1 P’ETERO

¹ Ni mimi P’etero muhumwa wa Jeso K’irisito niriye na widimi. Ninamwandikira mwimwi at’u otsagulwa ni Mulungu, murio mu ajeni phapha duniani, na mwátsamukana ta anjine asagala jimbo ra P’onito, anjine ra Galatiya, anjine ra Kapadokiya, anjine ra Asiya, na anjine ra Bitunia. ² Abayehu Mulungu wálamula mwenye kumutsagula mwimwi, na Rohowe achimutakasa kwa mumogophe Jeso K’irisito, na musamehewe kuchirira milatsoye. Mulungu naakaze kumuhats’a, na amuhende musagale na reriye. ³ Ajeso asena, nahumulikeni Mulungu Abaye Bwana wehu Jeso K’irisito! Yiye nahumulikeni kwakukala, wáhuhenda huvyalwe luphya kwa mbazize nyinji. Ndo vivi husegere na kuno hunalolera kwendapata uzima uphya ko mulunguni, kwakukala, Jeso K’irisito wáfufuka kulaa kuzimu. ⁴ Maana, Mulungu undaap’a manoso anae, na gago unamwikira t’ot’ot’o ko mulunguni kuriko k’agabanangika, k’agaola na k’agatsakala. ⁵ Ndo gago ni genu mwimwi murio munamanyirirwa ni widimi wa Mulungu kwa munamukuluphira, na Mulungu undaenderera kumumanyirira vivyo ta adze amutivye kamare yo ts’iku ya musindikizo wa urumwengu. ⁶ Ndo mwimwi hamirwani muno kwa gago, ta muripho vivi ni seti mushononeke kwa chiwango, kwa munapata mahezo ga aina-aina. ⁷ Lengo ra mahezo mupatago, ni kuhakikisha kumba munamukuluphira Mulungu jeri. Maana, ta dahabu yiriyo k’ayindakalako ta kare na kare, ni seti yitiywe mohoni kwa ta yisale yo dahabu yenye tu. Ndo ro kuluphiro renu naro, ririro rindaenderera ta kare na kare, rinahezwa vivyo, na muchivumirira, Mulungu undakudzamuhenda mulikwe, mwishimiwe na mukwezwe cheo yo ts’iku yiriyo Jeso K’irisito undauya. ⁸ Mwimwi k’amudzangwe kumona Jeso, ela munamuhenza. Na chisha, vivi ta k’amumona, ela munamukuluphira na munahamirwa muno ta k’avigombeka, ⁹ kwakukala, manoso genu gondogapata kwa mwámukuluphira Jeso K’irisito, ni ko kutivywa kwa kamare. ¹⁰ Agomvi a Mulungu ásema chimbere dzulu ya vyokala Mulungu undahutivya kwa mbazize, na ao álilikana na achidziuza muno dzulu ya uo wokofu. ¹¹ Ao agomvi a Mulungu ákala afunulirwa chimbere ni Roho wa K’irisito yekala u mwao ndani kukala, K’irisito wákala undashononeswa, ela yiyo shenene yichidzasira, ahewe ubomu. Ndo o agomvi a Mulungu álilikana, na achidziuza muno ni rini phokala gandalairira, na ni chidzedze. ¹² Ndo Mulungu wáafunulira ao agomvie kukala, gago maneno gokala anagasema, bee gákala k’agandalairira uo ukati wao, ela myaka minji yichikala yichira, yaani ukati wenu mwimwi. Gago gosemwa ni ao agomvi a Mulungu, vivi mwimwi mwágaambirwa ni o at’u omusumurira Nguma Mbidzo kwa kulongozwa ni Roho wa Mulungu yekala uhumwa kulaa mulunguni, na maneno gago ndigo garigo ta malaika enye nao anahenza muno agamanye. ¹³ Ndo mwimwi lilikanani t’ot’ot’o, na mudzidinise kwa ta muts’ihende dambi vivi muloleravyo garat’u manoso garigo mundagapata yo ts’iku yiriyo Jeso K’irisito undauya. ¹⁴ Vivi kwahivira munahenza mumogophe Mulungu, muts’ikubali kutawalwa kahiri ni t’amaa mbii zokala nazo phokala k’amudzangwe kumukuluphira Jeso K’irisito. ¹⁵ Its’iphokala, kalani atakatifu kwenye genu gosi muhendago, dza virat’u arivyo