TITUS

TITUS

¹ Oi tanak ku i Titus! Iyoho’ no, i Paulus, i susuhuon do Kinorohingan, om i sinuhu’ di Yesus Kristus, o minonulis diti surat diti. Pinili’ oku om sinuhu’ oku do monulung do tulun di nongopili’ do Kinorohingan om kogirot i’ iyolo’ dot id kotumbayaan diyolo’. Om apatut nogi’ do tudukan ku iyolo’, om kosuhut i’ iyolo’ di ponudukan dot otopot di pinotuduk di tugama’ toko’. ² Iri nopo i ponudukan diri om poingimpou dot id pagandasan do kaanu toko’ nondo do koposion dit otopot kopio om i poingompus. Nakabatos mantad nod Kinorohingan i koposion diri dit a’ po nowonsoi iti pomogunan — Kinorohingan nopo om a’ i’ kopio milo do mongudut. ³ Om pinointalang do Kinorohingan i batos dau’ddi do tontok di maso di natantu’ mantad dau do kopointalangan, do pinointalang dot id suang di boros dau. Om iri nopo i boros diri om iyoho’ o pinaharapan, om popinsusuyon ku’ddi iri do tumanud di nisuhu’ do Kinorohingan, i Gampamasi dati’. ⁴ Oi Titus, iya’ no o tanak kopio ku tu’ notumbayaan goduwo to no do Kristus. Om mogondos oku no dot onuan ko do Kinorohingan i Tapa’, om i Kristus Yesus, i Raja’ do Gampamasi dati’, do barakat om kosimbayanan do ginawo. ⁵ Pinoundorong ku iya’ do hilo’d Krita om ongowonsoi i’ it apatut nu do wonsoyon. Om kopomili’ ko i’ do piro-piro o boyoon do sidang dot id pointikid-tikid do bandar. Om sorohon ngai’ noti potudukon ku diya’: ⁶ Tulun nopo di silihon do boyoon do sidang om mositi’ no dot i tulun dit aiso’ o kabara-barasan, om mositi’ no dot it iso’ noo o sawo, om tangaanak dau nga’ mositi’ no do nongotumbayaan ngai’ do Kristus om okon i’ ko’ i tangaanak dit abantug dot araat o kowoyo-woyoon om it a’ milo do tudukan. ⁷ Komoyon nopod boyoon do sidang om i tulun di mongilo-ilo do karaja’ di dong Kinorohingan, om a’ i’ apatut do haro o kabara-barasan do kowoyo-woyoon dau. Om a’ nogi’ iyau apatut do minggayo-gayo ko’ obintogod, ko’ magagauk ko’ orohian po do monokisongkiwal, ko’ adalaan po do rumohian do tusin. ⁸ Mositi’ no dot orohian iyau do papasalakoi do tulun dot id walai dau, om orohian do momonsoi dit ongosonong, om koporinta’ do tinan dau, om otulid om olidang o kowoyo-woyoon, om osonong o kowoyo-woyoon. ⁹ Om mositi’ no dot igitan kopio dau i ponudukan di kinotumbayaan dau, do miagal di nokotuduk dot id dau. Om koilo indo iyau do monosihat do tulun do poingimpou di ponudukan dit otopot, om popointalang do kasalaan di tulun di sumongkiwal dau. ¹⁰ Tu’ ogumu’ o tulun dot orohian do sumongkiwal, om okon-okon pondo om i tulun di kitugama’ di dong Yohudi di gulu po. Om monipu’ iyolo’ do tulun do suwai, dot i boros dit aiso’ o suang o ponipu’. ¹¹ Iri nopo i tulun do miagal diri om mositi’ no dot oduhan do mimboros, tu’ iri no i ponudukan diyolo’ dit a’ otopot o momorulong dot ogumu’ o sompiiyon. Tu’ kapamansayan nopo diyolo’ do miagal diri om mogihum no iyolo’ do tuntung, dot a’ koontok o ralan do mogihum! ¹² Haro nogi’ o songulun o nabi dot id pogialatan diyolo’, do mantad id Krita do minomoros do poingkaa, ’’Tulun nopod Krita om managalai-galai nopo do mongudut, om miagal po iyolo’ do nintorusan dit orongit, om odoot om akaul iyolo’,’’ ka. ¹³ Om otopot ngai’ i’ i pinoboros di nabi diri. Om iri no o koponudukan nu kopio diyolo’ om gumirot i’ kasai’ iyolo’ dot id ponudukan dit otopot, ¹⁴ om a’ indo iyolo’ tumanud kawagu di tangon-tangon di tulun do Yohudi ko’ tumanud po di piro-piro o toturan di winonsoi di tulun di minada’ di ponudukan dot otopot diri. ¹⁵ Tu’ id tulun nopo dit olidang, om olidang ngai’ no o nunu nopo. Nga’ id tulun nopo di sosomu’ o pomusarahan om it aiso’ o kotumbayaan, om aiso’ i’ o tongoiso’ piya dot olidang, tu’ nososomu’ no o pomusarahan om i kopurimanan do ginawo diyolo’. ¹⁶ Om momoros iyolo’ do kotutun iyolo’ do Kinorohingan nga’ iri nopo i wonsoyon diyolo’ om popointalang i’ dot a’ iyolo’ otumbayaan do Kinorohingan. Om obinsaap iyolo’ om a’ mumboyo’; om iyolo’ no i tulun dit a’ milo do momonsoi dot ongosonong.

