1 JOHANA

¹ Neno wákalako hangu pho mwanzo. Siswi hwásikira manenoge, hwáhendamona na matso gehu enye, hwámulolat’o na hwámukumba. Siswi vivi hunasumurira dzulu ya ye Neno, ariye ndiye aap’aye at’u uzima, na husumuriravyo ni kukala, ² ye Neno, ariye ndiye aap’aye at’u uzima, wálairira. Yiye aripholairira, siswi hwámona ta vivi hu mashaidige na hunamusumurira mwimwi kukala, hangu pho mwanzo, wákala u kwa Baba Mulungu. Yiye ndiye aap’aye at’u uzima uphya wa kare na kare, na wáhulairira. ³ Siswi hunamusumurira gogaona na gogasikira, kwa ta mwimwi na siswi, hosini hukale na umwenga na Baba Mulungu, na Mwanawe Jeso K’irisito. ⁴ Ndo siswi hunamwandikira gago kwa ta kuhamirwa kwehu, kukale kwa kamare. ⁵ Ajeso asena, siswi hwásikira udzumbe wa Mulungu, na uo ndio humwambirao vivi. Udzumbe wenye unaamba, Mulungu ni mwanga, na k’agwirana na dziza kamare. ⁶ Ndo siswi huchamba huna umwenga na Mulungu, ela hunahenda mahendo mai garigo ganga dziza, hukala hunalemba, na k’ahutuwa ujeri. ⁷ Ela huchisagala mwangani, dza vyo arivyo Mulungu ni mwanga, hukala huna umwenga siswi ajeso, na milatso ya Jeso Mwana wa Mulungu, yinahutakasa madambi gosi. ⁸ Siswi huchamba k’ahu adambi, hunadzilemba na k’ahuumanya o ujeri wa Mulungu. ⁹ Ela huchikubali hu adambi, na huchigasema go madambi gehu gogahenda, Mulungu undahusamehe, na ahuusire ui wosi, maana, yiye unakuluphirika, na unahenda ga haki. ¹⁰ Siswi huchamba k’ahudzangwe kuhenda dambi, hukala hunamuhenda Mulungu ni mulongo, na vivyo vinaonyesa k’ahukuluphira nenore.

¹ Ajeso asena, mwimwi mu anangu a chiroho, na ninamuhenza. Ndo nidzimwandikira gago kwa ta muts’idze mukahenda dambi. Ela mut’u yeyosi achihenda dambi, huna mut’u mumwenga ahuvoyeraye kwa Baba Mulungu, kukala ahusamehe. Mut’u yiye ni Jeso K’irisito, ariye ni muhaki. ² Na chisha, yiye Jeso K’irisito ndiye sadaka yiusayo madambi gehu, na ta ga at’u osi phapha duniani. ³ Ajeso asena, siswi kuhenda kanuni hunamumanya Mulungu, nihutuwe malagizoge. ⁴ Mut’u aambaye, "Mimi ninamumanya Mulungu," ela k’atuwa malagizoge, ni mulongo na unalemba. ⁵ Ela mut’u atuwaye neno ra Mulungu, ndiye ariye unamuhenza Mulungu na moyowe wosi jeri. Ndo siswi kuhenda kanuni hu mwakwe ndani, nihutuwe nenore. ⁶ Na yeyosi adzambaye u mwakwe ndani, niasagale dza vyo arivyosagala Jeso K’irisito. ⁷ Ajeso asena nimuhenzao, mimi vivi ninamwandikira lagizo, na riro ts’i kwamba ni jeni, ela ni rirat’u ra p’indi murirorimanya kwanzira yo ts’iku muriyokuluphira. Lagizo riro, ni o udzumbe wa Mulungu ousumurirwa. ⁸ Elako, riri nimwandikiraro rinaambwa ni iphya, na o ujeri wa kukala ni iphya, ung’azwa ni vyo arivyosagala Jeso K’irisito, na vyo musagalavyo mwimwi, kwakukala, ukati wa dziza wenda uchisira, na o mwanga wa jeri unaaka kare. ⁹ Mut’u yeyosi adzambaye u mwangani, ela udzimumena nduguye wa chijeso, bee ucheri dzizani. ¹⁰ Amuhenzaye nduguye wa chijeso, unasagala mwangani na kwa vivyo, k’ana chochosi chiidimacho kumuhenda agwe. ¹¹ Ela yedzemumena nduguye wa chijeso, u dzizani na k’amanya endako, kwakukala, ro dziza ridzimuhosa matso. ¹² Mwimwi anangu nimuhenzao, ninamwandikira kwakukala, dambi zenu zásamehewa kwa dzina ra Jeso K’irisito. ¹³ Ninamwandikira