PILIPI

PILIPI

¹ Oi tobpinai-tobpinai ku, i dong Kinorohingan do tulun di songingiyon do hiti’d Pilipi, om i nokoiso’ dot id Kristus Yesus. Om iri nogi’ i piro-piro o boyoon om i palayan dot id sidang! Mogondos oku iyoho’, i Paulus, om i Timotius, iyahai i susuhuon di Kristus Yesus, ² dot onuan kou do Kinorohingan i Tapa’ toko’ om i Tuhan Yesus Kristus do barakat om kosimbayanan do ginawo. ³ Pointikid-tikid dot osorou ku iyokoyu, om mongunsikou kasai’ oku nopod Kinorohingan. ⁴ Om soira-ira’ nopo do sumambayang oku do bagi’ dokoyu ngai’, om osonong kasai’ nopo o ginawo ku do sumambayang. ⁵ Mongunsikou oku nod Kinorohingan tu’ mantad poddi timpuun i’ om gisom do baino’, om nuhupan oku no dokoyu do popinsusui di Habar dot Osonong do mantad id Kinorohingan. ⁶ Kinorohingan i’ o minonimpuun di karaja’ dot osonong dot id suang dokoyu, om monongkuyaan oku i’ do potilombuson dau i karaja’ddi do gisom dot opongo do tontok do Tadau’d Korikatan kawagu di Kristus Yesus. ⁷ Om atantu’ no dot iyo’ddi o topurimanan ku dot id dokoyu, tu’ osorou kasai’ ku i’ iyokoyu om osianan oku dokoyu. Om nokotonggoi kou doho’ do nakaramit di nipuhawang do Kinorohingan di pinatahak dau doho’; do dinondo piya tu’ poinggiil oku om tontok dit a’ oku po poinggiil do pokotopot om popogirot di Habar dot Osonong diri. ⁸ Oilaan id Kinorohingan do langadon oku no kopio dokoyu do mikuwo’d kosianan do mantad id Kristus Yesus. ⁹ Iti no o sambayang ku do bagi’ dokoyu i pokionuon ku no do muhang-ruhang o kosianan om toilaan dokoyu do pasal dit ongotopot, om pokionuon ku dot aralom o toilaan dokoyu. ¹⁰ Om koilo kou indo do momili’ dit osonong kopio om oidu’ indo do mantad id koposi-posion dokoyu o koinsanai dit araat om i kapasalaan di poingkuro nopo do tontok do tadau’d korikatan kawagu di Kristus. ¹¹ Om lumuyung pondo do mantad id koposi-posion dokoyu o kowoyo-woyoon dit osonong kopio, it i Yesus Kristus noo o milo do popoimbulai; om poinggoyoon nondo om pingroyohon o Kinorohingan. ¹² Orohian oku do koilo kou, dot iri nogi’ i nosiliu dot id doho’ o nokogumu-gumu’ do tulun do nokorongou om notumbayaan di Habar dot Osonong diri. ¹³ Om kinootuson nopoddi, nga’ nokoilo ngai’ddi i madtatamong di walai’d raja’ om i tulun do suwai do hiti’d bandar diti, do kinogiil-giilan ku nopo om iri i’ i momonsoi oku do karaja’ di dong Kristus. ¹⁴ Om iti no nokogiil oku o nokogiro-girot do kotumbayaan dot id Tuhan dit ogumu’ o tulun do Kristian dot id bandar diti, gisom do noruhangan nogiddi o kosisiou diyolo’ do popinsusui di boros do Kinorohingan, om a’ noddi iyolo’ ooris. ¹⁵ Haro i’ kopio o piro-piro dot id pogialatan diyolo’ do popinsusui do pasal di Kristus do mosol i’ o kopopinsusuyan om orohian do monokisongkiwal, nga’ iri no suwai om osonong i’ o kopopinsusuyan do pasal di Kristus. ¹⁶ Wonsoyon pogi’ diyolo’ o miagal diri nga’ osianan i’ iyolo’d Kinorohingan om osianan doho’, tu’ oilaan i’ diyolo’ do noonuan oku nod Kinorohingan do karaja’ do popotuduk kopio dot otopot i Habar dot Osonong diri. ¹⁷ Nga’ a’ i’ osonong o kopopinsusuyan do tulun do suwai do pasal di Kristus; tu’ kopopinsusuyan nopo diyolo’ om maan no diyolo’d kountungan do dau’d tinan. Om asanangan nogi’ iyolo’ dot oruhangan o kosusao’ ku do hiti’d giil. ¹⁸ Nga’ a’ i’ monguro dot iyo piya’ddi! Tu’ poingkuro nopo, dot osonong tuu ko’ kasala’ daa o kopopinsusuyan diyolo’, nga’ kopinsusui kasai’ i’ i Kristus; om osonong i’ o ginawo ku. Om iyo kasai’ iddi o ginawo ku, ¹⁹ tu’ oilaan ku i’ do mikuwo nopo di sambayang dokoyu om uhupan do Rusod di Yesus Kristus, om kalabus oku indo. ²⁰ Iri nopo i korohian kopio ku om i soro-sorohon ku om a’ ku daa otongkiadan i karaja’ ku. Suwai ko’ mogondos oku nogi’ do pointikid do maso, om okon-okon po om dinondo, dot osiou oku om aayi-ayi’ o ginawo ku do maso ku tuu do poimpasi ko’ poimpatai po do popoinggayo do Kristus. ²¹ Tu’ iyoho’ nopo do poimpasi om dong Kristus noo do koposion ku! Om apatai oku piya nga’ haro i’ o kountungan ku. ²² Nga’ ondung milo oku do momonsoi do karaja’ di poinggayo-gayo o guna’ do poimpasi do hiti’d pomogunan diti, om a’ oku no koilo ondung honggo’ddi o pilion ku. ²³ Duwo nopo kagayat doho’. Orohian oku i’ do kotongkiad diti pomogunan om koongoi oku indo kosugku’ di Kristus, tu’ iri kopio it osonong; ²⁴ nga’ sorohon nopondo o dokoyu’d koinsanangan om osonong nogi’ do poundorong oku do hiti’d pomogunan. ²⁵ Oilaan ku no kopio dot otopot iri. Om iri no o koilo-ilo ku do poinsugku’ kasai’ oku po ngai’ dokoyu, om koponguhup oku po dokoyu do gumirot om otood o ginawo do monongkuyaan do Tuhan. ²⁶ Iyo nopoddi, om gumuli’ oku nopondo kawagu do hino’d dokoyu, om oruhangan pondo o kaandasan dokoyu doho’ iyokoyu i nokoiso’ dot id Kristus Yesus. ²⁷ Om iri nopo it apatut kopio do wonsoyon dokoyu do dinondo om poontokon dokoyu di ponuhuan di Habar dot Osonong do pasal di Kristus o kowoyo-woyoon dokoyu. Om ondung iyo’ddi, om kosolowot oku tuu dokoyu ko’ amu’ nga’ korongou oku i’ dot ogirot o piuludan dokoyu om mogiuuhup do rumikot dot id iso’ o rikoton om iso-iso’ o korohian; iri no tu’ poingimpou o kotumbayaan dot id Habar dot Osonong di mantad id Kinorohingan. ²⁸ Kumosiou kasai’ kou no, kada’ kou kooris di pisangod dokoyu. Om iri no o ralan dokoyu do popointalang do pointantu’ no dot aala’ iyolo’, om kamanang kou, tu’ Kinorohingan no o manahak dokoyu do kamanangan. ²⁹ Tu’ noonuan kou nod Kinorohingan do nipuhawang dot okon nopo ko’ monongkuyaan no di Kristus, nga’ oinggorit nogi’ do bagi di Kristus. ³⁰ Om dinondo nga’ kotonggoi kou i’ doho’ dot id suang do karaja’ do miagal diri; i nokito dokoyu do winonsoi ku di gulu, om i maso ku po do wonsoyon do gisom do baino’, do miagal dit orongou dokoyu do dinondo.

