1 AKORITO

¹ Ni mimi P’aulo yeihiwa nikale muhumwa wa widimi wa Jeso K’irisito kwa henzo ra Mulungu, na nina mwenehu wa chijeso Sositene. ² Hunamwandikira mwimwi at’u a Mulungu a mudzi wa Korito, murio Mulungu wámuhenda muriche ga dunia kwa njira ya Jeso K’irisito kwa mukale at’ue, phamwenga na at’u osi chila phat’u ario anamwabudu Bwana wehu Jeso K’irisito, ariye ta ao nao ni Bwana wao. ³ Abayehu Mulungu na Bwana Jeso K’irisito naamuhats’e, na amuhende musagale na reri yao. ⁴ Ninamulavira mumvera Mulungu wangu ukati wosi kwa dzulu yenu, kwakukala, yiye wámuhats’a kwa njira ya Jeso K’irisito. ⁵ Mwimwi mwákuluphira Jeso K’irisito, naye Mulungu achimup’a madzo gosi. Vivyo ni kwamba, mwájaliwa widimi wosi wa kusumurira nenore, na muchifunulirwa maneno gosi ga chiroho, na ⁶ vivyo vinaonyesa o udzumbe dzulu ya Jeso K’irisito uhenda mizi ya ndani mwenu myoyoni. ⁷ Ndo vivi mutarizavyo Bwana wehu Jeso K’irisito auye, k’akuna ta chipaji chimwenga chenye cha Mulungu, muricho k’amunacho. ⁸ Na Mulungu undamwidimisa kugwiririra kuluphiro renu kinyi ta musindikizo, kwa ta ts’iku ya kuuyakwe muts’idzeonewa na makosa. ⁹ Mulungu yemwiha mwimwi mukale na umwenga na Mwanawe Jeso K’irisito, ariye ni Bwana wehu, unakuluphirika. ¹⁰ Enehu a chijeso, ninamuvoya mosi kwa dzina ra Bwana wehu Jeso K’irisito kukala, mwerekezane. Mwimwi ts’igavyaneni maduu-maduu, its’iphokala, kalani at’u amwenga enye azo mwenga, na lengo mwenga. ¹¹ Mimi náambirwa lwazu ni anjine a at’ungwa a Kiloe kukala, mwimwi k’amwerekezana kuko. ¹² Na kumwambira lwazu-lwazu ni ninaamba: chila mumwenga wenu kuko unagomba gakwe. Anjine achigomba anaamba, "Sino hu anafunzi a P’aulo," anjine o anaamba, "Sino hwa Apolo," anjine kahiri anaamba, "Sino hwa P’etero," na anjine o anaamba, "Sino hwa K’irisito." ¹³ Ndo akale ye Jeso K’irisito ts’i mumwenga? Mino P’aulo ndimi yeulagwa kwa kukot’wa misumari musalabani kwa dzulu yenu? Hebu muriphobatizwa, mwábatizwa kwa dzina rangu? ¹⁴ Ninamulavira mumvera Mulungu kwakukala, mimi ts’ibatizire mut’u munjine yeyosi kati yenu, its’iphokala, K’irisipo na Gayo tu. ¹⁵ Na náhenda vivyo kwa ta kuts’ilairire mut’u akaamba wábatizwa kwa dzina rangu. ¹⁶ (Aa! Nidzikala nidzinyala, ela vivi nidzikumbikira kukala, námubatiza Sitefana na adamue nao, na ninaona k’akuna munjine yemubatiza ta ni ao tu.) ¹⁷ Maana, Jeso K’irisito k’anihumire nibatize. Yiye wánihuma nisumurire Nguma Mbidzo, chisha, phots’ohumira hekima ya chidamu kwa ta chifo cha Jeso K’irisito musalabani chits’ilaviwe widimiwe. ¹⁸ Ni jeri kukala, at’u ahangamikao anawona udzumbe dzulu ya chifo cha Jeso musalabani ni ut’u ots’o ganjira, ela kwehu siswi hutivywao, hunaona jisi Mulungu arivyo na widimi. ¹⁹ Vivi vinagwa sawa na Maandiko ga Mulungu gaambago, "Nindabananga mipango ya at’u adzonao ana hekima, na o ulachu wa o adzonao ni alachu, niuhende uzuzu." ²⁰ Ndo chikala maneno gandakala vino, ano adzonao ana hekima, at’u a visomo na alumbi phano duniani, kuno kumanya kwao, kunda-aaviza nani? Ujeri ni kwamba, Mulungu wáng’aza kukala, hekima ya chidamu kwakwe ni uzuzu. ²¹ Maana, Mulungu kwa hekimaye, wáahenda at’u ats’imumanye kwa njira ya hekima yao ya chidamu. Kurichisakwe, Mulungu wáamula kuhumira uu udzumbe huusumurirao, urio anjine anawiha ni uzuzu, kwa aativye o aukuluphirao. ²² Ayahudi anahenza ahenderwe dalili ya konyesa kukala Mulungu unahenda kazi. Na Ayunani alola hekima ya chidamu; ²³ ela sino hunasumurira dzulu ya Jeso K’irisito yeulagwa kwa kukot’wa misumari musalabani. Udzumbe uu ni chikwazo kwa Ayahudi, na o at’u a makabila manjine anawona ni uzuzu. ²⁴ Ela kwa arat’u oihiwa ni Mulungu, akale ni Ayahudi hebu Ayunani, kwao Jeso K’irisito ndiye ye ang’azaye kukala, Mulungu una widimi na hekima. ²⁵ Maana, gaga ga Mulungu gaonewago ni uzuzu, gachira hekima ya chidamu, na ko konewako ni kuts’adziidima kwa Mulungu, kuchira mukotse wa anadamu. ²⁶ Enehu a chijeso, lilikanani hali muriyokala phokala Mulungu k’adzangwe kumwiha. Ni achache kati yenu okala ana hekima dza at’u a dunia alilikanavyo, ts’i anji okala ana widimi, hebu okala alaa nyumba za at’u amanyikanao. ²⁷ Ela Mulungu wátsagula at’u ots’o visomo phapha duniani, kwa ta o a hekima aifyike, na achitsagula at’u ots’o widimi, kwa ta enye widimi aifyike. ²⁸ Na wátsagula arat’u alaao nyumba za at’u a kuts’adziidima, aphurywao na aonewao dza kwamba ts’i at’u phapha duniani, kwa ta aalavye vyeo aa aonewao ana tende. ²⁹ Mulungu wáhenda vivyo, kwa ta kuts’ilairire mut’u ta mumwenga ariye unaidima kudziunula mbereze. ³⁰ Mulungu ndiye chanzo cha mazagazi gehu ga kumulola Jeso K’irisito, na chisha, ndiye yemuhenda Jeso ahurehere hekima kulaa kwakwe. Ndo Mulungu wáhuphokera dza enye haki, wáhuhenda hukale at’ue atakatifu, na huchiikwa tsare kwa njira ya yuyu Jeso K’irisito vivyo. ³¹ Gaga gohendwa ni Mulungu gáchimiza go Maandikoge gaambago kukala, "Ahenzaye kudziunula, naadziunule kwa gohenderwa ni Bwana."

¹ Enehu a chijeso, mimi niriphokudza kwenu kudzamusumurira udzumbe wa Mulungu okala p’indi k’aumanywa, ts’ihumirire hekima ya chidamu, hebu kudzonyesa kwa maneno gangu nina chisomo. ² Mino kabila kudza kwenu, nákala nidzamula kare kuts’agomba manjine, ta its’iphokala udzumbe dzulu ya Jeso K’irisito yefa musalabani tu. ³ Ndo ukati niriphokudza kuko kwenu, hali yangu yákala yi phots’i, na nichikala ninatetema kwa woga. ⁴ Na niriphomusumurira Nguma Mbidzo, ts’ihumirire maneno ga kulembalemba ga hekima ya chidamu. Kurichisakwe, niriphogomba, Roho wa Mulungu wáng’aza widimiwe, ⁵ kwa ta o widimi wa Mulungu umuhende mumukuluphire Jeso K’irisito, ela ts’i hiyo hekima ya chidamu. ⁶ Ela ta vivyo, hunagomba maneno ga hekima kwa arat’u ariokomala chiroho; ela hekima yiyo ts’i ya chidamu, hebu ya atawali a phapha duniani, ario andalaviwa vyeo. ⁷ Sino go maneno gehu ga hekima hugagombago galaa kwa Mulungu, na ga dzulu ya o mupango wa Mulungu wa kukala, hudze husagale naye. Mupango uu wáchizwa ni Mulungu hangu urumwengu k’audzangwe kuumbwa kukala udze uhufaidishe, ela wákala k’aumanywa ni adamu pho p’indi. ⁸ Na k’akuna ta mumwenga wa atawali phapha duniani yeyimanya hekima yiyi, kwakukala, kala áyimanya, k’aangamukot’ere misumari musalabani Bwana mwenye ubomu wosi. ⁹ Ela gago gáchimiza Maandiko ga Mulungu gaambago, "Garat’u gokala k’agadzangwe konewa, hebu kusikirwa ni mut’u, garat’u gokala ta k’akuna aazaye kukala gandalairira, ndigo gago arigo Mulungu wáabambanyira at’u amuhenzao." ¹⁰ Ela Mulungu wámuhenda Rohowe ahung’azire siswi o mupangowe. Maana, ye Roho wa Mulungu unamanya chila chit’u ta maneno ga Mulungu ga moyoni. ¹¹ Maneno ga mut’u gosi gamanywa ni rohoye, na ndo sawa na ga Mulungu gosi nago, gago gamanywa ni ye Rohowe. ¹² Siswi k’ahuhewerwe roho wa chidunia, ela hwáhewa Roho wa Mulungu kwa hugamanye goajaliwa ni Mulungu. ¹³ Ndo siswi hufunzapho dzulu ya goajaliwa ni Mulungu, hulongozwa ni ye Roho wa Mulungu, kwambira at’u maneno dzulu ya goajaliwa, chisha, kwa kuhumira maneno huhewago ni ye Roho, ela k’ahuhumira hekima ya chidamu. ¹⁴ Mut’u yets’e Roho wa Mulungu, k’aidima kuphokera maneno ga Roho wa Mulungu. Maana, kwakwe mut’u dza yiye, maneno gago ni ut’u ots’o tende kamare, na k’agamanya. Mut’u ugamanya gana tende tu chikala ye Roho wa Mulungu unasagala mwakwe ndani. ¹⁵ Mut’u mwenye Roho wa Mulungu unaidimiswa kumanya gosi, ela ye mwenye, k’akuna mut’u amanyaye gakwe, ¹⁶ dza Maandiko ga Mulungu gaambavyo kukala, "K’akuna mut’u aidimaye kumanya maazo ga Bwana Mulungu, k’akuna mut’u aidimaye kumup’a utumia yiye."

