SAKARIA

SAKARIA

¹ Tontok di tulan do kawalu’ di koduwo’d toun di Darius do raja’ do Porsia, om poboroso’ nod TUHAN o boros diti dot id doho’, i Nabi Sakaria, i tanak di Birikia, i manangaki di Ido. ² Om sinunudan oku’d TUHAN, it Osundu Kopio, do momisunud ngai’ di tulun do poingkaa, ’’Otogod tomod oku daa, iyoho’ i TUHAN, di komolohingan dokoyu di gulu po. ³ Nga’ baino’ nopondo om moro-boros oku dokoyu do poingkaa, Guli’ kou no dot id doho’, om gumuli’ oku indo iyoho’ dot id dokoyu. ⁴ Kada’ kou omit di taki-aki dokoyu. Di nopo di gulu po om sinunudan iyolo’ do piro-piro o nabi ku, do mogodu diyolo’ do mingwonsoi’d dusa om it araat. Nga’ a’ i’ iyolo’ minokinongou doho’ om a’ minumboyo’. ⁵ Aiso’ no o songimpasi di taki-aki dokoyu om i piro-piro nabi diri do baino’. ⁶ Sinuhu’ ku om pinoinsan ku i taki-aki dokoyu do pinawaya’ ku di piro-piro o nabi, i susuhuon ku, nga’ a’ i’ diyolo’ pinadul iri om gowoi poddi om noinggorit iyolo’. Om rologo nogiddi iyolo’ om minangakun dot iyoho’, i TUHAN it Osundu Kopio, o minomohukum diyolo’ do miontok di nowonsoi diyolo’ om miagal di nosorou mantad ku do wonsoyon ku,’’ ka dau. ⁷ Tontok di koduwo’d toun di kinosilihan di Darius do raja’, tontok di tadau do koduwo nohopod om apat do tulan di kohopod om iso’ (iri no i tulan do Sibat) om boro-boros no o TUHAN dot id doho’ dot id suang do pinointalang dau dot id doho’ di dongotuong. ⁸ Nokito ku o moloikat do TUHAN do poinsakai’d kuda’ dot aragang. Om undorong no iyau do hiri’d rolot do koguasan do murad dot id iso’ o kinoiyonon dot apatau, om hiri nopod tohuri-huri dau nga’ piro-piro po kawagu o kuda’, do haro o kuda’ dot aragang, om haro ot oposi’ o karagango’, om haro ot opurak. ⁹ Om uhoto’ ku no iyau, ’’Oi Tuan, nunu komoyon diti piro-piro kuda’dti?’’ kangku. Om boros ka dau, ’’Pokitonon tiya’ indo ondung nunu o komoyon diti. ¹⁰ Nga’ iyolo’ nopodti om sinuhu’d TUHAN do mongoi pogontong kopio diti pomogunan,’’ ka. ¹¹ Om boros ka di piro-piro o kuda’ddi do minomisunud di moloikat, ’’Notongkop no dahai iti pomogunan om noilaan no dahai dot aiso’ no o pokukurayan diti pomogunan tu’ naala’ no,’’ ka diyolo’. ¹² Om boros kaddi di moloikat, ’’Oi TUHAN, it Osundu Kopio, turu’ noddi nohopod o toun nu dot otogod do Yorusalim om i kabandaran do Yohuda. Songkuro po koloido’ nu dot otogod om ompunan nu nogi’ iyolo’?’’ ka dau. ¹³ Om simbaro’ nod TUHAN i moloikat diri do boros di koinsasamod tomod. ¹⁴ Om sunudai oku no di moloikat do popoboros di pinoboros do TUHAN, it Osundu Kopio do poingkaa, ’’Osianan oku i’ kopio om agayo o ginawo ku do monongkoilo do Yorusalim, i bandar ku dit olidang. ¹⁵ Om otogod tomod oku di bansa’ dit ongosimbayan om aiso’ o kagangahan. Tu’ tontok di pusus-pususon ku daa o kototogod ku dot id tulun ku, om ruhangai nogi’ di piro-piro o bansa’ddi i koinggoritan di tulun ku. ¹⁶ Om iri noddi o kinogulian ku do hilo’d Yorusalim do mongoi pangampun di bandar diri. Om otonduli’ indo kawagu i Walai’d Sasambayangan dot Agayo om owonsoi kawagu i bandar diri,’’ ka dau. ¹⁷ Om sinuhu’ oku nogi’ di moloikat do popimboros do poingkaa: ’’Boros kad TUHAN it Osundu Kopio do minamatos, osimbayan indo kawagu i bandar dau om uhupan kawagu dau o Yorusalim om songonuon dau i bandar diri,’’ ka. ¹⁸ Om id suang nod pinointalang do suwai om kokito ku no ot apat o sangau do sapi’. ¹⁹ Om uhoto’ ku no i moloikat di minoro-boros doho’, ’’Nunu o komoyon diti sangau’dti?’’ kangku. Om boros ka dau, ’’Iti nopo sangau’dti om poiyaan di piro-piro o pomorintaan dot ongokoris di pinopotompias di tulun do Yohuda, om Israil, om Yorusalim,’’ ka dau. ²⁰ Om pokitono’ oku nod TUHAN dot apat o tulun do sangkaraja’ dot ongkiinigit do dunsul. ²¹ Om uhoto’ ku no iyau, ’’Nunu o kinorikatan diti tulun diti?’’ kangku. Om boros ka dau, ’’Nokorikatan nopo diyolo’ om mongoi ponompurolosi om mongoi pangala’ di piro-piro o bansa’ di minamaraag do pomogunan do Yohuda om i pinopotompias di tulun do hilo’,’’ ka dau.

¹ Om id suang nod pinointalang do suwai om nokito ku o songulun o kusai do kiinigit do tali do ponipong. ² Om boros kangku do minonguhot, ’’Honggo ngoyon nu?’’ kangku. Om boros ka dau do suminimbar, ’’Mongoi oku ponipong do Yorusalim, do mongoi pogontong ondung songkuro o konoruo’ om kalaabo’ do bandar diri,’’ ka dau. ³ Om kokito ku’ddi do luminaang ponong id dosunsudan i moloikat di minoro-boros doho’, om ongoi no o tiso’ di moloikat do suwai solowot dau. ⁴ Om boros kaddi di moloikat dit id gulu dot id moloikat di koduwo, ’’Panangkus kopio om ngoyon i’ sunudai ilo tanakwagu dilo kiinigit do tali do ponipong. Om sunudan no iyau dot adalaan tomod nondo kogumu’ o tulun om tayam-tayam do hilo’d Yorusalim gisom dot a’ no milo’d wansayan do tolig o posorili’. ⁵ Tu’ nakabatos nod TUHAN dot iyau indo o sumiliu’d tolig do miagal do tapui do posorili’ di bandar do mongintirung diri om hilo’ nondo iyau do poingiyon do mikuwo’d sinundu om kagayaan dau,’’ ka dau. ⁶ - ⁷ Om boros kad TUHAN dot id tulun dau, ’’Pinotompias ku iyokoyu dot id koinsanai’d kinoiyonon. Nga’ baino’ nopo, oi tulun di nangatanggayan do pisangod, om poggidu’ kou no do mantad hino’d Babil om gumuli’ no do hilo’d Yorusalim. ⁸ Om isai nopo i sumaap dokoyu om miagal nori do sumaap di koupusan kopio ku,’’ ka dau. Om suhuo’ oku noddi do TUHAN, it Osundu Kopio, do poposunud diti boros dot id piro-piro o bansa’ di minongoi panakau di dapu’ di tulun dau: ⁹ ’’TUHAN indo o sumaap dokoyu, om panakahan kou di susuhuon daa dokoyu di gulu po,’’ ka. Om abayaan nopondo iri, om koilo ngai’ kou nondo do TUHAN, it Osundu Kopio, o minonuhu’ doho’. ¹⁰ Om boros kad TUHAN, ’’Podsinding no dot atataadan, oi tulun do Yorusalim! Tu’ mundorong oku nondo dot id pogialatan dokoyu,’’ ka dau. ¹¹ Om tontok nopondo do maso’ddi om ogumu’ nondo o bansa’d tulun do rumikot dot id TUHAN om sumiliu do tulun dau. Om miyon nondo iyau dot id pogialatan dokoyu, om koilo kou nogindo do TUHAN o minonuhu’ doho’. ¹² Om songonuon nondo kawagu’d TUHAN om silihon dau do dau kopio’d songonuon o Yohuda do hilo’d tana’ dau dit olidang, om Yorusalim nondo o bandar di koupusan kopio dau. ¹³ Kada’ nod haro o tiso’ dokoyu do minghiyo dot id toguang do TUHAN, tu’ rumikot no iyau do mantad hilo’d kinoiyonon dau dit olidang.

