MIKA

MIKA

¹ Tontok di maso’d pomorintaan di Raja’ Yotam, om i Ahas, om i Hiskia, do hilo’d Yohuda, om poboroso’ nod TUHAN o boros diti dot id di Mika, i mantad hilo’d bandar do Morisit i bandar dot okooro’. Om pinointalang ngai’ do TUHAN o boros dau’dti do pasal do Samaria om Yorusalim. ² Pokinongoho’ noti, oi koinsanai’d bansa’; pokinongoho’ noti, oi koinsanai dokoyu i poingiyon do hiti’d pomogunan! Pasalaon kou’d TUHAN, it Asawat Kopio, dot id pomisaraan, tu’ iyau no o sasi’ do papasala’ do koinsanai dokoyu! Pokinongoho’ no iyau do moro-boros do mantad hilo’d walai dau dit olidang di hilo’d surga. ³ Rumikot no o TUHAN do mantad id kinoiyonon dau dit olidang; lumintuhun no iyau do mongoi pimpanau do hilo’d sakai do konuluhanan do hiti’d pomogunan. ⁴ Om lumanak ngai’ nopondo ilo nuluhon dot oulakan dau, do miagal pod rilin di kosubo dot id tapui; om otuhan nopondo i konuluhanan om koluyung do hiri’d kokubangan, do miagal po di waig do mantad id konulu-nuluan do lumuyung do hiri’d siba’. ⁵ Om osiliu ngai’ nopondo o miagal diti tu’ nokowonsoi i’ do dusa o tulun dot Israil om suminaap iyolo’d Kinorohingan. Isai daa o nakasala’ gisom do momonsoi’d dusa ot Israil? Samaria no o nakasala’, i bandar dot agayo do pomogunan diri! Isai daa o nakasala’ do nokobungou do Yohuda do tumuku’ dot id tingolig? Yorusalim no o nakasala’! ⁶ Om gowoi poddi om minomoros o TUHAN do poingkaa, ’’Silihon ku nondo do pogun o Samaria do hilo’d talun, om pomutanaman pondod tulun dot anggur. Om liidon ku nondo do hilo’d kubong i watu do kinaraagan di bandar diri, om gisom dot angaragang i pinoimpahan di bandar. ⁷ Opurok ngai’ nopondo i tingolig dit angagayo o gatang, i tiupus-upus tomod daa dau om osorob ngai’ i pinopintahak di tongoondu’ do sundal di maganu-anu do hiri’d walai’d tingolig, om oinsanan nopondo i tingolig do raagon. Tinimung ngai’ do Samaria o konunu-nunuan diri do maan do podsubak di tingolig do kororombung. Nga’ baino’ nopondo om tanggayan ngai’ nopo di pisangod dau iri do maan do tukuon dot id kinoiyonon do suwai,’’ ka dau. ⁸ Om boros kaddi di Mika, ’’Om iri no o kobungou doho’ do tumongob om millompud do mihad. Om mimpanau oku nopondo dot aiso’ o kasut om aiso’ o pakayan do popointalang do tumongob oku. Om millahung oku nondo do miagal do toni om minguni do miagal di tombolog dot unta. ⁹ A’ no milo’d lingoson i suhat do Samaria, om Yohuda nga’ oruhai nod koiyo’ddi o koinggoritan; nokorikot nod wawayaan do Yorusalim i kinoiyonon do bansa’ ku, i kosusaan dot agayo,’’ ka dau. ¹⁰ Kada’ sunudai i pisangod dahai do hilo’d Gat di kinaalaan dahai; kada’ iyolo’ pologoso’ do kokito dokoyu do mihad. Oi tulun do Bait-Liapra, pingisis kou no do hilo’d pupuk do pointalang dot aiso’ o pokukurayan dokoyu! ¹¹ Oi tulun do Sapir, ongoi kou no do hilo’d pomogunan do pisangod do poillabas om ointingayaman. A’ no kobulun do sumoliwan di bandar diyolo’ i tulun do poingiyon do hilo’d Saanan. Om orongou nopondo dokoyu do mogihad i tulun do hilo’d Bait-Haisol, om oilaan no dokoyu dot aiso’ ot intirungon do hilo’. ¹² Noponu’ pod kopoddosian i tulun do Marot do magandad do ngoyon uhupai, tu’ nokoinsomok nod TUHAN o kosusaan do hilo’d