¹ Ela mimi nákala ts’iidima kugomba namwi dza nigombavyo na at’u ario a chiroho, mwimwi enehu a chijeso. Mimi yánibidi nigombe namwi dza at’u ario ni atsanga Jesoni, na acherio kusagala chimwiri. ² Ndo mimi yánibidi nimurise muswa ela ts’i kumurisa wari kwakukala, ukati uo mwákala k’amwidima kurya wari, na ta vivi chisha, k’amwidima kurya wari vivyo, ³ maana, mucheri kusagala chimwiri. Mwimwi munashindana na munapigana. Ndo, vyo bee ts’iko konyesa kukala mu chimwiri jeri, na munahenda go ga chidunia? ⁴ Maana, anjine kati yenu anaamba, "Sino hu anafunzi a P’aulo," na anjine o anaamba, "Sino hwa Apolo," ndo, vyo bee ts’iko konyesa mu chimwiri jeri? ⁵ Na kwani, mino P’aulo na ye Apolo hunani sana? Siswi hu ahendikazi a Mulungu tu hurio Mulungu wáhuhumira kumuhenda mwimwi mumukuluphire Jeso K’irisito, na chila mumwenga wehu, unahenda kazi yohewa ni Bwana. ⁶ Mimi ndimi yephanda, Apolo ye achimwagira madzi yo mimera; ela Mulungu ndiye yeyikuza mimera yiyo. ⁷ Ndo mimi muphandi na ye mumwagiri wa madzi, bee ts’iswi a halahala. Wa halahala ni Mulungu tu kwakukala, ndiye ayikuzaye yo mimera. ⁸ Mimi muphandi na ye mumwagiri, bee lengo rehu ni mwenga, its’iphokala tu chila mumwenga wehu undanoswa kutuwirizana na kaziye yoyihenda. ⁹ Ndo mimi na yiye hu ahendikazi a Mulungu, na mwi namwi munga dza munda wa Mulungu na nyumba yijengwayo ni ye Mulungu vivyo. ¹⁰ Ndo mimi náhumira o widimi ohewa ni Mulungu, na dza fundi wa nyumba jeri, nátsimba musinzi, na vivi at’u anjine anaunuriza kujenga pho musinzini, ela chila mut’u naadzimanyirire na vyo ajengavyo. ¹¹ Maana, Mulungu wákala udzimwika kare Jeso K’irisito hicheye tu kukala o musinzi. Ndo k’akuna mut’u aidimaye kutsimba musinzi unjine. ¹² At’u anaunuriza kujenga pho musinzini na dahabu, feda hebu mawe ga gali muno. Anjine o anahumira mihi, nyasi hebu mikangaga. ¹³ Ela kazi ya chila mut’u yindaonewa lwazu-lwazu yo ts’iku yiriyo Jeso K’irisito undauya kudzalamula. Maana, ts’iku yiyo kundakala na moho ondochirira kazi ya chila mut’u ta yimanywe udzowe. ¹⁴ Ndo yendekala udziunuriza kujenga pho musinzini na miyo yiriyo k’ayiphya, undanoswa ni Mulungu. ¹⁵ Ela ye ariye kaziye yindaphya, h’aya bee ye undakala wátsoka bule, na ta aripho ye mwenye undativywa, ela undakala dza mut’u yedzezeruka. ¹⁶ Vino bee mukale k’amumanya mwimwi kukala munga dza hekalu ra Mulungu, na Rohowe unasagala mwenu ndani? ¹⁷ Ndo mut’u abanangaye hekalu ra Mulungu, Mulungu naye undamuhangamiza mut’u yiye kwakukala, hekalu ra Mulungu ni takatifu, na mwimwi ndimwi murio mu hekalure. ¹⁸ Na mut’u naats’idzilembe. Chikala phana mut’u kati yenu adzonaye una hekima phapha duniani, bee ni baha myazo yiyo yimulae mut’u yiye, na adziike dza muzuzu, na ndipho undakala na hekima jeri. ¹⁹ Maana, chirat’u chonewacho ni at’u a chidunia kukala ni hekima, kwa Mulungu ni uzuzu. Na chisha, Maandiko ga Mulungu ganaamba, "Bwana wagwira at’u adzonao ana hekima mo mwao ulachuni." ²⁰ Na chisha, Maandikoge manjine ganaamba, "Bwana unamanya kukala, myazo ya at’u adzonao ana hekima, k’ayina tende." ²¹ - ²² Ndo mut’u naats’ihende ngulu kwa kukala mwanafunzi wa mut’u fulani. Maana, chila mut’u ni wenu. Kala mimi P’aulo, Apolo hebu P’etero, na chila chit’u nacho ni chenu vivyo, kala urumwengu uu, mazagazi na chifo, maneno ga vivi na gadzago, gosi ni genu. ²³ Na mwimwi enye mu at’u a Jeso K’irisito, na Jeso K’irisito naye ni wa Mulungu.

¹ Enehu a chijeso, at’u niamanye kukala, siswi hu ahendikazi a Jeso hurio Mulungu wáhup’a kazi ya kusumurira Nguma Mbidzo ya kutivya yokala p’indi k’ayimanywa. ² Na siswi ohewa kazi yiyo ni kwamba, hunahenzwa huhende kazi yehu kukuluphirika. ³ Ndo ta mwimwi mukanilamula, hebu nikaphirikwa kotini ni mut’u munjine yeyosi, chisha mino gago k’aganiuhusa, na mimi mwenye nami ts’idzilamula. ⁴ Mimi mwenye ninadzona ts’ina kosa rorosi, ela vivyo ts’i kwamba vinaimanisha kukala ts’ina ila jeri kwakukala, Bwana ndiye ye anilamulaye. ⁵ Ndo ts’ilamuleni mut’u yeyosi mwimwi na ukati wa ulamuli k’audzangwe kufika. Bwana achiuya, undakudzang’aza njama zihendwazo dzizani, na garigo myoyoni mwa at’u osi. Na phapho Mulungu naye undamulika chila mumwenga kutuwirizana na vyo arivyo. ⁶ Enehu a chijeso, nidzimwambira maneno gago gosini kwa kudzihadza mimi na Apolo dza mufano, kwa ta mwimwi muyimanye yo maana, ya musemo uu wambao, "Muts’ivuke muphaka wa goandikwa." Na ndo ta naphats’ilairire mut’u kati yenu akahenda ngulu kwa ni mwanafunzi wa mut’u fulani, na phapho amuphurye munjine. ⁷ Mwimwi ts’idzoneni muna tende kuriko anjine, maana, vivi vipaji vyenu vyosi murivyo navyo bee mwáhendaajaliwa navyo ni Mulungu. Ndo kwadze sambi muhende ngulu dza kwamba vyo murivyo navyo, bee ni ut’u outsakula enye, ela ts’i maajaliwa? ⁸ Mwimwi munadzona mudzikomala kare chiroho, ela ujeri ni kwamba k’amudzangwe kamare. Heka mwi munadzona mudzikala kare afalume phots’o siswi? Mimi ninaaza mukale mu afalume jeri, hutawaleni phamwenga! ⁹ Mimi vyangu nonavyo ni kukala, siswi ahumwa a Jeso a widimi hunga dza kwamba Mulungu wáhwika hukale at’u a ts’ini kamare. Siswi hunga dza at’u olamulwa kunyongwa, na at’u na malaika anahulolera dza vinyago. ¹⁰ Siswi hudzikala dza azuzu kwa dzulu ya Jeso K’irisito, ela mwi munadzona muna hekima kare! Hu anyonge siswi, ela mwi ts’imwi enye mikotse vyo! Na at’u anahuphurya, ela mwi ts’imwi mwishimiwao vyo! ¹¹ Siswi ta ukati uu chisha, huna tabu ya chakurya na madzi, hudzimala nguwo, at’u anahupiga, hu at’u a rero hipha, machero hiphara ta k’ahuna nyumba zehu enye, ¹² na hunaturika kuhenda kazi k’omu-k’omu kwa hupate gehu hurigo hunago haja enye. At’u ahulaphizapho, sino hunaavoyera madzo, ahuhenderapho mauku, sino hunavumirira, ¹³ na ahuhadzapho na mai, sino hunagomba nao t’ot’ot’o. At’u phapha duniani anahwona dza vidudu na nongo ta rero. ¹⁴ Enehu a chijeso, gaga nimwandikirago bee ninamwandikira kwa nimufunze dza anangu enye niahenzao, ela ts’i kwamba ninahenza nimutiye waibu. ¹⁵ Maana, ta mukakala na at’u a kumufunza udzumbe dzulu ya Jeso anji dzadze, chisha mwi manyani abayenu wa chiroho ni mumwenga tu. Na mimi ndimi abayenu wa chiroho kwakukala, mwimwi mwámukuluphira Jeso K’irisito kwa yo Nguma Mbidzo yomusumurira mimi. ¹⁶ Ndo anangu a chiroho, ninamuvoya mutuwe mufano wangu. ¹⁷ Gago ndigotuma ta nichimuhuma T’imoti, mwanangu wa chiroho nimuhenzaye, na ni muhendikazi wa Bwana akuluphirikaye, adze kuko kwenu kudzamukumbikiza vyangu nituwavyo mafunzo ga Jeso K’irisito, na gago ndigo nifunzago chila kanisa chila phat’u. ¹⁸ At’u anjine kati yenu anaona dza kwamba ts’indauya kahiri ko kwenu, na ndo ta anadziunula. ¹⁹ Ela Bwana achihenza, nindauya sambi kuko kwenu; na phapho ndipho nindamanya mwenye go gao aidimago kuhenda konyesa kukala, anamukuluphira Jeso K’irisito ao adziunulao, ela ts’i maneno maphuphu tu. ²⁰ Mimi ninaamba vivi kwakukala, Ufalume wa Mulungu ts’i maneno maphuphu, ela ni kukala na widimi. ²¹ Ndo mwimwi tsagulani enye. Munahenza nichidza ko kwenu, nidze chisiru, hebu nidze na kumuhenza na kukala mup’ore kwenu?

¹ Mimi náambirwa kukala, mumwenga wenu unazinga, na kuzinga kuko ni kui muno ta kwa at’u ario ts’i ajeso. Mimi náambirwa kukala, mukuluphiri yiye wátorosa mesomoye! ² Ndo ninamuuza sambi, heka at’u mwi munadziunula chikala mut’u ye ucheri mwenu duuni? At’u mwimwi munawirya mumushononekere mut’u yiye ahendaye gago, na mumutenge. ³ Mimi ta niripho ni kure namwi chimwiri, ela chiroho hu phamwengani. Ndo mimi mut’u yiye wa kuhenda riro neno ii, nidzimulamula kare kwa dzina ra Bwana Jeso una makosa, na ta kalapho ni ko kwenu, chisha ningari kumulamula dza vivi vyodzomulamula. ⁴ - ⁵ Mwimwi namwi murundikanapho kwa dzina ra Bwana, nindakala phamwenga namwi chiroho, na phapho mut’u yiye nimumulavye kwa widimi wa Bwana atawalwe ni Shetani. Kuko zo t’amaaze mbii zindabanangwa kwa ta phanjine Jeso K’irisito achiuya, rohoye ni kutiya. ⁶ At’u mwimwi ts’idziunuleni na mumwenga wenu wázinga! Mimi nina kanuni munamanya kukala, hamira ch’ach’e uchiyitsanganya phamwenga na unga wa nganu daba mwenga, ni kukolea unga wosi. ⁷ Ndo mwimwi mutengeni yiye wa dambi yiriyo dza hamira, ats’idze akamubananga, na phapho mundakala dza mikahe yots’otiywa hamira. Mwimwi mu vivyo kare kwakukala, Jeso K’irisito wálaviwa kare sadaka dza mwanagonzi wa kuusira ts’ikuk’uu ya P’asaka. ⁸ Ndo huusapho yiyi ts’ikuk’uu yehu, nahuyiuseni kwa kusagala mazagazi gamuhamirago Mulungu na kugomba ujeri, garigo ganga mikahe yots’otiywa hamira. Ela ts’i kwa kusagala mazagazi ga dambi na kuhenda mai kwakukala, gago ganga dza mikahe yotiywa hamira. ⁹ Mimi námwandikira kare mwimwi mo mwangu baruwani ya kwanza kukala, muts’igwirikane na azinzi. ¹⁰ Phapho mimi ts’i kwamba námwamba muts’igwirikane na at’u ario ts’i ajeso na anazinga, enye chidzitso, anyang’anyi hebu avoyao milungu ya vinyago, maana, mut’u achihenza kuts’agwirikana nao ao, bee ni ahendeuka kamare phapha duniani. ¹¹ Rangu rokala ninaramba phapho ni kukala, muts’igwirikane na mut’u yeyosi adzambaye ni mujeso, ela kuzinga unazinga, una chidzitso, unavoya milungu ya vinyago, unaasingizira at’u mai, ni munwadzi na ni munyang’anyi. Ndo mukuluphiri muchimumanya u vivyo, bee ta kurya chisha, ts’iryeni naye. ¹² - ¹³ Kala ni kazi ya kulamula at’u ario ts’i ajeso, yiyo ts’i kazi yehu. Ao andalamulwa ni Mulungu mwenye. Ela ano ajeso anziehu ano achihenda gago, nihwalamuleni kwakukala, ta Maandiko ga Mulungu ganaamba, "Mut’u achikala unaenderera kuhenda mai, mulavyeni mwenu duuni."

