2 P’ETERO

¹ Ni mimi Simoni P’etero, mugulwa muhumiki na muhumwa wa Jeso K’irisito niriye na widimi. Baruwa yiyi ninayandikira ajeso osi, ario ápata kuluphiro ra tende dza ro huriro naro siswi, kuchirira haki ya Jeso K’irisito, ariye ndiye Mulungu wehu na Mutivyi wehu. ² Mulungu naakaze kumuhats’a muno, na aenderere kumuhenda musagale na reriye, maana, mwimwi enye munaumanya udzo wa ye Mulungu, na wa Bwana wehu Jeso K’irisito. ³ Mulungu kuchirira widimiwe, wáhup’a chila chit’u huricho nacho haja kwa husagale chijeso. Na hunaidima kusagala vivyo kwakukala, hunamumanya yiye yehwiha kwa ubomuwe na udzowe. ⁴ Mulungu kuchirira o widimiwe na udzowe, wáhulaga vilaganevye vibomu na vidzo muno kwa ta kuchirira vivyo, siswi hukale dza yiye, na hwidime kuricha t’amaa mbii zihendwazo ni ataifa phapha duniani. ⁵ Ndo kwakukala, mwimwi mwáhenderwa gago gosi godzogahadza pho dzulu, hendani vyenu vyosi mwidimavyo mone kukala, munaenderera kumukuluphira Mulungu, munasagala mazagazi ga kumuhamya Mulungu, munagamanya go muhenzwago ni Mulungu muhende, ⁶ munadzidinisa kwa ta muts’ihende dambi, munavumirira ta muturiswapho, munasagala chijeso, ⁷ munaaonera mbazi ajeso anzienu osi, na munaahenza at’u osi na myoyo yenu yosi. ⁸ Maneno gago muchigahenda, na muchenderera kugahenda jeri-jeri, gandamuhenda muts’ikale akaha, na muhende go muhenzwago ni Bwana wehu Jeso K’irisito muhende, kwa munaumanya udzowe. ⁹ Ela mujeso yets’egahenda gago, unga dza mut’u yets’ona, na wányala kukala, Mulungu wámusamehe dambize, na achimuhenda ats’ikale na ila yoyosi. ¹⁰ Ndo k’amona enehu a chijeso, hendani vyenu vyosi mwidimavyo muhende maneno gaonyesago kukala, Mulungu wámutsagula mukale at’ue jeri. Maana, muchihenda vivyo, k’amundauya nyuma, ¹¹ na vivyo vindamuhenda mukaphokerwet’o ko kuriko Bwana wehu Jeso K’irisito, ariye ndiye Mutivyi, unatawala ta kare na kare. ¹² Mimi ninamanya munagamanya kare gago malagizo godzomwandikira, na mudzidina kutuwa ujeri ofunzwa. Ela mino ninaenderera kumukumbikiza vivyo. ¹³ - ¹⁴ Mimi ninamanya ts’iku zangu za kusagala phapha duniani zi phephi na kusira, maana, Bwana wehu Jeso K’irisito wánifunulira. Ndo ninaona ni vidzo nimukumbikize-kumbikize gago vivi nicherivyo moyo. ¹⁵ Ndo mimi nindahenda vyangu vyosi niidimavyo ta nichifa nimusiyire ut’u ondokala uchimukumbikiza gago ukati wosi. ¹⁶ Ajeso asena, siswi ahumwa a Jeso K’irisito hurio na widimi, hwázona na matso gehu enye zo nguvu za chimulungu za ye Bwana Jeso. Ndo siswi huriphomufunza kukala, Bwana wehu Jeso K’irisito undauya na nguvu za chimulungu, k’ahukalire hunamutsuphira ngano. ¹⁷ Mulungu, ariye ndiye Abaye Jeso K’irisito wágomba maneno ga kumwishima, na aching’aza kukala una widimi ye Jeso, pho mung’alo uriphobiririka, na laka richisikirika richamba, "Yiye ni Mwanangu nimuhenzaye, na udzinihamira." ¹⁸ Maneno gago gáhendeka ko mulima utakatifu, na siswi hwárisikira ro laka rolaa mulunguni, kwakukala, hwákala hu phamwenga naye. ¹⁹ Go maneno gohendeka ko mulima utakatifu gáonyesa kukala, maneno gogombwa ni agomvi a Mulungu, bee gákala ni ga jeri. Ndo gatuweni gago maneno ga agomvi a Mulungu, nago gandamwaviza. Maana, gago vivi ganga dza taa rakaro dzizani ta p’eho za kucha, na phapho kombezi rindalaa rimumwirikire mwenu myoyoni. ²⁰ Mwimwi renu ririro nimurimanye halahala ni kwamba, k’akuna mut’u aidimaye kusema maana, ya udzumbe wa agomvi a Mulungu urio Lagano ra Kare, phots’olongozwa ni Roho wa Mulungu. ²¹ Maana, o agomvi a Mulungu k’aasemere maneno gokala adzigatila ao enye, ela ágomba udzumbe wa Mulungu, chisha kwa kulongozwa ni Roho wa Mulungu.

