SINDING DIT ABANTUG

¹ Sinding di Suliman dit olumis kopio. ² Tungubai oku no dino munung nu; tu’ osonong po ko’ waig dot anggur o kosianan nu. ³ Osonong no kopio o kosingudan do tumau nu; om iyo po di tumau dot osonong o kosingudan do ngaran nu do poposonong do ginawo. Om oinsanan nopoddi o kosumandakan do muhang diya’. ⁴ Powoyoo’ oku, om kaino mogidu’; angatai oku no do hilo’d bilik nu, oi raja’. Om ooropod kito indo goduwo, do miinsian-sian, om miuhang-uhang. Apatut no giya do muhang ngai’ i kosumandakan diya’! ⁵ Oi tongoondu’ do Yorusalim! Oitom oku piya nga’ olumis oku i’, oitom oku piya do miagal di kiim do tulun do Kidar do hilo’d tana’ do kowotuan, nga’ olumis oku i’ do miagal di tirai di walai’d Suliman do don raja’. ⁶ Kada’ oku dokoyu indaraato’, dot oitom oku piya. Tu’ ilo’ i tadau o nokoitom doho’. Tuminogod ngai’ doho’ i tobpinai ku’d kusai, om suhuo’ oku noddi diyolo’ do kumaraja’ do hiri’d kabun dot anggur diyolo’, om gowoi poddi om aiso’ no o maso ku do momogompi’d tinan ku. ⁷ Sunudai oku no, oi kouhangan kopio ku, ondung hinonggo o pinaakan-akanan nu di dumba’ nu? Hinonggo o lungungon diyolo’ di pitangaadau? Nokuro tu’ minog oku pod mongoi rolot di dumba’ do tulun do suwai do mogihum diya’? ⁸ A’ ko toi kotunud di kinoiyonon diri, oi tondu’ ku, dit olumis kopio? Sumusui nopo di tulok di dumba’; om ngoyo’ nopo paakan-akano’ i kambing nu dot id somok di kokiiman di gompomogompi’d dumba’. ⁹ Kabayayat ko no kopio do ginawo, oi koupusan ku, miagal ko po di kuda’ di pamagayat do korita’-kuda’ di Piraun. ¹⁰ Olumis tomod ino pingas nu, om kolumis do tulu nu ino tobuk nu. Om kolikup do liou nu do miagal po di watu dot olumis dit agayo o gatang. ¹¹ Wansayan po dahai iya’ do karo do tamas, dot i dinakatan do pirok do maan do pongillumis. ¹² Tontok nopo di poillii i raja’ do hiri’d toodopon dau, om osingud pod tumau o hiri. ¹³ Iri nopo koupusan ku om osingud pod damar, do tontok di poillii iyau do poulunan do kangkab ku. ¹⁴ Iri nopo koupusan ku om miagal pod sowongkos o tusak do bunga bakung di hilo’d kabun dot anggur dot In-Gidi. ¹⁵ Olumis ko no kopio, oi koupusan ku, olundus ko no kopio, om popointalang do kosianan nu ino mato nu. ¹⁶ Oligkang ko no kopio, oi koginawaan ku, asanangan oku no kopio diya’. Hilo’d kasakat-sakatan o toodopon to. ¹⁷ Iri kayu sedar o torigi do walai to, om kayu sedar o wonsoyon do siling.

