PILIPI

PILIPI

¹ Lɛtɛrɛ ɔn, mu Pɔlu lee, Timɔte lee, emɛ, Kirisito Yesu birɛbirɛnw gɔbe, emɛ tiiuwɔ. Pilipi ana nɛ Ama inɛw mɔɔnu kajubanw gɔbe lee, bei baranw gɔbe lee, inɛw Ama inɛwin wɔin puu, Kirisito Yesu nɛ toin gɔbe lee bɛrɛ emɛ lɛtɛrɛ ɔn tiiuwɔin. ² Ama emɛ Ba lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. ³ Waaru ei mu ajubaajɛ puu, mu Ama mai birɛpoo tagajɔn. ⁴ E wooi puu dɛi, waaru Ama mu gɛɛnjɛ wooi, mu kinɛ ɛɛlu le gɛɛnjɔn. ⁵ Kibɛru Ɛju gɔ taga ga, bai pɔlɔ gɔ nɛ gowaa iye wɛɛ dɔɔ, e mu le bɔɔi biyaabei gɔ dɛi mu Amai birɛpoo tagauwɔn. ⁶ Kɔɔ gin’ mu kijɛ ɔn le tilai gawaa wɔun: Ama kinɛ ebe nɛ birɛ ɛju ɔn tɔlɔnɛ gɔ, Kirisito Yesu bai wɛɛido le, birɛ gɔ kibeido baa, wo birɛ wogɔ birɛnu biyɛdo. ⁷ Kibɛru Ɛju gɔ narain ga jugɔmɔ ga, woi bɔlɔtei ɛju nɛ daana ga pɔɔlɔ mui hɔɔlɔnɛi bee. Nɛɛ kanɛ mui kaju nɛ too. Kaa kaju nɛ mu too gɔ le ma, hɔɔlɔnɛi mu wɔɔ gɔ le ma, e puu, Ama nɛɛma mu bɛrɛ obu gɔ nɛ gamulu ebe biyaabei. Kɔɔ sabu dɛi, e puu sibɛ go ajubu kɔɔ tunmɔ mu siyɛun jaain wɔɔ. Ei kinɛ ma nɛ saii paa wɔun. ⁸ Mu Kirisito Yesu bana ei ibɛ gin’, ihibɛ diyɛ wogɔ le ei ibɛɛ wɔun giyaajɔn ye, mu narain sɔɔjɔn ga Ama igii wɔɔ. ⁹ E dɛi Ama bɛrɛ gɛɛn mu gɛɛnjɛ gɔ unwɔ: Ebaa kijɛ ɛju gɔ yɛmu bɛɛ ga, ihibɛ ebe bariyɛ bariyɛ yaamɔ. Iyaa ihibɛ wogɔ kuu nɛ jugɔ tɔitɔi gɔ lee, paamukanrun kibaai gɔ lee bariyɛmɔ. Kɔɔ gin’ Kirisito bai wɛɛido gɔ le ei ɛjaai biyɛdo, iyaa kijɛ turu nɛ kanran ei jarugu bɛɛmɔidolo. ¹¹ Amai baba dɛi, Ama boi sɔmi biyɛ dɛi, Yesu Kirisito turu sai ɛhɛju tɔitɔi obojɛ gɔ le ei jooi biyɛdo. ¹² Ba unrunw, kijɛ mu bɛrɛ dɔi gɔ, Kibɛru Ɛju gɔi tɛŋɛlu. Kaa woi giru go yaamaabe ga jugi e bii ye ibɛɛ wɔun. ¹³ Kɔɔ gin’, Rɔmɛ ɔgɔnɛ diyɛ ginrun diyɛ dɔmiyɛnw gɔbe puu lee, inɛw wajunw ɔn nɛ wɔin gɔbe puu lee, maa Kirisito birɛbirɛnɛi dɛi kaju nɛ too ga igii wɔin. ¹⁴ Kaju nɛ mu too gɔ dɛi, ba unrunw joo gamuu Inɛw Baŋa nɛ diyɛ daanu bemɛ bariyaa, kɔɔ sabu dɛi be anrangaju bɛɛu, liliyɛ sɛlɛ le Ama sɔɔ tagauwɔin. ¹⁵ Inɛw gamuu kai, ele lee, jai lee mu sibɛ go be sɛɛ dɛi, Kirisito waaju gɔ tagauwɔin. Kaa, inɛw gamuu gɔbe kinɛ ɛju le tagauwɔin. ¹⁶ Be mui