TIMƆTE PƆLƆ

TIMƆTE PƆLƆ

¹ Mu Pɔlu, Ama emi Yabanɛ gɔ lee, Kirisito Yesu, diyɛdɔn emɛi wɔɔ gɔ lee, tɔɔru mu bɛrɛ be obu gɔ le kɛukɛu, Kirisito Yesu jaŋu ii tiyaaɲui biyaa wɔɔ gɔ, ² mu, u Timɔte, gagawu nɛ ii ma tɔitɔi gɔ, lɛtɛrɛ ɔn u bɛrɛ tiiuwɔn. Ba Ama lee, Kirisito Yesu, Inɛw Baŋa emɛ lee, nɛɛma lee, amasɔgɔjugɔ lee, jamu lee ui obo. ³ Bana waaru Maseduanɛ gana yaa ga oju mu goi le u bɛrɛ mu tɔɔraabe gin’, mu uwaa Epɛse ana nɛ biyɛ ga ibɛɛ wɔun. Inɛw gamuu Epɛse ana nɛ yatoin. Be deeru kakalugu gɔ inɛwin deereuwɔin. Kɔɔ dɛi, mu uwaa Epɛse nɛ bii ye, inɛw kɔɔbei tɛŋɛ ga ibɛɛ wɔun. ⁴ Bei taga, bemaa elumɛ sɔɔ nɛ lee, tirɛ anranw boi digu le digu le, buu, dumɔ sɛlɛ boonu nɛ lee, waaru bemɛ yamalanu biyɛnɔu wa. Sɔɔ kɔɔbe jiiru koolo koolo sai ihingelemɔɲu. Kaa wogɔ, Ama, emɛ dɛi yayabu sɔɔ yegeraa sɛɛ gɔ nɛ giru go emi yaamɔɔlɛ. Yayabu sɔɔ wogɔ emɛ gagawu le jujugɔdɛin. ⁵ Emaa kinɛ hakɛ tolo nɛ lee, kinɛjugɔ jarugu sɛlɛ nɛ lee, gagawu tɔitɔi nɛ lee, ihibɛ goojɛ gɔ le tunmɔi ibɛɛ biyɛ ga, tɔɔru ma kijɛ dɛi mu daanu gɔ kɔɔ woi. ⁶ Inɛw gamuu sɔɔ kɔɔbe le onu dulaatiyaa, be jiiru koolo koolo nɛ manaa toin. ⁷ Be Ama tɔɔru deeru deerewin bii dɛnɛɲu, kaa be kuu bemɛ le sɔɔ be sɔɔjɛ inin, iyaa kijɛ dɛi ɛjii namaa gɛliyaa be sɔɔjɛ gɔ yaa paamau wɔnɛ. ⁸ Nɛɛ Ama tɔɔru gɔ, bana kanraun jaan le kɛukɛu dimiyaanɲu ye, Tɔɔru ɛjui ga emɛ puu igii wɔin. ⁹ Kɔɔ gin’, emɛ sɔɔ ɔn ɛjii paamu kanraun jaain wɔɔ: Tɔɔru kai, inɛ teitai wɔɔ dɛi daananɛ, kaa inɛw kɔkɔlɔmaagunw dɛi lee, inɛw sɔɔ yabaanɛ gɔbe dɛi lee, inɛw Ama babaanɛ gɔbe dɛi lee, inɛw hakɛ kanranw gɔbe dɛi lee, inɛw Ama lee, kijɛ ɛjaa wɔɔ wooi lee babaanɛ gɔbe dɛi lee, inɛw be babe lee, be nabe lee daanw gɔbe dɛi lee, inɛw inɛw daanw gɔbe dɛi lee, ¹⁰ inɛw salagunw gɔbe dɛi lee, anranw anranw be tunmɔ le diinw gɔbe dɛi lee, inɛw gunɔw dɔnrɔnw