PIƐRU PƆLƆ

¹ Mu Piɛru, Yesu Kirisito jaŋu ii tiyaaɲu gɔ, mu lɛtɛrɛ ɔn, e, Ama inɛw yɛmu, aduna ɔn nɛ yerunwin wɔin gɔbe, inɛw Rɔmɛ laamu, Pɔn lee, Galasi lee, Kapadɔse lee, Asi lee, Bitini lee numɔ nɛ ginaa wɔin gɔbe bɛrɛ tɔŋaa tiiuwɔn. ² Ebaa Yesu Kirisito sɔɔ yaba ga, ili womɔ le ei ɛjɛmɔ ga, Ba Ama pɔɔlɔ baa sɔɔ bibiyɛdo ga wo kɛju gɔ le kɛukɛu ei yɛmi. Iyaa Kikinu womɔ gɔnrɔn le ei Ama tɔgu dɛiin bojaaɲui digɛu ei yɛmi. Ama, nɛɛma lee, jamu lee ei gaai obo. ³ Inɛw Baŋa emɛ Yesu Kirisito Ama gɔ, iyaa wo Ba gɔi sɔmɔmɔi. Amasɔgɔjugɔ diyɛ womɔ sabu dɛi, Yesu Kirisitoi yiun nɛ bulogu gɔ le digɛu Ama emi pilemaa narun. Emɛ kunrin diyɛdɔn ɔnmɔ gɔ yasin. ⁴ Iyaa Ama, inɛw womɔ dɛi kɛn maŋaa sɛɛ gɔ, wogɔ bɛɛ ga emɛ kinɛ ɔgu le wɔin. Wo wogɔ e dɛi alagala nɛ gɛliyaa wɔɔ. Wogɔbe, arusɛgɛ asuu yanwaannɛbei, lɔgɔjiyɛɛnɛbei, kumujiyeenɛbei. ⁵ Yayabu, waaru dumɔ gɔ le jugɔmɔidɛin ga kanɛ baa yegeraaɲu gɔ, yayabu wogɔ bai e bɛɛido baa, e inɛw gagawu ebe dɛi Ama, gɔnrɔn unrunmɔ le gɛlɛ gɔbe, e dɛi Ama kijɛ ɛju wogɔbe alagala nɛ bojaa sɛɛ. ⁶ Halu kanɛ waaru gaila le, subɔrɔ tɔgu dɛin dɛin dɛi kinɛ ebe jijinwɛndo bibiyɛ kanran, e kijɛ ɛju wogɔ dɛi kinɛ ɛɛliyɛmɔuwɔi. ⁷ Subɔrɔ kɔɔbe, gagawu ebe pinɛ yɛnɛdɛin ga e bɛrɛ dɔɔuwɔ. Kange, halu pinɛ womɔ yaun nɛ yɛyɛnɛɲu kanran, woi kijɛ sɔgɔɔlɛi. Kunrin, gagawu ebe gaai kange dɛi ire wɔɔ gɔ yaa, yagɔ baa ɛɛn ma jugɔ ga, pinɛ womɔ yɛyɛnɛɲu. Kɔɔ gin’ e boi sɔmu lee, dooro lee, baba lee, Yesu Kirisito waaru unruin wo tagaraido gɔ le bɛbɛɛdei. ⁸ Halu e woi iyetɛnɛ kanran woi ibɛɛ wɔi. Halu e kanɛ woi iyeuwɔnɛ kanran, e wo le gawaa wɔi. E kɔɔ sabu dɛi kinɛ ɛɛlu diyɛ naa diyɛ le wɔi. Kinɛ ɛɛlu gɔ bana gaa gɔ aŋa le sɔi bɛɛmɔɔlɛ. ⁹ Sabu e kijɛ dɛi gawaa e wɔɔ gɔi bɛɛuwɔi: Wogɔ kikinu ebe yayabu gɔ woi. ¹⁰ Yayabu kɔɔ sɔɔ dɛi, inɛw Ama titiyaanw denu dɛnaabɛin, selumu selumaabɛin. Iyaa, be Ama e bɛrɛ nɛɛma oboido gɔ dɛi sɔɔ wɛɛido sɔwaabɛin. ¹¹ Inɛw Ama titiyaanw gɔbe nɛ Kirisito Kikinu tobe gɔ, Kirisito ɔɲɛ iyeido sɔɔ lee, kɔɔ onu nɛ dooro wo bɛɛido sɔɔ lee, giru nɛ baa