2 AKORITO

¹ Ni mimi P’aulo yeolohewa ni Mulungu nikale muhumwa wa Jeso K’irisito wa widimi, na nina ndugu yehu wa chijeso T’imoti. Hunamulamusa mwimwi ajeso a Korito, na at’u a Mulungu anjine osi kuko jimbo ra Akaya. ² Abayehu Mulungu na Bwana Jeso K’irisito naamuhats’e, na amuhende musagale na reri yao. ³ Naalikwe Mulungu Abaye Bwana wehu Jeso K’irisito. Yiye Baba Mulungu ndiye ye arehaye mbazi, na ndiye ye angolayengolaye at’u. ⁴ Yiye unahungolangola na riki zehu zosi, ta vivi siswi naswi hunaidima kwangolangola anjine achikala ana riki yoyosi, dza virat’u siswi hungolwavyongolwavyo ni ye Mulungu. ⁵ Siswi hunashononeka muno dza vyoshononeka K’irisito, ela hunangolwangolwa muno vivyo ni Mulungu kwa njira ya Jeso K’irisito. ⁶ Siswi huchishononeswa, hunavumirira kwa hunamanya malairiroge ni kukala, mwimwi mundangolwangolwa na mujengeke chiroho. Kwa vivyo, Mulungu achihungolangola, unahenda vivyo kwa siswi humungolengole mwimwi, na vivyo ndivyo vimwidimisavyo kuvumirira shenene dza vyo huvumiriravyo siswi. ⁷ Ndo huna kanuni mundavumirira shenene, kwakukala, hunamanya ambavyo munashononeka dza vyo hushononekavyo siswi, munatiywa moyo vivyo dza vyo hutiywavyo siswi. ⁸ Enehu a chijeso, hunahenza humumanyise dzulu ya zo ndai zohugwira jimbo ra Asiya. Kuko, siswi hwáhenderwa mauku muno ta huchikala hudzikat’a t’amaa ya kukala moyo. ⁹ Phapho phofiswa, bee pháhuhenda hwone hundafa. Gago gákala kwa ta siswi huts’idzikuluphire siswi enye, ela humukuluphire Mulungu hicheye, ariye unaidima kwafufula ta afadzi. ¹⁰ Mulungu phapho wáhutivya na riki yokala yindahuulaga, na vivi hunakuluphira kukala, undaenderera kuhutivya, ¹¹ vyo murivyo mwimwi namwi munahwaviza kwa kuhuvoyera. Na Mulungu undasikira mavoyo genu na ahuhats’e, na phapho at’u anji andamulavira mumvera Mulungu kwa kuhuhats’a siswi. ¹² Enehu a chijeso, siswi hunahamirwa kwakukala, huna kanuni mwehu myoyoni kukala, mazagazi gehu phapha duniani, na kamwe vyosagala na mwimwi, bee vyákala vinaonyesa hu at’u a kukuluphirika, na a moyo umwenga. Mulungu wáhulongoza na achihwaviza kuhenda henzore, ela k’ahulongozerwe ni hekima ya chidunia. ¹³ - ¹⁴ Ndo baruwa zangu nimwandikirazo, zi lwazu na zineleweka. Vivi mwimwi k’amudzangwe kuhumanya t’ot’ot’o, ela ninakuluphira kukala, mundahumanya t’ot’ot’o ta yo ts’iku yondokala Bwana wehu Jeso K’irisito unauya, mukale munaswi ngulu dza siswi vyondokala na ngulu namwi. ¹⁵ - ¹⁶ Mimi nákala nina kanuni kukala, mundanimanya t’ot’ot’o na munikuluphire ta nichikala nidzipanga kukala, phondokala ninenda jimbo ra Makedonia, nichire na ko kwenu. Na nichikala ninauya, niuye na ko kwenu vivyo, kwa ta nimuhende mufaidike k’ano mbiiri, na munaavize na charo changu cha kwenda jimbo ra Judea. ¹⁷ Ndo mukale vino munaona go nirigokala nidzigapanga, gari k’aga moyoni kwa nágaluza mipango yangu? Hebu munaona mino ni mut’u yets’e mwimo, ariye achamba undahenda hiri, ts’iro ahendaro? ¹⁸ Siswi gehu humwambirago ni ga jeri ukati wosi, dza virat’u Mulungu arivyo ugomba ujeri ukati wosi. ¹⁹ Mimi, Silwano na T’imoti hwámusumurira udzumbe dzulu ya Jeso K’irisito Mwana wa Mulungu, na yiye unakuluphirika jeri-jeri. ²⁰ Maana, Mulungu ariphomuhuma Jeso phapha duniani, wáchimiza vilagane vyosi vyokala udzivilaga pho mwanzo. Gago ndigo gatumago ta hunaamba " Amina" kwa dzina ra Jeso K’irisito kwa humulike Mulungu. ²¹ Mulungu ndiye ye ahuhendaye siswi na mwimwi humukuluphire Jeso K’irisito jeri. Yiye ndiye yehutsagulani, ²² na achihupiga molawe kwa kuhup’a Rohowe akale mwehu myoyoni, kuhutatisa dzulu ya gosi gondokudzahup’a. ²³ Mimi ts’idzire ko kwenu kwakukala, nákala ts’enzi kudzamugombera kwa go makosa genu. Gago ni ga jeri ta Mulungu unamanya. ²⁴ Lengo rehu ts’i kumutawala, na kumwambira muhenzwaro mukuluphire. Sino lengo rehu ni kuhenda kazi na mwimwi ta muhende kuluphiro ra kudina, na phapho muhamirwe.

¹ Ndo náamula kuts’amutsemberera kwakukala, nákala ts’enzi hudze hushononesaneni kahiri. ² Mimi kala nákudza kwenu, ningari nákudzamuhenda mushononeke, na phapho ningari nákosa mut’u wa kunitiya moyo. ³ Gotuma ta nichihendamwandikira baruwa ni kukala, nákala ts’enzi kudza mimi mwenye ko kwenu. Maana, kala nákudza ukati uo, mwimwi mungari mwánihenda nishononeke, na mwimwi ndimwi muwiryao kunihenda nihamirwe. Mimi nina kanuni kukala, mwimwi muchinihenda nihamirwe, ta mwimwi mosi namwi mundahamirwa vivyo. ⁴ Niriphomwandikira, nákala ninasikira ut’u ta nichikala ninarira. Ela ta vivyo, lengo rangu ronihenda nimwandikire baruwa yiyo, rákala ni kumumanyisa ninamuhenza muno, ela ts’i kumuhenda mushononeke. ⁵ Enehu a chijeso, dambi yohendwa ni mut’u mumwenga ko kwenu, bee k’ayinishononesere mimi hichiyangu, ela ta mwimwi mosi. Na chikala ts’i mosi, h’aya bee anjine enu. Mimi ninaamba vivi kwakukala, ts’enzi kumutsinzira muno yiye. ⁶ Kuko kutiywa akili kotiywa yiye ni anji enu, kunamutosha. ⁷ Ndo vivi muvuguleni mut’u yiye, na mumutiye moyo kwa ta ats’idze akashononeka muno ta akakuluphukwa kamare. ⁸ Ndo ninamuvoya mumonyese kukala, munamuhenza. ⁹ Mino yiyat’u baruwa námwandikira kwakukala, nákala ninahenza nimanye kumba mu kwete kutuwa malagizo gangu ukati wosi. ¹⁰ Mwimwi mut’u yiye muchimusamehe, ta mimi nami ninamusamehe. Na mino námusamehe kare ta Jeso K’irisito ni shaidi wangu, na mimi ninasamehe kwakukala, ninamumanyirira mwimwi. ¹¹ Gaga ninagahenda kwa ta Shetani ats’ipate nafasi ya kuhushindira kamare, maana, hunayimanya t’ot’ot’o vyo yirivyo mipangoye. ¹² Niriphokwenda mudzi wa T’orowa kwendasumurira Nguma Mbidzo dzulu ya K’irisito, Bwana wánivugulira njira ya kuhenda kazi yangu kuko. ¹³ Ela nákala ts’ina reri kwakukala, ts’imonere mwenehu wa chijeso Tito. Ndo gago gánihenda nialage o ajeso a phapho, na nichiuka nichenda jimbo ra Makedonia. ¹⁴ Siswi nahumulavireni mumvera Mulungu enehu a chijeso, kwakukala, Mulungu wámuhenda K’irisito amushinde Shetani, na ta siswi naswi hunao ushindi wa K’irisito, kwakukala, ndiye ahulongozaye ukati wosi. Na Mulungu unahuhenda hugot’eze chila phat’u udzo wa kumumanya K’irisito, urio unga dza k’ungu mbidzo. ¹⁵ Na siswi hunga dza sadaka ya k’ungu mbidzo yiriyo K’irisito unayifukizira Mulungu. Na yiyo k’ungu mbidzo, yinaafikira at’u osi, kwa atiyao na ayayao. ¹⁶ At’u ayayao, k’ungu yiyo anayisikira ni mbii, na yina k’ungu dza ya lufu. Ela at’u atiyao, k’ungu yiyo anayisikira ni mbidzo, na yinaarehera uzima. Ndo ni mut’u wa chidzedze awiryaye kuhenda kazi yino? ¹⁷ At’u anjine anji, adzikuhenda kusumurira udzumbe wa Mulungu ni ts’umo. Ela siswi hunausumurira na waminifu kwakukala, Mulungu ndiye yehup’a kazi yiyi, na unahwona vyo huusumuriravyo kwa widimi huhewao ni K’irisito.

