PINOINTALANG

PINOINTALANG

¹ Tonsi nopo do buuk diti om pasal di pinointalang di Yesus Kristus do pasal dit ongosiliu do koimbagu. Om pinosunud do Kinorohingan iri dot id Kristus om kointalang indo dau dot id piro-piro o susuhuon do Kinorohingan it ongoruhai nod ongosiliu. Om sinuhu’ do Kristus i moloikat dau do mongoi dot id di Yohanis, i susuhuon dau, do poposunud dot id dau dit ongosiliu’ddi. ² Om susuyo’ ngai’ noddi di Yohanis i nongokito dau’ddi; om iti no i sinusui dau do pasal di boros do Kinorohingan, i pinogirot di Yesus Kristus dot i pinasasi’ dau o pinomogirot. ³ Olumaag no i tulun di mambasa’ om i mokinongou di pinoboros mantad do hiti’d buuk diti, om i mumboyo’ di pinotulis dot id suang do buuk diti. Tu’ a’ no alaid om osiliu ngai’ noti. ⁴ Oi tobpinai-tobpinai dit id turu’ o sidang dot id pomogunan dot Asia! Mogondos oku no, iyoho’, i Yohanis, do puhawangan kou do barakat om kosimbayanan do ginawo do mantad id Kinorohingan — iyau i hino do dinondo, om i hino mantad, om i hino kasai’ do gisom do poingompus — om mantad nogi’ di turu’ o rusod dit id toguang do tirikohonon do Kinorohingan do momorinta’, ⁵ om mantad id di Yesus Kristus, i sasi’ dit otorodok. Iyau no it id gulu kopio posio’ kawagu do mantad id kapatayon om iyau no i pomorinta’ dot id sawat do koinsanai’d raja’ do hiti’d pomogunan. Osianan i’ i Yesus dati’, om iri no kinapatayon dau o pinopoidu’ dau dati’ do mantad id koinsanai’d dusa toko’, ⁶ om siniliu toko’ dau dot imam, i momorinta’ do miwoyo’ di Kristus, om momonsoi do karaja’ do dong Kinorohingan, i Tapa’ dau. I Yesus Kristus no it agayo kopio om i kikuasa’ do gisom do poingompus. Amin! ⁷ Ontong pogi’, rumikot nondo iyau do poinsakai’d haun! Om oinsanan nopondo o tulun do kokito dau, om iri nogi’ i tulun di minonobok dau nga’ kokito i’. Om mihad ngai’ nopondo o koinsanai’d bansa’ do hiti’d pomogunan do mogihad dau. Atantu’ no dot osiliu o miagal diri! Amin! ⁸ ’’Iyoho’ no it id gulu om it id tohuri,’’ kad Tuhan, i Kinorohingan, i hino do dinondo, om i hino mantad, om i hino kasai’ do gisom do poingompus, iyau it Agayo Kopio o Kuasa’. ⁹ Iyoho’ no, i Yohanis, i tobpinai dokoyu dit oinggorit dot iyo dokoyu, dot i koinggoritan dot oumbalan do pointikid-tikid di nakasanganu di Pomorintaan dau. Om pinataam oku do hiti’d pulou do Patmos tu’ pinopopinsusui oku i’ di boros do Kinorohingan, i pinogirot di kosianan di Yesus. ¹⁰ Tontok di tadau do Tuhan, om porintao’ oku no di Rusod do Kinorohingan, om korongou oku nod boros dot opuhod do miagal do tuni do torumpit do moro-boros do hiri’d tohuri-huri ku. ¹¹ Boros ka di minoro-boros, ’’Tulison no it okito nu, om pokirimon no i buuk diri dot id turu’ o sidang diti: Iposus, Smirna, Porgamus, Tiatira, Sardis, Piladilpia, om Laudikia,’’ ka. ¹² Om koili oku no do hiri’d tohuri ku do mogontong ondung isai i minoro-boros doho’. Om kokito ku no o turu’ o potimpakan do lampung, di tamas do winonsoi. ¹³ Hiri nopod tanga’ di potimpakan do lampung diri om haro o poingkakat di koiyo-iyo’d tulun o kokitanan. Om kirasuk iyau dot anaru, i kotontod o konoruo’. Om linakapan dau do lokop do kangkab di tamas do winonsoi o kangkab dau. ¹⁴ Om tobuk nopo dau om iyo pod hulu do dumba’, om iyo do gapas kopurak. Om mato dau nga’ iyo pod binuhang do tapui; ¹⁵ om gakod dau nga’ okolong poo do miagal di tambaga’ do tinantan om i kinisasan do mongilat. Om boros nopo dau om iyo pod kahas do wasai dit agayo. ¹⁶ Longon nopo dau’d wanan om kiinigit do turu’ o rombituon, om haro o gayang dit atarom om i duwo o tarom do mantad id kabang dau. Om rabas dau nga’ kosorong tomod o tulinau do miagal po di tadau do dong pitangaadau. ¹⁷ Tontok di nokito ku iyau, om kotungub oku nopo do hiri’d toguang dau, om iyo oku poddi di tulun di napatai. Nga’ pakabayo’ no dau doho’ o longon dau’d wanan om boro-boros no iyau do poingkaa, ’’Kada’ kooris! Iyoho’ no it id gulu om it id tohuri. ¹⁸ Iyoho’ no i poimpasi! Napatai oku no daa, nga’ ontong pogi’, nga’ poimpasi oku noddi do gisom do poingompus. Om kikuasa’ oku dot id sawat do kapatayon om id sawat do pomogunan di tulun do napatai. ¹⁹ Iyo nopoddi, om tulison no it ongokito nu, i maso dot osiliu do dinondo, om it osiliu do koimbagu. ²⁰ Iti no it a’ daa pinoilaan mantad do komoyon di turu’ o rombituon di nokito nu do poingigit do longon ku’d wanan, om komoyon di turu’ o potimpakan do lampung, di tamas do winonsoi: Iri nopo turu’ o rombituon diri om i piro-piro o moloikat di turu’ o sidang, om iri no i turu’ o potimpakan do lampung om i turu’ o sidang,’’ ka.

¹ Om boro-boros po kawagu i koiyo-iyo’d tulun o kokitanan do poingkaa, ’’Tulison no o poingkaa do pokirimon dot id moloikat do sidang di hilo’d Iposus: Iti no o boros do mantad id dau, i kiinigit di turu’ o rombituon o longon do wanan, om i mimpanau dot id pogialatan di turu’ o potimpakan do lampung, di tamas do winonsoi. ² Oilaan ku i’ i wonsoyon dokoyu: Aparu’ tomod kou do kumaraja’ om alanut tomod o ginawo dokoyu. Om oilaan ku i’ dot a’ kou orohian do poposimoyo’ di tulun dot angaraat. Om tinoinu’ i’ dokoyu i tulun di mangakun do tulun iyolo’ di sinuhu’, nga’ okon i’ kopio ko’ tulun iyolo’ di sinuhu’, om noilaan i’ dokoyu do goudut iyolo’. ³ Atantu’ i’ o ginawo dokoyu om noinggorit kou dot iyoho’ o kinoponginggoritan, om a’ kou napaasan. ⁴ Nga’ iti poo o kawagatan do ginawo ku dot id dokoyu: Tu’ a’ kou noddi osianan doho’ do miagal di timpuun i’. ⁵ Iyo nopoddi, om ilaai no dokoyu do naratu’ kou no kopio. Om rologo kou no do mantad id koinsanai’d dusa dokoyu, om wonsoyo’ no dokoyu o miagal di winonsoi dokoyu di timpuun i’. Ondung amu’, nga’ rumikot oku nondo dot id dokoyu om ngoyon ku nondo iduwo’ i potimpakan do lampung do mantad hiri’d pinoiyanan diri. ⁶ Nga’ haro i’ o tiso’ dot osonong dot id dokoyu, iri no tu’: Araatan kou di wowonsoyon di piro-piro o tumatanud di Nikolaus, i karaatan ku iyoho’. ⁷ Isai nopo i korongou, om mokinongou no kopio di pinoboros do Rusod do Kinorohingan dot id sidang! Om iri nopondo tulun di kamanang om pabanaron ku no do mangakan do tua’ do kayu di tadon do koposion di poinsuni do hilo’d Kabun do Kinorohingan,’’ ka dau. ⁸ Om boros ka kawagu di koiyo-iyo’d tulun o kokitanan, ’’Tulison no o poingkaa do pokirimon dot id moloikat di sidang do hilo’d Smirna: Iti no o boros do mantad id dau, it id gulu om it id tohuri — i napatai nga’ napasi iddi kawagu. ⁹ Oilaan ku i’ o koinsanai di kosusaan dokoyu; om oilaan ku i’ do mosikin kou — nga’ otopot nopo kopio om kaya’ kou i’! Oilaan ku i’ i boros do pongindaraat di tulun di mangakun do tulun do Yohudi, nga’ otopot nopo kopio om okon i’ iyolo’ ko’ tulun do Yohudi; iyolo’ nopo om tulun i’ di nasanganu do Rogon! ¹⁰ Kada’ kou kooris di koinggoritan dit a’ no alaid om koontok no dokoyu. Soro-sorohon no dokoyu, do posuangon nondo di Rogon dot id giil o wookon dokoyu do pogumbal dokoyu. Om oinggorit kou nondo do solinaid do hopod o tadau. Nga’ mositi’ no dot otorodok kou dot id doho’ do gisom dot apatai, om onuan ku indo iyokoyu do koposion dit otopot kopio om i poingompus do maan dot isomuli’ di kinamanangan dokoyu. ¹¹ Isai nopo i korongou, om mokinongou no kopio di pinoboros di Rusod do Kinorohingan dot id sidang! Om iri nopondo tulun di kamanang, om a’ no kopio oinggorit di kapatayon do koinduwo,’’ ka dau. ¹² Om boros ka kawagu di koiyo-iyo’d tulun o kokitanan, ’’Tulison no o poingkaa do pokirimon dot id moloikat do sidang di hilo’d Porgamus: Iti no o boros do mantad id dau, i kiinigit di gayang dot atarom, iri no i gayang di duwo o tarom. ¹³ Oilaan ku i’ o kinoiyonon dokoyu, tu’ poingiyon kou do hino’d kinoiyonon di Rogon do momorinta’. Om otorodok kou i’ dot id doho’. Tu’ tontok piya di pinatai i Antipas, i sasi’ ku dit otorodok diri, do hiri’d kinoiyonon di Rogon dot id dotoguangan dokoyu, nga’ a’ kou i’ minogolim dot otumbayaan kou doho’. ¹⁴ Nga’ haro po o piro-piro o hal dot a’ ku korohian dokoyu: Haro o piro-piro tulun dot id pogialatan dokoyu do tumanud di pinotuduk di Biliam. Om tinudukan di Biliam i Balak do ralan do momurunsut do tulun dot Israil dot id suang do dusa; tu’ ralan nopo om mamayayat diyolo’ do mangakan di taakanon di nokosubak dot id tingolig om minagampahu’. ¹⁵ Om haro nogi’ o tulun dot id pogialatan dokoyu do tumanud di ponudukan di tumatanud di Nikolaus. ¹⁶ Iyo nopoddi, om rologo kou no do mantad id koinsanai’d dusa dokoyu! Tu’ ondung amu’, nga’ a’ no alaid om rumikot oku no do hino’d dokoyu om songodon ku nondo i tulun diri do gayang di hiti’d kabang ku o panangod ku. ¹⁷ Isai nopo i korongou, om mokinongou no kopio di pinoboros di Rusod do Kinorohingan dot id sidang! Om iri nopondo i tulun di kamanang om pabanaron ku no do mangakan di manna di poillisok, om kaanu ngai’ nopondo iyolo’ do watu dit opurak do mantad id doho’. Om haro nondo o ngaran di wagu do pointulis dot id watu’ddi, it a’ oilaan dot isai nopo o tulun, do suwai ko’ i tulun di karamit diri,’’ ka. ¹⁸ Om boros ka kawagu di koiyo-iyo’d tulun o kokitanan, ’’Tulison no o poingkaa do pokirimon dot id moloikat do sidang do hilo’d Tiatira: Iti no o boros do mantad id Tanak do Kinorohingan, i mato nopo om obuhang po do miagal do tapui, om gakod no om okolong po do miagal do tambaga’ di tinantan. ¹⁹ Oilaan ngai’ ku i’ i wonsoyon dokoyu — oilaan ku i’ do mogiinsian-sian kou, om otorodok kou, om kumaraja’ kou, om alanut o ginawo dokoyu dot oinggorit piya. Om oilaan ku i’ do baino’ nopo om aparu’ kou po ko’ mantad di gulu po do kumaraja’. ²⁰ Nga’ iti no o kawagatan do ginawo ku dot id dokoyu: Tu’ orohian kou do tumanud di Isibil, i tondu’ di mangakun do susuhuon do Kinorohingan. Ogumu’ no o susuhuon ku do notipu’ dau om tinudukan dau do magampahu’ om mangakan do taakanon di nokosubak dot id tingolig. ²¹ Noonuan ku no iyau do maso do kumorologo do mantad id koinsanai’d dusa dau, nga’ mada’ i’ iyau do tumingkod do magampahu’. ²² Om antaan nopo! Nga’ poloposon ku motindo iyau dot id toodopon do gisom i’ dot orualan iyau. Om hiri nondo iyau om i tulun di minagampahu’ dau dot ongoinggorit tomod. Om wonsoyon ngai’ ku no o miagal diri do dinondo, nga’ a’ ku i’ daa’ndo wonsoyon do tumingkod no iyolo’ do momonsoi dit angaraat do miwoyo’ dau. ²³ Om iri piro-piro tumatanud dau nga’ patayon ku nondo om koilo ngai’ i’ o sidang dot iyoho’ no i koilo do pomusarahan om ginawo’d tulun. Om somulian ku indo iyokoyu do miontok di winonsoi dokoyu. ²⁴ Nga’ iyokoyu nopo i suwai do hino’d Tiatira om a’ i’ tuminanud di ponudukan dit araat diri, om a’ mininsingilo di toilaan do Rogon. Om poboroson ku no dot a’ ku i’ ruhangan o tonggungan dokoyu do gisom do sumiliu’d kawagatan dokoyu. ²⁵ Nga’ igitan no kopio dokoyu i naanu dokoyu do gisom dot orikot i maso do korikatan ku. ²⁶ - ²⁷ Om iri nopondo tulun di kamanang, om i momonsoi kasai’ di korohian ku do gisom do kopupuson, om onuan ku indo do kuasa’ do miagal di naanu ku do mantad id Tapa’ ku. Om karamit nondo iyolo’ do kuasa’ do mantad id doho’ do momorinta’ do koinsanai’d bansa’, do sukud do basi’ ot igitan do momorinta’, om onuan ku iyolo’ do kuasa’ do momoromumuk do koinsanai’d bansa’ddi do gisom dot iyo pondo iyolo’ di kuron do nomumuk. ²⁸ Om karamit nondo iyolo’ di rombituon di roitan do soguanggo’ do mantad id doho’. ²⁹ Isai nopo i korongou, om mokinongou no kopio di pinoboros di Rusod do Kinorohingan dot id sidang!’’ ka dau.

