SIPANIA

SIPANIA

¹ Iti no o boros do TUHAN do pinoboros dau dot id di Sipania do tontok dit i Yosia, i tanak di Amon o raja’ do Yohuda. (I Sipania nopo om sinakagon di Raja’ Hiskia tu’ suminolusuk i’ iyau di Kusi, om i Godalia, om i Amaria.) ² Om boros kad TUHAN, ’’Raagon ngai’ ku nopondo o suang diti pomogunan. ³ Kohompit ngai’ no o tulun, om nintorusan, om tombolog om sada’. Patayon ku nondo i tulun dot angaraat. Om patayon ngai’ ku o tulun, gisom dot aiso’ no songulun piya dot oolu’. Iyoho’ no i TUHAN, o minomoros diti. ⁴ Hukuman ku nondo o koinsanai’d tulun do Yorusalim om Yohuda. Om punsoon ku i tulun di noolu-olu’ di tumuku’ dot id Baal do hilo’, om gisom dot aiso’ nondo o songulun piya do kosorou dit imam do mogobi-obi’ do tingolig di minodsubak do Baal. ⁵ Om patayon ngai’ ku i tulun di mongoi do hilo’d sakai do taap do mongoi tuku’ dot id tadau, om tulan, om rombituon. Om iri tulun di tumuku’ dot id doho’ om i mangakun do tumorodok dot id doho’ nga’ patayon ku i’ tu’ sumumpa’ i’ iyolo’ dot id suang do ngaran di Milkom, i ponokokinorohingan diyolo’. ⁶ Om patayon ku nogi’ i tulun di tuminongkiad doho’ om it a’ tuminanud doho’, i tulun dit a’ rumikot dot id doho’, om it a’ mokituduk doho’,’’ ka dau. ⁷ Oruhai nod orikot i tadau’d TUHAN, i tadau do kapamansayan do Kinorohingan di wonsoyon dau; iyo nopoddi om kada’ kou no komi-komi dot id toguang dau. Tu’ sumodia’ no o TUHAN do monumbali’ di tulun dau do miagal di porsombahan do sumbolion. ⁸ Boros kad TUHAN, ’’Tontok nopondo do tadau’d koponumbolian diri, om hukuman ngai’ ku nondo i pagawai om i tangaanak di raja’, om koinsanai di tulun di musui do kowoyo-woyoon do tulun di bansa’d suwai. ⁹ Koinsanai di tulun di sumambayang do miagal do tulun dit a’ kotutun doho’, om i manakau om mamatai do mokimohilo-hilo’ dot oponu’ do dapu’ di pinanakau i walai do boyoon diyolo’, nga’ patayon ngai’ ku nopo,’’ ka dau. ¹⁰ Boros kad TUHAN, ’’Tontok nopondo do tadau’ddi, om haro nondo ot orongou dokoyu do mogihad do hilo’d wawayaan di roitan do Wawayaan do Sada’ do hilo’d Yorusalim. Om korongou kou do sollompud-lompud do mihad do ponong hiri’d kinoiyonon di wagu kowonsoi do hiri’d bandar om haro ot orongou do kurubut dot opuhod do hilo’d konuluhanan. ¹¹ Pinggiak kou no om mingihad no dot orongou dokoyu o miagal diri, koinsanai dokoyu i poingiyon do hilo’d bandar dit id siba’; tu’ nangapatai ngai’ no i dumadagang! ¹² Tontok nopo do maso’ddi om manu oku nondo do lampung om ngoyon ku pingantangai o pointongkop do Yorusalim. Om hukuman ku nondo i tulun dit oondos om mogondos do tinan dau, i mimboros dot, ’Aiso’ nopo o koburuluanai do wonsoyon do TUHAN, tu’ a’ i’ miagal diti, om a’ miagal dilo’,’ ka no. ¹³ Angapanakau nondo i dapu’ diyolo’ om angaraag i kawalayan diyolo’. Om a’ indo iyolo’ koiyon di walai do waalon diyolo’ om a’ koinum do waig dit anggur do tonomon diyolo’,’’ ka dau. ¹⁴ Oruhai nod orikot i tadau’d TUHAN, i tadau do kopomisaraan. Om a’ no alaid dot orikot iri! Tadau nopoddi om araat tomod tu’ iri piya’ndo i soudor di gunsiou nga’ mingihad poo tu’ aiso’ no o pokukurayan! ¹⁵ Tadau nopoddi om tadau do katagadan; om tadau do kosusaan om karaagan, om tadau dit otuong om kikatangaban, om tadau dit oluhung om momihaun. ¹⁶ Om tadau di noponu’ pod tuni do torumpit do sumasangod om pinongkisan do soudor di manangod do bandar di kitolig om walai dit angakawas. ¹⁷ Om boros kad TUHAN, ’’Porikot oku nondo do kosusaan dit awagat kopio dot id tulun gisom do sanghawor-hawor pondo ngai’ o tulun do miagal di tulun do bolou. Minomonsoi iyolo’d dusa dot id doho’, om gowoi pondo om potuntugon ku o raha’ diyolo’ do miagal pod waig, om mumang pondo pasa’ i rata’ diyolo’ do songingiliu do hilo’d tana’,’’ ka dau. ¹⁸ Tontok nopod tadau di kopointalangan do TUHAN do kototogod dau, om iri piya nondo i pirok om tamas nga’ a’ no kapasi diyolo’. Tu’ oinsanan nopo dot araag om alanak do tapui do kototogod dau iti pomogunan. Om potigowoon nondo dau do mamatai o tulun do hiti’d pomogunan.

¹ Oi bansa’ dit a’ milo dot ointingayaman, purimono’ no dokoyu ² dot a’ kou po olotu’ om apatai do miagal do tusak do bunga, om a’ po karatu’ dot id dokoyu i kototogod do TUHAN dit a’ ogina-gina’, om a’ po orikot i tadau do kopointalangan dau di kototogod dau. ³ Guli’ kou no dot id TUHAN; koinsanai dokoyu it ongosiriba’ o ginawo do hiti’d pomogunan, i mumboyo’ do boros dau. Wonsoyon no dokoyu it otopot, om minsiriba’ no dot id toguang do TUHAN. Tu’ koidu’ kou i’ doti’ daa’ndo do mantad id hukuman do tontok di tadau do kopointalangan do TUHAN di kototogod dau. ⁴ Songulun po nga’ aiso’ no ot oolu’ do hilo’d bandar do Gasa. Om Askilon pondo nga’ opogiiduan. A’ i’ kasangadau om ouyung no i tulun dot Asdod, om i tulun dot Ikron nga’ ouyung nogi’ do mantad id bandar diyolo’. ⁵ Ousung no i tulun do Pilistin, i tulun di poingiyon di poingompus do tisan do rahat. Norotuan kou nod TUHAN do hukuman. Om patayon kou no dau, om aiso’ no o tiso’ dokoyu do pooluon. ⁶ Iri nopondo tana’ dokoyu do hiri’d toning do rahat om osiliu pod tomulok dot ongkisulap do madtamong do dumba’ om ongkikandang do dumba’. ⁷ Om singolodon nondo di nongoolu-olu’ do tulun do Yohuda i tana’ dokoyu. Om hilo’ nondo o paakan-akanan diyolo’ di baanan do dumba’ diyolo’ om hiri’d kawalayan dot Askilon o toodopon diyolo’, om woyoon indo iyolo’d TUHAN, i Kinorohingan diyolo’ om posimbayanon kawagu dau iyolo’. ⁸ Om Yor. 49.1-6, Ykl. 21.28-32, 25.1-7, Amo. 1.13-15 boros kad TUHAN, it Osundu Kopio, ’’Norongou ku no i tulun do Muab om Amon do mongindaraat om mongirak-irak di tulun ku, om mimboros do mongoi poningolod di pomogunan diyolo’. ⁹ Om sumumpa’ oku tu’ Kinorohingan dot Israil di poimpasi, dot atantu’ no dot araag do miagal do Sodom om Gomura, o Muab om Amon. Osiliu pondo iyolo’d luang do noponu’ do silaon om pogun do gisom dot alaid, om okurumbutan do gouton. Om ngoyon nondo di tulun ku di nongoolu-olu’ panakahai iyolo’ om iri piya’ndo i tana’ diyolo’ nga’ osingolod i’ diyolo’,’’ ka dau. ¹⁰ Om miagal noddi o pomohukum di tulun do Muab om Amon tu’ mininggayo-gayo i’ iyolo’ om ongorongit, om kawagu po nga’ minongindaraat iyolo’ di tulun di songonuon do TUHAN, it Osundu Kopio. ¹¹ Om rolosion nondo iyolo’d TUHAN. Pakaisoon nondo dau i ponokokinorohingan do tulun do hiti’d pomogunan. Om oinsanan nopondo o bansa’ do tumuku’ dau, dot id pomogunan diyolo’. ¹² Om hukuman do TUHAN do kapatayon i tulun do hilo’d Etiopia. ¹³ Om pakayon nondod TUHAN i sinundu dau do mamaraag dot Asur. Om silihon dau do pogun i bandar do Niniwi, om silihon dau do tana’ do kowotuan dit aiso’ o waig. ¹⁴ Osiliu pondo iri do tuundorongon do dumba’, om sapi’, om piro-piro o bansa’ do nintorusan. Om ngoyon di puok iyono’ i pogun do walai diyolo’ om minguni pondo iri do hiri’d liligaon. Tiiyonon pondod bangkahak o hiri’d tukad do walai. Alangkab ngai’ nopondo i limput di kawalayan di kayu sedar do winonsoi. ¹⁵ Miagal noddi ot osiliu dot id bandar dit oondos kopio do kuasa’ dau om i momusorou dot aiso’ o koligagaanan. Osorou nopo daa di tulun do hiri om iri no i diyolo’d bandar ot agayo kopio do hiti’d pomogunan. Nga’ osiliu pondo do kinoiyonon dit oingou do koimbagu o kinoiyonon diri om osiliu do tiiyonon do nintorusan! Kotigowo ngai’ nopondo om ooris o koinsanai’d tulun di kawaya’d hiri.

¹ Ousung no o Yorusalim, i bandar dot araat om obinsaap do TUHAN, om i mongulok-ulok do tulun dau. ² A’ i’ i bandar diri minokinongou do boros do TUHAN om a’ minomusou do ponudukan dau. A’ i’ iri minogondos do TUHAN om a’ minokiuhup dau. ³ Miagal pod singa di sanggarom-garom i pagawai dau; om i gompomutus nga’ miagal pod toni di louson; om adalaan no kopio kodoot, tu’ a’ no sipoolu’ dot ongoiso’ piya o tulang do gisom do kosuabon. ⁴ Aiso’ nopo o monongkoilo di nabi om a’ iyolo’ otorodok dot id TUHAN; om sosomuon dit imam it ongolidang, om somputulon diyolo’ it oturan do Kinorohingan do maan do diyolo’d koinsanangan. ⁵ Nga’ hilo’ po kasai’ id bandar diri o TUHAN, om osonong kasai’ i’ o wonsoyon dau om a’ iyau insan pomonsoi di kasala’. Monikid kosuabon nopo do papatahak iyau dit otulid dot id tulun dau. Om inda’ ka do momonsoi kasai’ pod araat i tulun dot a’ otulid, om a’ nopo iyolo’ ointingayaman. ⁶ Om boros kad TUHAN, ’’Nopunso ku no o piro-piro o bansa’; nangaraag ku no i kabandaran diyolo’ om songingraag po o tolig om walai diyolo’ dit angakawas. Nopogitotongkiadan po i kabandaran; om aiso’ no tulun do hiri’d karalan-ralanan. ⁷ Ondos ku daa