¹ Id suang nod pinointalang do suwai om pinokito oku’d TUHAN di Yosua, i Boyoon dot Agayo dot Imam, do poingkakat do hiri’d toguang do moloikat do TUHAN. Om poingkakat nod hiri’d toning di Yosua om i Rogon, do posodia’ nod papasala’ dau. ² Om boros ka di moloikat do TUHAN dot id Rogon diri, ’’TUHAN no o momohukum diya’, oi Rogon! I TUHAN dot osianan do Yorusalim o momohukum diya’. Tu’ iti nopo tulun om miagal pod tompok do kayu di kinodong do mantad id tapui,’’ ka dau. ³ Om hiri no i Yosua do poingkakat do kirasuk dit omurong tomod. ⁴ Om boros ka di moloikat dot id piro-piro o susuhuon dau di hilo’d surga, ’’Ngoyo’ dokoyu iduwo’ ilo rasuk dot omurong do poimpakai diti tulun diti,’’ ka dau. Om boros kaddi dau dot id di Yosua, ’’Noidu’ ku no i dusa nu om onuan ku nondo iya’d rasuk do wagu do pakayon nu,’’ ka dau. ⁵ Om suhuo’ no di moloikat i piro-piro o susuhuon dau do monigar di Yosua do sigar dit opulang. Om wonsoyo’ no diyolo’ o miagal diri, om rosukai diyolo’ iyau do rasuk di wagu. Om poingontong diyolo’ i moloikat do TUHAN. ⁶ Om sunudai noddi di moloikat i Yosua di ⁷ pinoboros do TUHAN do poingkaa, ’’Ondung mumboyo’ ko dot oturan ku om momonsoi ko di karaja’ do nakatahak ku diya’, om kotilombus ko i’ do momohuruan do hiri’d Walai’d Sasambayangan dot Agayo om hiri’d piro-piro o natad do hilo’. Om pokinongohon ku indo o sambayang nu do miagal do pokikinongou ku do sambayang di moloikat dot id toguang ku. ⁸ Iyo nopoddi om pokinongou no kopio, oi Yosua, i Boyoon dot Agayo dot Imam, om iyokoyu it imam do suwai. Om iyokoyu no o poiyaan di maso dot osonong dot id dabantalan. Om pointalangon ku nondo i susuhuon ku di roitan dot i ’Tolid’ do tontok diri! ⁹ Poilihon ku nondo dot id dotoguangan di Yosua ot iso’ o watu di turu’ o sunduk. Om pokikiron ku nondo o tulis do hiri. Om insan no o tadau do pataamon ku o dusa do mantad id pomogunan diti. ¹⁰ Om orikot nopondo i tadau’ddi om sompori-pori kou nopondod mangalap di songkoduwo dokoyu do rumikot do mongoi pomurimon di kouludan om kosimbayanan do hiri’d kabun dot anggur om koguasan dot ara dokoyu,’’ ka dau.

¹ Om rikot no kawagu i moloikat di minoro-boros doho’ om ngoyo’ oku no dau posikai, do miagal pod minomosik do tulun di koodop. ² ’’Nunu ot okito nu?’’ ka dau do minonguhot doho’. Om boros kangku’d suminimbar, ’’Okito ku ot iso’ o potimpakan do lampung do tamas do winonsoi. Hiri nopod dompok kopio’ddi om haro o mangkuk do poiyanan do tumau. Om hiri nod potimpakan do lampung do pointutuk di mangkuk diri om haro o turu’ o lampung do pointimpak, om otikid nopori do posusukan do turu’ o rombu. ³ Om haro o duwo kayu’d saitun do miampaping di potimpakan do lampung,’’ kangku. ⁴ Om uhoto’ ku no i moloikat, ’’Nunu o komoyon ngai’dti?’’ kangku. ⁵ ’’A’ ko toi koilo?’’ ka dau do minonguhot doho’! ’’Amu’, a’ oku i’ koilo, oi Tuan,’’ kangku. ⁶ Om sunudai oku no di moloikat do poboros dot id di Sorubabil diti boros do mantad id TUHAN do poingkaa, ’’Kamanang ko i’ nga’ okon i’ ko’ i kokoriso’ do soudor, ko’ i kokoriso’ nu o papamanang, suwai ko’ i Rusod ku. ⁷ Irad piya daa do nuluhon o kogoyoo’ di kaantob diya’ nga’ oidu’ i’ iri. Om wonsoyon nu indo kawagu i Walai’d Sasambayangan dot Agayo. Om soira’ nopondod powonsoyon nu i watu di kolimpupuson no do powonsoyon om mimboros ngai’ nondod opuhod i tulun dot, ’Olumis, olumis!’ ka,’’ ka. ⁸ Om haro po kawagu o pinoboros do TUHAN dot id doho’. ⁹ Boros ka dau, ’’Nokowonsoi nod i Sorubabil i watu do poimpahan di Walai’d Sasambayangan dot Agayo om opongo indo dau i Walai’d Sasambayangan dot Agayo’ddi. Om abayaan nopondo iti om koilo nogindo kopio i tulun ku dot iyoho’ o minonuhu’ diya’ dot id diyolo’. ¹⁰ Oluhoi no daa o ginawo diyolo’ tu’ a’ i’ kosongkuro o koburuon di wonsoyon diyolo’. Nga’ okito indo diyolo’ i Sorubabil do tumuntun do maal di Walai’d Sasambayangan dot Agayo, om ongotood nondo iyolo’,’’ ka dau. Om boros ka di moloikat dot id doho’, ’’Ilo’ nopo turu’ o lampung nga’ poiyaan di turu’ o mato do TUHAN, i miontong do pointongkop diti pomogunan,’’ ka dau. ¹¹ Om uhoto’ ku no kawagu iyau, ’’Nunu o komoyon dilo duwo guas do saitun do miampaping dilo potimpakan do lampung? ¹² Om nunu o komoyon dilo duwo o raan do saitun dot id toning dilo duwo o solunsug do tamas, i koluyungon di tumau do saitun?’’ kangku. ¹³ Om boros ka dau dot id doho’, ’’A’ ko toi koilo?’’ ka dau. ’’Amu’, a’ oku i’ koilo, oi Tuan,’’ kangku. ¹⁴ Om boros kaddi dau, ’’Iti no i duwo tulun do nopili’d Kinorohingan om i siniliu dau do mogobi-obi’ dau, i TUHAN do koinsanai’d pomogunan,’’ ka dau.

