1 ATESALONIKE

¹ Ni mimi P’aulo, Silwano na T’imoti, hunamwandikira mwimwi ajeso a Tesalonike, murio mu at’ungwa a Baba Mulungu, na a Bwana Jeso K’irisito. Baba Mulungu naamuhats’e, na amuhende musagale na reriye. ² Siswi hunamulavira mumvera Mulungu ts’iku zosi kwa mwimwi mosi, na hunamukumbikira ukati wosi mwehu mavoyoni. ³ Siswi hunaenderera kukumbikira mbere za Mulungu wehu na ariye ni Abayehu, vyo murivyo munarihendera kazi kuluphiro renu, vyo yirivyo menzwa yenu yinamuhenda muhende kazi na chadi, na vyo murivyo mudzidina kumulolera Bwana wehu Jeso K’irisito adze. ⁴ Enehu a chijeso muhenzwao ni Mulungu, siswi hunamanya kukala, yiye wámutsagula mukale at’ue, ⁵ maana, ukati huriphomusumurira Nguma Mbidzo, k’ayikalire ya maneno tu, ela yákala yina widimi, hwákala hunalongozwa ni Roho wa Mulungu, na hwákala huna kanuni kamare kukala, udzumbe uo wákala ni wa jeri. Na mwimwi namwi, munamanya jisi hurivyosagala kati yenu, na hwásagala vivyo kwa ta hukale chelelezo kwenu muhwige. ⁶ Ts’iku zizo, at’u ámuhendera mauku muno kwa mwámukuluphira Jeso. Ela mwi muchituwa mufano wehu na wa Bwana Jeso, na udzumbe uo muchiuphokera vivyo na raha yirehewayo ni Roho wa Mulungu. ⁷ Gago ndigo gotuma ta mwimwi namwi mudzikala chelelezo chidzo kwa ajeso osi a jimbo ra Makedonia, na jimbo ra Akaya. ⁸ Maana, kulairirana na chadi chenu, ts’i neno ra Bwana hicheye tu rosikirika ko Makedonia na Akaya, ela ta nguma ya kuluphiro renu kwa Mulungu yigot’a chila phat’u ta vivi k’ahutakiya kusema ut’u kahiri. ⁹ At’u chila phat’u anagomba dzulu ya jisi murivyohuphokerat’o ukati huriphokudza kwenu. Chisha, anagomba dzulu ya vyo murivyoricha kuvoya milungu ya vinyago, na kumugalukira Mulungu kwa mumuhikirehikire yiye Mulungu ariye moyo na wa jeri, ¹⁰ na mumutarize Mwanawe Jeso auye kulaa mulunguni. Mulungu wámufufula kulaa kuzimu yiye Jeso, na unahutivya na chitai cha Mulungu chidzacho.

¹ Enehu a chijeso, mwimwi enye munamanya kukala, huriphokudza kwenu, bee charo chehu k’achikalire cha bule. ² Mwimwi munamanya kukala, hwáhenderwa vii na mauku ko mudzi wa Filipi phokala k’ahudzangwe kufika kwenu, na ta huriphofika kwenu nako, at’u anji áhupinga. Ela Mulungu wehu wáhutiya moyo vivyo, na huchimusumurira Ngumaye Mbidzo phots’o woga. ³ Na gaga humukalatago mugakuluphire, bee ni ga jeri, ela ts’i kwamba hwálembwa ni mut’u, hebu kukala huna maazo mai, na hebu ts’i kwamba hunahenza humulembe mut’u yeyosi. ⁴ Its’iphokala, sino ts’iku zosi hugomba dza ahuhenzavyo Mulungu hugombe, kwakukala, yiye wáhulola myoyo yehu na achihwona hunakuluphirika, na ndipho achihuchiza husumurire yiyi Nguma Mbidzo. Ndo sino husumurirapho Nguma Mbidzo, hukala hunahenza humuhamye Mulungu, ariye unamanya myoyo yehu ta ndani, ela ts’i kwamba hunahenza hwahamye at’u. ⁵ Mwimwi munamanya lwazu-lwazu kukala, siswi k’ahudzire kwenu na maneno madzo ga kumulembalemba, na ta Mulungu ni shaidi wehu kukala, k’ahuhumirire maneno ga chilachu kwa humwiyire. ⁶ Siswi k’ahuhenzere kulikwa ni at’u, kala mwimwi, hebu at’u anjine. ⁷ Siswi dza ahumwa a K’irisito a widimi, hwákala huna haki ya kumuvoya chit’u chochosi. Ela sino hwákala ap’ore kwenu dza muchet’u aroromavyo anae atsanga. ⁸ Siswi hwámuhenza muno vivyo mwimwi, na gago ndigotuma ta huchikala kwete kumusumurira Nguma Mbidzo ya Mulungu na kudzilavya kwenu tsetsetse. ⁹ Maana, mwimwi enehu a chijeso munamanya vyo hurivyohenda kazi na