gɔbe dɛi lee, inɛw kakalumaŋaw gɔbe dɛi lee, sɛɛrɛ kakalu goonw gɔbe dɛi lee, maa inɛ aai kanran deeru nanaa dimiyɛun jaan gin’ inɛ kanraanlɛ gɔ dɛi lee, tɔɔru gɔ daanaaɲu. ¹¹ Deeru nanaa ɔn, Ama mu bɛrɛ Kibɛru Ɛju taga ga tɔɔraabe gɔ le sɛgɛrɛuwɔ. Wogɔ, Ama, duba lee dooro lee baŋa gɔ bɛrɛ gowaa wɛɛ. ¹² Mu inɛ birɛ womɔ dɛi mui paŋa obonɛ gɔ, Kirisito Yesu, Inɛw Baŋa emɛ gɔi birɛpoo tagauwɔn. Mu pɔɔlɔ inɛ Yesu boi yamalanɛi bee gɔ, jaŋu unrunw womɔ tɔɔɲɔnɛi bee gɔ, inɛ gaari bee gɔ, mui inɛ le gawaɲui ga lugaa, birɛ womɔ gɔ dɛi mui wo yɛmu gɔ dɛi, mu woi birɛpoo tagauwɔn. Kaa Ama amasɔgɔ ma jugaabe, sabu mu jugɔlu go, gagawu sɛlɛ dɛi kanraunbɔn. ¹⁴ Kaa nɛɛma Inɛw Baŋa nɛ goojɛ gɔ mu sibɛ go gaai narinyaan, gagawu lee, ihibɛ lee, Kirisito Yesu nɛ bɛɛmɔjɛ gɔ mu bɛrɛ jɛɛlaabe. ¹⁵ Sɔɔ ɔn sɔɔ narain, inɛw puu wogɔ le kinɛpilu le yabaun jaain wɔɔ. Kirisito Yesu, aduna nɛ hakɛ kanranwin yabai wɛi. Logoro bemɛ nɛ hakɛ kanrannɛ yɛmu gɔ mui. ¹⁶ Kaa Ama, amasɔgɔ ma jugaabe. Kunrin, Kirisito Yesu, muyɔn kibaai womɔ tagara ga wo mui hakɛ kanranw logoro nɛ diyɛnɛ gɔ, mu bɛrɛ laa muyɔn womɔ tagaraabe. Wogɔ le digɛnu maa inɛw ɔnmɔsɔgɔ dɛi wo le gawaidɛin gɔbe puu dɛi sɛɛrɛ gin’ biyɛ ga, Ama yabaabe. ¹⁷ Asuu Ɔgɔnɛ, asuu ɔnmɔi wɔɔ gɔ, giri le iyemɔɔlɛ gɔ, Ama wo turu gɔ, baba lee, boi sɔmu lee, asuu nasuu womɔi biyɛmɔ. Amina. ¹⁸ Ii ma Timɔte, waaru galaai gɔ le, inɛw, u dɛi Ama bɛrɛ sɔɔ goi be sɔi gɔbe le kɛukɛu, tinwinrun ɔn ui obouwɔn. Sɔɔ u dɛi sɔin gɔbe ɛjii aa gɛliyaa ye, wogɔ le digɛnu kɔmɔ tai ɛju gɔ taa. ¹⁹ Gagawu gɔ lee, kinɛjugɔ jarugu sɛlɛ lee le biyɛ. Inɛw gamuu kinɛjugɔ jarugu sɛlɛ le bii gɔi pajaatin dɛi, be gagawu sibɛ go dii nɛ piriyaain. ²⁰ Inɛw kunrin kanranw gɔbe logoro nɛ Himɛnɛ lee, Alɛsandere lee yatoin. Bemaa Ama boi yamulu ɛjula jugɔ ga, mu bei Setanu numɔ nɛ kunaabɔn.