¹ Enehu a chijeso, mujeso achikala una makosano na mujeso munziwe, gago naagaambire o ajeso anjine gagombwe gasire, ela ts’it’o kwendamushitaki kwa at’u ario ts’i ajeso. ² Mukale k’amumanya mwimwi kukala, siswi ajeso ndiswi ondolamula at’u duniani? Bee, chikala sino ta ndiswi ondolamula at’u duniani, kwadze mushindwe ni kulamula gano maneno madide? ³ Siswi hundalamula ta malaika, na kwakukala, hundalamula ta malaika, huna haki muno ya kulamula ta gaga ga duniani. ⁴ Ndo mujeso akalapho una makosano na mujeso munziwe, gago muts’igaphirike kwendalumbwa ni at’u ario ta ga makanisani k’aagamanya. ⁵ - ⁶ Mimi nina kanuni kamare kukala, kati yenu mwimwi, bee k’aphakosa phana mumwenga ariye unaidima kugagomba ta gakasira maneno dza gago. Ndo mwimwi munadziifya mujeso amushitakipho mujeso munziwe kwa at’u ario ts’i ajeso alamule malau gao. ⁷ Uo ut’u wa kukala munashitakiyana, bee unaonyesa kukala, vivi munashindwa ni kusagala vyo ajeso ahenzwavyo asagale. Ndo mujeso akoswapho na aphokwapho chakwe ni mujeso munziwe, ni baha kuvumirira kuriko kushitakiyana. ⁸ Ela mwi k’amuvumirirana ta munakosana, na kuphokana vit’u mwimwi ajeso na ajeso! ⁹ Bee, ninamukanya mino kukala, at’u ai k’aandaphenya Ufalumeni kwa Mulungu. Ndo muts’idzilembe mukaona kukala, munaidima kuhenda mai na mukendaphenya Ufalumeni kwa Mulungu vivyo! Maana, at’u adiya, avoyao milungu ya vinyago, azembe, ahendanao ache chinyume cha vyopangwa ni Mulungu, ¹⁰ aivi, at’u a chidzitso, anwadzi, asingizirao at’u mai na anyang’anyi, ao osi k’aandaphenya Ufalumeni kwa Mulungu. ¹¹ Anjine kati yenu p’indi ákala a vivyo, ela vino Bwana Jeso K’irisito, na Roho wa Mulungu wehu ámuusira madambi genu tsetsetse, achimutsanganya na Mulungu, na achimuhenda mukale at’u a Mulungu kamare. ¹² Enehu a chijeso, mwimwi muchigomba munaamba, "Siswi huna haki ya kuhenda neno rorosi," ela ninamwambira mino, ts’i gosi gaavizago at’u. Mwimwi munaamba, "Siswi huna haki ya kuhenda neno rorosi," ela nahuts’itawalweni ni chit’u chochosi. ¹³ Na chisha munaamba, "Mulungu wáika ndani yiphokere vyakurya, na vyakurya navyo wáviika viphokerwe ni ndani, na kuna ts’iku yiriyo Mulungu gago undagafunga." Ela vivyo k’aviimanisha mwiri wáikwa ukale wa udiya. Mwimwi ninamuhenza mumanye kukala, mwiri wáikwa kwa umuhikirehikire Bwana, na Bwana wákudza kwa ativye o mwiri. ¹⁴ Mulungu wámufufula Bwana kulaa kuzimu, na undahufufula ta siswi naswi kwa widimiwe. ¹⁵ Vino bee mukale k’amumanya mwimwi kukala, miiri yenu ni vilungo vya mwiri wa Jeso K’irisito? Munaona munaidima kuhwala chilungo cha mwiri wa Jeso K’irisito mukachigwizanya na mwiri wa hawa? Ts’igo kamare gago! ¹⁶ Hebu k’amumanya mut’u agwirikanapho na hawa, chimwiri ni kukala akala amwenga, maana, ta Maandiko ga Mulungu ganasema lwazu-lwazu kukala, "Muche na mulume andakala dza kwamba ni mut’u mumwenga." ¹⁷ Ela agwirikanaye na Bwana, chiroho ni kukala akala amwenga. ¹⁸ Ndo mwimwi richani udiya kamare! Dambi zinjine zosi zihendwazo ni mut’u zinazuru anjine, ela ahendaye udiya bee unauhendera dambi o mwiriwe wenye. ¹⁹ Chila mumwenga wenu mwiriwe ni hekalu ra Roho wa Mulungu. Yiye mwámuhewa ni Mulungu, na unasagala mwenu ndani. Miiri yenu vivi ts’i yenu. ²⁰ Mwimwi mwa Mulungu kwakukala, yiye wámugula na achimuriphira tsetsetse. Ndo mwimwi miiri yenu yihendereni maneno ga kumuhenda Mulungu alikwe.

¹ Enehu a chijeso, vivi nahuuyireni gara genu gokala ga mwenu baruwani yonandikira. Ni vidzo mut’u kuts’ahwala. ² Ela, kwakukala, udiya uhenda muno, chila mulume naakale na muchewe mwenye, na chila muche naye, naakale na mulumewe mwenye. ³ Mulume niamup’e muchewe hakiye, na muche naye niamup’e mulumewe hakiye. ⁴ Maana, mwiri wa muche, mwenye ni mulumewe ela ts’i ye mwenye tu, na mwiri wa mulume nao, mwenye ni ye muchewe ela ts’i ye mwenye tu. ⁵ Alume na ache, mwimwi ts’ilafyaneni chilolwa. Muchikala k’amundakala phamwenga, nimukale mudzihendaerekezana kwa chiwango tu kwa mudzilavye kuvoya. Muchimala gago, munaidima kuuya phenu chilolwani, kwa ta Shetani ats’ipate njira ya kumujezera kwa kuts’aidima kwenu kudzidinisa. ⁶ Mimi ts’i kwamba ninalagiza mulume kuhwala, ela achikala unahenza kuhwala, naahwale. ⁷ Mino ninaaza kala at’u osi anasagala dza mimi; elako, chila mumwenga wáhewa chipajiche ni Mulungu. Mumwenga undamona una chipaji hichi, na munjine una chinjine. ⁸ Ndo ao alume ofererwa ni ache na magungu, nina-aambira mino kukala, ni vidzo ao ats’ihwale hebu kuhwalwa kahiri ta naakale dza mimi. ⁹ Ela achikala ao k’aaidima kudzidinisa, h’aya naahwale hebu ahwalwe, maana, vivyo vina baha kuriko kuyugika na ga ache na ga alume. ¹⁰ Dzulu ya ajeso ohwalana kare, nina amuri vivyo kwao, na amuri yiyo yálaviwa ni Bwana ts’i kwamba ninayilavya mimi. Amuri yenye yinaamba, muche naats’imuriche mulumewe; ¹¹ na ta akamuricha, naats’ihwalwe ni mulume munjine, hebu auye adze aerekezane na mulumewe. Na mulume naye naats’imuriche muchewe vivyo. ¹² Nina amuri vivyo kwa at’u anjine ario áhwalana, na amuri yiyi ninayilavya mimi kwakukala, Bwana k’ayilavire. Ndugu wa chijeso yeyosi achikala una muche ariye ts’i mujeso na ye muche u razi kwenderera kusagala na ye ndugu, ye ndugu naats’imuriche muche yiye. ¹³ Na muchet’u yeyosi ariye ni mujeso achikala naye mulumewe ts’i mujeso na yiye mulume u razi kwenderera kusagala na ye muche, ye muche naats’imuriche mulume yiye. ¹⁴ Mimi nidzamba vivyo kwakukala, mulume ariye ts’i mujeso, utiywa duu ra at’u a Mulungu kwa kugwizanywa na muchewe achikala ni mujeso. Na muche ariye ts’i mujeso naye, utiywa duu ra at’u a Mulungu kwa kugwizanywa na mulumewe achikala ni mujeso. Maneno gaga kala ts’i ga jeri, ana a avyazi ao angari kukala anga dza ana a at’u ario ts’i ajeso, ela vino Mulungu unaatiya kwenye duu ra at’ue. ¹⁵ Ela ta vivyo, mut’u ariye ts’i mujeso achilamula kumuricha ye muyawe ariye ni mujeso, yiye muricheni ende vyakwe, na ye mujeso yendekala urichwa, akale ni mulume hebu ni muche, u tsare kurichana naye, maana, Mulungu wámwiha musagale na reri. ¹⁶ Mumanyadze mwi ache murio mu ajeso kukala, mundaativya alume enu? Na mumanyadze mwi alume murio mu ajeso kukala, mundaativya ache enu? ¹⁷ Enehu a chijeso, chila mut’u naasagale kutuwirizana na vyopangirwa ni Bwana Jeso na vyokala, Mulungu ariphomwiha. Riri ndiro lagizo rangu nifunzaro makanisa gosi. ¹⁸ Ichikala mut’u wáihiwa ni Mulungu achikala ubit’wats’i kare, naats’idzambe k’abit’irwets’i; na ichikala ariphoihiwa ni Mulungu wákala k’abit’irwets’i kwa ni mut’u wa makabila rinjine, naats’ibit’wets’i. ¹⁹ Maana, ra halahala ni mut’u kutuwa malagizo ga Mulungu, ela ts’i ga yuno wábit’wats’i, hebu k’abit’irwets’i. ²⁰ Ndo chila mumwenga naenderere dza arivyokala ts’iku ariphoihiwa ni Mulungu. ²¹ Mut’u achikala phokala unaihiwa ni Mulungu wákala ni mugulwa, nagats’imuyuge gago. Ela, achipata wasaa wa kukala akale tsare, bee nauhumire. ²² Mut’u achiihiwa ni Mulungu amukuluphire Bwana Jeso na ni mugulwa, kwa Bwana u tsare. Na mut’u achiihiwa ni Mulungu na u tsare, kwa ye K’irisito ni mugulwa. ²³ Mwimwi Jeso wámugula na achimuriphira tsetsetse. Kwa vivyo, ts’ikaleni agulwa a mut’u munjine yeyosi. ²⁴ Ndo enehu a chijeso, chila mumwenga mbere za Mulungu naaenderere kusagala dza virat’u vyokala, Mulungu ariphomwiha. ²⁵ Enehu a chijeso, dzulu ya at’u ario k’aadzangwe kuhwala hebu kuhwalwa, Bwana k’alavire amuri, ela nindalavya utumia wangu kwakukala, Bwana wánonera mbazi, na kwa vivyo, ninakuluphirika. ²⁶ Ndo nilolapho zizi ndai zodzanza kare, ninaona ni vidzo mulume kukala kare vyo arivyo. ²⁷ Mut’u achikala wáhwala, naats’imuriche muchewe na achikala k’adzangwe, naats’ihwale. ²⁸ Ela ta niripho nidzamba vivyo, mulume achihwala, k’ahendere dambi, na muche naye achihwalwa, k’ahendere dambi vivyo. Chit’u ni kwamba, mut’u achihwala hebu achihwalwa, undakala na ndai za dziko, na zizo mino ndizo ts’enzi zimupate. ²⁹ Ra halahala nihenzaro murikumbikire enehu a chijeso ni kwamba, ts’iku ya musindikizo wa urumwengu yi phephi na kufika. Ndo at’u ohwala, naats’ililikane go ga madziko gao tu bahi, ³⁰ arirao, naats’ililikane go ga kurira tu bahi, apigao njerejere kwa raha, naats’ililikane go ga raha tu bahi, agulao miyo, naats’ililikane dzulu ya yo miyo yao ayigulayo tu bahi, ³¹ at’u ahumirao miyo ya duniani, naakale dza kwamba k’aahumirire ukati wao wosi kwa miyo yiyo kwakukala, gago gosi gariphochira. ³² Enehu a chijeso, ndo mimi ninamuhenza mwimwi muts’ibagalikire maneno ga dunia. Mujeso mundaka utuwa kubagalikira kazi ya Bwana tu, kwa ta asagale mazagazi gamuhamirago ye Bwana. ³³ Ela mujeso mwenye muche, unabagalikira ta maneno ga dunia nago, kwa amuhamye muchewe, ³⁴ kwa vivyo una mairi gamuryago. Mwanamuche wa chijeso yets’e mulume, hebu ariye k’adzangwe kulala na mulume, utuwa wa kubagalikira kazi ya Bwana tu kwa ta adzilavire tsetsetse kwa Bwana. Ela muchet’u wa chijeso yehwalwa unabagalikira ta maneno ga dunia nago kwa amuhamye mulumewe. ³⁵ Bee enehu a chijeso, mimi nidzimwambira maneno gaga gosi kwa ninahenza nimwavize, ela ts’i kwamba ninamwikira ch’ingamo. Mino chisha, ninamuhenza mwimwi musagale mazagazi gamuhamirago Mulungu, na mudzilavire tsetsetse kwa Bwana tu ta mukale k’amuna manjine. ³⁶ Mut’u achikala unaona go atsumago kumuhendera wendewe ts’i madzo, na ye wendewe unatsakalira phao, na ye unadzisikira kuhwala, u tsare kuhenda vyo vyakwe ahenzavyo. Ndo naamuhwale, na vivyo undakala k’ahendere dambi. ³⁷ Ela ta vivyo, mut’u achamula mwenye na moyowe, na phots’oambwa ni mut’u kukala ats’imuhwale ye wendewe, bee unahendat’o. ³⁸ Ndo mut’u ahwalapho wendewe, unahendat’o, ela yets’emuhwala wendewe, unahendat’o muno. ³⁹ Muche achihwalwa, yiye bee niamanye ye mulumewe ta maisha. Ela mulumewe achifa, ni kukala ukala tsare ta unaidima kuhwalwa ni mulume yeyosi amuhenzaye, bora tu akale ni mujeso ye mulume. ⁴⁰ Ela chiutumia wangu mimi na ta kamare ninaona ninalongozwa ni Roho wa Mulungu ni kukala, muchet’u afererwapho, nikuhats’wa muno ni Mulungu ats’iphohwalwa kahiri.

