SINDING

SINDING

¹ Olumaag no i tulun dit amu’ tumanud do ponudukan do tulun dot araat, om amu’ momit do kowoyo-woyoon do tulun do kidusa om amu’ moyo’ do tulun di mongindaraat do Kinorohingan. ² Suwai ko’ korohian nopo diyolo’ om mumboyo’ di Tourat do TUHAN, om momuhondom diri do tadau om totuong. ³ Miagal iyolo’ di kayu di poinsuni dot id tisan do bawang, tu’ mongua’ do pointikid do maso do koponguaan, om a’ rumiou o tuntu. Koundar ngai’ nopo o wonsoyon diyolo’. ⁴ Nga’ tulun nopod araat om amu’ i’ iyo’ddi; miagal iyolo’ di tapol dot otilib do tongus. ⁵ Hukuman indod Kinorohingan i tulun do kidusa, om potongkiadon do mantad id tulun Dau. ⁶ Tulun nopo di mumboyo’ Dau om potunudon i’ om intirungan do TUHAN, nga’ tulun nopo dit araat om pakayaan no dot id kapatayon.

¹ Nokuro tu’ momusorou do sumaap i piro-piro bansa’? Nokuro o rayat diyolo’ tu’ mogupakat dit aiso’ o kotutuk-tutukon? ² Sumaap ngai’ i raja’ diyolo’, mogipapakat ngai’ i pomorinta’ diyolo’ do sumaap do TUHAN om sumaap di raja’ di pinili’ dau. ³ Boros ka no di pomorinta’, ’’Kainou midu’ do mantad id pomorintaan diyolo’, om iduwon toko’ i’ i kuasa’ diyolo’ do momorinta’ dati’,’’ ka. ⁴ Mingirak o Kinorohingan do hiri’d tirikohonon dau do momorinta’ do hilo’d surga, do mongumang-umang dit osorou diyolo’d wonsoyon diyolo’. ⁵ Om otogod tomod diri o TUHAN do minoro-boros diyolo’ om tinompurolosi dau iyolo’ di kototogod dau dot a’ ogina-gina’. ⁶ Boros ka dau, ’’Nopili’ ku no i raja’ ku, do hilo’d Sion i nuluhon ku dit olidang,’’ ka. ⁷ Boros ka di raja’, ’’Popinsunudon ku nondo i nokoboros do TUHAN. Tu’ poingkaa o boros dau dot id doho’, ’Iya’ no o tanak ku, om tadau nod baino’ do nosiliu oku do Tapa’ nu. ⁸ Pokianu no, om patahakon ku i’ diya’ o koinsanai’d bansa’, om asanganu ngai’ nu indo o koinsanai’dti pomogunan. ⁹ Om babakon nu nondo iyolo’ dot i sukud do basi’ o pamabak, om mumukon nu iyolo’ do miagal do kuron,’ ka dau,’’ ka. ¹⁰ Iyo nopoddi, om pokinongoho’ no dokoyu iti boros do popoinsan, koinsanai dokoyu i raja’, pinsingilaai no dokoyu iti ponudukan, koinsanai dokoyu i momorinta’ diti pomogunan. ¹¹ Sambayang no dot id TUHAN do mikuwo’d oronok dau; ¹² Otud no dot id toguang dau do mikuwo’d momusou kopio. Tu’ ondung amu’ nga’ oruuhai moti’ dot otingkau o kototogod do TUHAN, om sigog i’ moti’ndo do matai kou. Olumaag ngai’ no i tulun di mongoi intirung do TUHAN!

¹ Sinding di Daud do tontok di minogidu’ iyau do mantad id di Absalom, i tanak dau. ² Oi TUHAN, ogumu’ no kopio o pisangod ku, om ogumu’ tomod o sumaap doho’! ³ Om mimboros po iyolo’ dot id doho’ do poingkaa, ’’A’ no iyau’d Kinorohingan uhupan,’’ ka no diyolo’. ⁴ Nga’ iya’ no, oi TUHAN, o ponokokolid ku do mongintirung doho’ do mantad id koligagaanan, om onuan oku i’ diya’ do kamanangan om popokoris ko do ginawo ku. ⁵ Lumohou oku diya’, oi TUHAN, do mokiuhup diya’, om simbaron oku i’ diya’ do mantad hino’d nuluhon nu dit olidang. ⁶ Lii oku nod minodop, om nintirungan oku id TUHAN do gisom do nosuaban. ⁷ A’ oku i’ moddosi di pisangod ku do rinibuan piya o kogumuo’ do tuminutuk do posorili’ doho’. ⁸ Rikot no, oi TUHAN, posio’ oku no, oi Kinorohingan ku! Hukumai no o koinsanai di pisangod ku, om a’ i’ iyolo’ milo do pokoruol doho’. ⁹ Kamanangan nopo om mantad i’ dot id diya’, oi TUHAN, om barakatan nu i’ o tulun nu.

¹ Maan di boyoon do modsisinding. Ompoton do kecapi. Sinding di Daud. ² Oi Kinorohingan, i mogobi’ doho’, simbaron oku no do tontok do sumambayang oku. Tontok dit id suang oku’d kosusaan, om tinulung oku i’ diya’. Kosianai no doho’ do dinondo om pokinongoho’ no o sambayang ku. ³ Songkuro po koloido’ dokoyu do mongindaraat doho’? Songkuro po koloido’ dokoyu dot orohian dit aiso’ o kootuk-otukon, om gumusa’ dit aiso’ o katapatan? ⁴ Hondomo’ no, do nokopomili’ no o TUHAN do songulun di kosianan dau do maan dau do dau’d songonuon, om pokinongohon oku i’ dau do tontok do lumohou oku dau. ⁵ Kooris kou no do mikuwo’d gagaran dot id toguang do Kinorohingan, soira’ nopo dot otogod kou om kada’ kou pomonsoi’d dusa. Om porolomon no o pomusorou do pasal diti, do tontok di pakadada’ kou do poillii dot id toodopon dokoyu. ⁶ Patahak nod porsombahan dit apatut dot id TUHAN, om ponongkuyaai no dau. ⁷ Ogumu’ o tulun do sumambayang do poingkaa, ’’Onuwai-nuwai po iyahai do barakat dot ogumu’, oi TUHAN; om maha’ daa om kohubayaan nu iyahai!’’ ka. ⁸ Nga’ iri nopo kataadan do pinatahak nu doho’ om agayo po ko’ i kataadan do pinatahak nu diyolo’ om agayo po ko’ i kataadan do tulun dit ogumu’ o dapu’. ⁹ Tontok do lumii oku om mipuwoyo’ oku nopod koodop, om aiso’ no o kagangau-gangau doho’; tu’ iya’ noo, oi TUHAN, i momogompi’ om poposimbayan doho’.

¹ Maan di boyoon do modsisinding. Ompoton do suling. Sinding di Daud. ² Oi TUHAN, pokinongoho’ no iti boros ku, om pokinongoho’ no iti todoi ku. ³ Pokinongoho’ no iti tihad ku do mokiuhup, oi Kinorohingan ku, i Raja’ ku! ⁴ Oi TUHAN, sumambayang oku dot id diya’, om orongou nu i’ o boros ku di dongkosuabon, mulai nogi’ o tadau om sumambayang oku no dot id diya’ do tontok di papatahak oku do porsombahan ku, om mandad oku nondo dot isimbar nu, oi TUHAN. ⁵ Iya’ nopo, oi Kinorohingan, om a’ i’ orohian di wowonsoyon dot araat, a’ nu i’ pologoson o tulun dot araat do sumuang di walai nu. ⁶ A’ ko i’ orohian do tulun di minggayo-gayo, om araatan ko do koinsanai’d tulun di momonsoi’d araat. ⁷ Patayon nu i’ o koinsanai’d tulun di goudut om iyada’ nu o tulun dit orongit om i monipu’. ⁸ Nga’ kosuang oku i’ di walai nu, tu’ agayo i’ kopio o kosianan nu, om milo oku i’ do sumambayang do hiri’d walai nu dit olidang, om motud oku do tumuku’ dot id diya’. ⁹ Ogumu’ tomod o pisangod ku, oi TUHAN, tudukai oku no do momonsoi di korohian nu, pointalango’ no o ralan nu do wayaan ku. ¹⁰ Nunu nopo i poboroson do pisangod ku om a’ i’ kopio milo do ponongkuyaanan, tu’ orohian no iyolo’d momungou doho’. Oomis tomod daa om kabayayat o boros diyolo’, nga’ poimponu’ i’ dit araat o ginawo diyolo’. ¹¹ Butusan no om hukuman no kopio iyolo’, oi Kinorohingan; om pologoson no i pakat diyolo’ dot araat do momungou diyolo’. Uyungon no iyolo’ do mantad id toguang nu tu’ i kogumuo’ do dusa diyolo’ om i kobinsaapo’ diyolo’ diya’ o koponguyungan. ¹² Nga’ tulun nopo di mintirung diya’ om ongooropod ngai’ no, om milo kasai’ iyolo’ do modsinding dot atataadan. Intirungai ngai’ no i tulun dit osianan diya’, tu’ iya’ no o kataadan kopio diyolo’. ¹³ Barakatan nu i’ i tulun di mumboyo’ diya’, oi TUHAN, om miagal pod kolid i kosianan nu do mongintirung diyolo’.

¹ Maan di boyoon do modsisinding. Ompoton do kecapi do tumanud di lagu’ di kawalu’. Sinding di Daud. ² Oi TUHAN, kada’ kotogod doho’, om kada’ oku iyadaai, kada’ oku hukumai do tontok dot otogod ko. ³ Kosianai no doho’ oi TUHAN, tu’ ohuyan oku no kopio; onuwai oku nod kokorisan tu’ a’ oku no kogoos. ⁴ Om poimponu’ oku pod kosusaan, songkuro po o koloido’ om mongoi ko nogi’ ponulung doho’, oi TUHAN? ⁵ Oi TUHAN, rikot no do mongoi pamasi doho’, poiduwo’ oku no do mantad id kapatayon tu’ kikosianan ko i’ doho’. ⁶ Hilo’ nopod pomogunan do tulun do napatai om a’ ko no ahandaman, om iso’ pod tulun nga’ aiso’ no o milo do mamarayou diya’ do hiloo’. ⁷ Oluhoi oku no dot adalaan do tumongob, monikid tuong nopo dot oyopos do romou ku i toodopon ku, om bantal ku nga’ oruyut nopo do romou ku. ⁸ Oruhai oku nod a’ kokito, tu’ nokobongkung tomod o mato ku do nouru’d miningihad do gama’ di pisangod ku. ⁹ Insodu’ kou no doho’, oi tulun dit angaraat! Tu’ orongou id TUHAN iti tihad ku. ¹⁰ Pokinongohon i’ dau o tihad ku do mokitulung, om simbaron i’ dau o sambayang ku. ¹¹ Om oinsanan nopondo i pisangod ku dot ointingayam, tu’ sigog indo dot oborulong iyolo’ om mogidu’ nondo iyolo’.

¹ Sinding di Daud do mogihad, i sinding dau dot id TUHAN, do gama’ di Kus, i tulun do Binyamin diri. ² Oi TUHAN, i Kinorohingan ku, rumikot oku dot id diya’ do mokiintirung, poiduwo’ oku no om posio’ oku no do mantad id toinsanan do tulun di momogusa’ doho’. ³ Tu’ ondung amu’, nga’ miagal pondo iyolo’d singa do mongoi pononggoi doho’, dot id kinoiyonon dit aiso’ no milo do mongoi pamasi doho’, om hilo’ nondo do pogianaton oku diyolo’. ⁴ - ⁵ Oi TUHAN i Kinorohingan ku, ondung nokowonsoi oku’d sala’ dot id disai nopo, ondung nokopohudsu oku do tambalut ku ko’ ruminongit oku po dot id pisangod ku dot aiso’ o paantakan — ondung haro o tiso’ddi do nowonsoi ku — ⁶ om pologoson nopo i pisangod ku do momogusa’ om mononggoi doho’, pologoson nopo iyolo’ do momobog om mamatai doho’ om monongkiad doho’ do poimpatai do poingiliu do hiti’d tana’! ⁷ Oi TUHAN, ingkakat no dot atatagadan! Saapo’ no i kororongit do pisangod ku. Oi Kinorohingan ku, ingkakat no om ngoyon oku no uhupai! Tu’ iri no it otulid o pokionuon nu. ⁸ Timungo’ ngai’ no o tulun dot id sorili’ nu, om porintaon no iyolo’ do hino’d tirikohonon nu do momorinta’ do hilo’d surga. ⁹ Iya’ no i gompomutus do koinsanai’d tulun, butusai oku no do tumanud di kotulido’ do ginawo ku, oi TUHAN, tu’ nokoilo ko i’ dot aiso’ o sala’ ku. ¹⁰ Iya’ no o Kinorohingan dit otulid om iya’ o mongilo do pomusarahan om korohian dahai. Tingkodo’ no i kararaat do tulun dot angaraat, om somuliai no i tulun dit ongosonong. ¹¹ Kinorohingan no o mongintirung doho’, posion i’ dau i tulun do mumboyo’ dau. ¹² Kinorohingan nopo om gompomutus dit otulid om hukuman kasai’ i’ dau i tulun dit araat. ¹³ Ondung a’ diyolo’ simbanan i kowoyo-woyoon diyolo’, om asaon nod Kinorohingan i gayang dau. Anaton no dau i pawakasan do pana’ om poundaon dau, ¹⁴ om ngoyon ngai’ dau i rapo-rapo dau di kapatai om potudukon i pana’ di kitapui. ¹⁵ Antangai pogi’ ondung poingkuro i tulun dot araat do minsorou dit angaraat, ginawo nopo diyolo’ om poimponu’ po dit araat om poimponu’ do poninipu’. ¹⁶ Mongukad no daa iyolo’d luang do maan do korotuon do wokon, nga’ iyolo’ nogi’ ot aratu’d hiri. ¹⁷ Om iri iddi i kararaat diyolo’ o minomohukum diyolo’ om i kororongit diyolo’ o pinopokoruol diyolo’. ¹⁸ Mongunsikou oku nod TUHAN di kotulido’ dau, om modsinding oku do mamarayou’d TUHAN, it Asawat Kopio.

¹ Maan di boyoon do modsisinding do tumanud di lagu’ do Gitit. Sinding di Daud. ² Oi TUHAN, i Kinorohingan dahai, nokito ngai’ no do pointongkop diti pomogunan o kogoyoo’ nu! Kosoibau i’ dilo tawan i sinding do pamarayou diya’, ³ do sindingon do tangaanak om i tangaanak di ragang po. Osimbayan ko i’ om aiso’ o koligagaanan nu do mantad id pisangod nu, om antaban ngai’ nu i’ i mumbal do sumaap diya’. ⁴ Tontok di tuminingaha’ oku do hilo’d tawan di winonsoi nu, do mintong di tulan om i rombituon di pinoiyon nu do hilo’d pinoiyanan nu, ⁵ om nunu’ddi kopio o tulun tu’ sorohon nu iyau? tulun i’ daa toomod iyau, nga’ gompion nu i’ iyau. ⁶ Nga’ tontok di winonsoi nu iyau, om iya’ poo oi Kinorohingan ot id sawat ko’ iyau, om tinupian nu po iyau do kagayaan om kosuahan. ⁷ Siniliu nu iyau do pomorinta’ dot id sawat do koinsanai di winonsoi nu, nonuan nu iyau do kuasa’ dot id sawat do koinsanai di winonsoi nu; ⁸ id sawat do dumba’ om sapi’, om iri nogi’ i nintorusan do hilo’d gouton, ⁹ id sawat do koinsanai’d tombolog om sada’ om it ongkipinuhobo do hilo’d rahat. ¹⁰ Oi TUHAN, i Kinorohingan dahai, nokito ngai’ no do pointongkop diti pomogunan o kogoyoo’ do kuasa’ nu!

¹ Maan di boyoon do modsisinding do tumanud di lagu’ do Mut-Labin. Sinding di Daud. ² Royohon ku no iya’, oi TUHAN, do mikuwo’d aayi-ayi’ o ginawo ku. Popinsusuyon ku nondo o koinsanai di nongowonsoi nu di kongopusahan kopio. ³ Modsinding oku nondo dot atataadan dot iya’ o kopodsindingan ku, modsinding oku nondo do mamarayou diya’, oi Kinorohingan it Asawat Kopio. ⁴ Mogidu’ ngai’ nopo i pisangod ku do tontok di mintalang ko, om aratu’ ngai’ nopo iyolo’, om angapatai. ⁵ A’ ko i’ manampaping om otulid o pomumutus nu, nobian oku i’ diya’ do tontok di minomutus ko. ⁶ Notogod ngai’ nu no i bansa’d suwai, nopunso nu no i tulun dot angaraat. Natanus nu no o ngaran diyolo’; om a’ noddi iyolo’ ahandaman do gisom dot alaid. ⁷ Nopunso noddi kopio i pisangod dahai do gisom dot alaid, nangaraag nu no i kabandaran diyolo’, om nolihuan noddi kopio iyolo’. ⁸ Nga’ TUHAN nopo om raja’ i’ do gisom do poingompus, nokopomonsoi no iyau do tirikohonon dau do momutus diti pomogunan. ⁹ Porintaon dau iti pomogunan do mikuwo’d katapatan, om otulid o pomumutus dau do koinsanai’d bansa’. ¹⁰ TUHAN no o kointirungan do tulun dit ulak-ulakan, om tiyonon dit aiso’ o koligagaanan do tontok do haro o kosusaan. ¹¹ Tulun nopo di kotutun diya’, om mogondos i’ diya’, oi TUHAN, a’ nu i’ tongkiadan tomod ot isai nopo tulun di rumikot dot id diya’. ¹² Podsinding no do mamarayou’d TUHAN, i momorinta’ do hilo’d Sion! Sunudan no o pointikid-tikid do bansa’ di nongowonsoi dau. ¹³ Ahandaman id Kinorohingan i tulun dot oinggorit, om a’ i’ dau olihuan i tihad diyolo’, om sulian i’ dau i tulun di minonginggorit diyolo’. ¹⁴ Oi TUHAN, kosianai no doho’! Antangai no iti koinggoritan do pinorikot di pisangod ku dot id doho’! Oi TUHAN, poiduwo’ oku no do mantad id kapatayon. ¹⁵ Om milo oku i’ do mingkakat dot id toguang di tulun do Yorusalim, i bandar dot olidang, om ongosunudan ku i’ iyolo’ do koinsanai di kapamarayahan ku diya’. Otood oku nondo tu’ pinasi oku i’ diya’. ¹⁶ Minongukad daa’d luang i piro-piro bansa’d suwai nga’ iyolo’ iddi o naratu’d hiri. Nokosulungon nopo diyolo’ om hiri id lawa’ di pinataan diyolo’. ¹⁷ Nokointalang nod TUHAN o tinan dau dot id suang di pomumutus dau dit otulid, iri nopo tulun dot araat om kosulung i’ di kowoyo-woyoon diyolo’. ¹⁸ Kapatayon no o kootuson ngai’ do tulun dit araat, om i magada’ do Kinorohingan. ¹⁹ A’ i’ kada-kadaan kasai’ i tulun di mosikin, om a’ tilombuson do mananus i soro-sorohon di tulun do mosikin. ²⁰ Oi TUHAN, rikot no, kada’ pologoso’ o tulun do minggayo-gayo! Potimbabao’ no diya’ i bansa’d suwai om porotuwai no iyolo’d hukuman. ²¹ Tompurolosio’ no iyolo’, oi TUHAN, popurimono’ no iyolo’ dot iyolo’ nopo om tulun i toomod.

¹ Nokuro tu’ osodu’ tomod ko, oi TUHAN? Nokuro tu’ lumisok ko nogi’ do tontok do kikosusaan iyahai? ² Ongoondos tomod i tulun dot araat om monginggorit iyolo’ di tulun do mosikin; pologoso’ no do kosulung iyolo’ di kararaat diyolo’. ³ Oondos tomod i tulun dot araat di korohian dau dot angaraat, om iri tulun do tamaha’ nga’ mimpopol poo om magada’ do TUHAN. ⁴ Tulun nopo dit araat om a’ i’ mamadul do TUHAN; aiso’ i’ o Kinorohingan dot osorou dau tu’ adalaan no kopio kasawat o ginawo dau. ⁵ Koundar ngai’ nopo o wonsoyon di tulun dot araat. A’ i’ iyau kosuhut dot oturan do Kinorohingan; om untotogodon dau i pisangod dau. ⁶ Moro-boros iyau dot id suang do ginawo dau do poingkaa, ’’A’ oku i’ bo iyoho’ koumbal dot a’ korikot dot id pokiririkatan ku, om a’ oku koumbal dot oontok do kosusaan do gisom dot alaid,’’ ka. ⁷ Koboro-boroso’ nopo dau om popol ngai’ poo om tudut, om boros do popokoruol do wokon; om oburuak iyau do mimboros do pongindaraat om pangamu-amu’ do wokon. ⁸ Mongoi iyau lisok do hiri’d kawalayan, om hilo’ no iyau do magawang do mamatai’d tulun dit aiso’ o sala’. Ngoyon dau solukuo’ i tulun di pokipapatayan dau, i tulun dit aiso’ no o pokukurayan, ⁹ miagal po iyau’d singa do poingandad do hiri’d linisok dau. Magawang iyau do tulun dit aiso’ o pokukurayan, om posulungon dau iyolo’ do hiri’d lawa’ dau om gayaton nogindo do mogidu’. ¹⁰ Songillatan po tomod i tulun di nangatangkap, tu’ aiso’ no o pokukurayan diyolo’, naala’ no iyolo’ di kororongit do tulun dit orongit. ¹¹ Boros ka dot id suang do ginawo di tulun dot araat, ’’A’ i’ monguro iti dot id Kinorohingan! Tu’ nokoungkodom nod Kinorohingan o mato dau om a’ no kokito doho’!’’ ka. ¹² Oi TUHAN, hukumai no kopio i tulun dot angaraat! Om hondomo’ no i tulun dit oinggorit! ¹³ Nokuro daa kopio tu’ mongindaraat do Kinorohingan i tulun dot araat, om momusorou dot a’ o Kinorohingan momohukum dau? ¹⁴ Nga’ kokito ko i’ om okito nu o kosusaan om koinggoritan dahai om atantu’ nod posodia’ kasai’ ko i’ do monulung dahai. Tumahak po dot id diya’ i tulun dit aiso’ o pokukurayan, tu’ monulung kasai’ ko i’ do tulun dit aiso’ o molohing. ¹⁵ Iduwo’ no o kuasa’ do tulun dit angaraat om ongorongit, hukumai no iyolo’ dot i kasalaan do nowonsoi diyolo’ o kopomohukuman, om a’ indo iyolo’ momonsoi kawagu do miagal diri. ¹⁶ TUHAN no o raja’ do gisom dot alaid, om tulun nopo di tumuku’ dot id tingolig om atanus indo do mantad id pomogunan dau. ¹⁷ Oi TUHAN, pokinongohon nu i’ i sambayang do tulun dit aiso’ o ngaran- ngaran, om pogiroton nu o ginawo diyolo’. ¹⁸ Pokinongohon nu i’ o tihad di tulun dit ulak-ulakan do wokon, om tihad di tangaanak dot aiso’ o molohing, obian nu i’ iyolo’ do tontok do momutus ko, om tumingkod indo o tulun do hiti’d pomogunan do rumongit do pokoruol do tulun.

¹ Maan di boyoon do modsisinding. Sinding di Daud. Mogondos oku id TUHAN do mongintirung doho’. Basug ko no kopio do momoros dot id doho’ dot, ’’Tulud pogi’ do miagal do tombolog do kumaa’d hilo’d konuluhanan, om apasi ko i’, ² tu’ naanat noddi tulun dot angaraat i pawakasan diyolo’d pana’ om nokotuduk no i pana’ do papanaon dot id tulun dit osonong do hiri’d kinoiyonon dit otuong. ³ Tu’ aiso’ no o milo’d wonsoyon di tulun dot osonong, do tontok dot a’ minsingoru o kowoyo-woyoon do tulun,’’ ka. ⁴ Nokosuang no o TUHAN do hilo’d Walai dau dit olidang, om hilo’d surga i tirikohonon dau do momorinta’. Piantangan i’ dau o koinsanai di tulun do hinonggo nopo om oilaan ngai’ dau o wonsoyon diyolo’. ⁵ Sorisidon i’ dau i tulun dit osonong om it araat, om aayi-ayi’ no kopio o ginawo dau dot araatan do tulun dit orohian do kororongit. ⁶ Porotuan dau dot arang di kitapui om tana’ do kitapui o tulun dit araat, om hukuman dau iyolo’d tongus di kosorob. ⁷ Otulid i’ o TUHAN om orohian iyau do kowoyo-woyoon dit otulid, om tulun nopo di momonsoi do miagal diri om kokito nod TUHAN om kotutun dau.

¹ Maan di boyoon do modsisinding do tumanud di lagu’ do kawalu’. Sinding di Daud. ² Oi TUHAN, tulungo’ no iyahai, tu’ aiso’ no ot iso’ piya’d tulun dot osonong do noolu’, aiso’ no o tiso’ pod tulun dot abantalan dit otulid o ginawo. ³ Mogiudut-udut ngai’ nopo iyolo’, om mogitipu-tipu’ do boros di kabayayat o maan do ponipu’. ⁴ Oi TUHAN, tingkodo’ no i dila’ di mimboros do boros di kabayayat. Om sompono’ no i kabang dit ongoondos, i mimboros do poingkaa, ⁵ ’’Iti i boros dahai o kaanu-anu dahai di pokioonuan dahai. Om poboroson nopondo dahai i korohian dahai’d poboros, om songulun po nga’ aiso’ i’ o milo do mogodu dahai,’’ ka no. ⁶ Boros kad TUHAN, ’’Rumikot oku noddi do baino’, tu’ ulak-ulakan tomod i tulun do mosikin om songodoi-odoi poo dot orurualan i tulun di maan inggorito’. Onuan ku nondo iyolo’ do kosimbayanan di laid no diyolo’d andad-andadon,’’ ka. ⁷ Milo ngai’ id ponongkuyaan i batos do TUHAN, tu’ aiso’ i’ o longot diri, iri nopo om miagal po di pirok dot inturu’ lanako’ do monompipi’ do hiri’d tapui. ⁸ - ⁹ Pointongkop nopo o tulun dot araat, om oinsanan nopo o tulun do mamarayou dit angaraat. Gompio’ kasai’ no iyahai, oi TUHAN, om intirungai no iyahai do mantad id kararaat do tulun diri.

¹ Maan di boyoon do modsisinding. Sinding di Daud. ² Songkuro po koloido’ nu do momolihu doho’, oi TUHAN? Gisom tuu dot alaid? Songkuro po koloido’ nu do lumisok do mantad id doho’? ³ Songkuro po tuu koloido’ ku’dti dot id suang do kosusaan? Songkuro po koloido’ do ponuabanan om panangadahan do poimponu’ kasai’ do katangaban o ginawo ku? Songkuro po koloido’ dot aala’ kasai’ oku di pisangod ku? ⁴ Antangai oku no, oi TUHAN, i Kinorohingan ku, om simbaro’ oku no. Pogulio’ no i kinoris ku, kada’ oku pologoso’ dot apatai. ⁵ Kada’ pologoso’ i pisangod ku do momoros dot, ’’Naala’ noddi dahai iyau,’’ ka. Kada’ iyolo’ pologoso’ dot ongotood dot i kinaalaan ku o kataadan. ⁶ Suminondiu oku i’ di kosianan nu dit aiso’ o kotingkadan, otood oku indo tu’ posion oku i’ diya’. Modsinding oku nondo dot id diya’, oi TUHAN, tu’ osonong tomod ko i’ dot id doho’.

¹ Maan di boyoon do modsisinding. Sinding di Daud. Poingkaa ot id suang do ginawo di tulun dot araat, ’’Aiso’ i’ bo o Kinorohingan,’’ ka. Araat ngai’ nopo iyolo’, om adalaan no kopio karaat i winonsoi diyolo’, aiso’ no songulun piya do momonsoi dit otopot. ² Lumuung no o TUHAN do mantad hilo’d surga dot id tulun, do mogontong daa ondung haro po o songulun di kitoilaan om i tumuku’ dau. ³ Nga’ oinsanan nopo iyolo’ do napalid, om oiyo nopo o kararaat diyolo’. Aiso’ no ot iso’ piya diyolo’ do momonsoi dit otopot, iso’ po nga’ aiso’ noo. ⁴ ’’A’ i’ tuu iyolo’dti koilo?’’ kad TUHAN do monguhot. ’’Oinsanan nopo tuu do basug iti tulun di mingwonsoi dot araat? Tu’ kaakan-akanan nopo diyolo’ om mongoi po pimpanakau di konunu-nunuan di tulun ku, om a’ no iyolo’ insan do sumambayang dot id doho’,’’ ka dau. ⁵ Nga’ moddosi indo iyolo’, do kokito do moyo-woyo’ o Kinorohingan do tulun di mumboyo’ dau. ⁶ Antaban daa di tulun dot araat it osorou di tulun do mosikin do wonsoyon dau, nga’ TUHAN i’ o monguhup dau. ⁷ Tuminotos oku no kopio do sumambayang om oonuan i’ do kamanangan ot Israil, do mantad hilo’d nuluhon do Sion. A’ no daa’ndo ogina-gina’ o kotoodo’ di tulun dot Israil dot oonuan kawagu iyolo’d TUHAN do kosimbayanan!

¹ Sinding di Daud. Oi TUHAN, isai o koino-ino do sumuang di Walai’d Sasambayangan dot Agayo? Isai o milo do sumambayang do hilo’d Sion, i nuluhon nu dit olidang? ² I tulun di mumboyo’ do Kinorohingan dot id suang do nunu nopo om i momonsoi kasai’ dit otopot, om it otopot om otulid o koboro-boroso’, ³ om it a’ mimboros do pakaraat do wokon. A’ i’ iyau momonsoi dot araat dot id tambalut dau om a’ popimboros do boros dit aiso’ o suang do ponompuraraat di songkoduwo dau. ⁴ Tumongkiad i’ iyau do tulun di niada’ do Kinorohingan, nga’ pusohon i’ dau i tulun di mumboyo’d TUHAN. Sulungon kasai’ nopo dau i batos dau, mulong piya dot apagon daa do sumulung. ⁵ Popoolos i’ iyau om a’ i’ iyau mokianu’d bunga di tusin di pinaalasan om mada’ iyau do sisipan do papasala’d tulun dit aiso’ o sala’. Isai nopo o tulun do momonsoi’d miagal diri om aiso’ no o koligagaanan do gisom dot alaid.

¹ Sinding di Daud. Oi Kinorohingan, gompio’ oku no, tu’ iya’ no o pagandasan ku do mongintirung doho’. ² Boros kangku dot id TUHAN, ’’Iya’ no o TUHAN ku, koinsanai dit ongosonong do haro dot id doho’ om mantad ngai’ i’ dot id diya’,’’ kangku. ³ A’ no ogina-gina’ o kosonongo’ di tulun dot ongotorodok di songonuon do TUHAN! Korohian ku nopo kopio om poinsugku’ daa diyolo’. ⁴ Tulun nopo di tumuku’ do tingolig om poporikot nod kosusaan dot id tinan diyolo’. A’ oku i’ tumanud diyolo’ do papatahak do porsombahan di sumbolion dot id tingolig; om a’ oku tumuku’ di tingolig diyolo’. ⁵ Oi TUHAN, iya’ poo i haro dot id doho’, om iya’ o manahak doho’ do koinsanai di pokionuon ku! Koposi-posion ku nopo dot id dosunsudan om id suang id palad nu. ⁶ Osonong tomod i nipuhawang nu dot id doho’, om koinsonong tomod do ginawo ku! ⁷ Royohon ku no o TUHAN, tu’ monuduk i’ iyau doho’, om dongotuong piya nga’ moro-boros i’ o ginawo ku do popoinsan doho’. ⁸ Kopuriman kasai’ oku i’ dot id toning ku o TUHAN, om poingoros iyau doho’, om aiso’ noddi o koguyu’ doho’. ⁹ Om ounsikou oku noddi om otood oku, om aiso’ no o koligagaanan dot opurimanan ku, ¹⁰ tu’ intirungan oku i’ diya’ do mantad id kuasa’ do kapatayon, om a’ nu i’ tongkiadan do hilo’d pomogunan do tulun di napatai i tulun di kosianan nu. ¹¹ Potudukon nu i’ doho’ i ralan di poingkaa dot id koposion. Tontok di hino ko dot id toning ku, om iri no o popotood kopio doho’, om poposimbayan doho’ do gisom dot alaid.

¹ Sambayang di Daud. Oi TUHAN, pokinongoho’ no iti sambayang ku do mokianu dit otulid, podulo’ no iti tihad ku do mokitulung! Pokinongoho’ no iti sambayang ku di mantad kopio dot id ginawo ku. ² Om obian oku indo diya’ do momutus ko, tu’ oilaan nu i’ it otopot. ³ Oilaan nu i’ o ginawo ku. Ruminikot ko i’ dot id doho’ di dongotuong, nosorisid oku no kopio diya’ om aiso’ i’ o nokito nu do korohian ku dit araat. ⁴ A’ oku i’ mimboros dot araat do miagal di wokon, minumboyo’ oku i’ di pinonuhuan nu om a’ oku i’ tuminanud di kowoyo-woyoon dit ongorongit. ⁵ Suminusui kasai’ oku i’ di ralan nu om a’ oku i’ nokoumbal do suminansala’. ⁶ Sumambayang oku dot id diya’, oi Kinorohingan, tu’ sumimbar ko i’ doho’. Iyo nopoddi om podulo’ oku no om pokinongoho’ no iti boros ku. ⁷ Pointalango’ no i kosianan nu di kopusahan kopio, om apasi i’ iyahai. Hiri nopod toning nu, om aiso’ no o ligogon dahai dot orikot iyahai di pisangod dahai. ⁸ Gompio’ oku no do miagal do pomogompi’ nu do mato nu, lisoko’ oku no dot id dokungkuban do talad nu. ⁹ Om a’ oku i’ asangod do tulun dit araat, notutukan oku nod pisangod ku di mokipamatai doho’. ¹⁰ Aiso’ no o kosian-sianan diyolo’ om ongoondos ngai’ o koboro-boroso’. ¹¹ Posorili’ no iyolo’ doho’ do dinondo, om honggo nopo o pakayaan ku om hiri no iyolo’ do mogihum do ralan do mamahaba’ daa doho’. ¹² Miagal po iyolo’ di singa do magawang doho’, om pokitatabpaan oku no daa diyolo’ do maan pogianato’. ¹³ Rikot no, oi TUHAN, ngoyo’ saapo’ i pisangod ku om alaon no iyolo’! Poiduwo’ oku no do mantad id tulun dot araat dot i gayang nu o popoidu’ doho’! ¹⁴ Poiduwo’ oku no do mantad id tulun di monimung do dapu’ diyolo’ do hiti’d pomogunan. Hukuman no iyolo’ di koinggoritan di notimung nu do porotuon dot id diyolo’. Orotuan po daa di pomohukum nu i tangaanak diyolo’ om i manangaki diyolo’. ¹⁵ Nga’ iyoho’ nopo om kokito oku indo diya’, tu’ aiso’ i’ o sala’ do nowonsoi ku, om oposik oku nopondo om oponu’ oku id kataadan tu’ poingoros ko i’ doho’.

¹ Maan di boyoon do modsisinding. Sinding di Daud, i susuhuon do TUHAN. Sininding o sinding diti dot id TUHAN do tontok di nokoidu’ i Daud do mantad id di Saul om id pisangod dau. ² Osianan oku no kopio diya’, oi TUHAN, iya’ no o tadon do kinoris ku. ³ TUHAN no o kointirungan ku, iyau no o kuta’ dit apanggor dot intirungon ku. Iri no Kinorohingan ku o kointirungon ku, om aiso’ no o koligagaanan ku do poinsugku’ dau. Miagal po iyau di kolid do mongintirung doho’, intirungan oku om gompion oku dau. ⁴ Lumohou oku nod TUHAN, om poiduwon oku i’ dau do mantad id pisangod ku. Royohon ku no o TUHAN! ⁵ Posorili’ po doho’ o kapatayon, om malit doho’ i tumbak do mamaraag. ⁶ Posorili’ no doho’ o kapatayon, om nakataan no di lobong o pamalawa’ dau doho’. ⁷ Luminohou oku’d TUHAN do tontok dit id suang oku’d kosusaan, luminohou oku’d Kinorohingan ku do mokitulung dau. Norongou i’ dau i boros ku do hiri’d Walai dau, pinokinongou i’ dau i tihad ku do mokitulung. ⁸ Om guyu’ noddi om gogor iti pomogunan, om i pinoimpahan do nuluhon nga’ guminuyu’ om guminogor, tu’ tuminogod no kopio o Kinorohingan. ⁹ Muntu-nguntu’ po o lisun do lumabus do mantad id todung dau, om sinikit do tapui om popou o lumabus do mantad id kabang dau. ¹⁰ Piangkango’ nopo dau ilo tawan om lintuhun no do mitonggoi’d haun dit otuong do hiri’d siriba’ do lapap dau. ¹¹ Osiau nopo iyau do tuminulud dot id sakai di moloikat di roitan do kerub, om huminombo iyau dot id sakai di talad do ribut. ¹² Tinirung dau do totuong o tinan dau, om nosorili’ iyau do haun dit akapal om poimponu’ do waig. ¹³ Lumopuson nopo di haun dot otuong o karambatu om kalab do tapui do mantad id kodumaat dit id toguang dau. ¹⁴ Om ngorod noddi o TUHAN do mantad hilo’d tawan, om norongou’ddi o boros dau, iyau it Asawat Kopio. ¹⁵ Papanao’ no dau i pana’ dau om pogitotongkiad nopo i pisangod dau; om santangkus-tangkus poddi iyolo’ do mogidu’ do kalab-kalaban do kodumaat. ¹⁶ Om kointalang nopoddi i nanad do rahat, om koimbulai ngai’ i pinoimpahan do katanaan, do tontok di tinogod do TUHAN i pisangod dau om di ginarangan dau iyolo’ dot atatagadan. ¹⁷ Poroloyo’ nod TUHAN o longon dau do mantad hilo’d sawat om gayato’ oku no, om potindalo’ oku no do mantad hiri’d waig dit aralom. ¹⁸ Pinoidu’ oku dau do mantad id pisangod ku dit ongokoris tomod om mantad id koinsanai di tulun dit araatan doho’ tu’ adalaan no kopio kokoris om a’ oku no kotori’. ¹⁹ Tontok dit id suang oku do kosusaan, om nongoi oku daa diyolo’ songodo’, nga’ nintirungan oku id TUHAN. ²⁰ Tinulung oku i’ dau do suminoliwan do mantad id koligagaanan, pinasi oku i’ dau tu’ osianan i’ iyau doho’. ²¹ Somulian oku id TUHAN tu’ otopot i’ o wonsoyon ku, om barakatan oku i’ dau tu’ aiso’ i’ o sala’ ku. ²² Minumboyo’ oku dit oturan do TUHAN, om a’ oku i’ tuminongkiad do Kinorohingan ku. ²³ Napadul ngai’ ku i’ i Tourat dau, om a’ ku i’ sinongkiwal i ponuhuan dau. ²⁴ Oilaan i’ dau dot aiso’ o sala’ ku, om mininsodu’ oku di wowonsoyon dit araat. ²⁵ Om somulian oku i’ dau tu’ iri i’ i korohian dau o wonsoyon ku, om oilaan i’ dau dot aiso’ o sala’ ku. ²⁶ Oi TUHAN, otorodok ko i’ dot id tulun dit otorodok dot id diya’, om osonong tomod ko dot id tulun dit aiso’ o kabara-barasan. ²⁷ Osonong ko i’ dot id tulun dit osonong, nga’ saapon nu i’ i tulun dit araat. ²⁸ Posion nu i’ i tulun di minsiriba’, nga’ poinsiribaon nu i’ i tulun di minggayo-gayo. ²⁹ Iya’ no o manahak doho’ do tanawau, oi TUHAN i Kinorohingan ku, om iya’ o mongidu’ di totuong ku. ³⁰ Onuan oku diya’ do kokorisan do sumaap do pisangod ku om kuasa’ do tumolibamban di tolig di pogintirungan diyolo’. ³¹ Aiso’ i’ o bohiton di wonsoyon do Kinorohingan, om milo kopio do ponongkuyaan o batos dau. Tu’ miagal iyau do kolid do tamas dot id koinsanai di tulun di mintirung dau. ³² TUHAN noo o Kinorohingan, Kinorohingan noo o manahak dati’ do kointirungan. ³³ Iyau no i Kinorohingan di popokoris doho’, om i poposimbayan do tindalanon ku. ³⁴ Pinokoris dau o gakod ku do miagal di gakod do tambang, om ginompi’ oku dau do hilo’d konuluhanan, gisom dot aiso’ o kinoligagaanan ku. ³⁵ Tinudukan oku dau do sumangod, om milo oku iddi do manganat di pana’ dit ologod. ³⁶ Oi TUHAN, nintirungan oku i’ diya’ om pinasi oku diya’, iri no i gogompi’ nu o pinapabantug doho’, om i sinundu nu o minomogompi’ doho’. ³⁷ A’ oku i’ diya’ pinologos do natangkap, om a’ oku insan karatu’. ³⁸ Gusaon ku nopo i pisangod ku do gisom dot aala’ ku iyolo’, om a’ oku i’ mundorong dot a’ ku po apatai iyolo’. ³⁹ Binobog ku iyolo’ do gisom dot a’ no iyolo’ kotungag, poingiliu po iyolo’ do nangaala’ dot id toguang ku. ⁴⁰ Nonuan oku diya’ do kokorisan do sumangod om kamanangan do suminangod do pisangod ku. ⁴¹ Pinogidu’ nu i pisangod ku do mantad id doho’, patayon ku nopo it araatan doho’. ⁴² Mingihad po iyolo’ do mokitulung nga’ aiso’ no o tiso’d tulun do mongoi ponulung diyolo’, lumohou daa iyolo’d TUHAN nga’ a’ i’ iyau sumimbar. ⁴³ Minumuk ku iyolo’ gisom do miagal po iyolo’ di pupuk do tilibon do ribut. Pingulakan ku po iyolo’ do miagal do burutak do hiri’d ralan. ⁴⁴ Pinasi oku diya’ do mantad id tulun dit obinsaap, om siniliu oku diya’ do pomorinta’ do koinsanai di bansa’, om bansa’ dit a’ mantad ku otutunan nga’ nosiliu noddi do susuhuon ku. ⁴⁵ Iri piya bansa’d suwai nga’ minsiriba’ i’ dot id doho’, om orongou oku nopo diyolo’d monuhu’ om mumboyo’ i’ iyolo’. ⁴⁶ Atagakan tomod nopo iyolo’ do kosioho’, om pananggagaran po iyolo’ do sumoliwan di kuta’ do pogintirungan. ⁴⁷ Poimpasi i’ o TUHAN! Royohon no i mogobi’ doho’! Popinsunudo’ no i kogoyoo’ do Kinorohingan di minamasi doho’. ⁴⁸ Nonuan oku dau do kamanangan do suminangod di pisangod ku, om pinoporintaan dau doho’ i piro-piro o bansa’. ⁴⁹ Om pinasi oku dau do mantad id pisangod ku. Om nonuan oku dau do kamanangan do suminangod di pisangod ku, om nintirungan oku dau do mantad id tulun dit orongit. ⁵⁰ Om iri no o kapamarayahan ku diya’ dot id pogialatan di bansa’, om modsinding oku do mamarayou diya’. ⁵¹ Onuan do Kinorohingan do kamanangan dot agayo i raja’ dau, om osianan kasai’ i’ iyau di tulun di nopili’ dau, i Daud om i sinakagon dau do gisom dot alaid.

¹ Maan di boyoon do modsisinding. Sinding di Daud. ² Popointalang i’ kopio ilo tawan do kagayaan do Kinorohingan, om popinsusui di nongowonsoi dau dit angagayo kopio. ³ Polombuson i’ do tadau o habar diri dot id tadau di sumusuhut, om posusuyon di totuong iri dot id totuong dit id dabantalan. ⁴ Aiso’ id komi om aiso’ o boros diyolo’, om aiso’ o tuni dot orongou. ⁵ Nga’ kotongkop id pomogunan o boros diyolo’ om orongou i’ do hilo’d tisan do tana’. Winansayan do Kinorohingan do tiyonon ilo tadau do hilo’d tawan, ⁶ om mimbulai nondo iri do dongkosuabon do miagal di tanakwagu dot otood tomod do mongoi kawin, om miagal di tulun di mananangkus do sitangkus no dot id pilumbaan. ⁷ Mulai nopo i tadau dot id tisan do tawan om dumarapas no do kumaa dot id tisan ponong hilo’. Om iso’ po nga’ aiso’ no o milo do lumisok do mantad id kolosuo’ di tinitiu dau. ⁸ Oturan nopod TUHAN om aiso’ no o bohiton, om manahak do kokorisan do wagu. Ponuhuan nopod TUHAN om milo id ponongkuyaanan, om manahak do toilaan dot id tulun dit aiso’ o toilaan. ⁹ Tourat nopod TUHAN om ongotopot i’, om tulun nopo di mumboyo’ddi om kaanu no do kosimbayanan. Ponuhuan nopod TUHAN om otulid i’ om poposuhut do tulun. ¹⁰ Sumambayang nopo dot id TUHAN om osonong tomod i’, om mositi’ nod wonsoyon kasai’ o miagal diri. Oturan nopod TUHAN om milo i’ do ponongkuyaanan, otulid i’ iri do gisom dot alaid. ¹¹ Oturan nopod TUHAN om agayo i’ o gatang ko’ mantad do tamas di nosompipi’, om oomis ko’ mantad di paha’ dit aiso’ o rolot. ¹² Manahak doho’ iri do toilaan, iyoho’ i susuhuon nu, om somulian oku tu’ numboyo’ ku i’ iri. ¹³ Aiso’ i’ o koilo do kasalaan dau dot iyau om iyau, poiduwo’ oku no do mantad id kasalaan ku di songillisok, oi TUHAN. ¹⁴ Om poinsoduwo’ oku no do mantad id dusa di tomodon, kada’ pologoso’ iri do momorinta’ doho’. Om aiso’ indo o kabara-barasan doho’ om koidu’ oku do mantad id kararaat do dusa. ¹⁵ Maha’ daa om kohubayaan nu iti boros ku om iti pomusarahan ku, oi TUHAN iya’ no i pogintirungan ku, om i gampamasi doho’!

¹ Maan do boyoon do modsisinding. Sinding di Daud. ² Maha’ daa om simbaron ko’d TUHAN do tontok dot id suang ko’d kosusaan! Maha’ daa om intirungan ko di Kinorohingan di Yakub! ³ Maha’ daa om paatadan ko dau dot itulung do mantad id Walai’d Sasambayangan dit Agayo om onuan ko di monguhup do mantad hilo’d Nuluhon do Sion. ⁴ Maha’ daa om romiton ngai’ dau i porsombahan nu om orohian iyau do koinsanai di porsombahan di sumbolion. ⁵ Maha’ daa om patahakon dau diya’ o koinsanai di korohian nu om popoundar do koinsanai dit osorou nu’d wonsoyon. ⁶ Om mamangkis toko’ nogindo dot atataadan do nakamanang ko om ramayon dahai i kinamanangan nu do mikuwo’d mamarayou’d Kinorohingan toko’. Om maha’ daa om patahakon ngai’d TUHAN i pokionuon nu. ⁷ Oilaan ku noddi do baino’ dot onuan do TUHAN do kamanangan i raja’ di nopili’ dau, om simbaron dau iyau do mantad hilo’d surga, i kinoiyonon dau dit olidang, om onuan do TUHAN i raja’ddi do kamanangan dit agayo dot i kuasa’ dau o papamanang. ⁸ Haro i’ o wookon do tulun do mogondos di korita’-kuda’ diyolo’ do don sumasangod om tulun nod suwai om mogondos di kuda’ diyolo’, nga’ iyati’ nopo om a’ i’ iyo’ddi, iyati’ nopo om mogondos i’ di kuasa’d TUHAN, i Kinorohingan toko’. ⁹ Tulun nopod miagal diri om kasadu i’ om aratu’, nga’ iyati’ nopo om kotungag i’ om apanggor do poingkakat. ¹⁰ Onuwai nod kamanangan i raja’, oi TUHAN, simbaro’ no iyahai do tontok do sumambayang iyahai.

¹ Maan di boyoon do modsisinding. Sinding di Daud. ² Osonong tomod o ginawo di raja’, oi TUHAN, tu’ nonuan nu iyau do kokorisan. Otood iyau tu’ pinamanang nu i’ iyau. ³ Pinatahak ngai’ nu dau o koinsanai di korohian do ginawo dau, om pinohubayaan nu i pinokianu dau. ⁴ Rumikot ko dot id dau do mikuwo’d barakat di mabai-labai, om tinupian nu iyau do tupi’ do tamas di don raja’. ⁵ Minokianu iyau do koposion, om nonuan nu i’ iyau do tumur dot anaru, i koposion do poingompus. ⁶ Agayo o kagayaan dau tu’ nuhupan nu i’ iyau om nonuan nu iyau do kobontugan om kagayaan. ⁷ Moyo-woyo’ kasai’ i’ dau i barakat nu do gisom dot alaid om otood tomod iyau tu’ poingoros kasai’ ko i’ dau. ⁸ Mogondos i’ i raja’, do TUHAN, it Osundu Kopio, om aiso’ indo o koligagaanan dau do gisom dot alaid, tu’ osianan kasai’ i’ o TUHAN dau. ⁹ Atangkap ngai’ indo di raja’ i pisangod dau om tangkapon ngai’ dau i tulun dit araatan dau. ¹⁰ Rumikot nopondo iyau do miagal do tapui di molob-ngolob om patayon ngai’ nopo dau iyolo’. Patayon nondod TUHAN iyolo’ dot atatagadan iyau, om sorobon nondo iyolo’ di tapui. ¹¹ Aiso’ nondo o tiso’ piya di sinakagon diyolo’ dot apasi, tu’ patayon ngai’ nopo iyolo’ di raja’. ¹² Minsorou nopo daa iyolo’ do sumaap dau, nga’ a’ i’ iyolo’ nakamanang. ¹³ Panaon indo dau iyolo’ di pana’ dau om gisom do manangkus nopo iyolo’d mogidu’. ¹⁴ Royohon no dahai iya’, oi TUHAN, tu’ agayo i’ o kuasa’ nu! Modsinding nondo iyahai do mamarayou di kokoriso’ nu.