ibɛɛ wɔin dɛi kɔɔ gin’ kanraunwɔin. Sabu be, maa sɔɔ sɔɔ dɛi, maa inɛw bɛrɛ Kibɛru Ɛju gɔ narain ga jugɔmɔ dɛi, Ama ɔn nɛ mui tii ga be igii wɔin. ¹⁷ Kaa inɛw gamuu Kirisito waaju gɔ kuu unrunbemɛ kai dɛi tagauwɔin, be kinɛpilu le tagauwɔnɛ. Kɔɔ gin’, ajubu bemɛ nɛ, waaru kaju mu too gɔ le, ɔɲɛ ma bariyɛmu bɛbɛɛdɛin ga wɔin. ¹⁸ Wogɔ gaju turu kanran wɔlɔ. Be kinɛgɛun le birɛɲu ma, kinɛpilu le birɛɲu ma, bana biyaai wooi puu, Kirisito waaju gɔ tagi wɔɔ. Wogɔ dɛi kinɛ ma ɛɛli wɔɔ. Iyaa kinɛ ma kanran ɛɛliyɛmɔnu biyɛdɔn. ¹⁹ Sabu amagɛɛn ebe lee, Yesu Kirisito Kikinu baru gɔ lee digɛu, kijɛ mu bɛrɛ dɔi kɔɔbe wooi yayabu ma sɔɔ le kijɛ digɛi biyɛdo mu igii wɔun. ²⁰ Dɔgɔ mui turu kanran aaidolo ga mu saii diyɛdɔn le dɔmiyaan wɔun. Kaa mu anrangaju gaai sii ye, ɔnmɔ ma le ma, yiun ma le ma, kanɛ goo ye, bai wooi mu dɛi Kirisito boi sɔmi biyɛdo. ²¹ Sabu, mu bɛrɛ kai ɔnmɔ gɔ Kirisitoi, iyaa yiun gɔ tinɛi. ²² Kaa iyaa, mu ɔnmɔi wɔnu birɛ niwɛn sɛɛ birɛ bɛbɛɛdɔn ye, nɛɛ mu kijɛ yɛmɛɲu inɔn. ²³ Mui sibɛ lɛi nɛ biɲiyaan wɔɔ. Yinwaaun ye, Kirisito le biyɛ ga, wogɔ saii daariyaa wɔun, sigɛ le wogɔ ire. ²⁴ Kaa e sabu dɛi, sɔɔ sigɛ le maa gɔ, wogɔ ɔnmɔi bii ma gɔ woi. ²⁵ Mu kɔɔ daii jugaa wɔun dɛi, mu e wooi logoro nɛ bibiyɛdɔn ga igii wɔun. Ebaa Ama oju nɛ giru go yaa ga, ebaa iyaa kinɛ ɛɛlu le biyɛ ga mu bibiyɛdɔn. ²⁶ Kɔɔ gin’, waaru logoro ebe nɛ pilemaa mu wiyaajɛ, e sigɛ le Kirisito Yesu nɛ mu dɛi kuu ebe unɔ bɛbɛɛdei. ²⁷ Sigɛ le, Kirisito Kibɛru Ɛju gɔ le bana sɛgɛrɛjɛ gin’ yoi yaai. Kɔɔ gin’ mu ei yɛnɛi wɛwɛiun ma, logoro ebe nɛ toloun ma biyaai kanran, ebaa sɛɛu ajubu turu nɛ ɛɛn go iŋiyaan, gagawu Kibɛru Ɛju bɛrɛ goojɛ gɔ dɛi tunmɔ le mɔrinyaan jai jaiyɛuwɔi ga mu ɛhɛgɛdɔn. ²⁸ Jaŋuw ebe bɛrɛ ei kijɛ turu nɛ kanran liirɛmɔnɔugi. Wogɔ bei suiyi sɛɛrɛi biyɛdo, kaa iyaa ei yabu sɛɛrɛi biyɛdo. Yayabu wogɔ Ama bɛrɛ goo ye wɛɛdo. ²⁹ Sabu Ama, Kirisito le gawu kuu ɛɛlu sai e bɛrɛ obolu, kaa iyaa wo dɛi ɔɲu kuu ɛɛlu gɔ e bɛrɛ obaabe. ³⁰ Kanɛ jai diyɛ gɔ nɛ e mu le bari bɛbɛɛdei. Wogɔ jai diyɛ pɔɔlɔ baa jaiyɛu mu bee gɔ woi, iyaa bana e igu gin’, iye bai dɔɔ jai jaiyɛu mu gɛlɛ gɔ woi.