¹ Enehu a chijeso, dzulu ya kurya nyama odzolaviwa sadaka kwa milungu ya vinyago, ni jeri kukala, siswi hosini hunamanya milungu ya vinyago ni ut’u ots’osoha. Ela kumanya phots’o menzwa ndiko kwahendako at’u akadziunula, ela menzwa ndiyo yiajengayo at’u ta akakomala chiroho. ² Mut’u adzonaye unamanya ut’u tsetsetse ni kukala, k’adzangwe kuumanya vyo ahenzwavyo aumanye ut’u uo. ³ Ela mut’u ahenzaye Mulungu, Mulungu u phamwenga naye. ⁴ Ndo dzulu ya kurya nyama odzolaviwa sadaka kwa milungu ya vinyago, hosini hunamanya kukala, Mulungu wa jeri ni mumwenga tu, na yino milungu ya vinyago ts’i ut’u wenye. ⁵ At’u anjine achigomba anaamba kukala, kuna milungu yikalayo mbinguni na duniani. Ela ta kuripho kuna vit’u vinji vyambwavyo ni milungu na mabwana, ⁶ kwehu siswi, Baba Mulungu ndiye Mulungu wa jeri tu hicheye. Yiye ndiye yeumba vyumbe vyosi, na siswi ndiye ahuhenzaye humuhikirehikire. Na Jeso K’irisito naye, ndiye Bwana hicheye tu. Na vyumbe vyosi vyáumbwa kwa njiraye, na hulola yiye tu mwehu mazagazini. ⁷ Ela ujeri uu wa kukala, milungu ya vinyago ts’i ut’u wenye, k’aumanywa ni at’u osi. At’u anjine ákala abara muno kuvoya milungu ya vinyago na kurya nyama zodzolavirwa yo milungu ya vinyago ta vivi aryapho nyama zizo, anaona anahenda dambi kwa utsanga wao. ⁸ Ela ujeri ni kwamba, chakurya k’achiidima kuhureha phephi na Mulungu. Ndo ta huremapho kurya, vivyo k’avihuphunguzira chit’u mbere za Mulungu, na huryapho, vivyo navyo k’avihwonjezera chit’u vivyo mbereze. ⁹ Ela chit’u nimuhenzacho muchitiye maanani ni kwamba, dzimanyirireni vivyo murivyo tsare kurya chila chit’u muts’idze mukaahenda ajeso ario k’aadzangwe kukomala chiroho, akahenda dambi kwa kurya vyakurya dza vivyo. ¹⁰ Maana, yuyat’u mut’u aonaye kurya nyama zodzolavirwa milungu ya vinyago ni dambi, achikona uwe umanyaye kukala, milungu ya vinyago ts’i ut’u wenye ta unarya phapho phodzolavirwa, undamukalata arye naye. ¹¹ Ndo ahendapho vivyo yuyu mujeso ariye k’adzangwe kukomala chiroho, unahangamika. Na kuhangamikakwe kundakala kurehewa ni ko kumanyako, na yiye bee ni nduguyo wa chijeso ariye Jeso K’irisito wáfa kwa dzuluye. ¹² Mwahenderapho dambi ajeso anzienu na kubananga myazo yao dza vivi, phapho bee mukala munahenda dambi ta kwa Jeso K’irisito. ¹³ Ndo chichikala chakurya chinamutiya dambini mwenehu wa chijeso, mimi bee ts’indarya nyama kahiri ta nife, kwa ta nits’imuhende mwenehu wa chijeso ahende dambi.

¹ Enehu a chijeso, mimi ni tsare. Mimi ni muhumwa wa Jeso K’irisito niriye na widimi. Mimi námona Bwana wehu Jeso K’irisito, na kuko kokoka kwenu, bee ni malairiro ga kukala, Bwana unanihumira kuhenda kaziye. ² Mimi ta niripho kwa at’u anjine ts’i muhumwa wa Jeso niriye na widimi, ela kwenu mwimwi mimi ni muhumwa. Maana, gago mazagazi genu ga kumulola Bwana Jeso, ndigo gang’azago kukala, mimi ni muhumwa wa Jeso niriye na widimi jeri. ³ At’u anipingapho, mimi nidzihehera kwa kwaamba, ⁴ "Mimi nina haki kamare ya kuriswa ni ajeso kwa yo kazi niahenderayo. ⁵ Mimi nina haki ya kutsukula muche wangu wa chijeso mo vyaroni dza ahendavyo ahumwa a Jeso enye widimi asena, nduguze Bwana na P’etero. ⁶ Hebu mino na Barinaba hichiyehu ndiswi hurio nihuhende kazi enye kwa hupate gehu hurigo hunago haja? ⁷ Mwámonaphi mwi shikari ahendaye kazi na mushahara udzimanya mwenye? K’akuna mut’u arimaye na kuphanda matsere, ela ye mwenye akats’agarya. Na k’akuna murisa yets’enwa maziya ga mifugo ayirisayo." ⁸ Maneno gago ts’i kwamba galilikanwa ni adamu hichiyao tu, ela gáandikwa vivyo mo Shariyani. ⁹ Maana, yiyo Shariya ya Musa yinaamba, "Urimapho kw’ekw’e na ng’ombe, uts’izifunge milomo." Ndo, pho munaona Mulungu wákala unalilikana dzulu ya ng’ombe hicheye? ¹⁰ Hakika phapho Mulungu wákala unalilikana dzulu yehu siswi, na riro Andiko ri dzulu yehu. Muphandi na muguwi achihenda kazi yao, naayihende achilolera kupata mutaro wao. ¹¹ Siswi naswi hwáphanda mbeyu za chiroho mwenu myoyoni. Ndo vino bee hukale huchimwamba muhumanye gehu hurigo hunago haja, vikale ni voro vivyo? ¹² Ichikala anjine ana haki ya kulolera kumanywa gau arigo anago haja ni mwimwi, ela sino bee ts’iswi odzohenda muno? Siswi huna haki ya kulolera kumanywa gehu hurigo hunago haja ni mwimwi, ela sino k’ahudzihwalirire hivyo. Its’iphokala hudzivumirira ndai zosi kwa ta huts’ihende chochosi chiidimacho kwahenda at’u ats’ikuluphire Nguma Mbidzo dzulu ya Jeso K’irisito. ¹³ Kwani k’amumanya mwi kukala, makuhani ahendao kazi mo hekaluni mwa Mulungu, apata vyakurya vyao mumo, na achilavya sadaka, anapata mutaro wao wa yo sadaka? ¹⁴ Ndo dza at’u asumurirao Nguma Mbidzo nao, ao Bwana wáalagizira kukala, amanywe gao arigo anago haja ni o at’u aasumurirao yo Nguma Mbidzo. ¹⁵ Ela mino ts’ina ts’iku ta mwenga yenye yomwamba munimanye gangu nirigo ninago haja, na vivi ts’i kwamba nidzimwandikira gago kumwamba munimanye gangu nirigo ninago haja. Mimi ni razi ta kwirika ela nihakikishe kukala, k’akuna mut’u yendenihenda niriche kusumurira Nguma Mbidzo phots’ololera kumanywa gangu nirigo ninago haja, kwakukala, vivyo ninavyo ngulu. ¹⁶ Na ujeri ni kwamba, kusumurira kwangu Nguma Mbidzo, ts’iko kunihendako nihende ngulu. Maana, mino náhendaolohewa ni Mulungu niyisumurire, na nits’iphoyisumurira, Mulungu undanihenda voro. ¹⁷ Kala mimi bee ni náhendatsagula mwenye kuhenda kazi yiyi ya kusumurira Nguma Mbidzo, ningari nina haki ya kulolera kuriphwa. Ela vino, ninayihenda dza mugulwa kwakukala, Mulungu wánoloha niyihende. ¹⁸ Ndo vivi manoso gangu ni; niidime kuyisumurira Nguma Mbidzo phots’ololera kuriphwa, hebu kumanywa gangu nirigo ninago haja, na phapho nindakala ts’iririra haki zangu dza muhumwa wa Jeso K’irisito niriye na widimi. ¹⁹ Ndo mimi P’aulo ni tsare ts’ilola mut’u yeyosi, ela mino ninadziika dza mugulwa wa chila mut’u, kwa ta niativye at’u anji chivyangu niidimavyo. ²⁰ Ndo mimi nákala nichenda kwa Ayahudi asena, ninasagala dza ao asagalavyo kwa niativye. Na ta niripho mimi ts’i ts’ini ya Shariya ya Chiyahudi, ela nákala nichenda kuko, ninatuwiriza yo Shariya kwa niativye. ²¹ Mimi nákala nichenda kwa at’u a makabila manjine ario k’aa ts’ini ya Shariya ya Chiyahudi, nákala ts’iyituwa yo Shariya ya Chiyahudi dza ao kwa niativye. Ela vivyo ts’i kwamba ts’ituwiriza malagizo ga Mulungu, kwakukala, ninatuwiriza malagizo ga Jeso K’irisito. ²² Mimi nákala nichikala ni kati ya at’u ario chiroho ni atsanga, ninadziika dza ao kwa niativye. Ndo nidzituwa-tuwa chila mut’u chivyovyakwe arivyo, kwa anjine niativye chivyovyosi. ²³ Mimi gago gosi ninagahenda kwaviza kugot’eza Nguma Mbidzo, kwa ta nami nipate mutaro wangu wa go manoso garehewago ni yo Nguma Mbidzo. ²⁴ Mimi nina kanuni munamanya kukala, mushindano wa mairo, bee akazao ni anji. Ela achiraye ta akanoswa, ni mumwenga tu. Ndo mwimwi munahenzwa mukaze vya kukala mundachira ta munoswe. ²⁵ At’u osi ashindanao mushindanoni achikala anadzibaza, anahenda chadi muno, na anahenda vivyo kwa achire na anoswe. Ela manoso gago anoswago, k’agaenderera ta kare na kare. Ela sino ajeso hunahenda vivyo kwa huchire, na hunoswe manoso gaendererago ta kare na kare. ²⁶ Ndo mimi ts’idzikazira chibubusa phots’o lengo, na ts’inga dza mut’u wa ngumi, ariye achijeza unakosa kwenda. ²⁷ Ndo mimi vivi ninahenda chadi muno kutuwa go gahenzwago ni roho yangu, kwa ta Mulungu ats’idze akadzanona ts’iwirya kupata manosoge ta niripho náasumurira Nguma Mbidzo at’u anjine.