ni mutakatifu ye Mulungu yemwiha mukale anae. ¹⁶ Maana, Mulungu mo mwakwe Maandikoni wá-aamba at’ue vivi, "Mwimwi nimukale atakatifu, maana, mimi mwenye ni mutakatifu." ¹⁷ Mwimwi nimumanye kukala, yiye Abayenu ariye dzulu muriye munamuvoya, k’alola cheo cha mut’u achikala unalamula, ta ye ulamula chila mut’u kutuwirizana na gakwe gohenda. Ndo mogopheni yiye vivi mucherivyo kusagala phapha duniani kwa chiwango tu, na chidzako mwende kwenu kwenye ko mulunguni. ¹⁸ Mwimwi munamanya kukala, Mulungu wálavya ut’u ubomu ndo achimutivya muchiricha kusagala dza vyokala achisagala akare enu, garigo gákala ni mazagazi gots’o tende. Na yiye k’ahumirire ut’u ubanangikao dza p’esa, hebu dahabu. ¹⁹ Ela ye wámukombola kuchirira milatso ya samani ya Jeso K’irisito, yomwagika ukati phokala unaulagwa kwa kukot’wa misumari musalabani, na ta yiye wákala unga dza mwanagonzi ariye k’amvanirwe, na k’ana bakwa rorosi. ²⁰ Yiye Jeso K’irisito wátsagulwa ni Mulungu hangu phokala ta o urumwengu k’audzangwe kuumbwa, na Jeso achidzamutivya zizi ts’iku za phephi na musindikizo wa urumwengu. ²¹ Ndo mwimwi mwámukuluphira Mulungu kuchirira ye K’irisito. Na kwahivira Mulungu wámufufula ye K’irisito kulaa kuzimu na achimup’a ubomu, vivi munamukuluphira, na munamulola ye Mulungu. ²² Mwimwi kwahivira mwáogopha ujeri, na phapho muchitakaswa kwa ta mwahenze ajeso anzienu jeri, munahenzwa mwenderere kuhenzana na myoyo yenu yosi. ²³ Mwimwi mwávyalwa luphya, na o uzima wenu uphya, k’aulairiranire na avyazi enu a phapha duniani, ario uzima wao musindikizowe ni chifo. Ela o uzima wenu uphya undaenderera ta kare na kare, kwakukala, wálairirana na neno ra Mulungu ra uzima, ririro rindaenderera ta kare na kare. ²⁴ Gago ganagwa sawa na Maandiko ga Mulungu gaambago, "At’u osi anga dza mihi, na nguma yosi ya o at’u, yinga dza maruwa ga yo mihi. Mihi yinafinyalala, na maruwa ganakut’ika. Ndo o at’u nao nikufa, na udzo wao ukayaya, ²⁵ ela neno ra Bwana rinaenderera ta kare na kare." Na neno ra Bwana ni Nguma Mbidzo yosumurirwa mwimwi.

¹ Ndo mwimwi vivi ts’ihendeni ii rorosi, ts’ialembeni at’u, ts’ihendeni ulumakwiri, ts’ihendeni chidzitso na muts’itsune at’u, maana, mwáhewa uzima uphya. ² Mwimwi vivi tamanini chakurya cha chiroho cha jeri ukati wosi, dza virat’u ana atsanga arivyo na ch’ere ya maziya ga amezao. Mwimwi muchirya chicho chakurya cha chiroho, mundakomala chiroho, ³ maana, mwáutata kare udzo wa Bwana. ⁴ Jeso unga dza dziwe roremwa ni ajengi, ela Mulungu ariye ndiye mujengi wa hekalu ra chiroho, wámutsagula yiye, kwakukala, unamanya kukala, una tende muno. Ndo mwimwi endani kwakwe, ⁵ na mumuhenzeze Mulungu amuhumire dza mawe kujengera ro hekalu ra chiroho. Na dzulu ya gago, mwimwi mu makuhani atakatifu a Mulungu mulavyao sadaka za chiroho, zirizo zinamuhamira Mulungu kuchirira Jeso K’irisito. ⁶ Gago ganagwa sawa na Maandiko ga Mulungu gaambago, "Sirikisani t’ot’ot’o, mimi kuko Sayuni ninaika dziwe ra musinzi, riro náritsagula, na rina tende muno, na yeyosi yendemukuluphira mut’u yiye, k’andaaibishwa." ⁷ Ndo yiye yetsagulwa ni Mulungu una tende muno