NAHUM

NAHUM

¹ Iti no o boros do Kinorohingan do pasal do Niniwi. Iti nopo om monusui do pasal di pinointalang di nokito di Nabi Nahum, i mantad hilo’d Ilkos. ² Mada’ o Kinorohingan do haro o mongoi iyo-iyo dau; om hukuman dau i tulun di sumaap dau. Sulian dau iyolo’ di kowoyo-woyoon diyolo’ tu’ atatagadan no kopio iyau. ³ A’ i’ obintogod o TUHAN, om kisinundu iyau om a’ i’ dau pologoson dot a’ ohukuman i tulun do kisala’. Honggo nopo o koulokon do TUHAN, om mimbulai no o tongus dot opuhod do hiri; ilo’ nopo haun om lisohu i’ toomod dot oulakan dau! ⁴ Barasan nopo dau ilo rahat, om rumasak nopo! Om rasakon ngai’ dau i bawang. Rumiou nopo i sakot do Basan, om sumilou o kokoyuan do Nuluhon do Karmol, om lumotu’ o tusak do kobungaan do Libanon. ⁵ Gumuyu’ nopo o konuluhanan do karapou o TUHAN; lumanak ngai’ nopo o nulu-nulu dot id toguang dau. Gumuyu’ nopo iti tana’ do mintalang o TUHAN; om gagaran iti pomogunan om koinsanai’d tulun do hiti. ⁶ Isai po daa o kasaap ondung tumogod o TUHAN? Isai po daa o koidu’ do mantad id kototogod dau? Urobuson nopo dau i kototogod dau dit a’ ogina-gina’; om omumuk nopo o tontolob dot id toguang dau. ⁷ Osonong i’ o TUHAN; om uhupan i’ dau i tulun dau do tontok do haro o kosusaan diyolo’; om gompion i’ dau i tulun do rumikot do mongoi pokiintirung dau. ⁸ Miagal po iyau di luyud dit opuhod do mamaraag do koinsanai di pisangod dau; patayon ngai’ nopo dau i sumaap dau. ⁹ Nunu daa o kopongupakatan dokoyu dot araat do sumaap do TUHAN? Atantu’ nod patayon kou i’ dau. Tu’ aiso’ i’ o tulun do milo do monginduwo do sumaap di pisangod dau suwai ko’ insan noo. ¹⁰ Om miagal kou pondo do bulungkut do rugi om i rahami di nokoring, tu’ tutudan kou nondo! ¹¹ Haro o songulun do mantad hilo’d Niniwi, di poimponu’ pod pomusarahan dot araat, i minongupakat do sumaap do TUHAN. ¹² Om poingkaa no o poboroson do TUHAN dot id Israil i tulun dau, ’’Mulong po dot okoris om ogumu’ i tulun dot Asur, nga’ araag i’ iyolo’ om opunso. Ninggorit ku iyokoyu, oi tulun ku, nga’ a’ ku nondo wonsoyon kawagu o miagal diri. ¹³ Pupusan ku nondo o kuasa’ dot Asur di momorinta’ dokoyu om pututon ku i rantai di pinongogos diyolo’ dokoyu,’’ ka dau. ¹⁴ Iti no o pinatantu’ do TUHAN dot osiliu dot id bansa’ dot Asur, ’’Aiso’ nondo o sinakagon diyolo’ do popotilombus do ngaran di bansa’ diyolo’. Raagon ngai’ ku nondo i tingolig di hiri’d walai di tingolig diyolo’. Posodia’ oku nod lobong do pamalabangan do bansa’ dot Asur tu’ a’ no iyolo’ osorupai do poimpasi!’’ ka dau. ¹⁵ Antangai pogi’, nga’ kumulapai nod nuluhon o songulun do mongoit do habar dot osonong! Hilo’ no iyau’d tanga’d ralan do mongoi popolombus di kinamanangan! Oi tulun do Yohuda, ramayo’ no dokoyu i tadau’d agayo dokoyu om patahako’ no dokoyu dot id Kinorohingan i pinabatos dokoyu dot id dau. Tu’ a’ nondo i tulun dot araat mongoi ponolod do pomogunan dokoyu. Tu’ nopunso no iyolo’!