mwimwi ano baba odzokomala chiroho, kwakukala, munamumanya yekalako hangu pho mwanzo. Ninamwandikira mwimwi atumia mvuka, murio chiroho mucheri kukula, kwakukala, mwámurima ye Mui. Ninamwandikira mwimwi atana nimuhenzao, kwakukala, munamumanya Baba Mulungu. ¹⁴ Ninamwandikira mwimwi ano baba odzokomala chiroho, kwakukala, munamumanya yekalako hangu pho mwanzo. Ninamwandikira mwimwi atumia mvuka, murio chiroho mucheri kukula, kwakukala, mwimire kudina, mudziriika mwenu myoyoni neno ra Mulungu, na mwámurima ye Mui. ¹⁵ Ajeso asena, mwimwi ts’ing’akireni yiyi dunia mbii, hebu ut’u wowosi ui wa dunia. Mut’u ang’akiraye yiyi dunia mbii, k’aidima kukala na menzwa dza ya Baba Mulungu. ¹⁶ Maana, maneno gosi ga dunia mbii, dza t’amaa mbii za chidamu, kuts’aona cha mut’u, na kudziunula kwa at’u kwa miyo ariyo nayo, gago gosi k’agalaa kwa Baba Mulungu, ela ni ga yiyi dunia mbii. ¹⁷ Dunia mbii na miyoye yitamanikayo, yindakala na musindikizo. Ela mut’u ahendaye henzo ra Mulungu, chiroho undakala moyo ta kare na kare. ¹⁸ Anangu nimuhenzao, ukati wa musindikizo wa urumwengu, urio ndio ondokudza ye mudawa wa Jeso K’irisito dza murivyosikira, u phephi na kufika. Ela manyani kukala, ta vivi adawa anji a Jeso K’irisito ákudza kare, na vivyo vinaonyesa uo ukati u phephi na kufika. ¹⁹ At’u ao ákala achituwa-tuwa duu rehu ra ajeso, ela vivi álaa, maana, ákala ts’i ajeso. Kalapho ao ákala ni ajeso dza siswi, angari k’aalaire mwehu duuni. Ela vivi arivyolaa, anaonyesa osi ákala ts’i ajeso. ²⁰ Ela mwimwi mwáudzazwa Roho wa Mulungu ni Jeso K’irisito ariye k’ana ila yoyosi, na mwimwi mosi munaumanya o ujeri. ²¹ Ndo mimi ninamwandikira kwakukala, munaumanya o ujeri na kwakukala, munamanya ulongo na ujeri k’augwirana, ela ts’i kwamba ninamwandikira kwa k’amumanya ujeri. ²² Ndo mulongo ni ani? Mulongo ni mut’u aremaye kukala, Jeso ndiye ye K’irisito. Mut’u ahendaye vivyo, ni mudawa wa Jeso K’irisito, na unarema kumukuluphira Baba Mulungu na Mwanawe. ²³ Na aremaye kumukuluphira ye Mwana, k’aidima kuhenda umwenga na Abaye Mulungu. Ela amukuluphiraye ye Mwana, unamuphokera ta ye Abaye Mulungu naye. ²⁴ Ajeso asena, mwimwi hakikishani munaenderera kugaika mwenu myoyoni garat’u gogasikira kwanzira yo ts’iku muriyokuluphira. Mwimwi hendani vivyo namwi mundaenderera kukala ndani mwa ye Mwana, na ndani mwa Abaye Mulungu, ²⁵ na vivyo, mundakala na uzima uphya wa kare na kare muriolagwa ni ye Mwana. ²⁶ Ajeso asena, mimi nidzimwandikira gago kumumanyisa dzulu ya o at’u ario anahenza kumuyaza. ²⁷ Ela mwimwi mwáudzazwa Roho wa Mulungu ni ye Jeso K’irisito, na ye Roho unaenderera kukala mwenu ndani, na unamufunza dzulu ya maneno gosi. Kwa vivyo, k’amutakiya kufunzwa ni mut’u munjine. Dzulu ya vivyo, yiye Roho ni mujeri ts’i mulongo. Ndo endererani kukala ndani mwa Jeso K’irisito dza vyofunzwa ni ye Roho. ²⁸ Anangu nimuhenzao, kutuwirizana na vivi maneno garivyo, mwimwi endererani kukala ndani mwa ye Jeso K’irisito, kwa ta achilairira yo ts’iku yondokala unauya, hukale k’ahu aoga naye, na phapho hwidime kwima mbereze. ²⁹ Mwimwi munamanya kare kukala, Jeso K’irisito unahenda ga haki, na munamanya vivyo kukala, ahendaye ga haki, bee wávyalwa ni Mulungu.

