OTURAN

OTURAN

¹ Om lohowo’ nod TUHAN i Musa do suminuang di Kiim do TUHAN om onuwai no dau i Musa do piro-piro ot oturan ² di mositi’ nod tonudon di tulun dot Israil do tontok do papatahak iyolo’ do porsombahan di sumbolion. Tontok nopo do papatahak o tulun do tayam-tayam do maan do porsombahan di sorobon, om koino-ino i’ iyau do patahak do sapi’, ko’ dumba’, ko’ kambing dau. ³ Ondung sapi’ o patahakon dau do maan do porsombahan, om mositi’ no dot i sapi’ do tontoluhan, om it aiso’ o bohiton do tinan. Om mositi’ no do hiri’d wawayaan di Kiim do TUHAN o paatadan dau’ddi, om kohubayaan i’ iyau do TUHAN. ⁴ Om mositi’ no do pakabayon di tulun o longon dau do hiri’d sakai di tulu di tayam-tayam diri, om romiton indo do TUHAN i porsombahan diri do maan do porsombahan do pangampun do dusa do tulun diri. ⁵ Om mositi’ no do sumbolion di tulun i sapi’ddi do hiri’d dotimbabaan di wawayaan di Kiim dot Olidang. Om iri nopondo raha’ di sapi’ om patahakon dit imam di suminolusuk di Harun, dot id TUHAN, om potiyason nogindo do hiri’d misingobik om hiri’d misingompok di pananaraban do porsombahan, do hiri’d toning di wawayaan di Kiim dot Olidang. ⁶ Om mositi’ no dot iduwon di tulun o kulit di tayam-tayam diri om popoton. ⁷ Om mositi’ no do pouludon dit imam i siduwon do hiri’d sakai di pananaraban do porsombahan om opuyan nogindo diyolo’. ⁸ Om mositi’ no do posuboon diyolo’ do hiri’d tapui i popot di tayam-tayam di sinumbali’ddi, om potonggoyon nogi’ i tulu om i lunok di tayam-tayam. ⁹ Om mositi’ no dot ougan di sanganu i suang do tian om i gakod di tayam-tayam diri, om sorobon nogindo dit imam di maso do maganu-anu o koinsanai di porsombahan di sinumbali’ddi do hiri’d pananaraban do porsombahan. Om iri no tawau di porsombahan do taakanon diri o kasanangan do TUHAN. ¹⁰ Ondung dumba’ ko’ kambing o patahakon do maan do porsombahan, om mositi’ nod tontoluhan, om it aiso’ o bohiton do tinan. ¹¹ Om mositi’ nod sumbolion di sanganu i tayam-tayam diri do hiri’d toning di tisan di pananaraban do porsombahan do ponong id utara. Om poiyason nogindo dit imam i raha’ di tayam-tayam diri do hiri’d misingobik om hiri’d misingompok di pananaraban do porsombahan. ¹² Om aayi’ nopondo di tulun do momopot i tayam-tayam diri, om posuboon ngai’ nondo dit imam di maganu-anu i popot diri, do mogitonggoi-tonggoi di tulu om i lunok, do hiri’d tapui. ¹³ Om mositi’ no dot ougan di sanganu i suang do tian om i gakod di tayam-tayam diri, om patahakon nogindo dit imam iri dot id TUHAN, om sorobon ngai’ nopondo do hiri’d sakai di pananaraban do porsombahan. Om iri no tawau di porsombahan do taakanon diri o kasanangan do TUHAN. ¹⁴ Ondung tombolog o patahakon di tulun do maan do porsombahan di sorobon, om mositi’ no do sikukur ko’ punai. ¹⁵ Om mositi’ no dot igitan dit imam i tombolog diri do hiri’d pananaraban do porsombahan, om uritoson nondo o liou di tombolog, om sorobon nogindo i tulu do hiri’d pananaraban do porsombahan. Om mositi’ no do poiyason dau i raha’ di tombolog diri do hiri’d misingobik om hiri’d misingompok di pananaraban do porsombahan. ¹⁶ Om mositi’ no dot iduwon dau i ludukan om i suang di ludukan di tombolog diri, om pataamon nogindo do hiri’d tisan di pananaraban do porsombahan do ponong id koulayon, i hiri’d patataaman do tauu. ¹⁷ Om mositi’ no dot igitan dau o hiri’d guas di palapa’ di tombolog diri do momohukata’ di tinan, nga’ kada’ pondo do kotobilang i palapa’. Om mositi’ no do songkoyuon i tombolog do monorob do hiri’d pananaraban do porsombahan. Om iri no tawau di porsombahan do taakanon diri o kasanangan do TUHAN.

¹ Ondung haro o tulun do papatahak do gandum do maan do porsombahan dot id TUHAN, om mositi’ no do tutuon po dau i gandum diri do gisom dot aapung. Om tunguhon nogindo do tumau’d saitun i tapung om sakayan do kominyan o hiri’d soibau. ² Om igitan nondo iri do hiri’d imam di suminolusuk di Harun. Om manu nondo it imam do maso do maganu-anu do songonggom di tapung do mitonggoi di tumau do saitun om insanan nopo i kominyan, om sorobon nondo iri do hiri’d sakai di pananaraban do porsombahan. Om iri no o tanda’ do nakatahak ngai’ no i porsombahan diri dot id TUHAN. Om iri no tawau di porsombahan do taakanon diri o kasanangan do TUHAN. ³ Iri nopondo i noolu’ di porsombahan do gandum diri om iri no it imam o kaanu. Iri nopo gandum diri om olidang no kopio, tu’ nanu i’ do mantad id taakanon di nakatahak dot id TUHAN. ⁴ Ondung roti di nonsok dot id pagagansakan o maan do porsombahan, om mositi’ no dot i roti dit a’ naralatan do pangambang. Om songkoino id akapal piya o pomomonsoi di roti, dot i tapung di rinalatan do tumau do saitun o wonsoyon; om songkoino nogi’ dot onipis piya o pomomonsoi di roti, i gihilan nod tumau’d saitun. ⁵ Ondung roti di linugu do hiri’d pomoluguan o maan do porsombahan, om mositi’ no dot i tapung di rinalatan do tumau do saitun o wonsoyon, it a’ rinalatan do pangambang. ⁶ Om tontok nopo do patahakon i roti’ddi do maan do porsombahan om mositi’ no do mumukon po om tuntugan nogindo do tumau’d saitun. ⁷ Ondung i roti do nonsok dot id poriuk o maan do porsombahan, om mositi’ no do tapung om tumau do saitun o wonsoyon do roti’ddi. ⁸ Om igitan no i roti’ddi do maan do porsombahan dot id TUHAN, om patahakon no dit imam. Om iri nondo it imam o mongigit di roti’ddi do hiri’d pananaraban do porsombahan. ⁹ Om onuon nondo dit imam o wookon di roti’ddi do maan do tanda’ do nakatahak ngai’ iri dot id TUHAN. Om sorobon nondo dau i roti’ddi do hiri’d pananaraban do porsombahan. Om iri no tawau di porsombahan do taakanon diri o kasanangan do TUHAN. ¹⁰ Om iri nopondo i noolu’ di porsombahan diri om iri no it imam o kaanu. Iri nopo roti’ddi om olidang no kopio, tu’ nanu i’ do mantad id taakanon di nakatahak do maan do porsombahan dot id TUHAN. ¹¹ Kada’ no kopio ralatai do pangambang ko’ paha’ o nunu nopo i taakanon do patahakon dokoyu dot id TUHAN. ¹² Om mositi’ no do manu kou do wookon di gandum dit id gulu koomot do pointikid do toun, om igitan nori do maan do porsombahan dot id TUHAN. Nga’ iri nopo gandum om a’ i’ sorobon do hiri’d pananaraban do porsombahan. ¹³ Pointikid-tikid di porsombahan do gandum om mositi’ no do ralatan dokoyu do silaon, tu’ iri no silaon o tanda’ di tumpongo dot id pialatan dokoyu om Kinorohingan. (Mositi’ no do ralatan dokoyu do silaon o koinsanai di porsombahan dokoyu.) ¹⁴ Soira’ nopo do papatahak kou do porsombahan dot id TUHAN dot i gandum dit id gulu koomot o patahakon, om igitan no i gandum di nolugu no ko’ i nowonsoi nod tapung. ¹⁵ Om mositi’ nod tuntugan do tumau do saitun i gandum om sakayan do kominyan o hiri’d soibau. ¹⁶ Om sorobon nondo dit imam o wookon di gandum om i tumau’ddi, om insanan nopo i kominyan, do sumiliu do tanda’ do nakatahak ngai’ iri dot id TUHAN do maan do porsombahan do taakanon.

¹ Tontok nopo do papatahak do sapi’ ot isai nopo o tulun, do maan dau do porsombahan do piombolutan, do tontoluhan ko’ tondu’ i sapi’ddi om mositi’ no dot it aiso’ o bohiton do tinan. ² Om mositi’ no do pakabayon di sanganu o longon dau do hiri’d sakai di tulu di sapi’ddi. Om sumbolion nogindo dau i sapi’ddi do hiri’d wawayaan di Kiim do TUHAN. Om potiyason nondo dit imam di suminolusuk di Harun i raha’ di sapi’ do hiri’d misingobik om hiri’d misingompok di pananaraban do porsombahan. ³ Om mositi’ no do patahakon dot id TUHAN iti piro-piro o bohogian di sapi’ddi do maan do porsombahan do taakanon: i linuap di songinsokot di suang do tian, ⁴ om i lusou-lusou do pitonggoyon di linuap, om i bohogian di tundu-undu’ dit osonong kopio. ⁵ Om tutudan ngai’ nopondo dit imam iri do hiri’d pananaraban do porsombahan do mitonggoi di porsombahan do sorobon di suwai. Om iri no tawau di porsombahan do taakanon diri o kasanangan do TUHAN. ⁶ Ondung dumba’ ko’ kambing o maan do porsombahan do piombolutan, om koino-ino i’ do tontoluhan ko’ tondu’ i tayam-tayam diri, nga’ mositi’ no dot aiso’ o bohiton do tinan. ⁷ Tontok nopo do haro o tulun do papatahak do dumba’ do maan do porsombahan, ⁸ om mositi’ no do pakabayon dau o longon dau do hiri’d sakai’d tulu di dumba’, om sumbolion nogindo iri do hiri’d dotimbabaan di Kiim dot Olidang. Om poiyason nondo dit imam i raha’ di dumba’ddi do hiri’d misingobik om hiri’d misingompok di pananaraban do porsombahan. ⁹ Om mositi’ no do patahakon dit imam dot id TUHAN iti piro-piro o bohogian di dumba’ do maan do porsombahan do taakanon: i lunok di dumba’, om oinsanan i tikiu di kilunok, do pamatod nopo di tikiu om porotopon nopo, om i linuap di songinsokot di suang do tian, ¹⁰ om i lusou-lusou om pitonggoyon di linuap, om i bohogian di tundu-undu’ dit osonong kopio. ¹¹ Om mositi’ no do sorobon dit imam di maso do maganu-anu o koinsanai’ddi do hiri’d sakai di pananaraban do porsombahan, do maan do porsombahan do taakanon dot id TUHAN. ¹² Ondung kambing o patahakon do maan do porsombahan, ¹³ om mositi’ no do pakabayon di sanganu o longon dau do hiri’d sakai’d tulu di kambing. Om sumbolion nondo dau i kambing diri do hiri’d dotimbabaan di Kiim do TUHAN. Om mositi’ no do poiyason dit imam i raha’ di kambing do hiri’d misingobik om hiri’d misingompok di pananaraban do porsombahan. ¹⁴ Om iti ngai’ no o bohogian do tinan di kambing do patahakon dit imam do maan do porsombahan do taakanon dot id TUHAN: oinsanan i linuap di songinsokot di suang do tian, ¹⁵ om i lusou-lusou do mitonggoi di linuap, om i bohogian di tundu-undu’ dit osonong kopio. ¹⁶ Om sorobon ngai’ nopondo dit imam iri dot id sakai di pananaraban do porsombahan, do maan do porsombahan do taakanon di kasanangan do TUHAN. Iri ngai’ nopo lunok di kambing diri om don TUHAN ngai’ no. ¹⁷ A’ i’ koino-ino do haro ot ongoiso’ piya do tulun dot Israil do mangakan do lunok ko’ raha’. Om iti nopo toturan diti om iyo no kasai’dti do gisom dot alaid om mositi’ no do tonudon do koinsanai’d tulun dot Israil do hinonggo nopo iyolo’ do poingiyon.

¹ Om suhuo’ nod TUHAN i Musa ² do popoilo di tulun dot Israil, dot isai nopo i kowonsoi do dusa om i kotolibamban do nunu nopo di pinonuhuan do TUHAN, dot a’ dau tomodon, om mositi’ no do tumanud dot oturan diti: ³ Ondung i Boyoon dot Agayo dot Imam o kowonsoi do dusa, om kohompit nondo i tulun dot Israil do pasalaon, om mositi’ no do papatahak iyau do songinan o sapi’ do tontoluhan dit aiso’ o bohiton do tinan om it okoro’ po, do maan do porsombahan di sumbolion dot id TUHAN, om oompunan id TUHAN i dusa dau. ⁴ Om mositi’ no dot igitan dau i sapi’ddi do hiri’d wawayaan di Kiim do TUHAN. Om pakabayon nondo di Boyoon dot Agayo dot Imam o longon dau dot id sakai’d tulu di sapi’, om sumbolion nondo iri do hiri’d Kiim dit Olidang. ⁵ Om mositi’ nod igitan dau o wookon di raha’ do sumuang di Kiim. ⁶ Om mositi’ nod potobungon dau o tunturu’ dau do hiri’d raha’ di sapi’ om powowoson dot inturu’ do hiri’d tabir dit id dotimbabaan di Kaban do Tumpongo. ⁷ Om pogihilon dau o tongokooro’ di raha’ do hiri’d sinangau-sangau dit id pointikid-tikid di sunduk di mija’ do podtutudan do kominyan dit osonong o kosingudan; i hiri’d suang di Kiim dot Olidang. Iri nopondo i topod di raha’, om poiyason do hiri’d poimpahan di pananaraban do porsombahan di hiri’d soliwan, i hiri’d dotimbabaan di wawayaan di Kiim. ⁸ Om mositi’ no dot onuon ngai’ dau i lunok di sapi’ do tontoluhan diri, om i linuap di songinsokot di suang do tian, ⁹ om i lusou-lusou do mitonggoi di linuap, om i bohogian di tundu-undu’ dit osonong kopio. ¹⁰ Om mositi’ no do sorobon ngai’ dit imam i lunok diri do hiri’d sakai di pananaraban do porsombahan di sorobon, do miagal di wonsoyon dau do tontok do papatahak do porsombahan do pogiombolutan. ¹¹ Nga’ mositi’ no dot onuon ngai’ dau i kulit, om i tonsi, om i tulu, om i gakod, om it id suang do tian, om kotonggoi ngai’ no i tinaii’. ¹² Om mositi’ no dot igitan ngai’ dau iri do sumoliwan di kokiiman, om sorobon do hiri’d sakai di siduwon do hiri’d patataaman do tauu, i hiri’d kinoiyonon di nolidangan no do tumanud dot oturan do don tugama’. ¹³ Ondung koinsanai di tulun dot Israil do kowonsoi’d dusa, om kasala’ iyolo’ tu’ nokotolibamban dot iso’ di ponuhuan do TUHAN, nga’ a’ i’ diyolo’ tinomod, ¹⁴ om oilaan nopondo i dusa’ddi, om mositi’ no do lomusan di tulun dot ogumu’ do mongoi paatod do sapi’ do tontoluhan dit okoro’ po do hiri’d Kiim do TUHAN. Om mositi’ no do patahakon i sapi’ddi do maan do porsombahan do pangampun do dusa. ¹⁵ Om mositi’ no do pakabayon di tongoboyoon di bansa’ o longon diyolo’ do hiri’d sakai di tulu di sapi’, om sumbolion nogindo i sapi’ddi dot id kinoiyonon diri. ¹⁶ Om mositi’ no do manu i Boyoon dot Agayo dot Imam dot ongokooro’ di raha’ di sapi’ddi dot igitan do sumuang di Kiim dot Olidang. ¹⁷ Om mositi’ no do potobungon dau di raha’ o tunturu’ dau om powowoson dot inturu’ do hiri’d tabir dit id dotimbabaan di Kaban do Tumpongo. ¹⁸ Om mositi’ no do pogihilon dau o tongokooro’ di raha’ do hiri’d sinangau-sangau dot id pointikid-tikid di sunduk di mija’ do podtutudan do kominyan, i hiri’d suang di Kiim. Om iri nopondo noolu’ om poiyason do hiri’d poimpahan di pananaraban do porsombahan di sorobon, it id soliwan di Kiim, do potimbaba’ di wawayaan di Kiim. ¹⁹ Om mositi’ no dot iduwon ngai’ i lunok di sapi’ om sorobon nogindo do hiri’d sakai di pananaraban do porsombahan. ²⁰ Om poingkuro nopo i wonsoyon dau dot id sapi’ do tontoluhan di maan do porsombahan do pangampun do dusa om iyo noddi o wonsoyon dau dot id sapi’ddi. Om iyo noddi i Boyoon dot Agayo dot Imam do papatahak do porsombahan do pangampun do dusa di tulun dot Israil, om ompunan indo do TUHAN i dusa diyolo’. ²¹ Om igitan nogindo dit imam i sapi’ddi do sumoliwan, om sorobon nondo dau iri do hiri’d soliwan di kokiiman, do miagal di pononorob dau di sapi’ do tontoluhan di maan do porsombahan do pangampun do dusa dau. Om iyo noddi o papatahak di porsombahan do pangampun do dusa di tulun dot ogumu’. ²² Ondung songulun o pomorinta’ do kowonsoi’d dusa, om kasala’ iyau tu’ nokotolibamban dot iso’ di pinonuhuan do TUHAN, nga’ a’ i’ dau tinomod, ²³ - ²⁴ om osunudan pondo iyau do pasal di dusa dau’ddi, om mositi’ no do manganu iyau do songinan o kambing do tontoluhan dit aiso’ o bohiton do tinan, do maan dau do porsombahan do pangampun do dusa dau’ddi. Om mositi’ no do pakabayon dau o longon dau do hiri’d sakai di tulu di kambing om sumbolion do hiri’d tisan ponong id utara di pananaraban do porsombahan, i hiri’d ponunumbolian do tayam-tayam di maan do porsombahan di sorobon. ²⁵ Om potobungon nondo dit imam o tunturu’ dau do hiri’d raha’ di kambing om pogihilon do hiri’d sinangau-sangau do pointikid-tikid di sunduk di pananaraban do porsombahan. Om iri nopo noolu’ di raha’ om poiyason do hiri’d poimpahan di pananaraban do porsombahan. ²⁶ Om mositi’ no do sorobon ngai’ dau i lunok di kambing do hiri’d sakai di pananaraban do porsombahan, do miagal di pononorob dau do lunok do tayam-tayam di sumbolion do maan do porsombahan do pogiombolutan. Om iyo noddi o papatahak dit imam di porsombahan do pangampun do dusa di songulun o pomorinta’ddi, om oompunan indo do TUHAN i pomorinta’. ²⁷ Ondung id pogialatan di tulun toomod o kopomonsoi’d dusa, om kasala’ no iyau tu’ kotolibamban no di ponuhuan do TUHAN, nga’ a’ i’ dau tinomod, ²⁸ om osunudan po iyau do pasal di dusa dau’ddi, om mositi’ no do lumomus iyau do mongoi panganu do songinan o kambing do tondu’ dit aiso’ o bohiton do tinan do maan do porsombahan di sumbolion. ²⁹ Om mositi’ no do pakabayon dau o longon dau do hiri’d sakai di tulu di kambing diri om sumbolion nogindo i kambing do hiri’d tisan ponong id utara di pananaraban do porsombahan, i ponunumbolian do tayam-tayam di maan do porsombahan di sorobon. ³⁰ Om mositi’ no do potobungon dit imam o tunturu’ dau do hiri’d raha’ di kambing, om pogihilon nogindo di sinangau-sangau dot id pointikid-tikid di sunduk di pananaraban do porsombahan. Om iri nopondo noolu’ om mositi’ no do poiyason do hiri’d poimpahan di pananaraban do porsombahan. ³¹ Om mositi’ no dot iduwon ngai’ dau i lunok do miagal di lunok di tayam-tayam di sinumbali’ do maan do porsombahan do pogiombolutan tu’ iduwon ngai’. Om mositi’ no do sorobon dau iri do hiri’d pananaraban do porsombahan, om kasanangan indo do TUHAN i tawau di sinorob dau’ddi. Om iyo noddi o papatahak dit imam di porsombahan do pangampun do dusa di tulun, om oompunan indo do TUHAN i tulun diri. ³² Ondung dumba’ ot igitan do tulun do maan do porsombahan do pangampun do dusa, om mositi’ nod tondu’ i dumba’ om aiso’ o bohiton do tinan. ³³ Om mositi’ no do pakabayon di sanganu o longon dau do hiri’d tulu di dumba’, om sumbolion i dumba’ddi do hiri’d tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. ³⁴ Om mositi’ no do potobungon dit imam o tunturu’ dau do hiri’d raha’ di dumba’ om pogihilon di sinangau-sangau dot id pointikid-tikid di sunduk di pananaraban do porsombahan. Om iri nopondo noolu’ di raha’ om potuntugon do hiri’d poimpahan di pananaraban do porsombahan. ³⁵ Om mositi’ no dot iduwon ngai’ dau i lunok do miagal di pongingidu’ dau do lunok di dumba’ do sumbolion do maan do porsombahan do pogiombolutan. Om sorobon nogindo dau iri do hiri’d sakai di pananaraban do porsombahan do mitonggoi di porsombahan do taakanon di patahakon dot id TUHAN. Om iyo noddi o papatahak dit imam di porsombahan do pangampun do dusa di tulun, om oompunan indo do TUHAN i tulun diri.