riki. Siswi hwáhenda kazi usiku na mutsana, kwa ta huts’ikale muzigo kwa mut’u yeyosi kati yenu, vyokala hunamusumurira Nguma Mbidzo ya Mulungu. ¹⁰ Mwimwi mukuluphirao, na ta Mulungu naye, mu mashaidi gehu ga kukala, huriphosagala kwenu, hwákala hu atakatifu, hunahenda ga haki, na hwákala k’ahuna ila yoyosi kwenu. ¹¹ Mwimwi munamanya kukala, siswi hwámuhenderat’o chila mumwenga wenu, dza virat’u mutumia aahenderavyot’o anae. ¹² Sino hwámutiya moyo, huchimukalata, na huchimwambira musagale mazagazi gawiryago mwiho wa Mulungu yemwiha muphenye kwakwe Ufalumeni, kwa muphokere ubomu kulaa kwakwe. ¹³ Chisha, hunaenderera kumulavira mumvera Mulungu ts’iku zosi kwakukala, muriphoriphokera ro neno ra Mulungu rorisikira kulaa kwehu siswi, k’amurihwalirire dza maneno gotilwa ni at’u tu, ela mwárimanya ni neno ra Mulungu, naro ni ro neno ra Mulungu jeri rihendaro kazi mwenu ndani mwimwi mukuluphirao. ¹⁴ Mwimwi enehu a chijeso, mwávumirira shenene yohenderwa ni achina kwenu enye, na vivyo muchikala munaaiga ajeso a makanisa ga Mulungu garigo Judea, ovumirira kushononeswa ni Ayahudi anziao, kwa ákala adzimukuluphira K’irisito Jeso. ¹⁵ Anjine a Ayahudi ao, ndio oulaga agomvi a Mulungu, na anjine ao, ndio okudzamuhenda aulagwe Bwana wehu Jeso, na vino anjine áhuhendera mauku achihuvuguza kwenu. Ao anamutsukiza Mulungu, na anapinga chila mut’u ¹⁶ kwa kuheza kuhukahaza huts’iasumurire at’u a makabila manjine Nguma Mbidzo ya kwativya. Bee, vivyo ndivyo akazavyo kudzonjezera madambi chila ts’iku dzulu ya go arigo nago kare. Ndo vivi chitai cha Mulungu, chidziagwerera. ¹⁷ Enehu a chijeso, siswi huriphohendwa hurichane chimwiri tu, ela ts’i chiroho kwa chiwango, hwámutamani muno ta huchaza muno humone kahiri! ¹⁸ Ndo siswi hwákala hunahenza muno hudze kwenu, na mimi P’aulo mwenye, náheza kudza kuko k’ano nyinji, ela Shetani wániziza. ¹⁹ Maana, mwimwi ndimwi o humulolerao mupate madzo, ndimwi o muhuhendao huhamirwe, na ndimwi ondohuhenda huvikwe chiremba cha ushindi, na huhende ngulu kwa dzulu yenu mbere za Bwana wehu Jeso K’irisito ukati achiuya. ²⁰ Hakika siswi hundahenda ngulu, na huhamirwe kwa mwimwi.

¹ Ndo huriphoona k’ahwidima kwenderera kuvumirira kuts’amona, hwákala razi kusala hichiyehu ko Atene, ² na huchimuhuma kwenu ndugu yehu wa chijeso T’imoti, ariye ni muhendikazi muyawehu wa Mulungu kwa dzulu ya Nguma Mbidzo ya K’irisito. Yiye T’imoti siswi hwámuhuma kwa adze amujenge chiroho, na amutiye moyo, kwa ta mukaze kugwiririra kinyi kuluphiro renu, ³ kwa ats’idze ta mumwenga wenu akauya nyuma kwa mauku mugapatago. Maana, mwimwi enye munamanya ni mupango wa Mulungu kukala, hosini hupatweni ni mauku kwa dzuluye. ⁴ Na ta huriphokala hu phamwengani, hwákala huchimwambira chimbere kukala, hundahenderwani mauku, na dza mumanyavyo, gago ndigo golairira jeri. ⁵ Ndo gago gánihenda nishindwe ni kuvumirira kuts’amona, na ndipho nichimuhuma T’imoti, kwa ta nimanye dzulu ya kuluphiro renu. Mimi nákala ni chimoyomoyo ninaona dza kwamba, Shetani ajezaye at’u wámujeza ta achimubit’a, na phapho kazi yehu yikale yákala ya bule. ⁶ Ela vivi T’imoti udziuya kuku kulaa ko kwenu, naye udzihwambira nguma za kuhamya dzulu ya kuluphiro renu, na jisi muhenzanavyo. Na chisha, udzihwambira kukala, munahukumbikira kwa madzo ts’iku zosi, na munatamani muhwone dza siswi humutamanivyo humone. ⁷ Ndo ta huripho hunahenderwa mauku na kushononeka enehu a chijeso, ela