sɔwaatiyaabɛin. Waaru yagɔ le ma, bana inge le ma biyɛdo ma ga, be mainiyaan jugɔ ibɛɛ bɛin. ¹² Inɛw Ama titiyaanw gɔbe bɛrɛ sɔɔ taga ga sagu duurin gɔ, wogɔ kuu bemɛ dɛi laa, kaa e dɛi ga Ama be bɛrɛ jugɔmaabe. Sɔɔ wogɔ, kanɛ inɛw Kibɛru Ɛju waaju taganw gɔ le digɛu e bɛrɛ tagaaɲu. Be Kikinu Pilu alagala gowaa tiin gɔ gɔnrɔn le sɔɔ gɔ tagaabɛin. Halu mɛlɛnkɛbe kanran wogɔ paamu kanran ga daariyaabɛin. ¹³ Kɔɔ sabu dɛi yeguru le biyɛi, hakilɛ kunɔi. Kuu ebe ɛjii gɛliyɛi. Yesu Kirisito waaru unruin wo tagaraido gɔ le nɛɛma e bɛrɛ oboidɛin gɔ, diyɛ ebe sɛɛu wogɔ nɛ daanai. ¹⁴ E, Ama sɔɔ le yabawin biyɛi. Pɔlɔ pɔlɔ, Amai jugɔlu ebe waaru le dadaaru e sɛbe gɔbe le biyɛnɔugi. ¹⁵ Ama ei boonɔnɛ gɔ bana ɛjaa wɔɔ gin’, kijɛ e kanranjɛ wooi nɛ e yaa ɛjaai biyɛi. ¹⁶ Sabu Ama Dɔn nɛ tɔŋaa gi: “E ɛjaai biyɛi, sabu mu ɛjaa wɔun.” ¹⁷ Inɛwin kabu kunɔlu go, inɛ tuturu, birɛ womɔ le kɛukɛu saliyɛ womɔ Ama kirenɛ gɔ, woi e Bai ga wo bɛrɛ gɛɛnjɛi ye, iyɛru nɛ waaru e wɔɔ le e Ama giri liyɛ le biyɛi. ¹⁸ Nɛɛ, e tirɛ anranw oju niwɛn sɛlɛ ei be deeraabe gɔ nɛ inge le ei dɔrugaabɛin ma e igii wɔi. Kijɛ yanwanjɛ, sarudu ma, kange ma gin’ le kai ei dɔrugɔnɛ. ¹⁹ Kaa Kirisito ili dɔnrun diyɛ gɔ le ei dɔrugaabɛin. Kirisito, wo peju ii jiun sɛlɛ ma, lɔgɔ ma tolo gin’ biyaabe. ²⁰ Ama, Kirisito gɔi aduna maŋamɔ nɛ yɛmaabe. Iyaa kanɛ waaru dumɔ ɔn le, Ama, ɛju ebe dɛi woi daii tagaraabe. ²¹ Ama, Kirisitoi yiun nɛ bulugaa, dooro wo bɛrɛ obonɛ gɔ, e Kirisito wogɔ le digɛu wo le gawaa wɔi. Kunrin gagawu ebe gɔ lee, diyɛdɔn ebe gɔ lee, Ama nɛ bojaa sɛi. ²² Gagawu nɛ e ba unrunw gɔbei kinɛpilu le ibɛɛ biyɛ ga, e naran gɔ le yabu le digɛu kinɛ ebe ɛjɛmaabei. Kodigɛu e tunmɔi kinɛ ebe wooi le, ɛjii ibɛɛ biyɛi. ²³ Ama sɔɔ ɔnmɔi wɔɔ gɔ asuu wɔɔ gɔ le digɛu ei pilemaa naraanɲu. Ei narannɛ gɔ inɛ yinwɛnjɛi laa, wo asuu yɔɔ. ²⁴ Sabu Ama Dɔn nɛ tɔŋaa gi: “Adama unrunw puu belu gin’ wɔin, daula bemɛ olu belu puyo gin’ wɔɔ. Belu mamaaŋiyɛnjɛ, puyo womɔ babagajɛ. ²⁵ Kaa, Inɛw Baŋa Ama sɔɔ gɔ asuu sɔsɔgɔjɛ.” Sɔɔ wogɔ Kibɛru Ɛju, sɔɔ e bɛrɛ tagu gɔ woi.