¹ Tulun nopo di pasalaon om mositi’ no do mamabo do kootuson di winonsoi dau: Ondung haro o tulun di lohowon do sumiliu do sasi’ dot id kut, nga’ a’ indo dau poboroson i nokito om i norongou dau. ² Ondung haro o tulun do kakama’ do nunu nopo i sosomu’ dot id pagantangan do tugama’, nga’ a’ i’ dau tomodon, do kakama’ do tinan do nintorusan di napatai, om opurimanan nopondo dau i nowonsoi dau’ddi om diri no do sosomu’ iyau dot id pagantangan do tugama’ om kasala’ iyau. ³ Ondung haro o tulun do kakama’ do nunu nopo i sosomu’ do mantad id tulun, dot a’ tomodon, om opurimanan nopondo dau i nowonsoi dau’ddi, om diri no do kasala’ iyau. ⁴ Ondung haro o tulun do sumumpa’ dot a’ puro-puroon o pomomoros do sumumpa’ do pasal do nunu nopo, om opurimanan nopondo dau i nowonsoi dau’ddi om diri no do kasala’ iyau. ⁵ Soira’ nopo do kasala’ o tulun do miagal diri o kasalaan, om mositi’ no dot okunon dau i kasalaan dau’ddi. ⁶ Om pomohukum nopo di dusa dau’ddi om songinan o dumba’ do tondu’ ko’ kambing do tondu’ do patahakon dau dot id TUHAN do maan do porsombahan. Om mositi’ no do patahakon dit imam i porsombahan diri, om oompunan indo i dusa di tulun diri. ⁷ Ondung aiso’ o dumba’ ko’ kambing do patahakon di tulun do nakasala’ddi do maan do porsombahan do pangampun di dusa dau, om mositi’ no do papatahak iyau dot id TUHAN do duwo o tinan do sikukur ko’ duwo o tinan do punai do maan do porsombahan di sumbolion do pangampun do dusa dau. Iri nopo songinan di tombolog om maan do porsombahan do pangampun do dusa, om iri no tiso’ om maan do porsombahan di sorobon. ⁸ Om mositi’ no do ngoyon dau patahako’ dit imam i duwo o tombolog diri. Om poguluonon pondo dit imam do papatahak i tombolog do maan do pangampun do dusa. Om mositi’ no dot uritoson dau i liou di tombolog diri, nga’ a’ i’ iduwon i tulu. ⁹ Om poturuon o wookon di raha’ di tombolog diri do hiri’d misingobik di pananaraban do porsombahan. Om iri nopondo raha’ di noolu’ om potuntugon do hiri’d poimpahan di pananaraban do porsombahan. Iri no o porsombahan do patahakon om kaanu i’ do koompunan do dusa. ¹⁰ Om patahakon nogindo dit imam i tombolog di koduwo do maan do porsombahan di sorobon, do tumanud dit oturan. Om iyo noddi o papatahak dit imam di porsombahan do pangampun do dusa di tulun, om oompunan i’ do TUHAN i tulun diri. ¹¹ Ondung aiso’ o pongonuan di tulun di nakasala’ddi do duwo o tinan do sikukur ko’ duwo o tinan do punai, om mositi’ no do papatahak iyau do songkilogram o tapung do maan do porsombahan do pangampun do dusa. Nga’ a’ i’ koino-ino do ralatan i tapung do tumau do saitun ko’ kominyan, tu’ iri nopo om porsombahan do pangampun do dusa, om okon i’ ko’ porsombahan do gandum. ¹² Om mositi’ no do ngoyon dau patahako’ dit imam i tapung diri. Om manu nondo it imam do songonggom di tapung, do maan do tanda’ do nakatahak ngai’ no i tapung diri dot id TUHAN. Om mositi’ no do sorobon i tapung di songonggom diri do hiri’d sakai di pananaraban do porsombahan do maan do porsombahan do taakanon. Om iri no o porsombahan do maan do pangampun do dusa. ¹³ Om iyo noddi o papatahak dit imam di porsombahan do pangampun do dusa di tulun, om oompunan i’ do TUHAN i tulun diri. Om i nopondo noolu’ di tapung om iri no it imam o kaanu do miagal dit oolu’ di porsombahan do gandum tu’ iri no imam o kaanu. ¹⁴ Om patahako’ nod TUHAN dot id di Musa iti piro-piro ot oturan. ¹⁵ Ondung haro o tulun dit a’ tumomod do kolihu do papatahak di porsombahan di nokotobilang dau do patahakon dot id TUHAN, om mositi’ no do papatahak iyau do porsombahan do poningolon. Patahakon nopo om mositi’ no do songinan o dumba’ do tontoluhan ko’ songinan o kambing do tontoluhan, nga’ mositi’ no dot aiso’ o bohiton do tinan. Om tontuon nondo o pomohorogo’ddi do tumanud di pomohorogo di natantu’ mantad. ¹⁶ Mositi’ no do tingalanan dau it a’ dau nakatahak om ruhangan po dot induwo i sompihopod. Om mositi’ no do patahakon dau i tayam-tayam diri dot id imam. Om patahakon nondo dit imam i tayam-tayam diri do maan do porsombahan do pangampun do dusa di tulun, om oompunan indo do TUHAN i tulun diri. ¹⁷ Ondung haro o tulun do kowonsoi’d dusa, om kasala’ no tu’ kotolibamban dot iso’ di pinonuhuan do TUHAN, nga’ a’ i’ daa dau tinomod, om kasala’ no iyau’ddi, om mositi’ no do bayaran dau i nokoontok dau. ¹⁸ Mositi’ no do paatod iyau dot id imam do songinan o dumba’ do tontoluhan ko’ songinan o kambing do tontoluhan dit aiso’ o bohiton do tinan. Om iri no o maan do porsombahan do poningolon. Om tontuon nondo o horogo’ddi do tumanud di pomohorogo di natantu’ mantad. Om patahakon nondo dit imam i porsombahan diri do pangampun do dusa di tulun, om oompunan indo do TUHAN i tulun diri. ¹⁹ Om iri no o porsombahan do poningolon do pangampun di dusa dau dot id TUHAN.

¹ Om patahako’ nod TUHAN dot id di Musa iti piro-piro ot oturan. ² - ³ Ondung a’ no iyau poguli’ do konunu-nunuan di pinokiopian dot id dau di sompi’ ko’ tulun dot Israil, ko’ manakau no iyau di konunu-nunuan do tulun diri, ko’ akalan no dau i tulun diri, ko’ a’ no iyau mangakun do nokokito di konunu-nunuan di natagak, do gisom do sumumpa’ iyau dot a’ nokokito’ddi, om kowonsoi no iyau do dusa dot id TUHAN. Om ondung kowonsoi iyau do miagal diri om mositi’ no do papatahak iyau do porsombahan do poningolon. ⁴ - ⁵ Om mositi’ no do tingalanan dau o nunu nopo i naanu dau dit a’ otulid o ralan dau do minanganu. Om soira’ nopo dot oilaan iyau do nakasala’, om tontok noddi do bayaran ngai’ dau i sanganu di nangaanu dau’ddi, om ruhangan po dot induwo i sompihopod. ⁶ Om mositi’ no do paatod iyau dot id imam do songinan o dumba’ do tontoluhan ko’ songinan o kambing do tontoluhan dit aiso’ o bohiton do tinan, do maan do porsombahan do poningolon dot id TUHAN. Om tontuon nondo o horogo’ddi do tumanud di pomohorogo di natantu’ mantad. ⁷ Om mositi’ no do patahakon dit imam i porsombahan diri do pangampun do dusa di tulun, om oompunan indo do TUHAN i tulun diri. ⁸ Om suhuo’ nod TUHAN i Musa do ⁹ papatahak dot id di Harun om id tangaanak di Harun diti piro-piro ot oturan do pasal do porsombahan di sorobon. Porsombahan nopo di sorobon om potimporonon nopo do hiri’d pananaraban do porsombahan do gisom dot osuaban, om mositi’ no dot osikit kasai’ i tapui. ¹⁰ Om iri nondo it imam di kirasuk do kain linan om kisoluar do kain linan dit oniiba’, o mongidu’ di tauu di kilunok, i noolu’ do hiri’d pananaraban do porsombahan, om hirion nondo dau id toning di pananaraban do porsombahan i tauu’ddi. ¹¹ Om mositi’ no do tingalanan dau o pakayan dau om igitan nondo dau i tauu do sumoliwan di kokiiman, om hirion nondo dau id kinoiyonon dit olidang dot id pagantangan do tugama’ i tauu’ddi. ¹² Om mositi’ no do piantangan kasai’ i tapui do hiri’d pananaraban do porsombahan om kitapui kasai’ i’; kada’ no kopio pologoso’ dot opisok i tapui’ddi. Pointikid-tikid do kosuabon om mositi’ no dot udungan dit imam i tapui di hiri’d pananaraban do porsombahan, om pouludon i maan do porsombahan do sorobon do hiri’d sakai di pananaraban do porsombahan. Om sorobon i lunok do hiri do maan do porsombahan do pogiombolutan. ¹³ Om mositi’ no do kisinikit kasai’ i tapui do hiri’d pananaraban do porsombahan, om kada’ no pologoso’ dot opisok. ¹⁴ Iti ngai’ no ot oturan do pasal di porsombahan do gandum. Mositi’ no do ngoyon dit imam di suminolusuk di Harun patahako’ o porsombahan do gandum dot id TUHAN do hiri’d dotimbabaan di pananaraban do porsombahan. ¹⁵ Om manu nondo iyau do songonggom di tapung om manu di tumau, om insanan nopo do manganu i kominyan di pinosoibau di tapung. Om sorobon nondo dau iri do hiri’d pananaraban do porsombahan do maan do tanda’ do nakatahak ngai’ nori dot id TUHAN. Om iri no tawau di porsombahan diri o kasanangan do TUHAN. ¹⁶ - ¹⁷ Om wonsoyon nondo i tapung di noolu’ddi do roti dit a’ ralatan do pangambang, om akanon nondo dit imam iri dot id kinoiyonon dit olidang, i hiri’d natad di Kiim do TUHAN. Iri no o pinatahak do TUHAN dot id imam do maan do diyolo’d gontok di porsombahan do taakanon. Iri nopo taakanon diri om olidang kopio, do miagal di porsombahan do pangampun do dusa om i porsombahan di poningolon. ¹⁸ Om pointikid-tikid di tangaanak di Harun do kusai nga’ koino-ino nod mangakan do roti’ddi do gisom dot alaid; iri no kasai’ o diyolo’d gontok dit aanu diyolo’ do mantad id taakanon di nakatahak dot id TUHAN. Nga’ tulun nopod suwai di kakama’ di taakanon di nakatahak diri, om orualan no dot oontok do kuasa’ do kolidango’ di porsombahan diri. ¹⁹ Om patahako’ nod TUHAN dot id di Musa o piro-piro ot oturan diti, ²⁰ do pasal do pomimili’ dot imam di sumolusuk di Harun. Tontok nopod tadau do pilion it imam diri, om mositi’ no do papatahak iyau dot id TUHAN do songkilogram o tapung do gandum. (Irad do kogumuon di porsombahan do gandum do patahakon do monikid tadau.) Iri nopo songintanga’ di tapung diri om patahakon di dongkosuabon, om iri no songintanga’ kawagu om patahakon do dongsosodopon. ²¹ Om mositi’ no do ralatan do tumau i tapung diri, om luguon nogindo do hiri’d pomoluguan. Om mumukon nondo iri om patahakon do maan do porsombahan do gandum. Om iri no tawau di porsombahan diri o kasanangan do TUHAN. ²² Papatahak nopo do porsombahan diri do gisom dot alaid om i sinakagon di Harun di nosiliu do Boyoon dot Agayo dot Imam. Om sorobon ngai’ nopori do maan do porsombahan dot id TUHAN. ²³ Iri nopo porsombahan do gandum di patahakon dit imam diri om mositi’ no dot insanan do monorob; om kada’ nod haro o tongokooro’ piya dot akanon. ²⁴ Om suhuo’ nod TUHAN i Musa do ²⁵ papatahak dot id di Harun om id tangaanak di Harun diti piro-piro ot oturan do pasal do porsombahan do pangampun do dusa. Iri nopo tayam-tayam do maan do porsombahan do pangampun do dusa om mositi’ no do sumbolion do hiri’d tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. Porsombahan nopodti om olidang no kopio. ²⁶ Iri nopo imam di papatahak di tayam-tayam diri om mositi’ no do hiri’d kinoiyonon dit olidang do mangakan di porsombahan diri, i hiri’d natad di Kiim do TUHAN. ²⁷ Isai nopo ko’ nunu nopo o kakama’ di tonsi do tayam-tayam di nakatahak diri om orualan no dot oontok di kuasa’ do kolidango’ddi. Ondung haro o kain dot otiasan do raha’ di tayam-tayam diri, om mositi’ no do pupuan i kain diri dot id kinoiyonon dit olidang. ²⁸ Iri nopo kuron di pinomolosuan di tonsi di tayam-tayam do numaan do porsombahan diri om mositi’ no do babakon. Om ondung poriuk do basi’ o pinagansakan, om mositi’ no do kisasan i poriuk om lihungan do waig. ²⁹ Isai nopo o tongokusai do mantad id sompiiyon dot imam om koino-ino nod mangakan do porsombahan diri, it olidang kopio’ddi. ³⁰ Nga’ ondung haro o naanu di raha’ di tayam-tayam diri do tinanggayan do sumuang di Kiim do pinakai do tontok di mokianu’d koompunan do dusa do tumanud dit oturan do tugama’, om a’ no koino-ino’d kanon i tayam-tayam diri, om mositi’ no dot insanan iri do monorob.

¹ Iti no ngai’ ot oturan do pasal di porsombahan do poningolon, i porsombahan dit olidang kopio. ² Iri nopo tayam-tayam do maan do porsombahan diti om mositi’ nod sumbolion do hiri’d tisan ponong id utara di pananaraban do porsombahan, i ponunumbolian di tayam-tayam do maan do porsombahan di sorobon. Om iri nopondo raha’ om mositi’ no do poiyason do hiri’d misingobik om hiri’d misingompok di pananaraban do porsombahan. ³ Mositi’ nod iduwon ngai’ i lunok di tayam-tayam om patahakon ngai’ do maan do porsombahan do hiri’d sakai di pananaraban do porsombahan: i tikiu di kilunok, om i linuap do songinsokot do hiri’d suang do tian, ⁴ i lusou-lusou om pitonggoyon di linuap, om i bohogian di tundu-undu’ dit osonong kopio. ⁵ Om mositi’ nod sorobon ngai’ dit imam i lunok diri do hiri’d pananaraban do porsombahan do maan do porsombahan do taakanon dot id TUHAN. Iri nopo om porsombahan do poningolon. ⁶ Isai nopo tongokusai do mantad id sompiiyon dot imam om koino-ino no do mangakan diri, nga’ mositi’ no dot akanon dot id kinoiyonon dit olidang tu’ iri nopo porsombahan diri om olidang kopio. ⁷ Haro o tiso’ o toturan do pasal di porsombahan do pangampun do dusa, om i porsombahan do poningolon do kopiagal: iri no tu’ iri nopo tonsi di tayam-tayam di pinatahak do maan do porsombahan om iri no imam di pinapatahak diri o kaanu. ⁸ Iri nopo kulit di tayam-tayam di pinatahak do maan do porsombahan di sorobon om iri no imam di pinapatahak diri o kaanu. ⁹ Om koinsanai di porsombahan do gandum di nuhub do minogonsok do hiri’d ponguhuban, ko’ i nonsok dot id poriuk, ko’ i linugu, om iri no imam di pinapatahak diri dot id Kinorohingan o kaanu’ddi. ¹⁰ Nga’ koinsanai di porsombahan do gandum dit a’ nonsok, dot iri tuu rinalatan do tumau, ko’ iri po it a’ rinalatan om kasanganu ngai’ no it imam di suminolusuk di Harun, om mositi’ no dot iradon o pamahagi’ddi dot id pogialatan diyolo’. ¹¹ Iti no o piro-piro toturan do pasal di porsombahan do piombolutan di patahakon do maan do porsombahan dot id TUHAN. ¹² Soira’ nopo do papatahak do porsombahan diti do maan do pongunsikou do Kinorohingan, om tanggayan no i tayam-tayam di pinatahak diri do roti dit a’ rinalatan do pangambang. Iri nopo roti di potonggoyon om koino-ino i’ dot akapal o pomomonsoi, dot i tapung di rinalatan do tumau do saitun o wonsoyon. Om songkoino nogi’ do roti dit onipis do rinalatan do tumau do saitun. ¹³ Om patahak po do roti di nonsok dot a’ rinalatan do pangambang do maan do pomoruhang diri. ¹⁴ Om mositi’ no do patahakon o wookon do pointikid-tikid do bansa’ di roti’ddi do maan do porsombahan di potobilangon do maan do don TUHAN; om kaanu nopoddi om iri no it imam di minanganu di raha’ di tayam-tayam om i pinopoiyas diri do hiri’d pananaraban do porsombahan. ¹⁵ Om iri nopo tonsi di tayam-tayam diri om mositi’ no do kanon do tontok do tadau di kinapatahakan diri; kada’ nod haro o toolu’ddi dot ongokooro’ piya do gisom do kosuabon kawagu. ¹⁶ Ondung paatod o tulun do porsombahan do piombolutan do pamayaan di nakabatos dau, ko’ maan dau do porsombahan do kagaanan do ginawo dau, om a’ i’ minog dot oiyon iri do mangakan do tontok do tadau di pinatahak iri. Nunu nopo it oolu’ om koino-ino i’ do kanon do tadau kawagu. ¹⁷ Nga’ haro nopo o topod di tonsi’ddi do kotolu’d tadau om mositi’ no do tutudan. ¹⁸ Ondung kanon i topod di tonsi’ddi di kotolu’d tadau, om a’ nod Kinorohingan romiton i porsombahan. Tu’ a’ no osiliu do barakat di tulun di pinapatahak i porsombahan diri, nga’ osiliu nogi’ do porsombahan di sosomu’. Om isai nopo o mangakan di porsombahan di nososomu’ddi om mositi’ no do mamabo do kootuson diri. ¹⁹ Ondung kotopis i tonsi’ddi do nunu nopo i sosomu’ dot id pagantangan do tugama’, om a’ nori koino-ino dot akanon, suwai ko’ mositi’ nod sorobon. Isai nopo it olidang dot id pagantangan do tugama’ om koino-ino no do mangakan di tonsi di porsombahan di piombolutan diri, ²⁰ nga’ ondung haro o tulun dit a’ olidang dot id pagantangan do tugama’ do mangakan diri, om a’ no kohompit di tulun do songonuon do Kinorohingan. ²¹ Om ondung haro o tulun do mangakan di tonsi di nakatahak diri do numaan do porsombahan, nga’ nokoigit i’ iyau di sosomu’ dot id pagantangan do tugama’, do mantad tuu dot id tulun ko’ mantad po dot id nintorusan, om a’ no iyau kohompit do tulun di songonuon do Kinorohingan. ²² Om patahako’ nod TUHAN dot id di Musa iti piro-piro ot oturan ²³ do patahakon dot id tulun dot Israil. Lunok nopod sapi’, om dumba’, om kambing om a’ no koino-ino dot akanon. ²⁴ Iri nopo lunok do nintorusan di napatai toomod ko’ i pinatai do nintorusan dot orongit om a’ no koino-ino do kanon, nga’ koino-ino i’ do maan do nunu nopo o kogunaan do suwai. ²⁵ Isai nopo i mangakan do lunok do nintorusan di milo daa do patahakon do maan do porsombahan do taakanon dot id TUHAN, om a’ no kohompit do tulun di songonuon do Kinorohingan. ²⁶ Hinonggo nopo o koiyonon do tulun dot Israil, nga’ a’ no kopio iyolo’ koino-ino do mangakan do raha’ do tombolog ko’ raha’ do nintorusan. ²⁷ Isai nopo o tumolibamban dot oturan diti om a’ no kohompit do tulun di songonuon do Kinorohingan. ²⁸ Om patahako’ nod TUHAN dot id di Musa iti piro-piro ot oturan ²⁹ do patahakon dot id tulun dot Israil. Isai nopo o papatahak do porsombahan do piombolutan, om mositi’ nod potobilang do wookon diri do maan do porsombahan di potobilangon do maan do don TUHAN, ³⁰ dot iyau kopio o papatahak diri do maan do porsombahan do taakanon. Om mositi’ nod igitan dau i lunok om i kangkab di tayam-tayam diri do maan do porsombahan di potobilangon do maan do don TUHAN. ³¹ Om mositi’ nod sorobon dit imam i lunok diri do hiri’d pananaraban do porsombahan nga’ iri nopo kangkab diri om aanu i’ dit imam. ³² Om iri nopo gakod do wanan di tayam-tayam diri om mositi’ nod potobilangon do patahakon ³³ dit imam di papatahak di raha’ om i lunok di porsombahan do piombolutan. ³⁴ Iri nopo kangkab om i gakod do wanan di tayam-tayam diri om porsombahan no di pinotobilang, it onuon do TUHAN do mantad id tulun dot Israil do patahakon diyolo’ dot id imam do gisom dot alaid. ³⁵ Iri no i bohogian do mantad id porsombahan do taakanon di pinatahak do TUHAN dot id di Harun om id tangaanak dau do tontok do tadau di pinili’ iyolo’ do sumiliu’d imam. ³⁶ Tontok no do tadau’ddi do sinuhu’d TUHAN i bansa’ dot Israil do papatahak do bohogian diti do mantad id porsombahan dit igitan diyolo’ dot id imam. Om mositi’ no do tonudon kasai’ di tulun dot Israil ot oturan diti do gisom dot alaid. ³⁷ Om iri no o piro-piro ot oturan do pasal do porsombahan di sorobon, om porsombahan do gandum, om porsombahan do pangampun do dusa, om porsombahan do poningolon, om porsombahan do piombolutan. ³⁸ Om tontok no di hilo’d Nuluhon do Sinai, i hilo’d tana’ do kowotuan, do pinatahak do TUHAN dot id di Musa o piro-piro o ponuhuan diri, do tontok di minonuhu’ iyau do tulun dot Israil do papatahak do porsombahan diyolo’.

¹ Om boros kad TUHAN dot id di Musa, ² ’’Angatan no i Harun om i tangaanak dau do mongoi do hilo’d wawayaan di Kiim ku, om igitan no i pakayan do dong imam, om i tumau do ponununtug, om i sapi’ do tontoluhan dit okoro’ po do maan do porsombahan do pangampun do dusa, om duwo o dumba’ do tontoluhan om sambalatak o roti dit a’ rinalatan do pangambang. ³ Om lohowon ngai’ nogindo i tulun dot Israil do tumimung do hiti,’’ ka dau. ⁴ Om wonsoyo’ no di Musa o miagal di pinonuhuan do TUHAN. Om kotimung ngai’ poddi i tulun dot ogumu’, ⁵ om boro-boros no i Musa diyolo’ do poingkaa, ’’Iti nopo wonsoyon ku do dinondo’dti om pinonuhuan i’ do TUHAN,’’ ka dau. ⁶ Om angatai no di Musa i Harun om i tangaanak di Harun do mongoi do hiri’d gulu om suhuo’ no dau iyolo’ do modsu’ do tumanud dit oturan do tugama’. ⁷ Om porosukai no dau di Harun i rasuk om i rasuk dit anaru, om poogkoso’ dau di Harun i tagkos. Om papakayai no dau it ipod om paagkasai dau di Harun i tagkos dit atandai o pinangawol. ⁸ Om papakayai nod Musa di Harun i lokop do kangkab om posuango’ no dau it Urim om Tumim do hiri’d lokop do kangkab. ⁹ Om posigarai no dau i sigar, om podokoto’ dau i tamas do pongillumis do hiri’d ponong id turos di sigar, i tanda’ do nosiliu i Harun do songonuon do Kinorohingan. Om wonsoyo’ ngai’ nopo di Musa iri do tumanud di pinonuhuan do TUHAN dot id dau. ¹⁰ Om ngoyo’ nod i Musa i tumau do ponununtug om gihilai no dau di tumau’ddi i Kiim do TUHAN, om koinsanai di konunu-nunuan do hiri’d suang di Kiim. Om iyo noddi o ralan dau do pinapatahak ngai’ddi dot id TUHAN. ¹¹ Om anu noddi i Musa dot okooro’ di tumau di ponununtug diri om wawasai no dau dot inturu’ o hiri’d sakai di pananaraban do porsombahan om koinsanai di pakakas do hiri, om hiri’d mimpun om hiri’d poimpahan di mimpun. Om iyo noddi o ralan dau do pinapatahak ngai’ddi dot id TUHAN. ¹² Om pilio’ noddi dau i Harun; om ralan nopo di Musa do minomili’ di Harun om tinuntugan dau o tulu di Harun dot okooro’ di tumau di ponununtug. ¹³ Om angatai nod i Musa i tangaanak di Harun do mongoi do hiri’d gulu, om porosukai no dau diyolo’ i rasuk, om paagkasai dau diyolo’ i tagkos, om potupiyai no dau diyolo’ i tupi’ do dong imam do tumanud di pinonuhuan do TUHAN dot id dau. ¹⁴ Om ngoyo’ noddi di Musa i songinan o sapi’ do tontoluhan dit okoro’ po do maan do porsombahan do pangampun do dusa, om pakabayo’ no di Harun om i tangaanak dau o longon diyolo’ do hiri’d sakai’d tulu di sapi’ddi. ¹⁵ Om sumbolio’ nod i Musa i sapi’ddi om onuo’ no dau o wookon di raha’. Om potobungo’ no dau o tunturu’ dau do hiri’d raha’ om pogihilo’ no i raha’ do hiri’d sinangau-sangau dot id pointikid-tikid di sunduk di pananaraban do porsombahan. Om poiyaso’ nogiddi dau i topod di raha’ do hiri’d poimpahan di pananaraban do porsombahan. Om iyo noddi o ralan dau do minomolidang di pananaraban do porsombahan do tumanud dot oturan do tugama’, om iyo noddi o ralan do pinapatahak diri dot id TUHAN. ¹⁶ Om onuo’ ngai’ noddi di Musa i linuap di songinsokot di suang do tian di sapi’ di sinumbali’ddi. Om nanu nogi’ dau i bohogian di tundu-undu’ om i lusou-lusou do mitonggoi di lunok di sapi’. Om sorobo’ ngai’ no dau iri do hiri’d pananaraban do porsombahan. ¹⁷ Om ngoyo’ no dau i noolu-olu’ di tonsi, om i kulit, om i tinaii’ di sapi’. Om sorobo’ ngai’ no dau do hiri’d soliwan di kokiiman do miagal di pinonuhuan do TUHAN. ¹⁸ Om ngoyo’ nogiddi di Musa i dumba’ do tontoluhan do maan do porsombahan do sorobon. Om pakabayo’ no di Harun om i tangaanak dau o longon diyolo’ do hiri’d sakai di tulu di dumba’ddi. ¹⁹ Om sumbolio’ no di Musa i dumba’ om poiyaso’ no dau i raha’ do hiri’d misingobik om hiri’d misingompok di pananaraban do porsombahan. ²⁰ - ²¹ Om popoto’ noddi di Musa i dumba’ do tontoluhan diri, om ougai no dau do waig i suang do tian om i gakod di dumba’ddi. Om iri nopo i tulu, om i lunok, om i noolu-olu’ do tinan di dumba’ do tontoluhan diri, om tinutudan dau do hiri’d sakai di pananaraban do porsombahan do tumanud di pinonuhuan do TUHAN. Iti no o porsombahan do taakanon, om iri no tawau do porsombahan diri o kasanangan do TUHAN. ²² Om ngoyo’ nod i Musa i dumba’ do tontoluhan di koduwo do maan do kopomilian dot imam. Om pakabayo’ nod i Harun om i tangaanak dau o longon diyolo’ do hiri’d sakai do tulu di dumba’, ²³ om sumbolio’ nod i Musa i dumba’ddi. Om onuo’ noddi di Musa o wookon di raha’ di dumba’ddi om pogihilo’ no dau do hiri’d tolingo’d wanan di Harun, om hiri’d posolon do longon dau’d wanan, om hiri’d posolon do lapap dau’d wanan. ²⁴ Om suhuo’ nod Musa i tangaanak di Harun do minsomok-somok dau, om gihilai nogiddi dau do raha’ dot okooro’ o hiri’d tolingo diyolo’d wanan, om hiri’d posolon do lapap diyolo’d wanan. Om iri nopo noolu’ di raha’ om pinoiyas di Musa do hiri’d misingobik om hiri’d misingompok di pananaraban do porsombahan. ²⁵ Om onuo’ nod i Musa i lunok di dumba’ddi, om i tikiu di kilunok, om koinsanai di linuap do songinsokot di suang do tian, om i bohogian di tundu-undu’ dit osonong kopio, om i lusou-lusou do mitonggoi di linuap, om i gakod do wanan di dumba’ddi. ²⁶ Om anu nogiddi i Musa di roti dit a’ rinalatan do pangambang do mantad hiri’d balatak. Om patahako’ no dau dot id TUHAN: iso’ o roti dit akapal, i rinalatan do tumau do minomonsoi, om iso’ o roti dit oniipis. Om pasakayo’ no dau i roti’ddi do hiri’d lunok om hiri’d gakod do wanan di dumba’. ²⁷ Om pakahangai ngai’ no dau di Harun om i tangaanak di Harun i taakanon diri om patahako’ no diyolo’ iri dot id TUHAN do maan do porsombahan di pinotobilang do maan do don TUHAN. ²⁸ Om ngoyo’ noddi di Musa i taakanon do poingkahang diyolo’, om sorobo’ no dau do hiri’d pananaraban do porsombahan. Iri nopo om pinosoibau dau di porsombahan di sorobon, do maan do porsombahan do kopomilian. Iri no o porsombahan do taakanon, om iri no tawau’ddi o kasanangan do TUHAN. ²⁹ Om ngoyo’ nod i Musa i kangkab di dumba’ddi om patahako’ no dot id TUHAN do numaan do porsombahan di pinotobilang do maan do don TUHAN. Om iri no o di Musa do gontok, do mantad id dumba’ do tontoluhan di sinumbali’ddi do numaan do porsombahan do kinopomilian dot imam. Om wonsoyo’ ngai’ nopod i Musa iri do tumanud di pinonuhuan do TUHAN dot id dau. ³⁰ Om anu no i Musa dot okooro’ di tumau do ponununtug om minanu iyau dot okooro’ di raha’ do hiri’d pananaraban do porsombahan, om powowoso’ no dau dot id di Harun om id pakayan diyolo’. Om iyo noddi o ralan dau do pinapatahak diyolo’ om i pakayan diyolo’ dot id TUHAN. ³¹ Om boros kad i Musa dot id di Harun om id tangaanak di Harun, ’’Igitai dokoyu ilo tonsi di sinumbali’ddi do hilo’d wawayaan diti Kiim do TUHAN, om losuon id hilo’. Om kanon nogindo do mikuwo’d di roti di hiri’d balatak di sinuangan do porsombahan do kopomilian, do miagal di pinonuhuan do TUHAN. ³² Mositi’ nod sorobon ngai’ o tonsi ko’ roti dit oolu’. ³³ Kada’ kou no kopio tongkiad do mantad hilo’d wawayaan di Kiim do TUHAN do solinaid do turu’ o tadau, dot a’ po owonsoi ngai’ it apatut do wonsoyon do kopomilian dokoyu. ³⁴ TUHAN i’ o minonuhu’ dati’ do momonsoi diti winonsoi toko’ baino’, om oompunan indo o dusa dokoyu. ³⁵ Om mositi’ nod mundorong kou do hilo’d toning di wawayaan di Kiim do TUHAN do solinaid do turu’ o tadau om turu’ o totuong, om atanud i’ i pinonuhuan do TUHAN. Ondung a’ dokoyu wonsoyon o miagal diri, om apatai kou no moti’. Tu’ iri no o pinonuhuan do TUHAN dot id doho’,’’ ka dau. ³⁶ Om wonsoyo’ ngai’ nopoddi di Harun om i tangaanak dau i pinonuhuan do TUHAN do pinolombus di Musa.

