PONGINTABAN

PONGINTABAN

¹ Tontok di tadau do koiso’ di tulan do koduwo di toun do koduwo do mantad di kinosoliwanan di tulun dot Israil do mantad id pomogunan do Masir, om boro-boros no o TUHAN dot id di Musa do tontok di hiri iyau id suang di Kiim do TUHAN di hilo’d tana’ do kowotuan do Sinai. Om boros ka dau, ² ’’Mositi’ no do papaharo kou di Harun do pongintaban dilo tulun dot Israil, om pogisuwai-suwayon iyolo’ do mongintob do tumanud do pinuruan do sompiiyon diyolo’. Om tulison ngai’ no o ngaran di tongokusai ³ di duwo nohopod o toun do tumur ko’ it otuo ko’ iri, it ongokoris po do sumiliu’d soudor. ⁴ Om suhuon no o tiso’ di boyoon do pinuruan do sompiiyon do mantad id pointikid-tikid di payat do monulung dokoyu,’’ ka dau. ⁵ - ⁵¹ Om soira’ nopod mundaliu kou, om iri no i tulun do Liwi o momohuyas di Kiim ku, om popowonsoi kawagu’ddi dot id pomukiiman kawagu dokoyu. Om isai nopo o tulun do suwai ko’ i tulun do Liwi, do mongoi insomok di Kiim om mositi’ nod hukuman do kapatayon. ⁴⁸ tu’ nosunudan nod TUHAN i Musa do ⁵⁰ Nga’ suhuon nogi’ i tulun do Liwi do momogompi’ di Kiim ku om koinsanai di pakakas do hiri. Om karaja’ nopo diyolo’ om: sumaan di Kiim ku do mitonggoi ngai’ di pakakas do hiri’d Kiim, om popowonsoi do kiim diyolo’ do posorili’ di Kiim ku. ⁴⁶ Om iri nopo tongokusai di nokorikot do duwo nohopod o toun do tumur ko’ it id dotuo ko’ iri, it ongokoris po do sumiliu’d soudor, om tinulis ngai’ nopo o ngaran do sinompipi’ do tumanud di pinuruan do sompiiyon om sompiiyon diyolo’. Nimpuun nopo do monulis om i payat di Rubin, i tanak di Yakub dot id dotuo. Om poingkaa no o kogumuon diyolo’: Payat, Kogumuon: Rubin 46,500; Simion 59,300; Gad 45,650; Yohuda 74,600; Isakar 54,400; Sibulon 57,400; Ipraim 40,500; Manasi 32,200; Binyamin 35,400; Dan 62,700; Asor 41,500; Naptali 53,400; Kogumuon do toinsanan: 603,550. ⁴⁷ Iri nopo tulun do Liwi om a’ i’ tinulis o ngaran do pinosugku’ do ngaran di payat do suwai, ¹⁶ Om iti ngai’ no i tongokusai, i boyoon do mantad id pointikid-tikid do payat do nongopili’ do momonsoi do karaja’ddi. Payat, Boyoon do Pinuruan do Sompiiyon: Rubin, I Ilisur i tanak di Sidour; Simion, I Solumiol i tanak di Surisiadai; Yohuda, I Nahason i tanak di Aminadab; Isakar, I Nitaniil i tanak di Suar; Sibulon, I Iliab i tanak di Hilon; Ipraim, I Ilisama i tanak di Amihud; Manasi, I Gamaliol i tanak di Pidasur; Binyamin, I Abidan, i tanak di Gidioni; Dan, I Ahiosor i tanak di Amisadai; Asor, I Pagiol i tanak di Okran; Gad, I Iliasap i tanak di Rohuil; Naptali, I Ahira i tanak di Inan. ¹⁷ Om iri ngai’ no i hopod om duwo o tongokusai’ddi o minonguhup di Musa om i Harun ¹⁸ do minonimung ngai’ di tulun do tontok di tadau do koiso’ di tulan do koduwo. Om tuliso’ ngai’ no diyolo’ o ngaran di tulun do pinogisosompipi’ do tumanud di pinuruan do sompiiyon diyolo’. Om ngaran nopo do koinsanai di tongokusai di nokorikot do duwo nohopod o toun do tumur ko’ it otuo ko’ iri om tinulis ngai’ nopo om pinointob ¹⁹ do tumanud di pinonuhuan do TUHAN. Om tuliso’ ngai’ no di Musa o ngaran di tongokusai’ddi di hilo’ iyolo’d tana’ do kowotuan do Sinai. ²⁰ - ⁵³ Nga’ iri nopo tulun do Liwi om mositi’ nod popowonsoi di kiim diyolo’ do posorili’ di Kiim ku. Om mositi’ nod tamangan diyolo’ i Kiim diri om aiso’ indo o tulun do koinsomok dot i kopotogod doho’, gisom do hukuman ku nondo o tulun dot Israil,’’ ka dau. ⁵⁴ Om wonsoyo’ ngai’ no di tulun dot Israil o koinsanai di pinonuhuan do TUHAN dot id di Musa. ⁵² Om iri no tulun dot Israil di suwai om mositi’ nod popowonsoi do kiim diyolo’ do tumanud di sinompuruan diyolo’, om sorompori-pori do tumanud di bondira’ diyolo’. ⁴⁹ poingkaa, ’’Papaharo ko nopod pongintaban do tulun dit ongokoris po do sumiliu’d soudor, om kada’ pohompito’ i payat di Liwi.

³² Om kogumuon nopo di tulun dot Israil di nongkotulis o ngaran om 603,550 o tulun. ¹ Om patahako’ nod TUHAN dot id di Musa om id di Harun iti piro-piro o toturan. ² Soira’ nopod powonsoi i tulun dot Israil do Kiim diyolo’, om mositi’ nod powonsoyon do pointikid-tikid do tulun o kiim diyolo’ dot id sahau do bondira’ di sinompuruan diyolo’, mikuwo’d dakatan do tanda’ di pinuruan do sompiiyon diyolo’ i kiim diyolo’. Om mositi’ nod posorili’ di Kiim ku o pawansayan ngai’ di kiim diri. ³ - ³³ Om iri nopo payat di Liwi om a’ i’ pinotulis o ngaran do poinghompit di tulun dot Israil do suwai, tu’ iyo noddi o pinonuhuan do TUHAN dot id di Musa. ⁹ Ponong id koulayon nopo, om i tulun dit id sahau do bondira’ do sinompuruan di Yohuda o popowonsoi di kiim diyolo’ do tumanud di pinuruan diyolo’, om sorompori-pori do moyo’ di boyoon diyolo’ do miagal diti: Payat, Boyoon, Kogumuon: Yohuda, I Nahason i tanak di Aminadab 74,600; Isakar, I Nitaniil i tanak di Suar 54,400; Sibulon, I Iliab i tanak di Hilon 57,400; Kogumuon do toinsanan: 186,400. Om mositi’ no dot i sinompuruan di Yohuda o mogulu do mamanau. ¹⁰ - ³⁴ Om wonsoyo’ ngai’ nopo di tulun dot Israil i pinonuhuan do TUHAN dot id di Musa. Sompori-pori nopo iyolo’d pinopowonsoi do kiim diyolo’ dot id sahau do bondira’ diyolo’, om minamanau do mogiwoyo-woyo’ di pinuruan do sompiiiyon diyolo’. ¹⁶ Ponong id salatan nopo om i tulun dit id sahau do bondira’ di sinompuruan di Rubin o popowonsoi do kiim diyolo’ do tumanud di pinuruan diyolo’, om sorompori-pori do tumanud di boyoon diyolo’, do miagal diti: Payat, Boyoon, Kogumuon: Rubin, I Ilisur i tanak di Sidour 46,500; Simion, I Solumiol i tanak di Surisiadai 59,300; Gad, I Iliasap i tanak di Rohuil 45,650; Kogumuon do toinsanan: 151,450. Om mositi’ no dot i sinompuruan di Rubin o mamanau do sumusuhut di sinompuruan di Yohuda. ¹⁷ Om kapamanau po i duwo o sinompuruan diri om mamanau nogindo i payat di Liwi, it ongkisinaan di Kiim do TUHAN. Om mositi’ nod mamanau o pointikid-tikid di sinompuruan diri do tumanud dit oturan do mamanau do miagal di maso’d powonsoi di kiim, tu’ sorompori-pori nopod mundorong do hiri’d kinoiyonon diyolo’, dot id sahau di bondira’ do sinompuruan diyolo’. ¹⁸ - ²⁴ Ponong id kotonobon nopo om i tulun dit id sahau do bondira’ di sinompuruan di Ipraim o popowonsoi do kiim do tumanud di pinuruan diyolo’, om sorompori-pori do tumanud di boyoon diyolo’ do miagal diti: Payat, Boyoon, Kogumuon: Ipraim, I Ilisama i tanak di Amihud 40,500; Manasi, I Gamaliol i tanak di Pidasur 32,200; Binyamin, I Abidan i tanak di Gidioni 35,400; Kogumuon do toinsanan: 108,100. Om iti no sinompuruan di Ipraim om mositi’ nod mamanau do sumusuhut di payat di Liwi. ²⁵ - ³¹ Ponong id utara nopo om i tulun dit id sahau do bondira’ di sinompuruan di Dan o popowonsoi’d kiim diyolo’ do tumanud di pinuruan diyolo’, om sorompori-pori do tumanud di boyoon diyolo’ do miagal diti: Payat, Boyoon, Kogumuon: Dan, I Ahiosor i tanak di Amisadai 62,700; Asor, I Pagiol i tanak di Okran 41,500; Naptali, I Ahira i tanak di Inan 53,400; Kogumuon do toinsanan: 157,600. Om iti nopo sinompuruan do payat di Dan om mamanau do hiri’d ponong id tohuri kopio.

¹ Om iti no o sompiiyon di Harun om i Musa do tontok di minoro-boros o TUHAN dot id di Musa di hilo’d timpak di Nuluhon do Sinai. ² I Harun nopo om kianak dot apat o kusai: i Nadab it id dotuo, om i Abihu, om i Iliasar, om i Itamar. ³ Om pinili’ ngai’ nopo iyolo’ do sumiliu dot imam dot i tinuntugan do tumau o tulu o ralan do minomili’. ⁴ Nga’ i Nadab nopo di Abihu om napatai iddi do tontok di pinapatahak iyolo’d tapui dit okon ko’ korohian do TUHAN di maso diyolo’ do hilo’d tana’ do kowotuan do Sinai. Om aiso’ i’ goduwo o tanak diyolo’, om iyo Iliasar poddi di Itamar o maganu-anu di toonuon dot imam di poimpasi po i Harun. ⁵ Om boros kad TUHAN dot id di Musa, ⁶ ’’Suhuon no i payat do Liwi do mongoi’d hiti’d gulu, om pilion i’ iyolo’ do sumiliu’d susuhuon di Harun, it Imam diri. ⁷ Om mositi’ nod momonsoi iyolo’ di karaja’ dit apatut diyolo’d wonsoyon do hiri’d Kiim ku om mogobi-obi’ dit imam om i tulun dot ogumu’. ⁸ Om mositi’ nod iyolo’ o mongilo-ilo do koinsanai di pakakas di Kiim om mogobi-obi’ di tulun dot Israil do suwai. ⁹ Iso’ noo o tonggungan di tulun do Liwi, iri no tu’ sumiliu’d susuhuon di Harun om i tangaanak dau. ¹⁰ Om mositi’ nod pilion nu i Harun om i tangaanak dau do momonsoi’d karaja’ di dong imam; om isai nopo o tulun do suwai di mumbal daa do momonsoi’d karaja’ddi nga’ mositi’ nod hukuman do kapatayon,’’ ka dau. ¹¹ Om boros kad TUHAN dot id di Musa, ¹² - ¹³ ’’Baino’ nopondo om iyoho’ no o sanganu di tulun do Liwi. Tontok di pinatai ku o koinsanai di tanak do kusai do tulun do Masir dit id gulu kosusu, om diri nod pinotobilang ku do maan ku’d doho’ i tangaanak do kusai dit id gulu kosusu, dot id suang do pointikid-tikid do sompiiyon do tulun dot Israil, om iri nogi’ i tanak do tontoluhan do tayam-tayam diyolo’ dit id gulu kosusu. Om poningolon nopo di tangaanak do kusai do tulun dot Israil dit id gulu kosusu om iri no i tulun do Liwi, om iyolo’ no ot osiliu do songonuon ku. Tu’ iyoho’ no o TUHAN,’’ ka dau. ¹⁴ Om tontok no di hilo’d tana’ do kowotuan do Sinai do sinuhu’d TUHAN i Musa ¹⁵ do monulis do ngaran do koinsanai di tulun do Liwi do tumanud di pinuruan do sompiiyon om sompiiyon diyolo’; om tinulis ngai’ nopo o ngaran do pointikid-tikid do tanak do kusai di sombulan nogi’ ko’ otuo ko’ iri o tumur. ¹⁶ Om wonsoyo’ nod Musa i pinonuhuan do TUHAN diri. ¹⁷ - ²⁰ I Liwi nopo om kianak do tolu o kusai: i Girson, i Kohat om i Morari. Om iyolo’ no o komolohingan di piro-piro pinuruan do sompiiyon di pinungaranan do ngaran diyolo’. I Girson no om kianak do duwo o kusai: i Libni om i Simoi. I Kohat no om kianak dot apat o kusai: I Amram, i Yisar, i Hibron om i Usiol. Om i Morari no om kianak do duwo o kusai: i Mali om i Musi. Om iyolo’ no o komolohingan di piro-piro o sompiiyon di pinungaranan do ngaran diyolo’. ²¹ Poinsuang nopo di pinuruan do sompiiyon di Girson om i sompiiyon di Libni om i sompiiyon di Simoi. ²² Kogumuon nopod tongokusai di sombulan nogi’ ko’ otuo ko’ iri o tumur di nokointob om 7,500 o tulun. ²³ - ²⁴ Boyoon nopod pinuruan do sompiiyon diti om i Iliasap i tanak di Lail. Om pawansayan nopod pinuruan do sompiiyon diti do kiim diyolo’ om mositi’ no do hiri’d ponong id kotonobon, it id dotolikudan di Kiim do TUHAN. ²⁵ Om iyolo’ no o mongilo-ilo di Kiim, om i tokop di Kiim do ponong id suang, om i tokop di Kiim do ponong id soibau, om i tabir di wawayaan, ²⁶ om i tabir di pomorinding di natad do posorili’ di Kiim om i pananaraban do porsombahan, om i tabir di wawayaan di natad. Om iyolo’ no o mongilo-ilo do nunu nopo o buruon di kagait do pakakas diri. ²⁷ Om poinsuang nopo di pinuruan do sompiiyon di Kohat om i sompiiyon di Amram, om i Isar, om i Hibron, om i Usiol. ²⁸ Om kogumuon nopod tongokusai di sombulan nogi’ ko’ otuo ko’ iri o tumur di nokotulis o ngaran om 8,600 o tulun. ²⁹ Om pawansayan nopod pinuruan do sompiiyon diti do kiim diyolo’ om mositi’ nod hiri’d ponong id salatan di Kiim do TUHAN. ³⁰ Om boyoon nopo di pinuruan do sompiiyon diyolo’ om i Ilisapan i tanak di Usiol. ³¹ Om iyolo’ no o mongilo-ilo di Kaban do Tumpongo, om i mija’, om i potitimpakan do lampung, om i pananaraban do porsombahan, om i mija’ do podtutudan do kominyan, om i piro-piro pakakas do pakayon dit imam do hiri’d Bilik dit Olidang, om i tabir do wawayaan di Bilik dit Olidang Kopio. Om iyolo’ no o mongilo-ilo do koinsanai di buruon do kagait do pakakas diri. ³² Boyoon nopo do toinsanan di tulun do Liwi om i Iliasar i tanak di Harun. Om iyau no o mongilo-ilo do koinsanai’d tulun di maganu-anu do hiri’d Bilik dit Olidang. ³³ Poinsuang nopo di pinuruan do sompiiyon di Morari, om i sompiiyon di Mali om i Musi. ³⁴ Kogumuon nopod tangaanak do tongokusai di sombulan nogi’ ko’ otuo ko’ iri o tumur di nokotulis o ngaran om 6,200 o tulun. ³⁵ Om pawansayan nopod pinuruan do sompiiyon diti do kiim diyolo’ om mositi’ nod hiri’d ponong id utara di Kiim do TUHAN. Om boyoon nopod pinuruan do sompiiyon diti om i Suriol i tanak di Abihail. ³⁶ Iyolo’ nopo om sinuhu’ do mongilo-ilo di papan di Kiim di poturidongon, om i ponukod di potibabaron, om iri ngai’ i torigi, om i posungkadan di torigi om koinsanai di pakakas do hiri. Om iyolo’ no o mongilo-ilo do nunu nopo o buruon do kagait do pakakas diri. ³⁷ Om iyolo’ nogi’ o mongilo-ilo ngai’ di torigi, om i posungkadan om i tali di pakayon do momorinding di natad. ³⁸ Om i Musa nopod i Harun om koinsanai di tangaanak di Harun, om mositi’ nod popowonsoi do kiim diyolo’ do hiri’d dotimbabaan di Kiim do TUHAN, i ponong id koulayon. Om iyolo’ no i momonsoi di wonsoyon di natantu’ mantad do tontok do sumambayang, do bagi’ di tulun dot Israil do hiri’d Bilik dit Olidang. Om isai nopo o tulun do suwai di mumbal do momonsoi’d miagal diri om mositi’ nod hukuman do kapatayon. ³⁹ Om kogumuon nopo do koinsanai di tangaanak do kusai di payat di Liwi di sombulan nogi’ ko’ otuo ko’ iri o tumur di tinulis di Musa o ngaran, do sinompipi’ do tumanud di pinuruan do sompiiyon diyolo’, do tumanud di pinonuhuan do TUHAN om 22,000 o tulun. ⁴⁰ - ⁴¹ Om boros kad TUHAN dot id di Musa, ’’Koinsanai di tangaanak do kusai di tulun dot Israil dit id gulu kosusu om doho’ ngai’ no. Om tulison no o ngaran do pointikid-tikid do tangaanak do kusai di tulun dot Israil dit id gulu kosusu, di sombulan no ko’ otuo ko’ iri o tumur. Nga’ maan nopod poningolon diyolo’ om oinsanan nopo i tulun do Liwi do silihon ku do doho’d songonuon. Tu’ iyoho’ no o TUHAN! Om iri tayam-tayam di tulun do Liwi nga’ onuon ku no do poningolon do koinsanai di tayam-tayam di tulun dot Israil dit id gulu kosusu,’’ ka. ⁴² Om wonsoyo’ nod Musa o koinsanai di pinonuhuan do TUHAN; tinulis ngai’ nopo dau o ngaran do koinsanai di tangaanak do kusai dit id gulu kosusu ⁴³ di sombulan no ko’ it otuo ko’ iri o tumur. Om kogumuon nopod toinsanan diyolo’ om 22,273 o tulun. ⁴⁴ Om boro-boros no o TUHAN dot id di Musa do poingkaa, ⁴⁵ ’’Dinondo nopodti om patahakon no dot id doho’ i tulun do Liwi do sumiliu do doho’d songonuon do maan do poningolon do koinsanai di tangaanak do kusai di tulun dot Israil dit id gulu kosusu, om patahakon ngai’ i tayam-tayam di tulun do Liwi do maan do poningolon di tayam-tayam di tulun dot Israil dit id gulu kosusu. ⁴⁶ Om iri nopo tangaanak do kusai do tulun dot Israil dit id gulu kosusu om 273 o tulun do poinggumu’ mantad ko’ i tulun do Liwi, om mositi’ nod lopusan dokoyu i nokolobi’ddi. ⁴⁷ Iso’ nopo di tanak diri om mositi’ nod lopusan dokoyu do limo o tusin do pirok do tumanud di pamagatang di natantu’ mantad; ⁴⁸ om patahakon no i tusin diri dot id di Harun om id tangaanak di Harun,’’ ka dau. ⁴⁹ Om wonsoyo’ nod i Musa i pinonuhuan do TUHAN diri. Om ngoyo’ no dau ⁵⁰ i tusin do pirok do 1,365 o kogumuo’. ⁵¹ Om patahako’ no dau i tusin diri dot id di Harun om id tangaanak di Harun.

¹ Om suhuo’ nod TUHAN i Musa ² do mongintob di tulun do Liwi, i mantad id pinuruan do sompiiyon di Kohat do pogisompipi-pipion do tumanud di pinuruan do sompiiyon di sorokuri-kuri’ om tumanud di sompiiyon diyolo’. ³ Om sinuhu’ nogi’ iyau do monulis do ngaran do koinsanai di tongokusai di kiumur dot id piolitan do tolu nohopod om limo nohopod o toun, it ongosorupai do maganu-anu do hiri’d Kiim do TUHAN. ⁴ Om karaja’ nopo diyolo’ nga’ momogompi’ di piro-piro pakakas dit ongolidang kopio. ⁵ Om patahako’ nod TUHAN dot id di Musa iti piro-piro o ponuhuan do poingkaa: Orikot nopo o maso’d kopomohuyasan di kokiiman, om mositi’ nod mongoi i Harun om i tangaanak dau do hilo’d suang di Kiim ku. Om iduwon nondo diyolo’ i tabir dit id dotimbabaan di Kaban do Tumpongo, om potokopon di Kaban i tabir diri. ⁶ Om mositi’ nod takapan kawagu diyolo’ i Kaban diri do kulit dit osonong, om soibahan kawagu’d monokop do kain dit otomou. Om posusukon nogindo i kayu do pangantayang di Kaban. ⁷ Om mositi’ nod takapan kawagu diyolo’d kain dot otomou i mija’ di poiyanan do roti do patahakon dot id TUHAN. Om pasakayon nogindo di mija’ i piring om i mangkuk di poiyanan do kominyan, om i mangkuk di poiyanan do porsombahan, om i kakanan di poiyanan do porsombahan do waig dot anggur. Om mositi’ nod haro kasai’ o roti do hiri’d sakai di mija’ddi. ⁸ Om mositi’ nod takapan ngai’ diyolo’ iri do kain dot aragang. Om takapan no kawagu’d kulit dot osonong. Om posusukon nogindo diyolo’ i kayu do pangantayang di mija’. ⁹ Om mositi’ nod mongoi iyolo’ anu do kain dot otomou, do ponokop di potitimpakan do lampung, om i lampung, om i sanggip om i talam, om koinsanai di poiyanan do tumau do saitun. ¹⁰ Iri nopo potitimpakan do lampung om koinsanai di pakakas di lampung nga’ mositi’ nod lopoton diyolo’ do kulit dit osonong om pasakayon nogindo do hiri’d pangantayang. ¹¹ Om owonsoi pondo o miagal diri, om mositi’ nod takapan diyolo’ do kain dit otomou i mija’ do podtutudan do kominyan di tamas do winonsoi. Om takapan nogi’ kawagu iri do kulit dit osonong. Om posusukon nogindo i kayu do pangantayang di mija’ di podtutudan do kominyan diri. ¹² Om mositi’ nod ngoyon ngai’ diyolo’ i pakakas di pakayon do hiri’d Bilik dit Olidang, om mositi’ nod lopoton iri do kain dit otomou. Om mositi’ nod takapan diyolo’ kawagu iri do kulit dit osonong. Om pasakayon nogindo do hiri’d pangantayangan. ¹³ Om mositi’ nod iduan diyolo’d tauu di kilunok i pananaraban do porsombahan om takapan nogindo do kain dit aragang doitom-itom. ¹⁴ Om mositi’ nod pasakayon diyolo’ do hiri’d pananaraban do porsombahan o koinsanai di pakakas di pakayon do sumambayang: i poiyanan do tapui, om i totodok, om i pononduk, om i mimpun. Om mositi’ nod takapan diyolo’ iri do kulit dit osonong om posusukon nogindod hiri i kayu do pangantayang. ¹⁵ Om soira’ nopo dot orikot o maso do kopomohuyasan di kokiiman, om mositi’ nod rumikot i tulun di mantad id pinuruan do sompiiyon di Kohat do mongoi panaan di piro-piro pakakas dot ongolidang diri; nga’ ngoyon nopo om it atakapan ngai’ di Harun om i tangaanak dau i pakakas diri. A’ i’ koino-ino do koigit di pakakas dot ongolidang i tulun do mantad id pinuruan do sompiiyon di Kohat tu’ ondung mongoi iyolo’ igit diri om apatai no moti’ iyolo’. Om iyo noddi o karaja’ di tulun do mantad id pinuruan do sompiiyon di Kohat do tontok do powolihon i Kiim diri. ¹⁶ I Iliasar no, i tanak di Harun diri, om mongilo-ilo do koinsanai di hiri’d Kiim om i tumau di lampung, om i kominyan, om i porsombahan do gandum, om i tumau di ponununtug, om koinsanai dit id suang di Kiim di nokotobilang do maan do don TUHAN. ¹⁷ Om boros kad TUHAN dot id di Musa om id di Harun, ¹⁸ - ¹⁹ ’’Iti nopo piro-piro pakakas diti om nokotobilang no do maan do doho’. Om antaan-taan no kopio dokoyu, om a’ i’ koinsomok dilo pakakas i tulun do Kohat. Tu’ apatai no moti’ iyolo’ do kowonsoi no iyolo’d miagal diri. Om mositi’ nod sumuang di Kiim i Harun om i tangaanak dau, om tudukan nogindo diyolo’ i tulun dit id payat di Kohat di karaja’ diyolo’ om it apatut diyolo’d igitan, om aiso’ indo ot osiliu do miagal diri. ²⁰ Nga’ ondung sumuang i tulun do Kohat di Kiim diri om kokito nondo dit imam do momodoropi’ di piro-piro pakakas dit ongolidang do tintod do powolihon, om apatai no i tulun do Kohat,’’ ka dau. ²¹ Om suhuo’ nod TUHAN i Musa ²² do mongintob di tulun do Liwi, i mantad id pinuruan do sompiiyon di Girson do tumanud di pinuruan do sompiiyon di sorokuri-kuri’ om i sompiiyon diyolo’. ²³ Om mositi’ nod tulison di Musa o koinsanai’d ngaran do tongokusai dit id piolitan do tolu nohopod om limo nohopod o toun, it osorupai do maganu-anu do hiri’d Kiim do TUHAN. ²⁴ Om nonuan iyolo’d karaja’ do mongigit diti piro-piro o pakakas: ²⁵ I Kiim om i piro-piro o pakakas do suwai: i tokop di Kiim do ponong id suang, om i tokop dit id soibau, i tokop di posoibahon kawagu, i kulit dit osonong do winonsoi, om i tabir do hiri’d wawayaan di Kiim, ²⁶ om i tabir om i tali di pakayon do momorinding do natad di Kiim, om i pananaraban do porsombahan, om i tabir di hiri’d wawayaan di natad, om koinsanai di pakakas do pakayon do popowonsoi ngai’ddi. Om iyolo’ no o mongilo-ilo do nunu nopo o buruon di kagait do pakakas diri. ²⁷ Om mositi’ nod ngoyon di Musa om i Harun piantangai iyolo’ om ongowonsoi ngai’ i’ i karaja’ di pinatahak di Harun om i tangaanak dau dot id tulun do Girson, om ongoigitan ngai’ i’ i pakakas dit apatut dot igitan. ²⁸ Om iri no o karaja’ di tulun do Girson do hiri’d suang di Kiim. Om mositi’ nod wonsoyon diyolo’ i karaja’ddi do moyo’ dit ituduk di Itamar i tanak di Harun. ²⁹ Om suhuo’ nod TUHAN i Musa do mongintob di tulun do Liwi, i mantad id pinuruan do sompiiyon di Morari do sompipion do tumanud do pinuruan do sompiiyon di sorokuri-kuri’, om i sompiiyon diyolo’. ³⁰ Om mositi’ nod tulison di Musa o ngaran do koinsanai’d tongokusai di kiumur dot id piolitan do tolu nohopod om limo nohopod o toun, it ongosorupai do maganu-anu do hiri’d Kiim do TUHAN. ³¹ Om nonuan iyolo’d karaja’ do manaan ngai’ di papan di poturidongon do powonsoyon di Kiim, om iri ngai’ i ponukod di potibabaron, om i torigi, om i posungkadan di torigi. ³² Om iri nogi’ i torigi di pongorigi di pomorinding di natad do pointutuk di Kiim, om i piro-piro posungkadan di torigi, om i gapit, om i tali, om koinsanai di pakakas di gunaon do maan do popowonsoi di Kiim. Om tinantu’ ngai’ nopo o pakakas dit igitan do pointikid-tikid do tulun. ³³ Om iyo noddi o karaja’ dot apatut do wonsoyon di tulun di mantad id pinuruan do sompiiyon di Morari do hiri’d suang di Kiim, om mositi’ nod wonsoyon o karaja’ddi do tumanud dit ituduk di Itamar i tanak di Harun. ³⁴ - ⁴⁸ Om papaharo no i Musa om i Harun om i piro-piro boyoon di tulun dot Israil do pongintaban di tolu o pinuruan do sompiiyon di Liwi: i pinuruan do sompiiyon di Kohat, om i Girson, om i Morari. Tu’ iyo noddi o pinonuhuan do TUHAN. Om sinompipi’ diyolo’ do mongintob do tumanud di pinuruan do sompiiyon di sorokuri-kuri’, om tumanud do pointikid-tikid di sompiiyon. Om tuliso’ ngai’ nopo diyolo’ o ngaran di tongokusai dit id piolitan do tolu nohopod o toun om limo nohopod o toun do tumur, it ongosorupai do maganu-anu do hiri’d Kiim do TUHAN. Om poingkaa o kogumuon di nointob diyolo’: Pinuruan do Sompiiyon, Kogumuon: Kohat 2,750; Girson 2,630; Morari 3,200; Kogumuon do toinsanan: 8,580. ⁴⁹ Om tinulis ngai’ nopo o ngaran di tulun diri, om nonuan ngai’ iyolo’ do karaja’ dit apatut diyolo’d wonsoyon om notudukan iyolo’ dit apatut do saanon diyolo’, do tuminanud di pinonuhuan do TUHAN do pinolombus di Musa.

¹ Om boros kad TUHAN dot id di Musa, ² ’’Patahakon no iti piro-piro o ponuhuan dot id tulun dot Israil: Iri nopo tulun di kitoruol do kusta, om i tulun di haro o miagal-agal do waig dit a’ osonong do sumoliwan do mantad id tinan, om i tulun di nokoigit do rata’, om mositi’ nod posoliwanon di kokiiman di tulun dot Israil. ³ Om mositi’ nod suhuon iyolo’d tumongkiad, om a’ i’ diyolo’ ososomu’ i kokiiman, i tiyonon ku do poinsugku’ di tulun ku,’’ ka dau. ⁴ Om wonsoyo’ no di tulun dot Israil i pinonuhuan diri. Om posoliwano’ ngai’ nopo diyolo’ do mantad hiri’d kokiiman diyolo’ o tulun di miagal diri. ⁵ Om patahako’ nod TUHAN dot id di Musa ⁶ iti piro-piro o toturan do patahakon dot id tulun dot Israil: Soira’ nopod haro o tulun dit a’ otorodok dot id TUHAN om i kowonsoi do sala’ dot id tulun do suwai, ⁷ om mositi’ nod okunon di tulun o dusa dau om lopusan ngai’ dau i nokoontok di kasalaan dau’ddi, om ruhangan po dot induwo i sompihopod om patahakon dau iri di tulun di napamansayan dau’d sala’. ⁸ Nga’ ondung napatai no i tulun di napamansayan dau’d sala’, om aiso’ o tobpinai dau dit osomok o kopiobpinayan, om mositi’ nod patahakon dau dot id TUHAN i pamalapus dau’ddi, om iri nondo it imam o kaanu’ddi. Iti nopo pamalapus om poruhangon di dumba’ do tontoluhan di maan do patahakon do tontok do momonsoi dit apatut do wonsoyon do maan do pongidu’d dusa do tulun di kisala’ddi. ⁹ Om pointikid-tikid di popuhawangon di pinotobilang, i patahakon do tulun dot Israil dot id TUHAN nga’ asanganu ngai’ no dit imam di karamit do porsombahan diri. ¹⁰ Iri nopo porsombahan di patahakon dot id songulun ot imam, om mositi’ nod onuon dit imam iri do maan do dau. ¹¹ Om suhuo’ nod TUHAN i Musa ¹² - ¹⁴ do papatahak diti piro-piro o toturan dot id tulun dot Israil. Haro i’ doti’ o tongokusai do koumbal do kopuriman dot a’ otorodok i sawo dau tu’ minongoi doti’ ponokidudun do kusai’d suwai. Nga’ a’ i’ doti’ di kusai oilaan kopio tu’ minomolisok-lisok i’ i sawo dau do minomonsoi do miagal diri. Om sasi’ nga’ aiso’, om a’ i’ nokosupan i sawo dau do minomonsoi do miagal diri; ko’ haro i’ doti’ o kusai di kipomusarahan dot araat dot id sawo dau, nga’ a’ i’ kopio nokowonsoi dot araat i sawo dau. ¹⁵ Om haro nopo ot osiliu do miagal di duwo o hal diri om mositi’ nod angatan di kusai i sawo dau do mongoi solowot dit imam. Om mositi’ nod migit iyau do porsombahan dit apatut do patahakon; iri no tu’ songkilogram o tapung do barli. A’ i’ koino-ino’d tunguhon do tumau do saitun i tapung om a’ kuwaan do kominyan tu’ iri nopo om porsombahan do mantad id kusai di kisangka’ dot araat; om iri no o pongilo ondung otopot ko’ amu’ i sangka’ dau’ddi. ¹⁶ Om angatan nondo dit imam i tondu’ddi do mongoi’d hiri’d gulu, om suhuon do mingkakat do hiri’d dotimbabaan di pananaraban do porsombahan. ¹⁷ Om manu nogindo it imam dot iso’ o mangkuk di tana’ do winonsoi, om suangan iri do waig dit olidang dot ongokooro’. Om manu nogindo iyau’d tana’ dot ongokooro’ do mantad hiri’d sirang di Kiim do TUHAN, om posuangon iri do hiri’d mangkuk di kiwaig, om osiliu indo i waig diri do waig di poporikot do kousungan. ¹⁸ Om poroboyon nondo o tobuk di tondu’, om pakahangan dau i tapung di maan do porsombahan. Om mositi’ nod it imam o mongigit di mangkuk di kisuang do waig dit opoit di poporikot do kousungan. ¹⁹ Om suhuon nogindo dit imam i tondu’ do tumumboyo’ diti sumpa’ do poboroson dit imam do poingkaa, ’’Ondung a’ ko nakapagampahu’ om a’ ko i’ oontok do kousungan do porikoton diti waig. ²⁰ Nga’ ondung nakapagampahu’ ko, ²¹ om TUHAN no o posiliu’d ngaran nu do ngaran di pongungusung dot id pogialatan do bansa’ nu. Om iyau no o popokukus di pawayaan nu’d sobu om papagayo do tian nu. ²² Kosuang nopondo iti waig dot id tian nu, om iti no o papagayo’d tian nu om popokukus di pawayaan nu’d sobu,’’ ka. Om mositi’ nod sumimbar i tondu’ddi do poingkaa, ’’Kotumboyo’ oku i’; wonsoyon nopod TUHAN o miagal diri,’’ ka. ²³ Om tulison nondo dit imam i boros do pomopol, om pisokon no kawagu i tulis dot i waig dit opoit di hiri’d mangkuk o pomisok. ²⁴ Iri nopo waig diri om pokoruol di tondu’ do gisom dot orualan no kopio. Nga’ tontok dit a’ po dit imam osuhu’ i tondu’ do monginum di waig diri, ²⁵ om mositi’ nod ngoyon po dit imam i porsombahan do tapung, om poinsawaton dau o longon dau do papatahak di tapung diri dot id TUHAN. Om pasakayon nogindo dau i tapung do hiri’d pananaraban do porsombahan. ²⁶ Om mongoi nondo it imam anu do songonggom di tapung do maan do tanda’ do nakatahak no i tapung diri. Om sorobon nogindo iri do hiri’d pananaraban do porsombahan. Om kolimpupuson nopondo om poinuman nondo di tondu’ i waig diri. ²⁷ Om ondung nakapagampahu’ kopio i tondu’ddi, nga’ kopuriman no iyau do toruol dot adalaan kopio dot obungou di waig diri; gumayo nondo o tian dau om kumukus o pawayaan dau’d sobu. Om osiliu nondo do ngaran di pongungusung o ngaran dau dot id pogialatan do bansa’ dau. ²⁸ Nga’ ondung aiso’ o sala’ dau, om a’ i’ iyau oontok di pinongusung diri. Om maganak i’ iyau. ²⁹ - ³⁰ Om iyo noddi o toturan do pasal do kusai di momiogu om i kipomusarahan do nakapagampahu’ i sawo dau. Om mositi’ nod suhuon i tondu’ do mingkakat do hiri’d dotimbabaan di pananaraban do porsombahan, om wonsoyon dit imam i natantu’ mantad do wonsoyon. ³¹ Iri nopo kusai om a’ i’ kohompit di kasalaan, nga’ iri nopo sawo dau om mositi’ nod mamabo do kootuson di winonsoi dau do nakasala’ no kopio iyau.