¹ Ndo ninamukanya kwa kumukumbikiza dzulu ya garat’u goalairira akare ehu okala na Musa. Akare ehu osi álongozwa ni ingu rokala ri vitswani, na osi achendavuka bahari ya Shamu na magulu. ² Ndo kwa gago gosi goalairira, osi achibatizwa dza anafunzi a Musa. ³ Osi árya chakurya chimwenga cholaviwa ni Roho wa Mulungu, ⁴ na osi achinwa madzi mamwenga golaviwa mwambani ni ye Roho wa Mulungu. Na mwamba uo, ni Jeso K’irisito mwenye, yekala chiroho u phamwenga nao. ⁵ Na ta aripho Mulungu wáahendera gago gosi, ela k’ahamirirwe ni anji ao, na achifa hipha na hipha ko nyika. ⁶ Ndo gago gosi goalairira akare ehu, ni mifano ya kuhukanya siswi huts’itamani mai, ⁷ hebu kuvoya milungu ya vinyago dza vyokala anjine ao achihenda. Maandiko ga Mulungu ganaamba vivi dzulu yao, "At’u ao ákala achisagala achirya na kunwa, na chidzako achiunuka achivina chidiya-diya." ⁸ Anjine ao ázinga na achidza áfa at’u helufu mirongo miiri na t’ahu (23,000) mutsana umwenga. Ndo siswi hunahenzwa huts’izinge kamare. ⁹ Siswi k’ahuhenzwa humuheze-heze ye K’irisito dza akare ehu anjine omuheza-heza Mulungu, na achilumwa ni nyoka achifa. ¹⁰ Na ts’inung’unikeni dza akare ehu anjine ohenda vivyo, na achihangamizwa ni malaika muulagi. ¹¹ Ndo maneno gago goapata ao, ni mifano kwa anjine, na gáandikwa kwa ta gahukanye siswi hurio hunasagala ts’iku za phephi na musindikizo wa urumwengu. ¹² Ndo adzonaye wimire kudina mbere za Mulungu, naadzimanyirire ats’idze akagwa. ¹³ Mwimwi nimumanye kukala, majezo gosi gomupata ndigo gaonago at’u. Ela Mulungu unakuluphirika, kwa vivyo k’andahenza mujezwe kuchira mukotse wenu, na ta muchijezwa, undamup’a widimi wa kuvumirira ta mupate njira ya kulaira. ¹⁴ Ndo richani kuvoya milungu ya vinyago kamare enehu a chijeso. ¹⁵ Mwimwi Akorito bee mu at’u na akili zenu. Kwa vivyo, dzilamulireni enye gaga nimwambirago. ¹⁶ Siswi humulavirapho mumvera Mulungu na kunwa divai na chikombe huchihumiracho ukati wa shuhuli ya Bwana, hukala hudzigwirana phamwenga kunufaishwa ni milatso ya Jeso K’irisito. Na huryapho mukahe huumegao-megao ukati wa shuhuli ya Bwana, hukala hudzigwirana phamwenga kunufaishwa ni mwiri wa Jeso K’irisito. ¹⁷ Siswi ta huripho hu anji, ela hu mwiri umwenga, kwakukala, o mukahe ni umwenga, na hosini hurya o mukahe uo. ¹⁸ Hwalani mufano wa Ayahudi. Ayahudi achirya phamwenga sadaka yodzolaviwa chijajani cha kulavira sadaka mo hekaluni mwa Mulungu, ni kukala adzidzigwizanya phamwenga kunufaishwa ni cho chijaja. ¹⁹ Ndo go gangu godzogagomba k’agaimanisha kukala, yo milungu ya vinyago na vyo vyakurya vilavirwavyo vivyo, ni ut’u. ²⁰ Ela rangu nambaro ni kukala, at’u ario ts’i ajeso achilavira sadaka milungu ya vinyago, anagalavira mapepo, ela ts’i Mulungu. Ndo mwimwi ts’enzi kamare mugwirikane phamwenga na mapepo. ²¹ K’aviidimikika mwimwi munwe divai na chikombe muhewacho ni Bwana, na chidzako munwe na chikombe chihumirwacho ukati wa kulavirwa sadaka mapepo. Na k’aviidimikika mwimwi murye meza ya Bwana, na chidzako mwende mukarye meza ya mapepo! ²² Huchihenda vivyo, hunamutiya wivu Bwana. Hebu vino bee nihukale hunadzona huna widimi kumurima Bwana ta huchimutiya wivu k’andahutiya akili? ²³ Enehu a chijeso, mwimwi munaamba, "Huna haki ya kuhenda neno rorosi," ela ninamwambira mino kukala, ts’i gosi gaavizago at’u, na ts’i gosi gajengago at’u. ²⁴ Mut’u niahende ut’u wa kwaaviza ta anzie, ela ts’i wa kumwaviza yiye hicheye tu. ²⁵ Mwimwi mu tsare kugula nyama yoyosi yiguzwayo soko ra nyama phots’ouza ko yilaako, na muchiyirya, yiryeni na moyo umwenga. ²⁶ Maana, Maandiko ga Mulungu ganaamba, "Dunia na vyosi virivyo mo duniani, ni miyo ya Bwana." ²⁷ Na mwimwi muchipigwa karibu ni mut’u ariye ts’i mujeso na muchenda, chondolavirwa, chiryeni phots’ouza ko chilaako. ²⁸ Ela mutsunirwapho kukala, "Nyama zizi zilavirwa sadaka milungu ya vinyago," ts’iziryeni. Maana, muchizirya, yendekala udzimwambira undamona munahenda dambi. ²⁹ Elako, mundakala k’amuhenda dambi, ta its’iphokala, yiye ndiye unaona munahenda dambi. Mwimwi munaidima kwamba, "Bee, kwadze mut’u munjine ahwone hunahenda dambi, na hu tsare kurya nyama yoyosi? ³⁰ Na kwadze at’u ahulaumu na huchikala hunarya vyakurya vyehu hunamulavira mumvera Mulungu?" ³¹ Ela ninamwambira mino, muryapho, hebu munwapho na muhendapho ut’u wowosi, hendani gosi kwa njira zondomup’a nguma Mulungu. ³² Mwimwi sagalani mazagazi garigo k’agandaakwaza Ayahudi, at’u a makabila manjine na ajeso osi, ³³ dza vyo nisagalavyo mimi. Mimi ninahenza nimuhamye chila mut’u na rangu rosi nihendaro, na nihende ut’u wa kwaaviza ta anjine anji, ela ts’i ut’u wa kunaviza mimi hichiyangu tu kwakukala, ninaahenza atiye.

¹ Ndo mwimwi tuwani mufano wangu, dza vyo mimi nituwavyo wa Jeso K’irisito. ² Enehu a chijeso, ninamulika mwimwi kwakukala, munakumbikira mahendo na mafunzo gangu ukati wosi, na munagatuwa go mafunzo gomufunza. ³ Ela ta vivyo, ninamuhenza mumanye kukala, Jeso K’irisito ndiye chilongozi wa chila mulume, mulume ndiye chilongozi wa muchewe, na Mulungu ndiye chilongozi wa Jeso K’irisito. ⁴ Ndo chila mulume avoyaye hebu agombaye udzumbe wa Mulungu na kuno udzidzibinik’iza t’aji, unamuphurya Jeso K’irisito. ⁵ Na chila muche avoyaye hebu agombaye udzumbe wa Mulungu na kuno k’ana chiremba, unamuphurya mulumewe, maana, yiye ni kukala k’ana tafauti na muchet’u yenyolwa chiphala. ⁶ Muchet’u achikala k’andadzifunga chiremba, naanyolwe chiphala. Ela kwakukala, muchet’u achinyolwa chiphala unagwirwa ni haya, ndo naafunge chiremba. ⁷ Mulume naats’idzibinik’ize t’aji kwakukala, yiye Mulungu wámuumba dza vyo arivyo ye mwenye, kwa yiye amwishime ye Mulungu, na muche naadzifunge chiremba, kwa amwishime mulumewe. ⁸ Muche naahende vivyo kwakukala, Mulungu wáhwala mwiri wa mulume achiumbira muche, ela k’ahwalire mwiri wa muche kuumbira mulume. ⁹ Na chisha, mulume k’aumbirwe kwa dzulu ya muche, ela ye muche wáumbwa kwa dzulu ya mulume. ¹⁰ Ndo muche achikala unavoya hebu unagomba udzumbe wa Mulungu, niadzifunge chiremba kwa dzulu ya malaika a Mulungu na kamare konyesa kukala, u ts’ini za mulumewe. ¹¹ Ela kwehu mazagazini ga kumulola Bwana, muche ni wa halahala kwa mulume, na mulume naye ni wa halahala kwa muche. ¹² Maana, muche wa kwanza wáumbwa na mwiri wa mulume, ela chila mulume naye uvyalwa ni muche. Ndo ao osi airi áumbwa ni Mulungu. ¹³ Ndo ninamuhenza mulamule enye kumba ni vidzo muche kumuvoya Mulungu na kuno k’ana chiremba. ¹⁴ Mwimwi ta mulolapho vyo husagalavyo tu, vinahwonyesa lwazu kukala, mulume achikala una vunga, unadziifya. ¹⁵ Ela kwa muche, kunamup’a nguma mbidzo, kwakukala, muche wáhewa nyere nyinji zikale dza chiremba. ¹⁶ Ela achikala mut’u unahenza agahendere k’ani gaga, naamanye kukala, mimi na o ajeso osi, k’ahuhenderana k’ani dzulu ya gago. ¹⁷ Enehu a chijeso, dzulu ya gaga malagizo nimwandikirago vivi, ts’iidima kumulika kamare mwimwi kwakukala, monanapho phamwenga dza kanisa, malairiroge ni kwamba, mai ndigo manji, ela madzo ni machache. ¹⁸ Ra kwanza ni kwamba, mino náambirwa ni at’u kukala, monanapho phamwenga, nikugavika maduu gapinganago, na ninaona gana ujeri goambirwa. ¹⁹ Kala ni mugavikano kati yenu, undakalapho kwa ta ajeri amanyikane. ²⁰ Ndo mwimwi muchonana, enye munaona munarya shuhuli ya Bwana, ela gago ts’igo. ²¹ Maana, uchifika ukati wa kurya, chila mumwenga urya kare chakwe, na malairiroge ni kukala, anjine nikuuka na nzala zao, na anjine akauka a tele! ²² Ndo, vino bee mukale k’amwidima kurya na kunwa kwenu midzini? Hebu ni munaaphurya na kwatiya waibu o ajeso ots’o chit’u? Sambi nimwambedze at’u mwi? Nimulike kwa munahenda gaga? Ng’o ts’iidima kumulika. ²³ Maana, mafunzo golaa kwa Bwana, ndigo nirigomufunza mwimwi, nago ni; usiku okala Bwana Jeso undaonyeswa kwa at’u ai amugwire, wáhwala mukahe ²⁴ na ariphomala kumulavira mumvera Mulungu, achiumega-mega na achamba, "Uu ni mwiri wangu, urio ninaulavya kwa dzulu yenu. Ndo hwalani murye, na kalani muchihenda vivi kunikumbikira." ²⁵ Ariphomala kurya cho chilaliro, achihwala chikombe cha divai na achilavya mumvera kwa Mulungu dza virat’u vyenye vyokala udziulavira o mukahe na achamba, "Chikombe chichi cha divai chinaonyesa Lagano Iphya ra Mulungu na at’u, rihakikishwaro ni milatso yangu. Ndo chila munwapho divai na chikombe chichi, hendani vivyo kunikumbikira." ²⁶ Ndo chila muryapho mukahe na kunwa divai na chikombe chicho ukati wa shuhuli ya Bwana, mukala munasumurira dzulu ya chifo cha Bwana, na vi vivyo ta auye. ²⁷ Ndo chila aryaye mukahe, hebu kunwa divai na chikombe cha Bwana chinyume cha vyo Bwana arivyopanga, una dambi ya kulafula mwiri, na milatso ya Bwana. ²⁸ Ndo ukati wa shuhuli ya Bwana, chila mut’u naanze kuuza moyowe ndipho arye o mukahe, na kunwa divai na chikombe chicho. ²⁹ Maana, aryaye mukahe na kunwa divai na chikombe chicho na k’amanya mwiri wa Bwana nini, unadzitiya lana mwenye. ³⁰ Gago ndigo gatumago ta anji kati yenu ni akongo, anjine ni a nywenywe, na anjine áfa. ³¹ Ela kala ukati wa shuhuli ya Bwana uchifika hunaanza kuuza myoyo yehu mwanzo, k’ahungagwirirwe ni lana. ³² Ela Bwana unahutiya akili kwa huriche kuhenda mai, kwa ta ukati wa musindikizo wa urumwengu, Mulungu ats’idzehulamula phamwenga na at’u a dunia. ³³ Ndo enehu a chijeso, monanapho kwa murye shuhuli ya Bwana, manyanani. ³⁴ Mut’u achikala uhenza arye chitajiri, naarye kwakwe mudzini kwa ta monanapho, muts’ihende maneno garigo gandamuhenda mutiywe akili ni Mulungu. Dzulu ya gano manjine, nindakudzamwambira ukati nichidza.