¹ Oi Niniwi, songodon ko no moti’! Nokorikot no i momoromumuk diya’. Tamangai no i kuta’ di pogintirungan! Tamangai no i karalan-ralanan! Sodia’ nod mongoi sangod! ² (Oruhai nod TUHAN do tondulion i kagayaan dot Israil, do miagal dit a’ po iyau napanakahan di pisangod dau.) ³ Ongkiinigit i soudor do kolid dot aragang om ongkirasuk dot aragang. Sumodia’ no iyolo’ do mongoi sangod! Malab-kalab po i korita’-kuda’ diyolo’ do miagal do tapui! Minsimbul po i kuda’ diyolo’! ⁴ Santalib-talib po do hilo’d karalan-ralanan i korita’-kuda’ dot ongosiau tomod, om a’ no oila-ilaan o kokoyoon diyolo’ do minghombo do hiri’d titimungon do tulun do hiri’d suang di bandar. Mingkalab po iyolo’ do miagal do tata’ di kiapui, om osiau iyolo’ do miagal pod kodumaat. ⁵ Nolohou nod mamanau i boyoon do soudor, om angkasadu po iyolo’ do mamanau do mongoi sangod. Arau-arau nopo i sumasangod do minongoi do hiri’d tolig di bandar, om nokosodia’ no i pakakas do pomohuyas. ⁶ Miwang ngai’ nopo i wawayaan dot id toning di bawang; om poimponu’ pod kopoddosian o hiri’d walai do raja’. ⁷ Natangkap i raja’d tondu’; mingihad po i susuhuon dau do tongoondu’ do miagal pod punai, om sonduntung-duntung po iyolo’d kangkab dot atatangaban. ⁸ Miagal pod waig dit okohus do mantad id tolig di nohusu i tulun do murabus do mantad hilo’d Niniwi! Om haro o minggiak dot ’’Undorong! Undorong!’’ ka — nga’ aiso’ no tiso’ diyolo’ do gumuli’. ⁹ Ngoyo’ panakaho’ i pirok! Ngoyo’ panakaho’ i tamas! Noponu’ pod dapu’ di kigatang i bandar diri! ¹⁰ Naraag no o Niniwi, om notongkiadan no, om oingou poddi! Lumuhoi ngai’ no o ginawo dot opopoddosian; gagaran ngai’ po o totud diyolo’, om ongoluhoi no; ongoposi’ po ngai’ o rabas diyolo’ dot ongooris. ¹¹ Honggo noddi i bandar di miagal do luang do singa di gulu po, i kinoiyonon do paakanan di tangaanak do singa, i kinoiyonon do pogintirungan di singa do tondu’ om i singa do tontoluhan, om i tangaanak do singa? ¹² Tinabpaan di singa i nintorusan do hilo’ om pogitobilang-bilango’ nopo do patahakon di singa di tondu’ om i tangaanak dau; noponu’ pod tonsi do nintorusan i luang dau. ¹³ ’’Iyoho’ no o pisangod nu!’’ kad TUHAN it Osundu Kopio. ’’Tutudan ku nondo i korita’-kuda’ nu. Om angapatai nondo dot id pisangadan i soudor nu, om ngoyon ngai’ ku nopondo i nangaanu nu do mantad id tulun do suwai. Om a’ nondo arangahan do hiti’d pomogunan o kogoyoo’ do kuasa’ nu,’’ ka dau.

