3 JOHANA

¹ Ni mimi Johana, chilongozi wa chijeso. Ninakwandikira uwe musena wangu Gayo nikuhenzaye, na bee ninakuhenza jeri. ² Musena wangu nikuhenzaye, mimi ninakuvoyera ukale muzima, na manenogo gosi gaenderere t’ot’ot’o, dza vyo wendereravyo t’ot’ot’o chiroho. ³ Mimi musena wangu náhamirwa muno, enehu a chijeso anjine ariphokudza na achisema kukala, wádzilavira kumuhikirahikira Mulungu, na unaenderera kutuwa ujeri. ⁴ Mimi náhamirwa muno niriphosikira vivyo, kwakukala, k’akuna ut’u unihamirao muno dza kusikira kukala, anangu a chiroho anatuwa ujeri. ⁵ Musena wangu nikuhenzaye, uwe una-aaviza ndugu zehu a chijeso na haja zao chikukuluphirika, ta ukakala k’wamanya. ⁶ Ao ákudza-aambira akuluphiri dzulu ya vyoaaviza na nyemi. Ndo achikala anauka kwako, a-aavize na charo chao kwa njira yiriyo yindamuhamira Mulungu, na vivyo bee undakala unahenda t’ot’ot’o. ⁷ At’u ao, áuka kwao kwa akahende kazi ya Jeso K’irisito, na ao bee, k’aaphokerere gokala ana haja nago kulaa kwa at’u ario ts’i akuluphiri. ⁸ Ndo siswi ajeso, hunahenzwa hwaavizeni at’u dza ao, kwa ta naswi hutiye mukono kazi yao ya kufunza ujeri. ⁹ Mwimwi akuluphiri a kuko, námwandikira baruwa. Ela ninamanya kukala, Diyot’erefe, ariye unadzihenda ndiye chilongozi wenu, k’andagatuwa gogaandika. ¹⁰ Ndo mimi nichidza ko kwenu, nindakudzagasema go gakwe ahendago. Yiye unahuhadza na mai siswi. Na ts’i gago hicheye, ela k’aapiga karibu ndugu zehu a chijeso, na anzie ahenzao, achamba anaapiga karibu, ye unaakahaza, na kwatenga. ¹¹ Bee k’ona musena wangu nikuhenzaye, uwe tuwa mufano wa at’u ahendao madzo, ela uts’ituwe mufano wa at’u ahendao mai. Mut’u yeyosi ahendaye madzo, ni wa Mulungu. Ela yeyosi ahendaye mai, k’amumanya Mulungu. ¹² Yuyu Demetiriyo yendekurehera baruwa yiyi, unalikwa ni chila mut’u kwa unahenda madzo, na chisha vyo atuwavyo ujeri navyo, vinaonyesa. Siswi naswi hunamulika vivyo, na uwe unamanya kukala, gehu hugombago ni ga jeri. ¹³ Mimi nina manji nihenzago nikwambire, ela gago ts’enzi kugaandika baruwani. ¹⁴ Mimi ninaaza kudza kwako sambi, na phapho nindakudzagomba nawe mimi mwenye mwiri. ¹⁵ Ninakuvoyera ukale na reri. Asena ehu kuku anakulamusa. Nilamusira asena ehu ario kuko kwa dzina ra Jeso K’irisito.