AKOLOSAI

AKOLOSAI

¹ Ni mimi P’aulo muhumwa wa Jeso K’irisito niriye na widimi yeolohewa ni Mulungu, na mwenehu wa chijeso T’imoti. ² Ninamwandikira mwimwi enehu a chijeso a mudzi wa Kolosai mukuluphirikao, na mwádzilavira tsetsetse kumutuwa Mulungu. Abayehu Mulungu naamuhats’e, na amuhende musagale na reriye. ³ Enehu a chijeso, siswi hunamulavira mumvera Mulungu, Abaye Bwana wehu Jeso K’irisito ukati wosi chila humuvoyerapho. ⁴ Siswi hunahenda vivyo kwakukala, hwásikira munamukuluphira Jeso K’irisito jeri, na munaahenza ajeso anzienu osi, ⁵ kwa go genu mugalolerago. Gago mwágamanya ukati muriphosumurirwa urat’u udzumbe wa jeri, yaani Nguma Mbidzo, na vivi munamanya kukala, gago mugalolerago, bee munaikirwat’o ko mulunguni. ⁶ Vivi Nguma Mbidzo yinagot’a kut’u kunji, na o ayikuluphirao anakaza kukomala chiroho dza virat’u virivyo kwenu mwimwi, kwanzira ts’iku yiyat’u muriphoyisumurirwa na kumanya kukala, Mulungu unamuhenza, na una mbazi jeri. ⁷ Mwimwi mwáambirwa ni Epafura muhendikazi wa Bwana munziwehu humuhenzaye dzulu ya kukala, Mulungu una mbazi jeri. Epafura ni muhendikazi akuluphirikaye wa Jeso K’irisito kwa dzulu yenu. ⁸ Chisha, yiye ndiye wáhwambira dzulu ya jisi Roho wa Mulungu amuhendavyo muhenzane na ajeso anzienu osi. ⁹ Ndo huriphosikira nguma zizo dzulu yenu tu, hwáanza kumuvoyera, na hunaenderera kumuvoyera kukala, Mulungu amuudzaze hekima na kumanya kurehewako ni ye Rohowe, kwa ta mugamanye garat’u gakwe gosi amuhenzago mugahende. ¹⁰ Muchigamanya gago, mundasagala dza Bwana ahenzavyo, na muhende garat’u gamuhamirago yiye ts’iku zosi, mundakala muchihenda maneno madzo ukati wosi, na mundakaza kumumanya Mulungu jeri. ¹¹ Hunamuvoya Mulungu amuudzaze nguvuze za kwangalaza, kwa ta mukashononeswa dzadze, chisha mwi mwidime kuvumirira, na muhamirwe kwa Bwana, ¹² na phapho mumulavire mumvera Baba Mulungu. Maana, wámuhenda namwi mwende mukavipate virat’u vit’u arivyovilaga kuvip’a at’ue ko mulunguni kwenye mwanga. ¹³ Mulungu wáhutivya kulaa utawali wa dziza wa Shetani, na achihureha t’ot’ot’o hutawalwe ni Mwanawe amuhenzaye. ¹⁴ Mulungu kuchirira ye Mwanawe wáhwika tsare, yaani wáhusamehe madambi gehu. ¹⁵ K’akuna mut’u aidimaye kumona Mulungu, ela Jeso K’irisito ndiye aonyesaye at’u vyo arivyo Mulungu. Yiye Jeso ni mubomu kuchira vit’u vyosi, ¹⁶ maana, Mulungu wáumba vit’u vyosi virivyo duniani na mulunguni kwa njiraye; vit’u vyonekavyo na vyots’ooneka, na ta virivyo vinatawala na vina widimi. Vit’u vivyo vyosi vyáumbwa kwa njiraye, na vyáumbirwa yiye. ¹⁷ Jeso K’irisito wákalako hangu phokala k’akudzangwe kuumbwa chochosi, na yiye ndiye avihendaye vit’u vyosi kukala chimwenga. ¹⁸ Jeso K’irisito ndiye chitswa cha kanisa, ririro ni mwiriwe. Yiye ndiye aup’aye o mwiri uzima uphya wa kare na kare, na ndiye Mwana wa kwanza wa Mulungu, maana, Mulungu wámufufula mwanzo kulaa kuzimu, kwa ta atawale vit’u vyosi. ¹⁹ Maneno gaga ni ga jeri kwakukala, Mulungu mwenye wáona ni vidzo kukala, ye Mwanawe akale dza vyo arivyo ye mwenye tsetsetse. ²⁰ Na Mulungu wáamula kuvyudza kwakwe vit’u vyosi virivyo duniani na mulunguni kwa njira ya ye Mwanawe, na achireha reri kwa milatso ya ye Mwanawe yomwagika musalabani. ²¹ Mwimwi namwi pho p’indi mwákala mu kure na Mulungu, na mwákala mu adawae kwa maazo genu mai, na go genu mai gokala muchigahenda. ²² Ela vino Mulungu wámugwira usena kahiri kuchirira chifo cha Mwanawe yesagala phapha duniani dza mudamu, kwa ta amuhende mukaime mbereze na kuno mu atakatifu, mu adzo na k’amuna kosa rorosi. ²³ Elako, munahenzwa mwenderere kuyikuluphira Nguma Mbidzo kwa mwime kudina na mudzimanyirire, na muts’ikubali kwangaishwa, na kuricha kulolera na kanuni garat’u manoso goambirwa muriphokuluphira Nguma Mbidzo. At’u chila phat’u ayisumurira yiyo Nguma Mbidzo, na ta mimi P’aulo nami nidzikala musumuriri wa yiyo Nguma Mbidzo. ²⁴ Mimi P’aulo ninahamirwa vivi nishononeswavyo kwa dzulu yenu mwimwi. Maana, kushononeswa kwangu phapha duniani, kunaaviza kumarigiza shenene yiriyo niyivumirirwe, dza virat’u Jeso K’irisito arivyoshononeswa kwa dzulu ya mwiriwe, yaani kanisa. ²⁵ Mimi Mulungu wánoloha nihikirehikire at’u amukuluphirao Jeso, kazi yiriyo yinamwaviza mwimwi. Na kazi yenye ni kuusumurira udzumbewe phots’oricha ta neno mwenga. ²⁶ Udzumbe uo, Mulungu wákala udziafitsa adamu osi myaka minji yodzochira, ela vino wáafunulira at’ue. ²⁷ Mulungu wáamula kwafunulira at’ue udzumbe uu urio ni wa jeri na wa kwangalaza, na u dzulu ya at’u a viryomo vyosi. Udzumbe okala Mulungu udziafitsa adamu osi ni uu: K’irisito u mwenu ndani, na kwa vivyo, munalolera na kanuni kwenda mulunguni. ²⁸ Gago ndigo gatumago ta hunaasumurira at’u osi dzulu ya Jeso K’irisito. Siswi hunamwambira chila mut’u maneno arigo k’ahenzwa ni Mulungu agahende, na hunafunza chila mut’u maneno ahenzwago ni Mulungu agahende na hekima yehu yosi, kwa ta humuhende chila mumwenga akaime mbere za Mulungu na kuno ukomala chiroho. ²⁹ Mimi ninabagalika vyangu niidimavyo kwa nigachimize gaga, na ninagahenda, kwakukala, widimi wa Jeso K’irisito unaniidimisa.