¹ Laa gɔ, inɛw puu dɛi amagɛɛn lee, Ama bɛrɛ gɛɛn kunu lee, kai Ama bɛrɛ tagu lee, Amai birɛpoo tagu lee nɛ, inɛw bemaa biyɛ ga mu ui tinwɛnrɛunwɔn. ² Kunrin, emaa jamu lee, iyaa, diyɛ daanaa ye, Ama giri liyɛ nɛ lee, bana jaan gin’ sɔɔ wooi nɛ ɛjii biyɛ ga, ɔgɔnw lee, paŋagunw gɔbe puu lee dɛi Ama bɛrɛ gɛɛn ga, mu tinwinrun obouwɔn. ³ Wogɔ kanran ga Ama emi Yabanɛ gɔ bɛrɛ ɛjii wɔɔ, kinɛ womɔ aauwɔ. ⁴ Wo inɛw puu wa yayabu bɛɛ ga, bemaa naran gɔ jugɔ ga ibɛɛ wɔɔ. ⁵ Sabu Ama koturu sai yɔɔ, iyaa Ama lee, inɛw lee logoro nɛ sɔɔ yegerenɛ koturu sai yɔɔ. Wogɔ, inɛ Kirisito Yesu gɔ woi. ⁶ Wo inɛw wooi dɔrugɔ ga kuu unrunmɔ obaabe. Kunrin wo, Ama, inɛw wooi wa yayabu bɛɛ ga ibɛɛ wɔɔ sɛɛrɛ gɔ, waaru jaan gɔ le tagaraabe. ⁷ Wogɔ sabu dɛi mui waaju taganɛ lee, Yesu jaŋu ii tiyaaɲu lee biyɛ ga bojaaɲu. Mui inɛw Yahutunw tɔgui laain gɔbe dɛi, gagawu lee naran lee jaŋudeerenɛi bojaaɲu. Mu narain sɔɔjɔn, kakalui maŋaalɔn. ⁸ Kunrin iyaa, mu anranw bemaa kinɛ ɛjaai le numɔ daa go dɛɛraa ye, kinɛbanrun siyɛlu go, jiiru wɔlɔ go, yalu wooi nɛ Ama gɛɛn ga ibɛɛ wɔun. ⁹ Kɔɔ gin’ yaanw kanran, sɔi be le dagaa wɔɔ goriyaa ye, baba lee, kuu sunugu lee le bii ye, kuu ɛru sigɛ le ma, kange le ma, dugɔi le ma, sɔi dɔnrun gaa ɛju le ma, saŋa saŋi ye biyɛnɔu. ¹⁰ Kaa yaanw Ama birɛ nɛ toin bana le kɛukɛu, birɛ ɛju be birɛmɔ. ¹¹ Yaanran, deeru wo bɛrɛ deereɲu gɔ, sɔɔ sɔɔlu go, sɔɔ sɛɛu yabaa ye dee. ¹² Mu yaanran womaa deeru deere ma, anranw kuu nɛ paŋa le biyɛ ma ga yabaalɔn. Kaa wo kelemu biyɛun jaain wɔɔ. ¹³ Sabu Adama laa maŋaabɛin, kɔɔ onu nɛ Hawai maŋaabɛin. ¹⁴ Iyaa inɛ dɔburu yabu gɔ Adamai laa, kaa yaanran gɔi dɔburu yabaa, Ama sɔɔ gɔ le yabalu kanrun. ¹⁵ Kɔɔ wooi logoro nɛ, yaanran, gagawu nɛ lee, ihibɛ nɛ lee, ɛjaai bii nɛ lee, kuu sunugu nɛ lee, dumɔ gɔ baa biyaajɛ ye, ii nɔrun dɛi woi yayabadɛin.