¹ Om boros ka kawagu di koiyo-iyo’d tulun o kokitanan, ’’Tulison no o poingkaa do pokirimon dot id moloikat do sidang do hilo’d Sardis: Iti no o boros dau, i sanganu di turu’ o rusod do mantad id Kinorohingan om sanganu di turu’ o rombituon. Oilaan ku i’ i wonsoyon dokoyu. Nokoboros daa do poimpasi kou, nga’ otopot nopo kopio om poimpatai kou i’! ² Iyo nopoddi, om posik kou no, om pogiroton no i haro dot id dokoyu, dot a’ pori apatai kopio. Tu’ noilaan ku no dot iri nopo i winonsoi dokoyu om aiso’ po o tiso’ dot aiso’ kopio o bohiton dot id toguang do Kinorohingan. ³ Iyo nopoddi, om soroho’ no dokoyu i nokotuduk dot id dokoyu di gulu po om i norongou dokoyu. Wonsoyo’ no dokoyu iri om rologo kou no do mantad id koinsanai’d dusa dokoyu. Ondung a’ kou mosik, om rumikot oku nondo dot id dokoyu do miagal do tulun di manakau; om a’ kou indo koilo di maso kopio do korikatan ku. ⁴ Nga’ hiti nopod pogialatan dokoyu do hiti’d Sardis om haro po o tulun di mada’ kopio dot ososomu’ o pakayan. Om iyolo’ nopo om moyo’ nondo doho’ do mamanau dot ongkipakayan dot opurak, tu’ osorupai i’ iyolo’ do manampakai’ddi. ⁵ Om rosukan indo do rasuk dot opurak i tulun di kamanang. Om a’ ku i’ pisokon o ngaran diyolo’ do hiri’d Buuk do Tulun di Napasi. Om okunon ku indo do songonuon ku iyolo’ dot id toguang di Tapa’ ku om i piro-piro o moloikat dau. ⁶ Isai nopo i korongou, om mokinongou no kopio di pinoboros di Rusod do Kinorohingan dot id sidang!’’ ka. ⁷ Om boros ka kawagu di koiyo-iyo’d tulun o kokitanan, ’’Tulison no o poingkaa do pokirimon dot id moloikat do sidang do hilo’d Piladilpia: Iti no o boros do mantad id dau, it olidang om it otopot kopio. Iyau no o mongigit di kunsi’ di Daud; ondung mongiwang iyau om aiso’ no o tiso’ pod tulun do milo do monobon diri, om ondung potobonon dau, om aiso’ no o tiso’ pod tulun do milo do mongiwang diri. ⁸ Oilaan ku i’ i wonsoyon dokoyu. Oilaan ku i’ dot a’ kou i’ okoris no; om natanud no dokoyu i pinonudukan ku om otorodok kou dot id doho’. Noiwangan ku no ot iso’ o wawayaan do wayaan dokoyu, it a’ milo do tabanan dot isai nopo o tulun. ⁹ Soroho’ no dokoyu iti: Iri nopo i tulun di nosiliu do tulun do songonuon do Rogon diri, om tulun i’ di goudut i mangakun do Yohudi iyolo’, om okon i’, om porikoton ku indo iyolo’ do gisom do motud iyolo’ dot id toguang dokoyu. Om koilo nondo iyolo’ dot osianan oku i’ dokoyu. ¹⁰ Om intirungan ku indo iyokoyu do mantad id maso do kosusaan di rumikot dot id pointongkop diti pomogunan tu’ otorodok kou i’ do tuminanud di pinonuhuan ku. Om osiliu pogi’ o miagal diri nga’ pogumbal do koinsanai’d tulun do hiti’d pomogunan. ¹¹ Oruhai oku nod rumikot! Om gompion no kopio dokoyu i naanu dokoyu, om aiso’ indo o tiso’ pod tulun do magahau di hodia’ do kinamanangan dokoyu. ¹² Iri nopo i tulun di kamanang, om silihon ku nondo do torigi dot id suang di walai’d Kinorohingan ku dit olidang, om hiri nondo iyau do poundorong do gisom do poingompus. Om iri nondo i ngaran do Kinorohingan ku, om i ngaran di bandar do Kinorohingan ku — iri no i Yorusalim do wagu di lumintuhun do mantad hilo’d surga, do mantad id Kinorohingan ku — o tulison ku dot id tinan do tulun diri. Om tulison ku dot id tinan do tulun diri o ngaran ku di wagu. ¹³ Isai nopo i korongou, om mokinongou no kopio di pinoboros di Rusod do Kinorohingan dot id sidang!’’ ka. ¹⁴ Om boros ka kawagu di koiyo-iyo’d tulun o kokitanan, ’’Tulison no o poingkaa do pokirimon dot id moloikat do sidang do hilo’d Laodikia: Iti no o boros di roitan dot Amin, i sasi’ dit otorodok om it otopot, i tadon do koinsanai’d nunu nopo di winonsoi’d Kinorohingan. ¹⁵ Oilaan ku i’ i wonsoyon dokoyu; oilaan ku i’ dot a’ kou osogit om a’ kou alasu’. Osonong nogi’ daa dot indama’ om osogit kopio ko’ alasu’ kou! ¹⁶ Nga’ alasu-lasu’ kou no; a’ alasu’ kopio, om a’ osogit. Om iri no o kopongilaban ku dokoyu. ¹⁷ Momoros kou dot, ’Kaya’ i’ iyahai om haro ngai’ i’ dahai,’ ka dokoyu. Nga’ a’ i’ dokoyu oilaan do norutum tomod kou om aradaat kopio o koiyon-iyono dokoyu! Mosikin kou, om poillabas kou, om bolou kou. ¹⁸ Om iri no o kopomisunudan ku dokoyu do momoli’d tamas do mantad id doho’, iri no i tamas dot osompipi’, om kakaya’ kou indo. Om momoli kou nogi’ do pakayan dit opurak do mantad id doho’ om kipakayan kou indo do ponirung do tinan dokoyu di poillabas om i kointingayam. Om momoli nogi’ do tubat do pogihilon dot id mato dokoyu om kokito kou indo. ¹⁹ Iri nopo tulun di kosianan ku, om togodon ku i’ om loposon ku do monuduk. Iyo nopoddi, om pokoiso-isoon no kopio dokoyu o ginawo dokoyu, om rumologo kou no do mantad id koinsanai’d dusa dokoyu. ²⁰ Antangai pogi’! Poingkakat oku no dot id wawayaan do mogkoritik. Ondung haro o tulun do korongou do boros ku, om mongiwang no di totobon, om sumuang oku nondo do mongoi solowot dau; om tumorungak oku nondo dau do makan om iyau nga’ potorungak no doho’d makan. ²¹ Iri nopondo tulun di kamanang om pabanaron ku no do mirikau dot id tirikohonon ku di don raja’ do poinsugku’ doho’, do miagal doho’ tu’ nakamanang no, om poirikau oku noddi dot id talad do Tapa’ ku dot id tirikohonon dau do momorinta’. ²² Isai nopo i korongou, om mokinongou no kopio do poboroson di Rusod do Kinorohingan dot id sidang!’’ ka dau.

¹ Om kokito oku po kawagu do pinointalang. Om nokito ku ot iso’ o wawayaan do noiwangan do hilo’d surga. Om korongou ku po kawagu o boros di minoro-boros doho’ dit id gulu i’ do miagal do tuni do torumpit o karangahan. Boros ka di minoro-boros, ’’Kaino’d hiti. Om pointongon ku indo iya’ dit ongosiliu do koimbagu,’’ ka. ² Om diiri i’ om diiri do noporinta’ oku do Rusod do Kinorohingan. Om kokito ku noddi do haro ot iso’ o tirikohonon do don raja’ do hilo’d surga, om haro ot iso’ tulun do poirikau dot id tirikohonon diri. ³ Rabas nopo do tulun diri om mogulinau po do miagal do watu di roitan do yaspor om watu di roitan do sardis, i watu dot agayo kopio o gatang. Om pointutuk nopo di tirikohonon do don raja’ddi om buluntung di mogulinau do miagal do watu samrud. ⁴ Om haro o duwo nohopod om apat o tirikohonon do don raja’ do pointutuk di tirikohonon do don raja’ddi. Om hiri no do poirikau o duwo nohopod om apat o boyoon dit ongkipakayan dot opurak, om ongkitupi’ do tamas do miagal di tupi’ do don raja’. ⁵ Om mingkalab poo o kodumaat do mantad hiri’d tirikohonon di don raja’ddi om hiri o tadon do tinggoron dit opuhod tomod. Om hiri nopod dotimbabaan di tirikohonon do don raja’ddi om haro o turu’ o tata’ di kitapui; iri no i turu’ o Rusod do Kinorohingan. ⁶ Om haro nogi’ o miagal di rahat do kasa’ dot id dotimbabaan di tirikohonon do don raja’ddi, do miagal pod kristal o kanawaho’. Hiri nopod posorili’ di tirikohonon do don raja’ddi, dot id pointikid-tikid di tisan om haro ot apat o kipinuhobo, i notongkop nopod mato o ponong id kangkab om ponong id likud. ⁷ Iri nopo i kipinuhobo di koiso’ nga’ koiyo-iyo’d singa. Iri no koduwo, om koiyo-iyo’d sapi’ di tontoluhan. Iri no kotolu om kirabas do miagal do rabas do tulun. Om iri no kaapat, om koiyo-iyo’d kondiu di mulud-tulud o kokitanan. ⁸ Iri nopo it apat o kipinuhobo’ddi, om saraanaman nopod talad, om notongkop do mato ot id soibau om id saalom. Om a’ nopo otingkod-tingkod do modsinding i kipinuhobo’ddi do tadau om totuong, do sinding do poingkaa, ’’Olidang, olidang, olidang no o Tuhan, i Kinorohingan dit Agayo Kopio o Kuasa’; i hino do dinondo, om i hino mantad, om i hino kasai’ do gisom do poingompus,’’ ka. ⁹ Modsinding ngai’ nopo it apat o kipinuhobo’ddi do sinding do pamarayou, om pomusou om pongunsikou dot id dau, i poirikau dot id tirikohonon do don raja’ddi, iyau i poimpasi do gisom do poingompus. Om tontok di modsinding it ongkipinuhobo’ddi, ¹⁰ om songingotud ngai’ nopo i duwo nohopod om apat o boyoon do hiri’d tirikohonon di don raja’, do tumuku’ dot id dau, i poimpasi do gisom do poingompus. Om pataamo’ nopoddi diyolo’ i tupi’ diyolo’ di don raja’ do hiri’d dotimbabaan di tirikohonon do don raja’ddi, do mikuwo’d minomoros do poingkaa, ¹¹ ’’Oi Tuhan, i Kinorohingan dahai! Iya’ noo ot osorupai do royohon, om pusohon om onuan do kuasa’. Tu’ iya’ no o minomonsoi do koinsanai’d nunu nopo, om mantad i’ do korohian nu do nongosiliu ngai’ om songimpasi o koinsanai’d nunu nopo,’’ ka.

¹ Om kokito ku noddi ot iso’ o buuk do linopi do poingigit di poirikau do hiri’d tirikohonon di don raja’ddi. Iri nopo buuk diri nga’ notongkop nopo do tulis o miampaping om sinorokot do turu’ o saap. ² Om kokito ku noddi o songulun o moloikat dit okoris kopio do mimboros dot opuhod do poingkaa, ’’Isai noo ot osorupai do mongidu’ dilo saap om mongungkaya’ diti buuk?’’ ka. ³ Nga’ hilo’ piya’d surga, om hiti’d pomogunan, om hilo’d saalom diti tana’ nga’ aiso’ i’ o tulun do milo do mongungkaya’ di buuk, om aiso’ o kasaap do montong do suang di buuk diri. ⁴ Om ihad oku nopo tu’ aiso’ i’ o songulun piya dot osorupai do mongungkaya’ di buuk diri, om it osorupai do montong do hiri’d suang di buuk. ⁵ Om haro’ddi o songulun dot id pogialatan di piro-piro o boyoon diri do minoro-boros dot id doho’ do poingkaa, ’’Kada’ ihad! Ontong pogi’! Nakamanang no i singa do mantad id payat do Yohuda, i sinakagon di Daud dit agayo’ddi. Om milo i’ iyau do mongidu’ dilo turu’ o saap om koungkaya’ iyau dilo buuk,’’ ka dau. ⁶ Om kokito ku noddi o songinan o Tanak do Dumba’ do miningkakat do hiri’d tanga-tanga’ di tirikohonon do don raja’ddi, do nosorilian dit apat o kipinuhobo om koinsanai di boyoon. Iri nopo Tanak do Dumba’ddi nga’ iyo di nosumbali’ no o kokitanan. Turu’ o sungu dau om turu’ o mato: iri no i turu’ o rusod do mantad id Kinorohingan di sinuhu’ do tumongkop diti pomogunan. ⁷ Om pamanau noddi i Tanak do Dumba’ddi do minongoi rapou om ngoyo’ no dau i buuk di poingigit do longon do wanan di tulun di poirikau do hiri’d tirikohonon di don raja’. ⁸ Om daamot nopo di Tanak do Dumba’ddi do momonsoi’d miagal diri om otud ngai’ nopo it apat o kipinuhobo om i duwo nohopod om apat o boyoon diri do hiri’d toguang di Tanak do Dumba’. Om ongkiinigit ngai’ nopo iyolo’ do kecapi om mangkuk do tamas di kisuang do kominyan, iri ngai’ no i sambayang do tulun di songonuon do Kinorohingan. ⁹ Om modsinding iyolo’ dot iso’ o sinding di wagu do poingkaa, ’’Iya’ no ot osorupai do manganu di buuk diri om mongidu’ di saap do pinonorokot. Tu’ napatai ko no, om iri no i kinapatayon nu’ddi, o pinomoli nu do tulun do mantad id koinsanai’d payat, om bansa’d boros, om pomogunan, om bansa’d tulun do patahakon dot id Kinorohingan. ¹⁰ Nosiliu nu no iyolo’ do sinompuruan do tulun di nokotobilang do silihon dot imam om kopogobi-obi’ i’ iyolo’d Kinorohingan toko’, om kopomorinta’ do hiti’d pomogunan,’’ ka. ¹¹ Om ontong oku po kawagu. Om korongou ku no o boros do moloikat di rinibuan i’ om jutaan o kogumuo’. Songingkakat iyolo’ do pointutuk di tirikohonon do don raja’, dot iyolo’ ngai’ dit apat o kipinuhobo om i piro-piro o boyoon diri. ¹² Om modsinding iyolo’ dot opuhod do poingkaa, ’’Iri nopo Tanak do Dumba’ di nosumbali’ddi om osorupai i’ do kaanu do kuasa’, om kakayaan, om toilaan, om kokorisan; osorupai i’ iyau do pusohon, om poinggoyoon om pingroyohon!’’ ka. ¹³ Om korongou ku noddi o koinsanai di kipinuhobo do hilo’d tawan, om hiti’d pomogunan, om hilo’d saalom do tana’ om hilo’d saalom do rahat — dot oinsanan nopo it ongkipinuhobo do hilo’d tawan om hiti’d pomogunan — do modsinding do poingkaa, ’’Iyau nopo i poirikau dot id tirikohonon di don raja’, om i Tanak do Dumba’ddi, om royohon no kopio om pusohon om abantug om kikuasa’ do gisom do poingompus!’’ ka. ¹⁴ Om boros ka dit apat o kipinuhobo’ddi do suminimbar, ’’Amin!’’ ka. Om otud ngai’ nopo i boyoon diri do tuminuku’.