¹ Enehu a chijeso, ninamuhenza mumanye kukala, mimi nidzihenda vyangu vyosi niidimavyo kumwaviza mwimwi ajeso a Kolosai, ajeso a Laodikiya na anjine osi ario k’aadzangwe kunona mimi mwenye mwiri dza mwimwi. ² Mimi ninahenda chadi chichi, kwa ta mwimwi na ao osi mukale na moyo wa kwenderera, mukale at’u amwenga ahenzanao, na kamare kwa ta muumanye tsetsetse o udzumbe wa Mulungu okala udziafitsa adamu osi pho p’indi, urio u dzulu ya Jeso K’irisito. ³ Yuyu ndiye aidimaye kufunula hekima na ulachu wa Mulungu, urio una tende muno dza nyungu ya p’esa nyinji yofitswa. ⁴ Ndo lengo ra kumwandikira gaga ni kukala, muts’ikubali kulembwa ni mut’u yeyosi na maneno ga ulongo ta akamulembalemba dzadze. ⁵ Mimi ninahenda chadi chicho kwakukala, ta niripho ni kure namwi chimwiri, ela chiroho, ni phamwenga namwi, na ninahamirwa kwakukala, mudzigwirana chivimwenga kumukuluphira Jeso K’irisito jeri. ⁶ Enehu a chijeso, mwimwi kwahivira mwámuphokera Jeso K’irisito akale Bwana wenu, sagalani dza vyo ahenzavyo yiye ts’iku zosi. ⁷ Mwimwi dinani kutuwa mafunzoge, na mwenderere kukuluphira muno gofunzwa mwanzo dzuluye. Na komalani chiroho kwa kutuwa o ujeri ofunzwa, na mwenderere kumulavira mumvera Mulungu muno. ⁸ Ajeso asena, mwimwi ng’alwani ni matso muts’ihangamizwe ni at’u na maneno gao ga ulongo, na gots’o ganjira. Maneno dza gago ni mafunzo ga at’u, na madzipepo gatawalago phapha duniani tu, ela ts’i ga Jeso K’irisito, ⁹ ariye ndiye Mulungu tsetsetse wa mwiri wa chidamu. ¹⁰ Ndo kwakukala, mwáphenya Jeso, vivi namwi mwápata uzima uphya wa kare na kare, kwakukala, Jeso K’irisito unatawala chila chit’u ta mapepo gosi gatawalago, na genye widimi. ¹¹ Mwimwi muriphophenya Jeso tu, mwátarwa mudzibit’wats’i kare, na kubit’wats’i kuko kuhendwa ni Jeso K’irisito mwenye. Nichigomba vivyo ninaamba, Jeso K’irisito wáusa mukotse wa t’amaa zenu mbii, ela ts’i kwamba wámutiya lwembeni. ¹² Maana, muriphobatizwa, mwákala dza kwamba munazikwa dza vyozikwa Jeso, na kufufuka dza vyofufuka yiye kwa kuukuluphira widimi wa Mulungu yemufufula Jeso K’irisito kulaa kuzimu. ¹³ Mwimwi phokala k’amudzangwe kuphenya Jeso, mwákala mudzefa chiroho kwa go madambi genu gokala muchigahenda, na kwakukala, mu at’u a makabila manjine ots’omanya Shariya ya Mulungu yohewa Ayahudi. Ela vino mwimwi okala mudzefa chiroho, Mulungu wámuhenda mukale na uzima dza Jeso, na wáhusamehe madambi gehu gosi. ¹⁴ Siswi hwákala hudzandikirwa makosa ni Mulungu, kwakukala, hwávunza malagizoge. Na makosa gehu gákala gadzandikwa kutuwirizana na malagizo garigo k’ahugatuwire. Ela Mulungu wárifuta riro kodza ra gago makosa gehu gosi, na achihusamehe tsetsetse, Jeso ariphokot’wa misumari musalabani. ¹⁵ Na chisha, Jeso ariphofa pho musalabani, Mulungu wáabit’a p’ep’o