¹ Sɔɔ ɔn narain: Inɛ turu Ama inɛw mɔɔnu kajubanɛi bii ibɛɛ wɔɔ ye, wo birɛ ɛjui daaru. ² Nɛɛ, Ama inɛw mɔɔnu kajubanɛ, inɛ jarugu wo le wɔlɔi wo biyɛun jaain wɔɔ. Woi yaanran turu igɛi, inɛ hakilɛ dɛinyaan wɔɔ, kuu kajubu le wɔɔ, inɛ sɔɔ sɛlɛ, ginrun sugo obonɛ, inɛ deeru deeru bɛɛjɛi biyɛun jaan. ³ Woi kɔɲɔnɔɔnɛi ma, inɛ koloi ma biyɛun jaanla. Kaa inɛ kaalu, jai jaiyɛɛlɛ, kɛɛlɛ dɛnɛnɛi laai wo biyɛmɔ. ⁴ Ginrun duu womɔ inɛ kajubaa sɛɛ, inɛ unrunw womɔ baba le sɔɔ womɔ yabawin biyɛmɔ. ⁵ Sabu inɛ ginrun duu unrunmɔ bana gɛliyɛɲu inɛɛ gɔ, kɔɔ baŋa yani Ama inɛw mɔɔnu gɔi gɛli bɛɛdo? ⁶ Ama inɛw mɔɔnu kajubanɛ, inɛ tubu kanai biyɛmɔnɔu. Kɔɔi laa ye, inɛ wogɔ tunmɔ kuu ulo le joo ye bii ye, Ama bana jinrun puu kuu baŋa nɛ jarugu wo duuru gin’, kuu womɔ nɛ yaa jarugu duduurɔdɛin. ⁷ Boi womɔ yanwannɔu ga, iyaa jinrun puu kuu baŋa woi pɛnrɛn unrunmɔ nɛ aanɔu ga, Ama inɛw mɔɔnu kajubanɛ, inɛw jaŋu unrunwin laain gɔbe giru nɛ boi ɛju siyɛun jaain wɔɔ. ⁸ Ama inɛw mɔɔnu kajubanw baranw gɔbe kanran, inɛw jige ɛjui sɛin biyɛun jaain wɔɔ. Bei inɛw aŋa lɛilɛi wɔin ma, inɛw kɔɲɔ gunɔ nɛ toin ma, inɛw nabara le kijɛ dɛnɛwin ma biyɛun jaanla. ⁹ Be kinɛjugɔ jarugu sɛlɛ le gagawu sɔɔ boŋurun jugɔmaaɲu gɔ gɛliyɛun jaain wɔɔ. ¹⁰ Bei yaa suburu yɛnɛu jaain wɔɔ. Kijɛ dagalu turu kanran be le tɛmɛmɔlu ye, kɔɔ onu nɛ birɛ gɔ nɛ bei kunɔ. ¹¹ Iyaa kɔɔ gin’ yaanw bemɛ kanran, yaanw jige ɛju sɛin biyɛun jaain wɔɔ. Inɛw wajunw sɔɔ mɔɲu sɔɔwin biyɛun jaanla. Kaa yaanw hakilɛ dɛinyaan, kijɛ wooi nɛ be le gawu bɛbɛɛmɔjɛ biyɛmɔ. ¹² Ama inɛw mɔɔnu kajubanw baranw gɔbe, yaanran turu igɛi be biyɛmɔ. Unrunw bemɛ lee, ginrun duu bemɛ lee inɛw ɛjii kajubawin be biyɛmɔ. ¹³ Inɛw Ama inɛw mɔɔnu birɛ ɛjii birɛnw gɔbe, baba bɛbɛɛdɛin. Iyaa, Kirisito Yesu nɛ bɔɔi bii emɛ le digɛu gagawu emɛ sɛɛ sɔɔ gɔ, be liliyɛ turu kanran wɔlɔ go, wogɔ sɔɔ sɔɔ bɛbɛɛɲu. ¹⁴ Mu lɛtɛrɛ ɔn u bɛrɛ tɔŋaa tiiuwɔn. Kaa u bɛrɛ bɛrii wɛwɛɛdɔn diyɛdɔn le wɔun. ¹⁵ Nɛɛ, mu u bɛrɛ wiyaa bɛɛlun ye, lɛtɛrɛ ɔn, bana Yesu jaŋu unrunwin emɛ biyɛido u bɛrɛ tatagarado. Emi Ama ginrun gonɔ maranwin, wogɔ Ama asuu ɔnmɔi wɔɔ gɔ inɛw mɔɔnui. Wogɔ tiyɛ gɔ, naran Ama bɛrɛ goojɛ jɛin gɔ lee, bɔlɔtei gɔ lee woi. ¹⁶ Gagawu emɛ sɔɔ boŋurun jugɔmaaɲu gɔ gaai wɔɔ. Inɛ turu kanran wogɔ le jiiru bɛɛidolo. Ama, inɛ taŋaa, unruin tagaraabe. Kikinu Pilu woi teitai wɔɔ ga jugɔmaabe, mɛlɛnkɛbe woi iyaabɛin. Tɔgube logoro nɛ waaju womɔ kunaaɲu. Aduna nɛ wo le gawaabɛin, woi alagala nɛ unaatin.