¹ Kɔɔ dɛi, e, mɔmɔɲu wooi lee, nabara wooi lee, iyaa aŋa lɛilɛi lee, ele lee, inɛw mɔɲu sɔɔ sɔi puu lee pajai. ² Ibanrin kanɛ naraanɲu bana wo na iru daariyɛjɛ gin’, iru koro kikinugu lɔgɔ tolo dadaaru gɔ ei aamɔi. E wogɔ nɔwaan ye, kole digɛnu ei gagabiyɛdo, ei yayabadɛin. ³ Ama Dɔn sɔwaa gi: “E Inɛw Baŋa Ama yagɔ baa ɛjii wɔɔ ma maraan yɛnaabei.” ⁴ Inɛw Baŋa genɛ nɛ dɔɔi. Woi tibu ɔnmɔ inɛw kamaa pajin gɔi, kaa Ama tibu maai wɔɔi ga yɛmaabe gɔi. ⁵ E yaa tibu ɔnmɔi wɔin gin’ bii ye, Inɛw Baŋa womaa ei jeɲɛ ye ginrun kikinugu e le ujɔ ga genɛ womɔ nɛ dɔɔi. E ginrun wogɔ kɔlɔ nɛ inɛw Ama bɛrɛ sadagadɔɔnɔw dɛiin bojaaɲui bibiyɛdei. Kɔɔ gin’ Yesu Kirisito le digɛnu sadaga Ama Kikinu le digɛ Ama bɛrɛ dɔdɔɔnɔdei, wogɔ Ama yayabajɛ. ⁶ Sabu Ama Dɔn nɛ ɔn gin’ tɔŋi: “Yɛnɛ, ginrun sibɛ tibu maai wɔɔ gɔ yɛmaa mu Siɔn nɛ duunaajɔn. Kaa, inɛ wo le gawaajɛ gɔ, wo asuu dɔgɔ iyeidolo.” ⁷ E inɛw Kirisito le gawaa wɔin gɔbe, e bɛrɛ tibu gɔ gaai maai wɔɔ. Kaa inɛw wo le gawanɛ gɔbe dɛi Ama Dɔn nɛ tɔŋaa gin: “Ginrun ujɔnw tibu kamaa pajin gɔ, tibu wogɔ, ginrun sibɛ tibu gɔ woi bii.” ⁸ Iyaa Ama Dɔn yalu waja nɛ tɔŋaa gi: “Wogɔ tibu inɛw kubɔ tomɔmɔjɛ gɔ woi, dumɔ bei numɔmɔjɛ gɔi.” Be Kibɛru Ɛju sɔɔ gɔ le yabanɛ dɛi kubɔ bemɛ tomi. Ama pɔɔlɔ baa kunrin biyɛdo ga sɔwaa galaai. ⁹ Kaa ei tɔgu yɛmaaɲui. Ei Ama bɛrɛ sadagadɔɔnɔw, Ama ɔgɔnɛi wɔɔ gɔ birɛbirɛnwin. Ei tɔgu Ama unrun dɛi dɛiin bojaa sɛɛi. Iyaa ei tɔgu Ama mɔi wɔɔi. Ama ɔlɔ nɛ ei goonaa, wijɛ womɔ kijɛ puu dɛi sigɛ doorojɛ gɔ nɛ ei jɛɛlɛnɛ gɔ birɛ ɛju naa ɛju gɔbe ebaa inɛw wooi bɛrɛ taga ga, wogɔ dɛi ei yɛmi. ¹⁰ Pɔɔlɔ e Ama tɔgui laai bei, kaa kanɛ ei Ama tɔgui. Pɔɔlɔ, Ama, amasɔgɔ ebe jugɔlu bee, kaa kanɛ amasɔgɔ ebe jugaaɲu. ¹¹ Ba unrunw ibɛ mabe, ei aduna ɔn nɛ yerunwin, ei oju galanwin. Kɔɔ sabu dɛi mu e bɛrɛ gɛɛunwɔn, e dadaaru mɔɲu kinɛ ebe nɛ goojɛ, kikinu ebe le jaiyɛjɛ gɔ dɛi