¹ Tadau poddi kawagu di nopongo i pagadatan do kopomilian, om lohowo’ nod i Musa i Harun, om i tangaanak di Harun, om i boyoon dot Israil. ² Om boros ka dau dot id di Harun, ’’Ongoi panganu’d songinan o sapi’ do tontoluhan dit omulok po, om songinan o dumba’ do tontoluhan dit aiso’ o bohiton do tinan. Om patahakon nori do maan do porsombahan dot id TUHAN. Iri nopo sapi’ om maan do porsombahan do pangampun do dusa om iri no dumba’ om maan do porsombahan do sorobon. ³ Om sunudan nondo i tulun dot Israil do manganu do kambing do tontoluhan do maan do porsombahan do pangampun do dusa, om songinan o sapi’ di sontoun nogi’ o tumur, om songinan o tanak do dumba’ di sontoun o tumur, om it aiso’ o bohiton do tinan do maan do porsombahan do sorobon. ⁴ Om suhuon no iyolo’ do mongigit do songinan o sapi’ do tontoluhan om songinan o kambing do tontoluhan do maan do porsombahan do piombolutan. Om mositi’ nod patahakon diyolo’ dot id TUHAN i tayam-tayam diri do mitonggoi di porsombahan do gandum di rinalatan do tumau. Om mositi’ nod wonsoyon diyolo’ o miagal diri tu’ tadau nod baino’ do mintalang o TUHAN dot id diyolo’,’’ ka. ⁵ Om igitai ngai’ nopo diyolo’ do hiri’d dotimbabaan di Kiim i pinonuhuan di Musa diri. Om timung ngai’ no i tulun dot Israil do hiri do suminambayang dot id TUHAN. ⁶ Om boros ka di Musa, ’’Sinuhu’ kou’d TUHAN do momonsoi do miagal diti om kokito kou indo di tulinau di kosorong kopio do tanda’ do koropohon do TUHAN,’’ ka dau. ⁷ Om boros ka di Musa dot id di Harun, ’’Ongoi do hilo’d pananaraban do porsombahan, om papatahak nod porsombahan do pangampun do dusa om porsombahan di sorobon do hilo’, om oompunan i’ do TUHAN o dusa nu om dusa do koinsanai’d tulun do diti. Om wonsoyon no o miagal diri, do tumanud di pinonuhuan do TUHAN,’’ ka dau. ⁸ Om ongoi no i Harun do hiri’d pananaraban do porsombahan om sumbolio’ no dau i sapi’d tontoluhan dit okoro’ po do numaan do porsombahan di sinumbali’ do pangampun di dusa dau. ⁹ Om ngoyo’ noddi di tangaanak di Harun i raha’ di sapi’ddi om patahako’ no diyolo’ dot id di Harun. Om potobungo’ nod Harun o tunturu’ dau do hiri’d raha’ om pogihilo’ no do hiri’d sinangau-sangau dot id pointikid-tikid di sunduk di pananaraban do porsombahan. Om iri nopoddi i noolu’ di raha’ om poiyaso’ no dau do hiri’d poimpahan di pananaraban do porsombahan. ¹⁰ Om iri nopo lunok, om i lusou-lusou, om i bohogian di tundu-undu’ di sapi’ dit osonong kopio, om sinorob dau do hiri’d pananaraban do porsombahan do miagal di pinonuhuan do TUHAN dot id di Musa. ¹¹ Nga’ iri nopo tonsi om i kulit di sapi’ddi om hiri’d soliwan di kokiiman o pinanaraban dau. ¹² Om ngoyo’ noddi di Harun i tayam-tayam di maan dau do porsombahan di sorobon do maan do dau, om sumbolio’ no dau. Om ngoyo’ noddi di tangaanak di Harun i raha’ om patahako’ no dot id di Harun. Om poiyaso’ no di Harun i raha’ddi do hiri’d misingobik om hiri’d misingompok di pananaraban do porsombahan. ¹³ Om patahako’ nogiddi diyolo’ di Harun i tulu om i popot do suwai di tayam-tayam diri, om sorobo’ no di Harun iri do hiri’d pananaraban do porsombahan. ¹⁴ Om ougai no dau i suang do tian om i gakod di tayam-tayam. Om sorobo’ no dau do hiri’d pananaraban do porsombahan, do pinotimpak di noolu-olu’ di porsombahan di sorobon. ¹⁵ Om kopongo poddi ngai’ iri, om patahako’ nogi’ di Harun i porsombahan do nigitan di tulun dot ogumu’. Om ngoyo’ no dau i kambing di patahakon do maan do porsombahan do pangampun do dusa di tulun dot ogumu’. Om sumbolio’ no dau i kambing diri om patahako’ no dau do miagal di pinapatahak dau di porsombahan do maan do pangampun do dusa dau. ¹⁶ Om ngoyo’ nogiddi dau i tayam-tayam di natantu’ mantad do maan do porsombahan di sorobon, om patahako’ no dau do tumanud dit oturan. ¹⁷ Om pinatahak nogi’ dau i porsombahan do gandum. Om anu no iyau do songonggom di tapung om sorobo’ no dau do hiri’d pananaraban do porsombahan. (Iti nopo nga’ pomoruhang di porsombahan di sorobon do monikid tadau.) ¹⁸ Om sumbolio’ no dau i sapi’ do tontoluhan om i dumba’ do tontoluhan do maan do porsombahan do piombolutan do maan di tulun dot Israil. Om ngoyo’ no di tangaanak di Harun i raha’ om patahako’ no diyolo’ dot id di Harun, om poiyaso’ no di Harun i raha’ddi do hiri’d misingobik om hiri’d misingompok di pananaraban do porsombahan. ¹⁹ Om iri nopo popot di sapi’ om i dumba’ dit ongkilunok, ²⁰ om pinasakai dau di kangkab di duwo o tayam-tayam diri, om igitai nogiddi dau do minongoi do hiri’d pananaraban do porsombahan. Om sorobo’ no dau i lunok diri do hiri’d pananaraban do porsombahan, ²¹ om patahako’ no dau i kangkab om i gakod di tayam-tayam diri do maan do porsombahan di pinotobilang do maan do don TUHAN, i bohogian dit onuon dit imam do miagal di pinonuhuan di Musa. ²² Om kopongo ngai’ poddi di Harun do papatahak i porsombahan diri, om poinsawato’ no dau o longon dau do kasahau di tulun dot ogumu’, om barakatai no dau iyolo’. Om lintuhun nogiddi iyau. ²³ Om suang no i Musa om i Harun do hiri’d Kiim do TUHAN, om kosoliwan poddi iyolo’ om barakatai no diyolo’ i tulun dot ogumu’. Om intalang no i tulinau di kosorong kopio do tanda’ do nakarapou o TUHAN, dot id tulun dit ogumu’ om kokito no diyolo’ iri. ²⁴ Om sigog iddi do porikoto’ do TUHAN o tapui, do minonorob di pananaraban do porsombahan. Om soira’ di nokito di tulun dot ogumu’ o miagal diri, om pomogiak ngai’ nopo iyolo’ om otud no do tuminuku’.

¹ Insan tadau om ngoyo’ no di Nadab om i Abihu i talam di poiiyanan diyolo’d tapui. Iyolo’ nopoddi om tangaanak di Harun. Om suangai no diyolo’d popou i talam diri, om ruhangai no diyolo’d kominyan; om patahako’ nogiddi diyolo’ dot id TUHAN. Nga’ iri nopo tapui’ddi om a’ i’ olidang, tu’ a’ i’ iyolo’d TUHAN sinuhu’ do papatahak diri. ² Om sigog nopoddi do polintuhuno’ nod TUHAN o tapui do minonorob diyolo’, gisom do napatai iyolo’ do hiri’d Kiim do TUHAN. ³ Om boros kaddi di Musa dot id di Harun, ’’Iti no o komoyon do TUHAN di boros dau do poingkaa, ’Koinsanai di tulun di momonsoi’d karaja’ ku om mositi’ no do momusou doho’, tu’ iyoho’ noo o Kinorohingan, om pointalangon ku indo o kagayaan ku dot id tulun ku,’ ka,’’ ka dau. Nga’ aiso’ id komi di Harun. ⁴ Om lohowo’ no di Musa i Misail om i Ilsapan. Iyolo’ nopo om tangaanak di Usiol, i tamanon di Harun. Om boros ka di Musa dot id diyolo’, ’’Kainou’d hiti, om ngoyon ngai’ i’ dokoyu antayango’ ilo rata’ di kamanakon dokoyu do sumoliwan diti Kiim dot Olidang; om posoliwanon i’ diti kokiiman,’’ ka dau. ⁵ Om rikot noddi iyolo’ om antayango’ no diyolo’ i rata, nga’ hiri nod pakayan o nigitan diyolo’ do tontok di minangantayang di rata’. Om posoliwano’ no diyolo’ di kokiiman i rata’ddi, do miagal di pinonuhuan di Musa. ⁶ Om boro-boros noddi i Musa dot id di Harun om id di Iliasar om id di Itamar, i tangaanak di Harun. Boros ka dau, ’’Kada’ dokoyu pologoso’ dot a’ sudayon ino tobuk dokoyu, om kada’ dokoyu hurako’ ino pakayan dokoyu do pointalang do mogihad kou. Tu’ ondung wonsoyon dokoyu o miagal diri om apatai kou no moti’. Om otogod nondo o TUHAN do koinsanai’d tulun dot Israil. Nga’ koino-ino i’ o koinsanai di tulun dot Israil di suwai do mogihad do kinapatayon di duwo o tulun diri, i pinatai di tapui do mantad id TUHAN. ⁷ Kada’ kou soliwan diti wawayaan do Kiim, om a’ kou i’ apatai. Tu’ nokotobilang kou no do momonsoi do karaja di don TUHAN, do tontok di tinuntugan kou di tumau,’’ ka dau. Om wonsoyo’ no diyolo’ o miagal di pinoboros di Musa. ⁸ Om boros ka do TUHAN dot id di Harun, ⁹ ’’A’ kou no koino-ino do sumuang di Kiim dot Olidang, iya’ om i tangaanak nu, ondung koponginum kou nod waig dot anggur ko’ tiinumon di kaawuk. Om ondung sumuang kou, om apatai kou no moti’. Om iti no ot oturan dot apatut do tonudon do koinsanai’d sinakagon nu. ¹⁰ Pisuwai-suwayon no kopio dokoyu i dong Kinorohingan om i dong kogumuan, om it a’ sosomu’ om i sosomu’ dot id pagantangan do tugama’. ¹¹ Potudukon no kopio dot id tulun dot Israil o koinsanai dit oturan do nakatahak ku diya’, di pinolombus di Musa,’’ ka. ¹² Om boros kad Musa dot id di Harun, om id di Iliasar om id di Itamar, i tangaanak di Harun, ’’Ngoyo’ dokoyu onuo’ i porsombahan do gandum, i noolu’ di porsombahan do taakanon di pinatahak dot id TUHAN. Om wonsoyon nori do roti dit a’ ralatan do pangambang, om akanon i’ do hilo’d toning di pananaraban do porsombahan, tu’ iri nopo porsombahan diri om olidang no kopio. ¹³ Kanon no dokoyu i roti’ddi dot id kinoiyonon dit olidang; tu’ iri no o dokoyu’d gontok, diya’ om don tangaanak nu di tongokusai, do mantad id taakanon di pinatahak dot id TUHAN. Iri no o pinonuhuan do TUHAN doho’. ¹⁴ Nga’ koino-ino kou i’ om i tangaanak dokoyu’d kusai om tondu’ do mangakan di kangkab om i gakod di tayam-tayam di numaan do porsombahan om i porsombahan do pinotobilang do maan do don TUHAN, it aanu dit imam. Honggo nopo o kinoiyonon dit olidang dot id pagantangan do tugama’ om koino-ino no dokoyu’d iyonon do mangakan diri. ¹⁵ Om igitan nondo diyolo’ i gakod om i kangkab di tayam-tayam diri do tontok di patahakon i lunok do maan do porsombahan do taakanon dot id TUHAN. Iri nopo popot do tayam-tayam diri om gontok no dokoyu om gontok di tangaanak dokoyu do gisom dot alaid, do miagal di pinonuhuan do TUHAN,’’ ka dau. ¹⁶ Om uhoto’ no di Musa ondung hinonggo i kambing do maan do porsombahan do pangampun do dusa. Om koilaai no dau do nosorob no i kambing diri. Om kotogod noddi iyau di Iliasar om i Itamar. Om boros ka dau, ¹⁷ ’’Nokuro tu’ okon ko’ id kinoiyonon dit olidang o pinangakanan dokoyu di porsombahan do pangampun do dusa’ddi? Olidang tomod moti’ iri, om pinatahak pogi’ do TUHAN iri dot id dokoyu nga’ maan do pangampun do dusa diti tulun dot ogumu’. ¹⁸ Om mositi’ no daa do hilo’d Kiim dot Olidang o pinangakanan dokoyu di porsombahan diri do miagal di pinonuhuan ku dokoyu, tu’ a’ i’ noigitan i raha’ di kambing diri do hilo’d Kiim dot Olidang,’’ ka dau. ¹⁹ Om boros ka di Harun do suminimbar, ’’Poingkuro no daa do nakan ku i porsombahan do pangampun do dusa’ddi di tadau baino’? Nokoinsonong i’ tuu daa do ginawo’d TUHAN iri? Nakatahak no di tulun dot ogumu’ i porsombahan do pangampun do dusa om i porsombahan di sorobon dot id TUHAN di tadau baino’, nga’ nosiliu kasai’ i’ iti kosusaan dot id doho’,’’ ka dau. ²⁰ Om natapatan iddi i Musa do nokorongou di pinosimbar di Harun do miagal diri.

¹ Om patahako’ nod TUHAN dot id di Musa om id di Harun iti piro-piro ot oturan, ² - ³ do patahakon dot id tulun dot Israil. Nunu nopo o nintorusan di poingiyon do hiti’d tindal, i manapa’ di kanon dau, om i nopilapak o sondulu om koino-ino no dokoyu’d kanon. ⁴ - ⁶ Nga’ iri nopo unta, om i palanuk, om i tikus balanda’ om a’ i’ koino-ino do kanon. Mositi’ nod pokososomuon ngai’ o nintorusan diri tu’ mulong piya do sapaon diyolo’ i kanon diyolo’, nga’ a’ i’ nopilapak o sondulu diyolo’. ⁷ Wogok nga’ a’ i’ koino-ino do kanon. Om mositi’ nod pokososomuon i wogok tu’ nopilapak piya daa o sondulu nga’ a’ i’ i wogok manapa’ di kanon dau. ⁸ Kada’ kou no kopio pangakan do nintorusan diri om kada’ kou ongoi igit do nintorusan diri di nangapatai piya, tu’ nintorusan nopoddi om sosomu’ i’. ⁹ Koino-ino kou i’ do mangakan do nunu nopo kasada’ di kisorod om kisisi’. ¹⁰ Nga’ nunu nopo o nintorusan di poingiyon do hilo’d waig dit aiso’ o sorod om aiso’ o sisi’, om amu’ no koino-ino’d kanon. ¹¹ Nintorusan nopo do miagal diri om pokososomuon no. Amu’ nori koino-ino do kanon, om amu’ koino-ino do mongoi kama’. ¹² Kada’ kou no kopio pangakan do nunu nopo i poingiyon dot id suang do waig dit aiso’ o sorod om aiso’ o sisi’. ¹³ - ¹⁹ Kada’ kou no kopio pangakan dot ongoiso’ piya do tombolog diti: kondiu, puok, simpupulu, kondiu baras, bangkahak, tombolog di roitan do burung unta, putik rahat, luungon, montis, luing, tubou, om gair. ²⁰ Om koinsanai di sontulud-tulud dit ongokooro’ om i sangkamang-kamang, nga’ pokososomuon ngai’ no; ²¹ suwai nondo ko’ i mimpod-simpod do mamanau. ²² Om koino-ino kou i’ do mangakan do katat, om ngatit, om godu. ²³ Nga’ koinsanai dit ongkitalad dit ongokooro’ om i sangkamang-kamang om mositi’ no do pokososomuon. ²⁴ - ²⁸ Om isai nopo o koigit do tinan do nintorusan di nangarait diti di nangapatai om sosomu’ no do gisom do sosodopon: koinsanai di nintorusan di kisondulu (suwai nondo ko’ i nopilapak o sondulu om i manapa’ di kanon dau) om i kigakod dot apat dit atarom o sondulu. Isai nopo o koigit do tinan do nintorusan diri di nangapatai om mositi’ nod pupuan i pakayan dau, nga’ sosomu’ po ma kasai’ iyau do gisom do sosodopon. ²⁹ - ³⁰ Iri nopo tikus do gouton, om i tikus dot angagayo om i tikus dot ongokoro’, om tugarang, om pokososomuon ngai’ nopo. ³¹ Om isai nopo o koigit di nintorusan diri di nangapatai om sosomu’ no iyau do gisom do sosodopon. ³² Om ondung aratu’ i tinan do nintorusan diri di napatai no dot id nunu nopo o koburu-buruon, dot iri tuu kayu, ko’ kain, ko’ kulit, ko’ karung do winonsoi, om ososomu’ nori, om mositi’ no do poobugon dot id waig. Nga’ poingkuro piya nga’ sosomu’ kasai’ nori do gisom do sosodopon. ³³ Om ondung aratu’ i tinan di nintorusan diri di napatai no dot id kuron, om kotonggoi ngai’ no i poinsuang di kuron dot ososomu’, om iri kuron nga’ mositi’ no do babakon. ³⁴ Iri nopo taakanon di koubasanan i’ daa do mangakan, om ososomu’ ngai’ no dot ondung notungu nori do waig do mantad id kuron di nososomu’. Om iri i milo i’ daa dot inumon dot id suang do kuron di nososomu’ nga’ kotonggoi no dot ososomu’. ³⁵ Nunu nopo o korotuon di tinan di nintorusan diri di napatai no om ososomu’ no; ondung i ropuhan do tana’ ko’ i pagagansakan di tana’ do winonsoi o korotuon diri om mositi’ no do babakon. ³⁶ Nunu nopo ot otopisan di tinan di nintorusan di napatai’ddi om sosomu’ no; nga’ iri nopondo tudan do waig om i torobong om a’ i’ ososomu’, tu’ iti nopo om a’ i’ ososomu’. ³⁷ Ondung haro ot ongoiso’ do nintorusan di napatai dot aratu’ dot id sakai di linsou di maan do tonomon, om a’ i’ ososomu’ i linsou. ³⁸ Nga’ ondung poirandam do waig i linsou, om orotuan nondo di tinan di nintorusan di napatai’ddi, om ososomu’ no i linsou. ³⁹ Ondung haro o tulun do koigit do nintorusan di napatai, i koino-ino piya daa do kanon, om sosomu’ no o tulun diri do gisom do sosodopon. ⁴⁰ Om ondung haro o tulun do kapangakan do tonsi di nintorusan di napatai’ddi — i naanu do mantad id honggo nopo o bohogian do tinan di nintorusan diri — om mositi’ no do pupuan dau o pakayan dau, nga’ sosomu’ kasai’ po mando iyau do gisom do sosodopon. Om isai nopo o mongigit do nintorusan di napatai’ddi om mositi’ no do pupuan dau o pakayan dau, nga’ sosomu’ kasai’ po mando iyau do gisom do sosodopon. ⁴¹ Kada’ kou nogi’ kopio pangakan do nunu nopo o bansa’ do nintorusan dit ongokooro’ do sampanau-panau do hilo’d tana’, ⁴² dot iri tuu i kumamang ko’ iri po i kigakod dot apat, ko’ it ogumu’ o gakod, tu’ sosomu’ ngai’ nori. ⁴³ Kada’ dokoyu sosomuo’ o tinan dokoyu do mangakan do nintorusan diri o ponosomu’. ⁴⁴ Iyoho’ no o TUHAN, i Kinorohingan dokoyu, iyo nopoddi om antaan-taan no dokoyu om olidang kasai’ kou i’ tu’ olidang oku i’ iyoho’. ⁴⁵ Iyoho’ no i TUHAN, i pinoposoliwan dokoyu do mantad hilo’d Masir, om osiliu oku indo do Kinorohingan dokoyu. Kumolidang kou no, tu’ olidang oku i’. ⁴⁶ Om iri no ot oturan do pasal do koinsanai do nintorusan om tombolog, om pasal do koinsanai di poingiyon dot id suang do waig, om koinsanai di nintorusan di mimpanau do hiti’d tana’. ⁴⁷ Om ilaan no kopio dokoyu i kopisuayan dit a’ sosomu’ om i sosomu’, om i nintorusan di koino-ino do kanon om it a’ koino-ino do kanon do tumanud dot oturan do tugama’.