¹ Maan di boyoon do modsisinding. Tumanud di lagu’ do: tambang di dongminsusuab. Sinding di Daud. ² Oi Kinorohingan ku, oi Kinorohingan ku, nokuro tu’ tinongkiadan oku diya’? Mihad-ihad oku po do mokitulung, nga’ aiso’ i’ o nokorikot do mongoi ponulung doho’. ³ Oi Kinorohingan ku, millohou oku diya’ di dangadau, nga’ a’ ko i’ sumimbar, om sumambayang oku di dongotuong nga’ aiso’ i’ o kosimbayanan do ginawo ku. ⁴ Nga’ iya’ i’ i raja’ dit olidang kopio, i pingroyohon do tulun dot Israil. ⁵ Minogondos i’ diya’ i komolohingan dahai, minogondos iyolo’ diya’, om pinasi nu iddi iyolo’. ⁶ Mininglohou iyolo’ diya’ om nokoidu’ iddi iyolo’ do mantad id koligagaanan, minogondos iyolo’ diya’ om a’ iddi iyolo’ noiman-iman. ⁷ Nga’ iyoho’ nopo om okon oku no ko’ tulun, tu’ miagal oku pod tonggiluang, dot indaraaton om hingi-hingion do koinsanai’d tulun. ⁸ Mongirak-irak ngai’ nopo doho’ i tulun di kokito doho’, sontondila-dila’ nopo iyolo’ om sombingog-bingog o tulu. ⁹ Boros ka no diyolo’, ’’Sumondiu ko’d TUHAN, nga’ nokuro’ddi tu’ a’ ko i’ dau ngoyon posio’? Ondung orohian daa o TUHAN diya’, om nokuro’ddi tu’ a’ ko dau ngoyon tulungo’?’’ ka no. ¹⁰ Iya’ i’ o pinapasawa’ doho’ do mantad id tian do tina’ ku, gisom dot osonong-sonong oku i’, ginompi’ oku i’ diya’ do tontok di ragang oku po. ¹¹ Mantad po di pogkosusuo’ oku i’ om iya’ no o pinagandasan ku, om iya’ no kasai’ o Kinorohingan ku. ¹² Kada’ kopio insodu’ doho’, oi TUHAN, tu’ osomok no o kosusaan, om aiso’ no o monulung doho’ do suwai ko’ iya’. ¹³ Ogumu’ tomod o pisangod do songintutuk doho’, miagal po iyolo’ di sapi’ do gonsukod, songinsorili’ nopo iyolo’ doho’, do miagal po di sapi’ do gonsukod dot ongorongit do mantad hilo’d pomogunan do Basan. ¹⁴ Sontungkabang no iyolo’ do miagal di singa, om sanggarom-garom do mongoi panabpo doho’. ¹⁵ Aiso’ no o kokorisan ku, miagal pod waig di nokotuntug do hilo’d tana’ tu’ aiso’ noddi. Nopisala’ ngai’ nopo o langaban ku, om ginawo ku nga’ oluhoi no do miagal poddi rilin do nalanak. ¹⁶ Miagal pod pupuk kotuu o tatalanan ku, om poinsokot po dot id kahad o dila’ ku. Tongkiadai tomod oku nopo diya’, oi TUHAN, do miagal po di tulun do napatai do hiri’d lobong. ¹⁷ Notutukan oku pod tulun dit angaraat, miagal po iyolo’d tasu dit ogumu’ do tuminutuk doho’, mingkokot po iyolo’d longon om gakod ku. ¹⁸ Atalang ngai’ po o tulang ku, songinsonsod po i pisangod ku do montong doho’. ¹⁹ Nundi’ diyolo’ ondung isai o kaanu di rasuk ku dit anaru, om pogiduwo-duwoo’ nogiddi diyolo’ i pakayan ku. ²⁰ Kada’ nogi’ kopio insodu’ doho’, oi TUHAN, siahai nod mongoi ponulung doho’. ²¹ Poiduwo’ oku no do mantad id gayang diri, poiduwo’ oku no do mantad id tasu di manabpo. ²² Poiduwo’ oku no do mantad id singa, aiso’ no o pokukurayan ku dot id toguang di baanan do sapi’ di lalang. ²³ Sunudan ku nondo i tulun ku di nongowonsoi nu, om royohon ku nondo o ngaran nu do hilo’d pitimungan diyolo’. ²⁴ Boros kangku’ndo, ’’Royohon no dokoyu iyau, iyokoyu i susuhuon do TUHAN. Poinggoyoo’ no dokoyu iyau, iyokoyu i sinakagon di Yakub. Tuku’ kou no dot id dau, oi tulun dot Israil. ²⁵ A’ i’ dau iyada-daan i tulun dit ulak-ulakan, om a’ olihuan i koinggoritan diyolo’. Om a’ i’ dau iyolo’ iduan, suwai ko’ sumimbar i’ iyau do tontok do lumohou iyolo’ do mokitulung,’’ kangku’ndo. ²⁶ Royohon ku nondo iya’, oi TUHAN, do hiri’d pitimungan do tulun dot ogumu’ dot i nongowonsoi nu o kapamarayahan ku. Patahakon ku nondo i porsombahan do sumbolion di nakabatos mantad ku do hiri’d dotoguangan do koinsanai di tulun di tumuku’ dot id diya’. ²⁷ Mingyahan nondod makan i tulun do mosikin, om mamarayou’d TUHAN i tulun di rumikot dot id TUHAN. Maha’ daa om osimbayan kasai’ iyolo’ do gisom dot alaid. ²⁸ Oinsanan nopondo o bansa’ do kosorou’d TUHAN. Rumikot ngai’ nopondo dot id dau o tulun do mantad id pointikid do linsuk diti pomogunan, oinsanan nopondo o bansa’d tulun do tumuku’ dot id dau. ²⁹ Tu’ TUHAN no o raja’ di kikuasa’, om iyau no o momorinta’ do koinsanai’d bansa’. ³⁰ Tumuku’ ngai’ nopondo dau i tulun dit ongoondos, om tumuku’ ngai’ dot id dau o koinsanai’d tulun. ³¹ Momonsoi ngai’ nopondod karaja’ dau i sinakagon di sumusuhut, om posunudon nondod tulun o pasal do TUHAN dot id sinakagon diyolo’, do gisom do mogisolusuk-lusuk. ³² Om iri piya tulun dit a’ po nongosusu nga’ sunudan nondo do poingkaa, ’’Pinasi’d TUHAN o tulun dau,’’ ka.

¹ Sinding di Daud TUHAN no o gompomogompi’ doho’, om haro ngai’ ku no. ² Pologoson oku dau do mundorong do hiri’d butur dit otomou. Potunudon oku dau do waig dit amu’ opuhod. ³ Inwoguan dau o koposion ku. Ahakon oku dau do sumusui di ralan dot otopot, tu’ iyo noddi o kowoyo-woyoon do ngaran dau. ⁴ Mulong piya’ do kawaya’ oku do kubong dit iyo pod kapatayon o kotuongo’, nga’ amu’ oku i’ moddosi do koligagaanan, oi TUHAN, tu’ moyo-woyo’ ko i’ doho’. Iri no tungkat om sukud nu o koinsasamod doho’. ⁵ Papaharo ko do poginakanan do maan ku, do hiri’d dokito di pisangod ku. Romiton oku i’ diya’, do miagal do tombului di suahon kopio. Om ihiban nu i sangkir ku do gisom do kalabai. ⁶ Iri no kosonongo’ om kosianan nu o moyo-woyo’ doho’, do pointikid-tikid tadau do koposion ku. Om miyon oku indo do hiri’d walai nu, oi TUHAN do gisom do poingompus.

¹ Sinding di Daud. TUHAN no o sanganu diti pomogunan om koinsanai di songingiyon do hiti’d pomogunan, iti tana’ om koinsanai di poingiyon do hiti nga’ iyau ngai’ i’ o sanganu. ² Pinili’ dau i pinoimpahan diti tana’ do hilo’d sakai do rahat, om pinoudong dau iri do hiri’d sakai’d waig dot aralom. ³ Isai no ot osorupai do tumakad do hilo’d nulu-nulu do TUHAN? Isai no o kosuang di Walai’d Sasambayangan dot Agayo? ⁴ Iri no tulun dit otulid o kowoyo-woyoon om pomusarahan, om it a’ tumuku’ dot id tingolig om a’ mamatos dit aiso’ o suang. ⁵ Om barakatan nondo iyolo’d TUHAN om posion dau iyolo’, om poboroson indo do Kinorohingan dot aiso’ o sala’ diyolo’. ⁶ Miagal noddi o tulun di rumikot dot id Kinorohingan, i mongoi tuku’ dot id toguang do Kinorohingan di Yakub. ⁷ Iwangai ngai’ no i wawayaan, iwangai ngai’ no i wawayaan di winonsoi di gulu po, om sumuang i’ i Raja’ dot Agayo kopio. ⁸ Isai i Raja’ dot agayo kopio’ddi? Iyau no i TUHAN, it okoris om poimponu’ do sinundu; i TUHAN do nakamanang dot id pinisangadan. ⁹ Iwangai ngai’ no i wawayaan, iwangai ngai’ no i wawayaan di winonsoi di gulu po, om sumuang i’ i Raja’ dot agayo kopio. ¹⁰ Isai i Raja’ dot agayo kopio’ddi? Iyau no i TUHAN dit Osundu Kopio. Iyau no i Raja’ di kikagayaan.

¹ Sinding di Daud. Id diya’ no, oi TUHAN, o porikatan ku do sambayang ku, ² iya’ no o pagandasan ku, oi Kinorohingan ku! Kada’ oku pologoso’ dot ointingayam dot aala’, kada’ pologoso’ i pisangod ku do monguntotogod doho’. ³ A’ i’ aala’ i tulun di mogondos diya’, suwai ko’ iri no tulun dit obinsaap diya’ ot aala’. ⁴ Tudukai oku no do karalan-ralano’ nu, oi TUHAN, pointalango’ ngai’ nori dot id doho’. ⁵ Tudukai oku no, om miontok i’ di korohian nu o kowoyo-woyoon ku, tu’ iya’ no o Kinorohingan ku di mamasi doho’. Mogondos kasai’ oku i’ diya’. ⁶ Oi TUHAN, hondomo’ no i kopuhawango’ om kosianan nu dit aiso’ o kotingkadan, di nokointalang nu do mantad di gulu po. ⁷ Ompunai no i dusa om i kasalaan ku do mantad dit okoro’ oku po. Hondomo’ oku no, oi TUHAN, tu’ mompus-ompus i’ o kosianan om kosonongo’ nu. ⁸ TUHAN nopo om osonong i’ om otulid, om potudukon i’ dau i ralan dau dot id tulun di kidusa. ⁹ Tudukan i’ do TUHAN i tulun dit osiriba’ o ginawo om tumanud i’ iyolo’ di korohian dau. ¹⁰ Woyoon i’ dau do mikuwo’d kotorodoko’ om kosianan dau o koinsanai’d tulun di tumanud do boros dau om mumboyo’ di ponuhuan dau. ¹¹ Bayaano’ no i batos nu oi TUHAN, om ompunai no o dusa ku, tu’ ogumu’ no kopio o dusa ku. ¹² Tulun nopo di mumboyo’d TUHAN om otudukan no dau do ralan dit apatut do susuyon diyolo’. ¹³ Om osimbayan indo kasai’ iyolo’, om tangaanak diyolo’ nga’ kotungkus nondo di pomogunan diyolo’. ¹⁴ TUHAN no o tambalut do tulun di mumboyo’ dau om pogiroton dau i batos dau dot id tulun diri. ¹⁵ Poingontong kasai’ oku nopod TUHAN, i monguhup doho’, om poiduwon oku i’ dau do mantad id koligagaanan. ¹⁶ Antangai oku no oi TUHAN, om kosianai no doho’, tu’ iso-iso’ oku no, om oluhoi oku. ¹⁷ Iduwo’ no i katangkabaan ku, om poiduwo’ oku no do mantad id koinsanai do kosusaan ku. ¹⁸ Antangai no iti kosusaan om koinggoritan ku, om ompunai ngai’ no o dusa ku. ¹⁹ Antangai pogi’ nga’ ogumu’ tomod moti’ o pisangod ku, om a’ no ogina-gina’ o kototogod diyolo’ doho’. ²⁰ Gompio’ oku no om kada’ oku pologoso’ dot aala’, tu’ rumikot oku i’ dot id diya’ do mongoi pokiintirung diya’. ²¹ Maha’ daa om ointirungan oku di kosonongo’ om kotulido’ do ginawo nu, tu’ mogondos oku i’ diya’. ²² Oi Kinorohingan, poiduwo’ no ot Israil i tulun nu, do mantad id koinsanai do kosusaan diyolo’.

¹ Sinding di Daud. Pokotopoto’ oku no, oi TUHAN, tu’ otopot i’ o wonsoyon ku. Om iso-iso’ no kopio o ginawo ku do mogondos diya’. ² Antangai oku no kopio, om umbalai oku no, oi TUHAN, sorisido’ no o korohian om pomusarahan ku. ³ Iri no i kosianan nu dot aiso’ o kotingkadan o popotunud doho’, om i kotorodoko’ nu o momoyo’ kasai’ doho’. ⁴ A’ oku i’ orohian do sumugku’ do tulun di gomponipu’, om minsodu’ oku’d tulun di posiwot. ⁵ Araatan oku i’ do monokiambalut do tulun dit araat, om ilagon ku i tulun dit a’ osonong. ⁶ Oi TUHAN, ougan ku no o palad ku do popointalang dot aiso’ o sala’ ku, om mamanau oku do tumutuk di pananaraban do porsombahan do tumuku’ dot id diya’. ⁷ Om modsinding oku do sinding do mongunsikou, om popinsunudon ku o koinsanai di nongowonsoi nu di kongopusahan kopio. ⁸ Orohian oku no kopio di walai dit iyonon nu, oi TUHAN, i kinoiyonon nu di poimponu’ do kagayaan nu. ⁹ Kada’ oku patayo’ do potonggoyon di tulun do kidusa, om kada’ oku poiyoo’ di kootuson di gampamatai; ¹⁰ i tulun dit araat kasai’ nopo o wonsoyon, om i posodia’ kasai’ nopo do rumamit do tusin do ponisip. ¹¹ Nga’ iyoho’ nopo om iri it otopot o wonsoyon ku, kosianai no doho’ om posio’ oku no, oi TUHAN. ¹² Nokoinsodu’ oku no do mantad id koinsanai do koligagaanan, om osimbayan oku noddi, om royohon ku nondo o TUHAN do hiri’d pitimungan do tulun dau.

¹ Sinding di Daud. TUHAN no o tanawau ku, om i gampamasi doho’, om aiso’ no o poddosi ku. TUHAN no o manahak doho’ do kointirungan do mantad id koinsanai do koligagaanan, om a’ oku no kopuriman do moddosi. ² Soira’ nopod rumikot daa i tulun dot araat, do mongoi saap doho’ om mumbal daa do mamatai doho’, om kasadu indo iyolo’ om aratu’. ³ Mulong piya dot oinsanan nopo daa i soudor do tumutuk doho’, nga’ a’ oku i’ moddosi, om mulong piya do saapon oku’d pisangod, nga’ mogondos kasai’ oku id Kinorohingan. ⁴ Iso’ noo o pokionuon ku dot id TUHAN, tu’ iso’ noo o korohian ku: iri no tu’ mokiiyon oku do hiri’d walai’d TUHAN do solinaid ku’d poimpasi, do momurimon di kosonongo’ dau, om mokituduk dau. ⁵ Tontok nopod haro o kosusaan om intirungan oku i’ dau, om lisokon oku dau do hiri’d Walai dau, om poiyonon oku dau dot id sakai do pampang dit akawas om aiso’ noddi o koligagaanan ku. ⁶ Om aala’ ku nondo i pisangod di songintutuk doho’. Om mimpangkis oku pondo dot atataadan do papatahak do porsombahan do sumbolion do hiri’d Walai’d Sasambayangan dot Agayo, om modsinding oku nondo, om mamarayou oku’d TUHAN. ⁷ Oi TUHAN, pokinongoho’ oku no do tontok do lumohou oku diya’, kosianai no doho’ om simbaro’ oku no! ⁸ Tontok di minomoros ko do poingkaa, ’’Rikot no do mongoi sambayang dot id doho’,’’ ka. Om boros kangku do suminimbar, ’’Rumikot oku i’, oi TUHAN. ⁹ Kada’ lisok do mantad id doho’,’’ kangku. Kada’ kotogod doho’; kada’ uyungo’ do posoliwan iti susuhuon nu. Tu’ iya’ no o gomponguhup doho’, kada’ kopio oku tongkiadai, om kada’ oku iduwai, oi Kinorohingan, i gampamasi doho’. ¹⁰ Mulong piya do tongkiadan oku do tapa’ om tina’ ku, nga’ gompion oku id TUHAN. ¹¹ Oi TUHAN, tudukai oku no di korohian nu do wonsoyon ku, om posusuyo’ oku no do ralan dit aiso’ o koligagaanan, tu’ ogumu’ no kopio o pisangod ku. ¹² Kada’ oku no kopio patahako’ dot id pisangod ku, tu’ saapon oku diyolo’ do tudut om ponompurolosi. ¹³ Oilaan ku i’ do kopuriman oku po do kosonongo’d TUHAN do daamot ku’d poimpasi. ¹⁴ Pogondos nod TUHAN, ponongkuyaai no, om kada’ poluhoyo’ o ginawo. Pogondos nod TUHAN.

¹ Sinding di Daud. Lumohou oku diya’, oi TUHAN i mogobi’ doho’, pokinongoho’ no iti pokionuon ku! Tu’ ondung a’ oku diya’ simbaron, om kotonggoi oku no di tulun di lumintuhun do hilo’d pomogunan do tulun di nangapatai. ² Pokinongohon oku nod tontok di millohou oku diya’ do mokitulung, om tontok di poinsawaton ku o longon ku do pointuduk do hilo’d Walai’d Sasambayangan dot Agayo. ³ Kada’ oku hukumai do potonggoyon di tulun dot araat, om i tulun dot angaraat o wonsoyon. It angaambalut tomod o koboro-boroso’ nga’ ginawo nopo diyolo’ om poimponu’ id katagadan. ⁴ Hukuman no iyolo’ dot i winonsoi diyolo’ o kopomohukuman, om miontok di kangaraaton do nongowonsoi diyolo’, hukuman no iyolo’ do miontok di winonsoi diyolo’, sulian no iyolo’ do miontok di winonsoi diyolo’. ⁵ A’ i’ diyolo’ pusohon i nongowonsoi’d TUHAN ko’ i po i tinaru’ dau, om gowoi pondo om hukuman dau iyolo’, om punsoon dau do gisom dot alaid. ⁶ Royohon no o TUHAN, tu’ pinokinongou i’ dau i tihad ku do mokitulung. ⁷ TUHAN no o mongintirung doho’ om mogobi’ doho’, om iyau no o pagandasan ku. Monulung i’ iyau doho’ om popotood do ginawo ku, royohon ku no iyau do mikuwo’d modsinding dot atataadan. ⁸ Intirungan id TUHAN o tulun dau, om obian i’ om posion dau i raja’ di nopili’ dau. ⁹ Posio’ no o tulun nu, oi TUHAN, om barakatai no i tulun di songonuon nu. Siliu no do gompomogompi’ doho’, om pitamangan no iyolo’ do gisom dot alaid.

¹ Sinding di Daud. Pamarayou kou nod TUHAN, iyokoyu i poingiyon do hino’d surga, royoho’ no i kagayaan om i kuasa’ dau. ² Royoho’ no i ngaran do TUHAN do kikagayaan, tuku’ no dot id toguang dau, do mikuwo’d manampakai di pakayan do sumambayang. ³ Orongou i’ o boros do TUHAN do hilo’d rahat, ongorod nopo o Kinorohingan di kikagayaan, om mulinggou nopo o boros dau do pointongkop di rahat dot agayo. ⁴ Orongou i’ o boros do TUHAN do mikuwo’d kinoris om kobontugo’ dau. ⁵ Kotipu’ id koguasan dot aras o tuni do boros do TUHAN, dot iri piya i koguasan dot aras do hilo’d Libanon. ⁶ Iyau no i popinsimbul di konuluhanan do Libanon, do miagal di tangaanak do sapi’ om iyau o popinsimpod di Nuluhon do Hormon do miagal di tanak do sapi’ dit okoro’ po. ⁷ Momoros nopo o TUHAN nga’ kumalab nopo o kodumaat. ⁸ Momoros nopo o TUHAN nga’ kogogor nopo o tana’ do kowotuan, oguyu’ nopo dau o tana’ do kowotuan. ⁹ Moro-boros nopo o TUHAN nga’ ongoguyu’ nopo o kokoyuan do berangan do hilo’d gouton, om atantag ngai’ o roun do kayu om oinsanan do gumiak i tulun di hiri’d Walai’d Sasambayangan dot Agayo do poingkaa, ’’Royohon no o Kinorohingan, royohon no o Kinorohingan,’’ ka. ¹⁰ TUHAN no o momorinta’ do waig dit angaralom, om iyau no i raja’ do momorinta’ do gisom dot alaid. ¹¹ Onuan do TUHAN do kokorisan i tulun dau, om onuan dau iyolo’ do kosimbayanan.

¹ Sinding di Daud. Sindingon do tontok do manambayang di Walai’d Sasambayangan dot Agayo. ² Royohon ku no iya’ oi TUHAN, tu’ pinasi oku i’ diya’. Om a’ nu pinologos i pisangod ku do monguntotogod doho’. ³ Mihad oku po do minglohou do mokitulung diya’, oi TUHAN i Kinorohingan ku, om liningasan oku i’ diya’. ⁴ Om a’ oku i’ diya’ pinologos do kosuang di lobong, tu’ pinoguli’ nu i’ o ginawo ku. ⁵ Podsinding no do mamarayou’d TUHAN, iyokoyu i tulun dau dit ongotorodok! Soroho’ ngai’ no i nongowonsoi’d TUHAN, it Olidang Kopio, om pongunsikou no dau. ⁶ Kototogod nopo dau om oruhai id opupusan, nga’ kosonongo’ nopo dau om mompus-ompus i’ do solinaid do tulun do poimpasi. Illogupon po doti’ daa o romou do tontok di dongotuong, nga’ kosuabon nopondo om rumikot indo o kataadan. ⁷ Aiso’ no o koligagaanan dot opurimanan ku om boros kangku’ddi dot id suang do ginawo ku, ’’A’ oku nobondo koumbal dot aala’,’’ kangku. ⁸ Tu’ osonong ko i’ kopio dot id doho’, oi TUHAN, tu’ miagal ko pod kuta’ do pogintirungan do hilo’d konuluhanan do manahak doho’d kointirungan. Nga’ tontok di luminisok ko do mantad id doho’, om a’ no ogina-gina’ o kooriso’ ku. ⁹ Mininglohou oku diya’, oi TUHAN, om minokitulung kopio oku diya’. ¹⁰ Nunu kopio o kountungan nu do sokiro dot apatai oku? Nunu kopio ot aanu-anu nu dot olobong oku? Milo po toi do mamarayou diya’ o tulun di nangapatai? Milo po toi iyolo’ do popinsusui di kosonongo’ nu dit aiso’ o kotingkadan? ¹¹ Pokinongoho’ no o sambayang ku, om insianai oku no. Tulungo’ oku no, oi TUHAN. ¹² Notingalanan nu no do kataadan i katangaban ku, gisom do mintari’ oku po dot atataadan, noidu’ nu no i katangaban ku, om nosorilian oku no diya’ do kataadan. ¹³ Om a’ oku nondo mimbongung-bongung, modsinding oku nondo do mamarayou diya’, oi TUHAN, iya’ no o Kinorohingan ku, om mongunsikou kasai’ oku nondo diya’.

¹ Maan di boyoon di modsisinding. Sinding di Daud. ² Oi TUHAN, rumikot oku dot id diya’ do mokiintirung diya’, om kada’ oku no kopio pologoso’ dot aala’. Iya’ no o Kinorohingan dit otulid, posio’ oku no, tu’ iti no o sambayang ku! ³ Pokinongoho’ no o sambayang ku, posio’ oku no kopio do dinondo. Siliu no do miagal do kuta’ di pogintirungan do tiyonon ku, i mongintirung om i kapasi doho’. ⁴ Iya’ no i kointirung om i kotingolig doho’, woyoo’ oku no om ahako’ oku no do miagal di nakabatos nu. ⁵ Paalayo’ oku no di lawa’ di nakataan no do pamalawa’ doho’, intirungai oku no do mantad id koligagaanan. ⁶ Iya’ no o pokigompian ku, posion oku indo diya’, oi TUHAN tu’ Kinorohingan ko i’ dit otorodok. ⁷ Araatan ko i’ di tulun di tumuku’ dot id tingolig, nga’ iyoho’ nopo om mogondos oku i’ diya’. ⁸ Otood oku indo om osonong o ginawo ku tu’ mompus-ompus i’ o kosianan nu doho’. Okito nu i’ o koinggoritan ku, om oilaan nu i’ o kosusaan ku. ⁹ A’ nu i’ pinologos i pisangod ku do manangkap doho’, om nonuan oku i’ diya’ do kosimbayanan do mongoi do honggo nopo o korohian ku. ¹⁰ Kosianai no doho’, oi TUHAN, tu’ id suang oku’d kosusaan, om opodi’ po o mato ku dot adalaan do mihad, om olomok oku po tomod. ¹¹ Oluhoi no o tinan ku dot ouru’d tumongob, om iti piya mingihad nga’ mongindiba’ id tumur ku. Olomok oku no do gama’ diti kosusaan ku, om tulang ku piya nga’ kotonggoi ngai’ nopo dot olomok. ¹² Oinsanan nopo i pisangod ku do mongindaraat doho’, om untotogodon oku di songkoduwo ku, iri piya tulun dit ongkotutun doho’ nga’ moddosi i’ doho’, tu’ okito oku nopo diyolo’ do hiri’d ralan om manangkus nopo iyolo’d mogidu’. ¹³ Nokolihu ngai’ no doho’ o tulun, miagal nopoddi napatai oku no. Miagal oku poddi rinomos. ¹⁴ Ogumu’ tomod o pisangod dot orongou ku do mogikonos-konos, nosorilian oku pod kopoddosian. Oinsanan nopo iyolo’ do mogipapakat do sumaap doho’, om sontima-tima’ do mamatai doho’. ¹⁵ Nga’ pagandasan ku nopo iyoho’, om iya’ i’ oi TUHAN, tu’ iya’ no o Kinorohingan ku. ¹⁶ Gompion kasai’ oku i’ diya’, poiduwo’ oku no do mantad id pisangod ku, om mantad id tulun di monginggorit doho’. ¹⁷ Pohubayaai no o susuhuon nu, posio’ oku no tu’ mompus-ompus i’ o kosianan nu. ¹⁸ Lumohou oku diya’, oi TUHAN, om kada’ oku pologoso’ dot ointingayam. Baya’ nopo dot ointingayam i tulun dot araat, om koongoi do hilo’d pomogunan di tulun di nangapatai. ¹⁹ Pologoson nopo dot ongobobou i tulun do goudut om koinsanai di tulun dit ongoondos om i minggayo-gayo, i mongindaraat do tulun dit otulid o ginawo. ²⁰ A’ no milo’d boroson o kosonongo’ di nongkoopi’ nu do patahakon di tulun di momusou diya’! Koilo ngai’ no o tulun do kosonongo’ nu, om i pomogompi’ nu’d tulun di mogondos diya’. ²¹ Intirungan nu i’ iyolo’ dot id doros nu tu’ hiri no o haro kosimbayanan om aiso’ o koligagaanan do mantad id pakat do tulun dot araat. Intirungan nu i’ iyolo’ dot id kinoiyonon dit osimbayan om it a’ orikot do pongindaraat do pisangod diyolo’. ²² Royohon no o TUHAN! Tu’ pinointalang i’ dau dot id doho’ i kosianan dau dit agayo kopio, do tontok di notutukan oku om sinangod oku do pisangod. ²³ Minodosi oku daa’ddi om osorou ku nopo om ouyung oku no kopio dau do mantad id doros dau. Nga’ norongou i’ dau o tihad ku, do tontok di luminohou oku do mokitulung dau. ²⁴ Kosianai nod TUHAN, koinsanai dokoyu i tulun dit ongotorodok. Intirungan id TUHAN i tulun dot ongotorodok, nga’ hukuman i’ dau i tulun dot ongoondos, do miontok di nongowonsoi diyolo’. ²⁵ Pokorison no om pogiroton no o ginawo, koinsanai dokoyu i mogondos do TUHAN.

¹ Sinding di Daud. Sinding do monuduk. Olumaag no i tulun di noompunan o dusa, om i noompunan o kasalaan dau. ² Olumaag no i tulun dit a’ do TUHAN pasalaon, om it a’ orohian do monipu’. ³ Tontok dit a’ ku po naakun o dusa ku, om oluhoi oku no dot ouru do monongodou-ngodou’d mihad. ⁴ Tadau om totuong nga’ hukuman oku i’ diya’, oi TUHAN, gisom do naayi’ no tomod o kokorisan ku, do miagal po di bolobou dot otuu di kolosuo’ do tadau. ⁵ Om okuno’ ku noddi o dusa ku dot id diya’, om a’ ku no linisok i kasalaan ku. Kinoiso-iso’ ku no kopio o ginawo ku do magakun diri dot id diya’, om nompunan ngai’ nu iddi i dusa ku. ⁶ Iyo nopoddi om apatut no do sumambayang dot id diya’ i tulun nu dit otorodok do tontok do haro o kosusaan, tu’ soira’ nopondo do tumigowo do rumikot o kosusaan do miagal di lumpadang do luyud, om a’ indo iyolo’ orikot diri. ⁷ Iya’ no o pogintirungan ku, tu’ iya’ no i popoidu’ doho’ do mantad id kosusaan. Puhadan ku nondod modsinding do mamarayou diya’, tu’ pinasi oku i’ diya’. ⁸ Boros kad TUHAN, ’’Tudukan ku indo iya’ do ralan dit apatut do susuyon nu, om punangan tiya’ om nosihatan ku. ⁹ Kada’ nogi’ pimbasug-basug do miagal di kuda’ ko’ i kaladai, tu’ minog pod kakangan om pikoton om mumboyo’ nogi’,’’ ka dau. ¹⁰ Iri nopo tulun dot araat om a’ no milo dot a’ oinggorit, nga’ tulun nopo di mogondos do TUHAN, om intirungan i’ di kosianan dau dit aiso’ o kopupuson. ¹¹ Kongotood kou no om kongooropod kou no, iyokoyu i tulun dit ongotulid o ginawo, dot i nowonsoi’d TUHAN o kaarapadan. Pimpangkis kou no dot atataadan, iyokoyu i mumboyo’ dau!

¹ Pamangkis kou no dot atataadan di nongowonsoi’d TUHAN, koinsanai dokoyu i tulun dit otulid o ginawo. Pamarayou kou no dau, koinsanai dokoyu i mumboyo’ dau. ² Pongunsikou kou nod TUHAN do mikuwo’d mongombit do kecapi, podsindingan no dokoyu iyau do mikuwo’d mongombit di tuunion dot ongkiloting. ³ Podsinding no do sinding do wagu dot id dau, sonongon no o pouuni di kecapi, om mimpangkis no dot atataadan! ⁴ Milo i’ do ponongkuyaanan i boros do TUHAN, otorodok i’ iyau dot id suang do nunu nopo o wonsoyon dau. ⁵ Orohian i’ o TUHAN dit ongotopot om ongotulid, koponu’ idti pomogunan i kosianan dau dit aiso’ o kotingkadan. ⁶ Koboros nopo o TUHAN do monuhu’ nga’ kowonsoi no ilo tawan, om koboros nopo dau nga’ kowonsoi no ilo tadau, om tulan om rombituon. ⁷ Pinotimung dau ilo rahat dot id iso’ no o kinoiyonon, om nantaban dau i rahat dot agayo om a’ i’ kalabai. ⁸ Poddosi nod TUHAN, koinsanai’d katanaan! Pusoho’ no iyau, koinsanai’d bansa’d tulun do hiti’d pomogunan! ⁹ Tontok di minoro-boros o TUHAN, om kowonsoi no iti pomogunan, poboroso’ no dau nga’ kosiliu ngai’ nopo. ¹⁰ Raagon id TUHAN it osorou di piro-piro bansa’d tulun, om oduhan dau iyolo’ do popowonsoi dit osorou daa diyolo’ do powonsoyon. ¹¹ Nga’ iri nopo i dau’d nosorou do wonsoyon dau om mompus-ompus i’, om aiso’ o kopupuson di pokiwawansayan dau. ¹² Olumaag no i bansa’ di mangakun do TUHAN o Kinorohingan diyolo’, olumaag no i bansa’ di nopili’ dau do sumiliu’d dau’d songonuon! ¹³ Lumuung no o TUHAN do mantad hilo’d surga om okito ngai’ nopo dau o tulun. ¹⁴ Lumuung iyau do mantad hilo’d kinoiyonon dau do momorinta’ dot id koinsanai di poingiyon do hiti’d pomogunan. ¹⁵ Iyau i’ o manahak do pomusarahan dot id diyolo’, om koilo iyau do koinsanai di wonsoyon diyolo’. ¹⁶ Okon i’ ko’ i kokoriso’ do soudor o kamanang-manang do raja’, om okon ko’ kokodoho’ dau o kamanang-manang di soudor. ¹⁷ A’ i’ milo do manahak do kamanangan i kuda’ do sasakayon do sumangod, a’ i’ kapasi i kokodoho’ diyolo’. ¹⁸ Piantangan id TUHAN i tulun di mumboyo’ dau, om i tulun di mogondos do kosianan dau dit aiso’ o kotingkadan. ¹⁹ Poiduwon i’ dau iyolo’ do mantad id kapatayon, om posion dau iyolo’ do tontok do mononglous. ²⁰ TUHAN no o pagandasan toko’, tu’ iyau no i gomponguhup om i mogobi’ dati’. ²¹ Iyau no o kataadan toko’, om i ngaran dau dot olidang o pagandasan toko’. ²² Maha’ daa om moyo-woyo’ kasai’ dahai i kosianan nu do mompus-ompus, oi TUHAN, tu’ iya’ no o pagandasan dahai.

¹ Sinding di Daud do tontok di miningulau-ulau iyau dot id toguang di Abimilik gisom do nuyung diri iyau. Mongunsikou kasai’ oku nopondod TUHAN, om a’ oku tumingkod do mamarayou dau. ² I nongowonsoi dau o karayahan ku dau, maha’ daa om ongkorongou i tulun dot ulak-ulakan do wokon, om ongotood indo iyolo’! ³ Tanud kou no doho’ do popinsusui di kogoyoo’ do TUHAN, kainou no mogioompot do mamarayou do ngaran dau. ⁴ Sambayang oku no dot id TUHAN, om sinimbar oku i’ dau, om pinoidu’ oku dau do mantad id koinsanai do kopoddosian ku. ⁵ Ongotood nondo i tulun dit inggori-goriton do kokito iyolo’ dau, om a’ nondo iyolo’ koumbal dot oiman-iman. ⁶ Lumohou no dau i tulun dit aiso’ o pokukurayan, om simbaron i’ dau iyolo’, poiduwon i’ dau iyolo’ do mantad id koinsanai do kosusaan diyolo’. ⁷ Tamangan id moloikat do TUHAN o koinsanai do tulun di mumboyo’d TUHAN, om poiduwon dau iyolo’ do mantad id koligagaanan. ⁸ Pimpori-pori nopo pogi’ do mongilo ondung songkuro o kosonongo’d TUHAN. Olumaag no i tulun di mintirung dau. ⁹ Umboyo’ kou nod TUHAN, koinsanai dokoyu i tulun dau, tu’ tulun nopo di mumboyo’ do TUHAN om a’ no insan dot okurangan. ¹⁰ Iri piya singa nga’ koumbal i’ do louson dot ooyian do taakanon, nga’ tulun nopo di mumboyo’d TUHAN om a’ i’ ooyian do nunu nopo it osonong. ¹¹ Pokinongou kou no, oi tangaanak ku dit ongomulok po, om tudukan ku i’ iyokoyu do momusou’d TUHAN. ¹² Asanangan kou daa dot osonong om osimbayan o koposi-posion? Orohian kou daa dot anaru o tumur dokoyu om kikosimbayanan? ¹³ Ondung orohian kou do miagal diri, om kada’ kou pimboros dot araat om kada’ kou pongudut. ¹⁴ Om tumongkiad no dit angaraat om momonsoi no dot osonong, om tumotos kou no do mogiuulud. ¹⁵ Piantangan id TUHAN i tulun dot ongotopot, om pokinongohon dau o tihad diyolo’. ¹⁶ Nga’ saapon i’ dau i tulun di mingwonsoi dot araat, om apatai pondo iyolo’ om olihuan no. ¹⁷ Pokinongohon id TUHAN i tulun dot otopot do tontok di lumohou iyolo’ dau, om poiduwon dau iyolo’ do mantad id koinsanai do kosusaan diyolo’. ¹⁸ Id doros i’ o TUHAN do tulun di tumongob, om posion dau i tulun dit aiso’ no o pokukurayan. ¹⁹ Ogumu’ i’ daa o kosusaan dot oumbalan di tulun dot osonong, nga’ poiduwon i’ iyau’d TUHAN do mantad id toinsanan diri. ²⁰ Gompion i’ kopio iyau’d TUHAN, om iso’ pod tulang dau nga’ aiso’ i’ ot otipu’. ²¹ Iri no i kararaat dau o kapatai’d tulun dit orongit, tu’ tulun nopo dot araatan di tulun dot ongotopot om atantu’ nod ohukuman. ²² Posion id TUHAN o tulun di songonuon dau, om a’ ohukuman o tulun di mongoi pokiintirung dau.

¹ Sinding di Daud. Saapon no i tulun di sumaap doho’, oi TUHAN, om songodon no i tulun di manangod doho’. ² Ngoyon no i kolid om i rasuk nu do don sumasangod om rumikot no do mongoi popoidu’ doho’. ³ Paakango’ no i tandus om i kapak nu dot id tulun di momogusa’ doho’. Sunudai oku no do posion oku diya’. ⁴ Angaala’ po daa om ongointingayam i tulun di mumbal do mamatai doho’. Ongouyung po daa om ongoborulong i tulun di mongupakat do sumaap doho’. ⁵ Miagal po daa iyolo’ di tapol dot otilib do ribut do tontok do gusaon iyolo’ di moloikat do TUHAN. ⁶ Otuong po daa om alamou i ralan do wayaan diyolo’ do tontok di pimbabagan iyolo’ di moloikat do TUHAN. ⁷ Pinapataan iyolo’ do lawa’ do pamalawa’ doho’ om aiso’ i’ daa o paantakan diyolo’ do mamalawa’ doho’; om minongukad iyolo’ do luang dot aralom do maan do pohudsuan doho’. ⁸ Nga’ a’ i’ diyolo’ oilaan dot okosupan iyolo’ do kapatayon, om kosulung nondo iyolo’ di lawa’ diyolo’ om aratu’, om iri no o kapatayon diyolo’. ⁹ Om otood oku nondo tu’ TUHAN o kataadan ku, om osonong o ginawo ku tu’ pinasi oku i’ dau. ¹⁰ Om aayi-ayi’ nopondo o ginawo ku do momoros dot id TUHAN do poingkaa, ’’Aiso’ no o koiyo diya’. Tu’ intirungan nu i’ it ongoluhoi do mantad id tulun dit ongokoris, om intirungan nu i tulun do mosikin do mantad id tulun di mongulok-ulok,’’ kangku nondo. ¹¹ Pakaraat doho’ o koboro-boroso’ di tulun dot angaraat om monondos iyolo’ doho’ do minomonsoi oku’d sala’ om aiso’ i’ o noila-ilaan ku do pasal diri. ¹² Araat nogi’ o ponomuli’ diyolo’ do kosonongo’ ku, om aiso’ noddi o pokukurayan ku. ¹³ Inda’ ka do tontok di sumakit iyolo’, om tuminongob oku i’ do gisom dot a’ oku minakan, ¹⁴ do miagal pod panambayang ku do tambalut ko’ tobpinai ku, om pointuku’ oku pod mogihad diyolo’ do miagal pod pogigihad ku do tina’ ku. ¹⁵ Nga’ tontok dit iyoho’ ot id suang do kosusaan, om ongotood ngai’ nogi’ iyolo’, om songintutuk nopo iyolo’ doho’ do monguntotori’ doho’, om iri piya sompogunan nga’ momobog i’ doho’, om a’ tumingkod do mongindaraat doho’. ¹⁶ Miagal po iyolo’ do tulun di mongumang-umang do tulun di nakakung, om okilou poo o mato diyolo’ do montong doho’ dot ara-raatan. ¹⁷ Oi TUHAN, songkuro po o koloido’ nu do poingontong no toomod doho’? Poiduwo’ oku no do mantad id pananangod diyolo’, om posio’ oku no do mantad id singa diti! ¹⁸ Om mongunsikou oku nogindo diya’ dot id pitimungan do tulun nu, om royohon ku iya’ dot id toguang diyolo’. ¹⁹ Kada’ pologoso’ i pisangod ku, i goudut diri, do monguntotogod di kinaalaan ku. Kada’ pologoso’ i tulun dit araatan doho’ dot aiso’ o paantakan, dot angasanangan do tumongob oku. ²⁰ A’ i’ aambalut o koboro-boroso’ diyolo’, tu’ minsimpudali’ nogi’ iyolo’ do tudut dot id tulun dit orohian dot oulud. ²¹ Sanggarang-garang po iyolo’ do mintondos doho’, ’’Nokito i’ dahai i winonsoi nu,’’ ka no diyolo’. ²² Nga’ nokito nu i’ iri, oi TUHAN, om kada’ pimbongung-bongung, oi TUHAN, om kada’ kopio insodu’. ²³ Urolos no, oi TUHAN, obiai oku no, tungag no, oi Kinorohingan ku, om tulungo’ oku no. ²⁴ Otulid ko i’ oi TUHAN, i Kinorohingan ku, om poboroso’ no dot otopot oku, kada’ kopio pologoso’ i pisangod ku do monguntotogod doho’. ²⁵ Kada’ iyolo’ pologoso’ do mimboros dot id suang do ginawo diyolo’ do poingkaa, ’’Napatai toko’ noddi iyau! Om iri no kopio o korohian toko’,’’ ka. ²⁶ Aala’ po daa om oborulong i tulun di monguntotogod doho’ di maso ku dot id suang do koinggoritan. om ointingayam po daa om oindaraat i tulun di momoros do poimaha-maha’ iyolo’ ko’ iyoho’. ²⁷ Maha’ daa om mimpangkis nondo dot atataadan i tulun dit orohian do pokotopoton oku om minghulit do mimboros do poingkaa, ’’Agayo no kopio o TUHAN, om orohian iyau dot osimbayan o susuhuon dau,’’ ka. ²⁸ Om popinsusuyon ku nondo o kotulido’ nu, om monongodou-ngodou oku do mamarayou diya’.

¹ Maan di boyoon do modsisinding. Mantad id di Daud i susuhuon do TUHAN. ² Pinglugutan do dusa o lugu’ do ginawo do tulun dit araat, gisom do magada’ iyau do Kinorohingan, om a’ momusou dau. ³ Om osorou nopo dau nga’ a’ nod Kinorohingan oimbulayan i dusa dau om a’ ohukuman iri, tu’ oondos i’ kopio iyau. ⁴ Koboro-boroso’ nopo dau om noponu’ pod kararaat om tudut, a’ no iyau milo do momonsoi di kopunong om it osonong. ⁵ Daamot nopo dau do poillii do hiri’d toodopon om minsorou no iyau dit angaraat, iso’ pod wonsoyon dau nga’ aiso’ no ot osonong, om aiso’ ot adaan dau dit araat. ⁶ Korikot i’ do hilo’d tawan o kosianan nu dit aiso’ o kotingkadan oi TUHAN, om kosunggu do tawan o kotorodoko’ nu. ⁷ Miagal pod nuluhon dit akawas o kosonongo’ nu, om miagal do korolomo’ do rahat o kotulido’ nu. Gompion nu i’ o tulun om nintorusan. ⁸ Oi Kinorohingan, a’ no kopio milo’d bolion o kosianan nu dit aiso’ o kotingkadan. Id sahau po di talad nu o kointirungan dahai. ⁹ Poginakanan dahai i taakanon di pinatahak nu, om pinologos nu iyahai do minum do mantad id bawang do kosonongo’ nu. ¹⁰ Iya’ no o tadon do koposion do koinsanai di songimpasi om iri no i tulinau nu o kokito-kito dahai do tanawau. ¹¹ Maha’ daa om potilombuson nu o kosianan nu dot id tulun di kotutun diya’, om osonong ko dot id tulun dit otulid o ginawo. ¹² Kada’ pologoso’ i tulun dot ongoondos do mumang doho’, om kada’ pologoso’ i tulun dot angaraat do popoggidu’ doho’. ¹³ Antangai pogi’ o nokorotuon di tulun dot angaraat, hilo’ no o nokoilihon diyolo’ om a’ no iyolo’ kotungag kawagu.

¹ Mantad id di Daud. Kada’ katangkabo do mingwonsoi piya dot araat o tulun, kada’ osol do tulun di mingwonsoi di kasala’. ² Tu’ a’ i’ alaid om atanus no iyolo’ do miagal di sakot do rumiou, om matai nondo iyolo’ do miagal di totonomon di nolonot. ³ Pogondos nod TUHAN om pomonsoi no dot osonong, om koundorong ko indo do hiri’d pomogunan diri om aiso’ o koligagaanan nu. ⁴ Ihumo’ no i kosimbayanan do mantad id TUHAN, om patahakon indo dau diya’ i korohian kopio do ginawo nu. ⁵ Patahako’ no o koposi-posion nu dot id TUHAN, pogondos no dau, om uhupan ko i’ dau. ⁶ Om potitihon indo dau i kosonongo’ nu, om poulinahon dau i kotulido’ nu do miagal di tadau do dong pitangaadau. ⁷ Polonuto’ no o ginawo om andadon nopo o TUHAN do popowonsoi di wonsoyon dau, kada’ osol do kokito do tulun di kumaya’, ko’ kokito po di tulun dit osimbayan tomod do monipu’ do wokon. ⁸ Kada’ katangkabo om kada’ kotogod, tu’ iri nopo om papakaa no dot id kosusaan. ⁹ Tu’ tulun nopo di mogondos do TUHAN om kasanganu i’ do pomogunan, nga’ tulun nopo dit araat om uyungon i’. ¹⁰ A’ no alaid om atanus no i tulun dot angaraat, om ihumon po daa’ndo dokoyu iyolo’, nga’ a’ no dokoyu iyolo’ okito. ¹¹ Om iri nondo tulun dit ongosiriba’ o ginawo o kasanganu di pomogunan om kopuriman do kakayaan om kosimbayanan dit a’ ogina-gina’. ¹² Iri nopo tulun dot araat om momusorou do mamatai di tulun dot osonong om miit po o nipon dau dot ara-raatan. ¹³ Nga’ irak-irakan id TUHAN i tulun dot angaraat, tu’ oilaan no dau dot a’ no alaid om patayon no iyolo’. ¹⁴ Songingkodong no di tulun dot angaraat o gayang diyolo’, om songinganat o pawakasan do pana’ do pamatai di tulun do mosikin om it aiso’ o pokukurayan, om ponobok di tulun di mingwonsoi dot otopot. ¹⁵ Nga’ iri indo i gayang diyolo’ o kapatai diyolo’, om iri pawakasan diyolo’d pana’ nga’ aayi’ nopo dot otipu’. ¹⁶ Okuri’ piya o dapu’ di tulun dot osonong nga’ agayo i’ o gatang ko’ mantad do koinsanai di kakayaan do tulun dit angaraat. ¹⁷ Tu’ iduwon indo do TUHAN o kokorisan di tulun dot araat, nga’ intirungan i’ dau i tulun dot ongosonong. ¹⁸ Gompion id TUHAN i tulun di mumboyo’ dau, om iyolo’ nondo kasai’ o kasanganu di pomogunan do gisom dot alaid. ¹⁹ Tontok piya’ndo do haro o kosusaan diyolo’ nga’ a’ i’ iyolo’ oinggorit, om kiakanon iyolo’ do maso piya do mononglous. ²⁰ Nga’ angapatai indo i tulun dot angaraat, om tumanus i pisangod do TUHAN do miagal di tusak do bunga do hilo’d gouton, om tumagak tomod iyolo’ do miagal di lisun. ²¹ Tulun nopo dit araat om milo nod molos nga’ a’ i’ insan do popoguli’, nga’ tulun nopo dit osonong om opuhawang i’ om obintahak. ²² Tulun nopo di nabarakatan do TUHAN om kasanganu i’ di pomogunan, nga’ tulun nopo di nousung dau om ongouyung indo. ²³ Potunudon id TUHAN o tulun di ralan dot apatut do susuyon dau, om intirungan dau i tulun di kohubayaan dau o kowoyo-woyoon. ²⁴ Om mulong piya dot aratu’ iyolo’, nga’ a’ i’ iyolo’ otilombus do poingratu’, tu’ potungagon i’ iyolo’d TUHAN. ²⁵ Molohing oku noddi, om alaid-laid oku no do hiti’d pomogunan, nga’ a’ oku i’ insan kokito do tulun dot osonong do tinongkiadan tomod do TUHAN, om a’ oku nokokito di tangaanak dau do mokianu-anu pod wokon do taakanon. ²⁶ Obimpuhawang kasai’ i’ iyau om popoolos kasai’ do wokon, om tangaanak dau nga’ osiliu ngai’ do barakat dot id dau. ²⁷ Tongkiad no dit angaraat om pomonsoi no dot osonong, om koiyon kasai’ i’ do hiri’d pomogunan diri i sinakagon nu do gisom dot alaid. ²⁸ Tu’ orohian i’ o TUHAN dit otulid om a’ iyau monongkiad tomod di tulun dau dit ongotorodok. Intirungan i’ kasai’ dau iyolo’ do gisom dot alaid, nga’ ongouyung indo i sinakagon di tulun dot araat. ²⁹ Om kasanganu indo di pomogunan i tulun dit ongotopot om koiyon do hiri do gisom dot alaid. ³⁰ Boros nopod tulun dit osonong om kisuang i’, om otulid o koboro-boroso’ dau. ³¹ Poopion i’ dau i Tourat do Kinorohingan dot id suang do ginawo dau om a’ iyau insan do sumansala’ddi. ³² Awangan daa di tulun dot araat i tulun dot osonong om umbalan daa dau do mamatai. ³³ Nga’ a’ i’ iyau’d TUHAN tongkiadan tomod dot id suang do longon di pisangod dau, om a’ dau pologoson dot ohukuman do tontok do bisara’. ³⁴ Pogondos nod TUHAN om umboyoon no o ponuhuan dau, om pusohon ko indo dau om patahakon dau diya’ i pomogunan, om okito nu indo dot ouyung i tulun dit angaraat. ³⁵ Haro o tulun dot araat tomod om i minggayo-gayo do notutunan ku di gulu po, miagal po iyau do kayu sedar di hilo’d Libanon do muung-luung do wokon. ³⁶ Nga’ tontok di tuminalib oku om a’ noddi iyau hino’d hiri. Ihumo’ ku po daa iyau, nga’ a’ ku no iyau nokito. ³⁷ Antangai no pogi’ i tulun dot osonong, om sorisidon do mongilo i tulun dit otopot, tu’ kisakag i’ moti’ i tulun dit orohian do piuludan. ³⁸ Nga’ tulun nopod kidusa om opunso nopo, om aayi’ dot apatai o sinakagon diyolo’. ³⁹ Posion id TUHAN i tulun dit ongotopot om intirungan dau iyolo’ do tontok do haro o kosusaan. ⁴⁰ Uhupan i’ dau iyolo’ om poiduwon dau, om posion dau do mantad id tulun dit araat tu’ mokiintirung i’ iyolo’ dau.

¹ Sinding di Daud. Sindingon do tontok do papatahak do porsombahan di kopomuhandaman. ² Oi TUHAN, kada’ oku diya’ hukumai dot otogod ko piya, kada’ oku inggorito’ dot alasu’ piya o ginawo nu, ³ tu’ notogu’ oku no diya’ di pana’ nu, om nobobog oku diya’. ⁴ Orualan tomod oku tu’ tinogod oku i’ diya’, om notongkop nopod toruo-ruol o tinan ku do nobungou di dusa ku. ⁵ Lumonsod oku no tu’ olumpadangan oku di dusa ku, tu’ adalaan no kopio kawagat iri dot id doho’. ⁶ Outong po tomod om songhomoi-homoi o gandas ku do nobungou di kababasug ku. ⁷ Pointuku’ oku po, om aiso’ no o pokukurayan ku, monongodou-ngodou oku pod mihad. ⁸ A’ no asangalan o kolosuo’ do tinan ku, om osomok oku nod apatai. ⁹ A’ oku no kogoos tu’ adalaan oku no kopio dot oluhoi, agangau po o ginawo ku, om modoi-odoi oku dot orurualan. ¹⁰ Oi TUHAN, oilaan nu i’ i kosionuan ku, om orongou nu o todoi ku. ¹¹ Motod-kotod po o tundu-undu’ ku do tumangkabo, om aiso’ no o kokorisan ku, om mato ku nga’ poinruyop poo. ¹² Oinsanan nopo i tambalut ku om i songkoduwo ku dot a’ mongoi insomok doho’, iri piya i sompiiyon ku nga’ minsodu’ i’ doho’. ¹³ Tulun nopo dit orohian do mamatai doho’ om nakapataan nod lawa’ do pamalawa’ doho’, om iri no tulun dit orohian do pokoruol doho’ om mima-tima’ no do momungou doho’, aiso’ nopo o kotingkadan diyolo’ do mogipapakat do sumaap doho’. ¹⁴ Miagal oku po di tulun do bosukon tu’ a’ no korongou, om miagal di tulun do bobou tu’ a’ koboros. ¹⁵ Miagal oku po di tulun dit a’ korongou tu’ a’ no milo do sumimbar. ¹⁶ Nga’ mogondos oku i’ diya’, oi TUHAN, om simbaron oku i’ diya’, oi TUHAN i Kinorohingan ku. ¹⁷ Kada’ pologoso’ i pisangod ku do monguntotogod doho’ do tontok dot id suang oku’d koinggoritan, kada’ iyolo’ pologoso’ do popimboros di kinaalaan ku. ¹⁸ Tu’ motiratu’ oku no, om toruol ku nga’ a’ nopo otingkod-tingkod. ¹⁹ Okunon ngai’ ku no o dusa ku, tu’ momonu’ no doho’ iri do katangkabaan. ²⁰ Ongokoris om ongosonong tomod o tinan di pisangod ku, om ogumu’ ot araatan doho’ dot aiso’ o paantakan. ²¹ Iri nopo tulun dit araat nga’ araat nogi’ o ponomuli’ dit osonong, om sumaap ngai’ nopo doho’ tu’ iyoho’ nopo om momonsoi i’ dit otopot. ²² Kada’ kopio oku diya’ iduwai, oi TUHAN, om kada’ insodu’ doho’, oi Kinorohingan ku. ²³ Tulungo’ oku nod dinondo, oi TUHAN i gampamasi doho’.

¹ Maan di boyoon do modsisinding. Sinding di Daud. Maan di Yodutun. ² Boros ka dot id suang do ginawo ku, ’’Monotos oku nod popoundar do kowoyo-woyoon ku. Om a’ ku no pologoson iti dila’ ku do popowonsoi doho’d dusa, a’ oku no mungkomi do tontok dot id doros doho’ i tulun dot araat,’’ kangku no. ³ Om kada’ oku no ungkomi, dot iso-iso’ piya o boros nga’ aiso’ i’ o pinoboros ku, mulong piya daa dot i boboroson dit ongosonong! Nga’ okon nogi’ do kourut o koinggoritan ku. ⁴ Om noponu’ pod katangkabaan o ginawo ku. Maha’ nogi’ do momusorou kopio oku nga’ okon nogi’ do tumangkabo oku, om boro-boros oku noddi do poingkaa, ⁵ ’’Songkuro po o koloido’ ku do poimpasi, oi TUHAN? Songgira’ oku’d apatai? Sunudai oku bo do surupu’ ku om kogisomon do tumur ku,’’ kangku no. ⁶ Oniiba’ kopio o pinogisaman nu do tumur ku! Id pagantangan nu nopo iya’ om a’ i’ kosongkuro o konoruo’ do tumur ku. Koinsanai’d koposi-posion do tulun om miagal nod pinuhobo do pohoboon, ⁷ om miagal di sangai tu’ tumanus i’. Aiso’ i’ o kotutuk-tutukon di wonsoyon dau, tu’ monimung no iyau’d dapu’ nga’ a’ indo iyau koilo ondung isai o tumungkus diri. ⁸ Nunu poddi o milo ku’d pagandasan diti, oi TUHAN? Iya’ poo o pagandasan ku. ⁹ Poiduwo’ oku no do mantad id koinsanai’d dusa ku, om kada’ pologoso’ i tulun do basug do mongirak-irak doho’. ¹⁰ Mundorong oku nopo, om a’ oku mungkomi tu’ iya’ i’ o pinopologos doho’ dot oinggorit do miagal diti. ¹¹ Kada’ oku nondo hukumai! Tu’ oruhai oku nod apatai dot ouru do bobogon nu. ¹² Hukuman nu di kototogod nu o dusa do tulun, om miagal ko pod tanai do mamaraag di kasanangan kopio’d tulun. Otopot no kopio do koposion nopod tulun om miagal nod pinuhobo di pohoboon. ¹³ Oi TUHAN, pokinongoho’ no o sambayang ku, om pokinongoho’ no o tihad ku. Tulungon oku no do tontok do mihad oku. Iyo oku no iyoho’ di taki-aki ku tu’ oruuhai do poinsugku’ diya’. ¹⁴ Pologoso’ oku nopo dot iso-iso’ om haro i’ o kosimbayanan ku dot a’ oku po kapamanau, om a’ oku nondo hino.