¹ Om suhuo’ nod TUHAN i Musa ² do papatahak diti piro-piro o toturan do kumaa dot id tulun dot Israil. Pointikid-tikid do kusai ko’ tondu’ di mamatos do sumiliu’d tulun do nasir om i tumobilang do sumiliu’d songonuon do TUHAN, ³ om mositi’ nod a’ monginum do waig dot anggur om tiinumon di kaawuk. Om a’ no iyau koino-ino do monginum do nunu nopo i winonsoi do mantad id tua’ dot anggur, om a’ koino-ino do mangakan do tua’ dot anggur di kouupu’ ko’ i tua’ dot anggur di kinoring. ⁴ Om solinaid nopo dau do sumiliu’d tulun do nasir, om a’ no iyau koino-ino do mangakan do nunu nopo i mantad id guas dot anggur; dot iri tuu i linsou ko’ iri po kulit dit anggur. ⁵ Solinaid nopo do poinggirot i batos dau do sumiliu’d tulun do nasir, om a’ no iyau koino-ino do momompod do tobuk dau ko’ momugar po do ganggut. Tu’ akagasan no iyau di batos dau do gisom pod aayi’ i maso do tuminobilang iyau do suminiliu’d tulun di songonuon kopio’d TUHAN. Om solinaid nopo do maso’ddi om mositi’ nod pologoson dau o tobuk om ganggut dau do numaru. ⁶ - ⁷ Om iri no i tobuk dau o sumiliu’d tanda’ do tuminobilang iyau do sumiliu’d songonuon kopio do Kinorohingan. Om iri no ot a’ dau koina-inaan do monosomu’ do tinan dau: a’ no iyau koino-ino do minsomok do rata’ do mulong piya do rata’ di tapa’ ko’ tina’ dau, ko’ rata’ po di tobpinai dau. ⁸ Om solinaid nopo dau do tulun do nasir om potobilang no iyau do sumiliu’d tulun di songonuon kopio’d TUHAN. ⁹ Ondung ososomu’ o tobuk do tulun do nasir, i tobuk di nokotobilang dau’ddi, tu’ pointoning iyau do tulun di monigowo do matai, om mositi’ nod andadon dau do solinaid do turu’ o tadau; om katalib pondo iri om bugaron nogindo dau o tobuk om ganggut dau, om olidang nogindo iyau. ¹⁰ Om tontok nopondo di kawalu’d tadau, om mositi’ nod mongoi iyau papatahak do duwo tinan do punai ko’ duwo tinan do sikukur dot id imam do hiri’d wawayaan di Kiim do TUHAN. ¹¹ Om iri nopo tiso’ di tombolog om mositi’ nod maan do porsombahan do pangampun do dusa, om iri no tiso’ om maan do porsombahan di sorobon do pongidu’ do kososomuo’ di tulun di nokoigit do rata’ddi. Om tontok i’ do tadau’ddi do mositi’ no do posongonuan kawagu di tulun diri i tobuk dau ¹² om inwoguan kawagu i kinapatahakan dau do tinan dau do sumiliu’d tulun do nasir do solinaid di maso do natantu’ mantad. Om iri nopo maso di notoliban om a’ no pointobon tu’ nososomu’ no i tobuk dau di pinosongonuan dau’ddi. Om mositi’ nod papatahak iyau do tanak do dumba’ do sontoun nogi’ o tumur do maan do porsombahan do poningolon. ¹³ Opupusan nopondo i maso di pinabatos di tulun do sumiliu iyau’d nasir, om mositi’ nod momonsoi iyau dot iso’ o wonsoyon di natantu’ mantad. Mositi’ nod mongoi iyau do hiri’d wawayaan di Kiim do TUHAN ¹⁴ do mongoi papatahak dot id TUHAN do tolu o tinan do tayam-tayam dit aiso’ o bohiton do tinan: songinan o tanak do dumba’ do tontoluhan di sontoun nogi’ o tumur do maan do porsombahan di sorobon, om songinan o tanak do dumba’ do tondu’ di sontoun nogi’ o tumur do maan do porsombahan do pangampun do dusa, om songinan o dumba’ do tontoluhan do maan do porsombahan do piombolutan. ¹⁵ Om mositi’ nogi’ do papatahak iyau do sambalatak o roti dit a’ rinalatan do pangambang: i roti dit obulugu’, i tapung di rinalatan do tumau do saitun o winonsoi, om i roti dit onipis, i ginihilan do tumau do saitun. Om suwai no ko’ iri om mositi’ nod papatahak po iyau do gandum om waig dot anggur. ¹⁶ Om mositi’ nod patahakon ngai’ dit imam iri dot id TUHAN; om mositi’ nod patahakon dau i porsombahan do pangampun do dusa om i porsombahan di sorobon. ¹⁷ Om potonggoyon nopo di roti do sambalatak diri om songinan o dumba’ do tontoluhan do patahakon dot id TUHAN do maan do porsombahan do piombolutan, om iri nogi’ i gandum om i waig dot anggur nga’ mositi’ nod patahakon dot id TUHAN. ¹⁸ Om mositi’ nod bugaron di tulun do nasir o tobuk dau do hiri’d wawayaan di Kiim do TUHAN. Om posuboon nogindo i tobuk dau do hiri’d tapui di maso do panaraban di porsombahan do piombolutan diri. ¹⁹ Om owonsoi pondo o miagal diri, dit oonsok i toliip di dumba’ do tontoluhan, om mositi’ nod ngoyon dit imam i toliip diri do pitonggoyon dot iso’ di roti dit obulugu’ om iso’ di roti dit onipis, om pakahangan nogindo di tulun do nasir. ²⁰ Om mositi’ nod patahakon dit imam i porsombahan do taakanon diri do maan do porsombahan di potobilangon do patahakon dot id TUHAN; om iti no i porsombahan dit olidang dot aanu dit imam, do maan do pomoruhang di kangkab om gakod di dumba’ do tontoluhan, i natantu’ mantad no dot aanu dit imam. Om owonsoi pondo o miagal diri om koino-ino nogindo i tulun di nasir diri do monginum do waig dot anggur. ²¹ Om iri no o toturan do tonudon di tulun di sumiliu’d nasir; nga’ ondung nokopoboros o songulun di suminiliu’d nasir do papatahak do porsombahan di lobi ko’ i miontok-ontok di batos dau, om mositi’ nod wonsoyon dau o miontok di pinoboros dau. ²² Om suhuo’ nod TUHAN i Musa ²³ do popoboros dot id di Harun om id tangaanak di Harun do mositi’ nod miagal diti o boros do poboroson diyolo’ do soira’ nopo do mamarakat iyolo’d tulun dot Israil: ²⁴ Maha’ daa om barakatan om gompion kou’d TUHAN. ²⁵ Maha’ daa om osonong om opuhawang o TUHAN dot id dokoyu. ²⁶ Maha’ daa om osianan o TUHAN dokoyu om manahak dokoyu do kosimbayanan. ²⁷ Om boros kad TUHAN, ’’Ondung roiton diyolo’ o ngaran ku do maan do pamarakat di tulun dot Israil, om barakatan ku no kopio iyolo’,’’ ka dau.

¹ Tontok di tadau di nopongo di Musa do pinopowonsoi i Kiim do TUHAN, om patahako’ no dau dot id TUHAN i Kiim om koinsanai di pakakas do hiri, do tinuntugan do tumau o ralan do pinapatahak. Om niyo nogiddi dau i pananaraban do porsombahan om koinsanai di pakakas do hiri. ² Om ngoyo’ noddi di piro-piro boyoon do pinuruan do sompiiyon patahako’ i porsombahan diyolo’ dot id TUHAN. Iyolo’ nopodti om i boyoon do payat dot Israil, om i nonuan do karaja’ do mongintob di maso’d pongintaban do tulun. ³ Om patahak no iyolo’ dot onom o guyudan om hopod om duwo tinan do sapi’: iso’ o guyudan do pinatahak do duwo o tulun do boyoon, om soronginanan do sapi’ o pointikid-tikid di boyoon. Om katahak poddi diyolo’ iri, ⁴ om boro-boros no o TUHAN dot id di Musa do poingkaa, ⁵ ’’Romiton ngai’ no i pinatahak diri do pakayon do momonsoi’d karaja’ dit apatut do wonsoyon do maan di Kiim ku; patahakon ngai’ nopori dot id tulun do Liwi do tumanud di karaja’ do wonsoyon diyolo’,’’ ka dau. ⁶ Om patahako’ ngai’ no di Musa i guyudan om i sapi’ddi dot id tulun do Liwi. ⁷ Tinahak nopo dau di tulun do Girson om duwo o guyudan om apat o tinan do sapi’, ⁸ om apat o guyudan om walu’ o tinan do sapi’ do tinahak dau di tulun do Morari. Om mositi’ nod wonsoyon diyolo’ o koinsanai di karaja’ diyolo’ do tumanud dit ituduk di Itamar, i tanak di Harun. ⁹ Nga’ iri nopo tulun do Kohat om a’ i’ nakaanu di guyudan ko’ i sapi’ di mantad id di Musa tu’ iri nopo pakakas dit ongolidang di diyolo’d gompion om a’ i’ milo dot a’ saanon. ¹⁰ Om minongigit po i piro-piro boyoon do porsombahan do maan do pamaramai do kapatahakan di pananaraban do porsombahan. Om tontok di nokosodia’ iyolo’ do papatahak di porsombahan diyolo’ddi do hiri’d pananaraban do porsombahan, ¹¹ om boro-boros no o TUHAN dot id di Musa do poingkaa, ’’Sunudan no iyolo’ dot insan nopo o tadau om iso’ no di boyoon o rumikot do mongoi papatahak di dau’d patahakon do maan do pamaramai di kapatahakan di pananaraban do porsombahan. Om iyo kasai’ nopoddi do solinaid do hopod om duwo o tadau,’’ ka dau. ¹² - ⁸³ Om ngoyo’ no diyolo’ patahako’ i porsombahan diyolo’ do minogisuhu-suhut do miagal diti: Tadau - Payat, Boyoon: Ko-1 - Yohuda, I Nahason i tanak di Aminadab; Ko-2 - Isakar, I Nitaniil i tanak di Suar; Ko-3 – Sibulon, I Iliab i tanak di Hilon; Ko-4 - Rubin, I Ilisur i tanak di Sidour; Ko-5 - Simion, I Solumiol i tanak di Surisiadai; Ko-6 - Gad, I Iliasap i tanak di Rohuil; Ko-7 - Ipraim, I Ilisama i tanak di Amihud; Ko-8 – Manasi, I Gamaliol i tanak di Pidasur; Ko-9 - Binyamin, I Abidan i tanak di Gidioni; Ko-10 – Dan, I Ahiosor i tanak di Amisadai; Ko-11 – Asor, I Pagiol i tanak di Okran; Ko-12 – Naptali, I Ahira i tanak di Inan. Oiyo nopo i porsombahan do nigitan diyolo’: iso’ o piring do pirok, do 1.5 kilogram do kawagato’, om iso’ o mimpun do pirok do 800 gram do kawagato’, do tumanud di poninimbang di natantu’ mantad. Om sinuangan goduwo nopo i piring om i mimpun diri do tapung di rinalatan do tumau do maan do porsombahan do gandum. Om iri no suwai om iso’ o piring do tamas do 110 o gram do kawagato’, do noponu’ do kominyan; om songinan o sapi’ do tontoluhan, om songinan o dumba’ do tontoluhan, om songinan o tanak do dumba’ do sontoun nogi’ o tumur, do maan do porsombahan di sorobon; iso’ o kambing do maan do porsombahan do pangampun do dusa; om duwo o sapi’ do tontoluhan, om limo o dumba’ do tontoluhan, om limo o kambing, om limo o tanak do dumba’ di sontoun nogi’ o tumur do maan do porsombahan do piombolutan. ⁸⁴ - ⁸⁸ Om kogumuon nopo di porsombahan do nigitan di hopod om duwo o boyoon diri dot oinsanan, do maan do tontok di kapatahakan di pananaraban do porsombahan om: — hopod om duwo o piring do pirok om hopod om duwo o mimpun do pirok do 27.6 kilogram o kawagato’ do toinsanan. — hopod om duwo o piring do tamas do 1.32 kilogram o kawagato’ do poimponu’ do kominyan. — hopod om duwo tinan do sapi’ do tontoluhan, om hopod om duwo o dumba’ do tontoluhan, om hopod om duwo o tanak do dumba’ di sontoun nogi’ o tumur, do pitonggoyon di porsombahan do gandum do maan do pomoruhang di porsombahan di sorobon. — hopod om duwo o kambing do maan do porsombahan do pangampun do dusa. — duwo nohopod om apat o sapi’ do tontoluhan, om onom nohopod o dumba’ do tontoluhan, om onom nohopod o kambing, om onom nohopod o tanak do dumba’ di sontoun nogi’ o tumur, do maan do porsombahan do piombolutan. ⁸⁹ Tontok di suminuang i Musa do hiri’d Kiim dot Olidang do mongoi boro-boros do TUHAN, om korongou no dau o TUHAN do minoro-boros dau do mantad hiri’d sawa-sawat di sompon do Kaban do Tumpongo, i hiri’d piolitan di duwo o pinoiyo-iyo’d moloikat di roitan do kerub.

¹ Om boros kad TUHAN dot id di Musa, ² ’’Sunudan no i Harun do tontok nopod popotimpak iyau di turu’ o lampung do hiri’d potitimpakan di lampung, om mositi’ nod poundaron kopio dau o potitimpak, om kotitiu i’ do ponong id gulu i tinitiu di lampung,’’ ka dau. ³ Om wonsoyo’ no di Harun o miagal di pinonuhuan do TUHAN. Om potimpako’ no dau i lampung do hiri’d potitimpakan di lampung do pinotoguang ponong id gulu. ⁴ Om iri nopo potitimpakan do lampung diri nga’ tamas ngai’ nopod tinantan o winonsoi do mantad hiri’d siriba’ om gisom do hiri’d sawat, do tumanud di poiyaan do pinokitanan do TUHAN dot id di Musa. ⁵ Om boros kad TUHAN dot id di Musa, ⁶ ’’Potongkiadon no i tulun do Liwi do mantad id tulun dot Israil do suwai, om wonsoyon no i wonsoyon di natantu’ mantad do pomolidang diyolo’ ⁷ do poingkaa o kowoyo-woyoo’ do momolidang: Wawasan no iyolo’ do waig di pinotobilang do maan do pomolidang, om suhuon iyolo’ do momugar do tobuk om hulu do pointongkop do tinan diyolo’, om suhuon iyolo’ do momupu’ do pakayan diyolo’. Om olidang indo iyolo’ dot id pagantangan do tugama’. ⁸ Om suhuon nondo iyolo’ do manganu do songinan o sapi’ do tontoluhan dit okoro’ po om porsombahan do gandum di gunaon, iri no i tapung di rinalatan do tumau do saitun. Om iya’, oi Musa, nga’ mositi’ nod mongoi panganu dot iso’ kawagu o sapi’ do tontoluhan do maan do porsombahan do pangampun do dusa. ⁹ Om timungon ngai’ nogindo i tulun dot Israil om suhuon i tulun do Liwi do mingkakat do hiri’d dotimbabaan di Kiim ku. ¹⁰ Om pakabayon nondo di tulun dot Israil o longon diyolo’ do hiri’d sakai’d tulu di tulun do Liwi. ¹¹ Om patahakon nogindo di Harun i tulun do Liwi diri do maan do porsombahan di pinotobilang do mantad id tulun dot Israil do patahakon dot id doho’, om milo i’ iyolo’d momonsoi do karaja’ ku. ¹² Om pakabayon nogindo di tulun do Liwi o longon diyolo’ do hiri’d sakai do tulu di duwo o sapi’ do tontoluhan diri; om iri nopondo i songinan om maan do porsombahan di sorobon. Om owonsoi nopo o miagal diri om koidu’ no i tulun do Liwi do mantad id dusa diyolo’. ¹³ Patahakon no i tulun do Liwi do maan do ponokoporsombahan di pinotobilang do patahakon dot id doho’, om suhuon no i Harun om i tangaanak dau do sumiliu’d boyoon diyolo’. ¹⁴ Om mositi’ nod posuwai-suwayon dokoyu i tulun do Liwi do mantad id tulun dot Israil di suwai, dot iyo’ddi o kowoyo-woyoo’ do posuwai-suwai; om osiliu i’ iyolo’ do doho’d songonuon. ¹⁵ Om owonsoi nopondo dokoyu i wonsoyon di natantu’ mantad do kapatahakan di tulun do Liwi, om haro no o kosorupayan diyolo’ do momonsoi’d karaja’ do hiri’d Kiim ku. ¹⁶ Nosiliu ku no iyolo’ do sumowoli di tangaanak do tongokusai dit id gulu kosusu do mantad id pointikid-tikid do sompiiyon do tulun dot Israil; om iyolo’ nopoddi om nokotobilang no do maan ku’d doho’. ¹⁷ Tontok di pinatai ku o toinsanan di tangaanak do kusai dit id gulu kosusu do hilo’d Masir, om maso noddi do nosiliu’d songonuon ku di pinotobilang i tangaanak do tongokusai dit id gulu kosusu do mantad id pointikid-tikid do sompiiyon dot Israil, om pointikid-tikid di tayam-tayam dit id gulu kosusu nga’ nosiliu nogi’ do doho’d songonuon. ¹⁸ Om dinondo nodti, om ilo’ no tulun do Liwi ot onuon ku do poningolon do koinsanai di tangaanak do kusai dit id gulu kosusu do tulun dot Israil, ¹⁹ do miagal ko’ porsombahan do mantad id tulun dot Israil. Om patahakon ngai’ ku iti dot id tulun do Liwi om id di Harun om id tangaanak dau, om kapaganu-anu i’ i tulun do Liwi di toonuon do dong imam do hiri’d suang di Kiim ku. Om iri nondo i tulun do Liwi o mokianu’d koompunan do mantad id doho’ do bagi’ di tulun dot Israil, om a’ i’ iyolo’ oontok do kosusaan do mulong piya do koinsomok kopio iyolo’ di Bilik dot Olidang diri,’’ ka dau. ²⁰ Om iri noddi o kinapatahakan di Musa om i Harun om koinsanai di tulun dot Israil di tulun do Liwi dot id TUHAN, do tumanud di pinonuhuan do TUHAN. ²¹ Om lidangai noddi di tulun do Liwi o tinan diyolo’ do tumanud dit oturan do tugama’, om pinupuan diyolo’ o pakayan diyolo’. Om patahako’ noddi di Harun iyolo’ do maan do porsombahan di pinotobilang do maan do don TUHAN. Om winonsoi nogi’ dau i wonsoyon di natantu’ mantad do pongidu’d dusa diyolo’. ²² Om wonsoyo’ ngai’ nopoddi di tulun dot Israil i pinonuhuan do TUHAN dot id di Musa do wonsoyon dot id tulun do Liwi. Om haro noddi o kosorupayan di tulun do Liwi do kumaraja’ do hiri’d Kiim do TUHAN do tumanud dot ituduk di Harun om i tangaanak dau. ²³ Om boros kad TUHAN dot id di Musa, ²⁴ ’’Mositi’ nod tumimpuun o pointikid-tikid do tulun do Liwi do momonsoi do karaja’ dau do hiri’d Kiim ku, dot orikot o duwo nohopod om limo o toun do tumur dau. ²⁵ Om kotingkod nopondo iyau do momonsoi di karaja’ dau’ddi om orikot o limo nohopod o toun do tumur dau. ²⁶ Om katalib nopondo iri, om koino-ino i’ iyau do monguhup di tulun do Liwi do suwai di kumaraja’ do hiri’d suang di Kiim ku. Nga’ a’ no iyau koino-ino dot iso-iso’ kopio do momonsoi do nunu nopo o karaja’. Om iyo noddi o kowoyo-woyoo’ nu do mangatur do karaja’ di tulun do Liwi,’’ ka dau.

¹ Tontok di tulan do koiso’, di toun do koduwo, do mantad di kinosoliwanan do tulun dot Israil do mantad hilo’d Masir, om boro-boros no o TUHAN dot id di Musa do hilo’d tana’ do kowotuan do Sinai. Om boros kad TUHAN, ² - ³ ’’Tontok nopod tadau’d kohopod om apat do tulan diti, do tumimpuun do mantad dit otonob o tadau, om mositi’ nod ramayon do tulun dot Israil o Tadau’d Agayo do Paska do tumanud dit oturan do natantu’ mantad,’’ ka dau. ⁴ Om suhuo’ no di Musa i tulun dot Israil do mamaramai do Paska. ⁵ Om ramayo’ noddi diyolo’ iri di sosodopon do tadau’d kohopod om apat do tulan diri, do hilo’d tana’ do kowotuan do Sinai. Om wonsoyo’ ngai’ nopo diyolo’ o miagal di pinonuhuan do TUHAN dot id di Musa. ⁶ Nga’ haro o piro-piro o tulun do sosomu’ dot id pagantangan do tugama’, tu’ nokoigit iyolo’d rata’. Om a’ noddi iyolo’ milo do mamaramai do Paska do tontok do tadau’ddi. Om ongoi no iyolo’ solowot di Musa om i Harun, ⁷ om boro-boros no iyolo’d poingkaa, ’’Iyahai nopodti om sosomu’, tu’ nokoigit iyahai’d rata’. Nga’ nokuro’ddi tu’ posuwai-suwayon iyahai do gisom dot a’ iyahai kapatahak do porsombahan dot id TUHAN do poingandad dilo tongotobpinai dahai dit oiyo o bansa’?’’ ka diyolo’. ⁸ Om boros kad i Musa do suminimbar, ’’Andadon po do gisom pod otudukan oku’d TUHAN,’’ ka dau. ⁹ Om suhuo’ nod TUHAN i Musa ¹⁰ do popoboros dot id tulun dot Israil do poingkaa, ’’Ondung haro ot id pogialatan dokoyu ko’ id pogialatan di sinakagon dokoyu do sosomu’ tu’ nokoigit do rata’, ko’ haro o tulun dot id tindalanon do kumaa dot id kinoiyonon dit osodu’, om it orohian i’ daa do mamaramai do Paska. ¹¹ Om koino-ino i’ iyolo’ do mamaramai’ddi. Nga’ iri nopondo i karamayan diri om pohoroon nopo diyolo’ om sombulan do gisom diri, i totuong di kohopod om apat do tulan di koduwo. Om ramayon nondo diyolo’ o tadau’ddi do mikuwo’d mangakan do roti dit a’ rinalatan do pangambang om rinapa’ dit opoit. ¹² Kada’ nod haro o pooluon do taakanon diri do gisom do kosuabon kawagu, om a’ nogi’ koino-ino do haro o tongoiso’ pod tulang dot otipu’ di tayam-tayam do patahakon dot id TUHAN. Om mositi’ nod ramayon o tadau’d Paska do tumanud do koinsanai dit oturan. ¹³ Nga’ iri nopo tulun dit olidang i’ daa dot id pagantangan do tugama’ om okon ko’ id tindalanon, nga’ a’ indo mamaramai di Paska, om a’ no kohompit do tulun di songonuon ku o tulun diri, tu’ a’ i’ iyau pinapatahak do porsombahan dot id doho’ do tontok di maso di natantu’ mantad. Om mositi’ nod boboon di tulun diri o kootuson di dusa dau. ¹⁴ Ondung haro o tulun do bansa’d suwai dot id rolot dokoyu dit orohian do mamaramai do Paska, om mositi’ nod tumanud iyau do koinsanai dit oturan om kowoyo-woyoo’ do mamaramai’ddi. Iso-iso’ i’ o toturan do tonudon do koinsanai’d tulun, dot iri tuu tulun dot Israil ko’ iri po tulun do bansa’d suwai,’’ ka dau. ¹⁵ - ¹⁶ Om tontok di tadau di pinowonsoi i Kiim do TUHAN, om tontok noddi do ruminikot o haun do luminikup di Kiim. Om dongotuong nopo nga’ miagal do tapui o kokitanan di haun diri. ¹⁷ Om soira’ nopod minsawat i haun, om huyason no di tulun dot Israil i kokiiman diyolo’, om mamanau nondo. Om honggo nopo o sondoton di haun om hiri no o pawansayan kawagu diyolo’ do kiim diyolo’. ¹⁸ Monuhu’ po o TUHAN di tulun dot Israil do momohuyas di kiim diyolo’, om huyason nogi’ diyolo’, om monuhu’ po o TUHAN do popowonsoi kawagu’ddi om powonsoyon nogi’ diyolo’. Om solinaid nopo di haun do hiri’d sawa-sawat di Kiim do TUHAN, om hiri kasai’ no iyolo’d kinoiyonon diri. ¹⁹ Ondung alaid i haun do hiri’d sawa-sawat di Kiim, om a’ no iyolo’ mamanau tu’ mumboyo’ i’ iyolo’d TUHAN. ²⁰ Nga’ nokoumbal i’ do piro-piro no tadau di haun do hiri’d sawa-sawat di Kiim. Nga’ poingkuro piya nga’ TUHAN i’ o popoilo ondung hiri kasai’ iyolo’d kinoiyonon diri do mundorong ko’ mundaliu iyolo’. ²¹ Om koumbal i’ do mundorong i haun do hiri do mantad nod sosodopon om gisom do kosuabon kawagu, om minsawat nopo i haun nga’ mamanau no iyolo’. Om soira-ira’ nopod minsawat i haun om mundaliu no iyolo’. ²² Om duwo tuu o tadau ko’ sombulan, ko’ sontoun, ko’ alaid ko’ iri nga’ solinaid nopo di haun do hiri’d sawa-sawat di Kiim do TUHAN, om a’ no iyolo’ mundaliu. Nga’ ondung minsawat i haun, om mundaliu no iyolo’. ²³ Om boros kasai’ nopod TUHAN o tonudon di tulun dot Israil do tontok do mundorong iyolo’ dot id iso’ o kinoiyonon om tontok do mundaliu iyolo’ dot id kinoiyonon do suwai, do tumanud di poboroson do TUHAN dot id di Musa.

¹ Om boros kad TUHAN dot id di Musa, ² ’’Momonsoi nod duwo o torumpit do pirok di tinantan o wonsoyon. Om iri no o pounion do pomolohou di tulun dot ogumu’ do tumimung om iri nogi’ o pounion do pomisunud diyolo’ do mamanau. ³ Ondung pounion goduwo i torumpit dot oloyong o pouuni, om komoyon nopoddi nga’ mositi’ nod tumimung ngai’ i tulun dot ogumu’ do hiri’d posorili’ diya’ do hilo’d wawayaan di Kiim ku. ⁴ Nga’ ondung iso’ noo o torumpit do pounion, om iri no i boyoon do payat o tumimung do hiri’d posorili’ diya’. ⁵ Ondung mutut-putut o pouuni, om komoyon nopoddi nga’ mositi’ nod mamanau ngai’ i payat di hiri’d ponong id koulayon o pinomukiiman. ⁶ Ondung pounion do koinduwo i torumpit diri do mutut-putut o pouuni, om komoyon nopoddi nga’ mositi’ nod mamanau ngai’ i payat di hiri’d ponong id salatan. Ondung mutut-putut o pouuni om ponuhu’ nori di tulun do mamanau. ⁷ Nga’ momolohou nopo di tulun dot ogumu’ do tumimung, om oloyong o pouuni. ⁸ Om pouni nopo di torumpit diri nga’ mositi’ nod it imam, i tangaanak di Harun. Om mositi’ nod tonudon iti piro-piro o toturan diti do gisom dot alaid. ⁹ Soira’ nopod sumangod kou dot id pomogunan dokoyu, do sumaap di pisangod do mongoi panangod dokoyu, om pounion no i torumpit do tanda’ do sumangod kou. Om ngoyon ku indo iyokoyu uhupai, iyoho’ i TUHAN i Kinorohingan dokoyu, om posion ku iyokoyu do mantad id koinsanai di pisangod dokoyu. ¹⁰ Om tontok di tadau do rumamai kou, di Tadau dot Agayo do Tulan do Wagu om i karamayan di suwai do don tugama’, om pounion no i torumpit diri do tontok di papatahak kou dot id doho’ do porsombahan di sorobon om porsombahan do piombolutan. Om uhupan ku indo iyokoyu. Tu’ iyoho’ no o TUHAN i Kinorohingan dokoyu,’’ ka dau. ¹¹ Om tontok di koduwo nod toun do mantad di tuminongkiad i tulun dot Israil do pomogunan do Masir, do koontok di tadau’d koduwo do tulan do koduwo, om insawat no i haun do mantad hiri’d sawa-sawat di Kiim do TUHAN. ¹² Om timpuun no i tulun dot Israil do mamanau do tuminongkiad di tana’ do kowotuan do Sinai. Om tontok di nokorikot iyolo’ do hilo’d tana’ do kowotuan do Paran, om undorong no i haun. ¹³ Om timpuun no i tulun dot Israil do minamanau do tumanud di ponuhuan do TUHAN do pinolombus di Musa. ¹⁴ Om soira-ira’ nopod mamanau iyolo’ nga’ iyo kasai’ nopoddi o toturan do mamanau do tonudon diyolo’. Om iri no tulun dit id sahau do bondira’ di sinompuruan di winoyo’ di payat di Yohuda o minogulu’d mamanau, do mogisuhu-suhut nopo i sinompuruan. Om boyoon nopo diyolo’ nga’ i Nahason i tanak di Aminadab. ¹⁵ Om minomoyo’ nopo di payat di Isakar om i Nitaniil i tanak di Suar. ¹⁶ Om i Iliab i tanak di Hilon o minomoyo’ di payat di Sibulon. ¹⁷ Om huyaso’ noddi i Kiim do TUHAN, om timpuun nod minamanau i pinuruan do sompiiyon di Girson om i Morari dot ongkisinaan di Kiim. ¹⁸ Om hiri nopod tohuri-huri diyolo’ nga’ i tulun dit id sahau do bondira’ di sinompuruan di winoyo’ di payat di Rubin, do mogisuhu-suhut nopo i sinompuruan. Om boyoon nopo diyolo’ nga’ i Ilisur i tanak di Sidour. ¹⁹ Minomoyo’ nopo di payat di Simion, om i Solumiol i tanak di Surisiadai, ²⁰ om minomoyo’ no di payat di Gad om i Iliasap i tanak di Rohuil. ²¹ Om pamanau nogiddi i tulun do Liwi, i mantad id pinuruan do sompiiyon di Kohat dot ongkiinigit di piro-piro pakakas dit ongolidang. Om tontok di nokorikot iyolo’ do hiri’d pawansayan do kiim dit id dosunsudan, om nokowonsoi no kawagu i Kiim do TUHAN. ²² Om pamanau no i tulun dit id sahau do bondira’ di sinompuruan di winoyo’ di payat dot Ipraim do mogisuhu-suhut nopo i sinompuruan. Om boyoon nopo diyolo’ nga’ i Ilisama i tanak di Amihud. ²³ Om boyoon nopo di payat di Manasi om i Gamaliol i tanak di Pidasur. ²⁴ Om boyoon no di payat di Binyamin om i Abidan i tanak di Gidioni. ²⁵ Om id tohuri noddi om pamanau no i tulun dit id sahau do bondira’ di sinompuruan di winoyo’ di payat do Dan. Om iyolo’ no i madtatamong do ponong id tohuri do koinsanai di sinompuruan. Om mogisuhu-suhut nopo i sinompuruan do minamanau. Om boyoon nopo diyolo’ nga’ i Ahiosor i tanak di Amisadai. ²⁶ Boyoon nopo di payat di Asor om i Pagiol i tanak di Okran, ²⁷ om boyoon no di payat di Naptali om i Ahira i tanak di Inan. ²⁸ Om iyo noddi o toturan di tulun dot Israil do mamanau do mogisuhu-suhut i sinompuruan do soira-ira’ nopo iyolo’d mamanau do kumaa dot id kinoiyonon do suwai. ²⁹ Om boro-boros no i Musa dot id di Hobab i tanak di Rohuil, i tulun do Midian diri, i tipagon di Musa. Boros ka dau, ’’Mamanau noddi iyahai do kumaa do hilo’d kinoiyonon di nokoboros do TUHAN do patahakon dau dot id dahai. Om nakabatos no o TUHAN do posiliu’d tulun dot Israil do bansa’ di kaya’. Om tanud pogi’ dahai om bohogian i’ dahai iya’ do kakayaan dahai,’’ ka dau. ³⁰ Nga’ boros ka di Hobab, ’’Pounsikou nopo, nga’ gumuli’ oku i’ do hilo’d pomogunan di kinosusuon ku,’’ ka dau. ³¹ Om boros kad Musa, ’’A, kada’ iyahai tongkiadai. Iya’ nopo om milo i’ do popotunud dahai’d ralan, tu’ kotunud ko i’ ondung honggo o tuundorongon do pawansayan toko’d kiim do hilo’d tana’ do kowotuan. ³² Tumanud ko nopo daa dahai om bohogian indo dahai iya’ do koinsanai di barakat do patahakon do TUHAN dot id dahai,’’ ka dau. ³³ Om tontok di nokotongkiad i bansa’ dot Israil do mantad hilo’d Sinai, i nuluhon dot olidang diri, om pamanau no iyolo’ do solinaid do tolu o tadau. Om iri kasai’ nopo i Kaban do Tumpongo’d TUHAN o hiri’d gulu diyolo’, do mogihum do kinoiyonon di pawansayan diyolo’d kiim. ³⁴ Om solinaid nopo diyolo’ do mingundaliu do mantad id pointikid-tikid do kinoiyonon di pinawansayan diyolo’d kiim, om hiri kasai’ nopod sawa-sawat diyolo’ i haun do TUHAN do tontok do dangadau. ³⁵ Om soira-ira’ nopo dot igitan i Kaban do Tumpongo om moro-boros no i Musa do poingkaa, ’’Ingkakat no, oi TUHAN, om pogitotongkiado’ no i pisangod nu do gisom do manangkus ngai’ do mogidu’ i tulun dit araatan diya’,’’ ka dau. ³⁶ Om soira-ira’ nopod poundorongon i Kaban do Tumpongo om moro-boros no i Musa do poingkaa, ’’Guli’ no, oi TUHAN, dot id piro-piro noribu do sompiiyon dot Israil,’’ ka dau.

