MARKUS

MARKUS

¹ Iti no o Habar dot Osonong do pasal di Yesus Kristus, i Tanak do Kinorohingan. ² Iti nopo Habar dot Osonong diti om mimpuun do miagal di tinulis di Nabi Yosaya do poingkaa, ’’ ’Iti no o susuhuon ku,’ kad Kinorohingan. ’Suhuon ku iyau do mogulu diya’, om kopomonsoi i’ iyau’d ralan do wayaan nu,’ ka. ³ Haro o tulun do mimboros dot opuhod do hilo’d tana’ do kowotuan do poingkaa, ’Rontisan no o ralan do Tuhan; Potingon no o ralan do wayaan dau,’ ka,’’ ka di Yosaya. ⁴ Om korikot noddi i Yohanis do mantad hilo’d tana’ do kowotuan do miagal di notulis mantad diri; om minamatis iyau’d tulun om pinopopinsusui iyau di habar do mantad id Kinorohingan. Boros ka dau, ’’Korologo kou no do momonsoi’d dusa om mokibatis kou no, om oompunan kou id Kinorohingan,’’ ka. ⁵ Om ongoi ngai’ nopoddi pokinongou di Yohanis i tulun do mantad hilo’d pomogunan do Yudia om mantad hilo’d Yorusalim. Om okuno’ no diyolo’ i dusa diyolo’. Om botisai noddi di Yohanis iyolo’ do hiri’d Bawang do Yordan. ⁶ Om pakayan nopo di Yohanis om hulu’d unta do winonsoi, om tagkos no dau om kulit do nintorusan do winonsoi, om taakanon nopo dau om godu om paha’ do mantad hiri’d gouton. ⁷ Om popinsusuyo’ no di Yohanis o habar do poingkaa, ’’Haro nondo o tulun do sumusuhut doho’; it agayo o kuasa’ ko’ iyoho’. Tu’ tali piya’d kasut dau nga’ a’ oku i’ osorupai do mongiad. ⁸ Iyoho’ nopo om waig no o pamatis ku dokoyu, nga’ iyau nopo om Rusod do Kinorohingan o pamatis dau dokoyu,’’ ka. ⁹ Om tontok iddi do nokorikot i Yesus do mantad hilo’d bandar do Nasarit, it id watas do Galilia. Om botisai no di Yohanis i Yesus do hilo’d Bawang do Yordan. ¹⁰ Om kotindal poddi i Yesus do mantad hiri’d bawang diri, om kokito no dau do haro o noukab do hilo’d tawan, om lintuhun noddi dot id dau i Rusod do Kinorohingan do miagal do punai o kowoyo-woyoo’ do suminondot dot id dau. ¹¹ Om korongou noddi dau o Kinorohingan do minoro-boros do poingkaa, ’’Iya’ no i Tanak ku di kosianan kopio ku. Om iya’ no o kohubayaan kopio do ginawo ku,’’ ka. ¹² Om katalib poddi iri, om tilombuso’ nopo di Rusod do Kinorohingan do minonuhu’ i Yesus do mongoi do hilo’d tana’ do kowotuan. ¹³ Om apat diri nohopod o tadau do koloidon dau do poundorong do hiri’d tana’ do kowotuan. Om hilo’ no iyau do pinogumbalan do Rogon. Om haro nogi’ o nintorusan dit ongorongit do hiri. Nga’ rikot no o piro-piro o moloikat do minongoi ponguhup di Yesus. ¹⁴ Tontok di nokogiil no i Yohanis, om pakayaai no di Yesus do hilo’d pomogunan do Galilia do mongoi popinsusui do Habar dot Osonong do mantad id Kinorohingan. ¹⁵ Boros ka dau, ’’Norikot no i maso. Oruhai nod korikot i Pomorintaan do Kinorohingan! Rologo kou no do momonsoi’d dusa, om kotumbayaai kou no di Habar dot Osonong do mantad id Kinorohingan,’’ ka. ¹⁶ Om tontok di manau-panau i Yesus do hiri’d tisan di Tasik Galilia, om kokito no dau o duwo o tulun do monginginsada’, iyolo’ nopoddi nga’ i Simun om i Andarias, i Andarias nopo om tadi’ di Simun. Om tontok nopoddi om maso diyolo’ do minrambot do hiri’d tasik. ¹⁷ Om boros ka di Yesus dot id diyolo’, ’’Tanud kou pogi’ doho’. Om tudukan ku i’ iyokoyu do mamarambot do tulun,’’ ka dau. ¹⁸ Om olomus nopoddi iyolo’ do tuminongkiad di rambot diyolo’ om tanud no di Yesus. ¹⁹ Om lombus po kawagu i Yesus do minamanau, om kokito po dau o duwo o tulun do miobpinai. Iyolo’ nopoddi nga’ i Yakub om i Yohanis, i tangaanak di Sabidi. Om maso diyolo’ do mongulud di rambot diyolo’ do hiri’d suang di parau’. ²⁰ Om iyolo’ nogi’ nga’ tilombusai nopo di Yesus do minomolohou. Om tongkiadai noddi diyolo’ i tapa’ diyolo’ om i susuhuon diyolo’ do hiri’d poinsakai di parau’. Om ongoi no iyolo’ tanud di Yesus. ²¹ Om korikot no i Yesus om i piro-piro o tumatanud dau do hilo’d bandar do Kapornaum. Om korikot poddi i tadau’d Sabat do minggu’ddi om ongoi no i Yesus do hiri’d walai’d sasambayangan, om timpuun no do minonuduk. ²² Om ongosuayan nopoddi i tulun do nokorongou di kowoyo-woyoo’ dau do monuduk. Tu’ kikuasa’ kopio iyau do monuduk. Om a’ i’ miagal di guru do Tourat. ²³ Nga’ maso nopoddi om haro o songulun do norusadan do rusod dot araat do suminuang do hiri’d walai’d sasambayangan, om pamagarang no iyau do poingkaa, ²⁴ ’’Oi Yesus i tulun do Nasarit, kukuroyon nu iyahai’dti? Momohukum toi dahai o kinorikatan nu’d hiti? Koilo oku i’ ondung isai ko: Dot iya’ no i susuhuon dit olidang do mantad id Kinorohingan,’’ ka dau. ²⁵ Om oduhai noddi di Yesus i rusod diri. Boros ka dau, ’’Tingkod! Soliwan no do mantad id tulun diti,’’ ka. ²⁶ Om popinggogoro’ tomod noddi di rusod dot araat i tulun diri mikuwo’d mininggiak dot opuhod, om soliwan nogiddi do mantad id tulun diri. ²⁷ Om ongosuayan tomod diri i tulun, om mogiuhot-uhot po iyolo’ do poingkaa, ’’Atuk, nunu kopio’ti? Ponudukan tuu iti’d wagu? Tu’ kisinundu iyau om kikuasa’ kopio do monuhu’ do rusod dot araat do sumoliwan, gisom do mihuboyo-boyo’ nopo dau,’’ ka diyolo’. ²⁸ Om oruhai’ddi kopio do nokotongkop o habar do pasal di Yesus do hiri’d pointongkop do watas do Galilia. ²⁹ Om soliwan noddi i Yesus om i piro-piro o tumatanud dau do mantad hiri’d walai’d sasambayangan diri. Om ongoi no iyolo’ salakoi do hiri’d walai di Simun om i Andarias. Om i Yakub, om i Yohanis nga’ tuminanud nogi’ diyolo’ do minongoi’d hiri. ³⁰ Nga’ maso nopoddi om poillii do hiri’d toodopon dau i tiwanon di Simun do tondu’ do sogiton tomod. Om sunudai noddi i Yesus do pasal diri, di kasasalakoi dau om i piro-piro o tumatanud dau do hiri’d walai’ddi. ³¹ Om ongoi noddi i Yesus insomok di tiwanon di Simun do tondu’, om igitai no dau o longon di tondu’ddi om potungago’ noddi dau iyau. Om kotingkod noddi i sogiton di tiwanon di Simun diri. Om pongobi-obi’ noddi iyau diyolo’. ³² Om sosodopon noddi di notonob o tadau, om haro’ddi o piro-piro o tulun do pinapaatod dot id di Yesus do koinsanai’d tulun di kitoruol om i nongorusadan do rusod dot araat. ³³ Om koinsanai nopoddi i tulun do hiri’d bandar diri do tuminimung do hiri’d ponong id wawayaan di walai’ddi. ³⁴ Om ogumu’ddi o tulun do liningasan di Yesus do mantad id mogisuayan o toruol. Om minonunsub nogi’ iyau dot ogumu’ o rusod dot araat. Om a’ no di Yesus pinologos do mimboros i rusod dot araat diri, tu’ koilo i’ iyolo’ ondung isai kopio i Yesus. ³⁵ Om otuong-tuong po di sinuabon kawagu, om tungag no i Yesus om tongkiad no iyau di walai, om ongoi no iyau do hiri’d kinoiyonon dit oingou do hiri’d soliwan di bandar, om sambayang no iyau’d hiri. ³⁶ Nga’ ongoyo’ noddi di Simun om i piro-piro o tambalut di Simun ihumo’ iyau. ³⁷ Om kabantalai no diyolo’ i Yesus, om boro-boros no iyolo’ dau do poingkaa, ’’Mogihum ngai’ nopo diya’ i tulun, oi Guru,’’ ka diyolo’. ³⁸ Nga’ boros ka di Yesus do suminimbar, ’’Mositi’ no do lumombus toko’ do mamanau do mongoi’d hilo’d kabandaran do suwai di posorili’d hiti. Om mositi’ no do koponuduk oku’d hilo’, tu’ iri no o kinorikatan ku’d hiti,’’ ka dau. ³⁹ Om iri no o kinaangayan di Yesus do pointongkop do pomogunan do Galilia, om monuduk do hiri’d piro-piro o walai’d sasambayangan. Om minonunsub nogi’ iyau do rusod dot araat. ⁴⁰ Rikot noddi dot id di Yesus o songulun di kitoruol do kusta. Om otud no i tulun diri dot id toguang di Yesus mikuwo’d minoro-boros do poingkaa, ’’Oi Tuan, ondung orohian ko om milo ko i’ do momolingos doho’,’’ ka dau. ⁴¹ Om kosianai noddi kopio i Yesus di tulun diri. Om kamao’ noddi dau iyau om boro-boros nod, ’’Orohian oku i’. Olingasan ko i’,’’ ka dau. ⁴² Om diiri i’ om diiri do natanus i toruol dau om kolingasai noddi iyau. ⁴³ Om suhuo’ noddi di Yesus i tulun diri do muli’. Om sunudai no dau do poingkaa, ⁴⁴ ’’Kada’ no kopio popinsusuyo’ iti dot id disai nopo. Nga’ ongoi nogi’ solowot dit imam om suhuon no iyau do pointalang kopio do nolingasan kopio ko. Om papatahak nogindod porsombahan do sorobon do miontok di pinonuhuan di Musa, tu’ iri no o popointalang kopio dot id koinsanai’d tulun do nolingasan kopio ko,’’ ka dau. ⁴⁵ Nga’ pamanau noddi i tulun diri om ngoyo’ no dau popinsusuyo’ i nosiliu’ddi do hinonggo nopo, gisom dot a’ noddi kosuang i Yesus do hiri’d bandar diri dot a’ lumisok-lisok poo do sumuang. Om hiri poddi i Yesus id soliwan di bandar dot id kinoiyonon dot oingou. Nga’ ogumu’ kasai’ i’ o tulun do rumikot dot id dau do mantad id hinonggo nopo o kinoiyonon.

¹ Om piro-piro noddi o tadau do mantad diri om uli’ no i Yesus do hilo’d Kapornaum. Om kotongkop noddi o habar diri do hino iyau do hiri’d walai. ² Om ogumu’ddi o tulun do ruminikot. Om timung nopo iyolo’d hiri gisom dot aiso’ no o tiyonon. Om hiri piya’d wawayaan nga’ nosolot id tulun. Om ponusui noddi i Yesus do habar do mantad id Kinorohingan dot id tulun dot ogumu’ddi. ³ Om tontok di maso di Yesus do moro-boros, om korikot no ot apat o tulun do magantayang do songulun dit a’ koundaliu. ⁴ Nga’ a’ i’ iyolo’ nokoinsomok di Yesus tu’ ogumu’ kopio i’ o tulun. Om raago’ nopo diyolo’ i taap dit id hapak kopio di Yesus. Om pouluho’ noddi diyolo’ i tulun dit a’ koundaliu’ddi do mitonggoi di pinoliiyan dau. ⁵ Soira’ di nokito di Yesus o kogoyoo’ do kotumbayaan diyolo’ om boro-boros no i Yesus di tulun dit a’ koundaliu’ddi do poingkaa, ’’Oi tanak ku, noompunan ngai’ no o dusa nu,’’ ka dau. ⁶ Nga’ haro’ddi o piro-piro o guru do Tourat do songirikau’d hiri do momusorou do poingkaa, ⁷ ’’Katama’ kopio ilo’d tulun do mimboros do miagal dilo’. Mongindaraat no kopio iyau’d Kinorohingan. Isai daa o milo do mangampun do dusa, suwai ko’ Kinorohingan no,’’ ka diyolo’. ⁸ Nga’ oilaan i’ di Yesus o pomusarahan diyolo’ddi do maso’ddi. Om boro-boros noddi iyau do poingkaa, ’’Nokuro tu’ iyo’ddi o ponguhatan dot id ginawo dokoyu? ⁹ Honggo’dti ot osonong-sonong do popoboros, ’Noompunan no o dusa nu’, ka ko’, ’Ingkakat no, om saanon i’ ino liniiyon nu om mamanau nogindo,’ ka? ¹⁰ Nga’ pointalangon ku do dinondo dot id dokoyu do kikuasa’ i’ i Tanak do Tulun do mangampun do dusa do hiti’d pomogunan,’’ ka dau. Om pomoros po kawagu i Yesus dot id tulun dit a’ koundaliu’ddi do poingkaa, ¹¹ ’’Ingkakat no, om saano’ ino liniiyon nu, om muli’ i’,’’ ka. ¹² Om ingkakat noddi i tulun diri om olomus nopo do minanaan di liniiyon dau om pamanau no do suminoliwan dot antang-antangan di tulun dot ogumu’. Om kosuayai ngai’ noddi i tulun dot ogumu’ do nokokito’ddi. Om oinsanan nopoddi i tulun do hiri do minamarayou’d Kinorohingan. Boros ka diyolo’, ’’A’ toko’ po insan kokito do miagal diti,’’ ka. ¹³ Om pamanau noddi i Yesus do guminuli’ kawagu do hilo’d tisan do Tasik Galilia. Om ogumu’ddi o tulun do ruminikot dot id dau. Om tudukai noddi di Yesus iyolo’. ¹⁴ Om maso di Yesus do manau-panau do hiri’d kinoiyonon diri, om kokito no dau o songulun o gomponimung do sukai dot i Liwi o ngaran, i tanak di Alpius, do poirikau do hiri’d tupis do pambayaran do sukai. Om boro-boros noddi i Yesus dau do poingkaa, ’’Tanud doho’,’’ ka. Om ingkakat noddi i Liwi om tanud no iyau di Yesus. ¹⁵ Om tontok di maso di Yesus do makan do hiri’d walai di Liwi, om rikot no ot ogumu’ tulun di gomponimung do sukai om i tulun dit a’ pokosonongon do tulun dot ogumu’, do minongoi torungak di Yesus om i piro-piro o tumatanud di Yesus do makan. Tu’ ogumu’ i’ ot id pogialatan diyolo’ do tuminanud di Yesus. ¹⁶ Om haro’ddi o piro-piro o guru do Tourat do mantad id sinompuruan do Parisi do nokokito di Yesus do makan do potorungak di tulun di gomponimung do sukai om i tulun dit a’ pokosonongon diri. Om uhoto’ noddi diyolo’ i tumatanud di Yesus do poingkaa, ’’Nokuro tu’ makan i guru dokoyu do potorungak dilo tulun do gomponimung do sukai om ilo tulun dot a’ ongosonong?’’ ka diyolo’. ¹⁷ Om korongou noddi di Yesus i ponguhatan diyolo’ddi, om simbar no iyau diyolo’ do poingkaa, ’’A’ i’ rumikot dot id dokutur i tulun dit aiso’ o toruol, suwai ko’ iri no i tulun di kitoruol. Kinorikatan ku nopo om okon i’ ko’ mongoi pomolohou di tulun di momusorou dot osonong iyau, suwai ko’ mongoi pomolohou di tulun di momusorou dot a’ iyau osonong,’’ ka dau. ¹⁸ Tontok dot insan o maso om suminambayang om puasa i piro-piro tumatanud di Yohanis Gampamatis om i tulun do Parisi. Om haro’ddi o tulun do ruminikot dot id di Yesus om ponguhot no iyau dau do poingkaa, ’’Nokuro tu’ sumambayang om puasa i tumatanud di Yohanis Gampamatis om i tumatanud di tulun do Parisi om a’ i’ sumambayang om a’ puasa ilo tumatanud nu iya’?’’ ka diyolo’. ¹⁹ Om boros ka di Yesus do suminimbar diyolo’, ’’A’ toi makan i tulun di nalap dot id poginakanan do pikowinan? Atantu’ no do makan i’ iyolo’ do maso po do poinsugku’ diyolo’ i kusai di kuminawin. ²⁰ Nga’ orikot indo o maso do potongkiadon do mantad id diyolo’ i kusai di kuminawin. Om diri nogindo dot a’ iyolo’ makan. ²¹ Aiso’ i’ o tulun do mangampin do rasuk di laid noo, do kain do wagu o pangampin. Tu’ kumongkong nondo i kain di pinangampin diri om okon nogi’ dot araladan i nohurak. ²² Om iyo nogiddi tu’ aiso’ i’ o tulun do poposuang do waig dot anggur di wagu dot id poiiyanan do waig di kulit do winonsoi di laid noo. Tu’ otobuk nopo i poiiyanan diri dot osuangan di waig dot anggur di wagu. Om orubat goduwo nopondo iri. Iri nopo i waig dot anggur do wagu om mositi’ no do posuangon dot id poiiyanan do waig di wagu,’’ ka dau. ²³ Tontok dot insan o tadau’d Sabat, di nakawaya’ i Yesus om i piro-piro o tumatanud dau do tumo do tinanaman do gandum, om pogkotu’ no i tumatanud dau di rawo di gandum. ²⁴ Om ponguhot noddi i tulun do Parisi di Yesus do poingkaa, ’’Nokuro tu’ tumolibamban ilo tumatanud nu do Tourat toko’, tu’ momonsoi iyolo’ di pogoduhan do tontok do tadau’d Sabat?’’ ka diyolo’. ²⁵ - ²⁶ Om boros ka di Yesus do suminimbar, ’’A’ kou po nakabasa’ di winonsoi di Daud do tontok dit i Abiatar o Boyoon dot Agayo dot Imam. Tontok di linouson i Daud om i tulun dau, om dit aiso’ no o takanon diyolo’, om suang no i Daud do hiri’d Walai’d Sasambayangan dot Agayo, om pangakan no iyau di roti di nakatahak no daa dot id Kinorohingan. Om nonuan nogi’ di Daud i tulun dau di roti’ddi. Nga’ tumanud nopo daa do Tourat toko’, om iri no it imam o koino-ino do mangakan di roti’ddi,’’ ka dau. ²⁷ Om boros ka kawagu di Yesus dot id diyolo’, ’’Tadau nopod Sabat om winonsoi do bagi’d tulun. Okon i’ ko’ tulun o winonsoi do bagi’d tadau’d Sabat. ²⁸ Iyo nopoddi om kikuasa’ i’ i Tanak do Tulun dot id sawat piya do tadau’d Sabat,’’ ka dau.