kuu ebe gɛliyɛi. ¹² Inɛw Ama inin gɔbe giru nɛ bana ebe ɛjii biyɛmɔi. Kunrin, halu be ei jaaraa, ebaa mɔɲu kanranwin giyaaɲu kanran, be waajibi kanran ɛju ebe gɔ ihiyedɛin. Iyaa bai Ama saliyɛ kirei wɛɛido gɔ le, be Ama boi sɔsɔmɔdɛin. ¹³ Inɛw Baŋa dɛi, e aduna paŋagunw wooi le tubiyei: Ɔgɔnɛ diyɛ, kijɛ puu kuui wɔɔ gɔ lee, ¹⁴ sɛmɛgunw lee, inɛw mɔɲu kanranw gɔbei mɔɲii tujɔ ga, ɛju kanranw gɔbei sɔmɔ ga, ɔgɔnɛ diyɛ gɔ bei tii. ¹⁵ Ama diŋɛ gɔ unwɔ: Kanran ɛju ebe gɔbe le, bomɔgunw jugɔ sɛlɛ le sɔɔ sɔɔnw gɔbe bɛrɛ sɔɔ sɔɔɲu bɛɛmɔnɔugi. ¹⁶ E hɔɔlɔnw gin’ biyɛi. Kaa hɔɔlɔi bii ebe gɔ kijɛ mɔɲu dɛbu gɛlii biyɛmɔnɔugi, Ama birɛbirɛnw gin’ biyɛi. ¹⁷ E inɛw puui babai: Gagawu nɛ e ba unrunw gɔbei ibɛɛ biyɛi, Ama giri liyɛi, ɔgɔnɛ diyɛ gɔi babai. ¹⁸ Gunɔw gɔbe, e baba wooi le e baŋabe le tubiyei. Baŋa ɛju gɔbe, kinɛ ɛju le wɔin gɔbe sai laa, halu baŋa nau gɔbe le kanran tubiyei. ¹⁹ Halu ɔɲɛ gɔ wo le jaanla bee kanran, Ama kinɛ aamɔ dɛi, inɛ ɔɲɛ muyaanjɛ ye, wogɔ Ama giru nɛ sɔɔ ɛjui. ²⁰ Mɔɲu e kanrun dɛi ei lagaaɲu ye, e wogɔ muyaanjɛi giye wogɔ dɛi ei sɔmɔ ga wɔi ma? Kaa ɛju e kanrun dɛi ei ɔɲɔmaaɲu ye, e wogɔ muyaanjɛi ye, Ama giru nɛ wogɔ sɔɔ ɛjui. ²¹ Kijɛ dɛi Ama ei boonu gɔ yaa kɔɔ woi. Sabu Kirisito, kuu womɔ le e dɛi ɔɲaabe. Ebaa kubɔnami unrunmɔ dimiyɛn ga, wo giru tagurui biyaabe. ²² Wo hakɛ turu kanran kanrantɛlu. Iyaa, aŋa womɔ nɛ nabara sɔɔ wo goou inɛ turu kanran ɛgɛtɛlu. ²³ Waaru woi be duyɔ le, wo duyaa tujɔlu. Inɛw waaru woi ɔɲɔmi le, wo bei ɔɲɔmu tujɔdo gɛɛlu. Kaa teitai le Ama saliyɛkirenɛ gɔ numɔ nɛ sɔɔ unrunmɔ pajaabe. ²⁴ Emaa hakɛ sibɛ go inɛw yinwin bii ye, emaa teitai gɔ dɛi ɔnmɔi biyɛ ga, Kirisito goju womɔ le ɔɲɔu, kuu womɔ le baga jai nɛ hakɛ emɛ duiyaabe. Woi be lagu gɔ dɛi ei bajaai. ²⁵ E peju manaayaabɛin gin’ bei. Kaa kanɛ, kikinu ebe girɛnɛ lee, kikinu ebe gɛliyɛnɛ gɔ lee bɛrɛ ei pilemaa jɛɛlaaɲu.