¹ Om timpuun no i tulun do sontogod-togod do TUHAN dot ouudipanan di kosusaan diyolo’. Om soira’ di norongou’d TUHAN i boros diyolo’ do sontogod-togod, om kotogod no iyau, om porikatai no dau iyolo’d tapui. Om tapui poddi o poirolot diyolo’ gisom do nosorob o somputul di kokiiman. ² Om pinggiak no i tulun do mokitulung di Musa. Om sambayang noddi i Musa dot id TUHAN, om kopisok no i tapui. ³ Om iri noddi o kinopomungaranan do kinoiyonon diri do Tabira tu’ hilo’ no do suminikit i tapui do TUHAN dot id pogialatan diyolo’. ⁴ Om haro i’ o piro-piro o tulun do bansa’d suwai do manud-tanud di tulun dot Israil do mamanau. Om iyolo’ nopodti nga’ siakan no tomod do tikanas, om iri poddi i tulun dot Israil nga’ tuminimpuun diri do sontogod-togod. Boros ka diyolo’, ’’Haro po bo daa giya o tikanas toko’dti! ⁵ Di nopo di hilo’ toko’ pod Masir om kaakan toko’ id sada’ do gisom dot abangat toko’, om a’ i’ minog do momoli. Osorou no daa’ddi i sangop, om i sadur, om i losun, om i bawang dit aragang, om i bawang dit opurak, i koubasan toko’ do mangakan di hilo’ po. ⁶ Nga’ baino’ noddi om ongolomok toko’ no. Aiso’ no nunu-nunu dot akanon — aiso’ no suwai, ilo’ po manna do pointikid-tikid do tadau,’’ ka no diyolo’. ⁷ (Iri nopo manna om miagal do linsou dit ongokooro’ dot ongopurak dosilou- silou. ⁸ - ⁹ Iri nopo manna’ddi om kotonggoi di bolobou do rumatu’ do hiri’d kokiiman di dongotuong. Om kosuabon nopondo om minsorili’ poo i tulun do mongoi ponimung di manna. Om kisaron nondo diyolo’ iri ko’ tutuon do gisom dot aapung. Om onsokon nondo diyolo’ do maan do roti dit ourug dit alampis. Om kaakanan nopo nga’ miagal do roti di nonsok do tumau do saitun.) ¹⁰ Om korongou nod i Musa i tulun dot Israil do sontogod-togod, dot ongotimung-timung do songingkakat do hiri’d wawayaan di kiim diyolo’. Om kotogod noddi o TUHAN gisom do tuminongob i Musa. ¹¹ Om boros kaddi di Musa dot id TUHAN, ’’Nokuro tu’ raraaton kopio oku iyoho’ diya’? Nokuro tu’ a’ ko orohian doho’? Nokuro tu’ onuan oku diya’d tonggungan do mongilo-ilo ngai’dti tulun? ¹² Okon toi ko’ okon i’ ko’ iyoho’ o minomonsoi diyolo’ om okon ko’ iyoho’ o minaganak diyolo’? Om nokuro tu’ suhuon oku diya’ do sumiliu’d miagal do mitatamong do mamabo’d tanak, gisom dot iyoho’ noo o momogompi’ kasai’ diyolo’ do solinaid do hiti’d tindalanon do kumaa do hilo’d pomogunan di pinabatos nu dot id komolohingan diyolo’? ¹³ Antangai pogi’ nga’ a’ nopo moti’ iyolo’ otingkod-tingkod do mokianu do tikanas. Om honggo daa o ngayan ku do tikanas do kabagal do tulun dot irad diti kogumu’? ¹⁴ A’ oku no kooyit dot iso-iso’ kopio oku do mongilo-ilo ngai’dti tulun; adalaan no kopio kawagat iti dot id doho’! ¹⁵ Ondung iyoon kasai’ oku diya’dti oi TUHAN, om kosianai no doho’, om patayon oku no om a’ oku i’ kopuriman do koinggoritan diti pinorikot nu dot id doho’,’’ ka dau. ¹⁶ Om boros kad TUHAN dot id di Musa, ’’Monimung nod turu’ nohopod o tulun di pusohon om i nongookunan do sumiliu’d boyoon do tulun. Om pootodon no iyolo’ dot id doho’ do hilo’d suang do Kiim ku, om suhuon no iyolo’ do mingkakat do hilo’ dot id talad nu. ¹⁷ Om lumintuhun oku nondo om moro-boros oku diya’ do hiri’d kinoiyonon diri. Om onuon ku nondo o tongokooro’ di rusod di nakatahak ku diya’ om patahakon ku nondo iri dot id diyolo’. Om milo indo iyolo’d monguhup diya’ do mongilo-ilo do koinsanai’d tulun diti, om a’ ko nondo iso-iso’ do mongilo-ilo diyolo’. ¹⁸ Om poboroson no dot id tulun diti do dinondo o poingkaa, ’Lidangan no dokoyu o tinan dokoyu do bagi’d tadau’d suab; om kaakan kou indo do tikanas. Norongou nod TUHAN i tihad om todoi dokoyu dot osisiakanan do tikanas, om i boros dokoyu do pakamaha-maha’ dokoyu di hilo’ kou pod Masir. Baino’ nopo om onuan kou nod TUHAN do tikanas, om mositi’ nod kanon dokoyu iri. ¹⁹ Om mositi’ nod kanon dokoyu iri dot okon nopo ko’ sangadau no ko’ duwo o tadau, ko’ limo ko’ hopod o tadau ko’ duwo nohopod o tadau, ²⁰ suwai ko’ mositi’ nod kanon dokoyu iri do solinaid do sombulan, do gisom id sumakit kou om mingilob dot ouru do mingakan di tikanas. Om osiliu nondo o miagal diri tu’ niada’ i’ dokoyu o TUHAN dot id pogialatan dokoyu. Om minimboros kou do sontogod-togod dau dot osonong nogi’ daa dot a’ kou minumbal do tumongkiad do mantad hilo’d Masir,’ ka,’’ kad TUHAN. ²¹ Om boros ka di Musa dot id TUHAN, ’’Diya oku’d momoyo’ dot onom nahatus noribu o tulun, om poboroson nu i’ do manahak ko do tikanas do kabagal diyolo’ ngai’ do solinaid do sombulan? ²² Kabagal i’ tuu o sapi’ om dumba’ do sumbolion do pamangat diyolo’? Kabagal i’ tuu diyolo’ dot oinsanan piya i sada’ do hilo’d rahat?’’ ka dau. ²³ Om boros kad TUHAN do suminimbar, ’’Haro toi o kogisomon do sinundu ku? A’ ko no alaid do kokito ondung abayaan kopio tuu ko’ amu’ i pinoboros ku’ddi,’’ ka dau. ²⁴ Om soliwan no i Musa, om polombuso’ no dau dot id tulun dot ogumu’ i pinoboros do TUHAN. Om ponimung no i Musa do turu’ nohopod o boyoon om suhuo’ no dau iyolo’ do mingkakat do hiri’d posorili’ di Kiim do TUHAN. ²⁵ Om lintuhun noddi o TUHAN do hiri’d haun om boro-boros no iyau di Musa. Om ngoyo’ no dau ot okooro’ di Rusod di pinatahak dau di Musa om patahako’ no dau dot id turu’ nohopod o boyoon diri. Om soira’ di luminintuhun i Rusod dot id diyolo’, om timpuun no iyolo’ do mimboros dot opuhod do miagal do nabi, nga’ a’ i’ alaid no dot iyo iyolo’ddi. ²⁶ Nga’ iri nopo duwo boyoon do mantad id pogialatan di turu’ nohopod o boyoon diri, i Ildad om i Midad, nga’ minundorong do hiri’d kokiiman om a’ i’ minongoi tanud di suwai do minongoi do hiri’d Kiim do TUHAN. Om hiri noddid kokiiman i Rusod do luminintuhun dot id diyolo’. Om timpuun no iyolo’ goduwo do mimboros dot opuhod do miagal do nabi. ²⁷ Om panangkus noddi do suminoliwan o songulun o tanakwagu do minongoi pomisunud di Musa di nosiliu dot id di Ildad om id di Midad. ²⁸ Om boro-boros noddi i Yosua i tanak di Nun, i mongunguhup di Musa do mantad dit omulok po iyau. Boros ka dau dot id di Musa, ’’Ngoyo’ iyolo’ oduhai oi Tuan!’’ ka dau. ²⁹ Om boros kad i Musa do suminimbar, ’’Nokuro tu’ mogobi’ ko doho’d osolon? Orohian oku nogi’ daa kopio do patahakon do TUHAN o Rusod dau dot id toinsanan diti tulun dau, om gisom do mimboros ngai’ iyolo’ dot opuhod do miagal do nabi!’’ ka dau. ³⁰ Om guli’ noddi i Musa om i turu’ nohopod o boyoon do hiri’d kokiiman. ³¹ Om sigog id potonguso’ do TUHAN i tongus do mantad id rahat do pinoporikot do burung puyuh dit ogumu’ kopio, dot ongosiriba’ no o ponunulud. Om kotongkop nopo di tombolog i kokiiman gisom do piro-piro o kilomito do kosoduwo’ do posorili’ di kokiiman do sinondot di tombolog, om honggo nopo nga’ sokoon no di tombolog diri. ³² Om nosongodou nopoddi do tadau’ddi, om nosuaban do totuong diri, om nosongodou di tadau kawagu, do minggamit i tulun di burung puyuh. ³³ Om tontok dit osima’ po iyolo’d tikanas, om kotogod no o TUHAN di tulun om porikatai no dau iyolo’d toruol di mogkoroliu. ³⁴ Om pungaranai noddi o kinoiyonon diri do ’’Lobong di Godoot’’ tu’ hilo’ no o pinamalabangan diyolo’ di tulun dit ongodoot do tikanas. ³⁵ Om undaliu no i tulun do mantad hiri om pakayaai no do hilo’d bandar do Hasirot; om powonsoyo’ no diyolo’ o kiim diyolo’d hilo’.

¹ I Musa nopo nga’ minanansawo do tondu’ do bansa’d Kus, om iri noddi o kopongindaraatan di Miriam om i Harun di Musa. ² Boros ka diyolo’, ’’I Musa no tuu o pawayaan do TUHAN do boros dau? Okon toi ko’ iyato nga’ pawayaan i’ dau’d boros dau?’’ ka diyolo’. Om norongou id TUHAN i boros diyolo’. ³ (I Musa nopo nga’ tulun dit osiriba’ kopio o ginawo it osiriba’ no kopio o ginawo ko’ mantad dot isai nopo o tulun di poimpasi do hiti’d pomogunan.) ⁴ Om sigog nopoddi do boro-boros o TUHAN dot id di Harun om id di Miriam do poingkaa, ’’Pokionuon ku iyokoyu’d tolu do mongoi do hilo’d Kiim ku,’’ ka dau. Om ongoi no iyolo’, ⁵ om lintuhun no o TUHAN dot id rolot do haun di poinaru do miagal do torigi. Om ingkakat noddi o TUHAN do hiri’d wawayaan di Kiim, om pomolohou nod, ’’Harun! Miriam!’’ ka. Om laang goduwo no iyolo’ do minamanau. ⁶ Om boros kad TUHAN, ’’Pokinongou kou no diti poboroson ku! Soira’ nopod haro o nabi dot id pogialatan dokoyu om mintalang oku dot id diyolo’ dot id suang do pinointalang om moro-boros oku diyolo’ dot id suang do nipi. ⁷ Nga’ a’ i’ iyo’ddi do tontok do moro-boros oku di Musa, i susuhuon ku, tu’ noonuan ku no iyau’d karaja’ do momoyo’ do koinsanai diti tulun dot Israil, i tulun ku. ⁸ Om timbabaon ku nopo iyau do tontok do moro-boros oku, om poinsondot o pomomoros ku, om okon no ko’ posiriban-ribanon ku. Tinan ku piya nga’ nokokito i’ iyau! Om nokuro tu’ katama’ kou po daa kopio do sumaap dau?’’ ka dau. ⁹ Om kotogod no o TUHAN diyolo’ goduwo; om tontok di tuminongkiad o TUHAN, ¹⁰ om di minidu’ i haun do mantad hiri’d Kiim do TUHAN, om sigog id koontok i Miriam do toruol do kusta. Om miagal poddi do gapas kopurak o kulit dau. Om soira’ di kuminoili i Harun di Miriam om kokito dau do noontok i Miriam do toruol do miagal diri. ¹¹ Om boro-boros no iyau di Musa, ’’Tulungo’ iyahai oi Tuan, kada’ iyahai pologoso’ dot oinggorit dot obungou di dusa do nowonsoi dahai do gama’ di kababasug dahai. ¹² Kada’ i Miriam pologoso’ do miagal di tanak do napatai mantad do nosusu, om i nopiintanga’ nod napasa’ o tonsi,’’ ka dau. ¹³ Om pomolohou no i Musa do TUHAN, ’’Oi Kinorohingan, lingasai no iyau!’’ ka. ¹⁴ Om boros kad TUHAN do suminimbar, ’’Ondung dinulaan daa iyau di tapa’ dau, om turu’ no tadau do boboon dau o kointingayaman dau. Iyo nopoddi om poinsoduwon no iyau diti kokiiman do solinaid do turu’ o tadau, om atalib pondo iri om koino-ino nogi’ iyau do sumuang kawagu,’’ ka dau. ¹⁵ Om posoliwano’ noddi i Miriam di kokiiman do solinaid do turu’ o tadau. Om solinaid nopo dit a’ po iyau nokoguli’, om a’ po minundaliu i bansa’ddi do mantad id kinoiyonon diri. ¹⁶ Om tongkiad nogiddi iyolo’ do mantad hilo’d Hasirot om powonsoyo’ no diyolo’ o kiim diyolo’ do hilo’d tana’ do kowotuan do Paran.

¹ Om boros kad TUHAN dot id di Musa, ² ’’Momili’ nod songulun dot id pialatan di piro-piro boyoon do pointikid-tikid di hopod om duwo o payat do bansa’dti; do songulun o mantad id pointikid-tikid do payat. Om suhuon no iyolo’ do sumiliu’d gomponoluku’ do mongoi ponorisid do mogontong di pomogunan do Kanaan, i patahakon ku dot id tulun dot Israil,’’ ka dau. ³ - ¹⁵ Om wonsoyo’ nod Musa i pinonuhuan do Kinorohingan diri. Om suhuo’ no dau do minamanau do mantad hilo’d tana’ do kowotuan do Paran iti piro-piro o boyoon diti: Payat, Boyoon: Rubin, I Siamua i tanak di Sakur; Simion, I Sapat i tanak di Hori; Yohuda, I Kalib i tanak di Yopuni; Isakar, I Yigal i tanak di Yusup; Ipraim, I Hosia i tanak di Nun; Binyamin, I Palti i tanak di Rapu; Sibulon, I Gadiol i tanak di Sodi; Manasi, I Gadi i tanak di Susi; Dan, I Amiol i tanak di Gomali; Asor, I Situr i tanak di Mikail; Naptali, I Nabi i tanak di Wopsi; Gad, I Guil i tanak di Maki. ¹⁶ Om iri ngai’ no o gomponoluku’ di sinuhu’ di Musa do mongoi ponoluku’ do pomogunan diri. I Hosia nopo i tanak di Nun diri, om pinawaliu di Musa o ngaran; om i Yosua diri o pinomungaran. ¹⁷ Om tontok di sinuhu’ di Musa iyolo’ do mamanau, om bilinai no dau iyolo’ do poingkaa, ’’Mamanau kou no do pakayaan ponong id utara do mantad hiti, do kumaa ponong hilo’d salatan do pomogunan do Kanaan, om lumombus nogindo do hiri’d konulu-nuluan. ¹⁸ Ilaan no kopio dokoyu ondung okuro-kuro o pomogunan diri, om ondung piro kogumuo’d tulun do hilo’, om ondung songkuro o kinoris diyolo’. ¹⁹ Om antangan no kopio dokoyu ondung osonong ko’ amu’ i pomogunan diri, om ondung id kawalayan dit aiso’ o tolig do posorili’ o tiyonon di tulun do hilo’ ko’ id bandar po dit ongkitolig o posorili’ o tiyonon diyolo’. ²⁰ Om antangan no ondung oluhub i tana’, om ondung ogumu’ o kayu do hilo’. Om kada’ kou no kopio kolihu do mongigit dot ongokuuri’ di tua’ do totonomon do hilo’ do gumuli’ kou,’’ ka dau. (Om tontok nopoddi nga’ tumimpuun nogi’ do monsok i tua’ dot anggur.) ²¹ Om pamanau no i tulun diri do kuminaa ponong id utara om sorisido’ no diyolo’ do mingontong o pomogunan diri do tuminimpuun do mantad hiri’d tana’ do kowotuan do Sin, i ponong id salatan, om luminombus do hiri’d bandar do Ribo, it id toning do Ralan do Hamat di ponong id utara. ²² Om id gulu nopo kopio om kuminaa iyolo’ do ponong id salatan do pomogunan diri om ruminikot do hilo’d bandar do Hibron, i kinoiyonon do tulun dot Ahiman, om Sisai om Talmai. Iyolo’ nopo nga’ sinakagon dot iso’ o bansa’d tulun dit angagayo koulun, i roitan do tulun dot Inak. (Iri nopo bandar do Hibron om turu’ no toun do poingwonsoi dot id gulu ko’ i bandar do Soan di hilo’d Masir.) ²³ Om korikot no iyolo’ do hilo’d Rantai dot Iskol. Om hilo’ no o pinanatasan diyolo’ do raan dot anggur do mitonggoi do sompuru o tua’ dot anggur. Nga’ awagat tomod iri gisom dot a’ no milo dot a’ pasansangon do kayu do pangantayang, om piniantayangan diri do duwo o tulun. Om minigit nogi’ iyolo’ do piro-piro o tua’ do kayu di roitan do delima om tua’ dot ara do patahakon do maan do ponuwau-suwau. ²⁴ Om pungaranai noddi o kinoiyonon diri do Rantai dot Iskol tu’ hilo’ no o pinongonuan di tulun dot Israil di sompuru o tua’ dot anggur. ²⁵ Om kosorisid poddi di piro-piro gomponoluku’ o pomogunan diri do solinaid dot apat nohopod o tadau, om poguliai nogi’ diyolo’ ²⁶ dot id di Musa, om id di Harun, om id toinsanan di tulun dot Israil, i maso do pointimung do hilo’d Kadis, it id tana’ do kowotuan do Paran. Om susuyo’ ngai’ no diyolo’ i nongokito diyolo’. Om pokitanai diyolo’ di tulun dot Israil i tua-ua’ di nigitan diyolo’. ²⁷ Om boros ka diyolo’ dot id di Musa, ’’Nosorisid no dahai do mogontong i pomogunan diri om nokito dahai do kaya’ i pomogunan om oluhub i tana’d hilo’; om diya iti tua-ua’ dot okuri’ do mantad hilo’. ²⁸ Nga’ iri nopo tulun do hilo’ om ongokoris koulun, om bandar diyolo’ nga’ angagayo om ongogirot po o tolig do posorili’. Om haro po ot araat tu’ hilo’ nogi’ o nokokitanan dahai di sinakagon do tulun dit angagayo koulun. ²⁹ Momogun-mogun nopod hiri’d ponong id salatan do pomogunan diri om i tulun dot Amalik; om hiri nod konulu-nuluan om i tulun do Hit, om Yobus, om Amori o mongiyon-ngiyon; om hiri nod potoropis di Rahat do Tanga’ om hiri’d poinsusui di Bawang do Yordan om i tulun do Kanaan o momogun-mogun,’’ ka. ³⁰ Nga’ tingkodo’ nod Kalib i tulun do somboro-boros do tumogod di Musa, boros ka dau, ’’Ngoyon toko’ nogi’ songodo’ i pomogunan diri om aahau toko’ i’ o pomogunan diri do dinondo, tu’ okoris toko’ i’ do mangala’ddi,’’ ka. ³¹ Nga’ boros ka di tulun di songwoyo’ di Kalib do guminuli’, ’’A’ toko’ i’ moti’ okoris do sumaap diyolo’. Tu’ iri nopo tulun do hilo’ om ongokoris i’ ko’ iyati’,’’ ka diyolo’. ³² Om popimboroso’ noddi diyolo’ o boros dit a’ otopot dot id tulun dot Israil do pasal di pomogunan di nongoi diyolo’ antangai. Boros ka diyolo’, ’’A’ i’ kabagal di tulun di hilo’ mantad id pomogunan o hasil di tana’d hilo’, tu’ okuri’ i’ kopio o hasil. Om iri nopo tulun do hilo’ do nongokito dahai om angaranggou kopio koulun. ³³ Om nokokito po iyahai do tulun dit angagayo kopio koulun, i sinakagon do tulun dot Inak. Om miagal pod godu-godu kokoro’ o kopurimanan dahai do tinan dahai, om iyo no doti’ddi kopio o kokitanan diyolo’ dahai,’’ ka.

¹ Om monuaban nopoddi i tulun dot Israil do mihad dot atatangkabaan. ² Om sontogod-togod diri iyolo’ di Musa om i Harun. Boros ka no diyolo’, ’’Osonong-sonong nogi’ daa do napatai toko’ di hilo’d Masir ko’ hiti pod tana’ do kowotuan! ³ Nunu kopio o kapangangatan do TUHAN dati’ do hilo’d pomogunan do Kanaan? Tu’ apatai toko’ nopo dot id pisangadan om angatanggayan do pisangod iti sawo om iti tangaanak toko’. Osonong nogi’ do gumuli’ toko’ do hilo’d Masir!’’ ka. ⁴ Om pogiboro-boros noddi iyolo’ do poingkaa, ’’Osonong nogi’ do momili’ toko’d boyoon om gumuli’ toko’ i’ kawagu do hilo’d Masir,’’ ka. ⁵ Om otud no i Musa om i Harun do hiri’d dotimbabaan do koinsanai di tulun. ⁶ Om hurako’ nopo di Yosua i tanak di Nun, om i Kalib i tanak di Yopuni, o pakayan diyolo’ do popointalang do tumongob iyolo’. Iyolo’ goduwo nopoddi nga’ mantad id pialatan di piro-piro o tulun di minongoi ponoluku’. ⁷ Om boros ka diyolo’ dot id toinsanan di tulun, ’’Iri nopo pomogunan di nongoi dahai antangai om aiso’ no o koiyo do kosonongo’. ⁸ Ondung ohubayaan o TUHAN dati’, om pootodon toko’ i’ dau do hilo’, om patahakon dau dati’ i pomogunan di kaya’ om it oluhub o tana’. ⁹ Kada’ kou saap do TUHAN om kada’ kou kooris di tulun do poingiyon do hilo’. Osoonong toko’ do mangala’ diyolo’. Tu’ moyo-woyo’ i’ o TUHAN dati’ om naala’ no dau i ponokokinorohingan di mongintirung do tulun do hilo’, om kada’ kou no kooris,’’ ka. ¹⁰ Om songima-ima’ ngai’ no daa’ddi i tulun do momodumpau ngai’ diyolo’d apat do watu do gisom dot apatai iyolo’. Nga’ sigog id kokito di tulun i tulinau di kosorong kopio do mantad id koropohon do TUHAN, do minimbulai do hiri’d sawa-sawat di Kiim do TUHAN. ¹¹ Om boros kad TUHAN dot id di Musa, ’’Gisom tuu do songgira’ iti tulun do sumaap kasai’ doho’? Songkuro po o koloido’ diyolo’d mada’ do mogondos doho’, dot irad piya’ddi kogumu’ o koimayaan do nowonsoi ku dot id pogialatan diyolo’? ¹² Punsoon ku nondo iyolo’, do toruol di mogkoroliu o pomunso ku. Om iya’ nondo o silihon ku do molohing dot iso’ o bansa’ dit agayo om it okoris ko’ mantad diyolo’,’’ ka. ¹³ Nga’ boros kad Musa dot id TUHAN, ’’Nga’ TUHAN, nokoilo no i tulun do Masir dot i sinundu nu o pinoposoliwan nu dahai do mantad hilo’d Masir. ¹⁴ Om nosusui no diyolo’ iri dot id tulun di poingiyon dot id pomogunan diti. Om nongkoilo no o tulun do moyo-woyo’ ko dahai. Om nongkorongou nogi’ iyolo’ dot okito ko i’ kopio do tontok do mundorong i haun nu dot id sawa-sawat dahai; om mogulu-gulu ko dahai dot id rolot do haun di poorigi do dangadau om id rolot ko do tapui di poorigi do dongotuong. ¹⁵ Om ondung patayon ngai’ nu iti tulun nu, om mimboros ngai’ nondo i bansa’ di nongkorongou do pasal do kobontugo’ nu, do ¹⁶ pinatai nu i tulun nu do hiti’d tana’ do kowotuan tu’ a’ ko no kogoos do papaatod diyolo’ do hilo’d pomogunan di pinabatos nu. ¹⁷ Om iri no o kokuwaan oi TUHAN, do pokionuon ku do pointalangon nu i kuasa’ nu dot id dahai om wonsoyon nu i pinabatos nu. Tu’ nokoboros ko i’ do poingkaa, ¹⁸ ’Iyoho’ nopo i TUHAN, om a’ i’ obintogod, om pointalangon ku i’ o kosianan ku, om kotorodoko’ ku dit a’ opupus-pupusan. Om ompunan ku i’ i tulun di kidusa om i sumaap doho’. Nga’ iyo piya’ddi nga’ posulion ku i’ dot id tangaanak om id manangaki o kasalaan di komolohingan do gisom id korikot di sinakagon do kointolu om koingapat,’ ka nu. ¹⁹ Om dinondo nopodti oi TUHAN, om pokionuon ku no kopio dot ompunan nu o dusa diti tulun do miagal di minangampun ko diyolo’ do mantad di tuminongkiad i’ iyolo’ do pomogunan do Masir, tu’ agayo i’ kopio o kosianan nu,’’ ka dau. ²⁰ Om boros kaddi do TUHAN do suminimbar, ’’Ompunan ku i’ iyolo’, do miagal di pinokianu nu. ²¹ Nga’ mamatos oku no dot id suang do ngaran ku om id suang do kuasa’ ku di koponu’ diti pomogunan, ²² dot id pogialatan nopodti tulun om iso’ po nga’ aiso’ no ot otogui do gisom do kosuang do pomogunan di pinabatos ku dot id komolohingan diyolo’. Tu’ a’ i’ iyolo’ mumboyo’ doho’, om managalai-galai nogi’ iyolo’ do mogumbal doho’. Om nongkokito i’ daa iyolo’ di tulinau do tanda’ do karapahan ku di kosorong tomod, om nokokito iyolo’ di piro-piro o koimayaan do winonsoi ku do hilo’d Masir om hiti’d tana’ do kowotuan. ²³ A’ no, a’ no kopio iyolo’ kosuang do pomogunan diri. Id pogialatan nopo diyolo’ di minagada’ doho’, om iso’ po nga’ aiso’ no o koulok do pomogunan diri. ²⁴ - ²⁵ Nga’ i Kalib nopo, i susuhuon ku om a’ i’ iyo’ddi. Tu’ iyau nopo om tuminorodok i’ dot id doho’. Om iri no o kapaatadan ku dau do hilo’d tana’ di nohombo dau. Om iri nopondo i tana’ dit arantai, i pomogun-mogunan do tulun dot Amalik om tulun do Kanaan do dinondo, om aanu indo di sinakagon di Kalib, i susuhuon ku’ddi. Om suab nopondo, oi Musa, om gumuli’ no om kumaa no do hilo’d tana’ do kowotuan, i ponong id Suok dot Akaba,’’ ka dau. ²⁶ Om boros kad TUHAN dot id di Musa om id di Harun, ²⁷ ’’Gisom po tuu do songgira’ do sontogod-togod kasai’ do sumaap doho’ iti tulun dot angaraat? Apaasan oku nod korongou do boros diyolo’ do sontogod-togod! ²⁸ Simbaron no dokoyu iyolo’ do poingkaa: Boros kad TUHAN om, ’Sumumpa’ oku no dot id suang do ngaran ku do wonsoyon ku nondo dot id dokoyu o miagal di pinokianu dokoyu. Iyoho’ no, i TUHAN o minomoros diti. ²⁹ - ³⁰ Apatai kou nondo om mogiuriasan nopondo do hiti’d tana’ do kowotuan o rata’ dokoyu. Tu’ sontogod-togod ngai’ kou i’ do sumaap doho’. Om iri no o kokuwaan do suwai nopo ko’ iyo Kalib di Yosua, om aiso’ no o tiso’ piya dokoyu dit id sawat ko’ duwo nohopod o toun do tumur do kosuang di pomogunan di pinabatos ku dokoyu. ³¹ Boros ka dokoyu om tanggayan nondo do pisangod i tangaanak dokoyu! Nga’ pootodon ku indo iyolo’ dot id pomogunan di niada’ dokoyu, om iri nondo o pomogunan dot osiliu do pomogunan kopio diyolo’. ³² Nga’ iyokoyu nopo om hiti nod tana’ do kowotuan o kapatayon. ³³ Om minghombo nopondo i tangaanak dokoyu do hiti’d tana’ do kowotuan do solinaid dot apat nohopod o toun. Om oinggorit nondo i tangaanak dokoyu, do gisom po dot apatai ngai’ i tulun di rampam dokoyu, tu’ a’ kou i’ tuminorodok. ³⁴ Om boboon no dokoyu i kootuson di dusa dokoyu do solinaid dot apat nohopod o toun; sontoun o pomogontok do sangadau do mantad dit apat nohopod o tadau dokoyu do minongoi hombo dot id pomogunan diri. Om oilaan nogindo dokoyu ondung okuro-kuro no o kopurimanan do saapon kopio ku iyokoyu! ³⁵ Om sumumpa’ oku no do wonsoyon ku iti dot id dokoyu, iyokoyu i tulun dot angaraat om i mogisosokodung nopo do sumaap doho’. Om hiti nod tana’ do kowotuan diti o kapatayon ngai’ dokoyu. Iyoho’ no i TUHAN o minomoros diti,’ ka dau, ’’ kanto dokoyu. ³⁶ - ³⁷ Iri no piro-piro o tulun di sinuhu’ di Musa do minongoi pogontong di pomogunan diri om it a’ otopot o pinosunud di guminuli’ iyolo’ o nokobungou di tulun dot Israil do sontogod-togod do sumaap do TUHAN. Om iri no o nokopomohukuman do TUHAN diyolo’ do toruol, do gisom do nangapatai iyolo’. ³⁸ Id pialatan nopo di hopod om duwo o gomponoluku’ om iyo Yosua po di Kalib o poimpasi. ³⁹ Om soira’ di sinunudan di Musa i tulun dot Israil di pinoboros do TUHAN diri, om songihad-ihad poddi iyolo’ dot atatangaban. ⁴⁰ Om tadau noddi kawagu, dit osuab po, om sodia’ no iyolo’ do mongoi panangod do hiri’d konulu-nuluan do pomogunan diri. Om boros ka diyolo’, ’’Okunon i’ dahai do nokowonsoi iyahai’d dusa. Nga’ baino’ nopo om ngoyon no dahai songodo’ do magahau i pomogunan di pinoboros do TUHAN dot id dahai,’’ ka diyolo’. ⁴¹ Nga’ boros kad Musa, ’’Nokuro’ddi tu’ sumurilog kou pod TUHAN do dinondo? Aiso’ i’ bo ot aanu-anu dokoyu! ⁴² Kada’ kou nogi’ ongoi. Tu’ a’ i’ moyo-woyo’ dokoyu o TUHAN, om aala’ kou indo di pisangod dokoyu. ⁴³ Kotimbaba’ kou nopondo di tulun dot Amalik om i tulun do Kanaan, om angapatai kou indo dot id pisangadan. Om a’ no o TUHAN momoyo’ dokoyu tu’ a’ kou i’ minumboyo’ dau,’’ ka dau. ⁴⁴ Nga’ nokobulun kasai’ po i tulun dot Israil do minongoi do hiri’d konulu-nuluan do mulong piya dot a’ i Musa om i Kaban do Tumpongo tuminongkiad di kokiiman. ⁴⁵ Om songodo’ no di tulun dot Amalik om i tulun do Kanaan di poingiyon do hilo’ i tulun dot Israil. Om kaala’ no diyolo’ i tulun dot Israil om gusao’ no do gisom do nokorikot do hilo’d Horma.