¹ Om guli’ no kawagu i Yesus do hiri’d walai’d sasambayangan. Om hiri nopo nga’ haro o songulun do napatai o tiso’d longon. ² Nga’ hiri nopo om haro o piro-piro o tulun do mogihum do kasalaan di Yesus, om adawa indo diyolo’ iyau. Om piantangan diri diyolo’ i Yesus ondung momolingos iyau do tulun di kitoruol do tontok do tadau’d Sabat. ³ Om boros ka di Yesus dot id tulun di napatai o tiso’d longon diri, ’’Kaino, ingkakat do hiti’d gulu,’’ ka. ⁴ Om ponguhot noddi i Yesus di tulun di songintimung do hiri do poingkaa, ’’Nunu no o koino-ino’d wonsoyon do tontok do tadau’d Sabat do tumanud do Tourat? Momonsoi dot osonong ko’ momonsoi dot araat? Mamasi do tulun ko’ mamatai?’’ ka dau. Om kada’ nopo iyolo’ ungkomi. ⁵ Om ontong no i Yesus do hiri’d posorili’ dau do mikuwo’d otogod, nga’ tumongob i’ iyau tu’ ongokodou i’ kopio o ginawo diyolo’. Om boro-boros no iyau di tulun di napatai o tiso’d longon diri do poingkaa, ’’Palatano’ ino longon nu,’’ ka. Om palatano’ noddi di tulun i longon dau. Om kolingos noddi i longon dau. ⁶ Om soliwan noddi i tulun do Parisi do mantad hiri’d walai’d sasambayangan diri, om olomus nopo iyolo’ do minogiupakat di piro-piro o tulun di sumokodung di Horudis do mamatai di Yesus. ⁷ Om tongkiad noddi i Yesus om i piro-piro o tumatanud dau do pinakayaan do hilo’d Tasik Galilia. Om ogumu’ddi kopio o tulun do tuminanud dau do mantad id watas do Galilia, om ogumu’ nogi’ o tulun do ruminikot do mantad hilo’d Yudia, ⁸ om mantad hilo’d Yorusalim, om mantad hilo’d watas dot Idumia, om mantad ponong hilo’d koulayon do mantad id Bawang do Yordan, om mantad id posorili’ do bandar do Tirus, om Sidon. Om rikot ngai’ nopo iyolo’ dot id di Yesus tu’ nongkorongou ngai’ iyolo’ di nongowonsoi di Yesus. ⁹ Om suhuo’ noddi di Yesus i piro-piro o tumatanud dau do poposodia’ do parau’ do sakayon dau tu’ ogumu’ kopio i’ i tulun, om a’ i’ iyau oimpit di tulun dot ogumu’ddi. ¹⁰ Om ogumu’ tomod o tulun do liningasan dau, gisom do mogiimpit-impit po i tulun do kitoruol do mongoi insomok di Yesus do mongoi kama’ dau. ¹¹ Nga’ pointikid-tikid do kokito di Yesus i tulun di norusadan do rusod dot araat om tumuku’ nopo iyolo’ dot id toguang dau om momogiak nod, ’’Iya’ no o Tanak do Kinorohingan!’’ ka. ¹² Nga’ oduhai noddi kopio di Yesus i piro-piro o rusod dot araat diri do popimboros dot ondung isai kopio iyau. ¹³ Om takad noddi i Yesus dot id iso’ o nulu-nulu, om pomolohou no iyau do piro-piro o tulun di korohian dau. Om rikot ngai’ noddi i tulun diri; ¹⁴ om pilio’ noddi di Yesus o hopod om duwo o tulun do mantad id pogialatan diyolo’. Om boros ka di Yesus dot id diyolo’, ’’Pilion ku iyokoyu om kowoyo’ kou i’ doho’, om osuhu’ ku indo iyokoyu do mongoi poposusui do Habar dot Osonong do mantad id Kinorohingan. ¹⁵ Om kaanu kou nondod kuasa’ do monunsub do rusod dot araat,’’ ka dau. ¹⁶ Iti no o ngaran di hopod om duwo o tulun di nopili’ddi: i Simun (i roitan nogi’ dau dot i Pitrus), ¹⁷ i Yakub, om i Yohanis, i tobpinai di Yakub. Iyolo’ nopo om tangaanak di Sabidi (rinoitan goduwo nopo di Yesus iyolo’ do Boanirgis, komoyon nopoddi nga’, ’’tanak do tinggoron’’), ¹⁸ om i Andarias, om i Pilipus, om i Bartolomius, om i Matius, om i Tumas, om i Yakub i tanak di Alpius, om i Tadius, om i Simun, i roitan dot i Patriot, ¹⁹ om i Yudas Iskariot i pinapadagang di Yesus. ²⁰ Om uli’ noddi i Yesus do hiri’d walai. Nga’ rikot po kawagu i tulun dot ogumu’, gisom dot a’ no i Yesus om i piro-piro tumatanud dau kosiwat do makan. ²¹ Om mimboros ngai’ i tulun do, ’’Mulau no iyau,’’ ka. Om korongou poddi di sompiiyon di Yesus o miagal diri, om ongoyo’ no daa’ddi diyolo’ i Yesus. ²² Om i piro-piro guru do Tourat di mantad hilo’d Yorusalim nga’ minomoros nogi’ do, ’’Norusadan no iyau di Biilsibul! Om iri no i boyoon do rusod dot araat diri o minanahak dau’d kuasa’ do monunsub do rusod dot araat,’’ ka. ²³ Om lohowo’ noddi di Yesus i tulun dot ogumu’, om susuyai no dau iyolo’ do piro-piro o poinukadan. Boros ka dau, ’’Milo toi o rusod dot araat do monunsub dot araat? ²⁴ Ondung haro o pomogunan dit opogibahagi-hagi’ dot id piro-piro o sinompuruan di mogisasangod om a’ i’ ogirot o pomogunan diri. ²⁵ Om i sompiiyon dit a’ mogiuulud, om mogisasaap nopo nga’ araag i’. ²⁶ Om i nogi’ i pomorintaan do Rogon di mogisasaap nopo om mogipori-pori om atantu’ no dot a’ ogirot o pomorintaan diri om atanus indo. ²⁷ Om aiso’ i’ o tiso’d tulun do kosuang do hiri’d walai di tulun dot okoris do mongoi panakau di dapu’ dau, dot a’ po dau akagasan i tulun dit okoris diri. Akagasan po dau i tulun dit okoris diri om milo nogi’ iyau do mongoi panakau di dapu’ dau’ddi. ²⁸ Ilaai no dokoyu! Do tontok nopo do momonsoi o tulun do dusa om mimboros do mongindaraat, om oompunan i’ iyau. ²⁹ Nga’ ondung mongindaraat iyau’d Rusod do Kinorohingan, om a’ no iyau oompunan! Tu’ i nopo pongindaraat do miagal diri om dusa no dit a’ oompunan do Kinorohingan,’’ ka dau. ³⁰ (Kinapamarasan nopo di Yesus do miagal diri nga’ haro o tulun do minomoros do norusadan i Yesus do rusod dot araat.) ³¹ Om korikot noddi i tina’ om i piro-piro o tobpinai di Yesus. Om songingandad iyolo’ do hiri’d soliwan. Om ponuhu’ noddi iyolo’ do songulun do mongoi pomolohou di Yesus. ³² Om maso nopoddi nga’ ogumu’ tomod o tulun do poirikau do posorili’ di Yesus, om boros ka diyolo’ dot id dau, ’’Oi Guru, hino moti’d hilo’d soliwan i tina’ om i piro-piro o tobpinai nu. Om mogihum iyolo’ diya’,’’ ka diyolo’. ³³ Boros ka di Yesus, ’’Isai o tina’ ku? Om isai o tobpinai ku?’’ ka dau. ³⁴ Om ontong no i Yesus di tulun dot ogumu’ di songirikau do poinsorili’ dau om boro-boros nod, ’’Iti ngai’ no o tina’ om tobpinai ku. ³⁵ Isai nopo o momonsoi do korohian do Kinorohingan om iri no o tobpinai ku’d kusai om tobpinai ku’d tondu’, om tina’ ku,’’ ka dau.

¹ Om ponuduk po kawagu i Yesus do hiri’d tisan di Tasik Galilia. Om ogumu’ tomod diri i tulun do guminurumung dau. Om ongoi noddi i Yesus suang dit iso’ o parau’ di hiri’d waig, om irikau no iyau’d hiri. Om songingkakat diri i tulun dot ogumu’ do hiri’d tisan di tasik. ² Om ogumu’ddi o pinotuduk di Yesus di tulun dot ogumu’ do pinawaya’ dau do poinukadan. Om poingkaa o pinotuduk dau diyolo’, ³ ’’Pokinongou kou no! Haro o songulun o gompongumo do minongoi pasasad do linsou. ⁴ Tontok di maso dau’d papasasad om haro o linsou do nakasasad do hiri’d ralan. Om rikot no o tombolog do minongoi poninduk di linsou diri, om kaayi’ nopo i linsou’ddi. ⁵ Om haro nogi’ o nakasasad do hiri’d kowotuan dit oniipis o tana’. Om oruhai’ddi i linsou do suminuni tu’ oniipis i’ i tana’. ⁶ Nga’ maha’ dit asawat o tadau om kolonot no i sobul om koriou no om kapatai noddi. Tu’ a’ i’ nakaralom no i gamut di sobul diri. ⁷ Om haro nogi’ o linsou do nakasasad do hiri’d salag do korugian, om suni noddi i rugi om kosidung noddi i suni di linsou’ddi, gisom dot a’ noddi minongua’. ⁸ Nga’ haro i’ o linsou do nakasasad do hiri’d tana’ dot oruak om suni no i linsou’ddi gisom dot agayo, om pongua’ noddi. Om haro o minongua’ dot intolu nohopod kopiluap, om haro ot ingonom nohopod, om haro ot inghatus piluap,’’ ka dau. ⁹ Om kopupusai poddi di Yesus do monusui i poinukadan diri, om boro-boros no iyau do poingkaa, ’’Pokinongou kou no do kitolingo kou no,’’ ka. ¹⁰ Om tontok dit iso-iso’ i Yesus om rikot noddi o piro-piro o tulun di nokorongou di ponudukan dau, do miwoyo’ di hopod om duwo di tumatanud dau. Om pokisunud no iyolo’ di Yesus do komoyon di pinoinukadan diri. ¹¹ Om boro-boros no i Yesus diyolo’ do poingkaa, ’’Iyokoyu nopo om nopuhawangan no do toilaan do mongilo di poillisok do pasal di Pomorintaan do Kinorohingan. Nga’ iri nopo i tulun dit id soliwan, om poinukadan i’ o maan do ponuduk ¹² tu’, ’Poingontong piya iyolo’ nga’ a’ i’ koilo ondung nunu it osiliu, om korongou i’ iyolo’ nga’ a’ i’ kosuhut. Om iyo nodti ot osiliu, om a’ i’ iyolo’ kokito om a’ kosuhut, om a’ korikot dot id Kinorohingan, om a’ iyolo’ ompunan do Kinorohingan,’ ka,’’ ka dau. ¹³ Om boros kaddi di Yesus dot id diyolo’, ’’Ondung a’ kou kosuhut do komoyon di poinukadan diri, om poingkuro kou’ndo do kosuhut di poinukadan di suwai? ¹⁴ Iri nopo i pinapasasad do linsou diri, om iri no i tulun di mongoi popinsusui di habar do mantad id Kinorohingan. ¹⁵ Om iri no i linsou di nakasasad do hiri’d ralan, om poiyaan di tulun di nokorongou di habar do pasal do kowoyo-woyoo’ do Kinorohingan do momorinta’. Tu’ korongou nopo diyolo’ iri om rikot no i Rogon do minongoi panganu di nakasasad daa dot id ginawo diyolo’. ¹⁶ Om iri no i linsou di nakasasad do hiri’d tana’ do kowotuan, om poiyaan di tulun di nokorongou di habar diri om olomus nopo do ruminamit diri, mikuwo dot osonong o ginawo. ¹⁷ Nga’ a’ i’ kopio nakagamut i habar diri dot id ginawo diyolo’, om gowoi poddi om a’ tuminimporon. Tu’ koontok nopo iyolo’d kosusaan ko’ koinggoritan dot i habar diri o koponginggoritan, om pitilombus nopo iyolo’ do tuminanus o kotumbayaan. ¹⁸ Om iri no i linsou di nakasasad do hiri’d salag do korugian, om poiyaan di tulun di nokorongou do habar diri, ¹⁹ nga’ atangkabo nopo do koposi-posion diyolo’, om orohian nopod kumaya’. Om mogisuayan nopo o korohian do don tinan do sumuang dot id ginawo diyolo’. Gowoi poddi om noolitan i habar di mantad id Kinorohingan dit id ginawo diyolo’, om a’ iddi minongua’. ²⁰ Om iri no i linsou di nakasasad do hiri’d tana’ dit oruak, om poiyaan di tulun di nokorongou di habar diri om i ruminamit kopio. Om pongua’ noddi iyolo’ dot asapou, om haro’ddi ot intolu nohopod om haro ot ingonom nohopod om haro ot inghatus piluap o kogumuo’ do tua’,’’ ka dau. ²¹ Om boro-boros po kawagu i Yesus diyolo’ do poingkaa, ’’Haro toi o tulun do nokoumbal do modtutud nopod lampung om tinggouban nondod kakanan, ko’ posusuton po dau dot id sahau do toodopon dau? Okon toi ko’ tutudan dau i lampung om potimpakon do hiri’d potitimpakan di lampung? ²² Om koinsanai di poillisok om poimbulayon indo; om i lisok-lisokon dau nga’ oilaan indo. ²³ Om iyo nopoddi om pokinongou kou no do kitolingo kou no,’’ ka dau. ²⁴ Om boros ka kawagu di Yesus, ’’Soro-sorohon no kopio dokoyu iti nongorongou dokoyu: Nunu nopo it oturan do poimpahan dokoyu do momutus do tulun do suwai, om iri no it oturan diri o poimpahan do Kinorohingan do momutus dokoyu — nga’ awagat po mando ko’ iri. ²⁵ Tu’ i nopo tulun di haro o naanu om ruhangan nogi’ kawagu, nga’ i nopo tulun dit aiso’ o naanu, om imumuyon nogi’ do manganu it okuuri’ di haro dot id dau,’’ ka dau. ²⁶ Om oputai po di Yesus i ponudukan dau. Boros ka dau, ’’Kowoyo-woyoo’ nopo di Pomorintaan do Kinorohingan om iyo di tulun do pinapatanom do linsou dot id tumo dau, ²⁷ tu’ dongotuong nopo om modop no iyau; om kosuabon nondo om tumungag no iyau. Om daamot nopoddi om muni-suni om mayo-gayo i linsou di pinasasad dau. Sumuni tomod nopo i linsou’ddi, om a’ i’ koilo i tulun di minananom. ²⁸ Tu’ iri i’ i tana’ o poposuni’ddi. Om sumuni po i guas om monilau nogi’ om momuonsi nogindo. ²⁹ Om oonsok pondo i gandum diri om omoton nogindo di tulun iri, tu’ norikot noddi o kapangamatan,’’ ka dau. ³⁰ Om boros ka kawagu di Yesus, ’’Okuro-kuro ma i Pomorintaan do Kinorohingan? Nunu tuu poinukadan do milo’d poposuhut diri? ³¹ Iyo iri do poinukadan diti: Haro o linsou dit okooro’ do nongoi do songulun tonomo’ do hiti’d tana’. Nga’ iri nopo linsou dit okooro’ddi om kopupuson nod okoro’ do hiti’d pomogunan. ³² Nga’ kosuni pondo iri om agayo po ko’ i totonomon do suwai. Tuntu nopo di totonomon diri nga’ okohob kopio gisom do milo do pomirumunan do tombolog o hiri’d karaanan,’’ ka dau. ³³ Om iyo noddi i Yesus do minonuduk diyolo’ do pinawaya’ dot ogumu’ o poinukadan do gisom dot osuhutan diyolo’. ³⁴ Poinukadan kasai’ nopo o pakayon di Yesus do monuduk di tulun dot ogumu’. Nga’ iri nopondo i tumatanud dau om potudukon ngai’ i’ dau diyolo’ o komoyon diri. ³⁵ Om sosodopon noddi do tadau’ddi om boros ka di Yesus dot id piro-piro di tumatanud dau, ’’Kainou soborong toko’ diti tasik,’’ ka. ³⁶ Om sakai noddi i Yesus do parau’, om tongkiadai noddi di piro-piro i tumatanud dau i tulun dot ogumu’ di hiri’d tisan di tasik, om sakai noddi iyolo’ di parau’ di sinakai di Yesus. Om haro nogi’ o piro-piro o parau’ do suwai do hiri. Om pamanau noddi i Yesus om i piro-piro i tumatanud dau do poinsakai di parau’. ³⁷ Om a’ po alaid do mantad diri, om rikot no o tongus dot opuhod. Om opuhod diri o tumbak gisom do kosuang do hiri’d parau’ diyolo’, om oruhai no daa’ddi dot oponu’ do waig i parau’ diyolo’. ³⁸ Nga’ i Yesus nopo om koodop do ponong id tohuri di parau’ do poulunan do bantal. Om ongoyo’ no di tumatanud di Yesus posikai i Yesus. Boros ka diyolo’, ’’Guru, uhang ngai’ nu i’ dot apatai toko’,’’ ka. ³⁹ Om tungag noddi i Yesus om suhuo’ no dau do tumingkod i tongus dot opuhod. Om barasai no dau i tasik do poingkaa, ’’Tingkod no om sinonod no!’’ ka. Om kotingkod no i tongus dot opuhod diri, om sinonod no i tasik. ⁴⁰ Om boro-boros noddi i Yesus di tumatanud dau, ’’Nokuro tu’ ooris kou? Nokuro tu’ a’ kou otumbayaan doho’?’’ ka dau. ⁴¹ Om kongooris noddi iyolo’, om mogiboro-boros nopoddi iyolo’ do poingkaa, ’’Isai kopio tuu o tulun diti tu’ tongus piya om tumbak nga’ mumboyo’ nopo dau?’’ ka.

¹ Om korikot noddi i Yesus om i piro-piro i tumatanud dau do hiri’d soborong di Tasik Galilia, i hiri’d watas do Garasa. ² Om maha’ di nokolintuhun nogi’ i Yesus do mantad id parau’, om ngoyo’ no iyau solowoto’ do songulun o kusai di suminoliwan do mantad hiri’d luang do nuluhon di pamalabangan. ³ Iri nopo i tulun diri om norusadan do rusod dot araat. Om hiri kasai’ nopo iyau’d kalabangan do mundorong. Om a’ no iyau milo do kagasan do rantai piya o pongogos. ⁴ Om asaru’ nod kagasan do rantai o gakod om longon dau, nga’ pututon kasai’ nopo dau i rantai’ddi om tipuon dau i basi’ di pinarangkap do gakod dau. Om aiso’ no o songulun piya do kopusus dau tu’ okodou i’ kopio iyau. ⁵ Monuab-nuaban nopo om monongodou-ngodou iyau do minggiak om mimpanau do hiri’d kalabangan om hiri’d nulu-nulu, om pinsuhaton dau do watu o tinan dau. ⁶ Om tontok di nokito dau i Yesus do rumikot di hiri pod sodu’, om panangkus no iyau do minongoi otud do hiri’d toguang di Yesus, ⁷ om pamagarang no iyau dot opuhod do poingkaa, ’’Oi Yesus, i Tanak do Kinorohingan it Asawat Kopio! Kukuroyon oku diya’dti? Pokionuon ku no dot id suang do ngaran do Kinorohingan dot a’ ko monginggorit doho’,’’ ka. ⁸ Minomoros pogi’ i tulun diri do miagal diri nga’ nabarasan no iyau di Yesus do poingkaa, ’’Oi rusod dot araat soliwan no do mantad id tulun diti,’’ ka. ⁹ Om ponguhot no i Yesus dau, ’’Isai o ngaran nu?’’ ka. Om boros ka di tulun diri do suminimbar, ’’I Logiun o ngaran ku, tu’ ogumu’ i’ kopio iyahai’dti,’’ ka dau. ¹⁰ Om momilugu-lugut nopoddi daa iyau di Yesus dot a’ monuhu’ di piro-piro o rusod dot araat diri do sumoliwan do mantad id watas diri. ¹¹ Nga’ hiri nopod somok do kinoiyonon diri nga’ haro ot ogumu’ o wogok do minsungal do hiri’d guas di nulu-nulu. ¹² Om boro-boros noddi i piro-piro o rusod dot araat diri di Yesus do poingkaa, ’’Suhuo’ nogi’ iyahai do mongoi suang dilo baanan do wogok,’’ ka. ¹³ Om kookunai noddi di Yesus iri. Om soliwan ngai’ noddi i rusod dot araat do mantad id tulun diri, om ongoi no suang di baanan do wogok. Om oinsanan nopoddi i wogok do minanangkus om tuhun no do hiri’d tasik do mantad hiri’d piras do ngangab. Om kongolondod ngai’ nopoddi i wogok. ¹⁴ Om panangkus ngai’ no i gompomogompi’ di wogok do kuminaa do hiri’d bandar, om popinsusuyo’ no diyolo’ i nosiliu’ddi dot id pointongkop di bandar diri om hiri’d kokompungan di posorili’d hiri. Om soliwan ngai’ nopo i tulun do minongoi ontong di nosiliu’ddi. ¹⁵ Om ongoi noddi iyolo’ solowot di Yesus, om kokito noddi diyolo’ i tulun di norusadan daa do rusod dot araat di gulu po, do poirikau no om kipakayan noddi iyau om kopunong noddi o pomusorou dau. Om kongooris ngai’ nopo iyolo’. ¹⁶ Om susuyo’ noddi di tulun di nokokito kopio di nosiliu dot id tulun di norusadan di rusod dot araat om id baanan do wogok i nongosiliu’ddi. ¹⁷ Om suhuo’ noddi di tulun do hiri’d watas diri i Yesus do tumongkiad di watas. ¹⁸ Om tontok di suminakai i Yesus di parau’, om pokibanar no daa’ddi di Yesus i tulun di norusadan do rusod dot araat diri do tumanud iyau di Yesus. ¹⁹ Nga’ a’ i’ nakaakun i Yesus. Boros ka dau, ’’Uli’ nogi’, om posusuyon noti nowonsoi do Tuhan dot id diya’ dot id koobpinayan nu,’’ ka dau. ²⁰ Om pamanau noddi i tulun diri do minongoi do hiri’d watas di roitan do Hopod o Bandar do popinsusui di nowonsoi di Yesus dot id dau. Om ongosuayan ngai’ nopo i tulun do korongou’ddi. ²¹ Om guli’ noddi kawagu i Yesus do hiri’d soborong di tasik. Om ogumu’ddi o tulun do tuminimung do posorili’ dau dot id tisan di tasik. ²² Om rikot no o songulun dot i Yairus o ngaran. Iyau nopo om boyoon dot id walai’d sasambayangan dot id bandar diri. Om tontok di nokito dau i Yesus om otud no iyau dot id toguang dau. ²³ Om pokitulung no kopio iyau dau. Boros ka dau, ’’Adalaan tomod do sumakit i tanak ku’d tondu’. Om angatan ku daa iya’ do mongoi pangama’ dau, om olingasan i’ iyau, om a’ indo iyau apatai,’’ ka dau. ²⁴ Om pamanau noddi i Yesus do minoyo’ di Yairus. Nga’ ogumu’ tomod o tulun do minoyo’ dau, om oimpit tomod nopoddi iyau. ²⁵ Id pogialatan nopo di tulun dot ogumu’ddi om haro o songulun o tondu’ do hopod no om duwo o toun do koloido’ dau dot oinggorit di toruol dau do pomulanan. ²⁶ Aiso’ no o songulun piya do koubat di toruol dau, gisom do naayi’ ngai’ no dau o dapu’ dau do pambayar dau do dokutur di mongubat daa dau. Nga’ okon nogi’ do sumurut i toruol dau. ²⁷ Om i nopo tondu’ddi nga’ ogumu’ no o norongou dau do pasal di Yesus. Om ongoi noddi iyau insomok di Yesus do mantad ponong id tohuri, dot id pogialatan di tulun dot ogumu’ddi; ²⁸ tu’ poingkaa ot osorou dau, ’’Koigit oku nopo dilo pakayan dau nga’ olingasan oku no!’’ ka. ²⁹ Om ongoi noddi iyau igit di pakayan di Yesus. Om diiri i’ om diiri do notingkod i pomulanan dau. Om kopurimanai noddi dau do nolingasan iyau. ³⁰ Om tontok iddi do nopurimanan di Yesus do haro o kuasa’ do noidu’ do mantad id tinan dau. Om koili noddi i Yesus do minontong di tulun dot ogumu’, om ponguhot noddi iyau diyolo’ do poingkaa, ’’Isai i minongoi igit do pakayan ku?’’ ka dau. ³¹ Om boro-boros noddi i tumatanud di Yesus, ’’Oi Guru, okito nu i’ dot ogumu’ kopio iti tulun do koimpit diya’ om monguhot ko po ondung isai o nokoigit diya’?’’ ka diyolo’. ³² Nga’ mingontong i’ kasai’ i Yesus do hiri’d posorili’ dau do mogihum di tulun di minongoi igit dau. ³³ Om iri nopoddi i tondu’ di nokoilo di nosiliu dot id tinan dau om ongoi nopoddi otud dot id toguang di Yesus, mikuwo’d gagaran om ooris. Om poboroso’ ngai’ nopo dau iri. ³⁴ Om boro-boros noddi i Yesus di tondu’ddi do poingkaa, ’’Oi tanak ku, iri no i kotumbayaan nu dot id doho’ o nokolingos diya’! Uli’ no om sumonong-sonong, tu’ nolingasan ko no kopio,’’ ka dau. ³⁵ Om maso po di Yesus do moro-boros, om rikot no o piro-piro o susuhuon do mantad id walai di Yairus do mongoi pomisunud di Yairus. Boros ka diyolo’, ’’Napatai no i tanak nu’d tondu’, oi Tuan. Om kada’ no ponusa’ dilo Guru,’’ ka. ³⁶ Om a’ i’ di Yesus pinusou i pinoboros di tulun diri, om boro-boros no i Yesus di Yairus do poingkaa, ’’Kada’ kooris, nga’ kotumbayaai nopo,’’ ka dau. ³⁷ Om lombus nopo i Yesus do minamanau, nga’ a’ i’ dau uhang do haro o songulun piya do tulun do suwai do tumanud dau, suwai ko’ i Pitrus no om i Yakub om i Yohanis, i tobpinai di Yakub. ³⁸ Om korikot noddi iyolo’ do hiri’d walai di Yairus, om kokito no di Yesus dot agangau nopo o hiri om norongou dau o tihad do mogihad dot opuhod tomod. ³⁹ Om salakoi noddi i Yesus om boro-boros no diyolo’, ’’Nokuro tu’ agangau kopio kou om songihad-ihad? Dot ilo’ nopo tanak dilo’ om a’ i’ napatai; suwai ko’ koodop noo,’’ ka dau. ⁴⁰ Nga’ irak-irakai nogi’ diyolo’ i Yesus. Om suhuo’ ngai’ noddi di Yesus iyolo’ do sumoliwan. Om angatai no dau i tina’ om i tapa’ di tanak diri om i tolu di tumatanud dau do sumuang do hiri’d bilik di tanak. ⁴¹ Om igitai no di Yesus i longon di tanak diri om boro-boros no iyau do poingkaa, ’’Talita kum,’’ ka, komoyon nopoddi nga’, ’’Oi tanak do tondu’, moro-boros oku diya’: tungag!’’ ka. ⁴² Om olomus nopod tuminungag i tanak diri, om pamanau no. (Hopod no om duwo o toun do tumur dau.) Ongosuayan ngai’ nopoddi i tulun do nokokito di nosiliu’ddi. ⁴³ Om oduhai noddi kopio di Yesus iyolo’ do popinsusui’ddi dot id disai nopo. Om boro-boros noddi iyau do poingkaa, ’’Onuwai dokoyu do takanon ilo tanak,’’ ka.