¹ Iyoho’ nopo, om miagal nod bunga do mantad hilo’d rantai do Saron, om miagal do bunga bakung do mantad hilo’d guas do nuluhon. ² Iyo po di bunga bakung dot id rolot do rugi, i koupusan ku, dot id rolot do kosumandakan do suwai. ³ Miagal pod guas dot ipol dot id rolot di kayu do hilo’d gouton, i koginawaan ku, do katalad di katanakwoguan do suwai. Orohian oku do mirikau do hiri’d lungung do kayu’ddi, om i tua’ do kayu’ddi nga’ oomis dot aakan ku. ⁴ Nangatan oku dau do hiri’d walai do poginakanan, om poimponu’ iyau do kosianan do montong doho’. ⁵ Pokoriso’ oku no dot i waig dot anggur dot oomis o popokoris, om posonongo’ o topurimanan ku, dot i tua’ dot ipol o poposonong, tu’ i muhang o tosiliu do toruol ku, om olomok oku no. ⁶ Iri nopo longon dau’d gibang om mangahang do tulu ku, om iri no longon dau’d wanan om mimpuwai doho’. ⁷ Oi tongoondu’ do Yorusalim, pamatos kou no, dot id paus om id tambang dit ongokilos, dot a’ kou mamagangau dahai do maso dahai’d miuhang-uhang. ⁸ - ⁹ Pokinongou pogi’! Hati no i koupusan ku do rumikot! Osiau tomod iyau do manangkus. Simbul-simbulan nopo dau o konuluhanan om konulu-nuluan. Poingkakat no iyau do hilo’d tirung do limput, om mikorowo-rowo do mogihum, om poingilot do hilo’d liligaon. ¹⁰ Pokinongou no, moro-boros no i koupusan ku. Kaino, oi koupusan ku, tanud doho’. ¹¹ Intangai pogi’ nga’ nakatalib no i maso dot osogit; om nopupusan no o maddasam. ¹² Mimbulai no o tusak do bunga do hilo’d talun; norikot no i maso do modsinding. Orongou no o sikukur do minguni do hiti’d kinoiyonon toko’. ¹³ Momulopuk no i kayu sedar; om osingud no o winongi’ di tusak dot anggur. Kaino no, oi koupusan ku kaino no! ¹⁴ Nokuro tu’ lumisok ko do hino’d pogiolit-olitan do watu, oi kosianan kopio ku? Pointongo’ oku no di kolumiso’ do rabas nu, om porongoho’ oku no di boros nu dit osonong kopio, tu’ olumis kopio o rabas nu, om osonong o boros nu. ¹⁵ Oi kongoombolutan, gomito’ no dahai i toni dit ongokooro’ dot a’ po iyolo’ kapamaraag dot anggur di maso do mongusak. ¹⁶ Iyoho’ no o sanganu di koupusan ku, om iyau o sanganu doho’; poirrolot iyau di bunga bakung do momogompi’d dumba’, ¹⁷ gisom do kalambai i ribut do dongkosuabon, di katalib o totuong. Guli’ no, oi koupusan ku, dot iyo di paus do tontoluhan do mantad hilo’d konuluhanan do Bitir.

¹ Di nopo dongotuong di hiri oku’d toodopon ku, om koipi ku no i kosianan kopio ku. Om ihumo’ ku no daa iyau nga’ a’ ku i’ iyau nokito. ² Tungag oku no, om ongoi oku no tongkop di bandar, minimpanau oku do hiri’d karalan-ralanan om hiri’d kawalayan. Nihum ku daa i kosianan kopio ku nga’ a’ ku i’ iyau nokito. ³ Kabantalai oku no di tulun do madtatamong do tontok di mimpanau iyau do hiri’d bandar. Om boros kangku, ’’Nokokito ko di kosianan kopio ku?’’ kangku. ⁴ Om tongkiadai ku no iyolo’, om kokito ku noddi i koupusan kopio ku. Pususo’ ku no iyau om a’ ku no pinoidu’ do gisom do nokorikot do hilo’d walai di tina’ ku; i hiri’d bilik di tina’ ku di minogkosusu doho’. ⁵ Oi tongoondu’ do Yorusalim; pamatos kou no dot id paus om id tambang dit ongokilos, dot a’ kou mamagangau dahai do maso dahai’d miuhang-uhang. ⁶ Isai ilo rumikot do mantad hilo’d tana’ do kowotuan, do miagal po di lisun di poorigi? Iyo po di mur om rampa o kosonongo’ do kosingudan dau, i rampa di padagangon di tulun do dumadagang. ⁷ Ilo’ nopo om i Suliman do poirikau do hilo’d tirikohonon do don raja’; om woyoon iyau dot onom nohopod o tulun do gunsiou, i tulun dot Israil di gunsiou. ⁸ It ongoilo kopio do migit do gayang, om nongoubas do sumangod. Ongkiabil ngai’ nopo iyolo’ do gayang do sumodia’ do sumaap do tontok do songodon di dongotuong. ⁹ Nantayang i Suliman do poirikau di tirikohonon dau do don raja’, i kayu dot osonong kopio do winonsoi. ¹⁰ Iri nopo torigi om pirok do winonsoi, om iri no sondihon om tamas do winonsoi. Iri nopo tirikohonon dau om linopikan do kain dit aragang, i nawol di tongoondu’ do Yorusalim do mikuwo’d kosianan. ¹¹ Oi tongoondu’ do Sion, intong kou no di Raja’ Suliman. Kitupi’ iyau di tupi’ do raja’, i pinotupi’ di tina’ dau, do tontok di tadau do kuminawin iyau, i tadau do kataadan do ginawo dau.