¹ Om patahako’ nod TUHAN dot id di Musa ² iti piro-piro o toturan dit apatut do tonudon di tulun dot Israil do hilo’d pomogunan di patahakon do TUHAN dot id diyolo’. ³ Maan nopod porsombahan di sorobon, om porsombahan do pamayaan do batos ko’ porsombahan di patahakon do tumanud do kagaanan do ginawo ko’ porsombahan do patahakon do tontok do nunu nopo o karamayan do don tugama’ di koubasanan, om honggo nopod tayam-tayam diti nga’ koino-ino id patahakon dot id TUHAN: songinan o sapi’ do tontoluhan, ko’ songinan o dumba’ do tontoluhan, ko’ songinan o dumba’ ko’ songinan o kambing. Om iri no o tawau do porsombahan do taakanon diti o kasanangan do TUHAN. ⁴ - ⁵ Isai nopo o papatahak dot id TUHAN do dumba’ ko’ kambing do maan do porsombahan di sorobon, om mositi’ nod tanggayan o pointikid-tikid do tayam-tayam diri do songkilogram o tapung di rinalatan do songlito o tumau do saitun do maan do porsombahan do gandum, om songlito o waig dot anggur. ⁶ Ondung songinan o dumba’ do tontoluhan do patahakon, om mositi’ nod papatahak po do duwo kilogram do tapung, do ralatan do tumau’d saitun do songlito om satanga’ do maan do porsombahan do gandum, ⁷ om mitonggoi do songlito om satanga’ o waig dot anggur. Om iri no tawau do piro-piro o porsombahan diti o kasanangan do TUHAN. ⁸ Ondung songinan o sapi’ do tontoluhan o maan do porsombahan di sorobon ko’ porsombahan do pamayaan do batos ko’ porsombahan do piombolutan, ⁹ om mositi’ nod papatahak po do tolu kilogram do tapung di rinalatan do duwo lito do tumau’d saitun do maan do porsombahan do gandum, ¹⁰ om duwo po o lito do waig dot anggur. Om iri no tawau do porsombahan diti o kasanangan do TUHAN. ¹¹ Om iri no it apatut do patahakon do maan do porsombahan do potonggoyon do pointikid-tikid do sapi’ do tontoluhan, ko’ dumba’ do tontoluhan, ko’ dumba’ ko’ kambing. ¹² Ondung lobi ko’ iso’ o tayam-tayam do patahakon do maan do porsombahan, om iri nogi’ i porsombahan do tapung, om tumau, om waig dot anggur nga’ ruhangan no do tumanud di kogumuo’ di tayam-tayam. ¹³ Om mositi’ nod wonsoyon do pointikid-tikid do tulun dot Israil o miagal diri do soira-ira’ nopo iyolo’ do papatahak do porsombahan do taakanon. Om iri no tawau do porsombahan diti o kasanangan do TUHAN. ¹⁴ Om i tulun do bansa’d suwai di poirolot dokoyu do daamot noo ko’ i tumimporon nga’ mositi’ nod tumanud do koinsanai dot oturan diri do soira’ nopo iyolo’ do papatahak do porsombahan do taakanon dot id TUHAN, dot i kasanangan do TUHAN o tawau. ¹⁵ - ¹⁶ Om oiyo nopo o toturan om kowoyo-woyoo’ dot apatut do tonudon dokoyu om i tulun do bansa’d suwai di poirolot dokoyu, tu’ iyokoyu nopo diyolo’ om oiyo i’ dot id pagantangan do TUHAN. Om iyo no kasai’ddi o tonudon do gisom dot alaid. ¹⁷ Om patahako’ nod TUHAN dot id di Musa ¹⁸ iti piro-piro o toturan do tonudon di tulun dot Israil do korikot iyolo’ do hilo’d pomogunan di patahakon do TUHAN dot id diyolo’. ¹⁹ Om soira’ nopo do mangakan kou do nunu nopo o tua’ do totonomon do hiri’d pomogunan diri, om mositi’ nod potobilang kou do wookon do maan do porsombahan di potobilangon do maan do don TUHAN. ²⁰ Om soira’ nopo do mogonsok kou do roti dot i gandum di gulu koomot o wonsoyon, om mositi’ nod patahakon dot id TUHAN i roti dit id gulu koonsok, do maan do porsombahan di potobilangon do maan do don TUHAN do karalan-ralano’ nopo do papatahak om iyo iddi papatahak dokoyu di gandum dit id gulu dokoyu kotutu. ²¹ Om mositi’ nod patahakon dokoyu i roti dit id gulu koonsok do maan do porsombahan di potobilangon do maan do don TUHAN do gisom do mompus-ompus. ²² Om haro i’ dotindo o tulun dit a’ tumomod do momolihu do momonsoi do piro-piro dit oturan di pinatahak do TUHAN dot id di Musa. ²³ Om koumbal i’ doti’ do koimbagu do kolihu iti tulun do momonsoi do koinsanai di pinonuhuan do TUHAN do pinolombus di Musa. ²⁴ Ondung owonsoi di tulun o kasalaan do miagal diri tu’ a’ i’ iyolo’ nokoilo dot oturan, om mositi’ no do papatahak iyolo’ do songinan o sapi’ do tontoluhan do maan do porsombahan di sorobon, i porsombahan di kasanangan do TUHAN o tawau. Om mositi’ nod papatahak po iyolo’ do porsombahan do gandum om porsombahan do waig dot anggur do miagal dit apatut, do potonggoyon di porsombahan do sorobon diri. Om suwai no ko’ iri, om mositi’ no do papatahak po iyolo’ do songinan o kambing do tontoluhan do maan do porsombahan do pangampun do dusa. ²⁵ Om wonsoyon nogindo dit imam i natantu’ mantad do wonsoyon do pongidu’ do dusa di tulun dot ogumu’. Om ompunan indo iyolo’d Kinorohingan tu’ a’ i’ diyolo’ tinomod do momonsoi i kasalaan diyolo’, om kawagu po nga’ nakapatahak no iyolo’ do porsombahan do pangampun do dusa do maan do porsombahan do taakanon do maan do don TUHAN. ²⁶ Om oinsanan nopondo i tulun dot Israil om i tulun do bansa’d suwai di poirolot diyolo’ dot oompunan, tu’ oinsanan i’ iyolo’ do nokohompit do kasalaan diri. ²⁷ Ondung haro o tulun do kowonsoi’d dusa dot a’ dau tomodon, om mositi’ nod papatahak iyau do songinan o kambing do tondu’ di sontoun nogi’ o tumur do maan do porsombahan do pangampun do dusa. ²⁸ Om mositi’ nod wonsoyon dit imam i natantu’ mantad do wonsoyon do pongidu’ di dusa, do hiri’d pananaraban do porsombahan om oidu’ i’ i dusa di tulun, om oompunan indo do TUHAN o tulun diri. ²⁹ Om iyo nogiddi o toturan do tonudon dot isai nopo o kowonsoi’d dusa dit a’ tomodon, do tulun tuu iri dot Israil ko’ tulun po do bansa’d suwai di poingiyon do hilo’. ³⁰ Nga’ ondung haro o tulun dot Israil ko’ tulun do bansa’d suwai di tumomod do momonsoi’d dusa, om pakaiso-aiso’ no kopio iyau’d TUHAN. Om mositi’ nod hukuman iyau do kapatayon ³¹ tu’ suminaap i’ iyau’d TUHAN om tuminomod do tuminolibamban di pinonuhuan do TUHAN. Om iri i sala’ di tulun o nokobungou di kinapatayon dau. ³² Insan o maso, do tontok di hilo’ pod tana’ do kowotuan i tulun dot Israil, om haro o kusai do nabantalan do maso do mintimung do siduwon do tontok do tadau’d Sabat. ³³ Om ngoyo’ no i tulun diri potimbabao’ di Musa, om i Harun om koinsanai di tulun, ³⁴ om pinoundorong poddi iyau tu’ a’ po oilaan ondung kukuroyon iyau. ³⁵ Om boros kad TUHAN dot id di Musa, ’’Mositi’ nod hukuman do kapatayon iti tulun diti; om mositi’ nod posoliwanon iyau diti kokiiman. Om oinsanan nopondo iti tulun do momodumpau dau’d watu do gisom dot apatai do hilo’d soliwan diti kokiiman,’’ ka dau. ³⁶ Om oinsanan nopoddi i tulun do pinoposoliwan di tulun diri do mantad hiri’d kokiiman, om dumpaho’ no diyolo’ iyau’d watu do gisom do napatai, do tumanud di pinonuhuan do TUHAN. ³⁷ Om suhuo’ nod TUHAN i Musa ³⁸ do poposunud diti ponuhuan dot id tulun dot Israil do poingkaa, ’’Wansayan nod rinaboi-raboi o hiri’d tompok do pakayan dokoyu om kagasan nod tali dot otomou o pointikid-tikid di rinaboi-raboi. Om mositi’ nod wonsoyon kasai’ dokoyu o miagal diti do gisom dot alaid. ³⁹ Om guna’ nopo di rinaboi-raboi’ddi nga’ maan do kopomuhandaman. Om soira-ira’ nopondo dot okito dokoyu i rinaboi-raboi’ddi, om osorou ngai’ no dokoyu i ponuhuan ku om umboyoon indo dokoyu iri. Om iri nondo o kaantob dokoyu do monolikud doho’ do tumanud di dokoyu’d korohian om i dokoyu dot osorou. ⁴⁰ Om iri no i rinaboi-raboi o poposorou dokoyu do mumboyo’ do koinsanai di ponuhuan ku, gisom dot asangkayu kou nondo kopio dot asanganu ku. ⁴¹ Iyoho’ no i TUHAN i Kinorohingan dokoyu; om iyoho’ no i pinoposoliwan dokoyu do mantad hilo’d Masir, om osiliu oku i’ do Kinorohingan dokoyu. Iyoho’ no o TUHAN,’’ ka.

¹ - ² I Kora nopo, i tanak di Yisar, i mantad id pinuruan do sompiiyon di Kohat, i payat di Liwi, om nakasaap kopio do suminurilog di Musa. Om sinokodung nogi’ iyau do tolu o tulun do mantad id payat di Rubin — i Datan om i Abiram i tangaanak di Iliab, om i On i tanak di Pilit — om haro po 250 o tulun dot Israil do suwai dot iri ngai’ i boyoon dit angabantug do nopili’ di rayat do suminokodung dau. ³ Om ongoi ngai’ nopo iyolo’ solowot di Musa om i Harun, om boro-boros nod poingkaa, ’’Pokinongou pogi’ oi Musa! Pointikid-tikid do tulun dot Israil om nokotobilang ngai’ i’ do sumiliu’d songonuon do TUHAN. Om hiti id pogialatan toko’ o TUHAN. Nga’ nokuro tu’ momusorou ko iya’ do poinsawa-sawat ko ko’ mantad diti tulun do suwai di songonuon do TUHAN? Adalaan no kopio ko’ i natantu’ mantad iti wonsoyon nu!’’ ka diyolo’. ⁴ Om soira’ di norongou di Musa iri, om tungub nopo iyau do hiri’d tana’ om sambayang no dot id TUHAN. ⁵ Om boros kaddi dau dot id di Kora om id toinsanan di tulun do tuminanud di Kora, ’’Kosuabon nopod suab om potudukon indo do TUHAN dot id dati’ ondung isai noo i tulun di nokotobilang do sumiliu’d songonuon do TUHAN. Om TUHAN indo o momili’ di tulun di nokotobilang do sumiliu’d songonuon dau, om pologoson do TUHAN o tulun diri do minsomok dau do hiri’d pananaraban do porsombahan. ⁶ - ⁷ Kosuabon nopondod suab om migit kou no, iya’ om koinsanai di tuminanud diya’ do talam di poiyanan do tapui, om suangan nod popou, om kuwaan do kominyan, om igitan nogindo iri do hiri’d pananaraban do porsombahan. Om okito toko’ nogindo ondung isai i nopili’ do TUHAN dot id pogialatan toko’. Iyokoyu nogi’, i tulun do Liwi o nokowonsoi dit adalaan kopio ko’ i natantu’ mantad,’’ ka dau. ⁸ Om boros ka kawagu di Musa dot id di Kora, ’’Pokinongou kou pogi’, oi tulun do Liwi! ⁹ Ondos daa dokoyu om agaan-gaan iti kinopomilian do Kinorohingan dot Israil dokoyu do mantad id pogialatan di tulun dot Israil do suwai, om gisom do koino-ino kou do minsomok dau, om kapaganu-anu do hiri’d Kiim dau, om kakaraja’ om kopogobi-obi’ di tulun dot Israil? ¹⁰ Pinusou ko nogi’ kopio’d TUHAN diti oi Kora, om koinsanai di tulun do Liwi di suwai — om pokionuon po daa’ddi dokoyu dot osiliu kou dot imam! ¹¹ Soira’ nopod mogod-togod kou do sumaap di Harun, om otopot nopo kopio, oi Kora, om TUHAN i’ o saapon nu, om saapon di tulun di tuminanud diya’,’’ ka. ¹² Om ponuhu’ no i Musa do mongoi pomolohou di Datan om i Abiram, nga’ boros ka diyolo’, ’’A’ i’ iyahai mongoi! ¹³ A’ po tuu ula’ do pinosoliwan nu iyahai do mantad hilo’d tana’ do Masir dit oluhub, do ngoyon no patayo’ do hiti’d tana’ do kowotuan? Om baino’ nodti om pakaanak-anakon nu po daa iyahai? ¹⁴ Atalang no kopio dot a’ ko i’ pinoporikot dahai dot id tana’ dit oluhub, om aiso’ o tumo om kabun dot anggur dot asanganu dahai, om akalan nu po daa’ddi iyahai do baino’. A’ i’ iyahai mongoi!’’ ka diyolo’. ¹⁵ Om kotogod noddi kopio i Musa, om boros ka dau dot id TUHAN, ’’Oi TUHAN, kada’ romito’ i porsombahan dot igitan do tulun diti. A’ oku i’ nokowonsoi’d sala’ dot id tongoiso’ piya diyolo’; songinan-nginan piya o kaladai nga’ aiso’ i’ o naanu ku do mantad id diyolo’,’’ ka. ¹⁶ Om boros kaddi di Musa dot id di Kora, ’’Rumikot nod suab do hilo’d Kiim do TUHAN do miwoyo’ di 250 o tulun do sumokodung diya’. Om i Harun nga’ hilo’ nogi’. ¹⁷ Om mositi’ nod sorompori-pori kou’d migit do talam di poiyanan do tapui, om suangan nod kominyan om patahakon nogindo iri do hiri’d sakai di pananaraban do porsombahan,’’ ka dau. ¹⁸ Om sompori-pori nopoddi i tulun do minongoi panganu di talam di poiyanan do tapui, om suangai no diyolo’d popou, om kinuwaan do kominyan. Om ingkakat noddi iyolo’ do hiri’d wawayaan di Kiim dot id talad di Musa om i Harun. ¹⁹ Om timungo’ ngai’ no di Kora o koinsanai di tulun, om ingkakat no iyolo’ do potimbaba’ di Musa om i Harun do hiri’d wawayaan di Kiim do TUHAN. Om sigog iddi do kokito di tulun i tulinau do koropohon do TUHAN di kosorong tomod. ²⁰ Om boros kaddi do TUHAN dot id di Musa om id di Harun, ²¹ ’’Insodu’ kou do mantad diti tulun, tu’ dinondo nod raagon ku iyolo’,’’ ka dau. ²² Nga’ otud no iyo Musa di Harun do tuminuku’ om boro-boros nod poingkaa, ’’Oi Kinorohingan, iya’ no i manahak do koposion do koinsanai di songimpasi. Ondung kowonsoi’d dusa o tiso’ o tulun, om otogod ko no tuu’ndo dot oinsanan o tulun?’’ ka diyolo’. ²³ Om boros kad TUHAN dot id di Musa, ²⁴ ’’Suhuo’ ilo tulun dot ogumu’ do minsodu’ dilo kiim di Kora, om i Datan om i Abiram,’’ ka. ²⁵ Om ongoi noddi i Musa do mogiwoyo-woyo’ di piro-piro boyoon dot Israil do hiri’d kinoiyonon di Datan om i Abiram. ²⁶ Om boros kad Musa dot id tulun dot Israil, ’’Insodu’ kou no do mantad id kiim diti tulun dot angaraat, om kada’ kou ongoi kama’ do nunu nopo i diyolo’d songonuon. Om ondung a’ kou mumboyo’, om apatai kou no do kotonggoi diyolo’, dot obungou di dusa diyolo’,’’ ka. ²⁷ Om insodu’ no i tulun dot Israil di kiim di Kora, om i Datan om i Abiram. Om nokosoliwan no i Datan om i Abiram di kiim diyolo’ om poingkakat no iyolo’, dot iyolo’ ngai’ di sawo om i tangaanak diyolo’ do hiri’d wawayaan di kiim diyolo’. ²⁸ Om boros kaddi di Musa dot id tulun dit ogumu’, ’’Iti no o koilaan dokoyu do TUHAN o minonuhu’ doho’ do momonsoi’d koinsanai’ddi, om okon i’ ko’ mantad id doho’d korohian. ²⁹ Ondung kapatai-patayo’ toomod diti tulun, om aiso’ no o nunu-nunu do hukuman do mantad id Kinorohingan, om a’ oku nod TUHAN sinuhu’. ³⁰ Nga’ ondung wonsoyon do TUHAN it a’ po dokoyu norongou-rongou do mantad di gulu, om opitas no iti tana’ do monolon diyolo’ om koinsanai di diyolo’d songonuon, om gisom do miyau iyolo’ do kolintuhun do hilo’d kinoiyonon do tulun di napatai, om oilaan no dokoyu do suminaap do TUHAN o tulun diti,’’ ka dau. ³¹ Om maha’ di nopupusan no kopio di Musa i boros dau, om pigirang no i tana’ do hiri’d ningkokoton diyo Datan di Abiram, do gisom do nopipitas, ³² om korudsu’ nopoddi iyolo’ do mogitonggoi-tonggoi di sompiiyon diyolo’ om koinsanai di tulun di suminokodung di Kora om iri ngai’ i dapu’ diyolo’. ³³ Om karatu’ noddi iyolo’ di poimiyau po iyolo’ do hiri’d kinoiyonon do tulun do napatai do mitonggoi do koinsanai di dapu’ diyolo’. Om pilontop no kawagu i tana’ om a’ noddi iyolo’ hino. ³⁴ Om oinsanan nopo i tulun dot Israil di hino’d hiri do minogidu’ do tontok di norongou diyolo’ i giniakan di tulun diri. Om songgiak-giak po i tulun dot Israil do poingkaa, ’’Panangkus toko’d mogidu’! Tu’ nunu koilo-ilo nga’ tolonon toko’ nopo iyati’ diti tana’!’’ ka. ³⁵ Om porikoto’ pod TUHAN o tapui do molob-ngolob do minonorob di 250 o tulun di minongoi papatahak di kominyan. ³⁶ Om boros kaddi do TUHAN dot id di Musa, ³⁷ ’’Suhuon no i Iliasar i tanak di Harun diri, do posuwai-suwai di talam do tambaga’ di poiyanan do tapui, do mantad id kinasaraban di tulun diri. Om potiason no i tohun di mantad id talam do poiyanan do tapui’ddi dot id kinoiyonon do suwai, tu’ iri nopo pinoiyanan do tapui’ddi om olidang. ³⁸ Tu’ nongolidangan no iri do tontok di nongoi patahako’ do hiri’d sakai di pananaraban do porsombahan di don TUHAN. Om ngoyon no i talam do poiyanan do tapui’ddi do mantad id tulun di nohukuman do nobungou di dusa diyolo’. Om tantanon no dokoyu iri do gisom id onipis, om wonsoyon indo do ponompon di pananaraban do porsombahan. Om iri no ot osiliu do popoinsan di tulun dot Israil,’’ ka dau. ³⁹ Om ngoyo’ ngai’ no di Iliasar i talam do poiyanan do tapui’ddi om ponuhu’ no iyau’d tulun do manantan diri do gisom dot ongonipis no, om wonsoyon nogindo do ponompon di pananaraban do porsombahan. ⁴⁰ Om iri nondo o popoinsan di tulun dot Israil, do suwai nopo ko’ i sinakagon di Harun, om iso’ pod tulun nga’ aiso’ no o koino-ino do mongoi podtutud do kominyan dot id TUHAN, do hiri’d pananaraban do porsombahan. Om isai nopo o tulun do tumolibamban dot oturan diri om apatai no do miagal di Kora om i tulun di suminokodung dau. Om wonsoyo’ ngai’ nopoddi o miagal diri do tumanud di pinonuhuan do TUHAN dot id di Iliasar do pinolombus di Musa. ⁴¹ Om tadau noddi kawagu om oinsanan nopo i tulun dot otogod diyo Musa di Harun. Boros ka diyolo’, ’’Pinatai dokoyu o piro-piro o tulun di songonuon do TUHAN,’’ ka. ⁴² Om maha’ di nokotimung ngai’ no iyolo’ do sumaap daa di Musa om i Harun, om koili no iyolo’ do hiri’d Kiim do TUHAN. Om kokito no diyolo’ o haun do luminikup di Kiim, om imbulai no i tulinau do mantad hiri’d Kiim do Koropohon do TUHAN di kosorong tomod. ⁴³ Om ongoi no iyo Musa di Harun ingkakat do hiri’d dotimbabaan di Kiim, ⁴⁴ om boro-boros no o TUHAN dot id di Musa do poingkaa, ⁴⁵ ’’Insodu’ kou do mantad id tulun diti. Tu’ hilo’ nod kinoiyonon diyolo’ o pamatayan ku diyolo’!’’ ka dau. Om otud goduwo nopo iyolo’ do tuminuku’. ⁴⁶ Om boros kaddi di Musa dot id di Harun, ’’Ngoyo’ kopio i talam do poiyanan nu’d tapui, om suangan nod popou do mantad hilo’d pananaraban do porsombahan, om kuwaan nod kominyan dot ongokooro’ o hiri’d sakai di popou. Om lomusan nod mongigit iri do mongoi’d hilo’d tulun dot ogumu’ om wonsoyon no i natantu’ mantad do wonsoyon do pongidu’ di dusa diyolo’. Lomusan no! Tu’ nokourabus no o kototogod do TUHAN om nokotimpuun nod mogkoroliu o toruol di rumoliu,’’ ka dau. ⁴⁷ Om wonsoyo’ nod i Harun o miagal di pinoboros di Musa. Ngoyo’ no dau i talam do poiyanan dau’d tapui, om panangkus no do minongoi’d hiri’d tanga’ di tulun dot ogumu’ di pointimung. Om soira’ di nokito dau do nokotimpuun no i kosusaan, om pasakayo’ no dau di popou’d tapui i kominyan, om wonsoyo’ no dau i natantu’ mantad do wonsoyon do pongidu’ do dusa di tulun dot ogumu’. ⁴⁸ Om kotingkod noddi i kosusaan diri, gisom do poingkakat diri i Harun do hiri’d tanga’ di tulun di poimpasi om i tulun di nangapatai. ⁴⁹ Om iri nopo napatai do maso’ddi om 14,700 o tulun, om a’ po kohompit i tulun di napatai do tontok di suminaap i Kora. ⁵⁰ Om kotingkod poddi i kosusaan diri, om guli’ nogi’ i Harun do hiri’d di Musa do hiri’d wawayaan di Kiim do TUHAN.

¹ Om boros kad TUHAN dot id di Musa, ² ’’Suhuon no i tulun dot Israil do papatahak dot id diya’ do hopod om duwo o sukud; dot iso’ o sukud do mantad id pointikid-tikid di boyoon do payat. Om tulison no o ngaran di piro-piro boyoon do hiri’d sukud diyolo’. ³ Om tulison nogindo o ngaran di Harun do hiri’d sukud di mamawakil do payat di Liwi. Om mositi’ nod iso’ o sukud do mantad id pointikid-tikid di boyoon do payat. ⁴ Om igitan ngai’ no i sukud diri do hiri’d Kiim ku om poilihon no do hiri’d dotimbabaan di Kaban do Tumpongo. Om hiri no o koiyonon ku do sumolowot diya’. ⁵ Om iri nopondo i sukud do tulun di pilion ku om momutolid. Om iti no o ralan ku do moningkod di boros do tulun dot a’ otingkod-tingkod do sontogod-togod do sumaap diya’,’’ ka dau. ⁶ Om poboroso’ no di Musa iri dot id tulun dot Israil. Om sompori-pori nopoddi i boyoon diyolo’ do pinapatahak dot iso’ o sukud dot id di Musa; dot iso’ o sukud do mantad id pointikid-tikid do payat. Om oinsanan nopo nga’ hopod om duwo o sukud, om poirolot noddi i di Harun do sukud. ⁷ Om igitai ngai’ nod Musa i sukud diri do suminuang di Kiim do TUHAN, om poiliho’ no dau do hiri’d dotimbabaan di Kaban do Tumpongo. ⁸ Om tadau noddi kawagu, di suminuang i Musa di Kiim, om kokito no dau do nokopomutolid no i sukud di Harun, i mamawakil do payat do Liwi. Om nokopongusak no i sukud om noungkaya’ i tusak, om kitua’ do tua’ do kayu ketapang di noonsok no! ⁹ Om ngoyo’ ngai’ no di Musa i sukud om pokitanai no dau di tulun dot Israil. Om kokito ngai’ no iyolo’ di nosiliu’ddi, om ngoyo’ noddi di piro-piro boyoon i sukud diyolo’. ¹⁰ Om boro-boros noddi o TUHAN dot id di Musa do poingkaa, ’’Ngoyo’ kawagu poiliho’ ino sukud di Harun do hilo’d dotimbabaan di Kaban do Tumpongo. Om poopion nopo i sukud diri do maan do popoinsan di tulun dot Israil dit obinsaap, om ondung a’ iyolo’ tumingkod do sontogod-togod om apatai no moti’ iyolo’,’’ ka dau. ¹¹ Om wonsoyo’ nod Musa i pinonuhuan do TUHAN diri. ¹² Om boros ka di tulun dot Israil dot id di Musa, ’’Iyo nopoddi om obungou no iyahai! ¹³ Ondung a’ milo dot a’ apatai o tulun di koinsomok dilo Kiim do TUHAN, om komoyon nopoddi nga’ aiso’ no o pokukurayan dahai!’’ ka diyolo’.

¹ Om boros kad TUHAN dot id di Harun, ’’Iya’ nopo oi Harun, om i tangaanak nu, om i tulun do Liwi, om mositi’ nod mamabo do kootuson di kasalaan do nunu nopo o paganu-anu do hilo’d Kiim ku, nga’ iya’ noo om i tangaanak nu o mamabo do kootuson do kasalaan di karaja’ di dong imam. ² Ngoyo’ no angatai’d hiti i koobpinayan nu, i payat ngai’ do Liwi, do kumoruhang diya’d kumaraja’ om monguhup diya’ do daamot nu om i tangaanak nu do kumaraja’ do hiri’d Kiim ku. ³ Om mositi’ nod wonsoyon di payat do Liwi it apatut diyolo’d wonsoyon dot id dokoyu om wonsoyon diyolo’ i karaja’ diyolo’ do hiri’d Kiim, nga’ a’ i’ iyolo’ koino-ino do mongoi igit di konunu-nunuan dit ongolidang do hiri’d Bilik dit Olidang ko’ iri po hiri’d pananaraban do porsombahan. Tu’ soira’ nopo do koigit iyolo’ddi, om apatai no iyolo’ om iya’ nga’ kotonggoi nod apatai. ⁴ Om mositi’ nod kumoruhang iyolo’ diya’ do kumaraja’ om momonsoi di karaja’ diyolo’ do maganu-anu do hiri’d Kiim ku, nga’ isai nopo it a’ noonuan do kosorupayan do momonsoi do karaja’ddi om a’ no koino-ino do kumoruhang diya’ do kumaraja’. ⁵ Iya’ noo, oi Harun, om i tangaanak nu, ot apatut do momonsoi di karaja’ do hiri’d Bilik dit Olidang om hiri’d pananaraban do porsombahan, om a’ oku indo otogod di tulun dot Israil. ⁶ Iyoho’ no i minomili’ di tulun do Liwi, i koobpinayan nu’ddi do mantad id pogialatan do tulun dot Israil do maan ku do pomuhawang diya’. Om nokotobilang no iyolo’ do sumiliu’d songonuon ku, om milo no iyolo’ do momonsoi’d karaja’ diyolo’ do hiti’d suang do Kiim ku. ⁷ Nga’ iya’ noo om i tangaanak nu o koino-ino do momonsoi do karaja’ di dong imam, do nunu nopo i kagait di pananaraban do porsombahan om i hiri’d Bilik dit Olidang Kopio. Om iri no ot apatut nu do wonsoyon, tu’ nopuhawangan ku no iyokoyu do karaja’ do dong imam. Om pointikid-tikid do tulun dit aiso’ o kosorupayan do miagal diri do koinsomok di konunu-nunuan dit olidang diri om hukuman nod kapatayon,’’ ka dau. ⁸ Om boros kad TUHAN dot id di Harun, ’’Soro-sorohon no, do koinsanai di porsombahan di pinotobilang do maan do doho’, om it a’ sorobon do maan do porsombahan, om iya’ no o kaanu. Om iri no o diya’d aanu kasai’ do gisom dot alaid. Om iri no o patahakon ku diya’ om i sinakagon nu. ⁹ Om mantad nopo di piro-piro porsombahan dit olidang kopio dit a’ sorobon do hiri’d pananaraban do porsombahan, om iti ngai’ no o diya’ dot aanu: i porsombahan do gandum, om i porsombahan do pangampun do dusa, om i porsombahan do poningolon. Om nunu nopo i pinatahak dot id doho’ do maan do porsombahan dit olidang, om iya’ no om i tangaanak nu o kaanu. ¹⁰ Om pokolidangon no iri, om akanon no dot id kinoiyonon dit olidang. Om tongokusai noo o koino-ino do mangakan diri. ¹¹ Om suwai no ko’ iri, om koinsanai di porsombahan do suwai di pinotobilang, i porsombahan do tulun dot Israil dot id doho’, om iya’ no o kaanu’ddi. Om iri no o patahakon ku diya’ om i tangaanak nu’d tongokusai om i tangaanak nu’d tongoondu’. Om iyo noddi o toturan do gisom dot alaid. Om isai nopo it id suang do sompiiyon nu dit olidang dot id pagantangan do tugama’ om koino-ino nod mangakan diri. ¹² Om iya’ no ot onuan ngai’ ku di hasil do tana’ dit id gulu dit ongosonong kopio, i ngoyon di tulun dot Israil patahako’ dot id doho’ do monikid toun: i tumau do saitun, om i waig dot anggur, om i gandum. ¹³ Koinsanai’ddi om diya’ ngai’ no. Om isai nopo it id suang do sompiiyon nu dit olidang dot id pagantangan do tugama’ om koino-ino nod mangakan diri. ¹⁴ Om nunu nopo i hilo’d tana’ dot Israil di pinotobilang do maan do doho’ dot aiso’ o pinaantakan, om iyokoyu no o kaanu. ¹⁵ Om pointikid-tikid do tanak ko’ tayam-tayam dit id gulu kosusu, do patahakon di tulun dot Israil dot id doho’, om iyokoyu no o kaanu. Nga’ mositi’ nod romiton dokoyu o tusin di pamalapus do pointikid-tikid do tanak dit id gulu kosusu om i pamalapus do pointikid-tikid do tayam-tayam di sosomu’ dit id gulu kosusu. ¹⁶ Om tangaanak nopo nga’ mositi’ nod lopusan do tontok di sombulan nogi’ o tumur diyolo’. Om gatang nopo di natantu’ do maan do pamalapus om limo o tusin do pirok, do tumanud di gatang do natantu’ mantad. ¹⁷ Nga’ sapi’ nopo ko’ dumba’ ko’ kambing dit id gulu kosusu om a’ no koino-ino do lopusan. Iri nopo tayam-tayam diri om doho’ no kopio om mositi’ nod patahakon. Poiyason no i raha’ di tayam-tayam diri do hiri’d pananaraban do porsombahan om sorobon no i lunok do maan do porsombahan do taakanon. Om iri no tawau di porsombahan diri o kasanangan ku. ¹⁸ Iyokoyu no o kaanu do tonsi di tayam-tayam do miagal di porsombahan di pinotobilang do maan do doho’ tu’ iyokoyu o kaanu di kangkab om i gakod do wanan di tayam-tayam diri. ¹⁹ Om iya’ no om i tangaanak nu’d tongokusai om tongoondu’ ot onuan ku do koinsanai di porsombahan di pinotobilang, i patahakon di tulun dot Israil dot id doho’, do gisom dot alaid. Om iti no o tiso’ o popogirot do batos, om it a’ no milo do pututon dot id pialatan to om i sinakagon nu,’’ ka dau. ²⁰ Om boros ka kawagu’d TUHAN dot id di Harun, ’’Iyokoyu nopo om a’ no kaanu do nunu-nunu do maan do tungkusan. Om aiso’ i’ o tongosongkoiyonon piya do tana’ do hilo’d pomogunan di pinabatos ku’ddi dot asanganu dokoyu. Tu’ iyoho’ no, i TUHAN, ot osiliu do tungkusan dokoyu,’’ ka dau. ²¹ Om boros kad TUHAN dot id di Harun, ’’Koinsanai di sompihopod do patahakon do tulun dot Israil dot id doho’ om patahakon ngai’ ku no dot id tulun do Liwi. Om iti no o ponokogadsi’ diyolo’ do maganu-anu do hiri’d Kiim ku. ²² Om iri nopo tulun dot Israil di suwai om a’ no koino-ino do mongoi insomok di Kiim, om a’ i’ iyolo’ koporikot do hukuman do kapatayon dot id tinan diyolo’. ²³ Mantad nopod baino’ om iri no tulun do Liwi o koino-ino do maganu-anu do hilo’d Kiim ku om i mongilo-ilo do karaja’d hilo’. Om iti nogi’ o toturan do tonudon di sinakagon nu do gisom dot alaid. Om aiso’ no ot aanu di tulun do Liwi do maan do tungkusan do hilo’d Israil, ²⁴ tu’ iri nopo sumiliu do tungkusan diyolo’ om koinsanai di sompihopod di patahakon do tulun dot Israil dot id doho’ do maan do porsombahan di pinotobilang do maan do doho’. Om iri no o kapabarasan ku dot id tulun do Liwi, dot iyolo’ nopo om a’ i’ kaanu do maan do tungkusan do hilo’d Israil,’’ ka dau. ²⁵ Om suhuo’ nod TUHAN i Musa ²⁶ do popolombus diti ponuhuan dot id tulun do Liwi do poingkaa, ’’Soira’ nopo do karamit kou di porsombahan do sompihopod do patahakon di tulun dot Israil dot id dokoyu, tu’ iri no i patahakon do TUHAN dot id dokoyu do dokoyu’d songonuon, om mositi’ nod patahakon kawagu dokoyu dot id TUHAN o sompihopod do mantad diri do maan do porsombahan di potobilangon. ²⁷ Om iti nopo porsombahan di potobilangon diti nga’ paagalon nopo di porsombahan do gandum do wagu, om i porsombahan do waig dot anggur do wagu do mantad id songulun o gompongumo. ²⁸ Om iyo nodti o ralan dokoyu do papatahak do porsombahan di potobilangon do maan do don TUHAN, do mantad id toinsanan di porsombahan do sompihopod dit aramit dokoyu do mantad id tulun dot Israil. Om iti nopo porsombahan do pinotobilang diti do maan do dong Kinorohingan nga’ mositi’ nod patahakon dokoyu di Harun. ²⁹ Patahakon no it osonong kopio do mantad id koinsanai dit aramit dokoyu. ³⁰ Om katahak pondo dokoyu it osonong kopio’ddi, om koino-ino kou nogindo do manganu di noolu’, do miagal di gompongumo tu’ iri it oolu’ di patahakon dau ot onuon dau. ³¹ Om iri nopo i noolu’, om koino-ino i’ dokoyu om i sompiiyon dokoyu dot akanon do hinonggo nopo o pangakanan. Tu’ iri no o ponokogadsi’ dokoyu do maganu-anu do hiri’d Kiim ku. ³² A’ kou i’ kasala’ do mangakan piya’ddi, ondung nakatahak dokoyu it osonong kopio dot id TUHAN. Nga’ kada’ nogi’ kopio dokoyu sosomuo’ i porsombahan do tulun dot Israil dit ongolidang diri do ponosomu’ nopo om i sangkaakan-akan nopo do mantad id porsombahan diri om a’ po nakatahak dot id doho’ it osonong kopio. Ondung tolibambanan dokoyu o toturan diti, om hukuman kou nod kapatayon,’’ ka dau.

