TESALONIKE LƐIYE

¹ E inɛw Tesalonike ana nɛ Ama inɛw mɔɔnu nɛ toin gɔbe, e emɛ Ba Ama lee, Inɛw Baŋa Yesu Kirisito lee mɔi wɔin gɔbe, mu Pɔlu lee, iyaa Silasu lee, Timɔte lee, emɛ lɛtɛrɛ ɔn e bɛrɛ tɔŋaa tiiuwɔin. ² Ba Ama lee, Inɛw Baŋa Yesu Kirisito lee, e bɛrɛ nɛɛma lee, jamu lee obo. ³ E dɛi, ba unrunw, waaru wooi Amai birɛpoo emɛ tagaun jaain wɔɔ. Kunrin kanran ga jaain wɔɔ. Sabu gagawu ebe gaai bariyɛuwɔ, iyaa e tuturu wooi, tunmɔi ibɛɛ bii ebe bariyɛ bariyɛ yaauwɔ. ⁴ Kɔɔ sabu dɛi Ama inɛw mɔɔnu gɔbe nɛ, emɛ e dɛi kuu emɛ unɔuwɔin. Tɔɔɲɔ lee, ɔɲɛ lee muyaan e wɔɔ gɔbe logoro nɛ bana ɛɛn go iŋiyaan, gawaa e wɔɔ gɔ dɛi emɛ kuu emɛ unɔuwɔin. ⁵ Kɔɔ puu Ama saliyɛ kiru gɔ teitai wɔɔ ga daii tagarajɛ. Dumɔ gɔ, Ama diinɛ, diinɛ dɛi ɔɲɔu e wɔɔ gɔ nɛ yoo ga e le jaain biyɛdo. E diinɛ wogɔ dɛi ɔɲɔuwɔi. ⁶ Ama kijɛ teitai wɔɔ gɔ kakanrando: Wo inɛw ei ɔɲɔmɔw gɔbei ɔhɔɲɔmɔdo. ⁷ E inɛw kanɛ ɔɲaa wɔin gɔbe, Ama kinɛ ebe kakaaliyɛmɔdo, kinɛ emɛ yaa kakaaliyɛmɔdo. Inɛw Ama inin gɔbe, inɛw Inɛw Baŋa emɛ Yesu Kibɛru Ɛju gɔ le yabanɛ gɔbe ɔɲɔmɔ ga, Inɛw Baŋa Yesu, mɛlɛnkɛ paŋagunw womɔbe le, yaun bije nɛ, alagala goo ye waaru unruin wo tagaraido le, Ama kunrin kanrando. ⁹ Ama bei ɔhɔɲɔmɔdo, bei asuu susuyodo. Inɛw Baŋa bei unrun le wagee bobojodo, bei dooro diyɛ unrunmɔ le wagee bojodo. ¹⁰ Inɛw Baŋa bai pilemɛ ye wɛɛido gɔ sɔɔ kɔɔ bibiyɛdo. Waaru pilemaa wo wiyaajɛ, inɛw womɔi wɔin gɔbe woi dedemɛniyɛnmɔdɛin. Inɛw wo le gawaa wɔin gɔbe puu woi bababadɛin. E yaa logoro bemɛ nɛ totoiyodei, sabu e sɔɔ womɔ e bɛrɛ emɛ tagu gɔ le yabaabei. ¹¹ Kɔɔ sabu dɛi, emɛ e dɛi Ama bɛrɛ waaru wooi gɛɛunwɔin. Ɔnmɔ nɛ ei boonaa wo jɛɛlu gɔ e le kijɛ jaain wɔɔi biyɛmɔ ga, womaa gɔnrɔn womɔ le, ɛju kanran ga daariyaa e wɔɔ puu ei kanrun bɛɛmɔ ga, iyaa gagawu ebe birɛ gɔ kibaai biyɛmɔ ga, emɛ wo bɛrɛ gɛɛunwɔin. ¹² Kunrin, Inɛw Baŋa emɛ Yesu boi gɔ e dɛi sɔsɔmɔdɛin, iyaa inɛw kanran wo dɛi boi ebe sɔsɔmɔdɛin. Ama emɛ lee, Inɛw Baŋa Yesu Kirisito lee nɛɛma gɔ dɛi kunrin biyɛdo.