¹ Om ontong oku no kawagu, om kokito ku no o karatas do linopi do mintulud. ² Om uhoto’ oku no di moloikat ondung nunu ot okito ku. Om simbaro’ ku no iyau dot, ’’Okito ku ot iso’ o karatas do linopi do mintulud. Konoruo’ nopoddi om siam o mito, om kalaabo’ no om apat om satanga’ mito,’’ kangku. ³ Om boros kaddi dau dot id doho’, ’’Ilo’ nopo om pinotulisan di popol dot id pointongkop diti pomogunan. Om hiri nopod sampaping di karatas diri om pinotulisan do boros dot oinsanan nopondo o gampanakau dot ouyung do mantad hiti’d pomogunan diti; om hiri nod sampaping kawagu om pinotulisan dot oinsanan nopo dot ouyung i tulun di mongudut do sumumpa’. ⁴ Om boros kad TUHAN it Osundu Kopio, om porikoton nondo dau i popol diri, dot id pointikid-tikid di walai di gampanakau om i walai di mongudut do sumumpa’. Om oontok kasai’ nopondo i walai diyolo’ddi do popol diri do gisom dot angaraag,’’ ka dau. ⁵ Om intalang po kawagu i moloikat diri om boro-boros nod, ’’Ontong pogi’! Haro po kawagu o rumikot,’’ ka dau. ⁶ ’’Nunu’ri?’’ kangku’d minuhot. Om boros ka dau, ’’Balatak, om iri no o poiyaan do dusa do koinsanai’dti pomogunan,’’ ka dau. ⁷ Iri nopo balatak diri om kisompon do tambaga’. Om tontok di poingontong oku, om pinoukab nogi’ i sompon, om id suang nopo di balatak diri nga’ haro o songulun o tondu’ do poirikau’d hiri. ⁸ Om boros ka di moloikat, ’’Iti nopo tondu’ om poiyaan do karaaton,’’ ka dau. Om pososoko’ no dau kawagu i tondu’ddi do hiri’d balatak om posompono’ no i sompon. ⁹ Om tingaha’ oku no om kokito ku o duwo o tondu’ do tumulud do kumaa ponong id doho’ om kitalad iyolo’ dit okoris tomod do miagal pod talad do montis dit angagayo. Om ngoyo’ no diyolo’ tangahai i balatak diri om tulud no, do pointangau i balatak diri. ¹⁰ Om uhoto’ ku no i moloikat, ’’Honggoon diyolo’ ilo balatak dilo’?’’ kangku. ¹¹ Om boros ka dau, ’’Hiloon id Babil. Om wansayan nondo diyolo’d walai do tingolig ilo’ do hiloo’. Om opongo nopondo i walai do tingolig diri om pohirion nondo i balatak diri do maan do tukuon,’’ ka dau.

¹ Om haro po kawagu o pinointalang dot id doho’. Om baino’ noo om nokito ku ot apat o korita’-kuda’ do don sumasangod do minimbulai dot id pialatan do duwo o nulu-nulu do tambaga’. ² Iri nopo korita’-kuda’ di koiso’ om ginayat do kuda’ dit angaragang, om iri no koduwo om ginayat do kuda’ dit ongoitom, ³ om iri no kotolu om ginayat do kuda’ dit ongopurak, om iri no kaapat om ginayat do kuda’ di balang-balang. ⁴ Om uhoto’ ku noddi i moloikat, ’’Oi Tuan, nunu o komoyon diti korita’- kuda’dti?’’ kangku. ⁵ Om boros ka dau, ’’Iti no it apat o tongus do mantad id apat o kinoiyonon; koririkot diyolo’ do mantad hilo’d dotoguangan do TUHAN do koinsanai’dti pomogunan,’’ ka dau. ⁶ Iti nopo korita’-kuda’ do gayaton di kuda’ dot ongoitom om pakayaan ponong id utara, do mongoi’d hilo’d Babil, om iri no kuda’ dot ongopurak om pakayaan ponong id kotonobon, om iri no kuda’ do balang-balang om pakayaan ponong id salatan. ⁷ Om tontok di suminoliwan i kuda’ di balang-balang diri, nga’ a’ no iyolo’ kaandad-andad do kaangayan kapagantangai diti pomogunan. Om boros ka di moloikat, ’’Ngoyo’ no dokoyu antangai iti pomogunan!’’ ka dau. Om ngoyo’ no diyolo’ antangai. ⁸ Om giakai oku noddi di moloikat, ’’Iri nopo kuda’ di pinakayaan do hilo’d Babil om pinoposogi-sogit do kototogod do TUHAN,’’ ka dau. ⁹ Om poboroso’ nod TUHAN dot id doho’ o boros diti. ¹⁰ Boros ka dau, ’’Ngoyo’ i porsombahan di pinopuhawang di Hildai, om i Tobia, om i Yodaya, i piro-piro tulun di wagu koguli’ do mantad id pomogunan do pisangod. Om igitan no i porsombahan diyolo’ddi om tumilombus nod mongoi do hilo’d walai di Yosia, i tanak di Sipania. ¹¹ Momonsoi nod tupi’ do don raja’ do pirok om tamas di pinatahak diyolo’ o wonsoyon, om potupion i’ iri di Yosua, i Boyoon dot Agayo dot Imam, i tanak di Yosadak. ¹² Om sunudan no iyau do poingkaa o boros do TUHAN, it Osundu Kopio, ’Iri nopo tulun di roitan dot I Tolid om minggayo nondo do hiri’d koundorongon dau om wonsoyon nondo kawagu dau i Walai’d Sasambayangan dot Agayo di don TUHAN. ¹³ Om iyau no i momonsoi di walai’ddi om iyau o kaanu do karayahan do miagal do don raja’, om iyau o momorinta’ do tulun dau. Om haro nondo o songulun ot imam do mingkakat do hiri’d toning do tirikohonon dau di don raja’, om miuhup nondo iyolo’ do kumaraja’ dot id suang do kosimbayanan om kouludan,’ kanto. ¹⁴ Om iri nopondo tupi’ do don raja’ diri om poopion do hilo’d Walai’d Sasambayangan dot Agayo do maan do kopomuhandaman di Hildai, om i Tobia, om i Yodaya om i Yosia. ¹⁵ Om haro nondo o tulun di poingiyon do hilo’d sodu’ do rumikot do mongoi uhup do momonsoi kawagu di Walai’d Sasambayangan dot Agayo. Om owonsoi nopondo kawagu iri om koilo nogindo iyolo’ dot iyoho’, i TUHAN it Osundu Kopio, o minonuhu’ diya’ dot id diyolo’. Om abayaan ngai’ i’ iti ondung umboyoon no kopio dokoyu i pinonuhuan ku dokoyu, iyoho’ i TUHAN, i Kinorohingan dokoyu,’’ ka dau.