¹ Om kokito ku noddi i Tanak do Dumba’ddi do minongidu’ di saap do koiso’ dot id pogialatan di turu’ o saap diri. Om korongou ku no o tiso’ dit apat o kipinuhobo do minomoros dot, ’’Kaino!’’ ka. Om karangahan nopo di boros dau nga’ iyo pod ngorod do tinggoron. ² Om ontong oku no, om kokito ku no o songinan o kuda’ dot opurak. Om iri nopo i poinsakai di kuda’ddi om kiinigit dot iso’ o pawakasan do pana’, om nonuan iyau dot iso’ o tupi’ di don raja’. Om pamanau no iyau do miagal do tulun di nakamanang no do mongoi panganu do kamanangan. ³ Om iduwo’ no di Tanak do Dumba’ddi i saap di koduwo, om korongou ku no i kipinuhobo di koduwo do minomoros dot, ’’Kaino!’’ ka. ⁴ Om soliwan noddi o songinan o kuda’ di suwai no. Iri nopo kuda’ddi om aragang. Om iri nopo i poinsakai di kuda’ddi om nonuan do kuasa’ do mananus do kouludan do hiti’d pomogunan, om mogipapatai indo o tulun. Om onuwai no iyau dot iso’ o gayang dit agayo. ⁵ Om iduwo’ noddi di Tanak do Dumba’ddi i saap di kotolu. Om korongou ku no i kipinuhobo di kotolu do minomoros dot, ’’Kaino!’’ ka. Om ontong oku no, om kokito ku no o songinan o kuda’ dit oitom. Om iri nopo i poinsakai di kuda’ddi om kiinigit do timbangan. ⁶ Om korongou ku noddi o miagal-agal do boros do tulun do moro-boros do mantad hiri’d tanga-tanga’ dit apat o kipinuhobo’ddi. Om poingkaa o pinoboros di minoro-boros diri, ’’Horogo nopod songkilogram o gandum om irad do gadsi’ do sangadau, om horogo do tolu kilogram do barli nga’ irad i’ do gadsi’ do sangadau. Nga’ kada’ raago’ i guas do saitun om i kabun dot anggur!’’ ka. ⁷ Om iduwo’ noddi di Tanak do Dumba’ddi i saap di kaapat. Om korongou ku no i kipinuhobo di kaapat do minomoros dot, ’’Kaino!’’ ka. ⁸ Ontong oku no, om kokito ku no o songinan o kuda’ dit oposi’. Om ngaran nopo di poinsakai di kuda’ddi om kapatayon. Om muhut-suhut dau i Pomogunan di Kapatayon. Om pinatahak dot id diyolo’ o sompiapat diti pomogunan, om kapamatai i’ iyolo’, do pamatai nopo om pisangadan, om mononglous, om toruol di mogkoroliu om piro-piro o nintorusan dit ongorongit. ⁹ Om iduwo’ noddi di Tanak do Dumba’ddi i saap di kolimo. Om kokito ku no do hiri nopod sahau di pananaraban do porsombahan om haro o piro-piro o ginawo do tulun di pinatai tu’ pinokotopot i’ diyolo’ i boros do Kinorohingan do tontok di suminasi’ iyolo’. ¹⁰ Om mimboros iyolo’ dot opuhod do poingkaa, ’’Oi Tuhan it Agayo Kopio o Kuasa’, it olidang om it otopot! Piro po o koloido’ om butusan nu nogi’ o tulun do hiti’d pomogunan om hukuman nu iyolo’ tu’ minamatai i’ iyolo’ dahai?’’ ka. ¹¹ Om tikidai ngai’ nopo iyolo’ do rasuk dot opurak. Om suhuo’ noddi iyolo’ do mundorong-dorong dot ongoruhai, do gisom dot opongo o ginumu’ di tambalut diyolo’ do pakaraja’ om i tobpinai diyolo’ dot apatai do miagal diyolo’ tu’ pinatai. ¹² Om kokito ku noddi i Tanak do Dumba’ddi do mongidu’ di saap di koonom. Om guyu’ noddi o tana’ dot opuhod kopio. Om tuong nopo o tadau do miagal poddi kain dot oitom dit aparad, om iri tulan nga’ ruminagang do miagal pod raha’. ¹³ Om sangratu-ratu’ poo i rombituon do hiti’d pomogunan, do mantad hilo’d tawan, do miagal di tua’ dot ara dit a’ po noonsok do lumoho do tontok dot otongusan do tongus dit opuhod. ¹⁴ Om tanus nopo ilo tawan do miagal nod karatas di linundun, om oinsanan nopo o nuluhon om pulou do pinoundaliu do mantad hiri’d kinoiyonon mantad diri. ¹⁵ Om oinsanan nopoddi o raja’ do pomogunan, om i tulun dit ongkipangkat, om i boyoon do soudor, om i tulun do kaya’ om i tulun di kikuasa’, om i tulun do suwai, dot iri turipon om it okon ko’ turipon, do minongoi ngai’ lisok dot id suang do luang do nuluhon om id pogiolit-olitan di pampang do hilo’d nuluhon. ¹⁶ Om minggiak poo iyolo’ dot i nuluhon om i pampang o barasan do poingkaa, ’’Onsitai no iyahai! Tirungo’ no iyahai do mantad id mato di poirikau dot id tirikohonon di don raja’ddi, om mantad id kototogod di Tanak do Dumba’ddi! ¹⁷ Nokorikot no i tadau di korolosi kopio, om pourobuson noddi diyolo’ o kototogod diyolo’, om aiso’ no o tongoiso’ pod tulun do katama’ do tumimbaba’ diyolo’!’’ ka no diyolo’.

¹ Om kokito ku noddi ot apat o moloikat do poingkakat do hiri’d apat o linsuk do pomogunan. Om pinusus diyolo’ it apat o tongus do hiti’d pomogunan, om aiso’ indo o tongus do kotongus dot id katanaan ko’ id rahat, ko’ id kokoyuan. ² Om kokito ku no kawagu o tiso’ o moloikat do suwai do ruminikot do mantad ponong hilo’d koulayon. Om minigit iyau do saap do mantad id Kinorohingan di poimpasi. Om lohowo’ no di moloikat dot opuhod o boros it apat o moloikat di nonuan do kuasa’ do mantad id Kinorohingan do mamaraag do katanaan om rahat. ³ Boros ka di moloikat diri, ’’Kada’ po dokoyu raago’ o katanaan ko’ iti rahat, ko’ ilo kokoyuan dot a’ po dahai asaapan ngai’ o turos di susuhuon do Kinorohingan toko’,’’ ka dau. ⁴ Om kosunudai oku noddi do haro o 144,000 o tulun di sinaapan o turos di saap do Kinorohingan. Iri nopo tulun diri om mantad ngai’ id hopod om duwo o payat do bansa’ dot Israil, ⁵ do 12,000 o tulun do mantad id pointikid-tikid do payat. Iyolo’ nopo om mantad id payat di: Yohuda, om di Rubin, om di Gad, ⁶ om di Asor, om di Naptali, om di Manasi, ⁷ om di Simion, om di Liwi, om di Isakar, ⁸ om di Sibulon, om di Yusup om di Binyamin. ⁹ Om ontong oku po kawagu, om kokito ku no o tulun dot ogumu’ kopio do songintimung — om ogumu’ no kopio gisom dot aiso’ no o tiso’ piya’d tulun do kointob do ginumu’ diyolo’. Iyolo’ nopoddi om mantad id pointikid-tikid do bansa’, om payat, om pomogunan, om bansa’d boros. Om kipakayan ngai’ nopo iyolo’ do rasuk dot opurak dit anganaru, om ongkiinigit do raan do kayu di roitan do palma, om songingkakat ngai’ i tulun dot ogumu’ddi do potimbaba’ di tirikohonon do don raja’. Om potimbaba’ di Tanak do Dumba’ddi. ¹⁰ Om pomoros noddi iyolo’ dot opuhod do poingkaa, ’’Tadon nopo do koposion toko’ om i Kinorohingan toko’, i poirikau dot id tirikohonon di don raja’, om mantad id Tanak do Dumba’ddi!’’ ka. ¹¹ Om oinsanan nopo i moloikat do miningkakat do pointutuk di tirikohonon do don raja’, om iyolo’ ngai’ di boyoon om it apat o kipinuhobo’ddi. Om otud ngai’ nopo i moloikat diri do hiri’d dotimbabaan di tirikohonon di don raja’ do tuminuku’ dot id Kinorohingan. ¹² Om boro-boros no iyolo’ dot opuhod do poingkaa, ’’Amin! Royohon no o Kinorohingan toko’, it agayo kopio om it oilo kopio. Om iyau no ot apatut dot unsikohon, om pusohon kopio. Iyau no i kikuasa’ om it okoris do gisom do poingompus! Amin,’’ ka. ¹³ Om uhoto’ oku noddi do tiso’ di boyoon diri do poingkaa, ’’Isai ilo tulun do kipakayan dot ongopurak dilo’, om honggo o tadon diyolo’?’’ ka dau. ¹⁴ Om boros kangku do suminimbar, ’’A’ oku i’ koilo, oi Tuan. Tuan nogi’ o koilo,’’ kangku. Om boros kaddi dau dot id doho’, ’’Ilo’ no i tulun di nakamanang do tontok di maso di koinggoritan dit awagat kopio. Nopupuan no diyolo’ i pakayan diyolo’ om opurak noddi dot i raha’ di Tanak do Dumba’ o pinomurak. ¹⁵ Om iri no o koingkakatan diyolo’ dot id toguang di tirikohonon do Kinorohingan di don raja’, om sumambayang iyolo’ dot id dau do tadau om totuong do hiri’d Walai’d Sasambayangan dot Agayo. Om iyau i poirikau dot id tirikohonon di don raja’ddi nga’ poingamung i’ diyolo’ do mongintirung diyolo’. ¹⁶ Om a’ nondo iyolo’ louson om a’ tuuhan, om a’ nondo iyolo’ olosuan di tadau om a’ olosuan di linasu’ di tadau, ¹⁷ tu’ iri indo i Tanak do Dumba’ di poirikau do hiri’d tanga-tanga’ di tirikohonon di don raja’ddi o sumiliu’d gompomogompi’ diyolo’. Om woyoon nondo dau iyolo’ do kumaa do hiri’d tudan do waig di manahak do koposion. Om pihidan nondod Kinorohingan o koinsanai do romou diyolo’,’’ ka dau.

¹ Tontok di nidu’ di Tanak do Dumba’ddi i saap di koturu’, om kododog nopo om aiso’ no ot ohiyo do hilo’d surga do solinaid doti’ do satanga’ jam. ² Om kokito ku noddi i turu’ o moloikat do poingkakat do hiri’d toguang do Kinorohingan, om onuwai no iyolo’ do turu’ o torumpit. ³ Om haro’ddi o tiso’ kawagu o moloikat do kiinigit do poiiyanan do kominyan, do tamas do winonsoi, do ruminikot do minongoi andog do hiri’d dotimbabaan di pananaraban do porsombahan. Om onuwai no iyau do kominyan dot ogumu’ kopio do poruhangon di sambayang do tulun di songonuon do Kinorohingan, om patahakon do hiri’d pananaraban do porsombahan di tamas do winonsoi, di hiri’d dotimbabaan di tirikohonon di don raja’. ⁴ Om mitonggoi nopondo i sambayang do tulun di songonuon do Kinorohingan, om i lisun di kominyan di maso do tutudan do minsawat do mantad id longon di moloikat di poingkakat do hiri’d toguang do Kinorohingan. ⁵ Om ngoyo’ noddi di moloikat i poiiyanan do kominyan diri om suangai nod tapui do mantad hiri’d pananaraban do porsombahan, om pataamo’ noddi dau iri do hiti’d pomogunan. Om kongorod nopoddi o tinggoron om a’ otingkod-tingkod o kodumaat om guminuyu’ o tana’. ⁶ Om sodia’ noddi i turu’ o moloikat di kiinigit di turu’ o torumpit, do popouni di torumpit. ⁷ Om pounio’ no di moloikat di koiso’ i torumpit dau, om asapou tomod diri o rasam dot ais om tapui do mirolot do raha’ do suminondot do hiti’d pomogunan. Om kaayi’ nopo do nosorob o sompitolu diti pomogunan; om nosorob ngai’ o sompitolu do kokoyuan, om nosorob ngai’ o sakot dit otomou. ⁸ Om pounio’ noddi di moloikat di koduwo i torumpit dau, om haro’ddi ot agayo kopio, do kokitanan nopo om iyo do nuluhon di molob-ngolob do tapui, do pinataam do hilo’d rahat. Om kosiliu nopod raha’ o sompitolu di rahat, ⁹ om kapatai noddi o sompitolu do koinsanai dit ongkipinuhobo do hilo’d rahat; om karaag noddi o sompitolu di kapal do rahat. ¹⁰ Om pounio’ noddi di moloikat di kotolu i torumpit dau, om haro’ddi o rombituon dit agayo, do mikit-sikit do miagal do tata’, do naratu’ do mantad hilo’d tawan, om korotuwai no o sompitolu do koinsanai di bawang om tudan do waig. ¹¹ (Ngaran nopo do rombituon diri om it ’’Opoit’’.) Om opoit diri o sompitolu do waig, om ogumu’ diri o tulun do napatai tu’ nokoinum di waig dot opoit diri. ¹² Om pounio’ noddi di moloikat di kaapat i torumpit dau. Om kobobog no o sompitolu di tadau, om sompitolu di tulan, om sompitolu di rombituon gisom do katanus nopo o sompitolu do katarango’ di tanawau diyolo’. Om a’ diri anawau no o sompitolu do dangadau om odondom tomod o kotuongo’ do sompitolu do dongotuong. ¹³ Om ontong oku no, om korongou ku no ot iso’ o kondiu di mintulud do hilo’d sawat do mimboros dot opuhod do poingkaa, ’’Obungou no! Obungou no! Obungou no o koinsanai’d tulun do hiti’d pomogunan dot orongou i tolu kawagu o moloikat do popouni di torumpit diyolo’ do tiinu’!’’ ka.

¹ Om pounio’ noddi di moloikat di kolimo i torumpit dau, om kokito ku no ot iso’ o rombituon do naratu’ do mantad hilo’d tawan om nokosondot diri do hiti’d pomogunan. Om iri nopo rombituon diri nga’ nonuan do kunsi’ di luang do kapatayon. ² Om ukabai noddi di rombituon i luang do kapatayon diri, om soliwan no o lisun do mantad hiri do miagal do lisun do mantad id podsiduan dit agayo. Om kotuong nopo o tadau om tawan do noluhungan di lisun do mantad id luang diri. ³ Om soliwan noddi o godu dit ogumu’ do mantad id lisun diri om sondot no do hiti’d pomogunan. Om iri nopo godu diri om nonuan i’ do kuasa’ do miagal di tompoluluhu. ⁴ Om noduhan i godu’ddi do mamaraag do sakot om i kokoyuan, om i totonomon do suwai. Suwai ko’ iri no i tulun dit aiso’ o saap do Kinorohingan dot id turos diyolo’ o koino-ino di godu do saapon. ⁵ A’ i’ i godu diri pinabanar do mamatai di tulun diri, suwai ko’ pinabanar no iyolo’ do monginggorit diyolo’ do solinaid do limo o tulan. Om koruolo’ nopo di ponginggorit di godu’ddi om iyo di koruolo’ dot okokot do tompoluluhu. ⁶ Om solinaid nopo di limo o tulan diri, om tumotos tomod daa i tulun diri do mokipapatai, nga’ a’ i’ iyolo’ apatai; om orohian daa iyolo’d matai nga’ osodu’ i’ do mantad id diyolo’ o kapatayon. ⁷ Iri nopo i godu’ddi om koiyo-iyo do kuda’ di nokosodia’ no do mongoi sangod o kokitanan. Om hiri nopod tulu di godu diri om haro o koiyo-iyo do tupi’ di don raja’ di tamas do winonsoi. Om rabas nopo diyolo’ om miagal do rabas do tulun. ⁸ Tobuk nopo diyolo’ om miagal do tobuk do tondu’, om nipon no diyolo’ om miagal do nipon do singa. ⁹ Kangkab nopo diyolo’ om linakapan do miagal-agal do rasuk do basi’ do winonsoi. Om tuni di talad diyolo’ nga’ iyo pod kurubut do korita’-kuda’ dit ogumu’ di maso do kumaa dot id pisangadan. ¹⁰ Om kitikiu om kisingot i godu diri do miagal do don tompoluluhu. Om hiri nod tikiu diyolo’ o tadon di kinoris diyolo’ do monginggorit do tulun do solinaid do limo o tulan. ¹¹ Om kiraja’ iyolo’ do momorinta’ diyolo’, om iri nopo i raja’ddi om i moloikat di mongilo-ilo di luang do kapatayon. Ngaran nopo di moloikat diri dot id suang do boros dot Ibrani om Abadon; om ngaran no dot id suang do boros do Yunani om Apolion (do komoyon nopo om ’’Gampamaraag’’.) ¹² Nakatalib no i koinggoritan dit id gulu. Om sumusuhut nopondoddi om duwo po o koinggoritan. ¹³ Om pounio’ no di moloikat di koonom i torumpit dau. Om korongou ku no o boros do mantad id apat o sunduk di pananaraban do porsombahan, i tamas do winonsoi, it id dotimbabaan do Kinorohingan. ¹⁴ Om boros ka di minoro-boros diri dot id moloikat di koonom diri, ’’Poiduwo’ no it apat o moloikat di kinagasan diri di hilo’d Bawang dot Iprat!’’ ka. ¹⁵ Om poiduwo’ noddi it apat o moloikat diri. Om nokosodia’ no iyolo’ do bagi’d jam, om tadau, om tulan om toun diri do mamatai do sompitolu do koinsanai’d tulun. ¹⁶ Om sinunudan oku do kogumuon nopo do koinsanai di soudor dot ongkikuda’ diri om duwo nahatus juta’. ¹⁷ Om kokito ku no i kuda’ddi om i songinsakai di kuda’ dot id suang do pinointalang. Om iri nopo i songinsakai di kuda’ddi nga’ ongkirasuk do basi’ do winonsoi dot osindak o karagango’, om otomou do miagal di watu do roitan do nilam, om osilou do miagal do tana’ di kitapui. Iri nopo tulu di kuda’ddi om koiyo-iyo do tulu do singa, om haro o tapui, om lisun, om tana’ do kitapui do sumoliwan do mantad id kabang di kuda’ddi. ¹⁸ Om kapatai nopo o sompitolu do tulun do noontok di tolu o monginggorit diri; iri no i tapui, om i lisun om i tana’ do kitapui do sumoliwan do mantad id kabang di kuda’ddi. ¹⁹ Tadon nopo di kinoris di kuda’ddi om hiri’d kabang om hiri’d tikiu diyolo’. Iri no tikiu di kuda’ddi om koiyo-iyo do tulanut om kitulu. Om iri no i tikiu di kuda’ddi o ponginggorit diyolo’ do tulun. ²⁰ Nga’ iri piya i tulun di noolu-olu’, it a’ napatai di piro-piro o koinggoritan diri, nga’ a’ i’ tuminongkiad di wowonsoyon diyolo’. A’ i’ iyolo’ tumingkod do tumuku’ dot id rusod dot araat, om id tingolig di winonsoi do mantad id tamas, om pirok, om tambaga’, om watu, om kayu, it a’ i’ kokito om a’ korongou, om a’ milo do mamanau. ²¹ Om a’ diyolo’ tiningkadan i wowonsoyon diyolo’ dit araat, iri no tu’ mamatai’d tulun, om momirusapan, om magampahu’ om manakau.