wawayaan do Yorusalim. ¹³ Pagayatai nod kuda’ i korita’-kuda’, oi tulun di poingiyon do hilo’d Lakis. Tu’ minomit kou di dusa dot Israil om gowoi poddi om nobinsuhu’ o Yorusalim do momonsoi’d dusa. ¹⁴ Om baino’ nodti, oi tulun do Yohuda, om atagakan kou nondo do bandar do Morisit Gat. Tu’ a’ no ouhupan di mantad id bandar dot Aksib i raja’ dot Israil. ¹⁵ Oi tulun do Marisa, patahakon kou nondod TUHAN dot id pisangod di mongoi ponolod do bandar dokoyu. Om mongoi ngai’ pondo lisok i boyoon dot Israil do hilo’d koluang-luangan do nuluhon do hilo’d Adulam. ¹⁶ Oi tulun do Yohuda, pampadan no o tobuk dokoyu do tanda’ do mogihad di tangaanak di kosianan dokoyu. Bugaran nopo o tulu dokoyu do miagal di tombolog do mangangakan do rata’, tu’ angatanggayan nondo o tangaanak dokoyu dot id pomogunan do pisangod.

¹ Obungou no i tulun dit a’ nopo koodop do koihi id minsorou do momonsoi’d araat! Om kosuabon nopondo, om soira-ira’ nopod haro o ralan diyolo’, om wonsoyon nopo diyolo’ it araat di nosorou mantad diyolo’d wonsoyon. ² Soira’ nopod sianu iyolo’ do tumo, om mongoi nopo iyolo’ ponolod do tumo; om soira-ira’ nopo iyolo’ do sianu do walai, om ngoyon nopo diyolo’ solodo’ o walai’d wokon. Poimponu’ pod koligagaanan o sompiiyon dot aayi’ dot apanakau o dapu’ diyolo’. ³ Om iri noddi o kinapamarasan do TUHAN do poingkaa, ’’Nokopomusorou oku nod poporikot do kosusaan dot id dokoyu om a’ kou no milo do mogidu’ do mantad diri. Om opurimanan nogindo dokoyu dot osusa’ kou, om a’ kou nondo milo do minggayo-gayo. ⁴ Orikot nopondo o maso’ddi om maan pondod tulun do poiyaan do kosusaan i nosiliu dot id dokoyu. Om sindingon nondo diyolo’ iti sinding do mogihad do pasal diri: Naraag toko’ no kopio! Tu’ nanu do TUHAN i pomogunan toko’ om pinatahak dau dot id tulun di minononggoi dati’,’’ ka dau. ⁵ Om gowoi pondo dot orikot nopondo i maso do kopogulian di tana’ dot id tulun do songonuon do TUHAN, om aiso’ no o tongosongulun piya do mantad id pogialatan dokoyu do kaanu do bahagi’ddi. ⁶ Tu’ mimboros i tulun dot id doho’ do poingkaa, ’’Kada’ iyahai tudukai. Kada’ pintuduk do pasal ngai’ddi. Tu’ a’ i’ o Kinorohingan mongintingayam dahai. ⁷ Ondos nu daa om napapalan do TUHAN ot Israil? Nga’ TUHAN nopo om alanut kasai’ i’ o ginawo om a’ i’ kopio dau wonsoyon o miagal diri. Tu’ a’ toi osonong i’ o boros dau dot id tulun di momonsoi dot otopot?’’ ka no diyolo’. ⁸ Om boros kad TUHAN do suminimbar, ’’Miagal pod pisangod i tulun ku do ngoyon dokoyu saapo’. Gumuli’ no i tongokusai do mantad id pisangadan, om osorou no daa diyolo’ dot aiso’ o koligagaanan dot id suang do walai, nga’ hilo’ kou no do poingandad do mongoi panakau di rasuk diyolo’. ⁹ Nuyung dokoyu i tongoondu’ di tulun ku do mantad id sompiiyon di kosianan kopio diyolo’, om nahawan nu iyolo’ di tangaanak diyolo’ di barakat ku daa dot id diyolo’ do gisom dot alaid. ¹⁰ Ingkakat no om mamanau i’; tu’ aiso’ no o kosimbayanan do hiti. Nobungou di dusa dokoyu o kinoiyonon diti, gowoi poddi om raagon o kinoiyonon diti. ¹¹ Korohian nopod tulun diti om i nabi di goudut om i gomponipu’. I mimboros do poingkaa, ’Poboroson ku do lumuyung nondo o waig dot anggur om tiinumon do kaawuk do