¹ Maan di boyoon do modsisinding. Sinding di Daud. ² Andad oku nopod TUHAN do mongoi ponulung doho’, om pokinongoho’ oku noddi dau om korongou no dau i tihad ku. ³ Pinalabus oku dau do mantad id luang di kikoligagaanan, om mantad id buyut dit aralom. Pinoiyon oku dau dot id sakai do pampang om aiso’ noddi o koligagaanan ku. ⁴ Tinudukan oku dau do modsinding do sinding do wagu, i sinding do pamarayou do Kinorohingan toko’. Ogumu’ nondo o tulun di kokito’ddi om oronok nondo iyolo’ om mogondos iyolo’d TUHAN. ⁵ Olumaag no i tulun di mogondos do TUHAN, it a’ mogondos do tingolig, om a’ mamung do tulun di tumuku’ dot id tingolig. ⁶ Ogumu’ no kopio o nowonsoi nu dot id dahai, oi TUHAN, i Kinorohingan, aiso’ no o koiyo diya’! Ogumu’ no i nopinsorou nu dit ongosonong kopio do wonsoyon nu dot id dahai, a’ ku no aayi-ayi’ do monusui ngai’ iri tu’ adalaan no kopio kogumu’. ⁷ Mada’ ko i’ do porsombahan di sumbolion om i porsombahan do suwai, om a’ ko i’ mokianu do tayam-tayam di songkoyuon do monorob do hiri’d pananaraban do porsombahan ko’ iri po porsombahan do pongidu’d dusa. Suwai ko’ nonuan oku nogi’ diya’ do tolingo do maan do pokinongou di boros nu. ⁸ Om simbar oku noddi, ’’Hati oku i’, notulis ngai’ no do hilo’d Buuk dot Oturan i ponudukan nu doho’. ⁹ Orohian tomod oku do momonsoi di korohian nu, oi Kinorohingan ku! Poopion ku i’ dot id suang do ginawo ku i Tourat nu,’’ kangku. ¹⁰ Pinopinsunud ku i habar dot osonong do pinasi iyahai diya’, do hiri’d pitimungan do koinsanai di tulun nu, oi TUHAN. Om oilaan nu i’ dot a’ oku tumingkod do popinsunud diri. ¹¹ A’ ku i’ tinoisaan i habar do koposion, pinopinsusui ku i’ i kotorodoko’ om i ponunulung nu. Okon i’ ko’ a’ ku nungkomian i kotorodoko’ om i kosianan nu dit aiso’ o kotingkadan dot id pitimungan do koinsanai’d tulun nu. ¹² Oi TUHAN, oilaan ku i’ dot a’ ko tumingkod dot osianan doho’, om iri no i kosianan om kotorodoko’ nu o mongintirung kasai’ doho’. ¹³ Notutukan oku pod kosusaan — a’ no ointob-intob o kogumuo’. Nokosupan oku di dusa ku, om a’ oku noddi kokito. Ogumu’ pori ko’ mantad diti tobuk do tulu ku, om aiso’ noddi o pokukurayan ku. ¹⁴ Posio’ oku no, oi TUHAN, tulungo’ oku nod dinondo! ¹⁵ Aala’ po daa kopio om oborulong po i tulun di mumbal do mamatai doho’! Ongkoguli’ po daa om ongointingayam po i tulun dit ongkoirak diti kosusaan ku. ¹⁶ Ongointingayam po daa i tulun di minonguntotogod doho’, tu’ naala’ iddi iyolo’. ¹⁷ Maha’ daa om ongooropod om ongotood ngai’ i tulun di rumikot dot id diya’. Maha’ daa om momoros kasai’ o koinsanai’d tulun dit ounsikahan do koposion do mantad id diya’ do poingkaa, ’’Agayo no kopio o TUHAN,’’ ka. ¹⁸ Oluhoi oku no, om mosikin oku oi TUHAN, nga’ a’ oku i’ diya’ linihuan. Iya’ no o gampamasi doho’ om iya’ o Kinorohingan ku, rikot no dot oruhai do mongoi ponulung doho’!

¹ Maan do boyoon do modsisinding. Sinding di Daud. ² Olumaag no i tulun di mamadul do tulun do mosikin, tu’ uhupan indo iyolo’d TUHAN do tontok do haro o kosusaan diyolo’. ³ Intirungan indo iyolo’d TUHAN om gompion dau o koposi-posion diyolo’, om posimbayanon dau iyolo’ do hiti’d pomogunan, om a’ dau iyolo’ patahakon dot id pisangod diyolo’. ⁴ Tulungon i’ iyolo’d TUHAN do tontok di sumakit iyolo’, om lingoson dau i toruo-ruol diyolo’. ⁵ Boros kangku, ’’Nokowonsoi oku nod dusa dot id diya’, oi TUHAN, nga’ kosianai no doho’ om lingasai oku no,’’ kangku. ⁶ Angaraat tomod o koboro-boroso’ di pisangod ku dot id doho’. Boros ka no diyolo’, ’’Soira’ ma iyau’lo’ dot apatai om olihuan i’?’’ ka no diyolo’. ⁷ Iri tulun di mongoi solowot doho’ nga’ a’ i’ otulid o ginawo, mintimung no iyolo’d boboroson dit araat do pasal doho’, om ngoyon nogindo diyolo’ popimboroso’ iri do hinonggo-honggo nopo. ⁸ Oinsanan nopo i tulun dit araatan doho’ do mogikonos-konos dot iyoho’ o komoyon, om osorou nopo diyolo’ nga’ araat oku no kopio. ⁹ Boros ka no diyolo’, ’’Adalaan no kopio iyau’d sumakit, om a’ no bo iyau koundaliu do mantad hilo’d toodopon dau do gisom- gisom,’’ ka no diyolo’. ¹⁰ Iri piya tambalut ku’ddi ponongkuyaan kopio ku, i tilang-ilang ku’d makan, nga’ sumaap i’ doho’. ¹¹ Kosianai no doho’, oi TUHAN, om lingasai oku no, om sulian ku indo ngai’ i pisangod ku. ¹² Om oilaan ku nondo dot ohubayaan ko doho’, tu’ a’ nondo iyolo’ kaala’ doho’. ¹³ Uhupan oku indo diya’ tu’ mingwonsoi oku i’ dit ongotopot, om posugkuon oku diya’ do gisom dot alaid. ¹⁴ Royoho’ no o TUHAN, i Kinorohingan do tulun dot Israil! Royoho’ no iyau do dinondo om gisom dot alaid. Iyo noddi ot osiliu! Amin!

¹ Maan di boyoon do modsisinding. Sinding do ponudukan do sininding di pinuruan do sompiiyon di Kora. ² Poingkuro nopo i tambang do langadon do waig do palu, om iyo oku no iyoho’ddi do langadon diya’, oi Kinorohingan. ³ Langadon oku diya’, i Kinorohingan do poimpasi, soira’ oku poddi do koongoi kasambayang do hilo’d walai nu? ⁴ Mihad oku nopo do tadau om totuong, romou poo o ponokotaakanon ku. Aiso’ nopo kotingkadan di pisangod ku do minguhot doho’ dot, ’’Hinonggo o Kinorohingan nu?’’ ka no. ⁵ Siihad no o ginawo ku do kosorou di gulu po, tontok di minoyo’ oku di tulun dot ogumu’ do minongoi do hiri’d walai’d TUHAN, om tontok di minomoyo’ oku diyolo’ do mamanau, i tinimungan do tulun dot ogumu’ dit ongotood ngai’ do modsinding om mimpangkis do mamarayou’d Kinorohingan. ⁶ Nokuro tu’ tumongob kopio oku? Nokuro tu’ tumangkabo kopio oku? Mogondos oku indo do Kinorohingan, om royohon ku pondo kawagu iyau, i Kinorohingan ku om i Gampamasi doho’. ⁷ - ⁸ Siihad po o ginawo ku do hiti’d pomogunan di pinananggayan doho’d pisangod, om iri noddi o kasarahan ku’d TUHAN. Pinorikatan dau do tumbak do katangaban o ginawo ku; iyo pod luyud o kagangahan do luminumpadang doho’; iyo pori di wasai dot opuhod do kotoruk do hiri’d bawang do Yordan do mantad hilo’d Nuluhon do Hormon om Nuluhon do Misar. ⁹ Maha’ daa om pointalangon do TUHAN i kosianan dau dit aiso’ o kopupuson do tontok do dangadau, om modsinding oku indo do dongotuong, om sumambayang oku dot id Kinorohingan, i tadon do koposion ku. ¹⁰ Poingkaa o poboroson ku dot id Kinorohingan, i Mogobi’ doho’, ’’Nokuro tu’ linihuan oku diya’? Nokuro tu’ oinggorit kasai’ oku nopo do gama’ do korongito’ di pisangod ku?’’ kangku. ¹¹ Norualan tomod o ginawo ku di pongindaraat diyolo’, tu’ a’ nopo iyolo’ tumingkod-tingkod do minguhot doho’ dot, ’’Hinonggo no o Kinorohingan nu?’’ ka no. ¹² Nokuro tu’ tumongob kopio oku? Nokuro tu’ tumangkabo kopio oku? Mogondos oku indo do Kinorohingan, om mamarayou oku pondo kawagu dau, i Kinorohingan ku, i Gampamasi doho’.

¹ Oi Kinorohingan, poboroso’ no dot otopot oku, om obiai oku no dot id toguang do tulun dit a’ monongkuyaan do Kinorohingan. Poiduwo’ oku no do mantad id tulun di goudut om i tulun dit araat. ² Iya’ no o kointirungon ku, nokuro tu’ niduan oku diya’? Nokuro tu’ oinggorit kasai’ oku nopo do gama’ do korongito’ di pisangod ku? ³ Pointalango’ no i kotorodoko’ nu om i katapatan nu, om maha’ daa om popotunud doho’ iri om poguli’ doho’ do hilo’d Sion, i nulu-nulu nu dit olidang, om hilo’d Walai’d Sasambayangan dit Agayo, i walai di tiyonon nu! ⁴ Om koongoi oku indo do hiri’d pananaraban do porsombahan dot id diya’, oi Kinorohingan, tu’ iya’ no o tadon do kataadan ku. Om mongombit oku nogindo di kecapi ku om modsinding oku do pamarayou ku diya’, oi Kinorohingan, i Kinorohingan ku. ⁵ Nokuro tu’ tumongob kopio oku? Nokuro tu’ tumangkabo kopio oku? Mogondos oku indo do Kinorohingan, om mamarayou oku pondo kawagu dau, i Kinorohingan ku, i Gampamasi doho’.

¹ Sinding di pinuruan do sompiiyon di Kora. Sinding do ponudukan. Maan di boyoon do modsisinding. ² Oi Kinorohingan, dahai no kopio’d tolingo o nokorongou’ddi, sinunudan iyahai di taki-aki dahai di susui’ddi, om koinsanai di nongowonsoi nu dot agayo dot id diyolo’ di gulu po. ³ I kinowoyo-woyoo’ nu do minonguyung di bansa’d suwai om i kinowoyo-woyoo’ nu do pinopoiyon di diya’d tulun do hilo’d pomogunan diyolo’, om i kinaralan-ralano’ nu do minomohukum di bansa’d suwai, om i kinaralan-ralano’ nu do pinoposimbayan di diya’d tulun. ⁴ Okon i’ ko’ gayang di tulun nu o pinanganu diyolo’ di pomogunan diri, om okon i’ ko’ kinoris diyolo’ o nakamanang-manang diyolo’, suwai ko’ iri i sinundu om i kinoris nu, om i tulinau di tanda’ do nakarapou ko, i popointalang dot osianan ko diyolo’, o nakamanang-manang diyolo’. ⁵ Iya’ no o raja’ ku om Kinorohingan ku, om manahak ko do kamanangan dot id tulun nu. ⁶ Om i sinundu nu o pinangala’ dahai di pisangod dahai, nosoibahan i’ dahai i bansa’ di sumaap dahai tu’ kinoruhang nu i’ iyahai. ⁷ A’ oku i’ mogondos do pana’ ku ko’ iti po gayang ku do manahak doho’ do kamanangan. ⁸ Tu’ iya’ no i minamasi dahai do mantad id pisangod dahai, om iya’ o minangala’ dit angaraatan dahai. ⁹ Mamarayou kasai’ indo iyahai diya’, om mongunsikou iyahai diya’ do gisom dot alaid. ¹⁰ Nga’ baino’ nopoddi om notongkiadan nu no iyahai, om pinologos nu iyahai do naala’, a’ ko noddi moyo’ di soudor dahai do mongoi sangod. ¹¹ Pinologos nu iyahai do mogidu’ dot opopoddosian di pisangod dahai, om siningolod ngai’ diyolo’ i dahai’d songonuon. ¹² Pinologos nu iyahai do kinorot do miagal do dumba’, pinogitongkiad-kiad nu iyahai do hilo’d pomogunan do bansa’d suwai. ¹³ Dinagang nu i tulun nu dot omura kopio o gatang, do miagal pod aiso’ o gatang diyolo’ dot osorou nu. ¹⁴ Kokito ngai’ i’ i songkoduwo dahai di winonsoi nu dot id dahai, om monguntotori’ poddi om mongirak-irak iyolo’ dahai. ¹⁵ Siniliu nu iyahai do koirakan dot id pogialatan do bansa’, om somporog-porog po iyolo’d mongindaraat dahai. ¹⁶ Indaraaton nopo kasai’ iyahai om ointingayam po tomod iyahai ¹⁷ do kopingrongou di ponguntotogod om pongindaraat di pisangod dahai om i tulun dit araatan dahai. ¹⁸ Nosiliu ngai’ nopori dot id dahai, dot a’ piya daa iyahai nokolihu diya’, om a’ tuminolibamban di tumpongo nu dot id dahai. ¹⁹ A’ i’ iyahai insan dot a’ tuminorodok dot id diya’, om a’ nogi’ iyahai suminaap dit isuhu’ nu. ²⁰ Nga’ niduan nu i’ iyahai dot id pogialatan di nintorusan dot orongit, om aiso’ no o pokukurayan dahai, om tinongkiadan nu iyahai do hiri’d odondom o kotuongo’. ²¹ Ondung nokotingkod daa iyahai do sumambayang dot id diya’, oi Kinorohingan dahai, om tuminuku’ nogiddi dot id tingolig do tulun do suwai, ²² om atantu’ no do noilaan nu i’ daa, tu’ koilo ko i’ do pomusarahan do tulun. ²³ Nga’ iya’ i’ o kinaangayan diyolo’ kapamatayai dahai, om iyoon po iyahai diyolo’ di dumba’ di potisumbolion no. ²⁴ Posik no, oi TUHAN! Nokuro tu’ koodop ko? Ingkakat no! Kada’ nogi’ kopio iyahai iyadaai do gisom dot alaid. ²⁵ Nokuro tu’ lumisok ko do mantad id dahai? Kada’ kolihuwai iti koinggoritan om kosusaan dahai! ²⁶ Omumuk nopo iyahai dot aratu’ do hilo’d tana’, songingiliu po tomod iyahai do hilo’d pupuk do naala’. ²⁷ Rikot no do mongoi ponulung dahai, posio’ no iyahai tu’ mompus-ompus i’ o kosianan nu.

¹ Sinding di pinuruan do sompiiyon di Kora. Sinding dot osianan. Maan do boyoon do modsisinding. Tumanud do lagu’ do: bunga bakung. ² Noponu’ po di boros dot olumis o pomusarahan ku do maso ku do monulis diti sinding do maan di raja’. Dila’ ku nopo om miagal po do pinsil di gomponulis tu’ posodia’ no do popolombus do sinding. ³ Iya’ no it oligkang kopio dot id pogialatan do tulun, oilo kopio ko do moro-boros, om pibarakatan kasai’ ko do Kinorohingan. ⁴ Obilo’ no ino gayang nu, oi raja’ dit osiou, iya’ no i kikagayaan om it abantug! ⁵ Pamanau no do mikuwo’d kagayaan do kumaa dot id kamanangan, do popogirot dit otopot om it otulid. Iri indo kinoris nu o manahak diya’ do kamanangan dit agayo! ⁶ Alahis i’ o pana’ nu do ponobok do tundu-undu’ di pisangod nu, om ahaba’ ngai’ nopondo o tulun dot id toning do gakod nu. ⁷ Iri nopondo i pomorintaan di pinopuhawang do Kinorohingan diya’, om ogirot kasai’ i’ do gisom do poingompus. Otulid i’ o pomorinta’ nu di tulun nu. ⁸ Orohian ko i’ dit otopot om otukanaan ko dit angaraat. Iri noddi o kinopomilian do Kinorohingan diya’, iyau i Kinorohingan nu, om minonuntug diya’ do kosimbayanan dit agayo po ko’ i kosimbayanan di raja’d suwai. ⁹ Osingud pod tumau do mur, gaharu om cendana o pakayan nu, om ramayon ko di pouuni do tuunion do hilo’d walai’d raja’ di linumis do lamai dit agayo o gatang. ¹⁰ Id pogialatan nopo di tongoondu’ do hilo’d walai’d raja’ om i tangaanak do tondu’ do piro-piro o raja’, om hiri’d ponong id wanan di tirikohonon nu do poingkakat i raja’d tondu’, do kipinakai do tamas dit osompipi’. ¹¹ Oi sawo do raja’, pokinongou no diti poboroson ku, lihuwai no i tulun nu om i kowori-worisan nu. ¹² Ino no kolumiso’ nu o porohian di raja’ diya’, iyau no o boyoon nu, om a’ ko noddi milo dot a’ mumboyo’ dau. ¹³ Paatadan ko nondo di tulun do Tirus dot ipuhawang, om tumotos ngai’ do momolumbok do ginawo nu i tulun do kaya’. ¹⁴ Iri nopo tanak di raja’ do tondu’ om hilo’d walai di raja’, om olumis no kopio iyau. Gaun nopo dau om banang do tamas do winonsoi. ¹⁵ Minanangrasuk iyau do gaun di mogisuayan o wotik di nongoi iyau posolowoto’ di raja’, do tinanud di susuhuon dau’d tongoondu’, om iyolo’ nogi’ nga’ suminolowot i’ di raja’. ¹⁶ Otood tomod om aramai iyolo’ do suminuang di walai di raja’. ¹⁷ Ogumu’ nondo o tangaanak nu’d kusai, oi Raja’ ku, do sumowoli di taki-aki nu do momorinta’, om silihon nu nondo iyolo’ do pomorinta’ do pointongkop diti pomogunan. ¹⁸ Iti no sinding ku o monusui do kobontugo’ nu do gisom dot alaid, om oinsanan nopondo o tulun do mamarayou diya’ do tikoompus do maso.

¹ Sinding di pinuruan do sompiiyon di Kora. Maan di boyoon do modsisinding. Tumanud di lagu’ dot Alamot. ² Kinorohingan no o kointirungon om kokorisan toko’, i posodia’ kasai’ do monulung do tontok do haro o kosusaan. ³ Om a’ toko’ noddi minog do moddosi do guyuon piya daa iti tana’ om lumiid o nuluhon do hilo’d rahat dot aralom, ⁴ om ngumorod piya om gumuyu’ ilo tumbak do rahat, om ongoguyu’ ngai’ ilo nulu-nulu do lumapos i tumbak dot agayo. ⁵ Haro i’ o bawang di mongoit do kataadan dot id bandar do Kinorohingan, om hilo’d walai di tiyonon do Kinorohingan dit Asawat Kopio. ⁶ Poundorong i’ o Kinorohingan dot id bandar diri, om a’ i’ araag i bandar diri, osuab po om rumikot no iyau do mongoi ponulung. ⁷ Ongooris ngai’ o bansa’, om pomorinta’ nga’ angaala’ ngai’ nopo, kongorod nopo o Kinorohingan nga’ otonu’ no iti tana’. ⁸ Moyo-woyo’ i’ dati’ o TUHAN, it Osundu Kopio, iri no i Kinorohingan di Yakub o mongintirung dati’. ⁹ Kainou pogi’ mintong di nongowonsoi’d TUHAN; intong pogi’ di nongowonsoi dau di kongopusahan kopio do hiti’d pomogunan. ¹⁰ Tiningkod dau o pisangadan do pointongkop diti pomogunan, rinaag ngai’ dau i rapo-rapo do sumangod om sinorob ngai’ dau iri. ¹¹ Boros ka dau, ’’Tingkod kou no do mogisasangod om ilaai no dot iyoho’ no o Kinorohingan, it Agayo Kopio dot id pogialatan do bansa’ om abantug do pointongkop diti pomogunan,’’ ka. ¹² Moyo-woyo’ i’ dati’ o TUHAN, it Osundu Kopio, iri no i Kinorohingan di Yakub o mongintirung dati’.

¹ Sinding di pinuruan do sompiiyon di Kora. Maan di boyoon do modsisinding. ² Pitapapo’ no dokoyu o palad dot atataadan, koinsanai do bansa’! Puhadan no dokoyu do modsinding do pamarayou’d Kinorohingan! ³ Koronok nod TUHAN tu’ iyau no it Asawat Kopio, iyau no o raja’ dot agayo, i momorinta’ do pointongkop diti pomogunan. ⁴ Nonuan toko’ dau do kamanangan do suminangod di bansa’d suwai, siniliu toko’ dau do pomorinta’ do pointongkop diti pomogunan. ⁵ Pinomilian toko’ dau do pomogunan dot iyonon toko’, i kaandasan kopio di tulun di kosianan dau. ⁶ Mongoi nopo o Kinorohingan dot id tirikohonon dau do don raja’! Om tontok noddi dot orongou o gara’ om tuni do torumpit dot opuhod kopio! ⁷ Podsinding no do pamarayou’d Kinorohingan, podsinding no do pamarayou’d raja’ toko’. ⁸ Kinorohingan no o raja’ do pointongkop diti pomogunan, royoho’ no iyau do sinding o pamarayou. ⁹ Poirikau o Kinorohingan do hiri’d tirikohonon dau di don raja’, iyau no o momorinta’ do koinsanai’d bansa’. ¹⁰ Rumikot ngai’ nopo o pomorinta’ do bansa’ do mongoi sugku’ do Kinorohingan di Abraham. Okoris po iyau ko’ mantad do koinsanai’d soudor, iyau no i pomorinta’ dot id sawat kopio.

¹ Sinding do pinuruan do sompiiyon di Kora. ² TUHAN no it Agayo Kopio, om apatut no do royohon kopio iyau, do hilo’d suang do bandar do Kinorohingan toko’, dot id sakai do nulu-nulu dau dit olidang. ³ Sion nopo, i Nuluhon do Kinorohingan, om akawas i’ om olumis, iri no bandar di raja’ dit agayo kopio o popotood do pointongkop diti pomogunan. ⁴ Nokointalang nod Kinorohingan dot id sugku’ no dau ot aiso’ o koligagaanan, dot id suang di kuta’ do pogintirungan di hiri’d bandar dau. ⁵ Minogititimung ngai’ i raja’, om ruminikot do minongoi panangod di Nuluhon do Sion. ⁶ Nga’ tontok di nokito diyolo’ iri, om kangapagag nopo iyolo’; om poddosi ngai’ no iyolo’ om poggidu’ ngai’ noddi. ⁷ Hilo’ no iyolo’d nongooris om nongorualan, do miagal poddi tondu’ dot orualan do mogkosusu; ⁸ om miagal do kapal do rahat dit opintanggayan do tongus dit opuhod. ⁹ Nokorongou toko’ no di nongowonsoi do Kinorohingan, om baino’ nopoddi om nokokito toko’ noddi do hilo’d bandar do Kinorohingan toko’, i TUHAN dit Osundu Kopio, om gompion indo dau i bandar diri do gisom do poingompus. ¹⁰ Oi Kinorohingan, hilo’ nod suang do Walai’d Sasambayangan dot Agayo dot ahandaman kasai’ dahai i kosianan nu dit aiso’ o kopupuson. ¹¹ Royohon ko i’ do koinsanai’d tulun do hinonggo nopo, om nokotongkop do pomogunan o kobontugo’ do ngaran nu. Otulid i’ o pomomorinta’ nu; ¹² pologoso’ no dot otood i tulun do hilo’d Sion! Pologoso’ no dot ongotood i tulun do hilo’d kabandaran do Yohuda! Tu’ hinukuman nu i’ i pisangod diyolo’! ¹³ Oi tulun di songonuon do Kinorohingan, pamanau no do tumutuk do Sion om intobon no i walai’d akawas; ¹⁴ antangan no i tolig om sorisidon nod mogontong i kuta’ do pogintirungan, om milo ko i’ do momisunud di sinakagon do sumusuhut. ¹⁵ Dot iyau no o Kinorohingan toko’, do gisom do poingompus; iyau kasai’ no o momoyo’ dati’ do gisom dot alaid.

¹ Sinding di pinuruan do sompiiyon di Kora. Maan di boyoon do modsisinding. ² Pokinongou kou nodti, koinsanai’d bansa’, pokinongou kou no, koinsanai’d tulun do hinonggo nopo do pointongkop diti pomogunan, ³ koinsanai dit angagayo om ongokoro’, om oinsanan i kaya’ om i mosikin. ⁴ Atarom nondo o pomusorou ku, om mimboros oku do boros dit aralom o komoyon. ⁵ Minsingilo oku nondo do boros dit aralom o komoyon, om posondoton ku o komoyon diri do tontok do mongombit oku do kecapi. ⁶ A’ oku i’ moddosi do tontok do haro o koligagaanan, om tontok do tutukan oku do pisangod, ⁷ om tutukan di tulun dit araat di mogondos do kahara-haraan diyolo’, om it ongoondos do kakayaan diyolo’ dot ogumu’. ⁸ Songulun po nga’ aiso’ i’ o milo do momoli do ginawo dau, a’ i’ iyau milo do mambayar do gatang do koposion dau dot id Kinorohingan. ⁹ Tu’ adalaan no kagayo o pambayar do koposion do tulun, aayi-ayi’ piya o nunu nopo do maan dau’d pambayar nga’ a’ i’ kabagal, ¹⁰ do popoilag dau do kapatayon om pamasi dau do gisom do poingompus. ¹¹ Isai nopo nga’ kokito i’ do tulun piya dit oilo nga’ matai i’, om iyo nogiddi i tulun do basug om it aiso’ o toila-ilaan, otongkiadan ngai’ i’ diyolo’ i kakayaan diyolo’ do potungkusan di sinakagon diyolo’. ¹² Lobong no o koiyonon diyolo’ do gisom do poingompus, hilo’ no iyolo’d poundorong do gisom dot alaid, mulong piya do haro daa o tana’ diyolo’ di gulu po. ¹³ Kobontugo’ nopod tulun om a’ i’ milo do momusus do tumur dau, apatai i’ iyau do miagal di nintorusan. ¹⁴ Antangai pogi’ o nongosiliu dot id tulun di mogondos do tinan dau, i kootuson do tulun di sumondiu do kakayaan dau. ¹⁵ Miagal po iyolo’ di dumba’ tu’ a’ no milo dot a’ apatai, om kapatayon no o gumompi’ diyolo’. Aala’ nondo iyolo’ di tulun dot ongotopot, om i tinan diyolo’ nga’ mipuwoyo’ nopo dot apasa’ do hilo’d pomogunan di tulun do napatai, it id sodu’ no do mantad di walai diyolo’. ¹⁶ Nga’ posion oku indo do Kinorohingan, om poiduwon oku i’ dau do mantad id kuasa’ do kapatayon. ¹⁷ Kada’ karaatai do kumaya’ piya o tulun, om sumurut piya o kakayao’ dau. ¹⁸ A’ i’ dau milo do tanggayan iri do matai iyau, a’ i’ milo do tumanud dau i dapu’ dau do hiri’d lobong. ¹⁹ Mulong piya do naanu ngai’ do tulun i korohian dau dot id suang do koposi-posion dau’d dinondo, om pingroyohon iyau tu’ koundar kasai’ iyau, ²⁰ nga’ kokoyoon nopondo dau om hilo’ id kinokoyoon di taki-aki dau, i hilo’d kinoiyonon dit otuong kasai’ do gisom dot alaid. ²¹ Kobontugo’ nopod tulun om a’ i’ milo do momusus do tumur dau, apatai i’ iyau do miagal di nintorusan.

¹ Sinding di Asap Moro-boros o TUHAN, i Kinorohingan dit Osundu Kopio, momolohou iyau dot id pointongkop diti pomogunan do mantad id koulayon om gisom id kotonobon. ² Mulinau o Kinorohingan do mantad id Sion, i bandar dit olumis kopio. ³ Rumikot no o Kinorohingan toko’, om a’ no iyau milo do mundorong, molob-ngolob no o tapui dot id gulu-gulu dau, om tongus dot opuhod o pointutuk dau. ⁴ Lohowon dau o tawan om pomogunan do sumiliu’d sasi’, do miontong dau do momutus do tulun dau. ⁵ Boros ka dau, ’’Timungo’ no dot id toguang ku i tulun dit ongotorodok, iyolo’ i minomonsoi’d tumpongo dot id doho’, om papatahak do porsombahan di sorobon,’’ ka. ⁶ Popimboros ilo tawan dot otulid o Kinorohingan, om iyau no o gompomutus dit otulid. ⁷ ’’Pokinongou kou no, koinsanai dokoyu i tulun ku, om moro-boros oku i’. Pasalaon ku nondo iyokoyu, oi Israil, iyoho’ no o Kinorohingan, i Kinorohingan dokoyu. ⁸ Okon i’ ko’ i porsombahan dokoyu o kopomohukuman ku dokoyu, ko’ iri po porsombahan di sorobon di patahakon kasai’ dokoyu dot id doho’. ⁹ A’ oku i’ manganu do sapi’ do mantad hilo’d paun dokoyu, ko’ iri po kambing di hilo’d kandang dokoyu, ¹⁰ tu’ doho’ i’ di nintorusan do hilo’d gouton, om i tayam-tayam do rinibuan do hilo’d konuluhanan. ¹¹ Koinsanai’d tombolog di sontulud-tulud nga’ iyoho’ i’ o sanganu, om koinsanai dit ongkipinuhobo do hilo’d talun nga’ doho’ i’. ¹² Ondung louson oku daa om a’ oku i’ minog do momisunud dokoyu, tu’ iti nopo pomogunan om koinsanai di hiti’d suang diti om doho’ ngai’ i’. ¹³ Mangakan oku toi do tonsi’d sapi’ do tontoluhan, om monginum oku toi do raha’d kambing? ¹⁴ Pongunsikou no doho’, i Kinorohingan dit Asawat Kopio, do maan do ponokoporsombahan dot id doho’, om sulungo’ ngai’ no dokoyu o koinsanai di pinabatos dokoyu dot id doho’. ¹⁵ Pomolohou no doho’ do tontok dot orikatan kou do kosusaan om poiduwon ku i’ iyokoyu, om mamarayou kou indo doho’,’’ ka dau. ¹⁶ Nga’ boros kad Kinorohingan dot id tulun dit araat, ’’Nokuro tu’ pinghulitan nu do mimboros i ponuhuan ku? Nokuro tu’ mimboros ko do pasal di tumpongo ku? ¹⁷ A’ nu uhang do tudukan tiya’ do tontok di kasala’ ko, om mada’ ko di boros ku. ¹⁸ Soira’ nopo do kosolowot ko di mananakau om mambalut ko no dau, om monokiwoyo-woyo’ ko di tulun do gampahu’. ¹⁹ Posodia’ kasai’ ko nopo do mimboros dit angaraat, a’ no mikoduwo o ginawo nu do mongudut. ²⁰ Posodia’ ko no do papasala’ do tobpinai nu, om mogihum do kasalaan diyolo’. ²¹ Nongowonsoi ngai’ nu noti, om a’ oku i’ minungkomi, om osorou nu nopo daa’ddi nga’ iyoho’ nga’ iyo iddi. Nga’ baino’ nopo om togodon ku no iya’ om pointalangon ku iti dot id toguang nu. ²² Pokinongou kou nodti, iyokoyu it a’ momusou doho’, tu’ ondung amu’ nga’ raagon ku no moti’ iyokoyu, om songulun po nga’ aiso’ no o milo do mamasi dokoyu. ²³ Pongunsikou no o ponokoporsombahan do pomusou doho’, om atantu’ no do posion ngai’ ku o tulun di mumboyo’ doho’,’’ ka dau.

¹ Maan di boyoon do modsisinding. Sinding di Daud ² do tontok di nokoongoi i Natan i Nabi, kosolowot dau, di nodudun no di Daud i Batsiba. ³ Oi Kinorohingan, kosianai no doho’, tu’ mompus-ompus i’ o kosianan nu. Tonuso’ ngai’ no o dusa ku, tu’ agayo i’ kopio o kosianan nu. ⁴ Lihungo’ ngai’ no i karaaton ku, om lidangai oku no do mantad id dusa ku. ⁵ Otutunan ku no o kasalaan ku, om opurimanan kasai’ ku i’ o dusa ku. ⁶ Nokowonsoi oku nod dusa dot id toguang nu, om id diya’ noo. Om aiso’ i’ o kasalaan nu do momutus doho’, om otulid ko do momohukum doho’. ⁷ Mantad poddi pogkosusuo’ oku nogi’ om araat oku no, kasawa’ oku nopo om kidusa oku no. ⁸ Pokionuon nu nopo om katapatan om ginawo dit osombulu’ kopio, ponuo’ no o pomusarahan ku di toilaan nu. ⁹ Poinsoduwo’ no i dusa ku, om olidang oku i’, lihungai oku no, om opurak oku indo ko’ i gapas. ¹⁰ Pologoso’ oku no do korongou dit otood om it osimbayan, om mulong piya do nomumuk oku no daa om nababak oku diya’, nga’ otood oku indo kawagu. ¹¹ Poungkodomo’ no o mato nu do mintong di dusa ku, om tonuso’ ngai’ no o karaaton ku. ¹² Oi Kinorohingan, onuwai oku nod ginawo dit olidang, om onuwai oku nod ginawo di wagu om ginawo dit alanut. ¹³ Kada’ oku poinsoduwo’ do mantad id doros nu, om kada’ ngoyo’ i Rusod nu’d Olidang do mantad id doho’. ¹⁴ Onuwai oku no kawagu do kataadan tu’ napasi oku no diya’, om porohiano’ oku no do mumboyo’ diya’. ¹⁵ Om tudukan ngai’ ku indo i tulun di kidusa do koinsanai di ponuhuan nu, om gumuli’ indo iyolo’ dot id diya’. ¹⁶ Poiduwo’ oku no do mantad id kapatayon, oi Kinorohingan i gampamasi doho’, om otood oku indo do popinsusui di katapatan nu. ¹⁷ Oi TUHAN, uhupai oku no do mimboros, om royohon ku indo iya’. ¹⁸ Mada’ ko i’ do porsombahan di sumbolion, tu’ ondung manu ko daa, om patahak oku i’. A’ ko i’ orohian do porsombahan di sorobon. ¹⁹ Porsombahan ku nopo oi TUHAN, om i ginawo ku dit oromumuk, tu’ a’ nu i’ iyada’ o ginawo di minsiriba’ om i kumorologo kopio. ²⁰ Oi Kinorohingan, pointalango’ no o kosonongo’ nu dot id Sion, om uhupai no iyau, wonsoyo’ no kawagu i tolig do Yorusalim. ²¹ Om orohian ko nogindo di porsombahan di natantu’ mantad, om koinsanai di porsombahan dahai di sorobon, om sapi’ di tontoluhan nga’ patahakon indo do maan do porsombahan di sorobon do hiri’d sakai di pananaraban do porsombahan.

¹ Maan di boyoon do modsisinding. Sinding do ponudukan di Daud, ² do tontok di ruminikot i Doig, i tulun dot Idom, do minongoi pomisunud di Saul, do nokorikot i Daud do hilo’d walai di Abimilik. ³ Oi tulun do gunsiou, nokuro tu’ pokiraya-rayahan nu ino kararaat nu? Kosianan nopod Kinorohingan om mompus-ompus i’. ⁴ Mongupakat ko do mamaraag do tulun do suwai, ino piya dila’ nu nga’ miagal pod pisau di pomumugar katarom. Momudali’ ko nopod tudut. ⁵ Agayo nogi’ o korohiano’ nu dit araat ko’ it osonong, om orohian ko nogi’ do tudut ko’ mantad dit ongotopot. ⁶ Orohian ko nopo do mimboros di pokoruol do ginawo’d tulun, om orohian ko nogid tudut ko’ mantad dit ongotopot. ⁷ Om gowoi pondo om raagon ko do Kinorohingan do gisom dot otilombus, om tangkapon ko nondo dau om posoliwanon ko do mantad id walai nu om pokoyoon ko do hilo’d pomogunan do tulun di nangapatai. ⁸ Kokito ngai’ nopondo’dti i tulun dit ongotopot, om mogiompoddosi nondo iyolo’, om mongirak-irak nondo iyolo’ diya’, om mimboros dot, ⁹ ’’Intong pogi’, iti no tulun dit a’ minogondos do Kinorohingan do mamasi dau, suwai ko’ minogondos nogi’ iyau di dapu’ dau dot ogumu’, om minintirung iyau di karaato’ dau,’’ ka. ¹⁰ Nga’ iyoho’ nopo om miagal i’ di guas do saitun di poinsuni do hiri’d suang do walai’d Kinorohingan, om mogondos oku di kosianan dau dit aiso’ o kopupuson do gisom dot alaid. ¹¹ Oi Kinorohingan, mongunsikou oku indo kasai’ diya’, dot i nongowonsoi nu o kopongunsikahan ku, om hilo’ nondod toguang di tulun nu do popimboroson ku o kosonongo’ nu.

¹ Maan di boyoon do modsisinding. Tumanud di lagu’ do Mahalat. Sinding do ponudukan di Daud. ² Boros ka dot id ginawo di tulun dot araat, ’’Aiso’ i’ o Kinorohingan,’’ ka. Nangapalid ngai’ no iyolo’, adalaan no kopio karaat i winonsoi diyolo’, aiso’ no tongosongulun piya do momonsoi dot otopot. ³ Hilo’d surga o Kinorohingan do miontong do tulun, mogontong iyau ondung haro po o tulun dit oilo do sumambayang dot id dau. ⁴ Nga’ napalid ngai’ no iyolo’, oiyo nopo o kararaat diyolo’. Iso’ po nga’ aiso’ no o momonsoi dot osonong, aiso’ no o tongosongulun piya. ⁵ ’’A’ toi iyolo’ koilo?’’ kad Kinorohingan do monguhot, ’’Aiso’ toi kopio o toila-ilaan diti tulun dot angaraat? Tu’ kaakan-akanan nopo diyolo’ om mimpanakau po di don tulun ku, om a’ no kopio iyolo’ sumambayang dot id doho’,’’ ka. ⁶ Nga’ id tohuri nopondo om moddosi i’ iyolo’, do miagal dit a’ po diyolo’ insan koumbalai, tu’ potiason nondod Kinorohingan i tulang di pisangod di tulun dau. Tu’ nadaan no diyolo’ o Kinorohingan, om aala’ nondo kopio iyolo’ do tulun dot Israil. ⁷ Oi TUHAN, pokionuon ku no daa kopio do kaanu do kamanangan ot Israil do mantad hilo’d Sion. Om soira’ nopondo do posimbayanon kawagu’d Kinorohingan o tulun dau om ongooropod nondo, om ongosimbayan i tulun dot Israil.

¹ Maan di boyoon do modsisinding. Ompoton do kecapi. Sinding do ponudukan di Daud ² do tontok do minongoi poboros i tulun do Sipi dot id di Saul do poingkaa, ’’Poillisok i Daud do hilo’d watas dahai,’’ ka. ³ Oi Kinorohingan, posio’ oku no di sinundu nu, poiduwo’ oku no dot i kinoris nu o popoidu’. ⁴ Oi Kinorohingan, pokinongoho’ no o sambayang ku, pokinongoho’ no iti poboroson ku. ⁵ Rumikot no i tulun dot ongoondos do mongoi saap doho’, mumbal daa do mamatai doho’ i tulun dot ongorongit, i tulun dot a’ mamadul do Kinorohingan. ⁶ Nga’ Kinorohingan no o gomponguhup doho’, TUHAN no o mongintirung doho’. ⁷ Hukuman po daa do Kinorohingan i pisangod ku dot i karaaton diyolo’ o kopomohukuman. ⁸ Patahak oku nondo do porsombahan di sorobon dot id diya’ oi TUHAN, do mikuwo’d mongunsikou oku diya’, tu’ osonong ko i’ kopio. ⁹ Pinoidu’ oku diya’ do mantad id koinsanai di kosusaan ku, om nokito ku no do naala’ i pisangod ku.

¹ Maan di boyoon do modsisinding. Ompoton do kecapi. Sinding do ponudukan di Daud. ² Oi Kinorohingan, pokinongoho’ no iti sambayang ku, kada’ tolikudai iti pokionuon ku. ³ Pokinongoho’ oku no om simbaro’ oku no, oluhoi oku no dot ouru diti katangkabaan ku. ⁴ Ooris oku no kopio di ponompurolosi do pisangod ku, om oonsitan oku di ponginggorit doho’ di tulun dot araat, Poporikot no iyolo’d kosusaan dot id doho’, ongotogod iyolo’ doho’ om angaraatan iyolo’. ⁵ Ooris tomod o ginawo ku, do kosorou di kapatayon do kotompurolosi kopio. ⁶ Ooris tomod oku om gagaran oku po, noponu’ oku no kopio do kopoddosian. ⁷ Poingkaa ot osorou ku, ’’Ondung kitalad oku daa do miagal di punai, om tumulud oku nopo do mongoi pogihum do tiyonon dit osimbayan. ⁸ Tumulud oku daa’ndo do kumaa do hilo’d sodu’ om momonsoi oku nogindo do walai do hilo’d tana’ do kowotuan. ⁹ Oruuhai oku daa’ndo do koihum dot intirungon ku do mantad id tongus om ribut dit opuhod,’’ ka. ¹⁰ Oi TUHAN, raago’ no iyolo’, pogisuwai-suwayo’ no o boros diyolo’, tu’ okito ku no o kororongit om pogisosongkiwalan do hilo’d bandar. ¹¹ Tadau pod totuong nga’ mimpanau i’ iyolo’ do mintutuk di bandar do poingompus di tolig, aiso’ no o kinoiyonon dot aiso’ o kararaat om kosusaan. ¹² Pointongkop nopo o kinaraagan, noompus pod ponginginggorit om poninipu’ ilo karalanan. ¹³ Ondung pisangod daa i mongumang-umang doho’, om ooyit-oyit ku i’ daa, ondung i daa ponokisaap ku i minggayo-gayo dot id toguang ku, om milo oku i’ daa do lumisok do mantad id dau. ¹⁴ Nga’ iya’ i’, i kombiso’ ku, i sugku-sugku’ ku om i tambalut kopio ku, o mongindaraat doho’. ¹⁵ Nokoumbal kito i’ dot osonong tomod do miongkorumo, om nokopiwoyo’ to do sumambayang do hiri’d Walai’d Sasambayangan dot Agayo. ¹⁶ Okuro ma do monigowo piya’d matai i pisangod ku, okuro i’ do miyau po om mongoi no iyau do hilo’d pomogunan do tulun di napatai. Kararaat po o hilo’d walai diyolo’ om id suang do ginawo diyolo’. ¹⁷ Nga’ lumohou oku i’ do TUHAN, i Kinorohingan, do mokiuhup dau, om posion oku i’ dau. ¹⁸ Korikot i’ dot id dau o todoi om tihad ku do dongkosuabon, om dong pitangaadau, om dongotuong, om orongou i’ dau i boros ku. ¹⁹ Poulion oku indo dau do mikuwo’d aiso’ o koligagaanan do mantad id pinisangadan do suminangod do pisangod dot ogumu’. ²⁰ Kinorohingan no, i minomorinta’ do mantad di timpuun po, o korongou doho’ om iyau o mangala’ diyolo’, tu’ mada’ no iyolo’ do sumimban, om a’ iyolo’ oronok do Kinorohingan. ²¹ I nakaambalut doho’ di gulu nga’ monokisaap no do tambalut dau, a’ dau sinulung i batos dau. ²² Koboro-boroso’ nopo dau om oomis po ko’ paha’, nga’ ginawo nopo dau om noponu’ id karaaton, miagal po daa do tumau kosonong i koboro-boroso’ dau, nga’ kotogu’ indo iri do miagal di gayang dot atarom. ²³ Patahako’ nod TUHAN ino katangkabaan nu, om pokorison ko indo dau, a’ i’ iyau insan popologos dot aala’ i tulun dit osonong. ²⁴ Nga’ iya’ indo, oi Kinorohingan o papataam do koinsanai di tulun do goudut dot id lobong do tontok dit a’ po daa nokopintanga’ o tumur diyolo’. Nga’ iyoho’ nopo om mogondos oku i’ diya’.

¹ Maan di boyoon do modsisinding. Tumanud di lagu’ do: Punai do hiri’d koguasan do tarbantin di hilo’d sodu’. Sinding di Daud do tontok di natangkap iyau do tulun do Pilistin do hilo’d Gat. ² Oi Kinorohingan, insianai oku no diya’, tu’ saapon oku do pisangod, om aiso’ nopo o kotingkadan di pisangod do monginggorit doho’. ³ Monongodou-ngodou nopo i pisangod ku do mumang doho’, ogumu’ tomod o tulun dit angasawat o ginawo do sumaap doho’. ⁴ Tontok nopo do moddosi oku, om iya’ po o pagandasan ku, oi TUHAN it Osundu Kopio. ⁵ Mogondos oku id Kinorohingan om a’ oku no moddosi, royohon ku no o TUHAN, do koinsanai di nakabatos dau o kapamarayahan ku. Nunu po daa o milo’d wonsoyon do tulun toomod dot id doho’? ⁶ Monongodou-ngodou nopo i pisangod ku do mamagangau doho’, aiso’ nopo o kotingkadan diyolo’ do mogihum do ralan do pokoruol doho’! ⁷ Tumimung nopo iyolo’ do mongoi lisok do monoinu’ do koinsanai di wonsoyon ku, om mogihum do ralan do mongoi pamatai doho’. ⁸ Oi Kinorohingan, suliai no i kararaat diyolo’, patayo’ no o tulun diri do mikuwo’d otogod. ⁹ Oilaan nu i’ dot oinggorit kopio oku, om nantangan nu i romou ku. A’ nu toi nokotulis ngai’ iri do hiri’d suang do buuk nu? ¹⁰ Tontok di mininglohou oku diya’, om diri no do suminunsuri ngai’ i pisangod ku, tu’ oilaan ku no kopio dot uhupan oku diya’. ¹¹ Royohon ku no kopio iya’, oi Kinorohingan do koinsanai di pinabatos nu o kapamarayahan ku. ¹² Iya’ no o pagandasan ku, om a’ oku no moddosi. Nunu po daa o milo’d tulun toomod do wonsoyon dot id doho’? ¹³ Oi Kinorohingan, sulungon ku nondo i nakabatos ku dot id diya’, om patahakon ku nondo diya’ i kounsikahan ku do maan ku do ponokoporsombahan ku. ¹⁴ Tu’ pinasi oku i’ diya’ do mantad id kapatayon, om a’ oku diya’ pinologos do naala’. Om milo oku indo do poimpasi do pointirung do Kinorohingan, dot id suang do tanawau di monitiu do koinsanai di tulun di songimpasi.

¹ Maan di boyoon do modsisinding. Tumanud di lagu’ do: Kada’ pamaraag. Sinding di Daud do tontok di minogidu’ iyau do mantad id di Saul om minongoi iyau do hiri’d luang do nuluhon. ² Kosianai no doho’, oi Kinorohingan, kosianai no doho’, tu’ rumikot oku dot id diya’ do mokiintirung. Mokiintirung oku dot id sahau do talad nu, do gisom do katalib ngai’ i tongus dot opuhod. ³ Lumohou oku do Kinorohingan, it Asawat Kopio, id Kinorohingan di manahak do koinsanai dit apatut dot aanu ku. ⁴ Hilo’ iyau’d surga do sumimbar doho’ om mamasi doho’, om aala’ ngai’ nondo dau i tulun di monginggorit doho’. Om pointalangon nogindo do Kinorohingan dot id doho’ o kosianan dau dit aiso’ o kopupuson, om kotorodoko’ dau dot id doho’. ⁵ Notutukan oku pod pisangod, miagal po iyolo’d singa do mangakan do tulun. Nipon nopo diyolo’ om miagal pod tandus om pana’, dila’ no diyolo’ om miagal pod gayang katarom. ⁶ Oi Kinorohingan, pointalango’ no o kogoyoo’ nu do hilo’d tawan, om kagayaan nu do pointongkop diti pomogunan. ⁷ Nakataan nod pisangod ku o lawa’ do pamalawa’ doho’, om poimponu’ oku pod kopoddosian. Minongukad iyolo’d luang do hiri’d ralan di wayaan ku, nga’ iyolo’ iddi o naratu’ do hiri. ⁸ Otumbayaan oku no kopio diya’, om modsinding oku nondo do mamarayou diya’. ⁹ Posik no, oi rusod ku! Posik no, oi kecapi om gambus! Om posikan ku i’ ilo tadau. ¹⁰ Mongunsikou oku dot id diya’, oi TUHAN, dot id pogialatan do bansa’. Mamarayou oku diya’ dot id toguang do tulun dot ogumu’. ¹¹ Kosianan nu nopo dit aiso’ o kopupuson om nokosunggu no do hilo’d tawan, om kotorodoko’ nu nga’ nokorikot no do hilo’d haun. ¹² Oi Kinorohingan, pointalango’ no o kogoyoo’ nu do hilo’d tawan, om kagayaan nu do pointongkop diti pomogunan.

¹ Maan di boyoon do modsisinding. Tumanud di lagu’ do: Kada’ pamaraag. Sinding di Daud. ² Otopot no nangku kopio dot otulid o pomisara’ dokoyu, iyokoyu i gompomutus? Otopot no nangku kopio dot aiso’ o gibang-gibangon dokoyu do tontok do momutus do tulun? ³ Amu’, araat noo o sorohon dokoyu, om mingwonsoi do kasalaan dit agayo kopio dot id pomogunan diti. ⁴ Pogkosusuo’ nopo i tulun dot araat om poimpalid no mantad, mongudut mantad no iyolo’ di pogkosusuo’ i’ iyolo’. ⁵ Poimponu’ po iyolo’d rasun do miagal do tulanut, om bosukon do miagal di tulanut do modsoding, ⁶ gisom dot a’ no korongou do boros di momolimu’ do tulanut, om i rinait di bobolian dit oilo. ⁷ Oi Kinorohingan, tipuo’ no o nipon di singa dot orongit, om uudo’ no i lasit do singa, oi TUHAN. ⁸ Atagak po daa iyolo’ do miagal di waig di rumasak, om okoring do miagal di sakot di hiri’d ralan di piulak-ulakan. ⁹ Iyo po daa iyolo’ di tuntul do notohok, om iyo po daa di tanak di nolombus do napatai tu’ a’ no nokokito do tanawau. ¹⁰ A’ i’ diyolo’ piiman-imanan dot atantab do miagal di sakot, nokotogod no kopio o Kinorohingan gisom do tinanus dau iyolo’. ¹¹ Ongotood nondo i tulun dot ongotopot do tontok do kokito iyolo’ do tulun di kidusa do hukuman, oyopos nondo di raha’ di tulun dot araat o gakod diyolo’. ¹² Boros ka nondod tulun, ’’Otopot no pama kopio do haro o somuli’ di tulun dot otopot. Om haro kopio o Kinorohingan do momutus diti pomogunan,’’ ka.