osi atawalao phapha duniani na enye widimi, na achiaonyesa at’u osi lwazu-lwazu kukala, udziarima. ¹⁶ Ndo muts’ikubali kwikirwa shariya ni mut’u dzulu ya vyakurya na vinwadzi, ts’iku za ts’ikuk’uu, ts’iku za majuma ga mwezi, hebu ts’iku ya Sabato. ¹⁷ Shariya dza zizo ni chivurivuri cha yekala undakudza, na vivi wákudza kare, na ni Jeso K’irisito. ¹⁸ Ndo muts’ikubali kwambwa mu akosa ni at’u adzambao anamanya muno kuchira anjine kwa maono agaonago ao hichiyao, adinao kufunza kukala, at’u niadziike ap’ore kwa malaika, na aabudu ao dza kwamba ni Mulungu. At’u dza ao a tele maazo ga chidambi, anadziunula muno, ¹⁹ na áricha kumukuluphira Jeso K’irisito, ariye ndiye chitswa cha kanisa ririro ni mwiriwe. Mwiri wosi uriswa na kugwizanywa phamwenga ni Jeso K’irisito kwa kuhumira vilungo na k’ano za o mwiri, na unakula dza Mulungu ahenzavyo. ²⁰ Jeso K’irisito ariphofa, mwimwi namwi mwákala dza kwamba mudzefa naye, na kwa vivyo, k’amutawalwa kahiri ni mapepo gatawalago urumwengu uu. Ndo heka sambi munatuwa malagizo ga mapepo dza mataifa? Heka munatuwa malagizo dza gano; ²¹ "Muts’ichigwire chichi," "Muts’itate chakurya chira," na ta "Muts’ikumbe chit’u chinjine." ²² Malagizo gaga gosi ga dzulu ya vyakurya na vinwadzi, virivyo vichiriwa na kunewa, gao nikukala gasira. Gaga ni malagizo gatungwago ni at’u tu na kugafunza. ²³ At’u anaahwalira kukala, ao otunga malagizo gago gosi ana hekima kwa vyo aadiniravyo at’u kukala, aabudu, na adziike ap’ore kwa malaika na kwa vyo aukahazavyo mwiri vit’u uvihenzavyo, ela gago k’agamwaviza mut’u kamare kudzidinisa ats’ikale na t’amaa mbii zosi.

¹ Enehu a chijeso, mwimwi Mulungu wámuhenda mukale na uzima uphya wa kare na kare dza arivyomufufula Jeso K’irisito kulaa kuzimu. Ndo tamanini kusagala vyo at’u a dzulu mulunguni ahenzwavyo kusagala, kuriko Jeso K’irisito usegere upande wa kulume wa Mulungu unatawala. ² Maazo genu nagakale dzulu ya mazagazi ga ko mulunguni, ela ts’i higa mazagazi mai ga phapha duniani. ³ Maana, go mazagazi genu ga p’indi gáfa na vivi kwa Mulungu, munasagala mazagazi maphya na Jeso, ela at’u k’aaidima kugaona. ⁴ Ela Jeso K’irisito ndiye amup’aye uzima uphya wa kare na kare, na ukati achiuya phapha duniani, mwimwi namwi mundakala phamwenga naye, na mundametameta chinguvu za chimulungu dza yiye mbere za at’u osi. ⁵ Enehu a chijeso, richani kamare mai gosi gahendwago phapha duniani, dza uzembe, kuhendana ache chinyume cha vyopangwa ni Mulungu, t’amaa za kuhenda mai, na kulavira matso vya at’u, kuriko ku sawa-sawa na kuvoya milungu ya vinyago. ⁶ Mai gago ndigo gamutsukizago Mulungu, na kwa vivyo, undaatiya akili o agahendao. ⁷ Mwimwi namwi p’indi phokala mucheri kutawalwa ni zizi t’amaa mbii, mwágahenda gago. ⁸ Ela vivi garicheni kamare