¹ Enehu a chijeso, mimi vivi ninahenza mumanye ujeri dzulu ya vipaji vya Roho wa Mulungu. ² Mwimwi munamanya kukala, phapho phokala k’amudzangwe kokoka, bee mwákala mudzayuswa ni kuvoya milungu ya vinyago, vit’u virivyo ta k’avigomba. ³ Ndo ta vivi vyookoka, chisha ninahenza mumanye kukala, mut’u achikala unalongozwa ni Roho wa Mulungu, k’aidima kwamba, "Jeso naalaniwe," na mut’u achikala k’alongozwa ni ye Roho, k’aidima kwamba, "Jeso ni Bwana" kulaa mwakwe ndani. ⁴ Kuna aina-aina ya vipaji vilaviwavyo ni Roho wa Mulungu, ela vyosi vilaviwa ni ye Roho wa Mulungu mumwenga. ⁵ Njira za kumuhikirahikira Bwana nazo ni nyinji, ela at’u osi ahikaohikao na zizo, átsagulwa ni ye Bwana mumwenga. ⁶ Na mahendo ga widimi ni manji, ela ni ye Mulungu mumwenga ndiye ye aidimisaye chila mumwenga kuhenda gago gosi. ⁷ Ndo chila yehewa chipaji chilaviwacho ni Roho wa Mulungu, wáhewa kwa a-aavize ajeso anzie. ⁸ Ndo Roho wa Mulungu nikumup’a mut’u hiyu udzumbe wa hekima, na yiye Roho mumwenga akamup’a mut’u munjine udzumbe wa kumanya. ⁹ Yiye Roho wa Mulungu nikumup’a mut’u yuno kuluphiro bomu, na yiye Roho mumwenga vivyo, akamup’a munjine vipaji vya kuphoza. ¹⁰ Munjine nikumup’a widimi wa kuhenda vilinge, na munjine, akamup’a widimi wa kugomba udzumbe wa Mulungu. Munjine nikumup’a widimi wa kutafautisha ga Roho wa Mulungu na garigo ts’i ga Roho. Hiyu nikumup’a chipaji cha kugomba viryomo, na munjine akamup’a chipaji cha kugasema. ¹¹ Na maneno gago gosi, gahendwa ni ye Roho wa Mulungu mumwenga. Yiye ndiye yeamulaye chila mumwenga undamup’a chipaji chani. ¹² Mwiri wa mut’u una vilungo vinji, ela vilungo vyosi vyágwizanywa phamwenga ta ni mwiri umwenga. Ndo ajeso ario ndio mwiri wa Jeso K’irisito nao, a vivyo. ¹³ Maana, siswi hosini, kala Ayahudi, hebu at’u a makabila manjine, agulwa, hebu at’u ario tsare, hwábatizwa na Roho wa Mulungu kwa ta hukale mwiri umwenga, na hosi hwáhewa yiye Roho wa Mulungu mumwenga humunwe. ¹⁴ Ndo mwiri wa mut’u ts’i chilungo chimwenga, ela ni vinji. ¹⁵ Kala lwayo ni kugomba lukaamba, "Kwahivira mimi ts’i mukono, h’a bee ts’i chilungo cha mwiri," chisha vivyo k’avindaluhenda luts’ikale chilungo cha mwiri jeri. ¹⁶ Sikiro naro kala ni kugomba rikaamba, "Kwahivira mimi ts’i dzitso, h’a bee ts’i chilungo cha mwiri," chisha vivyo k’avindarihenda rits’ikale chilungo cha mwiri jeri. ¹⁷ Kala mwiri wa mut’u wosi ni dzitso tu, angari k’asikira. Na kala mwiri wa mut’u wosi ni sikiro tu, angari k’asikira k’ungu. ¹⁸ Ela vino ujeri ni kwamba, Mulungu wápanga chila chilungo mo mwirini dza vyokala udzamula. ¹⁹ Kala mwiri wosi ni chilungo chimwenga tu, bee ungari ts’i mwiri. ²⁰ Ela vino ujeri ni kwamba, mwiri una vilungo vinji, ela vyosi vyágwizanywa, kwa ta vikale mwiri umwenga. ²¹ Ndo dzitso k’ariidima kwamba mukono, "Ts’inawe haja uwe." Na chitswa k’achiidima kwamba nyayo, "Ts’inamwi haja mwimwi." ²² Mwanzo virat’u vilungo vya mwiri huvyonavyo dza kwamba ni vinyonge, ndivyo vya halahala. ²³ Na vilungo vya mwiri virivyo k’aviloleka na vinagwiza haya, ndivyo huvivikavyo nguwo t’ot’ot’o jeri. ²⁴ Ela vilungo virivyo vi matsoni, k’avitsakula kuvikwa nguwo. Ndo Mulungu wágwizanya vilungo ta ni mwiri umwenga, na virat’u vyonewavyo dza kwamba k’avina tende, achivihenda viishimike muno. ²⁵ Mulungu wáhenda vivyo kwa ta vilungo vyosi vya mwiri, vimanyirirane sawa-sawa, ela ts’i kugavikana. ²⁶ Chilungo chimwenga chichiturika, vyo vilungo vinjine vyosi navyo ni kukala vinaturika. Na chilungo chimwenga chichilikwa, vyo vilungo vinjine vyosi navyo, nikuhamirwa dza chicho. ²⁷ Ndo mwimwi mosi mu mwiri wa Jeso K’irisito, na chila mumwenga wenu, ni chilungo cha o mwiriwe. ²⁸ Mulungu mo kanisani chila mut’u wámupangira phat’uphe, ahumwa a Jeso a widimi wáaika a mwanzo, agomvi a Mulungu achiaika a phiri, na alimu achiaika a hahu. Na chisha, Mulungu wáap’a at’u vipaji vya kuhenda vilinge, vipaji vya kuphoza, vipaji vya kwaaviza at’u anjine, vipaji vya ulongozi, na vipaji vya kugomba na viryomo. ²⁹ Ndo mo kanisani, ts’i kwamba chila mut’u ni muhumwa wa widimi wa Jeso, ts’i kwamba chila mut’u ni mugomvi wa Mulungu, ts’i kwamba chila mut’u ni mwalimu, ts’i kwamba chila mut’u unahenda vilinge, ³⁰ ts’i kwamba chila mut’u una widimi wa kuphoza, ts’i kwamba chila mut’u unagomba viryomo, na ts’i kwamba chila mut’u unaidima kugasema go gagombwago na viryomo. ³¹ Mwimwi ririrani muno kupata vipaji vya tende. Ela riri neno nimwandikiraro vivi, ndiro ra halahala muno enehu a chijeso.

¹ Mimi ta nikagomba viryomo vyosi na ta vya malaika, ela nichikala ts’enzi at’u, ninga dza k’ululu za upatsu hebu za k’engele. ² Mimi ta nikakala nina chipaji cha kugomba udzumbe wa Mulungu, ninamanya njama zosi za Mulungu, ninamanya maneno ga chiroho gosi, na nina kuluphiro bomu muno ra kuyamba milima, "Ng’okani," na ying’oke jeri, ela nichikala ts’enzi at’u, mimi ts’i rorosi vivyo. ³ Na ta nikalavya miyo yangu yosi, na o mwiri wangu nao nikaulavya wochwe, chisha nichikala ts’enzi at’u, vivyo k’avindanaviza kamare. ⁴ Ndo mujeso ahenzaye anzie, unaavumirira, na una mbazi nao. Yiye k’ana chidzitso, k’adziunula na k’adzivunya, ⁵ na k’atsowa akili. Mujeso ahenzaye anzie k’aririra ut’u wa kumwaviza yiye hicheye tu, k’atsukirwa maruru, k’ana undu na mut’u, na ⁶ k’ahamirwa ni mai, ela uhamirwa ni ujeri. ⁷ Mujeso ahenzaye anzie ta akakoswa k’agomba, ukati wosi unakuluphira at’u na ulola Mulungu, na ta akahendwadze, chisha ye unavumirira vivyo. ⁸ Menzwa yindaenderera ta kare na kare, ela vipaji vya kugomba udzumbe wa Mulungu, kugomba na viryomo na vya kumanya maneno ga chiroho, vindakala na musindikizo. ⁹ Maana, ta ye wa chipaji cha kumanya maneno ga chiroho, chisha k’amanya gosi, na ye wa chipaji cha kugomba udzumbe wa Mulungu naye k’amanya gosi. ¹⁰ Ela yo ts’iku ya musindikizo wa urumwengu yichifika, hundamanya gosi, na vivi vipaji vindahangamizwa. ¹¹ Mimi niriphokala ni mwanache nákala nigomba chanache, na maazo gangu gákala ga chanache vivyo. Ela niriphokula, ga wanache nágaricha. ¹² Ndo dza siswi naswi, vivi hunaona wiriwiri dza kwamba hunalola na chiloloni chots’oonyesa, ela ukati uo hundakudzahendaona na matso. Vivi k’ahudzangwe kumumanya Mulungu tsetsetse, ela ukati uo, hundakudzamumanya tsetsetse dza vyo ahumanyavyo. ¹³ Kuna maneno mahahu ga halahala nago ni; kuluphiro, lolero na menzwa, ela ra halahala muno kati ya gago, ni yo menzwa.