¹ Om kokito ku noddi ot iso’ o moloikat do suwai dit okoris, do luminintuhun do mantad hilo’d surga. Iyau nopoddi nga’ nokulumutan do haun, om haro o buluntung do pointutuk do tulu dau. Rabas nopo dau om mogulinau tomod dot iyo po do tapui di poorigi. ² Om poingigit nopo dau om buuk dot okooro’ di linopi, di poungkaya’ no. Gakod nopo dau’d wanan om poingulok dot id rahat, om gakod no dau’d gibang om poingulok dot id katanaan. ³ Om pomoros no iyau dot opuhod do miagal do singa di mamagarom. Om kopomoros po i moloikat diri, om simbar ngai’ nopo i turu’ o tinggoron dot ongorod nopo do suminimbar. ⁴ Om koboros ngai’ po i turu’ o tinggoron diri, om tulison ku no daa’ddi iri, nga’ korongou ku no o boros do mantad hilo’d surga do poingkaa, ’’Kada’ popimboroso’ dot id tulun do suwai i pinoboros di turu’ o tinggoron diri; kada’ tuliso’ iri!’’ ka. ⁵ Om kokito ku noddi i moloikat di poingulok dot id rahat om poingulok dot id katanaan do pinopobilid do longon dau’d wanan do hilo’d tawan. ⁶ Om sumpa’ no iyau dot id suang do ngaran do Kinorohingan di poimpasi do gisom do poingompus, i minomonsoi do tawan, om pomogunan om rahat om koinsanai do nunu nopo di poingiyon do hilo’. Boros ka di moloikat diri, ’’A’ no poloidon kawagu i maso!’’ ka. ⁷ Nga’ tontok do pounion kawagu di moloikat di koturu’ i torumpit dau, om wonsoyon nondod Kinorohingan i natantu’ mantad dau do wonsoyon dau, do miagal di nokosunud dau dot id piro-piro o susuhuon dau, iri no i piro-piro o nabi,’’ ka dau. ⁸ Om boro-boros po kawagu doho’ i minoro-boros do norongou ku do mantad hilo’d surga. Boros ka dau, ’’Ngoyo’ onuo’ i buuk di linopi di noungkayaan no do mantad id longon di moloikat di poingulok dot id rahat om id katanaan diri,’’ ka. ⁹ Om ongoi oku noddi rapou di moloikat diri om pokionuo’ ku no i buuk dot okooro’ di linopi diri. Om boros ka dau, ’’Ngoyo’ nopoti, om akanon no. Mumang indo poit iti do hino’d tian nu, nga’ oomis po do miagal do paha’ do hino pod kabang nu,’’ ka dau. ¹⁰ Om ngoyo’ ku no i buuk dot okooro’ di linopi diri do mantad id longon dau om akano’ ku nori. Om iyo pod paha’ o kaakanan diri, nga’ kotolon ku noddi, om poit noddi iri do nokosondot dot id tian ku. ¹¹ Om suhuo’ oku noddi do poingkaa, ’’Mositi’ no do popinsusuyon nu kawagu i boros do Kinorohingan do pasal do koinsanai’d bansa’d tulun, om pomogunan, om bansa’d boros, om raja’,’’ ka.

¹ Om onuwai oku noddi do sallangod o kayu di koiyo-iyo do kayu di poninipong. Om suhuo’ oku no do poingkaa, ’’Ngoyo’ tipongo’ i Walai’d Sasambayangan dot Agayo om i pananaraban do porsombahan. Om intobon no ondung piro o tulun di sumambayang do hiri. ² Nga’ kada’ tipongo’ i piro-piro o bilik do ponong id soliwan di Walai’d Sasambayangan dot Agayo, tu’ iri nopo kinoiyonon diri om nakatahak no dot id tulun dit a’ kotutun do Tuhan. Om piulok-ulok pondo diyolo’ i bandar dot olidang diri do solinaid dot apat nohopod om duwo o tulan. ³ Om suhuon ku nondo o duwo tulun do sasi’ ku do manampakai do pakayan do dong mogigihad, om popinsusui nondo iyolo’ di boros do Kinorohingan do solinaid do 1,260 o tadau,’’ ka dau. ⁴ Iri nopo duwo o sasi’ diri om duwo o guas do saitun om duwo o potimpakan do lampung di hiri’d dotimbabaan do Tuhan do koinsanai’dti pomogunan. ⁵ Ondung haro o tulun do mumbal do momonsoi dit a’ osonong dot id diyolo’, om sumoliwan nondo o tapui do mantad id kabang diyolo’ do mamatai ngai’ di pisangod diyolo’. Om iyo noddi dot oinsanan nopondo i tulun di mumbal do pokoruol diyolo’ dot angapatai. ⁶ Om haro o kuasa’ diyolo’ do monompon do tawan om a’ indo poposondot do rasam do solinaid diyolo’ do popinsusui di habar do mantad id Kinorohingan. Om kikuasa’ nogi’ iyolo’ dot id sawat do koinsanai’d tudan do waig, do poposiliu di waig do raha’. Om kikuasa’ iyolo’ do poporikot do mogisuayan o koinggoritan dit awagat kopio do hiti’d pomogunan, do soira-ira’ nopo dot orohian iyolo’ do momonsoi’ddi. ⁷ Om kopongo pondo iyolo’ do popinsusui di habar diyolo’ddi, om saapon nondo iyolo’ di nintorusan do sumoliwan do mantad hiri’d luang do kapatayon. ⁸ Om poingiliu pondo o rata’ diyolo’ do hiri’d talun-alun di bandar dot agayo, i pinosoliban di Tuhan diyolo’. Pongundadait nopo do bandar diri om Sodom ko’ Masir. ⁹ Om oinsanan nopondo o tulun do mantad id koinsanai’d pomogunan, om payat, om bansa’d boros, om bansa’d tulun do kokito di rata’ diyolo’ do solinaid do tolu o tadau om satanga’, om a’ kabanar do momolobong di rata’ diri. ¹⁰ Om ongotood nopondo i tulun do hiti’d pomogunan do napatai i duwo o sasi’ diri. Om ramayon nondo diyolo’ iri om mogitahak-tahak iyolo’ do nipuhawang, tu’ pinoporikot i’ i duwo o nabi dot ogumu’ o koinggoritan dot id koinsanai’d tulun do hiti’d pomogunan. ¹¹ Om katalib poddi o tolu o tadau om satanga’, om korikot no i pinuhobo do kapasi do mantad id Kinorohingan do suminuang kawagu dot id duwo o nabi diri. Om ingkakat noddi iyolo’, gisom do nongooris tomod o koinsanai’d tulun di nokokito diyolo’. ¹² Om korongou noddi i duwo o nabi diri do boros dot opuhod do minomolohou diyolo’ do mantad hilo’d surga do poingkaa, ’’Kainou, insawat kou do hiti!’’ ka. Om insawat noddi iyolo’ do hilo’d surga do nokulumutan do haun dot antang-antangan di piro-piro o pisangod diyolo’. ¹³ Om tontok noddi do guminuyu’ o tana’ dot opuhod kopio. Om karaag nopo o sompihopod di bandar diri, om turu’ noribu o tulun do napatai do noontok di guminuyu’ o tana’. Om kongooris tomod noddi i tulun do suwai. Om royoho’ no diyolo’ o kogoyoo’ do Kinorohingan di hilo’d surga. ¹⁴ Om nakatalib noddi i koinggoritan di koduwo. Nga’ ontong pogi’! A’ no alaid om sumusuhut no i koinggoritan di kotolu. ¹⁵ Om pounio’ no di moloikat di koturu’ i torumpit dau, om haro’ddi o mimboros dot opuhod kopio do norongou do mantad hilo’d surga, do mimboros do poingkaa, ’’Kuasa’ nopo do momorinta’ do pomogunan do baino’ om id suang no do longon do Tuhan toko’ om i Raja’ do Gampamasi di pinabatos dau. Om iyau no o momorinta’ do gisom do poingompus!’’ ka. ¹⁶ Om otud ngai’ nopo do tuminuku’ dot id Kinorohingan i duwo nohopod om apat o boyoon di poirikau do hiri’d tirikohonon diyolo’ di don raja’, dot id toguang do Kinorohingan. ¹⁷ Boros ka diyolo’, ’’Oi Tuhan, i Kinorohingan dit Agayo Kopio o Kuasa’, i hino do dinondo, om i hino mantad! Mongunsikou iyahai diya’ tu’ pinakai nu no i kuasa’ nu dit agayo kopio, om nokotimpuun ko no do momorinta’! ¹⁸ Iri nopo i tulun dit a’ kotutun do Tuhan, om ongotogod poo tu’ norikot noddi i maso do kopourobusan nu do kototogod nu, om norikot o maso nu do momutus do koinsanai’d tulun di nangapatai. Iti no o maso do koponomulian ngai’ di susuhuon nu, iri no i piro-piro o nabi, om koponomulian do koinsanai di tulun do songonuon nu, iri ngai’ no i tulun di sumambayang dot id diya’, dot it angagayo om it ongokoro’. Iti no o maso do kapamatayan di tulun di minamaraag diti pomogunan!’’ ka. ¹⁹ Om koiwang noddi i Walai’d Sasambayangan dot Agayo do hilo’d surga, om kokito no i Kaban do Tumpongo do hiri’d suang. Om haro’ddi o kodumaat dot a’ nopo otingkod-tingkod do mingkalab om ongorod o tinggoron om gumogor om gumuyu’ o tana’, om haro o rasam dot ais dit asapou tomod.

¹ Om haro’ddi o nokito do hilo’d tawan di kosuayan kopio om i suwai-suwai kopio. Haro o songulun o tondu’ do pakayan nopo dau om ilo tadau om poingkakat iyau do hilo’d tulan. Om haro o tupi’ dau di don raja’ do pointupi’ dau, om iri nopo tupi’ddi om rombituon i’ do hopod om duwo. ² Iri nopo tondu’ddi om monontian, om minggiak poo iyau dot orurualan tu’ oruhai no o kosusuan dau. ³ Om haro po i kosuayan kopio do nokito do hilo’d tawan. Haro o songinan o naga’ dot aragang dit agayo kopio do turu’ o tulu om hopod o sungu. Om kitupi’ ngai’ nopo di don raja’ o pointikid-tikid di tulu dau. ⁴ Om gayato’ nopo di tikiu dau o sompitolu di rombituon do hilo’d tawan om pataamo’ no dau do hiti’d pomogunan. Om ingkakat no i naga’ddi dot id toguang di tondu’ di monohoruol nod mogkosusu do mongoi daa ponolon do tanak di tondu’ddi do kasawa’ i tanak. ⁵ Om kosusu noddi i tondu’ddi dot iso’ o tanak do kusai, i momorinta’ do koinsanai’d bansa’ do sukud do basi’ ot igitan do momorinta’. Nga’ nahau i’ i tanak diri do mantad id tondu’ddi, om pokoyoo’ noddi i tanak diri dot id Kinorohingan om pinotimbaba’ di tirikohonon dau do momorinta’. ⁶ Om poggidu’ noddi i tondu’ddi do hilo’d tana’ do kowotuan, i tiyonon di nokosodia’ mantad nod Kinorohingan do tiyonon di tondu’ddi. Om hiri no iyau do gompion do solinaid do 1,260 o tadau do koloido’. ⁷ Om haro’ddi o pisangadan do hilo’d surga. Om monokisangod i Mikail om i piro-piro i moloikat dau do sumaap di naga’ddi. Om iri naga’ nga’ sumaap i’ di Mikail, om uhupan i naga’ di piro-piro o moloikat dau. ⁸ Nga’ naala’ iddi i naga’ddi. Om a’ noddi iyau om i piro-piro o moloikat dau pabanaron do miyon do hilo’d surga. ⁹ Om pataamo’ no do hiri’d soliwan i naga’ dit agayo’ddi! Iyau no i tulanut di gulu poddi, i roitan do Rogon ko’ Rusod dot Araat, i monipu’ dot id pointongkop do pomogunan. Om pinataam iyau do hiti’d pomogunan do mitonggoi do koinsanai di moloikat dau. ¹⁰ Om korongou ku noddi o boros dot opuhod do hilo’d surga do minoro-boros do poingkaa, ’’Dinondo no i maso do posion do Kinorohingan i tulun di songonuon dau! Dinondo no do pointalangon do Kinorohingan i kuasa’ dau di don Raja’! Om dinondo no i Raja’ do Gampamasi, i pinabatos diri do pointalang do kuasa’ dau! Tu’ nokosoliwan no do mantad hilo’d surga i papasala’ di piro-piro o tobpinai toko’ do tadau om totuong dot id toguang do Kinorohingan. ¹¹ Naala’ no iyau di piro-piro o tobpinai toko’ dot i raha’ di Tanak do Dumba’ om i habar do katapatan do mantad id Kinorohingan di popinsusuyon diyolo’ o pinangala’. Om agaan i’ o ginawo diyolo’ do pinapatahak do koposion diyolo’ do gisom do napatai. ¹² Iyo nopoddi, om mositi’ no dot otood o hilo’d surga om koinsanai di poingiyon do hilo’! Nga’ obungou no o pomogunan om rahat, tu’ nokolintuhun no i Rogon do hilo’ do mikuwo’d a’ ogina-gina’ o kototogod, tu’ oilaan no dau dot a’ no alaid o maso dau,’’ ka. ¹³ Tontok di noilaan di naga’ do nakataam iyau do hiti’d pomogunan, om timpuun no iyau do momogusa’ di tondu’ di minogkosusu di tanak do kusai’ddi. ¹⁴ Nga’ nonuan i’ i tondu’ do duwo o talad do kondiu dit agayo, om kotulud i’ iyau do kumaa do hiri’d tiyonon dau di hilo’d tana’ do kowotuan, om ogompi’ i’ iyau do solinaid do tolu o toun om satanga’, om a’ orikot di naga’ do sumaap. ¹⁵ Om polobputo’ no di naga’ o waig dot agayo dot id tondu’ddi, do momorulun daa di tondu’. ¹⁶ Nga’ nuhupan i’ diti pomogunan i tondu’ddi; potungkabango’ nopo diti pomogunan o kabang dau om tolono’ ngai’ no i waig di mantad id kabang di naga’ddi. ¹⁷ Om kotogod tomod noddi di tondu’ i naga’, gisom do nongoi dau saapo’ i sinakagon do suwai di tondu’ddi, iri ngai’ no i tulun di mumboyo’ do koinsanai di ponuhuan do Kinorohingan, om i papasasi’ do pasal di Yesus om i kuasa’ dau. ¹⁸ Om ongoi noddi i naga’ ingkakat do hiri’d tisan do rahat.