¹ Maan di boyoon do modsisinding. Tumanud di lagu’ do: Kada’ pamaraag. Sinding di Daud do tontok di minonuhu’ i Saul do tulun do madtamong di walai di Daud do mongoi daa pamatai di Daud. ² Oi Kinorohingan ku, posio’ oku no do mantad id pisangod ku, om intirungai oku no do mantad id tulun do sumaap doho’. ³ Poiduwo’ oku no do mantad id tulun dot araat, intirungai oku no do mantad id tulun di gampamatai. ⁴ Intong pogi’, nga’ mandad-andad no moti’ iyolo’ do mamatai doho’, nokotimung ngai’ no o tulun dot araat do sumaap doho’. Om a’ oku i’ daa nokowonsoi’d dusa, ko’ nokotolibamban po dit oturan nu, oi TUHAN. ⁵ Om aiso’ piya o sala’ ku, nga’ sangarau-arau i’ iyolo’ do mongoi do hiri’d kinoiyonon diyolo’. ⁶ Tungag no, oi TUHAN, i Kinorohingan dit Asawat Kopio, om uhupai oku no. Oi Kinorohingan dot Israil, ontong no. Intong no om hukumai ngai’ no ilo bansa’d suwai, kada’ kosianai dilo tulun dot angaraat di popohudsu. ⁷ Gumuli’ nondo iyolo’ di dongsosodopon, om mingusig poo iyolo’ do miagal do tasu do mintutuk do bandar. ⁸ Pokinongou pogi’ do boros diyolo’d monompurolosi, om mongindaraat. Boros nopo diyolo’ om miagal pod gayang katarom. Ondos daa diyolo’ om aiso’ o korongou diyolo’. ⁹ Nga’ irak-irakan nu iyolo’, oi TUHAN, om hingi-hingion nu o koinsanai di bansa’. ¹⁰ Iya’ no o kokorisan ku, om iya’ o podsindingan ku, tu’ iya’ no, oi Kinorohingan ot intirungon ku. ¹¹ Osianan i’ doho’ o Kinorohingan ku, om rumikot indo iyau dot id doho’, om popoontong iyau doho’ di pisangod ku dot angaala’. ¹² Kada’ iyolo’ patayo’, oi Kinorohingan, om a’ i’ di bansa’ ku olihuan iyolo’. Potompiaso’ no iyolo’ dot i sinundu nu o popotompias, om alao’ no iyolo’, oi TUHAN it intirungon dahai. ¹³ Tu’ kowonsoi’d dusa o kabang diyolo’, om dusa nopo o popimboroson diyolo’. Pologoso’ no iyolo’ dot alawaan di kasasawat do ginawo diyolo’, tu’ orohian iyolo’ do momopol om mingudut. ¹⁴ Patayo’ no iyolo’ do mikuwo’d otogod, oi Kinorohingan, patayo’ no iyolo’ do gisom dot opunso. Om koilo ngai’ indo o tulun do Kinorohingan o momorinta’ dot Israil, om pointongkop diti pomogunan o porintaon dau. ¹⁵ Gumuli’ nondo i pisangod ku di dongsosodopon, do mingusig poo do miagal do tasu do mintutuk di bandar do mogihum di milo diyolo’d patayon. ¹⁶ Iyo po iyolo’ di tasu do minsukai do rinomos, om millangak pondo dot a’ ayahan. ¹⁷ Nga’ iyoho’ nopo om modsinding i’ do rumayou do kokorison nu, monikid kosuabon nopo do sindingon ku i kosianan nu dit aiso’ o kopupuson. Tu’ iya’ no o kointirungon ku, om i mongintirung doho’ do tontok do haro o kosusaan. ¹⁸ Iya’ no i kokorisan ku, om iya’ no o podsindingan ku, tu’ iya’ no, oi Kinorohingan o kointirungan ku, om osianan kasai’ ko i’ doho’.

¹ Maan di boyoon do modsisinding. Tumanud di lagu’ do: Bunga bakung, kososian. Sinding do ponudukan di Daud, ² do tontok di suminangod iyau di tulun dot Aram-Misopotomia om tulun dot Aram-Soba, om tontok di naala’ di Yoab o hopod om duwo noribu o tulun dot Idom do hilo’d Rantai do Silaon, di minuli’ i Yoab. ³ Niadaan nu daa iyahai om nala’ nu iyahai, om a’ ko tuminanud dahai, oi Kinorohingan. Nga’ guli’ no dot id dahai do dinondo. ⁴ Ginuyu’ nu iti tana’ gisom do nopitas, sonongo’ no i nangababak, tu’ oguyu’ no iti tana’. ⁵ Pinadalaan nu iyahai do monginggorit, iyahai i tulun nu, om mikorobibi’ po iyahai do miagal di tulun di naawuk. ⁶ Pinoinsan nu i’ i tulun dit oronok diya’, om koidu’ i’ iyolo’ do mantad id hukuman. ⁷ Posio’ no iyahai di sinundu nu, om simbaro’ no o sambayang dahai, om angapasi i’ o tulun di kosianan nu. ⁸ Hilo’d kinoiyonon dau dot olidang do minoro-boros o Kinorohingan do poingkaa, ’’Bohogion ku nondo o tana’ do Sikim, om bohogion ku dot id tulun ku o Rantai do Sukot. ⁹ Giliad nopo om doho’ i’, om Manasi nga’ doho’ nogi’, Ipraim no om tupi’ ku dit okodou, om Yohuda no om sukud ku di don raja’. ¹⁰ Nga’ Muab nopo om pongougan ku’d gakod ku, om Idom no om podumpahan ku’d kasut ku, do tanda’ dot iyoho’ o sanganu’ddi. Mimpangkis oku po tu’ nakamanang oku no do suminangod di tulun do Pilistin,’’ ka. ¹¹ Oi Kinorohingan, isai no o paatod doho’ do hilo’d bandar di kitolig? Isai no o tonudon ku do kumaa do hilo’d Idom? ¹² Otopot no nangku kopio do niada’ nu iyahai? A’ ko no kopio mamanau do moyo’ di soudor dahai? ¹³ Uhupai no iyahai do sumaap di pisangod, tu’ tulun nopo o muhup om aiso’ i’ o guna’! ¹⁴ Kamanang indo iyahai oi Kinorohingan, dot uhupan nu iyahai, iya’ no o mangala’ di pisangod dahai.

¹ Maan di boyoon do modsisinding. Ompoton do kecapi. Sinding di Daud. ² Oi Kinorohingan, pokinongoho’ no o tihad ku, om pokinongoho’ no o sambayang ku. ³ Aiso’ no o pokukurayan ku, om nokoinsodu’ oku do mantad id walai, om lumohou oku po diya’. Pokoyoo’ oku no dot id kinoiyonon dit aiso’ o koligagaanan, ⁴ tu’ iya’ no o mongintirung doho’, om i moningolig doho’ do mantad id pisangod ku. ⁵ Pologoso’ oku no do poundorong do hiri’d kiim nu gisom do tikapatai ku, om aiso’ i’ o koligagaanan ku dot id sahau do talad nu. ⁶ Oi Kinorohingan, norongou nu no i batos ku, om noonuan oku no diya’ do miagal di naanu di tulun dit oronok diya’. ⁷ Otogui po daa i raja’, om pologoso’ no iyau do poimpasi do gisom do kokito di manangaki dau. ⁸ Maha’ daa om momorinta’ kasai’ iyau, i raja’ do pinili’ nu do gisom dot alaid. Oi Kinorohingan, intirungai no iyau di kotorodoko’ nu om kosianan nu dit aiso’ o kopupuson. ⁹ Om modsinding oku indo kasai’ dot id diya’, om sulungon ku i nakabatos ku dot id diya’ do pointikid do tadau.

¹ Maan di boyoon do modsisinding. Tumanud do: Yodutun. Sinding di Daud. ² Mandad oku nopod Kinorohingan do mamasi doho’. Iyau noo o pagandasan ku. ³ Iyau noo o mongintirung doho’ om mamasi doho’, iyau no o mogobi’ doho’, om a’ oku no aala’. ⁴ Songkuro po o koloido’ dokoyu do sumaap do tulun di miagal pod pagar do noromuk tu’ humaba’ poo? ⁵ Orohian kou nod paratu’ dau do mantad id pangkat dau dit asawat, asanangan kou do mongudut; poboroson nopo dokoyu om mamarakat i’, nga’ id suang nopod ginawo dokoyu om momolupu’ i’ dau. ⁶ Mandad oku nopod Kinorohingan, iyau poo o pagandasan ku. ⁷ Iyau noo o mongintirung om mamasi doho’, iyau no o mogobi’, om a’ oku no aala’. ⁸ Kinorohingan no o mongintirung doho’, om mogobi’ doho’ dit okoris. ⁹ Oi bansa’ ku, pogondos kasai’ kou nod Kinorohingan, sunudan ngai’ no iyau di kosusaan dokoyu, tu’ iyau no o kointirungan toko’. ¹⁰ Tulun nopo om miagal nod pinuhobo di pohoboon, it agayo om okoro’ nga’ oiyo nopo dot aiso’ o gatang. Timbangon nopo om agaan i’ kopio, agaan po ko’ pinuhobo di pohoboon. ¹¹ Kada’ pogondos do kororongit, kada’ soroho’ do haro ot aanu-anu nu do mantad id pinanakau, muhang-ruhang piya o kakayaan nu nga’ kada’ pogondos diri. ¹² Asaru’ oku i’ do korongou do Kinorohingan do momoros dot iyau o tadon do kuasa’, ¹³ om mompus-ompus kasai’ o kosianan dau. Iya’ no oi TUHAN, o monomuli’ do pointikid-tikid do tulun do tumanud di wonsoyon dau.

¹ Sinding di Daud do tontok di hilo’ iyau id tana’ do kowotuan do Yohuda. ² Oi Kinorohingan, iya’ no o Kinorohingan ku, langadon oku no diya’ om ihumon ku iya’. Iyo poddi tana’ dot otuu do tuuhan do waig, o ginawo ku do tuuhan diya’. ³ Pologoso’ oku no do kokito diya’ do hilo’d kinoiyonon nu dit olidang, om kokito di kokorisan om kagayaan nu. ⁴ Kosianan nu nopo dit aiso’ o kopupuson om kigatang po ko’ koposion, om iri no o kapamarayahan ku diya’. ⁵ Mongunsikou oku indo kasai’ diya’ do gisom do tikapatai ku, poinsawaton ku indo o longon ku dot id diya’ do maso ku’d sumambayang. ⁶ Royohon ku nondo iya’ do sinding dot atataadan, tu’ osimbayan no o ginawo ku do miagal po di nakaakan do taakanon dot awasiu. ⁷ Tontok di poillii oku do hiri’d toodopon ku, om ahandaman tiya’ no, iya’ kasai’ i’ o soro-sorohon ku do gisom dot osuaban, ⁸ tu’ iya’ no i minonulung doho’. Id sahau nod linungung do talad nu do modsinding oku dot atataadan. ⁹ Kumorom oku no kopio diya’, om apasi oku i’ tu’ okoris i’ o longon nu. ¹⁰ Tulun nopo di mamatai daa doho’ om kumaa no do hilo’d pomogunan do tulun di nangapatai. ¹¹ Angapatai nondo iyolo’ dot id pisangadan, om aakan iyolo’ do nintorusan dit orongit. ¹² Otood nondo i raja’ tu’ onuan i’ do Kinorohingan do kamanangan. Iri nopondo tulun di minamatos dot id suang do ngaran do Kinorohingan, om mamarayou i’ dau, nga’ kalantom ngai’ i’ o kabang di goudut.

¹ Maan di boyoon do modsisinding. Sinding di Daud. ² Oi Kinorohingan, pokinongoho’ no o sambayang ku, do tontok do haro o kosusaan ku. Poiduwo’ oku no do mantad id pisangod ku di korolosi doho’. ³ Intirungai oku no do mantad id pogupakatan di tulun dot araat, om mantad id tulun dot angaraat di mogiuhup do mumang doho’. ⁴ Asaon diyolo’ o dila’ diyolo’, gisom do miagal pod gayang, om poboroson diyolo’ o boros di pokoruol do miagal pod pana’. ⁵ Lumisok-lisok i’ iyolo’ do mamaraag do ngaran do tulun dit osonong, om potigowoon nopo diyolo’ om a’ no ointingayam do mongindaraat dau do gisom dot apatai iyau. ⁶ Mogiodsuur-suur nopo iyolo’ do mogupakat dot araat, mogiilo-ilo i’ iyolo’ ondung hinonggo o pataanan diyolo’ di lawa’ diyolo’. Om momusorou iyolo’ dot aiso’ o kokito diyolo’. ⁷ Minsorou iyolo’ do momonsoi dot araat. om ondos daa diyolo’ om aiso’ noo o bohiton dit osorou diyolo’d wonsoyon. Apagon no kopio do mongilo o ginawo om pomusarahan do tulun. ⁸ Nga’ papanaon nondod Kinorohingan i pana’ dau dot id diyolo’, om sigog nopo om ongotogu’ no iyolo’. ⁹ Raagon nondo dau iyolo’ dot i koboro-boroso’ diyolo’ o kapamaraagan, oinsanan nopondo o tulun do sombingog-bingog do tulu do kokito diyolo’. ¹⁰ Mogiompoddosi ngai’ nopondo iyolo’, momusorou nondo iyolo’ di winonsoi’d Kinorohingan, om poboroson diyolo’ i nongowonsoi dau. ¹¹ Om ongooropod ngai’ nondo i tulun dit ongosonong, dot i winonsoi’d TUHAN o kaarapadan. Om mintirung pondo iyolo’ dau. Om oinsanan nopondo i tulun dit ongotulid o ginawo do mamarayou dau.

¹ Maan di boyoon do modsisinding. Sinding di Daud. Sinding. ² Oi Kinorohingan, apatut i’ iyahai do mamarayou diya’ do hino’d Sion. Om sumulung iyahai di batos dahai dot id diya’, ³ tu’ iya’ nopo om sumimbar i’ do sambayang. Oinsanan nopondo o tulun do rumikot dot id diya’, ⁴ tu’ nokowonsoi i’ iyolo’d dusa. Awagat no daa kopio i dusa dahai, nga’ noompunan ngai’ nu i’ iri. ⁵ Olumaag no i tulun di nopili’ nu, i tulun di lohowon nu do miyon do hiri’d tiyonon nu dit olidang. Oiyahan indo iyahai do toinsanan dit ongosonong do hiri’d walai nu, i barakat di Walai’d Sasambayangan dot Agayo, dit olidang. ⁶ Ponimbar nu nopo dahai om kamanangan om minomonsoi ko di kongoimayaan kopio do pamasi dahai. Oinsanan nopo o tulun do pointongkop diti pomogunan, om i hilo’d soborong do rahat di hilo’d sodu’ dot otumbayaan diya’. ⁷ Sinundu nu i’ o pinopoingkakat dilo nuluhon, do popointalang dot agayo kopio o sinundu nu. ⁸ Kotingkod ko i’ do ngorod do rahat, om kotingkod ko di tumbak dot agayo, kotingkod ko do pogigugulatan do bansa’. ⁹ Oinsanan nopo o tulun di poingiyon do pointongkop diti pomogunan dot ooris om opusou do kokito di nongowonsoi nu dit agayo kopio. Oinsanan nopo o tulun do pointongkop diti pomogunan do pinotood nu do gisom do sampangkis-pangkis poo. ¹⁰ Gompion nu i’ i tana’ tu’ pirasaman nu i’, om poluhubon nu gisom dot orombung o sunion di songinsuni. Ponuon nu’d waig i bawang gisom dot asapou o tua’ di tanom-tanom. Pinosodiaan nu iyolo’ do gandum, iyo ko noddi do pinoposodia’. ¹¹ Porikatan nu’d rasam dot asapou o hiri’d tumo di naradu om potimparanan nu’d waig, lomokon nu’d tinuru’ do rasam i tana’ om posunion nu i tanom-tanom dit ongokoro’ po. ¹² Iri no i kosonongo’ nu o kosonong-sonong do tomoton; honggo nopo o koongoyon nu, om haro ngai’ no o nunu nopo do gisom dot a’ aayi-ayi’. ¹³ Notongkop pod dumba’ o hilo’d pangakan-ngakanan do dumba’, om ongotood ngai’ nopo i hilo’d guas do nulu-nulu. ¹⁴ Notongkop pod dumba’ o hilo’d kobuturan, om noponu’d gandum o hilo’d rantai. Om oinsanan nopod sampangkis-pangkis om modsinding dot atataadan.

¹ Maan di boyoon do modsisinding. Sinding. Royoho’ no o Kinorohingan do mikuwo’d mamangkis dot aarapadan, oi koinsanai’d tulun. ² Podsinding no om poinggoyoo’ no o ngaran dau, royoho’ no iyau do mikuwo’d sinding do pamarayou. ³ Pomoros no dot id Kinorohingan do poingkaa, ’’Koimayaan no kopio i nongowonsoi nu! Agayo no kopio o kuasa’ nu gisom do tumuku’ ngai’ nopo o pisangod dot id toguang nu tu’ ooris iyolo’ diya’. ⁴ Oinsanan nopo o tulun do hiti’d pomogunan do tumuku’ dot id diya’, modsinding iyolo’ do pamarayou diya’, om modsinding iyolo’ do mamarayou do ngaran nu,’’ ka. ⁵ Kainou mongoi intong di nongowonsoi’d Kinorohingan, i nongowonsoi dau do kongoimayaan kopio do hiti’d pogialatan do tulun. ⁶ Sinimbanan dau o rahat gisom do nosiliu do tana’ dot otuu, om pamanaho’ nopo di taki-aki toko’ do suminoborong di bawang, om iri ngai’ no i nongowonsoi dau o kaarapadan toko’. ⁷ Iyau no ot okoris do momorinta’ do gisom dot alaid, om poingontong kasai’ iyau di bansa’d suwai, om aiso’ i’ o tulun di sumasaap do kasaap dau. ⁸ Oi koinsanai’d bansa’, royoho’ no o Kinorohingan dahai, pologoso’ no dot orongou i pamarayou dokoyu. ⁹ Ginompi’ i’ iyahai dau, om a’ i’ iyahai pinologos dot aratu’. ¹⁰ Oi Kinorohingan, pinogumbalan nu iyahai, do miagal di pirok do sinompipi’ do tapui. ¹¹ Pinologos nu iyahai do nokosulung do lawa’, om pinababaan nu po dahai o binabo dit awagat kopio. ¹² Pinologos nu i pisangod dahai do minongulok dahai, om nakawaya’ iyahai do tapui om luyud. Nga’ baino’ noddi om nakaatod nu no iyahai dot id kinoiyonon dit aiso’ o koligagaanan. ¹³ Mongigit oku nondod porsombahan di sorobon do hilo’d walai nu, om sulungon ku i nakabatos ku dot id diya’, i batos di pinoboros ku. ¹⁴ Patahakon ku indo diya’ o nunu nopo i nakabatos ku, do tontok dit id suang oku’d kosusaan. ¹⁵ Papatahak oku indo do dumba’ do maan do porsombahan di sorobon do hiri’d pananaraban do porsombahan, om papatahak oku’d sapi’ do tontoluhan om kambing do maan do porsombahan do sumbolion, om kohubayaan nu i’ i lisun diri. ¹⁶ Kainou mokinongou, koinsanai do tulun di momusou do Kinorohingan, om sunudan ku i’ iyokoyu di winonsoi dau dot id doho’. ¹⁷ Mininglohou oku dau do mokitulung, om modsinding oku do mamarayou dau. ¹⁸ Ondung dusa o pininsarahan ku, om atantu’ no dot a’ o TUHAN minokinongou doho’. ¹⁹ Nga’ otopot nopo kopio om pinokinongou oku i’ do Kinorohingan, pinokinongou i’ dau i sambayang ku. ²⁰ Royohon ku no o Kinorohingan, tu’ pinadul i’ dau i sambayang ku om osianan kasai’ i’ iyau doho’.

¹ Maan do boyoon do modsisinding. Ompoton do kecapi. Sinding. ² Oi Kinorohingan, insianai no iyahai om barakatai no iyahai, antangai no iyahai do mikuwo’d olisiu ko dahai, ³ om kongoilo i’ do korohian nu o pointongkop diti pomogunan, om oinsanan i’ o bansa’ do kongoilo dot iya’ no o gampamasi. ⁴ Maha’ daa om mamarayou diya’ o koinsanai do bansa’d tulun, maha’ daa om mongunsikou diya’ o koinsanai’d tulun. ⁵ Maha’ daa om ongotood ngai’ o bansa’ om modsinding dot atataadan, tu’ otulid i’ o pomumutus nu do toinsanan do bansa’, om ahakon nu o koinsanai’d bansa’ do hiti’d pomogunan. ⁶ Maha’ daa om mamarayou ngai’ diya’ o bansa’, oi Kinorohingan, maha’ daa om mongunsikou ngai’ o tulun diya’. ⁷ Haro no o hasil do nokoimbulai diti tana’, tu’ nabarakatan toko’ nod Kinorohingan toko’. ⁸ Nabarakatan toko’ nod Kinorohingan, maha’ daa do momusou dau o koinsanai’d tulun do pointongkop diti pomogunan.

¹ Maan di boyoon do modsisinding. Sinding di Daud. ² Mingkakat no o Kinorohingan do popogitongkiad-kiad di pisangod dau. Om mogidu’ ngai’ nopo i tulun dit araatan dau tu’ naala’ no iyolo’. ³ Poingkuro nopo i lisun do tumagak om miagal noddi iyolo’ dot uyungon do Kinorohingan, iyo poddi rilin dot alanak do tapui, o tulun dit araat dot atanus dot id toguang do Kinorohingan. ⁴ Nga’ tulun nopo dit ongotopot om ongosimbayan i’ om ongooropod dot id toguang do Kinorohingan, ongooropod i’ iyolo’ om mimpangkis dot atataadan. ⁵ Podsinding no dot id Kinorohingan, royoho’ no o ngaran dau, posodiawo’ no o ralan dau, i poinsakai’d haun; ngaran nopo dau om TUHAN. Kooropod no dot id toguang dau. ⁶ Kinorohingan nopo, i poundorong dot id kinoiyonon dau dit olidang, om momogompi’ di tangaanak dit aiso’ o molohing om i tongoondu’ di nopuadan. ⁷ Onuan dau’d tiyonon i tulun dit aiso’ o walai, om papalabus iyau di tulun di nongogiil om pokoyoon dau dot id kosimbayanan, nga’ tulun nopo di sumaap do TUHAN om poundorongon no dot id tana’ dit oingou. ⁸ Oi Kinorohingan, tontok di tinanud nu i tulun nu, do duminarapas di tana’ do kowotuan, ⁹ om gogor nopo iti tana’, om ilo tawan nga’ pinoposondot do rasam; om guyu’ nopo o tana’, tu’ nokorikot i Kinorohingan do Sinai, i Kinorohingan dot Israil. ¹⁰ Pinarasam nu dot asapou, om pinoruak nu kawagu i tana’ dot okorop. ¹¹ Om undorong noddi i tulun nu’d hilo’, om ginompi’ nu i tulun do mosikin, tu’ osonong ko i’, oi Kinorohingan. ¹² Poboroso’ nod TUHAN, om poromuto’ no di tongoondu’ i habar do poingkaa, ¹³ ’’Mogidu’ ngai’ no i raja’ om i soudor diyolo’,’’ ka. Om pogiduwo-duwoo’ no di tongoondu’ di hiri’d duwalai i konunu-nunuan di nangaanu, ¹⁴ i pinoiyo-iyo’d punai do nurogupan do pirok, om talad nopo nga’ mogulinau nopo do miagal pod tamas dit osonong. (Nokuro tu’ minundorong o wookon dokoyu do hilo’d pogialatan di kandang do dumba’ do tontok di tadau do mogisasangod?) ¹⁵ Tontok di pinogitompias-pias do Kinorohingan i piro-piro raja’ do hilo’d Nuluhon do Salmon, om pasandatai no dau do salju ot id kinoiyonon diri. ¹⁶ A’ no ogina-gina’ o kogoyoo’ do Basan tu’ ogumu’ o posimunduk. ¹⁷ Oi Nuluhon do Basan, nokuro tu’ osolon ko do montong do mantad hilo’d timpak nu dit akawas, do montong di Nuluhon do Sion, i pinili’d Kinorohingan dot undorongon dau? Mundorong no o Kinorohingan do hilo’ do gisom dot alaid. ¹⁸ Rumikot o Kinorohingan do mantad hilo’d Sinai do kumaa do hilo’d tiyonon dau dit olidang, do mogiwoyo-woyo’ do rinibuan o korita’-kuda’ dit ongoringang. ¹⁹ Tumakad o TUHAN dilo posimunduk dot akawas, miwoyo’ dot ogumu’ tulun di nangatangkap dau, om karamit iyau do porsombahan do mantad piya dot id tulun dit obinsaap. Om TUHAN no, i Kinorohingan o mundorong do hilo’. ²⁰ Royohon no o TUHAN, i mamabo do binabo di kawagat dati’ do monikid do tadau, iyau no o Kinorohingan di mamasi dati’. ²¹ Kinorohingan toko’ nopo, om Kinorohingan di mamasi dati’, iyau no o TUHAN, i TUHAN toko’, i pinopoidu’ dati’ do mantad id kapatayon. ²² Purokon indo kopio do Kinorohingan o tulu di pisangod dau, om i tulun dit a’ tumingkod do mingwonsoi’d dusa. ²³ Nokoboros nod TUHAN o poingkaa, ’’Porikoton ku indo kawagu i pisangod dokoyu do mantad hilo’d Basan, pogulion ku indo iyolo’ do mantad hilo’d rahat dit aralom, ²⁴ om milo i’ dokoyu’d pongougan do gakod i raha’ diyolo’, om mimbangat i tasu dokoyu do monginum diri,’’ ka. ²⁵ Oi Kinorohingan, kokito ngai’ nondo diya’ do mamanau ko do popointalang do kinamanangan nu; tonud-tonudon do tulun dot ogumu’ i Kinorohingan ku, om i Raja’ ku do kumaa do hiri’d tiyonon dau dit olidang. ²⁶ I modsisinding o hiri’d gulu, om i popouni do tuunion o hiri’d tohuri, om i kosumandakan di monuntung do tamburin o hiri’d piolitan. ²⁷ ’’Royoho’ no o Kinorohingan dot id pogialatan di pitimungan do tulun dau; royoho’ no o TUHAN, oi koinsanai do sinakagon di Yakub,’’ ka. ²⁸ Minogulu nopo kopio om Binyamin, i payat dot okuri’ kopio, om suminusuhut no om i boyoon do Yohuda dit ogumu’ kopio, om susuhut nogiddi i boyoon do Sibulon om Naptali. ²⁹ Oi Kinorohingan, pointalango’ no o sinundu nu, i sinundu di pinakai nu do pinogobi’ nu dahai. ³⁰ Maha’ daa om mongoi paatod do patahak-tahakon i raja’ dot id diya’, do maan di Walai’d Sasambayangan dot Agayo do hilo’d Yorusalim, i bandar dot olidang. ³¹ Togodo’ no o Masir, i nintorusan dot orongit do hilo’d pogialatan do bundusan, tagado’ no i piro-piro bansa’ dit okoris om it oluhoi. Alao’ no i tulun di mogihum do kakayaan. Potompiaso’ no i tulun dit orohian do monokisangod. ³² Paatod nondod tambaga’ i tulun do mantad hilo’d Masir, om tulun do mantad hilo’d Etiopia nga’ popoinsawat nondod longon diyolo’ do sumambayang. ³³ Podsinding no dot id Kinorohingan, oi toinsanan do pomorintaan, podsinding no do pamarayou’d TUHAN, ³⁴ iyau i dumarapas dilo tawan, ilo tawan di hino no do mantad di gulu po. Pokinongou nod boros do TUHAN dit opuhod. ³⁵ Popinsusuyo’ no do momorinta’ o Kinorohingan dot Israil, om kisinundu o Kinorohingan do hilo’d tawan. ³⁶ A’ no ogina-gina’ o kagayaan do Kinorohingan toko’ do tontok di sumoliwan iyau do mantad hilo’d kinoiyonon dau, — i Kinorohingan dot Israil. Iyau no o manahak do kokorisan om sinundu dot id tulun dau. Royohon no o Kinorohingan!

¹ Maan di boyoon do modsisinding. Tumanud di lagu’ do: Bunga bakung. Mantad id di Daud. ² Posio’ oku no, oi Kinorohingan, tu’ nokorikot no dot id liou ku o waig. ³ Lumonsod oku no dot id burutak dot aralom, om aiso’ no o tana’ dot okodou, hiri oku nod daralom, om oruhai oku no dot oolitan do tumbak. ⁴ Ohuyan oku nod nouru do minglohou do mokitulung, oruol po o tatalanan ku, om opodi’ po o mato ku do mandad dot itulung nu. ⁵ Iri nopo tulun dit otogod doho’ dot aiso’ o paantakan, om ogumu’ po ko’ iti tobuk ku. Popinsunud do tudut do pasal doho’ i pisangod ku, om iri no i tulun dit ongokoris om sipamatai doho’. Om sansagan oku diyolo’ do popoguli’ di dapu’ dit a’ ku pinanakau. ⁶ Oi Kinorohingan, aiso’ i’ o dusa ku dot olisok do mantad id diya’, noilaan nu i’ i kobosugo’ ku dot a’ ogina-gina’. ⁷ Kada’ oku pologoso’ do mongintingayam do tulun di mogondos diya’, oi Kinorohingan, i TUHAN dit Osundu Kopio. Kada’ oku pologoso’ do mongindaraat do tulun di tumuku’ dot id diya’, oi Kinorohingan dot Israil! ⁸ Tu’ iya’ i’ o kinopongindaraatan doho’, om iya’ i’ o nokobungou diti tingayam ku. ⁹ Miagal oku pod sompogunan dot id koobpinayan ku, om miagal do wokon dot id tiyon-iyon ku. ¹⁰ Iri no i kosianan ku di walai nu o moningkau do ginawo ku, om iyoho’ no o nountunan di pongindaraat do tulun diya’. ¹¹ Puasa oku no do popointalang do minsiriba’ oku, nga’ pakaraaton oku id tulun. ¹² Manampakai oku no daa do pakayan di mogihad, om irak-irakan oku i’ diyolo’. ¹³ Iyoho’ po o boro-boroson diyolo’ do hilo’d tanga’d ralan, om mintondig po i nangaawuk do mongumang-umang doho’. ¹⁴ Nga’ iyoho’ nopo om sumambayang oku i’ dot id diya’, oi TUHAN, i Kinorohingan, simbaro’ oku no do tontok di maso di korohian nu. Simbaro’ oku no tu’ agayo i’ kopio o kosianan nu, om bayaanon nu i’ i boros nu do mamasi doho’. ¹⁵ Poiduwo’ oku no do mantad id burutak di kolonsodon, poiduwo’ oku no do mantad id pisangod ku, om mantad id waig dot angaralom. ¹⁶ Kada’ pologoso’ o luyud do mangalit doho’, kada’ oku pologoso’ dot olondod do hiri’d daralom ko’ kasaalom po do hiri’d lobong. ¹⁷ Simbaro’ oku no, oi TUHAN, tu’ osonong ko i’ om osianan kasai’ ko, koili no doho’, tu’ agayo i’ o kosianan nu. ¹⁸ Kada’ lisok do mantad id doho’ i susuhuon nu, tu’ id suang oku’d kosusaan dot agayo, simbaro’ oku nod dinondo. ¹⁹ Rikot no do mongoi pamasi doho’, poiduwo’ oku no do mantad id pisangod ku. ²⁰ Oilaan nu i’ i pongumang-umang doho’, om i pongikum-ikum om i pongindaraat doho’, okito ngai’ nu i’ i pisangod ku. ²¹ Iri no i pongindaraat o nokoruol do ginawo ku, om aiso’ no o pokukurayan ku. Mingihum oku daa’d tulun di monginsian, nga’ aiso’ i’, om miniontong oku daa do haro o mongoi ponginsasamod, nga’ aiso’ i’. ²² Tontok di linouson oku, nga’ nonuan oku nogi’ diyolo’d kawanit, om tontok di tinuuhan oku, nga’ nonuan oku nogi’ diyolo’d waig dit oonsom. ²³ Osiliu po daa do karaagon diyolo’ i poginakanan diyolo’, om poporikot do kosusaan i poginakanan diyolo’ di maan daa do kosogi-sogiton. ²⁴ Obolou po daa iyolo’, om aiso’ po daa o tongosongulun do poimpasi do hiri’d kiim diyolo’. ²⁵ Porikatai no iyolo’ di kototogod nu, om orotuan po daa iyolo’ di kototogod dit a’ ogina-gina’. ²⁶ Opogiiduan po daa o kiim diyolo’, om aiso’ po daa o tongosongulun do poimpasi do hiri’d kiim diyolo’. ²⁷ Tu’ monginggorit iyolo’ do tulun di hinukuman nu, om pimboroson diyolo’ o koinggoritan di tulun di pinokorualan nu. ²⁸ Pawagato’ po ko’ i gulu o pomohukum nu diyolo’, kada’ no iyolo’ pologoso’ do haro o tintanga’ di koposion do mantad id diya’. ²⁹ Maha’ daa om atanus o ngaran diyolo’ dot id suang di buuk do tulun di poimpasi, maha’ daa om a’ iyolo’ kohompit do hiri’d dopitar do ngaran di tulun nu. ³⁰ Nga’ id suang oku do korualan om aiso’ no o pokukurayan ku, tungago’ oku no, oi Kinorohingan, om posio’ oku no. ³¹ Modsinding oku nondo do mamarayou’d Kinorohingan, om popinsusuyon ku nondo o kogoyoo’ dau do tontok do mongunsikou oku dau. ³² Iri no i pamarayou o kohubayaan kopio’d TUHAN do mantad ko’ i sapi’ di patahakon dot id dau, om mantad ko’ i sapi’ do tontoluhan di patahakon do maan do porsombahan do sumbolion. ³³ Soira’ nopod okito di tulun dit ulak-ulakan iti, om ongotogod nondo iyolo’, om i tulun di sumambayang dot id Kinorohingan nga’ kongogirot nondo o ginawo. ³⁴ Pokinongohon id TUHAN o tulun di mosikin, om a’ i’ dau olihuan i tulun dau dit id suang do giil. ³⁵ Pamarayou nod Kinorohingan, oi tawan om tana’, rahat om koinsanai dit ongkipinuhobo do hilo’. ³⁶ Posion i’ dau o Yorusalim, om poingkakaton i’ dau kawagu i kabandaran do Yohuda. Om hilo’ no o tiyonon di tulun dau om asanganu diyolo’ i pomogunan diri. ³⁷ Om i sinakagon di susuhuon dau nga’ kotungkus nondo di tana’, om i tulun dit osianan dau nga’ kopomogun nondod hilo’.

¹ Maan di boyoon do modsisinding. Sinding di Daud do tontok di papatahak iyau do porsombahan di kopomuhandaman. ² Posio’ oku no, oi Kinorohingan, oi TUHAN, tulungo’ oku nod dinondo! ³ Aala’ po daa om oborulong po i tulun di mumbal do mamatai doho’. Oikum-ikum po daa om ongouyung po i tulun dit ongotood do haro o kosusaan ku. ⁴ Ongooris po daa om ointingayam i tulun di mongumang-umang doho’ dot i kinaalaan diyolo’ o kointingayam. ⁵ Maha’ daa om ongotood ngai’ om ongosonong o ginawo di tulun do rumikot dot id diya’. Maha’ daa om momoros kasai’ i tulun dit ongounsikou di koposion di patahakon nu dot, ’’Agayo no o Kinorohingan,’’ ka. ⁶ Oluhoi oku no, om aiso’ no o pokukurayan ku, rikot no kopio dot id doho’ do dinondo, oi Kinorohingan. Iya’ no o gampamasi doho’ oi TUHAN, lomusai no do mongoi ponulung doho’.

¹ Oi TUHAN, ruminikot oku dot id diya’ do mongoi pokiintirung, kada’ oku no kopio pologoso’ dot aala’. ² Tulungo’ oku no om poiduwo’ oku no tu’ otulid ko i’, pokinongoho’ oku no om posio’ oku no! ³ Siliu no dot intirungon ku dit ogirot tu’ miagal ko do kuta’ dot ogirot do maan ku’d intirungon, tu’ iya’ no ot intirungon ku om iya’ i moningolig doho’. ⁴ Oi Kinorohingan ku, poiduwo’ oku no do mantad id tulun dit angaraat, om mantad id kuasa’ di tulun dit araat om orongit. ⁵ Oi TUHAN, iya’ no o pagandasan ku, mantad poddi tanak oku po om mogondos oku no diya’. ⁶ Iya’ no o sinondiu ku do solinaid ku do poimpasi, om ginompi’ oku i’ diya’ do mantad di pogkosusuo’ oku i’, royohon ku no kasai’ iya’. ⁷ Iti nopo koposion ku om nosiliu dot usuyanan do tulun dot ogumu’, tu’ iya’ no o mongintirung doho’ dit ogirot. ⁸ Monongodou-ngodou oku nopo do mamarayou diya’, om popinsusui oku do kagayaan nu. ⁹ Kada’ oku iyadaai do baino’ tu’ molohing oku, om kada’ oku iduwai tu’ oluhoi oku noddi. ¹⁰ Pisangod ku nga’ mamatai doho’, om mogiupakat iyolo’ do sumaap doho’. ¹¹ Boros ka no diyolo’, ’’Notongkiadan no iyau’d Kinorohingan, ngoyo’ toko’ iyau gusao’ om tangkapon toko’ i’, tu’ aiso’ no o mongoi popoidu’ dau,’’ ka. ¹² Kada’ insodu’ tomod doho’, oi Kinorohingan, oi Kinorohingan ku, rikot no dot oruhai do mongoi ponulung doho’. ¹³ Aala’ po daa om apatai i tulun di sumaap doho’, ointingayam po daa om oindaraat i tulun di mumbal do pokoruol doho’. ¹⁴ Mogondos oku indo kasai’ diya’, om ruhangan ku o pamarayou ku diya’. ¹⁵ Popinsusuyon ku indo o kosonongo’ nu, om monongodou-ngodou oku do mimboros do pasal di koposion do mantad id diya’. Do mulong piya dot a’ ku osuhutan ngai’ iri. ¹⁶ Royohon ku nondo i sinundu nu, oi TUHAN, i Kinorohingan, om iri nondo i kosonongo’ nu o popinsusuyon ku. ¹⁷ Mantad po dit okoro’ oku po om tinudukan oku no diya’, om gisom do baino’ nga’ popinsusui kasai’ oku i’ di nongowonsoi nu di kongopusahan kopio. ¹⁸ Baino’ nopoddi tu’ molohing oku no, om nokopurak no o tobuk ku, om kada’ oku no kopio iduwai, oi Kinorohingan. Woyoon oku no do maso ku’d popinsusui do sinundu om kokoriso’ nu do kumaa dot id toinsanan o sinakagon di sumusuhut. ¹⁹ Korikot id hilo’d tawan o kotulido’ nu, oi Kinorohingan, angagayo no kopio i nongowonsoi nu, om aiso’ o koiyo diya’. ²⁰ Pinorikot nu o kosusaan om koinggoritan dot id doho’, nga’ pogulion nu i’ kawagu o kinoris ku, om tungagon oku i’ diya’ do mantad id lobong. ²¹ Pobontugon oku pondo diya’ do mantad ko’ i gulu po, om insasamadan oku indo kawagu diya’. ²² Royohon ku nondo iya’ do mikuwo’d popouni di kecapi ku, om royohon ku i kotorodoko’ nu, oi Kinorohingan ku. Modsinding oku nondo do mamarayou diya’, dot ompoton do kecapi, oi Kinorohingan dot Israil dit Olidang. ²³ Mimpangkis oku nondo dot atataadan do tontok do popouni oku do tuunion, om modsinding oku nondo do mikuwo’d aayi-ayi’ o ginawo ku, tu’ pinasi oku i’ diya’. ²⁴ Monongodou-ngodou oku nopondo do popinsusui di kotulido’ nu, tu’ naala’ no om nointingayam i tulun di mumbal daa do pokoruol doho’.

¹ Mantad id di Suliman. Oi Kinorohingan, tudukai no i raja’ dot oturan nu, onuwai no iyau di kotulido’ nu. ² Om otulid indo o pomorinta’ dau di tulun nu, om otulid o pomorinta’ dau di tulun dit ulak-ulakan. ³ Maha’ daa om osimbayan iti pomogunan, om it otulid ot owonsoi dot id pogialatan do toinsanan o bansa’. ⁴ Maha’ daa om obian di raja’ i tulun do mosikin, do tontok do butusan dau iyolo’, maha’ daa om tulungon dau i tulun dit orutum, om alaon dau i tulun di mongulok-ulok diyolo’. ⁵ Maha’ daa om sumambayang kasai’ dot id diya’ i tulun nu do solinaid po do kitinitiu ilo tadau, om maha’ daa om mamarayou ngai’ diya’ i sinakagon do solinaid po do kitulinau ilo tulan. ⁶ Maha’ daa om miagal i raja’ di rasam do sumondot do hilo’d dumo, om miagal do rasam dot asapou do momoyopos do tana’. ⁷ Maha’ daa om muhang-ruhang it otulid do daamot dau do poimpasi, om maha’ daa om mompus-ompus o kosimbayanan do solinaid po do kitinitiu ilo tulan. ⁸ Pomorintaan nopo dau om mantad po dot id iso’ o rahat om gisom do korikot do rahat do suwai, mantad pod hilo’d Bawang dot Iprat om gisom do korikot dot id tisan do tana’. ⁹ Tumuku’ ngai’ nopondo dot id dau i tulun do hilo’d tana’ do kowotuan, om motud i pisangod dau do hiri’d toning di gakod dau. ¹⁰ Iri ngai’ i raja’ do Tarsis om i mantad hilo’d piro-piro pulou nga’ paatod nondo do patahak-tahakon dot id dau, om iri ngai’ i raja’ do Shiba om Siba nga’ paatod ngai’ do popuhawangon dot id dau. ¹¹ Oinsanan nopondo o raja’ do tumuku’ dot id toguang dau, om oinsanan o bansa’ do sumiliu do susuhuon dau. ¹² Tulungon ngai’ i’ dau o tulun do mosikin di minglohou dot id dau, om tulungon dau i tulun dit aiso’ o pokukurayan om i tulun dit ulak-ulakan. ¹³ Osianan i’ iyau di tulun dit oluhoi om mosikin, posion i’ dau i tulun di kikokurangan. ¹⁴ Poiduwon i’ dau iyolo’ do mantad id tulun di mongulok-ulok om mantad id tulun dit ongorongit, tu’ koupusan i’ kopio dau o koposion diyolo’. ¹⁵ Potoguyo’ no o raja’! Maha’ daa om onuan iyau do tamas do mantad id pomogunan do Shiba, maha’ daa om sambayangan kasai’ iyau dot aiso’ o kotingkadan, maha’ daa om barakatan kasai’ iyau do Kinorohingan. ¹⁶ Maha’ daa om osima’ do gandum o hiti’d pomogunan, maha’ daa om otongkop do tanom-tanom o hilo’d konulu-nuluan, om angasapou o tua’ do miagal di hilo’d Libanon. Maha’ daa om ongoponu’ do tulun i kabandaran, do miagal di padang do notongkop do sakot. ¹⁷ Maha’ daa om a’ olihuan i ngaran di raja’, maha’ daa om mompus-ompus kasai’ i kobontugo’ dau do solinaid do haro o tadau. Maha’ daa om royohon iyau do koinsanai’d bansa’, maha’ daa om pokolumaagon iyau do koinsanai’d bansa’. ¹⁸ Royohon no o TUHAN, i Kinorohingan dot Israil, tu’ iyau noo o kowonsoi do kongopusahan diti. ¹⁹ Royohon no o ngaran dau tu’ kikagayaan do gisom dot alaid. Maha’ daa om koponu’ diti pomogunan o kagayaan dau. Owonsoi po daa o miagal diri. Amin. ²⁰ Iti no o nokopupuson do sambayang di Daud, i tanak di Isai.

¹ Sinding di Asap. Osonong tomod o Kinorohingan dot id tulun dit otulid o ginawo, om id tulun dit olidang o ginawo. ² Nga’ mikoduwo no daa o ginawo ku, oruhai no daa do natanus o kotumbayaan ku. ³ Tu’ minosol oku di tulun dit oondos, do tontok do nokito ku dot ongkoundar i tulun dot araat. ⁴ Iyolo’ nopo om a’ i’ oinggorit do toruo-ruol, tu’ okoris i’ iyolo’ om aiso’ o toruo-ruol. ⁵ A’ i’ iyolo’ oinggorit do miagal do tulun do suwai, om aiso’ i’ o kosusaan diyolo’ do miagal di dombokon. ⁶ Gowoi poddi om panakakaro diyolo’ o koondoso’ diyolo’, om panakarasuk diyolo’ o kororongit. ⁷ Ginawo nopo diyolo’ om noponu’ do karaaton, minsorou kasai’ iyolo’ do momonsoi dot araat. ⁸ Mongumang-umang nopo iyolo’ om mimboros dot angaraat dot id tulun do suwai, ongoondos tomod iyolo’ om orohian do mongonsit-onsit do wokon. ⁹ Mongindaraat iyolo’ do Kinorohingan, i hilo’d surga, om minggayo-gayo do minsuhu’ dot oiyo ko’ tulun do hiti’d pomogunan, ¹⁰ gowoi pondo om iri piya tulun di songonuon do Kinorohingan nga’ tumanud i’ diyolo’ om monongkuyaan tomod do poboroson diyolo’. ¹¹ Boros ka no diyolo’, ’’A’ i’ bo oilaan do Kinorohingan iti, a’ i’ bo dit Asawat Kopio oimbulayan iti,’’ ka. ¹² Miagal noddi o kowoyo-woyoon do tulun dit araat, osimbayan po iyolo’, om muhang-ruhang po o kakayaan. ¹³ Aiso’ i’ pama o kootuk-otukon ku’dti do kumolidang piya, om aiso’ o guna’ dot a’ piya momonsoi’d dusa. ¹⁴ Oi Kinorohingan, monongodou-ngodou oku nopo dot inggoriton nu, om monikid kosuabon nopo do hukuman oku diya’. ¹⁵ Ondung minimboros oku daa do miagal diri, om okon no ko’ miagal di tulun nu o kowoyo-woyoon ku. ¹⁶ Om numbalan ku i’ daa do momusorou kopio o hal diri nga’ adalaan i’ kopio karalom do bagi’ doho’. ¹⁷ Om ongoi oku noddi suang di Walai do Sasambayangan dit Agayo, om kosuhut oku nogiddi ondung poingkuro ot osiliu dot id tulun dit araat. ¹⁸ Hirion nu nondo iyolo’d ralan dit angalamou, om pologoson nu nondo iyolo’ dot aratu’ do gisom dot apatai iyolo’. ¹⁹ Diiri nopo om diiri iyolo’ dot apatai, araat no kopio o kootuson diyolo’. ²⁰ Miagal no iyolo’ di nipi tu’ olihuan no di dongkosuabon, soira’ nopo dit oposik ko oi TUHAN, om tumagak nopo iyolo’. ²¹ Tontok dit araat tomod o tosorou ku om dit oudipon tomod ot opurimanan ku ²² om miagal oku po do nintorusan kabasug, tu’ a’ oku nopo kosuhut do pasal diya’. ²³ Nga’ minundorong oku i’ kasai’ dot id toning nu, om nahak oku i’ diya’. ²⁴ Potunudon oku i’ diya’ do mikuwo di ponudukan nu, om kootuson nopondo om romiton oku i’ diya’ do mikuwo’d kosuahan. ²⁵ Nunu po toi o songonuon ku do hilo’d surga do suwai ko’ iya’, oi TUHAN? Om ondung nasanganu ku iya’, om aiso’ no o korohian ku do hiti’d pomogunan. ²⁶ Mulong piya dot oluhoi o tinan ku om oluhoi o pomusorou ku, nga’ iya’ i’ oi Kinorohingan o kokorisan ku; iya’ noo o pokioonuan kopio ku. ²⁷ Tulun nopo di tumongkiad diya’ om atantu’ no dot apatai, om patayon nu i tulun dit a’ otorodok dot id diya’. ²⁸ Nga’ iyoho’ nopo om potorungak no do Kinorohingan it a’ ogina-gina’ o kosonongo’, om kaanu oku do kointirungan do mantad id TUHAN, it Osundu Kopio, om popinsusui oku do koinsanai di nongowonsoi dau.

¹ Sinding do ponudukan di Asap. Oi Kinorohingan, nokuro tu’ niduan tomod nu iyahai do miagal diti? Potilombuson nu no toi kopio o kototogod nu dot id tulun nu? ² Soroho’ no i tulun nu, i pinili’ nu do mantad di gulu po, i tulun di pinoidu’ nu do mantad id ponguripanan om i siniliu nu do diya’d tulun. Hondomo’ no o Nuluhon do Sion, i niyon nu di gulu po. ³ Homboo’ no iti kinaraagan di kinoiyonon di gulu po, naraag ngai’ no di pisangod dahai o konunu-nunuan do hiri’d suang do Walai’d Sasambayangan dot Agayo. ⁴ Sanggara-gara’ po do hilo’d Walai’d Sasambayangan dot Agayo i pisangod nu dot atataadan do nakamanang, om nokoingkakat no diyolo’ i bondira’ diyolo’d hilo’, do tanda’ do kinamanangan diyolo’. ⁵ Miagal po iyolo’ di mananagad do kayu tu’ mintagad do kayu do kapak o panagad. ⁶ Raago’ ngai’ nopo diyolo’ i papan do pinomolimput dot i kapak om i tukul diyolo’ o pinamaraag. ⁷ Rinaag diyolo’ i Walai’d Sasambayangan dot Agayo, om sinosomu’ diyolo’ i tiyonon do sumambayang dot id diya’. ⁸ Panatasan no daa kopio diyolo’ iyahai do mangala’, sorobo’ ngai’ nopo diyolo’ i tiyonon do sumambayang dot id pomogunan diti. ⁹ Aiso’ noddi o nokito dahai di kongoimayaan kopio, aiso’ no o nabi do noolu’, om songulun po nga’ aiso’ i’ o koilo ondung soira’ dot opupusan iti. ¹⁰ Oi Kinorohingan, songkuro po koloido’ do pisangod dahai do momohingi-hingi diya’? Pologoson nu nopo toi iyolo’ do mongindaraat do ngaran nu do gisom dot alaid? ¹¹ Nokuro tu’ a’ ko monulung dahai? Nokuro tu’ a’ ko monongkoilo dahai? ¹² Okon toi ko’ nosiliu ko’d raja’ dahai do mantad di timpuun i’, oi Kinorohingan, om asaru’ ko do mamasi dahai. ¹³ Pinigirang nu i rahat dot i kinoris nu dit a’ ogina-gina’ o kogoyoo’ do pinomogirang, om minumuk nu o tulu di naga’ di hilo’d rahat. ¹⁴ Binabak nu o tulu di Lowiatan om pinaakanan nu i rata’ dau di nintorusan do hilo’d tana’ do kowotuan. ¹⁵ Pinoluyung nu i bawang om i tudan do waig, om rinasak nu i bawang dot angagayo. ¹⁶ Winonsoi nu o tanawau om totuong, pinoiyon nu ilo tadau om ilo tulan dot id poiyanan di natantu’ mantad nu. ¹⁷ Winonsoi nu o pogiwoli-wolitan diti pomogunan, om winonsoi nu o maso do magadau om maso do rumasam. ¹⁸ Nga’ soroho’ no, oi TUHAN do mongirak-irak diya’ i pisangod nu, om a’ iyolo’ kotutun diya’ om mongindaraat iyolo’ do ngaran nu. ¹⁹ Kada’ tongkiadai tomod iti tulun nu dit aiso’ o pokukurayan do pinsimbayagan di pisangod diyolo’ dit ongorongit, kada’ kopio lihuwai do gisom dot alaid i tulun nu di maso dot inggoriton. ²⁰ Soroho’ no i tumpongo nu do pinoumpongo nu dahai, haro ngai’ nopo o tulun dot orongit dot id pointikid-tikid do kinoiyonon do hiti’d pomogunan dit otuong. ²¹ Kada’ pologoso’ i tulun dit ulak-ulakan dot ointingayam, suwai ko’ pologoso’ no i tulun di mosikin om it oinggorit do mamarayou diya’. ²² Oi Kinorohingan, posik no om pokotopoto’ no i hal nu! Soroho’ no do monongodou-ngodou nopo i tulun dit a’ otumbayaan diya’ do mongirak-irak diya’. ²³ Kada’ lihuwai i balangas di pisangod nu dit ongotogod tomod, om i kohiyoo’ di tulun di sumaap diya’ dot a’ opupus-pupusan do mamagarang.

¹ Maan di boyoon do modsisinding. Tumanud do lagu’ do: Kada’ pamaraag. Sinding di Asap. Sinding. ² Mongunsikou iyahai diya’, oi Kinorohingan, mongunsikou iyahai diya’. Popinsusuyon dahai o kogoyoo’ nu, om popinsunudon dahai i nongowonsoi nu di kongopusahan kopio. ³ Boros kad Kinorohingan, ’’Tontok di maso do natantu’ ku do kopomutusan, om otulid i’ o pomumutus ku. ⁴ Mulong piya do gagaran ngai’ it ongkipinuhobo om gumuyu’ iti tana’, nga’ iri nopo pinoimpahan di tana’ om pogiroton ku i’. ⁵ Sunudan ngai’ ku i’ i tulun dit angaraat dot a’ ongoondos, ⁶ om oduhan ku iyolo’ do mimboros do minggayo-gayo,’’ ka. ⁷ Iti nopo pomumutus om okon i’ ko’ ruminikot do mantad id koulayon ko’ mantad id kotonobon, ko’ mantad po id utara ko’ mantad id salatan; ⁸ tu’ Kinorohingan no, i gompomutus, o momohukum do wookon do tulun, om pokotopot do wookon. ⁹ Poingigit nod TUHAN o sangkir, i noponu’ do waig dot anggur dit osokol do tanda’ dot otogod iyau. Potuntugon nondo dau i sangkir diri, om inumon nondo di tulun dot angaraat do gisom dot aayi’. ¹⁰ Nga’ iyoho’ nopo om a’ oku i’ tumingkod do popimboros do pasal di winonsoi do Kinorohingan di Yakub, om a’ oku tumingkod do modsinding do mamarayou dau. ¹¹ Poluhoyon nondo dau i tulun dit angaraat, nga’ pokorison pondo dau ko’ i gulu i tulun dit ongosonong.

