2 T’IMOTI

¹ Ni mimi P’aulo, muhumwa wa Jeso niriye na widimi kwa henzo ra Mulungu, na náolohewa kwa ta niaambire at’u uzima uphya wa kare na kare oulagwa, hurio hunao kwa kumukuluphira Jeso. ² Ninakwandikira uwe T’imoti mwanangu wa chiroho nikuhenzaye. Baba Mulungu na Bwana wehu K’irisito Jeso naakuhats’e, akonere mbazi, na akuhende usagale na reri yao. ³ T’imoti, mimi ninamulavira mumvera Mulungu kwa dzuluyo. Yiye Mulungu ninamuhikirahikira na maazo ga kukala, ninatuwa madzo dza akare ehu arivyokala. Mimi chila nichivoya usiku na mutsana, ninakukumbikira ukati wosi. ⁴ Mimi nichililikana vyoniririra ukati phokala hunarichana, ninatamani muno nikone kahiri, na nindahamirwa muno nichikona. ⁵ Mino nicheri kukumbikira vyo urivyo na kuluphiro ra jeri, na kuluphiro dza riro, ráanza kukala na aweyo Loisi, na ameyo Eunike naye, na nina kanuni kukala, ta uwe nawe unaro. ⁶ Gago ndigo gatumago ta ninakukumbikiza uchits’ots’ere cho chipaji urichohewa ni Mulungu ukati niriphokwikira mikono kukuvoyera. Ndo mino ninakuhenza uchihumire chipaji chicho. ⁷ Maana, Mulungu wáhup’a Roho ahup’aye widimi, ahuhendaye huhenzaneni, na ahuhendaye hudzidinise kwa ta huts’ihende dambi, ela k’ahup’ire Roho wa kuhuhenda hukale aoga. ⁸ Ndo uts’one haya kulavya ushuda dzulu ya Bwana wehu, hebu kwakukala, mimi ni jela kwa dzuluye. Its’iphokala, uwe nawe kubali kushononeswa kwa dzulu ya Nguma Mbidzo dza mimi kwa widimi wa kuvumirira uhewao ni Mulungu. ⁹ Mulungu wáhutivya, na achihwiha hukale at’ue atakatifu. Gago k’agahendere kwakukala, phanjine hwákala hudzihenda ut’u wowosi, ela ni kutuwirizana na lengore mwenye, na kwa vyopanga kuhwonera mbazi kuchirira K’irisito Jeso, pho mwanzo phokala urumwengu k’audzangwe kuumbwa. ¹⁰ Ndo mbazi zizo vivi záng’azwa lwazu-lwazu kwa kudzakwe Mutivyi wehu K’irisito Jeso. Yiye wáhangamiza chifo, na achireha uzima na kuts’ahangamika kuchirira yo Nguma Mbidzo. ¹¹ Ndo mimi Mulungu wánoloha nikale musumuriri, muhumwa wa Jeso wa widimi, na mwalimu wa yo Nguma Mbidzo. ¹² Na gago ndigo gatumago ta ninapatwa ni shenene zizi, ela mino ta ts’inago haya, maana, ninamumanya ye nimukuluphiraye, na nina kanuni unaidima kurindat’o urat’u niriomup’a ta ts’iku ya musindikizo wa urumwengu. ¹³ Go mafunzo ga jeri nirigokufunza, nagakale mufano kwako kwa kukala na kuluphiro na menzwa, maneno garehewago ni K’irisito Jeso. ¹⁴ Gamanyirire kwa widimi wa Roho wa Mulungu asagalaye mwehu ndani go mafunzo ga jeri urigohewa ugasumurire. ¹⁵ T’imoti, unamanya uwe kukala, ajeso anziehu anji a jimbo ra Asiya ánitsupha, ta Fugelo na Herimogene nao. ¹⁶ Ela Bwana naahats’e adamungwa a Onesiforo, maana, yiye udzinitiya moyo k’ano nyinji. Yiye k’anonerere waibu ta niripho ni chifungoni, ¹⁷ ta ye ariphokudza mudzi ubomu wa Rumi tu, wáanza kunitsakula muno ta achinona. ¹⁸ Bwana naamuhats’e muno ts’iku yiyo ya musindikizo wa urumwengu! Ta uwe unamanya t’ot’ot’o virat’u Onesiforo arivyonihikirahikira kwa njira nyinji ko Efeso.