¹ Nga’ iya’ nopo oi Titus, om potudukon no i ponudukan dit otopot. ² Om nosihatan no i tongokusai di molohing no, om milo i’ iyolo’d sorou, om osonong o kowoyo-woyoon, om kopusus do korohian do tinan. Om mositi’ no dot otumbayaan kasai’ iyolo’d Kristus, om osianan do tulun dit iso-iso’ o kotumbayaan, om alanut o ginawo do tumimbaba’ do koinggoritan. ³ Om iyo nogiddi, tu’ nosihatan no i tongoondu’ di molohing no, om miontok i’ di kowoyo-woyoon di tulun di nakatahak kopio dot id Kinorohingan o koposi-posion dau o kowoyo-woyoon diyolo’. Om a’ no iyolo’ koino-ino do mongindaraat do tulun do suwai, om a’ koino-ino dot akagasan di tiinumon di kaawuk. Mositi’ no do popotuduk iyolo’ dit ongosonong. ⁴ Om koilo i’ iyolo’ do monuduk di tongoondu’ dit ongomulok po dot osianan do sawo om tangaanak diyolo’. ⁵ Om milo indo iyolo’ do momusorou om olidang o kowoyo-woyoon om osiliu do tina’ dit osonong dot id suang do sompiiyon, om minsiriba’ dot id sawo dau. Om aiso’ indo o tulun do milo do papasala’ di habar do mantad id Kinorohingan. ⁶ Om iyo nogiddi i tulun dit ongomulok po, tu’ tudukan no iyolo’ om milo i’ iyolo’ do momusorou. ⁷ Om mositi’ no do sumiliu ko dot omitanan dit osonong o kowoyo-woyoon dot id suang do nunu nopo. Soira’ nopo do monuduk ko om mositi’ no dot otulid o ponunuduk nu om iso-iso’ kopio o ginawo do monuduk. ⁸ Om poboroson no i boros di haro kopio o komoyon, it a’ milo’d tulun do pasalaon, om ointingayam indo i tulun di sumaap diya’, dot aiso’ o kowoyo-woyoon dit araat do poimpahan diyolo’ do momoro-moros dati’. ⁹ Om i turipon nga’ mositi’ no do minsiriba’ dot id tuan diyolo’, om mumboyo’ ngai’ do ponuhuan diyolo’, om a’ iyolo’ koino-ino do sumongkiwal, ¹⁰ ko’ manakau po. Suwai ko’ mositi’ no do pointalangon diyolo’ o kowoyo-woyoon dit osonong om it otorodok, om iri indo i kowoyo-woyoon diyolo’ddi o kapamarayahan do tulun di ponudukan do pasal do Kinorohingan, i Gampamasi dati’. ¹¹ Tu’ nokointalang nod Kinorohingan o kosianan dau do pamasi do koinsanai’d tulun. ¹² Om iri nopo i kosianan do Kinorohingan diri om monuduk dati’ om a’ toko’ indo momonsoi di kowoyo-woyoon dit a’ miontok do korohian do Kinorohingan om a’ toko’ nondo tumanud di korohian di dom pomogunan. Tu’ notudukan toko’ no do kowoyo-woyoo’ do poimpasi do hiti’d pomogunan diti, do mikuwo’d momusus do korohian do tinan, om otulid o ginawo om otorodok dot id Kinorohingan. ¹³ Om dinondo nopodti om maso toko’ no do magandad di Tadau dit andad- andadon toko’; tu’ tontok nopo do Tadau’ddi om kokito nondo i tulun do hiti’d pomogunan do kagayaan do Kinorohingan, it Agayo Kopio om i Yesus Kristus i Raja’ do Gampamasi toko’. ¹⁴ Pinatahak dau o tinan dau do pinatai do suminowoli dati’ do pinopoidu’ dati’ do mantad id koinsanai’d karaaton, om pinoposiliu dati’ do tulun di nokoidu’ do mantad id dusa om siniliu toko’ddi do tulun dit iyau noo o sanganu, om it aparu’ do momonsoi dit ongosonong. ¹⁵ Om potudukon ngai’ no i pinoboros ku’ddi, om nosihatan no iyolo’ om tudukan no kopio i mokinongou diya’ do mikuwo’d kikuasa’ kopio do monuduk, om kada’ pologoso’ o tongosongulun piya do popoinsiriba-riba’ diya’.