¹ Enehu a chijeso, gago gangu godzogagomba phapho dzulu, bee ts’i kwamba nidzigagomba, kwa hunadzilika kahiri. Na k’ahutakiya baruwa za kudzimanyisa kwa mwimwi, hebu baruwa kulaa kwenu za kuhumanyisa hu ano ani dza anjine ahendavyo. ² Mwimwi ndimwi murio dza baruwa za kuhumanyisa kukala, siswi hu ahumwa a Jeso K’irisito jeri, na zizo záandikwa mwenu myoyoni kwa chila mut’u aone, na amanye. ³ Mwimwi vyo murivyo, bee vinang’aza kukala, munga dza baruwa yilaayo kwa K’irisito, ela siswi ndiswi huriyoyandika. Baruwa yiyo, k’ayaandikirwe na wino, ela yáandikwa na Roho wa Mulungu ariye moyo. Na k’ayaandikirwe maweni, ela myoyoni. ⁴ Gago gosi hunago kanuni kwakukala, hunamukuluphira Mulungu kuchirira Jeso K’irisito. ⁵ Na Mulungu ndiye ye ahup’aye widimi wa kuhenda kazi yiyo, ela siswi k’ahuna chochosi chiidimacho kuhuhenda hwambe, kazi yiyi hunayihenda kwa widimi wehu enye. ⁶ Mulungu ndiye yehup’a widimi wa kumuhikirahikira, kwa njira yolaviwa ni Lagano Iphya. Siswi at’u a Lagano Iphya hulongozwa ni Roho wa Mulungu, ela ts’i Shariya yohendaandikwa. Shariya yohendaandikwa yinareha chifo, ela Roho wa Mulungu unareha uzima. ⁷ Shariya ya kwandikwa maweni phokala yinalaviwa, yárehewa na mung’alo wa Mulungu, na uso wa Musa uchimetameta muno kwa o mung’alo wa Mulungu ta Ayahudi achikala k’aaidima kuulola. Ela mung’alo uo wákala ni wa chiwango tu. Ndo kwahivira kazi ya Shariya yirehayo chifo, yárehewa na mung’alo wa Mulungu, ⁸ kazi ya Roho wa Mulungu arehaye uzima, ni seti yonyese lwazu muno vyo Mulungu arivyo. ⁹ Na kwahivira yiyo kazi yiahendayo at’u alamulwe ni alongo, yárehewa na mung’alo wa Mulungu, kazi yiahendayo at’u aphokerwe ni Mulungu dza enye haki, ni seti yonyese lwazu muno vyo Mulungu arivyo. ¹⁰ Ela vivi, mung’alo wa Shariya k’awoneka kahiri, kwakukala, uyazwa ni Roho wa Mulungu aonyesaye lwazu muno vyo Mulungu arivyo. ¹¹ Na kwahivira Shariya yákala ni ya chiwango tu, na yákala yina mung’alo wa Mulungu, lagano ra Roho wa Mulungu ririro rindaenderera ta kare na kare, ni seti ronyese lwazu muno vyo Mulungu arivyo. ¹² Ndo kwahivira hunaro kanuni riro Lagano Iphya, hunasagala phots’o woga. ¹³ Sino k’ahunga dza Musa, yekala achifinik’ira usowe kwa Ayahudi ats’one mung’alo wa Mulungu uchififira ta mwisho. ¹⁴ Ndo k’aamanyire, kwakukala, akili zao záfinik’irwa. Na ta vivi rero chisha, achisomerwa vitabu vya Lagano ra Kare, k’aamanya vivyo, kwakukala, akili zao zicheri kufinik’irwa. Mut’u ufunulwa akili tu, amukuluphirapho Jeso K’irisito. ¹⁵ Ndo ta vivi rero ao achisomerwa vitabu vya Musa, k’aamanya, kwakukala, akili zao zicheri kufinik’irwa. ¹⁶ Ela mut’u achitya na kumugalukira Bwana, unafunulwa akili. ¹⁷ Ndo pharipho Bwana, Roho naye u phapho, na pharipho Roho, phana utsare. ¹⁸ Siswi hosini, nyuso zehu k’azifinik’irirwe. Kwa vivyo, hunga dza kwamba hunamona na chiloloni vyo arivyo ye Mulungu mwenye, na hunakaza kugaluzwa hukale dza yiye. Kugaluzwa kuku ni kazi ya Roho wa Bwana.