gisom i’ dot a’ dokoyu aayi-ayi’ do koimbagu,’ ka,’’ ka dau. ¹² Om boros ka kawagu’d TUHAN, ’’Nga’ timungon ku indo iyokoyu, koinsanai dokoyu i tulun dot Israil di noolu-olu’. Timungon ku indo kawagu iyokoyu om uludon ku do miagal di dumba’ do gumuli’ do hiri’d kandang. Om miagal pondo di kobuturan do noponu’d dumba’ o pomogunan dokoyu tu’ oponu’ nondo kawagu’d tulun dot ogumu’. ¹³ Iwangan nondo kawagu do Kinorohingan o ralan dokoyu om posoliwanon kou dau do mantad id pomogunan do pisangod. Raagon nopondo dokoyu i totobon do wawayaan do bandar do sumoliwan kou, om kalabus kou nondo. Om posoliwan nopo dokoyu om iyoho’ i’ i TUHAN, i raja’ dokoyu,’’ ka dau.

¹ Pokinongou kou no, oi pomorinta’ dot Israil! Apatut nopo daa om orohian kou dit otulid, ² nga’ araatan kou nogi’ dit osonong om orohian kou nogindo dit araat. Miahon nopo dokoyu do mongidu’d kulit i tulun ku om iduwon dokoyu i tonsi diyolo’ do mantad hiri’d tulang. ³ Mangakan kou do bansa’ ku. Oniton nopo dokoyu i kulit diyolo’, om tipuon no dokoyu i tulang diyolo’, om popoton no dokoyu iyolo’ do miagal do daging dit onsokon do hiri’d lansang. ⁴ Rumikot nondo o maso do lumohou kou daa do mokiuhup do TUHAN, nga’ a’ kou no dau simbaron. Om a’ no iyau mokinongou do sambayang dokoyu, tu’ araat i’ o winonsoi dokoyu. ⁵ Nakalan di piro-piro nabi i bansa’ ku, tu’ pinopoboros i’ iyolo’ do haro o kosimbayanan dot id tulun di manahak diyolo’d tusin nga’ pisangadan i’ o poboroson diyolo’ dot id tulun dit a’ manahak diyolo’d tusin. Poingkaa no o poboroson do TUHAN dot id piro-piro o nabi, ⁶ ’’Oi nabi; oruhai nod aayi’ o maso dokoyu; tumonob no o tadau dokoyu. Tu’ magakal kou i’ di tulun ku, om aiso’ nondo o pointalangon ku dot id dokoyu do pasal di natantu’ mantad ku’d wonsoyon ku, om a’ kou nondo milo do popoboros do nunu nopo dit osiliu dot id dosunsudan,’’ ka dau. ⁷ Tulun nopo di popimboros dot osiliu dot id dosunsudan om ointingayam no tu’ aiso’ i’ ot abayaan di poboroson diyolo’. Ointingayam ngai’ nopondo iyolo’ tu’ a’ no iyolo’d Kinorohingan simbaron. ⁸ Nga’ iyoho’ nopo om noporinta’ oku nod TUHAN di rusod om sinundu dau. Om nonuan oku dau do ginawo di kosuhut dit otulid om nonuan oku dau do kasangalo’ do momisunud di tulun dot Israil di dusa di nongowonsoi diyolo’. ⁹ Pokinongou kou no doho’, iyokoyu i pomorinta’ dot Israil, iyokoyu it araatan dit otulid om i monomputul do katapatan. ¹⁰ Wonsoyon daa dokoyu o Yorusalim, i bandar do Kinorohingan, nga’ poimpahan nopo dokoyu om i pogipapatayan om it a’ otulid. ¹¹ Momorinta’ pogi’ i piro-piro pomorinta’ do bandar nga’ mokimaanu-anu nod tusin di ponisip, om i piro-piro ot imam nga’ mokimaanu-anu nod gadsi’ o koponudukan di Tourat do TUHAN, om mokimaanu-anu nod tusin o kapabarasan di nabi di pinointalang dot id diyolo’. Nga’ magakun ngai’ i’ mando iyolo’ do manud-tanud o TUHAN diyolo’. Boros ka diyolo’, ’’Aiso’ i’ bo o kosusaan do korikot dot id dati’, tu’ moyo-woyo’ i’ o TUHAN dati’,’’ ka no diyolo’. ¹² Om iri no i karaato’ dokoyu o kobungou do Sion dot aradu do miagal do tumo, om Yorusalim nga’ osiliu nondo do pogun, om i nulu-nulu do kinoiyonon di Walai’d Sasambayangan dot Agayo nga’ osiliu nondo do gouton.