vivi zo nguma dzulu ya kuluphiro renu, zidzihungolangola. ⁸ Vivi hu azima kamare kwa vyodzomanya kukala, mwimire kudina kwa Bwana. ⁹ Siswi hunamulavira mumvera Mulungu muno kwa mwimwi, maana, hunahamirwa muno yenye kwa dzulu yenu huchikala hu mbereze. ¹⁰ Ndo siswi hudzidina kumuvoya Mulungu usiku na mutsana na moyo wehu wosi, kwa ta ahup’e ukati wa kuuya kwenu, na hudze humudzarigizire cho chiricho k’achimo mwenu kuluphironi. ¹¹ Ndo vivi hunamuvoya Mulungu wehu, ariye ni Abayehu, na Bwana wehu Jeso kukala, ahuvugulire njira hudze kwenu. ¹² Na Bwana namonjezere menzwa muriyo nayo kwa mukaze kuhenzana, na mwenderere kwahenza at’u osini dza vyo humuhenzavyo mwimwi, ¹³ kwa ta amuhende mukale na myoyo ya kudina, mukale phots’o ila, na mukale atakatifu mbere za Mulungu wehu, ariye ni Abayehu, ukati wa kuuya Bwana wehu Jeso phamwenga na atakatifue osi.

¹ Ajeso asena, manjine ni kwamba, siswi hwámufunza jisi muhenzwavyo musagale kwa ta mumuhamye Mulungu, na vivyo ndivyo musagalavyo jeri. Ndo vivi hunamuvoya na kumukalata kwa dzina ra Bwana Jeso kukala, mukaze kwenderera kuhenda vivyo. ² Mwimwi munagamanya garat’u malagizo hurigomup’a kwa widimi wa Bwana Jeso. ³ Na Mulungu unamuhenza mwimwi mukale atakatifu, na mugariche kamare mazagazi ga uzinzi. ⁴ Ndo chila mumwenga unahenzwa adinise mwiriwe, na asagale chitakatifu na ishima, ⁵ ela ts’i kutuwa t’amaa mbii dza mataifa ots’omumanya Mulungu. ⁶ Ndo kuko nakuts’ilairire mut’u akamukosa nduguye wa chijeso kwa kutamani ta kuzinga na muchewe. Maana, Bwana undaariphiza o ahendao dambi zizo, na gago bee hwámukanya chimbere mwimwi. ⁷ Maana, Mulungu k’ahwihire husagale mazagazi ga uzinzi, ela wáhwiha husagale mazagazi ga chitakatifu. ⁸ Ndo aremaye kutuwa mafunzo gago, ts’i kwamba unarema ga mut’u, ela ukala unarema ga Mulungu amup’aye Rohowe. ⁹ Dzulu ya kwahenza ajeso anzienu, k’ahutakiya kumwandikira kahiri. Maana, mwimwi mwáfunzwa ni Mulungu kare kukala muhenzane, ¹⁰ na vivyo ndivyo muhenderavyo ajeso ayaenu osi chila phat’u ko jimbo ra Makedonia. Ndo hunamukalata mwimwi enehu a chijeso kukala, mukaze kwenderera kuhenzana. ¹¹ Chila mut’u naakale na lengo ra kusagala phots’o h’uh’u, atuwe gakwe, na ahende kazi na mikonoye mwenye dza vyo hurivyomulagiza phokala hu kuko kwenu, ¹² kwa ta mataifa amwishime, na mukale k’amulolera at’u anjine kwa genu murigo nago haja. ¹³ Enehu a chijeso, hunahenza mumanye ujeri dzulu ya arat’u afadzi, kwa ta muts’ikale na shenene dza mataifa ots’ololera chochosi mut’u achifa. ¹⁴ Siswi hunakuluphira kukala, Jeso wáfa na achifufuka. Kwa vivyo, nihukuluphireni vivyo kukala, Mulungu undaafufula, na aahende akale phamwenga na Jeso arat’u afadzi osi ofa na kuno anamukuluphira Jeso. ¹⁵ Gaga mafunzo gatuwirizago, bee ni mafunzo ga Bwana, na go ni kukala, siswi hurio hu moyo na ondokala acheri moyo ukati wa kuuya Bwana, hakika k’ahundaalongolera o afadzi kwendamutsangira Bwana. ¹⁶ Maana, Bwana mwenye achikala unatserera kulaa mulunguni, undalavya lagizo kwa laka ra dzulu, kundakala na laka ra malaika mubomu, na gunda ra Mulungu rindapigwa. Na phapho ndipho arat’u ofa na kuno achikala anamukuluphira K’irisito, andafufulwa mwanzo. ¹⁷ Chidzako, siswi ondokala hu moyo na hucheri phapha duniani, hundahwalwa phamwenga na ao hwende mainguni hukamutsangire Bwana, na hundakala phamwenga naye ta kare na kare. ¹⁸ Ndo ngolananingolanani, na mutiyane moyo na maneno gaga.