¹ Om suhuo’ nod TUHAN i Musa om i Harun ² do papatahak diti piro-piro o toturan dot id tulun dot Israil: Manganu nod songinan o sapi’ dot aragang dit aiso’ o bohiton do tinan om it a’ po noumbalan do nasakayan do ginandar. ³ Patahakon no o sapi’ddi dot id di Iliasar, it Imam diri. Om mositi’ nod posoliwanon di kokiiman i sapi’ om sumbolion nogindo dot id toguang di Iliasar. ⁴ Om mositi’ nod manu i Iliasar dot ongokooro’ do raha’ di sapi’ om powowoson nogindo dot inturu’ do potimbaba’ ponong id Kiim ku. ⁵ Om mositi’ nod insanan do monorob i sapi’ddi, do potonggoyon i kulit, om i tonsi, om i raha’, om i suang do tian, do hiri’d toguang dit imam. ⁶ Om mongoi nogindo panganu it imam dot ongokooro’ di kayu sedar, om songguas o sakot do roitan do hisop, om sampatod o tali dot aragang, om posuboon ngai’ nogindo iri do hiri’d tapui. ⁷ Om owonsoi ngai’ pondo iri om pupuan nogi’ dit imam o pakayan dau om tuntugan do waig o tinan dau. Om koino-ino nogindo iyau do sumuang di kokiiman; nga’ gisom nopod sosodopon om poinghompit po iyau do tulun di sosomu’. ⁸ Om i tulun di minonorob di sapi’ nga’ mositi’ no do pupuan dau i pakayan dau om tuntugan do waig o tinan dau; om iyau nga’ sosomu’ po kasai’ do gisom do sosodopon. ⁹ Om ngoyon nogindo do songulun dit olidang dot id pagantangan do tugama’ timungo’ i tauu di sapi’ddi om poilihon dot id kinoiyonon dit olidang dot id pagantangan do tugama’ do hiri’d soliwan di kokiiman. Om hiri no o poilihan di tauu om oongoi i’ di tulun dot Israil do tontok do posodia’d waig do maan do pomolidang. Om iri nopo wonsoyon di natantu’ mantad diri nga’ maan do pongidu’d dusa. ¹⁰ Om iri nopo tulun di minonimung do tauu di sapi’ddi nga’ mositi’ nod pupuan dau o pakayan dau, nga’ tulun po kasai’ iyau’d sosomu’ do gisom dot orikot o sosodopon. Om iyo no kasai’ddi o toturan do gisom dot alaid, do tonudon di tulun dot Israil om i tulun do bansa’d suwai di poingiyon dot id rolot diyolo’. ¹¹ Isai nopo o koigit do rata’ om sosomu’ no do solinaid do turu’ o tadau. ¹² Om tontok nopo di tadau’d kotolu om tadau’d koturu’ om mositi’ nod papaharo o tulun diri do kopomolidangan do tinan dot i waig do pomolidang kasai’ o pakayon; om olidang nogindo iyau dot id pagatangan do tugama’. Nga’ ondung a’ iyau momolidang do tinan dau di tadau’d kotolu om tadau’d koturu’, om ososomu’ kasai’ po iyau. ¹³ Isai nopo o koigit do rata’ om a’ no momolidang do tinan, om tulun no iyau do sosomu’, tu’ a’ po iyau notuntugan di waig do pomolidang. Om koponosomu’ iyau di Kiim do TUHAN, om iri no ot a’ dau kohompit- hompit di tulun do songonuon do Kinorohingan. ¹⁴ Ondung haro o tulun dot apatai dot id suang do kiim, om isai nopo o tulun dot id suang di kiim do tontok di minatai i tulun diri, ko’ i kosuang di kiim diri, om ososomu’ no do solinaid do turu’ o tadau. ¹⁵ Om koinsanai di kakanan om poriuk dit aiso’ o sompon do hiri’d suang di kiim diri nga’ kohompit nod sosomu’. ¹⁶ Ondung haro o tulun do koigit do rata’d tulun di pinatai’d tulun ko’ i kinapatai-patayo’ toomod do hilo’d dumo, ko’ ondung haro o tulun do koigit do lobong ko’ tulang do tulun do napatai, om sosomu’ no o tulun diri do solinaid do turu’ o tadau. ¹⁷ Om pomolidang nopod tinan do mantad id kososomu’ddi om mositi’ nod mongoi panganu dot ongokuuri’ di tauu di sapi’ dot aragang di sinorob do maan do pangampun do dusa om posuangon nogindo i tauu’ddi dot id iso’ o poriuk, om tunguhon nogindo iri do waig di wagu kaanu. ¹⁸ Pasal nopo di hal do koiso’ddi, iri no tu’ tontok nopo do haro o tulun dot apatai dot id suang do kiim, om mositi’ nod mongoi panganu o songulun dit olidang dot id pagantangan do tugama’ do songguas o sakot di roitan do hisop, om poobugon iri do hiri’d waig, om wawasan nogindo i kiim om koinsanai dit id suang di kiim, om iri nogi’ i tulun di hiri’d kiim. Om pasal no di hal do koduwo, iri no tu’ soira’ nopo do haro o tulun do koigit do rata’, ko’ lobong ko’ tulang do tulun do napatai, om mositi’ nod i tulun dit olidang dot id pagantangan do tugama’ o momowowos di tulun di sosomu’ddi. ¹⁹ Om tontok nopondo do tadau’d kotolu om tadau’d koturu’, om mositi’ nod wawasan do tulun dit olidang dot id pagantangan do tugama’ i tulun di maso pod sosomu’ddi. Om koturu’ pondod tadau om opongo nogi’ o kopomolidangan do tulun diri. Om pupuan nogindo di tulun o pakayan dau om modsu’, om olidang nondo iyau dot otonob o tadau. ²⁰ Isai nopo it ososomu’ nga’ a’ indo papaharo do kopomolidangan do tinan, om sosomu’ kasai’ no iyau tu’ a’ po notuntugan di waig do pomolidang. Om koponosomu’ po iyau di Kiim do TUHAN, om a’ no iyau kohompit do tulun di songonuon do Kinorohingan. ²¹ Om mositi’ nod tonudon kasai’ dokoyu o toturan diti do gisom dot alaid. Om iri tulun di popowowos di waig do pomolidang diri nga’ mositi’ nod pupuan dau o pakayan dau. Om isai nopo o koigit do waig diri om sosomu’ no do gisom do sosodopon. ²² Om nunu nopo o konunu-nunuan dot oigitan do tulun di sosomu’ om kotonggoi nod sosomu’, om i tulun do suwai di kakabai di tulun diri nga’ sosomu’ no do gisom do sosodopon.

¹ Tontok di tulan do koiso’ om korikot ngai’ no i tulun dot Israil do hilo’d tana’ do Sin om powonsoyo’ no diyolo’ o kiim diyolo’ do hilo’d Kadis. Om hilo’ no o kinapatayon di Miriam om hilo’ o pinamalabangan dau. ² Om hiri nopod kinoiyonon di pinawansayan diyolo’d kiim nga’ aiso’ o waig. Om rikot ngai’ no i tulun do minongoi gurumung diyo Musa di Harun do ³ mikuwo’d sontogod-togod om mimboros do poingkaa, ’’Songkuro daa o kosonongo’ do napatai iyahai do hilo’d dotimbabaan dilo Kiim do TUHAN do nokotonggoi di tobpinai dahai dit iso-iso’ o bansa’. ⁴ Nokuro tu’ nangatan nu iyahai do minongoi’d hiti’d tana’ do kowotuan? Mongoi no daa patai do hiti do mogitonggoi-tonggoi diti tayam-tayam dahai. ⁵ Nunu kopio o kinoposoliwanan nu dahai do mantad hilo’d Masir dot id kinoiyonon dot oinggorit o pinangangatan, om it a’ i’ milo do tanaman do nunu- nunu? Aiso’ i’ o gandum do hiti, om aiso’ o tua’ dot ara toi ko’ tua’ dot anggur, om tua’ do delima. Om waig piya dot inumon nga’ aiso’ i’!’’ ka diyolo’. ⁶ Om insodu’ noddi i Musa om i Harun do mantad id tulun dot ogumu’ddi om ongoi no iyolo’ ingkakat do hiri’d wawayaan di Kiim do TUHAN. Om tuku’ no iyolo’ do gisom do nokotungub do hiri’d tana’ o rabas diyolo’, om intalang noddi i tulinau do koropohon do TUHAN di kosorong tomod dot id diyolo’. ⁷ Om boros kad TUHAN dot id di Musa, ⁸ ’’Ngoyo’ i sukud di hilo’d dotimbabaan di Kaban do Tumpongo om timungon nogindo dokoyu di Harun i tulun dot ogumu’. Om hiri nondod dotoguangan ngai’ diyolo’ do moro-boros ko dot id tontolob dilo hoodi’, om sumoliwan nondo o waig do mantad id tontolob dilo’ do tinumon di tulun dot ogumu’ om tinumon di tayam-tayam diyolo’,’’ ka. ⁹ Om ngoyo’ no di Musa i sukud diri, do tuminanud di pinonuhuan do TUHAN. ¹⁰ Om timungo’ no diyo Musa di Harun o koinsanai di tulun do hiri’d dotimbabaan di tontolob. Om boros kad Musa, ’’Pokinongou ngai’ kou no, iyokoyu it obinsaap! Minog no tuu kopio do posoliwan iyahai’d waig do mantad id tontolob diti do maan dokoyu?’’ ka. ¹¹ Om pobilido’ nod i Musa i sukud om pobobogo’ no dau di tontolob dot induwo pobobogo’. Om luyung nopo o waig dot agayo tomod om ologod do mantad hiri’d tontolob, gisom do nongkoinum ngai’ i tulun om i tayam-tayam diyolo’. ¹² Nga’ togodo’ nod TUHAN i Musa om i Harun. Om boros kad TUHAN, ’’A’ kou minonongkuyaan kopio doho’ do popoimbulai do sinundu ku dit olidang dot id toguang diti tulun dot Israil, om iri no ot a’ dokoyu koina-inaan do momoyo’ diyolo’ do sumuang di pomogunan di pinabatos ku dot id diyolo’,’’ ka dau. ¹³ Om iyo noddi o nosiliu do hilo’d Moriba. Tu’ hilo’ no i tulun dot Israil do minimboros do tumogod do TUHAN, om hilo’ no o TUHAN do pinopointalang do kolidango’ dau dot id bansa’ddi. ¹⁴ Om ponuhu’ no i Musa do piro-piro o tulun do minongoi solowot di raja’ dot Idom do tontok di hilo’ iyolo’d Kadis. Om boros ka diyolo’, ’’Iti no o habar do mantad id payat dot Israil, i kowori-worisan nu. Om nokoilo ko i’ di kosusaan do nokoontok dahai. ¹⁵ Iri nopo komolohingan dahai om minongoi do hilo’d Masir om hilo-hilo’ noddi iyolo’ do minomogun-mogun do solinaid do piro-piro o toun. Nga’ ninggorit di tulun do Masir i komolohingan dahai om iyahai nogi’ nga’ ninggorit i’ diyolo’, ¹⁶ om pomolohou noddi iyahai’d TUHAN do mokitulung dau. Om norongou i’ dau i lolohou dahai om porikot noddi iyau dot iso’ o moloikat. Om iri no i moloikat diri o minomoyo’ dahai do suminoliwan do mantad hilo’d pomogunan do Masir. Om dinondo nopodti om hilo’ no iyahai’d Kadis, it iso’ o kampung do hilo’d wolit diti pomogunan nu. ¹⁷ Om pokionuon daa dahai do pawayaon nu iyahai diti pomogunan nu. Om a’ i’ iyahai di tayam-tayam dahai sumala’ do ralan ko’ mongoi pod hiri’d koumaan ko’ hiri’d kokobunan dot anggur nu. Om a’ iyahai mongoi inum do hiri’d torobong nu. Mamanau nopo iyahai do sumusui di ralan magayo do gisom id kosoliwan iyahai diti pomogunan nu,’’ ka diyolo’. ¹⁸ Nga’ boros ka di tulun dot Idom do suminimbar, ’’A’ i’ dahai uhang do maya’ kou diti pomogunan dahai. Om ondung osonsog kou, om sumoliwan no iyahai do mongoi panangod dokoyu,’’ ka diyolo’. ¹⁹ Om boros ka di tulun dot Israil, ’’A’ i’ iyahai tumongkiad di ralan magayo. Om ondung mongoi iyahai inum do waig dokoyu, ko’ mongoi inum i tayam-tayam dahai, om bayaran i’ dahai. Maya’ no toomod iyahai do hiti,’’ ka diyolo’. ²⁰ Om boros ka kawagu di tulun dot Idom, ’’A’ i’ dahai uhang!’’ ka diyolo’. Om soliwan noddi iyolo’ do miwoyo’ do soudor dit ongokoris do mongoi panangod di tulun dot Israil. ²¹ Om poguliai noddi di tulun dot Israil do mongoi pogihum do ralan do suwai tu’ mada’ i’ i tulun dot Idom do pawaya’ di tulun dot Israil di pomogunan diyolo’. ²² Om oinsanan nopoddi i tulun dot Israil do tuminongkiad do mantad hilo’d Kadis om korikot no iyolo’ do hilo’d Nuluhon do Hor, ²³ it id wolit dot Idom. Om hilo’ no do minoro-boros o TUHAN dot id di Musa om id di Harun do poingkaa, ²⁴ ’’A’ i’ kosuang i Harun di pomogunan di pinabatos ku dot id tulun dot Israil; matai no iyau tu’ tuminolibamban kou i’ di pinonuhuan ku di hilo’d Moriba. ²⁵ Angatan no i Harun om i Iliasar, i tanak dau do tumakad di Nuluhon do Hor. ²⁶ Om hilo’ nopondo om iduwon no i pakayan do dong imam di poimpakai di Harun, om papakayan no iri di Iliasar. Om hilo’ no o kapatayon di Harun,’’ ka dau. ²⁷ Om wonsoyo’ nod Musa i pinonuhuan do TUHAN diri. Om takad no i Musa om i Harun om i Iliasar di Nuluhon do Hor dot antang-antangan do koinsanai di tulun. ²⁸ Om iduwo’ noddi di Musa i pakayan di Harun di dong imam om papakayai no dau di Iliasar. Om kapatai noddi i Harun do hiri’d timpak di nuluhon diri, om ruhuk no kawagu iyo Musa di Iliasar. ²⁹ Om korongou ngai’ noddi i tulun do napatai no i Harun, om pogihadai no diyolo’ i Harun do solinaid do tolu nohopod o tadau.

¹ Arad nopo nga’ ngaran dot iso’ o bandar di ponong id salatan do pomogunan do Kanaan. Om soira’ di norongou di raja’ do bandar diri do maya’ i tulun dot Israil di ralan do kawaya’ do hilo’d Atarim, om ngoyo’ no dau iyolo’ songodo’ om natanggayan dau’ddi o piro-piro di tulun dot Israil. ² Om pamatos noddi i tulun dot Israil do mikuwo’d suminumpa’; om boros ka diyolo’ dot id TUHAN, ’’Ondung onuan nu iyahai do kamanangan do sumaap dilo tulun, om patahakon no dahai iyolo’ dot id diya’ dot aiso’ o paantakan do kapatahakan, om potonggoyon ngai’ nogi’ dahai do patahak ilo bandar diyolo’, om patayon nopo kopio dahai iyolo’,’’ ka diyolo’. ³ Om pokinongoho’ id TUHAN i pinokianu di tulun dot Israil diri, om tinulung iddi dau iyolo’ do mangala’ di tulun do Kanaan. Om patayo’ no di tulun dot Israil i tulun do Kanaan om raago’ ngai’ diyolo’ i kabandaran diyolo’. Om pungaranai no diyolo’ o kinoiyonon diri do Horma. ⁴ Om tongkiad noddi i tulun dot Israil di Nuluhon do Hor, om susui no iyolo’ di ralan do poingkaa do hilo’d Suok dot Akaba, om kaalai i’ iyolo’ di pomogunan dot Idom. Nga’ di nopo di hiri no iyolo’d tanga’d ralan om a’ no di tulun dot ogumu’ milo’d pususon o ginawo diyolo’ do tumogod, ⁵ gisom do sontogod-togod po iyolo’ do Kinorohingan om i Musa. Boros ka diyolo’, ’’Nokuro tu’ pinosoliwan nu iyahai do mantad hilo’d Masir do ngoyon no patayo’ do hiti’d tana’ do kowotuan; hiti nopo om aiso’ o takano’ om aiso’ o waig. Apaasan noddi iyahai diti taakanon dot aiso’ o maro-maro!’’ ka. ⁶ Om porikatai noddi do TUHAN do tulanut di kapatai o tindukon i tulun dot ogumu’. Om ogumu’ tomod diri o tulun dot Israil do notinduk di tulanut. ⁷ Om ongoi noddi i tulun dot Israil solowot di Musa om boro-boros nod poingkaa, ’’Nokowonsoi no iyahai’d dusa tu’ mogod-togod iyahai’d TUHAN om mogod-togod iyahai diya’. Nga’ pokionuo’ no kopio’d TUHAN do dinondo do popoggidu’ diti tulanut do mantad id dahai,’’ ka diyolo’. Om sambayangai noddi di Musa i tulun dot ogumu’ddi. ⁸ Om suhuo’ noddi do TUHAN i Musa do momonsoi dot iso’ o tulanut do tambaga’ o wonsoyon, om poriliton i’ iri dot id iso’ o kayu di poodsukon. Om pointikid-tikid do tulun dit otinduk do tulanut om montong nopondo di tulanut do tambaga’ddi om olingasan i’! ⁹ Om pomonsoi no i Musa do tulanut, do tambaga’ o winonsoi, om podokoto’ no dot id iso’ o kayu di pinoodsuk. Om isai nopo o tulun dit otinduk do tulanut om olingasan no do kokito di tulanut do tambaga’ddi. ¹⁰ Om tilombus nopo i tulun dot Israil do minamanau om powonsoyo’ noddi diyolo’ o kiim diyolo’ do hilo’d bandar dot Obot. ¹¹ Om di nopoddi nokotongkiad iyolo’ do kinoiyonon diri, om powonsoyo’ no diyolo’ o kiim diyolo’ do hilo’d kinaraagan dot Abarim, i hilo’d tana’ do kowotuan, i ponong id koulayon do mantad id pomogunan do Muab. ¹² Om powonsoyo’ no diyolo’ o kiim diyolo’ do hilo’d Rantai do Sirid. ¹³ Om undaliu po kawagu iyolo’ do mantad hilo’ om powonsoyo’ no diyolo’ o kiim diyolo’ do ponong id utara di Bawang dot Arnon, i tana’ do kowotuan do kogoyoo’ nopo om korikot do hilo’d pomogunan do tulun dot Amori. (Iri nopo Bawang dot Arnon om ponokowolit di pomogunan do tulun do Muab om pomogunan di tulun dot Amori.) ¹⁴ Om iri no o kinoponulisan do hiri’d ’’Buuk do Pisangadan di don TUHAN’’ do poingkaa, ’’...Kampung Wahib, it id watas do Supa, om i rantai do hilo’, om i Bawang dot Arnon, ¹⁵ om i songintidong-tidong do hiri’d rantai, i korikot do hilo’d kampung Ar o kogoyoo’, om poingkaa do hilo’d wolit di pomogunan do tulun do Muab,’’ ka. ¹⁶ Om mantad nod hilo’ om pakayaai po diyolo’ do hilo’d Biir, i kinoiyonon di roitan dot Ogumu’ o Torobong. Om hilo’ no o TUHAN do minoro-boros di Musa do poingkaa, ’’Suhuo’ ilo tulun do tumimung, om onuan ku i’ iyolo’d waig,’’ ka. ¹⁷ Om tontok noddi do minodsinding i tulun dot Israil do sinding diti, ’’Oi torobong dot ogumu’, posimpulako’ no o waig nu, om romiton i’ dahai do mikuwo’d sinding — ¹⁸ I torobong do nukad di tangaanak do raja’ om i piro-piro boyoon do bansa’, nukad di sukud do pomorinta’ om nukad di sukud diyolo’,’’ ka. Om mantad nod hilo’d tana’ do kowotuan om pakayaai po diyolo’ do hilo’d Matana, ¹⁹ om pakayaai po kawagu diyolo’ do hilo’d Nahaliol, om pakayaai nogiddi diyolo’ do hilo’d Bamot; ²⁰ om pakayaai noddi diyolo’ do hilo’d rantai di pomogunan do tulun do Muab, it id dosibaan di Nuluhon do Pisga, i potimbaba’ ponong id tana’ do kowotuan. ²¹ Om ponuhu’ no i tulun dot Israil do piro-piro o tulun do minongoi solowot di Sihon i raja’ do tulun dot Amori, do mongoi popoboros do poingkaa, ²² ’’Pokionuon daa dahai do pologoson nu iyahai do maya’ do pomogunan nu. Om a’ i’ iyahai di tayam-tayam dahai sumala’ di ralan do mongoi do hiri’d koumaan ko’ hiri’d kokobunan dot anggur nu, om a’ i’ iyahai minum do hiri’d torobong nu. Sumusui nopo iyahai di ralan magayo do gisom do kosoliwan iyahai di pomogunan nu,’’ ka diyolo’. ²³ Nga’ a’ i’ di Sihon uhang do maya’ i tulun dot Israil di pomogunan dau. Om timungo’ no dau i soudor dau om ongoi no do hilo’d Yahas, i hilo’d tana’ do kowotuan, om songodo’ no diyolo’ i tulun dot Israil do hilo’. ²⁴ Nga’ id suang nopod pinisangadan diri om ogumu’ tomod o soudor dot Amori do napatai di tulun dot Israil. Om kaanu noddi di tulun dot Israil i pomogunan do pisangod, do mintonod di Bawang dot Arnon om gisom do korikot do hilo’d Bawang do Yabok, i ponong id utara, it id wolit do pomogunan do tulun dot Amon, tu’ iri nopo pomogunan dot Amon om intirungan i’ do tulun dit ongokoris kopio. ²⁵ Om iyo noddi o kinowoyo-woyoo’ di tulun dot Israil do minagahau do koinsanai di bandar do tulun dot Amori, om kohompit no o Hisbon om koinsanai di bandar dot ongokooro’ di hiri’d posorili’, om undorong noddi iyolo’ do hilo’. ²⁶ Hisbon nopo nga’ bandar dot agayo di Raja’ Sihon. Om nokoumbal i’ iyau do suminangod di raja’ do Muab di gulu po om naahau dau i pomogunan di raja’ do Muab do gisom do hilo’d Bawang dot Arnon. ²⁷ Om iri no o kopodsindingan di tulun dit ongoilo do modsinding do poingkaa, ’’Rikot no do hilo’d Hisbon, i bandar di Raja’ Sihon! Siontong iyahai do bandar diri dot owonsoi om otonduli’ kawagu. ²⁸ Di nopo di gulu po om haro o nosiliu dot id bandar do Hisbon dot iyo pod tapui i soudor di Sihon do minamanau; om rinaag diyolo’ i bandar dot Ar di hilo’d Muab om tinolon diyolo’ i konulu-nuluan do poingompus dit Arnon do ponong id sarayo. ²⁹ Oi tulun do Muab, obungou kou no! Iyokoyu i tumuku’ dot id tingolig do Kamos, angapatai kou no! Pinologos kou di ponokokinorohingan dokoyu dot osiliu’d tulun dit ouyung do pisangod, nangatanggayan di raja’ dot Amori i kongoonduan dokoyu. ³⁰ Nga’ baino’ nopoddi om nangapatai no i sinakagon diyolo’, do poinsusui nopo di ralan do mantad hilo’d Hisbon om korikot do hilo’d Dibon, do mantad pod hilo’d Nasim om gisom do hilo’d Nopa, it id somok do Modiba,’’ ka. ³¹ Om undorong no i tulun dot Israil do hiri’d pomogunan di tulun dot Amori. ³² Om ponuhu’ nogiddi i Musa do piro-piro tulun do mongoi pogihum do ralan dit osonong do mongoi panangod di bandar do Yasir. Om kaahau no di tulun dot Israil o bandar diri om iri nogi’ i kabandaran dit ongokooro’ do hiri’d posorili’, om uyungo’ no diyolo’ i tulun dot Amori di poingiyon do hilo’. ³³ Om pahamadai nogiddi di tulun dot Israil, om susui no iyolo’ di ralan do poingkaa do hilo’d Basan. Om pamanau no i Raja’ Og do mantad hilo’d Basan do miwoyo’ di soudor dau do mongoi panangod di tulun dot Israil do hilo’d bandar dot Idroi. ³⁴ Om boros kad TUHAN dot id di Musa, ’’Kada’ kooris dau. Tu’ onuan ku i’ iya’ do kamanangan. Om aala’ nu i’ iyau, om koinsanai di rayat dau om i pomogunan dau. Om wonsoyon no dot id dau o miagal di winonsoi nu dot id di Raja’ Sihon, i minomorinta’ do hilo’d Hisbon,’’ ka dau. ³⁵ Om patayo’ no di tulun dot Israil i Og, om i tangaanak dau om koinsanai di rayat dau; om aiso’ no o pinoolu-olu’ diyolo’. Om iyono’ noddi diyolo’ o pomogunan diri.

¹ Om mombus-lombus po kasai’ i tulun dot Israil do mamanau om powonsoyo’ no diyolo’ o kiim diyolo’ do hiri’d rantai do Muab, i ponong id koulayon do mantad di Bawang do Yordan, it id hapak do bandar do Yorikou. ² Om tontok di nokorongou i raja’ do Muab, i roitan dot i Balak i tanak di Sipor, do winonsoi di tulun dot Israil dot id tulun dot Amori, om i kogumuo’ di tulun dot Israil, ³ om ooris tomod diri iyau om ongooris ngai’ i rayat dau. ⁴ Om boro-boros noddi i tulun do Muab dot id piro-piro boyoon do tulun do Midian do poingkaa, ’’A’ no alaid om araag ngai’ nodti tulun dot ogumu’ o nunu nopo i hiti’d posorili’ toko’; do miagal no di sapi’ do mangaii’ di butur,’’ ka. Om ponuhu’ noddi i Raja’ Balak ⁵ do tulun do mongoi pomolohou di Biliam i tanak di Bior, i poingiyon do hilo’d bandar do Pitor, it id toning di Bawang dot Iprat, it id watas dot Amau. Om poingkaa o boros di pinobilin di Balak do poboroson di tulun di sinuhu’ dau dot id di Biliam, ’’Nokoilo ko no, do haro moti’ o tiso’ o bansa’d tulun do nokorikot do mantad hilo’d Masir, om iri nopo tulun diri do baino’ nga’ nokotongkop no do pomogunan dahai om motiponolod no do pomogunan dahai. ⁶ Iyolo’ nopo om ogumu’ i’ ko’ iyahai. Iyo nopoddi, om uhupan no iyahai do momopol diyolo’, om ulan toi’ daa om aala’ dahai iyolo’, om ouyung indo iyolo’ do mantad id pomogunan dahai. Tu’ oilaan ku i’ dot isai nopo o tulun do barakatan nu nga’ kaanu no kopio’d barakat. Om iyo nogiddi tu’ isai nopo i papalan nu nga’ apapalan no kopio o tulun diri,’’ ka. ⁷ Om pamanau no i piro-piro boyoon do tulun do Muab om i boyoon do tulun do Midian om minigit iyolo’ do pamagadsi’ di Biliam om momopol indo iyau di tulun dot Israil. Om pinoboros nogi’ diyolo’ dot id di Biliam i pinobilin di Raja’ Balak. ⁸ Nga’ boros ka di Biliam do suminimbar, ’’Modop kou po dot insan o tuong do hiti. Suab pondo om poboroson ku nogi’ dot id dokoyu ondung nunu ka do poboroson do TUHAN dot id doho’,’’ ka dau. Om undorong ngai’ noddi i boyoon do tulun do Muab diri do hiri’d di Biliam. ⁹ Om rikot noddi o Kinorohingan dot id di Biliam om ponguhot no dau do poingkaa, ’’Isai ngai’ iti tulun do minundorong do hiti’d diya’ oi Biliam?’’ ka. ¹⁰ Om boros ka di Biliam do suminimbar, ’’Iti ngai’ nopo tulun diti om mantad hilo’d pomogunan do Muab. Om sinuhu’ iyolo’ di Raja’ Balak do mongoi popoilo doho’ ¹¹ do haro o tiso’ o bansa’d tulun do nokorikot do mantad hilo’d Masir, om bansa’ nopoddi nga’ nokotongkop no do pomogunan diyolo’. Om suhuon oku’ddi di Raja’ Balak do momopol do bansa’ddi do mogobi’ dau. Om aala’ indo dau om ouyung dau iyolo’ do mantad id pomogunan dau,’’ ka dau. ¹² Nga’ boros kad Kinorohingan dot id di Biliam, ’’Kada’ nogi’ kopio ongoi tanud dilo tulun, om kada’ papalai i tulun dot Israil, tu’ iyolo’ nopo moti’ om nabarakatan ku no,’’ ka dau. ¹³ Om kosuabon noddi, om ongoi no boro-boros i Biliam di tulun di sinuhu’ di Raja’ Balak, boros ka dau, ’’Uli’ kou nogi’, tu’ mada’ i’ o TUHAN do mongoi oku tanud dokoyu,’’ ka dau. ¹⁴ Om guli’ noddi iyolo’ dot id di Balak om posunudo’ no diyolo’ dot id dau dot a’ i’ nakasaga’ i Biliam do tuminanud diyolo’. ¹⁵ Om ponuhu’ po kawagu i Balak do piro-piro o boyoon dot ogumu-gumu’ om angasawa-sawat o pangkat ko’ it id gulu. ¹⁶ Om ongoi noddi iyolo’ do hiri’d di Biliam do pinoposunud diti boros di Balak do poingkaa, ’’Pokionuon ku no daa kopio do mongoi ko do hiti’d doho’! ¹⁷ Gumuon ku i’ o pamagadsi’ ku diya’, om nunu nopo o ponuhuan nu doho’ nga’ wonsoyon ku i’. Rumikot no kopio om papalan i’ doho’ i bansa’d tulun diri,’’ ka. ¹⁸ Nga’ boros kad i Biliam do suminimbar, ’’Mulong piya do patahakon di Balak doho’ o koinsanai do pirok om tamas di hilo’d walai dau, nga’ a’ oku i’ milo do tumolibamban do boros do TUHAN i Kinorohingan di tukuon ku, do mulong piya do hal dit ongokooro’. ¹⁹ Nga’ odop kou pod hiti do miagal di winonsoi di tulun di sinuhu’ dit id gulu, om oilaan ku i’ ondung haro o suwai do poboroson do TUHAN dot id doho’,’’ ka dau. ²⁰ Om rikot noddi o Kinorohingan dot id di Biliam do totuong diri, om boro-boros nod poingkaa, ’’Ondung mongoi pangangat diya’ o nokorikatan diti tulun do hiti, om mogopi-opi’ nogi’ om tumanud i’ diyolo’. Nga’ iri po tu’ nunu nopo i ponuhuan ku diya’ om iri no o wonsoyon nu,’’ ka dau. ²¹ Om kosuabon noddi om pakalai nod i Biliam i kaladai dau, om ongoi no iyau tanud di boyoon do tulun do Muab. ²² Om otogod diri o TUHAN tu’ minongoi i’ i Biliam tanud diyolo’. Om tontok di poinsakai no i Biliam di kaladai dau, do minitanud di duwo o susuhuon dau, om ongoi no ingkakat o moloikat do TUHAN do hiri’d tanga’ di ralan do mangantob di Biliam. ²³ Om kokito nopo di kaladai i moloikat do poingkakat do hiri do kiinigit do gayang, om lisang no i kaladai om pakayaai no do hiri’d koumaan. Om bobogo’ no di Biliam i kaladai dau, om gayato’ no kawagu dau do tumorunung di ralan. ²⁴ Nga’ ongoi no kawagu i moloikat do TUHAN ingkakat do hiri’d ralan dit okikip, i hiri’d piolitan do duwo o kabun dot anggur, i nolig do watu o miampaping. ²⁵ Om kokito nopo di kaladai i moloikat do TUHAN, nga’ impit nopo i kaladai do hiri’d tolig do watu, om kokisas noddi di watu o gakod di Biliam. Om bobogo’ noddi kawagu di Biliam i kaladai dau. ²⁶ Om sogulu po kawagu i moloikat do TUHAN, om ongoi no ingkakat do hiri’d ralan dit okikip no kopio, it aiso’ noo o wayaan do magalai dot id wanan ko’ id gibang. ²⁷ Tontok nopoddi, om kokito nopo di kaladai i moloikat do TUHAN, nga’ gupu’ nopo i kaladai. Nga’ a’ noddi di Biliam nopusus o ginawo dau dot otogod tu’ bobogo’ nopo dau di sukud dau i kaladai dau. ²⁸ Om pomiloo’ noddi do TUHAN do moro-boros i kaladai, om boros kaddi di kaladai dot id di Biliam, ’’Nunu toi kopio o nowonsoi ku dot id diya’? Tu’ intolu ko noddi pomobog doho’?’’ ka. ²⁹ Om boros kad i Biliam do suminimbar, ’’Kababagan ku nopo diya’ nga’ i ponguntotogod nu doho’! Ondung kidangol oku daa om napatai ku no daa iya’,’’ ka dau. ³⁰ Nga’ boros ka di kaladai do suminimbar, ’’Okon toi ko’ iyoho’ kasai’ i’ i sasakayon nu do mantad di gulu po? Om nokoumbal oku no toi do minongiyo diya’dti di gulu, oi Tuan?’’ ka. Om boros kad i Biliam, ’’Amu’,’’ ka dau. ³¹ Om pokitono’ noddi do TUHAN i Biliam di moloikat do poingkakat do hiri, i kiinigit do gayang, om tungub nopoddi i Biliam do hiri’d tana’ do tuminuku’! ³² Om boro-boros noddi i moloikat do poingkaa, ’’Nokuro tu’ intolu nu nopo bobogo’ ilo kaladai nu? Kinorikatan ku nopo om mongoi pangantob diya’ tu’ a’ i’ daa apatut do mongoi ko. ³³ Nga’ osonong po tu’ nokokito doho’ ilo kaladai nu, om intolu nopoddi lisang ilo kaladai nu. Ondung a’ daa nokolisang ilo kaladai, om napatai ku no daa iya’, om ilo’ pondo daa kaladai nu o posion ku,’’ ka dau. ³⁴ Om boros kaddi di Biliam, ’’Nokowonsoi oku nod dusa. A’ ku i’ oilaan do poingkakat ko do hilo’d tanga’d ralan do mangantob doho’. Nga’ baino’ nopo, om ondung kasala’ oku do mongoi dot osorou nu, om muli’ oku no,’’ ka dau. ³⁵ Nga’ boros ka di moloikat do TUHAN, ’’Ongoi nopo katuu tanud dilo tulun, nga’ iri no i ponuhuan ku diya’ do poboros ot apatut nu’d poboroson,’’ ka dau. Om tilombus nogiddi i Biliam do mamanau do tuminanud di tulun di Balak. ³⁶ Om korongou nopoddi di Balak do rumikot i Biliam, nga’ ongoi no iyau ruba’ dau do hilo’d Ar, i bandar do hilo’d tisan do Bawang dot Arnon, i hilo’d wolit do pomogunan do Muab. ³⁷ Om boro-boros noddi i Balak dot id di Biliam do poingkaa, ’’Nokuro tu’ a’ ko ruminikot dit insan tiya’ i’ lohowo’? Ondos nu daa om a’ oku kasaap do mamagadsi’ diya’?’’ ka dau. ³⁸ Om boros kad i Biliam do suminimbar, ’’Nga’ nokorikot oku i’ maddi koii? Nga’ baino’ nopo, om aiso’ no o kuasa’ ku do popoboros do nunu nopo, tu’ iri no i ponuhuan do Kinorohingan doho’ o milo ku’d poboroson,’’ ka dau. ³⁹ Om tanud noddi di Balak i Biliam do minongoi do hilo’d bandar do Husot. ⁴⁰ Om hilo’ no o pinonumbolian di Balak do sapi’ om dumba’ dau. Om patahako’ nod i Balak o wookon di tonsi di sinumbali’ddi dot id di Biliam om id piro-piro boyoon di manud-tanud dau. ⁴¹ Tadau noddi kawagu om angatai no di Balak i Biliam do minongoi do hiri’d nulu-nulu do Bamot Baal. Om hiri nopoddi nga’ okito no di Biliam o wookon di tulun dot Israil.