¹ Nɛɛ, ba unrunw, Inɛw Baŋa emɛ Yesu Kirisito wɛɛgu gɔ sɔɔ sibɛ go lee, iyaa emɛ wo le bari ye yalu turu nɛ emɛ mɔrinyɛindo sibɛ go lee kanran, emɛ e bɛrɛ gɛɛunwɔin: ² Inɛ Ama titiyainɛ sɔɔ le digɛnu ma, waaju taganu ma, maa iyaa lɛtɛrɛ emɛ bɛrɛ goi ga gɛɛɲu sɔɔ le digɛnu, Inɛw Baŋa bai gɔ wiyaa dɔwaai giye, hakilɛ ebe ɔgiri bimiliyemɔnɔugi, iyaa kikinu manu le kanran biyɛnɔugi. ³ Inɛ turu kanran bɛrɛ, ei bana inge lei kanran lelemɔnɔugi. Sabu, Ama le murutu kanranw gɔbe wiyaa dɔɔnɛ ye, iyaa Ama jaŋunɛ gɔ, inɛ suiyi dɛi bojaaɲu gɔi tagaranɛ ye, bai diyɛ kɔɔ dɔɔidolo. ⁴ Ama jaŋunɛ kɔɔ, kijɛ amai gɛɛɲu, kijɛ demɛniyɛnmɔɲu puu le jajaiyɛdo. Unruin kijɛ kɔɔbe puu dɛi sigɛ bojodo. Wo unruin Amai giyaa ye, Ama Ginrun Diyɛ gɔ kɔlɔ nɛ baa yoi ye dɛinyɛndo. ⁵ Waaru e le mu bee le, mu sɔɔ kɔɔbe e bɛrɛ tagaabɔn ga e naŋaai ma? ⁶ Kɔɔ wooi nɛ, kijɛ kɔɔbe biyɛnɔu ga kijɛ tɛŋaa sɛɛ gɔ e kanɛ igii wɔi. Kunrin, Ama jaŋunɛ gɔ, waaru womɔ dɔwaai ye unruin tagarado. ⁷ Mɔmɔɲu gɔnrɔn babaŋa gɔ, kanɛ baa birɛ birɛuwɔ. Kaa, inɛ kanɛ woi tɛŋaa sɛɛ gɔ, oju womɔ nɛ goolu ye, kijɛ wɛɛido gɔ biyɛidolo. ⁸ Kɔɔ waaru le Ama jaŋunɛ gɔ tatagaradɛin. Inɛw Baŋa Yesu, aŋa uju unrunmɔ le woi dadaado, wɛɛgu unrunmɔ wijɛ diyɛ le woi susuyodo. ⁹ Ama jaŋunɛ gɔ waaru wɛɛido, wo Setanu gɔnrɔn le wɛɛdo. Wo taanrinyɛn lee, sɛɛrɛ taanrinyɛnbe lee, yarabirɛ lee tɔgu dɛin dɛin inɛ lelemu le wɛɛdo. ¹⁰ Wo, inɛw suiyoidɛin gɔbe, mɔɲu tɔgu dɛin dɛin puu le lelelemɔdo. Be Inɛw Baŋa sɔɔ naran bei yabado ga bee gɔi ibɛi biyɛ ga yabanɛ dɛi bei susuiyodo. ¹¹ Kɔɔ sabu dɛi, Ama, bemaa kakalu gɔ le gawa ga, lelemu paŋa sɛɛ be bɛrɛ tiiuwɔ. ¹² Kunrin inɛw Inɛw Baŋa naran sɔɔ gɔ le gawanɛ kanraan, teitai laa gɔ dɛi kinɛ ɛɛliyɛmɔw gɔbe, Ama be bɛrɛ jarugu duduurɔdo. ¹³ Ba unrunw Inɛw Baŋa ibɛ gɔbe, emɛ kai e dɛi waaru wooi Amai birɛpoo emɛ tagaun jaain wɔɔ, sabu Ama Kikinu gɔnrɔn le ei Ama tɔgu dɛiin bojaaɲu gɔi digɛu, iyaa naran gɔ le gawaa e wɔɔ gɔ digɛu, yayabu gɔ dɛi Ama, tɔlɔgu gɔ le baa ei yɛmaabe. ¹⁴ Sɔɔ kɔɔ dɛi, Kibɛru Ɛju e bɛrɛ emɛ tagu gɔ digɛu, Ama ei boonaabe. Wo, Inɛw Baŋa emɛ Yesu Kirisito dooro gɔ ebaa bɛɛ ga ei boonaabe. ¹⁵ Kɔɔ gin’, ba unrunw e ɛɛn go iŋiyɛin. Iyaa, sɔɔ le ma, lɛtɛrɛ le ma, deeru e bɛrɛ emɛ deeru gɔbei ɛjii gɛliyɛi. ¹⁶ Kunrin, Inɛw Baŋa emɛ Yesu Kirisito, kuu womɔ le, iyaa Ama emɛ Ba gɔ, emi ibɛɛ biyaa, nɛɛma womɔ le kinɛ kaalu sɔgɔjɛ lee, diyɛdɔn ɛju lee emi obu baŋa gɔ, ¹⁷ kinɛ ebe be kaaliyɛmɔ, iyaa, birɛ ɛju wooi lee, sɔɔ ɛju wooi lee kanran ga e bɛrɛ paŋa be obomɔ.