kwenu mwimwi mumukuluphirao. Ela kwa at’u ots’omukuluphira, ni dza Maandiko ga Mulungu gaambavyo kukala, "Dziwe riro roremwa ni ajengi, vivi ndiro rodzokala dziwe ra tende muno." ⁸ Na Maandiko ga Mulungu manjine ganaamba, "Dziwe riro ndiro rondoakwaza at’u, na ndio mwamba ondoabit’a." At’u anakwala kwakukala, k’aakuluphira neno ra Mulungu, na vivyo ndivyo arivyopangirwa. ⁹ Ela mwimwi ajeso mu at’u otsagulwa ni Mulungu, mu makuhani atawalao, na mu at’u atakatifu a Mulungu. Yiye ndiye yemwiha muchilaa dzizani muchidza kwakwe mwangani ung’alao muno, na ndiye yemutsagula mwaambire at’u dzulu ya ubomuwe. ¹⁰ P’indi mwimwi mwákala k’amu at’u a Mulungu, ela vivi mu akwe. Na p’indi mwákala k’amonerwa mbazi, ela vivi munaonerwa mbazi. ¹¹ Enehu a chijeso nimuhenzao, mwimwi phapha duniani musagala kwa chiwango tu, na chidzako mwende kwenu kwenye ko mulunguni. Ndo ninamuvoya muriche t’amaa zenu mbii, zirizo ndizo zipinganazo na roho zenu. ¹² Mwimwi menenzi genu nagakale madzo ukati wosi ta mukalapho mu kati ya mataifa. Mataifa anaidima kumutsinzira kumwamba mu akosa, ela achona menenzi genu ni madzo, andakubali kukala k’amu akosa, na vivyo vindaahenda adze amulike Mulungu yo ts’iku ya ulamuli. ¹³ Mwimwi dziikeni ts’ini za ulongozi wowosi, maana, vivyo ndivyo Bwana amuhenzavyo muhende. Mogopheni mufalume na magavunae ¹⁴ oaika yiye kwa aalamule kutiywa akili at’u ahendao mai, na aalike at’u ahendao madzo. ¹⁵ Mulungu unahenza mwimwi muhende madzo, kwa ta o at’u ots’omanya njiraze akose cha kumutsinzirira. ¹⁶ Mwimwi sagalani chikonyesa mu at’u oikwa tsare. Elako, ts’oneni munaidima kuhenda mai kwa mu tsare. Mwimwi nimusagale chikonyesa mu at’u mumuhikiraohikirao Mulungu. ¹⁷ Ndo aishimeni at’u osi, ahenzeni ajeso anzienu. Mogopheni Mulungu, na mwishimeni mufalume. ¹⁸ Mwi agulwa ahumiki, dziikeni ts’ini za aguli enu, na mwaishime ukati wosi. Mwimwi hendani vivyo kwa aguli a chivyovyosi, ario ni adzo na ana mbazi, na ta kwa asiru nao. ¹⁹ Maana, mut’u achamula kuhenda mahenzo ga Mulungu na avumirire kushononeswa na k’akosere, Mulungu undamuhats’a mut’u yiye. ²⁰ Mut’u ta akavumirira kutiywa akili, ela achikala wákosa, k’ahats’wa ni Mulungu. Ela avumiriraye kushononeswa na k’akosere, bee Mulungu undamuhats’a mut’u yiye. ²¹ Siswi ajeso, Mulungu wáhwiha kwa huvumirire kushononeswa na k’ahukosere, maana, ta ye Jeso K’irisito mwenye naye, wáshononeswa kwa dzulu yehu na achivumirira. Ndo siswi naswi hunahenzwa huvumirire shenene dza arivyovumirira yiye. ²² Yiye k’ahendere dambi, na k’alembere mut’u yeyosi. ²³ Yiye Jeso ariphohakanwa, ye k’ahakanire mut’u, na ariphoshononeswa, ye k’aikire undu, ta its’iphokala ye wámukuluphira Mulungu, ariye ndiye alamulaye haki na hakiye. ²⁴ Jeso K’irisito wáhwala madambi genu achigahenda gakwe, na achendaulagwa nago kwa kukot’wa misumari musalabani, kwa ta huriche kutawalwa ni dambi, na husagale vyo Mulungu ahuhenzavyo husagale. Yiye wáahulwa-ahulwa kwa mwimwi muphole. ²⁵ Mwimwi mwákala munga dza magonzi godzoyaya, ela vivi mwáuya kwa Jeso K’irisito, ariye ndiye murisa amumanyiriraye, na amurindaye.