¹ Om hiri nod kinoiyonon diri o tadon di Yesus om i tumatanud dau do minuli’ do hilo’d kampung dau. ² Om tontok nopoddi di tadau’d Sabat om timpuun no i Yesus do monuduk do hiri’d walai’d sasambayangan. Om ogumu’ddi o tulun do hiri. Om ongosuayan ngai’ nopoddi i tulun do nokorongou di ponudukan di Yesus. Om mogiboro-boros nopoddi iyolo’ do poingkaa, ’’Hinonggo kopio o kinoonuan do tulun diti do koinsanai’ddi? Okuro-kuro kopio o toilaan do naanu do tulun diti? Hinonggo o kinoonuan dau’d kuasa’ do momonsoi’d koimayaan? ³ Okon toi ko’ i tukang kayu ilo’, i tanak di Maria om i tobpinai di Yakub om i Yosis om i Yudas om i Simun? Om poundorong i’ do hiti i tobpinai dau do tongoondu’?’’ ka. Om iri noddi ot a’ diyolo’ kinoponongkuyaan dau. ⁴ Om boros kaddi di Yesus dot id diyolo’, ’’Pusohon i’ o nabi do hinonggo nopo, nga’ a’ nogindo iyau pusohon do hiri’d kampung dau om hiri’d pogialatan do koobpinayan om sompiiyon dau,’’ ka dau. ⁵ Om a’ i’ i Yesus minilo do minomonsoi dot ongoiso’ piya o koimayaan do hiri’d kinoiyonon diri, suwai ko’ haro no o piro-piro o tulun do sumakit do liningasan dau do kinama’ dau do minomolingos. ⁶ Om osuayan i Yesus tu’ a’ i’ kopio iyolo’ otumbayaan. Om ongoi noddi i Yesus do hiri’d piro-piro o kampung do hiri’d posorili’ di kinoiyonon diri; om ponuduk no iyau’d hiri. ⁷ Om lohowo’ ngai’ noddi dau i tumatanud dau di hopod om duwo. Om suhuo’ nogiddi dau iyolo’ do mamanau do soroduwo-duwo. Om onuwai no di Yesus iyolo’ do kuasa’ do monunsub do rusod dot araat. ⁸ Om bilinai nogiddi di Yesus iyolo’ do poingkaa, ’’Kada’ kou pongigit do nunu nopo do maan do hilo’d ralan, suwai ko’ sukud nopo ot igitan. Om kada’ kou pongokoriu, om kada’ kou igit do kantung do poiyanan di popuhawangon do tulun toi ko’ tusin. ⁹ Manangkasut kou nopo, nga’ kada’ kou no igit do duwo o rasuk,’’ ka dau. ¹⁰ Om boro-boros po kawagu i Yesus do poingkaa, ’’Ondung sumalakoi kou dot id iso’ o walai om mundorong kou nopod hiri do gisom do tumongkiad kou di bandar diri. ¹¹ Nga’ ondung korikot kou nopo dot id iso’ o kinoiyonon dit a’ papasalakoi dokoyu o tulun do hiri, om a’ iyolo’ mokinongou dokoyu, om tumongkiad kou nopo di kinoiyonon diri. Om tantagon no dokoyu o pupuk do mantad id lapap dokoyu. Om iri no o tanda’ dot id diyolo’ do hukuman nondo iyolo’,’’ ka dau. ¹² Om pamanau noddi i hopod om duwo i tumatanud di Yesus diri. Om ongoi noddi iyolo’ popinsusui do habar dot apatut no do rumologo o tulun do mantad id koinsanai’d dusa diyolo’. ¹³ Om ogumu’ nogi’ o rusod dot araat do sinunsub di tumatanud di Yesus. Om linuhad diyolo’d tumau do saitun i tulun di kitoruol om liningasan diyolo’ iyolo’. ¹⁴ Om korongou noddi di Raja’ Horudis o koinsanai di nongosiliu’ddi. Tu’ abantug noddi i Yesus do hinonggo nopo. Om haro o tulun do momoros do, ’’Noposian kawagu i Yohanis Gampamatis! Om iri noddi o kokuwaan do haro kopio o kuasa’ dau do momonsoi’d koimayaan,’’ ka. ¹⁵ Nga’ iri no i tulun do suwai om momoros dot, ’’Iyau nopo om i Ilia,’’ ka. Om haro nogi’ o momoros dot, ’’Iyau nopo om nabi do miagal di nabi di gulu po,’’ ka. ¹⁶ Om soira’ di nokorongou i Horudis diri, om boros ka dau, ’’I Yohanis Gampamatis no kopio iti, i pinonuhuan ku do momulos o tulu di gulu po. Om poimpasi noddi kawagu iyau do baino’,’’ ka. ¹⁷ Tu’ di nopo di gulu po om minonuhu’ i Horudis do tulun do mongoi panangkap di Yohanis om posuangon i’ dot id giil. Winonsoi pogi’ di Horudis o miagal diri nga’ gama’ di Horudias, i sawo di Pilipus i tobpinai dau. Tu’ kinawin di Horudis i Horudias. ¹⁸ Om asaru’ no i Yohanis do monogod di Horudis do pasal diri. Boros ka dau, ’’A’ i’ koino-ino do kowinon nu i sawo di tobpinai nu,’’ ka. ¹⁹ Om iri noddi o katagadan kasai’ di Horudias di Yohanis om pokipapatayan dau iyau, nga’ a’ i’ dau milo do wonsoyon o miagal diri tu’ oduhan i’ iyau di Horudis. ²⁰ Tu’ nokoponuhu’ no i Horudis do tulun do momogompi’ kopio di Yohanis do hiri’d giil, tu’ moddosi i’ iyau di Yohanis. Dot oilaan no dau dot i Yohanis nopo om tulun dit osonong di sinuhu’d Kinorohingan. Om asanangan kasai’ i’ i Horudis do mokinongou do soira’ nopo do moro-boros i Yohanis, do mulong piya dot atangkabo kasai’ nopo iyau do pointikid-tikid do korongou iyau di boros di Yohanis. ²¹ Nga’ alaid noddi om haro’ddi o ralan di Horudias do momonsoi’ddi do tontok di minonguramat do toun di Horudis. Om tontok noddi do pinapaharo i Horudis do poginakanan. Om alapo’ no dau o koinsanai di pagawai dit angasawat o pangkat dot id pomorinta’ om i boyoon do soudor om i boyoon do tulun do hiri’d Galilia. ²² Om panari’ no i tanak di Horudias do tondu’ dot id poginakanan diri, om orohian tomod i Horudis om i tulun di nangkarapou do hiri’d poginakanan diri do kokito di pananari’ di tanak do tondu’ddi. Om boro-boros noddi i Horudis dot id tanak do tondu’ddi do poingkaa, ’’Pokianu nopo do nunu nopo o korohian nu. Om patahakon ku i’ iri dot id diya’,’’ ka dau. ²³ Om pamatos noddi i Horudis dot id tanak do tondu’ddi do mikuwo’d suminumpa’. Boros ka dau, ’’Nunu nopo o pokionuon nu om patahakon ku i’. Do mulong piya do songintanga’ diti pomorintaan ku nga’ patahakon ku i’,’’ ka dau. ²⁴ Om soliwan noddi i tanak di tondu’ddi om ongoi no uhot di tina’ dau do poingkaa, ’’Ina’ nunu ma ot osonong do pokionuon ku?’’ ka dau. Om boros ka di tina’ dau do suminimbar, ’’Pokionuon i tulu di Yohanis Gampamatis,’’ ka. ²⁵ Om olomus nopoddi i tanak do tondu’ddi do guminuli’ do hiri’d di Horudis. Om boro-boros nod, ’’Pokionuon ku do dinondo i tulu di Yohanis Gampamatis om pasakayon nod talam!’’ ka dau. ²⁶ Nga’ tumongob tomod diri i Horudis do nokorongou di pokionuon diri. Nga’ a’ noddi iyau milo dot a’ papatahak di pinokianu’ddi tu’ nokosumpa’ no iyau dot id toguang di tulun di nalap dau. ²⁷ Om olomus nopoddi i Horudis do minonuhu’ do songulun o soudor di madtatamong dau do mongoi pomulos do tulu di Yohanis Gampamatis. Om pamanau noddi i soudor diri do minongoi’d hiri’d giil do mongoi pomulos di tulu di Yohanis Gampamatis. ²⁸ Om igitai no dau i tulu diri do poinsakai’d talam om patahako’ nogiddi dau di tanak do tondu’ddi. Om patahako’ no di tanak do tondu’ddi dot id tina’ dau i tulu. ²⁹ Om korongou poddi di tumatanud di Yohanis o hal diri, om ongoyo’ noddi diyolo’ i rata’ di Yohanis om lobongo’ no diyolo’. ³⁰ Om koguli’ ngai’ noddi i rasul, i sinuhu’ di Yesus do minamanau’ddi, om kotimung no kawagu iyolo’ om posunudo’ ngai’ no diyolo’ dot id di Yesus o koinsanai di nongowonsoi om i nongkotuduk diyolo’. ³¹ Nga’ ogumu’ nopoddi i tulun do rumikot om songuli-uli’ o wokon, gisom dot aiso’ no o maso di Yesus om i piro-piro i tumatanud dau do makan. Om boro-boros noddi i Yesus di tumatanud dau do poingkaa, ’’Kainou, ongoi toko’ undorong do hilo’d kinoiyonon dit oingou, om koundorong kou i’ dot ongoruhai,’’ ka dau. ³² Om pamanau noddi iyolo’ do suminakai dot iso’ o parau’ do kuminaa dot id kinoiyonon dit oingou. ³³ Nga’ ogumu’ iddi o tulun do nokokito diyolo’ do tuminongkiad do kinoiyonon diri, om kotutun iyolo’ diyolo’. Om panangkus ngai’ noddi i tulun di mantad id watas diri do minaya’ di ralan dit a’ kosoborong, do suminogulu di Yesus om i piro-piro i tumatanud dau. ³⁴ Om kolintuhun poddi i Yesus do mantad hiri’d parau’, om kokito no dau i tulun dot ogumu’. Om kosianai noddi iyau diyolo’, tu’ iyolo’ nopo om iyo di dumba’ dit aiso’ o momogompi’. Om timpuun noddi i Yesus do monuduk diyolo’ do piro-piro o ponudukan. ³⁵ Om sosodopon noddi om ongoi no boro-boros i tumatanud di Yesus dot id dau, ’’Oi Guru, oruhai noddi dot otuong om osodu’ toko’ nogi’ do kawalayan. ³⁶ Om osonong nogi’ do suhuon nu ilo tulun do mamanau. Om koongoi i’ iyolo’ koboli do taakanon do hilo’d kawalayan om hilo’d kokompungan do hiti’d posorili’ do kinoiyonon diti,’’ ka. ³⁷ Om boros ka di Yesus do suminimbar, ’’Paakanon nopo dokoyu iyolo’,’’ ka dau. Om boros ka di tumatanud di Yesus, ’’Gatang piya’d duwo nahatus o tusin do pirok do roti dot ongoyon bolio’ nga’ a’ i’ kabagal do paakan diti tulun do miagal diti kogumu’,’’ ka diyolo’. ³⁸ Om boros ka di Yesus dot id tumatanud dau, ’’Ngoyo’ dokoyu antangai om songkuro poo roti dokoyu,’’ ka dau. Om ngoyo’ noddi diyolo’ antangai, om boros ka diyolo’, ’’Limo po o liob do roti om duwo o tinan do sada’,’’ ka. ³⁹ Om suhuo’ noddi di Yesus o koinsanai di tulun diri do mirikau do mogitumpuk-tumpuk do hiri’d sakot dit otomou. ⁴⁰ Om ulud noddi i tulun do minirikau do mogitumpuk-tumpuk. Om haro o hatus o tulun dot id iso’ o kinotumpukon om haro o limo nohopod o tulun. ⁴¹ Om ngoyo’ noddi di Yesus i limo o liob do roti om i duwo o tinan di sada’, om tingaha’ no iyau do hilo’d tawan om pongunsikou no iyau’d Kinorohingan. Om pogikobing-kobingo’ noddi di Yesus i roti’ddi om patahako’ no di tumatanud dau do maan potikido’ di tulun dot ogumu’. Om i sada’ nga’ minaan nogi’ potikido’. ⁴² Om akan ngai’ noddi i tulun diri do gisom do nangayahan. ⁴³ Om ngoyo’ noddi di tumatanud di Yesus timungo’ i roti om i sada’ di noolu’ diyolo’ddi om nokoponu’ po do hopod om duwo o balatak. ⁴⁴ Ginumu’ nopo do tongokusai do minangakan di roti’ddi om haro i’ doti’ o limo noribu o tulun. ⁴⁵ Om olomus nopoddi i Yesus do minonuhu’ di piro-piro i tumatanud dau do sumakai’d parau’ do mogulu dau do sumoborong di tasik, do kumaa do hilo’d Baitsaida, do damot dau do monuhu’ di tulun dot ogumu’ do muli’. ⁴⁶ Om kopongintod-ngintod poddi i Yesus di tulun dot ogumu’ddi om ongoi nogi’ iyau dot id iso’ o nulu-nulu do minongoi sambayang. ⁴⁷ Om otuong noddi, om iri nopo i parau’ di sinakai di piro-piro o tumatanud di Yesus diri om hiri nod tanga’ di tasik. Nga’ i Yesus nopo om hiri pod tindal. ⁴⁸ Om kokito no di Yesus i piro-piro tumatanud dau dot osusa’ kopio do mangayu di parau’ diyolo’ tu’ asasakan diyolo’ i tongus. Om ongoi noddi i Yesus rapou diyolo’ do minamanau do hiri’d soibau di waig dot id piolitan doti’ do jam kotolu om jam do koonom do minsusuab. Om pamanau nopo iyau do miagal-agal do tumalib diyolo’. ⁴⁹ Om tontok di nokito diyolo’ do manau-panau iyau do hiri’d soibau di waig, om ondos nopo daa diyolo’ om tombiruo i Yesus. ⁵⁰ Gisom do songgiak-giak po iyolo’ dot opopoddosian. Tu’ nokokito ngai’ nopo iyolo’ dau om ongooris tomod diri iyolo’. Nga’ boro-boros noddi i Yesus diyolo’ do poingkaa, ’’Kada’ kou kooris! I Yesus oku i’. Kada’ kou poddosi!’’ ka dau. ⁵¹ Om sakai noddi i Yesus di parau’ di sinakai diyolo’, om kotingkod noddi i tongus diri. Om ongosuayan tomod diri i tumatanud di Yesus. ⁵² Om iri piya i koimayaan di limo o liob do roti diri nga’ a’ po diyolo’ osuhutan. Tu’ apagon kopio iyolo’ do kosuhut. ⁵³ Om tontok di nokorikot iyau do hiri’d soborong di tasik, om dampir noddi iyolo’ do hilo’d Ginisarit, om pokogoso’ no diyolo’ i parau’ do hiri’d tisan di tasik. ⁵⁴ Tontok di nokosoliwan nogi’ kopio iyolo’ do mantad hiri’d parau’, om kokito no di tulun dot i nopo nokorikot diri nga’ i Yesus. ⁵⁵ Om panangkus nopoddi iyolo’ do tuminongkop do watas diri. Om sarasayai noddi diyolo’ i tulun dit ongkitoruol om pootodo’ no dot id di Yesus. Om ondung orongou diyolo’ do hino i Yesus dot id iso’ o kinoiyonon om ongoyon no diyolo’ pootodo’ do hiri i tulun di sumakit. ⁵⁶ Om honggo nopo o bandar ko’ kawalayan do koongoyon di Yesus, om hiri no o tulun dot ogumu’ do mongoi papaatod ngai’ di tulun dit ongkitoruol dot ongoyon poiliho’ do hiri’d karalan-ralanan. Om pokionuon no diyolo’ i Yesus do popologos dit ongkitoruol do mongoi po daa igit di tompok di pakayan dau. Om isai nopo i tulun di koigit di pakayan di Yesus om ongolingasan ngai’ no.