¹ Maan di boyoon do modsisinding. Ambaton do kecapi. Sinding di Asap. Sinding. ² Abantug i’ o Kinorohingan do hilo’d Yohuda, suahon i’ o ngaran dau do hilo’d Israil. ³ Haro i’ o tiyonon dau do hilo’d Yorusalim, poundorong iyau do hilo’d Nuluhon do Sion. ⁴ Hilo’ no iyau do monipu’ do koinsanai di rapo-rapo diyolo’, i pana’ di pisangod dau, om i kolid, om i gayang diyolo’. ⁵ A’ no ogina-gina’ o kagayaan nu, oi Kinorohingan, olumis ko po ko’ i nuluhon di hino mantad no di gulu po. ⁶ I soudor di gunsiou nga’ nosolod ngai’ nu no o konunu-nunuan, om nokoolong no kopio iyolo’d koodop, gisom dot a’ no kotungag tu’ napatai no iyolo’. Aiso’ i’ o kinotutuk-tutukon di kinoris om i toilaan diyolo’. ⁷ Oi Kinorohingan di Yakub, tontok di tinompurolosi nu iyolo’, om kangapatai nopo i kuda’ diyolo’ do minitonggoi di tulun di songinsakai. ⁸ Nga’ iya’ nopo, oi TUHAN om aiso’ i’ o katama’ do sumaap, om aiso’ o katama’ do mingkakat dot id toguang nu do tontok dot otogod ko. ⁹ Hilo’ ko’d surga do pinopoilo dit ibutus nu, om kododog nopo iti pomogunan dot ouru do moddosi, ¹⁰ tontok di miningkakat ko do popoboros dit ibutus nu, do mamasi do koinsanai di tulun dit ulak-ulakan do hiti’d pomogunan. ¹¹ Kototogod nopod tulun om sumiliu i’ do pamarayou diya’, om iri nopondo tulun dit a’ apatai dot id pisangadan om pakayon nu i’ do sumiliu do diya’d kountungan. ¹² Bayaano’ no i nakabatos nu dot id TUHAN, i Kinorohingan nu. Papatahak ngai’ kou no do porsombahan dot id Kinorohingan, koinsanai dokoyu i bansa’ do hiti’d kasamakan. Poronokon id Kinorohingan dau o tulun. ¹³ Poinsiribaon dau i boyoon dit angasawat o ginawo, tompurolosion ngai’ dau i raja’ dit angabantug do hiti’d pomogunan.

¹ Maan di boyoon do modsisinding do tumanud do Yodutun. Sinding di Asap. ² Mininglohou oku dot opuhod dot id Kinorohingan, mininglohou oku om norongou oku i’ dau. ³ Tontok di haro o kosusaan om sumambayang oku i’ dot id TUHAN. Monuaban oku nopo do popoinsawat do longon do sumambayang, nga’ a’ oku i’ oinsasamadan. ⁴ Tontok di momusorou oku’d Kinorohingan, om koodoi oku nogi’! Om tontok do porolomon ku o pomusorou ku, nga’ okon nogi’ do lumomok o topurimanan ku. ⁵ A’ oku id TUHAN pologoson do koodop do dongotuong, adalaan oku no kopio do tumangkabo gisom dot a’ oku no milo do moro-boros. ⁶ Ongosorou ku po i tadau di nongotoliban, om angahandaman ku i toun di nangkatalib. ⁷ Monuaban oku nopo do minsorou, gisom do monguhot ot id suang do ginawo ku do poingkaa, ⁸ ’’Iyada’ toko’ no tuu kasai’ do Kinorohingan diti? A’ no tuu iyau ohubayaan dati’? ⁹ Nokotingkod tuu’ddi iyau dot osianan dati’? A’ no tuu’ddi dau bayaanon i batos dau? ¹⁰ Nolihuan no tuu’ddi do Kinorohingan i kobinsiano’ dau dati’? Notingalanan tuu’ddi do kobintogodo’ i kobinsiano’ dau’ddi?’’ kangku no. ¹¹ Om boros kangku’ddi, ’’Iti no kopio o kotongob do ginawo ku tu’ aiso’ noddi kuasa’ dit Asawat Kopio,’’ kangku. ¹² Oi TUHAN, hondomon ngai’ ku indo i nongowonsoi nu dit angagayo di gulu po, pogulion ku indo o pomusorou ku dot id kongopusahan di nongowonsoi nu di gulu po. ¹³ Sorohon ngai’ ku indo i nongowonsoi nu, om sorisidon ku do momusorou o koinsanai di nongowonsoi nu di kongopusahan kopio. ¹⁴ Oi Kinorohingan, olidang ngai’ nopo o wonsoyon nu, aiso’ no o kinorohingan do suwai do miagal diya’ kosundu. ¹⁵ Iya’ no i Kinorohingan di miningwonsoi do kongopusahan, om pinointalang nu i kuasa’ nu dot id pogialatan do bansa’. ¹⁶ Pinasi nu di sinundu nu i tulun nu, iri no i sinakagon di Yakub om i Yusup. ¹⁷ Poddosi nopo i waig do nokokito diya’, oi Kinorohingan, om gagarai nopo i nanad do rahat. ¹⁸ Pinopotuntug i haun do rasam, om opuhod o tinggoron do hilo’d tawan, om kodumaat nga’ sangkalab-kalab poo dot id posorili’. ¹⁹ Iri po ngorod do tinggoron nu ot orongou, om i kalab do kodumaat o kanawau diti pomogunan, iti po tana’ nga’ kogogor nopo om noguyu’. ²⁰ Mamanau ko nopo do sumalag di tumbak, om soborongon nu i rahat, nga’ a’ i’ okito o nulokon nu. ²¹ Miagal ko pod gompomogompi’ do dumba’ do momoyo’ di tulun nu, i winoyo’ di Musa om i Harun.

¹ Sinding do ponudukan di Asap. Oi tulun ku, pokinongou kou no diti potudukon ku, om podulon no kopio iti poboroson ku. ² Moro-boros oku dokoyu dot id suang do poinukadan, om posondoton ku o komoyon di boros dot aralom di pinoboros di gulu po dit a’ osuhutan o komoyon; ³ i nongorongou om i nongoilaan toko’, i pinosunud di komolohingan toko’ dot id dati’. ⁴ A’ toko’ i’ lisokon iri dot id tangaanak toko’, suwai ko’ susuyon toko’ i’ dot id tangaanak toko’ di sumusuhut dati’, i pasal di kosunduwo’ do TUHAN om koinsanai di nongowonsoi dau dit angagayo om i nongowonsoi dau di kongopusahan kopio. ⁵ Nonuan dau dot oturan o tulun dot Israil, i tulun dau, nonuan dau do ponudukan i sinakagon di Yakub. Sinuhu’ dau i taki-aki toko’ do popotuduk dit oturan dot id tangaanak diyolo’, ⁶ om kongoilo i’ di ponudukan i sinakagon do sumusuhut diyolo’, om iyolo’ nondo nga’ popotuduk id di dot id tangaanak diyolo’. ⁷ Miagal nodti o wonsoyon om mogondos indo iyolo’ dot id Kinorohingan, om a’ kolihu di nongowonsoi dau, suwai ko’ tumorodok kasai’ do tumanud di tisuhu’ dau. ⁸ Om a’ indo iyolo’ koiyo di komolohingan diyolo’, tu’ tulun di sumasaap om sumosongkiwal, om it a’ nokoumbal dot ogirot o kotumbayaan dot id Kinorohingan, om a’ tuminorodok dot id dau. ⁹ Iri payat dot Ipraim dit ongkipana’ do ponokorapo-rapo nga’ minogidu’ i’ do tontok di minogisasangod. ¹⁰ A’ diyolo’ sinulung i tumpongo do Kinorohingan dot id diyolo’, a’ iyolo’ minumboyo’ dit oturan dau. ¹¹ Nongolihuan no diyolo’ i nongowonsoi’d Kinorohingan, i kongopusahan do nokito diyolo’ do winonsoi dau. ¹² Minomonsoi o Kinorohingan do kongopusahan di hilo’d rantai do Soan, i hilo’d pomogunan do Masir, do montong-ontong i taki-aki diyolo’. ¹³ Pinigirang dau i rahat do winayaan dau do pinoposoborong diyolo’; pinoolig dau i waig do miagal do tolig do hiri’d miampaping. ¹⁴ Dangadau nopo om haun o pinomoyo’ dau diyolo’, om dongotuong no om tulinau do tapui o pinomoyo’. ¹⁵ Tontok di hilo’ iyolo’d tana’ do kowotuan om minamalapak iyau do pampang do pinopoimbulai do waig do pinoinuman diyolo’. ¹⁶ Pinoimbulai dau o waig do luminuyung do mantad hiri’d pampang do miagal pod bawang kologod. ¹⁷ Mulong piya do miagal diri nga’ a’ i’ iyolo’ tuminingkod do mingwonsoi’d dusa dot id Kinorohingan, om suminaap iyolo’ do Kinorohingan, it Osundu Kopio, di hilo’ iyolo’d tana’ do kowotuan. ¹⁸ Tuminomod i’ iyolo’ do mogumbal do Kinorohingan, tu’ suminonsog do mokianu do taakanon di korohian diyolo’. ¹⁹ Boros ka no diyolo’ do sumaap do Kinorohingan, ’’Milo i’ kaka o Kinorohingan do manahak dati’ do taakanon do hiti’d tana’ do kowotuan? ²⁰ Otopot nogi’ kopio do minamalapak iyau do pampang, om luminuyung o waig do mantad hiri do miagal pod bawang kologod. Nga’ milo po tuu iyau do manahak dati’ do taakanon, om manahak do tulun dau do tikanas do hiti?’’ ka no diyolo’. ²¹ Om kotogod noddi o Kinorohingan do nokorongou di pokionuon diyolo’, om saapo’ nod Kinorohingan i tulun dau do tapui, om muhang-ruhang nopoddi o kototogod dau diyolo’, ²² tu’ a’ i’ iyolo’ otumbayaan dau, om a’ iyolo’ monongkuyaan do kikuasa’ iyau do mamasi diyolo’. ²³ Mulong piya dot iyo’ddi nga’ minonuhu’ i’ iyau di tawan do popoiwang do totobon. ²⁴ Nonuan dau iyolo’ do taakanon do mantad hilo’d surga, tu’ pinolintuhun dau o manna do maan diyolo’d akanon. ²⁵ Om pangakan no iyolo’ di taakanon do mantad hilo’d surga, om akan no iyolo’ do gisom do nongoiyahan. ²⁶ Om suhuo’ pod Kinorohingan do tumongus i ribut do mantad hilo’d koulayon, om i sinundu dau o pinopotongus di ribut do mantad id salatan. ²⁷ Om porikatai no dau i tulun dau do tombolog do gisom dot a’ no ointob o kogumuo’. ²⁸ Pinaratu’ dau i tombolog diri do hiri’d pogiolit-olitan di pinomukiiman do posorili’ di kiim diyolo’. ²⁹ Om pangakan noddi iyolo’ do gisom do nongoiyahan, tu’ tinahak ngai’ id Kinorohingan o nunu nopo i pinokianu diyolo’. ³⁰ Nga’ a’ nopo iyolo’ milo dot abagal-bagalan, om maso poddi diyolo’ do mingakan di taakanon diri, ³¹ om kotogod tomod no o Kinorohingan diyolo’, om patayo’ no dau i tulun dit ongokoris, i tangaanakwagu dot Israil dit ongosiou. ³² Nga’ mulong piya dot iyo’ddi, nga’ kakal i’ diyolo’ do mingwonsoi’d dusa, om a’ monongkuyaan dau, do nokointalang piya ngai’ i kongoimayaan. ³³ Om gowoi poddi om pupusai nod Kinorohingan o tumur diyolo’, do miagal no di pinuhobo di pohoboon tu’ diiri i’ om diiri dot atanus. ³⁴ Nga’ tontok di pinatai do Kinorohingan o piro-piro dot id pogialatan diyolo’, om guli’ noddi o wookon diyolo’ dot id Kinorohingan, mikuwo’d minonosol do dusa, om tuminorodok diri iyolo’ do sumambayang dot id Kinorohingan. ³⁵ Nahandaman diyolo’ do Kinorohingan no ot intirungon diyolo’, om iyau, it Asawat Kopio o mamasi diyolo’. ³⁶ Nga’ tudut ngai’ i’ i boros diyolo’, iso’ po di pinoboros diyolo’ nga’ aiso’ i’ ot otopot. ³⁷ A’ i’ iyolo’ tuminorodok dot id Kinorohingan, a’ diyolo’ tinanud i tumpongo do Kinorohingan dot id diyolo’. ³⁸ Nga’ Kinorohingan nopo om obinsianan i’ do tulun dau, nompunan i’ dau o dusa diyolo’ om a’ i’ dau iyolo’ rinaag. Asaru’ nod Kinorohingan do pususon o kototogod dau om a’ dau pointalangon i kototogod dau. ³⁹ Tu’ ahandaman i’ dau dot iyolo’ nopo om matai i’, miagal no di ribut tu’ kalambai noo om katalib no. ⁴⁰ Asaru’ no iyolo’ do sumaap do Kinorohingan di hilo’ po iyolo’d tana’ do kowotuan, a’ no iyolo’ impiro-piro do pinopokoruol do ginawo’d Kinorohingan. ⁴¹ Miguli-guli’ nopo iyolo’ do mogumbal do Kinorohingan, om pinopokoruol do ginawo’d Kinorohingan dot Israil, i Kinorohingan dot olidang. ⁴² Nolihuan diyolo’ i sinundu dau dot agayo, om i tadau di pinasi dau iyolo’ do mantad id pisangod diyolo’, ⁴³ om di pinopointalang iyau do kongopusahan om koinsanai di nongowonsoi dau do kongoimayaan di hilo’d rantai do Soan, i hilo’d pomogunan do Masir. ⁴⁴ Siniliu ngai’ dau do raha’ o bawang, om aiso’ no o tinumon do tulun do Masir. ⁴⁵ Pinorikot dau o langau dot ogumu’ dot id pogialatan diyolo’ do maan do ponginggorit diyolo’, om pinorikatan dau iyolo’ do bonong do pamaraag do koinsanai di tana’ diyolo’. ⁴⁶ Pinorikot dau o katat do mangakan di tanom-tanom diyolo’, om koinsanai di tua’ di tanom-tanom diyolo’. ⁴⁷ Rinaag dau do karambatu o kabun dot anggur diyolo’, om i guas dot ara diyolo’ nga’ rinaag dau do bolobou dot ais. ⁴⁸ Pinatai dau do karambatu i sapi’ diyolo’, om i dumba’ diyolo’ nga’ sinisian ngai’. ⁴⁹ Haro o sonsinompuruan o moloikat do pinoporikot do kosusaan dot awagat kopio dot id diyolo’, Oiyo-iyo’ nopo dau do papalabus i kototogod dau, do gisom dot aiso’ noo o pinokukurayan diyolo’. ⁵⁰ A’ no dau pinusus o ginawo dau dot otogod, om pinorikatan dau iyolo’ do toruol di mogkoroliu do pinamatai dau diyolo’. ⁵¹ Pinatai ngai’ dau o tanak do kusai dit id gulu, dot id suang do koinsanai di sompiiyon do tulun do Masir. ⁵² Om woyoo’ noddi dau i tulun dau do luminabus do miagal di madtatamong do dumba’, om winoyo’ dau iyolo’ do minaya’ di tana’ do kowotuan. ⁵³ Aiso’ i’ o kinoligagaanan diyolo’ tu’ winoyo’ i’ dau iyolo’, om a’ i’ iyolo’ moddosi, nga’ iri nopo pisangod diyolo’ om nongolondod ngai’ i’ do hiri’d rahat. ⁵⁴ Pinakaa dau iyolo’ do hilo’d pomogunan dau dit olidang, i hilo’d konuluhanan di nosolod dau dot id pisangadan. ⁵⁵ Nuyung dau i tulun mantad do hiri do tontok di tuminongkop i tulun dau’d hiri; om pinogiduwo-duwo dau i tana’ dot id payat dot Israil do gisom do nongkoiyon iyolo’ dot id kokiiman di pisangod diyolo’. ⁵⁶ Nga’ suminaap iddi iyolo’ do Kinorohingan, it Asawat Kopio, om minogumbal iyolo’ dau, om a’ diyolo’ numboyo’ i pinonuhuan dau. ⁵⁷ Suminaap iyolo’ do miagal di taki-aki diyolo’, miagal po iyolo’ di pana’ do nokilong tu’ a’ no milo do pakayon. ⁵⁸ Pinotogod diyolo’ o Kinorohingan tu’ haro i’ o tiyonon diyolo’ do sumambayang dot id tininganak om tiiyonon do tumuku’ dot id tingolig di winonsoi diyolo’. ⁵⁹ Otogod tomod diri o Kinorohingan do tontok di nokito dau iri, om iyadaai noddi kopio do Kinorohingan i tulun dau. ⁶⁰ Om tongkiadai noddi do Kinorohingan i Kiim dau di hilo’d Silo i kinoiyonon di nundorong do Kinorohingan do poinsugku’ dati’. ⁶¹ Pinologos dau i pisangod toko’ do minononggoi di Kaban do Tumpongo, i tanda’ do sinundu om kagayaan do Kinorohingan. ⁶² Otogod o Kinorohingan di tulun dau, om pologoso’ noddi dau iyolo’ do pinatai di pisangod diyolo’. ⁶³ Tangaanakwagu nga’ nangapatai i’ dot id pisangadan, om kosumandakan poddi nga’ aiso’ no o mangawin. ⁶⁴ Imam nga’ pinatai i’ dot araat tomod o pinamatai, om iri ngai’ i sawo diyolo’ nga’ a’ no milo do mogihad diyolo’. ⁶⁵ Alaid poddi om koposik nogi’ o Kinorohingan do miagal poddi nokoodop iyau, om miagal poddi iyau di tulun dit okoris di nobinsuhu’ do waig dot anggur. ⁶⁶ Om uyungo’ no dau i pisangod dau do mikuwo’d tiningayam om naala’ do gisom dot alaid. ⁶⁷ Nga’ niadaan i’ dau i sinakagon di Yusup, om a’ dau nanu i payat dot Ipraim. ⁶⁸ Nga’ nanu nogi’ dau o payat di Yohuda, om pinili’ dau o Nuluhon do Sion, i kosianan kopio dau. ⁶⁹ Om hilo’ no o pinoingkakatan dau di Walai dau dot agayo, do pinoiyo di tiyonon dau do hilo’d surga, om winonsoi dau do miagal diti tana’ kogirot, tu’ a’ araag do gisom dot alaid. ⁷⁰ Pinili’ dau i Daud, i susuhuon dau, om linohou dau iyau do mantad hiri’d kobuturan. ⁷¹ I pinadtamangan di Daud di dumba’ dau, om siliho’ no dau i Daud do raja’ do tulun dot Israil, do podtomongon di tulun di dong Kinorohingan. ⁷² Om pinitamangan di Daud iyolo’ do mikuwo’d toilaan, om oilo tomod i Daud do minomogompi’ diyolo’, om otulid o ginawo dau do minomoyo’ diyolo’.

¹ Sinding di Asap. Oi Kinorohingan, nosolod nod bansa’ dit a’ kotutun diya’ i tana’ di potungkusan nu! Nososomu’ no diyolo’ i Walai’d Sasambayangan dot Agayo, om pinologos do poinraag o bandar do Yorusalim. ² Pinologos diyolo’ dot akanon do tombolog i rata’ di tulun nu, om i rata’ di susuhuon nu nga’ pinologos i’ diyolo’ dot akanon do nintorusan. ³ Pinalawas diyolo’ o raha’ di tulun nu do miagal pod popotuntug do waig, miagal pod waig o raha’ do lumuyung do pointongkop do Yorusalim, om aiso’ no o noolu’ do momolobong di rata’ diyolo’. ⁴ Oinsanan nopo i bansa’ dit id posorili’ dahai do mongindaraat dahai, mongirak-irak om mongumang-umang iyolo’ dahai. ⁵ Oi TUHAN, potilombuson nu no kopio o ginawo nu dot otogod dahai? Potilombuson nu no kopio o kototogod nu do sumikit do miagal do tapui? ⁶ Kotogod no di bansa’ dit a’ kotutun diya’, om id tulun dit a’ sumambayang dot id diya’. ⁷ Tu’ napatai no diyolo’ i tulun nu, om naraag diyolo’ i pomogunan nu. ⁸ Kada’ iyahai hukumai dot i dusa di komolohingan dahai o kopomohukuman, suwai ko’ kosianai no dahai do dinondo tu’ aiso’ no o pokukurayan dahai. ⁹ Oi Kinorohingan, i gampamasi dahai, uhupai no iyahai, om posio’ no iyahai, om ompunai no o dusa dahai, dot i kobontugo’ do ngaran nu o kopoiduan. ¹⁰ Kada’ pologoso’ i bansa’d suwai do monguhot do pasal dahai do poingkaa, ’’Hinonggo no o Kinorohingan diyolo’?’’ ka. Hukumai ngai’ no i bansa’ddi do montong-ontong iyahai, tu’ iyolo’ no i pinapalawas do raha’ di susuhuon nu. ¹¹ Pokinongoho’ no o todoi di tulun di songinggiil, om polobuson no i tulun di hukuman do kapatayon dot i sinundu nu dit agayo o papalabus. ¹² Oi TUHAN, suliai no i bansa’d suwai dot inturu’ kawagat ko’ mantad di pinongindaraat diyolo’ diya’. ¹³ Om iyahai nopondo tu’ tulun nu, om i ponokodumba’ di pigompian nu, om mongunsikou i’ dot id diya’ do gisom dot alaid, om mamarayou diya’ do gisom do poingompus.

¹ Maan di boyoon do modsisinding. Tumanud di lagu’ do: Bunga bakung. Sinding do kososian di Asap. ² Pokinongoho’ no iyahai, oi gompomogompi’ do tulun dot Israil, pokinongoho’ no iyahai, oi boyoon do tulun nu. Poirikau ko dot id tirikohonon nu di don raja’ dit id sawat ko’ i moloikat di roitan do kerub. ³ Intalang no dot id payat dot Ipraim, om Binyamin om Manasi. Pointalango’ no i sinundu nu, rikot no do mongoi pamasi dahai! ⁴ Pogulio’ no iyahai, oi Kinorohingan; pointalangai no iyahai di kosianan nu om angapasi i’ iyahai. ⁵ Oi TUHAN, i Kinorohingan dit Osundu Kopio, songkuro po koloido’ nu do tumogod do sumambayang piya i tulun nu? ⁶ Nonuan nu iyahai do katangaban do maan dot akanon, om sangkir dot agayo do noponu’d romou do maan dot inumon. ⁷ Pinologos nu i bansa’ dit id posorili’ dahai do mogitotogod do mogiaahau do sumolod diti pomogunan dahai, om indaraaton po iyahai di pisangod dahai. ⁸ Pogulio’ no iyahai, oi Kinorohingan it Osundu Kopio. Pointalangai no iyahai di kosianan nu, om angapasi i’ iyahai. ⁹ Tulun nu nopo om miagal do guas dot anggur di pinawaliu nu do mantad hilo’d Masir. Nuyung nu i bansa’d suwai om potonomo’ nu nogiddi i guas dot anggur do hiri’d pomogunan diyolo’. ¹⁰ Pamalangga’ ko nogiddi do kinoiyonon do pinatanaman diri, om pomugamut noddi iri do gisom do nakaralom, gisom do nokotongkop di pomogunan. ¹¹ Iri po nulu-nulu nga’ nongolungungan ngai’, om nokosoibau di kayu sedar dit angakawas o raan. ¹² Om ruminoloi i raan diri gisom do nokorikot do hilo’d Rahat do Tanga’, om gisom do nokorikot do hilo’d Bawang dot Iprat. ¹³ Nokuro’ddi tu’ hinaba’ nu i pagar do posorili’ddi? Baino’ nopoddi om isai nopo o kawaya’ do hiri nga’ mongoi nopo panakau di tua’ dit anggur. ¹⁴ Om piulak-ulakan pod bakas i guas dit anggur, om pingakanan do nintorusan i tua’. ¹⁵ Oi Kinorohingan, it Osundu Kopio, koiliono’ no iyahai, luungai no iyahai do mantad hino’d surga, rikot no do mongoi pamasi di tulun nu. ¹⁶ Rikot nod hiti do mongoi pamasi’dti guas dot anggur do tinanom nu, iti guas dot anggur dit omulok po do pinosuni nu do gisom do nokopomugamut. ¹⁷ Tinutudan om tinagad do pisangod dahai i guas dot anggur, kotogod no do mintong diyolo’ om patayo’ no iyolo’. ¹⁸ Intirungai no om gompio’ no iti tulun do pinili’ nu, i bansa’ di pinokoris nu. ¹⁹ Poingkuro piya nga’ a’ no iyahai mogidu’ kawagu do mantad id diya’, pologoso’ no iyahai do poimpasi om kapamarayou i’ iyahai diya’. ²⁰ Pogulio’ no iyahai oi TUHAN, i Kinorohingan dit Osundu Kopio, pointalangai no iyahai do kosianan nu, om angapasi i’ iyahai.

¹ Maan di boyoon do modsisinding. Tumanud di lagu’ do: Gitit. Mantad id di Asap. ² Pamangkis no dot atataadan dot id Kinorohingan i mogobi’ dati’, podsinding no do pamarayou’d Kinorohingan di Yakub. ³ Pounio’ no o tuunion om tuntungo’ no i tamburin, kombito’ no o gambus om kecapi dot olumis o pongongombit. ⁴ Pounio’ no o torumpit do tontok do tadau dot agayo, tontok di tulan do wagu om tontok di misawang o tulan. ⁵ Iti no o toturan do hilo’d Israil, i ponuhuan do Kinorohingan di Yakub. ⁶ Iti no o ponuhuan dau do tulun dot Israil, tontok di sinangod dau i pomogunan do Masir. Orongou ku o boros dit a’ ku po insan korongou do poingkaa, ⁷ ’’Nidu’ ku i binabo do poimbabo dokoyu, pinologos ku iyokoyu do pinopoiliu di bata’ do songinsaan dokoyu. ⁸ Tontok dit id suang kou do kosusaan, om luminohou kou doho’, om ruminikot oku i’ do minongoi pamasi dokoyu. Sinimbar ku i’ iyokoyu do mantad hiri’d lilisokon ku di hiri’d suang do tongus, pinogumbalan ku iyokoyu di hilo’d tudan do waig do Moriba. ⁹ Oi tulun ku, pokinongou no diti boros ku do popoinsan dokoyu, oi Israil, orohian oku no daa kopio do mokinongou kou doho’. ¹⁰ Kada’ kou nogi’ kopio tuku’ do kinorohingan do suwai. Kada’ nod haro o ponokokinorohingan dokoyu’d suwai. ¹¹ Iyoho’ no o TUHAN, i Kinorohingan dokoyu, i minomoyo’ dokoyu do suminoliwan do mantad id pomogunan do Masir. Tontok di linouson kou om nonuan ku i’ iyokoyu do taakanon. ¹² Nga’ a’ i’ minokinongou doho’ i tulun ku, om a’ minumboyo’ doho’ i tulun dot Israil. ¹³ Gowoi poddi om pologoso’ ku nopo iyolo’ do tumanud di diyolo’d korohian, om momonsoi do nunu nopo i diyolo’d korohian. ¹⁴ Orohian oku no daa kopio do mokinongou doho’ o tulun ku, orohian oku no daa kopio do mumboyo’ iyolo’ doho’. ¹⁵ A’ ku no poloidon do mangala’ i pisangod diyolo’, om saapon ngai’ ku i sumaap diyolo’. ¹⁶ Tulun nopo dit araatan doho’ om poinsiribaon ku indo, om mompus-ompus o hukuman diyolo’. ¹⁷ Nga’ iyokoyu nopo i tulun ku om paakanon ku indo do gandum dit osonong kopio, om popimbangaton ku iyokoyu do paha’ do mantad hilo’d gouton,’’ ka dau.

¹ Sinding di Asap. Kinorohingan no o boyoon di pitimungan dit ongosundu do hilo’d surga, id pitimungan noddi do pinoboros dau i natantu’ dau, do poingkaa, ² ’’Kada’ pomutus do tulun dot a’ otulid o pomumutus, om kada’ obiai i tulun dot araat. ³ Obiai no i tulun do mosikin om i tangaanak dit aiso’ o molohing, wonsoyo’ no it otulid dot id tulun di mosikin om id tulun dit aiso’ o pokukurayan. ⁴ Poiduwo’ no iyolo’ do mantad id kuasa’ di tulun dot araat. ⁵ Aiso’ no kopio o toila-ilaan dokoyu, basug kou no kopio, naraag no kopio o kowoyo-woyoon dokoyu, om natanus no it otulid do hiti’d pomogunan. ⁶ Nokosunud ku no dot iyokoyu nopo om kinorohingan, om oinsanan kou nopo do tangaanak do Kinorohingan dit Osundu Kopio. ⁷ Nga’ apatai kou i’ do miagal do tulun, om haro o kooyion do tumur dokoyu do miagal do pointikid-tikid di tulun di kipangkat,’’ ka. ⁸ Oi Kinorohingan, rikot no om porintao’ no iti pomogunan, tu’ koinsanai do bansa’ nga’ iya’ ngai’ i’ o sanganu.

¹ Sinding di Asap: sinding. ² Oi Kinorohingan, kada’ undorong tomod dot a’ mungkomi-komi, kada’ undorong tomod do momigapus nopo. ³ Intong pogi’, nga’ sumaap no moti’ diya’ ilo pisangod nu, om sumaap no ngai’ it angaraatan diya’. ⁴ Mogiupakat no iyolo’ do sumaap do tulun nu, om mogiboro-boros iyolo’ do sumaap di tulun dit intirungan nu. ⁵ Boros ka diyolo’, ’’Kainou maai toko’ punsoo’ o bansa’ diyolo’, om olihuan i’ ot Israil do gisom dot alaid,’’ ka. ⁶ Iso-iso’ nopo o ginawo di bansa’ do mogisokodung, om mogiuhup do sumaap diya’. ⁷ I bansa’d tulun dot Idom om bansa’d Ismail, om i bansa’d Muab om i bansa’d Hagar. ⁸ Om i bansa’d Gibal, om i bansa’d Amon om i bansa’d Amalik, om i bansa’d Pilistia om i bansa’d Tirus. ⁹ Om i bansa’d Asur nga’ minuhup nogi’ diyolo’, minogisosompuru iyolo’ do minuhup di sinompuruan do sinakagon di Lut. ¹⁰ Wonsoyo’ no dot id diyolo’ o miagal di winonsoi nu dot id tulun do Midian, om id di Sisira om id di Yabin di hilo’d Bawang do Kison. ¹¹ Naala’ nu iyolo’ do hilo’d Indor, om nangapasa’ o rata’ diyolo’ do hiri’d tana’. ¹² Wonsoyo’ no dot id boyoon diyolo’ o miagal di winonsoi nu dot id di Orib om i Siib, alao’ ngai’ no i woyo-woyoon diyolo’ do miagal di winonsoi nu dot id di Siba om id di Salmuna, ¹³ i minoro-boros do poingkaa, ’’Solodon nondo dahai i tana’ do dong Kinorohingan,’’ ka. ¹⁴ Oi Kinorohingan, potiaso’ no iyolo’ do miagal do pupuk, om miagal di sakot do nokoring do tilibon do ribut. ¹⁵ Poingkuro nopo i tapui do monorob do gouton, om i tapui do monorob di hilo’d konulu-nuluan, ¹⁶ om gusao’ no iyolo’ di tongus nu dot opuhod, om tompurolosio’ no iyolo’ di tongus nu di koronob o kopuhodo’. ¹⁷ Tingayamo’ no iyolo’, oi TUHAN, om okunon i’ diyolo’ do kisinundu ko. ¹⁸ Aala’ po daa iyolo’ om orolosi po daa do gisom dot alaid, angapatai po daa iyolo’ dot id suang do kointingayaman. ¹⁹ Maha’ daa om oilaan diyolo’ dot iya’ noo o TUHAN, it Asawat Kopio, i pomorinta’ dot id sawat kopio do pointongkop diti pomogunan.

¹ Maan di boyoon do modsisinding. Tumanud do lagu’ do: Gitit. Sinding di pinuruan do sompiiyon di Kora. ² Oi Kinorohingan, it Osundu Kopio, asanangan oku no kopio di Walai nu. ³ Asanangan oku no kopio do hilo’ oku; orohian oku no kopio do poinsuang di Walai nu. Aayi-ayi’ no ginawo ku dot ooropod do modsinding dot id Kinorohingan di poimpasi. ⁴ Iri piya pirit nga’ haro i’ o rumun, om kolumpisau nga’ haro i’ o tulion diyolo’. Pinoiyon diyolo’ i tangaanak diyolo’ do hiri’d toning di pananaraban do porsombahan nu, oi TUHAN it Osundu Kopio, i raja’ ku om Kinorohingan ku. ⁵ Olumaag no i tulun di poundorong dot id suang do Walai nu, i modsinding kasai’ do mamarayou diya’. ⁶ Olumaag no i tulun di nakaanu do kokorisan do mantad id diya’, om it orohian kopio do mongoi do hiri’d walai nu do hilo’d Nuluhon do Sion. ⁷ Tontok di tumalib iyolo’ di rantai do Baka dit otuu kopio, om sumiliu nopori do kinoiyonon di kitudan do waig, om i rasam di donglumahanggang o roun do kayu o koponu’ di botung-botung. Om iri no o barakat do TUHAN. ⁸ Om muhang-ruhang o kokoriso’ diyolo’ di maso diyolo’ do manau-panau do kumaa do hilo’d Sion do mongoi timbaba’ do Kinorohingan it id sawat do koinsanai’d ponokokinorohingan. ⁹ Oi TUHAN, i Kinorohingan dit Osundu Kopio, pokinongou no do sambayang ku, oi Kinorohingan di Yakub, pokinongou no. ¹⁰ Oi Kinorohingan, barakatai no i raja’ dahai, i raja’ di pinili’ nu. ¹¹ Angasangadau nopo do hiri’d suang do Walai nu nga’ osonong no kopio ko’ mantad do soribu o tadau dot id kinoiyonon do suwai. Uhang ku nod poingkakat do hiri’d wawayaan do Walai’d Kinorohingan ku, ko’ mantad do poingiyon do hiri’d walai do tulun dot angaraat. ¹² TUHAN no o gompomogompi’ om raja’ toko’ di kikagayaan, i manahak dati’ do kosonongo’ om kosuahan. Patahakon kasai’ id TUHAN it ongosonong dot id tulun di mingwonsoi do korohian dau. ¹³ Olumaag no i tulun di mogondos diya’, oi Kinorohingan it Osundu Kopio.

¹ Maan di boyoon do modsisinding. Sinding di pinuruan do sompiiyon di Kora. ² Oi TUHAN, nosianan ko i’ di pomogunan nu, tu’ pinakaya’ nu kawagu o tulun dot Israil. ³ Nompunan nu o dusa do tulun nu, om nompunan nu o koinsanai do kasalaan diyolo’. ⁴ A’ ko noddi otogod diyolo’, om a’ nu pinorikot dot id diyolo’ i kototogod nu dit a’ ogina-gina’. ⁵ Pogulio’ no iyahai, oi Kinorohingan i gampamasi dahai, om tingkod no do tumogod dahai. ⁶ Potilombuson nu no toi kopio ino kototogod nu dahai? A’ nu no nangku kopio posogi-sogiton ino ginawo nu? ⁷ Pokoriso’ no iyahai kawagu, om mamarayou indo iyahai diya’, iyahai i tulun nu. ⁸ Pointalango’ no dot id dahai i kosianan nu dit aiso’ o kotingkadan oi TUHAN, om posio’ no iyahai. ⁹ Mokinongou oku do poboroson do TUHAN, i Kinorohingan, pinapabatos iyau do piuludan dot id dati’, i tulun di kosianan dau, ondung tumongkiad toko’ no di dusa toko’. ¹⁰ Atantu’ no do posodia’ i’ iyau do mamasi di tulun di momusou dau, om mundorong indo i Kinorohingan di kikagayaan do hiti’d pomogunan toko’. ¹¹ Kopisolowot nondo o kosianan om kotorodoko’, om kopigapus o piuludan om it otulid. ¹² Om korikot nondo do hilo’d sawat o kotorodoko’ di tulun do mantad hiti’d pomogunan, om lumuung o kotulido’ do Kinorohingan do mantad hilo’d tawan. ¹³ Om pakayaon toko’ nondod TUHAN, ogumu’ nondo om osonong o hasil do tana’ toko’. ¹⁴ Mogulu nondod TUHAN it otulid, do mamarantis do wayaan dau.

¹ Sambayang di Daud. Oi TUHAN, pokinongoho’ no o sambayang ku, om simbaro’ oku no, tu’ oluhoi oku no om aiso’ no o pokukurayan ku. ² Poiduwo’ oku no do mantad id kapatayon, tu’ mogondos oku i’ diya’. Gompio’ oku no tu’ iyoho’ nopo om susuhuon nu i’, om osianan oku diya’. ³ Iya’ no o Kinorohingan ku, om insianai oku no, monongodou-ngodou oku i’ do sumambayang dot id diya’. ⁴ Potoodo’ no o susuhuon nu oi TUHAN, tu’ id diya’ no o korikoton do sambayang ku. ⁵ Osonong ko i’ dot id dahai om mangampun ko, om osianan ko i’ kasai’ do koinsanai di tulun di sumambayang dot id diya’. ⁶ Pokinongou no diti sambayang ku, oi TUHAN, pokinongoho’ no iti tihad ku do mokitulung. ⁷ Minglohou oku diya’ do tontok dot osusa’ oku, tu’ sumimbar ko i’ do sambayang ku. ⁸ Aiso’ no o kinorohingan do miagal diya’, oi TUHAN, aiso’ i’ o tiso’ do nokopomonsoi do miagal di nongowonsoi nu. ⁹ Oinsanan nopondo i bansa’ do winonsoi nu do rumikot do mongoi tuku’ dot id diya’, om royohon nondo diyolo’ o kobontugo’ nu. ¹⁰ Iya’ no it okoris om i mingwonsoi do kongopusahan, iya’ noo o Kinorohingan. ¹¹ Tudukai oku no do korohian nu do wonsoyon ku, oi TUHAN, om otorodok oku indo do mumboyo’ diya’, tudukai oku no do momonsoi do karaja’ nu do mikuwo’d aayi-ayi’ o ginawo ku. ¹² Om aayi-ayi’ indo o ginawo ku do mamarayou diya’, oi TUHAN i Kinorohingan ku, om popinsusuyon ku indo i kogoyoo’ nu do gisom dot alaid. ¹³ A’ no ogina-gina’ o kogoyoo’ do kosianan nu dit aiso’ o kopupuson dot id doho’. Tu’ pinoidu’ oku i’ diya’ do mantad hiri’d lobong. ¹⁴ Oi Kinorohingan, rumikot no i tulun dot ongoondos do mongoi saap doho’, haro o sonsinompuruan do tulun dit ongorongit, do mumbal daa do mongoi pamatai doho’, iri no i tulun dit a’ mamadul diya’. ¹⁵ Nga’ iya’ no oi TUHAN, i Kinorohingan dit obingupus om obinsianan, om it alanut o ginawo om otorodok kasai’ om opuhawang. ¹⁶ Koiliono’ oku no om insianai oku no, pokoriso’ oku no om posio’ oku no, tu’ momonsoi oku i’ do karaja’ nu do miagal di tina’ ku di gulu po. ¹⁷ Pointalango’ no kopio o kosianan nu dot id doho’, oi TUHAN, om ointingayam indo i tulun dit araatan doho’, do kokito iyolo’ do noinsasamadan oku diya’ om tinulung oku diya’.

¹ Sinding do pinuruan do sompiiyon di Kora. Sinding. Winonsoi do Kinorohingan i bandar dau do hilo’d timpak do nuluhon dit olidang. ² Kosianan no kopio dau i bandar do Yorusalim, do mantad ko’ i bandar do suwai do hilo’d Israil. ³ Oi bandar do Kinorohingan, pokinongou no, do koinsanai di boros dau dot ongosonong tomod do pasal diya’, ⁴ ’’Tontok nopo dot intobon ngai’ ku i bansa’ di mumboyo’ doho’, om pohompiton ku nondo diyolo’ o Masir om Babil; om pohompiton ku nogi’ i tulun do Yorusalim, i tulun do Pilistin, om Tirus, om Etiopia,’’ ka. ⁵ Om pasal nod Nuluhon do Sion om roitan nondo iri do kasanganu o koinsanai’d bansa’, om Kinorohingan it Osundu Kopio o popogirot dau. ⁶ Tulison nopondod Kinorohingan o ngaran do tulun dau, om pohompiton ngai’ nopondo dau i bansa’d suwai do tulun mantad do Yorusalim, i bandar dau. ⁷ Mintari’ nondo iyolo’ om modsinding do poingkaa, ’’Hiti nod Sion o tadon do koinsanai’d barakat toko’,’’ ka.

¹ Sinding. Sinding di pinuruan do sompiiyon di Kora. Maan di boyoon do modsisinding. Tumanud di lagu’ do Mahalat-Lianot. Sinding do ponudukan di Himan, i tulun dot Israhi. ² Oi TUHAN, i Kinorohingan ku om i gampamasi doho’, monongodou oku nopo do minglohou diya’, om dongotuong no om rumikot oku dot id toguang nu. ³ Pokinongou no do sambayang ku, pokinongoho’ no o lolohou ku do mokitulung. ⁴ Ogumu’ no kopio o kosusaan do nokorikot dot id doho’, gisom dot oruhai oku no dot apatai. ⁵ Miagal oku po di tulun di motingkapatai no, aiso’ no o kokorisan ku. ⁶ Pinataam oku dot id pogialatan do tulun di nangapatai, do miagal poddi tulun di pinatai di songinlii dot id suang do lobong diyolo’, i laid nu no kolihuwai, om it a’ nu no milo do tulungon. ⁷ Pinataam oku diya’ dot id lobong dit aralom, id suang di luang dit aralom om otuong kopio. ⁸ Awagat no kopio i kototogod nu doho’, nomumuk oku po do norotuan di kototogod nu. ⁹ Pinotongkiad ngai’ nu doho’ o tambalut ku, gisom do karaatan oku’ddi diyolo’. Noturungku’ oku no om a’ oku no milo do mogidu’, ¹⁰ om ohour po ot okito ku tu’ oinggorit oku no kopio. Oi TUHAN, monikid tadau oku nopo do minglohou diya’, do mikuwo’d poinsawat do longon ku do sumambayang dot id diya’. ¹¹ Momonsoi ko po toi do kongopusahan dot id tulun di napatai? Tumungag po toi do mamarayou diya’ i tulun di songillobong? ¹² Popinsusuyon po toi do tulun di songillobong o kosianan nu, ko’ popinsusuyon po toi o kotorodoko’ nu do hilo’d kinoiyonon do kapatayon? ¹³ Okito po toi o kongopusahan nu do hilo’d nokoiyonon dot otuong, om okito po toi o kosonongo’ nu do hilo’d pomogunan di nolihuan no? ¹⁴ Oi TUHAN, minglohou oku do mokitulung diya’, monikid kosuabon oku nopo do sumambayang dot id diya’. ¹⁵ Nokuro tu’ iyadaan oku diya’, oi TUHAN? Nokuro tu’ tolikudan oku diya’? ¹⁶ Mantad poddi tokoro’ oku po om oinggorit oku no, om motingkapatai oku i’ daa, olomok oku no dot awagatan di pomohukum nu doho’. ¹⁷ A’ no ogina-gina’ o kawagato’ do kototogod nu do koonsit doho’, iri i pomohukum nu dot adalaan kopio o kapatai doho’. ¹⁸ Monongodou-ngodou nopo iyolo’ do monurungku’ doho’ do miagal poddi luyud, om insan-insan nopo iyolo’ do tumutuk doho’. ¹⁹ Pinotongkiad nu i’ doho’ i tambalut kopio ku, om iri poddi totuong o tambalut ku.

¹ Sinding do ponudukan di Itan, i tulun dot Israhi. ² Oi TUHAN, modsinding kasai’ oku nopondo do mamarayou do kosianan nu dit aiso’ o kotingkadan, om popinsusuyon ku nondo i kosianan nu do gisom dot alaid. ³ Oilaan ku do kosianan nu nopo om aiso’ i’ o kopupuson, om kotorodoko’ nu nga’ miagal i’ do tawan kogirot. ⁴ Boros ka nu, ’’Nokopomonsoi oku no do tumpongo dot id tulun di nopili’ ku, nabatasan mantad ku no do mikuwo’d sumpa’ i Daud, i susuhuon ku. ⁵ Boros kangku, ’Haro nondo kasai’ o songulun di sinakagon nu dot osiliu do raja’, om gompion kasai’ ku i’ o pomorintaan nu do gisom dot alaid,’ ka,’’ ka. ⁶ Oinsanan nopo i poingiyon do hilo’ do modsinding do mamarayou di nongowonsoi nu di kongoimayaan kopio, om modsinding do pasal di kotorodoko’ nu, oi TUHAN. ⁷ Aiso’ no o koiyo diya’ do hilo’d surga, oi TUHAN, aiso’ i’ o tiso’ di hino’d surga do koiyo diya’. ⁸ Suahon ko i’ do hiri’d pogititimungan dit ongolidang, om motud ngai’ nopo iyolo’ dot id toguang nu do momusou diya’. ⁹ Oi TUHAN, i Kinorohingan dit Osundu Kopio, aiso’ no o koiyo diya’ kosundu, om otorodok ko dot id suang do nunu nopo, oi TUHAN. ¹⁰ Iya’ no i kikuasa’ dot id sawat dilo rahat dot agayo, om otingkod nu i’ i tumbak dit opuhod. ¹¹ Minumuk nu i Rahab i naga’ do rahat, om pinatai nu, naala’ nu di kokoriso’ nu dit a’ ogina-gina’ i pisangod nu. ¹² Sanganu nopodti pomogunan om iya’ i’, om ilo tawan nga’ diya’ i’, iya’ i’ o minomonsoi diti pomogunan om koinsanai di hiti’d suang diti pomogunan. ¹³ Winonsoi nu ot utara om salatan, podsindingan ko do Nuluhon do Tabor om Nuluhon do Hormon tu’ atataadan no iyolo’. ¹⁴ Agayo no kopio o kuasa’ nu, om a’ ogina-gina’ o kokoriso’ nu. ¹⁵ Pomorintaan nu nopo om poingimpou do katapatan om it otulid, kointalang kasai’ nopo o kosianan om kotorodoko’ dot id suang do koinsanai’d wonsoyon nu. ¹⁶ Otood no kopio o tulun di sumambayang dot id diya’ do mikuwo’d modsinding, om i poimpasi dot id suang do tanawau do kosonongo’ nu. ¹⁷ Iya’ no o kaarapadan diyolo’ do tikoompus do tadau, om royohon ko diyolo’ dot i kosonongo’ nu o kapamarayahan. ¹⁸ Nonuan nu iyahai do kinamanangan dit agayo kopio, pinamanang nu iyahai tu’ osonong ko i’. ¹⁹ Iya’ no i minomili’ dot intirungon dahai, oi TUHAN, iya’ no i Kinorohingan dot Israil, i Kinorohingan dit Olidang Kopio, o minanahak dahai di raja’ dahai. ²⁰ Id suang nopo dot iso’ o pinokitanan nu di gulu po om minoro-boros ko dot id susuhuon nu dit otorodok do poingkaa, ’’Nouhupan ku no o soudor dit abantug kopio, om nakatahak ku nogi’ o tirikohonon do raja’ dot id songulun di nopili’ ku do mantad id pogialatan di tulun ku. ²¹ Nosiliu ku nod raja’ i Daud, i susuhuon ku, tu’ notuntugan ku no iyau di tumau ku. ²² Om mongintirung kasai’ nondo dau i kokorison ku, om iri sinundu ku o pokoris kasai’ dau. ²³ A’ nondo iyau otorian di pisangod dau, om a’ iyau aala’ di tulun dot araat. ²⁴ Raagon ngai’ ku nopondo i sumaap dau, om patayon ngai’ ku o tulun dit araatan dau. ²⁵ Osianan oku indo om otorodok kasai’ oku dot id dau, om pamanangon kasai’ ku iyau. ²⁶ Paraladon ku nondo o pomorintaan dau do mantad pod hilo’d Rahat do Tanga’ om gisom do korikot do hilo’d Bawang dot Iprat. ²⁷ Momoros nondo iyau dot id doho’ do poingkaa, ’Iya’ no o tapa’ ku om Kinorohingan ku, iya’ no o mongintirung doho’ om gampamasi doho’,’ ka. ²⁸ Silihon ku nondo iyau do tanak ku’d kusai dit id gulu, om raja’ dit abantug kopio. ²⁹ Bayaanon kasai’ ku nopondo i pinabatos ku dau, om i tumpongo ku dot id dau nga’ poinggirot kasai’ i’ do gisom dot alaid. ³⁰ Haro kasai’ nondo o songulun di sinakagon dau dot osiliu’d raja’, do solinaid do haro o tawan. ³¹ Nga’ ondung a’ tumanud dot oturan ku i sinakagon dau om a’ no momonsoi do miontok di ponuhuan ku, ³² om a’ diyolo’ podulon i tisuhu’ ku, om a’ diyolo’ tonudon i potudukon ku, ³³ om hukuman ku no iyolo’ dot i dusa diyolo’ o kopomohukuman, om pologoson ku iyolo’ dot oinggorit dot i kinasalaan diyolo’ o koponginggoritan. ³⁴ Nga’ potilombuson ku i’ o kosianan ku dot id di Daud, om bayaanon ku i pinabatos ku dot id dau. ³⁵ A’ ku i’ pututon i tumpongo ku dot id dau, om iso’ po di pinabatos ku dot id dau nga’ aiso’ i’ ot a’ ku sulungon. ³⁶ Insan oku no pamatos do mikuwo’d sumpa’, om insan-insan no do gisom do poingompus, dot id suang do ngaran ku dit olidang, poingkuro piya nga’ a’ oku no kopio mongudut dot id di Daud. ³⁷ Haro kasai’ nopondo o sinakagon dau dot osiliu’d raja’, om gompion kasai’ ku o pomorintaan dau do solinaid po do kitinitiu ilo tadau. ³⁸ Pomorintaan nopondo dau om ogirot i’ do gisom dot alaid do miagal dilo tulan, om ilo’ no tulan o sasi’ dot otorodok do hilo’d tawan,’’ ka. ³⁹ Nga’ tinogod nu i raja’ di nopili’ nu, tinongkiadan nu iyau om niadaan nu. ⁴⁰ A’ nu sinulung i tumpongo nu dot id susuhuon nu, om pinataam nu i tupi’ dau do don raja’ do hilo’d burutak. ⁴¹ Rinaag nu i tolig do bandar dau, om pinologos nu do nohiyas i kuta’ do padtamangan dau. ⁴² Mongoi ngai’ nopo panakau di dapu’ dau i tulun do kawaya’, om oinsanan nopo i songkoduwo dau do mongirak-irak dau. ⁴³ Nonuan nu do kamanangan i pisangod dau, om pinotood ngai’ nu iyolo’. ⁴⁴ Pinologos nu dot aiso’ o noontok-ontok di rapo-rapo dau, om pinologos nu iyau do naala’ dot id pisangadan. ⁴⁵ Nongoi nu i kuasa’ dau do don raja’, om pinataam nu i tupi’ dau do don raja’ do hiri’d tana’. ⁴⁶ Pinoruhai nu iyau do luminohing dot a’ po orikot o kolohing-lohingan, om nintingayam nu kopio iyau. ⁴⁷ Oi TUHAN, songkuro po o koloido’ nu do lumisok? Songkuro po o koloido’ do kototogod nu do rumakit do miagal do tapui? ⁴⁸ Soroho’ no do tumur ku nopo om oniba’ i’ kopio, om soroho’ no do pinomonsoi nu nopo dahai om tulun i toomod tu’ haro i’ o kapatayon. ⁴⁹ Haro toi o tulun dot a’ apatai? Poingkukuro po daa o tulun do mongilag om a’ i’ koguli’ kawagu dot id tana’? ⁵⁰ Oi TUHAN, hinonggo no i kosianan nu di gulu po, hinonggo ngai’ no i tumpongo nu dot id di Daud? ⁵¹ Kada’ nogi’ kolihuwai, ondung poingkuro oku iyoho’ i susuhuon nu do numaan indaraato’, om ondung okuro-kuro oku po do minamabo do pongindaraat di bansa’d suwai. ⁵² Pingindaraaton do pisangod nu i raja’ do pinili’ nu, oi TUHAN, hinonggo nopo o ngoyon dau nga’ hilo’ no iyau do pingindaraatan diyolo’. ⁵³ Royoho’ toko’ no o TUHAN do gisom do poingompus. Owonsoi po daa o miagal diri! Amin!

