’irisito aenderere kusagala mwenu myoyoni vyo murivyo munamukuluphira. Ninavoya vivyo kukala, mazagazi genu gamit’e mizi ya ndani kwenye menzwaye, ¹⁸ kwa ta mwimwi na ajeso anzienu osi mwidime kugwira walamu, ure, chimo, na china cha yo menzwa ya K’irisito. ¹⁹ Ninamuvoyera mwidime kumanya menzwa ya K’irisito ta yiripho ni bomu muno ta k’amwidima kuyimanya tsetsetse, kwa ta muudzazwe uzima, na widimi wa Mulungu. ²⁰ Mulungu unaidima kuhuhendera mabomu kuchira gosi garigo hunaidima kugavoya, hebu kugalilikana kwa o widimiwe uhendao kazi mwehu ndani. ²¹ Mulungu naalikwe ta kare na kare kwa kanisare, na Jeso K’irisito! Amina.

¹ Enehu a chijeso, mimi P’aulo niriye vivi ni jela kwakukala ninamuhikirahikira Bwana, ninamuvoya musagale mazagazi garigo ganawirya o mwiho murioihirwa ni Mulungu. ² Mwimwi ukati wosi kalani arumwengu na ap’ore, vumiriranani na muhenzane. ³ Hendani vyenu vyosi mwidimavyo mone kukala, munaenderera kukala na umwenga urehewao ni Roho wa Mulungu, na mugwizanywe phamwenga ni reri. ⁴ Siswi ajeso hosini hu mwiri umwenga, Roho wa Mulungu huriye naye ni mumwenga vivyo, na hosini hwáihiwa kwa hulolere kupata manoso mamwenga ga Mulungu. ⁵ Kuna Bwana mumwenga tu, kuluphiro mwenga, na ubatizo umwenga. ⁶ Kuna Mulungu mumwenga ariye ndiye Abaye at’u osi, atawalaye osi, unahenda kazi kuchirira osi, na u ndani mwa osi. ⁷ Elako, chila mumwenga wehu wáhewa chipaji ni ye Jeso K’irisito, kutuwirizana na vyoamula yiye. ⁸ Vivi vinagwa sawa na Maandiko ga Mulungu gaambago, "Ariphokwenda ko dzulu kwenye, wákwenda na okala udziahwala mateka, na achiap’a at’u vipaji." ⁹ Ndo maanaye nini gano maneno gaambago, "Wákwenda dzulu"? Maanaye ni kwamba, yiye wáanza kudza phots’i phapha duniani. ¹⁰ Ndo yiye yekudza phots’i, ndiye yiye yekwenda dzulu mulunguni kwenye, kwa ta akale chila phat’u. ¹¹ Yiye yedzambwa, "Wáap’a at’u vipaji," ndiye ariye at’u anjine wáaika akale ahumwae enye widimi, anjine agomvi a Mulungu, anjine avumisi a Nguma Mbidzo, na anjine amanyiriri a ajeso, ario ni alimu. ¹² Na ao kazi yao ni kwabambanya at’u a Mulungu amuhikirehikire, na ajenge kanisa, ririro ni mwiri wa Jeso K’irisito, ¹³ ta siswi hosini hukaleni na kuluphiro mwenga, na kumumanya Mwanangwa wa Mulungu, kwa ta hukomaleni chiroho, na hukaleni vyo arivyo K’irisito mwenye. ¹⁴ Na phapho k’ahundakalani kahiri dza anache, hebu kuphirikwa hiku na hiku, na kukukulwa ni mafunzo ga ulongo garehewago ni alembi kwa aayaze anjine na ukora wao. ¹⁵ Its’iphokala, siswi nihugombeni ujeri, na huhenzaneni, na phapho ndipho hundakomalani chivyovyosi na hukaleni dza K’irisito, ariye ndiye chitswa cha kanisa. ¹⁶ Jeso K’irisito ndiye alongozaye vilungo vyosi vya mwiri, kwa vigwirane phamwenga vikale mwiri umwenga. Na chila chilungo mo mwirini chinaaviza kuugwizanya phamwenga o mwiri. Ndo chila chilungo chichihenda go chihenzwago chihende, na vihenzane