¹ Okoris kou i’, tu’ nokoiso’ kou no dot id Kristus. Om oinsasamadan kou tu’ osianan i’ o Kristus dokoyu! Woyoon kou i’ do Rusod do Kinorohingan, om mogiinsian-sian kou om mogilisiu-lisiu kou. ² Om umbal kou daa kopio do poposonong do ginawo ku om wonsoyo’ no dokoyu o miagal diti: koiso-isoon no o ginawo dokoyu do mogiinsian-sian om oiyo o kowoyo-woyoo’ do mogiinsian-sian, om iso-iso’ o pomusarahan om iso-iso’ o korohian. ³ Kada’ kou pomonsoi do nunu nopo dot oodsuur di dokoyu’d korohian, ko’ minggayo-gayo po suwai ko’ sompori-pori kou nogi’ do mogiinsiriba-riba’ do ginawo, om sorohon dot osonong o tulun do suwai ko’ mantad do dau’d tinan. ⁴ Kada’ dokoyu soroho’ o dokoyu nod koinsanangan; suwai ko’ sopisorohon no do dombokon do koinsanangan. ⁵ Tiruwanan no dokoyu o kowoyo-woyoo’ di Yesus Kristus. ⁶ Iyau nopo om miagal i’ kopio do Kinorohingan, nga’ a’ i’ iyau minomusorou dot apatut dau do pususon i kowoyo-woyoo’ dau di dong Kinorohingan. ⁷ Suwai ko’ tongkiadai ngai’ nopo dau iri, om siliu noddi iyau do miagal do songulun o susuhuon. Om suminiliu iyau do miagal do tulun, om iyo do don tulun o koinan-inano’ dau. ⁸ Mininsiriba’ i’ iyau, om minumboyo’ kasai’ do Kinorohingan do gisom do napatai iyau — iri no tu’ napatai do hiri’d salib. ⁹ Om iri noddi o kinopoinsawatan kopio’d Kinorohingan dau, om nonuan iyau do kuasa’ dit agayo ko’ mantad do koinsanai’d kuasa’ do suwai. ¹⁰ Om oinsanan nopondo i songingiyon do hilo’d surga, om i hiti’d pomogunan, om i hilo’d saalom diti tana’, do tumuku’ dot id di Yesus, do momusou dau. ¹¹ Om mangakun ngai’ nondo iyolo’ dot i Yesus Kristus no o Tuhan. Om koinggayo nondo o Kinorohingan Tapa’. ¹² Iyo nopoddi, oi tobpinai-tobpinai di kosianan ku, om poingkuro nopo do minumboyo’ kasai’ kou doho’ di poinsugku’ oku po dokoyu, om okon-okon po daa’ndo do dinondo tu’ mogiinsodu’ toko’, nga’ mumboyo’ kopio kou doho’. Napasi kou nod Kinorohingan, iyo nopoddi om minsimparu’ kou no kasai’ om opongo i’ o kosimbayanan do ginawo dokoyu. Om wonsoyon no dokoyu iri do mikuwo’d momusou om mumboyo’ do Kinorohingan, ¹³ tu’ Kinorohingan no o kumaraja’ dot id suang dokoyu, om i poporohian dokoyu om popomilo dokoyu do poposonong do ginawo’d Kinorohingan. ¹⁴ Om wonsoyon no dokoyu o koinsanai’d nunu nopo dot a’ muol-nguol dot araatan om a’ mogitotogod. ¹⁵ - ¹⁶ Om iyo noddi o ralan dokoyu do popointalang do tangaanak kou’d Kinorohingan dit aiso’ o kabara-barasan, it otulid om otopot o kowoyo-woyoon dot id pogialatan di tulun dit angaraat om it ongkidusa. Om tontok nopo do poposusui kou di habar di manahak do koposion dot id diyolo’, om sumiliu kou no do miagal