MALIAKI

MALIAKI

¹ Iti no o boros do pinoboros do TUHAN dot id di Maliaki do poboroson dot id tulun dot Israil. ² Boros kad TUHAN dot id tulun dau, ’’Osianan kasai’ oku i’ dokoyu,’’ ka dau. Nga’ boros ka diyolo’, ’’Poingkuro ko do pinopointalang do kosianan nu dot id dahai?’’ ka. Om boros kad TUHAN, ’’Miobpinai i’ daa iyo Isau di Yakub, nga’ ninsianan ku i’ i Yakub om i sinakagon dau. ³ Nga’ naraatan oku i’ di Isau om i sinakagon dau. Rinaag ku i pomogunan di Isau di hilo’d sokid om pinologos ku i tana’ do pinogiiduan om iyonon poddi do nintorusan,’’ ka dau. ⁴ Ondung momoros daa i sinakagon di Isau, i tulun dot Idom do, ’’Naraag i kabandaran dahai nga’ wonsoyon i’ dahai kawagu iri,’’ ka, om simbaron indo do TUHAN iyolo’ do poingkaa, ’’Pologoson nopo iyolo’ do momonsoi kawagu’ddi nga’ ngoyon ku indo raago’ kawagu. Om roitan nondo iyolo’ do tulun do ’Pomogunan dit Araat’ om ’I bansa’ do katagadan do TUHAN do gisom dot alaid,’ ka,’’ ka dau. ⁵ Om mato nondo kopio di bansa’ dot Israil o kokito’ddi, om momoros nondo iyolo’ dot, ’’Okoris i’ o TUHAN dot id soliwan piya do pomogunan dot Israil!’’ ka. ⁶ Om boros kad TUHAN, it Osundu Kopio, dot id imam, ’’Pusohon i’ do tanak i tapa’ dau, om pusohon di susuhuon i tuan dau. Om iyoho’ no o tapa’ dokoyu, nga’ nokuro tu’ a’ kou momusou doho’? Tuan oku i’ dokoyu nga’ nokuro tu’ a’ kou oronok doho’? Indaraaton oku i’ dokoyu, om inda’ ka do muhot kou i’ daa dot, ’Poingkuro iyahai do minongindaraat diya’?’ ka no dokoyu. ⁷ Poingkaa kou do minongindaraat doho’: Pinapatahak kou dot id doho’ do taakanon dit aiso’ o guna’ do hiri’d pananaraban do porsombahan. Om monguhot kou po daa do, ’Poingkuro iyahai dot a’ minomusou diya’?’ ka. Sunudai ku pogi’ iyokoyu — a’ kou minomusou di pananaraban do porsombahan dot id doho’. ⁸ Soira’ nopod mongoit kou do tayam-tayam di nobolou ko’ i sumakit ko’ i kakung do maan do patahakon dot id doho’, om ondos daa dokoyu om aiso’ o sala’ddi? Umbal kou pogi’ do papatahak do tayam-tayam do miagal diri dot id gobunor! Orohian i’ tuu iyau dokoyu om osonong i’ tuu o wonsoyon dau dot id dokoyu?’’ ka dau. ⁹ Umbal kou pogi’ do mokiinsian do Kinorohingan, oi imam. A’ no moti’ dau simbaron i sambayang dokoyu, om dokoyu id sala’ddi. ¹⁰ Om boros kad TUHAN, it Osundu Kopio, ’’Orohian oku nogi’ daa kopio do haro o tongoiso’ dokoyu do mongoi podtobon di wawayaan do Walai’d Sasambayangan dot Agayo om aantaban i’ i mongoi parakit do tapui dit aiso’ o guna’ do hilo’d pananaraban do porsombahan dot id doho’. A’ oku i’ orohian dokoyu; om a’ ku romiton i porsombahan do patahakon dokoyu dot id doho’. ¹¹ Momusou ngai’ i’ doho’ o tulun do mantad id koinsanai’d bansa’ do pointongkop diti pomogunan. Honggo nopo nga’ modtutud i’ iyolo’ do kominyan dot id doho’ om papatahak do porsombahan dit osonong do pomusou diyolo’ doho’. Momusou ngai’ i’ iyolo’ doho’! ¹² Nga’ iyokoyu no om a’ i’ momusou doho’ do tontok di momoros kou dot aiso’ o guna’ di pananaraban do porsombahan dot id doho’, om tontok di patahak kou do taakanon di niada-ada’ dokoyu do hiri’d sakai di pananaraban do porsombahan diri. ¹³ Boros ka no dokoyu, ’Apaasan noddi iyahai do mingwonsoi ngai’dti,’ ka. Om a’ kou no momusou doho’. Porsombahan nopo dokoyu dot id doho’ om i tayam-tayam do pinanakau om i nakakung ko’ i sumakit. Ondos daa dokoyu om romiton ku iri? ¹⁴ Ousung po i tulun di gomponipu’ tu’ patahak do tayam-tayam dit aiso’ o guna’ dot id doho’, om haro i’ daa o tayam-tayam dit osonong do hiri’d baanan dau di nakabatos dau do patahakon dot id doho’! Tu’ iyoho’ nopo om raja’ dot agayo, om oronok ngai’ nopo doho’ o tulun do mantad id koinsanai’d bansa’,’’ ka dau.