¹ Tontok di kaapat do toun di Raja’ Darius do momorinta’, di tadau’d kaapat do tulan di kosiam (i tulan do Kislip), om boro-boros no o TUHAN dot id doho’. ² Sinuhu’ di tulun do Baitol i Sarisir, om i Rigim-Milik do miwoyo’ di tulun diyolo’ do mongoi’d hiri’d Walai’d Sasambayangan dot Agayo do TUHAN, it Osundu Kopio, do mongoi sambayang do mokianu’d barakat do TUHAN, ³ om mongoi ponguhot di piro-piro ot imam om i piro-piro o nabi do tuhoton diti, ’’Potilombuson po tuu dahai i pogigihad do kinaraagan do Walai’d Sasambayangan dot Agayo, om sumambayang do mikuwo’d puasa do pointikid di tulan do kolimo do miagal di nowonsoi dahai do piro-piro toun do koloido’?’’ ka diyolo’. ⁴ Om iti no o boros do TUHAN do pinoboros dau dot id doho’. ⁵ Boros ka dau, ’’Sunudan no i tulun di poingiyon do hiti’d pomogunan diti om i piro-piro ot imam, do tontok nopo di sumambayang iyolo’ do mikuwo’d puasa, om di mogihad iyolo’ do tontok do tulan do kolimo om tulan do koturu’ do solinaid do turu’ nohopod o toun diri, om okon i’ ko’ pomusou doho’. ⁶ Om tontok di minoginakan om minonginum-nginum iyolo’ om maan no diyolo’ iri do ponguru di korohian do tinan diyolo’,’’ ka dau. ⁷ Om iri no o pinoboros do TUHAN do pinolombus di piro-piro o nabi dit id gulu po, do tontok di maso pod osimbayan o bandar do Yorusalim om di poimponu’ pod tulun i bandar diri. Om di maso pod ogumu’ o tulun do poingiyon do hiri’d kabandaran do posorili’ di bandar dot agayo, om hilo’d kinoiyonon do ponong id salatan om hilo’d guas do nuluhon di ponong id kotonobon. ⁸ Om poboroso’ nod TUHAN, it Osundu Kopio, o boros diti dot id doho’, ⁹ ’’Di nopo di gulu po om sinunudan ku o tulun ku do boros diti. ’Mositi’ nod antaan-taan kopio dokoyu om owonsoi i’ it otulid, om mositi’ nod popointalang kou do kopuhawango’ om kosianan dot id koinsanai’d tulun. ¹⁰ Kada’ dokoyu inggorito’ i tongoondu’ do nopuadan, om i tangaanak dot aiso’ o molohing, om i tulun do bansa’d suwai di poingiyon do poirolot dokoyu, ko’ isai nopo i kikosusaan. Om kada’ kou pogihum do ralan do pokoruol do tulun do suwai,’ ka. ¹¹ Nga’ pinokodou nogi’ di tulun ku o ginawo diyolo’ om a’ iyolo’ minokinongou. ¹² Om pinokodou diyolo’ o ginawo diyolo’ do gisom do miagal pod watu kokodou. Om kotogod oku noddi tomod tu’ a’ i’ iyolo’ tuminanud di ponudukan ku do pinolombus di piro-piro o nabi ku di gulu po. ¹³ Om a’ oku no suminimbar di sambayang diyolo’. Tu’ a’ i’ iyolo’ minokinongou do tontok di minoro-boros oku. ¹⁴ Om miagal oku poddi do tongus dot opuhod do minonilib diyolo’ tu’ pinakaa ku iyolo’ dot id pomogunan do suwai. Om nopogitotongkiadan poddi iti tana’ dot osonong, om aiso’ no songulun piya do poingiyon do hiti,’’ ka dau.

¹ Om poboroso’ nod TUHAN it Osundu Kopio, o boros diti dot id doho’, ² ’’Orohian oku no daa kopio do monguhup do Yorusalim tu’ osianan oku i’ kopio di tulun do hilo’, gisom do nobinsuhu’ oku’ddi do tumogod di pisangod dau. ³ Gumuli’ oku indo do hilo’d Yorusalim, i bandar ku dit olidang, om mundorong oku’d hilo’. Om roitan nondo’ri do bandar dit otorodok, om iri no nuluhon do TUHAN it Osundu Kopio, om roitan do nuluhon dit olidang. ⁴ Om songirikau nondo kawagu do hiri’d pogisasalawatan do hiri’d bandar i komolohingan no, om i taki-aki om i todu-odu’ dot ongkisukud poo do gama’ do komolohingo’. ⁵ Om iri nondo karalan-ralanan nga’ oponu’ pod tangaanak do kusai om tondu’ do minganak-anak. ⁶ Om a’ no doti’ daa milo’d owonsoi o miagal diti dot osorou di noolu-olu’ do bansa’ddi, nga’ milo ku i’ iti do wonsoyon. ⁷ Om posoliwanon ku nondo i tulun ku do mantad id piro-piro o pomogunan do pisangod diyolo’. ⁸ Om pogulion ku iyolo’ do mantad hilo’d koulayon om hilo’d kotonobon, om poiyonon ku nondo iyolo’ do hilo’d Yorusalim. Om osiliu nondo iyolo’d tulun ku, om osiliu oku iyoho’ do Kinorohingan diyolo’, do momorinta’ diyolo’ do mikuwo’d otorodok om otulid,’’ ka dau. ⁹ Boros kad TUHAN dot id tulun dau, ’’Pokoriso’ no ginawo dokoyu! Tu’ rongo-rongohon no dokoyu o boros do miagal di pinoboros di piro-piro o nabi do tontok di powonsoyo’ i’ i pinoimpahan di winonsoi kawagu iti Walai’d Sasambayangan dot Agayo. ¹⁰ Tu’ tontok dit a’ po norikot o maso’ddi om aiso’ i’ o songulun piya do milo’d mamagadsi’ do tulun ko’ moniwa’ do tayam-tayam, om aiso’ o kosimbayanan tu’ gangahon nopo do pisangod. Om pinogitotogod ngai’ ku i tulun. ¹¹ Nga’ baino’ nopo, om suwai no o wonsoyon ku dot id bansa’dti di noolu-olu’. ¹² Osimbayan indo iyolo’ do patanom di totonomon diyolo’. Om mongua’ it anggur diyolo’, om posuni do totonomon iti tana’, om asaru’ do rumasam. Patahakon ngai’ ku nopondo o barakat diti dot id tulun ku di maso pod poimpasi, do mantad id bansa’dti. ¹³ Oi tulun do Yohuda om Israil! Di nopo di gulu po om poingkaa o pomomopol di tulun do bansa’d suwai, ’Oontok kou po daa iyokoyu do kosusaan do miagal di nokoontok do Yohuda om Israil,’ ka. Nga’ posion ku i’ iyokoyu om mogiboro-boros indo i bansa’d suwai do poingkaa, ’Maha’ daa om kaanu ko’d barakat do miagal di naanu do Yohuda om Israil!’ ka. Iyo nopoddi om pokoriso’ no o ginawo dokoyu om kada’ kou kooris,’’ ka dau. ¹⁴ Om boros kad TUHAN, it Osundu Kopio, ’’Tontok di pinotogod oku di komolohingan dokoyu, om pomusorou oku noddi do poporikot do hukuman dit awagat dot id diyolo’, om a’ ku no winolihan o pomusarahan ku, tu’ wonsoyo’ ku nopo kopio i nosorou mantad ku. ¹⁵ Nga’ baino’ noddi om mamarakat oku no do tulun do Yorusalim om Yohuda. Om kada’ kou nondo kooris. ¹⁶ Om iti no o piro-piro ponuhuan dit apatut do wonsoyon dokoyu: Poboroson no it otopot dot id koinsanai’d tulun. Om wonsoyon no it otulid om otopot do hilo’d pomisaraan, i milo do popiulud. ¹⁷ Kada’ kou pomusorou do mogihum do ralan do pokoruol dot isai nopo o tulun, om kada’ kou pongudut do sumumpa’. Tu’ araatan oku i’ di goudut, om it a’ otulid om it orongit,’’ ka dau. ¹⁸ Om poboroso’ nod TUHAN it Osundu Kopio, o boros diti dot id doho’ do polombuson dot id tulun dau, ¹⁹ ’’Iri nopo i sumambayang do mikuwo’d puasa di pohoroon kasai’ daa do tontok di tulan do kaapat, om kolimo, om koturu’, om kohopod, om osiliu nondod poginakanan di poimponu’ do kaarapadan om kataadan dot id pogialatan do tulun do Yohuda. Om mositi’ no dot asanangan kou dit otopot om it otulid,’’ ka dau. ²⁰ Om boros kad TUHAN, it Osundu Kopio, ’’Rumikot no o maso do mongoi’d hilo’d Yorusalim o piro-piro tulun do mantad id ogumu’ o bandar. ²¹ Om mogiboro-boros pondo i tulun do mantad id iso’ o bandar dot id tulun di mantad id bandar do suwai do poingkaa, ’Kainou mongoi tuku’ dot id TUHAN, it Osundu Kopio, om mongoi sambayang do mokibarakat dau. Kainou pogi’ tumanud dahai!’ ka. ²² Om ogumu’ nondo o tulun om ogumu’ o bansa’ do mantad id pomogunan dit ongokoris do mongoi do hilo’d Yorusalim do mongoi sambayang dot id doho’, i TUHAN it Osundu Kopio, do mokianu’d barakat. ²³ Om tontok nopondo do maso’ddi om haro i’ o hopod o tulun do bansa’d suwai do mongoi rapou do songulun o Yohudi om momoros dot, ’Orohian iyahai do kaanu do kolumaagan do miagal dokoyu, tu’ nokorongou iyahai do barakatan kou’d Kinorohingan,’ ka,’’ ka dau. Iyo noddi o pinoboros do TUHAN, it Osundu Kopio.