¹ Olumis tomod ko, oi koupusan ku! Pointalang do kosianan o mato nu dot id tirung do tudung nu. Ino nopo tobuk nu om iyo po di kambing dit ogumu’ do rumuhuk do hilo’d konulu-nuluan do Giliad. ² Nipon nu nga’ miagal po di dumba’ di kobubugar om i kopopodsu’. Aiso’ i’ o tiso do nouud; osisid nopo om angapanggor o nipon nu. ³ Ino munung nu nga’ miagal po di tuwai di rinagang, do tontok do moro-boros ko. Ino pingas nu nga’ olumis tomod dot iyo po di tua’ do delima dot id tirung do tudung nu. ⁴ Ino liou nu nga’ miagal po di walai di Daud dit akawas, tu’ obulugu’ om anaru, karo nu nga’ iyo po do soribu o kolid. ⁵ Ino susu nu nga’ miagal pod duwo o tanak do tambang, om iyo di tanak do paus do miapid, di mangakan-ngakan dot id rolot do bunga bakung. ⁶ Orohian oku’d mundorong do hilo’d nuluhon do mur, i hilo’d rantai do kominyan, gisom do korikot i ribut do dongkosuabon, om katalib o totuong. ⁷ Olumis tomod ko, oi koupusan ku, aiso’ no o bohiton do tinan nu. ⁸ Ruhuk no, oi tondu’ di kinawin ku; do mantad hilo’d Nuluhon dot Amana, i tiyonon do rimau om singa. Kaino rumuhuk do mantad id Nuluhon do Libanon, mantad id Nuluhon do Somir om Nuluhon do Hormon. ⁹ Oi koginawaan ku, i tondu’ di kinawin ku, nagayat o ginawo ku, di pogogontong do mato nu, om nagayat o ginawo ku dino karo do poingkaro nu. ¹⁰ Moningkau do ginawo ku o kosianan nu, oi koupusan ku, i tondu’ di kinawin ku. Osonong po ko’ waig dot anggur i kosianan nu. Om osonong o kosingudan nu ko’ mantad do tumau dit osonong o kosingudan. ¹¹ Iyo pod paha’ koomis o munung nu, oi koupusan ku, om ino dila’ nu nga’ miagal pod susu om paha’ dot id doho’, om pakayan nu nga’ osingud do wongi’ do Libanon. ¹² Iri nopo i koupusan ku, om miagal do kabun di poillisok, om kabun di pinagar, om tudan do waig dit iso-iso’ o sanganu. ¹³ - ¹⁴ Ongorombung tomod i totonomon do hilo’, iyo po di kabun do kayu delima di kitua’ dot ongosonong kopio. Haro ngai’ nopo o bunga pacar, om narwastu, om kayu manis, om tobu, om kunit, om kominyan, om mur om rampa di mogisuayan. ¹⁵ I tudan do waig o koyopos di kabun, i bawang do poingudan do hilo’d Libanon. ¹⁶ Posik no, oi tongus do salatan om tongus dot utara, tongus no do hilo’d kabun ku, ponuo’ no dit osonong o kosingudan o hilo’. Lohowo’ no i koginawaan ku, do mongoi pangakan di tua’ dit ongosonong kopio do hilo’d kabun dau.