¹ Koimbagu nopondo om iri nopo nulu-nulu di pinoingkakatan di Walai’d Sasambayangan dot Agayo om osiliu do nuluhon dot akawas kopio, it akawas po ko’ mantad di konulu-nuluan do suwai. Om ogumu’ nondo o bansa’d tulun do mogiwoyo-woyo’ do mongoi’d hiri. ² Om momoros nondo i tulun diri do poingkaa, ’’Kainou tumakad do hilo’d nulu-nulu do TUHAN, do kumaa do hilo’d Walai’d Sasambayangan dot Agayo di tukuon dot Israil, i tulun dau. Tudukan toko’ nondo dau di korohian dau do wonsoyon toko’; om sumusui toko’ nondo di ralan di nopili’ dau. Tu’ tadon nopo do ponudukan do TUHAN om hilo’d Yorusalim; om hilo’d Sion o tadon do TUHAN do moro-boros dot id tulun dau,’’ ka nondo diyolo’. ³ Salasayon nondod TUHAN o pogitatagadan dot id pogialatan di bansa’ do hiti’d pomogunan, om id pogialatan do pomogunan dit ongokoris di hilo’d sodu’ om i hiti’d somok. Om wonsoyon nondo diyolo’ do radu i gayang diyolo’ om wonsoyon do pisau do ponunutu’ i tandus. Om a’ nondo mogisasangod i piro-piro o bansa’, om a’ sumodia’ do mongoi sangod. ⁴ Osimbayan ngai’ nopondo o tulun do mongiyon-ngiyon dot id pogialatan di kabun dot anggur om i kabun dot ara diyolo’; om aiso’ i’ o songulun piya do monompurolosi diyolo’. Tu’ nakabatos nod TUHAN, it Osundu Kopio o miagal diri. ⁵ Pointikid-tikid do bansa’ do hiti’d pomogunan, om mumboyo’ i’ om tumuku’ dot id tingolig dau. Nga’ iyati’ nga’ mumboyo’ indo do TUHAN i Kinorohingan toko’, om tumuku’ toko’ dot id dau do gisom dot alaid. ⁶ Boros kad TUHAN, ’’Rumikot no i maso do timungon ngai’ ku i tulun ku di hinukuman ku, i nongoinggorit do hilo’d pomogunan do pisangod. ⁷ Nongokimpaan iyolo’ om nokoinsodu’ do mantad id walai diyolo’, nga’ onuan ku indo do sinakagon do wagu i tulun di nongoolu-olu’, om osiliu indo iyolo’ do bansa’ dit agayo om okoris. Om hilo’ oku nondod nulu-nulu do Sion do momorinta’ diyolo’ do gisom dot alaid,’’ ka dau. ⁸ Om iya’ nogi’, oi Yorusalim, it iyonon do Kinorohingan do madtamong di tulun dau, do miagal po di gompomogompi’ do dumba’ do madtamong di dumba’ dau, nga’ osiliu ko indo kawagu do bandar dot agayo di pomorintaan nu. ⁹ Nokuro tu’ mompud-lompud kopio ko’d mihad? Nokuro tu’ oinggorit tomod ko do miagal pod tondu’ di mogkosusu? Iti toi it aiso’ o raja’ om nangapatai ngai’ i gomponosihat o koihadan nu? ¹⁰ Pinguritos no om pingodoi no, oi tulun do Yorusalim, do miagal di tondu’ do mogkosusu, tu’ norikot noddi o maso do tumongkiad kou diti bandar om mongoi kou nondo iyon do hilo’d talun. Om a’ no milo dot a’ kou koongoi do hilo’d Babil, nga’ hilo’ nopondo om poiduwon kou id TUHAN do mantad id pisangod dokoyu. ¹¹ Ogumu’ no o bansa’ do nokotimung do mongoi sangod dokoyu. Boros ka no diyolo’, ’’Mositi’ no do raagon o Yorusalim! Okito toko’ nondo iti bandar dot araag!’’ ka no diyolo’. ¹² Nga’ a’ i’ koilo iti piro-piro o bansa’ dot id suang do pomusarahan do TUHAN. A’ i’ diyolo’ opurimanan do notimung no iyolo’ do maan hukumai do miagal di gandum di notimung no do maan gomoso’. ¹³ Om boros kad TUHAN, ’’Oi tulun do Yorusalim, ngoyo’ dokoyu hukumai i pisangod dokoyu! Pokorison ku indo iyokoyu do miagal di sapi’ di basi’ o sungu om tambaga’ o sondulu. Om ogumu’ nondo o bansa’ dot araag dokoyu, om patahakon nondo dokoyu dot id doho’ i dapu’ di nangaanu diyolo’ dot id pisangadan. Tu’ iyoho’ no o TUHAN do koinsanai’d pomogunan,’’ ka dau. ¹⁴ Oi tulun do Yorusalim, timungo’ no o soudor nu! Tu’ noturungku’ toko’ no! Manangod iyolo’ di boyoon dot Israil.

¹ Boros kad TUHAN, ’’Oi Baitlahim Iprata, iya’ no daa i bandar dot okooro’ kopio do hiti’d Yohuda, nga’ iya’ nogi’ o tadon do songulun o pomorinta’ do poingkakaton ku do momorinta’ dot Israil. Sompiiyon nopo do sinolusukan dau om mantad po di gulu po kopio,’’ ka dau. ² Om pologoson nondod TUHAN i tulun dau do porintaon do pisangod diyolo’ do gisom dot osusu i tondu’ di natantu’ mantad do sumiliu do tina’ di pomorinta’ diri. Om kosugku’ nogindo kawagu i tulun di nangatanggayan do pisangod di bansa’ diyolo’. ³ Korikot nopondo i pomorinta’ diri, om porintaon nondo dau i tulun dau do mikuwo’d kokorisan dau do mantad id TUHAN, om mikuwo’d kobontugo’ do TUHAN i Kinorohingan dau. Om osimbayan nondo do mongiyon-ngiyon i tulun dau tu’ oinsanan nopo o tulun do pointongkop diti pomogunan do magakun do kogoyoo’ dau. ⁴ Om porikot nondo iyau do kouludan. Soira’ nopo do rumikot i soudor dot Asur do mongoi panangod do pomogunan toko’, om mongoi pamaraag di pogintirungan toko’, om suhuon toko’ nondo i boyoon toko’ dit ongokoris kopio do mongoi saap diyolo’. ⁵ Om aala’ nondo diyolo’ i tulun dot Asur tu’ ogumu’ i’ o rapo-rapo diyolo’, om apasi toko’ indo diyolo’ do mantad id tulun dot Asur di mongoi daa panangod do pomogunan toko’. ⁶ Om iri nopondo i tulun dot Israil di noolu-olu’ om miagal po do bolobou dit osogit di mantad id TUHAN do poposonong do kopurimanan dot ogumu’ o bansa’, do miagal po di rasam dot id tanom di sumuni nogi’. Om sumondiu nondo iyolo’ do Kinorohingan om okon i’ ko’ tulun o sondihon diyolo’. ⁷ Om iri nopondo tulun dot Israil dit oolu’ dot id pogialatan di bansa’ om miagal pod singa di mogihum do taakanon dot id puru’ ko’ id kasakat-sakatan, tu’ mongoi nopo i singa’ddi rolot di dumba’, om tabpaan no dau i dumba’, om pogianat-anaton nopo i dumba’ do gisom dot sokoro-koro’ no, om aiso’ i’ o rumikot do mongoi ponguhup di dumba’ddi. ⁸ Om aala’ ngai’ nondo dot Israil i pisangod dau om patayon ngai’ nopo dau iyolo’. ⁹ Boros kad TUHAN, ’’Tontok nopondo do maso’ddi om tonuson ku nondo o koinsanai di kuda’ nu om raagon