¹ Poingkaa no o boros do TUHAN: Nokoboros no dau do momohukum iyau do pomogunan do Hadrak om bandar do Damsik. Okon i’ ko’ iri no sinakagon dot Israil o songonuon do TUHAN, suwai ko’ iri nogi’ i bandar dot agayo do pomogunan do Siria nga’ don TUHAN i’. ² Pomogunan do Hamat, i poiwolit do pomogunan do Hadrak, nga’ don TUHAN i’, om iri nogi’ i bandar do Tirus om Sidon, do mitonggoi di toilaan di tulun do hilo’. ³ Minomonsoi o Tirus do tolig dau om minonimung nogi’ do pirok om tamas dot ogumu’ gisom do miagal pod pupuk do hilo’d ralan o kogumuo’ddi! ⁴ Nga’ ngoyon indod TUHAN onuo’ o koinsanai di haro dot id Tirus. Om pataamon nondod TUHAN i kakayaan do bandar diri do hilo’d rahat om ouu dot osorob i bandar diri. ⁵ Om ooris nondo i bandar dot Askilon do kokito’ddi, om kopuriman do moddosi o bandar do Gasa. Om iyo nogiddi ot Ikron tu’ aiso’ nondo o pagandasan dau. Oidu’ nondo i raja’ do Gasa, om opogitotongkiadan ot Askilon. ⁶ Om iri nondo i tulun do sinakagon do piro-piro o bansa’ o poingiyon do hilo’d Asdod. Boros kad TUHAN, ’’Intingayamon ku nondo iti tulun do Pilistin dit angasawat o ginawo. ⁷ Om a’ nondo iyolo’ mangakan do daging do mitonggoi’d raha’, ko’ nunu nopo i taakanon do pogoduhan. Osiliu ngai’ nopondod tulun ku, i tulun di noolu-olu’ do poimpasi, om kohompit di tulun ku om osiliu dot iso’ o pinuruan do sompiiyon dot id suang do payat do Yohuda. Om osiliu do tulun ku i tulun dot Ikron do miagal di tulun do Yobus di gulu po. ⁸ Om intirungan ku nondo i pomogunan ku om antaban ku o pisangod di maya’d hiri. Om a’ ku pologoson i tulun dot araat do monginggorit kawagu di tulun ku. Tu’ nokito ku no o kinoinggoritan di tulun ku,’’ ka dau. ⁹ Kotood kou no, kotood kou no, oi tulun do Sion! Pimpangkis nod atataadan, oi tulun do Yorusalim! Antangai pogi’ nga’ rumikot no dot id dokoyu i raja’ dokoyu! Rumikot iyau do mikuwo’d kataadan do nakamanang, nga’ osiriba’ i’ o ginawo dau do poinsakai’d kaladai — poinsakai’d kaladai dit okoro’ po di pagagandaran. ¹⁰ Om boros kad TUHAN, ’’Pataamon ku nondo i korita’-kuda’ do don sumasangod di hilo’d Ipraim om punsoon ku i kuda’ do hilo’d Yorusalim; om raagon ngai’ ku i pana’ do maan do sumangod. Om iri nondo i raja’ dokoyu o papaharo do piuludan dot id pogialatan do bansa’; kogoyoo’ nopo do pomorintaan dau om mantad id rahat do tiso’ om gisom do korikot dot id rahat do suwai, mantad hilo’d Bawang dot Iprat om gisom do hilo’d tisan diti tana’,’’ ka dau. ¹¹ Om boros kad TUHAN dot id tulun dau, ’’Polobuson ku i’ o tulun nu, poiduwon ku i’ iyolo’ do mantad id pomogunan do pisangod, i miagal pod torobong dot aiso’ o waig. Tu’ haro i’ o tumpongo ku dot id dokoyu, i pinogirot do raha’ do porsombahan di sinumbali’. ¹² guli’ kou no, oi tulun di natanggayan do pisangod, iyokoyu i haro noddi o pagandasan. Guli’ kou no do hilo’d kinoiyonon dit intirungon dokoyu. Sunudan ku iyokoyu do dinondo, do barakatan ku indo iyokoyu dot induwo kogumu’. ¹³ Pakayon ku nondo o Yohuda do miagal di pawakasan do pana’ di pakayon do soudor, om Israil no om miagal di pana’ di papanaon no. Om pakayon ku nondo i tulun do Sion do miagal do gayang, do sumaap di tulun do Yunani,’’ ka dau. ¹⁴ Om mintalang nondo o TUHAN dot id tulun dau; om pawakason dau i pana’ dau do miagal do kodumaat. Pounion nondod TUHAN, it Asawat Kopio, i torumpit, do tanda’d sumangod, om rumikot iyau do mikuwo’d tongus dot opuhod do mantad hilo’d salatan. ¹⁵ Intirungan id TUHAN, it Osundu Kopio, i tulun dau, om patayon diyolo’ i pisangod diyolo’. Om mimpangkis pondo iyolo’ dot id pisangadan do miagal di tulun di naawuk, om paawason diyolo’ o raha’ di pisangod diyolo’. Om miagal pondo iri do raha’ di porsombahan do sinumbali’ do potuntugon do hiri’d pananaraban do porsombahan. ¹⁶ Om orikot nopondo o tadau’ddi, om poiduwon nondod TUHAN i tulun dau, do miagal di gompomogompi’d dumba’, do popoidu’ di dumba’ do mantad id koligagaanan. Om mogulinau nondo iyolo’ do hilo’d pomogunan do TUHAN do miagal do watu dit olumis om it agayo o gatang di mogulinau dot id tupi’ do raja’. ¹⁷ A’ nondo ogina-gina’ o kosonongo’ om kolumiso’ di pomogunan diri! Om kumoris nondo i tulun dit ongomulok po do kaakan di gandum om koinum di waig dot anggur do hilo’.

