2 ATESALONIKE

¹ Ni mimi P’aulo, Silwano na T’imoti, hunamwandikira mwimwi ajeso a Tesalonike, murio mu at’ungwa a Baba Mulungu, na a Bwana Jeso K’irisito. ² Baba Mulungu na Bwana Jeso K’irisito naamuhats’e, na amuhende musagale na reri yao. ³ Enehu a chijeso, siswi hunahenzwa humulavire mumvera Mulungu ts’iku zosi kwa dzulu yenu, na yiyo ni haki. Maana, kuluphiro renu rinakaza kukula, na ta kuhenzana kwa chila mumwenga wenu nako, kunakaza konjezeka. ⁴ Ndo siswi enye go makanisa manjine ga Mulungu hunagaambira na ngulu dzulu ya vyo muvumiriravyo, na vyodzogwiririra kinyi kuluphiro renu vivyo, ta muripho munaturiswa muno, na kuhenderwa mauku. ⁵ Elako, Mulungu unahumira gago mauku mupatago, konyesa ulamuliwe wa haki. Maana, yiye undamuchiza kukala, munawirya kuphenya kwakwe Ufalumeni, urio vivi munahenderwa mauku kwa uo. ⁶ Mulungu ni muhaki. Kwa vivyo, ao amuhenderao mauku vivi, yiye undaariphiza mauku vivyo. ⁷ Ela mwimwi muhenderwao mauku vivi, undamuusira, na amuhurize phamwenga na siswi, ukati Bwana Jeso phondolairira kulaa mulunguni na malaikae enye widimi, na luchemi lwa moho. ⁸ Phapho Bwana undaatiya akili ots’omumanya Mulungu, na ots’oogopha Nguma Mbidzo ya Bwana wehu Jeso. ⁹ Ndo at’u ao kutiywa kwao akili kundakala kwa kuhangamizwa ta kare na kare, kwa kutanywa kure na Bwana, na widimiwe ubomu. ¹⁰ Gago gandahendeka ukati uo Bwana Jeso phondolairira kulaa mulunguni kudzalikwa, na kwishimiwa ni at’ue osi atakatifu, ario anamukuluphira. Mwimwi namwi mundakala kati yao, kwakukala, mwáukuluphira urat’u udzumbe huriomusumurira. ¹¹ Gago ndigo gatumago ta hunamuvoyera chila ts’iku kukala, Mulungu wehu amuchize kukala munawirya go mazagazi gomwihira, na kwamba agachimize go madzo genu gosi mugaazago, na zo kazi za kuluphiro kuchirira widimiwe. ¹² Gago gachihendeka, mwimwi mundamuhenda Bwana wehu Jeso alikwe, na yiye undamuhenda mulikwe phamwenga na yiye mwenye, kutuwirizana na mbazi za Mulungu wehu, na za Bwana Jeso K’irisito.

¹ Dzulu ya kuuya kwa Bwana wehu Jeso K’irisito phapha duniani, na siswi vyondorundikana phamwenga mbereze, hunamuvoya mwimwi enehu a chijeso ² kukala, muts’ikale at’u ots’oyuga kwangaishwa akili, hebu kuyugwa ni o at’u aambao ts’iku ya kuuya Bwana yáfika kare. Ao ta akamwamba áona ono, ahendagafunulirwa, hebu ágasoma baruwani ayambayo yálaa kwehu, chisha mwi ts’iakuluphireni vivyo. ³ Mwimwi muts’ilembwe ni mut’u yeyosi na njira yoyosi, maana, yiyo ts’iku ya kuuya Bwana, k’ayindafika ta ni seti mwanzo at’u amupinge Mulungu muno, na alairire ye mut’u wa mai gosi, ariye musindikizowe ni kuhangamizwa. ⁴ Yiye ni yuyat’u adziunulaye na kupinga chila chiihiwacho mulungu, na chila chabudiwacho. Na ta undahendaphenya mo hekaluni ra Mulungu asagale, na phapho adzambe yiye ndiye Mulungu. ⁵ Mukale k’amukumbikira mwimwi kukala, ukati niriphokala nicheri kuko kwenu nákala nichimwambira gago? ⁶ Na samba munamanya mwi kukala, yiye vivi uzuliywa ni ut’u, kwa ta alairire o ukatiwe opangirwa? ⁷ Yiye mut’u wa mai gosi vivi unahenda kazi kare chisiri-siri, na undaenderera vivyo chisiri-siri ta phondousirwa yedzemuzuliya. ⁸ Yiye achiuswa, ndipho yiye mut’u wa mai gosi undalairira, ela Bwana Jeso undakudzamuvivira p’umuzize amuulage, na amuhangamize na widimi ondokudza nao. ⁹ Ukati yiye mut’u wa mai gosi achilairira, undakudzahenda kazi za Shetani na widimi wosi, kwa kuhenda dalili, na maut’u-maut’u ga kwangalaza ga ulongo. ¹⁰ Yiye undahumira chila njira ya ulongo aalembere o ario andahangamizwa kwakukala, anarema kuuhenza ujeri urio ungari kwativya. ¹¹ Gago ndigo gatumago ta Mulungu unaabit’ira mukotse wa kuyaza, na phapho akuluphire gago maneno gosi ga ulongo. ¹² Na musindikizo wao, ao osi andalamulwa ni alongo kwa k’aakuluphirire ujeri, ta its’iphokala ohamirwa ni kuhenda mai. ¹³ Ela ta vivyo, siswi hunahenzwa humulavire mumvera Mulungu ts’iku zosi kwa dzulu yenu mwimwi enehu a chijeso. Mwimwi munahenzwa ni Bwana, maana, Mulungu wámutsagula hangu pho mwanzo kukala, mupate wokofu kuchirira kutakaswa ni Rohowe, na kukuluphira ujeri. ¹⁴ Mulungu wámwiha kuku wokofuni ukati huriphomusumurira Nguma Mbidzo, kwa ta mwimwi namwi mupate o ubomu wa Bwana wehu Jeso K’irisito. ¹⁵ Bee k’amona enehu a chijeso, mwimwi imani kudina, na gatuwirizeni jeri-jeri garat’u mafunzo gehu hurigomufunza phokala hunamusumurira Nguma Mbidzo, na gomwandikira mwehu baruwani. ¹⁶ Baba Mulungu wáhuhenza muno ta achihutiya moyo ta kare na kare, na kuhuhenda hulolere madzo kulaa kwakwe kwa mbazize mwenye. Bwana wehu Jeso K’irisito mwenye, na ye Baba Mulungu ¹⁷ naamutiye moyo na amwidimise kuhenda chila ririro idzo, na kugomba madzo maphuphu.