¹ Om boros kad i Biliam dot id di Balak, ’’Pamansayai oku do turu’ o pananaraban do porsombahan do hiti, om onuan oku do turu’ o sapi’ do tontoluhan om turu’ o dumba’ do tontoluhan,’’ ka dau. ² Om wonsoyo’ no di Balak i pinoboros di Biliam diri. Om tanud noddi iyolo’ do pinapatahak do maan do porsombahan dot iso’ o sapi’ om iso’ o dumba’ do tontoluhan goduwo, do hiri’d pointikid-tikid di pananaraban do porsombahan. ³ Om boro-boros noddi i Biliam dot id di Balak do poingkaa, ’’Ingkakat nondo do hiti’d toning diti porsombahan nu di sinorob. Om daamot nopodti om mongoi oku pogontong ondung sumolowot doho’ o TUHAN ko’ amu’ po. Om sunudan ku indo iya’ do koinsanai di poboroson dau doho’,’’ ka dau. Om iso-iso’ddi i Biliam do tuminakad dot iso’ o nulu-nulu. ⁴ Om ongoi noddi o TUHAN solowot di Biliam. Om boro-boros no i Biliam do TUHAN, ’’Oi TUHAN, nokopomonsoi oku nod turu’ o pananaraban do porsombahan, om nakapatahak oku nod maan do porsombahan do songinan o sapi’ om songinan o dumba’ do tontoluhan goduwo dot id pointikid-tikid di pananaraban do porsombahan,’’ ka dau. ⁵ Om sunudai nod TUHAN i Biliam ondung nunu o poboroson dau, om sinuhu’ dau iyau do mongoi poboros dot id di Balak di boros dau’ddi. ⁶ Om guli’ noddi i Biliam, nga’ hiri po kasai’ i Balak om i piro-piro boyoon do tulun do Muab do songingkakat do hiri’d toning di porsombahan di sinorob. ⁷ Om poboroso’ noddi di Biliam it ongosiliu dot id dabantalan do poingkaa, ’’Nangatan oku di Balak i raja’ do Muab do mantad hilo’d Aram, i hilo’d konuluhanan do ponong id koulayon. Boros ka dau, ’Rikot no, om tulungon oku i’ do moro-boros, patayon no doho’ ilo tulun dot Israil!’ ka. ⁸ Poingkuro oku daa do momopol dit a’ papalan do Kinorohingan? Ko’ mimboros do momohukum dit a’ hukuman do TUHAN? ⁹ Okito ku iyolo’ do mantad hiti’d timpak do nuluhon dit angakawas; piantangan ku iyolo’ do mantad hiti’d timpak do konulu-nuluan. Iyolo’ no o bansa’ di poimpori-pori do momogun-mogun; oilaan i’ diyolo’ do nabarakatan iyolo’ do lobi ko’ i bansa’d suwai. ¹⁰ Sinakagon nopo dot Israil om miagal pod pupuk kogumu’, a’ no ointob o kogumuo’. Maha’ daa om aayi’ o surupu ku do miagal dilo tulun di songonuon do Kinorohingan. It otorodok dot id Kinorohingan dot id suang do nunu nopo; matai oku nondo dot id suang do kosimbayanan,’’ ka dau. ¹¹ Om boros kaddi di Balak dot id di Biliam, ’’Nunu iti winonsoi nu dot id doho’? Kinapangangatan ku nopo diya’d hiti om mongoi pomopol dilo pisangod ku. Nga’ minamarakat ko nogi’ diyolo’,’’ ka. ¹² Om boros ka di Biliam do suminimbar, ’’Iri no ponuhuan do TUHAN doho’ o milo ku’d poboroson,’’ ka dau. ¹³ Om boro-boros noddi i Balak di Biliam do poingkaa, ’’Kaino mitanud do mongoi’d hilo’d kinoiyonon do suwai; om hilo’ nopondo om iri no wookon di tulun dot Israil ot okito nu. Om papalan nondo iyolo’d hilo’,’’ ka dau. ¹⁴ Om angatai no di Balak i Biliam do minongoi do hilo’d kobuturan do Sopim om ongoi no do hiri’d timpak di Nuluhon do Pisga. Om hilo’ nga’ minomonsoi i’ iyau do turu’ o pananaraban do porsombahan om pinapatahak do maan do porsombahan do songinan o sapi’ do tontoluhan om songinan o dumba’ do tontoluhan do hiri’d pointikid-tikid di pananaraban do porsombahan. ¹⁵ Om boros ka di Biliam dot id di Balak, ’’Undorong pod hiti, dot id toning diti porsombahan nu di sinorob, do daamot ku do mongoi solowot do TUHAN do hilo’,’’ ka dau. ¹⁶ Om ongoi no o TUHAN solowot di Biliam om sunudai no dau iyau ondung nunu it apatut do poboroson dau. Om suhuo’ nogiddi do TUHAN iyau do gumuli’ dot id di Balak do mongoi polombus di pinoboros dau. ¹⁷ Om poguliai no di Biliam, om kabantalai no dau do poingkakat kasai’ i’ i Balak do hiri’d toning di porsombahan dau di sinorob, om hiri ngai’ i’ i boyoon do tulun do Muab. Om uhot no i Balak ondung nunu i pinoboros do TUHAN. ¹⁸ Om poboroso’ noddi di Biliam iti tongosiliu dot id dabantalan do poingkaa, ’’Oi Balak i tanak di Sipor, kaino no, tu’ haro o poboroson ku, om pokinongohon no. ¹⁹ Kinorohingan nopo om a’ i’ miagal do tulun tu’ mongudut, om it oruuhai om kosimban no o ginawo. Nunu nopo o pobotoson dau, om wonsoyon no dau; moro-boros nopo iyau, om atantu’ nod owonsoi iri. ²⁰ Nosuhu’ oku nod mamarakat, om soira’ nopod mamarakat o Kinorohingan, om a’ ku no milo do pakaisoon iri. ²¹ Aiso’ ot araat dot okito ku dot id di Yakub; aiso’ ot osusa’ dot okito ku dot id Israil. Moyo-woyo’ i’ diyolo’ o TUHAN i Kinorohingan diyolo’; popimboroson no diyolo’ dot iyau o raja’ diyolo’. ²² Pinosoliwan iyolo’d Kinorohingan do mantad hilo’d Masir; miagal po iyau’d sapi’ di lalang do mogobi’ diyolo’d sumaap. ²³ Aiso’ no o limu’, om aiso’ o toilaan do dong rogon, do milo’d pakayon do sumaap di tulun dot Israil. Om popimboroson nopondod tulun do pasal di tulun dot Israil om poingkaa, ’Antangai pogi’ ilo winonsoi’d Kinorohingan dot Israil di koimayaan kopio!’ ka. ²⁴ Iri nopo tulun dot Israil om miagal do singa dit okoris: A’ po iyau mundorong dot a’ po atabpaan om a’ po oinum o raha’ di pisangod dau,’’ ka dau. ²⁵ Om boros kaddi di Balak dot id di Biliam, ’’Ula’ no. Ondung a’ ko momopol dilo tulun dot Israil, om kada’ po daa’ndo kopio iyolo’ barakatai!’’ ka dau. ²⁶ Nga’ boros ka di Biliam do suminimbar, ’’A’ ku toi diya’ nokoboros no do mositi’ nod wonsoyon ku i ponuhuan do TUHAN doho’?’’ ka dau. ²⁷ Om boros ka di Balak, ’’Kaino mongoi’d hilo’d kinoiyonon do suwai. Tu’ nunu koilo-ilo nga’ pologoson ko nopod Kinorohingan do momopol di tulun dot Israil do mogobi’ doho’ do hilo’,’’ ka dau. ²⁸ Om angatai no dau i Biliam do minongoi do hiri’d timpak di Nuluhon do Pior, i koimpa’ di tana’ do kowotuan. ²⁹ Om boros ka di Biliam dot id di Balak, ’’Momonsoi nod turu’ o pananaraban do porsombahan do hiti, om mongigit nod turu’ o tinan do sapi’ do tontoluhan om turu’ o tinan do dumba’ do tontoluhan,’’ ka dau. ³⁰ Om wonsoyo’ nod i Balak i pinonuhuan di Biliam. Om papatahak no iyau do songinan o sapi’ do tontoluhan om songinan o dumba’ do tontoluhan dot id pointikid-tikid di pananaraban do porsombahan.

¹ Om oilaan noddi di Biliam do monuhu’ o Kinorohingan dau do mamarakat di tulun dot Israil. Om a’ noddi iyau minongoi pogontong do maan do pogintutunan do miagal di winonsoi dau dit id gulu ko’ iri. Om ontong no i Biliam do ponong hiri’d tana’ do kowotuan ² om kokito no dau i tulun dot Israil do mogitumpuk-tumpuk o pinopowonsoi diyolo’ di kiim diyolo’ do sorompori-pori do tumanud di payat diyolo’. Om porintao’ noddi do Rusod do Kinorohingan i Biliam, ³ om poboroso’ no dau it ongosiliu dot id dabantalan do poingkaa, ’’Iti no o bilin di Biliam i tanak di Bior, moro-boros o tulun di kokito kopio ⁴ I korongou do poboroson do Kinorohingan, poinsonsod oku do montong dit okito ku dot id soroyoon i pinointalang do mantad id Kinorohingan dit Agayo o Sinundu. ⁵ Olumis i kokiiman nu oi Yakub, om i kinoiyonon nu oi Israil! ⁶ Miagal do rulud di koguasan do kayu kurma miagal do kabun dit id toning do bawang, miagal do kayu gaharu di tinanom do TUHAN, miagal do kayu sedar dit id toning do waig. ⁷ Osima’ indo iyolo’d rasam om a’ ooiyan do waig o tumo di pananaman diyolo’d totonomon. Abantug indo ko’ i Agag i raja’ diyolo’, om karalad o pomorintaan dau do hilo’d sodu’. ⁸ Pinosoliwan iyolo’d Kinorohingan do mantad hilo’d Masir, miagal po iyau’d sapi’ di lalang do sumaap do mogobi’ diyolo’. Tolon-tolonon nopo diyolo’ i pisangod diyolo’, om mumukon o tulang, om pintipuon i pana’. ⁹ Miagal pod singa dit okoris o bansa’ddi; isai po daa o kobulun do mamagangau dau do tontok di koodop iyau? Isai nopo o mamarakat dot Israil om abarakatan no, isai nopo o momopol dot Israil om ousung no,’’ ka dau. ¹⁰ Om otogod tomod diri i Balak mikuwo’d pinoonggom dau o tonggom dau. Om boro-boros no iyau dot id di Biliam do poingkaa, ’’Linohou ku iya’ do mongoi pomopol do pisangod ku nga’ binarakatan nu nogi’ iyolo’ dot ongointotolu. ¹¹ Nga’ pamanau nogi’ kopio’d muli’ do dinondo! Nakabatos oku no daa do mamagadsi’ diya’, nga’ mada’ i’ o TUHAN do rumamit ko di gadsi’,’’ ka dau. ¹² Om boros kad Biliam do suminimbar, ’’A’ oku toi nokoboros no di tulun di sinuhu’ nu do minongoi solowot doho’ ¹³ do patahakon nu piya daa doho’ o koinsanai’d pirok om tamas di hilo’d walai nu, nga’ a’ oku i’ milo do tumolibamban di ponuhuan do TUHAN doho’, om a’ oku milo do mingwonsoi do nunu nopo i doho’d korohian? Iri no ponuhuan do TUHAN doho’d poboros o milo ku’d poboroson,’’ ka dau. ¹⁴ Om boros kad Biliam dot id di Balak, ’’Muli’ oku no do hilo’d bansa’ ku do dinondo. Nga’ a’ oku po kapamanau om poinsanon mantad tiya’ po ondung nunu o wonsoyon di tulun dot Israil dot id bansa’ nu do koimbagu,’’ ka dau. ¹⁵ Om poboroso’ no di Biliam it ongosiliu dot id dabantalan do poingkaa, ’’Iti no o bilin di Biliam i tanak di Bior; iti no o boros do tulun di kokito kopio. ¹⁶ I korongou do boros do Kinorohingan om kaanu do toilaan do mantad id dau it Asawat Kopio. Poinsonsod oku do montong dot id soroyoon i pinointalang do mantad id Kinorohingan dit Agayo o Sinundu. ¹⁷ Okito ku ot id dabantalan, it id dosunsudan do bansa’d Israil. Haro o raja’ do miagal do rombituon dit agayo, it atalang o tulinau, do mimbulai do mantad id bansa’ddi. Miagal po iyau do rombituon dit agayo o tulinau do mantad id Israil. Bobogon nondo dau i boyoon do Muab om alaon ngai’ dau i tulun do Sit. ¹⁸ Alaon ngai’ nondo dau i pisangod dau do hilo’d Idom om asanganu dau i tana’ diyolo’, om kamanang i’ kasai’ ot Israil. ¹⁹ Ulakan di tulun dot Israil i pisangod diyolo’ om iso’ po nga’ aiso’ no ot oolu’,’’ ka dau. ²⁰ Om kokito no di Biliam i tulun dot Amalik dot id suang di pinointalang diri, om poboroso’ no dau it ongosiliu dot id dabantalan do poingkaa, ’’Id pialatan nopo do koinsanai’d bansa’ om Amalik no it okoris kopio do hiti’d pomogunan. Nga’ haro i’ o kopupuson diti bansa’, om poimpunso no do gisom dot alaid,’’ ka. ²¹ Om kokito po dau i sinakagon di Kain dot id suang di pinointalang diri. Om poboroso’ no dau it ongosiliu dot id dabantalan do poingkaa, ’’Osimbayan no kopio ino kinoiyonon dokoyu, miagal pod rumun di hiri’d sakai do pampang dit asawat. ²² Nga’ iyokoyu nopo, i tulun do Kini om apatai indo do tanggayan kou di tulun dot Asur,’’ ka. ²³ Om poboroso’ pod i Biliam it ongosiliu dot id dabantalan do poingkaa, ’’Isai ilo tulun do tumimung do hilo’d utara? ²⁴ Rumikot i mononolod do mantad hilo’d Siprus; alaon nondo diyolo’ ot Asur om Ibir, nga’ iyolo’ piya’ndo nga’ apatai i’,’’ ka dau. ²⁵ Om pogopi-opi’ noddi i Biliam om pamanau nod minuli’ do hiri’d walai dau, om i Balak nogi’ nga’ minamanau no.

¹ Om tontok di hilo’d Rantai do Sitim i tulun dot Israil do pinopowonsoi do kiim diyolo’, om timpuun no i kokusayan diyolo’ do minongoi pagampahu’ di tongoondu’ do Muab di hilo’. ² Om angatai no iyolo’ di tongoondu’ do Muab di mongoi rapou di poginakanan do papatahak do porsombahan, do pomusou di tingolig do Muab. Om pangakan no i tulun dot Israil do taakanon diri om tuku’ no iyolo’ dot id Baal, i tingolig ³ do hilo’d Nuluhon do Pior. Om kotogod no o TUHAN diyolo’, ⁴ om boro-boros no iyau dot id di Musa do poingkaa, ’’Timungon ngai’ no o koinsanai di boyoon do tulun dot Israil om patayon no iyolo’ di dongadau om owonsoi i’ iti ponuhuan ku, om a’ oku indo tumogod diti tulun,’’ ka dau. ⁵ Om boros kaddi di Musa dot id koinsanai di boyoon do tulun dot Israil, ’’Mositi’ nod sompori-pori kou nopod mamatai do koinsanai’d tulun dit id payat dokoyu di tumuku’ dot id Baal di hilo’d Pior,’’ ka dau. ⁶ Om tontok di maso di Musa om i tulun dot Israil do mihad do hiri’d wawayaan di Kiim do TUHAN, om kokito no diyolo’ o songulun o bansa’d Israil do minangangat do tondu’ do Midian do suminuang di kiim dau. ⁷ Om soira’ di nokito di Pinihas iri om ingkakat no iyau do tuminongkiad do mantad hiri’d pitimungan diri. I Pinihas nopoddi nga’ tanak di Iliasar, i manangaki di Harun. Om ongoi no iyau dot iso’ o tandus, ⁸ om susuhut no iyau di kusai om i tondu’ddi do suminuang di kiim. Om potokono’ no dau i tandus do gisom do nolopuson goduwo i tulun diri. Om kotingkod noddi i toruol do mogkoroliu do hilo’d Israil. ⁹ Nga’ daamot nopoddi om napatai no o 24,000 o tulun. ¹⁰ Om boros kaddi do TUHAN dot id di Musa, ¹¹ ’’I Pinihas nopo i tanak di Iliasar, i manangaki di Harun it Imam, om a’ no nokotoron do kokito’d tulun do tumuku’ do kinorohingan do suwai ko’ iyoho’. Om a’ oku nondo tumogod diti tulun dot Israil, om tumingkod oku no do mamatai diyolo’. ¹² Om sunudan no i Pinihas do momonsoi oku dot iso’ o pibatasan dot id dau, i poinggirot do gisom dot alaid. ¹³ Potontuon no iyau om i sinakagon dau do sumiliu dot imam do gisom dot alaid tu’ iyau nopo om a’ no nokotoron do kokito do tulun do tumuku’ dot id kinorohingan di suwai ko’ iyoho’. Om iri no o kopongompunan ku do dusa do tulun dot Israil!’’ ka dau. ¹⁴ Ngaran nopo di tulun dot Israil di pinatai do mitonggoi di tondu’ do Midian diri nga’ i Simri i tanak di Salu, i boyoon dot iso’ o sompiiyon dot id suang do payat di Simion. ¹⁵ Ngaran no di tondu’ om i Kosbi i tanak di Sur; om i Sur nopo, i tapa’ dau’ddi nga’ boyoon dot iso’ o pinuruan do sompiiyon do tulun do Midian. ¹⁶ Om poboroso’ nod TUHAN iti ponuhuan dot id di Musa do poingkaa, ¹⁷ ’’Ngoyon no songodo’ i tulun do Midian, ¹⁸ tu’ kapamatayan nopo om i kararaat diyolo’ di minagakal dokoyu do tontok di hilo’ kou id Pior, om i Kosbi, i tanak do songulun o boyoon dot iso’ o sompiiyon do tulun do Midian, i pinatai do tontok di haro o toruol di mogkoroliu di hilo’d Pior o kapamatayan dau,’’ ka dau.

¹ Om katalib poddi i toruol do mogkoroliu, om boro-boros no o TUHAN dot id di Musa om id di Iliasar, i tanak di Harun it Imam do poingkaa, ² ’’Papaharo kou nod pongintaban do koinsanai’dti tulun dot Israil do tumanud di sompiiyon diyolo’. Om mositi’ nod tulison ngai’ o ngaran di tongokusai di kiumur do duwo nohopod o toun ko’ it id sawat ko’ iri, i tongokusai di milo nod sumiliu do soudor,’’ ka. ³ - ⁴ Om wonsoyo’ no diyo Musa di Iliasar i pinonuhuan diri. Om lohowo’ ngai’ no diyolo’ o koinsanai di tongokusai di kiumur dot irad diri, om timungo’ no do hilo’d rantai do Muab, it id soborong di Bawang do Yordan, it id somok do bandar do Yorikou. Om iti no ngai’ o tulun dot Israil di suminoliwan do mantad hilo’d Masir: ⁵ Id suang nopo do payat di Rubin (I Rubin nopo om tanak di Yakub dit id dotuo) om: i pinuruan do sompiiyon di Hinok, om i Palu, ⁶ om i Hisron, om i Karmi. ⁷ Kogumuon nopo do tongokusai dot id suang do piro-piro o pinuruan do sompiiyon diti om 43,730 o tulun. ⁸ Sinakagon no di Palu, om i Iliab, ⁹ om tangaanak no di Iliab om i Nomuil, i Datan om i Abiram. Om iyo Datan no di Abiram i pinili’ di tulun dot ogumu’. Om iyolo’ no i suminaap di Musa om i Harun, om i suminokodung di tulun di tuminanud di Kora do suminaap do TUHAN. ¹⁰ Om pipitas no i tana’ do gisom dot agayo o nopipitas om kotolon noddi iyolo’ di tana’ om kapatai no do mogitonggoi-tonggoi di Kora om i tulun di tuminanud dau do daamot di tapui do minimpatai do 250 o tongokusai. Om iri no o nosiliu do popoinsan di tulun dot Israil. ¹¹ Nga’ a’ i’ nokotonggoi do napatai i tangaanak di Kora. ¹² Id suang nod payat di Simion om: i pinuruan do sompiiyon di Nomuil, om i Yamin, om i Yakin, ¹³ om i Sira om i Saul. ¹⁴ Kogumuon nopod tongokusai dot id suang do piro-piro o pinuruan do sompiiyon diti om 22,200 o tulun. ¹⁵ Id suang nod payat di Gad om: i pinuruan do sompiiyon di Sipon, om i Hagi, om i Suni, ¹⁶ om i Osni, om i Iri, ¹⁷ om i Arod, om i Arili. ¹⁸ Kogumuon nopod tongokusai dot id suang do piro-piro o pinuruan do sompiiyon diti om 40,500 o tulun. ¹⁹ - ²¹ Id suang nod payat di Yohuda om: i pinuruan do sompiiyon di Sila, om i Piris, om i Sira, om i Hisron om i Hamul. (Iri nopo duwo di tanak di Yohuda do kusai, iyo Or di Onan, om hilo’ pod Kanaan o kinapatayon.) ²² Kogumuon nopod tongokusai dot id piro-piro o pinuruan do sompiiyon diti om 76,500 o tulun. ²³ Id suang nod payat di Isakar om: i pinuruan do sompiiyon di Tola, om i Pua, ²⁴ om i Yasub om i Simron. ²⁵ Kogumuon nopod tongokusai dot id suang do piro-piro o pinuruan do sompiiyon diti om 64,300 o tulun. ²⁶ Id suang nopod payat di Sibulon om: i pinuruan do sompiiyon di Sirid, om i Ilon om i Yaliil. ²⁷ Kogumuon nopod tongokusai dot id piro-piro o pinuruan do sompiiyon diti om 60,500 o tulun. ²⁸ Mantad no dot id di Yusup, i tapa’ do duwo o kusai om: i payat di Manasi om i payat di Ipraim. ²⁹ Id suang nopod payat di Manasi om: i Makir i tanak di Manasi. Iyau no i tapa’ di Giliad; om iti ngai’ no i pinuruan do sompiiyon do suminolusuk di Giliad: ³⁰ i pinuruan do sompiiyon di Isir, om i Hilik, ³¹ om i Asriol, om i Sikim, ³² om i Somida om i Hipir. ³³ I Silapihad nopo i tanak di Hipir om aiso’ i’ o tanak do kusai; tongoondu’ ngai’ nopo o tanak dau. Ngaran nopo diyolo’ om i Mala, i Noa, i Hogla, i Milka om i Tirsa. ³⁴ Kogumuon nopod tongokusai dot id suang do piro-piro o pinuruan do sompiiyon diti om 52,700 o tulun. ³⁵ Id suang nod payat di Ipraim om: i pinuruan do sompiiyon di Sutila, om i Bikir om i Tahan. ³⁶ Iri nopo pinuruan do sompiiyon di Iran om sinakagon i’ di Sutila. ³⁷ Kogumuon nopod tongokusai dot id suang do piro-piro o pinuruan do sompiiyon diti om 32,500 o tulun. Om iri ngai’ no i pinuruan do sompiiyon di sinakagon di Yusup. ³⁸ Om id suang nopod payat di Binyamin om: i pinuruan do sompiiyon di Bila, om i Asbil, om i Ahiram, ³⁹ om i Sopupam om i Hupam. ⁴⁰ Iri nopo pinuruan do sompiiyon di Arod om i Naaman om sinakagon i’ di Bila. ⁴¹ Kogumuon nopod tongokusai dot id suang do piro-piro o pinuruan do sompiiyon diti om 45,600 o tulun. ⁴² Om id suang nod payat di Dan om: i pinuruan do sompiiyon di Suham. ⁴³ Kogumuon nopod tongokusai dot id suang do pinuruan do sompiiyon diti om 64,400 o tulun. ⁴⁴ Id suang nopod payat di Asor om: i pinuruan do sompiiyon di Yimna, om i Yiswi om i Boria. ⁴⁵ Iri nopo pinuruan do sompiiyon di Hibir om i Malkiol om sinakagon i’ di Boria. ⁴⁶ I Asor nopo om kianak dot iso’ o tondu’ dot i Sira o ngaran. ⁴⁷ Kogumuon nopod tongokusai dot id suang do piro-piro o pinuruan do sompiiyon diti om 53,400 o tulun. ⁴⁸ Id suang nopod payat di Naptali om: i pinuruan do sompiiyon di Yasiil, om i Guni, ⁴⁹ om i Yisir om i Silom. ⁵⁰ Kogumuon nopod tongokusai dot id suang do piro-piro o pinuruan do sompiiyon diti om 45,400 o tulun. ⁵¹ Kogumuon nopod tongokusai do tulun dot Israil dot oinsanan om 601,730 o tulun. ⁵² Om boros kad TUHAN dot id di Musa, ⁵³ ’’Pogiongkib-ongkibon no i tana’ dot id pogialatan di payat dot Israil do tumanud do kogumuo’ do pointikid-tikid di payat. ⁵⁴ - ⁵⁶ Ralan nopod mangangkib di tana’ om maan undio’. Iri nopo payat dot ogumu’ om agayo no o pangangkib, om iri no payat dot okuri’ om okoro’ no o pangangkib,’’ ka dau. ⁵⁷ Iri nopo payat di Liwi nga’ kosuang ngai’ no i pinuruan do sompiiyon di Girson, om i Kohat om i Morari. ⁵⁸ Om id suang nopod sinakagon diyolo’ nga’ kohompit ngai’ no i pinuruan do sompiiyon dit ongokooro’, iri no i pinuruan do sompiiyon di Libni, om i Hibron, om i Mali, om i Musi om i Kora. I Kohat nopo nga’ tapa’ di Amram, ⁵⁹ i minanansawo do tanak do tondu’ do songulun i mantad id payat di Liwi. Ngaran nopo di tanak do tondu’ddi nga’ i Yokibid; om nokosusuon nopo dau nga’ hilo’d Masir. Om paganak no iyolo’ di Amram do duwo o tanak do kusai, iyo Harun di Musa, om iso’ o tanak diyolo’d tondu’, dot i Miriam o ngaran. ⁶⁰ I Harun nopo om kianak dot apat o kusai: i Nadab, om i Abihu, om i Iliasar om i Itamar. ⁶¹ Iyo Nadab nopo di Abihu om napatai do tontok di pinapatahak iyolo’ do tapui dit okon ko’ korohian do Kinorohingan. ⁶² Kogumuon nopo do tongokusai dot id suang do payat di Liwi di sombulan nogi’ ko’ asawat ko’ iri o tumur om 23,000 o tulun. Iyolo’ nopo om pinosuwai-suwai o pinotulisan do ngaran do mantad di tulun dot Israil do suwai; tu’ a’ i’ iyolo’ nongkiban do tana’ di maan diyolo’d songonuon do hilo’d Israil. ⁶³ Om iyo noddi o pinopotulis do ngaran di piro-piro o pinuruan do sompiiyon dot Israil do tinulis diyo Musa di Iliasar di pinapaharo iyolo’ do pinongintaban do tulun do hilo’d rantai do Muab, it id soborong di Bawang do Yordan, it id somok no do bandar do Yorikou. ⁶⁴ Om id pialatan nopo di tulun do tinulis diyo Musa di Harun o ngaran di hilo’d tana’ do kowotuan do Sinai om iso’ po nga’ aiso’ no o poimpasi. ⁶⁵ Nokoboros mantad nod TUHAN dot angapatai ngai’ iyolo’ do hilo’d tana’ do kowotuan. Om nangapatai ngai’ no kopio iyolo’; nga’ i Kalib poo i tanak di Yopuni, om i Yosua i tanak di Nun ot a’ napatai.