¹ Posorohon no i tulun dit id suang do koinsanai di sidang nu do mositi’ no do minsiriba’ iyolo’ dot id boyoon om id pomorinta’ do pomogunan, om mumboyo’, om posodia’ do momonsoi do koinsanai dit ongosonong. ² Om sunudan no iyolo’ dot a’ mongindaraat do tulun om a’ monokisongkiwal dot isai nopo, suwai ko’ kumosuwau kasai’ no om alamaya’ kasai’ o kowoyo-woyoon diyolo’ dot id koinsanai’d tulun. ³ Tu’ iyati’ di gulu po nga’ basug i’, om napalid om a’ mumboyo’. Om nosiliu toko’ do turipon do mogisuayan o korohian di don tinan om korohian do ginawo; om araat o korohian do ginawo toko’ om mosol, om mogisuli-suli’ dot araatan. ⁴ Nga’ pinointalang i’ do Kinorohingan, i Gampamasi toko’, o kosianan om kosonongo’ dau dot id dati’. ⁵ Om posio’ toko’ noddi dau, nga’ okon i’ ko’ i minomonsoi toko’ dot osonong o kinopomosian dau dati’. Suwai ko’ pinasi toko’ dau dot i Rusod do Kinorohingan o pinawayaan do minamasi, i manahak dati’ do koposion do wagu om kowoyo-woyoon do wagu, dot i linihungan toko’ dau o ralan dau do pinapatahak diri. ⁶ Om pinotuntug do Kinorohingan o Rusod dau dot id dati’, dot i Yesus Kristus i Raja’ do Gampamasi toko’ o pinapatahak. ⁷ Om nokoulud toko’ noddi kawagu dot id Kinorohingan dot i kosianan di Yesus o pinopoulud dati’ om kaanu toko’ noddi do koposion dit otopot kopio om i poingompus, it andad-andadon toko’. ⁸ Om otopot i’ kopio iti boros diti. Om orohian oku do potudukon kopio nu iti, om monotos ngai’ i’ i tulun di notumbayaan do Kinorohingan do momonsoi do karaja’ dit ongosonong om i kiguna’ dot id koinsanai’d tulun. ⁹ Insodu’ kou no do mantad id pogisimbar-simbaran dit aiso’ o guna’, om susui-susui do pasal do sinolusukan, om i pisongkiwalan, om i pisaapan do pasal di Tourat. Tu’ koinsanai’ddi om aiso’ i’ o guna’ om a’ manahak do kountungan. ¹⁰ Om iri nopo i tulun di mamaraag do kouludan dot id suang do sidang, om ngoyon no nosihatai dot insan ko’ induwo; om owonsoi nopondo o miagal diri om kada’ nondo ongoi ponongkokuro-kuro dau. ¹¹ Tu’ oilaan nu i’ do tulun nopo do miagal diri om tulun no dit araat kopio om iri no i dusa dau o popointalang do nakasala’ iyau. ¹² Korikot nopo i Artimas ko’ i Tikikus do suhuon ku do mongoi do hino’d diya’, om lomusan no do mongoi solowot doho’ do hilo’d Nikopolis, tu’ osorou ku’d mundorong oku’d hilo’ do solinaid di maso dot osogit. ¹³ Tumotos no kopio do monulung di Sinas, i luyar diri, om i Apolos, om aiso’ i’ o kokurangan diyolo’ do mamanau iyolo’. ¹⁴ Om mositi’ no do minsingilo o tulun toko’ do momonsoi dit osonong, om koilo i’ iyolo’ do monulung di tulun di kikokurangan kopio, om haro indo o guna’ di koposi-posion diyolo’. ¹⁵ Om koinsanai di tulun di poinsugku’ doho’ nga’ poporikot ngai’ nopo do tabi’ dot id diya’. Om porikoton no o tabi’ dahai dot id tambalut toko’ dit iso-iso’ o kinotumbayaan. Om pokionuon ku no do barakatan ngai’ kou do Tuhan.