¹ Ama Kikinu daii sɔwaa gi: «Waaru dumɔ gɔbe le, inɛw gamuu gagawu gɔ papajadɛin. Be kikinu kakalumaŋaw sɔɔ yayabadɛin, iyaa jinrunbe deeru onu nɛ didimiyɛndɛin.» ² Be inɛw aŋa lɛilɛigunw lee, inɛw kakalumaŋaw lee bɛrɛ unrunbei liligijiyemɔdɛin. Inɛw, inɛw ligijiyemɔw wogɔbe, kinɛjugɔ bemɛ yanwaan, hakɛ gunɔ nɛ too. ³ Inɛw kɔɔbe purupagu lee, kijɛ gamuu kayi lee jaanla ga deereuwɔin. Kaa Ama, inɛw gawaa wɔin, naran jugaa wɔin gɔbe bemaa woi birɛpoo tagaatiyaa ye kunrin kaya gi. Ama, kakayɔn kɔɔbe kɔɔ dɛi boju. ⁴ Ama kijɛ maŋu gɔbe puu ɛjii wɔɔ. Kijɛ jumɔɲu turu kanran wɔlɔ. Kaa Amai birɛpoo tagu le kayaun jaain wɔɔ. ⁵ Sabu Ama sɔɔ gɔ lee, amagɛɛn gɔ lee dɛi kakayɔn gɔ ɛjaa wɔɔ. ⁶ U sɔɔ kɔɔbe, ba unrunw bɛrɛ deeraajɛu ye, ui Kirisito Yesu birɛbirɛnɛ ɛjui bibiyɛdo. Ui gagawu le kɔwaaɲu, u deeru ɛju gɔ sɛɛu dimiyaan wɔu ga jujugɔmɔdo. ⁷ Elumɛ tiyɛ sɛlɛ, gagawu sɔɔ le sɛgɛrɛɛlɛ gɔbe paja. Ama giriliyɛ nɛ bariyɛ bariyɛ yaa ga ɛjii mainiyɛn. ⁸ Gojutere le biyɛ ga maini gɔ niwɛn gaila sɛɛ. Kaa kanɛ lee, waaru wɛɛido gɔ lee dɛi, ɔnmɔ pui emɛ bɛrɛ kunaaɲu dɛi, Ama giriliyɛ gɔ kijɛ wooi nɛ niwɛn yasɛ. ⁹ Sɔɔ kɔɔ sɔɔ narain, iyaa inɛw puu wogɔ le sɛɛu yabaun jaain wɔɔ. ¹⁰ Emɛ birɛ birɛuwɔin, jaiyɛuwɔin. Sabu emɛ, Ama ɔnmɔi wɔɔ, Ama inɛw wooi Yabanɛ gɔ, sigiyaa inɛw wo le gawauwɔin gɔbe Yabanɛ gɔ le diyɛ emɛ daanaaɲu. ¹¹ U sɔɔ kɔɔbe inɛw bɛrɛ taga, wogɔbe le bei deere. ¹² Inɛ turu kanran bɛrɛ, uwaa ii dagi giye ui gailiyɛmɔnɔu. Kaa u sɔɔ nɛ lee, bana uwɔ nɛ lee, ihibɛ nɛ lee, gagawu nɛ lee, ɛjaai bii nɛ lee, inɛw gawaa wɔin gɔbe wooi giru nɛ ui giretagurui biyɛmɔ. ¹³ Mu wɛɛido baa, u Ama Dɔn inɛw puu giru nɛ jaŋu nɛ lee, inɛwin mainiyɛnmu nɛ lee, deeru deeru nɛ lee ɛjii kuu kunɔ. ¹⁴ Inɛw, u dɛi Ama bɛrɛ sɔɔ goi be sɔi gɔ le digɛu, waaru inɛw naw kuu uwɔ nɛ numɔ yaŋaraan, Ama gɛɛin gɔ le, Ama uwaa kijɛ kanrun bɛɛ ga, gɔnrɔn u bɛrɛ wo obu gɔ, sin obu wogɔ pajanɔu. ¹⁵ Inɛw puu giru nɛ u mainiyaan, giru go yaauwɔu ga tagara dɛi, u sɔɔ kɔɔbe kanran. Wogɔ nɛ ɛjii kuu uwɔ obo. ¹⁶ U kuu bana uwɔ lee, deeru uwɔ gɔ lee ɛjii kajuba. Sɔɔ wogɔbe nɛ ɛjii mainiyɛn. U kunrin kanraunwɔu ye, kuu uwɔ lee, inɛw sɔɔ uwɔ keŋiyɛnw gɔbe lee yaa yayabadou.