ngai’ ku i korita’-kuda’ nu di don sumasangod. ¹⁰ Raagon ngai’ ku nopondo i bandar do hilo’d pomogunan dokoyu om huyason ngai’ ku i pogintirungan dokoyu. ¹¹ Om raagon ngai’ ku i gimat do tiigitan dokoyu om tonuson ku i mogogontong do nasip dokoyu. ¹² Raagon ngai’ ku nondo i tingolig om i torigi’d watu do tingolig dokoyu; om a’ kou nondo tumuku’ dot id nunu nopo di winonsoi do longon dokoyu. ¹³ Om habaon ku nondo i tininganak di Asira, i ponokokinorohingan dokoyu do hilo’d pomogunan dokoyu om raagon ngai’ ku i bandar dokoyu. ¹⁴ Om atatagadan oku nopondo om sulian ngai’ ku nopo o karaaton di bansa’ dit a’ minumboyo’ doho’,’’ ka dau.

¹ Pokinongoho’ no iti kapasalaan do TUHAN dot Israil. Ingkakat no oi TUHAN, om poboroso’ no i poboroson nu; pologoso’ no do korongou ngai’ ilo nuluhon om ilo nulu-nulu di poboroson nu. ² Iyokoyu, oi konuluhanan, om iyokoyu i pinoimpahan diti pomogunan, nga’ mokinongou no di poboroson do TUHAN! Haro o poboroson do TUHAN do papasala’ dot Israil i tulun dau. Popoboros iyau do kapasalaan dau dot Israil. ³ Boros kad TUHAN, ’’Oi tulun ku, nunu o winonsoi dot id dokoyu? Poingkuro oku do minonusa’ dokoyu? Simbaro’ oku no. ⁴ Pinosoliwan ku iyokoyu do mantad hilo’d Masir; om pinoidu’ ku iyokoyu do mantad id ponguripanan; om sinuhu’ ku i Musa, om i Harun om i Miriam do minomoyo’ dokoyu. ⁵ Oi tulun ku, soroho’ pogi’ dokoyu ondung kukuroyon kou daa di Balak, i Raja’ do Muab, om ondung poingkuro o pinonimbar di Biliam i tanak di Bior, dot id dau. Soroho’ no dokoyu i nongosiliu do hiri’d tanga’d ralan do mantad hilo’d pinomukiiman do hilo’d Sitim om kuminaa do hilo’d Gilgal. Sorohon ngai’ no dokoyu iri om opurimanan i’ dokoyu i winonsoi ku do minamasi dokoyu,’’ ka dau. ⁶ Nunu toi ot apatut do patahakon ku dot id TUHAN, i Kinorohingan di hilo’d surga, do tontok do mongoi oku sambayang dot id dau? Migit oku tuu do tanak do sapi’ dit osonong kopio do patahakon do maan do porsombahan do sorobon dot id dau? ⁷ Asanangan tuu o TUHAN ondung migit oku do boribu-ribu o dumba’, ko’ tumau do saitun dit a’ aayi-ayi’ do patahakon dot id dau? Patahakon ku tuu dau i tanak ku dot id dotuo do maan do pamalapus di dusa ku? ⁸ A’ i’ kopio! Tu’ nosunudan toko’ nod TUHAN ondung nunu it osonong. Iti no o pokionuon dau do mantad id dati’: momonsoi dit otulid, om popointalang do kosianan dit aiso’ o kotingkadan, om monokiulud do Kinorohingan toko’ do mikuwo’d osiriba’ o ginawo. ⁹ Oilo toko’ no kopio ondung rumonok toko’ nod TUHAN. Boros ka dau dot id tulun dot id bandar, ’’Pokinongou kou no, iyokoyu i tulun do tumimung do hilo’d bandar. ¹⁰ Id suang nopod walai di tulun dot araat om noponu’ pod dapu’ dit a’ otulid o ralan do minanganu. I pagadang dot a’ koontok o pakayon diyolo’, om iri no i wowonsoyon