¹ Siswi k’ahufa moyo kwakukala, yiyi kazi ya kusumurira Nguma Mbidzo bee, hwáyihewa ni Mulungu kwa mbazize mwenye. ² Na hunasumurira ujeri wa Nguma Mbidzo lwazu-lwazu ta Mulungu unamanya. Vivyo ndivyo hwonyesavyo chila mut’u kukala, siswi hu ahumwa a Jeso a widimi jeri. Ela kala ni maneno ga waibu gahendwago chisiri-siri, yaani kulemba at’u, hebu kugaluza ujeri wa Nguma Mbidzo ukale ulongo, sino k’ahugaenzi kamare. ³ Yiyi Nguma Mbidzo huyisumurirayo, k’ayi lwazu kwa at’u anjine, na ni arat’u ayayao. ⁴ Ao k’aakuluphira Nguma Mbidzo kwakukala, Shetani mutawali mui atawalaye yiyi dunia, udziabananga maazo gao ta anga dza at’u ots’oona. Ao k’aaidima kuwona o mwanga urio unaamwirikira. Mwanga uo unagot’ezwa ni Nguma Mbidzo dzulu ya ubomu wa Jeso K’irisito, ariye unga Mulungu kamare. ⁵ Siswi k’ahusumurira dzulu yehu siswi enye. Gehu humusumurirago sino bee ni kukala, Jeso K’irisito ndiye Bwana, na kukala, hunamuhikirahikira mwimwi kwa dzuluye. ⁶ Mulungu yeamba, "Mwanga naumwirike kulaa dzizani," phokala unaumba urumwengu, ndiye yeasha mwangawe mwehu myoyoni. Mwanga uu ndio uhuhendao siswi humanye ubomu wa Mulungu, urio wáng’azwa ni K’irisito. ⁷ Siswi ohewa uu mwanga wa kwangalaza, bee hunga dza nyungu kwa ta o widimi ubomu umanywe lwazu kukala ulaa kwa Mulungu, ela ts’i kwehu siswi. ⁸ Siswi hunaturiswa kwa chila njira, ela k’ahushindwa ni kuhenda kazi yehu. Ukati unjine hunaangalala, ela k’ahufa moyo. ⁹ At’u anahuhendera mauku, ela Mulungu u naswi, na ta huripho ukati unjine hunapigwa, ela k’ahuulagwa. ¹⁰ Siswi ukati wosi bee hunaturiswa dza Jeso vyokala achituriswa kwa ta uzima wa Jeso ung’azwe kuchirira miiri yehu. ¹¹ Siswi hu moyo, ela ukati wosi bee hunainzwa ni chifo kwa dzulu ya Jeso, kwa ta uzima wa Jeso ung’azwe kuchirira yiyi miiri yehu yiriyo yindafa. ¹² Ndo siswi mbira zehu zi lwazu ukati wosi, ela mwimwi munahewa uzima. ¹³ Maandiko ga Mulungu ganaamba, "Nágomba kwakukala, ninamukuluphira Mulungu." Ndo siswi naswi hunasumurira Nguma Mbidzo kwakukala, hunaro kuluphiro dza riro. ¹⁴ Hunamanya kukala, Mulungu wámufufula Bwana Jeso kulaa kuzimu. Ndo huna kanuni undahufufula ta siswi vivyo, na chidzako ahuhwale hosini ahwike mbereze. ¹⁵ Shenene zizo zosi zinahupata kwa mwimwi mukale phadzo. Na vivi Mulungu akazavyo kwativya at’u anji enye kwa mbazize mwenye, at’u anji muno vivyo andamulavira mumvera Mulungu, na amulike muno. ¹⁶ Ndo siswi k’ahufa moyo kwa gago, kwakukala, ta huripho chimwiri hunaphunguka, ela ko ndani hunajengwa luphya chila ts’iku. ¹⁷ Maana, riki zizi hupatazo vivi ts’i bomu, na ni za chiwango tu, na zindahurehera manoso mabomu genye gondaenderera ta kare na kare. ¹⁸ Ndo siswi k’ahulola hizi ndai hurizo hunazona vivi, ela hulolera higo garigo k’ahudzangwe kugaona. Maana, zizi ndai huzonazo zindasira sambi; ela yo raha yidzayo yindakwenderera ta kare na kare.

¹ Maana, hunamanya kukala, gaga mahema husagalago vivi phapha duniani, yaani miiri yehu, gaching’olwa, Mulungu undakwendahup’a miiri miphya ko mulunguni, na yiyo yinga dza nyumba yondaenderera ta kare na kare, yiriyo k’ayijengwa ni at’u. ² Na vivi hucherivyo na miiri yiyi, hunaugula, kwakukala, hunatamani huvikwe yo miiri ya mulunguni. ³ Hunahenza huvikwe miiri yehu ya mulunguni, na phapho roho zehu k’azindakala phots’o miiri. ⁴ Siswi hunaugula vivi hucherivyo na miiri yiyi, na vivyo ts’i kwamba hunahenza huyivule yiyi miiri huriyo nayo, ela ni hunahenza huvikwe miiri ya mulunguni, kwa ta yiyi miiri yiriyo yindafa yiuswe ni hiyo miiri yiriyo yindakala ta kare na kare. ⁵ Mulungu mwenye ndiye yehubambanya kwa gago, kwa kuhup’a Rohowe na, kuhutatisa gondokudzagapata. ⁶ Ta huripho hunamanya kukala, vivi hucherivyo kusagala na miiri yiyi k’ahu mudzini pha Bwana Jeso, ela siswi huna kanuni hundapata miiri yiyo miphya. ⁷ Maana, hunasagala mazagazi gaga kwa kuluphiro, ela ts’i kwa kona. ⁸ Ndo siswi huna kanuni, na ta hungehenza muno huriche kusagala na miiri yiyi, na hwende hukasagale pha Bwana. ⁹ Dzulu ya gosi, hunahenza huhende gamuhamirago Bwana phehu phosi phondokala, hukale hucheri kusagala na miiri yiyi, hebu hunasagala mudzini pha Bwana. ¹⁰ Maana, hosini ni seti hwime mbere za mulamuli wehu K’irisito, naye undalamula chila mumwenga apate awiryacho, kwa mahendo gogahenda ukati phokala unasagala phapha duniani, gakale ni madzo hebu ni mai. ¹¹ Ndo kwahivira hunamanya kumogopha Bwana nini, hunahenda vyehu hwidimavyo kwavuha at’u ahukuluphire. Mulungu unahumanya t’ot’ot’o vyo hurivyo, na huna kanuni mwimwi namwi munahumanya t’ot’ot’o. ¹² Mimi nidzamba vivyo enehu a chijeso, ela ts’i huhwalireni kukala, ni hunadzilika mbere zenu kahiri. Rehu huhenzaro hurihende, ni kumup’a mwimwi ut’u wa kumuhenda muhende ngulu kwa siswi, na phapho mwidime kwaudzidza o at’u aalikao at’u kwa vyo aonekavyo, ela ts’i go gao ga myoyoni. ¹³ Siswi huchihenda maneno gots’omanywa ni at’u, hunagahendera Mulungu. Na huchihenda maneno ga kawaida, hunagahenda kwa dzulu yenu mwimwi. ¹⁴ Siswi hunahenda gaga kwakukala, hunalongozwa ni vyo Jeso K’irisito ahuhenzavyo. Yiyo menzwaye yinahulongoza kwakukala, huna kanuni wáfa kwa dzulu ya at’u osi. Ndo hunakubali kukala, chicho chifoche kwa dzulu ya at’u osi, chinaimanisha kukala, o at’u osi nao, gao ga p’indi gáfa. ¹⁵ Jeso K’irisito wáfa kwa dzulu ya at’u osi, kwa ta ondokubali kukala anafunzie, ats’enderere kulongoza mazagazi gao enye, ela galongozwe ni ye Jeso K’irisito yefa kwa dzulu yao, na achifufulwa kulaa kuzimu kwa dzulu yao vivyo. ¹⁶ Ndo kulaira huriphomukuluphira Jeso K’irisito, k’ahumulamula mut’u yeyosi chidunia. P’indi ta siswi hwámulamula Jeso chidunia, ela vivi k’ahugahenda kahiri. ¹⁷ Ndo mut’u yeyosi achiphenya Jeso, ni kukala ukala chumbe chiphya, na go mazagazige ga p’indi, ni kukala gáchira ta lola udzanza maphya. ¹⁸ Gago gosi siswi huhenderwa ni Mulungu, ariye wáhuhenda hutseke naye kahiri kwa gohendwa ni Jeso K’irisito. Na vivi, Mulungu wáhup’a kazi ya kwahenda anjine atseke naye. ¹⁹ Na udzumbe wehu unaamba, Mulungu kuchirira gohendwa ni K’irisito, wáavugulira njira at’u osi phapha duniani ya kwahenda atseke naye phots’oatarira madambi gao. Ndo siswi, Mulungu wáhup’a kazi ya kusumurira udzumbe wa kukala, unahenza at’u osi akubali kutseka naye. ²⁰ Ndo siswi hu atumia a Jeso K’irisito, na vivyo ni kwamba, Mulungu mwenye kuchirira siswi, bee unaavoya at’u osi atseke naye. Na siswi dza atumia a K’irisito, hunamuvoya mukubali Mulungu amuhende mutseke naye. ²¹ K’irisito k’ahendere dambi kamare, ela Mulungu wámuhenda dza kwamba ni mudambi kwa dzulu yehu, kwa ta Mulungu ahuphokere dza enye haki kuchirira ye K’irisito.