¹ Om patahako’ nod TUHAN dot id di Musa iti piro-piro ot oturan ² do patahakon dot id tulun dot Israil. Soira’ nopod haro o tondu’ dot osusu, om kusai no o tanak dau, om sosomu’ no i tondu’ddi dot id pagantangan do tugama’ do solinaid do turu’ o tadau; do miagal nopo di kososomuo’ dau do tontok di haro o pomulanan dau. ³ Om orikot nopondo o tadau’d kawalu’ om mositi’ no do sunatan i tanak di kosususu’ddi. ⁴ Om katalib nopo i turu’ o tadau, om tolu po nohopod om tolu o tadau di tondu’ do pokososomuon, tu’ ogumu’ i’ o raha’ do nokosoliwan. Om katalib pondo iri om a’ nogi’ iyau sosomu’. Om tontok nopo dit a’ po katalib i maso do kopomolidangan om a’ po iyau koino-ino’d kumama’ do nunu nopo it olidang ko’ mongoi po suang di Kiim dot Olidang. ⁵ Soira’ nopod haro o tondu’ dot osusu, om tondu’ no o tanak dau, om sosomu’ no i tondu’ddi do solinaid do hopod om apat o tadau, do miagal do kososomuo’ dau do tontok di haro o pomulanan dau. Om mantad nopoddi om onom po nohopod om onom o tadau di tondu’ do pokososomuon tu’ ogumu’ i’ o raha’ do nokosoliwan. ⁶ Om atalib nopondo i maso’d kopomolidangan, do kusai tuu i tanak di pinogkosusu ko’ tondu’ po, om mositi’ nod mongoi i tondu’ddi papatahak do porsombahan dot id imam do hiri’d wawayaan di Kiim do TUHAN. Porsombahan nopo do patahakon om songinan o tanak do dumba’ di sontoun nogi’ o tumur, do maan do porsombahan di sorobon, om songinan o punai ko’ songinan o sikukur do maan do porsombahan do pangampun do dusa. ⁷ Om mositi’ nod patahakon dit imam i porsombahan diri dot id TUHAN om wonsoyon i natantu’ mantad do wonsoyon do pongidu’ do kososomuo’ di tondu’, om olidang indo i tondu’ dot id pagantangan do tugama’. Iri no ot apatut do wonsoyon di tondu’, om oidu’ indo i kososomuo’ dau. ⁸ Ondung aiso’ o panganu di tondu’ddi do tanak do dumba’, om mositi’ no do papatahak iyau do duwo o tinan do punai ko’ duwo o tinan do sikukur. Iri nopo songinan om maan do porsombahan di sorobon om iri no tiso’ om maan do porsombahan do pangampun do dusa. Om mositi’ no do wonsoyon dit imam i natantu’ mantad do wonsoyon do pongidu’ di kososomuo’ di tondu’, om olidang indo i tondu’ddi dot id pagantangan do tugama’.

¹ Om patahako’ nod TUHAN dot id di Musa om id di Harun iti piro-piro ot oturan: ² Ondung haro o tulun di kitoruol o kulit, it oguruk ko’ i kikupos ko’ i haro o miagal di tinudu-tudu’ dot ongopurak, i koiyo-iyo do sumiliu’d toruol dit araat do hiri’d kulit dau, om mositi’ nod ngoyon i tulun diri posolowoto’ dit imam di suminolusuk di Harun. ³ Om porisaon nondo dit imam o kulit di tulun di kitoruol diri. Ondung opurak i hulu do hiri’d kulit di kitoruol, om poillosod no i kulit, om iri no kopio toruol do kulit dot araat o nokoontok di tulun diri. Om poboroson nondo dit imam di suminolusuk di Harun do sosomu’ i tulun diri. ⁴ Nga’ ondung opurak no toomod i kulit, om a’ poillosod i kulit, om a’ opurak i hulu, om posuwai-suwayon nopondo dit imam i tulun diri do solinaid do turu’ o tadau. ⁵ Om ngoyon nondo kawagu dit imam porisao’ i tulun diri di koturu’ do tadau, om ondung a’ nokosimban om a’ nakaralad i toruol dot okito dau, om posuwai-suwayon po dau i tulun diri do solinaid do turu’ kawagu o tadau. ⁶ Om ngoyon nondo kawagu dit imam porisao’ i tulun diri di koturu’ do tadau. Om ondung natanus i toruol, om a’ no nakaralad, om poboroson nondo dit imam dot olidang i tulun diri, om okon ko’ toruol dot araat i toruol dau. Om pupuan nondo di tulun i pakayan dau om olidang i’ iyau dot id pagantangan do tugama’. ⁷ Nga’ ondung rumalad i toruol dot id tohuri ko’ i nokoboros dit imam dot olidang i tulun diri, om mositi’ no do mongoi kawagu i tulun diri solowot dit imam. ⁸ Om porisaon nondo kawagu dit imam i toruol di tulun diri, om ondung nakaralad, om poboroson no dit imam do sosomu’ i tulun, tu’ iri nopo om toruol nod kulit dit araat. ⁹ Iri nopo tulun di kitoruol do kulit dit araat, om mositi’ nod ngoyon posolowoto’ dit imam. ¹⁰ Om porisaon nondo dit imam o tulun diri. Ondung opurak i kulit di kitoruol, om i hulu nga’ opurak om haro po o gandas, ¹¹ om kitoruol no kopio dot araat i kulit di tulun diri. Om mositi’ nod poboroson dit imam do sosomu’ i tulun diri. Okon no ko’ posuwai-suwayon po toomod, tu’ atalang no do sosomu’ i tulun diri. ¹² Ondung rumalad i miagal di tinudu-tudu’ dit opurak, gisom dot otongkop o tinan di tulun do mantad id gakod om gisom dot id tulu dau, ¹³ om mositi’ nod ngoyon kawagu iyau porisao’ dit imam. Ondung okito dit imam do nokotongkop nod tinan di tulun i miagal di tinudu-tudu’ dot opurak diri, om i kulit di tulun nga’ opurak ngai’ noddi, om mositi’ nod poboroson dit imam dot olidang i tulun diri. ¹⁴ - ¹⁵ Nga’ ondung gumandas, om mositi’ nod ngoyon kawagu iyau porisao’ dit imam. Om ondung gandas kopio iri, om mositi’ nod poboroson do sosomu’ i tulun diri. Tu’ iri no i gandas o tanda’ do toruol do kulit dit araat i toruol dau. ¹⁶ Nga’ ondung lumingos i gandas, om mumang kawagu purak, om mositi’ nod mongoi i tulun solowot dit imam, ¹⁷ om oporisa’ i’ iyau kawagu. Om ondung nokopurak i guminandas, om poboroson no dit imam dot olidang i tulun diri. ¹⁸ Ondung haro o tulun do kuposon, om olingos no i kupos dau ¹⁹ nga’ alaid-laid no om haro po o lumonit dot opurak ko’ opurak daragang- ragang o kokitanan do hiri’d kinolingasan di kupos, om mositi’ nod mongoi i tulun diri solowot dit imam ²⁰ om oporisa’ i’ iyau. Om ondung nokolosod i kulit di minumang purak, om nokopurak i hulu do hiri, om mositi’ nod poboroson dit imam do sosomu’ i tulun diri. Iri nopo kupos om koimpuunon nod toruol do kusta. ²¹ Nga’ ondung a’ opurak i hulu do hiri’d kinolingasan di kupos, om a’ poillosod i kulit, suwai ko’ opurak nogi’ ko’ i kulit do suwai, om mositi’ nod posuwai-suwayon dit imam i tulun diri do solinaid do turu’ o tadau. ²² Ondung rumalad it opurak diri, om mositi’ nod poboroson dit imam do sosomu’ i tulun diri tu’ toruol nod kulit dit araat o nokoontok dau. ²³ Nga’ ondung a’ nokosimban om a’ ruminalad it opurak, om iri i kinolingasan di kupos iri, om poboroson no dot olidang i tulun diri. ²⁴ Ondung haro o tulun dot olonuk do tapui, om mumang nondo purak ko’ opurak daragang-ragang i kulit do hiri’d nolonuk, ²⁵ om mositi’ nod porisaon po dit imam i tulun diri. Ondung mumang purak i hulu do hiri’d nolonuk diri, om poillosod no i kulit om norolihan nod toruol do kulit dit araat i nolonuk do tapui’ddi. Om mositi’ nod poboroson dit imam do sosomu’ i tulun diri. ²⁶ Nga’ ondung a’ mumang purak i hulu do hiri’d nolonuk, om a’ nokolosod i kulit, suwai ko’ opurak nogi’ o kokitanan, om mositi’ nod posuwai-suwayon dit imam o tulun diri do solinaid do turu’ o tadau. ²⁷ Om ngoyon nondo kawagu dit imam porisao’ i toruol di tulun diri do koturu’d tadau. Om ondung nakaralad i toruol, om iri no o tanda’ dot i toruol do kusta o nokoontok di tulun diri. Om mositi’ nod poboroson do sosomu’ i tulun diri. ²⁸ Nga’ ondung a’ sumimban om a’ rumalad it opurak diri, suwai ko’ opurak nogi’ o kokitanan, om okon i’ ko’ toruol do kusta iri. Om mositi’ nod poboroson dit imam dot olidang i tulun diri, tu’ iri nopo om kinolingasan i’ di nolonuk do tapui. ²⁹ Ondung haro o kusai ko’ tondu’ di kitoruol o kulit do tulu, ko’ kitoruol o hiri’d roo, ³⁰ om mositi’ nod ngoyon kopio dit imam porisao’ iri. Ondung poillosod i kulit, om osilou om otigas i tobuk do hiri, om iri no o tanda’ do toruol do kusta o nokoontok do tulun diri. Om mositi’ nod poboroson do sosomu’ i tulun diri. ³¹ Ondung a’ poillosod i kulit di kitoruol, nga’ aiso’ no ma o tobuk dit osonong do hiri, do tontok di porisao’ i’ dit imam, om mositi’ nod posuwai-suwayon i tulun diri do solinaid do turu’ o tadau. ³² Om koturu’ pondod tadau, om mositi’ nod porisaon kawagu dit imam i kulit di kitoruol. Om ondung a’ nakaralad i toruol diri om aiso’ o tobuk dit ongosilou, om a’ poillosod o kokitanan di kulit, ³³ om mositi’ nod bugaran di tulun o posorili’ di kulit di kitoruol. Om posuwai-suwayon po kawagu dit imam i tulun diri do solinaid do turu’ o tadau. ³⁴ Om koturu’ pondod tadau, om ngoyon no kawagu dit imam porisao’ i toruol di tulun diri. Om ondung a’ nakaralad i toruol, om a’ poillosod i kulit, om poboroson nod olidang i tulun diri; om mositi’ nod pupuan di tulun o pakayan dau. ³⁵ Nga’ ondung rumalad i toruol dot id tohuri ko’ i pinoboros dot olidang i tulun diri, ³⁶ om mositi’ nod ngoyon dit imam porisao’ kawagu i toruol di tulun diri. Ondung nakaralad kopio i toruol, om a’ no minog dot antangan dit imam ondung haro ot osilou di tobuk, tu’ atalang no do sosomu’ i tulun diri. ³⁷ Nga’ ondung okito dit imam dot a’ rumalad i toruol, om nokosuni no o tobuk dit ongosonong do hiri, om nolingos no i toruol diri. Om mositi’ nod poboroson dit imam do nolingos i toruol om olidang i tulun diri. ³⁸ Ondung haro o kusai ko’ tondu’ di haro o miagal do tinudu-tudu’ dot opurak do hiri’d kulit, ³⁹ om mositi’ nod porisaon kopio dit imam o tulun diri. Ondung a’ opurak no i kulit, om gurap i’ toomod iri do nokoroliu do hiri’d kulit di tulun, om a’ i’ sosomu’ i tulun diri. ⁴⁰ - ⁴¹ Ondung alagasan o ponong id tipus ko’ ponong id turos do tulu do tongokusai, om a’ i’ sosomu’ i tulun diri, ondung nalagasan no toomod. ⁴² Nga’ ondung haro o mimbulai dot opurak daragang-ragang do hiri’d nalagasan, om toruol nod kulit dit araat o nokoontok di tulun diri. ⁴³ Om mositi’ nod ngoyon kopio dit imam porisao’ o tulun diri. Om ondung haro kopio it ongopurak daragang-ragang do hiri’d nalagasan, ⁴⁴ om mositi’ nod poboroson dit imam do sosomu’ i tulun diri tu’ noontok no do toruol do kusta o hiri’d tulu di tulun diri. ⁴⁵ Om tulun nopo di noontok do toruol do kulit dit araat, om mositi’ nod manampakai iyau do pakayan di nongohurak-hurak no, om a’ sudayon o tobuk. Om mositi’ nod tirungon dau o ponong id siriba’ do rabas dau, om minggiak nogindo do poingkaa, ’’Sosomu’! Sosomu’!’’ ka. ⁴⁶ Solinaid nopo di tulun do kitoruol do miagal diri, om sosomu’ no iyau. Om mositi’ no do hiri’d soliwan di kokiiman o tiyonon dau, it id sodu’ do tulun do suwai. ⁴⁷ Soira’ nopod haro o gorum dot id kain ko’ id pakayan di kihulu-hulu ko’ i kain linan ⁴⁸ ko’ id kulit ko’ id nunu nopo i kulit do winonsoi, ⁴⁹ om ondung otomou-tomou ko’ aragang-ragang o kokitanan diri, om iri no kopio i gorum di rumalad iri, om mositi’ nod ngoyon pokitanai dit imam iri. ⁵⁰ Om antangan nondo dit imam i gorumon diri om posuwai-suwayon no i gorumon do solinaid do turu’ o tadau. ⁵¹ Om ngoyon no dau kawagu antangai iri di koturu’d tadau. Om nakaralad nopo i gorum, om sosomu’ no i ginorumon diri. ⁵² Om mositi’ nod tutudan dit imam i gorumon, tu’ iri nopo om gorum di rumalad; om mositi’ no do tapui o pamaraag diri. ⁵³ Nga’ ondung a’ nakaralad i gorum do hiri’d nokodokoton di gorum dot okito dit imam, ⁵⁴ om monuhu’ nondo iyau’d tulun do momupu’ di ginorumon diri om posuwai-suwayon o poiyanan diri do solinaid do turu’ o tadau. ⁵⁵ Om ngoyon nondo kawagu dit imam antangai i gorumon diri, om ondung iyo kasai’ddi o kokitanan di gorum, dot a’ piya daa nakaralad, om sosomu’ no i ginorumon diri; om mositi’ nod tutudan, do hiri tuu’d soibau ko’ hiri pod saalom i gorumon. ⁵⁶ Nga’ ondung natanus i gorum di ngoyon kawagu dit imam antangai i ginorumon, om hurakon nondo dau i ginorumon do mantad hiri’d kain ko’ mantad hiri’d kulit. ⁵⁷ Nga’ ondung mimbulai kawagu i gorum, om rumalad no kawagu, om mositi’ nod tutudan di sanganu i ginorumon diri. ⁵⁸ Ondung pupuan dau i ginorumon om a’ nondo mimbulai kawagu i gorum, om mositi’ nod pupuan kawagu dau iri, om olidang i’ iri dot id pagantangan do tugama’. ⁵⁹ Om iri no o toturan do pasal do gorum dot id pakayan, dot iri tuu i kain do kihulu-hulu ko’ iri po kain linan, ko’ nunu nopo i kulit do winonsoi.

¹ Om patahako’ nod TUHAN dot id di Musa ² iti piro-piro ot oturan do pasal do kowoyo-woyoo’ do momolidang do tulun di nolingasan do mantad id toruol do kusta. Tontok nopo di tadau do poboroson dot olidang i tulun diri, om mositi’ no do ngoyon iyau posolowoto’ dit imam. ³ Om angatan nondo iyau dit imam do sumoliwan di kokiiman om porisaon nogindo iyau. Ondung nolingos no kopio i toruol dau, ⁴ om suhuon nondo dit imam i tulun diri do papatahak do duwo o tombolog dit a’ sosomu’, om sallangod o kayu sedar do Libanon, om sampatod o tali dit aragang, om sompuun o sakot di roitan do hisop. ⁵ Om iri nopondo tiso’ di tombolog om mositi’ no do kokoron om sahawon di kuron di kisuang do waig do mantad id tudan do waig. ⁶ Om iri no tombolog di tiso’, om i kayu sedar, om i tali dot aragang om i sakot di roitan do hisop, om potobungon di raha’ di tombolog di kinokor. ⁷ Om powowoson nondo dit imam dot inturu’ i raha’ di tombolog diri do hiri’d tulun di nolingasan. Om poboroson nogindo dit imam dot olidang i tulun diri. Om iri nopondo i tombolog di poimiyau om mositi’ no do poiduwon do hilo’d talun. ⁸ Om pupuan nondo di tulun o pakayan dau, om bugaron ngai’ o tobuk dau, om mongoi podsu’; om olidang nogindo iyau dot id pagantangan do tugama’. Om koino-ino nondo iyau do sumuang do hiri’d kokiiman nga’ hiri po mando kasai’ iyau’d soliwan di kiim dau do solinaid do turu’ o tadau. ⁹ Om koturu’ nopondod tadau, om bugaron po kawagu dau o tulu dau, om bugaron o ganggut, om bugaron ngai’ o hulu do tinan dau; om pupuan nogindo dau o pakayan dau om mongoi podsu’, om olidang nogindo iyau dot id pagantangan do tugama’. ¹⁰ Kawalu’ nopondod tadau om mositi’ nod paatod iyau do duwo o tanak do dumba’ di tontoluhan, om songinan o dumba’ do tondu’ di sontoun nogi’ o tumur om it aiso’ o bohiton do tinan, om tolu kilogram do tapung di rinalatan do tumau do saitun, om sompitolu di songlito o tumau do saitun. ¹¹ Om mositi’ no dot angatan dit imam i tulun diri om igitan ngai’ i porsombahan dau’ddi do hiri’d wawayaan di Kiim do TUHAN. ¹² Om ngoyon nondo dit imam o tiso’ di tanak do dumba’ do tontoluhan diri om i tumau do saitun di sompitolu di sonlito. Om patahakon nondo dau iri do maan do porsombahan di poningolon. Om iri nopo nga’ porsombahan di pinotobilang do maan do don TUHAN, om iri no it imam o kaanu’ddi. ¹³ Om mositi’ no do sumbolion dau i tanak do dumba’ddi dot id kinoiyonon dit olidang, i hiri’d ponunumbolian do tayam-tayam di maan do porsombahan do pangampun do dusa om i porsombahan di sorobon. Om mositi’ no do hiri o ponumbolian di dumba’ddi tu’ iri nopo porsombahan do poningolon, om iyo i’ di porsombahan do pangampun do dusa tu’ olidang kopio om iri no imam o kaanu. ¹⁴ Om manu nondo it imam dot ongokooro’ di raha’ di tanak do dumba’ddi om pogihilon no do hiri’d tolingo’d wanan, om hiri’d posolon do longon do wanan om hiri’d posolon do lapap do wanan di tulun di poboroson dot olidang dot id pagantangan do tugama’. ¹⁵ Om manu it imam dot ongokooro’ di tumau do saitun om poihibon no do hiri’d palad dau’d gibang. ¹⁶ Om potuduwon nogindo dit imam o tiso’ di tunturu’ do longon dau’d wanan di tumau do saitun diri, om powowoson dot inturu’ ot ongokooro’ddi do hiri’d Kiim do TUHAN. ¹⁷ Om manu nogindo iyau dot ongokooro’ di tumau di hiri’d palad dau, om ongokooro’ di raha’ di dumba’, om pogihilon nogindo do hiri’d tolingo’d wanan, om hiri’d posolon do longon do wanan, om hiri’d posolon do lapap do wanan di tulun di poboroson dot olidang dot id pagantangan do tugama’. ¹⁸ Om iri nopondo tumau di noolu’ do hiri’d palad dau, om poumahon do tulu di tulun diri. Om iyo noddi o wonsoyon do maan do pomolidang do tumanud dit oturan do tugama’. ¹⁹ Om patahakon nogindo dit imam i porsombahan do pangampun do dusa om wonsoyon ngai’ i maan do pomolidang do tumanud dot oturan do tugama’. Om owonsoi ngai’ po dau iri om sumbolion nogindo dau i tayam-tayam do maan do porsombahan di sorobon. ²⁰ Om patahakon nondo dau iri do mitonggoi di porsombahan do gandum do hiri’d pananaraban do porsombahan. Om iyo noddi o wonsoyon dit imam do maan do pomolidang do tinan do tumanud dot oturan do tugama’. Om olidang nondo i tulun diri dot id pagantangan do tugama’. ²¹ Ondung mosikin i tulun diri, om aiso’ no o panganu dau di tolu o tayam-tayam di natantu’ mantad do maan do porsombahan, om migit nopo iyau do songinan o dumba’ do tontoluhan di tanak po do maan do porsombahan do poningolon, om maan do porsombahan di potobilangon do maan do don TUHAN, it aanu dit imam. Om songkilogram nopo o tapung di rinalatan do tumau do saitun o patahakon dau do maan do porsombahan do gandum om sompitolu di songlito o tumau do saitun. ²² Om papatahak nogi’ iyau do duwo o tinan do punai ko’ duwo o tinan do sikukur. Songinan o maan do porsombahan do pangampun do dusa om songinan o maan do porsombahan di sorobon. ²³ Om kawalu’ nopondod tadau di kopomolidangan do tinan dau, om mositi’ nod ngoyon ngai’ dau patahako’ dot id imam i porsombahan diri do hiri’d wawayaan di Kiim dot Olidang. ²⁴ Om ngoyon nondo dit imam i dumba’ om i tumau do saitun diri om patahakon no do maan do porsombahan di potobilangon do maan do don TUHAN, om iri nopo om aanu no dit imam. ²⁵ Om sumbolion nondo dit imam i dumba’ddi om manu dot ongokooro’ di raha’ om pogihilon nogindo do hiri’d tolingo’d wanan, om hiri’d posolon do longon do wanan, om hiri’d posolon do lapap do wanan di tulun di poboroson dot olidang. ²⁶ Om poihibon nondo dit imam ot ongokooro’ di tumau do hiri’d palad dau’d gibang. ²⁷ Om potuduwon o tiso’ di tunturu’ do longon dau’d wanan om powowoson nogindo dau dot inturu’ do hiri’d Kiim do TUHAN. ²⁸ Om gihilan nondo dau di tumau o hiri’d ginihilan dau di raha’: hiri’d tolingo’d wanan, om hiri’d posolon do longon do wanan, om hiri’d posolon do lapap do wanan di tulun di poboroson dot olidang. ²⁹ Om iri nopondo noolu’ di tumau om poumahon do hiri’d tulu di tulun diri. Om iyo noddi o kowoyo-woyoo’ do momolidang do tinan do tumanud dot oturan do tugama’. ³⁰ Om patahakon nogindo dau o tiso’ di punai ko’ sikukur ³¹ do maan do porsombahan do pangampun do dusa, om iri no tiso’ om maan do porsombahan di sorobon do mitonggoi di porsombahan do gandum. Om iyo noddi o wonsoyon dit imam do momolidang do tinan do tulun do tumanud dot oturan do tugama’. ³² Iri no ot oturan do tonudon do tulun di kitoruol do kusta nga’ it aiso’ o panganu di natantu’ mantad do maan do porsombahan do pomolidang do tinan dau. ³³ Om patahako’ nod TUHAN dot id di Musa om id di Harun ³⁴ iti piro-piro o toturan do pasal di walai dot adakatan do gorum di rumalad. (Iti nopo toturan diti om tonudon nopo om kosuang i tulun dot Israil di pomogunan do Kanaan, i patahakon do TUHAN dot id diyolo’ do maan do diyolo’d songonuon.) ³⁵ Isai nopo o kokito do gorum do hiri’d walai dau, om mositi’ no do mongoi pomisunud dit imam do pasal diri. ³⁶ Om monuhu’ nondo it imam do posoliwan do koinsanai di poinsuang di walai do tintod dau do mongoi pogontong kopio di gorum; tu’ a’ nopo posoliwanon nga’ oinsanan nopo i poinsuang di walai’ddi do pokososomuon. Om mongoi nogindo it imam do hiri’d walai’ddi ³⁷ do mongoi pogontong di gorumon. Ondung haro ot otomou-tomou ko’ aragang- ragang do potomborok do pasarabak di limput, ³⁸ om tongkiadan no dau i walai om ontiilan do solinaid do turu’ o tadau. ³⁹ Om koturu’ pondod tadau om gumuli’ no kawagu iyau do mongoi pogontong di gorum. Ondung nakaralad i gorum, ⁴⁰ - ⁴¹ om monuhu’ no iyau do tulun do mongidu’ di watu di nadakatan do gorum, om iduwon ngai’ i limput di ponong id suang. Om iri nopondo pinonorokot om i watu di nidu’ddi om pataamon do hiri’d kinoiyonon di sosomu’ do hiri’d soliwan di bandar. ⁴² Om tingalanan nogindo do watu do wagu i watu di nidu’ddi. Om lopisan do ponorokot do wagu i limput di walai. ⁴³ Ondung mimbulai kawagu i gorum do hiri’d walai dot id tohuri ko’ i noidu’ i watu di nadakatan do gorum, om nokisasan om nolopisan di ponorokot i walai, ⁴⁴ om mositi’ nod ngoyon kawagu dit imam antangai i walai’ddi. Ondung nakaralad i gorum om sosomu’ ngai’ no i walai’ddi. ⁴⁵ Om mositi’ nod huyason i walai, om iri nopondo watu om i kayu, om i pinonorokot do pinomonsoi di walai om mositi’ nod posoliwanon di bandar om pataamon do hiri’d kinoiyonon di sosomu’. ⁴⁶ Isai nopo o sumuang di walai di maso pod poontiil, om sosomu’ no do gisom do sosodopon. ⁴⁷ Isai nopo o kolii ko’ kaakan do hiri’d walai’ddi om mositi’ no do pupuan i pakayan dau. ⁴⁸ Ondung a’ mimbulai i gorum do hiri’d walai di nolopisan di pinonorokot do wagu di ngoyon dit imam antangai, om poboroson no dot olidang i walai, tu’ aiso’ noddi o gorum do hiri. ⁴⁹ Om manganu nondo it imam do duwo o tombolog, om piro-piro o langod do kayu sedar, om sampatod o tali dit aragang, om sompuun o sakot di roitan do hisop. ⁵⁰ Om mositi’ nod kokoron dau i tiso’ di tombolog diri do sahawon do kuron di kisuang do waig di kaanu do mantad id tudan do waig. ⁵¹ Om mositi’ nod ngoyon dau poobugo’ di raha’ di tombolog di kinokor i kayu sedar, om i hisop, om i tali dot aragang diri, om i tombolog di miyau. Om poobugon ngai’ dau iri do hiri’d waig di kaanu’ddi. Om wawasan nogindo dau di raha’ i walai’ddi dot inturu’ kowowos. ⁵² - ⁵³ Om iri nopo tombolog di poimiyau om mositi’ nod poiduwon dit imam do hiri’d talun, i hiri’d soliwan di bandar. Om iyo noddi o wonsoyon dit imam do pomolidang di walai do tumanud dot oturan do tugama’, om olidang indo i walai’ddi dot id pagantangan do tugama’. ⁵⁴ Om iyo noddi ot oturan do pasal do toruol do kusta, ⁵⁵ - ⁵⁶ om pasal dit oguruk, om i kupos, om i miagal di tinudu-tudu’ dot ongopurak ko’ iri po lumonit, om pasal do gorum dot id pakayan ko’ id walai. ⁵⁷ Om iti nopo piro-piro o toturan diti nga’ pongilo ondung sosomu’ tuu ko’ amu’ o nunu nopo dot id pagantangan do tugama’.