¹ Ela ta vivyo, siswi k’ahutakiya kumwandikira dzulu ya kukala, maneno gago gandalairira rini, na ukati wani. ² Maana, mwimwi enye munamanya kare kukala, Bwana undauya ts’iku yiriyo mundakala k’amumulolera dza virat’u mwivi adzavyo na usiku. ³ Ukati phondokala at’u anaamba, "Kuna reri na hunaroromwat’o," phapho bee ndipho andagwererwa ni kuhangamizwa maruru, na at’u k’aandaidima kukuchimbira kamare. Maana, kuko kundakala dza utsungu wa uvyazi umudziriravyo muchet’u wa t’umbo. ⁴ Ela mwimwi ajeso asena, k’amu dzizani kahiri. Kwa vivyo, ts’iku yiyo k’ayindamukudzirira dulukiza dza mwivi. ⁵ Mwimwi mosi mu at’u a mwanga, na at’u a mutsana. Siswi k’ahu at’u a usiku, hebu a dziza. ⁶ Ndo siswi nahuts’ikaleni dza o ataifa acherio kulala, ela nahukaleni matso, na hukaleni na chihezo. ⁷ At’u ario usikuni ndio alalao, na ndio anwao. ⁸ Ela kwahivira sino hu at’u a mutsana, nahukaleni na chihezo, na nahuvaleni ch’inga ya chilagani, yiriyo ni kuluphiro na menzwa, na hulolereni kutivywa, kuriko ndiko k’ofiya yehu ya chuma ya kuchinga chitswa. ⁹ Maana, Mulungu k’ahupangirire hugwererwe ni chitaiche, ela wáhupangira hupate wokofu kuchirira Bwana wehu Jeso K’irisito. ¹⁰ Yiye wáfa kwa dzulu yehu, kwa ta phondouya, hukale hu moyo hebu hudzefa, chisha hukasagale naye ta kare na kare. ¹¹ Ndo mwimwi endererani kutiyana moyo, na mujengane dza vyo muhendavyo kare. ¹² Enehu a chijeso, gehu ga musindikizo ni kwamba, hunamuvoya mwaone ana tende arat’u ahendao kazi na chadi kati yenu, ya kumulongoza kwa dzulu ya Bwana, na kumukanya. ¹³ Ap’eni ishima bomu, na mwahenze muno kwa kazi ayihendayo. Na mwimwi enye, sagalani na reri kati yenu. ¹⁴ Na hunamukalata mwimwi ajeso asena kukala, akanyeni ajeso ario ni akaha, atiyeni moyo ajeso ario a chiwogawoga, aavizeni ajeso ario ni anyonge, na kalani avumiriri kwa at’u osi. ¹⁵ Mwimwi hakikishani k’aphana mut’u ariphizaye chisasi, ela maazo genu nagakale ga kuhenderana madzo ts’iku zosi, na kwahendera madzo at’u osi. ¹⁶ Mwimwi hamirwani ukati wosi, ¹⁷ endererani kumuvoya Mulungu, ¹⁸ na muhewaro ni Mulungu, bee riphokereni na mumvera ukati wosi, maana, gago ndigo Mulungu agahenzago kwenu ujesoni. ¹⁹ Mwimwi muts’ifise moho wa Roho wa Mulungu. ²⁰ Ndo muts’iphurye udzumbe wa Mulungu ugombwao ni at’ue, ²¹ ela go maneno gao anzani kugalola t’ot’ot’o. Tuwani go maneno gao madzo, ²² ela rondorona ni ii, riricheni kare. ²³ Hunamuvoya Mulungu ahuhendaye husagale na reriye, amutakase tsetsetse mwimwi, na arinde maroho genu, myoyo yenu, na miiri yenu, kwa ta muts’ikale na ila yoyosi ukati Bwana wehu Jeso K’irisito achikala unauya. ²⁴ Mulungu amwihaye mwimwi unakuluphirika, na undamuhendera gago gosi. ²⁵ Huvoyereni siswi mwimwi enehu a chijeso. ²⁶ Chisha, hulamusireni muno ajeso ayaehu osi kuko, kwa kupigana busu takatifu. ²⁷ Ninamulagiza kwa dzina ra Bwana kukala, mwasomere ajeso asena osi baruwa yiyi. ²⁸ Bwana wehu Jeso K’irisito naamuhats’e.