¹ Om kokito ku noddi ot iso’ o nintorusan do minimbulai do mantad hilo’d saalom do rahat. Om hopod o sungu di nintorusan diri om turu’ o tulu dau. Om otikid nopo do tupi’ di don raja’ i sungu dau, om notulisan o pointikid-tikid di tulu dau dot iso’ o ngaran do pongindaraat do Kinorohingan. ² Iri nopo nintorusan di nokito ku’ddi om koiyo-iyo’d tontokinon o kokitanan, om gakod no dau om iyo di gakod do bohuang, om kabang no dau om iyo di kabang do singa. Om onuwai no di naga’ i nintorusan diri do kinoris dau, om tirikohonon di don raja’, om nonuan dau di kuasa’ dau dot agayo. ³ Iri nopo tiso’ di turu’ o tulu di nintorusan diri nga’ iyo di nadalaan do nosuhat o kokitanan, nga’ nolingos no i suhat diri. Om oinsanan nopo i hiti’d pomogunan do minoyo’ di nintorusan diri do mikuwo’d oimayaan tomod. ⁴ Om royohon tomod diyolo’ i naga’ diri tu’ nakatahak no di naga’ di nintorusan i kuasa’ dau. Om royohon diyolo’ i nintorusan diri. Boros ka diyolo’, ’’Aiso’ no o koiyo do nintorusan diti! Aiso’ no o kasaap do sumangod dau!’’ ka no diyolo’. ⁵ Om pinotumboyo’ i’ i nintorusan diri do mimboros di popoinggayo-gayo tomod do dau’d tinan om i mongindaraat do Kinorohingan. Om pinabanar iyau do momorinta’ do solinaid dot apat nohopod om duwo o tulan. ⁶ Om timpuun noddi i nintorusan diri do mongindaraat do ngaran do Kinorohingan. Om i tiyonon do Kinorohingan om koinsanai di poingiyon do hilo’d surga nga’ nindaraat i’ dau. ⁷ Om pinabanar iyau do sumaap di tulun di songonuon do Kinorohingan om mangala’ diyolo’. Om pinatahak dot id dau o kuasa’ dot id sawat do koinsanai di payat, om pomogunan, om bansa’d boros, om bansa’d tulun. ⁸ Om oinsanan nopondo o tulun di hiti’d pomogunan do tumuku’ dot id nintorusan diri, nga’ a’ indo tumuku’ i tulun di nokotulis mantad o ngaran dit a’ po nowonsoi iti pomogunan, dot id suang di buuk di tulun di napasi, i songonuon di Tanak do Dumba’ di nosumbali’. ⁹ Iyo nopoddi, om ondung korongou kou, om pokinongohon no kopio dokoyu iti habar diti, ¹⁰ ’’Tulun nopo dit a’ no milo dot a’ tanggayan do pisangod, om atantu’ no dot atanggayan. Om iri tulun dit a’ no milo dot a’ patayon do gayang o pamatai nga’ atantu’ nod patayon do gayang. Om iri no o kokuwaan do mositi’ no dot alanut o ginawo om otorodok i tulun do songonuon do Kinorohingan,’’ ka. ¹¹ Om kokito ku no kawagu o nintorusan do suwai do minimbulai do mantad id saalom diti tana’. Iri nopo om kisungu do duwo do miagal do sungu do tanak do dumba’. Om tuni no dau om iyo di tuni do naga’. ¹² Om pinakai i’ dau i kuasa’ dit agayo kopio, i naanu dau do mantad id nintorusan di koiso’ iddi, dot id toguang di nintorusan diri. Om oinsanan nopo o pomogunan om koinsanai di poingiyon do hiti’d pomogunan do sinansagan dau do tumuku’ dot id nintorusan di koiso’ iddi, i nolingos no i nadalaan do nosuhat. ¹³ Iri nopo nintorusan di koduwo’ddi om mingwonsoi do piro-piro o koimayaan kopio. Om polintuhun nopo iyau do tapui do hiti’d pomogunan do mantad hilo’d tawan dot id toguang do koinsanai’d tulun. ¹⁴ Om tipuon ngai’ nopo dau o tulun di poingiyon do hiti’d pomogunan dot i piro-piro o koimayaan di wonsoyon dau dot id toguang di nintorusan di koiso’ i’ o ponipu’ dau. Om suhuo’ ngai’ nopo dau iyolo’ do momonsoi dot iso’ o tininganak do poiyoon di nintorusan di nosuhat do gayang, nga’ i poimpasi i’ kasai’. ¹⁵ Om iri nopo nintorusan di koduwo’ddi nga’ pinabanar do manahak do pinuhobo dot id tininganak diri, do gisom do milo diri i tininganak do moro-boros om milo do mamatai do koinsanai’d tulun dit a’ tumuku’ dot id dau. ¹⁶ Om oinsanan nopo o tulun, dot it angagayo, om it ongokoro’, om i kaya’ om i mosikin, om i turipon om it okon ko’ turipon, do sinansagan di nintorusan diri do tandaan ot id longon diyolo’d wanan ko’ id turos diyolo’. ¹⁷ Aiso’ no o tiso’ pod tulun do milo do momoli ko’ padagang po do nunu nopo, ondung a’ iyau natandaan do tanda’ddi, iri no i ngaran di nintorusan diri, ko’ iri po i numbur di popointalang do ngaran diri o pinananda’. ¹⁸ Apatut i’ kopio do haro o toilaan do pasal diti. Tulun nopo di kitoilaan om milo i’ do mongilo do komoyon do numbur di nintorusan diri, tu’ iri nopo numbur diri om ngaran i’ dot iso’ o tulun. Iri nopo numbur diri om 666.

¹ Om ontong oku noddi, om kokito ku no i Tanak do Dumba’ diri do poingkakat dot id timpak di Nulu-Nulu do Sion. Om poinsugku’ dau o 144,000 o tulun di notulisan do ngaran dau om i ngaran do Tapa’ dau ot id turos diyolo’. ² Om korongou ku noddi o tuni do mantad hilo’d tawan dot akahas po do miagal di wasai dit agayo om miagal do ngorod do tinggoron dit opuhod. Karangahan nopod tuni diri nga’ iyo di tuni do kecapi do pounion di tulun di popouni. ³ Om hiri nod toguang di tirikohonon do don raja’ om id toguang dit apat o kipinuhobo om i piro-piro o boyoon di pointutuk di tirikohonon di don raja’ i 144,000 o tulun diri do modsinding dot iso’ o sinding do wagu. Om iri nopo sinding diri om a’ i’ milo do pinsingilaan dot ongoiso’ piya o tulun do suwai ko’ i 144,000 o tulun diri, i nokosoliwan do mantad hiti’d pomogunan. ⁴ Iri nopo tulun diri nga’ a’ i’ nososomu’, tu’ a’ i’ iyolo’ nokoumbal do dumidudun do tondu’. Om moyo-woyo’ nopo iyolo’ di Tanak do Dumba’ddi do honggo nopo o ngoyon dau. Om id pogialatan nopo do toinsanan o tulun, om iyolo’ no i pinoidu’ do siniliu’d porsombahan dit id gulu kopio dot id Kinorohingan om id Tanak do Dumba’. ⁵ A’ i’ iyolo’ nokoumbal do mongudut; om aiso’ i’ o bohiton diyolo’ dot ongokooro’ piya. ⁶ Om kokito ku noddi ot iso’ kawagu o moloikat do mintulud do hilo’d sawat do hilo’d tawan. Iri nopo moloikat diri om minigit do habar do pasal di Habar dot Osonong di poingompus do polombuson dot id tulun do hiti’d pomogunan, dot id koinsanai’d bansa’d tulun, om payat, om bansa’d boros om pomogunan. ⁷ Om boro-boros no i moloikat diri dot opuhod do poingkaa, ’’Koronok kou nod Kinorohingan, om royohon no i kagayaan dau! Tu’ norikot no o maso do kopomutusan do Kinorohingan do tulun. Tumuku’ kou no dot id dau i minomonsoi’d tawan, om pomogunan, om rahat, om koinsanai’d tudan do waig!’’ ka. ⁸ Om susuhut no i moloikat di koduwo, di moloikat di koiso’, om pomoros nod opuhod do poingkaa, ’’Naraag no! Naraag no i bandar do Babil dit agayo! Nawuk dau o koinsanai’d bansa’ dot i waig dot anggur o pinangawuk dau — iri no it anggur di korohiano’ dau do magampahu’!’’ ka. ⁹ Om haro po o moloikat di kotolu do suminusuhut di duwo o moloikat diri, do mikuwo’d minomoros dot opuhod kopio do poingkaa, ’’Tulun nopo di tumuku’ dot id nintorusan diri om id tininganak dau, om i kitanda’ di tanda’ do nintorusan diri dot id turos ko’ id longon dau, ¹⁰ om koinum no o tulun diri dit anggur do Kinorohingan, iri no it anggur do kototogod dau di nokotungu no dau dot id sangkir dau, om a’ i’ ningkurian iri dot ongokooro’ piya! Om oinsanan nopondo i tulun diri dot inggoriton dot id tapui om tana’ di kitapui, dot id toguang di piro-piro o moloikat dit olidang om id toguang di Tanak do Dumba’ddi. ¹¹ Om misun-lisun nopondo i tapui di ponginggorit do tulun diri do gisom do poingompus. Om aiso’ nopo o koundarangan diyolo’ dot oinggorit do tadau om totuong, iyolo’ i tumuku’ dot id nintorusan diri om id tininganak di nintorusan, iri no i koinsanai’d tulun di kitanda’ do ngaran di nintorusan diri,’’ ka. ¹² Om apatut no kopio dot alanut o ginawo di tulun do songonuon do Kinorohingan, i mumboyo’ do koinsanai di ponuhuan do Kinorohingan, om it otorodok dot id di Yesus. ¹³ Om korongou oku noddi do boros do mantad hilo’d surga do minomoros do poingkaa, ’’Tuliso’ no o poingkaa: Mantad pod baino’, om ongolumaag no i tulun dit apatai do maso dau do momonsoi’d karaja’ di don Tuhan!’’ ka. ’’Otopot i’!’’ ka di Rusod do Kinorohingan do suminimbar. ’’Tumingkod nondo iyolo’ do kumaraja’d awagat, tu’ moyo-woyo’ kasai’ indo diyolo’ i tua’ di karaja’ diyolo’,’’ ka dau. ¹⁴ Om ontong oku no, om kokito ku o haun dit opurak. Om hiri nopod sakai di haun diri nga’ haro o poirikau do miagal-agal do tulun o kokitanan. Om haro o tupi’ di don raja’, do tamas do winonsoi do pointupi’ dau, om poingigit dau ot iso’ o gogorib dit atarom. ¹⁵ Om soliwan noddi ot iso’ kawagu o moloikat do suwai do mantad hiri’d Walai’d Sasambayangan dot Agayo. Om pomoros no iyau dot opuhod dot i poirikau do hiri’d sakai di haun o binarasan do poingkaa, ’’Pogoribo’ no ino gogorib nu om pongomot no do dinondo, tu’ norikot no o maso do kapangamatan; noonsok no iti pomogunan, om milo nod omoton!’’ ka dau. ¹⁶ Om pogoribo’ no di poirikau do hiri’d sakai di haun i gogorib dau do hiti’d pomogunan, om koomot noddi iti pomogunan. ¹⁷ Om kokito ku poddi ot iso’ kawagu o moloikat do suwai do suminoliwan do mantad hiri’d Walai’d Sasambayangan dot Agayo di hilo’d surga. Om iyau nga’ kiinigit i’ dot iso’ o gogorib dit atarom. ¹⁸ Om rikot noddi ot iso’ kawagu o moloikat do suwai, i kikuasa’ dot id sawat do tapui, do minongoi’d hiri’d pananaraban do porsombahan. Om pomoros no iyau dot opuhod dot i moloikat di kiinigit do gogorib dit atarom o binarasan do poingkaa, ’’Pogoribo’ no ino gogorib nu do pongupu’ di puru do tua’ dot anggur do hilo’d pomogunan, tu’ nongoonsok no i tua’!’’ ka dau. ¹⁹ Om pogoribo’ no di moloikat i gogorib dau do hiti’d pomogunan om goribo’ no dau i puru di tua’ dot anggur di poingua’ po, om pataamo’ no do hiri’d pamagamasan do tua’ dot anggur, iri no i kototogod do Kinorohingan dit a’ ogina-gina’. ²⁰ Om iri nopo tua’ dit anggur diri nga’ pinaga’ do hiri’d soliwan di bandar, om iyo pod bawang o raha’ do lumuyung do mantad id pamagamasan dot anggur diri, do tolu nahatus o kilomito do kosoduwo’, om oruhai nod duwo o mito do korolomo’.

¹ Om kokito ku noddi i kosuayan kopio om i suwai-suwai kopio o kokitanan do hilo’d tawan. Haro o turu’ o moloikat do mitonggoi do turu’ o ponginggorit di kolimpupuson no. Iti no o kolimpupuson kopio do Kinorohingan do popourabus do kototogod dau. ² Om kokito ku noddi o miagal-agal do rahat do kasa’ di mirolot do tapui o kokitanan. Om nokito ku nogi’ o tulun di nakamanang no dot id sawat di nintorusan om i tininganak di nintorusan diri, om nakamanang iyolo’ dot id sawat di tulun di numbur o pinananda’ do ngaran. Om iri nopo i tulun di nakamanang diri om songingkakat do hiri’d tisan di rahat do kasa’ om ongkiinigit iyolo’ do kecapi di pinatahak do Kinorohingan dot id diyolo’, ³ om modsinding iyolo’ di sinding di Musa, i susuhuon do Kinorohingan diri om i sinding di Tanak do Dumba’. Poingkaa i sinding diri, ’’Oi Tuhan, i Kinorohingan dit Agayo Kopio o Kuasa’, angagayo no kopio om koimayaan kopio i piningwonsoi nu! Oi Raja’ do koinsanai’d bansa’, otulid no kopio om otopot i winonsoi nu! ⁴ Isai po daa ot a’ oronok diya’, oi Tuhan? Isai po daa ot a’ popinsusui di kogoyoo’ nu? Iya’ noo it olidang. Oinsanan nopondo o bansa’ do rumikot do mongoi tuku’ dot id diya’ tu’ nongokito ngai’ nod tulun i winonsoi nu dit ongotulid,’’ ka. ⁵ Om kokito ku noddi i Walai’d Sasambayangan dot Agayo di hilo’d surga do noiwangan om hiri’d suang diri i Kiim do Tuhan. ⁶ Om soliwan noddi i turu’ o moloikat do mitonggoi di turu’ o ponginggorit diri do mantad hiri’d Walai’d Sasambayangan dot Agayo. Om pakayan nopo diyolo’ nga’ kain dot opurak dit opulang om okilat. Om kipinakai iyolo’ do lokop do kangkab di tamas do winonsoi. ⁷ Om haro’ddi ot iso’ dit apat o kipinuhobo’ddi do minanahak di turu’ o moloikat diri do turu’ o mangkuk do tamas, i noponu’ do kototogod do Kinorohingan, — i Kinorohingan di poimpasi do gisom do poingompus. ⁸ Om koponu’ nopoddi do lisun do kagayaan om sinundu do Kinorohingan i Walai’d Sasambayangan dot Agayo’ddi. Om tontok nopo dit a’ po nopupusan i turu’ o ponginggorit diri, om aiso’ i’ o tiso’ pod tulun do milo’d sumuang do hiri’d Walai’d Sasambayangan dot Agayo.