¹ Oi koupusan ku, nokorikot oku nod hiti’d kabun ku, mangakan oku nod paha’ om i tulu di pinuwalai do potiukan. Monginum oku no do waig dot anggur om susu; om monimung oku do rampa om mur. Akan ngai’ kou no, oi tambalut dahai, inum kou no do gisom dot aawuk dot i miuhang-uhang o kaawuk. ² Koodop oku piya, nga’ poimposik i’ o ginawo ku. Nokoipi oku do mogkoritik nogi’ do hilo’d totobon, i koupusan ku. Posuango’ oku, oi koginawaan ku, oi punai ku; noyopos pod bolobou o tulu ku, om nabalabahan o tobuk ku. ³ Noidu’ ku no o pakayan ku; om nokuro daa tu’ pakayon ku po kawagu? Noowugan ku no gakod ku; om nokuro daa tu’ ramasan ku po kawagu? ⁴ Om kabai no i koupusan ku di totobon di wawayaan, om osonong tomod diri o ginawo ku tu’ id toning no iyau doho’. ⁵ Tungag oku no do mongoi pongiwang di totobon; om notongkop pod mur o palad ku, om sonturu-turu’ o mur dot id tunturu’ ku, gisom do noyopos i tontiil di totobon. ⁶ Iwangai ku no i wawayaan, do wayaan di koupusan ku, nga’ a’ i’ iyau hino. Sirongou tomod oku daa di boros dau! Ihumo’ ku no daa iyau, nga’ a’ ku i’ iyau nokito, lohowo’ ku no daa o ngaran dau, nga’ a’ i’ iyau suminimbar. ⁷ Nokito oku’ddi di tulun do tumamong di bandar, om binobog oku diyolo’ om pinokorualan oku; nahau di tulun do tumamong di bandar i kulabai ku. ⁸ Papalan ku iyokoyu, oi tongoondu’ do Yorusalim; kosolowot kou nopondo di koupusan ku, om poboroson no dokoyu dot id dau do sumakit oku tu’ ouru oku’d langadon. ⁹ Oi tondu’ dit olumis kopio, suwai toi kopio ko’ wokon i koupusan nu? Okuro-kuro kopio o koligkango’ dau, tu’ minog kopio dahai’d sulungon o batos dahai dot id diya’? ¹⁰ Oligkang i’ om okoris i koupusan ku, om iso’ noo iyau ot iyo’ddi dot id pialatan do hopod noribu o tulun. ¹¹ Miagal po di tambaga’ kolunau o rabas dau, om songingkilong o tobuk dau om oitom do miagal di bangkahak. ¹² Mato dau nga’ miagal po di punai kolumis, dit id toning di bawang di muyung-luyung, i nopodsu’ do susu, om poirikau dot id toning do bawang. ¹³ Om pingas nopo dau om olumis do miagal po di kabun do noponu’d rampa dit ongosonong o kosingudan, munung dau nga’ miagal po di tusak do bunga bakung do noyopos do waig do mur dit osompipi’. ¹⁴ Longon dau nga’ olumis, om kipondulung iyau do watu dit olumis dit agayo gatang, om tinan dau nga’ oligkang do miagal po di lamai di dinakatan do nilam. ¹⁵ Poo dau nga’ obulugu’ do miagal po di torigi do marmar dot opurak di pinosungkad do tamas; abantug iyau do miagal di Nuluhon do Libanon, om agayo do miagal di kayu sedar. ¹⁶ Oomis dot otunguban i munung dau; kagayat do ginawo ku o koinan-inano’ dau. Iyo noddi i koginawaan ku, oi tongoondu’ do Yorusalim.