¹ Ajeso asena, siswi ajeso hwáhenzwa muno ni Abayehu Mulungu ta unahwiha anae, na hu anae jeri! Ela at’u a chidunia k’aamanya hu ana a Mulungu, kwakukala, k’aadzangwe kumumanya ye Abayehu. ² Ajeso asena nimuhenzao, siswi vivi hu ana a Mulungu, ela k’ahudzangwe kuvimanyiswa vyo vyehu vyondokala o ukati udzao. Chehu humanyacho vivi ni kukala, Jeso K’irisito achikala unauya, hundamona vyondokala, na phapho siswi hundakala dza vyo ndokala yiye. ³ Ndo chila mut’u aloleraye kudzakala dza vyo ndokala yiye, unadzitakasa akale mutakatifu dza vyo arivyo yiye ni mutakatifu. ⁴ Ajeso asena, ninamuhenza mumanye kukala, mut’u ahendaye dambi unavunza shariya za Mulungu. Na mwanzo ta, dambi ni kuts’atuwa shariya za Mulungu. ⁵ Ela mwimwi munamanya kukala, Jeso K’irisito wákudza kwa ta ahuusire dambi zehu, na yiye k’ana dambi kamare. ⁶ Ndo kutuwana na gago, k’akuna mut’u akalaye unamukuluphira yiye, ela akenderera kuhenda dambi. Na k’akuna endereraye kuhenda dambi na kuno unamukuluphira, hebu unamumanya yiye. ⁷ Anangu nimuhenzao, muts’ikubali kuyazwa ni mut’u yeyosi. Mwimwi nimumanye kukala, ahendaye ga haki, ni muhaki dza Jeso K’irisito arivyo muhaki. ⁸ Ela endereraye kuhenda dambi ni wa Shetani, kwakukala, ye Shetani wáanza kuhenda dambi hangu pho mwanzo. Ndo Mwana wa Mulungu wákudzavunza zo kazi za ye Shetani. ⁹ K’akuna avyalwaye ni Mulungu, ela akenderera kuhenda dambi, maana, yo hali ya Mulungu yi mwakwe ndani, na k’aidima kwenderera kuhenda dambi, kwakukala, wávyalwa ni Mulungu. ¹⁰ Ndo tafauti ya ana a Mulungu na a Shetani yimanywa lwazu kwa gaga; ahendao ga haki na kwahenza ndugu zao a chijeso, ndio ana a Mulungu, ela ots’ohenda vivyo, ni a Shetani. ¹¹ Ajeso asena, udzumbe ousikira kwanzira yo ts’iku muriyokuluphira ni uu; hunahenzwa huhenzaneni. ¹² Siswi k’ahuhenzwa hukale dza Kaini, yephenywa ni ye Mui ta achimuulaga nduguye. Ndo kwadze wámuulaga nduguye? Yiye wámuulaga kwakukala, mahendoge gákala ni mai, ela go ga nduguye gákala ni ga haki. ¹³ Ndo muts’angalale enehu a chijeso, at’u a yiyi dunia mbii achimumena. ¹⁴ Siswi hunaahenza ndugu zehu a chijeso na kwa vivyo hunamanya kukala, hwákulaa ko chifoni cha chiroho, huchirehewa uzimani. Mut’u yeyosi yets’emuhenza nduguye wa chijeso, ucheri ko chifoni cha chiroho. ¹⁵ Mut’u yeyosi yedzemumena nduguye wa chijeso, ni muulagi, na dza mumanyavyo bee ni kukala, k’akuna muulagi ariye una uzima uphya wa kare na kare mwakwe ndani. ¹⁶ Jeso K’irisito wádzilavira kufa kwa dzulu yehu, na vivyo ndivyo