¹ Kirisito nɛ pagu turu e wɔɔ gɔ, anrangaju ei ohobojɛ ma? Ihibɛ womɔ kinɛ kaalu ei ohobojɛ ma? E Ama Kikinu le bɔɔi biyaa wɔi ma? E tunmɔ dɛi ihibɛ lee, amasɔgɔjugɔ lee yasin ma? ² Kɔɔ biyaai ye, mu e bɛrɛ gɛɛunwɔ e tunmɔ le ajubu turu le bii ye, ihibɛ turu nɛ bii ye, kinɛ ebe lee, ajubu ebe lee koturu bojo ye, kinɛ ɛɛlu ma kibemɔi. ³ E, kuu ebe kai dɛi ma, kuu ulo tiyɛ sɛlɛ dɛi ma giye, kijɛ turu kanran kanrannɔugi. Kaa e tunmɔ le kuu sunugu le bii ye, inɛ tuturu puu, inɛw wajunw gɔbe wo dɛi ire gin’ lugo. ⁴ Inɛ turu kanran kuu womɔ too tee toonɔu. Kaa inɛw wajunw kijɛ tinɛjɛ kanrain. ⁵ Kirisito Yesu jige sɛbe gɔ, e wogɔ tunmɔ siyɛi. ⁶ Halu wo lee, Ama lee bana koturu bee kanran, wo lee, Ama lee kɛukɛu bee kanran, wo wogɔ kijɛ paju bɛɛmɔɔlɛi ga lugolu. ⁷ Kaa wo kijɛ wo sɛbe puu pajaatiyaa, birɛbirɛnɛ bana jeɲaabe. Wo Adama unrunw gin’ biyaa, inɛ peere le murin unruin tagaraabe. ⁸ Wo kuu unrunmɔ sunugaa, iyaa yiun gɔ baa, baga jai kuu nɛ yai wo yinwɛindo baa, sɔɔ yabanɛi biyaabe. ⁹ Kɔɔ sabu dɛi Ama, alagala nɛ yalu baba wo sigɛ gɔ wo bɛrɛ obaabe. Iyaa boi puu dɛi boi wo sigɛ gɔ wo nɛ kunaabe. ¹⁰ Kɔɔ gin’ alagala nɛ lee, minɛ nɛ lee, minɛ doɲu nɛ lee kijɛ ɔnmɔi wɔin gɔbe puu, Yesu boi sɔmɔ dɛi tutuŋiyɛndɛin. ¹¹ Iyaa Ba Ama boi sɔmi biyɛ dɛi, inɛw wooi Yesu Kirisitoi Inɛw Baŋai ga daii gɛgɛɛdɛin. ¹² Kɔɔ gin’, ba unrunw ibɛ mabe, waaru e le mu bee le e waaru puu sɔɔ ma yabaabei. Nɛɛ, kanɛ e le wagee waaru mu wɔɔ gɔ le sɔɔ ma yabaabei ye sigɛ le wogɔ gaara maa. Yayabu ebe sɛɛu kibaai biyɛ ga, liliyɛ le, goju kinwun le birɛ birɛi. ¹³ Sabu, kijɛ diŋɛ womɔi wɔɔ gɔ ebaa ibɛɛ biyɛ ga, wogɔ kanrun kibemɔɲu gɔnrɔn ei obo ga, Ama, woi kinɛ ebe nɛ birɛ birɛuwɔ. ¹⁴ Aduna ɔn inɛw kakalugunw, inɛw mɔɲu gɔbe logoro nɛ ebaa inɛw jarugu sɛnɛ, inɛw tɛgɛ sɛnɛ, Ama unrunw nɛ lelu tolobei biyɛ ga, kijɛ puu guguun lee, jiiru lee wɔlɔ go kanrain. Be bɛrɛ sɔɔ ɔnmɔ obojɛ gɔ taganu wɔnu, logoro bemɛ nɛ alagala tolobe gin’ e dooroun jaain wɔɔ. E kɔɔ gin’ kanraanjɛi ye, Kirisito bai wɛɛido gɔ le mu e dɛi kuu ma unɔ bɛbɛɛgɔn. Sabu wogɔ birɛ mu biru gɔ lee, ɔɲɛ mu iye gɔbe lee bamai biyɛlu tagarado. ¹⁷ Mui daaɲu kanran, bamai laa biyɛdo. Sabu gagawu ebe gɔ, sadaga Ama bɛrɛ e obojɛ gin’ wɔɔ dɛi, kinrun ma sadaga gɔ sadaga ebe gɔ nɛ bariyɛidoi biyɛdo. Kunrin biyaai ye, kinɛ ma ahaado, mu e puu le bari ye kinɛ ɛhɛɛliyɛmɔdɔn. ¹⁸ E kanran kinɛ ebe aaun jaain wɔɔ, iyaa mu le bari ye kinɛ ɛɛliyɛmɔu jaain wɔɔ. ¹⁹ Kibɛru e bɛrɛ goo ye mu ɛgɛido gɔ le maa kuu ma le anrangaju siyɛ ga, Inɛw Baŋa Yesu diŋɛi biyaai ye, bɛrii Timɔte e bɛrɛ tii bɛbɛɛdɔn diyɛdɔn le wɔun. ²⁰ Woi laa ye inɛ mu gin’ mai ebe sɛɛ wɔlɔ. ²¹ Inɛw wajunw gɔbe puu, kuu unrunbemɛ mai laa ye, Yesu Kirisito le sɔɔ digɛ mai sɛnɛ. ²² Timɔte kai, e jige ɛju womɔ igii wɔi. Sabu wo lee, mu lee, emɛ tunmɔ go Kibɛru Ɛju gɔ waaju tagaabɛin. Aini bana wo bai barajɛ gin’, wo birɛ gɔ nɛ kunrin mui barauwɔ. ²³ Nɛɛ bana mu bɛrɛ biyɛido waaru mu jugaajɛ kɛu, mu woi e bɛrɛ titiidɔn diyɛdɔn le wɔun. ²⁴ Mu iyaa, Inɛw Baŋa nɛ diyɛ ma daanaa, mu kuu ma le bɛrii ei yɛnɛi wɛwɛɛdɔn ga igii wɔun. ²⁵ Emɛ bainɛ Epaporodite, kai ma kilɛ ga inɛ mu bɛrɛ e tii gɔ, birɛbirɛnɛ mu bɔɔnɛi, Kirisito dɛi kɔmɔ tai nɛ mui baranɛi. Kaa nɛɛ, woi e bɛrɛ pilemu ye mu tiiun jaain wɔɔ ga ajubaabɔn. ²⁶ Sabu wo e puui iyi dadaaru le wɔɔ. Iyaa woi jinwaanbe ga e ɛgaabei dɛi, wo ɛjii ajubu le wɔɔ. ²⁷ Narain, woi jinwaanbe, iyaa wo yiun le bɛrii bee. Kaa Ama amasɔgɔ womɔ jugaabe. Amasɔgɔ womɔ sai laa, kaa kinɛ jiun ma kuu nɛ kinɛjiun bariyɛnɔu ga, Ama, amasɔgɔ ma yaa jugaabe. ²⁸ Kɔɔ sabu dɛi mu sigɛ le kinɛ ɔgu le woi e bɛrɛ tii ibɛɛ wɔun. Kɔɔ gin’ waaru woi e iyaajɛ kinɛ ebe ɛhɛɛliyɛdo, kunrin kinɛjiun ma gɔ yaa gagamiyɛndo. ²⁹ E kinɛ ɛɛlu diyɛ le, Inɛw Baŋa nɛ e bainɛ gin’ woi sɛgɛrɛi. E inɛw wo gin’ wɔin gɔbei babai. ³⁰ Sabu Kirisito birɛ gɔ dɛi woi yinwɛndo ga bee. E kuu ebe le mu dɛi kijɛ nɛ mui baru bɛɛidelei e wɔɔ gɔ, wo wogɔ nɛ mui bara ga, kinrun unrunmɔ kunaa nɛwɛnlu.