¹ Enehu a chijeso, Mulungu unahenda kazi phamwenga naswi. Kwa vivyo, hunamuvoya mwimwi murioonerwa mbazi ni Mulungu, mukuhumire kuko, kumuhikirahikira yiye. ² Maana, Mulungu wáamba, "Ukati wa kukwaviza uriphofika, násikira chirirocho, na ts’iku ya kukutivya yiriphofika, nichikwaviza." Bee, uu ndio ukati wa kwavizwa, na ndiyo ts’iku ya kutivywa. ³ Siswi hunahenza humuhikirehikire Mulungu kwa njira yiriyo at’u k’aandapata cha kuhulaumira, na k’ahwenzi kumukwaza mut’u chivyovyosi ta areme kumukuluphira Bwana. ⁴ Ndo siswi hunadzonyesa kukala, hu ahendikazi a Mulungu jeri chivyovyosi. Maana, hunavumirira muno yenye ukati wa shenene, ndai na riki. ⁵ Siswi ukati unjine hunapigwa, hunafungwa, na hunabit’irwa miyuwano jamani. Na ukati unjine hunahenda kazi k’omu, hunachesa matso, na kuts’arya chakurya. ⁶ Ndo siswi hunadzonyesa kukala, hu ahendikazi a Mulungu kwa: kuts’akala na ila rorosi, kumumanya Mulungu, kuts’aahendera undu ta o ahukosao, kwaonera mbazi at’u, kwidimiswa na kulongozwa ni Roho wa Mulungu, na kwahenza at’u jeri. ⁷ Na chisha, hunadzonyesa hu ahendikazi a Mulungu kwa kusumurira udzumbe wa jeri kwa widimi huhewao ni Mulungu, na hunahumira silaha ya kuhenda ga haki, kuyekera na kupigira. ⁸ At’u anjine anahwishima, ela anjine anahuphurya. Anjine anahulika, ela anjine o anahwifya. At’u anahwamba hu alongo, ela sino hunagomba ujeri. ⁹ Anjine k’aahwona dza at’u, ela sino hunamanywa chila phat’u. Mbira zehu zi lwazu ukati wosi, ela sino hucheri moyo dza muhwonavyo. Siswi hunapigwa, ela k’ahuulagwa. ¹⁰ Hunashononeka chimwiri, ela chiroho hunahamirwa ukati wosi. Siswi hu achiya, ela hunaarudzya anji chiroho. K’ahuna chit’u, ela chiroho huna vyosi. ¹¹ Enehu a chijeso a Korito, siswi hudzimwambira lwazu-lwazu gehu gosi ga mwehu ndani, kumonyesa kukala, hunamuhenza jeri. ¹² Siswi hucheri kumuhenza, ela mwimwi k’amonyesa mucheri kuhuhenza. ¹³ Bee, mimi vivi ninamwambira dza bemut’u a-aambiravyo anae, kukala muhuhenze dza siswi humuhenzavyo. ¹⁴ Enehu a chijeso, mwimwi ts’ipambaneni na mataifa. Maana, gano mahendo ga haki na mai, gapambanadze? Na mwanga na dziza upambanadze? ¹⁵ Jeso K’irisito k’aidima kusikizana na Shetani, na kwa vivyo, mujeso naye k’aidima kushirikiyana na mutaifa. ¹⁶ Nyumba ya Mulungu wa jeri yihusiyanadze na nyumba ya milungu ya vinyago? Na bee, nyumba ya Mulungu ariye moyo, ni siswi dza Mulungu mwenye aambavyo, "Nindasagala mwao ndani, na nikale kati yao. Nindakala Mulungu wao, nao andakala at’u angu." ¹⁷ Ndo Bwana Mulungu una-aamba at’ue, "Kulaeni kuko kwa mataifa, na dzitengeni nao. Ts’ikumbeni ut’u wowosi urio ni najisi, nami nindamuphokera. ¹⁸ Mimi nindakala Abayenu, namwi mundakala anangu. Ninaamba vivyo mimi Bwana Mwenyezi Mulungu."

¹ Ndo kwahivira siswi hwálagwani vilagane vivyo ni Mulungu enehu a chijeso nimuhenzao, nahuricheni kuhenda maneno gosi mai garigo ganatiya najisi mwiri na roho, na nahudzilavireni tsetsetse kumogopha Mulungu, kwa hukale at’ue atakatifu kamare. ² Siswi hunamuvoya muhuhenze kwakukala, k’ahudzangwe kumukosa mut’u yeyosi, kubananga mut’u yeyosi, hebu kumulemba mut’u yeyosi. ³ Na ts’i kwamba nidzamba vivyo kumulamula mu alongo. Sino mwimwi hwámwambira kare kukala, hunamuhenza muno ta hundafa na kuno hunamuhenza vivyo. ⁴ Mimi ninamukuluphira muno mwimwi, nami ta nina ngulu muno kwa mwimwi. Mimi nidziphenya moyo, na ta huripho hunapata riki nyinji, ela ninahamirwa muno. ⁵ Siswi huriphofika jimbo ra Makedonia, k’ahwoyere, maana, at’u áhupinga, na huchikala hu chimoyomoyo. ⁶ Ela Mulungu unatiya moyo at’u odzovunzika myoyo. Ndo yiye wáhutiya moyo kwa kudza kwa Tito. ⁷ Dzulu ya vivyo, siswi hwákaza kutiywa moyo ni go maneno madzo gokudzaambirwa ni Tito dzulu yenu. Yiye wáhwambira kukala, munatamani muno munone, munashononeka kwa gohendeka, na munaniunga mukono. Gago gánihenda nikaze kuhamirwa. ⁸ Baruwa niriyomwandikira mwanzo, yámushononesa. Na ta viripho ni kwa chiwango tu, vivyo vyánishononesa ta mimi. Ela vivi ts’idzuta náyandikirani. ⁹ Vivi ninahamirwa, na ts’ihamirwa kwa námushononesa, ela kwakukala, kushononeka kwenu kwámuhenda muuye kwa Mulungu. Kuko kushononeka kwenu, kwátuwana na henzo ra Mulungu. Kwa vivyo, baruwa yehu yomwandikira k’ayimuudzire nyuma. ¹⁰ Kushononeka kutuwanako na henzo ra Mulungu, kunamuhenda mut’u auye kwa Mulungu; ambapho ni kukala utiya, na kuko k’akumuhenda mut’u adzute. Ela kushononeka kots’otuwana na henzo ra Mulungu, kunareha chifo. ¹¹ Kushononeka kwenu, kwátuwana na henzo ra Mulungu, na lilikanani ta mwimwi enye, godzolairira kwa kuko. Kuko kwámuhenda mudzidinise, muhenze kudzitsukutsa, kwámuuhusa na kuchimuhenda mogophe, kwámuhenda mutamani kuhwala hatuwa, kwámutiya moho, na kwámuhenda mukale kwete kumutiya akili yekosa. Ndo gago genu gosi gogahenda gang’aza kukala, mwimwi enye mwákala k’amuna kosa rorosi dzulu ya neno riro. ¹² Mimi niriphomwandikira baruwa yiyo, ts’iyaandikire kwa dzulu ya yehenda dambi hicheye, hebu yehenderwa dambi. Mino náandika baruwa yiyo, kwa ta vimanywe mbere za Mulungu vyo murivyo mwimwi mwádzilavira tsetsetse kwehu. ¹³ Gago bee ndigo gohutiya moyo. Na dzulu ya vivyo, siswi hwáhamirwa muno kwa hwámona Tito unahamirwa kwa mwimwi mwákala mudzimutsereza roho. ¹⁴ Mimi nákala nidzimwambira Tito kukala, mwimwi munakuluphirika. Na yiye ariphokudza kwenu, mwimwi k’amuniudzire nyuma. Siswi hwámwambira ujeri ukati wosi mwimwi, na gomwambira Tito, gákudzalairira vivyo ni ga jeri. ¹⁵ Tito ucheri kukumbikira vyo murivyomuphokera t’ot’ot’o, vyomwishima muno, na vyotuwa malagizoge mosi. Ndo gago ganamuhenda akaze kumuhenza. ¹⁶ Mimi ninahamirwa vivi kwakukala, nina kanuni munakuluphirika na gosi.