virivyohwonyesa huhenzwavyo huhenzane jeri. Ndo siswi naswi, hunahenzwa hukale kwete ta kufa kwa dzulu ya ajeso anziehu. ¹⁷ Mujeso achikala ni tajiri wa chila chit’u, na amanye nduguye wa chijeso una haja na ut’u fulani, ela ye ats’imuuhuke, yiye bee ukala k’amwenzi Mulungu. ¹⁸ Bee k’amona anangu nimuhenzao, siswi hunahenzwa huhenzaneni jeri, na ta mahendo gehu nago gaonyese hunahenzana. Ela k’ahuhenzwa menzwa yehu, yikale ya mulomoni tu. ¹⁹ - ²⁰ Ajeso asena, siswi humanya hunakuluphira kwa kuhenzana jeri, na kwa mahendo gehu nago, konyesa hunahenzana. Na chisha, vivyo ndivyo vihurizavyo myoyo yehu hukalapho hunavoya Mulungu na myoyo yehu yinahwamba hu akosa, kwakukala, Mulungu ni mubomu kuchira myoyo yehu, na unamanya chila chit’u. ²¹ Ajeso asena nimuhenzao, siswi myoyo yehu yichikala k’ayihwamba hu akosa, hunaidima kwima mbere za Mulungu phots’o woga, ²² na Mulungu akahup’a chochosi chondomuvoya, kwakukala, hunatuwa malagizoge, na hunahenda go gamuhamirago. ²³ Lagizo hurirohewa ni Mulungu ni riri; kwamba humukuluphire Jeso K’irisito, na huhenzane dza Mwanawe arivyohulagiza. ²⁴ Ndo atuwao malagizo ga Mulungu, anasagala ndani mwa Mulungu, na yiye naye unasagala mwao ndani. Na humanya Mulungu unasagala mwehu ndani kwa ye Rohowe yehup’a.

¹ Ajeso asena nimuhenzao, phapha duniani vivi phana at’u anji adzambao ni agomvi a Mulungu. Ndo mut’u achidza kwenu, mulolenit’o mumanye kumba unalongozwa ni Roho wa Mulungu jeri, ela ts’ikuluphireni chila mut’u tuu. ² Mut’u yeyosi ashuhudiyaye kukala, Jeso K’irisito wákudza dza mudamu phapha duniani, unalongozwa ni Roho wa Mulungu, na vivyo ndivyo hwidimavyo kumumanya mut’u alongozwaye ni Roho wa Mulungu jeri. ³ Ela mut’u yeyosi yets’eshuhudiya gago, k’alongozwa ni Roho wa Mulungu ta ulongozwa ni roho wa mudawa wa Jeso K’irisito. Mwimwi mwásikira kukala, kundakudza mudawa wa Jeso K’irisito, na bee vivi manyani kukala, wákudza kare phapha duniani. ⁴ Anangu nimuhenzao, mwimwi mwa Mulungu, na kwa vivyo, mwáarima ao adzambao ni agomvi a Mulungu. Maana, ye Roho wa Mulungu ariye mwenu ndani, una widimi muno kuchira Shetani, ariye ndiye mutawali wa yiyi dunia mbii. ⁵ Ao adzambao ni agomvi a Mulungu, ni a yiyi dunia mbii, na kwa vivyo agomba maneno ga chidunia, na o atuwao maneno gao, ni o at’u a yiyi dunia mbii vivyo. ⁶ Ela siswi hwa Mulungu, na yeyosi amumanyaye Mulungu, unatuwa gehu. Ela yeyosi ariye ts’i wa Mulungu, k’atuwa gehu. Ndo vivyo ndivyo hwidimavyo kumanya tafauti ya mut’u alongozwaye ni Roho wa Mulungu