¹ I Silapihad nopo om kianak do limo o tondu’, i Mala, i Noa, i Hogla, i Milka, om i Tirsa. I Silapihad nopo om tanak di Hipir, om i Hipir no om tanak di Giliad, om i Giliad no om tanak di Makir, om i Makir no om tanak di Manasi, om i Manasi no om tanak di Yusup. ² Om ongoi no i limo tanak di Silapihad do tondu’ddi solowot di Musa om i Iliasar, it Imam diri, om i piro-piro boyoon om koinsanai di tulun do pointimung do hiri’d toning di Kiim do TUHAN. Om boro-boros no iyolo’ do poingkaa, ³ ’’Napatai no i tapa’ dahai do hilo’d tana’ do kowotuan om aiso’ i’ o tanak dau’d kusai. Iyau nopo om okon i’ ko’ id pialatan di tulun di suminokodung di Kora, tu’ suminaap do TUHAN; iri i dau’d dusa o nakapatai-patai dau. ⁴ Nga’ nokuro tuu tu’ iri no it aiso’ o tanak dau’d kusai o katanus-tanus do ngaran do tapa’ dahai do mantad hiti’d bansa’ dot Israil? Onuwai no iyahai do tana’ do tungkusan dot id pogialatan di koobpinayan do tapa’ dahai,’’ ka. ⁵ Om posunudo’ nod Musa i boros diyolo’ddi dot id TUHAN, ⁶ om boros kad TUHAN dot id di Musa, ⁷ ’’Koontok i’ ilo pokionuon di tangaanak di Silapihad do tongoondu’; onuan nopo iyolo’d tana’ do tungkusan dot id pogialatan dilo koobpinayan di tapa’ diyolo’. Om pologoson nopo dot otungkusan diyolo’ it apatut dot aanu di tapa’ diyolo’. ⁸ Om sunudan no ilo tulun dot Israil dot ondung haro o kusai dot apatai om aiso’ i’ o tanak dau’d kusai om iri no i tanak dau’d tondu’ o tumungkus do nunu nopo i dau’d songonuon. ⁹ Ondung aiso’ o tanak dau’d tondu’, om iri no i koobpinayan dau’d tongokusai o kotungkus diri. ¹⁰ Ondung aiso’ o tobpinai dau’d kusai om iri no tobpinai di tapa’ dau do kusai o kotungkus diri. ¹¹ Ondung aiso’ o tobpinai dau’d kusai om aiso’ o tamanon dau, om iri no i waris dau dit id somok po o kopiobpinayan o kotungkus diri om kaanu’ddi dot osiliu do dau’d songonuon. Om mositi’ nod tonudon di tulun dot Israil iti do silihon dot oturan dit ogirot, do miagal di pinonuhuan ku, iyoho’ i TUHAN, dot id diya’,’’ ka dau. ¹² Om boros kad TUHAN dot id di Musa, ’’Ongoi takad dilo Nuluhon dot Abarim om mimpa’ i’ di tana’ do patahakon ku dot id tulun dot Israil. ¹³ Om kokito ko pondo’ddi, om matai ko no do miagal di Harun, i tobpinai nu, ¹⁴ tu’ suminurilog goduwo kou i’ di pinonuhuan ku di hilo’ kou id tana’ do kowotuan do Sin. Tontok di sontogod-togod ngai’ doho’ i tulun di hilo’d Moriba, om minada’ ko i’ do pinopointalang di sinundu ku dit olidang dot id diyolo’,’’ ka dau. (Moriba nopo nga’ ngaran di tudan do waig do hilo’d Kadis, i hilo’d tana’ do kowotuan do Sin.) ¹⁵ Om sambayang no i Musa do poingkaa, ¹⁶ ’’Oi TUHAN i Kinorohingan, i tadon do koposion do koinsanai di songimpasi, pokionuon ku no kopio do momili’ ko’d tulun di milo do momoyo’ diti tulun dot ogumu’, ¹⁷ om i milo do momoyo’ diyolo’ do mongoi sangod, om a’ i’ iyolo’ osiliu’d tulun do miagal di baanan do dumba’ dit aiso’ o gompomogompi’,’’ ka. ¹⁸ Om boros kaddi do TUHAN dot id di Musa, ’’Lohowon no i Yosua i tanak di Nun, i tulun dit oilo kopio’ddi, om pakabayon no o longon nu dot id tulu dau. ¹⁹ Poingkokoton no iyau dot id toguang di Iliasar it Imam diri om id toguang do toinsanan di tulun dot Israil, om poboroson nondo dot id toguang ngai’ diyolo’ dot iyau no i sumowoli diya’. ²⁰ Onuan no iyau do wookon di kuasa’ nu om mumboyo’ ngai’ i’ dau i tulun dot Israil. ²¹ Om mokituduk indo iyau di Iliasar it Imam diri, tu’ koilo do korohian ku do mamakai dit Urim om i Tumim. Om iyo noddi o ralan di Iliasar do monuduk di Yosua om koinsanai di tulun dot Israil dit apatut diyolo’d wonsoyon,’’ ka dau. ²² Om wonsoyo’ nod Musa o miagal di pinonuhuan do TUHAN dot id dau. Om poingkakato’ no dau i Yosua do hiri’d toguang di Iliasar, it Imam diri, om id toguang do koinsanai di tulun. ²³ Om pakabayo’ nod Musa o longon dau dot id tulu di Yosua, om poboroso’ no dau dot id tulun dot ogumu’ dot i Yosua no o sumowoli dau; tu’ iyo noddi o pinonuhuan do TUHAN.

¹ Om suhuo’ nod TUHAN i Musa ² do monuhu’ di tulun dot Israil do papatahak dot id Kinorohingan do tontok di maso di natantu’ mantad diti piro-piro o porsombahan do taakanon di kasanangan do TUHAN. ³ Om iti ngai’ no i porsombahan do taakanon do patahakon dot id TUHAN: Patahakon nopod maan do porsombahan di sorobon do pointikid do tadau, om duwo o tanak do dumba’ do tontoluhan di sopisontoun nogi’ o tumur, om it aiso’ o bohiton do tinan. ⁴ Iri nopo tiso’ di tanak do dumba’ddi om patahakon do dongkosuabon, om iri no tiso’ om patahakon do dongsosodopon. ⁵ Om tanggayan goduwo nopo i tanak do dumba’ddi do porsombahan do gandum do songkilogram o tapung, om ralatan do songlito o tumau do saitun dit osonong kopio. ⁶ Om iri no i porsombahan do patahakon do pointikid do tadau dit insanan do monorob, om it id gulu i’ kopio do pinatahak do hilo’d Nuluhon do Sinai do maan do porsombahan do taakanon. Om iri no i tawau do porsombahan diri o kasanangan do TUHAN. ⁷ Om iri nopo porsombahan do waig dot anggur do potonggoyon di tanak do dumba’ di koiso’ddi, om mositi’ nod potuntugon do hiri’d pananaraban do porsombahan o songlito di waig dot anggur diri. ⁸ Om dongsosodopon nondo om patahakon no i tanak do dumba’ di koduwo’ddi dot iyo iddi porsombahan do dongkosuabon o papatahak. Om potonggoyon i porsombahan do waig dot anggur. Om iri nga’ porsombahan i’ do taakanon, om iri no tawau do porsombahan diri o kasanangan do TUHAN. ⁹ Tontok nopod tadau’d Sabat om mositi’ nod papatahak do duwo o tanak do dumba’ do tontoluhan di sopisontoun nogi’ o tumur, it aiso’ goduwo nopo o bohiton do tinan, om papatahak do duwo kilogram do tapung di rinalatan do tumau do saitun do maan do porsombahan do gandum, om porsombahan do waig dot anggur. ¹⁰ Om mositi’ nod patahakon iti porsombahan di sorobon do pointikid do tadau’d Sabat, do poruhangon di porsombahan do monikid tadau om i porsombahan do waig dot anggur di potonggoyon kasai’ di porsombahan. ¹¹ Papatahak no dot id TUHAN do porsombahan di sorobon do pointikid do koimpuunon do tulan: patahakon nopo om duwo o tinan do sapi’ do tontoluhan dit okoro’ po, om songinan o dumba’ do tontoluhan, om turu’ o tanak do dumba’ do tontoluhan di sorontoun-toun ngai’ nogi’ o tumur, om it aiso’ ngai’ nopo o bohiton do tinan. ¹² Om maan nopo do porsombahan do gandum om i tapung di rinalatan do tumau do saitun: Potonggoyon nopod pointikid-tikid do songinan o sapi’ om tolu o kilogram do tapung; ¹³ om potonggoyon nod pointikid-tikid do songinan o tanak do dumba’ om songkilogram o tapung. Iti nopo porsombahan do sinorob diti om porsombahan do taakanon dot id TUHAN. Om iri no tawau diti porsombahan o kasanangan do TUHAN. ¹⁴ Iri nopo porsombahan do waig dot anggur dit apatut do patahakon do potonggoyon di porsombahan do sinorob, om duwo o lito do waig dot anggur do potonggoyon di dumba’ do tontoluhan, om songlito o potonggoyon do pointikid-tikid do songinan o tanak do dumba’. Om iri no o toturan do maan do porsombahan di sorobon do tontok do tadau’d koiso’ do pointikid-tikid do koimpuunon do tulan do poingompus do toun. ¹⁵ Om poruhangon nopo di porsombahan do sorobon do pointikid do tadau do mitonggoi di porsombahan do waig dot anggur, om songinan o kambing do tontoluhan do maan do porsombahan do pangampun do dusa. ¹⁶ Iri nopo Tadau’d Agayo do Paska om mositi’ nod ramayon do tontok di tadau do kohopod om apat do tulan di koiso’ do maan do pomusou’d TUHAN. ¹⁷ Om tadau nopondod kohopod om limo om tumimpuun no o karamayan do don tugama’ di ramayon do solinaid do turu’ o tadau. Om solinaid nopoddi om roti no dit a’ rinalatan do pangambang o koino-ino do kanon. ¹⁸ Tontok nopo di tadau do koiso’ do karamayan diri, om tumimung kou nod sumambayang, om kada’ kou no karaja’ do nunu nopo. ¹⁹ Om papatahak kou no dot id TUHAN do porsombahan di sorobon do maan do porsombahan do taakanon. Patahakon nopo om duwo o sapi’ do tontoluhan dit okoro’ po, om songinan o dumba’ do tontoluhan, om turu’ o tanak do dumba’ do tontoluhan di sorontoun-toun ngai’ nogi’ o tumur, om it aiso’ ngai’ nopo o bohiton do tinan. ²⁰ Papatahak nod porsombahan do gandum di natantu’ mantad om i ralatan do tumau’d saitun. Patahakon nopo om tolu o kilogram do tapung do potonggoyon do pointikid-tikid do songinan o sapi’, om duwo kilogram do potonggoyon di dumba’ do tontoluhan, ²¹ om songkilogram o potonggoyon do pointikid-tikid dot iso’ di tanak do dumba’. ²² Om patahak nogi’ do songinan o kambing do tontoluhan do maan do porsombahan do pangampun do dusa, om owonsoi i’ i wonsoyon di natantu’ mantad do pongidu’ do dusa di tulun dot ogumu’. ²³ Om patahakon ngai’ no iri do poruhangon di porsombahan do sorobon di natantu’ mantad do patahakon do monikid kosuabon. ²⁴ Om iyo nogiddi o papatahak do porsombahan do taakanon dot id TUHAN do solinaid do turu’ o tadau. Om iri no tawau di porsombahan diri o kasanangan do TUHAN. Om patahakon ngai’ no iri do poruhangon di porsombahan di sorobon om i porsombahan do waig dot anggur di patahakon do pointikid do tadau. ²⁵ Tumimung kou nod sumambayang di tadau’d koturu’ om kada’ kou no karaja’ do nunu nopo. ²⁶ Tontok nopo di tadau do koiso’ di Tadau dot Agayo do Dongmongomot, tontok di papatahak kou dot id TUHAN do wookon di gandum dit id gulu koomot, om mositi’ nod tumimung kou do sumambayang, om kada’ kou no karaja’ do nunu nopo. ²⁷ Papatahak kou nod porsombahan di sorobon tu’ iri no tawau do porsombahan diri o kasanangan do TUHAN. Patahakon nopo om duwo o tinan do sapi’ do tontoluhan dit okoro’ po, om songinan o dumba’ do tontoluhan, om turu’ o tanak do dumba’ do tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. ²⁸ Om papatahak nod porsombahan do gandum di natantu’ mantad, i tapung di rinalatan do tumau do saitun. Patahakon nopo om tolu o kilogram do tapung do potonggoyon do pointikid-tikid do songinan o sapi’ do tontoluhan, om duwo kilogram do tapung do potonggoyon di dumba’ do tontoluhan. ²⁹ Om songkilogram o tapung do potonggoyon do pointikid-tikid do songinan o tanak do dumba’. ³⁰ Om papatahak nogi’ do songinan o kambing do tontoluhan do maan do porsombahan do pangampun do dusa, om owonsoi i’ i wonsoyon di natantu’ mantad do pongidu’d dusa di tulun dot ogumu’. ³¹ Patahakon ngai’ no iri, om patahakon nogi’ i porsombahan do waig dot anggur do poruhangon di porsombahan do sorobon om i porsombahan do gandum di patahakon do pointikid do tadau.

¹ Tontok nopo di tadau do koiso’ di tulan do koturu’, om tumimung kou nod sumambayang, om kada’ kou karaja’ do nunu nopo. Om mositi’ nod pounion ngai’ i torumpit do tontok do tadau’ddi. ² Om papatahak kou no dot id TUHAN do porsombahan di sorobon, tu’ iri no tawau do porsombahan diri o kasanangan do TUHAN. Patahakon nopo om songinan o sapi’ do tontoluhan dit okoro’ po, om turu’ o tinan do tanak do dumba’ di tontoluhan do sorontoun-toun nogi’ o tumur, om it aiso’ ngai’ nopo o bohiton do tinan. ³ Om patahak kou nod porsombahan do gandum di natantu’ mantad, i rinalatan do tumau do saitun. Patahakon nopo om tolu o kilogram do tapung do potonggoyon di sapi’, om duwo o kilogram do tapung do potonggoyon di dumba’ do tontoluhan, ⁴ om songkilogram o tapung do potonggoyon do pointikid-tikid do songinan o dumba’. ⁵ Om patahak nogi’ do songinan o kambing do tontoluhan do maan do pangampun do dusa, om owonsoi i’ i natantu’ mantad do wonsoyon do pongidu’d dusa di tulun dot ogumu’. ⁶ Om patahakon ngai’ no iri do poruhangon di porsombahan do sorobon di natantu’ mantad do patahakon do monikid tadau do tontok di tadau’d koiso’ do pointikid do koimpuunon do tulan, do mitonggoi di porsombahan do gandum, om i porsombahan do waig dot anggur. Om iri no tawau do porsombahan do taakanon diri o kasanangan do TUHAN. ⁷ Tumimung kou nod sumambayang do tontok di tadau’d kohopod do tontok di tulan do koturu’. Om tontok nopo do tadau’ddi, om mositi’ nod puasa kou om a’ koino-ino do kumaraja’ do nunu nopo o karaja’. ⁸ Om patahak kou no dot id TUHAN do porsombahan di sorobon. Patahakon nopo om songinan o sapi’ do tontoluhan dit okoro’ po, om songinan o dumba’ do tontoluhan, om turu’ o tinan do tanak do dumba’ di tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. Om iri no tawau do porsombahan diri o kasanangan do TUHAN. ⁹ Patahak nod porsombahan do gandum di natantu’ mantad, i tapung di rinalatan do tumau do saitun: Patahakon nopo om tolu o kilogram do tapung do potonggoyon di sapi’, om duwo o kilogram do tapung do potonggoyon di dumba’ do tontoluhan, ¹⁰ om songkilogram o tapung do potonggoyon do pointikid-tikid do songinan o tanak do dumba’. ¹¹ Om patahak nogi’ do songinan o kambing do tontoluhan do maan do porsombahan do pangampun do dusa. Iti nopo nga’ poruhangon di kambing do patahakon do tontok di momonsoi di natantu’ mantad do wonsoyon do maan do pangampun do dusa di tulun dot ogumu’, om poruhangon di porsombahan di sorobon do pointikid do tadau do mitonggoi di porsombahan do gandum om i porsombahan do waig dot anggur. ¹² Tumimung kou nod sumambayang do tontok do tadau do kohopod om limo di tulan do koturu’. Om ramayon no dokoyu o tadau dot agayo diti do maan do pomusou’d TUHAN, do solinaid do turu’ o tadau. Om kada’ kou no karaja’ do nunu nopo do solinaid diri. ¹³ Om tontok nopo di tadau’d koiso’, om papatahak kou no dot id TUHAN do porsombahan do taakanon. Patahak nod hopod om tolu o sapi’ do tontoluhan dit ongokoro’ po, om duwo o tinan do dumba’ do tontoluhan, om hopod om apat o tanak do dumba’ do tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. Om iri no tawau do porsombahan diri o kasanangan do TUHAN. ¹⁴ Om patahakon no i porsombahan do gandum di natantu’ mantad, i tapung di rinalatan do tumau’d saitun. Potonggoyon nopo do pointikid-tikid do songinan o sapi’ om tolu o kilogram do tapung, om duwo o kilogram do tapung do potonggoyon do pointikid-tikid do songinan o dumba’ do tontoluhan, ¹⁵ om songkilogram o tapung do potonggoyon do pointikid-tikid do songinan o tanak do dumba’. Om potonggoyon nopo kawagu di porsombahan do gandum, om i porsombahan do waig dot anggur di natantu’ mantad. ¹⁶ Om suwai no ko’ iri, om patahak kou nod songinan o kambing do tontoluhan do maan do porsombahan do pangampun do dusa. Om porsombahan nopodti nga’ poruhangon di porsombahan do sorobon do pointikid do tadau, om i porsombahan do gandum i porsombahan do waig dot anggur di potonggoyon kasai’. ¹⁷ Om tontok nopo di tadau’d koduwo om patahak kou nod hopod om duwo o sapi’ do tontoluhan dit ongokoro’ po, om duwo o tinan do dumba’ do tontoluhan, om hopod om apat o tanak do dumba’ do tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. ¹⁸ - ¹⁹ Om patahakon nod pointonggoi do porsombahan diri o koinsanai di porsombahan do suwai di pinatahak do tontok di tadau’d koiso’. ²⁰ Om tontok nopo di tadau’d kotolu om patahak kou nod hopod om iso’ o sapi’ do tontoluhan dit ongokoro’ po, om duwo o tinan do dumba’ do tontoluhan, om hopod om apat o tanak do dumba’ di tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. ²¹ - ²² Om patahakon nod pointonggoi do porsombahan diri o koinsanai di porsombahan do suwai di pinatahak do tontok di tadau do koiso’. ²³ Om tontok nopo di tadau’d kaapat om patahak kou nod hopod o tinan do sapi’ do tontoluhan dit ongokoro’ po, om duwo o tinan do dumba’ do tontoluhan, om hopod om apat o tanak do dumba’ di tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. ²⁴ - ²⁵ Om patahakon nogi’ do pointonggoi’ddi o koinsanai di porsombahan do suwai di pinatahak do tontok di tadau do koiso’. ²⁶ Om tontok nopo di tadau do kolimo om patahak kou nod siam o sapi’ do tontoluhan dit ongokoro’ po, om duwo o tinan do dumba’ do tontoluhan, om hopod om apat o tanak do dumba’ di tontoluhan di sorontoun-toun nogi’ o tumur om it aiso’ ngai’ nopo o bohiton do tinan. ²⁷ - ²⁸ Om patahakon nogi’ do pointonggoi’ddi o koinsanai di porsombahan do suwai di pinatahak do tontok di tadau do koiso’. ²⁹ Om tontok nopo di tadau do koonom om patahak kou nod walu’ o tinan do sapi’ do tontoluhan dit ongokoro’ po, om duwo o tinan do dumba’ di tontoluhan, om hopod om apat o tanak do dumba’ do tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. ³⁰ - ³¹ Om patahakon nogi’ do pointonggoi di porsombahan diri o koinsanai di porsombahan do sorobon di suwai do miagal di pinatahak do tontok di tadau’d koiso’. ³² Om tontok nopo di tadau do koturu’, om patahak kou nod turu’ o sapi’ do tontoluhan dit ongokoro’ po, om duwo o tinan do dumba’ do tontoluhan, om hopod om apat o tanak do dumba’ do tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. ³³ - ³⁴ Om patahakon nogi’ do pointonggoi’ddi o koinsanai di porsombahan do suwai di pinatahak do tontok di tadau’d koiso’. ³⁵ Om tontok nopo di tadau do kawalu’ om tumimung kou no do sumambayang om kada’ kou no karaja’ do nunu nopo. ³⁶ Om patahak kou nod porsombahan di sorobon dot id TUHAN do maan do porsombahan do taakanon. Patahakon nopo om songinan o sapi’ do tontoluhan dit okoro’ po, om songinan o dumba’ do tontoluhan, om turu’ o tinan do tanak do dumba’ di tontoluhan di sorontoun-toun nogi’ o tumur, om it aiso’ ngai’ nopo o bohiton do tinan. Om iri no tawau do porsombahan diri o kasanangan do TUHAN. ³⁷ - ³⁸ Om patahakon nogi’ do pointonggoi’ddi o koinsanai di porsombahan di pinatahak do tontok di tadau do koiso’. ³⁹ Om iyo noddi o toturan do pasal di porsombahan di sorobon, om porsombahan do gandum, om porsombahan do waig dot anggur, om i porsombahan do piombolutan dit apatut dokoyu’d patahakon dot id TUHAN do tontok do mamaramai di piro-piro o tadau dot agayo di natantu’ mantad. Om iri ngai’ nopo porsombahan diri om poruhangon di porsombahan di patahakon dokoyu do pamayaan do batos di mikuwo’d sumpa’ ko’ i porsombahan do tumanud do kagaanan do ginawo. ⁴⁰ Om polombuso’ ngai’ nod i Musa dot id tulun dot Israil o koinsanai di pinonuhuan do TUHAN dot id dau.

¹ Om patahako’ nod Musa iti piro-piro o toturan dot id koinsanai di boyoon do payat dot Israil, do poingkaa: ² Soira’ nopod haro o kusai do mamatos do mikuwo’d sumpa’ do papatahak do nunu nopo dot id TUHAN, ko’ mamatos do mikuwo’d sumpa’ do mamantang do nunu nopo om mositi’ nod wonsoyon ngai’ di tulun i pinabatos dau’ddi, om a’ no iyau koino-ino dot a’ mamayaan di batos dau di mikuwo’d sumpa’ diri. ³ - ⁴ Soira’ nopod haro o sumandak di poingiyon po do hiri’d walai do tapa’ dau do mamatos do mikuwo’d sumpa’ do papatahak do nunu nopo dot id TUHAN, ko’ mamatos do mikuwo’d sumpa’ do mamantang do nunu nopo, om mositi’ nod wonsoyon dau o koinsanai di batos dau di mikuwo’d sumpa’ ko’ batos dau’ddi, ondung a’ no awagat o ginawo di tapa’ dau do koilo do pasal diri. ⁵ Nga’ ondung awagat o ginawo di tapa’ dau do bayaanon di tanak dau i pinabatos diri, om a’ i’ akagasan di batos i sumandak diri. Om oompunan i’ iyau’d TUHAN tu’ iri i tapa’ dau o mogodu dau do mamayaan di batos dau di mikuwo’d sumpa’. ⁶ - ⁷ Ondung haro o tondu’ dit a’ po nakasawo do momonsoi’d batos do mikuwo’d sumpa’, do minomusorou kopio tuu iyau do tintod do minomonsoi di batos diri ko’ amu’ po, ko’ ondung minamatos iyau do mikuwo’d sumpa’ do mamantang do nunu nopo, om akagasan no iyau di batos dau di mikuwo’d sumpa’ ko’ i batos dau’ddi. Om soira’ nopod kakawin iyau, om akagasan kasai’ po iyau di batos dau’ddi, ondung a’ no awagat o ginawo di sawo dau do korongou do pasal diri. ⁸ Nga’ ondung mogodu i sawo dau do bayaanon dau i batos dau di mikuwo’d sumpa’ddi do korongou i sawo dau, om a’ no iyau akagasan di batos diri. Om ompunan i’ iyau’d TUHAN. ⁹ Tondu’ nopo di nopuadan ko’ i nadaan do sawo om mositi’ nod mamayaan do koinsanai di batos dau di mikuwo’d sumpa’ ko’ i batos dau do mamantang do nunu nopo. ¹⁰ Ondung haro o tondu’ di nakakawin no do mamatos do mikuwo’d sumpa’ ko’ mamatos do mamantang do nunu nopo, ¹¹ om mositi’ nod wonsoyon dau o koinsanai di nokoboros dau’ddi, ondung a’ no awagat o ginawo di sawo dau do korongou do pasal diri. ¹² Nga’ ondung mogodu i sawo dau do bayaanon dau i batos dau’ddi do korongou i sawo dau do pasal diri, om a’ no i tondu’ akagasan di batos dau. Om ompunan i’ iyau’d TUHAN tu’ iri i sawo dau o minogodu dau do mamayaan di batos dau do mikuwo’d sumpa’. ¹³ Haro i’ o kuasa’ do kusai do popogirot ko’ papaiso’ do nunu nopo o batos do mikuwo’d sumpa’ ko’ batos di pinoboros di sawo dau. ¹⁴ Nga’ ondung a’ awagat o ginawo di kusai do tontok di tadau do korongou iyau do pasal di batos di sawo dau di mikuwo’d sumpa’, om mositi’ nod wonsoyon ngai’ di tondu’ i batos dau di mikuwo’d sumpa’ ko’ i batos dau. Nokogirot no di sawo dau i batos dau’ddi tu’ a’ i’ pinopoboros dot awagat o ginawo dau do tontok di tadau do nokorongou iyau do pasal di batos diri. ¹⁵ Nga’ ondung pakaisoon di kusai i batos di sawo dau di mikuwo’d sumpa’ do tadau’d suwai, om iri no i kusai o mamabo do kootuson di winonsoi dau do pinapakaiso’ddi. ¹⁶ Om iri no o piro-piro o toturan do pinatahak do TUHAN dot id di Musa do pasal do batos di mikuwo’d sumpa’ do wonsoyon do sumandak di poinsugku’ po do tapa’ dau, om i tondu’ di nakasawo no.

¹ Boros kad TUHAN dot id di Musa, ² ’’Hukuman ngai’ no o tulun do Midian do ponuli’ di kangaraaton diyolo’ dot id tulun dot Israil. Om katalib pondo iri om apatai ko nondo, oi Musa,’’ ka. ³ Om boro-boros noddi i Musa dot id tulun dot Israil, ’’Sumodia’ kou no do mongoi sangod. Om ongoyon no dokoyu songodo’ i tulun do Midian om hukuman no iyolo’ do ponuli’ di kangaraato’ diyolo’ dot id toguang do TUHAN. ⁴ Om momili’ kou nod sororibu-ribu o soudor do mantad id pointikid-tikid do payat dot Israil, do mongoi sangod,’’ ka dau. ⁵ Om pilio’ noddi o sororibu-ribu o tulun do mantad id pointikid-tikid do payat dot Israil. Om ginumu’ nopo diyolo’ddi nga’ hopod om duwo noribu o tulun di nokosodia’ no do mongoi sangod. ⁶ Om suhuo’ noddi di Musa iyolo’ do mongoi sangod. Om i Pinihas i tanak di Iliasar it Imam, o boyoon diyolo’. Om i Pinihas no i mongilo-ilo do koinsanai di pakakas dit ongolidang, om i torumpit di pouunion do maan do popoilo. ⁷ Om ngoyo’ noddi di tulun dot Israil songodo’ i tulun do Midian, om patayo’ ngai’ nopo diyolo’ i tongokusai’d hiri do tumanud di pinonuhuan do TUHAN dot id di Musa. ⁸ Om kohompit nogi’ i limo o raja’ do tulun do Midian. Iri ngai’ nopo raja’ddi nga’: i Iwi om i Rikim, om i Sur, om i Hur, om i Riba. Om pinatai po diyolo’ i Biliam i tanak di Bior. ⁹ Om tanggayai no di tulun dot Israil i tongoondu’ om i tangaanak di tulun do Midian, om onuo’ ngai’ diyolo’ i sapi’ om i tayam-tayam diyolo’d suwai om i dapu’ diyolo’. ¹⁰ Om tutudai no di tulun dot Israil i kabandaran om i kokiiman di tulun do Midian. ¹¹ Om timungo’ ngai’ nogiddi di tulun dot Israil i nangaanu diyolo’ do mantad id pisangod, dot i tulun om i tayam-tayam di natangggayan diyolo’ddi, ¹² om igitai ngai’ no diyolo’ do hiri’d di Musa om hiri’d di Iliasar om hiri’d toinsanan di tulun dot Israil. Tontok nopoddi om hilo’ iyolo’d rantai do Muab do minomukiim, i hilo’d somok do Bawang do Yordan, it id hapak do bandar do Yorikou. ¹³ Om soliwan ngai’ noddi i Musa om i Iliasar, om i piro-piro boyoon do suwai, om i tulun dot Israil do minongoi ruba’ di soudor dot Israil. ¹⁴ Om kotogod noddi i Musa di soudor om i boyoon di soudor om i sinompuruan do soudor di koguguli’ do mantad id pisangadan. ¹⁵ Om ponguhot no i Musa diyolo’, ’’Nokuro tu’ pinologos dokoyu’d poimpasi iti tongoondu’? ¹⁶ Okon toi ko’ ilo’ no tongoondu’ i tuminanud di nosihat di Biliam, i nokobungou ngai’d tulun dot Israil dot a’ tuminorodok dot id TUHAN di hilo’d Pior! Om iri noddi o pinoporikot do kousungan dot id tulun di songonuon do TUHAN. ¹⁷ Baino’ nopo om patayon ngai’ no dokoyu o tangaanak do tongokusai om i tongoondu’ di nodudun do kusai. ¹⁸ Nga’ iri nopo i tongoondu’ di minsusukod nogi’ om i tongoondu’ dit a’ po nodudun do kusai, om koino-ino i’ dokoyu dot onuon. ¹⁹ Om dinondo nodti, om koinsanai dokoyu i nakapamatai’d tulun, ko’ i nakakama’ do rata’d tulun om mositi’ nod mundorong do hilo’d soliwan dilo kokiiman do solinaid do turu’ o tadau. Om tontok nopo di kotolu om di koturu’d tadau, om mositi’ nod wonsoyon dokoyu om i tongoondu’ di tinanggayan dokoyu, i wonsoyon di natantu’ mantad do pomolidang do tinan do tumanud do toturan do tugama’. ²⁰ Koinsanai di pakayan om nunu nopo i kulit do winonsoi, ko’ hulu’d kambing ko’ kayu do winonsoi, om mositi’ nod lidangan do tumanud dit oturan do tugama’,’’ ka dau. ²¹ Om boro-boros noddi i Iliasar di tulun dot ogumu’ di koguguli’ do mantad id pisangadan, ’’Iti ngai’ no o toturan di pinatahak do TUHAN dot id di Musa. ²² - ²³ Koinsanai dit a’ sumorob, do miagal do tamas, om pirok, om tambaga’, om basi’, om gundol dit opurak om gundol dit oitom, om mositi’ nod posuboon ngai’ iri dot id tapui do pomolidang diri. Om nunu nopo i konunu-nunuan dit osorob do tapui om ougan no di waig di pongongoug do tontok do momolidang. ²⁴ Om koturu’ nopod tadau om mositi’ nod pupuan dokoyu o pakayan dokoyu, om olidang kou indo dot id pagantangan do tugama’, om koino-ino kou nondo do sumuang do hiri’d kokiiman,’’ ka dau. ²⁵ Om boro-boros noddi o TUHAN dot id di Musa, ²⁶ ’’Iya’ no om i Iliasar, om koinsanai di boyoon do suwai di tulun dot Israil, ot apatut do mongintob di konunu-nunuan di naahau do mantad id pisangod, om kohompit ngai’ nogi’ i tulun om i tayam-tayam di nangatanggayan. ²⁷ Om iri nopo i konunu-nunuan diri nga’ piduwoon om piintangaon nopo. Songintanga’ nopo om patahakon di soudor, om songintanga’ no om patahakon di tulun dot Israil di suwai. ²⁸ Mantad nopo di tintanga’ di naanu di soudor om mositi’ nod manganu dot iso’ do mantad id pointikid-tikid do limo nahatus — do mantad id pogialatan do tulun di natanggayan om mantad nogi’ dot id pogialatan do sapi’ om kaladai, om dumba’ om kambing, do maan do sukai do patahakon dot id TUHAN. ²⁹ Om patahakon nondo iri dot id di Iliasar it Imam, do maan do porsombahan di potobilangon do maan do don TUHAN. ³⁰ Om mantad no di tintanga’ di tulun dot Israil do suwai, om mositi’ nod manganu dot iso’ do mantad id pointikid-tikid do limo nohopod dot id pogialatan di tulun di natanggayan om mantad id pogialatan do sapi’ om kaladai, om dumba’ om kambing. Om patahakon ngai’ nondo iri di tulun do Liwi, i mongilo-ilo do hiri’d Kiim di Koropohon do TUHAN,’’ ka dau. ³¹ Om wonsoyo’ ngai’ nopo di Musa om i Iliasar iri do tumanud di pinonuhuan do TUHAN. ³² - ³⁵ Iti ngai’ no i nangaanu di soudor do tinanggayan diyolo’ do mantad id pisangod, do suwai mantad ko’ i nangaanu diyolo’ do maan diyolo’. Kogumuon nopo om 675,000 o dumba’ om kambing, om 72,000 o sapi’, om 61,000 o kaladai, om 32,000 o tongoondu’ dit a’ po nodudun do kusai. ³⁶ - ⁴⁰ Om kogumuon nopo di nakatahak dot id soudor diri om 337,500 o dumba’ om kambing. Om 675 o tinan do mantad diri do numaan do sukai do pinatahak dot id TUHAN; om 36,000 o tinan do sapi’, om 72 o tinan do mantad diri do numaan do sukai do pinatahak dot id TUHAN; om 30,500 o kaladai, om 61 o tinan do mantad diri do numaan do sukai do pinatahak dot id TUHAN; om 16,000 o tongoondu’ di minsusukod nogi’, om 32 o tulun do mantad diri do numaan do sukai do pinatahak dot id TUHAN. ⁴¹ Om patahako’ ngai’ nod Musa i numaan do sukai’ddi dot id di Iliasar do numaan do porsombahan do potobilangon do maan do don TUHAN, do tumanud di pinonuhuan do TUHAN. ⁴² - ⁴⁶ Om iri no i tintanga’ di pinatahak dot id tulun dot Israil di suwai, i songintanga’ di pinatahak di soudor, om 337,500 o dumba’ om kambing. Om 36,000 o sapi’, om 30,500 o kaladai, om 16,000 o tongoondu’ dit a’ po nodudun do kusai. ⁴⁷ Om mantad nodti om minanganu i Musa dot iso’ do mantad id pointikid-tikid do limo nohopod o tulun di tinanggayan di soudor dot Israil, om mantad id pogialatan di tayam-tayam. Om patahako’ nogiddi di Musa iri dot id tulun do Liwi, i maganu-anu dot id Kiim do TUHAN, do tumanud di pinonuhuan do TUHAN dot id dau. ⁴⁸ Om rikot noddi dot id di Musa i boyoon do soudor, i minomoyo’ di soudor dot Israil, ⁴⁹ do minongoi popoilo di Musa do poingkaa, ’’Tuan, nointob ngai’ no dahai i soudor dit id siriba’ do kuasa’ dahai, om aiso’ i’ o natagak. Hino ngai’ i’ iyolo’. ⁵⁰ Om baino’ nopodti om paatod no iyahai diti nangaanu dahai: Iti tamas, om saring, om lungkaki’, om pondulung, om simbong, om karo, do patahakon ngai’ dahai dot id TUHAN do pambayar dahai do ginawo dahai, om intirungan indo kasai’ iyahai’d TUHAN,’’ ka diyolo’. ⁵¹ Om romito’ ngai’ noddi di Musa om i Iliasar i tamas diri, i nowonsoi mantad no do maan do pongillumis. ⁵² Om iri nopo pinatahak di piro-piro boyoon do soudor diri nga’ osomok nod duwo nahatus o kilogram do kawagato’. ⁵³ Om onuo’ noddi di soudor dit okon ko’ boyoon i nangaanu do mantad id pisangod do maan do diyolo’. ⁵⁴ Om igitai ngai’ noddi di Musa om i Iliasar i tamas diri do hiri’d Kiim do TUHAN. Om ointirungan i’ do TUHAN i bansa’ dot Israil.