¹ Om korongou ku noddi o boros dot opuhod do mantad hiri’d suang di Walai’d Sasambayangan dot Agayo do minomoros dot id turu’ o moloikat diri do poingkaa, ’’Pamanau kou no om ngoyon i’ potuntugo’ i suang di turu’ o mangkuk do kototogod do Kinorohingan diri do hilo’d pomogunan!’’ ka. ² Om ngoyo’ no di moloikat do koiso’ potuntugo’ i suang di mangkuk dau do hiti’d pomogunan. Om imbulai noddi o kupos dit araat kopio om it oruol kopio dot id tinan do koinsanai’d tulun di kitanda’ do nintorusan diri, om id tulun di tumuku’ dot id tininganak di nintorusan diri. ³ Om potuntugo’ no di moloikat di koduwo i suang di mangkuk dau do hiri’d rahat. Om kosiliu noddi i waig do rahat do miagal di raha’ do tulun do napatai, om kapatai ngai’ nopoddi it ongkipinuhobo di poingiyon do hilo’d rahat. ⁴ Om potuntugo’ no di moloikat di kotolu i suang di mangkuk dau dot id koinsanai’d bawang om tudan do waig, om kosiliu ngai’ nopoddi do raha’ i waig. ⁵ Om korongou ku no i moloikat di kikuasa’ dot id sawat do waig do minomoros do poingkaa, ’’Otulid i’ i pomohukum do pinaratu’ nu, iya’ it Olidang Kopio, i Kinorohingan di hino do dinondo, om i hino mantad! ⁶ Pinalawas diyolo’ o raha’ di tulun do songonuon do Kinorohingan om i raha’ di piro-piro o nabi, om poinumo’ nondo iyolo’ do raha’ do dinondo. Apatut no do wonsoyon o miagal diri dot id diyolo’!’’ ka dau. ⁷ Om korongou ku noddi o boros do mantad hiri’d pananaraban do porsombahan do poingkaa, ’’Oi Tuhan, i Kinorohingan dit Agayo Kopio o Kuasa’, otopot no om otulid o koinsanai di pomohukum do porotuon nu!’’ ka dau. ⁸ Om potuntugo’ noddi di moloikat di kaapat i suang di mangkuk dau dot id tadau, om pabanaro’ noddi o tadau do monorob do tulun dot i kolosuo’ dit a’ ogina-gina’ o ponorob. ⁹ Om osorob diri o tulun di kolosuo’ di tadau, om pimpopol ngai’ no iyolo’ do ngaran do Kinorohingan, i kikuasa’ dot id sawat di ponginggorit do miagal diri. Iyo piya’ddi, nga’ a’ i’ iyolo’ kumorologo do mantad id dusa diyolo’ om a’ mamarayou di kogoyoo’ do Kinorohingan. ¹⁰ Om potuntugo’ noddi di moloikat di kolimo o suang di mangkuk dau do hiri’d kurusi’ do don raja’ di nintorusan diri. Om kotuong nopoddi o pointongkop di pomorintaan di nintorusan diri, om kokoton pod tulun o dila’ diyolo’ dot orurualan. ¹¹ Om pimpapalai noddi diyolo’ o Kinorohingan di hilo’d surga tu’ orurualan no iyolo’ om kinuposon iyolo’. Nga’ a’ i’ iyolo’ kuminorologo do mantad id wowonsoyon diyolo’ dit araat. ¹² Om potuntugo’ noddi di moloikat di koonom i suang di mangkuk dau do hiri’d Bawang dot Iprat dit agayo’ddi. Om karasak nopoddi i bawang diri gisom do milo’ddi i piro-piro o raja’ do mantad hilo’d koulayon do mamanau do sumoborong di bawang diri. ¹³ Om kokito ku noddi o tolu o rusod dot araat do koiyo-iyo’d bonong. Om iri nopo bonong diri nga’ suminoliwan do mantad id kabang di naga’, om mantad id kabang di nintorusan, om mantad id kabang di nabi di goudut. ¹⁴ Iyolo’ no i rusod dot araat di mingwonsoi di kongoimayaan. Om ongoi ngai’ nopo i tolu o rusod diri dot id koinsanai di raja’ do pointongkop do pomogunan do minonimung diyolo’ do mongoi sangod do tontok di Tadau dot agayo, iri no i Tadau do Kinorohingan, it Agayo Kopio o Kuasa’. ¹⁵ ’’Pokinongou no! Rumikot oku nondo do miagal di tulun do manakau! Olumaag no i tulun di posodia’ kasai’ om i momogompi’ do pakayan dau, gisom dot a’ iyau poillabas do mamanau om a’ ointingayam dot id toguang do tulun dot ogumu’!’’ ka. ¹⁶ Om timungo’ noddi di rusod diri i piro-piro o raja’ddi dot id kinoiyonon di roitan do Harmagidon, dot id suang do boros dot Ibrani. ¹⁷ Om potuntugo’ noddi di moloikat di koturu’ i suang di mangkuk dau do hiri’d sawat. Om haro’ddi o norongou do boros dot opuhod do mantad hiri’d tirikohonon di don raja’ do hiri’d Walai’d Sasambayangan dot Agayo, do minomoros do poingkaa, ’’Nopongo no!’’ ka. ¹⁸ Om a’ nopoddi otingkod-tingkod o kodumaat do mingkalab om ongorod po om ongkogogor o ngorod do tinggoron, om guminuyu’ o tana’ dot opuhod tomod. Om a’ po nokoumbal do nokoguyu’ o tana’ dot iyo kopio’ddi kopuhod do mantad di wonsoyo’ i’ o tulun. Diri no dot opuhod kopio o guyu’ do tana’! ¹⁹ Om kopitolu nopo do nababak i bandar dit agayo’ddi, om karaag ngai’ nopo i kabandaran do koinsanai’d pomogunan do hiti’d pomogunan. Om kosorou noddi do Kinorohingan o Babil dit agayo’ddi. Om poinumo’ no iyau do mantad id sangkir dot anggur do Kinorohingan — iri no it anggur di kototogod dau dit a’ ogina-gina’. ²⁰ Om katanus ngai’ nopoddi o pulou, om natanus ngai’ o nuluhon. ²¹ Om suminondot o rasam dot ais do mantad hilo’d tawan, do kawagato’ nopo dot iso’ di rasam dot ais om limo nohopod o kilogram. Om kongorotuwai nopo i tulun di rasam dot ais diri. Om pimpapalai no diyolo’ o Kinorohingan, dot i rasam dot ais di koinggorit kopio o kinapamapalan.

¹ Katalib noddi iri, om rikot no dot id doho’ o tiso’ di turu’ o moloikat di kiinigit do turu’ o mangkuk diri, om boro-boros nod, ’’Kaino, om pokitonon ku i’ iya’ ondung poingkuro i sundal dit abantug diri do hukuman, iri no i bandar dit agayo, i winonsoi dot id toning di kabawangan. ² Monokiampahu’ dau i piro-piro o raja’ do pomogunan, om nangaawuk poo i tulun do hiti’d pomogunan do nokoinum dit anggur do tampahu’ dau,’’ ka dau. ³ Om porintao’ oku noddi di Rusod do Kinorohingan, om tanggayai oku no di moloikat do hilo’d tana’ do kowotuan. Om hilo’ no do nokito ku ot iso’ o tondu’ do poirikau dot id sakai dot iso’ o nintorusan dit oitom o karagango’, om i notongkop pod tulis do ngaran di pongindaraat do Kinorohingan. Om iri nopo nintorusan diri nga’ turu’ o tulu om hopod o sungu. ⁴ Iri nopo tondu’ddi om kirasuk dot oitom daragang-ragang om it oitom o karagango’, om linumis di pongillumis do tamas do winonsoi, om watu dit agayo o gatang, om mutiara’. Om kiinigit iyau dot iso’ o mangkuk do tamas di noponu’ dit angaraat om i sosomu’, i tua’ di pagagampahu’ dau. ⁵ Om notulisan dot iso’ o ngaran o hiri’d turos dau, do komoyon nopo om a’ i’ pinatarang. Iri nopo ngaran diri om, ’’Babil dit Agayo, i tina’ do koinsanai’d sundal om i tulun dot araat do hiti’d pomogunan,’’ ka. ⁶ Om kokito ku noddi do naawuk poo i tondu’ddi do raha’ di tulun do songonuon do Kinorohingan om raha’ di tulun di pinatai dot it otorodok iyolo’ dot id di Yesus o kinapamatayan. Tontok di nokito ku i tondu’ddi, om kosuayai oku nopo kopio. ⁷ Om boros kaddi di moloikat dot id doho’, ’’Nokuro tu’ osuayan ko? Sunudan ku i’ iya’ do komoyon di tondu’ddi, om i nintorusan di sinakai dau, iri no i nintorusan di turu’ o tulu, om hopod o sungu. ⁸ Iri nopo nintorusan diri om nokoumbal i’ do poimpasi di gulu po, nga’ baino’ nopoddi om a’ no poimpasi. A’ no alaid om sumoliwan no iyau do mantad id luang do kapatayon om kumaa nondo iyau dot id kapatayon. Om iri nopo tulun di poingiyon do hiti’d pomogunan, it a’ nokotulis o ngaran dot id suang do Buuk do Tulun di Napasi dit a’ po nowonsoi iti pomogunan om osuayan nondo do kokito di nintorusan diri. Tu’ nokoumbal i’ do poimpasi i nintorusan diri di gulu po. Nga’ baino’ noddi om a’ no poimpasi, nga’ mimbulai indo kawagu. ⁹ Mositi’ no do kitoilaan kopio om atarom o pomusarahan do mongilo do pasal diti. Iri nopo turu’ o tulu diri om turu’ o nulu-nulu; om iri no i nulu-nulu di nirikau di tondu’ddi. Om iri nopo turu’ o tulu nga’ turu’ o raja’; ¹⁰ naala’ no o limo diyolo’, nga’ maso po do momorinta’ o tiso’, om iri no tiso’ om a’ po nokorikot. ¹¹ Om iri no nintorusan di nokoumbal do poimpasi di gulu po, nga’ it a’ noddi poimpasi do baino’, om raja’ di kawalu’. Om iyau nga’ id pogialatan i’ di turu’ o raja’ddi, i maso no do kumaa dot id kapatayon do dinondo. ¹² Iri nopo hopod o sungu di nokito nu’ddi om hopod o raja’ dit a’ po nokotimpuun do momorinta’. Nga’ onuan indo iyolo’ do kuasa’ do momorinta’ do miagal do raja’ do miwoyo’ di nintorusan diri do solinaid do sajaam. ¹³ Iso-iso’ i’ o pokiwawansayan di hopod o raja’ddi; patahako’ ngai’ nopo diyolo’ o kinoris om kuasa’ diyolo’ dot id nintorusan diri. ¹⁴ Om sumangod nondo iyolo’ do sumaap di Tanak do Dumba’ddi. Nga’ alaon indo di Tanak do Dumba’ om i piro-piro o tumatanud dau dit otorodok, i nongolohou om i nongopili’ dau, i piro-piro o raja’ddi, tu’ iyau no o Tuhan do koinsanai’d tuan, om iyau o Raja’ do koinsanai’d raja’,’’ ka dau. ¹⁵ Om boros ka kawagu di moloikat, ’’Iri nopo waig di nokito nu’ddi, i nirikau di tondu’ do sundal diri, om iri no o piro-piro o bansa’d tulun, om rayat, om pomogunan, om bansa’d boros. ¹⁶ Iri nopo hopod o sungu di nokito nu’ddi om i nintorusan diri om araatan di tondu’ do sundal. Om ahawon nondo diyolo’ o koinsanai di songonuon di tondu’ do sundal diri om labasan diyolo’ iyau. Om akanon nondo diyolo’ o tonsi dau om patayon diyolo’ iyau do tapui o pamatai. ¹⁷ Tu’ notingkau nod Kinorohingan o ginawo diyolo’ do momonsoi di natantu’ mantad do Kinorohingan do wonsoyon dau. Om pinogiiso’ do Kinorohingan o ginawo diyolo’ do papatahak do kuasa’ diyolo’ dot id nintorusan diri, om momorinta’ indo i nintorusan diri, do gisom dot osiliu i pinoboros do Kinorohingan. ¹⁸ Iri nopo tondu’ di nokito nu’ddi om iri no i bandar dot agayo, i momorinta’ do koinsanai’d raja’ do hiti’d pomogunan,’’ ka dau.