om momusou nondo i tulun doho’ om mamadul di ponudukan ku, om a’ nondo kolihu di pinonudukan ku diyolo’. Nga’ a’ i’ alaid om miagal no di gulu karaat o kowoyo-woyoon diyolo’,’’ ka dau. ⁸ Boros kad TUHAN, ’’Andado’ nopo, andado’ nopo i tadau do kapasalaan ku do piro-piro o bansa’. Nokopomusorou oku no do monimung do koinsanai’d bansa’ om pomogunan, do popuriman diyolo’ do kawagato’ do kototogod ku. Oinsanan nopondo iti pomogunan dot araag di tapui do kototogod ku. ⁹ Om simbanan ku nondo o ginawo di tulun do mantad id koinsanai’d bansa’, om iyoho’ o tukuon diyolo’ om okon no ko’ i ponokokinorohingan. Om oinsanan nopondo iyolo’ do mumboyo’ doho’. ¹⁰ Iri piya tulun ku di nokoongoi do hilo’d Etiopia, i hilo’d sodu’ kopio, nga’ rumikot i’ do mongoi papatahak do porsombahan dot id doho’. ¹¹ Tontok nopondo do maso’ddi om a’ kou nondo ointingayam, oi tulun ku, do mulong piya do suminaap kou daa doho’. Poinsoduwon ku nondo o koinsanai’d tulun di minggayo-gayo om it oondos, om a’ kou nondo mumbal kawagu do sumaap doho’ do hilo’d nuluhon ku dit olidang. ¹² Om poundorongon ku nondod hilo’ i tulun dit ongosiriba’ o ginawo om i rumikot dot id doho’ do mongoi pokiuhup. ¹³ Om iri nopondo tulun dot Israil di noolu-olu’ om aiso’ i’ o songulun piya do momonsoi’d araat dot id tulun do suwai, om a’ mongudut, om a’ mumbal do monipu’. Om osimbayan nondo iyolo’ om aiso’ o koligagaanan om aiso’ o poddosi,’’ ka dau. ¹⁴ Podsinding no om mimpangkis nod atataadan, oi tulun dot Israil! Kaayi-ayi’ no o ginawo dot ooropod, oi Yorusalim! ¹⁵ Nopupusan nod TUHAN o hukuman nu; nouyung ngai’ no dau i pisangod nu. Moyo-woyo’ no dokoyu o TUHAN, i raja’ dot Israil; om aiso’ no o paantakan dokoyu do moddosi. ¹⁶ Rumikot no i maso do moro-boros iyolo’ dot id Yorusalim do poingkaa, ’’Kada’ no kooris om kada’ katangkabo, oi bandar do Sion! Kada’ pologoso’ do lumomok o longon nu! ¹⁷ Moyo-woyo’ i’ diya’ o TUHAN, i Kinorohingan dit okoris, om manahak diya’ do kamanangan i sinundu dau. Om asanangan nondo o TUHAN diya’, om onuan ko dau do koposion do wagu tu’ osianan i’ iyau diya’. Om modsinding nondo iyau tu’ atataadan iyau diya’, ¹⁸ do miagal pod tulun dit id karamayan o kooropodo’ dau,’’ ka dau. Om boros kad TUHAN, ’’Nopupusan ku no i boros do ponompurolosi do haro o kosusaan om noidu’ ku i tingayam dokoyu. ¹⁹ Rumikot no i maso! Om hukuman ku nondo i minongulok-ulok dokoyu; om poiduwon ngai’ ku nondo i nongokimpaan om poulion ku i tulun do nangatanggayan do pisangod dot id walai diyolo’. Silihon ku nondo do kosuahan i tingayam diyolo’ om oinsanan nopondo o pomogunan do mamarayou diyolo’. ²⁰ Rumikot no o maso! Om pogulion ku nondo dot id diya’ i tulun nu di nokotompias; om pobontugon ku nondo iya’ do pointongkop diti pomogunan om posimbayanon kawagu ku iya’,’’ ka dau. Iyo noddi o pinoboros do TUHAN.