¹ Om patahako’ nod TUHAN dot id di Musa om id di Harun iti piro-piro o toturan ² do patahakon dot id tulun dot Israil. Iri nopo miagal-agal do waig di sumoliwan do mantad id wayaan do sobu do tongokusai om sosomu’ i’; ³ dot iri tuu i kotobpus kopio ko’ iri po it opusus, om a’ indo kotobpus. ⁴ Om iri toodopon dot oirikahanan ko’ oodop do kusai’ddi nga’ kotonggoi nod sosomu’. ⁵ - ⁸ Om isai nopo o tulun di kakama’ do tulun di nokopoulai di miagal-agal do waig diri, ko’ kakabai di toodopon dau, ko’ koirikau do hiri’d nirikohonon dau, ko’ it odulaan do tulun diri, om mositi’ nod pupuan dau i pakayan dau om modsu’; nga’ sosomu’ no i tulun diri do gisom do sosodopon. ⁹ Iri nopo pakol ko’ timpohon dot oirikahanan do tulun di nokopoulai di miagal-agal do waig diri, om sosomu’ no. ¹⁰ - ¹¹ Isai nopo i kakama’ ko’ kagantai do nunu nopo i noirikahanan ko’ i noigitan do tulun do miagal diri, dot a’ po iyau kopongoug do palad dot id gulu, om sosomu’ no o tulun diri do gisom do sosodopon. ¹² Iri nopo kuron dot igitan do tulun do miagal diri om mositi’ nod babakon, om lihungan i tompurung di kayu do winonsoi, dit oigitan dau. ¹³ Olingasan nopondo o tulun di haro o miagal-agal do waig do sumoliwan do mantad id wayaan do sobu dau, iri no i toruol dau’ddi, om mositi’ nod mandad iyau do solinaid do turu’ o tadau. Om katalib pondo iri om pupuan nogi’ dau i pakayan dau om mongoi podsu’ dot id tudan do waig, om olidang nogindo iyau dot id pagantangan do tugama’. ¹⁴ Om kawalu’ pondod tadau om mositi’ nod paatod iyau do duwo o tinan do punai ko’ sikukur do hiri’d wawayaan di Kiim do TUHAN do ngoyon patahako’ dit imam. ¹⁵ Om patahakon nondo dit imam o tiso’ di tombolog diri do maan do porsombahan do pangampun do dusa om iri no tiso’ om maan do porsombahan di sorobon. Om iyo noddi o wonsoyon dit imam do pomolidang do tulun diri do tumanud dit oturan do tugama’. ¹⁶ Soira’ nopo do kasabput do kusai o narot dau, om mositi’ nod modsu’ iyau, nga’ sosomu’ po ma kasai’ iyau do gisom do sosodopon. ¹⁷ Nunu nopo i kain ko’ kulit do winonsoi dot osobputan di narot om mositi’ nod pupuan, om sosomu’ nori do gisom do sosodopon. ¹⁸ Kopidudun nopo o kusai om tondu’, om mositi’ nod modsu’ goduwo iyolo’, om sosomu’ no iyolo’ do gisom do sosodopon. ¹⁹ Tontok nopod pomulanan do tondu’, om sosomu’ no i tondu’ddi do solinaid do turu’ o tadau. Om isai nopo i koigit dau om sosomu’ no do gisom do sosodopon. ²⁰ Nunu nopo it oirikahanan dau ko’ it oliiyan dau do maso’d haro o pomulanan dau om sosomu’ no. ²¹ - ²³ Isai nopo o koigit do toodopon ko’ koigit di noirikahanan di tondu’ddi nga’ mositi’ nod pupuan di tulun i pakayan dau om modsu’. Om sosomu’ no i tulun diri do gisom do sosodopon. ²⁴ Ondung haro o kusai do mongoi dudun do tondu’ di maso’d haro o pomulanan, om orolihan no i kusai di kososomuo’ di tondu’ddi om sosomu’ no iyau do solinaid do turu’ o tadau. Om honggo nopo o toodopon dot oodop dau nga’ sosomu’ no. ²⁵ Ondung haro o tondu’ do haro kasai’ o raha’ do sumoliwan do solinaid do piro-piro o tadau do suwai ko’ i pomulanan dau ko’ ondung alaid ko’ mantad di koubasanan do tumingkod o pomulanan dau, om sosomu’ no iyau do solinaid pod haro o raha’ do sumoliwan, do miagal di kososomuo’ dau di maso’d haro o pomulanan dau. ²⁶ Om honggo nopo o toodopon di koliiyon dau ko’ nunu nopo it oirikahanan dau do tontok do miagal iyau’ddi, om sosomu’ no. ²⁷ Isai nopo i koigit diri om kotonggoi nod sosomu’; om mositi’ nod pupuan dau i kain dau om modsu’; om sosomu’ kasai’ no iyau do gisom do sosodopon. ²⁸ Otingkod nopondo i raha’ do sumoliwan, om mositi’ nod mandad i tondu’ddi do solinaid do turu’ o tadau, om olidang nogindo iyau dot id pagantangan do tugama’. ²⁹ Om kawalu’ pondod tadau om migit nondo iyau do duwo o tinan do punai ko’ duwo o tinan do sikukur do ngoyon patahako’ dit imam do hiri’d wawayaan di Kiim do TUHAN. ³⁰ Om patahakon nondo dit imam o tiso’ di tombolog diri do maan do porsombahan do pangampun do dusa om iri no tiso’ om maan do porsombahan do sorobon. Om iyo noddi o wonsoyon dit imam do momolidang do tondu’ddi do tumanud dot oturan do tugama’. ³¹ Om sinuhu’ do TUHAN i Musa do poposorou di tulun dot Israil do mongilo kopio ondung soira’ iyolo’d ososomu’ om soira’ dot a’ sosomu’, om a’ i’ diyolo’ ososomu’ i Kiim do TUHAN, i hiri’d tanga’ di kokiiman diyolo’. Tu’ ondung koponosomu’ iyolo’ di Kiim dot Olidang, om patayon no iyolo’. ³² Om iri ngai’ no ot oturan do tonudon di tongokusai di haro o miagal-agal do waig do sumoliwan do mantad id wayaan do sobu ko’ i kopoulai do narot, ³³ om i tonudon do tongoondu’ do haro o pomulanan, om tonudon di tongokusai di kodudun di tongoondu’ di haro o pomulanan.

¹ Om boro-boros no o TUHAN dot id di Musa di napatai i duwo o tanak do kusai di Harun, dot i pinapatahak do tapui dit okon ko’ korohian do TUHAN o nakapatayan. ² Boros ka dau, ’’Sunudan no i Harun, i tobpinai nu, do tontok no di maso’d natantu’ mantad do koino-ino iyau do mongoi do hiri’d dotirung di tabir, do sumuang di Bilik dit Olidang Kopio. Tu’ hilo’ oku nod mintalang do poirolot do haun, do hiri’d sawa-sawat di sompon di Kaban do Tumpongo. Ondung tumolibamban i Harun dot oturan diri, om apatai no iyau. ³ Kapatahak po iyau’d sapi’ do tontoluhan dit okoro’ po do maan do porsombahan do pangampun do dusa om kapatahak do songinan o dumba’ do tontoluhan do maan do porsombahan di sorobon, om koino-ino nogi’ iyau do sumuang di Bilik dit Olidang Kopio,’’ ka dau. ⁴ Om patahako’ noddi do TUHAN iti piro-piro ot oturan. Tintod nopo di Harun do mongoi do hiri’d Bilik dit Olidang Kopio, om mositi’ nod modsu’ iyau om manampakai di pakayan do dong imam, i rasuk, om i soluar dot oniiba’, om i tagkos, om i sigar di kain linan ngai’ nopo do winonsoi. ⁵ Om mositi’ nod onuan di tulun dot Israil i Harun do duwo o kambing do tontoluhan do maan do porsombahan do pangampun do dusa om songinan o dumba’ do tontoluhan do maan do porsombahan di sorobon. ⁶ Om mositi’ nod papatahak i Harun do songinan o sapi’ do tontoluhan do maan do porsombahan do pananus do dusa dau om i dusa di sompiiyon dau. ⁷ Om igitan nogindo dau i duwo o kambing diri do hiri’d wawayaan di Kiim do TUHAN. ⁸ Hiri nopondo om undion nondo dau, do mamakai do duwo o watu do maan do pongilo. Iri nopo tiso’ di watu om natandaan do ’’don TUHAN,’’ ka, om iri no tiso’ om natandaan dot ’’di Asasil,’’ ka. ⁹ Om patahakon nondo di Harun i kambing di nopili’ do don TUHAN do maan do porsombahan do pangampun do dusa. ¹⁰ Om iri no i kambing di nopili’ do patahakon di Asasil, om miyahon nopo do papatahak dot id TUHAN om uyungon nogindo do kumaa do hiri’d tana’ do kowotuan do pokoyoon dot id di Asasil, om oidu’ i’ i dusa di tulun dot Israil. ¹¹ Soira’ nopo do papatahak i Harun di sapi’ do tontoluhan do maan do porsombahan do pangampun do dusa dau om i sompiiyon dau, ¹² om mositi’ no do mongoi iyau do talam di poiiyanan kasai’ do tapui, om ponuon iri do popou di kisinikit po do mantad hiri’d pananaraban do porsombahan, om manu do duwo tonggom do kominyan dit atandai, om igitan nogindo iri do hiri’d suang di Bilik dit Olidang Kopio. ¹³ Om mositi’ nod posuboon dau i kominyan diri do hiri’d tapui, i hiri’d dotoguangan do TUHAN. Om otirung indo di lisun i sompon di Kaban do Tumpongo, om a’ i’ dau okito i sompon, om a’ indo iyau apatai. ¹⁴ Om mositi’ nod manu iyau dot ongokooro’ di raha’ di sapi’ om potuduwon nondo dau’d hiri o tunturu’ dau, om powowoson do hiri’d dotimbabaan di Kaban do Tumpongo dot inturu’ powowoso’. ¹⁵ Om owonsoi pondo o miagal diri, om sumbolion nogindo di Harun i kambing do maan do pangampun do dusa di tulun dot ogumu’, om igitan i raha’ di kambing diri do hiri’d Bilik dit Olidang Kopio. Om powowoson nogindo dau i raha’ddi do hiri’d sompon om hiri’d dotimbabaan di Kaban do Tumpongo, do miagal di pinopowowos iyau di raha’ di sapi’. ¹⁶ Om iyo noddi o wonsoyon dau do pomolidang di Bilik dit Olidang Kopio do mantad id kososomuo’ di tulun dot Israil om mantad id koinsanai’d dusa diyolo’. Om mositi’ nod wonsoyon dau o miagal diri do pomolidang di Kiim dit Olidang, tu’ hiri id tanga’ di kokiiman o pinawansayan di Kiim dit Olidang, om iri nopo kokiiman nga’ sosomu’ i’ dot id pagantangan do tugama’. ¹⁷ Mantad nopo di sumuang i’ i Harun di Bilik dit Olidang Kopio do mongoi pomonsoi di natantu’ mantad do wonsoyon do maan do pomolidang, om gisom do kosoliwan iyau, om kada’ nod haro o tongoiso’ piya’d tulun do poundorong do hiri’d suang di Kiim diri. Om owonsoi pondo di Harun iri do bagi’d tinan dau, om i sompiiyon dau, om bagi’d koinsanai di tulun, ¹⁸ om mositi’ nod sumoliwan iyau do mongoi’d hiri’d pananaraban do porsombahan diri. Om mositi’ nod manu iyau dot ongokooro’ di raha’ di sapi’ om raha’ di kambing om pogihilon nondo do hiri’d sinangau-sangau dot id pointikid di sunduk di pananaraban do porsombahan. ¹⁹ Om potobungon nondo dau o tunturu’ dau do hiri’d raha’ om powowoson nogindo dau o tongokooro’ di raha’ddi do hiri’d pananaraban do porsombahan dot inturu’ wawasai. Om iyo noddi o kowoyo-woyoo’ do momolidang di pananaraban do porsombahan do mantad id dusa di tulun dot Israil, om olidang indo i pananaraban do porsombahan diri. ²⁰ Om boros ka kawagu’d TUHAN dot id di Musa, ’’Opongo pondo di Harun do momonsoi i natantu’ mantad do wonsoyon do momolidang di Bilik dit Olidang Kopio, om i kinoiyonon do suwai di hiri’d Kiim do TUHAN, om i pananaraban do porsombahan do tumanud dit oturan do tugama’, om mositi’ no do patahakon dau dot id TUHAN i kambing di miyau po di nopili’ do di Asasil. ²¹ Om mositi’ nod pakabayon goduwo di Harun o longon dau do hiri’d sakai do tulu di kambing diri, om mikuwo’d mangakun do koinsanai di karaaton, om dusa, om kososongkiwal di tulun dot Israil, om kakaa i’ dot id tulu di kambing o koinsanai di karaaton di tulun dot Israil. Om uyungon nondo i kambing diri do pokoyoon do hiri’d tana’ do kowotuan. Moguyung nopoddi om songulun i nopili’ do momonsoi do karaja’ddi. ²² Om tanggayan nondo di kambing diri o koinsanai di dusa do tulun dot Israil do hiri’d tana’ do kowotuan dit aiso’ o tulun do momogun. ²³ Om sumuang nondo i Harun di Kiim dot Olidang, om iduwon dau i pakayan do dong imam; i rinasuk dau di tintod do suminuang di Bilik dit Olidang Kopio. Om poilihon nondo dau i pakayan diri do hiri’d Kiim dit Olidang. ²⁴ Om mositi’ nod modsu’ iyau dot id bilik dit olidang om manampakai nogindo di dau’d pakayan. Om sumoliwan nogindo iyau do mongoi papatahak do porsombahan di sorobon do pananus di dusa dau om i dusa di tulun dot Israil. ²⁵ Om sorobon nondo dau do hiri’d pananaraban do porsombahan i lunok di tayam-tayam di maan do porsombahan do pangampun do dusa. ²⁶ Om iri nopo tulun di minongoi ponguyung di kambing do tontoluhan do hiri’d tana’ do kowotuan do pokoyoon dot id di Asasil, om suhuon kopio do momupu’ di pakayan dau om modsu’ do tintod do gumuli’ do hiri’d kokiiman. ²⁷ Om iri nopondo i sapi’ do tontoluhan om i dumba’ do tontoluhan di numaan do porsombahan do pangampun do dusa, i songraha’ di nigitan do hiri’d Bilik dit Olidang Kopio do maan do pananus do dusa, om mositi’ no do posoliwanon di kokiiman, om sorobon nogindo. Om mositi’ no do sorobon ngai’ nopo i kulit, om i tonsi’, om i suang do tian di duwo o tayam-tayam diri. ²⁸ Om iri nopo tulun di modtutud ngai’ddi om mositi’ nod momupu’ di pakayan dau om modsu’ do tintod do gumuli’ do hiri’d kokiiman,’’ ka dau. ²⁹ - ³¹ Om boros ka kawagu’d TUHAN dot id di Musa, ’’Iti no ngai’ ot oturan dit apatut do tonudon do gisom dot alaid. Tontok nopod tadau’d kohopod do tulan do koturu’, om mositi’ nod puasa om a’ koino-ino’d momonsoi’d karaja’ do nunu nopo, o koinsanai’d tulun dot Israil, om i bansa’d suwai di poirolot diyolo’. Tu’ tadau nopoddi om tadau dit olidang kopio. Mositi’ nod wonsoyon i natantu’ mantad do wonsoyon do momolidang do bansa’d Israil do mantad id koinsanai di dusa diyolo’ do tontok do tadau’ddi. Om olidang indo iyolo’ do tumanud dit oturan do tugama’. ³² Om iri no i Boyoon dot Agayo dot Imam o nopili’ kopio, om i nokotobilang do Kinorohingan do sumowoli di tapa’ di Boyoon dot Agayo dot Imam diri o momonsoi di wonsoyon di natantu’ mantad do wonsoyon do maan do pomolidang. Om mositi’ nod manampakai iyau di pakayan do dong imam, ³³ om wonsoyon nogindo i natantu’ mantad do wonsoyon do pomolidang di Bilik dit Olidang Kopio, om i kinoiyonon do suwai do hiri’d Kiim do TUHAN, om i pananaraban do porsombahan, om it imam, om koinsanai di tulun dot Israil. ³⁴ Om mositi’ nod tonudon kasai iti toturan diti do gisom dot alaid. Om wonsoyon kasai’ dot insan do sontoun i wonsoyon di natantu’ mantad do wonsoyon do pomolidang di tulun dot Israil do mantad id koinsanai di dusa diyolo’,’’ ka dau. Om wonsoyo’ nod i Musa iri do tumanud di pinonuhuan do TUHAN dot id dau.

¹ Om suhuo’ nod TUHAN i Musa ² do papatahak dot id di Harun om id tangaanak di Harun, om id koinsanai di tulun dot Israil diti piro-piro ot oturan do poingkaa, ³ - ⁴ ’’Soira’ nopo do koponumbali’ o tulun dot Israil do sapi’ ko’ dumba’ ko’ kambing do maan do porsombahan dot id TUHAN dot id kinoiyonon do suwai ko’ mantad do hiri’d wawayaan di Kiim do TUHAN, om kotolibamban no dit oturan, tu’ nakapaawas nod raha’. Om a’ no o tulun diri kohompit di tulun do songonuon do Kinorohingan. ⁵ Komoyon nopo dot oturan diti nga’ baino’ nopondo om ngoyon ngai’ nopo di tulun dot Israil pootodo’ do hiri’d Kiim do TUHAN i tayam-tayam di koubasan daa diyolo’ do monumbali’ do hilo’d talun. Baino’ nopondo om mositi’ no do ngoyon diyolo’ pootodo’ iri dot id imam do hilo’d wawayaan di Kiim do TUHAN, om sumbolion nogindo do hiri do maan do porsombahan do piombolutan. ⁶ Om mositi’ nod powowoson dit imam i raha’ di sinumbali’ddi do hiri’d misingobik om hiri’d misingompok di pananaraban do porsombahan, i hiri’d wawayaan di Kiim dit Olidang. Om sorobon dau i lunok om kasanangan indo do TUHAN i tawau di porsombahan diri. ⁷ Om mositi’ no do tumorodok i tulun dot Israil dot id TUHAN om a’ kopio koino-ino do monumbali’ do tayam-tayam diyolo’ do hilo’d talun do maan do porsombahan dot id rusod dit araat, di monongkoiyo-iyo’d kambing. Om mositi’ nod tonudon kasai’ iti toturan diti do gisom dot alaid. ⁸ Soira’ nopod haro o tulun dot Israil ko’ bansa’d suwai di poingiyon dot id rolot diyolo’ do papatahak do porsombahan di sorobon ko’ nunu nopo o porsombahan ⁹ do maan do porsombahan dot id TUHAN, dot id kinoiyonon do suwai ko’ mantad do hilo’d wawayaan di Kiim dot Olidang, om a’ no kohompit do tulun di songonuon do Kinorohingan. ¹⁰ Ondung haro o tulun dot Israil ko’ bansa’d suwai di poirolot diyolo’ do mangakan do tonsi do tayam-tayam dit a’ nakaawas o raha’, om saapon nod TUHAN o tulun diri, om a’ no iyau kohompit do tulun di songonuon do TUHAN. ¹¹ Tu’ ginawo nopo do koinsanai di songimpasi om hiri nod raha’. Om iri no o nokoponuhuan do TUHAN do popotuntug do koinsanai di raha’ do hiri’d pananaraban do porsombahan, om oidu’ indo o dusa’d tulun. Iri no i raha’, tu’ ginawo, o koidu’ do dusa. ¹² Om iri no o nokopogoduhan do TUHAN di tulun dot Israil om i bansa’d suwai di poirolot diyolo’ do mangakan do tonsi dit a’ nakaawas o raha’. ¹³ Soira’ nopod haro o tulun dot Israil ko’ bansa’d suwai di poirolot diyolo’ do mongoi pongintorus do nintorusan ko’ tombolog di koino-ino’d kanon, om mositi’ nod paawason dau i raha’ do hiri’d tana’ om olitan nogindo do tana’ i raha’ddi. ¹⁴ Tu’ ginawo nopod koinsanai di songimpasi om hiri nod raha’. Om iri no o nokopogoduhan do TUHAN di tulun dot Israil do mangakan do tonsi dit a’ nakaawas o raha’. Om isai nopo o mangakan di pogoduhan om a’ no kohompit do tulun di songonuon do Kinorohingan. ¹⁵ Pointikid-tikid do tulun dot Israil ko’ bansa’d suwai di poirolot diyolo’, do kapangakan do tonsi do nintorusan di napatai toomod ko’ i pinatai do nintorusan dit orongit, om mositi’ nod pupuan i pakayan dau, om modsu’, om mandad do gisom do sosodopon, om olidang nogindo iyau dot id pagantangan do tugama’. ¹⁶ Ondung a’ dau wonsoyon o miagal diri om mositi’ nod boboon dau o kootuson diri,’’ ka dau.