¹ Om kokito oku noddi dot iso’ kawagu o moloikat do luminintuhun do mantad hilo’d surga. Om agayo kopio o kuasa’ dau, om anawau nopo o pointongkop diti pomogunan dot otitihan di kolumiso’ dau. ² Om pomoros no iyau dot opuhod do poingkaa, ’’Naraag no! Naraag no o Babil dit agayo! Nosiliu noddi iyau do tiyonon do rogon om rusod dot araat do baino’. Om hilo’ no o tiyonon do mogisuayan o tombolog di sosomu’ om i karaatan do tulun. ³ Tu’ nokoinum ngai’ no o bansa’ dit anggur do korohiano’ dau do magampahu’. Monokiampahu’ ngai’ dau o raja’ do hiti’d pomogunan, om nangkakaya’ i piro-piro o mongingindapu’ do hiti’d pomogunan dot i korohian do tinan dau dit a’ opusus-pusus o pinapakaya’,’’ ka dau. ⁴ Om korongou ku no o boros do suwai do mantad hilo’d surga do minomoros do poingkaa, ’’Soliwan no, oi tulun di songonuon ku! Soliwan kou no do mantad id dau! Kada’ kou tanud di dusa dau, kada’ kou hompit dot id pomohukum dau! ⁵ Tu’ nountun tomod no o dusa dau do gisom do nokorikot do hilo’d tawan, om osorou do Kinorohingan i kararaat dau. ⁶ Wonsoyon nopo dokoyu dot id dau o miagal di winonsoi dau dot id dokoyu; sulian no iyau dot induwo kogumu’ ko’ mantad do koinsanai di winonsoi dau. Suangan no i mangkuk dau do tinumon dot induwo kopiluap o kopoito’ ko’ mantad di tiinumon di pinosodia’ do poinuman dokoyu. ⁷ Onuan no iyau do koinggoritan om koudipanan dot irad di kagayaan om kakayaan di nanu dau do maan do dau’d songonuon. Tu’ asaru’ nopo iyau do momoros dot iyau o komoyon do poingkaa, ’Iyoho’ no o raja’d tondu’ di momorinta’! Okon oku i’ ko’ tondu’ di nopuadan; a’ oku i’ kopuriman do tumongob!’ ka no dau. ⁸ Om iri no o kokuwaan dot insan no o tadau om oontok no iyau do kosusaan dit agayo, — toruol, katangaban, om kolousanan. Om sorobon nondo iyau do tapui, tu’ kikuasa’ i’ o Tuhan i Kinorohingan, i momutus dau,’’ ka. ⁹ Iri nopondo raja’ do pomogunan di tuminanud di tampahu’ di tondu’ddi om i tuminanud di korohian di tondu’ddi di don tinan, om mihad pondo iyolo’ do mogihad di bandar diri dot okito diyolo’ i lisun do tapui di monorob do bandar diri. ¹⁰ Om mingkakat nondo iyolo’ do hiri’d sodu’ tu’ moddosi iyolo’ dot oontok di koinggoritan dau. Boros ka no diyolo’, ’’Atuukoi, a’ no kopio ogina-gina’ o kosusaan do nokoontok diti bandar dot abantug diti — i bandar do Babil dit ogirot! Sajaam noo om ohukuman ko no!’’ ka no diyolo’. ¹¹ Om iri mongingindapu’ do hiti’d pomogunan nga’ mihad nondo om mogihad di tondu’ddi, tu’ aiso’ no o tiso’ pod tulun do mongoi pomoli di dapu’ do dagangon diyolo’. ¹² Aiso’ no o momoli do tamas, om pirok, om watu dit agayo o gatang, om i mutiara’ diyolo’; om i kain dot opurak, om i kain dot oitom daragang-ragang, om i sutara’, om i kain dot oitom o karagango’; om mogisuayan nopo o kayu dit ingkuuri’ dot aanu, om i kayu dot agayo o gatang do winonsoi, om tambaga’, om basi’, om marmar; ¹³ om i kulit do kayu manis, om i rampa, om i setanggi, om mur, om kominyan, om anggur om tumau, om tapung om gandum, om sapi’ om dumba’, om kuda’ om korita’-kuda’, om turipon, om iri piya ginawo do tulun. ¹⁴ Om boros ka di piro-piro i mongingindapu’ dot id tondu’ddi, ’’Aiso’ noddi i kakayaan nu, om i kolumiso’ nu nga’ natanus no. Om a’ nu no okito kawagu iri!’’ ka. ¹⁵ Om iri mongingindapu’ di nakakaya’ do mantad id dumagang-dagang dot id bandar diri nga’ hiri’d sodu’ ot ingkokoton, tu’ ooris iyolo’ dot oontok di koinggoritan dau. Om mihad nondo iyolo’ do mogihad, ¹⁶ om momoros nondo iyolo’ do poingkaa, ’’Atuukoi, araat no kopio o nokoontok diti bandar dot abantug! Koubasanan nopo dau do manampakai om kain dit opurak, om it oitom daragang-ragang om it oitom o karagango’; om koubasanan no dot otongkop iyau do pongillumis di tamas do winonsoi, om watu dit agayo o gatang, om mutiara’! ¹⁷ Nga’ sajaam noo om katagakai no iyau do koinsanai di kakayaan dau’ddi!’’ ka diyolo’. Om hiri ngai’ nopod sodu’ do songingkakat i kopitan do kapal do rahat, om i tulun di sumakai, om i papamanau do kapal do rahat, om koinsanai di tulun di hilo’d rahat o pogihuman do kaakan-akanan. ¹⁸ Om momogiak nondo iyolo’ dot okito diyolo’ i lisun do minsawat do mantad id tapui di monorob do bandar diri. Om momoros iyolo’ dot opuhod dot, ’’A’ i’ nokoumbal do haro o bandar do suwai do miagal do bandar diti tu’ agayo!’’ ka. ¹⁹ Om popingarab iyolo’ do pupuk dot id tulu diyolo’ do tanda’ do mogihad iyolo’, om mingihad nondo iyolo’ om minggiak dot, ’’Atuukoi, a’ no kopio ogina-gina’ o kosusaan do nokoontok do bandar dot agayo diti! Iri no i kakayaan do bandar diti o pinapakaya’ do koinsanai’d tulun di kikapal do rahat! Nga’ sajaam noo, om katagakai no iyau do koinsanai’ddi!’’ ka no diyolo’. ²⁰ Oi surga, kotood no, tu’ naraag no i bandar diri! Oi tulun di songonuon do Kinorohingan, om i rasul, om i nabi, kongotood kou no! Tu’ nohukuman no iyau’d Kinorohingan do ponuli’ di winonsoi dau dot id dokoyu! ²¹ Om katalib poddi iri, om haro o tiso’ moloikat dit okoris do pinopobilid dot iso’ o watu — irad i’ di watu do ponutuan dit agayo — om pataamo’ noddi dau iri do hilo’d rahat om boro-boros nod poingkaa, ’’Iyo nodti i bandar do Babil dit abantug diri do pataamon dot opuhod o podudumpau, gisom dot a’ nondo okito kawagu. ²² A’ nondo orongou do hino’d suang nu i tuni do kecapi do pounion di tulun di popouni, om i sinding di modsisinding, om i popouni do suling om i popouni do torumpit! Om aiso’ o tiso’ pod tukang dit oilo dot osolowot do hino, om i lobuk do watu di ponutuan nga’ a’ nondo orongou do hino. ²³ Aiso’ nondo o tinitiu do lampung dot okito’d tulun do hino’d suang nu; om aiso’ o karamayan do poginakanan do pikowinan do hino. Iri nopo i mongingindapu’ nu om iri no i tulun dit angabantug no kopio do hiti’d pomogunan, om akalan nu o koinsanai’d bansa’ dot i toilaan nu do dong bobolian o pagakal nu!’’ ka dau. ²⁴ Hinukuman pogi’ o Babil nga’ id suang no do bandar diri i raha’ di piro-piro o nabi om i raha’ di tulun di songonuon do Kinorohingan — om i raha’ do koinsanai’d tulun di pinatai do hiti’d pomogunan.

¹ Om korongou ku noddi o miagal do gara’ do tulun dot ogumu’ do mantad hilo’d surga do mimboros dot opuhod do poingkaa, ’’Royohon no o Kinorohingan! Kinorohingan toko’ nopo om Kinorohingan di mamasi; iyau no i Kinorohingan dit abantug om i kikuasa’! ² Otulid i’ om oilo o pomumutus dau! Nohukuman no dau i sundal dit abantug, i minamaraag diti pomogunan dot i kosusundal dau o pinamaraag. Nohukuman nod Kinorohingan i sundal diri, tu’ minamatai i’ iyau di piro-piro o susuhuon do Kinorohingan,’’ ka. ³ Om pomoros po kawagu dot opuhod i minoro-boros do miagal do gara’ do tulun dot ogumu’ diri do poingkaa, ’’Royohon no o Kinorohingan! A’ nopondo tumingkod do minsawat i lisun do mantad id tapui di monorob do bandar dot agayo’ddi!’’ ka. ⁴ Om otud ngai’ nopoddi i duwo nohopod om apat o boyoon om it apat o kipinuhobo di pointutuk di tirikohonon di don raja’ddi, om tuminuku’ iyolo’ dot id Kinorohingan, i poirikau do hiri’d tirikohonon di don raja’. Boros ka diyolo’, ’’Amin! Royohon no o Kinorohingan!’’ ka. ⁵ Om haro’ddi o norongou do boros do mantad id tirikohonon di don raja’ do minomoros do poingkaa, ’’Royohon no o Kinorohingan, oi koinsanai dokoyu i susuhuon do Kinorohingan, om koinsanai’d tulun — dot it angagayo om it ongokoro’ — di tumuku’ dot id Kinorohingan!’’ ka. ⁶ Om korongou ku no o tuni do miagal do gara’ do tulun dit ogumu’ do pointimung; om iri nopo tuni diri nga’ miagal do tumbak dit opuhod om miagal do ngorod do tinggoron. Om norongou ku iyolo’ do mimboros do poingkaa, ’’Royohon no o Kinorohingan! Tu’ momorinta’ noddi do dinondo o Tuhan, i Kinorohingan toko’ dit Agayo Kopio o Kuasa’. ⁷ Kumooropod toko’ no om kumotood toko’; royoho’ toko’ no o kagayaan dau! Tu’ norikot no i tadau do pikowinan di noonuan do pangkat do Tanak do Dumba’, om nokosodia’ no i kowinon dau dot id pikowinan diri. ⁸ Noonuan no iyau do kain linan do pakayon dau,’’ ka. (Iri nopo pakayan dot opurak diri om i wowonsoyon dot osonong do winonsoi di tulun do songonuon do Kinorohingan.) ⁹ Om boros kaddi di moloikat dot id doho’, ’’Tuliso’ noti, ’Olumaag no i tulun di naalap dot id poginakanan do pikowinan di Tanak do Dumba’ddi,’ ka,’’ ka dau. Om boros ka kawagu di moloikat, ’’Iti no i habar dot otopot do mantad id Kinorohingan,’’ ka. ¹⁰ Om otud oku no dot id toguang di moloikat diri do tumuku’ daa dot id dau, nga’ boros ka dau dot id doho’, ’’Kada’! Kada’ tuku’ dot id doho’; suwai ko’ tuku’ nogi’ dot id Kinorohingan! Tu’ iyoho’ nga’ susuhuon noo do miagal diya’ om miagal do koinsanai di tobpinai nu dit ogirot kopio dot otumbayaan di kososian di Yesus!’’ ka dau. Tu’ iri no i kososian di Yesus diri o manahak do toilaan dot id tulun di popoboros mantad dit osiliu do koimbagu. ¹¹ Om kokito ku noddi o surga do noiwang, om kokito ku no o songinan o kuda’ dit opurak. Om ngaran nopo di poinsakai’ddi om Iyau it Otorodok om Iyau it Otopot. Om otulid i’ o pomumutus dau do tontok do momohukum iyau om otulid i’ dot id pisangadan di songodon dau. ¹² Mato nopo dau om iyo pod binuhang do tapui om ogumu’ o tupi’ di don raja’ do pointupi’ dau. Om haro ot iso’ o ngaran do pointulis dot id tinan dau; om iyau noo o koilo do ngaran diri. ¹³ Iri nopo rasuk do poimpakai dau om nakatabung do raha’. Om roitan iyau do ’’Boros do Kinorohingan’’. ¹⁴ Om moyo-woyo’ dau i piro-piro o soudor do surga do songinsakai’d kuda’ dit ongopurak, om ongkipakayan do kain linan dit opulang o kopurako’. ¹⁵ Om haro o gayang dot atarom do sumoliwan do mantad id kabang dau, om iri no i gayang diri o pangala’ dau do koinsanai’d bansa’, om iyau nondo o momorinta’ diyolo’ do sukud do basi’ ot igitan do momorinta’. Om mamaga’ nondo iyau dot anggur do hiri’d pamagaan dit anggur do kototogod do Kinorohingan, it Agayo Kopio o Kuasa’. ¹⁶ Om hiri nopod rasuk dau om hiri’d poo dau om tinulisan do ngaran diti, ’’Raja’ do koinsanai’d raja’, om Tuhan do koinsanai’d tuan,’’ ka. ¹⁷ Om kokito ku noddi o tiso’ o moloikat do poingkakat do hilo’d tadau. Om boro-boros no iyau dot opuhod dot id koinsanai’d tombolog di sontulud-tulud do hilo’d sawat do poingkaa, ’’Kainou no tumimung do mongoi rapou di poginakanan dot agayo di ramayon do Kinorohingan! ¹⁸ Kainou no mangakan do tonsi do raja’, om tonsi do boyoon do soudor, om tonsi do gunsiou; kainou mangakan do tonsi di tulun di sumasakai’d kuda’ do mitonggoi di tonsi do kuda’ diyolo’ om tonsi do koinsanai’d tulun, dot it angagayo om it ongokoro’, om i turipon om it okon ko’ turipon!’’ ka. ¹⁹ Om kokito ku noddi i nintorusan diri, om i piro-piro o raja’ do pomogunan om i soudor diyolo’, do tuminimung do mongoi sangod di poinsakai di kuda’ dot opurak diri om i piro-piro o soudor dau. ²⁰ Om katangkap noddi i nintorusan diri do mitonggoi di nabi do goudut, i miningwonsoi do piro-piro o koimayaan dot id toguang di nintorusan diri. (Om iri no i kongoimayaan diri o maan di nintorusan do ponipu’ do tulun di kitanda’ di nintorusan diri, om ponipu’ di tulun di tumuku’ dot id tininganak di nintorusan.) Om miaho’ nopoddi i nintorusan diri om i nabi do goudut do pinataam do hiri’d rahat do tapui di molob-ngolob do mirolot do tana’ do kitapui. ²¹ Om pinatai ngai’ i soudor diyolo’ dot i gayang di sumoliwan do mantad id kabang di poinsakai di kuda’ dot opurak diri o pinamatai. Om rikot noddi i piro-piro o tombolog om ngoyo’ nopo diyolo’ pingyahanai do minangakan i tonsi di tulun di nangapatai.

¹ Om kokito ku noddi ot iso’ o moloikat do luminintuhun do mantad hilo’d surga. Om poingigit dau o kunsi’ di luang do kapatayon om poingigit dau ot iso’ o pongogos dot agayo. ² Om tangkapo’ noddi dau i naga’ diri, i tulanut di gulu po — iri no i Rogon ko’ Rusod dot Araat — om kagasai no dau iri do solinaid do soribu o toun. ³ Om pataamo’ noddi di moloikat i naga’ do hiri’d luang do kapatayon, om kunsiai no dau i luang diri om saapai no dau, om a’ i’ i naga’ddi koponipu’ di tulun dot a’ po aayi’ i soribu o toun. Om katalib pondo iri om polobuson nogindo iyau dot ongoruhai. ⁴ Om kokito oku noddi do piro-piro o tirikohonon do don raja’, om iri nopo tulun di songirikau dot id tirikohonon do don raja’ddi om nonuan do kuasa’ do paparatu’ do hukuman. Om nokito ku nogi’ i rusod do tulun di pinulos o tulu do minamatai tu’ pinapasasi’ i’ iyolo’ do pasal di Yesus, om pinopinsusui iyolo’ do boros do Kinorohingan. Iri nopo tulun diri om a’ i’ tuminuku’ dot id nintorusan diri, om a’ tuminuku’ dot id tininganak di nintorusan. Om a’ iyolo’ insan katandaai do tanda’ di nintorusan diri dot id turos tuu ko’ id longon po diyolo’. Om kapasi noddi iyolo’ kawagu om momorinta’ diri iyolo’ do miagal do raja’ do poinsugku’ di Kristus do solinaid do soribu o toun. ⁵ Iti no ot id gulu kopio do kopomosian kawagu di tulun di nangapatai. (Nga’ iri nopo tulun do suwai di nangapatai om a’ po posion kawagu do solinai’d po di soribu o toun diri.) ⁶ Olumaag no i tulun di kotonggoi’d posion kawagu do tontok di kopomosian dit id gulu kopio. Ongosorupai no iyolo’ do sumiliu’d songonuon do Kinorohingan. Om a’ no kikuasa’ dot id sawat diyolo’ i kapatayon do koinduwo. Osiliu nondo iyolo’ dot imam di songonuon do Kinorohingan om Kristus; om momorinta’ nondo iyolo’ do poinsugku’ dau do solinaid do soribu o toun. ⁷ Om opupusan pondo i soribu o toun diri, om poiduwon nondo i Rogon do mantad id pinogiilan dau, ⁸ om mongoi nondo iyau ponipu’ do tulun do pointongkop do hiti’d pomogunan, dot iyolo’ nopoddi om i Gog om i Magog. Om timungon nondo iyolo’ di Rogon do mongoi sangod. Om kogumuon nopo diyolo’ om iyo po di togis do hilo’d rahat, tu’ ogumu’ no kopio. ⁹ Om tumias nondo iyolo’ do tumongkop diti pomogunan om tutukan nondo diyolo’ i kokiiman di tulun do songonuon do Kinorohingan om i bandar do kosianan do Kinorohingan. Nga’ lumintuhun nondo o tapui do mantad hilo’d tawan do mamatai diyolo’. ¹⁰ Om iri nopondo i Rogon diri, i minonipu’ diyolo’, om pataamon nondo dot id suang di rahat do tapui om tana’ do kitapui. Om hiri no o pinataaman di nintorusan om i nabi di goudut diri di gulu po. Om inggoriton nondo iyolo’ do tadau om totuong do gisom do poingompus. ¹¹ Om kokito ku noddi ot iso’ o tirikohonon do don raja’ dit opurak om it agayo om nokito ku i poirikau do hiri. Om katanus nopo o tawan om pomogunan do mantad hiri’d dotoguangan dau, gisom dot aiso’ noddi ot okito. ¹² Om kokito ku no i tulun do napatai, dot it angagayo om it ongokoro’, do songingkakat dot id dotimbabaan di tirikohonon do don raja’ddi. Om iri piro-piro o buuk nga’ nukaban ngai’. Om haro’ddi ot iso’ o buuk do suwai do nukaban, iri no i Buuk do Tulun do Napasi. Om porotuo’ noddi o hukuman dot id tulun di nangapatai do miontok di winonsoi diyolo’, do tumanud di nongkotulis do hiri’d suang di piro-piro o buuk diri. ¹³ Om patahako’ no do rahat i tulun di napatai do hiri’d rahat. Om kapatayon om Pomogunan do Tulun do Nangapatai nga’ pinapatahak nogi’ do tulun di nangapatai do hiri. Om i tulun di nangapatai’ddi nga’ oinsanan nopo do rinotuan do hukuman do miontok di winonsoi diyolo’. ¹⁴ Om pataamo’ noddi do hiri’d rahat do tapui o Kapatayon om Pomogunan di Tulun di Nangapatai. (Iti nopo rahat do tapui diti om kapatayon di koinduwo.) ¹⁵ Om iri nopo tulun dit a’ nokotulis o ngaran dot id suang di Buuk do Tulun di Napasi, om pataamon no do hiri’d rahat do tapui.