do karaatan kopio ku. ¹¹ Poingkuro oku pod mangampun do tulun di mamakai do timbangan om pagagadang dit a’ koontok? ¹² Mongonsit-onsit di tulun do mosikin i tulun do kaya’ do hilo’d bandar dokoyu, om goudut ngai’ kou nopo. ¹³ Om gowoi poddi om notimpuunan ku no iyokoyu do momobog om mamaraag do gama’ di dusa dokoyu. ¹⁴ Om kaakan kou piya nga’ a’ kou i’ ayahan, tu’ louson kou po kasai’. Ogumu’ nondo o konunu-nunuan dot igitan dokoyu, nga’ a’ i’ dokoyu milo do poopion iri; tu’ nunu nopo i koopi-opi’ dokoyu nga’ raagon ku i’ dot id pisangadan. ¹⁵ Patanom kou daa do gandum nga’ a’ i’ dokoyu aanu o tua’ddi. Om manganu kou daa do tumau do mantad id tua’ do saitun, nga’ a’ i’ dokoyu apakai iri. Om momonsoi kou daa do waig dot anggur nga’ a’ indo dokoyu oinum iri. ¹⁶ Osiliu nondo o miagal diri tu’ tuminanud kou i’ di kowoyo-woyoon dot araat di Raja’ Omri, om i tanak dau i Raja’ Ahab. Tuntunai nopo dokoyu i diyolo’d kowoyo-woyoon om oturan, om gowoi pondo om pokoyoon ku iyokoyu dot id karaagon, om oinsanan nopondo o tulun do monguntotori’ om momohingi-hingi dokoyu. Om nunu nopo o bansa’ do tulun nga’ mongindaraat nopo dokoyu,’’ ka dau.

¹ Obungou oku no! Tu’ miagal oku pod tulun di louson no dit aiso’ o takanon. Aiso’ no o tua’ do hiti’d kouwaan om aiso’ ot okito do tua’ dot anggur do hiri’d guas dot anggur. Nongoupu’ ngai’ no i tua’ dot anggur om i tua’ dot ara dit ongoomis. ² Aiso’ no o songulun piya dit otulid o kowoyo-woyoon do noolu’ do hiri’d pomogunan, aiso’ no o tiso’ piya dot otorodok dot id Kinorohingan. Songingandad ngai’ nopo o tulun do sompi’ ko’ iyolo’ ngai’. ³ Ongoilo tomod iyolo’ do momonsoi’d araat. Iri pagawai om i gompomutus nga’ mokisisip ngai’ nopod tusin. Sansagan iyolo’ di tulun dit ongkipangkat do momonsoi di korohian diyolo’, om mogipapakat nondo iyolo’. ⁴ Iri piya it osonong no kopio om otulid o ginawo dot id pogialatan diyolo’ nga’ miagal nod sakot tu’ aiso’ i’ o guna’. Norikot no o tadau do kopomohukuman do Kinorohingan do koinsanai di tulun dau do miagal di nokoinsan mantad dau do pinolombus di piro-piro o nabi. Angagangau tomod diri ot id pogialatan diyolo’. ⁵ Kada’ ponongkuyaai di songkoduwo nu om kada’ pogondos di tambalut nu. Antaan-taan no o poboroson nu dot id sawo nu piya. ⁶ Tu’ tontok nopod maso do miagal diti, om miagal pod basug o tapa’ do saapon di tanak dau’d kusai, om i tangaanak do tongoondu’ nga’ sumaap di tina’ diyolo’, om i tongoondu’ dit ongomulok po nga’ monokisongkiwal di tiwanon diyolo’d tondu’. Pisangod nopod tulun om id suang id sompiiyon dau. ⁷ Nga’ iyoho’ nopo om mogondos oku i’ do TUHAN; om mogondos kopio oku’d Kinorohingan om mandad oku dau do mamasi doho’. Om orongou i’ do Kinorohingan o sambayang ku. ⁸ Aiso’ i’ o paantakan di pisangod toko’ do