¹ E kanran, yaanw gɔbe, e igɛbe le e tubiyeun jaain wɔɔ. Kɔɔ gin’ bana ɛju ebe le digɛnu igɛnw gamuu Ama sɔɔ le gawanɛ ye, inɛw gawaa wɔin bibiyɛdɛin. Kunrin e sɔɔ sɔi kai siyɛidelei. ² Sabu bana ebe gɔ aŋai ɛjii wɔɔ lee, aŋai baba sɛɛ gɔ lee, be ihiyeɲu. ³ Saŋa saŋi ebe bain saŋa saŋi biyɛmɔnɔugi: Kuu ɛru sigɛ le ma, kange dugɔi ma, sɔi dɔnrun diyɛ e goriyeido ma nɛ hakilɛ ebe bojonɔugi. ⁴ Kaa saŋa saŋi ebe gɔ kinɛ ebe kɔlɔ nɛ saŋa saŋiyaan wɔi biyɛmɔi. Saŋa saŋi wogɔ asuu bibiyɛdo, wogɔ kinɛ kuu sunugu sɛɛ, kaali wɔɔ nɛ goi. Wogɔ Ama giru nɛ kijɛ puu dɛi sigɛ ɛjii wɔɔ. ⁵ Pɔɔlɔ yaanw Ama giri liyɛnw, Ama nɛ diyɛ bemɛ daanaa bɛin gɔbe, be kɔɔ gin’ unrunbei saŋaraunbɛin. ⁶ Sara kunrin bee. Wo Abarahamu sɔɔ yabaa, woi unrun baŋai ga boonɔube. E ɛju kanranjɛi ye, iyaa kijɛ turu nɛ kanran kinɛ ebe yanwaanlɛ ye, ei Sara unrunw yaanwin. ⁷ E igɛnw gɔbe, e kanran bana ɛju le yaanw ebe le biyɛi. Be e gin’ gɔnrɔn sɛnɛ ga paamai. Kunrin be sibɛ go baba le biyɛi. Sabu Ama, nɛɛma womɔ dɛi ɔnmɔ wo obojɛ gɔ, e wooi bɛrɛ tunmɔ go obojɛ. Kijɛ turu kanran amagɛɛn ebe tɛŋɛnɔu ga, e kɔɔ gin’ kanrain. ⁸ Kɔɔ wooi onu nɛ, e wooi sɔɔ turu gɔ le biyɛi. E tunmɔ amasɔgɔ jugɔi. Ba unrunw gin’ tunmɔi ibɛɛ biyɛi. Tunmɔ le kinɛ ɛju le biyɛi. Tunmɔ le kuu sunugu le biyɛi. ⁹ Inɛ mɔɲu kanrannɛ gɔi mɔɲu le tujɔnɔugi, maa inɛ duyɔ duyɔnɛ gɔi duyɔ le tujɔnɔugi. Kaa be dɛi Ama boi booi. Sabu waaru Ama ei boonu le wo ei duba kanrando ga boonu. ¹⁰ Sabu Ama Dɔn kijɛ gi: “Inɛ, aduna kayi ibɛɛ wɔɔ ye, inɛ, bai ɛju iye ibɛɛ wɔɔ ye, mɔɲu dɛi ninɛ womɔ ai gɛliyɛ, nabara sɔɔ dɛi aŋa womɔ ai gɛliyɛ. ¹¹ Wo mɔɲu kanrun le onu kigelemaatiyaa ye, ɛju kanran. Wo jamu dɛnɛ, wogɔ onu nɛ digiyɛ. ¹² Sabu Inɛw Baŋa Ama, giri unrunmɔ inɛw teitai wɔin bɛrɛ dɛɛraa wɔɔ, wo gɛɛn bemɛ keŋiyɛunwɔ. Kaa Inɛw Baŋa Ama, mɔɲu kanranw gɔbe le jajaiyɛjɛ.” ¹³ Ɛju kanrun dɛi e saii mainiyɛunwɔi ye, inɛ aa e bɛrɛ mɔɲu kakanrando ma? ¹⁴ Kaa halu teitai dɛi ei ɔɲɔmɔdɛin kanran, Ama e yabu. E, inɛw giri liyɛnɔugi. Iyaa kikinu manu le biyɛnɔugi. ¹⁵ Kaa, Kirisitoi kinɛ ebe nɛ babai, woi Inɛw Baŋa ebei ga