¹ Iri nopo payat di Rubin om i Gad nga’ sorogumuan tomod do tayam-tayam. Om kokito nopoddi diyolo’ dot osonong kopio i tana’ do hilo’d Yaisor om i tana’ do hilo’d Giliad do pomogompian do tayam-tayam, ² om ongoi noddi iyolo’ solowot di Musa, om i Iliasar, om i piro-piro boyoon do suwai dit id pogiolitan do tulun dot Israil, om boro-boros no iyolo’ do poingkaa, ³ - ⁴ ’’Iri nopo tana’ do hilo’d bandar dot Atarot, om Dibon, om Yaisor, om Nimra, om Hisbon, om Iliali, om Sibam, om Nibo, om Bion, i naanu no do tulun dot Israil, do tinulung do TUHAN do minanganu, nga’ ongoluhub kopio om osonong do pomogompian do tayam-tayam. Iyahai nopo om sorogumuan tomod do tayam-tayam, ⁵ om pokionuon no dahai do patahakon nu dahai o tana’dti do dahai’d songonuon. Om kada’ iyahai suhuo’ do mundaliu do kumaa do hilo’d soborong dilo Bawang do Yordan,’’ ka diyolo’. ⁶ Om boros kad Musa do suminimbar, ’’Nunu hoi? Mundorong kou no daa’ddi iyokoyu do hiti om inda’ ka di tongotobpinai dokoyu dot oiyo ko’ bansa’ dot Israil tu’ maso pod mongoi sangod. ⁷ Nokuro tu’ kasaap kopio kou do monompurolosi do tulun dot Israil do sumoborong dilo Bawang do Yordan do kumaa do hilo’d pomogunan di pinatahak mantad do TUHAN dot id diyolo’? ⁸ Om iyo no motindo i winonsoi di komolohingan dokoyu di gulu po, do tontok di sinuhu’ ku iyolo’ do mongoi hombo di pomogunan diri do mantad hilo’d Kadis Barnia. ⁹ Om pamanau no iyolo’ do gisom do nokorikot do hilo’d Rantai dot Iskol, om nokokito no iyolo’ di pomogunan diri. Nga’ tontok di guminuli’ iyolo’ om tompurolosio’ no diyolo’ i tulun dot Israil, gisom dot a’ noddi iyolo’ minongoi do hiri’d pomogunan di pinatahak mantad do TUHAN dot id diyolo’. ¹⁰ - ¹¹ Om tontok nod tadau’ddi do notogod tomod o TUHAN, boros ka dau, ’Iti nopo tulun diti om a’ noddi tumorodok dot id doho’. Om sumumpa’ oku no dot isai nopo o tulun dot Israil di nokorikot nod duwo nohopod o toun do tumur ko’ it otuo mantad ko’ iri do mantad di kinosoliwanan diyolo’ do mantad hilo’d Masir, om aiso’ no o kosuang do hilo’d pomogunan di nakabatos ku di Abraham om i Isak om i Yakub,’ ka dau. ¹² Om koontok ngai’ nopo i tulun dot Israil di sumpa’ diri, om i Kalib po i tanak di Yopuni, i tulun do Kinas diri, om i Yosua i tanak di Nun ot a’ noontok. Tu’ iyolo’ poo it otorodok dot id TUHAN. ¹³ Om otogod diri o TUHAN dot id tulun dot Israil, gisom do pinologos do TUHAN iyolo’ do mombo-hombo do hilo’d tana’ do kowotuan do solinaid dot apat nohopod o toun, om gisom do nangapatai ngai’ i tulun di suminaap do TUHAN. ¹⁴ Baino’ nodti om momonsoi kou po iyokoyu do miagal di winonsoi di komolohingan dokoyu. Kidusa kou no kopio, iyokoyu i sukodwagu. Tu’ ondung momonsoi kou do miagal diri om poporikot kou no kopio do kototogod do TUHAN dit a’ ogina-gina’ dot id tulun dot Israil! ¹⁵ Ondung a’ kou mumboyo’ do tisuhu’ do TUHAN do dinondo, om tongkiadan pondo do TUHAN dot alaid-laid o koinsanai do bansa’dti do hiti’d tana’ do kowotuan. Om iyokoyu no o kobungou do kapatayon diyolo’,’’ ka dau. ¹⁶ Om ongoi noddi i payat do Rubin om i payat do Gad solowot di Musa, om boro-boros nod poingkaa, ’’Potumboyoo’ po iyahai do momonsoi’d kandang di kitolig do poiyanan dahai di dumba’ dahai, om momonsoi do bandar dit ongkitolig o posorili’ do poiyanan dahai dilo tangaanak om sawo dahai. ¹⁷ Om opongo pondo dahai iri, om mongoi nogindo iyahai uhup di koobpinayan dahai dit iso-iso’ o bansa’ do sumaap di pisangod do gisom dot aanu diyolo’ i pomogunan diri om osiliu do diyolo’d songonuon. Om daamot nopondoddi om miyon nondo do hiri’d bandar do kitolig i tangaanak om sawo dahai do daamot dahai do mongoi sangod. Om ointirungan nondo iyolo’ do mantad id tulun di poingiyon mantad do hiti’d pomogunan diti di mongoi sangod. ¹⁸ Om a’ po iyahai gumuli’ do hiri’d walai dahai dot a’ po aanu di tulun dot Israil i pomogunan di nakatahak mantad do maan do diyolo’d songonuon. ¹⁹ Om a’ no iyahai manganu dot ongokooro’ piya do tana’ di hilo’d soborong do Bawang do Yordan, tu’ nakaanu no iyahai do dahai’d gontok do tana’ do hiti’d ponong id koulayon do mantad id Bawang do Yordan,’’ ka diyolo’. ²⁰ Om boros kad i Musa do suminimbar, ’’Ondung otopot no kopio ino pinoboros dokoyu, om hiti nod kinoiyonon do Koropohon do TUHAN do sumodia’ kou do mongoi sangod. ²¹ Om koinsanai dilo soudor dokoyu om mositi’ nod sumoborong dilo Bawang do Yordan do mongoi sangod dilo pisangod toko’. Om woyoon kou id TUHAN do gisom dot aala’ do TUHAN iyolo’, ²² om gisom dot osolod dokoyu i pomogunan diri. Om koino-ino kou nogindo do muli’, tu’ nowonsoi no dokoyu it apatut dokoyu’d wonsoyon dot id TUHAN, om id tongotobpinai dokoyu dit oiyo ko’ bansa’ dot Israil. Om kotumboyo’ nogindo o TUHAN do iyokoyu o kasanganu di tana’ di ponong id koulayon. ²³ Nga’ a’ nopo dokoyu owonsoi o miagal di nakabatos dokoyu, om sorohon no dokoyu do kowonsoi kou nod dusa dot id toguang do TUHAN. Nga’ kada’ kou no kopio pomonsoi’d dusa tu’ iri no moti’ dusa o kopomohukuman dokoyu. ²⁴ Om ongoi kou no popoingkakat do bandar om kandang do poiyanan di dumba’ dokoyu. Nga’ wonsoyon no kopio dokoyu i nangkabatos dokoyu!’’ ka dau. ²⁵ Om boro-boros noddi i payat do Gad om i payat do Rubin do poingkaa, ’’Oi Tuan, tonudon ngai’ i’ dahai o nunu nopo i ponuhuan do Tuan. ²⁶ Poundorongon ngai’ dahai o tangaanak om sawo om i dumba’ dahai do hiti’d bandar do Giliad. ²⁷ Nga’ iyahai nopo om sumodia’ i’ do mongoi sangod, om TUHAN i’ o momoyo’ dahai. Om sumoborong nondo iyahai di Bawang do Yordan do mongoi sangod do tumanud di pinoboros do Tuan,’’ ka diyolo’. ²⁸ Om poboroso’ noddi di Musa iti ponuhuan dot id di Iliasar om id di Yosua, om id koinsanai di boyoon dot Israil, ²⁹ ’’Ondung tumanud no kopio do ponuhuan i payat do Gad om i payat do Rubin do sumoborong do Bawang do Yordan, do mongoi uhup dokoyu do mongoi sangod, om kamanang kou no, om patahakon nopo diyolo’ i tana’ do Giliad do maan do diyolo’d songonuon. ³⁰ Nga’ a’ nopo iyolo’ moyo’ dokoyu do sumoborong do Bawang do Yordan do mongoi sangod, om mositi’ nod iri no i tana’ di diyolo’d bahagi’ ot aanu diyolo’ do miagal dokoyu tu’ kaanu do bahagi’d tana’ do hilo’d pomogunan do Kanaan,’’ ka. ³¹ Om boros ka di payat do Gad om i payat do Rubin do suminimbar, ’’Oi Tuan, wonsoyon ngai’ i’ dahai o nunu nopo i pinonuhuan do TUHAN dot id dahai. ³² Om sumoborong i’ iyahai do kumaa do hilo’d pomogunan do Kanaan do mongoi sangod do moyo’ do TUHAN i boyoon dahai. Om aanu i’ dahai iti tana’ do dahai’d songonuon do hiti’d ponong id koulayon do mantad id Bawang do Yordan,’’ ka diyolo’. ³³ Om patahako’ nod Musa dot id payat do Gad om id payat do Rubin om id songintanga’ do payat do Manasi o koinsanai di watas di Sihon i raja’ do tulun dot Amori, om i watas di Raja’ Og, i mantad id pomogunan do Basan, om kohompit nogi’ i kabandaran om i tana’ do hiri’d posorili’. ³⁴ Om wonsoyo’ no kawagu di payat di Gad i bandar do Dibon, Atarot, Aroir, ³⁵ Atarot Sapan, Yaisir, Yogbiha, ³⁶ Bait-Nimra, om Bait-Haran do winonsoi’d kabandaran di kitolig om pamansayan do kandang do dumba’. ³⁷ Om winonsoi kawagu di payat di Rubin i kabandaran do Hisbon, Iliali, Kiriataim, ³⁸ Nibo, Baal-Mion (ngaran nopo do bandar diti om nakawaliu no) om Sibam. Iri nopo bandar di winonsoi kawagu diyolo’ddi nga’ pinungaranan ngai’ diyolo’ do ngaran do wagu. ³⁹ Om ngoyo’ no di pinuruan do sompiiyon di Makir i tanak di Manasi, solodo’ i tana’ do Giliad, om iyon noddi iyolo’ do hiri. Om uyungo’ no diyolo’ i tulun dot Amori, i poingiyon do hiri’d bandar diri. ⁴⁰ Om patahako’ noddi di Musa dot id pinuruan do sompiiyon di Makir i tana’ do Giliad, om hiri noddi iyolo’ do minomogun-mogun. ⁴¹ Om i Yair no i mantad id payat do Manasi, om minanangod om minonolod do piro-piro o kampung, om pungaranai noddi dau i kokompungan diri do ’’Kokompungan do Yair’’. ⁴² Om i Noba no, om minongoi panangod om minonolod di bandar do Kinat om koinsanai di kokompungan do hiri. Om pungaranai noddi dau iri do Noba do pinasangai di ngaran dau.

¹ Tontok di nokotongkiad i tulun dot Israil do mantad hilo’d Masir, do minulud do minamanau do tumanud di payat diyolo’, do winoyo’ di Musa om i Harun, om minumbaya’ iyolo’ dot id piro-piro o kinoiyonon. ² Om tinulis ngai’ di Musa o ngaran do pointikid-tikid di kinoiyonon di pinomukiiman diyolo’, do tumanud di pinonuhuan do TUHAN. ³ Om di nopo suminoliwan o tulun dot Israil do mantad id Masir, do winoyo’ do TUHAN, om tontok di tadau’d kohopod om limo do tulan di koiso’, i sangadau nogi’ o kinotoliban do mantad di tadau do Paska di koinsan nogi’. Om tongkiad no iyolo’ di bandar do Ramisis, dot antang-antangan di tulun do Masir, ⁴ di maso do momolobong di tangaanak diyolo’ dit id gulu kosusu, i pinatai do TUHAN. Om iri no i kinapatayan di tangaanak diyolo’ddi do pinointalang do TUHAN dot iyau no ot okoris ko’ mantad di tongotingolig di tulun do Masir. ⁵ Om pamanau noddi i tulun dot Israil do mantad hilo’d Ramisis om pomukiim no iyolo’ do hilo’d Sukot. ⁶ Om mantad nod hilo’d Sukot om pomukiim no iyolo’ do hilo’d Itam, i hiri’d tisan do tana’ do kowotuan. ⁷ Om mantad nod hilo’, om poguliai no diyolo’ do hilo’d Pi-Hahirot, i ponong id koulayon do mantad id Baal Sipon, om pomukiim noddi iyolo’ do hilo’d somok do Migdol. ⁸ Om tongkiad noddi iyolo’ do mantad hilo’d Pi-Hahirot om soborong no iyolo’ di Rahat dot Aragang, om pamanau no do kuminaa do hiri’d tana’ do kowotuan dot Itam; om maha’ di tolu noddi o tadau diyolo’ do manau-panau om pomukiim no iyolo’ do hilo’d Mara. ⁹ Om mantad nod hilo’ om lombus no iyolo’ do hilo’d Ilim, om pomukiim no iyolo’d hilo’. Hilo’ nopod Ilim om haro o hopod om duwo o tudan do waig, om turu’ nohopod o guas do kurma. ¹⁰ Om pamanau no iyolo’ do tuminongkiad dot Ilim om pomukiim no iyolo’ do hiri’d somok do Suok do Suis. ¹¹ Om pomukiim no kawagu iyolo’ do hilo’d tana’ do kowotuan do Sin. ¹² Om koimbagu noddi om pomukiim no iyolo’ do hilo’d somok do Dopka, ¹³ om pakayaai no diyolo’ do hilo’d Alus. ¹⁴ Om pomukiim noddi iyolo’ do hilo’d Rapidim, nga’ aiso’ i’ o waig dot inumon do hiri. ¹⁵ - ³⁷ Om mantad no do hilo’d Rapidim om lombus no iyolo’ do kuminaa do hilo’d Nuluhon do Hor. Om iti no ngai’ o nokoiyonon diyolo’ do minomukiim: Hilo’d tana’ do kowotuan do Sinai, hilo’d Kibrot Taawa, ko’ ’’Kalabangan di Godoot’’, hilo’d Hasirot, hilo’d Ritma, hilo’d Rimon Piris, hilo’d Libna, hilo’d Risa, hilo’d Kihilata, hilo’d Nuluhon do Siapir, hilo’d Harada, hilo’d Makilot, hilo’d Tahat, hilo’d Tara, hilo’d Mitka, hilo’d Hasmona, hilo’d Mosirot, hilo’d Bini Yaakan, hilo’d Hor Gidgad, hilo’d Yodbata, hilo’d Abrona, hilo’d Ision-Gibir, hilo’d tana’ do kowotuan do Sin (i hilo’d Kadis) om hilo’d Nuluhon do Hor, it id wolit do tana’ dot Idom. ³⁸ - ³⁹ Om takad no i Harun, it Imam diri, do hilo’d Nuluhon do Hor, do tumanud di pinonuhuan do TUHAN. Om kapatai noddi i Harun do hilo’ do tontok di tadau do koiso’ do tulan di kolimo, di kaapat nohopod do toun do mantad di kinosoliwanan do tulun dot Israil do mantad hilo’d Masir. Tumur nopo di Harun do tontok di napatai iyau om hatus om duwo nohopod om tolu o toun. ⁴⁰ Om korongou noddi di raja’ do pomogunan dot Arad, i hilo’d tana’ do Nigib, i ponong id salatan do Kanaan, do mamanau no do kumaa’d hiri’d pomogunan diri i tulun dot Israil. ⁴¹ - ⁴⁹ Iti no ngai’ i kinoiyonon do pinawansayan di tulun dot Israil do kiim diyolo’ di mantad iyolo’ do hilo’d Nuluhon do Hor om gisom do nokorikot iyolo’ do hilo’d rantai do pomogunan do Muab, i hilo’d Salmuna, hilo’d Punon, hilo’d Obot, hilo’d kinaraagan dot Abarim, hilo’d watas do Muab, hilo’d Dibon Gad, hilo’d Almon Diblataim, hilo’d Nuluhon do Abarim, it id somok do Nuluhon do Nibo, om hilo’d rantai do Muab, it id somok di Bawang do Yordan, id hapak di bandar do Yorikou, it id pialatan do Bait-Yosimot, om Rantai dot Akasia. ⁵⁰ Hilo’ nod rantai do Muab, i hiri’d somok do Bawang do Yordan, it id hapak do bandar do Yorikou do nonuan do TUHAN i Musa do ⁵¹ piro-piro o ponuhuan diti do patahakon dot id tulun dot Israil, ’’Kosoborong kou nopondo di Bawang do Yordan do kumaa’d hilo’d pomogunan do Kanaan, ⁵² om mositi’ nod uyungon ngai’ dokoyu i tulun mantad do hilo’d pomogunan diri. Om raagon ngai’ no dokoyu o koinsanai di tingolig diyolo’ di watu ko’ tambaga’ do winonsoi, i tiiyonon diyolo’ do sumambayang. ⁵³ Om mositi’ no do solodon dokoyu i tana’ddi om miyon kou nod hiri, tu’ iri no o patahakon ku dokoyu. ⁵⁴ Om mositi’ nod pogiongkib-ongkibon dokoyu i tana’ddi dot id pogialatan do pointikid-tikid di payat om i pinuruan do sompiiyon do tulun dot Israil, dot undion o ralan do mangangkib. Iri nopo i pinuruan do sompiiyon dit asapou om agayo no o tana’ do poongkibon, om iri no i pinuruan do sompiiyon dit okuri’ om okoro’ no o tana’ do poongkibon dot id diyolo’ do maan do diyolo’d songonuon. ⁵⁵ Nga’ ondung a’ dokoyu uyungon i tulun mantad do hiri’d pomogunan diri, om iyolo’ no motindo i poundorong do hilo’ o monusa’ dokoyu, do miagal pod togis di nokoliwata’ dokoyu ko’ miagal do rugi di nokosulu do lapap dokoyu. Om saapon kou motindo diyolo’. ⁵⁶ Om ondung a’ dokoyu uyungon iyolo’, om iyokoyu motindo o raagon ku do pamaraag ku nopo om i natantu’ mantad ku do pamaraag ku diyolo’,’’ kad TUHAN.

¹ Om poboroso’ noddi do TUHAN dot id di Musa ² i ponuhuan do kumaa dot id tulun dot Israil do poingkaa, ’’Korikot kou nopondo do hilo’d Kanaan om wansayan no dokoyu’d wolit i tana’ddi do poingkaa: ³ Wolit nopo do ponong id salatan, om potilombus nopo do mantad hiri’d tana’ do kowotuan do Sin do poinsusui di wolit do pomogunan dot Idom. Wolit nod ponong id koulayon om poimpuunon do hilo’d tompok ponong id salatan di Rahat do Napatai. ⁴ Om pahamadon nondo do ponong id salatan do kumaa id Ralan dot Akrabim, om potilombus nopo do hilo’d Sin gisom do korikot do hilo’d Kadis Barnia, i ponong id salatan. Om mantad nondod hilo’ om pahamadon po do kumaa do ponong id kotonobon, do gisom do korikot do hilo’d Hasar-Adar, om potilombuson do hilo’d Asmon. ⁵ Om hilo’ no do pahamadon i wolit do kumaa’d hilo’d rantai do piwolitan do pomogunan do Masir, om koompok nondo do hilo’d Rahat do Tanga’. ⁶ Iri no i Rahat do Tanga’ o wolit di pomogunan dokoyu do ponong id kotonobon. ⁷ Wolit no do ponong id utara om poimpuunon di Rahat do Tanga’ do pokoyoon do hilo’d Nuluhon do Hor ⁸ om mantad nod hilo’ om pokoyoon do hilo’d ralan di roitan do Ralan do Hamat, om potilombuson do hilo’d Sidad ⁹ om hilo’d Sipron om koompok do hilo’d Hasar-Inan. ¹⁰ Wolit no do ponong id koulayon, om poimpuunon do hilo’d Hasar-Inan om gisom do korikot do hilo’d Sipam. ¹¹ Om mantad nod hilo’ om poruhukon do hilo’d Ribla, i ponong id koulayon do mantad id Ain, om potilombuson do hilo’d konulu-nuluan, it id tisan di Tasik Galilia do ponong id koulayon, ¹² om pokoyoon do ponong id salatan do posusuyon di Bawang do Yordan, om gisom do korikot do hilo’d Rahat do Napatai. Om iyo noddi it apat o wolit di pomogunan dokoyu,’’ ka dau. ¹³ Om boro-boros noddi i Musa di tulun dot Israil do poingkaa, ’’Iti no ngai’ o tana’ dot aanu dokoyu, dot undion o ralan dokoyu’d manganu, i tana’ dot ongkibon dot id pogialatan di siam om satanga’ o payat dot Israil, do tumanud di pinonuhuan do TUHAN. ¹⁴ - ¹⁵ Iri nopo payat do Rubin om Gad om i songintanga’ do payat do Manasi nga’ nakaanu no do diyolo’d gontok, om iri nopo tana’ diyolo’ddi om naangkib no dot id pogialatan di piro-piro o sompiiyon diyolo’. Tana’ nopo di naanu diyolo’ nga’ ponong id koulayon do mantad di Bawang do Yordan, it id hapak do Bandar do Yorikou i ponong id soborong,’’ ka dau. ¹⁶ Om boros kad TUHAN dot id di Musa, ¹⁷ ’’Iri nopo it apatut do mangangkib di tana’ om i Iliasar it Imam, om i Yosua, i tanak di Nun. ¹⁸ Om momili’ no do songulun o boyoon do mantad id pointikid-tikid do payat do monguhup diyo Iliasar om i Yosua do mangangkib di tana’,’’ ka dau. ¹⁹ - ²⁸ Om iti ngai’ no o ngaran di tulun di nopili’ do TUHAN. Payat, Boyoon: Yohuda, I Kalib i tanak di Yopuni; Simion, I Samuil i tanak di Amihud; Binyamin, I Ilidad i tanak di Kislon; Dan, I Buki i tanak di Yogli; Manasi, I Haniol i tanak di Ipod; Ipraim, I Komuil i tanak di Siptan; Sibulon, I Ilisapan i tanak di Parna; Isakar, I Paltiol i tanak di Asan; Asor, I Ahihud i tanak di Silomi; Naptali, I Pidail i tanak di Amihud. ²⁹ Iri ngai’ no o tulun di sinuhu’d TUHAN do mangangkib di tana’ di hilo’d Kanaan do patahakon dot id tulun dot Israil.

¹ Tontok di hilo’d rantai do Muab, i hilo’d somok do Bawang do Yordan, it id hapak do bandar do Yorikou, om boro-boros no o TUHAN dot id di Musa do poingkaa, ² ’’Sunudan ngai’ no o tulun dot Israil do mantad nopo di tana’ do naanu diyolo’ddi om mositi’ no do patahakon diyolo’ dot id tulun do Liwi om kopomogun-mogun i’ do hilo’ i tulun do Liwi. ³ Om asanganu nondo diyolo’ i kabandaran diri do pomogun-mogunan diyolo’. Om iri no i tana’ di kobuturan do hiri’d posorili’ di kabandaran om poiyanan di sapi’ om i tayam-tayam diyolo’d suwai. ⁴ Kogoyoo’ nopo di kobuturan diri om apat nahatus om limo nohopod o mito do sukaton do mantad id tolig di bandar do pabasagi’. ⁵ Iri nopondo tana’ do kinoiyonon di tulun do Liwi om apasagi’. Sopisiam nahatus o mito do konoruo’ om kalaabo’. Om iri nopondo i bandar om hiri’d tanga’ di kinoiyonon diyolo’. ⁶ Om onuan nogi’ dokoyu i tulun do Liwi dot onom o bandar di maan do pogintirungan do tulun di kapamatai do tulun do suwai dit a’ tomodon do mamatai, om hiri nondo o tongoyon diyolo’ intirungo’. Om suwai no ko’ iri om onuan po dokoyu iyolo’ dot apat nohopod om duwo o bandar ⁷ do mitonggoi di kobuturan. Om oinsanan nopondo om apat nohopod om walu’ o bandar dot aanu di tulun do Liwi. ⁸ Kogumuo’ nopo do bandar do tulun do Liwi dot id suang do watas do pointikid-tikid dot iso’ o payat dot Israil om mositi’ nod tontuon do tumanud do kogoyo-goyoo’ di watas,’’ ka dau. ⁹ Om suhuo’ nod TUHAN i Musa ¹⁰ do popolombus dot id tulun dot Israil diti boros do poingkaa, ’’Kosoborong kou nopondo di Bawang do Yordan do kumaa do hilo’d pomogunan do Kanaan, ¹¹ om momili’ kou nod piro-piro o bandar do maan do pogintirungan dot isai nopo o tulun di kapamatai do tulun dot a’ tomodon do mamatai, om hiri nondo o ngoyon di tulun diri. ¹² Om hiri nod bandar diri dot aiso’ o ligogon di tulun diri do mantad id koobpinayan di tulun di napatai dau’ddi, i kosorou daa do momolokop. Tu’ isai nopo it atandasan do mamatai’d tulun, om a’ i’ milo do hukuman do kapatayon dot a’ po oilaan kopio dot id bisara’. ¹³ Om momili’ kou no dot onom o bandar: ¹⁴ tolu o hilo’d ponong id koulayon do mantad id Bawang do Yordan om tolu o hilo’d tana’ do Kanaan. ¹⁵ Om iri nopo piro-piro o bandar diri om silihon do bandar do pogintirungan do tulun dot Israil, om i tulun do bansa’d suwai di poirolot dokoyu di koumbaya’ no toomod ko’ i poingiyon do hiri. Om isai nopo o tulun do kapamatai do tulun dit okon ko’ tomodon do mamatai, om hiri nod bandar diri o poggiduon. ¹⁶ - ¹⁸ Nga’ ondung haro o tulun do kapamatai do sompi’ ko’ tulun do basi’ ko’ watu ko’ kayu o pinakai dau do minamatai di tulun, om kasala’ no iyau. Om mositi’ no do hukuman do kapatayon. ¹⁹ Om mositi’ no dot i koobpinayan dit osomok po di tulun di napatai o mamatai do tulun diri. Ondung osolowot dau i tulun diri om mositi’ no do patayon dau. ²⁰ Ondung haro o tulun dot otogod do tulun do suwai, om patayon nondo dau iyau do maan potungubo’ ko’ dumpahon po dau, ²¹ ko’ tumbukan po dau i tulun, om kasala’ no i tulun di minamatai’ddi. Om mositi’ no do hukuman do kapatayon. Om mositi’ no dot i koobpinayan dit osomok po di tulun di napatai o mamatai di tulun di minamatai’ddi. Ondung osolowot dau i tulun diri om mositi’ no do patayon dau. ²² Nga’ iri nopo tulun di kapamatai do tulun dit aiso’ i’ o katagad-tagadan dau, do nokotungub tuu ko’ nodumpau po dau do watu o nakapatai di tulun diri, nga’ a’ i’ daa dau tinomod do mamatai. ²³ Ko’ ondung haro o songulun do pinaparatu’ do watu om haro’ddi o tulun do nootungan di watu om napatai’ddi, nga’ okon i’ ko’ haro ot osorou dau do mamatai ko’ okon ko’ pisangod dau i tulun diri. ²⁴ Hal nopo do miagal diri, om mositi’ nod obian di tulun dot ogumu’ i tulun di nakapatai’ddi, om okon i’ ko’ i tobpinai di tulun di napatai ot obian. ²⁵ - ²⁸ Mositi’ nod intirungan di tulun dot ogumu’ i tulun di nakapamatai’ddi do mantad id kototogod di koobpinayan di tulun di napatai. Om angatan nondo iyau do gumuli’ do hiri’d bandar di pogintirungan, i pinogiduwon dau di gulu. Om mundorong nopo iyau do hiri do gisom dot apatai i Boyoon dot Agayo dot Imam do maso’ddi. Om katalib pondo iri om koino-ino nogindo iyau do muli’. Ondung tumongkiad iyau do mantad hiri’d bandar di pogintirungan, i pinogiduwon dau’ddi, om osolowot nondo iyau di koobpinayan di tulun di napatai om patayon nondo iyau, om iyo nopoddi om a’ i’ komoyon do minamatai. ²⁹ Iti nopo toturan diti om mositi’ nod tonudon dokoyu om i sinakagon dokoyu do hinonggo kou nopo do poingiyon. ³⁰ Ondung haro o tulun do tondoson do minamatai do tulun do suwai, om milo nopo kopio do poboroson do nakasala’ ko’ hukuman do kapatayon do kointalang kopio i winonsoi dau do poboroson do duwo ko’ lobi ko’ iri o tulun do sasi’. Nga’ iso-iso’ nopo o tulun do sasi’ om a’ i’ ogirot do popotopot di pinonondos diri. ³¹ Tulun nopo di minamatai do tulun om mositi’ nod hukuman do kapatayon. Om a’ i’ dau milo do bayaran do tusin i hukuman do nokoontok dau’ddi. ³² Ondung haro o tulun do mogidu’ do kumaa dot id honggo nopo di bandar do pogintirungan, om kada’ no dokoyu potumboyoo’ i tulun diri do mambayar do tusin do koulian dau dot id walai dau dot a’ po apatai i Boyoon dot Agayo dot Imam. ³³ Ondung poulion dokoyu iyau om ososomu’ no dokoyu i pomogunan dit iyonon dokoyu. Om aiso’ no o ralan do suwai do momolidang di pomogunan diri, suwai nondo ko’ patayon i tulun di minamatai. ³⁴ Kada’ no kopio dokoyu sosomuo’ o pomogunan di koiyonon dokoyu tu’ iyoho’ no o TUHAN, om poundorong oku do hiti’d pogiolitan do tulun dot Israil,’’ kad TUHAN.

¹ Om ongoi no solowot di Musa om i piro-piro boyoon do suwai i komolohingan do sompiiyon dit id suang do pinuruan do sompiiyon di Giliad. I Giliad nopo om tanak di Makir, i manangaki di Manasi. I Manasi nopo om tanak di Yusup. ² Om boros ka diyolo’, ’’Sinuhu’ kou’d TUHAN do mangangkib di tana’ dot id pogiolitan diti tulun dot Israil dot undion o ralan do mangangkib. Om sinuhu’ kou nogi’ dau do manahak do tana’ do potungkusan di Silapihad i tobpinai dahai’ddi, dot id tangaanak dau di tongoondu’. ³ Nga’ apatut id sorohon dot ondung akawin iyolo’ do tongokusai di mantad id payat do suwai, om i tana’ nga’ aanu no di tulun do mantad id payat do suwai’ddi. Om oingkarayan nondo i tana’ di pinaangkib do maan do dahai. ⁴ Om tontok piya di Toun do Kopogulian, i maso do kopogulian ngai’ do nunu nopo o dapu’ di nadagang dot id sanganu mantad di dapu’, nga’ iri nopo tana’ di tangaanak di Silapihad do tongoondu’, om asanganu kasai’ no di payat do sawo diyolo’, om okon nondo ko’ payat dahai o kasanganu di tana’,’’ ka diyolo’. ⁵ Om poboroso’ nod Musa dot id tulun dot Israil iti boros do mantad id TUHAN do poingkaa, ’’Otopot i’ i pinoboros di tulun do mantad id payat di Yusup, ⁶ om iri no o kapabarasan do TUHAN dot aiso’ i’ o kokogos di tangaanak di Silapihad do tongoondu’ do mokikawin dot isai nopo i korohian diyolo’, nga’ mositi’ no ma do tulun dit id suang do payat diyolo’. ⁷ Iri nopo tana’ dot otungkusan do pointikid-tikid do tulun dot Israil om asanganu kasai’ no di payat dau do gisom dot alaid. ⁸ Om pointikid-tikid do tongoondu’ di kaanu do tungkusan do tana’ dot id pogiolitan do payat do hiti’d Israil, om mositi’ nod mokikawin do tulun dit id suang do payat dau. Om kotungkus indo o koinsanai di tulun dot Israil di tana’ do komolohingan diyolo’, ⁹ om a’ i’ kopingwaliu dot id payat do suwai o sanganu di tana’. Om pointikid-tikid do payat nga’ kasanganu kasai’ no di tana’ do notungkusan diyolo’ do gisom dot alaid,’’ ka dau. ¹⁰ - ¹¹ Om pokikawin ngai’ noddi i limo o tanak di Silapihad do tondu’: i Mala, i Tirsa, i Hogla, i Milka, om i Noa di koobpinayan diyolo’ di pinsan koinsan nogi’, do tumanud di pinonuhuan do TUHAN dot id di Musa. ¹² Minokikawin iyolo’ di tulun do mantad id pinuruan do sompiiyon dit id suang do payat di Manasi i tanak di Yusup diri. Om asanganu kasai’ iddi di payat do tapa’ diyolo’ i tana’ do notungkusan diyolo’. ¹³ Om iri no ngai’ o pongoturan om ponuhuan do pinatahak do TUHAN dot id bansa’ dot Israil do pinolombus di Musa, do tontok di hilo’d rantai do Muab i tulun dot Israil, i hilo’d toning do Bawang do Yordan, it id hapak do bandar do Yorikou.