¹ Mwanangu wa chiroho T’imoti, uwe kaza kukomala chiroho kwa widimi uhewao ni K’irisito Jeso kwa mbazize mwenye. ² Na garat’u mafunzo urigonisikira ninagafunza mbere za mashaidi anji, uwe nawe, gafunze alume akuluphirikao gago, ario andaidima kwafunza anjine nao. ³ Uwe vumirira shenene dza siswi, maana, uwe nawe u shikari mudzo wa K’irisito Jeso. ⁴ Shikari achikala u vihani, k’aphenyerera makazi manjine kwa ta achimize lengore ra kumuhamya mubomuwe yemwandika. ⁵ Mukazi wa mairo naye, k’anoswa chiremba cha ushindi achikala k’andakaza kutuwiriza shariya. ⁶ Mundimwa arimaye na chadi ndiye awiryaye kutaphula mavuno. ⁷ Galilikane t’ot’ot’o gaga nikwandikirago, maana, Bwana undakufunulira ugamanye. ⁸ Lilikana muno dzulu ya Jeso K’irisito, mut’u wa murere wa Daudi. Yiye wáshononeswa muno ta achifa, ela achifufuka kulaa kuzimu, na yiyo ndiyo Nguma Mbidzo niyisumurirayo. ⁹ Mimi nami vivi ninashononeswa, na ta nidzifungwa minyororo dza kwamba ni gerugeru kwa kusumurira yo Nguma Mbidzo. Ela neno ra Mulungu k’arizizika. ¹⁰ Ndo mimi ninavumirira chila chit’u kwa dzulu ya at’u otsagulwa ni Mulungu, kwa ta nao apate wokofu kwa kumukuluphira K’irisito Jeso, na adze apate ubomu wa kare na kare. ¹¹ Musemo uu utuwirizao ni wa jeri: "Ichikala mazagazi gehu ga p’indi gáfa na yiye, hundasagala naye vivyo. ¹² Huchenderera kuvumirira shenene kwa dzuluye, hundatawala phamwenga naye vivyo. Huchidzamutina, yiye naye undahutina. ¹³ Siswi ta huts’iphokala at’u a kukuluphirika kwakwe, ela ye bee undaenderera kukala mut’u wa kukuluphirika kwehu ts’iku zosi, maana, yiye k’aidima kugaluka." ¹⁴ T’imoti, ao at’u enderera kwakumbikiza maneno gaga, na wakanye mbere za Baba Mulungu ats’ihenderane k’ani dzulu ya maneno. Kuko bee k’akwaviza mut’u, ta kuts’iphokala ni kunabananga arat’u akusikirao. ¹⁵ Henda widimavyo uriseme t’ot’ot’o ro neno ra ujeri, kwa ta Mulungu akuchize kukala u muhendikaziwe mudzo, na phapho k’undaaibika. ¹⁶ Uwe uts’ituwe kamare maneno gots’o ganjira, garigo ts’i ga kumuhikirahikira Mulungu. Maana, maneno dza gago ndigo gakazago kwatanya at’u kure na Mulungu. ¹⁷ Na mafunzo gao ganga dza chironda ndugu, maana, ganarisa na kubananga at’u. Kati ya at’u afunzao mafunzo dza gago, ni Humenayo na Fileto. ¹⁸ Ao áyaywa ni kutuwa ujeri kwa kugwiririra kwamba, ts’iku ya kufufuka at’u yáchira kare, na vivyo anaahenda at’u anjine aphungukirwe ni kuluphiro rao. ¹⁹ Ela musinzi wa kudina urioikwa ni Mulungu bee k’autukuka, na pho dzuluye pháandikwa vivi, "Bwana Mulungu unaamanya arat’u ario ni akwe," na, "Chila adzambaye ni wa Bwana Mulungu, bee ni seti ariche mai gosi." ²⁰ Mudzini pha mut’u mwenye nafasi, ni seti phakale na miyo ya chila aina: minjine ni seti yikale miyo ya dahabu na ya p’esa, yiriyo nikuhumirwa ukati wa shuhuli malumu. Na minjine ni seti yikale mivure na nyungu, yiriyo nikuhumirwa chila ts’iku. ²¹ Ndo mut’u achidzitakasa kwa kuts’ashirikiyana na ao, unakala unga dza mwiyo uhumirwao ukati wa shuhuli malumu. Na kwakukala, undakala ni mutakatifu, undahumirwa ni Bwanawe t’ot’ot’o kwikwa kwete kuhenda chila kazi mbidzo. ²² Ndo uwe uts’ituwe t’amaa mbii za uvulana, ta we henda widimavyo wone kukala, unahenda ga haki, udzigwiririra kuluphiroro kinyi, unaahenza anzio, na unasagala na reri phamwenga na at’u osi ario anamuvoya Bwana na myoyo midzo. ²³ Uwe uts’ituwe kamare k’ani za kuphupha na zots’o tende. Maana, uwe unamanya kukala, zizo ndizo zihendazo at’u akakosana. ²⁴ Uwe niumanye kukala, muhendikazi wa Bwana k’ahenzwa akale mut’u wa kukosana na at’u. Its’iphokala, unahenzwa akale murumwengu kwa chila mut’u, akale mut’u aidimaye kufunza t’ot’ot’o, na wa kuvumirira. ²⁵ Muhendikazi wa Bwana unahenzwa aafunze na aakanye at’u apingao mafunzoge kwa njira ya up’ore, kwakukala, Mulungu unaidima kwagaluza myoyo yao akatya, na phapho amanye ujeri. ²⁶ At’u ao atyapho, ni kuuyirwa ni akili zao t’ot’ot’o, na phapho akachimbira muhambo wa Shetani yekala udziahwala mateka kuhenda henzore.