¹ Sambayang di Musa, i susuhuon do Kinorohingan. Oi TUHAN, iya’ mantad no o nosiliu dot intirungon dahai, do mantad di gulu po om gisom do mogisolusuk-lusuk. ² Tontok dit a’ nu po nowonsoi ilo nulu-nulu, om dit a’ nu po nowonsoi iti pomogunan, om Kinorohingan mantad ko no di poingompus, it aiso’ o nimpuun om aiso’ o kopupuson. ³ Sunudan nu o tulun do gumuli’ kawagu dot id tana’, om sumiliu do pupuk do miagal di timpuun i’. ⁴ Soribu nopo o toun nga’ miagal nod sangadau dot id pongintaban nu, miagal noddi konihab, tu’ nakatalib no, miagal noddi madtatamong do dongotuong tu’ oruhai po om sowolian no. ⁵ Tanggayan nu iyahai do miagal po dot atanggayan do luyud, miagal no iyahai di nipi tu’ oruhai do katalib. Miagal no iyahai di sakot tu’ kalambing nopo do dongkosuabon, ⁶ om sumuni no om mongusak nondo, nga’ olubok no om oriou dot orikot o dongsosodopon. ⁷ Angapatai iyahai do kototogod nu, om ongooris iyahai dino korongito’ nu. ⁸ Pinointalang nu i dusa dahai dot id toguang nu, i dusa di linisok dahai nga’ kointalang ngai’ nopo dot id dokito nu. ⁹ Koiniba’ o tumur dahai do gama’ di kototogod nu, miagal no di pinuhobo do kohobo o koposion dahai do tumalib. ¹⁰ Turu’ no nohopod o toun dahai om apatai no iyahai, nga’ ongokoris nopo iyahai, om korikot id walu’ nohopod o toun dahai. Nga’ opurimanan nopo dahai om kosusaan no om katangaban, oruuhai dot aayi’ o tumur dahai om a’ nondo iyahai hino. ¹¹ Isai noo o nokopuriman do kawagato’ do kototogod nu? Isai noo o koilo ondung okuro-kuro poo o kootuson do tumogod ko? ¹² Popurimono’ no iyahai do tumur nopo dahai om oniba’ i’, om milo i’ iyahai do momusorou. ¹³ Songkuro po koloido’ dot iyo kasai’dti o kototogod nu, oi TUHAN? Kosianai nod susuhuon nu. ¹⁴ Ponuo’ no iyahai di kosianan nu it aiso’ o kopupuson do pointikid do kosuabon, om milo indo iyahai do modsinding do mikuwo’d ongooropod do gisom dot ikapatai dahai. ¹⁵ Onuwai no iyahai do kosimbayanan dot irad di katangaban do tinahak nu dahai di gulu, tu’ haro i’ o piro-piro o toun dahai do tumongob di gulu po. ¹⁶ Pointongo’ no iyahai, i susuhuon nu, di wonsoyon nu di kongoimayaan kopio, pologoso’ no do kongokito o sinakagon dahai di kogoyoo’ do sinundu nu. ¹⁷ Oi Kinorohingan, i TUHAN dahai, pologoso’ no i barakat nu do moyo-woyo’ kasai’ dahai. Poundaro’ no kasai’ iyahai dot id suang do nunu nopo o wonsoyon dahai.

¹ Isai nopo i mokiintirung do TUHAN, it Osundu Kopio, ² om milo no do moro-boros dot id dau do poingkaa, ’’Iya’ no i mogobi’ doho’ om it intirungon ku. Iya’ no o Kinorohingan ku, i pagandasan ku,’’ ka. ³ Intirungan ko i’ dau do mantad id koligagaanan di songinlisok, om mantad id koinsanai do toruol di mogoit dot id kapatayon. ⁴ Likupan ko i’ dau di talad dau, om aiso’ indo o koligagaanan nu do pointirung dau, tu’ iri no i kotorodoko’ dau o moningolig om mongintirung diya’. ⁵ A’ ko no minog do moddosi di koligagaanan do dongotuong, ko’ i po monigowo do sumaap do dangadau, ⁶ ko’ iri po toruol do mogkoroliu di rumikot do dongotuong, ko’ i po toruol do mamatai do dongkosuabon. ⁷ Haro i’ doti’ o soribu o tulun dot ahaba’ do hiri’d toning nu, om hopod noribu o tulun do posorili’ diya’, nga’ iya’ nopo om a’ i’ orualan. ⁸ Kokito ko nondo om osorisid kopio nu, ondung poingkukuro o pomohukum di tulun dot araat. ⁹ Nosiliu nu no do mogobi’ diya’, o TUHAN, om it Asawat Kopio o mongintirung diya’. ¹⁰ Om a’ ko noddi oontok do kosusaan, om a’ orikatan do kororongit o walai nu. ¹¹ Suhuon indo do Kinorohingan i moloikat dau do madtamong diya’ om momogompi’ diya’ do hinonggo nopo o tongoyon nu. ¹² Kahangan ko indo diyolo’, om a’ i’ otogu’ di watu o lapap nu. ¹³ Pingulakan nu indo o singa om tulanut, om i singa dit orongit om tulanut di kapatai o tindukon. ¹⁴ Boros kad Kinorohingan, ’’Posion ku indo i tulun dit ongosianan doho’, om intirungan ku i mangakun do TUHAN oku. ¹⁵ Soira’ nopo do minglohou iyolo’ doho’, om simbaron ku i’, om tontok dot osusa’ iyolo’, nga’ tulungon ku i’ iyolo’. Posion ku i’ iyolo’ om pusohon ku. ¹⁶ Somulian ku indo iyolo’ do tumur dit otogui, om posion ku iyolo’,’’ ka dau.

¹ Sinding do Tontok do Tadau’d Sabat. ² A’ no ogina-gina’ o kosonongo’ do mongunsikou diya’, oi TUHAN, do mikuwo’d modsinding do pomusou do Kinorohingan, it Asawat Kopio. ³ Om monikid kosuabon do popinsusui do kosianan nu dit a’ opupusan, om monikid tuong do poposusui do kotorodoko’ nu, ⁴ do miompot do tuni do gitar di hopod o loting, om ompoton do gambus om kecapi. ⁵ Poposonong do ginawo ku i nongowonsoi nu, oi TUHAN, i kongopusahan kopio. Iri no i nongowonsoi nu o kopodsindingan ku do mikuwo’d ooropod kopio. ⁶ Agayo no kopio i nongowonsoi nu, oi TUHAN. Pomusorou nu nga’ aralom no kopio! ⁷ Iri no it a’ oilaan do tulun do basug, om it a’ osuhutan do tulun dot aiso’ o toila-ilaan. ⁸ Sumuni i’ doti’ daa do miagal do sakot dit orombung i tulun dot araat, om kumaya’ i’ doti’ daa i tulun do mingwonsoi dit angaraat, nga’ oinsanan indo iyolo’ dot apatai, ⁹ tu’ iya’ no, it id sawat kopio, oi TUHAN, do gisom dot alaid. ¹⁰ Oilaan i’ dahai dot apatai ngai’ nondo i pisangod nu, om angaala’ ngai’ i tulun dot araat. ¹¹ Pinokoris oku diya’ do miagal di sapi’ do lalang, om binarakatan oku diya’ do kataadan. ¹² Nokokito oku no di pisangod ku do nangaala’, om norongou ku do songihad-ihad ngai’ i tulun dit angaraat. ¹³ Iri nopo tulun dit ongotopot om rumombung indo do miagal do guas do kurma, om osonong o sunion diyolo’ do miagal di guas dot aras do hilo’d Libanon. ¹⁴ Miagal iyolo’ di kayu di tinanom do hiri’d Walai’d TUHAN, tu’ rumombung tomod do hiri’d Walai’d Kinorohingan toko’, ¹⁵ tu’ mongua’ kasai’ po do nakalaid piya, om otomou kasai’ o roun om ogirot o guas. ¹⁶ Iti no o koilaan dot otulid i’ o TUHAN, om aiso’ o kasalaan dau, i mogobi’ doho’.

¹ TUHAN no o raja’ dit abantug om okoris. Nokogirot no kopio o pinopoiyon diti pomogunan, om a’ no milo do guyuon. ² Tirikohonon nu nopo, oi TUHAN om ogirot mantad no, do mantad di timpuun i’, om hino mantad ko no, om hino kasai’ do gisom do poingompus. ³ Oi TUHAN, popuhodon tomod dilo rahat dot aralom o ngorod dau, mahas-kahas po o tumbak dot ologod tomod. ⁴ Nga’ TUHAN no i momorinta’ do hilo’d surga, ot agayo o kuasa’ ko’ mantad di ngorod do rahat, om osundu ko’ mantad di tumbak do rahat. ⁵ Oturan nu nopo oi TUHAN, om aiso’ i’ o kopupuson, om walai nu nga’ olidang i’ kasai’ do gisom do poingompus.

¹ Oi TUHAN, iya’ no o Kinorohingan di momohukum, pointalango’ no o kototogod nu. ² Iya’ no o gompomutus do koinsanai’d tulun, ingkakat no om sulian i’ ilo tulun dot ongoondos do miontok di nowonsoi diyolo’. ³ Songkuro po o koloido’ dilo tulun dot angaraat dot ongotood? Songkuro po o koloido’ do rumamai iyolo’, oi TUHAN? ⁴ Songkuro po koloido’ dilo tulun dot angaraat dot ongoondos do kangaraaton diyolo’? ⁵ Monginggorit iyolo’ do tulun nu, oi TUHAN, om ulak-ulakan iyolo’ do tulun di nasanganu nu. ⁶ Mamatai iyolo’ do tongoondu’ di nongopuadan om tangaanak dit aiso’ o molohing, om patayon diyolo’ i bansa’d suwai di poingiyon do hiti’d pomogunan dahai. ⁷ Boros ka no diyolo’, ’’A’ no iyahai’d TUHAN okito, a’ i’ iyahai’d Kinorohingan dot Israil antangan,’’ ka. ⁸ Oi tulun ku, nokuro tu’ iyo kopio kou’ddi kabasug? Soira’ kou’ndo do minsingilo’d momusorou? ⁹ Kinorohingan i’ o minomonsoi do tolingo toko’, om a’ tuu daa’ndo iyau korongou? Iyau i’ o minomonsoi do mato toko’, om a’ tuu daa’ndo iyau kokito? ¹⁰ Iyau no o monuduk do koinsanai’d bansa’, om a’ tuu daa’ndo iyau momohukum diyolo’? Iyau no o nosiliu’d gomponuduk do koinsanai’d tulun, om aiso’ tuu daa’ndo o dau’d toilaan? ¹¹ Ongoilaan i’ do TUHAN o pomusarahan do tulun, ongoilaan i’ dau dot aiso’ o kotutuk-tutukon do pomusarahan diyolo’. ¹² Oi TUHAN, olumaag no i tulun di tudukan nu, i tulun di tudukan nu dot oturan nu. ¹³ Onuan nu iyau do kosimbayanan do tontok do haro o kosusaan, do gisom id aratu’ i tulun dot araat do hiri’d luang. ¹⁴ A’ i’ kopio’d TUHAN iyada’ i tulun dau, a’ i’ dau tongkiadan i tulun di songonuon dau. ¹⁵ Haro indo kawagu o toturan do hilo’d pomisaraan, om sumokodung ngai’ nopoddi i tulun dit ongotulid o ginawo. ¹⁶ Isai no i miningkakat do minogobi’ doho’, do sumaap do tulun dit angaraat? Isai no i minuhup doho’ do sumaap di tulun di mingwonsoi dot araat? ¹⁷ Ondung a’ oku daa do TUHAN nuhupan, om a’ i’ daa alaid om koongoi oku no do hilo’d pomogunan do tulun di nangapatai. ¹⁸ Boros kangku, ’’Rumatu’ oku no,’’ kangku daa, nga’ pinogirot oku i’ di kosianan nu dit aiso’ o kotingkadan, oi TUHAN. ¹⁹ Soira’ nopod tumongob om tumangkabo oku, om oinsasamadan oku i’ diya’ om potoodon oku diya’. ²⁰ A’ ko i’ kopio sumokodung di gompomutus di mokisisip, i popotopot dit a’ otopot. ²¹ Om i monokiupakat do sumaap do tulun dit ongotulid o ginawo, om i momohukum do kapatayon do tulun dit aiso’ o sala’. ²² Nga’ obian oku id TUHAN, om intirungan oku’d Kinorohingan ku. ²³ Hukuman indo dau iyolo’ dot i kangaraaton diyolo’ o kopomohukuman, om patayon dau iyolo’ dot i dusa diyolo’ o kapamatayan, TUHAN i’ i Kinorohingan toko’ o mamatai diyolo’.

¹ Kainou pamarayou toko’d TUHAN, podsindingai toko’ no o Kinorohingan do mikuwo’d otood, tu’ iyau no i mongintirung dati’! ² Kainou mongoi rapou dau do mikuwo’d mongunsikou, om ongotood do modsinding do sinding do pamarayou. ³ Tu’ TUHAN nopo om Kinorohingan di kisinundu, iyau no o raja’ dit okoris kopio dot id sawat do koinsanai di ponokokinorohingan. ⁴ Iyau no o momorinta’ do pointongkop diti pomogunan, mantad po do hiri’d luang dit aralom no kopio om gisom do hiri’d nuluhon dit asawat kopio. ⁵ Iyau i’ o momorinta’ dilo rahat, i winonsoi dau, om iyau o momorinta’ di katanaan, i winorun dau. ⁶ Kainou tumuku’ do sumambayang dot id dau, kainou motud dot id toguang do TUHAN, i minomonsoi dati’. ⁷ Iyau no o Kinorohingan toko’, iyati’ no i tulun di kosianan dau. Om iyati’ i ponokodumba’ dau do pigompian dau. Pokinongou kou nod boros do dinondo, ⁸ ’’Kada’ dokoyu pokodoho’ o ginawo do miagal di taki-aki dokoyu di hilo’ iyolo’d Moriba, om miagal di hilo’ iyolo’d tana’ do kowotuan do Masa. ⁹ Hilo’ no iyolo’ do minogumbal doho’, mulong po do nongkokito iyolo’ di nongowonsoi ku dot id diyolo’. ¹⁰ Apat nohopod o toun do koloidon ku dot araatan kopio diyolo’, om boros kangku, ’Atuk, obinsurilog no kopio iti tulun ku! Tu’ a’ no kopio iyolo’ mamadul do tisuhu’ ku,’ kangku. ¹¹ Om kotogod oku noddi om boros kangku do minomopol diyolo’, ’A’ kou no kosuang di pomogunan diri i kinoiyonon di koonuan dokoyu do kosimbayanan do poinsugku’ doho’,’ kangku,’’ ka.

¹ Podsinding nod sinding do wagu dot id TUHAN! Podsinding no dot id TUHAN, oi pointongkop do pomogunan. ² Podsinding no dot id TUHAN, om royoho’ no iyau! Popinsusuyo’ no do pointikid-tikid do tadau i habar dot osonong do minamasi iyau dati’. ³ Popinsusuyo’ no o kagayaan dau dot id koinsanai’d bansa’, om i nongowonsoi dau di kongoimayaan nga’ susuyon no dot id koinsanai’d tulun. ⁴ TUHAN nopo om agayo, om apatut no do royohon kopio, iyau no ot apatut do pusohon do mantad ko’ koinsanai di ponokokinorohingan. ⁵ Ponokokinorohingan nopo do bansa’d suwai om tingolig i’ toomod, nga’ TUHAN nopo om minomonsoi do koinsanai do nunu nopo. ⁶ Iyau nopo om nolopot do kagayaan om kobontugan, om noponu’ do sinundu om kolumiso’ i Walai’d Sasambayangan dot Agayo. ⁷ Royoho’ no o TUHAN, oi koinsanai’d bansa’ do hiti’d pomogunan, royoho’ no i kagayaan om kokoriso’ dau. ⁸ Royoho’ no o ngaran do TUHAN di kikagayaan, pongigit no do porsombahan om suang no dot id Walai dau. ⁹ Tuku’ no dot id toguang do TUHAN, mikuwo’d manampakai do pakayan do sumambayang, rikot no dot id dau do mikuwo’d momusou kopio dau, oi pointongkop diti tana’. ¹⁰ Poboroso’ no dot id koinsanai’d bansa’ o poingkaa, ’’TUHAN no o Raja’! Nokogirot tomod o pinopowonsoi dau diti pomogunan, om a’ no milo’d guyuon, om otulid nondo o pomumutus dau do koinsanai’d bansa’,’’ kanto. ¹¹ Kongooropod kou no, oi tana’ om tawan! Ngorod no, oi rahat om koinsanai di kipinuhobo dot id suang nu. ¹² Kongooropod no, oi talun om koinsanai di songinsuni do hino, pamangkis kou no dot atataadan, oi kokoyuan do hilo’d puru’. ¹³ Tu’ rumikot no o TUHAN do mongoi pomorinta’ diti pomogunan, mikuwo’d otulid o pomumutus do koinsanai’d bansa’.

¹ TUHAN no o raja’! Kooropod no oi pomogunan, kongooropod kou no oi pulou do hilo’d rahat. ² Nosorili’ iyau do haun om pituongon, pomorintaan nopo dau om pinoimpou do toturan om it otulid. ³ Tapui ot id gulu dau, do monorob do koinsanai di pisangod di posorili’ dau. ⁴ Kotitiu diti pomogunan i kodumaat dau, om gagaran po iti tana’ do kokito’ddi. ⁵ Lumanak do miagal do rilin i konulu-nuluan dot id toguang do TUHAN, i pomorinta’ do koinsanai’d pomogunan. ⁶ Popinsusui ilo tawan do kotulido’ dau, om oinsanan nopo o bansa’ do kokito do kagayaan dau. ⁷ Koinsanai do tulun di tumuku’ dot id tingolig om ointingayam no, i tulun di mokirayou-rayou dot i tingolig diyolo’ o kopokirayahan, tu’ koinsanai di tingolig nga’ tumuku’ i’ dot id toguang do TUHAN. ⁸ Ongotood ngai’ nopo i tulun do Sion, om rumamai ngai’ i bandar do hilo’d Yohuda, tontok di korongou di pomumutus nu, oi TUHAN. ⁹ Oi TUHAN, it Asawat Kopio, iya’ no o pomorinta’ do pointongkop diti tana’, iya’ no it agayo ko’ mantad do koinsanai do ponokokinorohingan. ¹⁰ Osianan i’ o TUHAN do koinsanai di tulun dit araatan do karaaton, om tingoligan dau o koinsanai’d tulun dau, om poiduwon dau iyolo’ do mantad id kuasa’ do tulun dit araat. ¹¹ Poulinau kasai’ i’ o tinitiu dot id tulun dit ongotopot, om haro o kaarapadan do tulun dit osonong. ¹² Oi tulun dit ongotulid o ginawo, kongooropod ngai’ kou no, dot i nongowonsoi’d TUHAN o kaarapadan, soroho’ ngai’ no i nongowonsoi’d Kinorohingan, it olidang, om pongunsikou kou no dot id dau.

¹ Sinding. Podsinding no do sinding do wagu dot id TUHAN, tu’ minomonsoi iyau di kongopusahan kopio. Mantad id kuasa’ dau om kokoriso’ dau o nakamanang-manang dau. ² Pinosunud do TUHAN i kinamanangan dau, om pinopinsusui do TUHAN i kuasa’ dau do mamasi, om pinointalang dau i kotulido’ dau dot id koinsanai’d bansa’. ³ Binayaan kopio i’ dau i tumpongo dau dot id tulun dot Israil, tu’ osianan kasai’ i’ iyau om otorodok dot id diyolo’. Koinsanai’d bansa’ do hinonggo nopo nga’ nokokito ngai’ no do kinamanangan do Kinorohingan toko’. ⁴ Oi koinsanai do pomogunan, podsinding kou no do mikuwo’d ooropod dot id TUHAN, royoho’ no dokoyu iyau do mikuwo’d sinding om pangkis dot atataadan! ⁵ Podsinding no do mamarayou’d TUHAN, kombito’ no dokoyu i kecapi. ⁶ Pounio’ no dokoyu i torumpit om i toburi’, om pamangkis kou no dot atataadan dot id TUHAN, i raja’ toko’. ⁷ Ngorod no, oi rahat om koinsanai di kipinuhobo do hino, oi tana’ podsinding no, om koinsanai di momogun do hino. ⁸ Pitapapo’ no o palad dokoyu oi kabawang-bawangan, oi konulu-nuluan pogioompot kou no do modsinding do mikuwo’d otood dot id toguang do TUHAN. ⁹ Tu’ rumikot no iyau do mongoi pomorinta’ diti pomogunan, om porintaon nondo dau i tulun do hiti’d pomogunan do mikuwo’d otulid o pomomorinta’.

¹ TUHAN no o raja’, poirikau iyau do hiri’d tirikohonon dau do momorinta’, dit id sakai di moloikat di roitan do moloikat do kerub, om gagaran ngai’ nopo o tulun dot opopoddosian, om gumuyu’ iti pomogunan. ² TUHAN no i kikuasa’ do hilo’d Sion, iyau no i momorinta’ dot id sawat kopio do koinsanai’d bansa’. ³ Oinsanan nopondo o tulun do mamarayou di ngaran dau dit abantug om kikagayaan. Iyau no it olidang kopio. ⁴ Oi raja’ do gunsiou, iya’ no it orohian do katapatan, iya’ no i pinopogirot di katapatan do hiti’d Israil, om minongigit ko dit otulid om i toturan. ⁵ Royohon no o TUHAN, i Kinorohingan toko’, otud no dot id toguang do tirikohonon dau do momorinta’, iyau no it olidang kopio! ⁶ I Musa no di Harun ot imam dau, om i Somuil no i sumasambayang dot id dau. Mininglohou iyolo’d TUHAN, om sinimbar iddi dau iyolo’. ⁷ Minoro-boros iyau diyolo’ do mantad hiri’d haun di poorigi, tinanud ngai’ diyolo’ i ponudukan om ponuhuan do pinoboros dau dot id diyolo’. ⁸ Oi TUHAN, i Kinorohingan dahai, sinimbar nu i’ i tulun nu, om pinointong nu iyolo’ dot iya’ no o Kinorohingan dit orohian do mangampun mulong piya do hinukuman nu iyolo’ dot i dusa diyolo’ o kinopomohukuman nu. ⁹ Royohon no o TUHAN i Kinorohingan toko’, om tuku’ no do sumambayang do hilo’d nuluhon dau dit olidang. Olidang i’ o TUHAN, i Kinorohingan toko’.

¹ Sinding do maan do porsombahan do kounsikahan. Oi koinsanai do pomogunan, podsinding no dot id TUHAN! ² Sambayang no dot id TUHAN do mikuwo’d otood, rikot no dot id toguang dau do mikuwo’d modsinding! ³ Kada’ no kopio kolihuwai do TUHAN nopo om Kinorohingan, iyau no i minomonsoi dati’, om iyau o sanganu dati’. Iyati’ no o tulun dau, i bansa’ di pigompian dau. ⁴ Suang no di Walai dau do mikuwo’d mongunsikou, suang no do hiri’d natad di walai do mikuwo’d mamarayou, pongunsikou no dau om royoho’ no iyau. ⁵ Osonong no kopio o TUHAN, kosianan nopo dau om aiso’ o kopupuson, om kotorodoko’ dau nga’ mompus-ompus i’.

¹ Sinding di Daud. Iti nopo sinding ku om pasal do kotorodoko’ om kotulido’, sindingon ku o sinding diti dot id diya’, oi TUHAN. ² Aiso’ indo o kabara-barasan do kowoyo-woyoon ku, soira’ ko do rumikot dot id doho’? Olidang indo o koposi-posion ku do poingiyon do hiri’d walai ku, ³ om a’ ku pologoson tomod o karaaton. Araatan oku i’ di wowonsoyon do tulun di mogidu’ do mantad id diya’, a’ oku i’ kopio orohian do monokiupakat diyolo’. ⁴ Wonsoyon ku nopo iyoho’ om otulid i’, om minsodu’ oku dit angaraat. ⁵ Patayon ku indo i tulun di lumisok-lisok do mongindaraat do tulun do suwai, om a’ oku i’ orohian di tulun dit oondos om mokirayou. ⁶ Orohian oku indo di tulun dit otorodok dot id Kinorohingan, om pologoson ku iyolo’ do mundorong do hiti’d walai ku do don raja’. Om pologoson ku indo do kumaraja’ dot id doho’ i tulun dit otopot-topot kopio dot otulid o ginawo. ⁷ Tulun nopo di goudut om a’ i’ koino-ino do miyon do hiti’d walai ku do don raja’, om aiso’ o tulun di minsorupai-rupai no do koundorong dot id toguang ku. ⁸ Monikid tadau nopondo do patayon ngai’ ku i tulun dit angaraat do hiti’d pomogunan toko’. Uyungon ngai’ ku nopo i tulun dit angaraat do mantad hiti’d bandar do TUHAN.

¹ Sambayang do songulun di haro o kosusaan, di popoboros ngai’ do kosusaan dau dot id TUHAN. ² Oi TUHAN, pokinongou nod sambayang ku, om podulo’ no iti pokionuon ku. ³ Kada’ oku tolikudai do tontok dot osusa’ oku. Pokinongoho’ oku no, om kolosu’ nod sumimbar do tontok do minglohou oku. ⁴ Miagal po di lisun do tumagak o koposi-posion ku, om tinan ku nga’ miagal pod sumorob dot id tapui. ⁵ Oluhoi oku no, miagal oku po di sakot do nokoring, om aiso’ no o kosiakanan ku. ⁶ Opuhod tomod o todoi ku, om agahui oku no, tu’ tulang ku po o mogioput-oput. ⁷ Miagal oku po di tombolog do hilo’d tana’ do kowotuan, iyo oku poddi puok do hilo’d pogun. ⁸ A’ oku no siodop, miagal oku po di tombolog dot iso-iso’ do hiri’d taap do walai. ⁹ Monongodou-ngodou nopo o pisangod ku do mongindaraat doho’, om i tulun di mongumang-umang doho’ nga’ iri po ngaran ku o maan diyolo’ do pomopol. ¹⁰ Pupuk pod tana’ o panakataakanon ku, om tinumon ku, nga’ mirolot pod romou ku, ¹¹ do gama’ di kototogod nu om i kolosuo’ do ginawo nu. Nongoi oku diya’ buntuto’ om pataamo’ oku nogiddi diya’, oi TUHAN. ¹² Koposion ku nopo om miagal po di sangai di dongsosodopon tu’ oruhai nod tumagak, miagal oku poddi sakot do nokoring. ¹³ Nga’ iya’ nopo, oi TUHAN, om raja’ i’ do gisom dot alaid, om koinsanai do sinakagon nga’ kosorou kasai’ indo diya’. ¹⁴ Mingkakat ko nondo om osianan ko do Sion, norikot no o maso do monginsian dau. ¹⁵ Ongosianan ngai’ i’ dau i susuhuon nu, mulong po do naraag iyau. Ongolisiu ngai’ i’ iyolo’ dau, mulong piya do nohiyas no iyau. ¹⁶ Oinsanan nopondo o bansa’ do moddosi do TUHAN, om oinsanan o raja’ do pomogunan do moddosi di kuasa’ dau. ¹⁷ Soira’ nopondo do poingkakaton koimbagu do TUHAN o bandar do Sion, om pointalangon nondo dau o kagayaan dau. ¹⁸ Pokinongohon nondo dau i sambayang di tulun di niduan dau, om simbaron dau o sambayang diyolo’. ¹⁹ Potuliso’ ngai’ no i nongowonsoi’d TUHAN do maan di sinakagon di sumusuhut, om mamarayou indo dau i tulun dit a’ po nopogkosusu. ²⁰ Luminuung o TUHAN do mantad hilo’d tiyonon dau dit olidang do hilo’d sawat, hilo’ iyau’d surga do luminuung diti pomogunan. ²¹ Norongou i’ dau i todoi do tulun di songinggiil, om pinalabus dau i tulun di nohukuman daa do kapatayon. ²² Om popinsusuyon nondo o ngaran dau do hilo’d Sion, om royohon iyau do hilo’d Yorusalim, ²³ tontok dot otimung ngai’ o bansa’ om pomorintaan do mongoi sambayang dot id TUHAN. ²⁴ Noidu’ nod TUHAN o kokorisan ku om omulok oku po daa, noinibaan no dau o tumur ku. ²⁵ Oi Kinorohingan, kada’ ngoyo’ o ginawo ku do baino’ poo, tu’ a’ oku po molohing. Oi TUHAN, poimpasi ko i’ do gisom do poingompus, ²⁶ winonsoi nu iti pomogunan di gulu po, om longon nu o minomonsoi dilo tawan. ²⁷ Tumagak ngai’ i’ iti nga’ iya’ nopo om hino kasai’ i’ do gisom do poingompus, koinsanai’ddi om rumomuk i’ do miagal do kain, om pataamon nu indo iri do miagal do rasuk di nagansing no, om atanus nondo ngai’ iri. ²⁸ Nga’ iya’ nopo om a’ i’ sumimban, om koposion nu nga’ aiso’ i’ o kopupuson. ²⁹ Ongosimbayan indo o tangaanak dahai do mongiyon-ngiyon, om sinakagon diyolo’ nga’ ongosonong-sonong indo tu’ intirungan nu i’.

¹ Mantad dot id di Daud. Orohian no kopio o ginawo ku do mamarayou’d TUHAN, om mamarayou’d ngaran dau dit olidang o tinan om pomusarahan ku. ² Orohian no kopio o ginawo ku do mamarayou’d TUHAN, om a’ oku kolihu do koinsanai dit osonong di nongowonsoi dau. ³ Mangampun i’ iyau do koinsanai’d dusa ku, om momolingos iyau do koinsanai’d toruol ku. ⁴ Pinoidu’ oku dau do mantad id lobong, om binarakatan oku dau do kosianan om kolisihan. ⁵ Pinonu’ dau dit ongosonong o koposi-posion ku, gisom dot omulok kasai’ oku po om okoris do miagal di kondiu. ⁶ Obian id TUHAN do momutus i tulun dit ulak-ulakan, otulid i’ o wonsoyon dau. ⁷ Sinunudan dau i Musa di wonsoyon dau dot id dabantalan, om pinoontong dau o tulun dot Israil do kinoris dau. ⁸ TUHAN nopo om obinsianan i’ om obinglisiu, alanut o ginawo dau om poimponu’ do kosianan di mompus-ompus. ⁹ A’ i’ iyau managalai-galai do tumogod, om a’ iyau mompus-ompus dot otogod. ¹⁰ A’ toko’ i’ dau hukuman do miontok di dusa toko’, om a’ toko’ dau sulian do miontok di kasalaan toko’. ¹¹ Poingkuro nopo o kasawato’ dilo tawan do mantad hiti’d tana’, om iyo noddi o kogoyoo’ do kosianan dau dot id tulun di momusou dau. ¹² Songkuro nopo o kosoduwo’ do koulayon do mantad id kotonobon, om iyo noddi o kosoduwo’ do pataaman do Kinorohingan do dusa toko’ do mantad id dati’. ¹³ Poingkuro nopo o kosianan do tapa’ dot id tangaanak dau, om iyo noddi o kosianan do TUHAN dot id tulun di momusou kopio dau. ¹⁴ Oilaan i’ dau o tadon toko’, ahandaman i’ dau do tana’ toko’ i’ toomod. ¹⁵ Koposi-posion toko’ nopo om miagal nod sakot, sumuni toko’ no om lumombut do miagal di bunga do hilo’d gouton, ¹⁶ nga’ alambayan po di ribut iri, om a’ no hino, om aiso’ no o kokito kawagu’ddi. ¹⁷ Nga’ kosianan nopod TUHAN do tulun di momusou dau, om mompus-ompus i’, om kosonongo’ dau nga’ a’ i’ opupusan do gisom do kopogilombu-lombus o sinakagon, ¹⁸ do tulun dit otorodok dot id tumpongo dau, om it otorodok do tumanud do koinsanai di ponuhuan dau. ¹⁹ Momorinta’ o TUHAN do hilo’d surga, iyau no o raja’ do koinsanai do nunu nopo. ²⁰ Pamarayou kou nod TUHAN, oi moloikat di gunsiou om i kisinundu, i mokinongou do boros dau, om otorodok do tumanud do koinsanai di ponuhuan dau. ²¹ Pamarayou kou nod TUHAN, oi koinsanai dokoyu it ongosundu do hilo’d surga, koinsanai dokoyu i susuhuon dau di mingwonsoi do korohian dau. ²² Pamarayou kou nod TUHAN, oi koinsanai dokoyu i winonsoi dau, do pointongkop di pomorintaan dau. Orohian oku no kopio do mamarayou’d TUHAN o ginawo ku om tinan ku om pomusorou ku.

¹ Orohian oku no kopio do mamarayou’d TUHAN o ginawo ku om tinan ku om pomusorou ku! Oi TUHAN i Kinorohingan ku, abantug ko no kopio! Kipinakai ko do karayahan om kagayaan, ² om kikuluput ko do tulinau. Pinoungkalad nu ilo tawan do miagal do kiim, ³ om winaal nu o walai nu do hilo’d sakai do waig di hilo’d tawan. Ponokokorita’ nu ilo haun, om mimpanau ko do poinsakai di talad do ribut. ⁴ Siniliu nu’d susuhuon nu ilo ribut, om i kodumaat o ponokoturipon nu. ⁵ Ogirot tomod o pinopoudong nu diti tana’ dot id sakai di pinoimpahan, om a’ no oguyu’ do gisom dot alaid. ⁶ Kinuluputan nu’d waig iti tana’, om nakaalit i waig di nuluhon. ⁷ Nga’ soira’ di binarasan nu i waig, om nonos noddi iri, soira’ di nokorongou iri di boros nu dot opuhod, om kohus nopori do minogidu’. ⁸ Tolibai nopo di waig i nuluhon do luminuyung do hiri’d kokubangan, om kumaa do hiri’d tiyonon di nokosodia’ nu diyolo’. ⁹ Minomonsoi ko do wolit dit a’ milo dot otolibambanan, do pangantob di waig do lumabai kawagu do tumongkop diti pomogunan. ¹⁰ Pinoluyung nu o tudan do waig do hilo’d kokubangan, om pinoluyung nu o bawang do hilo’d pogiolit-olitan do konulu-nuluan. ¹¹ Iri no o tinumon di nintorusan do hilo’d gouton, om pongurudtuu di kaladai di hilo’d gouton. ¹² Om hiri nod kayu dit id kasamakan, i tombolog do songuni-uni do momirumun. ¹³ Pinorikot nu o rasam do mantad hilo’d tawan do hilo’d konulu-nuluan, om nonuan nu’d hasil iti tana’ do gisom dot a’ aayi-ayi’. ¹⁴ Posunion nu o sakot do taakanon do nintorusan, om posunion nu o totonomon do maan do tulun, om milo indo o tulun do mananom-tanom, ¹⁵ om haro i’ o waig dot anggur do popotood do ginawo diyolo’, om haro o tumau do saitun do popooropod diyolo’, om haro o taakanon do popokoris diyolo’. ¹⁶ Iri nopo koguasan dot aras do hilo’d Libanon om asaru i’ dot arasaman, iri no i kokoyuan do TUHAN, i tinanom dau. ¹⁷ Hilo’ no o pomirumunan do tombolog, om pomirumunan do burung bangau o hiri’d kayu sedar. ¹⁸ Mongiyon-ngiyon do hilo’d konuluhanan dot angakawas i kambing do gouton, om iri no palanuk om songinlisok do hiri’d kapampangan. ¹⁹ Winonsoi nu o tulan do koilaan do sombulan, om ilo tadau nga’ koilo id maso do katanaban. ²⁰ Pinaharo nu o maso do totuong, om tontok noddi do sumoliwan ngai’ i nintorusan. ²¹ Minggarom po i tangaanak do singa do tontok di mokiakanon iyolo’, do mogihum do taakanon di patahakon do Kinorohingan dot id diyolo’. ²² Koulai nopondo o tadau om gumuli’ ngai’ no iyolo’ do mongoi odop do hiri’d tiyonon diyolo’ do lumisok. ²³ Om sumoliwan nondo i tulun do mongoi porobuat, om morobuat nopo iyolo’ do gisom do sosodopon. ²⁴ Oi TUHAN, ogumu’ no kopio o nongowonsoi nu, om oilo tomod o pinomonsoi nu do koinsanai’ddi. Noponu’ po iti pomogunan di winonsoi nu. ²⁵ Ilo rahat nga’ agayo om alaab tomod, om a’ no ointob-intob i songingiyon do hilo’, it angagayo om it ongokoro’. ²⁶ Hilo’ no o layagon di kapal do rahat, om hilo’ o pinghambaan di Lowiatan, i nintorusan do rahat dit agayo kopio do winonsoi nu. ²⁷ Iya’ ngai’ nopo o sondihon diyolo’, om manahak diyolo’ do taakanon do tontok do louson iyolo’. ²⁸ Patahakon nu no diyolo’ i taakanon, om akanon no diyolo’ iri, iya’ i posodia’ do taakanon di pingyahanan diyolo’. ²⁹ Soira’ nopo do tumongkiad ko, om moddosi no iyolo’, om soira’ nopo dot ongoyon nu o pinuhobo diyolo’ om apatai no iyolo’, om gumuli’ no iyolo’ dot id tana’, i tadon mantad diyolo’. ³⁰ Nga’ soira’ nopo dot onuan nu iyolo’ do pinuhobo, om apasi no iyolo’, om onuan nu’d koposion do wagu iti pomogunan. ³¹ Maha’ daa om mompus-ompus o kagayaan do TUHAN, maha’ daa om asanangan iyau do koinsanai di nongowonsoi dau! ³² Mintong nopo iyau do hiti’d pomogunan, nga’ gagaran nopo iti pomogunan, om kumama’ nopo iyau do nuluhon, nga’ muntu’ nopo o lisun do mantad hiri’d nuluhon. ³³ Modsinding oku nondo dot id TUHAN do solinaid ku do poimpasi, om modsinding oku do mamarayou’d Kinorohingan ku do gisom do tikapatai ku. ³⁴ Maha’ daa om orohian iyau do korongou diti sinding ku, tu’ iyau no o tadon diti kataadan ku. ³⁵ Angatanus po daa do hiti’d pomogunan i tulun do kidusa, om opunso po daa i tulun dot araat. Orohian oku no kopio do mamarayou’d TUHAN o ginawo ku, om tinan ku om pomusarahan ku! Royoho’ no o TUHAN!

¹ Pongunsikou nod TUHAN, popinsusuyo’ no o kogoyoo’ dau, susuyai ngai’ no o bansa’ di nongowonsoi dau. ² Podsinding no do pamarayou’d TUHAN popinsunudo’ no i nongowonsoi dau di kongoimayaan kopio. ³ Kooropod no tu’ nasanganu toko’ no dau, kongooropod kou no, iyokoyu i tumuku’ dot id dau. ⁴ Rikot no do mongoi pokiuhup do TUHAN, om kada’ tingkod do sumambayang dot id dau. ⁵ - ⁶ Iyokoyu i sinakagon di Abraham, i susuhuon do Kinorohingan, iyokoyu i sinakagon di Yakub, i tulun do pinili’ dau. Soroho’ ngai’ no dokoyu i kongopusahan do winonsoi’d Kinorohingan om it oturan do pinatahak dau. ⁷ TUHAN no o Kinorohingan toko’, om boros nopo dau om bagi’ do koinsanai di hiti’d pomogunan. ⁸ Om igitan kasai’ i’ dau i tumpongo dau, do gisom dot insoribu pogisolusuk-lusuk o sinakagon. ⁹ Sorohon i’ dau i tumpongo dau dot id di Abraham, om i tumpongo dau dot id di Isak. ¹⁰ Pinogirot do TUHAN i tumpongo dau dot id di Yakub, i tumpongo dot id Israil do gisom dot alaid. ¹¹ Boros ka dau, ’’Patahakon ku nondo dokoyu i pomogunan do Kanaan, om iri no o sumiliu do dokoyu’d songonuon,’’ ka. ¹² A’ i’ ogumu’ o nintaban di tulun di songonuon do Kinorohingan, om sompogunan po iyolo’ do hilo’d pomogunan do Kanaan. ¹³ Mininghombo iyolo’ dot id piro-piro o pomogunan, om id piro-piro o bansa’. ¹⁴ Nga’ aiso’ i’ o tiso’ piya’d tulun do pinologos do Kinorohingan do monginggorit diyolo’, pinoinsan ngai’ i’ do Kinorohingan i raja’ om mongintirung indo iyolo’ di tulun di nasanganu dau. ¹⁵ Boros ka dau, ’’Kada’ dokoyu gangaho’ i tulun di nongopili’ ku, kada’ dokoyu pokorualai i nabi ku,’’ ka. ¹⁶ Pinorikatan do TUHAN do mononglous i pomogunan diyolo’, om nongoi ngai’ dau i taakanon diyolo’. ¹⁷ Nga’ pinoguli’ i’ dau o songulun diyolo’, i Yusup, i pinadagang do sumiliu’d turipon. ¹⁸ Kinagasan do rantai o gakod dau, om sinulungan do rantai’d basi’ o liou dau, ¹⁹ gisom do nabayaan i pinoboros mantad dau. Pinotopot i’ iyau di boros do TUHAN. ²⁰ Om polobuso’ noddi iyau di raja’ do Masir, om pinalabus iyau di raja’ do piro-piro o bansa’ do mantad id giil. ²¹ Sinuhu’ iyau di raja’ do mongilo-ilo di pomorintaan dau, om siniliu iyau do pomorinta’ do pointongkop di pomogunan. ²² Om kikuasa’ iyau dot id sawat di pagawai di raja’, om kikuasa’ iyau do monuhu’ di montiri’ di raja’. ²³ Om ongoi noddi i Yakub do hilo’d Masir om undorong no dot id pomogunan diri. ²⁴ Om onuwai nod TUHAN do tangaanak dot ogumu’ i tulun dau om pinokoris dau iyolo’ ko’ mantad di pisangod diyolo’. ²⁵ Om pinologos dau i tulun do Masir dot araatan di tulun dau om pingakalan di tulun do Masir i susuhuon dau. ²⁶ Om porikoto’ noddi dau i Musa i susuhuon dau, om i Harun, i pinili’ dau. ²⁷ Om miningwonsoi iyolo’ do piro-piro o koimayaan do mantad id Kinorohingan om minomonsoi iyolo’ do piro-piro o kopusahan do hilo’d Masir. ²⁸ Om potuongo’ nod Kinorohingan o pomogunan diri, nga’ a’ i’ i tulun do Masir minumboyo’ di boros dau. ²⁹ Siniliu dau do raha’ i bawang diyolo’, om pinatai ngai’ i sada’. ³⁰ Om notongkop do bonong i pomogunan diyolo’, do hiri piya’d walai di raja’ nga’ noponu’ id bonong. ³¹ Om ponuhu’ no o Kinorohingan, om tokop nopo di pomogunan o langau om togonok. ³² Pinorikot dau o karambatu om gonit do hilo’d pomogunan diyolo’, om okon nogi’ ko’ rasam o pinorikot. ³³ Om rinaag ngai’ dau i guas dot anggur om i koguasan dot ara, om hinaba’ ngai’ dau i kayu. ³⁴ Koboros nopo iyau’d minonuhu’, om rikot no o katat dot a’ no ointob-intob o kogumuo’. ³⁵ Akano’ ngai’ nopo diyolo’ i tanom-tanom do hiri’d pomogunan diri, om nakan ngai’ diyolo’ i tua’ do tanom-tanom. ³⁶ Pinatai ngai’ dau i tanak do kusai dit id gulu, dot id pointikid-tikid do sompiiyon do tulun do Masir. ³⁷ Om posoliwano’ nogiddi dau i tulun dot Israil, om minongigit iyolo’ do pirok om tamas, om ongokoris ngai’ nopo iyolo’, om aiso’ o kitoruol tu’ gompion i’ iyolo’d TUHAN. ³⁸ Om ongooris ngai’ nopoddi diyolo’ i tulun do Masir, om ongotood nopoddi i tulun do Masir di suminoliwan i tulun dot Israil. ³⁹ Nintirungan do Kinorohingan do haun i tulun dau, om nonuan dau iyolo’ do tapui do dongotuong do ponitiu diyolo’ do tontok do mamanau. ⁴⁰ Pokianu no iyolo’, om porikot no iyau do tombolog, nonuan dau iyolo’ do takanon do mantad hilo’d surga, dot akanon diyolo’ do gisom dot ongoiyahan iyolo’. ⁴¹ Linapak dau o tontolob, om okohus nopo o waig do luminuyung, do miagal pod bawang do lumuyung do hilo’d tana’ do kowotuan. ⁴² Tu’ osorou id TUHAN i tumpongo dau dot id di Abraham i susuhuon dau. ⁴³ Om posoliwano’ no dau i tulun di nopili’ dau, om minsinding po iyolo’ om mimpangkis dot atataadan. ⁴⁴ Pinatahak dau diyolo’ i pomogunan do bansa’d suwai, om pinologos dau i tulun dau do suminingolod di koumaan diyolo’. ⁴⁵ Om mumboyo’ indo i tulun dau dit oturan dau om tumanud di ponuhuan dau. Royohon no o TUHAN!

¹ Royohon no o TUHAN! Pongunsikou nod TUHAN, tu’ osonong i’ iyau; om aiso’ o kotingkadan do kosianan dau. ² Isai po o kaayi’ do monusui di nongowonsoi dau dit angagayo kopio? Isai po o milo do mamarayou dau do gisom do kabagal o pamarayou dau? ³ Olumaag no i tulun di mumboyo’ di ponuhuan dau, om i momonsoi kasai’ dit otopot. ⁴ Soroho’ oku no dot ongoyon nu uhupai i tulun nu, oi TUHAN, pohompito’ oku no iyoho’ dot ongoyon nu iyolo’ posio’. ⁵ Pokitono’ oku no do kosimbayano’ do tulun nu, om kohompit oku i’ di kataadan di tulun nu, om kotonggoi oku di kaandasan di tulun di pinili’ nu. ⁶ Nokowonsoi no iyahai’d dusa do miagal di komolohingan dahai, araat no o nowonsoi dahai om nakasala’ iyahai. ⁷ A’ i’ nokosuhut di kopusahan do piningwansayan do Kinorohingan i taki-aki dahai di hilo’ po iyolo’d Masir, olihuan i’ diyolo’ do pinopointalang o Kinorohingan do kosianan dau dot id diyolo’, om suminaap iyolo’ dau, it Asawat Kopio di hilo’ iyolo’d Rahat dot Aragang. ⁸ Nga’ pinasi i’ dau iyolo’ do miagal di nakabatos dau, do popointalang di sinundu dau dot agayo. ⁹ Barasai nopo dau i Rahat dot Aragang om rasak no, pinawaya’ dau i tulun dau dot id tana’ dit otuu. ¹⁰ Pinasi dau iyolo’ do mantad id tulun dit araatan diyolo’, pinoidu’ dau iyolo’ do mantad id pisangod diyolo’. ¹¹ Nga’ nolondod i’ do hiri’d waig i pisangod diyolo’, om aiso’ no o tiso’ do napasi. ¹² Om kotumbayaai nogiddi i tulun dau di batos dau, om podsinding no iyolo’ do mamarayou dau. ¹³ Nga’ a’ po alaid om kolihuwai no diyolo’ i nowonsoi’d TUHAN, om mimpori-pori nopoddi iyolo’ do mingwonsoi do nunu nopo; om a’ no mandad do nosihat do TUHAN. ¹⁴ Noporinta’ po iyolo’ do korohian do tinan diyolo’ di hilo’ iyolo’d tana’ do kowotuan, om pinogumbalan diyolo’ o Kinorohingan. ¹⁵ Om patahako’ noddi do Kinorohingan i pinokianu diyolo’, nga’ pinoporikot poddi iyau do toruol dit araat kopio dot id diyolo’. ¹⁶ Tontok di hilo’ iyolo’d tana’ do kowotuan om minosol iyolo’ di Musa, om i Harun, i susuhuon do TUHAN dit olidang. ¹⁷ Om pipitas no i tana’ om kourusud no i Datan do hiri, om naratu’d hiri i Abiram om i sompiiyon dau. ¹⁸ Om sondot no o tapui dot id tulun di tuminanud diyolo’ om kosorob no i tulun dit angaraat diri. ¹⁹ Minomonsoi iyolo’d sapi’ do tamas do hilo’d Sinai, om tuminuku’ iyolo’ dot id tingolig diri. ²⁰ Pinoolon diyolo’ i kagayaan do Kinorohingan, do tininganak di pinoiyo-iyo’d nintorusan di mangakan do sakot. ²¹ Nolihuan diyolo’ i Kinorohingan di minamasi diyolo’, i miningwonsoi do kongoimayaan di hilo’d Masir. ²² Kopusahan no kopio i winonsoi dau di hilo’d pomogunan diri, kosuayan no kopio i winonsoi dau di hilo’d Rahat dot Aragang. ²³ Soira’ di minomoros o Kinorohingan do patayon dau i tulun dau, om miningkakat i Musa do minomiolitan do Kinorohingan om i tulun dau. Om nantaban di Musa i kototogod do Kinorohingan do mamatai diyolo’. ²⁴ Om minada’ iyolo’ di pomogunan dot osonong, tu’ a’ iyolo’ notumbayaan di batos do Kinorohingan. ²⁵ Minundorong iyolo’ do hiri’d kiim diyolo’ om somboro-boros dot araatan om a’ no mokinongou’d boros do TUHAN. ²⁶ Om poinsano’ nod TUHAN iyolo’ do mikuwo’d suminumpa’ iyau dot apatai nondo iyolo’ do hiri’d tana’ do kowotuan. ²⁷ Om potompiason dau i sinakagon diyolo’ dot id pogialatan do bansa’d suwai, om pologoson dau iyolo’ dot apatai dot id sompogunan. ²⁸ Om tontok no di hilo’ iyolo’d Pior, om minoyo’ i tulun di songonuon do Kinorohingan do tumuku’ dot id Baal, om minangakan iyolo’ do porsombahan di nokosubak dot id tingolig. ²⁹ Tiningkau di kowoyo-woyoon diyolo’ o kototogod do TUHAN, om noontok diri iyolo’ do toruol dit araat kopio. ³⁰ Nga’ ingkakat no i Pinihas om hukumai no dau i tulun di nakasala’, om kotingkod noddi i toruol diri. ³¹ Om sorohon noddi kasai’ i winonsoi dau dit osonong kopio’ddi do mantad poddi om gisom dot alaid. ³² Om hilo’ nod tudan do waig do Moriba om potogodo’ po kawagu di tulun o TUHAN, om i Musa iddi o nosusa’ dot iyolo’ o minonusa’. ³³ Pinaraat tomod diyolo’ o ginawo di Musa gisom dot a’ no iyau minomusorou di pimboroson dau. ³⁴ A’ i’ diyolo’ pinatai i tulun do bansa’d suwai, tu’ a’ i’ iyolo’ tuminanud di pinonuhuan do TUHAN. ³⁵ Tu’ minogikawin-kawin nogi’ iyolo’ di bansa’ddi om minomit iyolo’ di kowoyo-woyoon di tulun dit a’ kotutun do Kinorohingan. ³⁶ Tuminuku’ do tingolig i tulun di songonuon do Kinorohingan, om iri no o nakapatai-patai diyolo’. ³⁷ Pinatahak diyolo’ i tangaanak diyolo’d tongokusai om tongoondu’ do sumiliu do porsombahan di sumbolion dot id tingolig do hilo’d Kanaan. ³⁸ Pinatai diyolo’ i tangaanak dot aiso’ o sala’, om nososomu’ diri i pomogunan dot i pinamatayan diri o nokososomu’. ³⁹ Sinosomu’ diyolo’ o tinan diyolo’ dot i winonsoi diyolo’ddi o nokososomu’, om a’ iyolo’ tuminorodok dot id Kinorohingan. ⁴⁰ Om otogod diri o TUHAN dot id tulun dau, om araatan kopio iyau diyolo’. ⁴¹ Pinosuang dau iyolo’ dot id kuasa’ do bansa’d suwai, om i pisangod diyolo’ o momorinta’ diyolo’. ⁴² Ninggorit iyolo’ di pisangod diyolo’ om id siriba’ iyolo’ do kuasa’ diyolo’. ⁴³ Asaru’ i’ daa do poiduwon do TUHAN i tulun dau, nga’ uhang nogi’ diyolo’ do sumaap do TUHAN, om marom-ralom diri o kolonsodo’ diyolo’ dot id dusa. ⁴⁴ Nga’ pinokinongou id TUHAN iyolo’ do tontok di mininglohou iyolo’, om nokito i’ dau i kosusaan diyolo’. ⁴⁵ Om sinorou i’ dau i tumpongo dau dot id diyolo’, om winolihan iddi dau i tosorou dau tu’ agayo i’ o kosianan dau. ⁴⁶ Pinologos diri dau dot osianan diyolo’ i pisangod diyolo’. ⁴⁷ Posio’ no iyahai oi TUHAN, i Kinorohingan dahai, om pogulio’ no iyahai dot id pomogunan dahai do mantad id piro-piro o bansa’ddi, om ounsikou indo iyahai om mamarayou iyahai do ngaran nu dit olidang. ⁴⁸ Royohon no o TUHAN i Kinorohingan dot Israil, royohon no iyau do baino’ om gisom dot alaid! Pologoson no do momoros ngai’ o tulun dot, ’’Amin!’’ ka. Royohon no o TUHAN!