¹ Enehu a chijeso, hunamumanyisa dzulu ya Mulungu arivyoajaliya ajeso a jimbo ra Makedonia myoyo ya mbazi. ² Maana, o ta aripho ápata riki nyinji, na chisha bee ni achiya muno, ela ao ákala anahamirwa muno ta achilavya na moyo umwenga. ³ Ao ninamwambira, álavya chivyao vyosi vyoidima na ta zaidi, kwa henzo rao enye. ⁴ Ao áhuvoya muno ahenzezwe kwaaviza ajeso anziao a mudzi wa Jerusalemu. ⁵ Ao áhenda manji kuchira gokala hunagalolera ahende. Ao áanza kudzilavira tsetsetse kwa Bwana Jeso, na kwehu siswi kwakukala, ákala anamanya vivyo ndivyo vyokala Mulungu unahenza. ⁶ Ndo gago gáhuhenda humukalate Tito kukala, adze amarigize yo kazi ya konyesa menzwa, yaani mutsango kulaa kwenu okala udziwanzisha p’indi. ⁷ Mwimwi mu t’ot’ot’o chila upande: Kala kuluphiro, kugomba, kuumanya ujeri, chadi, na vyo muhuhenzavyo siswi. Ndo ninamuhenza mukale t’ot’ot’o vivyo na yiyo kazi ya konyesa menzwa. ⁸ Riro ts’i kwamba nidzirilavya dza lagizo. Mino ko kulavya na moyo umwenga kwa anjine, nidzikuhwala dza mufano, kwa nimulole kumba menzwa yenu ni ya jeri. ⁹ Ndo mwimwi lavyani na moyo umwenga kwakukala, munamanya Bwana wehu Jeso K’irisito unahuhenza muno. Yiye ta aripho wákala ni tajiri, ela wákudza duniani, na achidziika dza muchiya kwa dzulu yenu. Yiye wádziika vivyo, kwa mwimwi mukale matajiri chiroho. ¹⁰ Mwimwi pho mwaka dzana, ndimwi oanza kuhenza kwatsangira ajeso ayaehu a Jerusalemu na moyo umwenga, na muchanza kukusanya. Ndo maoni gangu ni kwamba, ninaona ni baha ¹¹ vivi mumarigize mutsango wenu. Na umarigizeni na moyo wa kuhenza kulavya dza vyoanza, na lavyani kutuwirizana na widimi wenu. ¹² Maana, mut’u achikala una moyo wa kuhenza kulavya, na achilavya kutuwirizana na widimiwe, Mulungu unachiphokera cho chilaviwacho, kwakukala, k’alolera mut’u alavye cho aricho k’anacho. ¹³ Mimi ts’i kwamba nina-aaviza anjine, kwa kumuhwika mizigo mibomu mwimwi, h’a-a. At’u osi mino ninaahenza akale sawa. ¹⁴ Ela kwakukala, mwimwi vivi muna vinji, na o ayaenu azongekwa, aavizeni kwa ta namwi muchidzazongekwa, na o akale ana vinji, amwavize, na phapho mukale mu sawa. ¹⁵ Vivyo vindagwa sawa na Maandiko ga Mulungu gaambago, "Yeungaunga chakurya chinji, k’akalire na chakurya chinji muno. Na yeungaunga chakurya chichache, k’akalire na chakurya chichache muno." ¹⁶ Hunamulavira mumvera Mulungu kwa kumuhenda Tito akale na moyo wa kuhenza kumwaviza muno mwimwi, dza vyo nihenzavyo mimi. ¹⁷ Tito niriphomuvoya adze kwenu, kudzamwaviza, wákubali. Na kugomba ujeri ni kwamba, yiye wákala una moyo wa kuhenza kumwaviza muno yenye kare, ta wákala udzidzilavira kudza kwa henzore mwenye. ¹⁸ Ndo yiye Tito hunamuhuma na mujeso muyawehu, ariye unaishimiwa muno ni makanisa gosi, kwa kaziye ya kusumurira Nguma Mbidzo. ¹⁹ Na dzulu ya kumanyikanakwe, yiye wátsagulwa ni makanisa ahuzungumuze mwehu charoni, na ahwavize kuwimirira t’ot’ot’o mutsango wa kwaaviza ajeso ayaehu. Mutsango uo undamuhenda Bwana Jeso K’irisito alikwe, na undahuhenda humanywe huna moyo wa kuhenza kwaaviza ajeso ayaehu. ²⁰ Ndo siswi hunawimirira t’ot’ot’o uu mutsango otsangwa na moyo umwenga, kwa ta mut’u ats’ipate cha kuhulaumira. ²¹ Lengo rehu siswi, ni kuhenda gamuhamyago Bwana Mulungu, na gakale ganaonewa ni at’u ni haki. ²² Ano Tito, hunaahuma na mujeso muyawehu munjine, ariye hudzimona k’ano nyinji u kwete kwaaviza. Yiye vivi unahenza aavize muno yenye kwakukala, unamwi kanuni. ²³ Tito, ni musena huhendaye kazi ya Bwana phamwenga kwa dzulu yenu. Ano ajeso ayaehu anjine adzao nao, ni adzumbe a makanisa, na anamuhenda Jeso K’irisito alikwe. ²⁴ Ndo aa aonyeseni kukala, mu at’u a kuhenza ayaenu jeri, na nguma yiyo yindafika kwao makanisani, na phapho makanisa gandamanya kukala, hwákala huna haki ya kuhenda ngulu kwa mwimwi.