¹ Pokianu nod TUHAN do rasam do tontok di momuroun kawagu o kayu. Tu’ TUHAN i’ o poporikot do haun di kirasam om rasam dit asapou, om otomou i’ i koumaan do koinsanai’d tulun. ² Mongoi o tulun uhot do tingolig om i mogogontong do nasip, nga’ isimbar nopo dot aanu diyolo’ om tudut ngai’ no om it aiso’ i’ o komoyon. Haro nogi’ i poposuhut do komoyon do nipi nga’ mamalid no dokoyu iri; tu’ aiso’ i’ o guna’ di ponginsasamod diyolo’. Om gowoi poddi om minghombo poo o tulun do miagal do dumba’ di natagak, om id suang iyolo’d kosusaan tu’ aiso’ i’ o boyoon diyolo’. ³ Om boros kad TUHAN, ’’Otogod oku no kopio di bansa’d suwai di momorinta’ di tulun ku, om hukuman ku no iyolo’. Iri nopo tulun do Yohuda om iyoho’ i’ o sanganu, om iyoho’ i TUHAN dit Osundu Kopio, o momogompi’ diyolo’. Om iyolo’ no silihon ku’d kuda’ do don sumasangod dit ongokoris kopio. ⁴ Om id pogialatan no diyolo’ o pomilian ku do pomorinta’, om boyoon, om boyoon do soudor do momorinta’ diti tulun ku. ⁵ Om iri nopondo tulun do Yohuda om miagal di soudor do nakamanang tu’ mingulok di pisangod diyolo’ do miagal po di burutak di hilo’d karalan-ralanan. Om sumaap nondo iyolo’ tu’ uhupan i’ iyolo’d TUHAN, om iri piya nondo i pisangod diyolo’ do songinsakai’d kuda’ nga’ aala’ i’ diyolo’. ⁶ Pokorison ku indo i tulun do Yohuda; om posion ku i tulun dot Israil. Osianan oku i’ diyolo’ om poulion ngai’ ku i’ iyolo’ do hilo’d pomogunan diyolo’. Om miagal pondo dot a’ ku iyolo’ insan kadaai. Iyoho’ no o TUHAN, i Kinorohingan diyolo’, om simbaron ku o sambayang diyolo’. ⁷ Om okoris pondo do miagal do soudor i tulun dot Israil. Om ooropod do miagal di tulun do nokoinum do waig dot anggur. Om osorou kasai’ indo di sinakagon diyolo’ o kinamanangan diti do gisom dot alaid, om otood tu’ i winonsoi do TUHAN dot id diyolo’ o kataadan. ⁸ Lohowon ku nondo i tulun ku, om timungon ngai’ ku iyolo’. Om poiduwon ku iyolo’ om posopohon ku do miagal di gulu po. ⁹ Mulong pod nokotompias ku daa iyolo’ dot id pogialatan do bansa’, nga’ hilo’ piya’d sodu’ nga’ osorou kasai’ oku i’ diyolo’. Om apasi i’ iyolo’ om i tangaanak diyolo’ om mogiwoyo-woyo’ indo iyolo’ do gumuli’ do hilo’d pomogunan diyolo’. ¹⁰ Poulion ku nondo iyolo’ do mantad hilo’d Masir om hilo’d Asur. Om poundorongon ku iyolo’ do hilo’d pomogunan diyolo’. Om poundorongon ku nogi’ iyolo’ do hilo’d Giliad om hilo’d Libanon; gisom dot oponu’ nopondod tulun i pomogunan. ¹¹ Om soira’ nopod kawaya’ iyolo’ do rahat do kosusaan, om iyoho’ i’ i TUHAN, o rumuba’ di tumbak; om tumuu nopondo i hiri’d daralom do Bawang do Nil. Om koinsiriba’ nondo ot Asur tu’ asawat i’ o ginawo dau. Om Masir tu’ okoris nga’ oidu’ indo o kuasa’ dau. ¹² Pokorison ku nondo i tulun ku; om sumambayang nondo om mumboyo’ iyolo’ doho’. Iyoho’ no, i TUHAN, o minomoros diti,’’ ka dau.

¹ Poiwango’ ino totobon nu, oi Libanon, om osorob i’ do tapui ino kayu sedar nu! ² Ihad no, om pillompud nod mihad, oi kayu sedar, nahaba’ no i kayu sedar, nangahaba’ no i kayu dot ongosonong! Ihad no, om pillompud nod mihad oi kayu tarbantin do hilo’d Basan tu’ nangatagad no i puru’! ³ Mingihad pod atatangaban i piro-piro o pomorinta’; aiso’ noddi i kagayaan diyolo’! Pokinongou nod garom do singa do hilo’d gouton, naraag no i puru’ do panakawalai diyolo’ do poinsusui di Bawang do Yordan! ⁴ Om boros kad TUHAN i Kinorohingan, dot id doho’, ’’Pingiyo-iyo no di gompomogompi’d dumba’ di potisumbolion no i dumba’ do pigompian dau. ⁵ Om patayon nondo di sanganu di dumba’ i dumba’ diyolo’, om iyo piya’ddi nga’ a’ i’ iyolo’ ohukuman. Om pobolion no diyolo’ i daging di dumba’ddi om mimboros nod, ’Royohon no o TUHAN! Tu’ kaya’ toko’ noddi!’ ka no diyolo’. Om iri piya i gompomogompi’ di dumba’ nga’ a’ no osianan di dumba’,’’ ka dau. ⁶ Boros kad TUHAN, ’’A’ oku nondo monginsian dot isai nopo do hiti’d pomogunan. Om iyoho’ nondo o poposuang do koinsanai di tulun dot id suang do kuasa’ di pomorinta’ diyolo’. Om raagon nopondo kopio di piro-piro o pomorinta’ iti pomogunan, om a’ ku i’ ahawon iti do mantad id kuasa’ diyolo’,’’ ka dau. ⁷ Om godsiai oku no di tulun di minomoli om i pinapadagang di dumba’ do kumaraja’ do hiri’d dau, om momogompi’ oku’ddi di dumba’ di maan sumbolio’. Om anu oku nod duwo o sukud. Iri nopo tiso’ om pinungaranan ku dot ’’Opuhawang’’ om iri no tiso’ om pinungaranan ku do ’’Kopiisaan’’. Om iyoho’ no o minomogompi’ di dumba’ddi. ⁸ Om a’ ku noddi milo do pususon o ginawo ku dot otogod di tolu o gompomogompi’d dumba’ do suwai, tu’ araatan iyolo’ doho’, om insan i’ o tulan do pinoidu’ ngai’ ku iyolo’. ⁹ Om boros kangku’ddi dot id baanan do dumba’ di gompion ku, ’’Okon oku nondo ko’ gompomogompi’ dokoyu. Baya’ nopod apatai i patayon, om baya’ dot araag i raagon. Om iri nondo it oolu-olu’ nga’ mogipapatai poo,’’ kangku. ¹⁰ Om ngoyo’ ku noddi i sukud di pinungaranan ku dot ’’Opuhawang’’ om tipuo’ ku nori, do mananus di tumpongo do winonsoi’d TUHAN dot id toinsanan o bansa’. ¹¹ Om tadau noddi do natanus i tumpongo’ddi. Om songingontong po doho’ i tulun do momoli om i padagang do dumba’, om oilaan no diyolo’ do moro-boros o TUHAN do pinawaya’ di winonsoi ku. ¹² Om boros kangku dot id diyolo’, ’’Ondung kaakun kou, om patahako’ dokoyu doho’ i gadsi’ ku, nga’ a’ nopo, om poopion nopo dokoyu,’’ kangku. Om godsiai oku no diyolo’ do tolu nohopod o tusin do pirok. ¹³ Om boros kad TUHAN dot id doho’, ’’Ngoyo’ poopio’ ino do hilo’d poopian do tusin do hilo’d Walai’d Sasambayangan dot Agayo,’’ ka dau. Om ngoyo’ ku noddi i tolu nohopod o tusin do pirok diri, i gatang ku dot agayo tomod dot osorou diyolo’, om ngoyo’ ku nori poopio’ do hiri’d poopian do tusin do dong Walai’d Sasambayangan dot Agayo. ¹⁴ Om tipuo’ ku no i kayu di koduwo, i roitan do ’’Kopiisaan’’, om naraag diri o kopiisaan do Yohuda om Israil. ¹⁵ Om boros kaddi do TUHAN dot id doho’, ’’Pingiyo-iyo po kawagu do gompomogompi’d dumba’, nga’ baino’ noo om miyo di gompomogompi’d dumba’ dit araat. ¹⁶ Nokoponuhu’ oku nod tulun do madtamong di baanan do dumba’ ku, nga’ a’ i’ dau tinulung i dumba’ di haro o koligagaanan do kapatayon; om a’ dau ngoyon ihumo’ i dumba’ di natagak, om a’ dau ubatan i nongosuhat, om a’ sumadon i nongoolu-olu’. Suwai ko’ ngoyon nogi’ dau kano’ i dumba’ dit olomu’ kopio om pingiduan dau do sondulu! ¹⁷ Ousung no i gompomogompi’d dumba’ dit aiso’ o guna’! Tu’ tinongkiadan dau i baanan do dumba’. Om pupusan nondo do pisangadan i kuasa’ dau. Om lumomok nondo o longon dau, om mumang bolou i mato dau do ponong id wanan,’’ ka dau.