¹ Pongunsikou nod TUHAN, tu’ iyau nopo om osonong, om mompus-ompus o kosianan dau. ² Pinghulitan nod momoros iti boros do pamarayou’d TUHAN, koinsanai dokoyu i napasi dau. Tu’ pinoidu’ kou dau do mantad id pisangod dokoyu. ³ Om pinoguli’ kou do mantad id pomogunan do suwai, do mantad hilo’d koulayon om kotonobon, om mantad hilo’d utara om salatan. ⁴ Haro i’ o piro-piro do mininghombo do hilo’d tana’ do kowotuan, om a’ kotunud do ralan do kumaa dot id bandar do tiyonon diyolo’. ⁵ Louson po iyolo’ om tuuhan, om aiso’ no o soro-sorohon diyolo’ dot id dosunsudan. ⁶ Om pomolohou noddi iyolo’d TUHAN dit id suang iyolo’d kosusaan, om poiduwo’ no dau iyolo’ do mantad id kosusaan diyolo’ddi. ⁷ Pinosusui dau iyolo’ di ralan dit opoting do kumaa dot id bandar di tiyonon diyolo’. ⁸ Apatut nod mongunsikou iyolo’d TUHAN tu’ mompus-ompus i’ o kosianan do TUHAN dot id diyolo’, om minomonsoi iyau di kongoimayaan kopio dot id diyolo’. ⁹ Pinoinum dau i tulun do tuuhan, om pinakayahan dau dit ongosonong i tulun di louson. ¹⁰ Haro i’ o piro-piro o poingiyon dot id kosusaan om id dotuong, do songinggiil om songingkogos, ¹¹ tu’ suminaap iyolo’ do boros do Kinorohingan dit Osundu Kopio, om minada’ iyolo’ do ponudukan dau. ¹² Olomok no iyolo’ do nouru do karaja’ dit awagat, ahaba’ nopo iyolo’ om aiso’ i’ o potungag. ¹³ Om id suang poddi iyolo’d kosusaan om pomolohou nogi’ iyolo’d TUHAN, om pinoidu’ iddi dau iyolo’ do mantad id kosusaan diyolo’ddi. ¹⁴ Pinosoliwan dau iyolo’ do mantad id kosusaan om totuong, om pinutut dau i kogos diyolo’. ¹⁵ Om apatut nod mongunsikou iyolo’d TUHAN, tu’ mompus-ompus i’ o kosianan do TUHAN dot id diyolo’, om minomonsoi iyau di kongoimayaan kopio dot id diyolo’. ¹⁶ Rinaag dau i totobon do tambaga’, om tinipu’ dau i salampad do basi’. ¹⁷ Haro i’ o piro-piro diyolo’ dot oinggorit dot i dusa om kararaat diyolo’ o koinggorit. ¹⁸ A’ no iyolo’ orohian do kokito do taakanon tu’ oruhai no iyolo’ dot apatai. ¹⁹ Om id suang poddi iyolo’ do kosusaan om pomolohou nogi’ iyolo’d TUHAN, om pinoidu’ iddi dau iyolo’ do mantad id kosusaan diyolo’ddi. ²⁰ Pomoros no o TUHAN om kolingasai no iyolo’, om pinoidu’ dau iyolo’ do mantad id kapatayon. ²¹ Apatut nod mongunsikou iyolo’d TUHAN tu’ mompus-ompus i’ o kosianan do TUHAN dot id diyolo’, om miningwonsoi iyau di kongoimayaan kopio dot id diyolo’. ²² Apatut nod ounsikou iyolo’ do mikuwo’d mongigit do porsombahan do sumbolion, om popinsusuyon i nongowonsoi dau do mikuwo’d sinding dot aarapadan. ²³ Haro i’ o piro-piro do suminoborong do rahat do suminakai do kapal do rahat, om hilo’ nod rahat o pogihuman diyolo’ do kaakan-akanan. ²⁴ Om nokito diyolo’ i winonsoi’d TUHAN, i winonsoi dau di kopusahan kopio do hilo’d rahat. ²⁵ Pomoros nopo o TUHAN, om timpuun nod tuminongus dot opuhod kopio, om opuhod tomod diri o tumbak. ²⁶ Nokoinsawat tomod i kapal do rahat om nongkotodsok i kapal do hiri’d nanad do rahat. Om moddosi po o tulun dot id suang do koligagaanan diri. ²⁷ Nakatahub iyolo’ om minikorobibi’ do miagal do tulun di naawuk, om aiso’ no o tosorou-sorou diyolo’. ²⁸ Om id suang poddi iyolo’d kosusaan om pomolohou nogi’ iyolo’d TUHAN, om pinoidu’ iddi dau iyolo’ do mantad id kosusaan diyolo’. ²⁹ Tiningkod dau i tongus dot opuhod, om a’ noddi agayo i tumbak. ³⁰ Om ooropod diri iyolo’ tu’ nakatalib noddi i tongus dot opuhod, om osimbayan nopo iyolo’ do pinorikot dau do hiri’d kodompiron do kapal do rahat di rikoton diyolo’. ³¹ Apatut nod mongunsikou iyolo’d TUHAN tu’ mompus-ompus i’ o kosianan do TUHAN dot id diyolo’, om miningwonsoi iyau di kongoimayaan dot id diyolo’. ³² Mositi’ nod popinsusuyon diyolo’ i kagayaan dau dot id pitimungan do tulun dot ogumu’, om royohon iyau dot id pitimungan do tongoboyoon. ³³ Rinasakan do TUHAN o kabawang-bawangan, om tiningkod i tudan do waig do poluyung do waig. ³⁴ Siniliu dau do tana’ dot oosin i tana’ dot oluhub, tu’ i karaato’ di tulun do poingiyon do hiri o kinapamansayan do miagal diri. ³⁵ Siniliu dau do kulam do waig i kowotuan, om siniliu dau do tudan do waig i tana’ dot otuu. ³⁶ Pinologos dau i tulun do louson do miyon do hilo’, om minomonsoi iyolo’ do bandar do tiyonon diyolo’. ³⁷ Tinanaman diyolo’ i tumo diyolo’ om minananom iyolo’ dot anggur, om ogumu’ddi o nomot diyolo’. ³⁸ Binarakatan dau i tulun dau, om ogumu’ddi o tangaanak diyolo’, om a’ dau pinologos do kumuri’ i tayam-tayam diyolo’. ³⁹ Soira’ di naala’ i tulun di nasanganu do Kinorohingan om noudipon tomod iyolo’ di koinggoritan om pongulok-ulok. ⁴⁰ Om nidu’ diri dau o kuasa’ di minonginggorit diyolo’, om pinologos dau iyolo’ do minghombo dot id tana’ do kowotuan dit aiso’ o ralan. ⁴¹ Nga’ pinoidu’ i’ dau i tulun do mosikin do mantad id kosusaan diyolo’ om pinoinggumu’ dau i sompiiyon diyolo’ do miagal pod baanan do dumba’. ⁴² Ongotood ngai’ nopo i tulun dot otopot do kokito diti, nga’ aiso’ nopo komi di tulun dot araat. ⁴³ Pologoson nod momusorou do pasal diti i tulun dit ongoilo, pologoson no iyolo’ do kopuriman di kosianan do TUHAN dit aiso’ o kotingkadan.

¹ Sinding. Sinding di Daud. ² Ogirot i’ o kotumbayaan ku, oi Kinorohingan, modsinding oku i’ do mamarayou diya’. ³ Posikan ku o ginawo ku, posikan ku o kecapi om gambus ku, posikan ku o tadau. ⁴ Mongunsikou oku i’ diya’, oi TUHAN, dot id pogialatan do bansa’. Royohon ku i’ iya’ dot id pogialatan do tulun. ⁵ Tu’ kosoibau dilo tawan o kosianan nu dit aiso’ o kotingkadan, kosunggu i’ dilo tawan o kotorodoko’ nu. ⁶ Pointalango’ no i kagayaan nu do hilo’d tawan, oi Kinorohingan, om i kobontugo’ nu do pointongkop diti pomogunan. ⁷ Posio’ no iyahai di sinundu nu, simbaro’ no o sambayang ku, om apasi i’ i tulun di kosianan nu. ⁸ Nakapamatos no o Kinorohingan do hiri’d kinoiyonon dau dit olidang do poingkaa, ’’Bohogion ku nondo o tana’ do Sikim do mikuwo’d osonong o ginawo ku, om ongkibon ku i Rantai do Sukot dot id tulun ku. ⁹ Giliad nopo om Manasi om doho’ i’, Ipraim no om ponokotupi’ ku, om Yohuda no om ponokotungkat ku di don raja’. ¹⁰ Nga’ Muab nopo om silihon ku indo do mimpun do pongougan do gakod om Idom noo om pataaman ku’d kasut ku, om iri no o koilaan dot iyoho’ o sanganu’ddi. Mamangkis oku indo do pogintutunan do nakamanang oku do suminangod do tulun do Pilistin,’’ ka dau. ¹¹ Isai o papaatod doho’ do hilo’d bandar do kitolig, oi Kinorohingan? Isai o potunud doho’ do hilo’d Idom? ¹² Niadaan nu no tuu’ddi kopio iyahai? A’ ko no kopio moyo’ di soudor dahai do mamanau? ¹³ Uhupan no iyahai do sumaap di pisangod, tu’ aiso’ i’ o kotutuk-tutukon do tulun toomod o monguhup. ¹⁴ Ondung mobi’ dahai o Kinorohingan om kamanang i’ iyahai, om aala’ i’ dau i pisangod dahai.

¹ Maan di boyoon do modsisinding. Sinding di Daud. Royohon ku no iya’, oi Kinorohingan, om ungkomi no. ² Nongoi oku saapo’ di tulun dot araat om i moninipu’, miningudut iyolo’ do pasal doho’. ³ Om mimboros iyolo’ dot araat do pasal doho’, om sumaap iyolo’ doho’ dot aiso’ o paantakan. ⁴ Saapon oku i’ diyolo’ do mulong piya dot osianan oku diyolo’, om suminambayang oku piya do bagi’ diyolo’. ⁵ Sulian nogi’ diyolo’ do karaaton o kosonongo’ ku, om sulian diyolo’ do kototogod o kosianan ku. ⁶ Pomili’ no di gompomutus dot araat do momisara’ di pisangod ku, om pologoson i pisangod dau do papasala’ dau. ⁷ Pologoson nopo iyau do bisaraon om oilaan i’ do kisala’, pologoson no do tondoson do kasalaan i sambayang piya dau. ⁸ Pologoson no dot oruhai’d opupusan i koposion dau, pologoso’ no do tulun do suwai o kosowoli di karaja’ dau. ⁹ Pologoso’ no dot aiso’ o molohing di tangaanak dau, om opuadan i sawo dau. ¹⁰ Pologoso’ no dot osiliu do tulun di mokianu-anu po om i mombo-hombo poo i tangaanak dau, pologoso’ no dot ouyung iyolo’ do mantad hiri’d pogun dit iyon- iyonon diyolo’. ¹¹ Pologoso’ no dot oongoi ngai’ di tulun di pinogutangan dau i dapu’ dau, om pologoso’ no dot angaanu ngai’ do bansa’d suwai i pininghuyanan dau do minogihum. ¹² Kada’ pologoso’ do haro o tulun dot opuhawang dot id dau ko’ haro po o momogompi’ di tangaanak dau di notongkiadan dau. ¹³ Pologoso’ no dot apatai ngai’ i sinakagon dau, om olihuan i’ o ngaran dau dot id sinakagon di sumusuhut. ¹⁴ Pologoso’ no dot osorou kasai’d TUHAN i karaato’ di komolohingan dau, om a’ ompunan i dusa dau do gisom do kopupuson diti pomogunan. ¹⁵ Pologoso’ no dot osorou kasai’d TUHAN i dusa diyolo’, nga’ iyolo’ nopo om lihuan no kopio dau. ¹⁶ Tu’ tulun nopoddi om a’ i’ minomusorou do momuhawang, tu’ minonginggorit iyau om minamatai di tulun do mosikin, om it oinggorit om it aiso’ o pokukurayan. ¹⁷ Orohian iyau do momopol — om pologoso’ no dot iyau ot apapalan, araatan iyau do manahak do barakat, om pologoso’ no dot aiso’ o mamarakat dau! ¹⁸ Noubas tomod iyau do mimpopol, do miagal po do mananrasuk o koubaso’ dau, pologoso nod sumarabak i popol dau dot id tinan dau do miagal do waig, om sumarabak dot id tulang dau do miagal do tumau. ¹⁹ Pologoso’ nori do pointokop dau do miagal do rasuk om poinrilit dau do miagal do tagkos. ²⁰ Oi TUHAN, iyoon noddi o pomohukum di pisangod ku, i tulun di mimboros dot araat do pasal doho’. ²¹ Nga’ uhupai oku no iyoho’, oi TUHAN, i Kinorohingan ku, do miagal di nakabatos mantad nu, om poiduwo’ oku no tu’ i kosonongo’ om kosianan nu o kopoiduan. ²² Mosikin oku om oinggorit oku, om norualan tomod o ginawo ku. ²³ Miagal oku pod sangai di dongsosodopon no, tu’ oruhai nod atagak, miagal oku po di godu do pugagon. ²⁴ Olomok no o totud ku tu’ puasa oku, santaid-taid po o kulit ku, om tulang ku po o mogioput-oput. ²⁵ Om songirak-irak po i tulun do mintong doho’, om songbingog-bingog pod tulu do monguntotogod. ²⁶ Uhupai oku no oi TUHAN, i Kinorohingan ku, posio’ oku no tu’ osianan kasai’ ko i’ doho’. ²⁷ Poiloo’ no i pisangod ku, dot iya’ no i minamasi doho’. ²⁸ Papalan oku piya diyolo’ nga’ barakatan oku i’ diya’. Aala’ po daa i pisangod ku, nga’ iyoho’ nopo i susuhuon nu om otood i’. ²⁹ Pologoso’ no dot okuluputan do tingayam i pisangod ku, pologoso’ no iyolo’ dot olopot do kointingayamo’. ³⁰ Puhadan ku nondo o boros ku do mongunsikou’d TUHAN, royohon ku indo iyau do hilo’d pitimungan do tulun dot ogumu’. ³¹ Tu’ obian i’ dau i tulun do mosikin om posion dau do mantad id tulun di momohukum daa dau do kapatayon.

¹ Sinding di Daud. Om boros kad TUHAN dot id tuan ku, i raja’, ’’Irikau do hiti’d dawananan ku do gisom id opoulakan ku diya’ i pisangod nu,’’ ka. ² Hilo’ nod Sion o poimpuunan do TUHAN do popoinggayo do pomorintaan nu. Porintaon no i pisangod nu! ³ Tontok nopo di tadau do mongoi ko sangod di pisangod nu, om orohian toomod nopondo i tulun nu do mongoi tanud do sumangod. Om miagal po di bolobou do dongkosuabon i tangaanakwagu do rumikot do hilo’d Nuluhon dit Olidang. ⁴ Nakabatos nod TUHAN do mikuwo’d sumpa’, om a’ no dau pakaisoon iri. Boros ka dau, ’’Imam ko nondo do gisom do poingompus do miagal di Malkisidik,’’ ka dau. ⁵ TUHAN nopo om hino id dawananan nu, om soira’ nopo do tumogod iyau, om raja’ piya nga’ aala’ i’ dau. ⁶ Porotuan nondo dau do hukuman i piro-piro o bansa’, om ponuon dau do rata’ i kinoiyonon do sumangod, alaon dau i raja’ do pointongkop diti pomogunan. ⁷ Mongoi i raja’ inum do hiri’d tudan do waig do hiri’d tisan do ralan, om okoris indo iyau, om kamanang iyau.

¹ Royohon no o TUHAN! Aayi-ayi’ no o ginawo ku do mongunsikou’d TUHAN dot id pitimungan do tulun dau. ² Ongosonong tomod om koimayaan kopio i wonsoyon do TUHAN, oinsanan nopo i tulun dit asanangan diri dot orohian do kosuhut kopio’ddi. ³ Koinsanai di wonsoyon do TUHAN om osonong i’ om royohon, om mompus-ompus o kotulido’ dau. ⁴ Mada’ i’ o TUHAN dot olihuan toko’ i winonsoi dau di kongopusahan kopio, tu’ obinsianan iyau om obinlisiu. ⁵ Manahak i’ iyau do taakanon dot id tulun di momusou dau, a’ i’ dau olihuan i tumpongo dau. ⁶ Nokointalang no dau i sinundu dau dot id tulun dau, tu’ nakatahak no dau diyolo’ i tana’ do bansa’d suwai. ⁷ Otorodok i’ o TUHAN om otulid dot id suang do nunu nopo o wonsoyon dau, om milo ngai’ do ponongkuyaanan i boros dau. ⁸ Mompus-ompus kasai’ i’ it oturan dau, tu’ pinatahak i’ dau iri dot id suang do katapatan om kotulido’. ⁹ Pinalabus do TUHAN i tulun dau, om minomonsoi iyau do tumpongo di mompus-ompus dot id diyolo’. Iyau nopo om olidang om okoris! ¹⁰ Ralan nopod kaanu do toilaan om oronok do TUHAN; om manahak i’ iyau do pomusarahan dit atarom dot id tulun di mumboyo’ do boros dau. Apatut nod royohon iyau do gisom dot alaid.

¹ Royohon no o TUHAN! Olumaag no i tulun dit oronok do TUHAN, om it asanangan do mumboyo’ do ponuhuan dau. ² Tangaanak nopo di tulun dot osonong om angabantug i’ do hiti’d pomogunan, om abarakatan o sinakagon dau. ³ Sompiiyon nopondo dau om kaya’ om ogumu’ o dapu’, om haro kasai’ o kosimbayanan do gisom dot alaid. ⁴ Tumitiu i’ o tulinau do hiri’d totuong dot id tulun dit osonong, om it obinsianan om opuhawang om otulid. ⁵ Olumaag no i tulun dit orohian do popoolos, om it otulid o kowoyo-woyoon do dumagang. ⁶ Tulun nopo dot osonong om a’ i’ koumbal do koinsiriba’ o ngaran, om osorou kasai’ indo iyau do gisom dot alaid. ⁷ A’ i’ iyau ooris do korongou do habar dot araat, tu’ ogirot i’ o kotumbayaan dau, om mogondos iyau’d TUHAN. ⁸ A’ i’ iyau kumanggau om a’ ooris, tu’ iso-iso’ no o ginawo dau dot otumbayaan do kokito iyau di pisangod dau dot aala’. ⁹ Opuhawang i’ iyau dot id tulun di mosikin, om a’ sumimban i kopuhawango’ dau, asawat o pangkat dau om pusohon iyau. ¹⁰ Otogod nondo i tulun dot araat do kokito’ddi, miit po o nipon diyolo’ dot atatagadan om apatai nondo iyolo’, om atanus tomod nopo i soro-sorohon diyolo’.

¹ Royohon no o TUHAN! Oi koinsanai’d susuhuon do TUHAN, royoho’ no o ngaran dau! ² Royohon nondo o ngaran dau, do mantad do baino’ om gisom do poingompus. ³ Mantad pod hilo’d koulayon do tadau om gisom do korikot do hilo’d kotonobon do tadau do royohon o ngaran do TUHAN. ⁴ Porintaon do TUHAN o koinsanai do bansa’, om kosoibau do tawan o kagayaan dau. ⁵ Aiso’ no o koiyo do TUHAN i Kinorohingan toko’. Poingiyon iyau do hilo’d kinoiyonon dit id sawat kopio, ⁶ nga’ luminuung i’ iyau do mintong do tawan om pomogunan. ⁷ Potungagon dau i tulun do mosikin do mantad id pupuk, kakaton dau i ruminutum do mantad id koinggoritan diyolo’. ⁸ Om silihon dau iyolo’ do tambalut do raja’, i raja’ do tulun dau. ⁹ Pusohon i’ dau i tondu’ dit aiso’ o tanak dot id sompiiyon dau, potoodon i’ dau iyau tu’ onuan i’ dau iyau do tangaanak. Royohon no o TUHAN!

¹ Tontok di suminoliwan i tulun dot Israil do mantad hilo’d Masir, di tuminongkiad i sinakagon di Yakub di pomogunan diri, ² om siliho’ nod TUHAN o tulun do Yohuda do tulun dau, om siniliu dau ot Israil do songonuon dau. ³ Ontong no dau i Rahat dot Aragang om panangkus no do minogidu’, om tingkod nopo do luminuyung i Bawang do Yordan. ⁴ Mininsimbul i nuluhon do miagal do kambing do tontoluhan, om mininsimpod i nulu-nulu do miagal do tangaanak do dumba’. ⁵ Nokuro kopio tu’ minogidu’ ko, oi rahat? Nokuro tu’ tuminingkod ko do lumuyung, oi Bawang do Yordan? ⁶ Nokuro tu’ mininsimbul kou do miagal do kambing do tontoluhan, oi konulu-nuluan? Oi nulu-nulu, nokuro tu’ mininsimpod kou do miagal do tangaanak do dumba’? ⁷ Gogor no, oi pomogunan tu’ rumikot no o TUHAN, gogor no dot id toguang do Kinorohingan di Yakub. ⁸ Iyau no i pinoposimban di tontolob do siniliu do kulam do waig om pinoposimban do pampang do siniliu do bawang di songluyung-luyung.

¹ Iya’ noo oi TUHAN, om iya’ noo ot apatut do royohon, om okon i’ ko’ iyahai o royohon tu’ otorodok ko i’ om aiso’ o kotingkadan do kosianan nu. ² Nokuro daa tu’ muhot dahai i bansa’ do poingkaa, ’’Hinonggo o Kinorohingan dokoyu,’’ ka. ³ Kinorohingan nopo dahai om hilo’d surga, om nunu nopo o korohian dau om iri no o wonsoyon dau. ⁴ Ponokokinorohingan nopo diyolo’ om tamas om pirok do winonsoi om winorun do palad do tulun. ⁵ Kikabang i’ iyolo’ nga’ a’ i’ koboros om kimato nga’ a’ i’ kokito. ⁶ Kitolingo i’ iyolo’ nga’ a’ i’ korongou, om kitodung nga’ a’ i’ kosingud. ⁷ Kilongon i’ iyolo’ nga’ a’ i’ milo do kumama’, om kigakod nga’ a’ i’ kapanau, om a’ iyolo’ koboros. ⁸ Om pologoso’ no i tulun di minomonsoi diyolo’ do koiyo di tingolig do winonsoi diyolo’. ⁹ Pogondos nod TUHAN, oi tulun dot Israil, tulungon kou i’ dau om intirungan kou. ¹⁰ Pogondos nod TUHAN, oi imam di mogobi-obi’ do Kinorohingan, tulungon kou i’ dau om intirungan kou. ¹¹ Pogondos nod TUHAN, oi koinsanai dokoyu i tumuku’ dot id dau, tulungon kou i’ dau om intirungan kou. ¹² Osorou toko’ i’ do TUHAN om barakatan toko’ i’ dau, barakatan i’ dau i tulun dot Israil om it imam di mogobi-obi’ do Kinorohingan. ¹³ Barakatan i’ dau o koinsanai do tulun di momusou dau, iyoon nopo dau do mamarakat it angagayo om it ongokoro’. ¹⁴ Maha’ daa om onuan kou’d TUHAN do tangaanak dot ogumu’, iyokoyu om i sinakagon dokoyu. ¹⁵ Maha’ daa om barakatan kou’d TUHAN, i minomonsoi do tawan om pomogunan! ¹⁶ Tawan nopo om TUHAN noo o sanganu, nga’ pinatahak i’ dau do tulun o pomogunan. ¹⁷ A’ i’ o TUHAN royohon di tulun di nangapatai, ko’ i tulun di nongkolintuhun no dot id kinoiyonon dit oingou. ¹⁸ Nga’ iyati’ nopo i songimpasi om mongunsikou i’ dau, do mantad do baino’ om gisom do poingompus. Royohon no o TUHAN!

¹ Osianan oku’d TUHAN, tu’ pokinongohon oku i’ dau, pokinongohon i’ dau o sambayang ku. ² Mokinongou i’ iyau doho’, do pointikid-tikid do lumohou oku dau. ³ Nosorilian oku po do koligagaanan do kapatayon, katangkabo no kopio om korolosi doho’ o kapatayon. ⁴ Om pomolohou oku noddi do TUHAN do poingkaa, ’’Pokionuon ku no kopio iya’ oi TUHAN do mamasi doho’,’’ kangku. ⁵ TUHAN nopo om osonong i’ om obinsianan, monginsian i’ o Kinorohingan doho’. ⁶ Intirungan id TUHAN i tulun dot aiso’ o pokukurayan, tulungon oku i’ dau do tontok dot id suang oku’d koligagaanan. ⁷ Pogiroton ku i’ o ginawo ku, tu’ osonong i’ o TUHAN dot id doho’. ⁸ Pinoidu’ oku i’ do TUHAN do mantad id kapatayon, ninsasamadan oku i’ dau om a’ oku dau pinologos do naala’. ⁹ Om poimpasi oku iddi do hiti’d pomogunan tu’ intirungan oku id TUHAN. ¹⁰ Otumbayaan oku i’ kasai’ do minomoros oku piya dot, ’’Ulak-ulakan oku no kopio,’’ ka, ¹¹ om tontok piya dit oborulong oku om minomoros oku dot, ’’Aiso’ i’ o tongoiso’ piya’d tulun do milo do ponongkuyaan,’’ kangku. ¹² Nunu po o milo ku’d patahakon dot id TUHAN do ponomuli’ ku di kosonongo’ dau dot id doho’? ¹³ Papatahak oku indo do porsombahan do waig dot anggur dot id TUHAN do pongunsikou ku dau do minonulung doho’. ¹⁴ Hilo’ nod pitimungan do koinsanai’d tulun dau do bayaanon ku i pinabatos ku dot id dau. ¹⁵ Oupus tomod i’ o TUHAN do tontok do haro ot apatai dot ongoiso’ piya di tulun di kosianan dau. ¹⁶ Iyoho’ no o susuhuon nu, oi TUHAN, momonsoi oku i’ do karaja’ nu do miagal di tina’ ku. Pinoidu’ oku i’ diya’ do mantad id kapatayon. ¹⁷ Papatahak oku indo do porsombahan do kounsikahan ku dot id diya’, om sumambayang oku dot id diya’. ¹⁸ Bayaanon ku indo i batos ku dot id TUHAN, dot id toguang do toinsanan di tulun dau ¹⁹ di pointimung do hiri’d natad do Walai’d Sasambayangan dot Agayo do hilo’d tanga’ di bandar do Yorusalim. Royohon no o TUHAN!

¹ Royoho’ no o TUHAN, oi koinsanai’d bansa’, royoho’ no iyau, oi koinsanai’d tulun! ² Tu’ osianan i’ kopio iyau dati’, om mompus-ompus o kotorodoko’ dau. Royohon no o TUHAN!

¹ Pongunsikou nod TUHAN, tu’ osonong i’ iyau, om mompus-ompus o kosianan dau. ² Pologoso’ no do momoros i tulun dot Israil do, ’’Mompus-ompus i’ o kosianan dau,’’ ka. ³ Pologoso’ no do momoros it imam di mogobi-obi’ do Kinorohingan do, ’’Mompus-ompus i’ o kosianan dau,’’ ka. ⁴ Pologoso’ no do momoros ngai’ i tulun di tumuku’ dot id dau do, ’’Mompus-ompus i’ o kosianan dau,’’ ka. ⁵ Luminohou oku’d TUHAN do tontok dit id suang oku’d kosusaan, om sinimbar oku i’ dau om pinoidu’ oku dau. ⁶ Moyo-woyo’ i’ o TUHAN doho’, om a’ oku i’ moddosi, om aiso’ no o milo’d tulun do wonsoyon dot id doho’. ⁷ TUHAN i’ o monulung doho’, om okito ku indo i pisangod ku dot aala’. ⁸ Osonong nogi’ do mogondos do TUHAN, ko’ mantad do sumondiu do tulun. ⁹ Osonong nogi’ do mogondos do TUHAN, ko’ mantad do sumondiu do raja’. ¹⁰ Ogumu’ daa o pisangod do pointutuk doho’, nga’ naala’ ku i’ iyolo’ di kuasa’d TUHAN. ¹¹ Nosorilian oku nopo diyolo’, nga’ naala’ ku i’ iyolo’ di kuasa’d TUHAN. ¹² Miagal po iyolo’ di moningot do minongurun doho’, nga’ kosorob tomod nopo iyolo’ do miagal di rugi di sinorob do tapui tu’ oruhai do nouu. Tu’ pinunso ku iyolo’ di sinundu’d TUHAN. ¹³ Pinadalaan tomod oku do minanangod om oruhai oku no daa dot aala’, nga’ nuhupan oku iddi do TUHAN. ¹⁴ TUHAN no o popokoris om popogirot doho’, iyau no o mamasi doho’. ¹⁵ Pokinongou no do boros dit opuhod dot atataadan do nakamanang, do hilo’d kokiiman do tulun do Kinorohingan, do poingkaa, ’’Iri no o winonsoi’d TUHAN dit okoris kopio. ¹⁶ Pinamanang toko’ di kuasa’ dau, i kuasa’ dau di nakamanang dot id pisangadan!’’ ka no. ¹⁷ A’ oku i’ apatai suwai ko’ poimpasi oku i’, om popinsusui oku di nowonsoi’d TUHAN. ¹⁸ Nadalaan oku no kopio dau do minomohukum, nga’ a’ oku i’ dau pinologos dot apatai. ¹⁹ Iwangai doho’ i totobon do Walai’d Sasambayangan dot Agayo, om sumuang oku i’ do mongoi pongunsikou’d TUHAN. ²⁰ Iti no o wawayaan di don TUHAN, om iri no tulun dot otopot o milo do maya’d hiti. ²¹ Royohon ku iya’, oi TUHAN, tu’ sinimbar nu i’ o sambayang ku, om nonuan oku diya’ do kamanangan. ²² Iri nopo watu di niada’ di mamamaal, tu’ sorohon diyolo’ dot aiso’ o guna’, nga’ iri nogiddi i watu’ddi o kiguna’ kopio. ²³ Iri no o winonsoi’d TUHAN, om koimayaan tomod toko’ iri. ²⁴ Iti no o tadau di kinamanangan do TUHAN, om kongotood toko’ no do mamaramai’dti. ²⁵ Posio’ no iyahai oi TUHAN, om onuwai no iyahai’d kamanangan. ²⁶ Pologoson no do barakatan do Kinorohingan, i tulun di rumikot dot id suang do ngaran do TUHAN, barakatan dahai iya’ do mantad hilo’d Walai’d Sasambayangan dot Agayo. ²⁷ TUHAN nopo om Kinorohingan i’, om osonong iyau dot id dati’. Potimpuuno’ no i karamayan do mikuwo’d mongigit do raan do kayu om mintutuk di pananaraban do porsombahan. ²⁸ Iya’ no o Kinorohingan ku, om unsikohon ku iya’; om popinsusuyon ku o kagayaan nu. ²⁹ Pongunsikou nod TUHAN tu’ osonong iyau, om mompus-ompus o kosianan dau.

¹ Olumaag no i tulun dit aiso’ o kabara-barasan do koposi-posion, om i mumboyo’ do Tourat do TUHAN. ² Olumaag no i tulun di tumanud do ponuhuan dau, om it iso-iso’ kopio o ginawo do mumboyo’ dau. ³ Olumaag no i tulun di tumanud do korohian do TUHAN, om it a’ momonsoi dot araat. ⁴ Oi TUHAN, nakatahak nu no dahai it oturan nu, om sinunudan nu iyahai do tumorodok do mumboyo’ddi. ⁵ Orohian oku no daa kopio dot otorodok oku do tumanud di ponudukan nu. ⁶ Ondung podulon kopio ku o koinsanai di ponuhuan nu, om a’ oku no ointingayam. ⁷ Royohon ku nondo iya’ do mikuwo’d otulid o ginawo ku, do tontok do minsingilo oku dit oturan nu dit otulid. ⁸ Tonudon ku i’ it oturan nu, kada’ oku no kopio tongkiadai. ⁹ Ralan nopo do tanakwagu do popolidang kasai’ do kowoyo-woyoon dau om tumanud di ponudukan nu, oi TUHAN. ¹⁰ Aayi-ayi’ no o ginawo ku do momonsoi di korohian nu, om kada’ oku pologoso’ do sumansala’ di ponuhuan nu. ¹¹ Nokoopi’ ku no dot id suang do ginawo ku it oturan nu, om a’ oku indo kowonsoi’d dusa dot id diya’. ¹² Royohon ku no iya’, oi TUHAN, om tudukai oku no do kowoyo-woyoo’ nu. ¹³ Opuhod indo o boros ku do popinsunud do koinsanai dit oturan di nakatahak nu. ¹⁴ Osonong nogi’ kopio o ginawo ku do tumanud di ponuhuan nu ko’ mantad do dapu’ dot ogumu’. ¹⁵ Minsingilo oku dit oturan nu, om sorisidon ku i ponudukan nu. ¹⁶ Orohian tomod oku dit oturan nu, om a’ ku lihuan i ponuhuan nu. ¹⁷ Kumosonong no dot id doho’, i susuhuon nu, oi TUHAN, om apasi oku i’, om mumboyo’ oku indo di ponudukan nu. ¹⁸ Poungkalato’ no o mato ku, om kokito oku i’ do katapatan di Tourat nu. ¹⁹ Daamot nopo do hiti oku’d pomogunan, om kada’ lisoko’ i toturan nu do mantad id doho’. ²⁰ Oruol po o ginawo ku do langadon, orohian oku no kopio do koilo dit oturan nu do pointikid-tikid do maso. ²¹ Togodon nu i’ i tulun dot asawat o ginawo, papalan nu indo i tulun dit a’ mumboyo’ dit isuhu’ nu. ²² Poiduwo’ oku no do mantad id pongindaraat om ponguntotori’ diyolo’, tu’ tinanud ku i’ it oturan nu. ²³ Mulong piya do mogipapakat i pomorinta’ do sumaap doho’, nga’ momusorou kasai’ oku i’ dit oturan nu. ²⁴ Poposonong do ginawo ku i ponudukan nu, om iri no o monosihat doho’. ²⁵ Poillii oku po om poingisis tomod oku’d pupuk, posio’ oku no kawagu do miagal di nakabatos nu. ²⁶ Naakun ngai’ ku no i nongowonsoi ku, om sinimbar oku iddi diya’, tudukai oku no do tumanud dit oturan nu. ²⁷ Uhupai oku no do tumanud dit oturan nu, om soro-sorohon ku indo kasai’ i nongowonsoi nu di koimayaan kopio. ²⁸ Mihad po o ginawo ku dot adalaan do tumongob, pokoriso’ oku no do miagal di nakabatos nu. ²⁹ Kada’ oku pologoso’ do sumansala’ di ralan, om tudukai oku no do tourat nu tu’ osonong ko i’. ³⁰ Nopili’ ku no do tumanud diya’, pinokinongou ku no kopio i ponudukan nu dit otulid. ³¹ Natanud ku no i pinonuhuan nu, oi TUHAN, kada’ oku pologoso’ dot ointingayam. ³² Tonudon ku i’ i ponuhuan nu, tu’ ruhangan nu i’ o toilaan ku. ³³ Oi TUHAN, tudukai oku no do komoyon di ponudukan nu, om umboyoon ku i’ kasai’ iri. ³⁴ Posuhuto’ oku no di Tourat nu, om umboyoon ku i’ iri, om tonudon ku i’ do mikuwo’d aayi-ayi’ o ginawo ku. ³⁵ Popihuboyo-boyoo’ oku no di ponuhuan nu, tu’ iri no o koonuan ku do kaarapadan. ³⁶ Onuwai oku no do korohian do mumboyo’ di ponudukan nu, do mantad ko’ rumohian do kakayaan. ³⁷ Kada’ oku pologoso’ do mogihum dit aiso’ o kootuk-otukon, kumosonong no dot id doho’ do miagal di nakabatos nu. ³⁸ Sulungon no i batos nu dot id doho’, i susuhuon nu, i batos do pinabatos nu dot id tulun di mumboyo’ diya’. ³⁹ Poiduwo’ oku no do mantad id pongindaraat di poddosi ku, tu’ osonong i’ kopio it oturan nu. ⁴⁰ Orohian kopio oku i’ do mumboyo’ di ponuhuan nu, onuwai oku no do koposion do wagu, tu’ otulid ko i’. ⁴¹ Pointalango’ no o kosianan nu dot id doho’, oi TUHAN, om posio’ oku no do miontok di nakabatos nu. ⁴² Om milo oku id sumimbar di tulun do mongindaraat doho’, tu’ mogondos oku i’ do boros nu. ⁴³ Tulungo’ oku no do popoboros kasai’ dit otopot do pointikid do maso, tu’ pagandasan ku nopo om iri i boros nu dit otulid. ⁴⁴ Mumboyo’ oku i’ kasai’ di Tourat nu, do gisom do poingompus. ⁴⁵ Poimpasi oku indo dot id suang do kosimbayanan, tu’ tumotos kopio oku i’ do mumboyo’ di ponudukan nu. ⁴⁶ Popinsunudon ku nondo i ponuhuan nu dot id piro-piro o raja’, om a’ oku indo ointingayam. ⁴⁷ Asanangan oku i’ do mumboyo’ di ponuhuan nu, tu’ orohian oku i’ kopio’ddi. ⁴⁸ Pusohon ku i’ om korohian ku i ponudukan nu, soro-sorohon ku i’ i boros nu. ⁴⁹ Soroho’ no i batos nu dot id doho’, i susuhuon nu, tu’ iri no o manahak doho’ do pagandasan. ⁵⁰ Oinggorit oku piya nga’ haro i’ o koinsasamod doho’, tu’ minanahak i’ doho’ do koposion i batos nu. ⁵¹ Monogod-togod nopo doho’ i tulun dot asawat o ginawo, nga’ a’ oku i’ nokotongkiad di Tourat nu. ⁵² Osorou ku i’ i toturan nu di hino mantad no di gulu po, om koinsasamod doho’ iri, oi TUHAN. ⁵³ Soira’ di kokito oku’d tulun dot araat do tumolibamban di Tourat nu, om otogod oku no kopio. ⁵⁴ Tontok di maso ku’d poimpasi dot oruuhai do hiti’d pomogunan, om minonulis oku do sinding do pasal di ponuhuan nu. ⁵⁵ Dongotuong nga’ osorou ku i’ iya’, oi TUHAN, om momusorou oku di Tourat nu. ⁵⁶ Koonuan ku nopo do kataadan, om mumboyo’ di ponuhuan nu. ⁵⁷ Iya’ noo o korohian kopio ku, oi TUHAN, mamatos oku no do mumboyo’ do boros nu. ⁵⁸ Aayi-ayi’ no o ginawo ku do mokiinsian diya’, do tumanud di nakabatos nu. ⁵⁹ Nosorisid ku no o kowoyo-woyoon ku, om mamatos oku no do tumanud do ponudukan nu. ⁶⁰ A’ oku no minglaid, suwai ko’ potilombusan ku no do mumboyo’ di ponuhuan nu. ⁶¹ Nakataan no daa di tulun dot araat i lawa’ di pamalawa’ dau doho’, nga’ a’ ku i’ lihuan i Tourat nu. ⁶² Tumungag oku nopo do pitangatuong, do mamarayou diya’ tu’ otulid i’ i ponuhuan nu. ⁶³ Tambalut oku i’ do koinsanai’d tulun di tumanud di ponuhuan nu. ⁶⁴ Oi TUHAN, noponu’ po iti pomogunan do kosianan nu dit aiso’ o kotingkadan, tudukai oku no di ponuhuan nu. ⁶⁵ Sinulung nu i’ i batos nu, oi TUHAN, om mamadul ko doho’, i susuhuon nu. ⁶⁶ Onuwai oku no do toilaan om pomusorou dit atarom, tu’ otumbayaan oku i’ di ponuhuan nu. ⁶⁷ Tontok nopo dit a’ oku po diya’ nohukuman, om kasala’ oku nopo, nga’ mumboyo’ oku noddi do boros nu do baino’. ⁶⁸ Osonong ko no kopio, om osonong o wonsoyon nu, tudukai oku no do ponuhuan nu. ⁶⁹ Mongindaraat doho’ i tulun dot asawat o ginawo, nga’ aayi-ayi’ i’ o ginawo ku do mumboyo’ di ponudukan nu. ⁷⁰ Aiso’ i’ o tosuhut-suhutan do tulun diti, nga’ poposonong i’ do ginawo ku iyoho’ it Tourat nu. ⁷¹ Nokoinsonong nogi’ doho’ i pinomohukum nu, tu’ minonuduk doho’ do minsingilo di ponuhuan nu. ⁷² Haro nogi’ kopio o gatang dit oturan do pinatahak nu doho’, ko’ mantad do koinsanai di dapu’ do hiti’d pomogunan. ⁷³ Winonsoi oku diya’, om ginompi’ oku diya’, onuwai oku no do toilaan, om koilo oku i’ dit oturan nu. ⁷⁴ Tulun nopo di momusou diya’, om ooropod i’ do kokito doho’, tu’ mogondos oku i’ di batos nu. ⁷⁵ Oilaan ku i’ dot otulid i boros nu, oi TUHAN, om hinukuman oku diya’ tu’ otorodok ko i’. ⁷⁶ Pologoso’ no do koinsasamod kasai’ doho’ i kosianan nu dit aiso’ o kotingkadan, do miagal di nakabatos nu doho’, i susuhuon nu. ⁷⁷ Kosianai no doho’, om apasi oku i’, tu’ poposimbayan i’ do ginawo ku i Tourat nu. ⁷⁸ Pologoso’ no dot ointingayam i tulun dot asawat o ginawo tu’ mingudut iyolo’ do papasala’ doho’, nga’ iyoho’ nopo, om momusorou i’ di ponudukan nu. ⁷⁹ Pologoso’ no do rumikot dot id doho’ i tulun do momusou diya’, om koinsanai’d tulun di koilo do ponuhuan nu. ⁸⁰ Pologoso’ no dot osombulu’ kopio o ginawo ku do tumanud di ponuhuan nu, om a’ oku i’ ointingayam. ⁸¹ Olomok oku po tomod do mandad diya’ do mongoi pamasi doho’, oi TUHAN, iri po batos nu o pagandasan ku. ⁸² Opodi’ po tomod o mato ku do miontong diya’ do mamayaan di pinabatos nu, om minguhot oku do poingkaa, ’’Soira’ ko nondo do monginsasamod doho’?’’ kangku no. ⁸³ Aiso’ no o guna-guna’ ku, miagal oku pod kantung do kulit di niada’, nga’ a’ ku i’ nolihuan i ponuhuan nu. ⁸⁴ Piro po koloido’ ku do mandad? Songgira’ nu do hukuman i tulun do monginggorit doho’? ⁸⁵ Tulun nopo dit asawat o ginawo, it a’ mumboyo’ do Tourat nu, om nokopongukad nod luang do popohudsu doho’. ⁸⁶ Milo ngai’ id sondihon i toturan nu, tulungo’ oku no, tu’ gusaon oku om aiso’ i’ o paantakan. ⁸⁷ Oruhai no daa iyolo’ do kapamatai kopio doho’, nga’ a’ ku i’ tinongkiadan i ponuhuan nu. ⁸⁸ Kumosonong no dot id doho’, om mumboyo’ oku i’ di ponudukan nu tu’ aiso’ i’ o kotingkadan di kosianan nu. ⁸⁹ Mompus-ompus i boros nu, oi TUHAN, poingompus-ompus i’ do hilo’d surga. ⁹⁰ A’ i’ atanus o kotorodoko’ nu do piro-piro piya koloido’, nokogirot nu no iti pomogunan, om poingiyo kasai’ nodti. ⁹¹ Hino kasai’ po o koinsanai do nunu nopo do gisom do tadau’d baino’ tu’ pogiroton ngai’ iri di boros nu, om susuhuon ngai’ nu iyolo’. ⁹² Ondung okon daa ko’ i Tourat nu o tadon do kataadan ku, om napatai oku no daa di koinggoritan ku. ⁹³ A’ ku i’ kopio iyadaan i ponudukan nu, tu’ iri no o pinamasi nu doho’. ⁹⁴ Posio’ oku no, tu’ iya’ i’ o sanganu doho’, om tuminotos oku i’ do mumboyo’ di ponuhuan nu. ⁹⁵ Poingandad no o tulun dot araat do mamatai doho’, nga’ mamadul oku i’ iyoho’ di boros nu. ⁹⁶ Noilaan ku no do haro ngai’ i’ o gisom do nunu nopo, nga’ iri nopo boros nu om aiso’ i’ o kogisomon. ⁹⁷ Orohian tomod oku di Tourat nu, om iri nopo o sorohon ku do monongodou-ngodou. ⁹⁸ Soro-sorohon kasai’ ku nopo i boros nu, tu’ iri no o popomilo doho’ do mantad ko’ i pisangod ku. ⁹⁹ Ogumu’ nogi’ o doho’d osuhutan ko’ i monuduk doho’, tu’ minsingilo oku i’ di ponuhuan nu. ¹⁰⁰ Ogumu’ nogi’ o doho’d toilaan ko’ i komolohingan, tu’ mumboyo’ oku i’ do ponuhuan nu. ¹⁰¹ Mininsodu’ oku do koinsanai do kowoyo-woyoon dot araat, tu’ orohian oku i’ do mumboyo’ di boros nu. ¹⁰² A’ ku i’ niadaan i ponudukan nu, tu’ orohian oku i’ do mumboyo’ di boros nu. ¹⁰³ Oomis tomod i ponudukan nu, oomis po ko’ paha’! ¹⁰⁴ Kaanu oku do toilaan do mantad id boros nu, gisom dot araatan oku’ddi do koinsanai’d kowoyo-woyoon dot araat. ¹⁰⁵ Boros nu nopo om miagal do lampung do potunud doho’, om monitiu do ralan ku. ¹⁰⁶ Bayaanon ku i’ i batos ku di mikuwo’d sumpa’ do mumboyo’ di ponudukan nu dit otulid. ¹⁰⁷ Ouruan oku no kopio dot oinggorit, oi TUHAN, gompio’ oku no do miagal di nakabatos nu. ¹⁰⁸ Romito’ no iti sambayang ku do mongunsikou, oi TUHAN, om tudukai oku no do boros nu. ¹⁰⁹ Posodia’ kasai’ oku i’ do papatahak do koposion ku do gisom dot apatai, nga’ a’ ku i’ lihuan i Tourat nu. ¹¹⁰ Nokowonsoi nod tulun dot araat o lawa’ do pamalawa’ doho’, nga’ a’ oku i’ suminansala’ do boros nu. ¹¹¹ Iri no i ponudukan nu o panakadapu’ ku do gisom dot alaid, iri no i kataadan do ginawo ku. ¹¹² Nokopomusorou oku no kopio do mumboyo’ di boros nu, do gisom do tikapatai ku. ¹¹³ Araatan oku di tulun dit a’ iso-iso’ o ginawo do tumanud diya’, nga’ asanangan oku i’ di Tourat nu. ¹¹⁴ Iya’ no o mogobi’ om mongintirung doho’, mogondos oku i’ di batos nu. ¹¹⁵ Oi tulun di kidusa! poggidu’ no do mantad id doho’! Tu’ orohian oku i’ do mumboyo’ do ponuhuan do Kinorohingan ku. ¹¹⁶ Onuwai oku no do kokorisan do miagal di nakabatos nu om apasi oku i’, kada’ oku pologoso’ dot oiman-iman di soro-sorohon ku. ¹¹⁷ Ahako’ oku no om aiso’ i’ o koligagaanan ku, om mamadul kasai’ oku i’ di ponudukan nu. ¹¹⁸ Iyadaan ngai’ nu i’ i tulun di sumansala’ do ponudukan nu, tu’ aiso’ i’ o kootuk-otukon di pakat diyolo’ di mingudut. ¹¹⁹ Iyoon nu pod rinomos i tulun dot araat, om asanangan oku’ddi di ponudukan nu. ¹²⁰ Gagaran oku po dot ooris diya’, noponu’ oku pod kopoddosian di pomohukum nu. ¹²¹ Nowonsoi ku no it otopot om osonong, kada’ oku patahako’ dot id pisangod ku. ¹²² Pamatos no do monguhup doho’, kada’ pologoso’ i tulun dot asawat o ginawo do mongulok-ulok doho’. ¹²³ Opodi’ po o mato ku do miontong diya’ do mongoi pamasi doho’, magandad oku di maso do kopoiduan di pinabatos nu. ¹²⁴ Wonsoyo’ no dot id doho’ o miontok di kosianan nu dit aiso’ o kotingkadan, om tudukai oku no do ponudukan nu. ¹²⁵ Susuhuon oku i’ diya’, om posuhuto’ oku no, om kosuhut oku i’ do ponudukan nu. ¹²⁶ Oi TUHAN, norikot noddi o maso nu do momonsoi di powonsoyon nu, tu’ sumaap no o tulun di Tourat nu. ¹²⁷ Orohian oku i’ di boros nu do mantad ko’ i tamas do nosompipi’. ¹²⁸ Om iri no o kotonudan ngai’ ku di ponuhuan nu, om araatan oku do koinsanai di kowoyo-woyoon di kasala’. ¹²⁹ Osonong tomod o ponudukan nu, om aayi-ayi’ noddi o ginawo ku do mumboyo’ddi. ¹³⁰ Manahak do tulinau i ponudukan nu do tontok di potudukon, om manahak do toilaan dot id tulun di basug. ¹³¹ Iyo po dit adalaan tomod do tuuhan o kalangado’ ku di ponudukan nu. ¹³² Antangai oku no om kosianai no doho’, do miagal di wonsoyon nu dot id toinsanan o tulun dit osianan diya’. ¹³³ Poundaro’ no o pamanau-panau ku do miagal di nokoboros nu, kada’ oku pologoso’ dot oporinta’ dit araat. ¹³⁴ Poiduwo’ oku no do mantad id tulun di mongulok-ulok doho’, om mumboyo’ oku i’ di ponudukan nu. ¹³⁵ Ontong no doho’ do mikuwo’d osianan, om tudukai oku no do boros nu. ¹³⁶ Miagal pod bawang o romou ku do lumuyung, tu’ a’ do tulun umboyoon i tourat nu. ¹³⁷ Otulid ko no kopio oi TUHAN, om oturan nu nga’ otulid ngai’ nopo. ¹³⁸ Ponuhuan nopo di nakatahak nu, om otulid i’ om otopot ngai’. ¹³⁹ Miagal pod tapui o kototogod ku, tu’ a’ mamadul di boros nu i pisangod ku. ¹⁴⁰ Ogirot ngai’ i’ o batos nu, om milo do ponongkuyaanan, om kasanangan tomod ku iri. ¹⁴¹ Aiso’ i’ o ngaran-ngaran ku om ulak-ulakan oku, nga’ a’ ku i’ niada’ i ponudukan nu. ¹⁴² Mompus-ompus i’ i kotulido’ nu, om otopot kasai’ i Tourat nu. ¹⁴³ Noponu’ oku pod kosusaan om katangkabaan, nga’ manahak i’ doho’ do kataadan i boros nu. ¹⁴⁴ Otulid kasai’ i’ i ponudukan nu, posuhuto’ oku no, om apasi oku i’. ¹⁴⁵ Aayi-ayi’ no ginawo ku do lumohou diya’, simbaro’ oku no oi TUHAN, om mumboyo’ oku i’ di boros nu. ¹⁴⁶ Lumohou oku diya’, posio’ oku no, om igitan ku i’ o ponudukan nu. ¹⁴⁷ Osuab po om lumohou oku no do mokiuhup diya’, mogondos oku i’ di batos nu. ¹⁴⁸ Monuaban oku nopo dot a’ koodop, do momusorou di ponudukan nu. ¹⁴⁹ Tu’ aiso’ i’ o kopupuson do kosianan nu, pokinongoho’ oku no oi TUHAN. Pointalango’ no o kosianan nu, om gompio’ oku no. ¹⁵⁰ Momok-somok no i tulun dot ongorongit di monginggorit doho’, i tulun dit a’ insan tanud do Tourat nu. ¹⁵¹ Nga’ osomok ko i’ doho’, oi TUHAN, om otopot kasai’ o boros nu. ¹⁵² Nokopinsingilo oku no do ponudukan nu di gulu po, natantu’ nu no do mompus-ompus kasai’ i’ iri. ¹⁵³ Antangai no iti koinggoritan ku, om posio’ oku no, tu’ a’ ku i’ niada’ i Tourat nu. ¹⁵⁴ Obiai oku no, om poiduwo’ oku no, posio’ oku no do miagal di nakabatos nu. ¹⁵⁵ Tulun nopo dot araat om a’ i’ posion, tu’ a’ iyolo’ mumboyo’ di ponudukan nu. ¹⁵⁶ Nga’ agayo i’ o kolisihan nu, oi TUHAN, pointalango’ no o kosianan nu, om posio’ oku no do miontok dit oturan nu. ¹⁵⁷ Ogumu’ o pisangod om ogumu’ o tulun di mongulok-ulok doho’, nga’ a’ oku i’ tumingkod do mumboyo’ di boros nu. ¹⁵⁸ Araatan oku no kopio do kokito di tulun do popohudsu, tu’ a’ iyolo’ mumboyo’ di boros nu. ¹⁵⁹ Antangai pogi’ o korohiano’ ku di ponudukan nu, oi TUHAN, posio’ oku no tu’ a’ i’ insan do sumimban o kosianan nu. ¹⁶⁰ Otopot ngai’ nopo i ponudukan nu, om mompus-ompus kasai’ it oturan nu dit otulid. ¹⁶¹ Saapon oku do tulun dit ongokoris dot aiso’ o paantakan, nga’ momusou oku i’ di Tourat nu. ¹⁶² Ooropod tomod oku dot i batos nu o kaarapadan ku, miagal pod tulun di nakaanu do dapu’ o kooropodo’ ku. ¹⁶³ Araatan oku om mada’ kopio oku do tudut, nga’ asanangan oku i’ di Tourat nu. ¹⁶⁴ Mongunsikou kasai’ oku nopo diya’ do pointikid-tikid do tadau, dot it oturan nu dit otulid o kopongunsikahan ku. ¹⁶⁵ Tulun nopo dit asanangan do Tourat nu, om kikosimbayanan no kopio, om aiso’ no o milo do paparatu’ diyolo’. ¹⁶⁶ Mandad oku nopo diya’ do mongoi pamasi doho’, oi TUHAN, om wonsoyon ku i ponuhuan nu. ¹⁶⁷ Tonudon ku i’ i ponudukan nu, tu’ aayi-ayi’ no o ginawo ku dot orohian diri. ¹⁶⁸ Tonudon ku i’ i boros nu om i ponudukan nu, okito ngai’ nu i’ o wonsoyon ku. ¹⁶⁹ Pologoso’ no do korikot dot id diya’ o giniakan ku do mokitulung, oi TUHAN, onuwai oku no do ginawo dit obinsuhut do miagal di pinabatos nu. ¹⁷⁰ Pokinongoho’ no iti sambayang ku, om posio’ oku no do miontok di batos nu. ¹⁷¹ Royohon kasai’ ku indo iya’, tu’ tudukan oku i’ diya’ di boros nu. ¹⁷² Sindingon ku indo i Tourat nu, tu’ otulid ngai’ i’ o ponudukan nu. ¹⁷³ Sumodia’ kasai’ no do monulung doho’, tu’ tumanud oku i’ di ponuhuan nu. ¹⁷⁴ Langadon oku no do posion nu, oi TUHAN, nosiliu do kaarapadan ku i Tourat nu. ¹⁷⁵ Onuwai oku no do koposion, om royohon ku i’ iya’, pologoso’ no do kotulung doho’ i ponudukan nu. ¹⁷⁶ Minghombo oku po do miagal do dumba’ di natagak, rikot no do mongoi pogihum doho’, i susuhuon nu, tu’ a’ ku i’ nadaan i boros nu.