¹ Mwi ache ohwalwa, mwimwi dziikeni ts’ini za alume enu, kwa ta o alume ario k’aadzangwe kogopha neno ra Mulungu, avuhiwe ni menenzi genu ta akuluphire Nguma Mbidzo. ² Mwimwi muchikala na menenzi madzo na ishima, k’amundatsakula kwashuhudiya alume enu kwakukala, o alume enu andavuhiwa ni gago. ³ Mwimwi ts’iikeni mbere maneno ga kumuhenda moneke adzo kuku konze dza kusongwa misongo ya gali-gali, kuvala miyo ya dahabu na nguwo za gali. ⁴ Its’iphokala, udzo wenu unahenzwa wanze moyoni, ambapho nimukale na roho mbidzo na muvumirire. Udzo uu ndio ots’opuka, na ndio wonewao una tende ni Mulungu. ⁵ Uo ndio udzo okala na ache atakatifu pho p’indi, ario ámukuluphira Mulungu, na achidziika ts’ini za alume ao. ⁶ Sara ni mumwenga wa ao ache okala anamukuluphira Mulungu, na yiye wádziika ts’ini za mulumewe Burahimu ta achikala umwiha ts’aweye. Ndo mwimwi namwi, hendani madzo na muts’ogofyerwe ni ut’u wowosi, na phapho mundakala dza yiye Sara. ⁷ Mwi alume ohwala, mwimwi namwi sagalani na ache enu na kwamanya kukala, ao ts’i angumbau dza himwi. Aishimeni kwakukala, mwimwi na ao, mosi mundaphokera manoso ga uzima uphya wa kare na kare. Ndo gahendeni gago mwimwi alume, kwa ta mavoyo genu gats’izizwe. ⁸ Ajeso asena, gaga nimwandikirago vivi ga dzulu yenu mwimwi mosi. Mwimwi kalani na mwimo umwenga na moyo umwenga, ahenzeni ndugu zenu a chijeso, monerane mbazi, na mukale arumwengu. ⁹ Mut’u achimuhendera mai, ts’imuripheni mai. Mut’u achimulaphiza, ts’imulaphizeni ta mwi muvoyereni ahats’we ni Mulungu, maana, vivyo ndivyo muhenzwavyo muhende ni Mulungu, na kamare Mulungu wámulaga undamuhats’a. ¹⁰ Vivyo vinagwa sawa na Maandiko ga Mulungu gaambago, "Mut’u achihenza kusagala mazagazi ga raha na kukala na ukati udzo, lulimilwe, naluts’ilavye mai, na mulomowe, nauts’igombe maneno ga kulemba. ¹¹ Naarichane na mai ahende madzo, naatsakule reri, na ahende aidimavyo ayipate. ¹² Maana, matso ga Bwana, ganaaona o ahendao ga haki, na masikiroge, udzigahega kwa mavoyo gao, ela ahendao mai, Bwana udzialozera mongo." ¹³ Ndo ni ani yendaaza kumuhenda vii muchikala muna chadi cha kuhenza kuhenda madzo? ¹⁴ Elako, ta mukashononeswa vivyo kwa munahenda madzo, Mulungu undamunosa vivyo. Ndo muts’ogofyerwe, hebu muts’ibabaishwe ni mut’u yeyosi. ¹⁵ Chit’u ni kwamba tu, mwishimeni na mogopheni muno Jeso K’irisito, kwakukala, yiye ndiye Bwana wenu. Na ukati wosi, kalani kwete kumushuhudiya mut’u yeyosi yendemuuza kwadze munamukuluphira Jeso K’irisito. ¹⁶ Chisha, muchikala munamushuhudiya, mushuhudiyeni chip’ore na chiishima, na menenzi genu nagakale madzo. Ndo mwimwi hendani gago, na ao at’u amwifyao na kumwamba munahenda mai kwa mu anafunzi a Jeso K’irisito, andagwirwa ni haya enye. ¹⁷ Maana, mwimwi muchishononeswa kwa vivyo ndivyo Mulungu ahenzavyo, bee ni vidzo mushononeke kwa munahenda madzo, kuriko kushononeka kwa munahenda mai. ¹⁸ Mwimwi nimukale razi kushononeka kwa munahenda madzo, kwakukala, ta Jeso K’irisito ndiye yekala k’ahenda mai, ela yiye wádzilavya achifa kwa ativye adambi. Chicho chifoche chofa, ndiyo njira hicheye tu ya kusameherwa dambi zehu, na ta vivi wáhutsanganya na Mulungu. Yiye ariphoulagwa, wákala una mwiri wa chidamu ufao, ela Mulungu wámufufula na mwiri wa chiroho ots’ofa, ¹⁹ na achendasumurira udzumbe kwa roho zokala zifungwa na minyororo yots’otoka ko dzizani. ²⁰ Roho zizo ni za at’u ario Mulungu wáavumirira amogophe, ela o k’aamogophere vivyo o ukati okala Nuhu unajenga safinaye. Na kati ya at’u osi okala a phapha duniani o ukati wa Nuhu, ni at’u anane hichiyao tu ophenya mo safinani, ndio ario átivywa kuchirira o muvo wa madzi okudza. ²¹ Na muvo wa madzi uo okudza, wákala ni mufano wa uu ubatizo, urio mutivywa kuchirira uo vivi. Uu ubatizo ts’i madzi ga koga mut’u atsuke mwiri, ela ni njira ya konyesa Mulungu unakutakasa moyoni kwa kukusamehe. Ndo mutivywa kuchirira uo kwa widimi wa kufufuka kulaa kuzimu kwa Jeso K’irisito, ariye ²² wáhwalwa achenda mulunguni, na kuko u mukono wa kulume wa Mulungu unatawala malaika osi, enye vyeo, na enye widimi.