¹ Enehu a chijeso, kwa kweli, mimi ts’itsakula kumwandikira manji dzulu ya o mutsango utsangirwao at’u a Mulungu ayaenu a Jerusalemu. ² Maana, ninamanya kare muna moyo wa kuhenza kulavya. Mimi ná-aambira na ngulu aa ajeso a jimbo ra Makedonia kukala, mwimwi ajeso a jimbo ra Akaya, mwákala mu kwete kulavya hangu mwaka dzana. Na vivyo vidziahenda anji phapha, akale na moyo wa kuhenza kulavya nao. ³ Ndo mimi vivi ninamuhuma Tito na o anzie airi, adze ko kwenu. Na ninahenza vivi nialikiravyo ajeso a kuku Makedonia kukala mu kwete kulavya, bee vikale vivyo jeri, ela gats’ikale maneno ga mulomoni tu. ⁴ Mimi ninahenza nichidza nao kuko, bee hudze hwone mwátsanga kare. Aa ná-aambira na kanuni kukala, mu kwete. Kwa vivyo, huchidzamona k’amudzangwe, bee mimi nindagwirwa ni haya muno, na ta mwimwi enye namwi mundagwirwa ni haya vivyo. ⁵ Ndo nidzona ni vidzo niakalate aa ajeso ayaehu, alongole kudza ko kwenu, adze atsangishe mutsango wenu oulaga ta mimi nichidza, mutsango wenu ukale u tayari. Na phapho, mundakala munalavya mutsango na moyo umwenga, ela ts’i wa kugaramishwa. ⁶ Mwimwi munamanya kukala, aphandaye chichache, uguwa chichache, na aphandaye chinji, uguwa chinji vivyo. ⁷ Ndo chila mut’u naats’ilavye na kuno unashononeka, hebu kwa kugaramishwa. Ela naalavye kutuwirizana na vyo arivyodzipangira mwakwe moyoni. Maana, mut’u alavyaye na raha ndiye ahenzwaye ni Mulungu. ⁸ Mulungu unaidima kumup’a manoso gosi kwa unji, kwa ta mukale na vya kumutosha ukati wosi. Na phapho, namwi mwidime kulavya na moyo umwenga kwa dzulu ya chila kazi mbidzo. ⁹ Ta Maandiko ga Mulungu ganaamba vivi dzulu ya alavyaye na moyo umwenga, "Yiye manosoge uhendamwaga, achiya wap’a na moyo umwenga, na mbazize k’azisira." ¹⁰ Mulungu ndiye amwidimisaye mut’u kupata mbeyu za kuphanda zilavye vyakurya. Ndo Mulungu undamwidimisa kupata mbeyu nyinji za kuphanda, muphande. Kwa vivyo, yiye ko kulavya kwenu na moyo umwenga, undakuhenda kuvyale manji. ¹¹ Ndo Mulungu undamup’a vinji kwa ta namwi mukaze kulavya na moyo umwenga ukati wosi. Na phapho at’u anji andamulavira mumvera Mulungu, kwa go manoso genu gondoaphirikira siswi. ¹² Yiyi kazi yenu ya kulavya na moyo umwenga, bee ts’i kwamba yindaahenda ajeso ayaenu apate go gao arigo ana haja nago tu bahi, ela yindaahenda at’u anji amulavire mumvera Mulungu. ¹³ Yiyi kazi yenu ya kulavya na moyo umwenga yinang’aza kukala, munamukuluphira Jeso K’irisito jeri. Na ajeso ayaenu, andamulika Mulungu kwa vyo mushuhudiyavyo munakuluphira Nguma Mbidzo dzulu ya K’irisito lwazu-lwazu, na vyo mumogophavyo. Na chisha, andamulika Mulungu kwa vyodzoap’a ao, na anjine osi, vyenu murivyo navyo na moyo umwenga. ¹⁴ Ndo ao andamuvoyera na kumuhenza kwa vyodzong’aza kukala, mwimwi munahenza ayaenu jeri. ¹⁵ Nahumulavireni mumvera Mulungu, kwa chipajiche chohup’a, chiricho ta k’akuna aidimaye kucheleza!

¹ Enehu a chijeso, at’u anaamba kukala, ni murumwengu nichikala ni phamwenga namwi, ela nichikala ts’i phamwenga namwi, ni musiru. Ndo mimi P’aulo mwenye vivi, ninamuvoya chirumwengu na mbazi dza Jeso K’irisito arivyokala. ² Voyo rangu ni kukala, ninahenza nichidza ko kwenu, muts’idzenihenda nikakala musiru! Kuko kwenu kuna at’u anambao kukala, ninasagala chidunia, na ao nichidzaaona acheri kugomba gago, bee andanihenda nikale musiru kwao. ³ Kala ni kusagala, husagala phapha duniani jeri, ela k’ahuheha chidunia. ⁴ Ndo siswi k’ahuhumira silaha za chidunia. Sino huhumira silaha zenye widimi wa Mulungu, kuurimira widimi wa Shetani. Ndo hunagarima maneno gosi ga ulongo, ⁵ na hunagarima maneno gosi ga kudziunula, gaidimago kwaaziza at’u ats’imumanye Mulungu. Sino hunahenda maazo gosi ga at’u gakale ga kumogopha Jeso K’irisito. ⁶ Na muchihwonyesa munahwogopha jeri, hundakala kwete kumutiya akili mut’u yeyosi, yendekala unaenderera kuts’ahwogopha. ⁷ Enehu a chijeso, mwimwi muhwalira maneno vyo mugaonavyo tu! Mimi ninaahenza ao at’u ario ana kanuni ni a Jeso K’irisito, bee alilikane muno yenye, na andaona mimi nami, ni wa Jeso K’irisito dza ao. ⁸ Bwana Jeso K’irisito wánip’a widimi, na widimi uo ni wa kumujengera mwimwi, ela ts’i wa kumubanangira. Ndo ta nikadziunula muno kwa o widimi wangu, chisha vivyo k’avindanigwiza haya. ⁹ Mimi ts’enzi mwimwi munone dza kwamba, ninamuuhusa-uhusa na baruwa zangu. ¹⁰ Maana, at’u anaamba, "P’aulo achandika baruwa zi chisiru, na zina maneno mafu-mafu. Ela yiye mwenye achikala hu phamwengani, k’ana rorosi, na ta achigomba, manenoge k’agana tende." ¹¹ Bee ao at’u aambao vivyo, ninaahenza amanye kukala, gaga nigaandikago baruwani kwa ni kure, bee ndigo gondokudzagahenda ukati nichidza ko kwenu. ¹² Siswi k’ahwenzi kudziika duu mwenga na at’u adzilikao enye. At’u ao anadzihwalanisha enye na enye. Ndo ao k’aamanya. ¹³ Ela siswi k’ahundadziunula na widimi urio k’ahunao. Sino lengo rehu ni kuts’avuka miphaka yophakirwa ni Mulungu, na vivyo nihuhende kazi ta kati yenu. ¹⁴ Ndo siswi k’ahuvuka miphaka huchamba mwimwi mu ts’ini zehu. Maana, ndiswi a kwanza okudzamusumurira Nguma Mbidzo dzulu ya K’irisito. ¹⁵ Na k’ahudziunula kwa kazi yohendwa ni at’u anjine kati yenu. Ela siswi hunalolera mukaze kukomala chiroho, na phapho kazi yehu yikaze kukula kati yenu. ¹⁶ Gago gachilairira, siswi hundaidima kwendasumurira Nguma Mbidzo ta mbere za ko kwenu kuriko k’akudzangwe kufikwa ni mut’u. Na phapho, hundakala k’ahudziunula na kazi yohendwa ni mut’u munjine. ¹⁷ Ela ta vivyo, Maandiko ga Mulungu ganaamba, "Ahenzaye kudziunula, naadziunule kwa gohenderwa ni Bwana." ¹⁸ Maana, mut’u achidzilika mwenye, k’avina cheo, ela mut’u achilikwa ni Bwana, vina cheo.