¹ Om rikot noddi dot id di Yesus ot iso’ o tinimungan do tulun do Parisi om i piro-piro o guru do Tourat do mantad hilo’d Yorusalim. ² Om kokito no diyolo’ o piro-piro di tumatanud di Yesus do makan dot a’ opulang o palad dot id pagantangan do tugama’, tu’ a’ iyolo’ minomoug do palad do tumanud dit oturan do tugama’. ³ Dot i nopo tulun do Parisi om koinsanai di tulun do Yohudi om ongotorodok kopio do tumanud di koubasanan di komolohingan diyolo’. Do tintod nopo diyolo’d makan om mositi’ no do momoug iyolo’ do tumanud di kowoyo-woyoo’ di natantu’ mantad. ⁴ Om iyo nogiddi do tontok do haro ot oboli diyolo’ do taakanon do mantad hiri’d pasar tu’ mositi’ nod ougan diyolo’ om akanon nogi’. Om ogumu’ po ot oturan do suwai do pinotuduk di komolohingan diyolo’ di tonudon kopio diyolo’. Do miagal ko’ oturan do momolidang do sangkir, om mangkuk, om i ngai’ i pakakas do tambaga’. ⁵ Om ponguhot noddi i tulun do Parisi om i piro-piro o guru do Tourat dot id di Yesus do poingkaa, ’’Nokuro ilo piro-piro o tumatanud nu tu’ a’ momoug do tintod do makan? Nokuro tu’ a’ iyolo’ tumanud do koubasanan di komolohingan toko’,’’ ka diyolo’. ⁶ Om boros ka di Yesus do suminimbar, ’’Iyokoyu nopo om tulun di minsorupai-rupai no toomod! Kabayaai nopo i pinoboros mantad di Yosaya do pasal dokoyu do poingkaa, ’Iti nopo tulun diti om boros no toomod diyolo’ do tumuku’ dot id doho’, tu’ ginawo nopo om osodu’ i’ doho’. ⁷ Aiso’ i’ o guna’ do tumuku’ piya iyolo’ dot id doho’, tu’ potudukon diyolo’ it oturan do mantad id tulun do miagal nopo kopio dot oturan ku!’ ka. ⁸ Om iyada’ nogi’ dokoyu i ponuhuan do Kinorohingan, om tonudon nogi’ kopio dokoyu it oturan do tulun,’’ ka dau. ⁹ Om boros ka kawagu di Yesus, ’’Milo kou no kopio do magada’ di ponuhuan do Kinorohingan, om atanud indo dokoyu i dokoyu’d ponudukan. ¹⁰ Nokoponuhu’ no i Musa do poingkaa, ’Podulo’ no o tapa’ om tina’ nu. Om isai-isai nopo o mongindaraat do tapa’ om tina’ dau, om mositi’ no do hukuman iyau do kapatayon,’ ka. ¹¹ Nga’ iyokoyu nopo om monuduk kou dot: Ondung haro o tulun do moro-boros dot id molohing dau dot, ’Iri nopo daa it apatut do patahakon ku dot id tapa’ om id tina’ ku, om nakatahak ku nori dot id Kinorohingan,’ ka. ¹² Om poiduwon no dokoyu i tulun diri do mantad id tonggungan dau do monulung di tapa’ om tina’ dau. ¹³ Om iri no o ponudukan dokoyu di potudukon dokoyu do tulun, do ralan dokoyu do pakaiso’ di boros do Kinorohingan. Om ogumu’ po o suwai do miagal diri do pingwansayan dokoyu,’’ ka dau. ¹⁴ Om lohowo’ po kawagu di Yesus i tulun dot ogumu’ddi, om boro-boros no iyau diyolo’, ’’Pokinongou kou no, om kosuhut kou i’! ¹⁵ Aiso’ i’ o tongoiso’ piya do mantad id soliwan di kosuang dot id tulun do kososomu’ dau. Nga’ nunu nopo i sumoliwan do mantad id tulun diri om iri no o kososomu’ dau. ¹⁶ [Iyo nopoddi om pokinongou kou no do kitolingo kou no.]’’ ka dau. ¹⁷ Om tontok di tuminongkiad i Yesus di tulun dot ogumu’ddi om suang no iyau do hiri’d walai, om ponguhot noddi di Yesus i piro-piro tumatanud dau do komoyon di poinukadan diri. ¹⁸ Om boros ka di Yesus dot id diyolo’, ’’A’ kou po pama iyokoyu kosuhut? A’ kou i’ koilo dot iri nopo i sumuang dot id tulun om a’ i’ kososomu’ di tulun diri? ¹⁹ Tu’ iri nopo i sumuang om a’ i’ kawaya’ dot id ginawo dau, suwai ko’ kawaya’ no dot id tian, om kosoliwan no kawagu,’’ ka dau. Om iyo noddi o boros di Yesus do pinopoilo dot aakan ngai’ o taakanon. ²⁰ Om boro-boros po kawagu i Yesus do poingkaa, ’’Nunu nopo o sumoliwan do mantad id tulun om iri no o kososomu’ dau. ²¹ Tu’ mantad no dot id suang do ginawo do mimbulai o pomusarahan dot araat om iri no o mominsuhu’d tulun do momonsoi di sosomu’, om manakau, om mamatai, ²² om magampahu’, om monipu’, om mongindaraat do wokon, om mingwonsoi do koinsanai dit angaraat, om mominsuhu’ dot agayo o mamaha’, om it a’ osinondot, om osolon, om minggayo-gayo, om a’ milo’d tudukan. ²³ Om koinsanai dit angaraat diti om mantad ngai’ i’ dot id suang do ginawo’d tulun, om iri no o kososomu’ do tulun,’’ ka dau. ²⁴ Om tongkiad noddi i Yesus do kinoiyonon diri, om pakayaai no dau do hilo’d watas dit id somok do bandar do Tirus. Om salakoi no iyau do hiri’d iso’ o walai, om mada’ daa iyau dot oilaan do tulun do hino iyau’d hiri. Nga’ a’ i’ iyau milo do lumisok. ²⁵ Om haro ot iso’ o tondu’ do kianak do tondu’ do norusadan do rusod dot araat do nokorongou do pasal di Yesus. Om rikot no iyau dot id di Yesus om otud no dot id toguang dau, ²⁶ do minokitulung di Yesus do monunsub di rusod dot araat do mantad id tanak diri. I nopo tondu’ddi om okon i’ ko’ tulun do Yohudi. Kinosusuon nopo dau om hilo’d watas do Ponisia, i hilo’d pomogunan do Siria. ²⁷ Om boros ka di Yesus dot id dau, ’’Poguluonon nopod papaakan om i tangaanak. A’ i’ osonong do patahakon nogi’ do tasu o taakanon do tangaanak,’’ ka dau. ²⁸ Nga’ boros ka di tondu’ do suminimbar, ’’Tuan, iri piya i tasu di hiri’d sahau di mija’ nga’ mangakan id mumu’ di porotuon di tangaanak,’’ ka dau. ²⁹ Boros kaddi di Yesus dot id tondu’ddi, ’’Uli’ no, nokosoliwan no i rusod dot araat do mantad id tanak nu; tu’ iyo iddi o pinonimbar nu!’’ ka dau. ³⁰ Om uli’ noddi i tondu’ddi. Om korikot no iyau do hiri’d walai, om kokito no dau i tanak dau’ddi do poingodop do hiri’d toodopon. Om otopot i’ kopio do nokosoliwan no i rusod dot araat do mantad id tanak dau’ddi. ³¹ Om tongkiad noddi i Yesus di watas do Tirus, om pamanau no iyau do minaya’ do hiri’d bandar do Sidon do pinakayaan do hilo’d Tasik Galilia. Om waya’ no iyau di ralan di kawaya’ di watas di roitan do Hopod o Bandar. ³² Om hiri no do haro o tulun do pinapaatod dot id di Yesus do songulun o bobou om bosukon. Om pokikamaai no diyolo’ di Yesus i tulun diri. ³³ Om angatai noddi di Yesus i tulun di bobou om bosukon diri do tumongkiad do mantad id tulun dit ogumu’. Om posonsongo’ no di Yesus i tunturu’ dau dot id tolingo goduwo di tulun diri. Om pomodula’ no i Yesus, om tuduo’ no dau di dula’ dau i dila’ di tulun diri. ³⁴ Om tingaha’ noddi i Yesus do hilo’d tawan, om pomuhobo no iyau dot opuhod, om boro-boros nogiddi iyau di tulun diri do poingkaa, ’’Ipata,’’ ka, komoyon nopoddi om, ’’Ukab no!’’ ka. ³⁵ Om diiri i’ om diiri do nokorongou i tulun diri, om noidu’ i katakong di dila’ dau, om osonong noddi iyau do moro-boros. ³⁶ Om oduhai noddi di Yesus iyolo’ do popinsusui’ddi dot id disai nopo o tulun. Nga’ maha’ nogi’ dit oduhan kopio iyolo’ di Yesus do popinsusui’ddi om okon nogi’ do popinsusuyo’ diyolo’ iri. ³⁷ Om oinsanan nopo i tulun di nokorongou’ddi dot ongoimayaan. Boros ka diyolo’, ’’Ongosonong ngai’ nopo i winonsoi dau! Tu’ iri piya i bosukon nga’ korongou noddi, om i bobou nga’ koboros noddi!’’ ka.

¹ Om a’ po alaid do mantad diri, om haro po kawagu ot iso’ o tinimungan do tulun do ruminikot do tuminimung. Om lohowo’ ngai’ noddi di Yesus i tumatanud dau tu’ aiso’ no ot akanon di tulun dot ogumu’ddi. Boros ka dau, ² ’’Osianan oku no dilo tulun dot ogumu’. Tu’ tolu noddi o tadau diyolo’ do moyo-woyo’ doho’ om aiso’ noddi o takanon diyolo’. ³ Om ondung suhuon ku iyolo’d muli’ dot a’ kaakan, om olikapan dotindo iyolo’ do hilo’d tanga’d ralan. Om okon-okon pondo om i tulun dit osodu’ o tadon,’’ ka dau. ⁴ Om boros ka di tumatanud di Yesus do suminimbar, ’’Kinoiyonon nopodti om osodu’ do kawalayan, om hinonggo’ddi o pongonuan do taakanon do kabagal do paakan do koinsanai’d tulun diti?’’ ka diyolo’. ⁵ Om uhoto’ no di Yesus iyolo’, ’’Piro poo roti dokoyu?’’ ka dau. ’’Turu’ poo,’’ ka diyolo’. ⁶ Om suhuo’ noddi di Yesus i tulun dot ogumu’ do mirikau do hiri’d tana’. Om ngoyo’ no dau i turu’ o roti’ddi. Om pongunsikou no iyau’d Kinorohingan. Om pogikobing-kobingo’ noddi dau i roti’ddi. Om patahako’ no dau di piro-piro i tumatanud dau do potikidon di tulun. Om wonsoyo’ noddi di tumatanud dau o miagal diri. ⁷ Om haro nogi’ o piro-piro po tinan do sada’ dot ongokooro’. Om pongunsikou no i Yesus dot id Kinorohingan dot i sada’ o kinopongunsikahan. Om suhuo’ no dau i piro-piro tumatanud dau do popotikid di sada’ddi. ⁸ - ⁹ Om akan noddi iyolo’ do gisom do nangayahan om haro i’ doti’ ot apat noribu o ginumu’ di tulun diri do minakan. Om timungo’ noddi di tumatanud di Yesus i noolu’ di taakanon diri — om turu’ po o balatak do noponu’. Om suhuo’ nogiddi di Yesus i tulun diri do muli’. ¹⁰ Om olomus nopoddi i Yesus om i piro-piro tumatanud dau do minongoi sakai di parau’ do minongoi’d hilo’d watas do Dalmanuta. ¹¹ Om rikot noddi dot id di Yesus o piro-piro o tulun do Parisi, om timpuun no iyolo’ do monokisimbar-simbar dau do maan daa diyolo’ do pomurunsut dau. Om suhuo’ no diyolo’ i Yesus do momonsoi do koimayaan do maan do tanda’ do mantad kopio iyau dot id Kinorohingan. ¹² Om awagat no kopio o ginawo di Yesus. Om simbar no iyau’d poingkaa, ’’Nunu o kobungou diti tulun do baino’ tu’ monuhu’ doho’ do momonsoi’d koimayaan? Amu’! A’ oku i’ momonsoi do tanda’ do miagal diri dot id diyolo’!’’ ka dau. ¹³ Om tongkiad noddi i Yesus diyolo’, om sakai no iyau di parau’ om pamanau no do kuminaa do hiri’d soborong di tasik. ¹⁴ Nga’ nokolihu i piro-piro tumatanud di Yesus do mongigit do roti di kabagal diyolo’. Om iso’ poddi o roti diyolo’ do hiri’d parau’. ¹⁵ Om boros ka di Yesus dot id diyolo’, ’’Antang-antangan no kopio dokoyu i pangambang do tapung di tulun do Parisi om i pangambang do tapung di Horudis,’’ ka dau. ¹⁶ Om timpuun noddi i piro-piro i tumatanud di Yesus do mogiboro-boros do pasal diri. Boros ka diyolo’, ’’Minomoros pogi’ iyau do miagal diri, nga’ aiso’ o roti toko’,’’ ka. ¹⁷ Om oilaan i’ di Yesus i pogibara-barasan diyolo’ddi. Om ponguhot noddi iyau diyolo’, ’’Nokuro tu’ mogiboro-boros kou do pasal dot aiso’ o roti? A’ kou toi koilo, om a’ kou po toi kosuhut? A’ no kopio atarom o pomusarahan dokoyu? ¹⁸ Kimato kou i’, om nokuro tu’ a’ kou kokito? Kitolingo kou i’, om nokuro tu’ a’ kou korongou? A’ toi dokoyu osorou ¹⁹ i limo no liob do roti di pinogikabing-kabing ku do pinaakanan di limo noribu o tulun? Om piro po o balatak do noponu’ do noolu’ di taakanon diri di nongoi dokoyu timungo’?’’ ka dau. ’’Hopod po om duwo o balatak,’’ ka diyolo’d suminimbar. ²⁰ Om uhoto’ po kawagu di Yesus iyolo’, ’’Tontok di pinogikabing-kabing ku i turu’ o liob di roti do pinaakanan dit apat noribu o tulun, om piro po o balatak do noponu’ di noolu’ di taakanon diri di nongoi dokoyu timungo’?’’ ka dau. ’’Turu’ po o balatak,’’ ka diyolo’. ²¹ Om boros ka kawagu di Yesus, ’’Iyo nopoddi, om a’ kou po kasai’ kosuhut?’’ ka dau. ²² Om korikot no iyolo’ do hilo’d Baitsaida. Om hiri no do pinapaatod o tulun dot id di Yesus do songulun o bolou do pokikamaan diyolo’ dau, om olingasan indo iyau. ²³ Om igitai no di Yesus i longon di tulun di bolou’ddi om ahako’ no dau do suminoliwan di bandar. Om dulaai no di Yesus i mato di tulun do bolou’ddi. Om kamao’ no dau i mato di tulun diri. Om uhoto’ no dau iyau do poingkaa, ’’Haro noddi ot okito nu?’’ ka dau. ²⁴ Om ontong no i tulun diri dot id dotimbabaan dau, om boro-boros nod, ’’Haro. Kokito oku noddi do tulun do manau-panau; nga’ miagal no iyolo’d kayu,’’ ka dau. ²⁵ Om kamao’ po kawagu di Yesus i mato di tulun diri. Om sonsod noddi kopio i tulun diri do minontong. Om kolingos no i mato dau. Om atarang ngai’ nopoddi do tokito dau. ²⁶ Om boro-boros noddi i Yesus di tulun diri, ’’Uli’ no, om kada’ no guli’ kawagu dot id bandar diri,’’ ka dau. ²⁷ Om ongoi no i Yesus om i piro-piro tumatanud dau do hiri’d kokompungan di posorili’ do Kaisaria Pilipi. Om maha’ di hiri no iyolo’d tanga’d ralan, om uhoto’ no di Yesus iyolo’ do poingkaa, ’’Isai oku’dti dot osorou’d tulun?’’ ka dau. ²⁸ Om boros ka diyolo’ do suminimbar, ’’Haro i’ o momoros dot: i Yohanis Gampamatis ko, om haro nogi’ o momoros dot i Ilia ko; om haro nogi’ o momoros dot iya’ nopo om iso’ di nabi di gulu po,’’ ka. ²⁹ Om ponguhot po kawagu i Yesus, ’’Nga’ isai oku dot osorou dokoyu?’’ ka dau. Om boros ka di Pitrus do suminimbar, ’’Iya’ nopo om i Raja’ di Gampamasi,’’ ka dau. ³⁰ Om sunudai noddi di Yesus iyolo’ dot a’ poposunud dot id disai nopo do pasal dau. ³¹ Om katalib poddi iri om timpuun no i Yesus do monuduk di piro-piro tumatanud dau, do mositi’ nod ogumu’ o koinggoritan di Tanak do Tulun om saapon nondo iyau di piro-piro o boyoon, om i boyoon dot imam om i piro-piro guru do Tourat. Om patayon nondo iyau, nga’ kotolu nopondod tadau om posion nondo kawagu iyau do mantad id kapatayon. ³² Om posondoto’ nopo di Yesus do pinopoboros iri dot id piro-piro di tumatanud dau. Om gayato’ noddi di Pitrus i Yesus do mininsodu-odu’ di piro-piro tumatanud di Yesus di suwai, om togodo’ no dau iyau. ³³ Nga’ koili no i Yesus om ontong no iyau di piro-piro tumatanud dau, om togodo’ no dau i Pitrus. Boros ka dau, ’’Poggidu’ do mantad hiti, oi Mogugumbal. Dot ino nopo pomusarahan nu om don tulun id pomusarahan; okon i’ ko’ pomusarahan do dong Kinorohingan,’’ ka dau. ³⁴ Om lohowo’ noddi di Yesus i tulun dot ogumu’ di hino’d hiri om i piro-piro tumatanud dau. Om boro-boros noddi iyau diyolo’ do poingkaa, ’’Tulun nopo dot orohian do tumanud doho’, om mositi’ nod lihuan i dau’d korohian, om sumaan do salib dau, om tumanud nondo doho’. ³⁵ Tu’ tulun nopo dit orohian nod momogompi’ do dau’d koposion, om okon nogindo dot atagakan di koposion dau. Nga’ tulun nopo di papatahak do koposion dau do gisom dot apatai dot iyoho’ o kapatahakan om i Habar dot Osonong do mantad id Kinorohingan om apasi nogindo kopio iyau. ³⁶ Tu’ nunu no o kountungan do tulun, dot asanganu ngai’ piya dau o pomogunan, nga’ atagakan indo iyau do koposion dau? ³⁷ Milo toi o koposion do poolonon do nunu nopo? ³⁸ Ondung ointingayaman o tulun do mangakun do tumatanud iyau doho’; om it a’ poposusui diti ponudukan ku dot id tulun dit angaraat om it a’ otumbayaan do Kinorohingan do maso’dti, om i Tanak do Tulun nga’ ointingayaman nondo do mangakun do tumatanud dau o tulun diri, do rumikot iyau do mikuwo’d kuasa’ do Tapa’ dau, om miwoyo’ di piro-piro o moloikat dit olidang,’’ ka di Yesus.

¹ Om poboroso’ po kawagu di Yesus diyolo’ o poingkaa, ’’Ilaai no dokoyu! Id pogialatan piya dokoyu’d hiti nga’ haro i’ ot a’ po apatai dot a’ po kokito’d Pomorintaan do Kinorohingan do mikuwo’d kuasa’,’’ ka dau. ² Om katalib poddi ot onom o tadau om angatai no di Yesus i Pitrus om i Yakub om i Yohanis, i tobpinai di Yakub do tuminakad dot iso’ o nuluhon dit akawas dot iyolo-yolo’. Om kosimban noddi o korupa-rupao’ di Yesus di maso diyolo’d poingontong dau. ³ Om i pakayan dau nga’ minumang purak gisom do mogulinau po o kopurako’. Om aiso’ no o songulun piya do hiti’d pomogunan di momumupu’ do kain, do milo do momupu’ do miagal kopio’ddi kopurak. ⁴ Om kokito noddi di tolu o tumatanud di Yesus do moro-boros i Yesus di Ilia om i Musa. ⁵ Om boro-boros noddi i Pitrus di Yesus do poingkaa, ’’Oi Guru, osonong no kopio do hiti toko’. Osonong nogi’ do popowonsoi iyahai do kiim, dot iso’ o diya’ om iso’ o di Musa om iso’ kawagu o di Ilia,’’ ka dau. ⁶ Otopot nopo kopio om a’ no i Pitrus koilo ondung nunu it apatut dau’d poboroson, tu’ moddosi no kopio iyau om i duwo tambalut dau. ⁷ Om tokop noddi o haun dot id diyolo’, om mantad no dot id haun diri do norongou diyolo’ o boros do poingkaa, ’’Iti no o Tanak ku di kosianan kopio ku. Pokinongou kou no dau!’’ ka. ⁸ Om olomus nopo iyolo’ do mikoroontong do hiri’d posorili’ diyolo’, om aiso’ noddi o nokito diyolo’d tulun do suwai do poinsugku’ diyolo’, do suwai ko’ i Yesus noo. ⁹ Om tontok di rumuhuk iyolo’ di nuluhon diri, om sunudai no di Yesus iyolo’ do poingkaa, ’’Kada’ dokoyu posunudo’ dot id disai nopo i nokito dokoyu di tiinu’ddi dot a’ po apasi do mantad id kapatayon i Tanak do Tulun,’’ ka dau. ¹⁰ Om minumboyo’ i’ iyolo’ di pinosunud di Yesus diri, nga’ id pogialatan nopo diyolo’ om tuminimpuun no iyolo’ do mogiboro-boros ondung nunu o komoyon di Yesus di boros dau dot, ’’apasi kawagu do mantad id kapatayon,’’ ka. ¹¹ Om uhoto’ no diyolo’ i Yesus, ’’Nokuro tu’ momoros i piro-piro guru do Tourat dot, ’Mositi’ no dot i Ilia po o mogulu do rumikot?’ ka,’’ ka diyolo’. ¹² Om boros ka di Yesus do suminimbar, ’’Atantu’ no dot i Ilia o mogulu do rumikot do mongoi posodia’ do koinsanai’d nunu nopo. Nga’ poingkuro no i Tanak do Tulun? Nokuro tu’ nokotulis dot id suang do Buuk do Kinorohingan dot ogumu’ nondo o koinggoritan dau om indaraaton iyau’d tulun? ¹³ Nga’ poboroson ku no dokoyu: Dot i Ilia nopo om nokorikot no, om wonsoyo’ nopod tulun dot id dau o poingkuro nopo i korohian diyolo’, om miontok nopo kopio iri di nokotulis mantad dot id Buuk do Kinorohingan do pasal dau,’’ ka dau. ¹⁴ Om soira’ di nokoguli’ i Yesus om i tolu o tumatanud dau dot id piro-piro o tumatanud dau’d suwai, om kokito no diyolo’ dot ogumu’ o tulun do hiri. Om haro nogi’ o piro-piro guru do Tourat do maso do monokisimbar-simbar di piro-piro tumatanud di Yesus. ¹⁵ Om kokito noddi di tulun i Yesus, om kongotigowo nopo iyolo’, om santangkus-tangkus nopoddi iyolo’ do mongoi suwau dau. ¹⁶ Om uhoto’ no di Yesus i piro-piro tumatanud dau do poingkaa, ’’Nunu i pogisimbar-simbaran dokoyu di piro-piro o gomponuduk do tugama’ddi?’’ ka dau. ¹⁷ Om simbar no i songulun dot id pogialatan di tulun dot ogumu’ do poingkaa, ’’Oi Guru, pootodon ku dot id diya’ iti tanak ku. Bobou iyau tu’ norusadan iyau’d rusod dot araat. ¹⁸ Ondung inggoriton iyau di rusod diri, om popinliidon nopo iyau dot id tana’. Om mogimputa’ nondo o kabang dau, om marit-ngarit o nipon, om kumodou nopo o tinan dau. Om nosuhu’ ku no daa i piro-piro tumatanud nu do monunsub di rusod dot araat diri, nga’ a’ i’ iyolo’ nokosunsub,’’ ka dau. ¹⁹ Om boros ka di Yesus dot id diyolo’, ’’Aranaban oku no kopio dokoyu’dti! Otopot no kopio do tulun kou dit a’ otumbayaan. Songkuro po o koloido’ ku do poinsugku’ kasai’ dokoyu om papalanut do ginawo ku dot id dokoyu? Ngoyo’ hitio’ i tanak diri!’’ ka dau. ²⁰ Om ngoyo’ noddi diyolo’ hirio’d di Yesus i tanak diri. Nga’ kokito nopo di rusod dot araat i Yesus om pokohiso’ nopo di rusod dot araat i tinan di tanak om kohunduk nopoddi i tanak diri gisom do minliid po do hiri’d tana’. Om muta’-puta’ tomod o kabang dau. ²¹ Om uhoto’ no di Yesus i tapa’ di tanak, ’’Songkuro no o koloidon dilo’ do miagal diti?’’ ka dau. ’’Mantad po dit okoro’ po,’’ ka di tapa’ di tanak do suminimbar. ²² Boros ka kawagu di tapa’ di tanak, ’’Asaru’ no i rusod dot araat do tumotos daa do mamatai dilo tanak, do maan no posuboo’ do tapui om porotuon no dot id waig. Nga’ milo ko nopo daa do monulung, om insianai no iyahai om tulungo’ no kopio iyahai!’’ ka dau. ²³ Om boros ka di Yesus do suminimbar, ’’Nunu ka nu’ddi? Ondung milo ko no, ka nu? Milo ngai’ i’ do wonsoyon dot otumbayaan i tulun!’’ ka dau. ²⁴ Om pagarango’ nopo di tapa’ di tanak o poingkaa, ’’Otumbayaan oku i’ oi Tuhan. Nga’ a’ kosongkuro kogiroto’ do kotumbayaan ku. Tulungo’ oku no om kogirot i’ o kotumbayaan ku!’’ ka dau. ²⁵ Om soira’ di nokito di Yesus i tulun dot ogumu’ do tumimpuun nod murugun, om barasai no dau i rusod dot araat diri, ’’Oi rusod di bosukon om i bobou, suhuon ku iya’ do sumoliwan do mantad id tanak diti, om kada’ nondo kopio guli’ do mongoi suang dau,’’ ka dau. ²⁶ Om pomogiak no i rusod dot araat diri om pokohiso’ no dau o tinan di tanak, om soliwan nogiddi. Om iyo poddid rata’ o kokitanan di tanak, gisom dot oinsanan nopo i tulun do minomoros do, ’’Napatai no iyau!’’ ka. ²⁷ Nga’ igitai no di Yesus o longon di tanak do pinopotungag. Om tungag noddi i tanak diri. ²⁸ Om kasalakoi poddi i Yesus do hiri’d walai, om rikot no i piro-piro o tumatanud dau do hiri dot iyolo-yolo’. Om uhoto’ no diyolo’ i Yesus, ’’Nokuro ma tu’ a’ iyahai nokosunsub di rusod dot araat diri?’’ ka. ²⁹ Om boros ka di Yesus do suminimbar, ’’Rusod nopod araat do miagal diri, om a’ i’ milo do sunsubon do poingkuro nopo o ralan do monunsub, suwai ko’ sumambayang poo,’’ ka dau. ³⁰ Om tongkiad noddi do kinoiyonon diri i Yesus om i tumatanud dau, om lombus no iyolo’d minamanau do minaya’ do hilo’d Galilia. Om mada’ i’ i Yesus dot oilaan do tulun do suwai i kinoiyonon dau, ³¹ tu’ maso dau do monuduk di tumatanud dau. Boros ka di Yesus, ’’Patahakon nondo i Tanak do Tulun dot id kuasa’ do tulun, om patayon nondo iyau, nga’ kotolu nopondod tadau om apasi indo iyau kawagu!’’ ka. ³² Om a’ i’ kosuhut i tumatanud di Yesus di pinotuduk di Yesus diri, nga’ ooris iyolo’ do monguhot dau. ³³ Om korikot noddi iyolo’ do hilo’d Kapornaum. Om kasalakoi poddi iyolo’ do hiri’d walai, om uhoto’ no di Yesus i piro-piro tumatanud dau, ’’Nunu i pogisimbar-simbaran dokoyu di hilo’d tanga’d ralan di tiinu’ddi?’’ ka dau. ³⁴ Nga’ a’ nopo iyolo’ suminimbar, tu’ minogisimbar-simbar i’ iyolo’ ondung isai it agayo o ngaran di hiri po iyolo’d tanga’d ralan. ³⁵ Om irikau noddi i Yesus om lohowo’ no dau i hopod om duwo o tumatanud dau’ddi. Om poboroso’ no dau dot id diyolo’ o poingkaa, ’’Isai nopo o tulun dot orohian dot id gulu om mositi’ no do tumohuri iyau. Om sumiliu iyau do susuhuon do koinsanai’d tulun,’’ ka dau. ³⁶ Om ngoyo’ no di Yesus o tiso’ tanak dit okoro’ po om poingkakato’ no dau i tanak diri dot id dotoguangan diyolo’. Om gopuso’ no dau i tanak om boro-boros no iyau di piro-piro tumatanud dau do poingkaa, ³⁷ ’’Tulun nopo di rumamit do songulun o tanak do miagal diti dot iyoho’ o kopomoromitan, om komoyon nopoddi om rumamit no iyau doho’. Om i tulun di rumamit doho’ nga’ okon i’ ko’ iyoho’ noo o romiton dau nga’ rumamit nogi’ iyau di minonuhu’ doho’,’’ ka dau. ³⁸ Om boro-boros noddi i Yohanis di Yesus do poingkaa, ’’Oi Guru, nokokito iyahai dot iso’ o tulun do monunsub do Rogon do rumait do ngaran nu. Om oduhai noddi dahai iyau tu’ iyolo’ nopo om okon i’ ko’ mantad id pogialatan toko’,’’ ka dau. ³⁹ Nga’ boros ka di Yesus, ’’Kada’ dokoyu iyau oduhai, tu’ aiso’ i’ o tongosongulun piya do milo do momonsoi’d koimayaan do rumait do ngaran ku di mitilombus nopondo do momohingi-hingi doho’. ⁴⁰ Tu’ tulun nopo dit a’ sumaap dati’ om sumokodung no dati’. ⁴¹ Soro-sorohon no dokoyu! Tulun nopo di popoinum dokoyu dot i tumanud kou di Raja’ do Gampamasi o kopoinuman dau dokoyu, om atantu’ no do somulian i’ iyau’ddi,’’ ka dau. ⁴² Om poboroso’ po kawagu di Yesus o poingkaa, ’’Isai nopo i mamalid dot ongoiso’ diti tangaanak dot ongokoro’ podti, do gisom dot a’ nondo iyolo’ otumbayaan doho’, om osonong nogi’ do lontoidan do watu di pongingisar o liou dau, om pataamon do hilo’d rahat. ⁴³ Ondung ino longon nu o kobungou diya’ do momonsoi’d dusa, om potodon nogi’ i longon nu’ddi! Osonong nogi’ do poimpasi ko do poinsugku’d Kinorohingan dot iso-iso’ piya o longon nu ko’ mantad do hino goduwo o longon nu do kosuang do tapui naraka dit a’ milo’d pisokon. ⁴⁴ [Hilo’ nopo om a’ no milo’d pisokon i tapui, om giuk nga’ a’ i’ matai.] ⁴⁵ Om ondung gakod nu o kobungou diya’ do momonsoi’d dusa, om potodon nopo i gakod nu’ddi, tu’ osonong nogi’ do poimpasi ko do poinsugku’d Kinorohingan dot iso-iso’ piya o gakod ko’ mantad do hino goduwo o gakod nu do kosuang di tapui naraka. ⁴⁶ [Om hilo’ nopo om a’ no milo’d pisokon i tapui, om giuk nga’ a’ i’ matai.] ⁴⁷ Om ondung mato nu o kobungou diya’ do momonsoi’d dusa, om irulon nopo i mato nu’ddi. Osonong nogi’ dot aiso’ piya o tiso’d mato do sumuang do Pomorintaan do Kinorohingan ko’ hino goduwo o mato nu om pataamon ko indo do hilo’d tapui naraka. ⁴⁸ Om hilo’ nopo om a’ no milo’d pisokon i tapui, om giuk nga’ a’ i’ matai. ⁴⁹ Pointikid-tikid do tulun om lidangan indo do tapui, do miagal di porsombahan di sinumbali’, tu’ lidangan di silaon. ⁵⁰ Silaon nopo om osonong kopio, nga’ ondung oidu’ o koosino’ di silaon diri, om a’ nori milo do mosin kawagu. Iyo nopoddi, om siliu kou no do miagal do silaon — mogiuulud kou no,’’ ka dau.