¹ Ajeso asena, p’indi kwákala kuna agomvi a Mulungu enye kati ya Ayahudi, ela kuchidzalairira hinyo a ulongo. Ndo mwimwi namwi ninamwambira mino kukala, mumo mwenu duuni namo mundakudzaphenya alimu a ulongo. Ao andafunza at’u mafunzo ga ulongo, na ga kuyaza chisiri-siri, na ta andarema aambe ts’i Bwana wao ye Jeso K’irisito yeativya ariche madambi gao. ² Ndo ajeso anji andahenda gago maneno ga waibu gahendwago ni alimu a ulongo, na phapho aahende ataifa aifye Nguma Mbidzo. ³ Ao alimu a ulongo ana chidzitso, na andamufunza mafunzo ga ulongo kwa apate p’esa. Ela Mulungu wáavunga ulongo hangu p’indi, na achichiza kukala, undaahangamiza. Ndo Mulungu gago k’agarichire ta ye undaatiya akili dza vyoamba. ⁴ Siswi hunamanya kukala, kuna malaika ohenda dambi, na ao Mulungu k’aaonerere mbazi kamare, ta ye wáafunga na minyororo yots’otoka, achiaika dzizani atarize kulamulwa. ⁵ Hunamanya vivyo kukala, at’u pho p’indi ákala k’aamogopha Mulungu, na ao Mulungu k’aaonerere mbazi, ta ye wáreha muvo wa madzi, na uo uchidzaahosa osi okala k’aamogopha. Ukati uo wámutivya Nuhu na adamue afungahe tu bahi, kwakukala, ye Nuhu wákala unasumurira dzulu ya vyokala Mulungu unahenza at’u asagale. ⁶ Achina midzi ya Sodoma na Gomora nao k’aamogophere Mulungu, na ao Mulungu wáavunga ulongo, na achiaocha na midzi yao tsetsetse konyesa kukala, o at’u ots’omogopha undaatiya akili. ⁷ Ela Mulungu phapho wámutivya Lutu, kwakukala, wákala unahenda ga haki yiye. Lutu wákala achishononeswa ni go maneno ga waibu gokala gachihendwa ni o at’u ai a Sodoma. ⁸ Yiye Lutu yekala unahenda ga haki, wákala usagala mudzi uo okala at’u ni ai, na chila ts’iku wákala achishononeswa muno ni go mai gokala achigaona, na gokala achigasikira. ⁹ Ndo gago gosi ganaonyesa kukala, Bwana Mulungu una njiraye ya kwavulira ndaini at’u amogophao, na unayo vivyo ya kwafungira at’u ai atarize kutiywa akili ts’iku ya ulamuli. ¹⁰ Ndo vi lwazu kamare kukala, Mulungu undaatiya akili o at’u ahendao maneno gahenzwago ni t’amaa mbii za chimwiri, na kuphurya widimi wa Mulungu. Alimu a ulongo nao ni angumbau, na ana chimvute. Ao k’aaogopha malaika enye widimi, ta o kazi yao ni kwaifya tu. ¹¹ Maneno gago anagahenda, ela ta o malaika abomu enye vyeo na widimi chisha, k’aashitaki kwa Mulungu na maneno ga kwaifya o malaika anjine ario ni ai. ¹² Ela o alimu a ulongo anaifya chila chit’u chiricho k’aachimanya, dza nyama a weruni ario áikwa akale a kwinzwa, na kuulagwa kwa anahenda neno rorosi adzisikiraro kurihenda phots’olilikana. Ndo o alimu a ulongo nao andahangamizwa dza vyo nyama a weruni aulagwavyo, ¹³ na andaturiswa dza vyo aaturisavyo at’u anjine vivi. Ao anahenda maneno mai lwazu-lwazu, na vivyo enye anadzona a rahani. Na chisha, ao munarya nao shuhuli ya Bwana, ela