¹ Sinding do mongoi kakap. Tontok dit id suang oku do kosusaan, om luminohou oku diya’, oi TUHAN, om sinimbar oku i’ diya’. ² Poiduwo’ oku no, oi TUHAN, do mantad id tulun di gomponipu’ om i tulun di goudut. ³ Oi tulun do goudut, nunu no o wonsoyon do Kinorohingan dot id dokoyu? Poingkuro iyau do momohukum dokoyu? ⁴ Hukuman kou do pana’ do soudor dit atarom, om popou dit aragang o kolosuo’! ⁵ Miagal pod poingiyon do hilo’d Misik o karaato’ do poinsugku’ dokoyu, om miagal do poinsugku’ di tulun do Kidar. ⁶ Alaid oku noddi kopio do poinsugku’ do tulun dit araatan do piuludan. ⁷ Soira’ nopo do momoros oku do pasal do piuludan, om pisangadan nogi’ o diyolo’d poboroson.

¹ Sinding do mongoi kakap. Tontok do montong oku do hilo’d konuluhanan, om oilaan ku no o tadon di monulung doho’. ² TUHAN no o tadon di monulung doho’, iyau i minomonsoi do tawan om pomogunan. ³ A’ ko i’ dau pologoson dot aratu’, poimposik kasai’ i’ i mongintirung diya’. ⁴ Iri nopo mongintirung dot Israil, om a’ i’ koumbal do kotudu’ ko’ koodop. ⁵ Tamangan ko id TUHAN, hiri i’ iyau id toning nu do mongintirung diya’. ⁶ A’ i’ pokoruol diya’ i tadau do dangadau, om i tulan nga’ a’ i’ pokoruol diya’ do dongotuong. ⁷ Intirungan ko id TUHAN do mantad id koinsanai di koligagaanan, gompion ko i’ dau om osimbayan ko i’. ⁸ Intirungan ko i’ dau do tontok di rumikot ko, om tontok di mamanau ko, do baino’ om gisom dot alaid.

¹ Sinding di Daud do mongoi kakap. Ooropod tomod oku do tontok di minomoros o tulun dot id doho’ do poingkaa, ’’Kainou mongoi do hilo’d Walai’d TUHAN,’’ ka. ² Om baino’ noddi om hiti toko’ no, do nokosuang no diti bandar do Yorusalim do minaya’ di wawayaan. ³ Yorusalim nopo om bandar di winonsoi kawagu, om olumis o pinomonsoi om sinonong kopio. ⁴ Hiti no o ngoyon di piro-piro payat dot Israil, do mongoi pongunsikou dot id TUHAN do miontok di ponuhuan dau. ⁵ Hiti no i raja’ dot Israil, do mirikau do momutus di rayat diyolo’. ⁶ Sambayang no do bagi’ do kouludan do Yorusalim, ’’Pologoso’ no do kumaya’ om osimbayan i tulun di kosianan nu. ⁷ Pologoso’ no do haro o kouludan dot id suang do watas nu, om haro o kosimbayanan dot id suang do walai’d raja’,’’ ka. ⁸ Momoros oku dot id Yorusalim do pogobi’ ku di koobpinayan om i tongotambalut ku do poingkaa, ’’Maha’ daa om osonong-sonong kou!’’ ka. ⁹ Sumambayang oku om osimbayan ko i’, dot i Walai’d Sasambayangan dot Agayo o kasambayangan ku.

¹ Sinding do mongoi kakap. Oi TUHAN, tumingaha’ oku dot id diya’, do hilo’d surga i kinoiyonon nu do momorinta’. ² Poingkuro nopo i susuhuon do sumondiu di tuan dau, om poingkuro nopo i susuhuon do tondu’ do sumondiu di tondu’ di sanganu di karajaon dau, om iyo noddi iyahai do sumondiu kasai’ diya’, oi TUHAN i Kinorohingan dahai, gisom i’ dot insianan nu iyahai. ³ Kosianai no dahai, oi TUHAN, kosianai no dahai, tu’ adalaan no kopio o pongindaraat diyolo’ dahai. ⁴ Alaid noddi kopio iyahai dot untotorion di tulun do kaya’, om hingi-hingion iyahai di tulun di mongulok-ulok dahai dit ongoondos tomod.

¹ Sinding di Daud do mongoi kakap. Poingkuro no daa’ddi dot a’ daa minogobi’ dati’ o TUHAN? Posimbaro’ no o poingkaa, oi Israil, ² ’’Ondung a’ daa minogobi’ dati’ o TUHAN do tontok di sinangod toko’ di pisangod toko’, ³ om atantu’ no do miaho’ toko’ nopo daa diyolo’ do minonolon dot atatagadan dati’. ⁴ Om natanggayan toko’ no daa di luyud, om noolitan toko’ di waig. ⁵ Om nolondod toko’ no daa do hiri’d waig di monomporiu-riu,’’ ka. ⁶ Kainou mongunsikou’d TUHAN, tu’ a’ pinopologos do pisangod toko’ do minamatai dati’. ⁷ Nokoidu’ toko’ i’ do miagal di tombolog do nakalabus do mantad id lawa’ di tulun di mongintorus, noputut no i lawa’ om nakalabus toko’ no. ⁸ Tadon nopo di monunulung dati’ om TUHAN i’, iyau i minomonsoi do tawan om pomogunan.

¹ Sinding do mongoi kakap. Tulun nopo di mogondos do TUHAN om miagal no di Nuluhon do Sion, tu’ a’ no milo’d guyuon, om a’ milo’d powolihon. ² Poingkuro nopo i nuluhon do mongintirung do Yorusalim, om iyo noddi o TUHAN do mongintirung di tulun dau do baino’ om gisom dot alaid. ³ Okon i’ ko’ poinsari-sari’ i tulun dot araat do momorinta’ di pomogunan do tulun dot otopot, tu’ ondung iyolo’ kasai’ o momorinta’ om kowonsoi dotindo dot araat i tulun dot otopot. ⁴ Oi TUHAN, wonsoyo’ no it osonong dot id tulun dit osonong, om id tulun di mumboyo’ do boros nu. ⁵ Soira’ nopo do momohukum ko di tulun dot araat, om potonggoyon nod momohukum i tulun di sumansala’ di ponudukan nu. Maha’ daa om haro o kouludan di tulun nu!

¹ Sinding do mongoi kakap. Tontok di pinoguli’ kawagu toko’d TUHAN do hilo’d Yorusalim, om miagal pori do nipi! ² Mingirak toko’ po om minsinding toko’ dot aarapadan, om boros kaddi di piro-piro bansa’d suwai dot iyati’ o komoyon, ’’Koimayaan no kopio i winonsoi’d TUHAN dot id diyolo’,’’ ka. ³ Om otopot no kopio do kongoimayaan i winonsoi dau dot id dati’; olumaag toko’ no kopio! ⁴ Oi TUHAN, pogulio’ no iyahai do hilo’d pomogunan dahai, do miagal di rasam tu’ poguli’ do waig dot id kinarasakan do bawang. ⁵ Pologoso’ no i tulun di songihad-ihad do pinapatanom do linsou, dot ongooropod do mongoi ponimung di tua’. ⁶ Iri nopo tulun do songihad-ihad do minongoi patanom do linsou do hilo’d dumo, om sonsinding-sinding indo dot atataadan do gumuli’ iyolo’ dot ongkiinigit di tua’ di tinanom diyolo’.

¹ Sinding di Suliman. Ondung okon ko’ TUHAN o mamaal do walai, om aiso’ i’ o kotutuk-tutukon di karaja’ do tulun do mamaal. Ondung okon ko’ TUHAN o madtamong do bandar, om aiso’ i’ o guna’ di tulun do madtamong. ² Aiso’ i’ o guna’ do tumotos piya do mogihum do kaakan-akanan, do sumuab do mosik om lumaid do mongoi odop. Tu’ patahakon ngai’ id TUHAN iri dot id tulun di kosianan dau, di maso po diyolo’d koodop. ³ Tangaanak nopo om nipuhawang i’ do mantad id TUHAN, iyolo’ nopo om barakat i’ kopio do mantad id Kinorohingan. ⁴ Iri nopo tanak do kusai do tanak do songulun o kusai dit omulok po iyau, om miagal pod pana’ do poingigit do soudor. ⁵ Olumaag no i tulun di kipana’ do miagal diri. Tu’ a’ nondo iyau koumbal dot aala’ do tontok do kosolowot iyau di pisangod dau do hilo’d tiyonon do mogibisara’.

¹ Sinding do mongoi kakap. Olumaag no i tulun di mumboyo’d TUHAN, om i tumanud di ponuhuan dau. ² Kaakan ko i’ do hasil do karaja’ nu, om otood ko indo om osimbayan. ³ Iri nopondo sawo nu om miagal pod guas dot anggur dit asapou o tua’ dot id walai nu, om i tangaanak nu nga’ miagal pod guas do saitun dit ongokoro’ po, do posorili’ di mija’ nu. ⁴ Tulun nopo do mumboyo’d TUHAN om atantu’ nod barakatan do TUHAN do miagal diri. ⁵ Maha’ daa om barakatan ko’d TUHAN do mantad hilo’d Sion. Maha’ daa om kokito ko do kosimbayanan do Yorusalim do solinaid nu do poimpasi! ⁶ Maha’ daa om otogui ko om kokito ko po di manangaki diya’! Maha’ daa om haro o kouludan di tulun nu!

¹ Sinding do mongoi kakap. Oi Israil, sunudai daa iyahai ondung poingkuro i pisangod nu do minonginggorit diya’ do mantad dit okoro’ ko po. ² ’’Mantad po dit okoro’ oku po, om pinadalaan mantad oku no di pisangod ku do minonginggorit, nga’ a’ oku i’ ma diyolo’ naala’. ³ Aralom tomod o sinuhat diyolo’ dot id likud ku, om gisom do miagal pod tumo di rinadu o likud ku. ⁴ Nga’ TUHAN i’, it otulid, o pinopoidu’ doho’ do mantad id pinonguripanan,’’ ka. ⁵ Pologoso’ no dot angaala’ om ongouyung, o koinsanai’d tulun dit araatan do Sion. ⁶ Pologoso’ no iyolo’ do miagal di sakot di songinsuni do hilo’d sakai’d taap do walai, tu’ a’ po kosuni kopio om oriou no. ⁷ Aiso’ o mongoi ponimung diri, om aiso’ o mongoi pomongkos. ⁸ Om aiso’ i’ o tiso’ di tulun di santalib-talib do momoros dot, ’’Maha’ daa om barakatan ko’d TUHAN! Barakatan dahai iya’ dot id suang do ngaran do TUHAN,’’ ka.

¹ Sinding do mongoi kakap. Lumohou oku diya’, oi TUHAN, do maso ku dot id suang do kosusaan dit awagat kopio. ² Pokinongoho’ no iti lolohou ku, oi TUHAN, pokinongoho’ no iti lolohou ku do mokitulung. ³ Ondung sorohon kasai’ nu i dusa dahai, om isai poddi o kopoggidu’ do mantad id hukuman? ⁴ Nga’ nompunan nu i’ iyahai, om oronok indo iyahai diya’. ⁵ Mandad-andad tomod oku dot itulung do TUHAN, om mogondos oku di batos dau. ⁶ Poillobi po o pagagandad ku’d TUHAN ko’ mantad di pagagandad di tulun do madtatamong do magandad do kanawahan. ⁷ Oi Israil, pogondos nod TUHAN, tu’ mompus-ompus i’ o kosianan dau, om orohian kasai’ iyau do mamasi. ⁸ Poiduwon i’ dau ot Israil i tulun dau, do mantad id koinsanai’d dusa diyolo’.

¹ Sinding di Daud do mongoi kakap. Oi TUHAN, naadaan ku no i kasasawat do ginawo ku, om nokotolikud oku no di kobinggoyo-goyoo’ ku. A’ oku no minsorou do hal dit angagayo ko’ minsorou po di hal dot adalaan kosusa’ do bagi’ doho’. ² Suwai ko’ abagalan oku no om osimbayan oku. Poingkuro nopo i tanak di poingkibit di tina’ dau tu’ aiso’ no o gura- gura’ do nokosusu, om iyo noddi o ginawo ku tu’ osimbayan noddi. ³ Oi Israil, pogondos nod TUHAN, do mantad do baino’ om gisom dot alaid!

¹ Sinding do mongoi kakap. Oi TUHAN, kada’ lihuwai i Daud, om koinsanai di kinoinggoritan dau. ² Oi TUHAN, soroho’ no i batos do pinoboros dau dot id diya’, i Kinorohingan di Yakub, dit Okoris Kopio, do poingkaa, ³ ’’A’ oku po muli’ ko’ mongoi po odop; ⁴ a’ oku po mundorong ko’ modop po do hilo’d kiim ku, ⁵ dot a’ ku po kosodia’ o tiyonon do TUHAN, i walai do Kinorohingan di Yakub dit Okoris Kopio,’’ ka. ⁶ Nokorongou toko’ do pasal di Kaban do Tumpongo di hilo’ toko’d Baitlahim, om kokito toko’ noddi iri do hilo’d koumaan do Yaar. ⁷ Minomoros toko’ do poingkaa, ’’Kainou mongoi do hilo’d Walai’d TUHAN, kainou mongoi sambayang do hiri’d toguang di tirikohonon dau di don raja’,’’ ka. ⁸ Ongoi no do hilo’d Walai’d Sasambayangan dot Agayo, oi TUHAN, do miwoyo’ di Kaban do Tumpongo, i tanda’ do sinundu nu, om mundorong no kasai’d hilo’. ⁹ Pologoso’ no do miontok kasai’ di korohian nu o wonsoyon di piro-piro imam di mogobi-obi’ diya’, pologoso’ no do mimpangkis dot aarapadan i tulun nu. ¹⁰ Minamatos ko dot id di Daud, i susuhuon nu, kada’ iyadaai i raja’ do nopili’ nu, oi TUHAN. ¹¹ Minamatos ko dot id di Daud, i batos dit a’ no milo dot a’ sulungon. Boros ka nu, ’’Silihon ku’d raja’ o tiso’ di tangaanak nu om iyau no o sumowoli diya’ do momorinta’. ¹² Om ondung tumorodok kasai’ iyau dot id tumpongo ku, om mumboyo’ di boros ku, om iri nondo tangaanak dau nga’ osiliu no do raja’ do sumowoli diya’ do gisom dot alaid,’’ ka. ¹³ Nopili’ nod TUHAN o Sion, silihon dau iri do walai dau. ¹⁴ Boros ka nu, ’’Hiti no o tiyonon ku do gisom dot alaid, hiti no o tiyonon ku do momorinta’. ¹⁵ Om patahakon ku indo o koinsanai di pokionuon do Sion, om pakayahanon ku do taakanon i tulun do mosikin do hilo’. ¹⁶ Om barakatan ku indo it imam di mogobi-obi’ dau do nunu nopo o wonsoyon diyolo’, om modsinding nondo om mimpangkis dot aarapadan i tulun do hilo’. ¹⁷ Om hilo’ no do silihon ku’d raja’ dot agayo o tiso’ di tangaanak di Daud, om hilo’ no do pogiroton ku o pomorintaan di raja’ do nopili’ ku. ¹⁸ Om lopoton ku nondo do tingayam i pisangod dau, nga’ pomorintaan nopo dau om haro i’ o kosimbayanan,’’ ka.

¹ Sinding di Daud do mongoi kakap. Okuro-kuro nopo daa o kosonongo’ om kosimbayano’, do mogiuulud o tulun do Kinorohingan! ² Miagal pori di tumau do ponununtug dit agayo gatang di pinotuntug do hiri’d tulu di Harun om koluyung do hiri’d ganggut dau, om koluyung do hiri’d liou do rasuk dau. ³ Miagal pori di bolobou do hilo’d Nuluhon do Hormon, do sumondot do hilo’d konulu-nuluan do Sion. Hilo’ no o pinabatasan do TUHAN di barakat dau iri no i koposion dot aiso’ o kopupuson.

¹ Sinding do mongoi kakap. Kainou mamarayou’d TUHAN, koinsanai dokoyu i susuhuon dau, koinsanai di maganu-anu do hiri’d Walai’d Sasambayangan dot Agayo do dongotuong. ² Poinsawato’ no o longon dokoyu do sumambayang do hiri’d Walai’d Sasambayangan dot Agayo, om royohon no o TUHAN! ³ Maha’ daa om barakatan kou’d TUHAN do mantad hilo’d Sion. Iyau i minomonsoi’d tawan om pomogunan!

¹ Royohon no o TUHAN! Royohon no o ngaran dau, koinsanai dokoyu i susuhuon do TUHAN, ² i maganu-anu do hilo’d Walai’d TUHAN, i hilo’d tiyonon do Kinorohingan toko’. ³ Royohon no o TUHAN, tu’ osonong i’ iyau, podsinding no do mamarayou do ngaran dau, tu’ opuhawang i’ iyau. ⁴ Pinili’ dau i Yakub do maan dau do dau’d songonuon, om siniliu dau do dau’d songonuon i tulun dot Israil. ⁵ Oilaan ku no dot agayo o TUHAN toko’, om agayo po kopio iyau ko’ koinsanai’d tingolig. ⁶ Wonsoyon ngai’ nopo dau i korohian dau, do hilo’d tawan om hiti’d pomogunan, om hilo’d rahat om hilo’d saalom do rahat dot agayo. ⁷ Poporikot iyau do pituongon om tongus do mantad hilo’d tisan diti tana’, om wansayan dau do kodumaat i tongus, om posoliwanon dau i ribut do mantad hiri’d pinoopian dau’ddi. ⁸ Pinatai dau i kotuahan do tanak do tulun, om nintorusan do hilo’d Masir. ⁹ Minomonsoi iyau do piro-piro o kopusahan do hilo’, do pomohukum di raja’ om i pagawai dau. ¹⁰ Ogumu’ o bansa’ do rinaag dau, om pinatai dau i raja’ dot ongokoris: ¹¹ i Sihon i raja’ do tulun dot Amori om i Og, i raja’ do Basan, om koinsanai di raja’ do hilo’d Kanaan. ¹² Pinatahak dau i tana’ diyolo’ddi dot id Israil, i tulun dau. ¹³ Oi TUHAN, popinsusuyon ko indo kasai’ do Kinorohingan ko, om soro-sorohon ko kasai’ do koinsanai di sinakagon di sumolusuk. ¹⁴ Obian nu i’ i tulun nu, oi TUHAN, om insianan nu i susuhuon nu. ¹⁵ Tingolig nopo di piro-piro bansa’ om pirok i’ om tamas do winonsoi om winorun do longon do tulun. ¹⁶ Kikabang i’ daa iyolo’ nga’ a’ i’ koboros, om kimato nga’ a’ i’ kokito. ¹⁷ Kitolingo i’ daa iyolo’ nga’ a’ i’ korongou, om aiso’ o pinuhobo diyolo’. ¹⁸ Pologoson no dot oinsanan i minomonsoi di tingolig diri om i mogondos diri dot osiliu do miagal di tingolig di winonsoi diyolo’. ¹⁹ Royohon no o TUHAN, oi tulun dot Israil, royohon no iyau, oi nabi do Kinorohingan! ²⁰ Royohon no o TUHAN, oi tulun do Liwi, royohon no iyau, koinsanai dokoyu i sumambayang dot id dau! ²¹ Royohon no o TUHAN do hilo’d Sion, do hilo’d Yorusalim, i tiyonon dau. Royohon no o TUHAN!

¹ Pongunsikou nod TUHAN tu’ osonong i’ iyau, om mompus-ompus o kosianan dau. ² Pongunsikou no dot id dau, it agayo ko’ mantad do koinsanai’d ponokokinorohingan do suwai, tu’ mompus-ompus i’ o kosianan dau. ³ Pongunsikou nod TUHAN, iyau it okoris ko’ mantad do tuhan do suwai, tu’ mompus-ompus i’ o kosianan dau. ⁴ Iyau noo o momonsoi do kopusahan dit angagayo, mompus-ompus i’ o kosianan dau. ⁵ Winonsoi dau ilo tawan dot i toilaan dau o pinomonsoi, mompus-ompus i’ o kosianan dau. ⁶ Winonsoi dau iti pomogunan dot id sakai’d waig, mompus-ompus i’ o kosianan dau. ⁷ Winonsoi dau ilo tadau om tulan, mompus-ompus i’ o kosianan dau; ⁸ momorinta’ ilo tadau do dangadau, mompus-ompus i’ o kosianan dau; ⁹ momorinta’ ilo tulan om rombituon do dongotuong, mompus-ompus i’ o kosianan dau. ¹⁰ Pinatai dau i tanak do kusai dot id gulu di tulun do Masir, mompus-ompus i’ o kosianan dau. ¹¹ Pinosoliwan dau i tulun dot Israil do mantad hilo’d Masir, mompus-ompus i’ o kosianan dau; ¹² dot i longon dau dit okoris om kisinundu o pinoposoliwan, mompus-ompus i’ o kosianan dau. ¹³ Pinigirang dau i Rahat dot Aragang, mompus-ompus i’ o kosianan dau; ¹⁴ winoyo’ dau i tulun dau do suminoborong di rahat, mompus-ompus i’ o kosianan dau. ¹⁵ Nga’ linondod dau i raja’ do Masir om i soudor di raja’ddi, mompus-ompus i’ o kosianan dau. ¹⁶ Winoyo’ dau i tulun dau do minaya’ di tana’ do kowotuan, mompus-ompus i’ o kosianan dau. ¹⁷ Pinatai dau i raja’ dot ongokoris, mompus-ompus i’ o kosianan dau; ¹⁸ pinatai dau i raja’ dot angabantug, mompus-ompus i’ o kosianan dau; ¹⁹ i Sihon, i raja’ dot Amori, mompus-ompus i’ o kosianan dau; ²⁰ om i Og, i raja’ do Basan, mompus-ompus i’ o kosianan dau. ²¹ Pinatahak dau i tana’ diyolo’ dot id tulun dau, mompus-ompus i’ o kosianan dau; ²² pinatahak dau iri dot id Israil, i susuhuon dau, mompus-ompus i’ o kosianan dau. ²³ A’ toko’ i’ dau linihuan do tontok di naala’ toko’, mompus-ompus i’ o kosianan dau. ²⁴ Pinoidu’ toko’ dau do mantad id pisangod toko’, mompus-ompus i’ o kosianan dau. ²⁵ Onuan ngai’ dau do taakanon i songimpasi, mompus-ompus i’ o kosianan dau. ²⁶ Pongunsikou no dot id Kinorohingan i pomorinta’ do hilo’d tawan, mompus-ompus i’ o kosianan dau.

¹ Minirikau iyahai do hiri’d tisan di kabawang-bawangan do Babil, om minihad iyahai di nosorou dahai o Sion. ² Pinasait dahai i kecapi dahai, do hiri’d karaan-raanan di kayu do roitan do gandarusa di hiri’d toning. ³ Om suhuo’ no iyahai di tulun di minononggoi dahai do modsinding, sinuhu’ iyahai diyolo’ do mamaramai diyolo’, ’’Podsindingai iyahai di sinding do pasal do Sion,’’ ka diyolo’. ⁴ Poingkuro daa iyahai do modsinding dot id TUHAN do hilo’d pomogunan do wokon? ⁵ Baya’ nopo dot a’ oku milo kawagu do pouni do kecapi, ondung kolihu oku no diya’, oi Yorusalim! ⁶ Baya’ nopo dot a’ oku milo kawagu do modsinding ondung a’ ku no iya’ osorou, ondung a’ ku no sorohon dot iya’ o kataadan kopio ku! ⁷ Soroho’ no i winonsoi di tulun dot Idom, oi TUHAN do tontok di sinolod o Yorusalim. Soroho’ no i boros di pinghulitan diyolo’ do poingkaa, ’’Raagon nopo kopio do gisom id katana’!’’ ka no. ⁸ Araag ko i’ moti’, oi Babil, tu’ orongit kopio ko i’. Olumaag no i tulun di monuli’ diya’ di piningwonsoi nu dot id dahai; ⁹ i tulun di mongoi di tangaanak nu di ragang po, om i popodumpau’ddi dot id tontolob.

¹ Mantad id di Daud. Ounsikou oku diya’, oi TUHAN, do mikuwo’d aayi-ayi’ o ginawo ku. Modsinding oku do mamarayou diya’ dot id toguang di piro-piro o ponokokinorohingan. ² Tumimbaba’ oku di walai nu dit olidang, i Walai’d Sasambayangan dot Agayo, tumuku’ oku om mamarayou oku do ngaran nu, tu’ i kosianan nu di mompus-ompus om i kotorodoko’ nu o kapamarayahan ku diya’, tu’ nokointalang nu no dot id sawat i’ ko’ nunu nopo i ngaran nu om i boros nu. ³ Sinimbar oku i’ diya’ do tontok di luminohou oku diya’, om i kokoriso’ nu o pinopokoris doho’. ⁴ Oinsanan nopondo o raja’ do hiti’d pomogunan do mamarayou diya’, oi TUHAN, tu’ nokorongou iyolo’ di batos nu. ⁵ Sindingon nondo diyolo’ i nongowonsoi nu, om i kogoyoo’ do sinundu nu. ⁶ Mulong po daa do hilo’ ko’d sawat, nga’ momogompi’ ko i’ do tulun dit osiriba’ o ginawo, om i tulun dot asawat o ginawo nga’ a’ i’ milo do lumisok do mantad id diya’. ⁷ Tontok dit osorili’ oku do kosusaan, om gompion oku i’ diya’. Ngoyon nu i’ saapo’ i pisangod ku dit ongotogod om posion oku i’ diya’ di sinundu nu. ⁸ Wonsoyon nu i’ o koinsanai di pinabatos nu, oi TUHAN, tu’ mompus-ompus i’ o kosianan nu, pongoo’ no i notimpuunan nu do momonsoi.

¹ Maan di boyoon do modsisinding. Sinding di Daud. Oi TUHAN, nosorisid oku no diya’, om otutunan oku i’ diya’. ² Oilaan ngai’ nu i’ o wonsoyon ku; hilo’ pod sodu’ om osuhutan ngai’ nu no o pomusarahan ku. ³ Okito oku i’ diya’ do maso ku do kumaraja’, om maso ku do poundorong, oilaan ngai’ nu i’ o wonsoyon ku. ⁴ Tu’ tontok piya dit a’ ku po kolombus o poboroson ku, nga’ oilaan nu no o poboroson ku. ⁵ Posorili’ ko nopo doho’, om intirungan oku diya’ di sinundu nu. ⁶ Aralom no kopio o toilaan nu do pasal doho’, aralom po ko’ it osuhutan ku. ⁷ Honggo po daa o pakayaan ku do mogidu’ do mantad id diya’? Honggo po daa o poggiduon ku do mantad id dotoguangan nu? ⁸ Ondung minsawat oku daa do hilo’d tawan nga’ hilo’ ko i’, ondung mongoi oku daa lii do hilo’d pomogunan do tulun di napatai, nga’ hilo’ ko i’. ⁹ Ondung tumulud oku daa do gisom do katalib do koulayon do tadau ko’ mongoi oku po daa iyon do hilo’d kinoiyonon dit id sodu’ kopio do ponong hilo’d kotonobon, ¹⁰ nga’ hilo’ ko i’ om hilo’ ko do monulung doho’. ¹¹ Milo oku i’ daa do monuhu’ do totuong do momolisok doho’, om monuhu’ di tanawau do posorili’ doho’ do sumiliu’d totuong, ¹² nga’ iri piya totuong nga’ a’ i’ otuong dot id diya’, iri totuong nga’ miagal id tadau kanawau, aiso’ i’ o pisuayan do totuong om tadau dot id diya’. ¹³ Iya’ no o minomonsoi do koinsanai’d pakakas do tinan ku, pinogihunung-hunung nu o pakakas do tinan ku di hilo’ pod tian do tina’ ku. ¹⁴ Royohon ku no iya’ tu’ iya’ no it apatut do poinggoyoon, suwai no kopio om kopusahan kopio o koinsanai di wonsoyon nu, oilaan ku no kopio iri. ¹⁵ Tontok di worunon nogi’ o tulang ku, om di pogihunung-hunungon nogi’ iri do hiri’d tian di tina’ ku, om tontok di maso ku po do sumuni do hilo’d kinoiyonon di poillisok, om oilaan nu no do hilo’ oku. ¹⁶ Nokito mantad oku no diya’ dit a’ oku po nosusu, iri nopo kogumuo’d tadau do poimpasi oku om notulis mantad nu no dot id suang do buuk nu. ¹⁷ Oi Kinorohingan, aralom no kopio o pomusarahan nu, om ogumu’ kopio! A’ ku no osuhutan! ¹⁸ Ondung maan ku daa intobo’ iri om ogumu’ po ko’ pasir; soira’ dit oposik oku, om momusorou kasai’ oku po diya’. ¹⁹ Oi Kinorohingan, orohian oku daa do patayon nu i tulun dot araat. Orohian oku no daa dot a’ oku ngoyon gangaho’ di tulun dot ongorongit! ²⁰ Angaraat tomod o pimboroson diyolo’ do pasal diya’, indaraaton diyolo’ o ngaran nu. ²¹ Oi TUHAN, araatan oku no kopio di tulun dot araatan diya’, a’ oku orohian di tulun di sumaap diya! ²² Aayi-ayi’ no kopio o ginawo ku dot araatan diyolo’, nosiliu no iyolo’ do pisangod ku. ²³ Sorisido’ oku no oi Kinorohingan, om intutunai no o ginawo ku, umbalai oku no om ilaai no o pomusarahan ku. ²⁴ Antangan no ondung haro ot araat dot id suang ku, om potunudo’ oku no di ralan dit aiso’ o kopupuson.

¹ Maan di boyoon do modsisinding. Sinding di Daud. ² Oi TUHAN, poiduwo’ oku no do mantad id tulun dot araat, intirungai oku no do mantad id tulun dot orongit. ³ Mongupakat kasai’ nopo iyolo’ dot araat, om monikid tadau nopo do mogihum do kopogisongkiwalan. ⁴ Dila’ nopo diyolo’ om miagal nopo di tulanut di kapatai o tindukon om boros diyolo’ nga’ iyo po di paliu do modsoding. ⁵ Intirungai oku no oi TUHAN, do mantad id kuasa’ di tulun dot araat, intirungai oku no do mantad id tulun dot orongit, i mongupakat do pokoruol doho’. ⁶ Nokowonsoi no di tulun dot angasawat o ginawo o lawa’ do pamalawa’ diyolo’ doho’, om ompuso’ nopo diyolo’d lawa’ i ralan do pamalawa’ daa doho’. ⁷ Om boros kangku dot id TUHAN, ’’Iya’ no o Kinorohingan ku,’’ kangku. Pokinongoho’ no iti lolohou ku do mokitulung, oi TUHAN! ⁸ Oi TUHAN, i Kinorohingan ku, i mogobi’ doho’ dit okoris, intirungan oku i’ diya’ dot id pisangadan. ⁹ Oi TUHAN, kada’ patahako’ di tulun dot araat i korohian diyolo’, kada’ pologoso’ dot abayaan i pakat diyolo’ dot araat. ¹⁰ Kada’ pologoso’ do kamanang i pisangod ku, pologoso’ no do koguli’ kawagu dot id diyolo’ i ponompurolosi diyolo’ doho’. ¹¹ Pologoso’ no dot orotuan iyolo’ di popou, pologoso’ no do kataam iyolo’ dot id luang do gisom dot a’ no iyolo’ kosoliwan kawagu. ¹² Pologoso’ no dot aiso’ ot owonsoi-wonsoi di tulun di papasala’ do wokon, pologoso’ no do gusaon do kosusaan i tulun dot orongit, om apatai indo iyolo’. ¹³ Oi TUHAN, oilaan ku i’ dot obian nu i tulun do mosikin, om tulungon nu i tulun dit ulak-ulakan. ¹⁴ Om atantu’ no do royohon ko di tulun dit otulid o ginawo, om koiyon indo iyolo’ dot id sugku’ nu.

¹ Sinding di Daud. Lumohou oku diya’ oi TUHAN, tulungo’ oku no do dinondo. Pokinongohon oku no diya’ do tontok do lumohou oku diya. ² Romito’ no iti sambayang ku do ponokoporsombahan do kominyan, om iti longon ku di poinsawat o ponokoporsombahan ku di sumbolion. ³ Oi TUHAN, tamangai no o kabang ku, om piantangai no o munung ku. ⁴ Kada’ oku pologoso’ do rumohian do momonsoi di kasala’, om poinsoduwo’ oku no do mantad id wowonsoyon dit araat. Kada’ oku pologoso’ do mongoi sugku’ di tulun dot angaraat do mongoi rapou di poginakanan diyolo’. ⁵ Ondung tulun dot osonong o monogod om momohukum doho’, om osonong i’ iri dot id doho’. Nga’ pamarayou nopo di tulun dot araat om a’ ku i’ romiton, tu’ sumambayang oku i’ kasai’ do sumaap di kowoyo-woyoon diyolo’ dot araat. ⁶ Soira’ nopo do porotuon i pomorinta’ diyolo’ do mantad id sakai di pampang, om okunon nogindo di tulun dot otopot i boros ku. ⁷ Poingkuro nopo i kayu do laason om totokon, om iyo nogiddi o tulang diyolo’ do pasasadon do hiri’d tisan di lobong. ⁸ Nga’ mogondos oku i’ kasai’ diya’, oi TUHAN, i Kinorohingan ku. Mokiintirung oku i’ diya’, kada’ oku pologoso’ dot apatai. ⁹ Intirungai oku no do mantad id lawa’ di nongkounda’ no diyolo’ do pamalawa’ doho’, om mantad id lawa’ di tulun dit angaraat. ¹⁰ Pologoson no i tulun dot araat do kosulung di lawa’ diyolo’, nga’ a’ oku indo iyoho’ kosulung.

¹ Sinding do ponudukan di Daud do tontok di hiri iyau id luang do nuluhon. ² Lumohou oku do mokitulung do TUHAN, om mokitulung oku no kopio dau. ³ Patahakon ngai’ ku nopo dau i kawagat do ginawo ku, sunudan ngai’ ku nopo iyau do kosusaan ku. ⁴ Tontok dit oruhai nod aiso’ o posunsudan ku, om oilaan i’ dau it apatut ku’d wonsoyon. Ralan nopo di susuyon ku, om nangataanan no di pisangod ku do lawa’ do pamalawa’ doho’. ⁵ Soira’ di minontong oku dot id posorili’ doho’, om aiso’ i’ o nokito ku do monulung doho’, om aiso’ o mongintirung doho’. Om aiso’ o mamadul doho’. ⁶ Oi TUHAN, lumohou oku do mokitulung diya’, iya’ no i mongintirung doho’, oi TUHAN, iya’ no o kosionuan kopio ku dot id koposi-posion ku do hiti’d pomogunan. ⁷ Pokinongoho’ no iti lolohou ku do mokitulung, tu’ aiso’ no o pokukurayan ku. Poiduwo’ oku no do mantad id pisangod ku, tu’ okoris no kopio iyolo’ do sumaap doho’. ⁸ Poiduwo’ oku no do mantad id kosusaan ku, om royohon ku indo iya’ do hilo’d pitimungan di tulun nu, dot i kosonongo’ nu dot id doho’ o kapamarayahan ku.

¹ Sinding di Daud. Oi TUHAN, pokinongoho’ no iti sambayang ku, pokinongoho’ noti pokionuon ku tu’ otulid ko i’. Simbaro’ oku no tu’ otorodok ko i’! ² Kada’ oku butusai, iyoho’ i susuhuon nu, tu’ aiso’ i’ ot iso’ piya do tulun dot aiso’ o sala’ dot id toguang nu. ³ Ginusa’ oku di pisangod ku, om naala’ oku noddi kopio. Pinosuang oku dau dot id giil dit otuong, om miagal oku poddi di tulun di laid no kapatai. ⁴ Om posodia’ oku noddi do tumahak nopo dot id pisangod, tu’ aiso’ no o pokukurayan ku. ⁵ Osorou ku i’ i piro-piro o tadau di nakatalib, sorohon ku i’ o koinsanai di nowonsoi nu, om hondomon ngai’ ku i nongowonsoi nu. ⁶ Poinsawaton ku o longon ku dot id diya’ do tontok do sumambayang oku, miagal pod tana’ dot otuu di lumangad do rasam o ginawo ku do langadon diya’. ⁷ Simbaro’ oku no do dinondo, oi TUHAN, tu’ aiso’ no o pagandasan ku. Kada’ lisok do mantad id doho’, om a’ oku i’ oturungku’ di tulun di nokolintuhun no do hilo’d pomogunan do tulun di napatai. ⁸ Posoroho’ oku no kasai’ do monikid kosuabon di kosianan nu di mompus-ompus, tu’ iya’ no o pagandasan ku. Id diya’ no o porikatan ku do sambayang ku, tudukai oku no di ralan dit apatut do susuyon ku. ⁹ Rumikot oku do mokiintirung diya’, oi TUHAN, poiduwo’ oku no do mantad id pisangod ku. ¹⁰ Iya’ no o Kinorohingan ku, tudukai oku no do momonsoi do korohian nu. Kumosonong no dot id doho’, om potunudo’ oku no do ralan dit aiso’ o koligagaanan. ¹¹ Posio’ oku no oi TUHAN, do miagal di nakabatos nu, poiduwo’ oku no do mantad id kosusaan ku tu’ osonong ko i’! ¹² Patayo’ no i pisangod ku, om punsoo’ ngai’ no i tulun di mongulok-ulok doho’, tu’ osianan ko i’ doho’ i susuhuon nu.

¹ Mantad id di Daud. Royohon no o TUHAN, i mongintirung doho’! Tudukan oku dau do sumangod om popinsingiloon oku do mongoi sangod. ² Iyau no i mongintirung om mogobi’ doho’, it intirungon ku om gampamasi doho’. I pagandasan ku do manahak do kointirungan, poinsiribaon dau i bansa’ dot id doho’. ³ Oi TUHAN, nunu kopio o tulun tu’ antangan kopio nu, isai kopio iyau tu’ podulon kopio nu? ⁴ Tulun nopo om miagal nod ribut di mambai-lambai, om tumur dau nga’ miagal nod sangai di tumalib. ⁵ Oi TUHAN, pigirango’ pogi’ ilo tawan om lumintuhun no, ngoyo’ kamao’ ilo nuluhon, om mogolisun i’ ilo’. ⁶ Porikot nod kalab do kodumaat om kotias i’ i pisangod nu, papanao’ no i pana’ nu om tumangkus i’ iyolo’ do mogidu’. ⁷ Poroloyo’ no longon nu do mantad hino’d surga, potindalo’ oku no do mantad id waig dit aralom om posion oku no, posio’ oku no do mantad id kuasa’ do bansa’d suwai, ⁸ it a’ nopo insan do poposunud dit otopot, om sumumpa’ no iyolo’ nga’ tudut i’ iri. ⁹ Modsinding oku nondo do sinding do wagu dot id diya’, oi Kinorohingan, om kombiton ku nondo i kecapi om modsinding oku dot id diya’. ¹⁰ Minanahak ko do kamanangan dot id raja’ om pinoidu’ nu i Daud, i susuhuon nu. ¹¹ Posio’ oku no do mantad id pisangod ku dit araat, poiduwo’ oku no do mantad id kuasa’ do bansa’d suwai, it a’ insan do poposunud dit otopot, om sumumpa’ no iyolo’ nga’ tudut i’ iri. ¹² Pologoso’ no i tangaanak dahai do kusai di maso po diyolo’ dot omulok do miyo di tanom do sumuni om gumirot. Pologoso’ no i tangaanak dahai do tondu’ do miagal di torigi dit olumis di momolumis do linsuk di walai’d raja’. ¹³ Pologoso’ no dot oponu’ i sulap dahai do tua’ do piro-piro o bansa’ do totonomon. Pologoso’ no i dumba’ do hilo’d tumo dahai do maganak do piro-piro nohopod noribu o kogumuo’. ¹⁴ Pologoso’ no do maganak dot ogumu’ i sapi’ dahai, om aiso’ o toiduan do ponontianon ko’ atagakan pod tanak. Pologoso’ nod aiso’ o giniakan dot osusa’ do hilo’d karalan-ralanan do bandar dahai. ¹⁵ Olumaag no i bansa’ do miagal diri o kowoyo-woyoo’, olumaag no i bansa’ di TUHAN o Kinorohingan diyolo’!

¹ Sinding do mantad id di Daud. Popinsusuyon ku i kogoyoo’ nu, oi Kinorohingan om raja’ ku, unsikohon ku iya’ do gisom dot alaid. ² Unsikohon ku iya’ do monikid tadau, om royohon ku iya’ do gisom dot alaid. ³ TUHAN nopo om abantug, om apatut do royohon kopio, a’ no milo’d osuhutan o kogoyoo’ nu. ⁴ Iri nopo winonsoi nu’ddi om royohon nondo do piro-piro o sinakagon do mogisolusuk-lusuk, om popinsusuyon nondo diyolo’ i kokoriso’ nu. ⁵ Popimboroson nondo diyolo’ i kagayaan om pangkat nu do don raja’, om soro-sorohon ku nondo i winonsoi nu di kongoimayaan kopio. ⁶ Popimboroson nondod tulun i winonsoi nu dit angagayo kopio, om popinsusuyon ku i kogoyoo’ nu. ⁷ Om popinsunudon ngai’ nondo diyolo’ i kosonongo’ nu, om sindingon diyolo’ i kopuhawango’ nu. ⁸ TUHAN nopo om obinsianan i’ om obinglisiu, alanut i’ o ginawo dau, om osianan kasai’ iyau. ⁹ Osonong i’ iyau dot id koinsanai’d tulun om kikosianan dot id koinsanai di winonsoi dau. ¹⁰ Oinsanan nopo i winonsoi nu do mamarayou diya’, oi TUHAN, om oinsanan i tulun nu do mongunsikou diya’. ¹¹ Royohon nondo diyolo’ i kuasa’ nu di don raja’ om popinsunud di kokoriso’ nu. ¹² Om koilo ngai’ i’ o tulun di wonsoyon nu di kongopusahan kopio, om kagayaan om kobontugo’ di pomorintaan nu. ¹³ Pomorintaan nu nopo om mompus-ompus i’, om raja’ ko do gisom do poingompus. Otorodok ko i’ dot id batos nu, oi TUHAN, om koinsanai di wonsoyon nu nga’ osonong i’. ¹⁴ Tulungon i’ dau i tulun dot id suang do kosusaan, om tungagon dau i tulun do naratu’. ¹⁵ Iya’ poo o pagandasan do koinsanai di songimpasi, om onuan nu iyolo’ do taakanon do tontok di kaakanan diyolo’. ¹⁶ Kabagal i’ diyolo’ i patahakon nu diyolo’, om onuan nu iyolo’ do koinsanai di pokionuon diyolo’. ¹⁷ Otulid i’ o koinsanai di wonsoyon do TUHAN, om kikosianan iyau do tontok do momonsoi do nunu nopo. ¹⁸ Minsomok i’ iyau dot id tulun di lumohou dau, i lumohou do mikuwo’d otulid o ginawo. ¹⁹ Patahakon i’ dau o koinsanai dit apatut dot aanu, do tulun dit oronok dau, orongou i’ dau i tihad diyolo’ om posion i’ dau iyolo’. ²⁰ Intirungan ngai’ i’ dau o koinsanai do tulun dit osianan dau, nga’ patayon i’ dau i tulun dot araat. ²¹ Royohon ku indo kasai’ o TUHAN, pologoson ngai’ no i winonsoi dau dit ongkipinuhobo do mamarayou di ngaran do TUHAN do gisom dot alaid.

¹ Royohon no o TUHAN! Orohian oku no kopio do mamarayou’d TUHAN, o ginawo ku! ² Royohon ku i’ kasai’ iyau do solinaid ku do poimpasi, om modsinding oku dot id Kinorohingan do gisom do kooyion do tumur ku. ³ Kada’ pogondos do boyoon do tulun, tu’ aiso’ i’ o tulun do kapasi diya’. ⁴ Apatai nopo iyolo’, om gumuli’ no do hilo’d tana’, om tontok nod tadau’ddi dot opupusan ngai’ o koinsanai dit osorou diyolo’d wonsoyon. ⁵ Olumaag no i tulun di Kinorohingan di Yakub o nosiliu do monulung dau om i mogondos dot id TUHAN, i Kinorohingan dau, ⁶ i minomonsoi’d tawan, om pomogunan om rahat, om koinsanai di songingiyon do hilo’. Sulungon kasai’ i’ dau o batos dau. ⁷ Om obian dau i tulun dit ulak-ulakan do tontok di butusan dau iyolo’, om onuan dau do taakanon i tulun do louson. Polobuson i’ do TUHAN o tulun di songinggiil, ⁸ om poungkalaton dau i tulun di bolou. Poingkakaton i’ dau i tulun di naratu’, om osianan i’ iyau di tulun dau dit otulid o ginawo. ⁹ Intirungan i’ dau i bansa’d suwai do poingiyon do hiti’d pomogunan toko’, om tulungon dau i tongoondu’ do nopuadan om i tangaanak dit aiso’ o molohing, nga’ a’ i’ dau pologoson dot owonsoi i tosorou di tulun dot araat. ¹⁰ Raja’ i’ o TUHAN do gisom dot alaid. Momorinta’ i’ kasai’ iyau do gisom dot alaid i Kinorohingan nu, oi Sion. Royohon no o TUHAN!

¹ Royohon no o TUHAN! Osonong no kopio do modsinding do mamarayou’d Kinorohingan toko’, om apatut i’ do royohon toko’ iyau tu’ iri no o popotood dati’. ² Tondulion nod TUHAN o Yorusalim, pogulion no dau i tulun di natanggayan do pisangod. ³ Insasamadan dau i tulun dit adalaan do tumongob, om rilitan dau i suhat diyolo’. ⁴ Natantu’ mantad no dau o ginumu’ do rombituon do hilo’d tawan om tikido’ nopo dau do minomungaran iri. ⁵ TUHAN toko’ nopo om abantug no kopio om okoris, om toilaan dau nga’ a’ i’ milo do tipongon. ⁶ Poingkakaton dau i tulun dot osiriba’ o ginawo, nga’ poisison i’ dau do hilo’d tana’ i tulun dot araat. ⁷ Podsinding no do sinding do pamarayou’d TUHAN, kombito’ no i kecapi do pamarayou’d Kinorohingan toko’. ⁸ Pawaladon do TUHAN i haun do hilo’d tawan, om manahak iyau’d rasam do hiti’d pomogunan, om posunion dau o sakot do hilo’d nuluhon. ⁹ Onuan dau do taakanon i nintorusan, om sumadon dau i tangaanak do tombolog di songuni-uni poo do louson. ¹⁰ Okon i’ ko’ kuda’ dot okoris o kasanangan do TUHAN, om okon ko’ soudor dit ongosiou o korohian dau, ¹¹ nga’ kasanangan nopo dau om i tulun dit oronok dau, i tulun di mogondos kasai’ di kosianan dau di mompus-ompus. ¹² Royohon no o TUHAN, oi Yorusalim! Royohon no o Kinorohingan, oi Sion! ¹³ Pogiroton i’ dau o totobon di wawayaan nu, barakatan i’ dau o tulun nu. ¹⁴ Pitamangan i’ dau o hilo’d watas nu om osimbayan i’ kasai’, om pakayahanon ko do gandum dit osonong kopio. ¹⁵ Popoboros iyau dot isuhu’ dau do hiti’d pomogunan, om oruhai dot owonsoi i ponuhuan dau. ¹⁶ Miagal pod kumut o salju do pawaladon dau, om miagal do pupuk i bolobou do nokodou do potiason dau. ¹⁷ Miagal pod watu do nababak o karambatu di porikoton dau, aiso’ no o kasangal dit osogit do porikoton dau. ¹⁸ Om momoros po kawagu iyau do monuhu’ om lumanak nopondo it ais; porikoton no dau i tongus, om lumuyung nopo i waig. ¹⁹ Pinosunud dau i bilin dau dot id tulun dau, om i ponudukan om oturan dau dot id Israil, i tulun do pinili’ dau. ²⁰ A’ i’ dau winonsoi o miagal diti dot id bansa’d suwai, a’ i’ iyolo’ koilo dot oturan dau. Royohon no o TUHAN!

¹ Royohon no o TUHAN! Royohon no o TUHAN do hilo’d surga, iyokoyu i poingiyon do hino’d sawat. ² Royohon no iyau, oi koinsanai do moloikat dau, oi koinsanai do soudor dau do hino’d surga. ³ Royohon no iyau, oi tadau om tulan, royohon no iyau, oi rombituon di mogulinau. ⁴ Royohon no iyau, oi tawan dit asawat, om royohon no iyau oi waig di hilo’d soibau do tawan. ⁵ Pologoson ngai’ no iyolo’d mamarayou do ngaran do TUHAN! Koboros nopo dau nga’ kowonsoi ngai’ no iyolo’, ⁶ om tinantu’ dau o poiyanan diyolo’, om iri no o tonudon diyolo’ do gisom dot alaid. ⁷ Royohon no o TUHAN, iyokoyu i hiti’d pomogunan, om iri ngai’ i naga’ do hilo’d rahat, om koinsanai di rahat dot aralom; ⁸ i kodumaat om karambatu om i salju om i haun, om i ribut dit opuhod, i mumboyo’ do boros do TUHAN. ⁹ Royohon no iyau, oi nulu-nulu om konuluhanan, oi kouwaan om kogoutanan; ¹⁰ koinsanai di nintorusan dit ongokohup, om i lalang, i nintorusan do sangkamang-kamang om i tombolog. ¹¹ Royohon no iyau, oi koinsanai’d raja’ om koinsanai’d pomorinta’ do bansa’, i tangaanak do raja’ om koinsanai di pomorinta’ do suwai; ¹² i kosumandakan om i tangaanakwagu, i kongomolohingan om iri nogi’ i tangaanak. ¹³ Pologoson no do mamarayou ngai’ iyolo’ do ngaran do TUHAN, tu’ ngaran nopo dau om abantug i’ ko’ mantad do koinsanai’d ngaran. Om kagayaan dau nga’ id sawat i’ ko’ pomogunan om tawan. ¹⁴ Pinokoris dau i bansa’ dau, om oinsanan indo i tulun dau do mamarayou dau, i tulun dot Israil di koupusan kopio dau. Royohon no o TUHAN!

¹ Royohon no o TUHAN! Podsinding no do sinding do wagu dot id TUHAN, royoho’ no iyau dot id pitimungan di tulun dau dit ongotorodok! ² Kotood no, oi Israil dot i minomonsoi diya’ o kataadan, kooropod no oi tulun do Sion, dot i raja’ nu o kaarapadan! ³ Royoho’ no i ngaran dau do mikuwo’d manari’, tuntungon no o gandang om kombiton no o kecapi do pamarayou dau. ⁴ Asanangan i’ o TUHAN di tulun dau, om onuan dau do kamanangan i tulun dot osiriba’ o ginawo. ⁵ Pologoso’ nod rumamai i tulun do nasanganu’d Kinorohingan, dot i kinamanangan diyolo’ o karamayan, om monuaban do modsinding dot atataadan. ⁶ Pologoso’ no iyolo’ do mamarayou do Kinorohingan, do mikuwo’d songingigit diyolo’ i gayang diyolo’ dit atarom, ⁷ do pangala’ di bansa’ om pomohukum diyolo’; ⁸ om pongogos di raja’ diyolo’, om pongogos di boyoon diyolo’ do rantai do basi’ o pongogos; ⁹ om pomohukum di bansa’ do miagal di pinonuhuan do Kinorohingan. Iri no o kamanangan do tulun di nasanganu do Kinorohingan. Royohon no o TUHAN!

¹ Royohon no o TUHAN! Royohon no o Kinorohingan do hilo’d Walai’d Sasambayangan dit Agayo! Royohon no i kokoriso’ dau do hilo’d surga! ² Royohon no iyau dot i nongowonsoi dau dit angagayo o kapamarayahan. Royoho’ no iyau dot i kobontugo’ dau o kapamarayahan. ³ Royohon no iyau do mikuwo’d popouni do torumpit, royohon no iyau do mikuwo’d mongombit do gambus om kecapi. ⁴ Royohon no iyau do mikuwo’d monuntung do tamburin om manari’, royohon no iyau do mikuwo’d mongombit do kecapi om popouni do suling. ⁵ Royohon no iyau do mikuwo’d monuntung do simbal, royohon no iyau mikuwo’d monuntung do simbal dit opuhod o tuni. ⁶ Royohon no o TUHAN, oi koinsanai di winonsoi dau dit ongkipinuhobo. Royohon no o TUHAN!