¹ Ndo enehu a chijeso, ahenzeni anzienu muno, na ririrani kupata vipaji vilaviwavyo ni Roho wa Mulungu, kamwe chipaji cha kugomba udzumbe wa Mulungu. ² Maana, mut’u mwenye chipaji cha kugomba na viryomo, achigomba ukala unagomba na Mulungu ela ts’i anzie, na k’aphana mut’u yendemanya ro agombaro. Yiye ukala unalongozwa ni Roho wa Mulungu kugomba maneno garigo gamanywa ni ye Roho tu. ³ Ela mwenye chipaji cha kugomba udzumbe wa Mulungu achigomba, ukala unagomba na at’u, na nikukala unaajenga, unaatiya moyo na unaangolangola. ⁴ Mut’u agombaye na chiryomo udzijenga yiye mwenye tu, ela agombaye udzumbe wa Mulungu ye, unaajenga ajeso osi. ⁵ Ndo mosi ningehenza mugombe na viryomo, ela nigahenzago muno ni kukala, mukale na chipaji cha kugomba udzumbe wa Mulungu, maana, yuyu ndiye ye aavizaye anzie muno kuchira ye agombaye na viryomo. Mut’u agombaye na viryomo waaviza anzie tu, phachikala phana wa kugasema go agagombago na viryomo. ⁶ Ndo ta mimi nami nichidza kwenu kanisani, na nidze nigombe na viryomo, vivyo k’avindamwaviza na rorosi enehu a chijeso. Kudzamwaviza, ninidze nimwambire maneno gofunulirwa ni Mulungu, hebu udzumbe wa kumanya, hebu udzumbe wa Mulungu, hebu mafunzo. ⁷ Vit’u dza nzumari na ngephephe virivyo vinaimbirwa mira na k’avisoha navyo, mut’u ats’iphovipiga t’ot’ot’o, anjine k’aaidima kumanya wira wimbwao. ⁸ Ukati wa viha nao, filimbi yits’iphopigwa ta yikasikirika t’ot’ot’o, shikari k’aadziika ch’enich’eni. ⁹ Ndo mwimwi namwi muchigomba na muts’ilavukize, go mugagombago k’agandamanywa ni mut’u, na phapho mundakala munagomba na p’eho. ¹⁰ Phapha duniani phana viryomo vinji, ela chila chiryomo, china enye achimanyao. ¹¹ Ela mut’u achigomba chiryomo chiricho ts’ichimanya, kwangu undakala ni mugeryenge, na mimi nami kwakwe nindakala ni mugeryenge vivyo. ¹² Ndo mwimwi namwi vivi muririravyo kupata vipaji vilaviwavyo ni Roho wa Mulungu, ririrani kupata vipaji vya kujenga ajeso anzienu kuriko vinjine. ¹³ Ndo mwenye chipaji cha kugomba na chiryomo, naahende chadi cha kuvoya apate chipaji cha kugasema go agagombago na chiryomo. ¹⁴ Mimi nichivoya na chiryomo, ukala ni ye Roho wa Mulungu ariye mwangu ndani ndiye unavoya, ela akilini k’agamo. ¹⁵ Ndo kwakukala, maneno ga hivi, mimi nindavoya chikawaida, ela ukati unjine Roho achinilongoza kuvoya na chiryomo, nindavoya. Na nindaimba chikawaida, ela Roho achinilongoza kwimba na chiryomo, nindaimba. ¹⁶ Mwimwi muchivoya na viryomo tu, bee ta mukakala munamulavira mumvera Mulungu, ela phapho phachikala phana mut’u ariye k’amanya ga chijeso, mut’u yiye undashindwa ni kwamba, " Amina," kwakukala, undakala k’agamanyire godzovoywa. ¹⁷ Mavoyo genu ga kumulavira mumvera Mulungu munaidima kukala mudzigavoyat’o, ela ta vivyo, k’agandamujenga kamare ye mut’u munjine. ¹⁸ Mimi nina mumvera na Mulungu kwakukala, ninagomba na viryomo muno kuchira mwimwi mosi. ¹⁹ Ela nikalapho nina ajeso asena, nikukala ninahenza nigombe ta kumba ni maneno matsano tu chikawaida kwa ta niajenge anjine, kuriko kugomba maneno ndulu na chiryomo. ²⁰ Enehu a chijeso, mwimwi richani kulilikana chanache. Maazo genu nagakale ga chiut’u uzima, ela dzulu ya kuhenda mai, kalani dza anache. ²¹ Gáandikwa ta Maandikoni ga Mulungu kukala, Mulungu wáamba, "Nindahumira ageryenge kwa nigombe na at’u angu, Nindahumira at’u agombao viryomo vinjine kugomba na at’u angu, ela at’u angu k’aandanisikira vivyo." ²² Ndo kugomba na chiryomo ni dalili kwa ataifa, ela ts’i kwa ajeso. Na kugomba udzumbe wa Mulungu, ni ut’u ujengao ajeso, ela ts’i ataifa. ²³ Ndo ajeso osi akalapho a phamwenga na osi agombe na viryomo, ataifa hebu at’u ots’omanya ga chijeso achidza phapho andaamba anaayuka ao. ²⁴ Ela akalapho osini anagomba udzumbe wa Mulungu na phapho phadze mutaifa hebu mut’u yets’emanya ga chijeso, gondogasikira ganagombwa ni osi, gandamung’azira madambige gosi, gamuhende adzimanye ni mudambi na ²⁵ amanye kukala, njamaze zosi mbii za mwakwe moyoni, zinamanywa ni Mulungu. Phapho mut’u yiye undamit’a mavindi kumwabudu Mulungu na aambe, "Mulungu u phamwenga namwi jeri!" ²⁶ Ndo enehu a chijeso, chila mukalapho mu kanisani, hakikishani genu gosi gondogahenda ni ga kwavizana, na kujengana. Kwa vivyo, mumwenga achikala na p’ambiyo, munjine naakale na ra kufunza. Munjine achikala una ut’u odzofunulirwa ni Mulungu, mumwenga naagombe na chiryomo, na munjine agaseme godzogombwa na chiryomo. ²⁷ Chila mukalapho mu kanisani munavoya, at’u a kugomba na chiryomo naagombe airi hebu ahahu tu, chisha mumwenga-mumwenga, na phakale phana mut’u wa kugasema go gagombwago na chiryomo. ²⁸ Ela phachikala k’aphana mut’u wa chipaji cha kusema go gagombwago na chiryomo, ao agombao na chiryomo naagombe chimoyomoyo tu na Mulungu. ²⁹ At’u enye vipaji vya kugomba udzumbe wa Mulungu nao mukalapho mu kanisani, naagombe airi hebu ahahu tu, na o anjine agalolet’o. ³⁰ Ela mumwenga mo kanisani achifunulirwa ut’u ni Mulungu, yendekala unagomba, naanyamale amuphise yiye agombe. ³¹ Mosi munaidima kugomba udzumbe wa Mulungu, ela naagombe mumwenga-mumwenga, kwa ta chila mut’u agamanye go gafunzwago, na ajengeke. ³² At’u a vipaji vya kugomba udzumbe wa Mulungu anaidima kudzidinisa, ³³ - ³⁴ kwakukala, Mulungu k’enzi huyuganeni, ela unahuhenza hwabuduni chireri. Ache naanyamale dza gahendavyo makanisa gosi. Ao k’aahenzezwa agombe, kwa vivyo, naadziike ts’ini dza vyo yambavyo Shariya. ³⁵ Ao achikala ana ut’u ahenzao aumanye, naauze alume ao, chisha ko kwao midzini, kwakukala, muche kugomba kanisani ni waibu. ³⁶ Mwimwi Akorito nimumanye kukala, neno ra Mulungu k’aranzire kwenu, na k’aridzire ko kwenu mwimwi hichiyenu. ³⁷ Mut’u achikala unadzona ni mugomvi wa Mulungu hebu u chiroho, gaga godzomwandikira undakubali kukala, galaviwa ni Bwana mwenye. ³⁸ Ela yendegarema gago, bee ta mwimwi namwi ts’imutuweni gakwe. ³⁹ Ndo enehu a chijeso, ririrani kupata chipaji cha kugomba udzumbe wa Mulungu, ela ta o a vipaji vya kugomba na viryomo nao, muts’iakahaze. ⁴⁰ Chit’u ni kwamba tu, hendani maneno gosi t’ot’ot’o, chisha na mupangiliyo.