¹ Poingkaa no o boros do TUHAN do pasal dot Israil, i TUHAN di pinapawalad do tawan, om i minomonsoi diti pomogunan, om i minanahak do koposion dot id tulun. Boros ka dau, ² ’’Silihon ku nondo o Yorusalim do miagal do sansangkir o waig dot anggur; om minum nondo i piro-piro o bansa’ do posorili’ dau om mikorobibi’ pondo iyolo’ do miagal do tulun di naawuk. Om turungkuon nopondo o Yorusalim, om i kabandaran do Yohuda do suwai nga’ kotonggoi nod oturungku’. ³ Nga’ orikot nopondo o maso’ddi om silihon ku nondo o Yorusalim do miagal do watu dit awagat, gisom dot isai nopo i mumbal do mangakat diri om orualan no. Om pogisusugkuon nopondo do koinsanai’d bansa’ do hiti’d pomogunan o soudor diyolo’ do mongoi panangod do Yorusalim. ⁴ Tontok nopondod maso’ddi om tompurolosion ngai’ ku i kuda’ diyolo’ om borulongon ku o pomusarahan di tulun di songinsakai di kuda’. Piantangan ku i’ i tulun do Yohuda nga’ bolohon ku indo i mato di kuda’ di pisangod diyolo’. ⁵ Om moro-boros indo i piro-piro o sompiiyon do Yohuda dot id ginawo diyolo’ dot, ’Onuan id TUHAN, it Osundu Kopio, do kokorisan i tulun dau di poingiyon do hilo’d Yorusalim,’ ka. ⁶ Tontok nopondod maso’ddi om silihon ngai’ ku nondo i sompiiyon do Yohuda do miagal do tapui do hilo’d puru’ ko’ hilo’d tumo di nongoonsok no o gandum, tu’ raagon nondo diyolo’ i piro-piro o bansa’ do hiri’d posorili’. Om aiso’ nondo o koligagaanan di tulun do Yorusalim do poingiyon do hiri’d bandar. ⁷ Om poguluonon ku iyoho’ i TUHAN, do manahak do kamanangan i piro-piro o soudor do Yohuda om iri nopondo i kosuahan dot aanu di sinakagon di Daud om i tulun do Yorusalim om a’ i’ agayo ko’ mantad di kosuahan di naanu do tulun do Yohuda di suwai. ⁸ Om tontok nopondod maso’ddi om intirungan ku indo i tulun do poingiyon do hilo’d Yorusalim om gisom dot iri piya’ndo it oluhoi kopio nga’ koiyo i’ di Daud kokoris. Om woyoon nondo iyolo’ di sinakagon di Daud, i miagal pod moloikat ku. Om iyo po dit iyoho’ kopio o momoyo’. ⁹ Om tontok nopondo do maso’ddi om raagon ku nondo o pointikid-tikid do bansa’ di mumbal do sumaap do Yorusalim. ¹⁰ Om onuan ku nondo i sinakagon di Daud om tulun do suwai do hilo’d Yorusalim do ginawo dit obingampun om it orohian do sumambayang. Om soira’ nopo do mintong iyolo’ di tulun di tinobok diyolo’ do minamatai, om pogihadan nondo diyolo’ iyau do miagal do mogihad di tanak di napatai dit iso’ no daa. Om mogihad tomod nondo iyolo’ do miagal di mogihad do tanak do kusai diyolo’ dit id dotuo di napatai. ¹¹ Om tontok nopondoddi om i nopo mogihad do hilo’d Yorusalim om miagal poddi mogihad di hilo’d Hadad-Rimon kopuhod, i hilo’d rantai do Mogido. ¹² - ¹⁴ Om sompori-pori nopondo do mogihad i piro-piro o sompiiyon do hiri’d pomogunan diri, i sompiiyon di suminolusuk di Daud, om i sompiiyon di suminolusuk di Natan, om i sompiiyon do suminolusuk di Liwi, om i sompiiyon di suminolusuk di Simoi, om koinsanai di sompiiyon do suwai, om sompori-pori nopondo i sompiiyon do mogihad, iri nopondo tongokusai dit id pointikid-tikid do sompiiyon om posuwai-suwai di tongoondu’ do mogihad,’’ ka dau.

¹ Boros kad TUHAN it Osundu Kopio, ’’Orikot nopondo o maso’ddi, om haro nondo o tudan do waig do sumimpulak do pomolidang di sinakagon di Daud om i tulun do Yorusalim, do mantad id dusa om i poniningolig diyolo’. ² Om tontok nopondod maso’ddi om tonuson ngai’ ku nondo i ngaran di tingolig do mantad hiri’d pomogunan diri, om aiso’ nondo o kosorou’ddi. Om patayon ngai’ ku i tulun di momoros do nabi iyau om tonuson ku i korohian do tulun do tumuku’ do tingolig. ³ Om ondung haro o tulun dit osonong do mimboros do pasal dit osiliu dot id dosunsudan, om iri indo i tapa’ om tina’ dau o momisunud dau dot apatut do hukuman iyau’d kapatayon, tu’ tudut i’ i popimboroson dau. Om ondung mangakun kasai’ iyau do nabi iyau, om iri indo tapa’ om tina’ dau o monobok dau do gisom dot apatai iyau. ⁴ Om orikot nopondo o tadau’ddi om aiso’ nondo o nabi dot oondos di nongokito dau dot id pinointalang, ko’ mingiyo-iyo pod nabi o kowoyo-woyoon, ko’ manampakai pod rasuk do nabi do maan do pagakal do tulun. ⁵ Suwai ko’ poboroson nopondo do nabi om poingkaa, ’Okon oku i’ ko’ nabi. Gompongumo oku no do solinaid ku’d poimpasi,’ ka nondo diyolo’. ⁶ Om ondung haro o tulun do muhot dau do poingkaa, ’Nunu o nokosuhat dino kangkab nu?’ ka. Om sumimbar nondo iyau dot, ’Nosuhat oku do hilo’d walai di tambalut ku,’ ka nondo dau,’’ ka dau. ⁷ Om boros kad TUHAN, it Osundu Kopio, ’’Posik no, oi gayang. Om ngoyon i’ saapo’ i gompomogompi’d dumba’ di pakaraja’ dot id doho’! Patayon no iyau om kopogitongkiad-kiad i’ i dumba’. Saapon ku nondo i tulun ku, ⁸ om duwo nondo o bohogian do mantad di tolu o bohogian do tulun dot apatai do pointongkop diti pomogunan. ⁹ Om sompitolu pondo di tolu o bohogian do tulun diri ot apasi. Om lidangan ku nondo iyolo’ do miagal do pirok di sompipion do tapui, om umbalan ku iyolo’ do miagal do tulun di monompipi’ do tamas. Om sumambayang nondo iyolo’ dot id doho’, om simbaron ku nondo iyolo’. Om sunudan ku nondo iyolo’ do tulun ku iyolo’, om okunon diyolo’ do Kinorohingan oku diyolo’,’’ ka dau.