do tanawau dot id diyolo’, i tumitiu do mamanawau diti pomogunan. Ondung iyo’ddi o kowoyo-woyoon dokoyu, om haro no o paantakan ku dot oondos dokoyu do korikatan kawagu di Yesus Kristus. Om iri no o kointalangan kopio dot okon i’ ko’ maan toomod i karaja’ ku, om kointalangan do haro kopio o tua’ di karaja’ ku’ddi. ¹⁷ Om patayon oku dotindo om raha’ ku nga’ osiliu do miagal di porsombahan di potuntugon dot id sakai di porsombahan dokoyu dot id Kinorohingan, do maan do tanda’ dot otumbayaan kou dau. Ondung a’ milo dot a’ osiliu o miagal diri, om mongunsikou oku nopo om tumonggoi oku dokoyu dot otood. ¹⁸ Om iyo kou nogi’ daa’ddi iyokoyu tu’ ounsikou om tumonggoi doho’ dot otood. ¹⁹ Monongkuyaan oku i’ dot uhupan oku nopod Tuhan Yesus, om olomus oku i’ do monuhu’ di Timotius do mongoi do hino’d dokoyu, om oinsasamadan oku indo do korongou do habar dokoyu. ²⁰ Iso’ po i Timotius o kosuhut kopio do kopurimanan ku, om mamadul kopio dokoyu. ²¹ Iri ngai’ nopo tulun do suwai om iri no i diyolo’d koinsanangan o sorohon, om a’ i’ diyolo’ podulon i karaja’ di Yesus Kristus. ²² Om iyokoyu nga’ nokokito i’ do nokointalang no kopio di Timotius o komiloo’ dau. Tu’ nokototos tomod iyau do kuminaraja’ do minoyo’ doho’ do popinsusui di Habar dot Osonong do mantad id Kinorohingan. Iyahai nopo om miagal po do miaanak. ²³ Iyo nopoddi, om oilaan ku pondo o kootuson diti hal ku, om suhuon ku iyau do mongoi’d hino’d dokoyu. ²⁴ Om monongkuyaan oku i’ dot uhupan oku nopod Tuhan, om iyoho’ piya nga’ a’ no alaid om koongoi no koompuya’ dokoyu. ²⁵ Om pasal no di Ipaproditus, i tobpinai toko’, i sinuhu’ dokoyu do mongoi ponguhup doho’, om opurimanan ku dot osonong i’ do suhuon ku kawagu iyau do gumuli’ do hino’d dokoyu. Om minoyo’ i’ iyau doho’ do minomonsoi’d karaja’ ku om i pokiwawansayan kopio ku. ²⁶ Langadon no kopio iyau dokoyu ngai’, om tumangkabo iyau tu’ nokorongou kou i’ do sumakit iyau. ²⁷ Otopot nogi’ do suminakit iyau do gisom dot oruhai nod apatai. Nga’ nosianan i’ o Kinorohingan dau; om okon i’ ko’ iyau noo, suwai ko’ iyoho’ nga’ kinosianan nogid Kinorohingan, om a’ i’ oruhangan o katangaban ku. ²⁸ Om iri no o kagayo-gayo do ginawo ku do monuhu’ dau do gumuli’ dot id dokoyu, om otood kou i’ kawagu do kosolowot kou dau, om osimbayan o doho’d ginawo. ²⁹ Iyo nopoddi, om romiton no dokoyu iyau do mikuwo’d osonong o ginawo, do miagal do tobpinai dit iso-iso’ o kinotumbayaan. Om pusohon ngai’ no dokoyu o tulun di miagal dau. ³⁰ Oruhai no daa iyau dot apatai do momonsoi’d karaja’ di dong Kristus; om uhang ngai’ no daa dau dot apatai piya iyau do mongoi ponulung doho’ do mobi’ ngai’ dokoyu.