wa jeri, na alongozwaye ni roho wa ulongo. ⁷ Ajeso asena nimuhenzao, siswi nahwenderereni kuhenzana, kwakukala, menzwa yilaa kwa Mulungu. Mut’u yeyosi ahenzaye anzie, wávyalwa ni Mulungu, na unamumanya ye Mulungu. ⁸ Ela yeyosi yets’ehenza anzie, k’amumanya Mulungu, maana, Mulungu ndiye mwenye menzwa ya jeri. ⁹ Mulungu wáhwonyesa una menzwa ya jeri, kwa kumuhuma Mwanawe wa hicheye phapha duniani, kwa adze ahup’e uzima uphya wa kare na kare. ¹⁰ Ndo menzwa ya jeri hunayona phapha; yiye wáhuhenza ta achimuhuma Mwanawe achidzakala sadaka ya kuhuusira madambi gehu, ela ts’i kwamba siswi hwákala hunamuhenza. ¹¹ Ndo k’amona ajeso asena nimuhenzao, kwahivira Mulungu wáhuhenza muno vivyo, siswi naswi hunahenzwa huhenzaneni. ¹² K’akuna mut’u yemona Mulungu kamare, ela siswi huchihenzanani, vivyo vindaonyesa Mulungu unasagala mwehu ndani, na siswi hundaahenza anziehu dza vyo Mulungu aahenzavyo at’u. ¹³ Siswi hunamanya hunasagala mwakwe ndani, na yiye naye unasagala mwehu ndani, kwakukala, wáhup’a Rohowe. ¹⁴ Baba Mulungu wámuhuma Mwanawe ta siswi huchimona, na vivi hunaenderera kwashuhudiya at’u kukala, yiye wáhumwa adze akale Mutivyi wa at’u a dunia. ¹⁵ Mut’u yeyosi ashuhudiyaye kukala, Jeso K’irisito ni Mwana wa Mulungu, Mulungu unasagala mwakwe ndani, na yiye naye unasagala ndani mwa Mulungu. ¹⁶ Ndo siswi hunamanya na hunakuluphira kukala, Mulungu unahuhenza jeri. Mulungu ndiye mwenye menzwa ya jeri. Ndo yeyosi ahenzaye na aendereraye kuhenza Mulungu na anzie, unasagala ndani mwa Mulungu, na Mulungu naye unasagala mwakwe ndani. ¹⁷ Na vivi ndivyo vihuhendavyo huhenzaneni dza vyo Mulungu ahenzavyo at’u, kwa ta yo ts’iku yiriyo Mulungu undahulamula yichifika, hudze hwime mbereze phots’o woga. Na siswi hundaima mbere za Mulungu phots’o woga, kwakukala, vyo vyehu husagalavyo phapha duniani, vinga dza vyo arivyosagala Jeso K’irisito. ¹⁸ Mut’u amuhenzaye Mulungu na anzie jeri, ts’i moga na Mulungu, kwakukala, kuhenzana kwa jeri dza vyo arivyo Mulungu unaahenza at’u, kunausa woga. Kutiywa akili ndiko kumuhendako mut’u akale moga. Ndo moga k’adzangwe kuhenda menzwa ya jeri. ¹⁹ Siswi hunamuhenza Mulungu na at’u, kwakukala, Mulungu ndiye yeanza kuhuhenza. ²⁰ Mut’u achamba, "Ninamuhenza Mulungu," ela udzimumena nduguye wa chijeso, unalemba. Maana, yeyosi yets’emuhenza nduguye wa chijeso ariye ta unamona, k’aidima kumuhenza Mulungu ariye ta k’adzangwe kumona. ²¹ Mulungu wáhup’a lagizo ra kukala, amuhenzaye Mulungu, niamuhenze ta nduguye wa chijeso naye.