muno, o mwiri wosi undakula, na udzijenge. ¹⁷ Enehu a chijeso, mimi dza mutumia wa Bwana bee ninamukanya kukala, muts’enderere kusagala dza at’u ots’omukuluphira Mulungu. Ao maazo gao k’agana tende, ¹⁸ na a dzizani. At’u ao bee a kure na uzima uphya urio Mulungu unaap’a at’u kwakukala, k’aamanya njiraze, na k’a-aambirika. ¹⁹ Ao anahenda mai, na mahendo makolo gosi ukati wosi, na gago ta k’aanago haya. ²⁰ Ela mwimwi, gofunzwa dzulu ya K’irisito ts’i higo! ²¹ Mimi nina kanuni mwásikira nguma za Jeso, na muchifunzwa kwa widimiwe kutuwirizana na o ujeri urio kwakwe. ²² Ndo mwáfunzwa muriche mwendo wenu okala nao phokala k’amudzangwe kokoka, yaani mazagazi genu gokala muchisagala, garigo gákala ganabanangwa ni t’amaa za kulemba. ²³ Na mwáfunzwa vivyo kukala, maazo genu nigatawalwe ni Roho wa Mulungu. ²⁴ Na kukala, mwimwi enye mukale na mwendo uphya, maana, mu vyumbe viphya virivyo Mulungu wávyumba dza vyo arivyo ye mwenye, kwenye kuhenda ga haki jeri, na kukala atakatifu. ²⁵ Ndo kwahivira mwáricha kulemba, chila mut’u naamwambire ujeri mujeso munziwe, kwakukala, hosini hu vilungo vya mwiri umwenga. ²⁶ Mwimwi muchikoseka, muts’itsukirwe muno ta mukahenda dambi, na muts’isinde dii kutsukirwa, ²⁷ maana, vivyo vinaidima kumup’a nafasi Shetani. ²⁸ Yekala achiiya, naats’iiye kahiri vivi, ta naanze kuhenda kazi ya hilali, kwa ta adzipatire gakwe arigo unago haja na aidime kwaaviza achiya. ²⁹ Mwimwi muts’igombe maneno mai kamare. Its’iphokala, gombani maneno madzo ga kwaaviza at’u, na ga kujenga gagwago sawa na haja zao, kwa ta ondomusikira munagomba bee abarikiywe. ³⁰ Na ts’imushononeseni Roho wa Mulungu, ariye ndio mola wa Mulungu wa konyesa mu akwe, na uhakikisho kukala, ts’iku yinadza yiriyo Mulungu undamukombola. ³¹ Ndo muts’ikale na utsungu kamare, ukali, usiru, maneno ga chisiru, kutsunana, na maneno mai gosi. ³² Its’iphokala, kalani na myoyo midzo, monerane mbazi, na musameheane dza Mulungu arivyomusamehe kuchirira Jeso K’irisito.

¹ Mwimwi kalani dza Mulungu, maana, mu anae amuhenzao. ² Sagalani na kuhenzana, dza virat’u K’irisito arivyohuhenza ta achidzilavya achifa dza sadaka ya k’ungu ya kunuk’at’o kwa Mulungu kwa dzulu yenu. ³ Mwimwi kwahivira mu ajeso vivi, k’amuhenzwa muhadzwe na uzembe kamare, mahendo makolo, hebu kulaiwa ni matso kwa vya mut’u. ⁴ Na k’amuhenzwa mugombe maneno ga kuhakana, maneno ga chizuzu, hebu mare mai, maana, gago k’agawirya kuhadzwa na mujeso. Its’iphokala, mwi munahenzwa mumulavire mumvera Mulungu. ⁵ Mwimwi nimumanye kamare kukala, muzembe, ahendaye makolo, hebu alaiwaye ni matso kwa vya mut’u (ariye wabudu vyo vit’u), k’andaphenya Ufalumeni kwa Jeso K’irisito, na Mulungu. ⁶ Muts’ikubali kulembwa ni mut’u na maneno ga ulongo, kwakukala, gago maneno godzogahadza phapho dzulu ndigo gondoricha ta Mulungu aatiye akili o ario k’aamogopha. ⁷ Ndo muts’igwirikane nao at’u ao. ⁸ P’indi mwimwi mwákala mu dzizani, ela vivi mwáupata mwanga wa Bwana. Ndo sagalani chiat’u ario mwangani ahenzwavyo asagale. ⁹ Maana, malairiro ga at’u ario mwangani ni kuhenda madzo gosi, kuhenda ga haki, na ga jeri. ¹⁰ Mwimwi ukati wosi lilikanani garat’u gamuhamirago Bwana. ¹¹ Mwimwi ts’igahendeni kamare gago mahendo mai gahendwago dzizani, ta mwi aonyeseni at’u kukala, gago ni mai. ¹² Maana, maneno gago gahendwago chisiri-siri dzizani, ni waibu ta ko kugahadza. ¹³ Ela mwanga uchimwirika chit’u chochosi, at’u nikuchimanya chit’u chicho, ¹⁴ kwakukala, mwanga ndio uhendao chit’u choneke. Gago ndigo gatumago ta at’u anaamba, "Lamuka we urereye, fufuka kulaa kuzimu, naye K’irisito undakumwirikira mwanga." ¹⁵ Ndo gamanyirireni go menenzi genu. Mwimwi sagalani dza at’u a hekima, ela ts’i dza at’u ots’o hekima. ¹⁶ Humiranit’o chila nafasi kuhenda madzo, kwakukala, ts’iku zizi ni mbii. ¹⁷ Ndo mwimwi ts’ikaleni azuzu, ela gamanyeni go mahenzo ga Bwana. ¹⁸ Mwimwi ts’irevyweni ni uchi kwakukala, uo undamubananga. Its’iphokala, udzalwani ni Roho wa Mulungu, ¹⁹ na phapho mundaimba maneno ga zaburi, p’ambiyo na mira ga chiroho kati yenu, na kuno munamwimbira Bwana mo myoyoni mwenu. ²⁰ Na chisha, mundamulavira mumvera Baba Mulungu ukati wosi kwa dzina ra Bwana wehu Jeso K’irisito, kwa chila rondolairira. ²¹ Na kamare chila mumwenga wenu naadziike ts’ini za munziwe kwa maana, munamogopha K’irisito. ²² Mwi ache, mwimwi dziikeni ts’ini za alume enu dza vyo murivyo ts’ini za Bwana. ²³ Maana, mulume ndiye chitswa cha muchewe, dza virat’u K’irisito arivyo ndiye chitswa cha mwiriwe, yaani kanisa; naye ndiye Mutivyi wa ro kanisa. ²⁴ Ndo virat’u kanisa ririvyo ts’ini ya K’irisito, ache namwi dziikeni ts’ini za alume enu kwa chila neno. ²⁵ Mwi alume namwi, mwimwi ahenzeni ache enu dza K’irisito arivyorihenza kanisa ta achidzilavira kufa kwa dzuluye, ²⁶ na ariphoritsukutsa na madzi kuchirira neno ra Mulungu, achidziikira k’anda. ²⁷ Jeso wáhenda vivyo kwa ta ro kanisa richidzaima mbereze, rikale rinametameta phots’o bakwa, kasoro hebu chochosini dza vivyo, its’iphokala rikale takatifu na rots’o ila. ²⁸ Ndo mwimwi alume namwi, ahenzeni ache enu dza vyo muhenzavyo miiri yenu. Mulume achikala unahenza muchewe, ukala unadzihenza mwenye. ²⁹ Maana, k’akuna mut’u amenaye mwiriwe mwenye ta its’iphokala unaumanyirira na kuuhenza, dza virat’u K’irisito amanyiriravyo kanisa, ³⁰ kwakukala, ni mwiriwe, na siswi hu vilungo vya mwiri uo. ³¹ Maana, Maandiko ga Mulungu ganaamba, "Gaga ndigo gatumago ta mulume achihwala, undaatelephuka avyazie, agwirikane na muchewe, na ao airi bee andakala dza kwamba ni mut’u mumwenga." ³² Andiko riri bee rifitsa ujeri ubomu, ela mino ninagomba dzulu ya K’irisito, na kanisa. ³³ Elako, chila mumwenga ta mwimwi naamuhenze muchewe dza vyo adzihenzavyo ye mwenye, na chila muche naye namwishime mulumewe.