¹ Suwai no ko’ iri, oi tobpinai-tobpinai ku, om kotood kou no tu’ nokoiso’ kou no dot id Tuhan. A’ oku i’ apaasan do popotulis kawagu di tinulis ku dot id dokoyu dit id gulu; tu’ iri nopo om osonong om kointirung dokoyu. ² Antaan-taan no dokoyu i tulun di momonsoi’d angaraat, i tulun di milo no do roitan do ’’tasu’’. Tu’ osoonong iyolo’ do monuhu’ do monunat do tulun. ³ Nga’ iyati’ nogi’ o nosunatan di sunat dot otopot, om okon i’ ko’ iyolo’. Tu’ tumuku’ toko’ i’ dot id Kinorohingan do mikuwo’d tudukan di Rusod do Kinorohingan, om mongunsikou toko’ tu’ nokoiso’ toko’ no dot id Kristus Yesus. A’ toko’ i’ sumondiu di piro-piro o wonsoyon do tumanud di toturan do tugama’ dit id soibau noo. ⁴ Otopot nopo kopio om milo oku i’ daa do sumondiu di piro-piro o wonsoyon do tumanud di toturan do tugama’. Tu’ ondung haro daa o tongoiso’ do tulun do kopuriman do haro o paantakan dau do sumondiu di wonsoyon do tumanud di toturan do tugama’ dot id soibau noo, om okon-okon oku po daa iyoho’ nga’ haro kopio o paantakan ku. ⁵ Iyoho’ nopo om sinunatan i’ di walu’ nogi’ o tadau do tumur ku. Om nosusu oku dot id sompiiyon do tulun dot Israil, do mantad id payat di Binyamin; om pasok kopio oku dot Ibrani. Om pananud-tanud ku no di toturan do tugama’ do Yohudi om poinsuang oku di sinompuruan do tulun do Parisi. ⁶ Om aparu’ tomod oku gisom do minonginggorit oku’d sidang. Om ondung antangan do poimpohon di Tourat, om osonong oku i’ koulun, om aiso’ o kabara-barasan doho’. ⁷ Nga’ Kristus no o pinopomilo doho’ do momusorou dot iri ngai’ nopo i kountungan daa dot osorou ku di gulu po, om nosiliu noddi do korugian do baino’. ⁸ Om okon i’ ko’ iri noo; suwai ko’ nunu nopo i suwai nga’ sorohon ngai’ ku no do korugian iri. Om agayo nogi’ kopio o gatang diti naanu ku do baino’: iri no tu’ nokotutun oku di Kristus Yesus, i Tuhan ku. Om Kristus no o nakapagadaan ngai’ ku’ddi. Om sorohon ku po do rinomos toomod o koinsanai’ddi, om aanu ku i’ o Kristus, ⁹ om koiso’ oku indo kopio dau. Om a’ oku noddi mimpori-pori do mulud dot id Kinorohingan do tumanud di Tourat o ralan do mulud. Nokoulud oku noddi kawagu dot id Kinorohingan, tu’ notumbayaan oku no di Kristus. Om tadon nopo di kopiuludan om Kinorohingan i’, dot i kotumbayaan dot id di Yesus Kristus o pinoimpahan. ¹⁰ Iso’ no kopio o pokioonuan ku, iri no tu’ kotutun oku di Kristus, om kopuriman di kuasa’ di nakapasi dau do mantad id kapatayon. Orohian oku do kotonggoi dau dot oinggorit, om koiyo dau dot apatai. ¹¹ Om mogondos oku dot iyoho’ piya’ndo nga’ apasi i’ kawagu do mantad id kapatayon. ¹² A’ oku i’ momoros do nangaanu ku no iyoho’ iri, om a’ oku momoros dot aiso’ o kabara-barasan doho’. Nga’ a’ oku nopo tumingkod do monokiahau do manganu di hodia’ do nokosodia’ di Kristus Yesus. Om iri no o kokuwaan do nahau oku dau om pinili’ oku dau do maan do dau’d songonuon. ¹³ Atantu’ no, oi tobpinai-tobpinai, dot a’ ku i’ kopio sorohon do naanu ku no i hodia’ diri. Nga’ iso’ noo o wonsoyon ku, iri no tu’ lihuan ku nopo it id tohuri ku om tumotos oku no do mongoi panganu dit id dosunsudan ku. ¹⁴ Om iri no ot a’ ku