¹ Ela niumanye uwe T’imoti kukala, zizi ts’iku za phephi na musindikizo wa urumwengu, bee kundakala na ndai nyinji. ² Maana, at’u ukati uu andadzihenza ao enye tu, andahenda chipherephere na p’esa, andadziunula na ahende ngulu, andagomba maneno ga kumwifya Mulungu, k’aandaasikira avyazi ao, k’aandakala na mumvera, k’aandakala atakatifu, ³ k’aandahenzana, k’aandasameheana, andatsunana, k’aandadzidinisa kwa ats’ihende dambi, andakala asiru, na andamena madzo. ⁴ At’u ts’iku zizo andaguzana, k’aandasikira ta akakanywa, andadzivunya, andahenza raha muno ela k’andamuhenza Mulungu, ⁵ na andaoneka dza kwamba anamogopha Mulungu, ela mazagazi gao gandaonyesa lwazu-lwazu kukala, k’aana widimi wa ye Mulungu. Ndo uwe uts’igwirikane nao kamare at’u a vivyo. ⁶ Maana, anjine ao ndio endao madzumbani mwa at’u akendaalemba achet’u ario k’aadzangwe kukomala chiroho, ario acheri kutawalwa ni dambi, na ario analongozwa ni t’amaa za chila aina, ⁷ achet’u ario anadzifunza ukati wosi, ela k’aaidima kuumanya o ujeri. ⁸ At’u ao anapinga ujeri dza virat’u Jane na Jambere arivyomupinga Musa. Ao akili zao zábanangika, na kuluphiro rao ts’i ra jeri. ⁹ Ela k’aandatowa, maana, o uzuzu wao undamanywa lwazu-lwazu ni at’u osi dza vyokala kwa Jane na Jambere. ¹⁰ Ela uwe udzona na unamanya gosi dzulu ya mafunzo gangu, vyo vyangu nisagalavyo, lengo rangu, kuluphiro rangu, kuvumirira kwangu, vyo niahenzavyo asena, vyo niimirevyo kudina, ¹¹ vyohenderwa mauku mimi, na vyoshononeswa. Uwe unagamanya go maneno gonipata ko midzi ya Anitiyokiya, Ikoniyo na Lusitira. Mino kuko náhenderwa mauku muno, ela nichivumirira vivyo, na Bwana achinitivya na shenene yiyo yosi. ¹² Chila mut’u ahenzaye kusagala mazagazi ga kumogopha Mulungu kwa kumukuluphira K’irisito Jeso, undahenderwa mauku. ¹³ At’u ai na alimu a ulongo, andakaza kukala ai muno kwa kwalemba anjine, na o enye nao alembwe. ¹⁴ Ela uwe enderera kugatuwa garat’u mafunzo ga jeri urigofunzwa na uchigakuluphira, maana, uwe mwenye unamanya anakuluphirika o at’u okufunza. ¹⁵ Na chisha, uwe Maandiko matakatifu ga Mulungu wágamanya hangu u mwanache, na gago ndigo garigo ganaidima kukup’a hekima dzulu ya wokofu kwa njira ya kumukuluphira K’irisito Jeso. ¹⁶ Maandiko gosi ga Mulungu gálaviwa ni Rohowe. Kwa vivyo, ni madzo kwa kufunzira ujeri na kusema ulongo ni uphio, kwambira mut’u makosage, na kubaza at’u ahende ga haki, ¹⁷ kwa ta mut’u wa Mulungu aikwe kwete chivyovyosi kuhenda madzo maphuphu.