¹ Ba unrunw mabe, kɔɔ wooi onu nɛ, ei Inɛw Baŋa mɔi dɛi kinɛ ɛɛliyɛmɔi. Kijɛ e bɛrɛ tɔŋaatiyaa mu galu gɔ, wogɔ pilemu taga ga mu bɛrɛ doori laa. Iyaa e bɛrɛ wogɔ ire. ² Inɛw birɛ mɔɲu birɛnw gɔbe, inɛw iju kɔɔbe, inɛw araa nɔɔmɔw tɔitɔi laain kɔɔbe dɛi kuu ebe kajubai. ³ Sabu inɛw araa nɔɔmɔw tɔitɔi gɔbe, inɛw Amai Kikinu womɔ le babanw gɔbe, inɛw Kirisito Yesu dɛi kuu emɛ unɔw gɔbe, iyaa atɛmu sɔɔ nɛ inɛw diyɛ emɛ daanaa sɛnɛ gɔbe emi. ⁴ Kaa mu kanran atɛmu sɔɔ nɛ diyɛ ma daanu bɛbɛɛbɔn. Inɛ turu atɛmu sɔɔ nɛ diyɛ unrunmɔ daanu bɛbɛɛgɔn ga ajubaa yɔɔ ye, mu gaara wogɔ baŋa dɛi sigɛ ajubaun jaan. ⁵ Mui narin bai gagaraye gɔ le mui araa nɔɔmi. Mu ba lee, mu na lee Yahutunwin, mui Bɛnjamɛ tɔgui, mui Heburu tɔgu tɔitɔii. Yahutunw tɔɔru sibɛ go mui Parisiɛin bee. ⁶ Ama dɛi maini sibɛ go mui inɛw Yesu le gawaa wɔiin tɔɔɲɔnɛi bee. Tɔɔru yabu le teitai dɛnu sibɛ go, inɛw, jarugu turu kanran mu nɛ tɛmɛnɛ. ⁷ Kaa pɔɔlɔ kijɛ tinɛ sɛin gin’ mu lugoube gɔbe, kanɛ Kirisito dɛi, kijɛ tinɛ sɛnɛ gin’ lugouwɔn. ⁸ Kijɛ sigɛ le maa gɔ, tiyɛ gɔ Kirisito Yesu, Inɛw Baŋa ma jugɔ gɔ le tunwaan yɛnaajɔn ye, mu kijɛ puu kijɛ tinɛ sɛnɛ gin’ lugouwɔn. Kirisito dɛi, kijɛ kuu ma tee tinɛjɛ gɔ puu pajaatun. Kirisitoi tinɛi gin’ bɛɛ ga, wo le pagu turui biyɛ ga, mu kijɛ puu lɔgɔ gin’ lugouwɔn. Mu waja Tɔɔru yabu ma dɛi mui teitai wɔɔ ajubu siyɛidolɔn. Kaa Kirisito nɛ gagawu mu sɛɛ gɔ dɛi mui teitai wɔɔ. Teitai bii Ama bɛrɛ goojɛ gɔ dɛi, iyaa inɛ gawaa wɔɔ baŋa bɛrɛ teitai bii Ama obojɛ gɔ dɛi mui teitai wɔɔ. ¹⁰ Mu kijɛ turu sai ibɛɛ wɔun. Wogɔ Kirisito lee, bulogu womɔ gɔnrɔn gɔ lee jugu gɔi. Kɔɔ gin’, bana biyaai puu mui kanran yiun nɛ bulo ye goo bɛɛ ga, yiun womɔ nɛ yaa wo le murin bii ye, bana ɔɲɛ wo iye gin’, ɔɲɛ iye ibɛɛ wɔun. ¹² Mu kijɛ dɛi mu goi kanɛ baa biyaajɔn ga wɔlɔn, maa kanɛ baa mui kibaai ga wɔlɔn. Kaa maini ye maa jobu tujɔ gɔ bɛɛ ga, mu jɔbɔuwɔn, sabu Kirisito Yesu wogɔ dɛi mui aa galaai. ¹³ Ai, ba unrunw, mu wogɔ biyaajɔn ga kanɛ baa kole wɔlɔn. Kaa, kijɛ mu kanranjɛ turu yɔɔ: Kijɛ onu ma nɛ wɔɔ naŋaatiyaa ye, mu giru ma nɛ kijɛ wɔɔ gɔi bɛɛdɔn giye mainiyɛnjɔn. ¹⁴ Kɔɔ gin’, Kirisito Yesu