¹ Oi lundu’ do tongoondu’, honggo nongoi di koginawaan nu? Sunudai iyahai di ralan do sinusui dau, om kouhup indo iyahai diya’ do mogihum dau. ² Minongoi i koginawaan ku do hilo’d kabun dau, i tinanaman do rampa. Paakan-akan iyau di dumba’ dau’d hilo’ om mogkotu’ di tusak do bunga bakung. ³ Iyoho’ no o sanganu di koupusan ku, om iyau o sanganu doho’. paakan iyau di dumba’ dau do hilo’d kobungaan do bakung. ⁴ Oi koupusan ku, iyo ko po di bandar do Yorusalim kolumis, om olundus ko do miagal do Tirsa! Kagayat ko do ginawo, do miagal po di tawan do notongkop do rombituon. ⁵ Kada’ oku diya’ antangai, tu’ kododog oku nopo dot antangan nu. Miagal pod baanan do kambing do rumuhuk do hilo’d konulu-nuluan do Giliad ino tobuk nu. ⁶ Ino nipon nu nga’ opurak poo do miagal do dumba’ di kobubugar om i kopopodsu’. Aiso’ i’ tiso’ dot a’ hino; osisid nopo om angapanggor. ⁷ Ino nopo pingas nu om iyo pod tua’ do delima di pinilapak, dot id dotirung do tudung nu. ⁸ Haro piya ot onom nohopod do sawo di raja’, om walu’ nohopod o tongoondu’ do panakasawo dau, om haro o kosumandakan dit a’ ointob o kogumuo’, ⁹ nga’ iso’ no o kouhangan ku. Olundus iyau do miagal do punai. Iso’ no iyau o tanak di tina’ dau, om iyau no o tanak do koupusan kopio di tina’ dau. Suahon ngai’ iyau’d tulun om royohon do toinsanan o tongoondu’, iri piya i piro-piro o sawo di raja’ om i tongoondu’ do panakasawo di raja’ nga’ mamarayou i’ dau. ¹⁰ - ¹¹ Minongoi oku do hilo’d kabun do kenari, om sinonsod ngai’ ku i tolid do hiri’d rantai; isai poddi milo ondung nokopomiroun tuu i guas dot anggur ko’ nokopongusak po i guas do delima. Isai i rumikot dot iyo po di tadau di mingungulai nogi’, om iyo di tulan di misawang kolumis, om iyo di tadau di kosorong? ¹² Gagaran oku po, tu’ iri po i kosianan nu o kalangadan ku dot iyo poddi papanau do korita’-kuda’ tu’ langadon do mongoi sangod. ¹³ Oi tondu’ do Sulam di maso do manari’, pintari’ no om mintong i’ iyahai diya’ do manari’. Nokuro tu’ mintong kou doho’ do manari’ dot id pogialatan do tulun do mananari’?

¹ Iya’ no o tondu’ ku dit olumis kopio, olumis tomod ino lapap nu do kikasut. Ino kinobulugu-luguo’ do poo nu nga’ miagal po di winonsoi-wonsoi, tu’ olumis no kopio. ² Iyo po di mangkuk dot olumis o pusod nu, i poimponu’ kasai’ do waig dot anggur di kirampa. Iyo pod gandum di pointimung o tian nu, i notutukan do tusak do bunga bakung. ³ Miagal pod paus di miapid o kolumiso’ dino susu nu, om miagal do duwo o tambang. ⁴ Miagal pod walai dit akawas, di lamai do winonsoi ino liou nu, tu’ anaru om olumis. Ino mato nu nga’ olumis do miagal po di botung do hilo’d toning di wawayaan do Hisbon, ino todung nu nga’ olumis dot iyo po di walai’d akawas do Damsik di hilo’d Libanon. ⁵ Ino tulu nu nga’ poirrindog poo do miagal di nulu-nulu do Karmol. Om ino tobuk nu nga’ kosorong do miagal di kain do sutara’ dit olumis; i kagayat do ginawo do raja’ o kolumiso’. ⁶ Olumis ko, om olundus; i koupusan kopio ku, i poposonong do ginawo ku. ⁷ Olundus o tinan nu, do miagal po di guas do kurma, om ino susu nu nga’ miagal po di puru do tua’ do kurma. ⁸ Orohian oku no do mindakod di guas do kurma om mongoi panganu di tua’. Ino nopo susu nu nga’ miagal po di puru do tua’ dot anggur, om pinuhobo nu nga’ miagal po di winongi’ dot ipol, ⁹ om otunguban dino munung nu nga’ miagal po di kaakan do tua’ dot anggur dit oomis. Pologoson nopo do lumuyung i waig dot anggur dot id koginawaan ku, om koluyung do hiri’d munung om hiri’d nipon dau. ¹⁰ Iri no koupusan ku o sanganu doho’, om iyoho’ o sanganu dau. ¹¹ Kaino, oi koupusan ku, kaino mongoi’d hilo’d talun, om modop to i’ do hilo’d pogiolitan do bunga. ¹² Sumuab to do mosik, om antangan to i’ i guas dot anggur, ondung haro no o tolid, om ondung mungkaya’ no i tusak, om ondung mongusak no i guas do delima. Om hilo’ no do patahakon ku diya’ i kosianan ku. ¹³ Osonong tomod o kosingudan di sakot di koubat, ogumu’ o tua’ dit awasiu do hilo’d toning di wawayaan to. Oi koupusan ku, nokosodia’ ku no diya’ i kasanangan di laid om i kasanangan di wagu.