¹ Enehu a chijeso, vivi ninahenza nimukumbikize yiyat’u Nguma Mbidzo niriyomusumurira, namwi muchiyiphokera, na munaenderera kuyikuluphira jeri-jeri. ² Na muchenderera kuyikuluphira jeri-jeri vivyo yiyo Nguma Mbidzo niriyomusumurira, bee yindamutivya. Ela muchituwa manjine, mundakala mwákuluphira bule. ³ Uo udzumbe omusumurira mwimwi, mimi nami náhendauphokera, na una tende muno. Udzumbe wenye ni kukala, Jeso K’irisito wáfa kwa dzulu ya madambi gehu, dza Maandiko gaambavyo. ⁴ Achizikwa, na ts’iku ya hahu achifufulwa kulaa kuzimu dza Maandiko gaambavyo. ⁵ Na udzumbe unaenderera kwamba, yiye wámulairira P’etero, na achidzaalairira anafunzie kumi na airi. ⁶ Ndo chisha, achidzaalairira anafunzie okala achira magana matsano (500) ukati umwenga, na anji ao acheri azima, ela anjine achache áfa. ⁷ Malai ga phapho, wámulairira Jakobo, na chisha achidzaalairira ahumwae osi a widimi. ⁸ Musindikizowe, Jeso K’irisito wánilairira mimi. Na mimi ninga dza mut’u yehendaryomorywa ⁹ kwakukala, kati ya ahumwa a Jeso osi a widimi, mimi ndimi wa ts’ini kamare. Na chisha, ta ts’iwirya kwihiwa muhumwa wa widimi wa Jeso, kwakukala, náahendera mauku at’u a Mulungu. ¹⁰ Ela Mulungu wánonera mbazi vivyo, na ta ts’iwirya, na gago ndigo ganihendago nikale vivi nirivyo. Na gago k’agakalire ga bule, kwakukala, nidzihenda kazi bomu muno kuchira ao ahumwa a Jeso a widimi anjine osi. Ela ta vivyo, yo kazi náyihenda, kwakukala, Mulungu u phamwenga nami, ela ts’iyihendere kwa widimi wangu mwenye tu. ¹¹ Ndo k’avijalisha ukale udzumbe uo náusumurira mimi, hebu o ahumwa a widimi a Jeso anjine, maana, hosini husumurira uo udzumbe umwenga, nao ndio muukuluphirao mwimwi. ¹² Bee k’amona enehu a chijeso, udzumbe huusumurirao siswi ni kwamba, Mulungu wámufufula Jeso K’irisito kulaa kuzimu. Ndo anjine kati yenu aambadze kukala, at’u achifa k’aafufuka? ¹³ Ichikala vyo aambavyo ao ni jeri, bee Mulungu naye k’amufufulire Jeso K’irisito kulaa kuzimu. ¹⁴ Na ichikala Mulungu k’amufufulire Jeso K’irisito kulaa kuzimu, bee uu udzumbe huusumurirao na ko kumukuluphira kwenu Jeso K’irisito nako, bee k’avina maana, yoyosi. ¹⁵ Dzulu ya gago, go gehu gogasumurira, bee gandakala ts’igo gohendwa ni Mulungu, na kwa vivyo, hundakala hu alongo. Maana, sino hwáshuhudiya kukala, Mulungu wámufufula Jeso K’irisito, ambavyo ts’ivyo chikala at’u a kufa k’aafufuka. ¹⁶ Chikala ni ga jeri go ga kwamba at’u achifa k’aafufuka, bee ta ye Mulungu naye k’amufufulire Jeso K’irisito kulaa kuzimu. ¹⁷ Na achikala Mulungu k’amufufulire Jeso K’irisito kulaa kuzimu, ko kumukuluphira kwenu Jeso K’irisito, bee k’akuna maana, yoyosi, na madambi genu k’agadzangwe kusamehewa. ¹⁸ Na chisha, go maneno bee gachikala ga vivyo, bee ta arat’u ofa na kuno anamukuluphira Jeso K’irisito nao áyaya. ¹⁹ Ichikala vyo hukuluphiravyo Jeso K’irisito undahunufaisha, bee ni undahunufaisha na mazagazi gaga hurigo nago kare vivi tu, at’u anawirya kuhushononekera muno kuchira at’u anjine osi phapha duniani. ²⁰ Ela vino maneno k’aga hivyo, ta ujeri ni kwamba, Jeso K’irisito wáfufulwa kulaa kuzimu kwanza, na anjine ario vivi ni afadzi, andatuwiriza. ²¹ Vyo chirivyo chifo chárehewa ni mut’u mumwenga, kufufuka nako kwárehewa ni mut’u mumwenga vivyo. ²² Maana, at’u osini andafa kwa gohendwa ni Adamu, na osini andafufulwa kulaa kuzimu vivyo, kwa gohendwa ni Jeso K’irisito. ²³ Ela ta vivyo, chila mumwenga undafufulwa kutuwirizana na vyopangirwa. Jeso K’irisito wáfufulwa kwanza, na undatuwirizwa ni arat’u ario anamukuluphira ukati achikala unauya kahiri phapha duniani. ²⁴ Gachilairira gago, musindikizo wa urumwengu undafika, na phapho Jeso K’irisito o Ufalumewe undamup’a Baba Mulungu kwa undakala udzigabit’a go mapepo gosi gatawalago, enye vyeo osi na enye widimi osi. ²⁵ Maana, Jeso K’irisito ni seti atawale ta Mulungu aarime adawa osini, na aaike ts’ini za o Ufalume wa Jeso. ²⁶ Na mudawa yendehangamizwa kusindikiza ni chifo. ²⁷ Maandiko ga Mulungu ganaamba kukala, "Mulungu wáika miyo yosi yitawalwe ni yiye." Ela vivyo gaambavyo, "Miyo yosi yáikwa yitawalwe ni yiye," bee vinaonyesa lwazu-lwazu kukala, Mulungu k’amo duu riro kwakukala, yiye ndiye yeika miyo yosi yitawalwe ni Jeso K’irisito. ²⁸ Na miyo yosi yichiikwa ts’ini za utawali wa Jeso K’irisito, ye Jeso K’irisito mwenye naye, ariye ndiye Mwana, undadziika ts’ini za utawali wa Mulungu yeika miyo yosi yitawalwe ni ye Jeso. Ndo phapho Mulungu akale yiye hicheye ndiye mutawali wa chila chit’u. ²⁹ Enehu a chijeso, ninagomba vichache dzulu ya at’u abatizwao kwa dzulu ya afadzi. Ano at’u abatizwao kwa dzulu ya afadzi, aokolani? Ichikala ni ga jeri go ga kwamba at’u achifa k’aafufuka kahiri, chino chitumacho ta at’u anabatizwa kwa dzulu ya afadzi, nini? ³⁰ Na achikala at’u achifa k’aafufuka kahiri, kwadze sino hunadzizinza chila saa? ³¹ Enehu a chijeso, mimi roho rangu ri mukononi chila ts’iku, na gago ni ga jeri kamare dza vyo nirivyo mimi nina ngulu muno kwa go mazagazi genu ga kumulola Jeso K’irisito. ³² Mimi phapha mudzi wa Efeso nidziheha na at’u ario ta anga dza nyama ai. Ndo kalapho ts’ilolera kufufuka nichifa, mimi ts’ingadzizinzire vivyo. Ela achikala at’u achifa k’aafufuka kahiri, h’a bee nahutuweni o musemo wambao, "Nahuryeni na kunwa kwakukala, kufa kunadza." ³³ Richani kulembwa mwimwi. Asena ai ndio abanangao at’u. ³⁴ Ndo vivi lilikanani maneno gago t’ot’ot’o, na muriche kuhenda madambi. Maana, anjine kati yenu k’aamumanya Mulungu, na ndo ninamwambira mino kukala, uo bee ni waibu kwenu! ³⁵ Ela anjine enu andauza aambe, "Mulungu undaafufuladze afadzi? Na ta achifufulwa, yo miiri yao yindakala yi chidzedze?" ³⁶ Bee ninamwambira mino, gago ni maswali ga chizuzu. Vino bee mukale k’amumanya mwimwi kukala, muchiphanda ut’u, yo mbeyu ni seti yole mwanzo ndipho yimere? ³⁷ Mut’u aphandacho ni mbeyu tu, phanjine za nganu, hebu t’embe zinjine, ela ts’i hinyo muhi wenye urio undamera. ³⁸ Ndo yo mbeyu yimerapho, Mulungu nikuyihenda yikale o muhi okala udziupanga kwakukala, ye chila mbeyu unayihenda yimere muhi wa ainaye. ³⁹ Miiri ya vyumbe visohavyo nayo, k’ayi sawa. Miiri ya adamu yi aina mwenga. Miiri ya nyama a magulu mane yi chivyakwe. Nyama a kuburuka, miiri yao yi chilwakwe, na mabeshe nago, miiri yao yi chivinjine. ⁴⁰ Vit’u vya mbinguni, vina umbo, na vyumbe vyosi vya duniani navyo, vina umbo. Udzo wa umbo ra vit’u vya mbinguni, u tafauti na udzo wa umbo ra vyumbe vya duniani. ⁴¹ Udzo wa dzuwa, u chilwakwe. Wa mwezi u chilwakwe, na wa nyenyezi nao u chivinjine, na ta zo nyenyezi kare tu, chila nyenyezi yina udzowe. ⁴² Ndo vivyo ndivyo vyondokala ts’iku Mulungu achifufula afadzi. Virat’u mumanyavyo kukala, mbeyu yichiphandwa ni seti yole ndipho yimere, mwiri uu nao ni seti uzikwe na wole, ndipho ufufulwe, ela ondofufulwa, k’aundafa ta kare na kare. ⁴³ Mwiri uu uchikala unazikwa nikukala k’auhamira mut’u na k’auna rakwe, ela Mulungu achidzaufufula, undakala ni udzo na una mukotse. ⁴⁴ Uzikwapho, nikukala ni mwiri wa phapha duniani tu, ela Mulungu achidzaufufula, undakala ni mwiri wa mulunguni. Kuna mwiri wa phapha duniani, na ni seti kukale na mwiri wa mulunguni. ⁴⁵ Maana, ta Maandiko ga Mulungu ganaamba vivi dzulu ya Adamu, mut’u wa kwanza kukala, "Mulungu wámuumba akale chumbe chisohacho," ela ye wa kusindikiza, achimwika akale Roho alavyaye uzima. ⁴⁶ Ela yelongola ts’i hiye wa mwiri wa mulunguni, ela ni yuyat’u wa mwiri wa phapha duniani, ndo chidzako achidza hiye wa mwiri wa mulunguni. ⁴⁷ Mut’u wa mwanzo, yaani Adamu, wáumbwa na mitsanga phapha duniani. Ela ye wa kusindikiza, yaani Bwana, ni mut’u wa dzulu mulunguni. ⁴⁸ At’u a phapha duniani anga dza yiye yeumbwa na mitsanga ya phapha duniani, na arat’u ondokwenda mulunguni, andakala dza ye wa ko dzulu mulunguni. ⁴⁹ Vivi hunga dza ye mut’u yeumbwa na mitsanga ya phapha duniani kamare, ela hundakudzakala dza ye wa ko dzulu mulunguni kamare. ⁵⁰ Bee enehu a chijeso, rangu nimwambiraro ni kukala, yiyi miiri yehu yiriyo ni nyama na milatso tu na yindaola, k’ayindaidima kuphenya Ufalumeni kwa Mulungu, kuriko k’akola ut’u. ⁵¹ Ela imani nimwambire maneno gokala k’agamanywa ni adamu, ela vivi gang’azwa. Maneno gago ni kwamba, siswi k’ahundasira kufa, ela hosini hundagaluzwa ⁵² maruru dza dzitso riphets’avyo yo ts’iku ya musindikizo, yiriyo gunda rindapigwa. Maana, gunda riro richipigwa, akuluphiri osi ofa andafufulwa kulaa kuzimu, akale na miiri yots’oola, na ondokala a moyo nao, osini agaluzwe akale na miiri ya chivinjine. ⁵³ Maana, yiyi miiri yehu yiriyo yindafa na yole, ni seti yigaluzwe yikale miiri yots’ofa na kola. ⁵⁴ Ndo yiyi miiri yehu yifayo na kola yichigaluzwa ta yichikala k’ayifa kahiri na kola, gandachimira go Maandiko gaambago, "Mulungu, chifo udzichirima kamare." ⁵⁵ "Vidze chifo, kutsomako ku lwaphi? Chifo, widimi wa kulumiza u lwaphi?" ⁵⁶ Chifo chipata widimiwe wa kuulaga, at’u ahendapho dambi, na dambi nayo yihewa widimi ni shariya. ⁵⁷ Ela nahumulavireni mumvera Mulungu ahup’aye ushindi kwa njira ya Bwana wehu Jeso K’irisito. ⁵⁸ Ndo enehu a chijeso nimuhenzao, mwimwi imani kudina jeri muts’iyumbeyumbe. Na dzilavyeni jeri-jeri kuhenda kazi ya Bwana muchimanya kukala, yiyo kazi ya Bwana muyihendayo, bee ts’i ya bule.

¹ Enehu a chijeso, dzulu ya mutsango wa kwaaviza ajeso anziehu ario jimbo ra Judea ni kwamba, ninamwamba muhende dza vyoamba ajeso a jimbo ra Galatiya ahende. ² Vivi chila ts’iku ya kwanza ya juma, chila mumwenga wenu naatanye k’anda p’esa aidimazo kutanya kutuwirizana na patore, na aziike kwa ta nichidza, kuts’ikale na haja ya kuhenda mitsango. ³ Na mimi nichidza, ao ondokala mudziatsagula aphirike mutsango wenu, ninda-aandikira baruwa za kwamanyisa, na niahume Jerusalemu aphirike o mutsango wenu. ⁴ Ela nichona mimi nami ninahenzeka nende, h’a bee nindagwirana nao hwende. ⁵ Mimi nichikala ninadza ko kwenu, nindachira na jimbo ra Makedonia. ⁶ Na ko kwenu nichidza, ninalolera kudzasagala namwi, na ninaidima ta kusagala chirimo chosi cha mwaka. Na nichilaa phapho, mwimwi ndimwi ondonaviza nenderere na charo changu cha kokosi kondokala ninahenzeka nende. ⁷ Mimi ts’enzi kudza vivi kuko kwenu kwakukala, ta nikadza, ninisagale namwi ts’iku ch’ach’e tu, na chidzako nichire. Ndo nichidza chicho charo changu chochipanga, ninalolera kudzasagala namwi ts’iku nyinji Bwana achihenza. ⁸ Vivi ninasagala phapha mudzi wa Efeso ta ts’ikuk’uu ya P’enitekosite yifike. ⁹ Maana, ta aripho at’u anji ananipinga, ela nina ukati udzo wa kuhenda kazi ya Bwana, na malairiroge ni madzo. ¹⁰ T’imoti achidza ko kwenu, hakikishani munamuphokera t’ot’ot’o ta adzitsanzaike zizo ts’iku zosi zondokala namwi kwakukala, yiye unahenda kazi ya Bwana dza mimi. ¹¹ Ndo kuko nakuts’ilairire mut’u kati yenu akamuphurya. Na mwavizeni ta charoche cha kuuya auye na reri kwakukala, ninamulolera adze na ajeso asena anjine. ¹² Dzulu ya mujeso muyawehu Apolo, mimi nidzimulombera muno adze ko kwenu phamwenga na anzie, ela k’ahenzere kamare kudza vivi. Ndo yiye achipata nafasi undakudza. ¹³ Enehu a chijeso, mwimwi dzimanyirireni, endererani kukuluphira jeri-jeri o ujeri ofunzwa, kalani na moyo wa kwenderera, na kazani kukomala chiroho. ¹⁴ Genu gosi mugahendago, gahendeni na kuhenzana. ¹⁵ Mimi nina kanuni munamanya kukala, Sitefana na at’ue ndio at’u a mwanzo oanza kumukuluphira Jeso K’irisito ko jimbo ra Akaya, na achidzilavira tsetsetse kwahikirahikira at’u a Mulungu. Ndo ninamuvoya mwimwi enehu a chijeso, ¹⁶ mwaogophe vilongozi ario anga dza ao, na yeyosi yedzedina kuhenda kazi nao. ¹⁷ Mimi vivi ninahamirwa muno kwakukala, Sitefana, Foritunato na Akaiko ákudza, na niriphoaona, bee nádzisikira dza kwamba nidzimona mwimwi mosi. ¹⁸ Ndo ao adzinijenga dza vyo amujengavyo mwimwi. Ndo aishimeni at’u ario anga dza ao. ¹⁹ Ajeso a jimbo ra Asiya anamulamusa. Akula na muchewe P’irisila, phamwenga na akuluphiri avoyao kwao nyumbani, anamulamusa muno kwa dzina ra Bwana. ²⁰ Enehu a chijeso osi phapha anamulamusa. Mwimwi namwi lamusanani kwa kupigana busu takatifu. ²¹ Mimi P’aulo nami ninamulamusa, na maneno gaga ninagaandika na mukono wangu mwenye. ²² Mut’u yeyosi yets’emuhenza Bwana, naalaniwe ni Mulungu. Bwana naauye maruru! ²³ Bwana Jeso naamuhats’e, na akale namwi ukati wosi. ²⁴ Mimi ninamuhenza mwimwi mosi kwakukala, hosini hunahendwa huhenzaneni ni Jeso K’irisito.