madambi gosi. Mwimwi muts’itsukirwe, muts’imene at’u, muts’imuhadze mut’u na mai, muts’ihakane kamare, ⁹ na muts’ilembane, kwakukala, vyokala p’indi, na gokala muchigahenda mwágaricha. ¹⁰ Mwimwi vivi mu vyumbe viphya, na Mulungu ariye ndiye Muumbi, unakaza kumuhenda mukale dza yiye kwa mwidime kumumanya jeri. ¹¹ Ndo kwakukala, mwimwi mu vyumbe viphya vya Mulungu, k’akuna kahiri ga yuno ni mut’u wa kabila rinjine, hebu ni Muyahudi, yuno wábit’wats’i, hebu k’abit’irwets’i, yuno ni mujeni, hebu yuno k’adzangwe kwenderera, yuno ni mugulwa muhumiki, hebu u tsare. Jeso K’irisito u ndani mwa chila amukuluphiraye, na ndiye chila chit’u. ¹² Ajeso asena, mwimwi namwi mu at’u a Mulungu, na yiye unamuhenza, na wámutsagula kwa mukale at’ue. Ndo sambi kalani na myoyo ya mbazi, at’u adzo, arumwengu, ap’ore, na avumiriri. ¹³ Na mut’u akoswapho ni munziwe, naamuvumirire na amusamehe. Mwimwi mwásamehewa ni Bwana, na kwa vivyo sameheanani namwi. ¹⁴ Gago gosi gahendeni, na dzuluye muhenzane. Kuhenzana ndiko kugwizanyako at’u ta akakala amwenga jeri. ¹⁵ Jeso K’irisito ndiye amuhendaye musagale phamwenga na reri, na reri yiyo nayimwidimise kwamula kuhenda muhenzwago muhende, kwakukala, Mulungu wámwiha phamwenga kwa mukale at’u amwenga asagalao chireri. Chisha, kalani na mumvera kwa Mulungu. ¹⁶ Neno ra K’irisito narikale mwenu myoyoni ukati wosi. Funzanani na mwambirane maneno garigo k’amuhenzwa mugahende na hekima yosi. Imbani mira ga Maandiko ga Mulungu, p’ambiyo na mira ya kumulika Mulungu na myoyo yenu yosi, chisha mukale na mumvera, na phapho mundaumanya jeri o udzumbe. ¹⁷ Genu gosi gondohenda na gondogomba, nagakale ga chikumukuluphira Bwana Jeso vyo mwendereravyo kumulavira mumvera Baba Mulungu kuchirira Jeso. ¹⁸ Mwi ache, dziikeni ts’ini za alume enu, kwakukala, vivyo ndivyo ahenzavyo Bwana. ¹⁹ Mwi alume namwi, mwimwi ahenzeni ache enu, na muts’iasuruphire. ²⁰ Mwi ana, mwimwi aogopheni avyazi enu kwa chila neno, kwakukala, vivyo vinamuhamira Bwana. ²¹ Mwi avyazi namwi, mwimwi ts’iagombereni-gombereni ana enu akosapho kakosa kokosi, kwakukala, gago ganaidima gakaahenda afe moyo. ²² Mwi agulwa ahumiki, mwimwi aogopheni ao ario chimwiri ni aguli enu ukati wosi, na muhende kazi na moyo umwenga, ts’i ukati munalolerwa ni o aguli enu tu, kwa kuhenza kulikwa. Ela aogopheni na moyo umwenga kwakukala, munamogopha Bwana. ²³ Muchikala munahenda kazi yoyosi, yihendeni vyenu vyosi mwidimavyo dza kwamba munamuhikirahikira Bwana, ela ts’i adamu. ²⁴ Mwimwi nimumanye kukala, Bwana Jeso K’irisito ndiye yendemuripha phondomup’a chirat’u choalaga kwaikira at’ue, kwakukala, yiye ndiye mumuhikirayehikiraye. ²⁵ Ela ahendaye mai, undatiywa akili kutuwirizana na maige gogahenda, kwakukala, Mulungu k’alola cheo cha mut’u.