¹ Oruhai no i tadau do kopomutusan do TUHAN. Om panakahan nondo o Yorusalim, om poontong-ontongon kou nopondo do bohogion i pinanakau’ddi. ² Om timungon ngai’ nopondod TUHAN i bansa’ do mongoi sangod do Yorusalim. Om osingolod nondo i bandar, om apanakahan i kawalayan, om ongokasou do tongokusai i tongoondu’. Om songintanga’ nopondo di tulun om atanggayan do pisangod, nga’ iri nopondo suwai om a’ i’ atanggayan do mantad hiri’d bandar. ³ Om sumoliwan nogindo o TUHAN do mongoi saap di bansa’ddi, do miagal di winonsoi dau di gulu. ⁴ Om tontok nopondo do tadau’ddi om mingkakat nondo iyau do hilo’d Nulu- Nulu do Saitun, i ponong id koulayon om gisom do hilo’d kotonobon do mantad id Yorusalim. Om opipitas nondo i Nulu-Nulu do Saitun do mantad hilo’d koulayon om gisom do hilo’d kotonobon, do kubong dit agayo o kopitas. Om kumaa nondo ponong id utara o sampaping di nulu-nulu’ddi om kumaa ponong id salatan o sampaping. ⁵ Om mogidu’ kou nondo do maya’ diti kubong di minomitas di nulu-nulu’ddi. Om mogidu’ kou nondo do miagal di komolohingan dokoyu do tontok di guminuyu’ o tana’ di maso dit i Usia o raja’ do Yohuda. Om rumikot nondo o TUHAN, i Kinorohingan ku do miwoyo’ do koinsanai di moloikat dau. ⁶ Om orikot nopondo o tadau’ddi om aiso’ nondo o tongus dot osogit om aiso’ ot ais. ⁷ Om aiso’ nondo o totuong. Anawau kasai’ nopondo do dangadau, om dongotuong piya nga’ anawau i’. Nga’ TUHAN noo o koilo do maso dot osiliu ngai’ o miagal diti. ⁸ Om orikot nopondo o tadau’ddi, om lumuyung nondo o waig dot oniniting do mantad hilo’d Yorusalim. Om lumuyung nondo o songintanga’ di waig diri do hilo’d Rahat do Napatai om iri no songintanga’ om lumuyung do hilo’d Rahat do Tanga’. Om muyung-luyung kasai’ nopondo i waig diri do tikoompus do toun, di maso do magadau om di maso do rumasam. ⁹ Om TUHAN nondo o raja’ do momorinta’ do pointongkop diti pomogunan; om oinsanan nopondo o tulun do tumuku’ dot id dau, i Kinorohingan, om iso’ pondo o ngaran dau dot otutunan ngai’ diyolo’. ¹⁰ Om alampai nopondo i kinoiyonon do mantad pod hilo’d Giba i ponong hilo’d utara om gisom do hilo’d Rimon, i ponong hilo’d salatan. Nga’ Yorusalim nondo o poinsawat kopio dot id pogialatan di kinoiyonon di hiri’d posorili’; om kogoyoon nopo di bandar diri om mantad po di wawayaan di roitan do Wawayaan do Binyamin om gisom do korikot di wawayaan do roitan do Wawayaan do Linsuk, i kinoiyonon di wawayaan di gulu po, om mantad di Walai’d Akawas do Hananil om gisom di pamagaan dot anggur di don raja’. ¹¹ Om osimbayan ngai’ nondo o tulun do momogun-mogun dot id bandar diri tu’ a’ no orolosi di mongoi pamaraag. ¹² Om porikatan nondod TUHAN do toruol dit araat kopio o koinsanai di bansa’ di minongoi sangod do Yorusalim. Mumang nopondo momos o tinan diyolo’ di maso po diyolo’d poimpasi; om mato om dila’ diyolo’ nga’ mumang nopo momos. ¹³ Om tontok nopondo do tadau’ddi om borulongon nondod TUHAN o pomusarahan diyolo’ om rolosion dau, gisom do tabpaan nopondo diyolo’ i tambalut diyolo’ di pointoning diyolo’ om saapon no diyolo’. ¹⁴ Om sumaap nondo i tongokusai do Yohuda do mogobi’ do Yorusalim. Om onuon ngai’ nopondo diyolo’ i kakayaan di bansa’, i tamas, om i pirok, om i pakayan dot ogumu’ tomod. ¹⁵ Om haro nogi’ o toruol dit araat tomod do rumikot dot id kuda’, om bagal, om unta, om kaladai, om id koinsanai di tayam-tayam do hilo’d kiim do pisangod. ¹⁶ Om oinsanan nopondo i tulun do noolu-olu’ dot id pogialatan di bansa’ di suminangod do Yorusalim do mongoi dot id bandar diri do pointikid do toun, do mongoi tuku’ dot id Raja’, i TUHAN dit Osundu Kopio, om mongoi pamaramai di Tadau dot Agayo do Kinuhub-Kuhub. ¹⁷ Om ondung haro o bansa’ dot a’ mongoi’d hilo’d Yorusalim do mongoi tuku’ dot id Raja’ddi, i TUHAN dit Osundu Kopio, om a’ nondo arasaman i pomogunan diyolo’. ¹⁸ Ondung a’ i tulun do Masir mamaramai di Tadau dot Agayo do Kinuhub-Kuhub, om oontok no iyolo’ do toruol di porikoton do TUHAN dot id pointikid-tikid do bansa’ dit a’ mongoi sambayang. ¹⁹ Om iri no o hukuman do porotuon dot id Masir om id koinsanai’d bansa’, ondung a’ no iyolo’ mamaramai di Tadau dot Agayo do Kinuhub-Kuhub. ²⁰ Om tontok nopondoddi om iri piya i lunsing do hiri’d pakayan di piro-piro o kuda’ nga’ kinikiran ngai’ id boros do poingkaa, ’’Pinotobilang do maan do don TUHAN,’’ ka. Om iri piya’ndo i lansang do hiri’d Walai’d Sasambayangan dot Agayo nga’ miagal i’ di mangkuk do hiri’d dotimbabaan di pananaraban do porsombahan o kogoyoo’d guna’. ²¹ Om oinsanan nopondo i lansang do hilo’d Yorusalim om hilo’d Yohuda do potobilangon do maan do pakayon do sumambayang dot id TUHAN it Osundu Kopio. Om pomolosuan nondo di tulun, di daging di pinatahak do numaan do porsombahan i lansang diri. Om orikot nopondo o maso’ddi om aiso’ nondo o tulun do dumagang do hiri’d Walai’d Sasambayangan dot Agayo di don TUHAN, it Osundu Kopio.