¹ Enehu a chijeso, ningehenza munivumirire vivyo, ta niripho ninaphenya kuphuphani vichache. Mwimwi nivumirirani tu! ² Gaga gosi ninagahenda, kwa vyo nimoneravyo wivu dza vyo Mulungu amuhenderavyo. Maana, mimi námufanyira mupango muhwalwe ni K’irisito, na ninahenza nidze nimulavye kwakwe muchikala mu azima. ³ Ela vivi mimi ni chimoyomoyo, kwakukala, garat’u gomupata Hawa, ganaidima kumupata ta mwimwi. Nyoka kwa welevuwe, wámulemba Hawa ta achiricha kumogopha Mulungu. Ndo mwimwi namwi, maazo genu ganaidima kuvurugwa ta mukaricha kukala aaminifu jeri kwa K’irisito. ⁴ Mimi ni chimoyomoyo kwa mwimwi, kwakukala, at’u anjine ákudzamusumurira manjine dzulu ya Jeso, ta ts’i higo gomusumurira siswi, mwáphokera roho munjine kurichisa yekala mudzimuphokera kare, na mwákubali udzumbe unjine ta ts’i hura okala hudzimusumurira siswi. Ela gago gosi, munagavumirira muno yenye! ⁵ Bee, o mwaonao ni ahumwa a Jeso abomu, ninaona k’anifika. ⁶ Mimi ts’isomerere ugomvi, ela ninamanya nigombaro. Na neno riri, hudzimonyesa lwazu-lwazu ukati wosi kwenye chila chit’u chomuhendera. ⁷ Mimi nádziika ts’ini, kwa mwimwi mukale dzulu, kwa kumusumurira Nguma Mbidzo ya Mulungu, phots’omuvoya chochosi. Ndo nikale vyo, náhenda vii? ⁸ Niriphokala ninamusumurira Nguma Mbidzo, gangu gokala ninago haja, gákala gamanywa ni makanisa manjine. Na ta ninaidima kwamba, phapho nákala ninariphwa ni gago kwa nimuhikirehikire mwimwi. ⁹ Na chisha, phokala ni phamwenga namwi, náphungukirwa ni p’esa. Ela muzigo uo ts’imuhwikire mwimwi, ta its’iphokala ni enehu a chijeso a jimbo ra Makedonia, ndio onirehera chila chit’u chokala ninacho haja. Ndo mimi ts’imuhwikire muzigo, na ts’indamuhwika. ¹⁰ Na nichigomba vivyo ninaamba, k’akuna mut’u ko jimbo ra Akaya kosi aidimaye kunipinga akaamba gaga nigagombago ts’i ga jeri. Jeso K’irisito wákala achigomba ujeri ukati wosi. Na haki yenye, mimi nami ninagomba ujeri dza yiye. ¹¹ Ndo mukale vino munanona ts’imwenzi kwa ts’enzi p’esa zenu? Mino bee, ninamuhenza mwimwi ta Mulungu unamanya! ¹² Na nindakwenderera na o mwimo wangu wa kuts’ahenza p’esa zenu, ta ao aambwao nao ni ahumwa a Jeso, niahende ats’iidime kudziunula kwamba hangwe Nguma Mbidzo anayisumurira dza vyo huyisumuriravyo siswi. ¹³ At’u ao anadzamba ni ahumwa, ela kazi yao ni kulemba at’u tu, kwa kudzihenda ni ahumwa a K’irisito ario na widimi. ¹⁴ Vivyo k’avihwangalaza, kwakukala, ta ye Shetani mwenye naye, unadzihenda ndiye ye arehaye mwanga. ¹⁵ Ndo o ahendikazie achidzihenda ni ahendikazi a Mulungu ahendao ga haki, k’aanza ao. Ela hunamanya kukala, ts’iku ya musindikizo wa urumwengu yichifika, andatiywa akili kutuwirizana na mahendo gao. ¹⁶ Enehu a chijeso, mimi ts’inoneni ni muzuzu kwa gondogagomba. Ela muchikala mundanona ni muzuzu vivyo, h’a bee nisirikisani na uzuzu wangu, kwa nami nidziunule vichache. ¹⁷ Gaga ga kudziunula nindagagomba vivi, ela ts’igo malagizo ga Bwana. Vivi mimi nindaphenya kuphuphani. ¹⁸ Ela, kwakukala, at’u anji anadziunula chidunia, h’a bee ta mimi nami nindadziunula. ¹⁹ Mwi namwi, munadzona mu alachu, ukale o ndio umuhendao mwavumiririre azuzu na kuno muna raha? ²⁰ H’a heka munamuvumirira ta mut’u amuhendaye dza agulwa ahumiki, mut’u amwiyiraye chimatsomatso, amoneraye, mut’u adzikut’ulaye na amwifyaye? ²¹ Hebu munahenza nami kala náhenda go maneno ga waibu? Bee, vivi nami nindakala dza muzuzu dza ao anjine, nidziunule na go adziunulirago. ²² Ao achidzamba ni Aburania, ta mimi nami ni Muburania. Achidzamba a kati ya zo mbari kumi na mbiiri za Aiziraeli, ta mimi nami ni mumo. Na achidzamba ni at’u a mudzungu wa Burahimu, ta mimi. ²³ Ao achidzamba anamuhikirahikira Jeso K’irisito, mino bee ndimi nimuhikirayehikiraye muno yenye kuchira ao. Na vivi, ninagomba dza kwamba nidziruk’wa ni akili. Mimi nidzihenda kazi na chadi muno kuchira ao, nidzifungwa k’ano nyinji kuchira ao, nidzipigwa muno kuchira ao, na nidzitsuma kuulagwa k’ano nyinji. ²⁴ Mimi nápigwa k’ano ts’ano vikoto mirongo mihahu na chenda (39) ni vilongozi a Ayahudi. ²⁵ Nápigwa vibok’o k’ano t’ahu ni vilongozi a Arumi. Na ukati umwenga, at’u ánipiga mawe ta achitsuma kuniulaga. Mimi náhoherwa ni meli zokala nichisafiriya k’ano t’ahu. Na mwengayapho kati ya zizo k’ano t’ahu, náchesa choo, na nichisinda dii baharini. ²⁶ Vyaro vyangu vinji nidzikala maengaengani, kwa myuho yikala yi tele-tele, kwa anyang’anyi, kwa Ayahudi asena, na at’u a makabila manjine. Chisha, kwa ndai zonipata midzini, nyika, na baharini, na kwa vyoshononeswa ni at’u adzambao ni ajeso, na ts’i ajeso. ²⁷ Mimi nidzidzivunza kwa kazi, nidzichesa matso k’ano nyinji, ukati unjine nidzikala na nzala na ch’iru, mimi nidzifunga ukati kwa ukati, na nidzikala p’ehoni phots’o nguwo za p’eho. ²⁸ Na mbali na gago gosi, mimi nina muzigo wa kumanya makanisa gosi chila ts’iku. ²⁹ Mujeso musena achikala chiroho ni munyonge, mimi ninabagalika kwa o unyongewe. Na mujeso musena achiudzwa nyuma, mimi nami ninashononeka. ³⁰ Ichikala bee ni nidziunule, h’a bee nindadziunula kwa go maneno gaonyesago unyonge wangu. ³¹ Mulungu, Abaye Bwana Jeso K’irisito, ariye nialikwe ta kare na kare, unamanya kukala, ts’igomba ulongo. ³² Mimi niriphokala ni mudzi wa Damasiko, gavuna yekala utsagulwa ni mufalume Areta, wáika shikari chila dziyango ra Damasiko kwa nigwirwe. ³³ Ela ajeso asena achinitiya ndani ya hundu bomu, na achinilavya na mwanyani okala u dzikuta ra o mudzi, achinitsereza ta phots’i, na phapho, nichichimbira kufungwa ni ye gavuna.