le digɛnu, Ama, tujɔ daa go maa bɛɛ ga mui wo boonu gɔi bɛɛ ga, wogɔ onu nɛ jɔbɔuwɔn. ¹⁵ Emɛ, inɛw kikinu sibɛ go inɛw nawin taŋaai gɔbe, emɛ puu ajubu tutunmɔ wogɔ siyɛmɔi. Kaa kɔɔ wooi nɛ, inɛw gamuu logoro ebe nɛ ajubu wajai sɛin biyaai ye, Ama wogɔ ei daii tatagarado. ¹⁶ Bana biyaai wooi puu, emɛ iye bai dɔɔ oju nɛ emɛ too gɔ, wogɔi dimi yaamɔi. ¹⁷ Ba unrunw, e mui deewin biyɛi. Emɛ giretagurui biyaabɛin. Aiwa, giru taguru kɔɔbe bana le kɛukɛu yoi yaanw gɔbe, e bei yɛnɛi. ¹⁸ Sabu mu kubɔ joo e bɛrɛ tagaaginaabɔn, iyaa kanɛ giridii le e bɛrɛ pilemaa sɔɔuwɔn: Inɛw joo yɔɔin, be Kirisito baga jai jaŋuw gin’ yoi yaauwɔin. ¹⁹ Be suiyi oju nɛ toin. Bɛrɛ bemɛ gɔ ama bemɛi biyaai. Be kijɛ dɛi dɔgɔ le be biyɛun jaan gɔ dɛi kuu ulo le wɔin. Iyaa, be aduna ɔn kijɛ ajubu sai le wɔin. ²⁰ Emɛ kai, emi alagala diinɛ unrunwin. Yabanɛ alagala goo ye wɛɛido gɔi emɛ kinɛ ɔgu le dɔmiyaan wɔin. Wogɔ Inɛw Baŋa Yesu Kirisitoi. ²¹ Gɔnrɔn kijɛ wooi unrun le wo tubiyemɔjɛ gɔ le, wo goju peere emɛ gɔ dulomu ye goju doorojɛ womɔ gɔ gin’ bobojodo.

¹ Kɔɔ gin’ ba unrunw ibɛ mabe, inɛw dadaaru le saii mu wɔɔ gɔbe, inɛw dɛi kinɛ ma ɛɛliyaa wɔɔ gɔbe, e inɛw dɛi kuu ma unɔu mu wɔɔ gɔbe, Inɛw Baŋa nɛ ɛɛn go bana iŋiyɛun e jaan kɔɔ woi. ² Ewodi lee, Sintise lee, mu e bɛrɛ gɛɛunwɔ e Inɛw Baŋa nɛ tunmɔ le jamu le biyɛi. ³ U kanran, u birɛbirɛnɛ mu bɔɔnɛ sɔɔ turu baŋa gɔ, uwaa yaanw kɔɔbei bara ga ibɛɛ wɔun, sabu, inɛw bɛrɛ Kibɛru Ɛju waaju gɔ taga ga, be mu le bariyaa jai jaiyaabɛin. Iyaa be birɛ kɔɔ dɛi Kilema lee, inɛw birɛbirɛnw mu bɔɔnw wajabe lee le kanran bariyaabɛin. Inɛw kɔɔbe puu ɔnmɔ dɔn gɔ nɛ boi bemɛ tɔŋi wɔɔ. ⁴ Ei Inɛw Baŋa mɔi dɛi waaru wooi kinɛ ɛɛliyɛmɔi. Mu gimaa sɔɔuwɔn, kinɛ ɛɛliyɛmɔi. ⁵ E inɛw wooi bɛrɛ kinɛ kaalu ebe gɔi jugɔmɔi. Inɛw Baŋa wɛɛgu gɔ bɛrii wɔɔ. ⁶ Kijɛ turu kanran dɛi diyɛdai le biyɛnɔugi. Kaa, kijɛ wooi dɛi, kai e sɛɛ gɔ, gɛɛn nɛ Ama bɛrɛ tagai. Waaru wo bɛrɛ kijɛ e gɛɛnjɛ wooi, woi birɛpoo tagai. ⁷ Kunrin, Ama jamu obojɛ gɔ, inɛw paamukanrun dɛi sigɛ wɔɔ gɔ, kinɛ ebe lee, hakilɛ ebe lee, Kirisito Yesu nɛ sɛɛu gɛgɛliyɛdo. ⁸ Nɛɛ, ba unrunw, sɔɔ dumɔrɔn ma gɔ unwɔ: Kijɛ boi ɛju