¹ Om boros kad TUHAN, it Osundu Kopio, dot id imam, ’’Iti no o ponuhuan ku dokoyu: ² Pusohon oku no dokoyu dot i wonsoyon dokoyu o pomusou. Ondung a’ kou mokinongou diti poboroson ku om ousung kou no. Papalan ngai’ ku nopo it aramit dokoyu di maan daa dokoyu’d kosukup-sukupan. Otopot nopo kopio om napapalan ku no ngai’ iri, tu’ a’ i’ dokoyu pinadul kopio i pinonuhuan ku. ³ Hukuman ku nondo i tangaanak dokoyu om pokisason ku o rabas dokoyu dot id taii’ di tayam-tayam do patahakon dokoyu do maan do porsombahan, om pokoyoon kou nondo do hilo’d kinotimungon do taii’. ⁴ Om koilo kou nogindo do nokoboros ku dokoyu o pinonuhuan diti, om a’ indo araag i tumpongo ku dot id imam, iri no i sinakagon di Liwi. ⁵ Id suang nopod tumpongo ku’ddi om pinabatos ku dot id diyolo’ do kaanu iyolo’d koposion om kasanang-sanangan, om iri no kopio i pinatahak ku diyolo’, om pusohon oku i’ diyolo’. Om tontok nopoddi om minomusou i’ kopio iyolo’ om ruminonok iyolo’ doho’. ⁶ Om pinotuduk diyolo’ it otopot om okon i’ ko’ i kasala’. Om poingulud kasai’ iyolo’ doho’; tu’ okon nopo ko’ minomonsoi iyolo’ dit otopot, nga’ minonguhup nogi’ iyolo’ do tulun do suwai do tumingkod do momonsoi’d araat. ⁷ Om karaja’ i’ dot imam do potuduk di ponudukan dot otopot do pasal doho’, i TUHAN, it Asawat Kopio. Om apatut no do mongoi o tulun pokituduk do korohian ku do mantad id diyolo’ tu’ iyolo’ no o susuhuon ku. ⁸ Nga’ baino’ noddi om tuminolikud kou iyokoyu it imam, di ralan dit otopot. Minangangat nogi’ dot ogumu’ o tulun i ponudukan dokoyu do minomonsoi di kasala’. Rinaag dokoyu i tumpongo do winonsoi ku dot id dokoyu. ⁹ Om gowoi poddi om iyoho’ nga’ mominsuhu’ no di tulun dot Israil dot a’ momusou dokoyu tu’ a’ kou i’ mumboyo’ do korohian ku. Om soira’ nopo do monuduk kou’d tulun ku, om a’ i’ dokoyu iyoon o ponunuduk diyolo’,’’ ka dau. ¹⁰ Okon toi ko’ iso-iso’ i’ o tapa’ toko’? Okon toi ko’ iso-iso’ i’ o Kinorohingan do minomonsoi dati’? Nga’ nokuro’ddi tu’ a’ toko’ mogisulung-sulung do batos, om nokuro tu’ a’ toko’ podulon i tumpongo do Kinorohingan dot id komolohingan toko’? ¹¹ A’ di tulun do Yohuda sinulung i batos diyolo’ dot id Kinorohingan om araat tomod o winonsoi diyolo’ do hilo’d Yorusalim om pointongkop diti pomogunan. Om sinosomu’ nogi’ diyolo’ i Walai’d Sasambayangan dot Agayo di kosianan tomod do TUHAN. Om minanansawo i tongokusai do tongoondu’ di tumuku’ dot id ponokokinorohingan do bansa’d suwai. ¹² Pologoson nopo dot uyungon do TUHAN do mantad id tulun dot Israil o tulun do miagal diri, om a’ no iyau pologoson kawagu do mongoi amung do papatahak do porsombahan dot id TUHAN, it Osundu Kopio, do moyo’ diti bansa’ toko’. ¹³ Iti po kawagu i winonsoi dokoyu. pinonu’ dokoyu’d romou i pananaraban do porsombahan dot id TUHAN, tu’ miningihad kou om mininglompud do minihad tu’ a’ noddi dau romiton i porsombahan do patahakon dokoyu. ¹⁴ Muhot kou ondung nokuro tu’ a’ dau romiton iri. Om a’ pogi’ dau romiton iri nga’ noilaan no dau dot a’ dokoyu sinulung i batos dokoyu dot id tondu’ di kinawin dokoyu dit omulok kou po. Iyau nopo om tontok i’ daa dokoyu, nga’ a’ i’ dokoyu sinulung i batos dokoyu dot id dau, mulong piya do minamatos