ana waibu, na k’aamogopha Mulungu, maana, ao anahamirwa ni zo njira zao mbii amulemberazo. ¹⁴ Ao k’aaphisa muche, na nzala yao ya muche k’ayisira. Ao anaahenda ahende dambi o at’u ario chiroho ni atsanga. Ao a mbere kwa chidzitso, na andatiywa akili ni Mulungu. ¹⁵ Ao alimu a ulongo áricha kutuwa ujeri, na vivi ayaya, dza vyoyaya Balaamu mwanangwa wa Beori. Balaamu wákala u razi kuhenda dambi kwa apate p’esa. ¹⁶ Ela p’undawe wágomba dza mut’u achimugombera kwa yo dambiye yokala udziyihenda, na achimukanya ats’igauyire kahiri gago maneno gots’o tende. ¹⁷ Ao alimu a ulongo anga dza visima vyouma madzi, na anga dza maingu gaphepheswago ni vuto. Ela Mulungu wáchiza andakwendakala ko kut’u kwa dziza kali. ¹⁸ Ao anadziunula na maneno gots’oaviza mut’u, analongozwa ni t’amaa zao mbii za chimwiri kwahenda ahende dambi o ajeso ookoka dzuzi-dzuzi. ¹⁹ Ao alimu a ulongo anaamba k’aandatawalwa ni dambi o at’u ao aayazao, ela ta o enye acheri kutawalwa ni dambi, maana, mut’u utawalwa ni ut’u odzomushinda kuuricha. ²⁰ At’u kutiya ta ariche kutawalwa ni dambi za dunia zirizo zinabananga, niamukuluphire Bwana wehu Jeso K’irisito, ariye ndiye Mutivyi. Ela auyirapho kuhenda dambi ta zikale zinaatawala kahiri, hali yao nikukala mbii muno kuchira pho mwanzo phokala k’aadzangwe kumukuluphira Jeso K’irisito. ²¹ At’u achifika dza phapho nikukala, ni baha kala k’aayimanyire kamare yo Nguma Mbidzo, yiriyo ndiyo yiaonyesayo at’u vyo ahenzwavyo ni Mulungu asagale, kuriko kuyimanya yo Nguma Mbidzo, na chidzako ariche kugatuwa go mafunzoge. ²² At’u a vivyo analengwa ni zizi t’adi mbiiri zambazo, "Diya rinarya maphaphikage." Na yo ya phiri yinaamba, "Nguluwe achogeswa, chidzako wendagalagala t’opheni."

¹ Enehu a chijeso nimuhenzao, baruwa yiyi nimwandikirayo ni ya phiri, na mumu namo nidziheza kumukumbikiza-kumbikiza dzulu ya maneno murigo munagamanya kare dza vyohenda kwenye yo baruwa ya mwanzo, kwa ta mwidime kukala na maazo madzo. ² Gangu nihenzago mugakumbikire ni garat’u maneno gogombwa p’indi ni agomvi a Mulungu atakatifu, na go mafunzo ga Bwana wehu Jeso K’irisito, ariye ndiye Mutivyi, hurigomufunza siswi ahumwae a widimi. ³ Rangu ra kwanza ririro ninahenza murimanye halahala ni kwamba, ts’iku za phephi na musindikizo wa urumwengu zichifika, kundakudzalairira at’u ario andakala anatawalwa ni t’amaa zao mbii, na ao andamuzomorera mwimwi ajeso ⁴ amwambe, "Samba wálaga undauya ye Jeso wenu! H’a u lwaphi vino? Bee k’andauya yiye kwakukala, ta akare ehu ásira kufa, na k’akudzangwe kugaluka ut’u, ta maneno gacheri dza vyo hangu mwanzo wa urumwengu." ⁵ At’u ao anaurema kasidi o ujeri wa kukala, pho p’indi Mulungu wáhendaamba, nakukale mbingu na dunia, na vivyo vichiumbika jeri. Na Mulungu yo dunia wáyihenda yilairire