¹ Kɔɔ wooi onu nɛ, ba unrunw, bana logoro ebe nɛ bii gin’ Inɛw Baŋa sɔɔ gɔ ɔgu ginɛ ga, baba siyɛ ga, e, emɛ dɛi Ama gɛɛin. ² Ama womaa inɛw mɔɲube lee, inɛw teitai laain lee numɔ nɛ emi yaba ga, e emɛ dɛi Ama gɛɛin. Sabu inɛw puu gawa ga yabaidenɛ. ³ Kaa Inɛw Baŋa wo sɔɔ turu baŋai. Wo paŋa ei ohobodo, iyaa Mɔɲu kuu baŋa numɔ nɛ ei papaabado. ⁴ Kijɛ ebaa kanran ga emɛ tɔɔru gɔbe, e wogɔbe kanraunwɔi, iyaa wogɔbe kakanrandei ga Inɛw Baŋa nɛ, emɛ e le gawaa wɔin. ⁵ Ama, kinɛ ebe, ihibɛ e dɛi wo sɛɛ sibɛ go lee, Kirisito muyɔn ei obojɛ sibɛ go lee kigelemɔ. ⁶ Ba unrunw, emɛ Inɛw Baŋa Yesu Kirisito boi le e bɛrɛ tɔɔrɔuwɔin, bainɛ aai kanran, wala le biyaa, deeru wo bɛrɛ emɛ obu gɔ le kɛukɛu yoi yaalɛ gɔ, e genɛ womɔ nɛ dɔrɔ gooi. ⁷ Bana emi e deeun dagaa gɔ e kuu ebe le ɛjii igii wɔi. Sabu waaru e le emɛ bee le, emɛ wala walanɛ. ⁸ Emɛ inɛ turu kanran pana tujɔlu go, bamai kayanɛ. Kaa ɔɲɛ lee, birɛ kirɛ lee emɛ iyaabɛin. Emɛ inɛ turu nɛ kanran logoro ebe nɛ dɔɔi biyɛnɔu ga, aga lee digɛ lee birɛ biraabɛin. ⁹ Kunrin emɛ kanrun gɔ, wogɔ emaa e sagi biyɛ ga, e bɛrɛ tɔɔrɔun paŋa sɛnɛ dɛi laa. Kaa ebaa emi deewin biyɛ ga, emɛ emi giru taguru gin’ tagaraabɛin. ¹⁰ Kunrin waaru logoro ebe nɛ emɛ tobe le, emɛ sɔɔ ɔn e bɛrɛ tagaubɛin: Inɛ aai kanran birɛ birɛ ga yabaalɛ ye, pana yaa wo kayaun jaanla. ¹¹ Sabu, inɛw gamuu logoro ebe nɛ wala walawin biyaa, be birɛ birɛɛnɛ, kaa sɔɔ be tolo nɛ aŋa kukunɔɲu ga emɛ ɛgɛuwɔin. ¹² Inɛw Baŋa Yesu Kirisito boi le, emɛ inɛw kɔɔbei tɔɔrɔuwɔin, be bɛrɛ gimaa gɛɛunwɔin: Bemaa sɛɛu birɛ birɛ wa, kuu bemɛ le pana be bɛi gɔ, wogɔ kaya wa. ¹³ Kaa, e kai ba unrunw, e ɛju kanrun nɛ ɔɲɔnɔugi. ¹⁴ Lɛtɛrɛ ɔn nɛ sɔɔ emɛ gi gɔ, inɛ turu wogɔ le yabalu ye, e inɛ wogɔi kajubai. Womaa dɔgɔ iye ga, e wo le mɔrin ye biyɛnɔugi. ¹⁵ Kɔɔ wooi logoro nɛ e woi jaŋunɛ gin’ lugonɔugi. Kaa bainɛ gin’ woi tinwɛnrɛin. ¹⁶ Inɛw Baŋa jamu obonɛ gɔ, yani biyaai kanran, waaru wooi, kuu womɔ le e bɛrɛ jamu obo. Inɛw Baŋa e wooi le biyɛ. ¹⁷ Poo kunu ɔn, mu Pɔlu, numɔ ma le mu tɔŋu. Mu lɛtɛrɛ mabe wooi nɛ boi ma kɔɔ gin’ tɔŋɔuwɔn. Dɔn tɔŋu ma bana gɔ kɔɔ woi. ¹⁸ Inɛw Baŋa emɛ Yesu Kirisito nɛɛma gɔ e wooi le biyɛ.