¹ Om suhuo’ nod TUHAN i Musa ² do popoboros dot id tulun dot Israil diti boros do poingkaa, ’’Iyoho’ no o TUHAN, i Kinorohingan dokoyu. ³ Kada’ kou omit di kowoyo-woyoon di tulun do Masir, i hilo’d pinomogunan dokoyu di gulu po, om kada’ kou omit do kowoyo-woyoon di tulun do hilo’d pomogunan do Kanaan, i paatadan ku dokoyu. ⁴ Mumboyo’ kou nod oturan ku om tonudon no dokoyu i ponuhuan ku. Tu’ iyoho’ no o TUHAN, i Kinorohingan dokoyu. ⁵ Tonudon ngai’ no dokoyu it oturan om i ponuhuan ku di pinatahak ku dot id dokoyu. Tu’ ondung owonsoi dokoyu o miagal diri om apasi kou no. Iyoho’ no o TUHAN, i Kinorohingan dokoyu,’’ ka dau. ⁶ Om iti ngai’ no ot oturan do pinatahak do TUHAN, ’’Kada’ kou ongoi dudun dot isai nopo di koobpinayan dokoyu. ⁷ Kada’ dokoyu ngoyo’ duduno’ o tina’ dokoyu, om a’ i’ ointingayam o tapa’ om tina’ dokoyu. ⁸ Kada’ dokoyu intingayamo’ o tapa’ dokoyu, dot i mongoi kou dudun di sawo dau’d suwai o pongintingayam. ⁹ Kada’ dokoyu duduno’ i tobpinai dokoyu’d tondu’ di toput dokoyu’d pusod ko’ iri po tobpinai dokoyu’d tondu’ di tanak mantad di tapa’ dokoyu ko’ i tanak mantad di tina’ dokoyu, dot i poinsugku’ dokoyu’d guminayo ko’ it amu’. ¹⁰ Kada’ dokoyu duduno’ i manangaki dokoyu; tu’ iri no moti’ o mongintingayam dokoyu. ¹¹ Kada’ dokoyu duduno’ i tobpinai dokoyu’d tondu’ di tanak mantad di tapa’ dokoyu ko’ tanak mantad di tina’ dokoyu; tu’ iyau nga’ tobpinai i’ dokoyu. ¹² - ¹³ Kada’ dokoyu duduno’ i tinanon dokoyu, do tobpinai tuu iyau di tapa’ dokoyu, ko’ tobpinai po di tina’ dokoyu. ¹⁴ Kada’ dokoyu duduno’ o sawo di tamanon dokoyu; tu’ iyau nga’ tinanon i’ dokoyu. ¹⁵ Kada’ dokoyu duduno’ i tondu’ do monongiwan dokoyu ¹⁶ ko’ iri po sawo di tobpinai dokoyu. ¹⁷ Kada’ dokoyu duduno’ i tanak ko’ i monongodu’ di tondu’ di noumbalan dokoyu’d momodudun do gulu; tu’ a’ i’ oila-ilaan nga’ iso-iso’ po doti’ o raha’ dokoyu, om kotolibamban i’ dot oturan o miagal diri. ¹⁸ Kada’ dokoyu kowino’ i tobpinai di sawo dokoyu, do poimpasi po i sawo dokoyu. ¹⁹ Kada’ kou ongoi dudun do tondu’ di maso’d haro o pomulanan, tu’ tondu’ nopoddi om sosomu’ i’ dot id pagantangan do tugama’. ²⁰ Kada’ kou ongoi dudun do sawo’d tulun do suwai; tu’ iri no o kososomu’ dokoyu. ²¹ Kada’ kou papatahak dot ongoiso’ piya do tanak dokoyu do maan pakayo’ do tumuku’ dot id Molok, i ponokokinorohingan diri. Tu’ iri nopo wonsoyon do miagal diri om mongindaraat i’ do ngaran do Kinorohingan, i TUHAN. ²² A’ no kopio koino-ino do miampahu’ o kusai om kusai; tu’ iri nopo om katagadan i’ do Kinorohingan. ²³ A’ no kopio koino-ino do mongoi pagampahu’ do nintorusan ot isai nopo o kusai ko’ tondu’; tu’ iri nopo wonsoyon do miagal diri om araat i’ om sosomu’ kopio. ²⁴ Kada’ dokoyu sosomuo’ o tinan dokoyu do wowonsoyon do miagal diri, tu’ iyo noddi i tulun do kapir do minonosomu’ do tinan diyolo’, i tulun do kapir di poingiyon mantad no do hilo’d pomogunan do Kanaan dot id gulu ko’ iyokoyu, om iri noddi o koponguyungan do TUHAN diyolo’, om koiyon kou i’ iyokoyu’d hilo’. ²⁵ - ²⁷ Om iri no i kowoyo-woyoon diyolo’ dit araat kopio o minonosomu’ di tana’ddi. Om hukumai noddi iyolo’d TUHAN, om a’ noddi iyolo’ pologoson do mundorong do hilo’. Nga’ iyokoyu nopo, om kada’ kou nogi’ kopio pomonsoi do wowonsoyon do miagal diri. Iyokoyu ngai’ nopo om koinsanai di bansa’d suwai di poirolot dokoyu, om mositi’ nod mumboyo’ dit oturan om i ponuhuan do TUHAN. ²⁸ Om a’ kou indo ohukuman do TUHAN om a’ ouyung do mantad id tana’ddi do miagal di nosiliu dot id tulun do kapir di poingiyon do hilo’ dit id gulu ko’ iyokoyu. ²⁹ Om koilo ngai’ kou i’ dot isai nopo i momonsoi’d kowoyo-woyoon do miagal diri karaat om a’ no kohompit do tulun di songonuon do Kinorohingan,’’ ka dau. ³⁰ Om boros kad TUHAN, ’’Tonudon no dokoyu i boros ku om kada’ kou tanud di kowoyo-woyoon di tulun di poingiyon do hilo’d pomogunan do Kanaan dit id gulu ko’ iyokoyu. Kada’ dokoyu sosomuo’ o tinan dokoyu do mingwonsoi’d miagal diri o ponosomu’. Tu’ iyoho’ no o TUHAN, i Kinorohingan dokoyu,’’ ka dau.

¹ Om suhuo’ nod TUHAN i Musa ² do popoboros dot id tulun dot Israil do boros do poingkaa, ’’Kolidang kou no, tu’ iyoho’ nopo, i TUHAN, i Kinorohingan dokoyu, om olidang i’. ³ Mositi’ nod momusou do tina’ om tapa’ o pointikid-tikid do tulun, om momusou di tadau’d Sabat, do miagal di pinonuhuan ku. Tu’ iyoho’ no o TUHAN, i Kinorohingan dokoyu. ⁴ Kada’ kou tongkiad doho’, om kada’ kou tuku’ dot id tingolig; kada’ kou pomonsoi do ponokokinorohingan dot i miagal do basi’ o wonsoyon, do maan dokoyu’d tukuon. Tu’ iyoho’ no o TUHAN, i Kinorohingan dokoyu. ⁵ Soira’ nopo do monumbali’ kou do tayam-tayam do maan do porsombahan di piombolutan, om mositi’ nod tonudon dokoyu it oturan do nakatahak ku dokoyu, om romiton ku i’ i porsombahan dokoyu. ⁶ Om mositi’ nod kanon i tonsi do tontok do tadau di sinumbali’ i tayam-tayam diri ko’ di tadau kawagu. Haro nopo ot oolu’ di tonsi’ddi di kotolu’d tadau, om mositi’ nod sorobon, ⁷ tu’ sosomu’ nori dot id pagantangan do tugama’. Om isai nopo i mangakan diri nga’ a’ ku no romiton i porsombahan dau. ⁸ Om isai nopo i mangakan diri nga’ kasala’ no tu’ poiyoon i’ dau di koubasanan no kasai’ i nokotobilang do maan do doho’. Om a’ no iyau kohompit di tulun do songonuon ku. ⁹ Soira’ nopod mongomot kou, om kada’ dokoyu omoto’ i hiri’d tisan di tumo, om i nongotoliban do mongomot nga’ a’ no minog do ngoyon gulio’ do mongomot. ¹⁰ Kada’ kou guli’ do hiri’d kabun dot anggur dokoyu do mongoi pongupu’ di tua’ di noolu’ ko’ mongoi po pomuhu di tua’ di nongoloho. Pologoson nopori do maan di tulun do mosikin om i tulun do bansa’d suwai. Tu’ iyoho’ no o TUHAN, i Kinorohingan dokoyu. ¹¹ Kada’ kou panakau, om kada’ kou ponipu’, om kada’ kou pongudut. ¹² Kada’ kou pamatos dot id suang do ngaran ku ondung a’ no dokoyu bayaanon kopio iri; tu’ mongindaraat nori do ngaran ku. Tu’ iyoho’ no o TUHAN, i Kinorohingan dokoyu. ¹³ Kada’ kou pakaanak-anak dot isai nopo o tulun om kada’ kou pagahau do konunu-nunuan do tulun diri. Kada’ dokoyu poloido’ do papatahak do sontuong- tuong piya i gadsi’ do tulun di pakaraja’ dot id dokoyu. ¹⁴ Kada’ kou pomopol do tulun di bosukon, om kada’ kou ongoi poiliu do nunu nopo dot id doburuan do tulun di bolou do maan dokoyu’d kosoduwon dau. Koronok kou no doho’; tu’ iyoho’ no o TUHAN, i Kinorohingan dokoyu. ¹⁵ Mositi’ no dot otopot om otulid o wonsoyon dokoyu do tontok do momutus kou dot id kut, kada’ kou panampaping di tulun do mosikin om kada’ kou kooris di tulun do kaya’. ¹⁶ Kada’ kou popimboros do boboroson dit a’ otopot do pasal dot isai nopo o tulun. Ondung manantu’ do kosunsudon di tulun i kopomisaraan dau, do posion tuu ko’ patayon po iyau, om mungkomi kou no, ondung kotulung no dau i dokoyu’d poboroson. Tu’ iyoho’ no o TUHAN. ¹⁷ Kada’ kou poopi’ do katagadan dokoyu dot id isai nopo o tulun. Salasayon nogi’ dokoyu di tulun diri i katagadan dokoyu’ddi, om a’ kou i’ kowonsoi’d dusa dot i tulun diri o kobungou. ¹⁸ Kada’ kou suli’ dot isai nopo o tulun, om kada’ kou popoopi’ do karaatan dokoyu dot id tulun diri, suwai ko’ kosianai kou nod tulun do suwai do miagal dot osianan kou do dokoyu’d tinan. Tu’ iyoho’ no o TUHAN. ¹⁹ Tonudon ngai’ no dokoyu i ponuhuan ku. Kada’ dokoyu pisobuho’ o nintorusan di misuwai o bansa’. Kada’ kou pananom do duwo o bansa’ do totonomon dot iso-iso’ o tumo do pananaman. Kada’ kou panampakai do pakayan di nawol, do duwo o bansa’d banang do piniawol. ²⁰ Ondung haro o kusai do nakabatos do papadagang di turipon dau’d tondu’ dot id kusai’d suwai do maan do ponokosawo di kusai’ddi, nga’ a’ po di kusai di momoli nabayaran i tondu’ddi, om a’ i’ hukuman do kapatayon i kusai do sanganu di tondu’ dot aampahu’ piya dau i tondu’ddi, nga’ hukuman goduwo nopo iyolo’. Tu’ turipon kasai’ po dau i tondu’ddi. ²¹ Om mositi’ nod paatod i kusai, i sanganu di tondu’ddi, do dumba’ do tontoluhan do hiri’d wawayaan di Kiim do TUHAN do maan dau’d porsombahan do poningolon. ²² Om patahakon nondo dit imam i dumba’ do maan do pomolidang, om oidu’ i’ o dusa di tulun diri, om oompunan indo iyau’d Kinorohingan. ²³ Korikot kou nopondo do hilo’d pomogunan do Kanaan, om tontok nopo do momutanom kou do nunu nopo o bansa’d tua-ua’, om pokososomuon no dokoyu i tua’ di tua-ua’ dokoyu’ddi do tolu-tolu po toun. Kada’ dokoyu akano’ o tua’ di tinanom dokoyu do solinaid poddi. ²⁴ Om kaapat nopondod toun om mositi’ nod patahakon ngai’ dokoyu i tua’ddi dot id doho’ do maan do porsombahan do popointalang do kounsikahan dokoyu dot id doho’, i TUHAN. ²⁵ Nga’ kolimo nopondod toun om koino-ino no dokoyu’d kanon i tua’ di tinanom dokoyu’ddi. Ondung wonsoyon dokoyu o miagal diri, om sumapou no o tua’ di tua-ua’ dokoyu. Tu’ iyoho’ no o TUHAN, i Kinorohingan dokoyu. ²⁶ Kada’ kou pangakan do tonsi dit a’ nakaawas o raha’. Kada’ kou pinsingilo do nunu nopo o kowoyoon do toilaan di don rogon. ²⁷ Kada’ dokoyu pampadai o tobuk dot id poriling do tulu dokoyu om kada’ kou pomugar do ganggut, ²⁸ om kada’ kou pamapak do tinan dokoyu, om kada’ kou pinsuhat do tinan dokoyu do tontok do mogihad di tulun do napatai. Tu’ iyoho’ no o TUHAN. ²⁹ Kada’ dokoyu intingayamo’ i tangaanak dokoyu’d tondu’, dot i silihon do sundal dot id walai do tingolig o pongintingayam; tu’ ondung momonsoi kou do miagal diri om tumuku’ kou nod tingolig om oponu’ pondod wowonsoyon dit a’ osonong i pomogunan diri. ³⁰ Poinggoyoon no dokoyu o tadau’d Sabat om pusohon no dokoyu i tiyonon do sumambayang dot id doho’. Tu’ iyoho’ no o TUHAN. ³¹ Kada’ kou ongoi pokinosihat do tulun di momolohou do rusod do tulun di napatai. Tu’ ondung mongoi kou, om atantu’ nod ososomu’ kou. Tu’ iyoho’ no o TUHAN, i Kinorohingan dokoyu. ³² Podulon no dokoyu om pusohon no i tongomolohing no. Koronok kou no doho’; om pusohon oku no dokoyu, tu’ iyoho’ no o TUHAN. ³³ Kada’ dokoyu raraato’ o tulun do bansa’d suwai di poingiyon dot id pomogunan dokoyu. ³⁴ Poiyoon nopo dokoyu iyolo’ di sompi’ ko’ tulun dot Israil om kosianai kou no diyolo’ do miagal dot osianan kou do dokoyu’d tinan. Hondomo’ no dokoyu dot iyokoyu nga’ nokoumbal i’ do nokosugku’ do bansa’d suwai do momogun-mogun di hilo’ kou pod pomogunan do Masir. Tu’ iyoho’ no o TUHAN, i Kinorohingan dokoyu. ³⁵ Kada’ kou pamakai do ponipong dit a’ koontok do ponipu’ do tulun do suwai, dot iri tuu i ponipong do konoruo’, ko’ iri po ponimbang do kawagato’ ko’ iri po i pagagadang. ³⁶ Mositi’ no do koontok i poninimbang, om i poninipong om i pagagadang dokoyu. Tu’ iyoho’ no o TUHAN, i Kinorohingan dokoyu, om iyoho’ i pinoposoliwan dokoyu do mantad hilo’d Masir. ³⁷ Tonudon ngai’ no dokoyu it oturan om i boros ku. Tu’ iyoho’ no o TUHAN,’’ ka dau.

¹ Om suhuo’ nod TUHAN i Musa ² do popoboros dot id tulun dot Israil do boros do poingkaa, ’’Isai nopo dokoyu ko’ isai nopo di bansa’d suwai di poingiyon dot id rolot dokoyu, o papatahak do tanak do maan pakayo’ do tumuku’ di tingolig do Molok om mositi’ nod dumpahon do watu, dot oinsanan nopo i tulun do momodumpau, do gisom i’ dot apatai i tulun diri. ³ Ondung haro o tulun do papatahak di tanak dau dot id di Molok om i monosomu’ di Kiim ku dit Olidang, om i mongindaraat do ngaran ku dit olidang, om saapon ku no o tulun diri, om a’ ku pohompiton di tulun do songonuon ku. ⁴ Nga’ ondung pologoson tomod di tulun dot ogumu’ i nowonsoi di tulun diri, om a’ diyolo’ iyau hukuman do kapatayon, ⁵ om iyoho’ nondo o sumaap di tulun diri, om koinsanai di sompiiyon dau om koinsanai di tulun di minoyo’ dau do tuminongkiad do mantad id doho’, om tuminuku’ nogiddi di tingolig do Molok. Om a’ ku no iyau pohompiton do tulun di songonuon ku. ⁶ Ondung haro o tulun do mongoi pokinosihat do tulun di momolohou do rusod di tulun do napatai, om saapon ku no o tulun diri, om a’ ku pohompiton do tulun di songonuon ku. ⁷ Kumolidang kou no, tu’ iyoho’ no o TUHAN, i Kinorohingan dokoyu. ⁸ Tonudon no dokoyu it oturan ku, tu’ iyoho’ no o TUHAN, om iyoho’ i popotobilang dokoyu do silihon ku do doho’d songonuon,’’ ka dau. ⁹ Om patahako’ nod TUHAN iti piro-piro ot oturan do poingkaa, ’’Isai nopo i momopol do tina’ ko’ tapa’ dau, om mositi’ nod hukuman do kapatayon. Iri nopo kinapatayon dau om iri i kasalaan dau o nokobungou. ¹⁰ Ondung haro o kusai do bansa’d Israil do magampahu’ do sawo do tulun di bansa’ dau, om hukuman goduwo nopod kapatayon i kusai om i tondu’ di nampahu’ dau’ddi. ¹¹ Iri nopo kusai di mongoi dudun dot iso’ di sawo di tapa’ dau, om mongintingayam no di tapa’ dau. Om mositi’ nod hukuman goduwo nopod kapatayon i kusai om i tondu’ddi. Iri nopo kinapatayon diyolo’ddi om iri i kasalaan diyolo’ o nokobungou. ¹² Ondung haro o kusai do mongoi dudun di tondu’ di monongiwan dau, om mositi’ nod hukuman goduwo nopo iyolo’d kapatayon. Tu’ nokotolibamban no iyolo’ dit oturan. Om iri nopo kinapatayon diyolo’ddi om iri i kasalaan diyolo’ o nokobungou. ¹³ Soira’ nopod miampahu’ o kusai om kusai, om kowonsoi goduwo no iyolo’ dit araat kopio, om mositi’ nod hukuman goduwo nopo iyolo’d kapatayon. Om iri nopo kinapatayon diyolo’ddi om iri i kasalaan diyolo’ o nokobungou. ¹⁴ Ondung kowinon do songulun o kusai ot iso’ o tondu’ om kowinon po kawagu dau i tina’ di tondu’ddi, om mositi’ nod tutudan ngai’ nopo iyolo’d tolu do gisom dot apatai, tu’ minomonsoi i’ iyolo’ dit araat kopio. Kada’ no kopio do haro ot osiliu do miagal diri dot id pogialatan dokoyu. ¹⁵ Ondung haro o kusai do monokiampahu’ do nintorusan, om mositi’ nod hukuman do kapatayon i kusai’ddi om i nintorusan. ¹⁶ Ondung haro o tondu’ do monokiampahu’ do nintorusan om mositi’ nod hukuman do kapatayon i tondu’ddi om i nintorusan. Om iri nopo kinapatayon diyolo’ddi om iri i kasalaan diyolo’ o nokobungou. ¹⁷ Ondung haro o kusai do mangawin di tobpinai dau’d tondu’ di toput do pusod dau ko’ i tobpinai dau’d tondu’ di tanak mantad di tapa’ ko’ tanak mantad di tina’ dau, om mositi’ nod intingayamon iyolo’ dot id toguang do tulun dot ogumu’, om uyungon nogindo do mantad id kinoiyonon di tulun dot ogumu’. Tu’ minagampahu’ i’ i kusai’ddi di tobpinai dau’d tondu’, om mositi’ nod boboon dau i kootuson diri. ¹⁸ Ondung dumudun o kusai do tondu’ di maso’d haro o pomulanan, om mositi’ nod uyungon iyolo’ do mantad id kinoiyonon do tulun dot ogumu’, tu’ notolibambanan no diyolo’ it oturan do pasal do kolidangan do tumanud dot oturan do tugama’. ¹⁹ Ondung haro o kusai do magampahu’ di tinanon dau, om mositi’ nod tonggungon diyolo’ o kootuson di winonsoi diyolo’ dit a’ tuminanud dot oturan. ²⁰ Ondung dudunon do songulun o kusai i sawo di tamanon dau, om mongintingayam no iyau di tamanon dau. Om mositi’ nod boboon di kusai om i tondu’ o pomohukum di winonsoi diyolo’ddi: tu’ pomohukum nopo om a’ goduwo nopondo iyolo’ maganak. ²¹ Ondung haro o kusai do mangawin di sawo do tobpinai dau, om a’ no iyolo’ maganak do gisom dot ikapatai diyolo’. Tu’ sosomu’ no kopio om araat i winonsoi dau, om minongintingayam iyau di tobpinai dau,’’ ka dau. ²² Om boros kad TUHAN, ’’Tonudon ngai’ no dokoyu it oturan om i ponuhuan ku. Om a’ kou i’ ouyung do mantad id pomogunan do Kanaan, i kinoiyonon do paatadan ku dokoyu. ²³ Kada’ kou omit do kowoyo-woyoon om i kaadat-adato’ di tulun mantad do hilo’. Pinaparaat no kopio i tulun do kapir do ginawo ku, tu’ angaraat i’ kopio o kowoyo-woyoon diyolo’. Om iri no o koponguyungan ku diyolo’ do baino’dti, om kosuang kou i’ di pomogunan diri. ²⁴ Nakapamatos oku no dot iyokoyu o kasanganu di pomogunan di kaya’ om it oluhub diri, om patahakon ku i’ kopio iri dot id dokoyu. Iyoho’ no i TUHAN, i Kinorohingan dokoyu. Om nokosuwai-suwai ku no iyokoyu do mantad id bansa’d suwai. ²⁵ Iyo nopoddi om mositi’ nod milo kou do mongintutun di nintorusan om i tombolog di sosomu’, om it a’ sosomu’. Kada’ kou pangakan do nintorusan ko’ tombolog di sosomu’. Tu’ nokoboros ku no do sosomu’ o nintorusan diri, om ondung kanon pondo dokoyu iri, om ososomu’ kou no. ²⁶ Nokosuwai-suwai ku no iyokoyu do mantad id bansa’d suwai, om osiliu kou i’ do tulun dit iyoho’ noo o sanganu. Om mositi’ no dot olidang kou tu’ iyoho’ no o TUHAN, om olidang oku. ²⁷ Pointikid-tikid do tongokusai om tongoondu’ di mongoi pomolohou do rusod do tulun do napatai om mositi’ nod dumpahon do watu do gisom dot apatai; om iri nopo kinapatayon do tulun di momonsoi do miagal diri om iri i kasalaan dau o nokobungou,’’ ka dau.