¹ Enehu a chijeso, chimwiri Jeso K’irisito wáturiswa muno. Ndo mwimwi namwi munahenzwa mukale razi kuturika dza vyo arivyoturika yiye na achikala u razi, kwakukala, muchiturika chimwiri, bee ni kukala k’amutawalwa ni dambi kahiri. ² Na ndo ta vyo mucherivyo kusagala phapha duniani, mundahenda go huhenzwago huhende ni Mulungu, ela ts’i higo gahenzwago ni t’amaa mbii za chidamu. ³ Mwimwi pho p’indi mwáyaza ukati wenu unji kuhenda maneno gaahamirago ataifa, na vivi k’amuhenzwa mugauyire kamare gago. Mwimwi mwákala mu azembe na adiya, mwákala muchenda shuhulini za chidunia, kunwa dza ao na kuhenda makolo, na mwákala muchivoya milungu ya vinyago, ut’u urio k’auhenzwa. ⁴ Mataifa vivi adzangalala na anamwifya, kwakukala, k’amugahenda kahiri gago mai gokala muchigahenda phamwenga. ⁵ Ela andakudzamwambira enye Mulungu gao gosi gohenda, kwakukala, yiye ndiye mulamuli wa at’u ario moyo, na afadzi. ⁶ Gago ndigo gatumago ta Nguma Mbidzo yásumurirwa ta ofa, kwa ta roho zao zikale na uzima uphya vivyo kulaa kwa Mulungu, ta aripho o enye átiywa akili kwa kufa dza atiywavyo akili at’u osi. ⁷ Ajeso asena, ts’iku ya musindikizo wa urumwengu yi phephi. Ndo dzidiniseni kwa ta muts’ihende dambi, na mudzimanyirire kwa ta mwidime kwenderera kuvoya. ⁸ Ra halahala ririro nimurihende ni kwamba, henzanani na myoyo yenu yosi, maana, muchikala munahenzana, mundakala razi kusameheana madambi manji. ⁹ Piganani karibu mwenu midzini phots’o h’uh’u. ¹⁰ Mwimwi mwáhewa vipaji aina-aina ni Mulungu, na chila mumwenga naachihumiret’o kwahikirahikira anzie cho chipajiche chohewa ni Mulungu. ¹¹ Yehewa chipaji cha kusumurira neno ra Mulungu, naasumurire riro neno ra Mulungu. Na yehewa chipaji cha kwahikirahikira ajeso, naahikehike na widimi ahewao ni Mulungu. Muchigahenda gago, Mulungu undalikwa kwenye chila neno kuchirira Jeso K’irisito, ariye undaenderera kukala na ubomu na widimi ta kare na kare. Amina. ¹² Enehu a chijeso nimuhenzao, mwimwi vivi munaturika muno, na gago nagats’imwangalaze dza kwamba gákala k’agalolerwa kulairira. ¹³ Mwimwi ta hamirwani vivi murivyo munaturika dza vyoturika Jeso K’irisito, kwakukala, yiye achikala unauya mundaona mung’alowe, na phapho muhamirwe muno. ¹⁴ Baha mwimwi chikala at’u anamwifya kwa mu anafunzi a Jeso K’irisito, maana, Roho wa Mulungu ariye una widimi, u phamwenga namwi. ¹⁵ Mut’u achikala ni muulagi, ni mwivi, ni gerugeru hebu ni mut’u wa kuphenyerera maneno ga at’u, ni seti aturike. Ela mwimwi ajeso k’amuhenzwa muturike kwa mudzihenda dza gago. ¹⁶ Ajeso anahenzwa aturike kwa dzulu ya Jeso K’irisito na yendeturika kwa gago, naats’one waibu, ta ye naamulike Mulungu kwa ye ni mujeso. ¹⁷ Maana, ukati wa ulamuli wa Mulungu ufika, na Mulungu undaanza kwalamula o at’ue. Ndo chikala Mulungu ta undaanza kuhulamula siswi at’ue enye, munaona o at’u ots’okuluphira Ngumaye Mbidzo undaahendadze? ¹⁸ Gago ganagwa sawa na Maandiko ga Mulungu gaambago, "Achikala o at’u ahendao ga haki tu ko kutivywa kwao ni kwa gada, o adambi ots’omumanya Mulungu munaona andahendwadze?" ¹⁹ Bee, at’u aturikao kwa vivyo ndivyo Mulungu ahenzavyo, naamukuluphire Mulungu muumbi wao, ariye unakuluphirika kamare, na aenderere kuhenda madzo.