¹ Om tongkiad noddi i Yesus do kinoiyonon diri, om pakayaai no dau do hilo’d watas do Yudia om hilo’d watas dit id soborong do Bawang do Yordan. Om ogumu’ po kawagu o tulun do ruminikot do tuminimung do posorili’ di Yesus. Om ponuduk noddi i Yesus diyolo’ do miagal di koubasanan kasai’ dau. ² Om rikot no dot id dau o piro-piro tulun do Parisi do mongoi daa pomurunsut dau. Om uhoto’ no diyolo’ i Yesus do poingkaa, ’’Tumanud nopo do Tourat toko’, om koino-ino toi o kusai do magada’d sawo dau?’’ ka diyolo’. ³ Om boros ka di Yesus do suminimbar, ’’Nunu ka dot oturan di tinahak di Musa dokoyu?’’ ka dau. ⁴ Om boros ka diyolo’ do suminimbar, ’’I Musa nopo om potumboyo’ i’ do kusai do magada’ do sawo dau, do kopomonsoi po iyau’d surat do kopiadaan,’’ ka. ⁵ Om boros ka di Yesus dot id diyolo’, ’’Minonulis pogi’ i Musa dot oturan do miagal diri nga’ mantad id kongosongkiwalo’ dokoyu. ⁶ Tontok di wonsoyo’ id Kinorohingan o tulun om pinoboros dot, ’Winonsoi iyolo’d Kinorohingan do kusai om tondu’,’ ka. ⁷ ’Om iri no o kotongkiadan do kusai do mantad id tina’ om tapa’ dau om kosugku’ i’ iyau di sawo dau, ⁸ om osiliu nondo iyolo’ dot iso-iso’,’ ka. Om okon noddi ko’ duwo po iyolo’, suwai ko’ iso’ poo iyolo’. ⁹ Om iri no o kokuwaan, do nunu nopo i pinopiiso’ do Kinorohingan om a’ no koino-ino do pitongkiadon do tulun!’’ ka di Yesus. ¹⁰ Om kosuang poddi iyolo’ do hiri’d walai, om ponguhot no di Yesus i piro-piro tumatanud dau do pasal diri. ¹¹ Boros kaddi di Yesus dot id diyolo’, ’’Isai nopo o kusai do magada’ do sawo dau om kumawin indo kawagu do tondu’d suwai, om magampahu’ no i kusai’ddi dot id sawo dau dit id gulu. ¹² Om iyo nogiddi o tondu’ di magada’ do sawo dau om mokikawin indo do kusai’d suwai, tu’ iyau nga’ kapagampahu’ nogi’,’’ ka dau. ¹³ Om haro o piro-piro tulun do pinapaatod do tangaanak dot id di Yesus do pokikamaan diyolo’ dau om pokibarakatan. Nga’ togodo’ noddi di piro-piro tumatanud di Yesus i tulun diri. ¹⁴ Om kokito poddi di Yesus o miagal diri, om kotogod no iyau. Om boros kaddi dau dot id piro-piro di tumatanud dau, ’’Pologoso’ nopo ilo tangaanak do rumikot dot id doho’. Kada’ dokoyu iyolo’ oduhai, tu’ iyo no diyolo’ o tulun di kasanganu do Pomorintaan do Kinorohingan. ¹⁵ Soro-sorohon no dokoyu iti: Isai nopo i rumikot dot id Kinorohingan dot a’ iyo do tanak o kowoyo-woyoo’, om a’ no kosuang di Pomorintaan do Kinorohingan,’’ ka dau. ¹⁶ Om koboros poddi di Yesus o miagal diri, om gopuso’ noddi dau i tangaanak diri, om pintikido’ no dau do mangama’ i tangaanak do mamarakat diyolo’. ¹⁷ Tontok di luminombus i Yesus do minamanau, om haro’ddi o songulun do mangkus-tangkus nopo do ruminikot dot id di Yesus. Om otud no iyau dot id toguang di Yesus. Om boros ka dau do minonguhot, ’’Oi Guru dit osonong, nunu ot apatut ku’d wonsoyon om kaanu oku i’ do koposion dit otopot kopio om i poingompus?’’ ka dau. ¹⁸ Om boros ka di Yesus do suminimbar, ’’Nokuro tu’ roitan oku diya’ dot osonong? Tu’ aiso’ i’ ot osonong, suwai ko’ Kinorohingan noo. ¹⁹ Noilaan ngai’ nu no it oturan do Kinorohingan do poingkaa, ’Kada’ pamatai, kada’ pagampahu’, kada’ panakau, kada’ pongudut, kada’ ponipu’, om pusohon no o tapa’ om tina’ nu,’ ka,’’ ka dau. ²⁰ Boros ka di tulun diri, ’’Koinsanai dit oturan diri om nangatanud ngai’ ku no, do mantad po dit okoro’ oku po, oi Guru,’’ ka dau. ²¹ Om ontong no i Yesus di tulun diri do mikuwo’d osianan iyau dau, om boro-boros noddi iyau do poingkaa, ’’Iso’ poo ot apatut nu’d wonsoyon. Ngoyon ngai’ no padagango’ i dapu’ nu; om patahakon no i tusin do gatang diri dot id tulun do mosikin, om kaanu ko nondod dapu’ do hilo’d surga. Om owonsoi nu pondo o miagal diri, om rumikot no do mongoi tanud doho’,’’ ka dau. ²² Nga’ korongou poddi di tulun diri i boros di Yesus do miagal diri, om lunggui nopo iyau, om tongkiad no iyau do mantad id kinoiyonon diri do mikuwo’d tumongob tomod, tu’ kaya’ i’ kopio iyau. ²³ Om ontong noddi i Yesus di piro-piro tumatanud dau, om poboroso’ no dau diyolo’ o poingkaa, ’’Osusa’ no kopio o tulun do kaya’ do sumuang di Pomorintaan do Kinorohingan!’’ ka dau. ²⁴ Nga’ ongosuayan ngai’ nopo i tumatanud di Yesus do nokorongou di boros di Yesus do miagal diri. Nga’ boro-boros po kawagu i Yesus diyolo’ do poingkaa, ’’Oi tangaanak ku, atantu’ no dot osusa’ do sumuang di Pomorintaan do Kinorohingan! ²⁵ Osonong-sonong nogi’ o songinan ot unta do sumuang dot id luang do dalat ko’ mantad do tulun do kaya’ do sumuang di Pomorintaan do Kinorohingan,’’ ka dau. ²⁶ Om ongosuayan tomod i tumatanud di Yesus do nokorongou di pinoboros dau do miagal diri, gisom do mogiuhot-uhot po iyolo’ do poingkaa, ’’Iyo nopoddi, om isai po ot apasi?’’ ka no diyolo’. ²⁷ Om ontong no i Yesus diyolo’ om boro-boros no iyau do suminimbar diyolo’, ’’A’ no daa kopio milo’d wonsoyon do tulun o miagal diri, nga’ aiso’ i’ ot a’ milo’d Kinorohingan do wonsoyon, milo ngai’ id Kinorohingan do wonsoyon,’’ ka dau. ²⁸ Om boros kaddi di Pitrus, ’’Antangai pogi’, nga’ aiso’ no ot a’ dahai tinongkiadan tu’ tumanud no iyahai diya’,’’ ka dau. ²⁹ Om boros ka di Yesus, ’’Kotumbayaai kou no: Do tulun nopod tuminongkiad do sompiiyon dau, ko’ tobpinai dau do tongokusai ko’ tobpinai dau do tongoondu’, ko’ tina’ dau ko’ tapa’ dau ko’ tangaanak dau ko’ tumo dau, dot iyoho’ om i Habar dot Osonong do mantad id Kinorohingan o kotongkiadan, ³⁰ om ogumu’ pondo ko’ iri ot aanu di tulun diri do maso’d dinondo. Kaanu i’ iyau dot inghatus kopiluap o kogumuon do walai, om tobpinai’d kusai, om tobpinai’d tondu’, om tina’ om tangaanak, om tumo, — om koinggoritan nogi’. Nga’ koimbagu nopondo om kaanu nondo iyau do koposion dit otopot kopio om i poingompus. ³¹ Nga’ ogumu’ nondo o tulun dit id gulu daa do dinondo poo nga’ kotohuri indo do koimbagu, om ogumu’ o tulun di potohuri daa do dinondo poo, nga’ kopogulu indo do koimbagu,’’ ka dau. ³² Om tontok di manau-panau no i Yesus om i piro-piro tumatanud dau do pakayaan do hilo’d Yorusalim, om hiri’d gulu diyolo’ i Yesus do manau-panau, om atangkabo ngai’ nopo i tumatanud dau. Om iri tulun di muhut-suhut diyolo’ nga’ kopuriman ngai’ nogi’ do moddosi. Om lohowo’ ngai’ noddi di Yesus i tumatanud dau dot iyolo-yolo’ om poiloo’ no dau iyolo’ dit osiliu dot id dau. ³³ Boros ka dau, ’’Pokinongou kou no! Kumaa toko’ nodti do hilo’d Yorusalim. Om hilo’ nopondo om patahakon nondo i Tanak do Tulun dot id piro-piro o boyoon dot imam om id guru do Tourat. Om hukuman nondo iyau do kapatayon, om patahakon nogindo dot id tulun dit okon ko’ Yohudi. ³⁴ Om hingi-hingion nondo diyolo’ iyau, om pindulaan, om inggoriton, om posolibon iyau. Nga’ kotolu nopondod tadau om apasi indo kawagu iyau,’’ ka dau. ³⁵ Om rikot noddi dot id di Yesus i Yakub om i Yohanis. Iyolo’ nopo om tangaanak di Sabidi. Om boros ka diyolo’ dot id di Yesus, ’’Oi Guru, haro daa ot iso’ do korohian dahai do wonsoyon nu dot id dahai,’’ ka diyolo’. ³⁶ ’’Nunu o korohian dokoyu’d wonsoyon ku dot id dokoyu?’’ ka di Yesus do minonguhot diyolo’. ³⁷ Om boros ka diyolo’d suminimbar, ’’Orohian daa iyahai do poirikohonon nu ot iso’ dahai dot id dawananan nu om iso’ ot id dogibangan nu, do momorinta’ ko do mikuwo’d kagayaan,’’ ka diyolo’. ³⁸ Om boros ka di Yesus dot id diyolo’, ’’A’ kou i’ koilo ondung nunu kopio i pokionuon dokoyu’ddi. Kasaap kou i’ tuu do monginum dot id sangkir do koinggoritan dit inumon ku, om sumuang dot id lansang do koinggoritan di suangon ku?’’ ka dau. ³⁹ ’’Kasaap,’’ ka diyolo’d suminimbar. Om boros ka kawagu di Yesus dot id diyolo’, ’’Otopot i’ dot iyokoyu nga’ koinum indo dot id sangkir do koinggoritan dit inumon ku om kosuang kou do hiri’d lansang do koinggoritan di suangon ku. ⁴⁰ Nga’ pasal no di koirikau dot id dawananan om id dogibangan ku om okon i’ ko’ iyoho’ o kikuasa’ do manantu’ddi. Kinorohingan i’ o manantu’ ondung isai o koirikau do hiri’d kinoiyonon diri,’’ ka dau. ⁴¹ Om tontok di nokorongou i hopod o tumatanud di Yesus di suwai do pasal diri, om kotogod no iyolo’ di Yakub om i Yohanis. ⁴² Om lohowo’ ngai’ noddi di Yesus iyolo’, om boro-boros no iyau do poingkaa, ’’Koilo kou i’ dot iri nopo i piro-piro o boyoon do bansa’ dit a’ kotutun do Kinorohingan om mongulok-ulok nopo di rayat diyolo’. Om mongudipon di rayat i tulun dit ongkipangkat. ⁴³ Nga’ iyokoyu nopo om a’ i’ koino-ino do miagal diri. Tu’ tulun nopo dit orohian dot agayo o ngaran dot id pogialatan dokoyu, om mositi’ no do sumiliu’d mogobi-obi’ dokoyu. ⁴⁴ Om iri tulun dit orohian do kopogulu dot id pogialatan dokoyu, nga’ mositi’ no do sumiliu’d turipon do koinsanai’d tulun. ⁴⁵ Tu’ iri Tanak do Tulun nga’ okon i’ ko’ mokiobi-obi’ o kinorikatan, suwai ko’ kinorikatan nopo dau om mongoi pogobi-obi’, om papatahak do tinan dau do gisom dot apatai do mamasi do tulun dot ogumu’,’’ ka dau. ⁴⁶ Om korikot noddi iyolo’ do hilo’d Yorikou. Om tontok di tuminongkiad i Yesus om i piro-piro tumatanud dau, om i tulun dot ogumu’ do mantad id bandar diri, om haro’ddi o songulun o bolou dot i Bartimius o ngaran, i tanak di Timius, do poirikau do hiri’d tisan do ralan do mokipuhawang. ⁴⁷ Om korongou noddi iyau dot iri nopo i kawaya’ do hiri nga’ i Yesus, i tulun do Nasarit. Om pinglohou noddi iyau do poingkaa, ’’Oi Yesus i Tanak di Daud! Kosianai no doho’,’’ ka. ⁴⁸ Om togodo’ no iyau di tulun dot ogumu’ om oduhai no diyolo’ iyau do minglohou. Nga’ okon nogi’ do pomolohou kawagu iyau dot opuhod dot, ’’Oi Tanak di Daud! Kosianai no doho’!’’ ka. ⁴⁹ Om undorong noddi i Yesus om boro-boros nod, ’’Lohowo’ iyau,’’ ka. Om lohowo’ noddi diyolo’ i tulun do bolou’ddi. Om boro-boros no iyolo’ dau, ’’Kotood no! Tu’ lohowon ko no di Yesus, ingkakat!’’ ka. ⁵⁰ Om pataamo’ nopo di tulun di bolou i rasuk dau dit id soibau om olomus nopoddi do miningkakat do minongoi rapou di Yesus. ⁵¹ Om boros ka di Yesus do minonguhot dau, ’’Nunu daa o korohian nu’d wonsoyon ku dot id diya’?’’ ka. Om boros ka di tulun di bolou’ddi do suminimbar, ’’Oi Guru, orohian oku’d kokito,’’ ka dau. ⁵² Om boros ka di Yesus, ’’Pamanau no, nolingasan ko no, tu’ otumbayaan ko i’ doho’,’’ ka dau. Om diiri i’ om diiri do nokokito i tulun diri. Om tanud noddi iyau di Yesus do minamanau.