kotingkadan do manangkus do kumaa dot id rikoton kopio om kaanu oku i’ do kamanangan, iri no i koposion di hilo’d surga; om iri no o kinapamalahawan do Kinorohingan dati’ dot i Kristus Yesus o pinomolohou. ¹⁵ Iyati’ ngai’ nopo, i nongkotuo no dot id suang do don rusod, om mositi’ no dot iyo’ddi o kowoyo-woyoo’. Nga’ ondung haro ot id pogialatan dokoyu di suwai ko’ iri o tosorou, om patarangon indod Kinorohingan iri dot id dokoyu. ¹⁶ Nga’ ilaan no kopio dokoyu o hal diti: Mositi’ no dot otorodok toko’ do tumanud di toturan di tinanud toko’ do solinaid diti. ¹⁷ Oi tobpinai-tobpinai ku! Omit kou no do kowoyo-woyoo’ ku. Nokopointalang no iyahai do kowoyo-woyoo’ dit otopot, om iyo nopoddi, om omitan no dokoyu o kowoyo-woyoo’ di tulun di minomit do kowoyo-woyoo’ dahai. ¹⁸ Asaru’ ku no iyokoyu do sunudan om gulion ku po kawagu do posunud do mikuwo’d mihad oku, dot ogumu’ o tulun do kowoyo-woyoon nopo diyolo’ om mamaraag noo do komoyon di kinapatayon di Kristus do hiri’d salib. ¹⁹ Kootuson nopondo do koposi-posion do tulun do miagal diri om karaagon, tu’ ponokokinorohingan nopo diyolo’ om i korohian do tinan diyolo’. Om iri nogi’ i kointingayam tomod o kaandasan diyolo’, tu’ sorohon nopo diyolo’ om iri no i dom pomogunan. ²⁰ Nga’ iyati’ nopo om hilo’ id surga o pomogunan kopio toko’. Om hilo’ nogi’ o tadon di Raja’, i Gampamasi dati’, iri no i Tuhan Yesus Kristus. Om iyau no i piandad-andad toko’ do rumikot do mantad hilo’. ²¹ Iti nopo tinan toko’ diti toluhoi om i rumaag, om simbanan indod Kristus do sumiliu’d miagal di tinan dau di kikagayaan. Om milo i’ iyau do momonsoi do miagal diri tu’ kikuasa’ i’ iyau do momorinta’ do koinsanai’d nunu nopo.

¹ Iyo nopoddi, oi tobpinai-tobpinai ku di kosianan ku, om iyo noddi o kowoyo-woyoo’ do koposi-posion dokoyu dit apatut om mikuwo’d monongkuyaan kopio do Tuhan. Langadon oku no dokoyu! Iyokoyu no o kaandasan ku om i popotood doho’. ² Oi tobpinai ku’d tongoondu’, i Yuodia om i Sintiki! Pokionuon ku no daa kopio dot iso-iso’ o ginawo dokoyu, tu’ iso-iso’ i’ o kinotumbayaan dokoyu. ³ Om pokionuon ku nogi’ iya’ i tambalut ku dit otorodok, do monulung di duwo o tondu’ddi. Tu’ nokototos tomod iyolo’ do kuminaraja’ do minoyo’ doho’ do pinopopinsusui di Habar dot Osonong do mantad id Kinorohingan, do miagal di Klimin om koinsanai di tulun do suwai di minoyo’ doho’ do kuminaraja’. Om nokosuang ngai’ no o ngaran diyolo’ do hiri’d Buuk do Tulun di Nangapasi. ⁴ Om maha’ daa om otood kasai’ kou tu’ nokoiso’ kou no dot id Tuhan. Om poboroson ku po kawagu do kongotood kou no! ⁵ Pologoson no do kokito o koinsanai’d tulun di kowoyo-woyoo’ dokoyu dit osonong. Tu’ a’ no alaid om korikot no o Tuhan. ⁶ Kada’ kou katangkabo do pasal do nunu nopo. Suwai ko’ sumambayang nogi’ do bagi’ddi, om poboroson i’ i pokionuon dokoyu dot id Kinorohingan. Nunu nopo o pokionuon dokoyu, om poboroson kasai’ nori dot id Kinorohingan do mikuwo’d mongunsikou. ⁷ Om iri indo i kosimbayanan do ginawo di mantad id Kinorohingan, it a’ osuhutan do tulun, o poposimbayan do ginawo om pomusarahan dokoyu, i nokoiso’ dot id Kristus Yesus. ⁸ Om poboroson ku nopo do pongolimpupus ku, oi tobpinai-tobpinai, om potumpuon no dokoyu o pomusarahan dokoyu dot id koinsanai di haro o guna’, om it apatut do royohon, iri no it ongotopot, om i suahon, om it otulid, om it olidang, om i popoinsonong, om it osonong. ⁹ Wonsoyon no dokoyu i nongopinsingilaan dokoyu om i naanu dokoyu do mantad id doho’; i mantad id boros di pinoboros ku om i winonsoi ku. Om Kinorohingan no, i tadon do kosimbayanan do ginawo o momoyo’ dokoyu. ¹⁰ Osimbayan tomod o kopurimanan ku dot id suang do koposi-posion ku di nokoiso’ oku dot id Tuhan. Tu’ iyo piya’ddi o koloido’ nga’ kosorou kasai’ kou po doho’. Okon i’ ko’ komoyon ku do nokolihu kou doho’; tu’ mamadul kou i’ kopio doho’, nga’ gisom i’ dot aiso’ o ralan dokoyu do popointalang diri. ¹¹ Okon i’ ko’ haro o kokurangan ku do kapabarasan ku’dti, tu’ nokopinsingilo oku no dot abagalan do nunu nopo i haro dot id doho’. ¹² Nokoumbal oku no dot okurangan om nokoumbal oku dot osima’, gisom dot a’ ku aayi-ayi’. Nokoilo oku nod ralan do tumimbaba’ do poingkuro nopo o kowoyo-woyoo’; do tontok di haro o kosimbayanan ko’ di maso do mosikin, om di maso’d osima’ om di maso do haro o kokurangan. ¹³ Haro i’ o kokorisan ku do tumimbaba’ do poingkuro nopo o kowoyo-woyoo’, do mikuwo di kuasa’ di pinatahak do Kristus dot id doho’. ¹⁴ Nga’ notulung oku no dokoyu dot id suang do kosusaan ku; om osonong i’ kopio i winonsoi dokoyu’ddi. ¹⁵ Oi tobpinai-tobpinai ku, i tulun do Pilipi! Iyokoyu nga’ koilo i’ kopio do tontok nopo di tongkiad oku i’ do mantad hilo’d Makidunia di gulu po, di koinsan ku nogi’ do pinoposusui di Habar dot Osonong diri, om iyokoyu noo o sidang di minonulung doho’; om iyokoyu no kopio i nokotonggoi doho’ do nokopuriman di kountungan om i kinorugian ku. ¹⁶ Tontok di hilo’ oku’d Tosolunika om dit okurangan oku, om a’ kou i’ insan-insan do pinopokirim do maan do ponulung doho’. ¹⁷ Komoyon nopoddi om okon i’ ko’ orohian oku nod kaanu do nipuhawang. Suwai ko’ korohian ku nopo kopio om kokito oku di tua’ di koruhang di kountungan dokoyu. ¹⁸ Naanu ngai’ ku nori om a’ ku no aayi-ayi’! Iri ngai’ nopo i pinopuhawang dokoyu doho’ di pinaatod dokoyu om nangaanu ku no do mantad id di Ipaproditus. Om haro ngai’ ku noddi do baino’. Om iri nopo i piro-piro o pinopuhawang dokoyu’ddi om iyo po di winongi’ do porsombahan di sorobon di pinatahak dot id Kinorohingan om i kasanangan do Kinorohingan do rumamit. ¹⁹ Om Kinorohingan no, i tukuon ku, i haro o kakayaan dit a’ aayi-ayi’ dot id suang di Kristus Yesus, o papatahak do koinsanai di pokionuon dokoyu. ²⁰ Royohon no o Kinorohingan, i Tapa’ toko’ do gisom dot alaid! Amin. ²¹ Porikoton no o tabi’ ku dot id koinsanai’d tulun di dong Kinorohingan, i nokoiso’ dot id Kristus Yesus. Om romito’ no dokoyu o tabi’ di piro-piro o tobpinai’d suwai di poinsugku’ doho’d hiti. ²² Oinsanan nopo i dong Kinorohingan do tulun do hiti’d bandar diti, om okon-okon po om i piro-piro o tulun do mantad id walai di raja’ Kaisar, do poporikot do tabi’ diyolo’ dot id dokoyu. ²³ Om pokionuon ku no i Tuhan Yesus Kristus do mamarakat ngai’ dokoyu.