2 JOHANA

¹ Ni mimi Johana, chilongozi wa chijeso. Ninakwandikira uwe mayo yetsagulwa, na anao. At’u mwimwi ninamuhenza jeri, na ta ts’i mimi hichiyangu ye amuhenzaye, ela ta ni at’u osi amanyao ujeri. ² Siswi hunamuhenza jeri, kwakukala, neno ra Mulungu, ri mwehu myoyoni, na rindakwenderera kukala mumo ta kare na kare. ³ Baba Mulungu na Mwanawe Jeso K’irisito, andahuhats’a, andahwonera mbazi, na ahuhende husagale na reri yao, siswi hurio hunaumanya o ujeri, na hunahenzanani. ⁴ Mayo, mimi náhamirwa muno niriphomanya kukala, anao anjine anatuwa ujeri dza vyo hurivyolagizwani ni Baba Mulungu. ⁵ Mimi vivi mayo nikuhenzaye, ninakwandikira lagizo kukuvoya kukala, huhenzaneni siswi ajeso hosini. Lagizo riri ts’i kwamba ni jeni, ela ni rirat’u ra p’indi urirorimanya kwanzira yo ts’iku uriyokuluphira. ⁶ Na konyesa hunahenzanani, nihusagaleni mazagazi gehu gosi huchikala hunatuwa malagizo ga Mulungu. Uwe lagizo rorisikira kwanzira yo ts’iku uriyokuluphira ni riri ra kukala, husagaleni mazagazi ga kuhenzana. ⁷ Ajeso asena, phapha duniani phazumbuka alembi anji, ario k’aakuluphira kukala, Jeso K’irisito wákudza duniani dza mudamu. Mut’u yeyosi yets’ekuluphira gago, ni ye mulembi, na ni mudawa wa Jeso K’irisito. ⁸ Ndo mwimwi dzimanyirireni, kwa mupate manoso genu kamili. Ela muts’iphohenda vivyo, mundagakosa murigogabagalikira. ⁹ Mut’u yeyosi yets’enderera kutuwiriza mafunzo ga Jeso K’irisito t’ot’ot’o, ela ye unaonjeza na gakwe, k’ana umwenga na Mulungu. Ela yeyosi aendereraye kugatuwiriza t’ot’ot’o, una umwenga na Baba Mulungu, na ye Mwanawe Jeso K’irisito. ¹⁰ Mut’u achidza kwenu kanisani, ela mumumanye k’ana wa mafunzo ga Jeso, ts’imuhenzezeni kuhubiri. ¹¹ Mut’u yeyosi amuhenzezaye kuhubiri mut’u wa vivyo, yiye naye ni mui dza yiye. ¹² Mimi nina manji nihenzago nimwambire, ela gago ts’enzi kugaandika baruwani. Mimi ninaaza kudza ko kwenu, nidze nigombe namwi mimi mwenye mwiri, kwa ta huhamirweni tsetsetse. ¹³ Ajeso anzienu otsagulwa, anamulamusa.