¹ Enehu a chijeso, kudziunula k’akwaviza mut’u, ela ni seti nidziunule vivyo. Na vivi nindagomba dzulu ya maono, na maneno gofunulirwa ni Bwana Jeso K’irisito. ² Mimi ninakumbikira t’ot’ot’o kukala, myaka kumi na mine (14) yodzochira, náhwalwa ni Mulungu ta ko mulunguni kwenye raha. Ela Mulungu ndiye ye amanyaye kumba náhwalwa nichenda mulunguni jeri, hebu ni nákala ninaona ono tu. ³ Mimi nidzigomba kare, na ninauyira kahiri kukala, náhwalwa ta ko mulunguni kwenye raha, ela Mulungu ndiye ye amanyaye kumba náhwalwa nichenda mulunguni jeri, hebu ni nákala ninaona ono tu. ⁴ Na kuko, násikira maneno garigo mudamu k’aidima kugasema, na k’ahenzwa agagombe. ⁵ Ndo mimi nindadziunula kwa gago maneno ga kwangalaza gogaona, ela ts’indadziunula kwa dzulu yangu mwenye, its’iphokala nindadziunula na o unyonge wangu tu. ⁶ Mimi kala ninahenza kudziunula, ningari ninadziunula, na phapho ts’ingakalire ninahenda neno ra uzuzu kwakukala, ningari kukala ninagomba ujeri. Ela mino ts’indadziunula kwakukala, ninahenza at’u anilamule kwa go aonago ninagahenda na asikirago ninagagomba, ela ts’i kwa vyo nigombavyo dzulu yangu. ⁷ Gago maneno mabomu nirigofunulirwa ni Mulungu, bee gangari gánihenda nidziunule, ela Mulungu achinip’a mwiri kudungwa ni mwiya, kwa ta nits’idze nikadziunula. Na mwiya uo unga dza mudzumbe wa Shetani, na unanidunga-dunga kwa nits’idziunule. ⁸ Mimi námuvoya Bwana k’ano t’ahu kukala, aniusire mwiya uo. ⁹ Ela Bwana achiniudzidza achinamba, "Widimi nikup’ao uwe phots’otara makosago bee unatosha, maana, widimi wangu uhenda kazi muno phenye unyonge." Ndo mimi ninadziunula na raha kwa o unyonge wangu, kwa ta widimi wa K’irisito ukale nami. ¹⁰ Ndo mimi ninahamirwa ni unyonge, waibu, ndai, kuhenderwa mauku, na riki kwa dzulu ya K’irisito, maana, nichikala munyonge, ndipho nikalapho na mukotse. ¹¹ Ajeso asena, mimi nidzihenda uzuzu ko kudziunula, ela mwimwi ndimwi odzonihenda nikuhende. Mwimwi ndimwi okala munawirya munilike kwakukala, ta niripho ts’i chit’u, ela ao ahumwa mwaonao ana tende, k’aanichirire vyenye! ¹² Mulungu wáhenda dalili nyinji, na maut’u-maut’u ga kwangalaza niriphokala ninahenda kazi na uvumiriri kati yenu, na zizo ni dalili za muhumwa wa Jeso K’irisito. ¹³ Mimi ts’ina ut’u urio náuhendera ajeso anjine, ela mwi ts’imuhenderere, ta its’iphokala ts’imwambire munaavize na p’esa tu. Ndo ichikala kuko bee ndiko kumukosa, ninamuvoya munisamehe. ¹⁴ Vivi ni kwete kamare nimutsemberere k’ano ya hahu, na ts’indakudzamwamba munaavize na p’esa vivyo. Mino nimuhenzao ni mwimwi enye, ela ts’i miyo yenu. Dzulu ya vivyo, mimi dza abayenu ndimi niwiryaye nimwikire mbeko mwimwi, ela ts’i mwimwi ana muniikire mbeko mimi mutumia. ¹⁵ Mimi ni razi nihumire vyangu vyosi na mimi mwenye kamare kwa faida yenu. Ndo mukale mwi munanihenza vichache kwa mino ninamuhenza muno? ¹⁶ Mwimwi enye munamanya kukala, mimi ts’imuvoyere wavizi wa p’esa. Ela anjine anaamba náhumira ukora ta nichimwiyira. ¹⁷ Ndo akale bee vino ano at’u a kwahuma kwenu, yákala ni njira ya kumwiyira? ¹⁸ Mimi námuhuma Tito na ye mukuluphiri muyawehu munjine adze ko kwenu, na nina kanuni kamare kukala, Tito k’amwiyirire. Maana, mimi na yiye lengo rehu ni mwenga, na hulongozwa ni Roho mumwenga. ¹⁹ Mwimwi ts’oneni dza kwamba nidzimwandikira gaga gosi kwa kudzihehera. Mino ni muhumwa wa Jeso K’irisito niriye na widimi, na ninagomba ujeri ta Mulungu unamanya. Na maneno gosi nigahendago asena, bee ni ga kumujenga mwimwi. ²⁰ Mimi ninahenda vivyo kwakukala, ts’enzi kudzamona mucheri kuhenda gots’ogahenza, maana, phapho mwimwi namwi k’amundavihenza vyangu vyondomwamba. Mino ts’enzi kudzamona mucheri kuheha, konerana chidzitso, kutsukirirwana, kulafyana vit’u, kupigirana nzili, kutsunana, mu chiguvuguvu na kuts’asikizana. ²¹ Mimi nindakudza kahiri ko kwenu, ela ts’enzi Mulungu adze anigwize haya kwa mwimwi, na phapho nishononeke muno kwa ao ario ahenda dambi p’indi, na k’aadzangwe kutya ta o anaenderera na udiya, uzembe na maneno manjine ga waibu.

¹ Enehu a chijeso, mimi vivi ni kwete kudza ko kwenu, na chichi chindakala ni charo cha hahu. Na dza mumanyavyo kukala, Maandiko ga Mulungu ganaamba, "Chila neno nirihakikishwe ni ushaidi wa at’u airi, hebu kwenderera." ² Mimi niriphomutsemberera lwa phiri, náakanya ao at’u okala áhenda dambi, na mwanzo ta ni námukanya mosini. Na vivi ta niripho ni kure, ela ninamukanya kahiri. Ndo charo chichi cha hahu at’u ao nichidzaaona k’aadzangwe kutya, andakudzanimanya. ³ Mimi nindahenda vivyo kwakukala, mwimwi munahenza ut’u wa kumonyesa kukala, K’irisito unagomba kuchirira mimi. Mwimwi nimumanye kukala, K’irisito k’andakala chinyonge achipambana namwi, ta ye undahumira widimiwe. ⁴ K’irisito wáoneka dza kwamba ni munyonge phokot’wa misumari musalabani, ela vivi u moyo kwa widimi wa Mulungu. Ndo siswi ahumwae naswi hunaoneka hu anyonge dza yiye vyoonewa. Ela huchidza ko kwenu, K’irisito ariye u moyo, undakala phamwenga naswi, na phapho hundakala na widimi wa Mulungu ta hupambane nao ao adambi. ⁵ Mwimwi uzani myoyo yenu tsetsetse kwa ta mudzimanye kumba munamukuluphira Jeso K’irisito jeri. Mwimwi uzani myoyo yenu tsetsetse, jeri, na mundamona u mwenu ndani, ta ts’imanya mukale mundaugwa o mutihani. ⁶ Mimi ninakuluphira mundamanya kukala, k’ahuugwire o mutihani. ⁷ Ela ta vivyo, hunamuvoya Mulungu muts’ihende ui wowosi. Ra halahala ts’i kumonyesa widimi wehu, ela hunamuhenza muhende ga haki, ta siswi hukaoneka hwáshindwa. ⁸ Gehu huhendago ni ga kwendereza ujeri, ela k’ahwidima kuupinga na njira yoyosi. ⁹ Mwimwi muchikala mwimire kudina, at’u ta akahwona hu anyonge, chisha sino hunahamirwa vivyo. Ndo hunamuvoyera mukomale chiroho. ¹⁰ Mimi ninamwandikira baruwa yiyi chimbere nichikuluphira kukala, nichidza ko kwenu, ts’indapambana namwi chisiru. Widimi wangu ohewa ni wa kumujenga, ela ts’i wa kumubit’a. ¹¹ Enehu a chijeso, kumarigiza ni kwamba, Mulungu naakale phamwenga namwi. Na hendani vyenu vyosi mwidimavyo mukale at’u ots’o ila yoyosi, mutuwe malagizo gangu, mwerekezane, musagale na reri, na Mulungu ahuhenzaye na ahuhendaye husagale na reri, undakala phamwenga namwi. ¹² Lamusanani kwa kupigana busu takatifu. At’u a Mulungu osi ario phapha, anamulamusa. ¹³ Mwimwi manyani mbazi za Bwana Jeso, menzwa ya Mulungu, na ushirika wa Roho wa Mulungu.