¹ Mwi enye agulwa ahumiki, mwimwi ahendereni agulwa ahumiki enu ga haki na ga sawa kwakukala, ta mwimwi namwi munamanya muna Bwana wenu ko mulunguni. ² Enehu a chijeso, muts’itsoke kuvoya, muts’ikale akaha na kuvoya, na mulavireni mumvera Mulungu vyo muvoyavyo. ³ Chisha, huvoyereni naswi chila mukalapho na mavoyo, kwa ta Mulungu ahuvugulire njira husumurire udzumbewe dzulu ya Jeso K’irisito, okala p’indi k’aumanywa. Mimi vivi ni chifungoni kwakukala, nákala ninasumurira udzumbe uo. ⁴ Ndo nivoyerani kwa ta niusumurire udzumbe uu, chisha lwazu-lwazu, kwakukala, vivyo ndivyo Mulungu anihenzavyo nihende. ⁵ Ajeso asena, menenzi genu kwa at’u ario ts’i ajeso nagaonyese kukala, muna hekima, na muchigwirikana nao, hakikishani munauhumirat’o o ukati ondokala mu phamwenga nao. ⁶ Genu gondoambira, ganahenzwa gakale madzo, na ga kuhamya ts’iku zosi, kwa ta mumanye vyo muhenzwavyo kumuudzidza chila mut’u. ⁷ - ⁸ Ninamuhuma mwenehu wa chijeso Tukiko, ariye ni muhendikazi wa Bwana munziwehu wa kukuluphirika, na humuhenzaye. Yiye undakudzamwambira gosi gohupata kuku, na amutiye moyo. ⁹ Tukiko unadza na mwenehu wa chijeso Onesimo, ariye unakuluphirika, na ninamuhenza. Onesimo ni Mukolosai munziwenu, na ao andakudzamwambira maneno gosi gahendekago kuku. ¹⁰ Arisitako, ariye hu jela hosi unamulamusa, na Mariko, ariye yiye na Barinaba ni mut’u na mwana wa abaye muvaha, unamulamusa naye. Mwimwi mwáambirwa kare kukala, Mariko achidza kwenu, nimumupige karibu. ¹¹ Jeso, ariye dzinare rinjine ndiye Jusito unamulamusa naye. Kati ya Ayahudi osi okuluphira, ni Tukiko, Mariko na Jeso tu ndio nihendao nao kazi kwa Ufalume wa Mulungu udze, na ao adzinaviza muno. ¹² Mwenehu wa chijeso Epafura, ariye ni Mukolosai munziwenu vivyo, na muhendikazi wa Jeso K’irisito unamulamusa. Epafura unamuvoyera Mulungu chila ts’iku na moyowe wosi kukala, mukomale chiroho, na mugamanye tsetsetse garat’u muhenzwago ni Mulungu mugahende. ¹³ Mimi nidzikala nichimona na matso gangu mwenye vyo amubagalikiravyo mwimwi Akolosai, at’u a Laodikiya, na a Hirapoli. ¹⁴ Dakitari wehu Luka humuhenzaye na Dema anamulamusa. ¹⁵ Hulamusireni ajeso anziehu a mudzi wa Laodikiya. Mulamuseni mwenehu wa chijeso wa chiche Nimufa phamwenga na ajeso osi avoyao kwakwe nyumbani. ¹⁶ Muchimala kusomerwa baruwa yiyi, aphirikireni ajeso anzienu a mudzi wa Laodikiya nao akasome. Na chisha, mwimwi namwi nimuyisome yo baruwa yoaandikira ao achimurehera. ¹⁷ Arikipo ni muhendikazi wa Bwana. Ndo mwambireni achimize kaziye ariyohewa. ¹⁸ Ninamulamusa mosi mimi P’aulo, na mwajo uu ninawandika na mukono wangu mwenye. Muts’inyale asena kukala, ni jela. Baba Mulungu naamuhats’e.