¹ Tontok di mirririkot no iyolo’ do hilo’d Yorusalim, om korikot no iyolo’ do hilo’d bandar do Baitpagi om hilo’d Baitani, i hilo’d guas di Nulu-Nulu do Saitun. Om hilo’ no do sinuhu’ di Yesus o duwo di tumatanud dau do mogulu dau. ² Boros ka dau dot id diyolo’, ’’Ongoi kou do hilo’d kampung dit id dabantalan dokoyu. Om korikot kou nopondo do hiri’d kampung diri om okito nondo dokoyu ot iso’ o tanak do kaladai do poingkogos, it a’ po noumbalan do tulun do sumakai. Om iyadan nopo dokoyu i kaladai’ddi om gayaton no do kumaa’d hiti. ³ Om ondung haro o tulun do monguhot dokoyu ondung nokuro tu’ iyadan dokoyu i kaladai’ddi, om sunudan no dot, ’Gunaon do Tuhan iti, om pogulion i’ dau dot oruhai,’ kanto dokoyu,’’ ka dau. ⁴ Om pamanau goduwo noddi i tumatanud di Yesus diri, om kokito no diyolo’ ot iso’ o tanak do kaladai do poingkogos do hiri’d wawayaan di walai dit id tisan do ralan, om iyado’ no diyolo’ i polihan di kaladai’ddi. ⁵ Om uhoto’ no iyolo’ di piro-piro o tulun di poingkakat do hiri, ’’Ooi, kukuroyon dokoyu no? Nokuro tu’ iyadan dokoyu ino tanak do kaladai?’’ ka. ⁶ Om simbaro’ no diyolo’ i tulun diri do miagal di pinoboros di Yesus dot id diyolo’. Om pologoso’ nopoddi di tulun diri do ginayat diyolo’ i kaladai. ⁷ Om korikot noddi iyolo’ do hiri’d di Yesus, om lopikai no diyolo’ di rasuk diyolo’ dit id soibau i likud di kaladai, om sakai noddi i Yesus di kaladai’ddi. ⁸ Om ogumu’ddi o tulun do hiri do pinapalapik di rasuk diyolo’ dit id soibau do hiri’d tanga’d ralan, om iri no suwai om minongoi panatas do raan do kayu do hiri’d kokoyuan, om popingiliho’ nogiddi do hiri’d ralan. ⁹ Om mimboros ngai’ poddi dot opuhod i tulun di hiri’d gulu-gulu di Yesus om i hiri’d tohuri dau do poingkaa, ’’Royohon no o Kinorohingan! Abarakatan no i rumikot dot id suang do ngaran do Tuhan! ¹⁰ Barakatan id Kinorohingan i pomorintaan di rumikot do koimbagu — i pomorintaan di Daud, i taki-aki toko’! Royohon no o Kinorohingan it Asawat Kopio!’’ ka diyolo’. ¹¹ Om korikot noddi i Yesus do hilo’d Yorusalim, om suang no iyau do hiri’d Walai’d Sasambayangan dot Agayo. Om mingontong diri iyau do hiri’d posorili’ dau. Nga’ oruhai noddi dot otuong om pamanau no iyau do kuminaa do hilo’d Baitani do mogiwoyo-woyo’ di hopod om duwo o tumatanud dau. ¹² Om tadau noddi kawagu di manau-panau no iyolo’ do mantad hilo’d Baitani, om louso’ no i Yesus. ¹³ Om hiri pod sodu’ om kokito no dau o songguas ot ara dit okohob o tuntu. Om ongoi noddi iyau do hiri’d guas dit ara do minongoi pogontong ondung haro o tua’ddi. Nga’ di nopoddi nokorikot iyau do hiri’d guas diri, om aiso’ i’ o tua’ suwai ko’ roun noo. Tu’ okon po ko’ maso do koponguaan dot ara. ¹⁴ Om boro-boros noddi i Yesus di guas dot ara diri do poingkaa, ’’Mantad pod baino’ om aiso’ no o tongosongulun piya do kaakan do tua’ nu!’’ ka dau. Om kongorongou i’ i tumatanud di Yesus di boros dau’ddi. ¹⁵ Om korikot noddi iyolo’ do hilo’d Yorusalim, om ongoi no kawagu i Yesus do hiri’d Walai’d Sasambayangan dot Agayo. Om uyungo’ ngai’ no dau i tulun di mogidagang-dagang do hiri. Om pinsomboliko’ ngai’ no dau i mija’ di tulun di monukar do tusin, om i timpohon di tulun do padagang do punai. ¹⁶ Om iso’ pod tulun nga’ aiso’ no o pologoson dau do mongigit do nunu nopo do maya’ do hiri’d natad di Walai’d Sasambayangan dot Agayo. ¹⁷ Om ponuduk noddi i Yesus di tulun do hiri do poingkaa, ’’Nokotulis no dot id suang do Buuk do Kinorohingan do minomoros o Kinorohingan do poingkaa, ’Roitan nondod tiiyonon do sumambayang do koinsanai’d bansa’ i walai ku,’ ka. Nga’ siniliu nogi’ dokoyu iti do lilisokon do gampanakau!’’ ka dau. ¹⁸ Om korongou noddi di piro-piro o boyoon dot imam om i guru do Tourat i boros dau’ddi, om pogihum noddi iyolo’ do ralan do mamatai di Yesus. Nga’ ooris i’ iyolo’ dau tu’ ongoimayaan ngai’ nopo i tulun do korongou di ponudukan dau. ¹⁹ Om sosodopon noddi om tongkiad no i Yesus om i piro-piro o tumatanud dau di bandar diri. ²⁰ Tontok dit osuab po di tadau kawagu, di nakawaya’ kawagu iyolo’ di guas dit ara diri, om kokito no diyolo’ do napatai no i guas om i gamut di kayu’ddi. ²¹ Om kosorou noddi di Pitrus i nosiliu di sangadau nogi’ do mantad diri. Om boro-boros no i Pitrus di Yesus, ’’Oi Guru, antangai pogi’ nga’ noriou no moti’lo guas dot ara di pinapalan nu’ddi!’’ ka dau. ²² Om boros ka di Yesus, ’’Kotumbayaai nod Kinorohingan. ²³ Tu’ milo kou i’ do momoros dot id nulu-nulu diti do, ’Kakat no om tumaam i’ do hilo’d rahat,’ ka. Om osiliu indo kopio o miagal diri dot id dokoyu dot a’ no mikoduwo o ginawo dokoyu, om otumbayaan kou no kopio dot osiliu o nunu nopo i poboroson dokoyu. ²⁴ Iyo nopoddi om soro-sorohon no dokoyu iti: Soira’ nopod sumambayang kou do mokianu do nunu nopo, om kotumbayaai kou no do nakatahak nod Kinorohingan dot id dokoyu i pinokianu dokoyu’ddi. Om aanu indo kopio dokoyu iri. ²⁵ Ondung sumambayang kou, om haro indo o karaatan dokoyu dot id iso’ o tulun, om ompunan po dokoyu’d gulu i tulun diri, om ompunan indo di Tapa’ di hilo’d surga o koinsanai di dusa dokoyu. ²⁶ [Ondung a’ kou mangampun do tulun do suwai, om i Tapa’ dokoyu do hilo’d surga nga’ a’ no mangampun di dusa dokoyu,’’ ka]. ²⁷ Om guli’ noddi kawagu iyolo’ do hilo’d Yorusalim. Om tontok di manau-panau i Yesus do minsorili’ di Walai’d Sasambayangan dot Agayo, om rikot no i piro-piro o boyoon dot imam, om guru do Tourat, om i boyoon do tulun do Yohudi dot id di Yesus. ²⁸ Om uhoto’ no diyolo’ i Yesus do poingkaa, ’’Nunu kopio o kuasa’ nu do minomonsoi ngai’dti? Isai o minanahak diya’d kuasa’?’’ ka diyolo’. ²⁹ Om boros ka di Yesus, ’’Iyoho’ nga’ haro i’ o tuhoton dot id dokoyu. Om osimbar po dokoyu iri, om poboroson ku nogindo dot id dokoyu ondung isai o minanahak doho’d kuasa’ do mingwonsoi ngai’dti. ³⁰ Sunudai oku daa dokoyu ondung honggo o tadon di kuasa’ di Yohanis do mamatis do tulun. Kinorohingan ko’ tulun?’’ ka dau. ³¹ Om pogiboro-boros noddi i piro-piro o boyoon dot imam, om i boyoon do tulun do Yohudi. Boros ka diyolo’, ’’Ondung poboroson toko’ do, ’Mantad id Kinorohingan,’ ka, om poboroson nondo dau do, ’Nokuro tu’ a’ kou minonongkuyaan di Yohanis?’ ka nondo dau. ³² Nga’ osusa’ indo do poboroson do, ’Mantad id tulun,’ ka, tu’ sorohon ngai’ idti tulun dot ogumu’, do nabi i Yohanis,’’ ka diyolo’. ³³ Om posimbaro’ noddi diyolo’ o poingkaa, ’’A’ i’ iyahai koilo,’’ ka. Om boros kaddi di Yesus dot id diyolo’, ’’Iyo nopoddi, om iyoho’ nga’ a’ i’ poposunud dokoyu ondung disai’d kuasa’ ku do mingwonsoi ngai’dti,’’ ka dau.

¹ Om timpuun noddi i Yesus do moro-boros dot id piro-piro o boyoon dot imam om i guru do Tourat, om i boyoon do tulun do Yohudi do pinawaya’ do poinukadan do poingkaa, ’’Haro o songulun do minananom dot anggur dot id kabun dau, om pagaro’ no dau o pointutuk di kabun diri. Om pongukad no iyau’d luang do pawansayan do pamagaan di tua’ dot anggur, om pomonsoi nogiddi iyau do sinurambi’ dot akawas dot iyonon do madtamong di kabun diri. Om posiwaai noddi dau i kabun dot anggur diri do piro-piro o tulun, om pamanau no iyau do minongoi do hilo’d pomogunan do suwai. ² Om korikot poddi o maso do kopongupuan di tua’ dit anggur, om ponuhu’ no i sanganu di kabun dot anggur, dot iso’ o susuhuon dau do mongoi solowot di tulun di minoniwa’ di kabun dot anggur diri, do mongoi panganu di dau’d bahagi’. ³ Nga’ tangkapo’ nogi’ di tulun di minoniwa’ di kabun dot anggur i susuhuon diri. Om bobogo’ no diyolo’ iyau, om poulio’ tomod nopo diyolo’ i susuhuon diri dot aiso’ i’ o tinahak. ⁴ Om ponuhu’ po kawagu i sanganu di kabun dot anggur diri do songulun o susuhuon dau’d suwai do mongoi dot id diyolo’. Nga bobogo’ i’ di tulun di moniwa’ di kabun dot anggur o tulu di susuhuon diri, om uyungo’ no diyolo’ iyau om pininglupuan. ⁵ Om ponuhu’ po kawagu i sanganu di kabun diri do songulun di susuhuon dau’d suwai, do minongoi dot id diyolo’. Nga’ iri nopo i susuhuon diri, om patayo’ nopo diyolo’. Om ogumu’ po o susuhuon do suwai do minaan diyolo’ iyoo’ddi: tu’ haro i’ o binobog om haro o pinatai. ⁶ Om iso’ poddi i tanak di sanganu di kabun, di kosianan kopio dau do milo dau’d suhuon do mongoi kawagu dot id diyolo’. Om suhuo’ noddi dau i tanak dau’ddi do mongoi do hiri’d tulun di minoniwa’ di kabun dau. Poingkaa daa ot osorou dau, ’Atantu’ no do podulon i’ bo diyolo’ i tanak ku’ddi,’ ka. ⁷ Nga’ pogiboro-boros no i tulun di minoniwa’ di kabun dau do poingkaa, ’Ilo’ no moti’ o tumungkus diti kabun diti. Kainou patayo’ toko’ iyau, om aanu toko’ indo iti tungkusan dau!’ ka. ⁸ Om tangkapo’ no diyolo’ i tanak diri om patayo’ no. Om pataamo’ no diyolo’ i rata’ di tanak do hiri’d soliwan di kabun diri,’’ ka di Yesus. ⁹ Om ponguhot noddi i Yesus diyolo’ do poingkaa, ’’Nunu mando o wonsoyon di sanganu di kabun diri! Atantu’ no dot ongoyon dau patayo’ i tulun di minoniwa’ di kabun dau’ddi, om posiwaan nondo dau’d tulun do suwai i kabun diri. ¹⁰ Atantu’ no do nakapambasa’ kou i’ dot ayat diti, dot id suang do Buuk do Kinorohingan do poingkaa, ’Iri nopo i watu di nadaan di piro-piro o tukang mamaal do walai, om nosiliu nogiddi do watu dit agayo o guna’. ¹¹ Iti no o winonsoi’d Tuhan; om koimayaan toko’ no kopio iri,’ ka,’’ ka di Yesus. ¹² Om pokitatangkapan diri di piro-piro o boyoon do Yohudi i Yesus di nokorongou iyolo’ di poinukadan diri. Tu’ oilaan no diyolo’ dot iyolo’ i’ o komoyon di poinukadan diri. Nga’ moddosi i’ iyolo’ di tulun dot ogumu’. Om tongkiadai noddi diyolo’ i Yesus. ¹³ Haro o piro-piro o tulun do Parisi om piro-piro o tulun do mantad id pati’ di Horudis do sinuhu’ do mongoi pomurunsut di Yesus do piro-piro o ponguhatan. ¹⁴ Om rikot noddi iyolo’ dot id di Yesus, om boro-boros nod poingkaa, ’’Oi Guru, oilaan dahai dot otopot i’ o poboroson nu, om a’ ko nogi’ okurai-kurayan dot osorou’d tulun do suwai om posondoton nu nopo kopio o ponunuduk do pasal do korohian do Kinorohingan dot id tulun. Tu’ a’ ko i’ montong do pangkat do tulun. Sunudai daa iyahai ondung koino-ino iyahai do mambayar do sukai dot id di Kaisar ko’ amu’ do tumanud do Tourat? Apatut tuu do mambayar di sukai’ddi ko’ amu’?’’ ka diyolo’. ¹⁵ Nga’ oilaan i’ di Yesus do maan i’ toomod diyolo’ i ponguhatan diyolo’ddi. Om simbaro’ noddi dau do poingkaa, ’’Nokuro tu’ momurunsut kou daa doho’? Onuwai oku daa dot iso’ o tusin do pirok,’’ ka dau. ¹⁶ Om patahako’ no diyolo’ dot id di Yesus ot iso’ o tusin do pirok. Om ponguhot no i Yesus diyolo’, ’’Disai dilo gambar, om disai dilo ngaran?’’ ka dau. ’’Di Kaisar,’’ ka diyolo’d suminimbar. ¹⁷ Om boros kaddi di Yesus dot id diyolo’, ’’Iyo nopoddi om apatut id patahakon dokoyu di Kaisar i di Kaisar, om patahakon dokoyu’d Kinorohingan i dong Kinorohingan,’’ ka dau. Om ongosuayan nopoddi iyolo’ do nokorongou di boros dau’ddi. ¹⁸ Om haro’ddi o piro-piro o tulun do mantad id sinompuruan do tulun do Saduki do ruminikot dot id di Yesus. (Iyolo’ nopodti nga’ iso’ o sinompuruan do tulun dit a’ otumbayaan do posion kawagu i tulun di napatai.) ¹⁹ Om boro-boros no iyolo’ di Yesus do poingkaa, ’’Oi Guru, notulis no di Musa ot oturan dot id dati’ do poingkaa, ’Ondung apatai o songulun o kusai dit aiso’ po o tanak om iri no tobpinai dau ot apatut do mangawin di tondu’, i sawo daa dau’ddi. Om oonuan i’ do sinakagon i tulun di napatai,’ ka. ²⁰ Om nokoumbal i’ do haro o turu’ o tulun do mogiobpinai, om kawin no daa it id dotuo, nga’ aiso’ po o tanak dau om kapatai no iyau. ²¹ Om kowino’ no di tobpinai dau di koduwo i sawo daa dau, om kapatai i’ i kusai di koduwo’ddi dit aiso’ po o tanak diyolo’. Om iyo iddi o nosiliu dot id tobpinai dau di kotolu, ²² om iyo ngai’ nopoddi o nosiliu do gisom do noinsanan i turu’ o mogiobpinai. Om alaid noddi om kapatai no i tondu’ddi. ²³ Om tontok nopondo do tadau di posion kawagu o tulun di napatai, om isai nondo o sansawo di tondu’ddi? Tu’ nakapangawin ngai’ nopo di tondu’ i turu’ o kusai’ddi?’’ ka diyolo’. ²⁴ Om boros ka di Yesus do suminimbar, ’’Napalid kou no kopio. Tu’ a’ kou i’ kosuhut do komoyon di Buuk do Kinorohingan om i sinundu do Kinorohingan. ²⁵ Tu’ apasi nopondo kawagu i tulun di nangapatai, om a’ nondo iyolo’ kumawin kawagu. Tu’ iyo pondo iyolo’ di moloikat do hilo’d surga. ²⁶ Om pasal no di tulun di napatai do posion kawagu, om a’ kou toi nakabasa’ di buuk di Musa do pasal di bulungkut do mikit-sikit o tapui’ddi? Om nokotulis no dot id suang dot ayat diri do minomoros o Kinorohingan dot id di Musa do poingkaa, ’Iyoho’ no o Kinorohingan di Abraham om Kinorohingan di Isak, om Kinorohingan di Yakub,’ ka. ²⁷ Kinorohingan nopo om okon i’ ko’ Kinorohingan di tulun di napatai. Suwai ko’ Kinorohingan iyau di tulun di songimpasi. Napalid kou no kopio’d momusorou,’’ ka di Yesus. ²⁸ Om rikot no o songulun o guru do Tourat do minongoi pokinongou di pibara-barasan di Yesus om i tulun do mantad id sinompuruan do Saduki. Om kokito no di gomponuduk do tugama’ddi dot osonong nopo i Yesus do suminimbar di tulun diri. Om uhoto’ no dau i Yesus do poingkaa, ’’Nunu o ponuhuan dit agayo kopio dot id pogialatan do koinsanai di ponuhuan diri?’’ ka dau. ²⁹ Om boros ka di Yesus do suminimbar, ’’Ponuhuan nopo dit agayo kopio om poingkaa, ’Pokinongou kou no, oi bansa’ dot Israil! Iri nopo Tuhan i Kinorohingan toko’, om Tuhan dit iso’ noo. ³⁰ Kosianai nod Tuhan, i Kinorohingan nu do mikuwo’d aayi-ayi’ o ginawo nu, om aayi-ayi’ o koposion om pomusorou nu, om mikuwo’d aayi-ayi’ o kokorisan nu,’ ka. ³¹ Ponuhuan nod koduwo om poingkaa, ’Kosianai nod sompi’ ko’ iyokoyu ngai’, do miagal dot osianan ko do diya’d tinan,’ ka. Om aiso’ no o ponuhuan dot agayo ko’ mantad diti duwo o ponuhuan diti,’’ ka di Yesus. ³² Om boros ka di guru do Tourat diri dot id di Yesus, ’’Koontok no kopio iri oi Guru. Dot otopot i’ i pinoboros nu do poingkaa: Tuhan no i Kinorohingan dit iso’ noo, om aiso’ no o Kinorohingan do suwai. ³³ Om mositi’ no dot osianan o tulun do Kinorohingan do mikuwo’d aayi-ayi’ o ginawo dau om pomusorou dau, om aayi-ayi’ o kokorisan dau. Om mositi’ no dot osianan iyau’d tulun di sompi’ ko’ iyau ngai’ do miagal dot osianan do dau’d tinan. Om iri no ot osonong kopio, ko’ mantad do papatahak do porsombahan di sorobon, om i piro-piro o porsombahan do suwai do patahakon dot id Kinorohingan,’’ ka dau. ³⁴ Om koilaai noddi di Yesus dot osonong kopio o nisimbar di guru do Tourat. Om boro-boros noddi i Yesus dau do poingkaa, ’’Osomok ko no di Pomorintaan do Kinorohingan,’’ ka dau. Om aiso’ noddi o tongosongulun piya do katama’ do mongoi ponguhot di Yesus. ³⁵ Tontok di maso di Yesus do monuduk do hiri’d Walai’d Sasambayangan dot Agayo, om uhoto’ no di Yesus iyolo’. Boros ka dau, ’’Poingkuro i piro-piro o guru do Tourat do milo do momoros do sinakagon di Daud i Raja’ do Gampamasi? ³⁶ Dot i Daud piya — do notudukan di Rusod do Kinorohingan nga’ minomoros i’ do poingkaa, ’Boros kad Tuhan dot id Tuhan ku; irikau no dot id dawananan ku, gisom do poinsiribaon ku dot id diya’ i piro-piro o pisangod nu,’ ka. ³⁷ Om ondung rinoitan di Daud do, ’Tuhan’, i Raja’ do Gampamasi, om poingkuro’ddi iyau do sinakagon di Daud!’’ ka di Yesus. Angasanangan ngai’ nopo do mokinongou di ponudukan di Yesus i tulun dot ogumu’ di hiri’d Walai’d Sasambayangan dot Agayo. ³⁸ Om boro-boros no i Yesus diyolo’ do poingkaa, ’’Umbangan-banganan no dokoyu i piro-piro o guru do Tourat. Tu’ iyolo’ nopo om orohian dot anganaru o pakayan do mimpanau, om orohian do suahon do tulun do hiri’d pasar. ³⁹ Om orohian nopo iyolo’d mirikau do hiri’d tirikohonon di tulun dit ongkipangkat, di hirid walai’d sasambayangan, it iyonon dot ongosonong di hiri’d poginakanan. ⁴⁰ Om monipu’ nogi’ iyolo’ di tongoondu’ di nopuadan, om magahau di walai diyolo’. Om anaru tomod nondo o sambayang diyolo’ do pangalit-alit diyolo’ di kararaat diyolo’. Nga’ hukuman indod Kinorohingan iyolo’ddi dit awagat kopio do koimbagu,’’ ka di Yesus. ⁴¹ Om tontok di poirikau i Yesus do hiri’d hapak di poiiyanan do porsombahan di hiri’d Walai’d Sasambayangan dot Agayo. Om piantangan dau i tulun dot ogumu’ do mongoi poposuang di tusin diyolo’ do hiri’d pati’ di poiiyanan di porsombahan. Om ogumu’ o tulun do kaya’ do minongoi poposuang do tusin dot ogumu’. ⁴² Om rikot noddi o songulun o tondu’ di nopuadan om mosikin. Om ongoi no iyau poposuang do duwo no o tusin do tambaga’ do taparak dit okuri’ no kopio o suang. ⁴³ Om lohowo’ ngai’ no di Yesus i tumatanud dau, om boro-boros no diyolo’ do poingkaa, ’’Ilaai no dokoyu iti: Dot ilo’ nopo tondu’ do nopuadan om mosikin, om ogumu’ nogi’ o dau’d pinosuang do hilo’d pati’ ko’ mantad di pinosuang do koinsanai di tulun do suwai. ⁴⁴ Tu’ iyolo’ ngai’ nopo om pinapatahak dit a’ no diyolo’ aayi-ayi’. Nga’ iri nopo tondu’ di nopuadan diri om imumuyo’ nopo dau do papatahak o koinsanai di haro dot id dau, i pomoli i’ daa dau do kaakan-akanan,’’ ka dau.