¹ Nobungou no o bandar diti di noponu’ do tudut om gampamatai, i poimponu’ do dapu’ do ngoyon panakaho’ om it ongoyon ahawo’. ² Pokinongoho’ no i kopit do pipikot, om i kudarak do ruda’, om i tulok do kuda’, om i ngarak do korita’-kuda’! ³ Sumaap i soudor di poinsakai’d kuda’, kumalab o gayang, om kumilap o tandus! Asawat no o kinotimungon do rata’, om a’ no ointob-intob i tulun di nangapatai, om kototohubon pori do tulun! ⁴ Nohukuman no o Niniwi i sundal diri. Olumis no daa kopio iyau om noponu’ do kolulundus di kapatai, linimu’ dau i piro-piro o bansa’ om siniliu dau iyolo’ do turipon. ⁵ Om boros kad TUHAN, it Osundu Kopio, ’’Hukuman tiya’ no, oi Niniwi! Labasan tiya’ om pokitonon ku diya’ i piro-piro o bansa’ddi, om ointingayam ko i’ dot id toguang diyolo’. ⁶ Indaraaton ku nondo iya’, om paagalon ku pondo iya’ do rinomos di sosomu’. Om songinsonsod pondo o tulun diya’ om ongooris ngai’ nopo iyolo’. ⁷ Minsodu’ ngai’ nopo it ongkokito diya’. Mimboros nondo iyolo’ dot, ’Pogun pondo o Niniwi! Isai po daa ot osianan dau? Isai po daa o monginsasamod dau?’ ka no diyolo’,’’ ka dau. ⁸ Oi Niniwi, osonong ko toi iya’ ko’ Tibi, i bandar dot agayo do Masir? Tibi nogi’ nga’ haro i’ o bawang do mongintirung dau do miagal do tolig — iri no i Bawang do Nil o mongintirung dau. ⁹ Pinorinta’ do Tibi o Etiopia om Masir, aiso’ no o kogisomon do kuasa’ dau, om sumokodung dau o Libia. ¹⁰ Nga’ iyo piya’ddi nga’ natanggayan i’ dot id pomogunan do pisangod i tulun do hilo’d Tibi. Honggo nopo i pogitongkiad-kiadan do ralan om hiri no i tangaanak diyolo’d pinimbabagan do gisom do napatai. Om i tulun diyolo’ dit ongkipangkat nga’ kinagasan ngai’ do rantai om pinogibahagi-hagi iyolo’ di tulun di minanangkap diyolo’ do minononggoi. ¹¹ Oi Niniwi, iya’ nga’ ahadan indo dot oowukan! Iya’ nogi’ nga’ mumbal indo daa do mogidu’ do mantad id pisangod nu. ¹² Iri ngai’ nopo i kuta’ do pogintirungan nu om miagal pod guas dot ara di nongoonsok no o tua’, tu’ guyuon nopo i guas dot ara diri om misuang nopo i tua’ dot id kabang di tulun di momoguyu’! ¹³ Miagal pod tongoondu’ koluhoi i soudor nu, om aiso’ no o pokukurayan di pomogunan nu do sumaap do pisangod. Om osorob nondod tapui i salampad di totobon nu. ¹⁴ Ongoi no panganu’d waig do maan do tinumon do solinaid do turungkuon ko di pisangod. Pogiroto’ no i kuta’ do pogintirungan nu! Pingulakan no i lagit do wonsoyon do bata’, om posodiawon no i bata’ do maan do tantob! ¹⁵ Om poingkuro piya daa o wonsoyon dokoyu nga’ apatai kasai’ kou no do sorobon ko’ apatai po dot id pisangadan. Aayi’ kou nopondo kopio do miagal po di totonomon do naayi’ di katat do mangakan. Miagal kou po daa do katat do guminumu’ di gulu po! ¹⁶ Ogumu’ po ko’ ilo rombituon do hilo’d tawan o dumadagang do hilo’! Nga’ a’ noddi iyolo’ hino do baino’ do miagal di katat do poungkalad do talad om tumulud nod mogidu’. ¹⁷ Iri nopo pagawai nu om miagal pod sinompuruan do katat di songinsako do mongoi intirung di tolig do tontok di maso’d osogit. Nga’ otitihan pondo di tadau om tumulud no iyolo’, om aiso’ no o koilo do pinakayaan diyolo’! ¹⁸ Oi raja’ dot agayo do pomogunan dot Asur, nangapatai no i piro-piro gobunor nu om koodop no do gisom dot alaid i wakil di gobunor nu! Nongkotompias no do hilo’d nuluhon i rayat nu, om aiso’ no o songulun piya do milo do popouli’ kawagu diyolo’. ¹⁹ Aiso’ no o pongubat dino toruol nu, om a’ no milo do lingoson ino suhat nu. Santapap-tapap pod palad i tulun di korongou do habar do kinaraagan nu, tu’ atataadan iyolo’. Haro po toi o tongoiso’d tulun do nokoidu’ do mantad id kororongit dokoyu dit a’ opupus-pupusan?