¹ Om suhuo’ nod TUHAN i Musa do poposunud diti piro-piro ot oturan dot id tongoimam di sinakagon di Harun, ’’Iso’ po dit imam nga’ a’ no koino-ino do monosomu’ do tinan dau dot i mongoi tanud do momolobong do tanak do tobpinai dau o kososomu’, ² nga’ suwai indo dot iri no i tina’ dau ot apatai ko’ iri tapa’ dau, ko’ tanak dau’d kusai ko’ tanak dau’d tondu’, ko’ tobpinai dau’d kusai, ³ ko’ tobpinai dau’d tondu’ dit a’ po nakakawin, it iso-iso’ po o walai diyolo’. ⁴ Om a’ i’ iyau koino-ino do popologos dot ososomu’ o tinan dau do kososomu’ nopo om i kapatayon do tulun di kawaris dau tu’ nokopogitotokin no. ⁵ Imam nopo om a’ i’ koino-ino do momugar do tobuk do ponong honggo nopo do tulu dau, ko’ momompod pod ganggut dau ko’ minsuhat do tinan, do popointalang do mogihad iyau di tulun do napatai. ⁶ Tu’ iri nopo imam om nokotobilang no do sumiliu’d songonuon ku, om iri no ot a’ diyolo’ koina-inaan do mongindaraat do ngaran ku. Tu’ iyolo’ no i papatahak dot id doho’ di porsombahan do taakanon, om mositi’ no dot olidang iyolo’. ⁷ Imam nopo om a’ i’ koino-ino do mangawin do tondu’ di nokoumbal do sumiliu’d sundal ko’ i tondu’ di nodudun do kusai’d gulu, ko’ i tondu’ di nakaada’ do sawo, tu’ imam nopo om nokotobilang no do sumiliu’d songonuon ku. ⁸ Om mositi’ nod okunon do koinsanai’d tulun dot iri nopo imam om nokotobilang no do sumiliu’d songonuon ku, tu’ iri no it imam o papatahak dot id doho’ di porsombahan do taakanon. Iyoho’ no o TUHAN, om olidang oku, om lidangan ku o tulun ku. ⁹ Ondung sumiliu’d sundal o tanak do tondu’ dit imam, om mositi’ nod tutudan i tondu’ddi do gisom dot apatai, tu’ minongintingayam i’ iyau di tapa’ dau. ¹⁰ Iri nopo Boyoon dot Agayo dot Imam, om nokotobilang no do sumiliu’d songonuon do Kinorohingan do momonsoi do karaja’ di dong imam. Om pinopogirot nopo di pinomilian dau’ddi om iri no i tinuntugan di tumau dot olidang o hiri’d tulu dau, om pinakayan iyau do pakayan di dong imam. Om iri no ot a’ dau koina-inaan do popologos di tobuk dau dot a’ osudai, ko’ momohurak pod pakayan dau do popointalang do mogihad iyau do tulun di napatai. ¹¹ - ¹² Nakatahak no iyau dot id doho’ do pinotobilang do sumiliu’d songonuon ku, om iri no ot a’ dau koina-inaan do monosomu’ do tinan dau. Om a’ nogi’ iyau koino-ino do monosomu’ di Kiim ku dit Olidang do ponosomu’ nopo om i mongoi salakoi’d walai di haro o rata’, do mulong piya do rata’ iri di tapa’ ko’ tina’ dau. ¹³ - ¹⁴ Tondu’ nopo di koino-ino dau’d kowinon om iri no i mantad id payat di tadon dau iyau. Om a’ no iyau koino-ino do mangawin do tondu’ di nopuadan ko’ tondu’ po di naadaan do sawo, ko’ tondu’ di nokoumbal do suminiliu’d sundal. ¹⁵ Ondung wonsoyon dau i pogoduhan diri, om iri nopondo i tangaanak dau, it apatut daa dot olidang, om sosomu’ no. Tu’ iyoho’ no o TUHAN, om nokotobilang ku no iyau do sumiliu do Boyoon dot Agayo dot Imam,’’ ka dau. ¹⁶ Om suhuo’ nod TUHAN i Musa ¹⁷ do popoboros diti dot id di Harun, ’’Tulun nopo di haro o bohiton do tinan dot id pogialatan di sinakagon nu, om a’ no iyau koino-ino do papatahak do porsombahan do taakanon dot id doho’. Om iyo noddi ot oturan do gisom dot alaid. ¹⁸ Iri nopo tulun di papatahak do porsombahan, om a’ no koino-ino do tulun di haro o bohiton do tinan: a’ koino-ino’d tulun di bolou, ko’ i kimpo’, ko’ it a’ iyo’d dombokon o rabas, ko’ it a’ iyo’d dombokon o tinan; ¹⁹ om a’ koino-ino i tulun di notipu’ o longon, ko’ i notipu’ o gakod; ²⁰ om a’ koino-ino i tulun di notongkud ko’ i miningkarakata’ o kinosuni-sunio’; om a’ koino-ino i tulun di noinggolian. ²¹ Iri nopo tulun di haro o bohiton do tinan dot id pogialatan di sinakagon di Harun om a’ no koino-ino do papatahak do porsombahan do taakanon dot id doho’. ²² Nga’ koino-ino i’ iyau do mangakan di taakanon do nakatahak dot id doho’, i porsombahan do taakanon dit olidang om i porsombahan do taakanon dit olidang kopio. ²³ Nga’ a’ no o tulun diri koino-ino do mongoi insomok di tabir dot olidang om i pananaraban do porsombahan tu’ haro i’ o bohiton do tinan dau. Om a’ no kopio iyau koino-ino do monosomu’ di konunu-nunuan di nokotobilang do maan do doho’, tu’ iyoho’ no o TUHAN, om iyoho’ i pinopotobilang di konunu-nunuan diri,’’ ka dau. ²⁴ Om iri ngai’ no i pinoboros di Musa dot id di Harun, om id tangaanak di Harun, om id koinsanai di tulun dot Israil.

¹ Om suhuo’ nod TUHAN i Musa ² do popolombus do boros diti dot id di Harun om id tangaanak di Harun, ’’Kada’ dokoyu indaraato’ o ngaran ku dit olidang. Iyo nopoddi om mositi’ nod pusohon kopio i piro-piro porsombahan di pinotobilang di tulun dot Israil do patahakon doho’. Tu’ iyoho’ no o TUHAN. ³ Ondung haro o tiso’ di sinakagon nu di maso do sosomu’ do mongoi insomok di porsombahan di pinatahak di tulun dot Israil dot id doho’, om a’ no kopio iyau pologoson kawagu do maganu-anu do hiri’d pananaraban do porsombahan. Om iti no ot oturan do gisom dot alaid. Tu’ iyoho’ no o TUHAN. ⁴ Kada’ nod haro o tongoiso’ di sinakagon di Harun di kitoruol o kulit dit araat kopio, ko’ i maso’d haro o sumoliwan do miagal-agal do waig do mantad id wayaan do sobu, do mongoi pangakan di porsombahan dot olidang, dot a’ po iyau nolidangan do tumanud dit oturan do tugama’. Ondung koigit it imam do nunu nopo i sosomu’ do notopisan do rata’ om sosomu’ no iyau; om sosomu’ no iyau ondung koposoliwan iyau’d narot, ⁵ ko’ koigit iyau’d nintorusan ko’ tulun di sosomu’. ⁶ Isai nopo ot imam dit ososomu’ om sosomu’ kasai’ no iyau’ddi do gisom do sosodopon. Om atalib piya o sosodopon nga’ sosomu’ kasai’ po iyau om a’ po koino-ino do mangakan di porsombahan dot olidang dot a’ po iyau kopodsu’. ⁷ Otonob po o tadau, om olidang nogi’ iyau, om koino-ino nogindo iyau do mangakan di porsombahan dot olidang, tu’ iri no o ponokotaakanon dau. ⁸ Imam nopo om a’ i’ koino-ino do mangakan do tonsi do nintorusan di napatai toomod ko’ iri po i pinatai do nintorusan dot orongit. Ondung mangakan iyau’ddi, om ososomu’ no iyau. Tu’ iyoho’ no o TUHAN. ⁹ Om mositi’ nod tumanud o koinsanai dit imam di piro-piro ot oturan di pinatahak ku. Tu’ ondung amu’, om kasala’ no iyolo’, om apatai, tu’ tuminolibamban i’ iyolo’ di piro-piro ot oturan dit olidang diri. Tu’ iyoho’ no o TUHAN, om iyoho’ no i pinopotobilang diyolo’ do sumiliu’d songonuon ku. ¹⁰ Iri nopo porsombahan di pinotobilang do maan do doho’, om iri no i tulun dit id sompiiyon dit imam o koino-ino do mangakan, tulun nopod suwai om a’ i’ koino-ino do mangakan diri do mulong piya dot i tulun di poinsugku’d walai dit imam, ko’ i tulun di pakaraja’ dot id imam. ¹¹ Nga’ iri nopo turipon dit imam, i binoli dit imam do tusin dau, ko’ i turipon di nosusu do hiri’d walai dit imam, om koino-ino id mangakan di taakanon dot aanu dit imam. ¹² Iri nopo tanak do tondu’ dit imam dit akawin do kusai dit okon ko’ imam, om a’ no koino-ino do mangakan di porsombahan di pinotobilang do maan do doho’. ¹³ Nga’ iri nopo tanak do tondu’ dit imam di nopuadan ko’ i naadaan do sawo om aiso’ po o tanak, i guminuli’ do hiri’d walai di tapa’ dau, om iri poddi molohing dau o kosondi-sondihon, om koino-ino i’ do mangakan dit aramit di tapa’ dau, i nosiliu dot imam. Iri no sompiiyon kopio dit imam o koino-ino do mangakan do porsombahan diri. ¹⁴ Ondung haro o tulun dit okon ko’ sompiiyon dit imam do kapangakan di porsombahan dit olidang diri, nga’ a’ i’ daa dau tinomod, om mositi’ nod bayaran kawagu dau it imam do gatang do koinsanai di porsombahan diri, om ruhangan po dot induwo i sompihopod. ¹⁵ A’ no kopio koino-ino it imam do monosomu’ di porsombahan do pinotobilang do maan do doho’, ¹⁶ dot i popologos do tulun dit a’ koino-ino’d mangakan, do mangakan di porsombahan, o ponosomu’. Tu’ iyoho’ no o TUHAN, om iyoho’ no i momolidang do porsombahan diri,’’ ka dau. ¹⁷ Om suhuo’ nod TUHAN i Musa, ¹⁸ - ¹⁹ do papatahak dot id di Harun om id tangaanak di Harun, om id koinsanai di tulun dot Israil, diti piro-piro ot oturan do poingkaa, ’’Soira’ nopod papatahak o tulun dot Israil ko’ i bansa’d suwai do poingiyon do hilo’d Israil, do porsombahan di sorobon, do pamayaan tuu dau iri di nakabatos dau ko’ porsombahan po dau do tumanud do kagaanan do ginawo dau, om mositi’ nod aiso’ o bohiton do tinan di tayam-tayam diri. Om mositi’ nod tontoluhan i tayam-tayam, om it aiso’ o bohiton do tinan, om aramit indo iri. ²⁰ Ondung papatahak kou do tayam-tayam di haro o bohiton do tinan do maan do porsombahan, om a’ nod TUHAN romiton iri. ²¹ Soira’ nopod haro o tulun do papatahak dot id TUHAN do porsombahan di piombolutan, do pamayaan tuu dau iri do batos dau ko’ porsombahan po dau do tumanud do kagaanan do ginawo dau, om mositi’ nod it aiso’ o bohiton do tinan di tayam-tayam diri, om aramit indo iri. ²² Kada’ kou papatahak dot id TUHAN do tayam-tayam di bolou, ko’ i kimpo’ ko’ i notipuan ko’ i notogu’, ko’ i kikupos di kinanaon, ko’ i kitoruol o kulit, ko’ i kigandas. Kada’ papatahak do tayam-tayam do miagal diri do hiri’d pananaraban do porsombahan do maan do porsombahan do taakanon. ²³ Koino-ino i’ do papatahak do tayam-tayam dit a’ iyo di koubasanan o kinosuni-sunio’ ko’ it a’ osonong o kinoinan-inano’ do maan do porsombahan di tumanud do kagaanan do ginawo, nga’ tayam-tayam nopo do miagal diri om a’ i’ romiton do maan do pamayaan di pinabatos. ²⁴ Kada’ kou papatahak dot id TUHAN do tayam-tayam di nababak o tontolu, ko’ i nosinsib o tontolu, ko’ i nosuhat ko’ i noidu’ o tontolu. A’ no kopio koino-ino do haro ot osiliu do miagal diri do hiti’d pomogunan dokoyu. ²⁵ Kada’ kou papatahak do nunu nopo o tayam-tayam di naanu dokoyu do mantad id tulun di bansa’d suwai do maan do porsombahan do taakanon. Tu’ tayam-tayam nopod miagal diri om miagal nopo di tayam-tayam di haro o bohiton do tinan, om a’ i’ romiton do maan do porsombahan. ²⁶ - ²⁷ Soira’ nopod haro o tanak do sapi’ dot osusu, ko’ tanak pod dumba’, ko’ tanak do kambing, om kada’ no kopio potongkiado’ iri do mantad id molohing dau do turu-turu’ po tadau do mantad di kinosusuon. Nga’ katalib pondo iri om romiton nori do maan do porsombahan do taakanon. ²⁸ Kada’ dokoyu piandado’ do papatahak do maan do porsombahan i sapi’ om i tanak di sapi’, ko’ i dumba’ om i tanak di dumba’, ko’ i kambing om i tanak di kambing dot insan-insan kopio o tadau do patahakon. ²⁹ Soira’ nopod papatahak kou do porsombahan do kounsikahan dot id TUHAN, om mositi’ nod tonudon it oturan om aramit i’ i porsombahan dokoyu, ³⁰ om akanon ngai’ nopori do tontok do tadau’ddi om kada’ kou no poolu’ dot ongokooro’ piya do maan do tadau kawagu,’’ ka dau. ³¹ Om boros kad TUHAN, ’’Tonudon ngai’ no dokoyu i ponuhuan diri; tu’ iyoho’ no o TUHAN. ³² Kada’ dokoyu indaraato’ o ngaran ku dit olidang; om mositi’ nod ongotumbayaan ngai’ i tulun dot Israil dot olidang oku. Tu’ iyoho’ no o TUHAN, om iyoho’ i popolidang dokoyu. ³³ Om iri no o kinoposoliwanan ku dokoyu do mantad hilo’d Masir, tu’ sumiliu oku nondo do Kinorohingan dokoyu. Tu’ iyoho’ no o TUHAN,’’ ka dau.

¹ Om patahako’ nod TUHAN dot id di Musa ² iti piro-piro ot oturan do pasal do tadau dot agayo do tugama’, ’’Tontok nopo di piro-piro o tadau’ddi om mositi’ nod tumimung i bansa’ dot Israil do sumambayang. ³ Om mositi’ nod potobilangon dokoyu o tadau’d Sabat do maan do don TUHAN do hinonggo kou nopod poingiyon. Onom o tadau dokoyu do koino-ino do kumaraja’, nga’ sorohon no dokoyu, do koturu’ nopod tadau, i tadau’d Sabat, om tadau nod koundarangan. Kada’ kou no karaja’ do tadau’ddi, suwai ko’ tumimung kou no do sumambayang. ⁴ Om posunudon noti piro-piro o tadau dot agayo diti do tontok di maso do natantu’ mantad,’’ kad TUHAN. ⁵ Om boros ka kawagu’d TUHAN, ’’Iri nopo Tadau’d Agayo do Paska, i ramayon do maan do pomusou’d TUHAN, om tumimpuun do tontok dit otonob o tadau do koontok di tadau’d kohopod om apat do tulan do koiso’. ⁶ Om tadau nondo kawagu, di tadau’d kohopod om limo, om tumimpuun no i Tadau’d Agayo do Roti dit A’ Kipangambang. Om kada’ kou no pangakan do roti di rinalatan do pangambang do solinaid do turu’ o tadau. ⁷ - ⁸ Solinaid nopo di turu’ o tadau’ddi om mositi’ nod papatahak kou do porsombahan do taakanon dot id TUHAN. Om tontok nopo di tadau’d koiso’ om tadau’d koturu’ do karamayan diri, om mositi’ nod tumimung kou do sumambayang om a’ kou koino-ino do kumaraja’ do nunu nopo. ⁹ - ¹⁰ Korikot kou nopondo do hilo’d pomogunan di patahakon do TUHAN dot id dokoyu, om tontok nopondo di mongomot kou’d barli do hilo’, om iri nopo barli dit id gulu kopio dokoyu omoto’, om mositi’ nod ngoyon dokoyu patahako’ dit imam. ¹¹ Tontok nopo di sinuabon di tadau’d Sabat om mositi’ nod patahakon dit imam i porsombahan do barli diri do maan do porsombahan di pinotobilang do maan do don TUHAN, om asanangan indo o TUHAN dokoyu. ¹² Om tontok nopod papatahak kou do porsombahan do barli diri, om mositi’ nod papatahak kou po do songinan o tanak do dumba’ di sontoun nogi’ o tumur, om it aiso’ o bohiton do tinan do maan do porsombahan di sorobon. ¹³ Om potonggoyon nopo dokoyu’ddi do maan do porsombahan do taakanon, om duwo o kilogram do tapung di rinalatan do tumau’d saitun. Om iri no i tawau di porsombahan diri o kasanangan do TUHAN. Om papatahak kou nogi’ do songlito o waig dot anggur do potonggoyon diri. ¹⁴ Ondung a’ po dokoyu katahak o porsombahan diri dot id TUHAN, om kada’ kou no kopio pangakan dot ongokuuri’ piya di barli di koomot diri, dot iri tuu it a’ po noonsok, ko’ iri po i nalasu’ no, ko’ i nogoyiu no. Om mositi’ nod tonudon do koinsanai di sinakagon nu iti toturan diti do gisom dot alaid,’’ ka dau. ¹⁵ Om boros ka kawagu’d TUHAN, ’’Mantad nopo di sinuabon di tadau’d Sabat, do tontok di papatahak kou dot id TUHAN do tua’ do barli dit id gulu omoto’, om intobon no dokoyu o turu’ kopio o minggu’. ¹⁶ Om tadau nopondod kolimo nohopod, dit atalib o tadau’d Sabat di kointuru’, om mositi’ nod papatahak kou kawagu do porsombahan do gandum dot id TUHAN. ¹⁷ Pointikid-tikid do sompiiyon om mositi’ nod papatahak do duwo o binuluguan do roti om patahakon nondo do maan do porsombahan di potobilangon do maan do don TUHAN. Om sombulugu’ nopo di roti, nga’ duwo o kilogram do tapung di rinalatan do pangambang o wonsoyon. Om mositi’ nod patahakon iri dot id TUHAN do maan do porsombahan do gandum dit id gulu omoto’. ¹⁸ Om mositi’ nod papatahak i tulun dot Israil do turu’ o dumba’ di sontoun nogi’ o tumur, om songinan o sapi’ do tontoluhan, om duwo tinan do kambing, dit aiso’ ngai’ o bohiton do tinan do potonggoyon di roti’ddi. Om patahakon ngai’ nondo iri do maan do porsombahan di sorobon dot id TUHAN, do mitonggoi di porsombahan do gandum om porsombahan do waig dot anggur. Om iri no tawau do porsombahan diri o kasanangan do TUHAN. ¹⁹ Om papatahak nogi’ iyolo’ do songinan o kambing do tontoluhan do maan do porsombahan do pangampun do dusa, om duwo o tanak do dumba’ do tontoluhan di sontoun nogi’ o tumur, do maan do porsombahan do piombolutan. ²⁰ Om mositi’ nod patahakon dit imam i roti om i duwo o tanak do dumba’ddi do maan do porsombahan di potobilangon do maan do don TUHAN, om iri no it aanu dit imam. Om iri ngai’ nopo porsombahan diri om ongolidang ngai’ nopo. ²¹ Tontok nopod tadau’ddi om a’ kou no koino-ino do kumaraja’ do nunu nopo, om mositi’ nod tumimung kou do sumambayang. Om mositi nod wonsoyon di sinakagon nu o miagal diti do gisom dot alaid, do honggo nopo iyolo’d poingiyon. ²² Soira’ nopod mongomot kou, om kada’ dokoyu omoto’ i gandum do hiri’d tisan di tumo, om kada’ dokoyu ngoyo’ gulio’ do mongomot i gandum di nongotoliban. Pologoson nopori do maan di tulun do mosikin om i tulun do bansa’d suwai. Tu’ TUHAN no o Kinorohingan dokoyu,’’ ka dau. ²³ - ²⁴ Om boros ka kawagu’d TUHAN, ’’Tadau nopod koiso’ do tulan do koturu’ om mositi’ nod ramayon tu’ nokotobilang nori do tadau’d koundarangan. Tontok nopod tadau’ddi, dit orongou i tuni do torumpit, om mositi’ nod tumimung kou do sumambayang. ²⁵ Om papatahak kou nod porsombahan do taakanon dot id TUHAN, om kada’ kou karaja’ do nunu nopo,’’ ka dau. ²⁶ - ²⁷ Om boros ka kawagu’d TUHAN, ’’Tontok nopo di tadau do kohopod do tulan do koturu’ om Tadau di Kopongompunan do Dusa do tulun dot ogumu’ do pointikid-tikid do toun. Tontok nopod tadau’ddi om mositi’ nod puasa kou om tumimung kou do sumambayang, om papatahak kou dot id TUHAN do porsombahan di taakanon. ²⁸ Kada’ kou no karaja’ do tontok do tadau’ddi, tu’ tadau noddi do kapamansayan di wonsoyon di natantu’ mantad do maan do pangampun do dusa. ²⁹ Isai nopo i mangakan do nunu nopo do tontok do tadau’ddi, om a’ no kohompit do tulun di songonuon do Kinorohingan. ³⁰ Om isai nopo i kumaraja’ do tontok do tadau’ddi, om TUHAN no o momohukum do tulun diri do kapatayon o pomohukum. ³¹ Om iyo no kasai’dti ot oturan do tonudon do koinsanai di manangaki diya’ om i sinakagon diyolo’, do honggo nopo iyolo’d poingiyon. ³² Iri nopo maso dot id piolitan di motingkotonob no o tadau do tadau’d kosiam do tulan diri om gisom dit otonob o tadau di tadau’d kohopod, om mositi’ nod pusohon kopio dokoyu, tu’ iri no o tadau’d koundarangan di nokotobilang. Om osongodou nopo do tadau’ddi do puasa kou, om a’ no koino-ino do mangakan do nunu nopo, do sokoro-koro’ piya,’’ ka dau. ³³ - ³⁴ Om boros ka kawagu’d TUHAN, ’’Iri nopo Tadau dot Agayo do Kinuhub-Kuhub, om tumimpuun do tontok di tadau’d kohopod om limo do tulan di koturu’, om koloido’ nopoddi om turu’ o tadau. ³⁵ - ³⁶ Om solinaid nopo di turu’ o tadau, om mositi’ nod papatahak kou do porsombahan do taakanon do pointikid do tadau. Om tadau nopondod kawalu’ do karamayan diri om mositi’ no do tumimung kou do sumambayang, om papatahak do porsombahan do taakanon om a’ kou koino-ino do kumaraja’. ³⁷ (Om iri no ngai’ i tadau dot agayo do tugama’ dit apatut do ramayon dokoyu. Tontok nopod tadau dot agayo’ddi, om mositi’ nod tumimung kou do sumambayang om papatahak do porsombahan do taakanon, om porsombahan di sorobon, om porsombahan do gandum, om porsombahan do tayam-tayam, om porsombahan do waig dot anggur, do miontok di gunaon do pointikid do tadau. ³⁸ Iti nopo karamayan diti om pomoruhang di tadau’d Sabat di koubasanan, om i piro-piro porsombahan nga’ pomoruhang nogi’ di porsombahan dokoyu di koubasanan, om pomoruhang di porsombahan dokoyu di pamayaan di pinabatos, om pomoruhang di porsombahan di tumanud do kagaanan do ginawo, do patahakon dot id TUHAN.) ³⁹ Om koomot kou nopondo, om mositi’ nod papaharo kou do karamayan do solinaid do turu’ o tadau, do tumimpuun di tadau’d kohopod om limo do tulan do koturu’. Om iri nopo tadau’d koiso’ om tadau’d potobilangon do maan do koundarangan. ⁴⁰ Om tontok nopod tadau’ddi, om mongoi kou no pongupu’ do piro-piro o tua-ua’ dit ongosonong do mantad id kouwaan dokoyu. Om manganu nogi’ do roun di guas do roitan do palma, om i raan do kayu dit ongokohob o tuntu. Om tumimpuun nogindo do mamaramai di karamayan do tugama’ do pomusou’d TUHAN, i Kinorohingan dokoyu. ⁴¹ Om ramayon no dokoyu o karamayan diri do solinaid do turu’ o tadau. Om mositi’ nod tonudon di sinakagon dokoyu ot oturan diti do gisom dot alaid. ⁴² Om mositi’ nod miyon ngai’ i tulun dot Israil dot id kinuhub-kuhub do solinaid di turu’ o tadau’ddi, ⁴³ om koilo indo i sinakagon dokoyu do sinuhu’ do TUHAN i bansa’ dot Israil do miyon dot id kinuhub-kuhub dit angara-raat do tontok di pinosoliwan dau iyolo’ do mantad hilo’d Masir. Tu’ iyau no i TUHAN, i Kinorohingan dokoyu,’’ ka dau. ⁴⁴ Om iyo noddi i Musa do pinopoboros dot id tulun dot Israil do koinsanai dit oturan diri do papaharo do karamayan do tugama’ do pomusou’d TUHAN.