¹ Om di nopo di tuminongkiad i Yesus di Walai’d Sasambayangan dot Agayo, om boro-boros no di Yesus o songulun do mantad id pogialatan di tumatanud dau. Boros ka dau, ’’Oi Guru, intong pogi’ dilo piro-piro o walai. Om ilo watu do pinawaal. Nga’ a’ no ogina-gina’ o kolumiso’,’’ ka dau. ² Om boros ka di Yesus, ’’Okito nu daa ilo piro-piro o walai dot angagayo dilo’ koii? Aiso’ nondo o tongoiso’ piya di watu di pinamaal dilo’ dot oolu’ do mogitimpak-timpak do hilo’d pinawaalan dilo’. Raagon ngai’ nopondo ilo’,’’ ka dau. ³ Om ongoi noddi i Yesus do hiri’d Nulu-Nulu do Saitun, i hiri’d dotimbabaan di Walai’d Sasambayangan dot Agayo. Om irikau no iyau’d hiri. Om rikot no dot id dau i Pitrus, om i Yakub, om i Yohanis, om i Andarias do mongoi boro-boros dau dot iyolo-yolo’. ⁴ Boros ka diyolo’, ’’Sunudai daa iyahai ondung soira’ dot ongosiliu ngai’ i komoyon nu’ddi, om nunu o pogintutunan diri dot orikot o maso’ddi?’’ ka. ⁵ Om simbar no i Yesus diyolo’, ’’Antaan-taan no dokoyu, om a’ kou i’ aakalan. ⁶ Tu’ ogumu’ motindo o tulun do rumikot do manansanganu do ngaran ku, om momoros nondo dot, ’Iyoho’ no iyau!’ ka. Om ogumu’ nondo o tulun dot aakalan. ⁷ Om korongou kou nopondo do mogisasaap om korongou kou do habar do pisangadan om kada’ kou poddosi. Tu’ a’ no milo dot a’ ongosiliu ngai’ iri, nga’ iri nopo om okon po ko’ kopupuson do pomogunan. ⁸ Om mogisasaap nondo o bansa’ om mogisasaap o pomogunan. Om hinonggo- honggo nopo nga’ gumuyu’ nondo o tana’, om mononglous. Om koinsanai’dti om koimpuunon nogi’ do koinggoritan, do miagal di tondu’ do monohoruol nogi’ do mogkosusu. ⁹ Nga’ mositi’ no do mumbangan-bangan kou, tu’ tangkapon kou motindo om gayaton kou dot id pomisaraan dot id toguang do gompomutus. Om pimbabagan kou nondo do hiri’d walai’d sasambayangan. Om potimbabaon kou nondo di piro-piro o pomorinta’ om i piro-piro o raja’, tu’ tumatanud kou i’ doho’. Om iri no o maso dokoyu do pasasi’ do pasal doho’ dot id diyolo’. ¹⁰ Om mositi’ no do popinsusuyon po iti Habar dot Osonong do mantad id Kinorohingan dot id koinsanai’d bansa’. ¹¹ Om soira’ nopo dot atangkap kou om porikoton kou dot id pomisaraan, om kada’ kou katangkabo ondung nunu o poboroson dokoyu do tontok do maso’ddi. Do nunu nopo i potudukon dot id dokoyu do maso’ddi, om poboroson nopo dokoyu dot orikot i maso dokoyu’d moro-boros. Tu’ okon i’ ko’ dokoyu di boros di poboroson dokoyu’ddi, suwai ko’ mantad id Rusod do Kinorohingan. ¹² Om haro nondo o tulun dot i piya tobpinai dau nga’ pohudsuon i’ dau do gisom do patayon. Om iyo nogiddi ot osiliu dot id pialatan do miaanak. Tu’ i tangaanak nga’ sumaap di molohing dau, om papatahak diyolo’ do maan patayo’. ¹³ Om katagadan kou nogi’ do koinsanai’d tulun, tu’ tumatanud kou i’ doho’. Nga’ iri nopondo i tulun dit ogirot kasai’ do gisom do kopupuson, om posion no iyau,’’ ka dau. ¹⁴ Om boros ka kawagu di Yesus, ’’Kokito kou nondo di ’Karaaton di Mamaraag’ do poingkakat do hiri’d kinoiyonon di pogoduhan daa do poingkakatan dau. (Kopoilaan dot id tulun di mambasa: Ilaan no kopio o komoyon diti!) Do tontok nopoddi, om mositi’ no do mogidu’ do mongoi’d hilo’d konuluhanan i tulun di hilo’d Yudia. ¹⁵ Om iri nopo tulun do hiri’d sakai do taap do walai dau, om kada’ no lintuhun do mongoi suang di walai do mongoi panganu do nunu nopo do mantad hiri’d walai dau. ¹⁶ Om i tulun di hiri’d dumo dau nga’ kada’ no guli’ do mongoi panganu di rasuk dau di posoibahon. ¹⁷ Araat no kopio o tadau’ddi dot id tondu’ di monontian, om i tongoondu’ di poposusu do tanak! ¹⁸ Sumambayang kou no om a’ i’ ongosiliu iri do tontok do dongrumasam. ¹⁹ Om tontok nopo di piro-piro o tadau di korolosi kopio’ddi om haro nondo o kosusaan dit a’ po insan kosiliu do mantad di wonsoyo’ id Kinorohingan iti pomogunan om gisom do baino’, om a’ nondo osiliu kawagu o miagal diri. ²⁰ Ondung a’ daa’d Kinorohingan ponibaon o maso’ddi, om aiso’ no daa o tiso’ piya’d tulun dot apasi. Nga’ ponibaon id Kinorohingan i maso’ddi, dot i tulun do songonuon dau o kopoinibaan. ²¹ Tontok nopoddi, om ondung haro o songulun do moro-boros dot id dokoyu dot, ’Ontong pogi’, hino no moti’d hiti i Raja’ do Gampamasi,’ ka, ko’, ’Hino no iyau’d hilo’!’ ka — om kada’ kou nogi’ ponongkuyaai di tulun diri. ²² Tu’ rumikot motindo o piro-piro di gampamasi di goudut om piro-piro o nabi di goudut. Om mingwonsoi nondo iyolo’ do piro-piro o koimayaan, om i kosuayan kopio do maan daa do pagakal do tulun, om milo-milo nopo om pagakal nogi’ do tulun piya di nasanganu nod Kinorohingan. ²³ Iyo nopoddi, om antaan-taan no kopio dokoyu! Nokosunud ngai’ ku no dokoyu iti do tontok dit a’ po osiliu o miagal diri,’’ ka. ²⁴ Om boros ka kawagu di Yesus, ’’Om katalib pondo i kosusaan diri, om tumuong nondo ilo tadau, om a’ mulinau ilo tulan. ²⁵ Om rumatu’ ngai’ nondo ilo rombituon do mantad hilo’d tawan, om angagangau ngai’ nopondo i pomorinta’ do hilo’d tawan. ²⁶ Om tontok nopondoddi om okito nondo i Tanak do Tulun do rumikot dot id rolot do haun do mikuwo’d kuasa’ om kagayaan dau. ²⁷ Om suhuon nondo dau i piro-piro o moloikat do mongoi ponimung di tulun di nongopili’ dau do mantad id apat o linsuk diti pomogunan, om mantad id tisan do tana’ om korikot do hilo’d tisan do tawan,’’ ka di Yesus. ²⁸ Om boros ka kawagu di Yesus, ’’Pinsingilaan no dokoyu i ponudukan dot aanu do mantad id guas dot ara. Tu’ tumomou nopo om mongomulok om momutolid i raan do kayu’ddi, om oilaan no dokoyu dot oruhai no dot orikot i maso dot alasu’. ²⁹ Om iyo nogiddi, tu’ okito nopo dokoyu dot ongosiliu o miagal diri, om oilaan no dokoyu dot oruhai no kopio dot orikot o maso’ddi. ³⁰ Ilaai no dokoyu! Dot a’ po angapatai ngai’ iti tulun do songimpasi do dinondo, om ongosiliu ngai’ no o miagal diri. ³¹ Tumanus i’ o tawan om pomogunan, nga’ boros ku nopo om hino kasai’ i’ do gisom do poingompus,’’ ka dau. ³² Om boros ka kawagu di Yesus, ’’Mulong pod miagal diri, nga’ aiso’ i’ o songulun piya do koilo ondung soira’ o tadau ko’ jam diri. Iri piya i moloikat do hilo’d surga nga’ a’ i’ koilo, om i Tanak nga’ a’ i’ koilo, suwai ko’ iri no i Tapa’ o koilo. ³³ Iyo nopoddi om apatut no do minsan-insan om mumbangan-bangan kou, tu’ a’ kou i’ koilo ondung soira’ dot orikot i maso’ddi! ³⁴ Kowoyo-woyoo’ nopo do korikatan dau, om iyo di kowoyo-woyoo’ do songulun di tuminongkiad di walai dau om minongoi do hiri’d pomogunan dit osodu’. Om minonuhu’ iyau di piro-piro o susuhuon dau do mongilo-ilo do hiri’d walai dau di daamot dau do nokotongkiad. Om tontuo’ nogiddi dau o karaja’ do pointikid-tikid di susuhuon dau. Om bilinai no dau i susuhuon dau di sinuhu’ do madtamong di wawayaan do mumbangan-bangan kopio. ³⁵ Iyo nopoddi om iyokoyu nga’ apatut do mumbangan-bangan no, tu’ a’ i’ dokoyu oilaan ondung soira’ do koguli’ i sanganu di walai’ddi, dongsosodopon tuu ko’ pitangatuong, ko’ minsusuab po tuu ko’ i mulai nogi’ o tadau. ³⁶ Tu’ ondung sigog indo do korikot iyau, om kada’ pondo do koodop kou dot orikatan dau. ³⁷ Tu’ koinsanai’dti nokoboros ku dokoyu om poboroson ngai’ ku nogi’ iti dot id koinsanai’d tulun: iri no tu’ mumbangan-bangan kou no kasai’!’’ ka dau.

¹ Di nopo di duwo po o tadau om orikot no i karamayan do Tadau’d Agayo do Paska om i Tadau’d Agayo dit A’ Kipangambang, om pogiupakat no i piro-piro o boyoon dot imam om i guru do Tourat do mogihum do ralan do lumisok-lisok i’ do manangkap di Yesus. Om patayon nogindo daa diyolo’ iyau. ² Om boros ka diyolo’, ’’Nga’ kada’ toko’ po wonsoyo’ o miagal diri do maso pod haro o karamayan, tu’ gumangau nondo om sumaap dati’ ilo tulun dot ogumu’,’’ ka. ³ Tontok di hilo’ i Yesus id Baitani, di hiri’d walai di Simun, i kitoruol do kusta di gulu po, om rikot no o songulun o tondu’ dot id di Yesus. Om minigit iyau dot iso’ o kakanan dit okooro’ do marmar do winonsoi, do kisuang do tumau dot osonong o kosingudan om it aiso’ o rolot, om agayo o gatang. Tontok di poirikau i Yesus do makan, om babako’ no di tondu’ i poiiyanan diri om potuntugo’ no i tumau’ddi do hiri’d tulu di Yesus. ⁴ Om kongotogod noddi i piro-piro di tulun di hino’d hiri, om mogiboro-boros nopoddi iyolo’ do poingkaa, ’’Nunu’ddi o kinokoyo-koyoon dilo’ do rubaton tomod. ⁵ Tu’ milo i’ daa do padagangon i tumau’ddi, om ogumu’ i’ daa ko’ tolu nahatus o tusin do pirok do gatang diri. Om patahakon nogindo i tusin di gatang diri dot id tulun do mosikin!’’ ka diyolo’. Om otogod diri iyolo’ di tondu’ddi. ⁶ Nga’ boro-boros noddi i Yesus do poingkaa, ’’Pologoso’ nopo dokoyu iyau. Nokuro tu’ papasala’ kou dau! Tu’ iri nopo i winonsoi dau’ddi dot id doho’ om osonong i’ om apatut do royohon. ⁷ Tu’ iri nopo tulun do mosikin om hino kasai’ i’ dot id pogialatan dokoyu, om soira’ nopo dot orohian kou do monulung diyolo’ om milo kou i’ do monulung diyolo’. Nga’ iyoho’ nopo om a’ i’ poinsugku’ kasai’ dokoyu. ⁸ Iti nopo tondu’dti om minomonsoi di milo dau’d wonsoyon. Om tinuntugan oku dau di tumau dit osonong o kosingudan do poposodia’ doho’ do maan lobongo’ dot a’ po orikot i maso’ddi. ⁹ Ponongkuyaai kou no! Do honggo nopondo o posusuyan di Habar dot Osonong do mantad id Kinorohingan, do hiti’d pointongkop diti pomogunan, om iti winonsoi diti tondu’ diti nga’ popinsusuyon nogindo do kopomuhandaman dau,’’ ka di Yesus. ¹⁰ Om haro’ddi o songulun dot id pogialatan di hopod om duwo di tumatanud di Yesus, i roitan dot i Yudas Iskariot, do minongoi solowot di piro-piro o boyoon dot imam do papadagang di Yesus dot id diyolo’. ¹¹ Om ongosonong nopo o ginawo diyolo’ do nokorongou di boros di Yudas Iskariot diri, om pamatos noddi iyolo’ do manahak di Yudas do tusin. Om mantad noddi do mogihum nopoddi i Yudas do maso dit osonong do papatahak di Yesus dot id diyolo’. ¹² Tontok di tadau’d koiso’ di Tadau’d Agayo do Roti dit A’ Kipangambang — tontok do monumbali’ o tulun do dumba’ di dong Paska, om rikot no dot id di Yesus i piro-piro o tumatanud dau. Om ponguhot no iyolo’ dau do poingkaa, ’’Hinonggo o korohian nu do posodiaan dahai do taakanon di dong Paska do maan nu oi Guru?’’ ka diyolo’. ¹³ Om ponuhu’ no i Yesus do duwo o tulun dot id pogialatan diyolo’. Boros ka dau, ’’Ongoi kou do hilo’d bandar, do hilo’ nopo om haro o songulun o kusai do kiinigit do kakanan do kisuang do waig, do mongoi solowot dokoyu. Om tumanud kou nopo dau ¹⁴ do mongoi do hiri’d walai di solokoyon dau om sunudan no i sanganu di walai do poingkaa, ’Monguhot i Guru, ondung hinonggo o tiyonon dau om i tumatanud dau do mangakan-ngakan di taakanon di dong Paska,’ kanto dokoyu. ¹⁵ Om tudukan kou nondo dau dot iso’ o bilik dot agayo do hiri’d sawat di nosodia’ mantad no, om haro nogi’ o konunu-nunuan do hiri. Om hiri no o posodiaan dokoyu do taakanon do maan toko’ akano’,’’ ka dau. ¹⁶ Om pamanau noddi i duwo di tumatanud di Yesus diri do minongoi do hiri’d bandar, om kosiliu nopo kopio o miagal di pinoboros di Yesus dot id diyolo’. Om posodiawo’ noddi diyolo’ i taakanon do dong Paska. ¹⁷ Om otuong noddi om rikot nod hiri i Yesus om i hopod om duwo o tumatanud dau. ¹⁸ Om maso poddi diyolo’ do songirikau do makan om boro-boros no i Yesus do poingkaa, ’’Pokinongou kou no: haro nondo o songulun dot id pogialatan dokoyu di potorungak doho’ do makan do dinondo do papadagang doho’,’’ ka dau. ¹⁹ Om tuminongob tomod diri i tumatanud di Yesus do nokorongou’ddi. Om pogisowoli-woli nopoddi iyolo’ do minonguhot di Yesus do poingkaa, ’’Okon i’ bo ko’ iyoho’ o komoyon nu’ddi oi Guru!’’ ka diyolo’. ²⁰ Om boros ka di Yesus do suminimbar, ’’Iri nopo tulun diri om id pogialatan i’ dokoyu i hopod om duwo tumatanud ku, i kaandad doho’ do papatabung do roti do hilo’d mangkuk. ²¹ Atantu’ no dot apatai i Tanak do Tulun, do miagal di nokotulis dot id Buuk do Kinorohingan. Nga’ obungou no i tulun di papadagang di Tanak do Tulun! Osonong nogi’ daa dot a’ nopo kopio nopogkosusu o tulun diri!’’ ka dau. ²² Om tontok di makan iyolo’, om anu no i Yesus dot iso’ o roti, om sambayang no iyau do minongunsikou’d Kinorohingan. Om pogikobing-kobingo’ noddi dau i roti’ddi om potikido’ no dau dot id tumatanud dau, om boro-boros nod, ’’Onuo’ no dokoyu iti, om akanon no; tu’ iti no o tinan ku,’’ ka dau. ²³ Om ongoi no iyau anu do sansangkir o waig dot anggur, om sambayang no iyau do mongunsikou’d Kinorohingan, om patahako’ noddi dau i sangkir diri dot id tumatanud dau. Om inum ngai’ noddi iyolo’ dit anggur diri. ²⁴ Om boro-boros noddi i Yesus do poingkaa, ’’Iti no o raha’ ku di popogirot kopio di tumpongo do Kinorohingan, i raha’ di potuntugon do bagi’d tulun dot ogumu’. ²⁵ Ponongkuyaai kou no: Tu’ a’ oku nondo koinum kawagu do waig dot anggur diti do gisom dot orikot i maso ku do monginum di waig dot anggur di wagu do potorungak dokoyu do hilo’d Pomorintaan do Kinorohingan,’’ ka dau. ²⁶ Om podsinding noddi iyolo’ dot iso’ o sinding do pamarayou. Om ongoi nogiddi iyolo’ do hilo’d Nulu-Nulu do Saitun. ²⁷ Om boro-boros noddi i Yesus dot id piro-piro di tumatanud dau do poingkaa, ’’Oinsanan kou nopondod mogidu’ do tumongkiad doho’. Tu’ nokotulis no dot id Buuk do Kinorohingan o poingkaa, ’Patayon nondod Kinorohingan i gompomogompi’d dumba’ dau, om kopogitongkiad-kiad nopondo i dumba’ dau’ddi,’ ka. ²⁸ Nga’ apasi oku nopondo kawagu, om mogulu oku nondo dokoyu do mongoi do hilo’d Galilia,’’ ka dau. ²⁹ Om boros ka di Pitrus dot id di Yesus, ’’Tumongkiad ngai’ piya diya’ ilo wokon, oi Guru, nga’ a’ oku i’ kopio iyoho’ tumongkiad diya’,’’ ka dau. ³⁰ Nga’ boros ka di Yesus, ’’Mumbangan-bangan. Tu’ a’ po koponingkukuhuk dot induwo o manuk do totuong diti om intolu ko no kopogolim doho’,’’ ka dau. ³¹ Om boros ka kawagu di Pitrus do pinoposunud kopio, ’’Mulong piya do patayon oku do potonggoyon diya’ nga’ a’ oku i’ kopio momoros dot a’ oku kotutun diya’, oi Guru!’’ ka dau. Om iyo ngai’ nogiddi o pinoboros di tumatanud do suwai. ³² Om korikot noddi iyolo’ do hiri’d iso’ o kinoiyonon di roitan do Gitsamani, om boro-boros noddi i Yesus di piro-piro o tumatanud dau do poingkaa, ’’Irikau kou pod hiti, do daamot ku do mongoi sambayang,’’ ka dau. ³³ Om angatai noddi di Yesus i Pitrus, om i Yakub, om i Yohanis do minoyo’ dau. Om timpuun noddi i Yesus do tumongob om atangkabo. ³⁴ Om boros kaddi dau dot id tumatanud dau, ’’Tumongob oku no kopio; iyo poddi matai no ot opurimanan ku. Undorong kou nopod hiti, om mumbangan-bangan kou no!’’ ka dau. ³⁵ Om pamanau noddi i Yesus do minongoi do hiri’d sodu-odu’, om tungub nopo iyau do hiri’d tana’ om sambayang no. Om id suang nopod sambayang dau om pinokianu dau dot a’ iyau minog dot oontok di koinggoritan, do milo-milo no. ³⁶ Om sambayang no iyau do poingkaa, ’’Apa’, oi Apa’, iya’ nopo om aiso’ i’ o tiso’ dot a’ nu milo’d wonsoyon. Poinsoduwo’ no do mantad id doho’ iti koinggoritan diti. Nga’ a’ indo tumanud do doho’d korohian, suwai ko’ tumanud nopo do korohian do Tapa’,’’ ka dau. ³⁷ Om guli’ noddi i Yesus do hiri’d piro-piro o tumanud dau om kabantalai no dau iyolo’ do koodop. Om boro-boros no iyau di Pitrus, ’’Oi Simun, koodop ko i’ pama? Mogot po om kogoos ko dot a’ koodop dot ongosajaam piya!’’ ka dau. ³⁸ Om boro-boros noddi i Yesus diyolo’ do poingkaa, ’’Umbangan-banganan no dokoyu, om sumambayang kou no om a’ kou i’ oontok do pogumbalan. Atantu’ no dot orohian i’ daa o rusod dokoyu do momonsoi dot otopot, nga’ a’ kou i’ milo do momonsoi tu’ oluhoi i’ o kowoyo-woyoo’ do tulun,’’ ka dau. ³⁹ Om ongoi po kawagu i Yesus sambayang dot iyo kasai’ iddi gulu o pinoboros dau. ⁴⁰ Om guli’ no kawagu i Yesus do hiri’d tumatanud dau. Om kabantalai po kawagu dau do koodop i’ iyolo’, tu’ siodop no kopio iyolo’. Om aiso’ noddi o milo diyolo’d poboroson dot id di Yesus. ⁴¹ Om tontok di guminuli’ kawagu i Yesus, dot id diyolo’ di kointolu no, om boro-boros noddi iyau diyolo’ do poingkaa, ’’Koodop kou po pama kasai’ do popotingkod do huyan dokoyu? Ula’ po dokoyu no! Tu’ norikot no moti’ i maso do Tanak do Tulun do patahakon dot id longon do tulun di kidusa. ⁴² Tungag kou, om mamanau toko’ i’! Ontong kou pogi’! Nga’ nokorikot no moti’ i tulun di papadagang doho’!’’ ka dau. ⁴³ Om maso po di Yesus do moro-boros, nga’ korikot no i Yudas i songulun dot id pogialatan di hopod om duwo di tumatanud di Yesus. Om ogumu’ po o tulun do suwai dot ongkiinigit do gayang om bobobog do manud-tanud di Yudas. Iyolo’ nopoddi om sinuhu’ di piro-piro o boyoon dot imam om i guru do Tourat, om i boyoon do tulun do Yohudi. ⁴⁴ Om nosunudan mantad no iyolo’ di tulun di papadagang diri dot iso’ o tanda’ do maan diyolo’d pogintutunan. Boros ka dau, ’’Isai nopo o tulun di tunguban ku, om iri no i tulun diri. Om tangkapon nopo dokoyu iyau om oiton no do mikuwo’d tamangan kopio,’’ ka dau. ⁴⁵ Om rikot no i Yudas, om pitilombus nopo iyau do minongoi rapou di Yesus, om boro-boros nod, ’’Oi Guru!’’ ka. Om tungubai noddi dau i Yesus. ⁴⁶ Om tangkapo’ noddi di tulun di moyo-woyo’ di Yudas i Yesus, om kagasai no diyolo’ iyau. ⁴⁷ Nga’ haro’ddi ot iso’ di tulun di hino’d hiri do minongodong di gayang dau om tibaso’ no dau i turipon di Boyoon dot Agayo dot Imam, gisom do kaansap nopo o tolingo di turipon diri. ⁴⁸ Om boros kaddi di Yesus dot id diyolo’, ’’Tulun oku toi’dti dot araat, do gisom do rumikot kou dot ongkiinigit do gayang om bobobog do mongoi panangkap doho’? ⁴⁹ Monikid tadau oku i’ do monuduk do hilo’d Walai’d Sasambayangan dot Agayo, dot id toguang ngai’ dokoyu, nga’ a’ oku i’ dokoyu tinangkap. Nga’ iyo nobo’dti ot osiliu om abayaan i’ i nokotulis dot id suang do Buuk do Kinorohingan,’’ ka dau. ⁵⁰ Om poggidu’ ngai’ nopoddi i tumatanud di Yesus do tuminongkiad dau. ⁵¹ Om haro’ddi ot iso’ o tanakwagu do tuminanud di Yesus do kikurilib nod kain. Om tangkapo’ no daa di tulun diri i tanakwagu’ddi, ⁵² nga’ patatako’ nopo dau i kain dau’ddi, om panangkus no do minogidu’ do poillabas. ⁵³ Om pootodo’ noddi i Yesus do hiri’d walai di Boyoon dot Agayo dot Imam. Om nokotimung nod hiri i piro-piro o boyoon dot imam om i boyoon do tulun do Yohudi om i guru do Tourat. ⁵⁴ Om tanud i’ i Pitrus di Yesus nga’ hiri’d sodu-odu’ do gisom do nokorikot do hiri’d natad di walai di Boyoon dot Agayo dot Imam. Om irikau no iyau do hiri’d somok di tapui do minagamut do poinsugku’ di piro-piro o madtatamong. ⁵⁵ Om tumotos tomod diri i piro-piro o boyoon dot imam om koinsanai di Gompomutus do Don Tugama’ do mogihum do kointalangan kopio do poimpahan do papasala’ di Yesus, om milo indo diyolo’ do hukuman do kapatayon i Yesus. Nga’ aiso’ i’ o tiso’ piya do nokito diyolo’ do kointalangan kopio do milo’d poimpahan do kapasalaan di Yesus. ⁵⁶ Ogumu’ i’ daa i tulun di suminiliu’d sasi’ di linohou do poposunud dit a’ otopot do pasal di Yesus, nga’ a’ i’ mogiiyo o poboroson diyolo’. ⁵⁷ Om ingkakat noddi o piro-piro di sasi’ do pinopoboros dit a’ otopot do pasal di Yesus. Boros ka diyolo’, ⁵⁸ ’’Norongou dahai iti tulun diti do minomoros do poingkaa, ’Raagon ku’ti Walai’d Sasambayangan dot Agayo diti winonsoi’d tulun, om katalib pondo o tolu o tadau om popoingkakat oku nondo do walai’d sasambayangan dit okon ko’ tulun o momonsoi,’ ka dau,’’ ka diyolo’. ⁵⁹ Nga’ a’ i’ mogiiyo i pinoboros di tulun di suminiliu’d sasi’ddi. ⁶⁰ Om ingkakat no i Boyoon dot Agayo dot Imam dot id toguang ngai’ diyolo’, om uhoto’ no dau i Yesus do poingkaa, ’’A’ nu i’ simbaron i pinotondos diyolo’ diya’ddi?’’ ka dau. ⁶¹ Nga’ a’ nopo minungkomi i Yesus. Om a’ iyau suminimbar. Om uhoto’ po kawagu di Boyoon dot Agayo dot Imam i Yesus do poingkaa, ’’Iya’ nogi’ i Raja’ do Gampamasi, i Tanak do Kinorohingan dit Olidang Kopio?’’ ka dau. ⁶² Om boros ka di Yesus do suminimbar, ’’Iyoho’ nogi’ iri. Om kokito ngai’ kou nondo do Tanak do Tulun do poirikau do hiri’d dawananan do Kinorohingan dit Osundu Kopio, om rumikot iyau dot id rolot do haun do mantad hilo’d tawan!’’ ka dau. ⁶³ Om hurako’ nopo di Boyoon dot Agayo dot Imam i pakayan dau, om boro-boros nod, ’A’ no minog do haro o sasi’! ⁶⁴ Nokorongou ngai’ kou no di boros dau do mongindaraat do Kinorohingan. Poingkuro no o dokoyu’d tosorou do dinondo?’’ ka dau. Om oinsanan nopo iyolo’ do pinopoboros do kisala’ i Yesus om apatut do hukuman do kapatayon. ⁶⁵ Om timpuun noddi o piro-piro o tulun do mindula’ di Yesus, om sompono’ no diyolo’ o mato dau om pimbabagai nogi’, om moro-boros do poingkaa, ’’Tonduwai daa ondung isai i minomobog diya’?’’ ka. Om iri nogi’ i piro-piro o madtatamong nga’ minintompiling i’ di Yesus. ⁶⁶ Tontok di hiri i Pitrus id natad, om rikot noddi do hiri o tiso’ o tondu’ do susuhuon di Boyoon dot Agayo dot Imam. ⁶⁷ Om kokito no dau i Pitrus do magamut do hiri’d somok di tapui, om sonsodo’ no dau o rabas di Pitrus, om boro-boros nod, ’’Okon toi ko’ iya’ nga’ songkoruhangan ngai’ nogi’ di Yesus, i tulun do Nasarit diri?’’ ka dau. ⁶⁸ Nga’ pogolim no i Pitrus. Boros ka dau do suminimbar di susuhuon diri, ’’A’ oku i’ koilo om a’ oku kosuhut dino komoyon nu,’’ ka dau. Om ongoi noddi i Pitrus do hiri’d wawayaan do sumuang do hiri’d natad di walai di Boyoon dot Agayo dot Imam. [Om diiri nod minoningkukuhuk i manuk.] ⁶⁹ Om kokito po kawagu di tondu’ diri i Pitrus, om boro-boros noddi iyau dot id koinsanai di tulun di hino’d hiri, ’’Atantu’ nod iyau nga’ songkoruhangan nogi’ diyolo’,’’ ka. ⁷⁰ Nga’ pogolim po kawagu i Pitrus. Om a’ po alaid do mantad diri om boro-boros no dot id di Pitrus i tulun di hino’d hiri do poingkaa, ’’A’ nu no milo dot olimon dot iya’ nga’ songkoruhangan i’ diyolo’, tu’ iya’ nga’ mantad i’ do hilo’d Galilia!’’ ka diyolo’. ⁷¹ Om boros kaddi di Pitrus, ’’Sumumpa’ oku no dot otopot i’ iti poboroson ku! Hukuman oku nopod Kinorohingan do mongudut oku no!’’ ka dau. ⁷² Om diiri nod minoningkukuhuk i manuk do koinduwo. Om kahandamai noddi di Pitrus do nokopomisunud mantad no i Yesus dau dot, ’’A’ po koponingkukuhuk o manuk dot induwo, om intolu kono pogolim doho’,’’ ka. Om pingihad tomod noddi i Pitrus.