jugɔi. Diyɛdɔn le e wɔɔ tiyɛ gɔ inɛ aai kanran e bɛrɛ selumaajɛ ye, e waaru wooi inɛ wogɔ aŋa saa ga yeguru le biyɛi. ¹⁶ Kaa e wogɔ tɛgɛ sɛlɛ le, iyaa baba le kanrain. Waaru ei mɔɲu kanranwin giyaa ei jaaraaɲu, ei Kirisito mɔi digɛu bana ɛju le e wɔɔ gɔ dɛi, inɛw sɔɔ mɔɲu sɔɔnw gɔbe bemaa sɔɔ bemɛ dɛi dɔgɔ le biyɛ ga, e kinɛjugɔ jarugu sɛlɛ le biyɛi. ¹⁷ Ama diŋɛi ye, kanran mɔɲu dɛi ɔɲɛ bɛɛ dɛi, kanran ɛju dɛi ɔɲɛ bɛɛ ire. ¹⁸ Sabu Kirisito, kuu unrunmɔ le hakɛ ebe dɛi kubɔ turu sai yinwaan kilaai bii. Ei Ama genɛ nɛ jɛyaa ga, wo inɛ teitai bee gɔ, inɛw teitai laain dɛi yinwun. Inɛw, Kirisito goju gɔi daabɛin, kaa Ama, Kikinu unrunmɔ le digɛu yiun nɛ woi bulomaabe. ¹⁹ Wo Kikinu wogɔ le, kikinu pɔɔlɔ Ama sɔɔ yabanɛ kanrin, kaju nɛ toin gɔbe bɛrɛ waaju tagai yaabe. Wogɔ Nɔwe waaru le, Ama waaru muyaan bee gɔ le, diikoro diyɛ gɔ waaru yegereubɛin gɔ le bii. Diikoro wogɔ nɛ inɛw lugo gaila, tiyɛ gɔ inɛw gagara sai dii nɛ yabaabɛin. ²¹ Dii wogɔ, batise kanɛ ei yabajɛ gɔ sɛɛrɛi bee. Batise wogɔ goju lɔgɔ goonɔ dɛi laa, kaa Ama giru nɛ kinɛjugɔ jarugu sɛlɛ pui kunu sɔɔi. Batise wogɔ, Yesu Kirisito, yiun nɛ wo bulu gɔ dɛi ei yabajɛ. ²² Yesu Kirisito alagala ulaa, Ama numɔ iin sibɛ nɛ daan. Mɛlɛnkɛ gɔbe lee, alagala paŋagunw gɔbe lee, alagala sɛmɛgunw gɔbe lee, wo le tubiyaa wɔin.

¹ Kunrin Kirisito, ɔɲɛ iyaabe dɛi, e kanran, wo gin’ ɔɲɛ bɛɛ ga yeguru le biyɛi. Sabu inɛ goju ɔɲɛ iyaajɛ gɔ, woi hakɛ le kabiyaa kilaai. ² Nɛɛ, e kanɛ baa, aduna nɛ bai e bɛrɛ wajaai gɔ wooi, inɛw dadaaru mɔɲu gin’ laa, kaa Ama diŋɛ le kɛukɛu biyɛi. ³ E pɔɔlɔ, inɛw Ama inin gɔbe kijɛ kanrun ibiin gɔbe kanraun tanwaanbei. Nɛɛ kɔɔ baa wɔɔ. E kuu sɛlɛ lee, dadaaru mɔɲu lee, kɔɲɔ le bimili lee, yɔgɔrɔ mɔɲu lee, mɔrin ye kijɛ nɔi gabu lee, ɔmɔlɔ bulu tuutaaɲu gɔ lee, wogɔbei kanraunbei. ⁴ Nɛɛ kanɛ, inɛw Ama inin gɔbe, e be le mɔrinyaan ye yanwan mɔɲu naa mɔɲu kɔɔbe kanraanlɛ e wɔɔ gɔ dɛi, be bɛrɛ maunɛ wɔɔ, iyaa ei duduyɔɲu. ⁵ Inɛw ɔnmɔi wɔin gɔbe lee, inɛw yinwaain gɔbe lee saliyɛ kiredo ga, Ama unruin yegeraa wɔɔ gɔ, kijɛ be kanrun gɔbe bei seselumɛdo. ⁶ Kɔɔ sabu