sɛɛ wooi lee, kijɛ sɔmu wo le dagaa wɔɔ wooi lee, tiyɛ gɔ kijɛ narain wɔɔ baba sɛɛ, teitai wɔɔ, ɛjaa wɔɔ, ɛjii wɔɔ, inɛw wooi kinɛ aajɛ gɔ, e kijɛ kɔɔbe puu ajubu le biyɛi. ⁹ Kijɛ e bɛrɛ mu deeru gɔ lee, mu le e bɛi gɔ lee, kijɛ sɔɔu mu wɔu e ɛgu gɔ lee, kijɛ kanraun mu wɔu e iye gɔ lee kanrain. Kunrin, Ama, jamu obonɛ gɔ e le bibiyɛdo. ¹⁰ Mui Inɛw Baŋa mɔi dɛi kinɛ gaai ɛɛliyɛmɔuwɔn. Sabu waaru joo onu nɛ, e iyaa lee pilemaa mai ma yasin ga kanraan tagaraabei. Ebaa mai ma sii gɔi pajaatiyaabei gɛɛlun, kaa e bana wogɔ tagaraun bɛɛli beei. ¹¹ Kai le wɔun dɛi mu wogɔ gɛɛu wɔlɔn. Sabu kijɛ mu bɛrɛ dɔɔjɛ puu nɛ kinɛ ma aai biyɛ ga mu wogɔ le wɛɛjiyaa wɔun. ¹² Mu dɛgu le bana biyɛɲu igii wɔun, kijɛ joo le bana biyɛɲu igii wɔun. Kijɛ kayaɲu yasɔn ma, giyɛ le wɔun ma, kijɛ joo yasɔn wee, mui baalu wee, yalu wooi nɛ, waaru wooi, mu bana sɛɛu biyɛun jaan deyaa wɔun. ¹³ Kirisito mui paŋa obojɛ gɔ digɛu, mu kijɛ wooi kanrun bɛbɛɛdɔn. ¹⁴ Yinkanran, ɔɲɛ nɛ waaru mu tobe le mui e baru gɔ, wogɔ sɔɔ ɛjui. ¹⁵ Pilipi bɛɛnw, e kuu ebe le bana e igu gin’: Waaru Kibɛru Ɛju gɔ logoro ebe nɛ tagu tɔlin le, Maseduanɛ nɛ gowaa waaru mu yai le, ei laa ye Ama inɛw mɔɔnu mui baru turu kanran wɔlɔ. Ei laa ye, Ama inɛw mɔɔnu turu kanran kɛɛlɛ sin obu mu bɛrɛ obu wɔlɔ. ¹⁶ Kunrin waaru Tesalonike nɛ mu bee le, e kubɔ turu dɛi sigɛ kijɛ kai ma kilɛido mu bɛrɛ tiyaabei. ¹⁷ Mu sin obu ebe tee dɛnɛɛlɔn, kaa kijɛ mu dɛnɛjɛ gɔ, wogɔ Ama, sin obu ebe dɛi ei sigɛ le duba wo kanraindo gɔi. ¹⁸ Kijɛ mu bɛrɛ e tii gɔ puu mu bɛrɛ dɔwaai, wogɔ kai ma dɛi gaa. Epaporodite numɔ nɛ kijɛ kunaa e tii gɔ waaru mu bɛrɛ dɔi le, kijɛ sɛbele mu bee turu kanran bele. Sin obu wogɔbe kijɛ jiɲu ɛjui, sadaga Ama yabaajɛi, wogɔ le kinɛ womɔ aa wɔɔ. ¹⁹ Kirisito Yesu nɛ arusɛgɛ dooro sɛɛ womɔ le kɛukɛu, Ama ma kai ebe wooi kikilɛdo. ²⁰ Boi sɔmu gɔ asuu nasuu Ama emɛ Ba mɔi biyɛmɔ. Amina. ²¹ Ama inɛw, Kirisito Yesu mɔi wɔin gɔbe puu bemaa poo poo wa. Ba unrunw ɔn nɛ mu le wɔin gɔbe ei poonɔuwɔin. ²² Ama inɛw, ɔn nɛ wɔin gɔbe puu ei poonɔuwɔin. Sigiyaa, Rɔmɛ ɔgɔnɛ diyɛ ginrun gonɔ inɛw ei poonɔuwɔin. ²³ Inɛw Baŋa Yesu Kirisito nɛɛma gɔ e le biyɛ.