¹ T’imoti, ninakwandikira lagizo, na Mulungu na K’irisito Jeso yendealamula at’u ario moyo na afadzi ukati yiye phondouya kudzatawala, ni mashaidi gangu. Ndo lagizo rangu ni kwamba: ² risumurire neno ra Mulungu, na kala kwete kurisumurira ukati uwiryao, na ta ots’owirya. A-aambire at’u ahenzwago ahende, achikosa akanye, atiye moyo, na funza na uvumiriri. ³ Maana, ukati undakudza urio at’u k’aandatuwa kahiri mafunzo ga jeri, ela andatuwa t’amaa zao enye, na phapho atsagule enye alimu ao anji ondokala achiafunza garat’u gaahamirago. ⁴ Na andaricha kusikiza ujeri agalukire kusikiza ngano za ulongo. ⁵ Ela uwe dina kutuwa o ujeri ukati wosi. Uchishononeswa, we vumirira vivyo, yivumise Nguma Mbidzo, na chimiza gosi gahenzwago ni kaziyo. ⁶ Chiupande wangu mimi, mazagazi gangu ga phephi na kulaviwa dza sadaka, maana, ukati wangu wa kwenda kwa Mulungu ufika. ⁷ Mimi nidziyipiga yo k’ondo mbidzo ya kuhehera Nguma Mbidzo, nidzimala mushindano wosi wa mairo, na nicheri kuugwiririra kinyi ujeri niukuluphirao ta vivi. ⁸ Ndo vivi náikirwa chiremba chiricho ni kuhenda ga haki. Bwana, ariye ndiye mulamuli alamulaye haki na hakiye, undaninosa chiremba chicho ts’iku phondouya kahiri. Na ts’i mimi hichiyangu yendenoswa chiremba chicho, ela ta arat’u osi amulolerao na raha auye, andanoswa nao. ⁹ Henda widimavyo udze kuku niriko sambi. ¹⁰ Maana, Dema wáhamirwa ni ga dunia yiyi ta achinitsupha, na vivi wáuka achenda vyakwe mudzi wa Tesalonike. Kiresike ye wákwenda jimbo ra Galatiya, na Tito naye achenda jimbo ra Dalimatiya. ¹¹ Luka hicheye ndiye huriye hosi phapha. Uwe mwambire Mariko mudze mosi, maana, yiye unaidima kudzanaviza kazi yangu ya kusumurira Nguma Mbidzo kuku. ¹² Tukiko námuhuma mudzi ubomu wa Efeso. ¹³ Uwe uchikala unadza, nirehera kaputi rangu roriricha kwa Karipo ko mudzi wa T’orowa, na chisha nirehera vitabu vyangu, kamwe virat’u vyotengezwa na ch’ingo. ¹⁴ Alekizanda atengezaye miyo ya vyuma, wánihendera vii muno ta ninamurichira Mulungu. ¹⁵ Na dzimanyirire naye ta uwe, maana, yiye udziupinga muno udzumbe wehu. ¹⁶ Mimi niriphophirikwa kotini lwa mwanzo, ajeso asena osi ánitsupha ta k’akuna ta mumwenga yenihehera. Ela ta vivyo, Mulungu naats’iatarire kosa riro. ¹⁷ Mino Bwana wákala phamwenga nami phapho, achiniidimisa kuyisumurira Nguma Mbidzo yosi kwa ta at’u a makabila manjine ayisikire, na chisha nichitivywa kulaa mulomoni mwa ts’imba. ¹⁸ Bwana undanitivya na maneno gosi mai, na undanitsukula salama ta kwakwe Ufalumeni ko mulunguni. Yiye naalikwe ta kare na kare! Amina. ¹⁹ Nilamusira Akula na muchewe P’irisila, phamwenga na adamungwa a Onesiforo. ²⁰ Erasito wásala mudzi wa Korito, na T’orofimo námuricha kadzidzi ka Mileto, kwakukala, wákala ni mukongo. ²¹ Henda widimavyo ta ukati wa p’eho na mvula bomu uchanza, uwe ukale udzikudza kare kuku niriko. Ebulo, P’ude, Lino, Kilaudiya, na enehu a chijeso osi a phapha Rumi anakulamusa. ²² Bwana naakale mwako rohoni. Mulungu naamuhats’e mosi.