dɛi, Kibɛru Ɛju gɔ, inɛw yiunbe bɛrɛ kanran tagaabɛin. Inɛw puu saliyɛ bana kireɲu gin’, waaru ɔnmɔi be bee le inɛw saliyɛ bemɛ kirin gɔbe, Kibɛru Ɛju gɔ be bɛrɛ tagin. Kunrin, bemaa Ama bana kikinui wɔɔ gin’ kikinu sibɛ go ɔnmɔi biyɛ ga Kibɛru Ɛju gɔ be bɛrɛ tagin. ⁷ Kijɛ puu dogogu gɔ bɛruniyaain. Kɔɔ digɛu Ama gɛɛn bɛɛ ga, e hakilɛ ebe daanaa ye, kuu ebe ɛjii gɛliyɛi. ⁸ Kijɛ wooi dɛi sigɛ tunmɔi ɛjii ibɛɛ bii gɔ kinɛ ebe nɛ kunɔi. Sabu ihibɛ, hakɛ joo naa joo yaabu kakanranjɛ. ⁹ E guguun wɔlɔ go, tunmɔ bɛrɛ ginrun sugo oboi. ¹⁰ Logoro ebe nɛ, inɛ tuturu Ama sin obu dɛin wo bɛrɛ obu gɔ kajubanɛi ɛjui wo biyɛun jaain wɔɔ. Iyaa sin obu dɛin wo bɛi gɔ inɛw puu kai kili biyɛmɔ. ¹¹ Kijɛ wooi nɛ baba gɔ Yesu Kirisito le digɛnu Ama mɔi biyɛmɔ ga, inɛ waaju taganɛ gɔ, Ama sɔɔ gɔ inɛw bɛrɛ saanau jaain wɔɔ. Iyaa inɛ inɛw wajunw baranɛ gɔ, Ama wo bɛrɛ paŋa obojɛ gɔ le wo birɛun jaain wɔɔ. Boi sɔmu lee, gɔnrɔn lee, asuu nasuu Yesu Kirisito mɔi. Amina. ¹² Ba unrunw ibɛ mabe, subɔrɔ nau e bɛrɛ dɔɔjɛ gɔ, kijɛ yeru gin’ bojo ye, maunɛ biyɛnɔugi. ¹³ Kaa, waaru Kirisito dooro tagaraidɛin gɔ le ebaa kanran kinɛ ɛɛlu le joo ye biyɛ ga, e wo gin’ ɔɲɛ iyaabei dɛi, kinɛ ɛɛliyɛmɔi. ¹⁴ Ei Kirisito jaŋu unrunwin dɛi ei duyaaɲu ye, Ama e yabu, sabu dooro Kikinu, Ama Kikinu gɔ, e le wɔɔ. ¹⁵ Logoro ebe nɛ, inɛ turu kanran, inɛ daanɛi ma, gugunyɔnnɛi ma, mɔɲu kanrannɛi ma, inɛ waja sɔɔ nɛ aŋa womɔ kunɔnɛi ma gin’ bii ye ɔɲɛ woi bɛɛmɔnɔu. ¹⁶ Kaa inɛ tuturu wooi, Kirisito inɛi dɛi ɔɲɛ iyeuwɔ ye, wo kɔɔ dɛi dɔgɔ le biyɛnɔu. Kaa, Kirisito inɛi wo wɔɔ gɔ dɛi wo Ama boi sɔmɔ. ¹⁷ Sabu saliyɛ kiru tɔlɔgu gɔ dɔwaai. Ama ginrun gonɔ maranw gɔbe saliyɛ laa kiredɛin. Nɛɛ, saliyɛ kiru gɔ kuu emɛ nɛ laa tɔlɔdo ye, inɛw Ama bɛrɛ Kibɛru Ɛju goi gɔ le yabanɛ gɔbe le bana yagɔ le dogodo? ¹⁸ Ama Dɔn bana sɔɔjɛ gin’: “Inɛw teitai gɔbe yaba ga nawin wɔɔ ye, inɛw Amai babanɛ, hakɛ kanranw gɔbe mɔ yani biyɛdo?” ¹⁹ Kɔɔ gin’, inɛw Ama diŋɛ le kɛukɛu ɔɲɔuwɔin gɔbe, birɛ ɛju kanrun gɔ be digiyɛun jaain wɔɔ. Be iyaa Maŋanɛ, sɔɔ turu baŋa gɔ nɛ sagu bemɛ sɛɛu be duurɔun jaain wɔɔ.