¹ Vilongozi asena a makanisa, mimi ninagomba namwi dza chilongozi munziwenu wa kanisa, niriyeona na matso gangu mwenye Jeso vyoturiswa, na chisha niriye nindakala na o ubomu udzao. Mimi ninamuvoya mwimwi asena kukala, ² mukale razi kwamanyirira at’u a Mulungu ario ts’ini zenu, kwakukala, vivyo ndivyo Mulungu ahenzavyo, ela muts’ihendegaramishwa. Kazi yiyo yihendeni kwa kudzilavira, ela ts’iyihendeni kwa chipherephere cha p’esa. ³ Mwimwi ts’idziikeni abomu a o at’u a Mulungu ario ts’ini zenu, ela kalani a mwanzo kuhenda go mwahenzago ahende. ⁴ Mwimwi hendani vivyo, na Jeso K’irisito ariye ndiye mumanyiriri mubomu wa siswi hosini, achiuya, mundakudzapata manoso mabomu gondokwenderera ta kare na kare. ⁵ Mwi atana namwi, mwimwi dziikeni ts’ini za vilongozi. Na mwanzo mwimwi ajeso mosi munahenzwa muhikiranehikirane chirumwengu, maana, Maandiko ga Mulungu ganaamba, "Mulungu unaapinga o at’u adziunulao, ela at’u arumwengu, unaahats’a." ⁶ Ndo dziikeni chirumwengu ts’ini za Mulungu mwenye widimi wa kumumanyirira na kumutivya, kwa ta adze amuhende mwishimike o ukati owika yiye uchifika. ⁷ Mwimwi murichireni Mulungu genu gosi gamuyugago, maana, yiye unamumanyirira. ⁸ Mwimwi dzimanyirireni na mukale matso, kwakukala, ye mudawa wenu Shetani unazunguluka kutsakula mut’u amuulage chiroho dza ts’imba ainzaye. ⁹ Ndo endererani kumukuluphira Mulungu jeri mumupinge ye Shetani, maana, munamanya kukala, ta o ajeso anzienu dunia yosi, niaturike na avumirire dza vyo muturikavyo mwimwi na munavumirira. ¹⁰ Mulungu kwa mbazize mwenye, wámwiha kwa mukale na ubomu dza o wakwe ta kare na kare, kuchirira Jeso K’irisito. Ndo vivi mwimwi munaturika kwa chiwango tu na chicho chichisira, Mulungu undamuhenda muts’ikose chochosi, amudinise, amup’e mukotse na amukomaze. ¹¹ Mulungu naakale na widimi ta kare na kare. Amina. ¹² Mimi nidzimugwira Silwano mwenehu wa chijeso akuluphirikaye aniandikire yiyi baruwa yangu kwa ufuti. Lengo rangu ni kumutiya moyo, na kumuhakikishira kukala, gago Mulungu undamuhendera, maana, unamuhenza jeri. Ndo endererani kugagwira jeri. ¹³ Ajeso anzienu ario kuku mudzi wa Babuloni, ario nao átsagulwa ni Mulungu, anamulamusa. Na mwanangu wa chiroho Mariko, unamulamusa naye. ¹⁴ Mwimwi namwi lamusanani kwa kupigana busu ra kuhenzana kuko. Kalani na reri mwimwi ajeso mosi.