¹ Mwi ana, mwimwi aishimeni avyazi enu dza vyo mumwishimavyo Bwana, kwakukala, yiyo ni haki. ² Kamare, lagizo ra kwanza ririro rinaalaga madzo ondorituwa rinaamba, "Aishime abayo na ameyo, ³ nawe undatserezerwa bugu, na usagale myaka minji phapha duniani." ⁴ Mwi ano baba namwi, mwimwi arereni ana enu kwa kwambira, na kwafunza mafunzo ga Bwana, ela ts’i kwagombera-gombera. ⁵ Mwi agulwa ahumiki, mwimwi aishimeni, na aogopheni aguli enu a phapha duniani. Ao ahikirenihikireni na myoyo ya kutsuka dza kwamba munamuhikirahikira K’irisito, ⁶ na ts’iaogopheni aguli enu ukati muchikala mu phamwenga nao tu kwa kuhenza kulikwa. Ela aogopheni na myoyo yenu yosi, maana, gago ndigo gahenzwago ni Mulungu, na ta kamare mwimwi mu agulwa ahumiki a Jeso K’irisito. ⁷ Mwimwi hendani kazi yenu ya chiugulwa na moyo dza kwamba munamuhikirahikira Bwana, ela ts’i at’u tu. ⁸ Mwimwi nimumanye kukala, Bwana k’ana ga yuno ni mugulwa muhumiki hebu u tsare, ta ye undanosa madzo chila mut’u mudzo. ⁹ Mwi aguli namwi, mwimwi ahenderenit’o agulwa ahumiki enu, na muts’iaogofye-ogofye. Mwimwi nimumanye kukala, mwimwi na ao agulwa ahumiki enu, mosini Bwana wenu ni mumwenga ko mulunguni, na yiye k’alola cheo cha mut’u. ¹⁰ Enehu a chijeso, rangu ra musindikizo ni kwamba, patani nguvu kulaa kwa Bwana, kwakukala, una widimi unji. ¹¹ Mwimwi valani ch’inga zosi muhewazo ni Mulungu kwa ta mwidime kudzirinda na mbinu mbii za Shetani. ¹² Mwimwi zivaleni zizo ch’inga, kwakukala, k’ahuhehani na adamu anziehu, its’iphokala, hunahehani na atawali, enye widimi, nguvu za urumwengu uu wa dziza, na mapepo mai gatawalago garigo dzulu. ¹³ Ndo mwimwi valani ch’inga zosi muhewazo ni Mulungu, kwa ta ao achimugwavukira ats’imuzuru, na gago gachisira mukale mucheri kwima kudina. ¹⁴ Ndo dzirindeni kwa kumanya ujeri wa Mulungu, na uo undakala dza ukanda wa kudzifunga mwenu vyununi: kalani na haki ya Mulungu, na yiyo yindakala dza ngao ya myoyo yenu. ¹⁵ Kalani na reri yirehewayo ni Nguma Mbidzo, na yiyo yindakala dza virahu vya kurinda nyayo zenu. ¹⁶ Phamwenga na vivyo vyosi, gwiririrani kinyi kuluphiro, na riro rindakala dza ch’inga ya kufisa mivi yosi ya moho mujezwayo ni ye Mui. ¹⁷ Humirani wokofu wenu dza k’ofiya ya kudzichingira chitswani, na neno ra Mulungu kulaa kwa Rohowe dza upanga wenu. ¹⁸ Kalani muchivoya chiroho ukati wosi mavoyo ga chila aina na viriro vyenu. Mwimwi dzimanyirireni, na mukale avumiriri kwavoyerani at’u a Mulungu osi. ¹⁹ Na chisha, nivoyerani nami kukala nichikala ninagomba, Mulungu anip’e ra kugomba kwa ta nigombe phots’o woga, na phapho niaambire at’u Nguma Mbidzo yokala p’indi k’ayimanywa. ²⁰ Mimi ni mutumia wa Jeso K’irisito, na vivi ta ni chifungoni, kwakukala, nákala ninasumurira yiyo Nguma Mbidzo. Ndo nivoyerani kukala, niyisumurire yiyo Nguma Mbidzo phots’o woga dza vyo nihenzwavyo nihende. ²¹ - ²² Ninamuhuma Tukiko, ndugu yehu wa chijeso humuhenzaye. Yiye ni muhendikazi wa Bwana akuluphirikaye, na ninamuhuma kwa ta adze amwambire gosi gohupata kuku, na amutiye moyo. Na kamare undakudzamwambira gosi gonipata mimi mwenye mwiri, na phapho mundamanya vyo nendereravyo. ²³ Baba Mulungu na Bwana Jeso K’irisito naamuhende mwimwi enehu a chijeso mosi musagale na reri yao, muhenzane na mwakuluphire ao. ²⁴ Mulungu naamuhats’e mosi mwimwi mumuhenzao Bwana wehu Jeso K’irisito na menzwa yiriyo k’ayindalaa kamare.