¹ Ondung toput ku daa iya’d pusod, om pinosusu ko di tina’ ku, om tunguban tiya’ nopo daa dot osolowot ku iya’ do hilo’d tanga’d ralan, om aiso’ i’ ot osuayan. ² Om angatan ku iya’ do hilo’d walai di tina’ ku, om tudukan oku nogindo diya’ do kosianan. Om onuan ku iya’ do waig dot anggur di kirampa, om i waig do tua’ do delima o maan do tinumon. ³ Poingkahang do tulu ku o longon nu’d gibang, om muwai-puwai doho’ o longon nu’d wanan. ⁴ Pamatos kou no dot id doho’, oi tongoondu’ do Yorusalim, dot a’ kou momigangau do piuhang-uhangan dahai. ⁵ Isai iti rumikot do mantad id tana’ do kowotuan, do miangkait di koginawaan dau? Pinosikan tiya’, i koupusan ku, do hiri’d sahau do guas dot ipol, i hiri’d pinogkosusuan diya’. ⁶ Siliho’ oku nod tondu’ di kosianan kopio nu, kada’ pamagapus do tondu’d suwai ko’ iyoho’. Kosianan nopo om miagal pod kapatayon kokoris; om miagal do pomogunan do tulun di napatai o kokodoho’. Kosianan nopo om iyo po di sinikit do tapui di molob-ngolob, om rumakit do miagal do tapui dit osikit. ⁷ A’ i’ milo do londodon do luyud o kosianan. Nga’ ondung haro daa o momoli do kosianan do dapu’ o pomoli, om tingayam noo o taanu dau. ⁸ Kitobpinai iyahai do tondu’ dit omulok po, om susu dau nga’ okoro’ po. Kukuroyon no ma dahai iyau do haro o kusai do korikot do mongoi ponunang dau? ⁹ Ondung limput daa iyau’d bata’, om wansayan i’ daa dahai do pogimpaan o hiri’d timpak, do pirok o wonsoyon. Om ondung wawayaan iyau, om intirungan i’ daa dahai do torigi do kayu sedar. ¹⁰ Iyo oku i’ do limput, om iri no susu ku o pogimpaan. Oilaan i’ di koupusan ku do kaanu iyau do kosimbayanan do mantad id doho’. ¹¹ Haro o kabun dot anggur di Suliman do hilo’d Baal Hamon, om posiwaai no dau iri do piro-piro o gompongumo. Om soribu o tusin do pirok do pinambayar diyolo’ di hasil, om duwo nahatus ot aanu diyolo’ do gontok di huyan diyolo’. ¹² Baya’ nopo do kaanu i Suliman do soribu o tusin, om iri no gompongumo om kaanu do duwo nahatus o tusin do tintanga’ diyolo’, tu’ haro i’ o doho’d kabun. ¹³ Porongoho’ oku no do boros nu do mantad hilo’d kabun, oi koginawaan ku; songingandad no i kongoombolutan ku do sirongou diya’ do moro-boros. ¹⁴ Poboroso’ no om olomus oku i’ do rumikot; om osiau oku do miagal di paus dit okilos do rumuhuk di nulu-nulu do Bitir.