¹ Ajeso asena, mut’u yeyosi akuluphiraye kukala, Jeso ndiye ye K’irisito, wávyalwa ni Mulungu. Na yeyosi amuhenzaye Baba Mulungu, unaahenza ta o anae nao. ² Siswi kudzimanya hunaahenza ana a Mulungu, nihumuhenze ye Mulungu, na hutuwe malagizoge. ³ Siswi huchituwa malagizo ga Mulungu, hukala hunaonyesa hunamuhenza Mulungu. Na malagizo ga Mulungu k’agahushinda kutuwa. ⁴ Maana, yeyosi ariye ni mwana wa Mulungu, una widimi wa kugarima maneno ga yiyi dunia mbii. Siswi hwágarima ga dunia kuchirira kuluphiro rehu. ⁵ Ndo mut’u aidimaye kugarima ga yiyi dunia mbii, ni yuyat’u akuluphiraye kukala, Jeso K’irisito ni Mwana wa Mulungu. ⁶ Yiye Jeso K’irisito wákudza phapha duniani kuchirira madzi, na milatso. Yiye k’adzire kuchirira madzi hicheye, ela wákudza kuchirira madzi na milatso. Maneno gago ni ga jeri, kwakukala, ta ye Roho wa Mulungu naye unashuhudiya kukala ni ga jeri, na bee ni mujeri. ⁷ Ndo kuna vit’u vihahu vihumanyisavyo gago. ⁸ Navyo ni, ye Roho wa Mulungu, go madzi, na yo milatso, na vivyo vyosi vinaamba gago ni ga jeri. ⁹ At’u ashuhudiyapho, hunakubali ushuda wao ni wa jeri. Ela ushuda ulaviwao ni Mulungu, nihuukubalini muno ni wa jeri kuchira wa at’u, kwakukala, ni ushuda wa Mulungu oulavya dzulu ya Mwanawe. ¹⁰ Ndo mut’u yeyosi akuluphiraye Mwana wa Mulungu, unaenderera kuukubali o ushuda olaviwa ni Mulungu. Ela yets’ekuluphira, unamuhenda kukala Mulungu ni mulongo, kwakukala, k’aukuluphira ushuda olaviwa ni Mulungu dzulu ya Mwanawe. ¹¹ Ushuda olaviwa ni Mulungu ni uu; Mulungu wáhup’a uzima uphya wa kare na kare, na uzima uo ulaa kwa ye Mwanawe. ¹² Ndo ariye una umwenga na ye Mwana, una uzima uphya wa kare na kare. Ela yets’ena umwenga na ye Mwana wa Mulungu, k’ana uo uzima uphya wa kare na kare. ¹³ Ajeso asena mukuluphirao Mwana wa Mulungu, mimi ninamwandikira gaga gosi kwa ta mukale na kanuni kukala, muna uzima uphya wa kare na kare. ¹⁴ Siswi k’ahu aoga na Mulungu, maana, huna kanuni kukala, chochosi chondomuvoya kutuwirizana na mahenzoge, unaphokera mavoyo gehu. ¹⁵ Na kwahivira hunamanya gehu gosi humuvoyago unagaphokera, hunamanya vivyo kukala, gehu gosi humuvoyago unahuchimizira. ¹⁶ Mut’u achimona nduguye wa chijeso unahenda dambi yiriyo k’ayimuhenda afe chiroho, naamuvoyere, na Mulungu undaenderera kumup’a uzima. Mimi nidzamba vivyo kuhadza at’u ario anahenda dambi yiriyo k’ayiahenda afe chiroho. Maana, kuna dambi yiriyo mut’u achiyihenda, yinamuulaga chiroho, na mimi ts’i kwamba nidzamba mut’u achihenda dambi yiyo, avoyerwe. ¹⁷ Chila kosa rihendwaro ni mut’u ni dambi, ela kuna makosa manjine garigo k’agamuhenda mut’u afe chiroho. ¹⁸ Siswi hunamanya kukala, mut’u yeyosi yevyalwa ni Mulungu, k’aenderera kuhenda dambi, maana, ye Mwana wa Mulungu mwenye unamurinda, na kwa vivyo, ye Mui k’amukumba. ¹⁹ Siswi ajeso hunamanya kukala, hu ana a Mulungu, elako, dunia yosi yinatawalwa ni ye Mui. ²⁰ Siswi hunamanya vivyo kukala, ye Mwana wa Mulungu wákudza, na yiye wáhufunza kwa ta humumanye ye Mulungu wa jeri. Ndo siswi, hu ndani mwa yiye Mulungu wa jeri, na mwa Mwanawe Jeso K’irisito naye. Jeso K’irisito ni Mulungu wa jeri, na ndiye ye aap’aye at’u uzima uphya wa kare na kare. ²¹ Bee k’amona anangu a chijeso nimuhenzao, muts’idzilavye kwa ut’u wowosi urio unaidima kuhwala nafasi ya Mulungu mo mwenu myoyoni.