¹ Osuab poddi kopio, om oinsanan nopo i Gompomutus do Don Tugama’ om i boyoon dot imam om i boyoon do tulun do Yohudi om i guru do Tourat do minogiboro-boros dot oruuhai. Om kagasai noddi diyolo’ i Yesus, om suhuo’ no diyolo’ iyau do minamanau om patahako’ noddi diyolo’ iyau dot id di Pilatus. ² Om uhoto’ no di Pilatus i Yesus do poingkaa, ’’Otopot no do raja’ ko do tulun do Yohudi?’’ ka dau. Om boros ka di Yesus do suminimbar, ’’Iyo nondo ino boros nu,’’ ka dau. ³ Om ogumu’ o pinoboros di piro-piro o boyoon dot imam do papasala’ di Yesus. ⁴ Om uhoto’ po kawagu di Pilatus i Yesus, ’’A’ ko i’ nangku sumimbar? Tu’ antangai pogi’ nga’ ogumu’ no i pinoboros diyolo’ do papasala’ diya’!’’ ka dau. ⁵ Nga’ a’ nopo suminimbar i Yesus dot ongoiso’ piya, gisom do nosuayan i Pilatus. ⁶ Pointikid-tikid do Tadau’d Agayo do Paska, om koubasan no di Pilatus do papalabus do songulun di songinggiil do tumanud do pokionuon di tulun dot ogumu’. ⁷ Om haro’ddi o songulun dot id pogialatan di tulun di songinggiil di nakapamatai’d tulun do tontok di suminaap iyolo’d porinta. Ngaran nopo di tulun diri om i Barabas. ⁸ Om timung ngai’ noddi i tulun dot ogumu’, om pokionuo’ no diyolo’ do polobuson di Pilatus o songulun di poinggiil do miagal di koubasan do wonsoyon di Pilatus. ⁹ Om uhoto’ no di Pilatus iyolo’. Boros ka dau, ’’Uhang i’ dokoyu do polobuson ku dokoyu ilo raja’ do tulun do Yohudi?’’ ka. ¹⁰ Tu’ pinoboros pogi’ di Pilatus o miagal diri nga’ noilaan no dau do kinapatahakan nopo di piro-piro o boyoon dot imam, di Yesus dot id dau nga’ osolon i’ toomod iyolo’. ¹¹ Nga’ a’ nopo otingkod-tingkod i piro-piro o boyoon dot imam do mominsuhu’ di tulun dot ogumu’ do monuhu’ di Pilatus do papalabus di Barabas. ¹² Om uhoto’ po kawagu di Pilatus i tulun dot ogumu’ddi, ’’Iyo nopoddi, om nunu’ddi ot apatut ku’d wonsoyon dot id tulun di roitan dokoyu’d raja’ do tulun do Yohudi’ddi?’’ ka. ¹³ Om pagarango’ no diyolo’ o poingkaa, ’’Posolibon nopo iyau,’’ ka. ¹⁴ Nga’ boros ka di Pilatus do minuhot diyolo’, ’’Nunu o karaaton dau?’’ ka dau. Nga’ okon nogi’ dot opuhod iyolo’ do pinapagarang do, ’’Posolibon nopo iyau!’’ ka. ¹⁵ Om polobuso’ noddi di Pilatus i Barabas. Om ponuhu’ no iyau’d tulun do momobog di Yesus, om patahako’ nogiddi do posolibon. Tu’ poposonong i Pilatus do ginawo di tulun dot ogumu’. ¹⁶ Om posuango’ noddi di piro-piro o soudor i Yesus do hiri’d tiiyonon do momisara’ i hiri’d walai do gobunor, om oinsanan nopoddi i posukan do soudor do linohou do tuminimung. ¹⁷ Om pakayai nogiddi diyolo’ i Yesus do rasuk dot otomou daragang-ragang, dit anaru, om pomonsoi no iyolo’ do tupi’ do raan-raan di kirugi do ponokotupi’ do raja’, om potupiyai noddi diyolo’ di Yesus. ¹⁸ Om boro-boros noddi iyolo’ do sumuwau dau, ’’Tabi’ Raja’ do tulun do Yohudi!’’ ka. ¹⁹ Om bobogo’ nogiddi diyolo’ di sukud o tulu di Yesus. Om pindulaai diyolo’ iyau. Om minotud iyolo’ dot id toguang di Yesus. ²⁰ Kohingi-hingi poddi diyolo’ iyau, om iduwo’ no diyolo’ i rasuk dit otomou daragang-ragang om porosukai no diyolo’ kawagu i rasuk mantad di Yesus, om posoliwano’ noddi iyau dot ongoyon posolibo’. ²¹ Hiri noddid tanga’d ralan om sansagai no diyolo’ ot iso’ o tulun do sumaan di salib di Yesus. Iri nopo tulun diri om mantad id kampung, om pakayaan do hiri’d bandar. (Ngaran nopo dau om i Simun, i mantad hilo’d Kirini di gulu po — i tapa’ di Aliksandor om i Rupus.) ²² Om pokoyoo’ noddi diyolo’ i Yesus dot id iso’ o kinoiyonon di roitan do Gulguta. Komoyon nopoddi nga’, ’’Kinoiyonon do Korulung do Tulu’’. ²³ Om hiri no do pinoinum daa diyolo’ i Yesus do waig dot anggur i rinalatan do mur, nga’ a’ i’ mininum i Yesus di waig dot anggur diri. ²⁴ Om posolibo’ noddi diyolo’ i Yesus, om pogibohogi-hogio’ no diyolo’ i pakayan dau, do nundi’ do minanantu’ dit aanu do pointikid-tikid diyolo’. ²⁵ Om jam kosiam nogid kosuabon do pinasalib diyolo’ i Yesus. ²⁶ Om posokoto’ no diyolo’ do hiri’d dompok ponong id sawat di salib di Yesus i pinotulisan do pinotondos dot id dau do poingkaa, ’’Iti no i Raja’ do tulun do Yohudi,’’ ka. ²⁷ Om pinapasalib po iyolo’ do duwo o tulun di mananakau do pinaandad di Yesus. Om iri no tiso’ om id dawananan di Yesus, om iri no tiso’ om id dogibangan dau. ²⁸ [Om iyo noddi do nabayaan i nokotulis dot id Buuk do Kinorohingan do poingkaa, ’’Pohompiton iyau do tulun dit angaraat,’’ ka.] ²⁹ Om songbingog-bingog do tulu i tulun di katalib do hiri om momohingi-hingi di Yesus. Boros ka diyolo’, ’’Iya’ no i minomoros do mamaraag di Walai’d Sasambayangan dot Agayo, om kowonsoi i’ kaka’ndo iri dot id suang do tolu o tadau. ³⁰ Lintuhun daa do mantad hino’d salib, om posion no o tinan nu!’’ ka diyolo’. ³¹ Om i piro-piro o boyoon dot imam om i guru do Tourat nga’ monguntotogod nogi’ di Yesus. Boros ka diyolo’ do mogiboro-boros, ’’Mamasi i’ iyau’d tulun do suwai, om a’ indo milo do mamasi do dau’d tinan! ³² Ondung raja’ iyau dot Israil, om Raja’ di Gampamasi, om lumintuhun nopo daa iyau do mantad hilo’d salib do dinondo, om kokito i’ iyahai om otumbayaan indo iyahai dau!’’ ka. Om i tulun di pinasalib do poindamot di Yesus nga’ momohingi-hingi i’ dau. ³³ Om pitangaadau noddi, om tuong nopo o pointongkop do pomogunan diri do solinaid do tolu o jam. ³⁴ Om pomogiak no i Yesus dot opuhod di jam kotolu nod sosodopon. Boros ka dau, ’’Iloi, Iloi, lama sabaktani?’’ ka. Komoyon nopoddi nga’, ’’Oi Kinorohingan ku, oi Kinorohingan ku, nokuro tu’ tinongkiadan oku diya’?’’ ka. ³⁵ Om haro’ddi o piro-piro o tulun do hiri do nokorongou do giniakan diri. Om boros ka diyolo’, ’’Momolohou iyau di Ilia!’’ ka. ³⁶ Om osiau nopo i tiso’ diyolo’ do minongoi panganu di koiyo-iyo’d rongilut. Om poobugo’ nori do waig dot anggur dit oonsom. Om posuluho’ no dau do tompok dot iso’ o kayu, i koiyo-iyo’d rongilut diri om poinsawato’ noddi dau do pinopotopis di munung di Yesus, mikuwo’d minoro-boros do poingkaa, ’’Andad toko’ po, antangai toko’ po ondung rumikot i Ilia do mongoi popolintuhun dau do mantad hilo’d salib,’’ ka. ³⁷ Om pomogiak noddi i Yesus, om koidu’ no o ginawo dau. ³⁸ Om i tirai di pinorinding do hiri’d Walai’d Sasambayangan dot Agayo nga’ kopiduwo nopo do nohurak do mantad po do hiri’d sawat om gisom do nokosondot do hiri’d siriba’. ³⁹ Om i soudor di poingkakat dot id somok di salib nga’ nokokito nogi’ do kowoyo-woyoo’ di Yesus do minatai. Om boros ka di soudor diri, ’’Otopot no kopio do Tanak do Kinorohingan o tulun diti,’’ ka dau. ⁴⁰ Om haro nogi’ o piro-piro o tongoondu’ do hiri’d sodu’ do nokokito ngai’ddi. Id pogialatan nopo diyolo’ddi om hino nogi’ i Salomi, om i Maria Magdalina, om i Maria i tina’ di Yakub it omulok poddi, om i Yosis. ⁴¹ Om iyolo’ no i tongoondu’ di tuminanud di Yesus om minonguhup dau di hilo’ po iyau id Galilia. Om ogumu’ po o tongoondu’d suwai do hiri di nangkatanud di Yesus do minongoi do hilo’d Yorusalim. ⁴² - ⁴³ Om tumuong noddi, om korikot no i Yusup i mantad hilo’d Arimatia. Iyau nopo om id pogialatan nogi’ di Gompomutus do Don Tugama’ di pusohon kopio. Om iyau nga’ mandad-andad nogi’ do korikatan di Pomorintaan do Kinorohingan. Tadau nopoddi om tadau do Kopongumpayan. (Iri no i tadau dit a’ po orikot o tadau’d Sabat.) Om iri noddi o nakatama-tama’ di Yusup do mongoi solowot di Pilatus do mokianu di rata’ di Yesus. ⁴⁴ Nga’ osuayan no i Pilatus do nokorongou do napatai no i Yesus. Om ponuhu’ noddi i Pilatus do tulun do mongoi pomolohou di boyoon do soudor, om uhoto’ no di Pilatus iyau ondung laid no kapatai i Yesus. ⁴⁵ Om korongou poddi di Pilatus i boros di boyoon do soudor diri, om pabanaro’ noddi di Pilatus i Yusup do minongongoi di rata’ di Yesus. ⁴⁶ Om pomoli noddi i Yusup do kain linan dit osonong kopio, om polintuhuno’ no dau i rata’ di Yesus, om lopoto’ no dau di kain. Om ongoyo’ no dau lobongo’ i rata’ di Yesus do hiri’d lobong di pinoluang do hiri’d pampang. Om liido’ no dau o watu dot agayo do pinonompon di wawayaan di lobong. ⁴⁷ Om nokito i’ di Maria Magdalina, om i Maria i tina’ di Yosis, i pinoilihan di rata’ di Yesus.

¹ Om katalib poddi i tadau’d Sabat, om ongoi no i Maria Magdalina, om i Maria i tina’ di Yakub om i Salomi, pomoli do tumau dit osonong o kosingudan do pongumau di rata’ di Yesus. ² Om osuab po di tadau’d koiso’ do minggu’’ddi, di mulai nogi’ o tadau, om ongoi no iyolo’ do hiri’d lobong. ³ - ⁴ Om tontok di hiri po iyolo’d tanga’d ralan om pogiboro-boros no iyolo’ do poingkaa, ’’Isai ma o monulung dati’ do momoliid di watu di pinonompon di wawayaan di lobong diri?’’ ka. Tu’ iri nopo i watu’ddi om agayo kopio. Om korikot noddi iyolo’ do hiri’d lobong, nga’ kokito no diyolo’ do noliid no i watu. ⁵ Om suang noddi iyolo’ do hiri’d lobong diri. Om kokito no diyolo’ o songulun o tanakwagu do kipakayan dot anaru dot opurak, do poirikau do hiri’d suang di lobong do hiri’d dawananan diyolo’. Om kapagag nopo iyolo’. ⁶ Om boros ka di tanakwagu’ddi dot id diyolo’, ’’Kada’ kou kooris! Oilaan ku i’ do mogihum kou daa di Yesus i tulun do Nasarit i pinasalib diri. A’ no iyau hino’d hiti. Tu’ napasi no iyau kawagu! Ongoi kou pogi’ ontong dilo kinoliiyon dau. ⁷ Nga’ pamanau kou nogi’ do dinondo do mongoi pomisunud di piro-piro o tumatanud dau om i Pitrus do habar diti. Om poboroson no o poingkaa, ’Mogulu- gulu iyau dokoyu do kumaa do hilo’d Galilia. Om okito indo dokoyu i Yesus do hilo’, do miagal di nokoboros mantad dau dokoyu,’ kanto,’’ ka di tanakwagu. ⁸ Om soliwan no iyolo’ do mantad hiri’d lobong om panangkus noddi iyolo’ tu’ nakapagag kopio iyolo’ om moddosi. Om aiso’ i’ o pinosunud diyolo’ dot id disai nopo tu’ moddosi tomod iyolo’. [ ⁹ Om kapasi poddi kawagu i Yesus do mantad id kapatayon dit osuab po di tadau’d Minggu’, om intalang no iyau dot id di Maria Magdalina. (Sinunsub di Yesus o turu’ o rusod dot araat do mantad id dau di gulu po.) ¹⁰ Om pamanau no i Maria Magdalina do minongoi poposunud di nongosiliu’ddi dot id tongotambalut di Yesus, i maso pod mogihad. ¹¹ Nga’ a’ i’ iyolo’ notumbayaan do nokorongou di boros di Maria Magdalina do napasi kawagu i Yesus om nokito di Maria iyau. ¹² Om intalang poddi kawagu i Yesus dot id duwo o tumatanud dau, nga’ suwai no o kowoyo-woyoo’ di Yesus do minintalang dot id diyolo’. Tu’ minintalang iyau di maso diyolo’ do manau-panau do kumaa dot id iso’ o kampung. ¹³ Om poguliai noddi diyolo’ do minongoi poposunud diri dot id kinoruhangan diyolo’d suwai. Nga’ a’ i’ iyolo’ notumbayaan. ¹⁴ Om id tohuri noddi om intalang no i Yesus dot id hopod om iso’ di tumatanud dau, di masaan diyolo’d makan. Om togodo’ noddi di Yesus iyolo’ tu’ a’ i’ ogirot o kotumbayaan diyolo’ om ongokodou o ginawo, gisom dot a’ iyolo’ minonumbayaan di tulun di nokokito kopio di Yesus do napasi kawagu. ¹⁵ Om boro-boros noddi i Yesus diyolo’ do poingkaa, ’’Ongoi kou no dot id pointongkop do pomogunan om popinsusuyon no dokoyu i Habar dot Osonong do mantad id Kinorohingan dot id pointikid-tikid do tulun. ¹⁶ Iri nopo tulun dit otumbayaan om i nobotisan om apasi no. Nga’ iri nopo tulun dit a’ otumbayaan om hukuman no. ¹⁷ Koinsanai’d tulun dit otumbayaan doho’ om onuan nondo iyolo’d kuasa do momonsoi’d koimayaan: monunsub nondo iyolo’ do rusod dot araat dot id suang do ngaran ku, om mimboros iyolo’ di boros dit a’ diyolo’ noilaan mantad. ¹⁸ Ondung koigit iyolo’d tulanut ko’ koinum di kawanit om a’ i’ iyolo’ matai. Om ondung sukabayan diyolo’ i tulun do sumakit om ongolingasan nopo i tulun diri,’’ ka di Yesus. ¹⁹ Om boro-boros poddi i Tuhan Yesus diyolo’, om poinsawato’ no iyau do hilo’d surga. Om hilo’ no iyau’d momorinta’ do poinsugku’d Kinorohingan. ²⁰ Om pamanau noddi i piro-piro o tumatanud dau do pinopopinsusui di habar do mantad id Kinorohingan do hinonggo-honggo nopo. Om Tuhan nga’ minuhup i’ diyolo’ do momonsoi do karaja’ddi. Om pinopointalang kopio dot otopot kopio i popinsusuyon diyolo’ dot i kongoimayaan o pinopointalang kopio.] [ (v 9) Om ongoi noddi i tongoondu’ddi solowot di Pitrus om i piro-piro tambalut di Pitrus, om susuyo’ no diyolo’ dot oniiba’ o koinsanai di pinoboros di tanakwagu’ddi dot id diyolo’. (v 10) Om i Yesus piya’ddi nga’ pinopopinsusui i’ do pinolombus di tongotumatanud dau, di habar dot olidang om i poingompus do pasal do koposion dit aiso’ o kopupuson, do mantad pod hilo’d koulayon om gisom do hilo’d kotonobon.]