¹ U inɛ pɛii ganwannɔu. Kaa waaru wo le sɔɔ u sɔɔjɛ, u ba gin’ woi lugo. Sagatara unrunw gɔbe u ba unrunw gin’ lugo. ² Yaanw naw gɔbe u nabe gin’ lugo, iyaa yaanw dagunw gɔbe u saabe gin’, manugu ɛju le bei tinwɛnrɛn. ³ Yapanuw tɔitɔi gɔbe baba. ⁴ Kaa yapanunɛ turu, unrunw ma, tirɛ unrunw ma yasɛ ye, gagawu bemɛ gɔ ginrun gonɔ bemɛ nɛ laa be tagaramɔ. Iyaa bei naranw gɔbe sibɛ go kijɛ kanraun jaain be wɔɔ gɔ puu be kanranmɔ. Wogɔ Ama bɛrɛ ɛjii wɔɔ. ⁵ Nɛɛ, yapanunɛ tɔitɔi gɔ, kuu womɔ turu sai wɔɔ gɔ, wo diyɛ womɔ Ama nɛ daanaa sɛɛ. Wo aga lee digɛ lee, Ama womaa unruin bara gɛɛuwɔ, iyaa, wo Ama bɛrɛ gɛɛunwɔ. ⁶ Kaa yapanunɛ yɔgɔrɔ sɔɔ nɛ tee biyɛjɛ gɔ, halu woi ɔnmɔi wɔɔ kanran, kanɛ baa yinwaain. ⁷ Bemaa jarugu le biyɛnɔu ga sɔɔ kɔɔbe bei taga. ⁸ Inɛ wo maranw kai kilɛɛlɛ gɔ, sigɛ le ginrun duu womɔ maranw kai kilɛɛlɛ gɔ, kɔɔbaŋa gagawu oju gɔ pajaati, woi inɛ tubu tolo dɛi mɔɲu. ⁹ Yapanunɛ, anranguju womɔ pɛlukuloi dɔɔlu ye, boi womɔ dɔn nɛ tɔŋɔ kunɔnɔu. Iyaa woi yaanran igɛ kubɔ turu sai ɛyaabei biyɛmɔ. ¹⁰ Woi yaanran birɛ ɛju womɔ dɛi boi ɛju womɔ gowaa wɔɔi biyɛun jaan. Kunrin woi yaanran unrunw ɛjii kɔwaabe ga, yerunwin ɛjii sɛgɛraabe ga, Ama inɛw kubɔ mɔŋaabe ga, inɛw ɔɲɛ nɛ toin gɔbei baraabe ga, womaa birɛ ɛju tɔgu dɛin dɛin biraabe ga sɛɛrɛ ɛju gɔ inɛw wo dɛi gooun jaain wɔɔ. ¹¹ Kaa yapanuw nimɛ pɛɛnɛ gɔbe boi tɔŋɔnɔu. Sabu igɛ ɛi dadaaru bei aa ye, be Kirisito le onu duduloɲu. ¹² Wo le pui pɔlɔ be kunaabe gɔ yamalatiiɲu dɛi, jarugu le bibiyɛdɛin. ¹³ Iyaa kɔɔ kuu nɛ bariyaa, be wala deyaa, ginrun ginrun nɛ gɔgɔŋɔlɔɲu. Wala gɔ dɛi sigɛ, be mɛrun mɛrɛnwin biyɛɲu. Sɔɔ bei tolo nɛ aŋa kukunɔɲu. Kijɛ sɔɔun dagalu sɔɔnu biyɛɲu. ¹⁴ Kɔɔ sabu dɛi yapanuw nimɛ pɛɛnɛ gɔbe bemaa igɛ bemɛ ɛɛ ga mu ibɛɛ wɔun. Bemaa unrunw bɛɛ, ginrun bemɛ kajuba, jaŋuw emɛ bɛrɛ, sɔɔ mɔɲu emɛ dɛi yalu sɔɔɲu turu kanran be obomɔnɔu. ¹⁵ Sabu kanɛ baa gamuu naran oju gɔ pajaatiyaa, Setanu onu nɛ dimiyaain. ¹⁶ Ama inɛw mɔɔnu womaa, yapanuw tɔitɔi gɔbe kai kilɛ dɛi, yaanran jaŋu ii aai kanran, yapanuw yasɛ ye, Ama inɛw mɔɔnu bɛrɛ dɔɔ duurɔnɔu ga, baŋa kai bemɛ kilɛ. ¹⁷ Inɛw naw, Ama inɛw mɔɔnu ɛjii teeremɔw gɔbe, tujɔ bemɛ sɔɔrɔ lɛi be le jaain wɔɔ. Sigɛ le inɛw waaju tagu nɛ lee, jaŋu deeru nɛ lee