¹ Mu Ama inɛw mɔɔnu inɛ na gɔ, nɛɛ mu, e inɛw Ama inɛw mɔɔnu logoro nɛ inɛw nawin wɔin gɔbe bɛrɛ gɛɛunwɔn. Mui Kirisito ɔɲɛ sɛɛrɛi. Mu iyaa dooro jugɔmɔidɛin gɔ nɛ gamulu ma bɛbɛɛdɔn. Inɛw naw gɔbe bɛrɛ kijɛ mu gɛɛjɛ unwɔ: ² E pejugirɛnw gin’, Ama peju kulɔ e bɛrɛ sagu duuru gɔi ɛjii kajubai. Kinɛ aalu lei laa, kaa Ama diŋɛ le kɛukɛu, kinɛ ɛju le woi kajubai. Kɛɛlɛ bɛɛ sai dɛi kanrannɔugi, kaa kuu ebe obaa ye kanrain. ³ Inɛw e bɛrɛ gawaraaɲu gɔbei paŋa tagaranɔugi, kaa peju kulɔ gɔ giru nɛ, giru taguru ɛjubei biyɛi. ⁴ Kɔɔ gin’, waaru pejugirɛnw Kuu Baŋa unruin tagaraido, e dooro ɔgɔdomɔ kɔɔlɔɔlɛ gɔ bɛbɛɛdei. ⁵ Kɔɔ bana wɔɔ gin’, e sagatara unrunw gɔbe, inɛw e dɛi gaain gɔbe le tubiyei. E wooi puu kuu sunugu le bii ye tunmɔ kai kilɛi. Sabu Ama Dɔn sɔwaa gi: “Ama, inɛw kuu unrunbemɛ unɔw gɔbe le jajaiyɛjɛ, kaa inɛw kuu sunugu le wɔin gɔbe bɛrɛ nɛɛma ohobojɛ.” ⁶ Ama waaru kɛjɛido gɔ le womaa kuu ebe unɔ ga, e kɔɔ dɛi Ama numɔ gɔnrɔn sɛɛ gɔ doɲu nɛ kuu ebe sunugoi. ⁷ Diyɛdai ebe wooi kuu womɔ nɛ duurɔi, sabu wo mai ebe yasɛ. ⁸ E kuu ebe ɛjii gɛliyɛi, giri yemɛi. Jaŋunɛ ebe, jinrun puu kuu baŋa gɔ, yara durojɛ gin’, inɛ wo tɛnwɛindo bɛɛ ga gɔŋɔlɔuwɔ. ⁹ Gagawu nɛ ɛɛn go bii ye wo le jaiyɛi. Sabu gagawu nɛ e ba unrunw aduna yalu wooi nɛ wɔin gɔbe ɔɲɛ kɔɔ tunmɔ bɛɛuwɔin ga e igii wɔi. ¹⁰ Kaa waaru gaila ei ɔɲaai onu nɛ, nɛɛma wooi obonɛ Ama gɔ, Kirisito le ebaa dooro sɔgɔ womɔ nɛ yoo ga ei boonaajɛ baŋa gɔ, wo tunmi ei titibemɔdo, ei ɛɛn go ihiŋiyɛnmɔdo, paŋa ei ohobodo, bɔlɔtei ɛju nɛ ei dadaanado. ¹¹ Gɔnrɔn gɔ asuu nasuu womɔi biyɛmɔ. Amina. ¹² Lɛtɛrɛ dumi ɔn e bɛrɛ tɔŋɔ tii ga Silasu mui baraabe. Mu, woi bainɛ sɔɔ turu baŋai ga lugaa wɔun. Mu ei anrangaju obu ibɛɛ wɔun. Iyaa e bɛrɛ daii tagauwɔn, Ama nɛɛma tɔitɔi gɔ kunrin wɔɔ. E wogɔ nɛ ɛɛn go iŋiyɛin. ¹³ Babilɔnɛ ana nɛ, Ama inɛw mɔɔnu e gin’ Ama yɛmu gɔ ei poonɔuwɔ. Maruka, ii ma kanran ei poonɔuwɔ. ¹⁴ E Ama inɛw gin’ tunmɔi ihibɛ le poonɔi. E inɛw Kirisito mɔi wɔin gɔbe puu, jamu e le biyɛ.