¹ Enehu a chijeso, malagizo gangu ga musindikizo ni kwamba, huvoyereni siswi kukala, hwidime kurigot’eza maruru neno ra Bwana, na kosi kondofika riro neno, riphokerwe na ishima dza virat’u mwimwi murivyoriphokera. ² Na chisha, huvoyereni vivyo kukala, Mulungu ahurinde salama na at’u ai, na ots’ohenda ga haki, maana, ts’i osi akuluphirao. ³ Ela Bwana unakuluphirika. Kwa vivyo, yiye undamudinisa, na undamurinda na yuyat’u Mui. ⁴ Na chisha, ninakuluphira kukala, Bwana undamuhenda mugatuwe go nimulagizago, na mwenderere kugatuwa vivyo. ⁵ Bwana naalongoze myoyo yenu mumanye menzwa ya Mulungu, na K’irisito amup’e kuvumirirakwe ta muripho munahenderwa mauku. ⁶ Ndo siswi hunamulagiza mwimwi enehu a chijeso kwa dzina ra Bwana wehu Jeso K’irisito kukala, muts’igwirikane na chila mujeso ariye ni mukaha, na ariye k’atuwa garat’u malagizo gogaphokera kulaa kwehu. ⁷ Maana, mwimwi enye munamanya t’ot’ot’o kukala, ni seti mwige mufano wehu. Siswi huriphokala namwi, k’ahukalire akaha. ⁸ Siswi k’ahurirye cha mut’u bule, its’iphokala, sino hwáhenda chadi cha kuhenda kazi usiku na mutsana, kwa ta huts’ikale muzigo kwa yeyosi kati yenu. ⁹ Siswi hwákala huna haki ya kumwamba muhumanye gehu hurigo hunago haja, ela sino hwáhenda chadi chicho, kwa ta humup’e mufano, na mwendo wehu muutuwe. ¹⁰ Maana, ta huriphokala hu phamwengani, hwákala huchimwamba vivi, "Mut’u ariye k’enzi kuhenda kazi, naats’ihewe chakurya." ¹¹ Siswi hunamup’a malagizo gaga, kwakukala, hwásikira kukala, anjine enu ágaluka akaha k’aahenda kazi, ta ni at’u a kuzunguluka, na kuphuphizira at’u anjine kazi zao. ¹² Bee ao ajeso ayaehu hunaalagiza na kwakanya kwa dzina ra Bwana wehu Jeso K’irisito kukala, ahurire na ahende kazi kwa ta adzipatire gao arigo nago haja enye. ¹³ Ela chiupande wenu mwimwi enehu a chijeso, muts’itsoke kuhenda madzo. ¹⁴ Mut’u yeyosi achikala k’agaogopha gaga malagizo garigo ndani ya baruwa yiyi, dzimanyirireni na mut’u yiye, na muts’igwirikane naye kwa ta agwirwe ni haya. ¹⁵ Na muts’imuhwalire dza kwamba ni mudawa, ela mwimwi mukanyeni tu dza ndugu yenu wa chijeso. ¹⁶ Bwana wehu Jeso, ariye yiye mwenye ndiye aahendaye at’u akakala na reriye, naamuhende mukale na reri ukati wosi, chisha kwa chila njira. Bwana naakale namwi mosi. ¹⁷ Uu ni mwajo kulaa kwa mimi P’aulo, na ninawandika na mukono wangu mwenye. Vivi ndivyo nitiyavyo chidole chila nimarigizapho kwandika baruwa yangu. ¹⁸ Bwana wehu Jeso K’irisito naamuhats’e mosi.