kou dot id toguang do Kinorohingan do tumorodok kou dot id dau. ¹⁵ A’ toi do Kinorohingan pinoiso-iso’ o tinan om rusod dokoyu? Nunu toi o kinopongiyo’ddian do TUHAN diri? Kinopongiyo’ddian nopo dau’ddi nga’ maganak kou nondo do tangaanak di songonuon kopio’d Kinorohingan. Iyo nopoddi om antaan-taan no kopio dokoyu dot araag i batos dokoyu dot id sawo dokoyu. ¹⁶ ’’Araatan oku di miada’,’’ kad TUHAN, i Kinorohingan dot Israil, ’’Araatan oku no kopio ondung haro o tiso’ dokoyu do momonsoi do miagal diri karaat dot id sawo dau. Antaan-taan no kopio dokoyu dot araag i batos dokoyu do tumorodok dot id sawo dokoyu,’’ ka dau. ¹⁷ Minongudipon nod TUHAN ino koboro-boroso’ dokoyu. Nga’ muhot kou i’ daa’ndo do poingkaa, ’’Poingkuro kopio iyahai do minongudipon do TUHAN?’’ ka. Poingkaa o pinongudipon dokoyu dau, minomoros kou dot, ’’Osonong i’ i gompomonsoi’d araat dot osorou’d TUHAN, it Osundu Kopio; asanangan i’ iyau diyolo’,’’ ka dokoyu. Om muhot kou do, ’’Honggo kopio i Kinorohingan dit otulid kaka’ddi?’’ ka dokoyu.

¹ Om boros kad TUHAN, it Osundu Kopio, ’’Suhuon ku nondo i susuhuon ku do mongoi posodia’ do wayaan ku. Om sigog indo do rumikot o TUHAN dit ihumon dokoyu do hilo’d Walai’d Sasambayangan dot Agayo. Om rumikot nondo i susuhuon dit andad-andadon no dokoyu do mongoi posunud di tumpongo ku,’’ ka dau. ² Nga’ isai po mando o kasangal do tontok di tadau do korikatan dau? Isai po mando ot apasi do kointalang kopio iyau? Tu’ miagal po iyau do sabun di kopulang kopio, om miagal do tapui di monompipi’ do basi’. ³ Om rumikot nondo iyau do mongoi pomutus do miagal do tulun di mongisas om monompipi’ do pirok. Om poingkuro nopo i modsusupu’ do monompipi’ di pirok om tamas, om iyo noddi i susuhuon do TUHAN do momolidang dit imam, om papatahak indo iyolo’ di porsombahan di korohian do TUHAN. ⁴ Om korohian indod TUHAN i porsombahan dot igitan di tulun do Yohuda om Yorusalim dot id dau, do miagal di koubasanan di gulu po. ⁵ Om boros kad TUHAN, it Osundu Kopio, ’’Mintalang oku nondo dot id dokoyu do mongoi pomutus, om moro-boros oku nondo do pasal di tulun dit ongkiinigit do gimat, om i tulun di magampahu’, om i popoboros do tudut do pasal do tulun do suwai, om i tulun di monipu’ do mamagadsi’ di songingkaraja’ dot id dau, om i mongulok-ulok do tongoondu’ do nopuadan om i tangaanak dot aiso’ o molohing om i tulun di bansa’d suwai, saapon ngai’ ku nopo o koinsanai’d tulun dit a’ momusou doho’,’’ ka dau. ⁶ Boros kad TUHAN, ’’Iyoho’ no o TUHAN, om a’ oku i’ sumimban. Om iri no ot a’ dokoyu kinopunsaan kopio, oi sinakagon di Yakub. ⁷ Iyokoyu nga’ miagal nopo di komolohingan dokoyu di gulu po tu’ tuminolikud dit oturan ku om a’ minumboyo’ddi. Guli’ kou no dot id doho’, om gumuli’ oku i’ dot id dokoyu. Nga’ muhot kou po do, ’Poingkuro o wonsoyon dahai do gumuli’ kawagu dot id diya’?’ ka. ⁸ Muhot oku dokoyu, apatut i’ toi o tulun do monipu’ do Kinorohingan? Atantu’ nod amu’, nga’ monipu’ kou i’ iyokoyu doho’. ’Poingkuro kopio?’ ka daa dokoyu do monguhot. Om boros kangku, ’Id suang do hal do manahak do porsombahan do sompihopod om i porsombahan do suwai. ⁹ Ousung kou no ngai’ tu’ oinsanan nopo iti bansa’ do monipu’ doho’. ¹⁰ Igitan ngai’ no i porsombahan dokoyu di sompihopod do hilo’d Walai’d Sasambayangan dot Agayo, om osima’ i’ do taakanon o hilo’. Umbalai oku pogi’ dokoyu, om okito i’ dokoyu do poiwangon ku ilo liligaon do surga om potuntugon ku i’ dot id dokoyu o koinsanai dit ongosonong do gisom i’ dot a’ dokoyu aayi- ayi’. ¹¹ Om a’ ku indo pologoson o mangakan-ngakan do mamaraag di tanom dokoyu, om it anggur dokoyu nga’ olimbagatan ngai’ pod tua’. ¹² Om oinsanan nopondo o tulun do mantad id koinsanai’d bansa’ do mamarait dokoyu do tulun di nongkoundar tu’ osonong i’ kopio dot iyonon i pomogunan dokoyu,’ ka,’’ ka dau. ¹³ Boros kad TUHAN, ’’Araat tomod o pinimboros dokoyu do pasal doho’. Nga’ muhot kou i’ do, ’Nunu kopio o pinimboros dahai do pasal diya’?’ ka dokoyu. ¹⁴ Poingkaa o pinoboros dokoyu, ’Aiso’ i’ o guna’ do mogobi-obi’ do Kinorohingan. Nunu kopio o guna’ do tumanud di ponuhuan do TUHAN, it Osundu Kopio, om nunu o guna’ do mumbal do pointalang dot id dau do monosol toko’ di nowonsoi toko’? ¹⁵ Okito nopo dahai om iri nogi’ i tulun dit angasawat o ginawo ot ongosimbayan tomod. Okon nopo ko’ rumuhang o kohoroo’ di tulun dot araat, nga’ mogumbal nogi’ iyolo’ do kolonuto’ do ginawo’d Kinorohingan dot i wowonsoyon diyolo’d araat o pogumbal om aiso’ i’ o nunu-nunu dot osiliu dot id diyolo’,’ ka dokoyu,’’ ka dau. ¹⁶ Om pogiboro-boros noddi i tulun dit oronok do TUHAN om pokinongoho’ nod TUHAN, om norongou i’ dau i pinoboros diyolo’. Om tuliso’ noddi dot id iso’ o buuk dot id toguang do TUHAN o ngaran do koinsanai di tulun dit oronok om momusou do TUHAN. ¹⁷ Boros kad TUHAN, it Osundu Kopio, "Osiliu indo iyolo’ do tulun ku. Om tontok nopondo do tadau di kapamansayan ku di wonsoyon ku, om osiliu nondo iyolo’ do tulun di songonuon ku. Om osianan oku nondo diyolo’ do miagal di tapa’ dot osianan di tanak di mogobi-obi’ dau. ¹⁸ Om kokito pondo kawagu I tulun dit araat om I tulun dit osonong, om pisuayan do tulun di mogobi-obi’ doho’ om it a’ mogobi-obi’ doho’," ka dau.

¹ Om boros kad TUHAN, it Osundu Kopio, ’’Rumikot no i tadau do sorobon i tulun di minggayo-gayo om it araat do miagal do sakot do nokoring. Om tontok nopondo do tadau’ddi om ouu nopo iyolo’ dot osorob, om aiso’ no ot oolu’. ² Nga’ iyokoyu nopo i mumboyo’ doho’, om mulinau indo dot id dokoyu i sinundu ku do mamasi, do miagal di tadau om manahak do kolingasan do miagal di tinitiu do tadau. Om ongotood kou nondo do miagal di tangaanak do sapi’ do tontok di polobuson do mantad id kandang tu’ iyokoyu’ nga’ kalabus indo. ³ Om tontok nopod tadau do powonsoyon ku i wonsoyon ku, om aala’ nondo dokoyu i tulun dot araat, om miagal pondo iyolo’ do pupuk do pingulakan dokoyu. ⁴ Soroho’ no dokoyu i ponudukan di Musa, i susuhuon ku. I piro-piro ot oturan om ponuhuan di pinoboros ku dau di hilo’d Nuluhon do Sinai dot umboyoon do koinsanai’d tulun dot Israil. ⁵ Nga’ tontok dit a’ po korikot i tadau’d TUHAN dot agayo om i korolosi kopio’ddi, i natantu’ mantad ku’ddi, om porikoton ku nondo dot id dokoyu i Nabi Ilia. ⁶ Om piuludon nondo kawagu dau i tapa’ dot id tangaanak diyolo’; om a’ oku i’ rumikot do mongoi pamaraag diti pomogunan dokoyu,’’ ka dau.