kulaa kwa madzi phogavya madzi gakale phat’uphe, ⁶ na Mulungu dunia yiyo wáyihosa na muvo wa go madzi vivyo. ⁷ Ndo yiyi dunia husagalayo vivi nayo, Mulungu wáhendaamba dza vivyo, na unayiikira kudzayihangamiza na moho yo ts’iku ya ulamuli, yiriyo at’u ots’omogopha Mulungu andahangamizwa. ⁸ Ndo muts’inyale enehu a chijeso nimuhenzao kukala, Bwana Mulungu k’atara ukati dza vyo hutaravyo siswi adamu. Maana, kwakwe ts’iku mwenga, yi sawa na myaka helufu mwenga (1,000), na myaka helufu mwenga (1,000), yi sawa na ts’iku mwenga. ⁹ Ndo Bwana Mulungu ts’i kwamba unachelewa kuchimiza garat’u gogalaga dza at’u anjine aazavyo, ela ni unamuvumirira mwimwi, kwa k’enzi mut’u yeyosi ahangamike. Yiye uhenza at’u osi atye, na amugalukire yiye. ¹⁰ Mwimwi manyani kukala, Bwana undauya ts’iku yiriyo at’u k’aamulolera dza mwivi, na ukati uo ko mbinguni kundaodoka muno, na kuhangamike. Vit’u vya ko mbinguni navyo vindahangamizwa na moho, na yiyi dunia na vyosi virivyo duniani, vindaphya na moho tsetsetse. ¹¹ Bee enehu a chijeso, siswi hunamanyani kukala, urumwengu wosi undahangamizwa. Ndo mwimwi hendani garat’u muhenzwago ni Mulungu muhende ukati wosi, ¹² vivi mutarizavyo yo ts’iku muyitamaniyo muno, yiriyo Mulungu undaulamula urumwengu. Ts’iku yiyo, ko dzulu mbinguni kundahangamizwa na moho, na vyo vit’u vya ko dzulu mbinguni navyo viphye. ¹³ Ela siswi ajeso, Mulungu wáhulaga kwendasagala urumwengu uphya, na vivi hunatariza kwenda kuko kuriko chila mut’u undamogopha Mulungu jeri. ¹⁴ Ndo mwimwi enehu a chijeso nimuhenzao, hendani vyenu vyosi mwidimavyo vivi mutarizavyo yo ts’iku yiriyo Mulungu undaulamula urumwengu, kwa ta ts’iku yiyo yichifika mwi mukale k’amuna dambi, hebu ila yoyosi, na phapho mukale na reri na Mulungu. ¹⁵ Na vivi arivyo Bwana unaavumirira at’u, munahenzwa mumanye kukala, yiye unahenda vivyo kwap’a ukati atiye. Ndugu yehu wa chijeso humuhenzaye P’aulo naye, wámwandikira vivyo dzulu ya neno riri kwa kulongozwa ni hekima yokala uhewa ni Mulungu. ¹⁶ P’aulo wágahadza maneno gago mo mwakwe baruwani, ela vifungu vinjine ni vikomu kuvyelewa. Ndo at’u ario k’aadzangwe kufunzwa, na k’aadzangwe kukomala chiroho, anayigaluza yo maana, ya vifungu vivyo, na anagaluza ta vifungu vinjine vya Maandiko ga Mulungu. Ndo at’u ao ahendao vivyo anadzitiya lana enye, na andakudzahangamizwa yo ts’iku ya ulamuli. ¹⁷ Ela mwimwi enehu a chijeso nimuhenzao, munagamanya kare gago. Ndo dzimanyirireni kwa ta ao at’u ahendao mai ats’idze akamuhenda namwi mukahenda mai, na phapho mukaricha kutuwa o ujeri muutuwao. ¹⁸ Mwimwi sagalani mazagazi garigo gandamuhenda mukaze kuwona udzo wa Jeso K’irisito, ariye ndiye Bwana na Mutivyi wehu, na mukaze kumumanya t’ot’ot’o. Nahwenderereni kumulika Jeso K’irisito ta kare na kare. Amina.