mainiyɛun wɔin gɔbe bɛrɛ kanraun jaain wɔɔ. ¹⁸ Sabu Ama Dɔn sɔwaa gi: “Naa jiŋu dɛnrɛn kiju namaa ye ii goonɔjɛ aŋa nɛ aŋa pɔin e kunɔu jaanla.” Iyaa gi: “Birɛbirɛnɛ, tujɔ womɔ wo le jaain wɔɔ.” ¹⁹ Inɛw lɛi ma taanu ma sɛɛrɛ goonw wɔlɔ ye, Ama inɛw mɔɔnu inɛ na turu kanran dɛi jarugu yabanɔu. ²⁰ Be logoro nɛ inɛw hakɛ kanranw gɔbe, inɛw wajunw gɔbe bemaa liliyɛ le biyɛ ga, inɛw puu giru nɛ be le sɔɔ. ²¹ Ama lee, Kirisito Yesu lee, mɛlɛnkɛ yɛmaaɲu gɔbe lee giru nɛ u le daii sɔɔuwɔn: Inɛ kabu kunɔlu go, inɛ turu waja dɛi ire bojolu go, u tɔɔru ɔnbe gɛliyɛ. ²² U inɛ turu kanran kuu nɛ ɔgu numɔ yaŋurun ye, Ama inɛw mɔɔnu birɛ nɛ woi kunɔ ga kanrannɔu. Inɛw wajunw hakɛ le mɔrinyɛnnɔu. Ui ɛjaai gɛliyɛ. ²³ U waaru wooi dii saun sai nɔɔnu biyɛnɔu. Kaa bɛrɛ uwɔ sabu dɛi lee, waaru joo jiun ui aajɛ gɔ dɛi lee, u resɛndii ilɛ gaila nɔɔ. ²⁴ Inɛw gamuu, hakɛ bemɛ, saliyɛ kiru baa dɔmiyɛindolo, kanɛ baa ɛlu gowaai. Kaa inɛw gamuu hakɛ gɔ dumɔ nɛ ɛlu goodo. ²⁵ Kɔɔ gin’ birɛ ɛju gɔbe yaa bain nɛ ihiyemɔdo. Iyaa birɛ nimɛ ɛlu goolu gɔbe yaa jaa baŋi biyɛidenɛ.

¹ Jaŋu unrunw gunɔ nɛ toin gɔbe, be baŋabei ɛjii babaun jaain wɔɔ ga be lugomɔ. Inɛ turu kanran Ama boi mɔɲu ma, deeru emɛ sɔɔ mɔɲu ma sɔɔnɔu dɛi, kɔɔ gin’ be kanranmɔ. ² Gunɔw be baŋa gɔbe jaŋu unrunwin wɔin gɔbe, be baŋabe jaŋu unrunw be ba unrunwin dɛi bei gailiyɛmɔu jaanla. Kaa be, be dɛi, sigɛ le ɛjii birɛ birɛun jaain wɔɔ, sabu inɛw birɛ bemɛ niwɛn kayaɲu gɔbe jaŋu unrunw ibɛɛ be wɔi. Kijɛ kɔɔbe bei deere, wogɔbe nɛ bei mainiyɛnmɔ. ³ Inɛ, deeru waja, Inɛw Baŋa emɛ Yesu Kirisito naran sɔɔ gɔ lee, Ama giriliyɛ deeru emɛ gɔ lee deeru dɛin wɔɔ inɛ deerejɛ gɔ, ⁴ inɛ kɔɔbaŋa kuu ulo le jowaa wɔɔ. Wo kijɛ kanma inɛɛ. Kaa wo jiiru kunu dadaaru jiun lee, sɔɔ kuu nɛ jai jaiyɛ dadaaru lee le wɔɔ. Kijɛ kɔɔbe inɛwin tunmɔ le ele le bojojɛ, tunmɔ le jijiiremɔjɛ, duyɔ duyɔmɔjɛ, ajubu mɔɲu tunmɔ dɛi ahajubamɔjɛ. ⁵ Bei inɛw kuu sɛnɛi, naran nanaa inin wɔin, jiiru dumɔ sɛlɛ, tiyɛ sɛlɛ kunɔwin. Ajubu bemɛ nɛ, Ama giriliyɛ gɔ le digɛnu, kɛɛlɛ gaai bɛɛmɔjɛ ga wɔin. ⁶ Nɛɛ, inɛ Ama giriliyɛ gɔ dɛi, kijɛ wo sɛɛ gɔ woi baa wɔɔ ga wɔɔ ye, kɔɔbaŋa bɛrɛ Ama giriliyɛ gɔ arusɛgɛ diyɛi. ⁷ Sabu emɛ aduna nɛ wɛɛu, kijɛ turu kanran le wɛɛnɛ, iyaa waaru aduna