mongirak-irak dati’. Naratu’ toko’ no daa, nga’ tumungag toko’ i’ kawagu. Id suang toko’ daa do totuong do baino’ poo, nga’ onuan toko’ indod TUHAN do tanawau. ⁹ Nokowonsoi toko’d dusa dot id TUHAN, om gowoi poddi om kopuriman toko’ do kototogod dau do dinondo. Nga’ a’ no alaid dot obian toko’ dau om onuan toko’ dau dit otulid. Om pokoyoon toko’ nondo dau dot id tanawau; om kokito toko’ po do ngoyon toko’ dau posio’. ¹⁰ Om okito nondo di pisangod toko’ i wonsoyon do TUHAN dot id dati’ om ointingayam nondo i pisangod di minomohingi-hingi dati’ di gulu po, tu’ mininguhot iyolo’ do, ’’Honggo no o TUHAN, i Kinorohingan dokoyu?’’ ka no. Om okito toko’ indo iyolo’ dot aala’ om opingulakan do miagal pod burutak do hilo’d karalan-ralanan. ¹¹ Oi tulun do Yorusalim, rumikot no o maso do tondulion ilo tolig do bandar nu. Om tontok nopondo do maso’ddi om koinggayo nondo o watas dokoyu. ¹² Om gumuli’ nondo i tulun nu do mantad id piro-piro o kinoiyonon do mantad hilo’d Asur di ponong id koulayon, om mantad hilo’d Masir i ponong id salatan, om mantad do hilo’d watas do Bawang dot Iprat, om mantad hilo’d soborong do rahat om mantad do hilo’d konuluhanan di hilo’d sodu’. ¹³ Nga’ sumiliu nondod tana’ dit a’ sunian iti pomogunan tu’ araat i’ o tulun di songingiyon do hiti. ¹⁴ Gompio’ no i tulun nu, oi TUHAN, i tulun di nopili’ nu. Tu’ mulong po do hilo’ iyolo’d gouton do poingiyon nga’ haro i’ o tana’ dot oluhub do posorili’ diyolo’. Pologoso’ no iyolo’ do mongoi pangakan-ngakan di sakot do hilo’d Basan om hilo’d Giliad; do miagal di koubasanan diyolo’ di gulu po. ¹⁵ Pomonsoi no do kopusahan do bagi’ dahai, oi TUHAN, do miagal di winonsoi nu di pinosoliwan nu i’ iyahai do mantad hilo’d Masir. ¹⁶ Om okito nondo di bansa’ iti om ointingayam tomod nopondo iyolo’ tu’ opurimanan nondo diyolo’ dot aiso’ i’ o guna’ di kokorisan diyolo’. Om atagakan nopondo iyolo’ do pomusarahan gisom dot a’ no iyolo’ milo do moro-boros om a’ milo’d mokinongou. ¹⁷ Om miagal pondo iyolo’d tulanut do misis do hiri’d tana’; om sanggagaran pondo iyolo’ do moddosi do sumoliwan do mantad id kuta’ do pogintirungan diyolo’. Om rumikot nondo iyolo’ dot id TUHAN, i Kinorohingan toko’. ¹⁸ Aiso’ no o Kinorohingan do suwai do koiyo diya’, oi TUHAN, tu’ mangampun ko do dusa di tulun nu di noolu-olu’. Om a’ ko i’ otogod do gisom dot alaid, suwai ko’ asanangan ko i’ do popointalang di kosianan nu dit aiso’ o kotingkadan dot id dahai. ¹⁹ Osianan ko indo kawagu dahai om mangampun ko dahai. Om alaon nu i dusa dahai om pataamon nu do hilo’d nanad do rahat! ²⁰ Om pointalangon nu indo i kotorodoko’ nu om i kosianan nu dit aiso’ o kotingkadan dot id tulun nu, i sinakagon di Abraham om i Yakub, do miagal di nakabatos nu dot id komolohingan dahai di gulu po.