¹ Om kokito ku noddi o tawan do wagu om pomogunan do wagu. Om katanus noddi i tawan om i pomogunan dit id gulu, om i rahat nga’ tuminanus nogi’. ² Om kokito ku noddi i bandar dot olidang, iri no i Yorusalim do wagu, do luminintuhun do mantad hilo’d surga do mantad id Kinorohingan. Om iri nopo bandar diri nga’ nokosodia’ no do miagal dot iso’ o tondu’ di kumawin do lumison tomod do ngoyon posolowoto’ di kusai do mangawin dau. ³ Om korongou ku noddi o boros do mantad id tirikohonon di don raja’ do minoro-boros dot opuhod do poingkaa, ’’Baino’ nopoddi om poinsugku’ nod tulun o tiyonon do Kinorohingan! Om sumugku’ nondo iyau diyolo’, om osiliu iyolo’ do tulun di songonuon dau. Om Kinorohingan nga’ poinsugku’ i’ diyolo’ om osiliu iyau do Kinorohingan diyolo’. ⁴ Om pihidan nondo dau o koinsanai’d romou do mato diyolo’. Om aiso’ nondo o kapatayon; om aiso’ o katangaban, om koihadan, om toruol. Nangatanus ngai’ no it id gulu,’’ ka dau. ⁵ Om boros kaddi dau i poirikau dot id tirikohonon di don raja’ddi, ’’Baino’ nopondo om poinwoguon ngai’ ku nori!’’ ka. Om boros ka dau dot id doho’, ’’Tulison noti, tu’ otopot i’ iti boros om milo do ponongkuyaanan,’’ ka. ⁶ Om boros kaddi dau, ’’Nopongo no! Iyoho’ no it id gulu om it id tohuri; iyoho’ no o Tuhan do mantad di Timpuun i’ om gisom do Kopupuson. Pointikid-tikid do tulun di tuuhan om poinumon ku indo do mantad id tudan do waig di manahak do koposion, om a’ i’ iri minog do bolion. ⁷ Iri nopondo tulun di kamanang om kaanu no ngai’ddi do mantad id doho’. Osiliu oku nondod Kinorohingan dau, om osiliu iyau do tanak ku. ⁸ Nga’ tulun nopo di guntalou, om i popohudsu, om it araat, om gampamatai, om tulun di magampahu’, om i momirusapan, om i tumuku’ dot id tingolig, om koinsanai di goudut, om pataamon no dot id rahat do tapui om tana’ do kitapui di molob-ngolob, iri no i kapatayon do koinduwo,’’ ka dau. ⁹ Om rikot no dot id doho’ o tiso’ di turu’ o moloikat di minigit di piro-piro o mangkuk do noponu’ di turu’ o ponginggorit dit id tohuri noddi, om boro-boros nod, ’’Kaino! Om pokitonon ku indo iya’ di Tondu’ do Kowinon, i sawo di Tanak do Dumba’,’’ ka dau. ¹⁰ Om porintao’ oku noddi di Rusod do Kinorohingan, om igitai oku no di moloikat do hiri’d timpak do nuluhon dit asawat kopio. Om pokitono’ oku no dau do Yorusalim, i bandar dot olidang diri, i Bandar do luminintuhun do mantad hilo’d surga, do mantad id Kinorohingan, ¹¹ do mikuwo’d kolumiso’ om kagayaan do Kinorohingan. Iri nopo bandar diri nga’ mogulinau poo do miagal do watu dit agayo o gatang, om miagal do watu di roitan do Yaspor, om anawau do miagal do kristal. ¹² Iri nopo tolig do posorili’ diri nga’ asawat om agayo. Wawayaan nopo di bandar diri om hopod om duwo, om tamangan do hopod om duwo o moloikat. Om pointikid-tikid di wawayaan om tinulisan ngai’ nopo do ngaran di hopod om duwo o payat do bansa’d Israil. ¹³ Om tolu o wawayaan do potimbaba’ dot id pointikid-tikid do kohunungon: tolu o ponong id koulayon, om tolu o ponong id salatan, om tolu o ponong id utara, om tolu o ponong id kotonobon. ¹⁴ Iri nopo tolig di bandar diri om pinoimpou do hopod om duwo o watu do poimpahan do tontok di minomonsoi. Om iri ngai’ nopo watu do pinoimpahan diri om tinulisan do ngaran di hopod om duwo o rasul di Tanak do Dumba’. ¹⁵ Iri nopo moloikat di monokiboro-boros doho’ddi nga’ kisukud do tamas di poninipong, do ponipong do bandar diri, om ponipong di piro-piro o wawayaan om tolig di bandar diri. ¹⁶ Iri nopo bandar diri nga’ apasagi’ — miirad nopo i konoruo’ om kalaabo’. Om tipongo’ noddi di moloikat i bandar diri dot i sukud di poninipong o pinonipong dau; om konoruo’ nopo nga’ 2,400 o kilomito; om irad i’ di konoruo’ o kalaabo’ om kasawato’ di bandar diri. ¹⁷ Tontok di tinipong di moloikat i tolig di bandar diri, om koilaai noddi do kasawato’ nopo di tolig om onom nohopod o mito. Iri nopo poninipong di pinonipong di moloikat om iyo i’ di poninipong do pakayon do tulun. ¹⁸ Iri nopo tolig do bandar diri om watu di roitan do yaspor do winonsoi, om iri no bandar om tamas dit aiso’ o rolot do winonsoi, om anawau do miagal do kasa’. ¹⁹ Om iri no piro-piro watu do pinoimpahan di bandar diri om linumis do mogisuayan nopo o watu dit angagayo o gatang. Iri nopo watu do poimpahan di koiso’ om watu di roitan do yaspor do winonsoi, om iri no koduwo om watu di roitan do nilam, om iri no kotolu om watu di roitan dot akik, om iri no kaapat om watu di roitan do samrud, ²⁰ om iri no kolimo om watu di roitan dot oniks, om iri no koonom om watu di roitan do sardis, om iri no koturu’ om watu di roitan do ratna cempaka, om iri no kawalu’ om watu di roitan do beril, om iri no kosiam om watu di roitan do topas, om iri no kohopod om watu di roitan do kalsidoni, om iri no kohopod om iso’ om watu di roitan do lasuardi, om iri no kohopod om duwo om watu di roitan do kecubung. ²¹ Iri nopo hopod om duwo o wawayaan di bandar om winonsoi do mantad id hopod om duwo o mutiara’, dot iso’ nopo o wawayaan om iso’ no o mutiara’ do pinowonsoi. Iri nopo talun-alun do hiri’d bandar diri om tamas dit aiso’ o rolot do winonsoi, om anawau do miagal po di kasa’ di kosorong. ²² Om a’ oku no nokokito do Walai’d Sasambayangan dot Agayo dot id suang do bandar diri, tu’ iri nopo Walai’d Sasambayangan diri om iri no i Tuhan, i Kinorohingan dit Agayo Kopio o Kuasa’, om i Tanak do Dumba’. ²³ Om a’ no minog do haro o tadau ko’ tulan do tumitiu dot id bandar diri, tu’ iri no i kagayaan do Kinorohingan o monitiu, om iri Tanak do Dumba’ o panakalampung. ²⁴ Om mamanau ngai’ nopondo o bansa’d tulun do hiti’d pomogunan dot id suang di tanawau dau, om iri ngai’ piya’ndo i raja’ nga’ mongigit i’ do kakayaan diyolo’ dot id suang do bandar diri. ²⁵ Om poingiwang kasai’ nopondo dot osongodou i wawayaan di bandar diri; om a’ indo tabanan tu’ aiso’ i’ o totuong do hilo’. ²⁶ Om igitan nondo dot id bandar diri o kagayaan om kakayaan do koinsanai’d bansa’. ²⁷ Nga’ iri nopo tulun di momonsoi di sosomu’, om i tulun di mongudut — do nunu nopo i sosomu’, om a’ no kosuang dot id bandar diri. Iri nopo kosuang om iri no tulun di nokotulis o ngaran dot id suang di Buuk do Tulun di Napasi, i buuk di Tanak do Dumba’ddi.

¹ Om pinotuduk nogi’ di moloikat dot id doho’ i bawang di manahak do koposion. Om kosorong tomod i bawang diri dot iyo pod hablur, om lumuyung do mantad hiri’d tirikohonon do Kinorohingan om i Tanak do Dumba’ do momorinta’, ² do hiri’d tanga-tanga’ di talun-alun do hiri’d bandar diri. Hiri nopod tisan do miampaping di bawang diri om haro o guas do kayu di tadon do koposion, it inghopod om duwo pongua’ do sontoun tu’ monikid tulan nopo do mongua’. Om iri no i roun di kayu’ddi o pomolingos do toruol do koinsanai’d bansa’d tulun. ³ Id suang nopod bandar diri om aiso’ i’ ot ongoiso’ piya di noontok do popol do Kinorohingan. Om hiri nondod suang do bandar diri i tirikohonon do Kinorohingan om i Tanak do Dumba’ do momorinta’. Om sumambayang ngai’ nondo dot id dau i susuhuon dau; ⁴ om kokito iyolo’ do rabas dau. Om tulison nondo dot id turos diyolo’ i ngaran dau. ⁵ Om a’ no iyolo’ minog do haro o lampung ko’ tinitiu pod tadau, tu’ aiso’ nondo o totuong, om Tuhan no i Kinorohingan diyolo’ o kanawau diyolo’. Om momorinta’ nondo iyolo’ do miagal do raja’ do gisom do poingompus. ⁶ Om boros kaddi di moloikat diri dot id doho’, ’’Otopot i’ kopio iti boros diti om milo do ponongkuyaanan. Iri nopo Tuhan i Kinorohingan, i pinapatahak do Rusod dau dot id nabi, om nokoponuhu’ no di piro-piro o moloikat dau do mongoi popoilo di piro-piro o susuhuon dau do pasal dit oruhai nod osiliu,’’ ka. ⁷ Boros ka di Yesus, ’’Ilaai no dokoyu iti! Oruhai oku nod rumikot. Olumaag no i tulun di mumboyo’ di boros dot id suang do buuk diti do pasal dit osiliu dot id dosunsudan!’’ ka. ⁸ Iyoho’ no, i Yohanis, o nokorongou om nokokito ngai’dti. Om kongorongou ngai’ ku poddi iri om di nokito ngai’ ku, om otud oku no dot id toguang di moloikat di pinopotuduk ngai’ddi dot id doho’. Om tumuku’ oku daa’ddi dot id dau, ⁹ nga’ boros ka dau dot id doho’, ’’Kada’! Kada’ tuku’ dot id doho’! Tuku’ nogi’ dot id Kinorohingan! Tu’ iyoho’ nga’ susuhuon i’ do miagal diya’, om iyo di piro-piro o tobpinai nu, i nabi om koinsanai di tulun di mumboyo’ do koinsanai di boros dot id suang do buuk diti,’’ ka. ¹⁰ Om boros ka kawagu dau, ’’Kada’ polisok-lisoko’ i boros do pasal dit osiliu dot id dosunsudan diri dot id suang do buuk diti, tu’ oruhai no dot osiliu ngai’ iri. ¹¹ Iri nopo tulun dit araat, om pologoson nopo do tumilombus do momonsoi dot araat; om iri tulun di sosomu’, nga’ pologoson nopo do monosomu’ do tinan dau; om iri no tulun di tumanud do korohian do Kinorohingan, om pologoson nopo do tumilombus do tumanud do korohian do Kinorohingan, om iri tulun di nakatahak kopio dot id Kinorohingan o koposion nga’ pologoson nopo do tumilombus do pointahak kopio dot id Kinorohingan o koposion dau,’’ ka dau. ¹² Om boros ka di Yesus, ’’Ilaai noti! A’ no alaid om rumikot oku no do mikuwo’d mongigit oku dot isomuli’ do ponomuli’ do pointikid-tikid do tulun do miontok di winonsoi diyolo’. ¹³ Iyoho’ no it id gulu om it id tohuri; iyoho’ no i Tuhan do mantad di Timpuun i’ om gisom do Kopupuson,’’ ka dau. ¹⁴ Olumaag no i tulun di momupu’ do pakayan dau do gisom dot opulang om osorupai indo iyolo’ do mangakan do tua’ di guas do kayu do koposion om kosuang do hiri’d bandar diri do maya’ di wawayaan di bandar. ¹⁵ Nga’ iri nopo tulun di mingwonsoi di sosomu’, i momirusapan, om i tulun di mingwonsoi di kagait do tampahu’, om i mamatai, om i tumuku’ dot id tingolig, om i tulun di mongudut, dot id koboro-boroso’ tuu ko’ wowonsoyon po dau, om hiri ngai’ nod soliwan di bandar o koiyonon di tulun diri. ¹⁶ ’’Iyoho’ no, i Yesus, o minonuhu’ di moloikat ku dot id dokoyu do mongoi poposunud ngai’dti do maan do koinsanangan ngai’ di sidang. Iyoho’ nopo om sinakagon di Daud; om iyoho’ no i rombituon, it atarang kopio’ddi, i roitan do soguanggo’,’’ ka dau. ¹⁷ Om boros ka di Rusod do Kinorohingan om i Tondu’ di Kumawin, ’’Kaino!’’ ka. Om pointikid-tikid do tulun di korongou’ddi nga’ mositi’ no do momoros ngai’ dot, ’’Kaino!’’ ka. Isai nopo i tuuhan, om rumikot no kopio! Om isai nopo it orohian om mongoi no kopio anu di waig di manahak do koposion, om a’ i’ iri minog do bolion. ¹⁸ Pointikid-tikid do tulun di korongou do boros do pasal dit osiliu dot id dosunsudan dot id suang do buuk diti, om iyoho’ no, i Yohanis, o popoinsan dot: ondung haro o tulun do momoruhang do nunu nopo dot id boros do pasal dit osiliu dot id dosunsudan diti, om ruhangan nondod Kinorohingan o hukuman dot id tulun diri dot i piro-piro o koinggoritan di nokosunud dot id buuk diti o poruhangon. ¹⁹ Om ondung haro o tulun do mongidu’ do nunu nopo o boros do pasal dit osiliu dot id dosunsudan diti, om Kinorohingan nga’ mongidu’ nod wookon dit apatut daa dot aanu di tulun diri, di nakatarang no dot id suang do buuk diti — iri no i bohogian do mantad id guas do kayu do koposion om mantad id bandar dit olidang diri. ²⁰ Iyau no i pinopolombus do habar diti, o minomoros do poingkaa, ’’Otopot no kopio dot a’ no alaid om rumikot oku no,’’ ka dau. Amin. Rikot no, oi Tuhan Yesus! ²¹ Pokionuon ku no o Tuhan Yesus do manahak do barakat dau dot id koinsanai’d tulun di songonuon do Kinorohingan!