nɛ emɛ gooido, kijɛ turu kanran le yaaidenɛ. ⁸ Kaa, emɛ kijɛ kayaɲu lee, kijɛ goriyeɲu lee yasin ye, wogɔ emi baamɔ. ⁹ Kaa inɛw arusɛgɛ joo bɛɛ ibɛin gɔbe, bei subɔrɔ nɛ nunumɔjɛ. Be dadaaru tiyɛ sɛlɛ joo nɛ lee, dadaaru mɔɲu joo nɛ lee pɛnrɛn nɛ yoyooɲu. Wogɔbe inɛi ɔgu mamanamɔjɛ, inɛi susuyojɛ. ¹⁰ Sabu mɔɲu dɛin dɛin bɔlɔduu gɔ, kɛɛlɛ dadaaru gɔ woi. Inɛw gamuu, wogɔ dadaaru ɛjii bei wo aa, gagawu oju gɔ pajaatin. Wogɔ digɛu kinɛjiun diyɛ le wɔin. ¹¹ Kaa u, Ama inɛ gɔ, kijɛ kɔɔbe le wagee biyɛ. U teitai lee, Ama giriliyɛ lee, gagawu lee, ihibɛ lee, muyɔn lee, inɛw le ɛjii bii lee dɛnɛ. ¹² U gɔnrɔn uwɔ wooi le gagawu jobu gɔ jɔbɔ, u kuu uwɔ dɛi ɔnmɔsɔgɔ siyɛ. U gagawu uwɔ aŋa sɛɛrɛ ɛju gɔ, inɛw joo giru nɛ waaru u goi le, ɔnmɔsɔgɔ wogɔ dɛi Ama ui boonaabe. ¹³ Ama kijɛ wooi bɛrɛ ɔnmɔ obonɛ gɔ giru nɛ lee, Kirisito Yesu aŋa sɛɛrɛ ɛju Pɔnse Pilate giru nɛ goonɛ gɔ giru nɛ lee, mu uwaa ¹⁴ tɔɔru e bɛrɛ obin gɔ gɛliyɛ ga tɔɔrɔuwɔn. Inɛw Baŋa emɛ Yesu Kirisito bai kuu unrunmɔ wo tagaraido baa, u wogɔ sɛɛu jarugu wɔlɔ go gɛliyɛ. ¹⁵ Waaru wo kɛjɛido gɔ le, Ama Yesui pilemɛ ye wɛwɛɛmɔdo. Ama, duba baŋa gɔ, kijɛ wooi kuu baŋa gɔ wo turu sai. Woi ɔgɔnw wooi Ɔgɔnɛi, inɛw baŋabe wooi Inɛw Baŋai. ¹⁶ Wo turu sai asuu ɔnmɔi wɔɔ. Wo, wijɛ inɛ turu kanran wogɔ nɛ dɔɔ bɛɛlɛ gɔ nɛ too, inɛ turu kanran woi iyetɛlu, woi iye bɛɛlɛ. Baba lee, gɔnrɔn asuu dogoolɛ gɔ lee womɔi. Amina. ¹⁷ Aduna ɔn kijɛ nɛ inɛw ɔgɔ unrunwin wɔin gɔbe bemaa kuu ulo le biyɛnɔu wa. Bemaa arusɛgɛ kijɛ sɔgɔjɛi laa dɛi, diyɛ bemɛ arusɛgɛ gɔbe kuu nɛ daananɔu wa. Kaa Ama, emaa kinɛ emɛ ɛɛliyɛmɔ ga, emɛ bɛrɛ kijɛ wooi gaai obojɛ gɔ nɛ diyɛ bemɛ daana wa. ¹⁸ Bemaa ɛju kanran wa, birɛ ɛju biru nɛ ɔgɔ unrunwin biyɛ wa. Bemaa inɛw bɛrɛ sin kanrun nɛ lee, inɛw wajunw bɛrɛ kijɛ be sɛɛ gamulu nɛ lee, kinɛ ɔgu le biyɛ wa. ¹⁹ Be kɔɔ gin’, yogo dɛi arusɛgɛ ɛju, bɔlɔtei ɛju nɛ daan gɔi mɔɔnɔuwɔin, iyaa be kɔɔ waaru le ɔnmɔ tɔitɔi gɔ sisiyɛdɛin. ²⁰ U Timɔte, kijɛ u bɛrɛ sagu duuraaɲu gɔ ɛjii gɛliyɛ. U, jiiru tiyɛ sɛlɛ, gagawu sɔɔ le sɛgɛrɛɛlɛ gɔbe lee, jiiru, inɛw kakalu le jugɔ sɔɔi gɛɛɲu gɔbe lee nɛ aŋa uwɔ kunɔnɔu. ²¹ Inɛw gamuu kɔɔ gin’, jugɔ sɔɔ wogɔ yasin ga ajubaa, be gagawu oju gɔ nɛ gɛŋiyaan gowaain. Ama nɛɛma gɔ e le biyɛ.