¹ Om suhuo’ nod TUHAN i Musa ² do papatahak dot id tulun dot Israil diti piro-piro ot oturan do poingkaa, ’’Paatod kou no do tumau do saitun dit osompipi’ om it osonong kopio do ponuang di lampung di hiri’d Kiim dot Olidang, om otutudan indo kasai’ i lampung. ³ Om mositi’ nod ngoyon di Harun tutudai i lampung diri do pointikid do sosodopon, om pologoson nopod kitapui do gisom do kosuabon o hiri’d kinoiyonon di koropohon do TUHAN, i hiri’d soliwan di tabir, it id dotimbabaan di Kaban do Tumpongo, i hiri’d Bilik dit Olidang Kopio. Om mositi’ nod tonudon kasai’ iti toturan diti do gisom dot alaid. ⁴ Om mositi’ nod gompion kasai’ di Harun i lampung di hiri’d potitimpakan do lampung di tamas dit osompipi’ o winonsoi. Om mositi’ nod ngoyon dau piantangai iri, om otutudan kasai’ i’ iri do tontok di kopodtutudan kasai’ do hiri’d Kiim do TUHAN,’’ ka dau. ⁵ Om boros ka kawagu’d TUHAN, ’’Manu no do hopod om duwo kilogram do tapung om wonsoyon nori do hopod om duwo o binuluguan do roti. ⁶ Om poiiliu nopo di roti’ddi om ruludon do duwo o rulud, do sopionom o sonrulud, do hiri’d mija’ di nurogupan do tamas dit osompipi’, i hiri’d suang di Kiim do TUHAN. ⁷ Om timpakan nod kominyan dit osompipi’ o hiri’d duwo o rulud di roti’ddi. Tu’ iri nopo kominyan diri om poningolon di roti do maan do tanda’ do nakatahak nori dot id TUHAN do maan do porsombahan do taakanon. ⁸ Pointikid-tikid do tadau’d Sabat, om mositi’ nod haro o roti do hiri’d suang di Kiim do TUHAN, do gisom do mompus-ompus. Tu’ iti no it apatut do wonsoyon do tulun dot Israil do gisom dot alaid. ⁹ Iri nopo roti’ddi om maan di Harun om i sinakagon dau. Om mositi’ nod id kinoiyonon dit olidang o pangakanan diyolo’ddi, tu’ iri nopo roti’ddi om nanu do mantad id taakanon dit olidang kopio di nakatahak dot id TUHAN, om iri no it aanu dit imam,’’ ka dau. ¹⁰ - ¹¹ Hiri nopod kokiiman di tulun dot Israil om haro o songulun o kusai. Tapa’ nopo dau om tulun do Masir om tina’ no dau om tulun dot Israil, dot i Silomit o ngaran i tanak di Dibri do mantad id payat di Dan. Insan tadau om ponokisongkiwal no i kusai’ddi dot iso’ o tulun dot Israil. Om tontok di misongkiwal iyolo’, om pomopol no i kusai’ddi do Kinorohingan. Om ngoyo’ noddi iyau di tulun dot Israil posolowoto’ di Musa. ¹² Om tamangai nopoddi diyolo’ i tulun diri do daamot do magandad do boros do TUHAN, ondung poingkuro o wonsoyon diyolo’ dot id tulun diri. ¹³ Om boros kad TUHAN dot id di Musa, ¹⁴ ’’Ngoyo’ posoliwano’ diti kokiiman i tulun diri. Om pointikid-tikid do tulun di nokorongou do tulun diri do minomopol, om mositi’ nod pakabai do longon diyolo’ dot id tulu do tulun diri do popointalang do nakasala’ i tulun. Om oinsanan nopondo i tulun do momodumpau di tulun diri do watu do gisom dot apatai. ¹⁵ Om poboroson nogindo dot id toinsanan o tulun dot Israil dot isai nopo i momopol do Kinorohingan om mositi’ nod mamabo do kootuson diri, ¹⁶ om hukuman nogindod kapatayon i tulun diri. Isai nopo o tulun, do tulun tuu dot Israil ko’ bansa’d suwai di poingiyon do hilo’d Israil, do kopomopol do TUHAN om mositi’ nod dumpahon do watu, do koinsanai di tulun o momodumpau do gisom dot apatai i tulun diri. ¹⁷ Isai nopo i mamatai’d tulun do suwai om hukuman nod kapatayon. ¹⁸ Isai nopo o tulun di mamatai’d tayam-tayam do tulun do suwai om mositi’ nod tingalanan dau iri. Oturan nopo om ’ginawo o pomolokop do ginawo’. ¹⁹ Ondung haro o tulun do pokoruol do tulun do suwai, om poingkuro nopo i winonsoi dau do pinopokoruol, om mositi’ nod wonsoyon o miagal diri dot id dau. ²⁰ Ondung koponipu’ iyau’d tulang, om mositi’ nod tipuon o dau’d tulang. Ondung kopomolou iyau dot iso’ do mato do tulun do suwai, om i tiso’ di dau’d mato nga’ bolohon no. Ondung kopomobog iyau’d tulun do suwai, gisom dot otipu’ o nipon di tulun diri, om mositi’ nod tipuon o dau’d nipon. Nunu nopo i winonsoi dau dot id tulun do suwai, gisom dot a’ diri osonong o tinan do tulun do suwai, om mositi’ nod wonsoyon o miagal diri dot id dau’d tinan do ponuli’ di winonsoi dau. ²¹ Isai nopo o kapamatai do tayam-tayam, om mositi’ nod tingalanan dau iri. Nga’ isai nopo o kapamatai do tulun, om mositi’ nod patayon. ²² Om mositi’ nod tonudon ngai’ dokoyu i toturan diri om tonudon nogi’ di tulun do bansa’d suwai di poingiyon dot id rolot dokoyu, tu’ iyoho’ no i TUHAN, i Kinorohingan dokoyu,’’ ka dau. ²³ Om koboros poddi di Musa iri dot id tulun dot Israil, om posoliwano’ no diyolo’ di kokiiman i tulun di minomopol do Kinorohingan, om dumpaho’ no diyolo’ iyau’d watu do gisom do napatai. Om iri no o nokoodsuur di tulun dot Israil do momonsoi di pinonuhuan do TUHAN dot id di Musa.

¹ Om hilo’ nod Nuluhon do Sinai o TUHAN do minoro-boros di Musa, om minonuhu’ dau ² do patahak diti piro-piro ot oturan dot id bansa’d Israil: Soira’ nopondod korikot kou do hilo’d pomogunan di patahakon do TUHAN dot id dokoyu om a’ kou no koino-ino’d mananom-tanom di tana’ do pointikid-tikid di toun do koturu’. Om opusou i’ dokoyu o TUHAN. ³ Mositi’ nod tanaman dokoyu i tumo dokoyu om tutuan i guas dot anggur, om onuon i tua’ di tanom-tanom dokoyu do solinaid dot onom o toun. ⁴ Nga’ iri nopo koturu’d toun om potobilangon no dokoyu do maan do don TUHAN. Om solinaid nopod toun diri om pologoson nopo i tana’ dot a’ buatan om a’ tanaman. A’ no tanaman i tumo dokoyu om a’ tutuan i guas dot anggur. ⁵ Iri piya gandum di suminuni toomod, it a’ tinanom, nga’ kada’ no dokoyu ngoyo’ omoto’. Tu’ toun nopoddi om maso do koundarangan di tana’ do buatan. ⁶ Om iyo piya’ddi nga’ haro kasai’ i’ o suang di tana’ do maan dokoyu’d takanon om akanon di turipon dokoyu, om i songingkaraja’ dot id dokoyu, om i bansa’d suwai di poinsugku’ dokoyu; ⁷ om akanon nogi’ di tayam-tayam dokoyu, om i nintorusan di songhombo-hombo do hilo’d koomulakan dokoyu. Nunu nopo i sumuni do hilo’d tana’ om aakan ngai’ i’. ⁸ Intobon no o toun dot inturu’ i turu’, om kogumuo’ nopoddi om apat nohopod om siam o toun. ⁹ Om tontok nopondo do tadau’d kohopod do tulan di koturu’, i Tadau do Kopongompunan do Dusa om monuhu’ nod tulun do mongoi pouni do torumpit do pointongkop di pomogunan. ¹⁰ Om iyo kou noddi do potobilang di toun do kolimo nohopod diri, om poposunud do haro o kosimbayanan do kumaa dot id toinsanan o tulun di hiri’d pomogunan. Solinaid nopod toun diri om koinsanai di dapu’ di nakadagang om mositi’ nod pogulion kawagu dot id sanganu mantad di dapu’ ko’ id sinakagon di sanganu mantad di dapu’ddi. Om isai nopo i nadagang do siniliu do turipon om mositi’ nod pogulion do hiri’d sompiiyon dau. ¹¹ Kada’ dokoyu tanamai o tumo dokoyu, om kada’ dokoyu omoto’ i gandum di suminuni toomod, om kada’ dokoyu ngoyo’ upuo’ i tua’ dot anggur dokoyu dit a’ notutuan. ¹² Toun nopoddi om toun dit olidang dot id dokoyu. Iri nopo i koino-ino dokoyu’d kanon om iri po i tua’ di suminuni toomod do hiri’d tumo dokoyu. ¹³ Id suang nopod toun diri om koinsanai di dapu’ di nakadagang om mositi’ nod pogulion dot id sanganu mantad di dapu’ddi. ¹⁴ Om soira’ nopondo do papadagang kou’d tana’ dot id tulun di bansa’ dokoyu, ko’ momoli kou’d tana’ do mantad id tulun diri, om kada’ no kopio dot a’ otulid o ralan do papadagang diri ko’ momoli’ddi. ¹⁵ Iri nopo gatang di tana’ om mositi’ no do tontuon mantad do tumanud do kogumuon di toun di haro ot aanu do mantad id tana’ddi om gisom dot orikot i Toun do Kopogulian dit id dosunsudan. ¹⁶ Ondung ogumu’ po o nintaban do toun dot a’ po orikot iri, om amahal no o gatang di tana’. Nga’ ondung okuri’ no o nintaban do toun dot a’ po orikot iri, om mositi’ nod omura-mura no o gatang, tu’ iri nopo dagangon om iri no i kogumuon do tua’ do tanom do hiri’d tana’. ¹⁷ Kada’ kou ponipu’ dot iyokoyu ngai’ it iso-iso’ o bansa’. Suwai ko’ koronok kou nod TUHAN, i Kinorohingan dokoyu. ¹⁸ Tonudon ngai’ no it oturan om i ponuhuan do TUHAN, om osimbayan kou id mongiyon-ngiyon dot id pomogunan diri. ¹⁹ Om kouwa’ indo i tinanom dokoyu do hiri’d tana’ om kabagal kasai’ dokoyu o taakanon om osimbayan kou do mongiyon-ngiyon do hilo’. ²⁰ Nga’ haro dotindo o muhot ondung nunu no ot akanon do tontok di koturu’d toun, tu’ a’ i’ tanaman i tana’ om a’ ongoyon onuo’ i tua’ di songintanom. ²¹ Tontok nopo di toun do koonom om barakatan indo do TUHAN i tana’ gisom dot iri nopo tua’ dot aanu do toun diri om kabagal i’ do duwo o toun. ²² Om mananom kou nopondo di tumo dokoyu di kawalu’d toun, om haro kasai’ po i tomot dokoyu di toun do koonom dot akanon dokoyu. Om haro kasai’ po ot akanon dokoyu do gisom dot oomot i tua’ di tinanom dokoyu di toun do kawalu’ddi. ²³ Kada’ kopio dokoyu dagango’ do gisom dot otilombus i tana’ dokoyu, tu’ okon i’ ko’ iyokoyu o sanganu’ddi. Sanganu nopo kopio di tana’ddi om Kinorohingan i’, om iyokoyu nopo nga’ miagal nod sompogunan di pinologos do mananom-tanom di tana’. ²⁴ Ondung haro o songkoiyonon do tana’ do padagangon, om mositi’ nod tumboyoon i sanganu mantad di tana’, do tontok dot onuon kawagu dau i tana’ddi. Tu’ iyau no it apatut do kasanganu’ddi. ²⁵ Ondung haro o tulun dot Israil di rumutum kopio, gisom dot a’ no milo dot a’ dau padagangon i tana’ dau, om mositi’ nod bolion kawagu di tobpinai dau dit id somok po, i tana’ddi. ²⁶ Om tulun nopo dit aiso’ o tobpinai do momoli kawagu di tana’ dau, om kakaya’ i’ doti’ iyau do koimbagu om kabagal indo o tusin dau do pomoli kawagu di tana’ddi. ²⁷ Om ondung iyo’ddi nga’ mositi’ nod bayaran dau do tusin i tulun di minomoli di tana’ddi dot irad di gatang do suang di tana’ do solinaid di piro-piro o toun dot a’ po orikot i Toun do Kopogulian dit id dosunsudan. Tu’ orikot nopo o toun diri, om poingkuro piya nga’ koguli’ kasai’ no i tana’ dot id dau tu’ sanganu mantad di tana’ddi. ²⁸ Nga’ ondung a’ kabagal o tusin dau do pomoli kawagu di tana’ dau’ddi, om iri kasai’ po i minomoli o kikuasa’ di tana’ddi do gisom dot orikot i Toun do Kopogulian. Nga’ orikot nopondo i toun diri om pogulion no i tana’ dot id sanganu mantad di tana’. ²⁹ Soira’ nopod papadagang o tulun do walai dit id suang do bandar di kitolig o posorili’, om kikuasa’ no iyau do momoli kawagu di walai’ddi dot osontounan do mantad di tadau’d kinapadagangan. ³⁰ Nga’ ondung a’ dau bolion kawagu i walai’ddi dot osontounan, om asanganu no kasai’ di minomoli i walai, om otungkusan di sinakagon dau; om a’ no koguli’ kawagu i walai’ddi do tontok piya di Toun do Kopogulian. ³¹ Nga’ walai nopod hiri’d kawalayan dit aiso’ o tolig do posorili’, om paagalon nopod tumo; tu’ haro i’ o kuasa’ di sanganu mantad do momoli’ddi, om mositi’ do pogulion kawagu iri do tontok di Toun do Kopogulian. ³² Nga’ iri nopo tulun do Liwi om kikuasa’ i’ do momoli kawagu di dapu’ diyolo’ do hiri’d bandar di natantu’ mantad do diyolo’ do soira-ira’ nopo. ³³ Ondung haro o tulun do Liwi do padagang do walai dit id suang dot ongoiso’ di kabandaran di natantu’ do diyolo’ddi, om ondung a’ dau oboli kawagu iri, om mositi’ nod pogulion kawagu dot id dau i walai’ddi dot orikot i Toun do Kopogulian, tu’ iri nopo walai di tulun do Liwi do hiri’d bandar diyolo’, om iyolo’ kasai’ no o kasanganu do gisom dot alaid dot id pogialatan di tulun dot Israil. ³⁴ Nga’ iri nopo kobuturan do hiri’d posorili’ di kabandaran do tulun do Liwi, om a’ no kopio koino-ino do padagangon; tu’ iyolo’ kasai’ no o kasanganu’ddi do gisom dot alaid. ³⁵ Ondung haro o tulun dot Israil di poingiyon dot id somok dokoyu di rumutum kopio, om gisom dot aiso’ no o kanon dau om mositi’ nod onuan dokoyu iyau dot irad di patahakon dokoyu dot id tulun di gumadsi’. Om poingiyon kasai’ indo iyau do hiri’d somok dokoyu. ³⁶ - ³⁷ Kada’ dokoyu pokionuwai’d bunga i tusin di pinaalasan dokoyu dot id tulun diri. Suwai ko’ koronok kou nod Kinorohingan, om pologoson no o tulun diri do poingiyon do hiri’d somok dokoyu. Om kada’ kou panganu’d tuntung do mantad id taakanon di padagangon dokoyu dot id dau. ³⁸ Iri no o ponuhuan do TUHAN, i Kinorohingan dokoyu, i pinoposoliwan dokoyu do mantad hilo’d Masir, do papatahak dokoyu diti tana’ do Kanaan; om osiliu indo iyau do Kinorohingan dokoyu. ³⁹ Ondung haro o sompi’ ko’ tulun dot Israil di poingiyon dot id somok dokoyu do rumutum kopio, om gisom do dumagang nopo iyau dot id dokoyu do sumiliu’d turipon, om kada’ dokoyu iyau suhuo’ do momonsoi’d karaja’ di dong turipon. ⁴⁰ Mositi’ nod miyon nopo iyau do hiri’d dokoyu do miagal do tulun di gumadsi’; om kumaraja’ dot id dokoyu do gisom dot orikot i Toun do Kopogulian. ⁴¹ Tontok nopoddi om mositi’ nod tumongkiad iyau om i tangaanak dau di walai dokoyu, om gumuli’ do hiri’d sompiiyon dau om hiri’d tana’ di komolohingan dau. ⁴² Iri nopo tulun dot Israil om turipon i’ do TUHAN, tu’ iyau i’ o pinoposoliwan diyolo’ do mantad hilo’d Masir; om a’ no iyolo’ koino-ino do padagangon do maan do turipon. ⁴³ Kada’ dokoyu iyolo’ raraato’, nga’ koronok kou nod Kinorohingan dokoyu. ⁴⁴ Ondung orohian kou do haro o turipon, om mongoi kou nopo boli do mantad id bansa’d suwai di hiri’d posorili’ dokoyu. ⁴⁵ Om koino-ino kou i’ do momoli di tangaanak do tulun do bansa’d suwai di poingiyon dot id rolot dokoyu. Iri nopo tangaanak do bansa’d suwai dit osusu dot id pomogunan dokoyu, om koino-ino i’ do silihon do dokoyu’d songonuon. ⁴⁶ Om koino-ino i’ iyolo’ do potungkusan dokoyu di tangaanak dokoyu do maan diyolo’d turipon do solinaid po diyolo’d poimpasi. Nga’ kada’ nogi’ kopio dokoyu raraato’ o sompi’ ko’ tulun dot Israil. ⁴⁷ Ondung haro o bansa’d suwai di poingiyon dot id rolot dokoyu do kumaya’, om rumutum nogindo i sompi’ ko’ tulun dot Israil, om dumagang nondo iyau do sumiliu’d turipon di bansa’d suwai’ddi, ko’ id sompiiyon di bansa’d suwai. ⁴⁸ Om kadagang nopondo iyau, om koino-ino kasai’ i’ i tulun dot Israil diri do bolion kawagu do tongoiso’ di tobpinai dau’d kusai, ⁴⁹ ko’ i tamanon dau, ko’ i tikid dau’d molohing, ko’ i koobpinayan dau’d suwai dit id somok po o koobpinayan; ko’ iyau piya, di kaanu iyau’d tusin do kabagal do pambayar, nga’ milo i’ do momoli do kopolobusan do tinan dau. ⁵⁰ Om mositi’ nod monokirunding iyau di tulun di minomoli dau. Om intobon diyolo’ i toun do mantad di duminagang i tulun diri do sumiliu’d turipon om gisom dot orikot i Toun do Kopogulian dit id dosunsudan. Om tontuon nogindo diyolo’ o gatang di kopolobusan dau. Om iri nopo pamagatang om poiyoon di pamagadsi’ do tulun di gumadsi’. ⁵¹ - ⁵² Om mositi’ nod pogulion kawagu di turipon o wookon di gatang do pinomoli do tumanud do kogumuon do toun di noolu’, ⁵³ do miagal-agal ko’ tulun iyau di guminadsi’ do monikid toun nod godsian. Om a’ no kopio koino-ino do raraaton iyau di tuan dau. ⁵⁴ Ondung a’ iyau kalabus do tumanud di duwo o ralan do kolobusan diri, om mositi’ nod polobuson iyau om i tangaanak dau do tontok do Toun di Kopogulian dit id dosunsudan. ⁵⁵ Tulun nopo dot Israil om a’ i’ koino-ino do sumiliu’d turipon do gisom dot ikapatai, tu’ tulun nopod Israil om turipon nod TUHAN. Iyau i’ o pinoposoliwan diyolo’ do mantad hilo’d Masir. Om iyau no o TUHAN, i Kinorohingan diyolo’.

¹ Om boros kad TUHAN, ’’Kada’ kou pomonsoi’d tingolig, om kada’ kou popoingkakat do tininganak om torigi’d watu di kinikiran do maan do tukuon. Tu’ iyoho’ no o TUHAN, i Kinorohingan dokoyu. ² Ramayon no dokoyu i piro-piro o tadau dot agayo do tugama’, om pusohon no i tiyonon do sumambayang dot id doho’. Tu’ iyoho’ no o TUHAN. ³ Ondung miontok dit oturan o kowoyo-woyoon dokoyu om mumboyo’ kou di ponuhuan ku, ⁴ om porikoton ku indo kasai’ o rasam di dongkararasaman kasai’, om kosuni i’ i songintanom do hiri’d tana’, om mongua’ i kouwaan dokoyu. ⁵ Om a’ indo aayi-ayi’ o tua’ di tanom-tanom di hiri’d tana’ dokoyu, gisom dot orikot nopo i kopongupuan dokoyu’d tua’ dot anggur, om maso po dokoyu do mongomot do gandum. Om tontok nopo dit orikot no o kapananaman do gandum, om maso po dokoyu do mongupu’ do tua’ dot anggur. Om kabagal kasai’ indo dokoyu o taakanon dokoyu, om osimbayan kou do mongiyon-ngiyon dot id pomogunan dokoyu. ⁶ Om onuan ku indo iyokoyu do kosimbayanan do hilo’d pomogunan dokoyu, gisom dot osimbayan kou nopod modop, tu’ aiso’ no o poddosi dokoyu. Punsoon ngai’ ku nopondo i nintorusan dit ongorongit do hilo’d pomogunan dokoyu, om pisangadan do hilo’ nga’ aiso’ nondo. ⁷ Angaala’ indo dokoyu i pisangod dokoyu, ⁸ om limo nopo dokoyu nga’ kaala’ no do hatus o tulun, om hatus no om kaala’ i’ do hopod noribu o tulun. ⁹ Barakatan ngai’ ku indo iyokoyu, om onuan ku iyokoyu do tanak dot ogumu’. Om nunu nopo i nakabatos ku dot id dokoyu nga’ bayaanon ngai’ ku i’. ¹⁰ Om ogumu’ tomod nondo o tomot dokoyu gisom do koromut do sontoun. Om gisom do taamon pondo dokoyu i noolu’ di nomot dit id gulu om haro i’ o poiyanan di wagu koomot. ¹¹ Om mundorong oku indo dot id pogialatan dokoyu do hiri’d Kiim ku dit Olidang, om a’ ku indo kopio iyokoyu tongkiadan. ¹² Moyo-woyo’ oku indo kasai’ dokoyu; om osiliu oku do Kinorohingan dokoyu, om iyokoyu nga’ osiliu nondo do tulun ku. ¹³ Iyoho’ no i TUHAN, i Kinorohingan dokoyu, o pinoposoliwan dokoyu do mantad hilo’d Masir om a’ kou noddi osiliu’d turipon. Noidu’ ku no i kuasa’ di monginggorit dokoyu om nosiliu ku no iyokoyu’d tulun dit a’ porintaon do bansa’d suwai,’’ ka dau. ¹⁴ Om boros kad TUHAN, ’’Ondung a’ kou tumanud do ponuhuan ku, om ohukuman kou no. ¹⁵ Ondung a’ kou tumanud dit oturan ku om i boros ku, om mamaraag kou no di tumpongo di winonsoi ku dot id dokoyu, ¹⁶ om hukuman ku no iyokoyu. Porikatan ku nondo iyokoyu do kosusaan — toruol om sogiton dit a’ milo’d lingoson, gisom dot obolou o mato dokoyu, om oinggorit o koposi-posion dokoyu. Momutanom kou piya nga’ a’ kou i’ kaakan di tua’ di tinanom dokoyu, tu’ rumikot nondo i pisangod do mongoi pangala’ dokoyu om mangayi’ di natanom-tanom dokoyu. ¹⁷ Om saapon ku nondo iyokoyu gisom dot aala’ kou. Om iri nondo tulun dit araatan dokoyu o momorinta’ dokoyu. Om adalaan kou nondo kopio’d moddosi gisom do manangkus kou’d mogidu’ dot aiso’ piya o momogusa’ dokoyu. ¹⁸ Ondung a’ kou mumboyo’ doho’ do kopuriman kou piya ngai’ddi, om ruhangan ku pondo o hukuman dokoyu dot inturu’ kopiluap ko’ i gulu. ¹⁹ Adalaan no daa kopio kasawat o ginawo dokoyu, nga’ poinsiribaon ku indo iyokoyu. Aiso’ nondo o rasam do sumondot, om tumuu pondo om kumodou do miagal do watu o tana’ dokoyu. ²⁰ Aiso’ nopondo o kootuk-otukon do huyan dokoyu, tu’ a’ i’ haro o sumuni do hiri’d tana’ dokoyu, om a’ mongua’ o kouwaan dokoyu. ²¹ Ondung sumurilog kasai’ kou om a’ kou mumboyo’ doho’, om ruhangan ku pondo o hukuman dokoyu do gisom dot inturu’ kopiluap ko’ i gulu. ²² Porikoton ku nondo i nintorusan dit ongorongit dot id pogialatan dokoyu. Om iri nondo nintorusan diri o mimpatai di tangaanak dokoyu, om i tayam-tayam dokoyu, om mangayi’ dokoyu gisom dot okuri’ kou nondo, om ongoingou pondo i karalan-ralanan dot id pomogunan dokoyu. ²³ Ondung a’ kasai’ kou mumboyo’ doho’, do kopuriman kou piya ngai’ di pomohukum diri, suwai ko’ sumaap kou nogi’, ²⁴ om saapon ku no iyokoyu om hukuman ku dot inturu’ kopiluap o kawagato’ ko’ mantad dit id gulu. ²⁵ Om porikot oku nondod pisangadan dot id dokoyu do pomohukum ku dokoyu tu’ nokotolibamban kou no di tumpongo toko’. Om tontok nopondo di tumimung kou dot id bandar dokoyu do mongoi daa intirung, om porikatan ku po iyokoyu’d toruol dit a’ milo’d lingoson, gisom dot a’ nondo milo dot a’ kou tumahak dot id pisangod dokoyu. ²⁶ Om ooiyan kou nondo do taakanon gisom dot iso’ poo o pagansakan do roti do pakayon do hopod o tongoondu’, tu’ iri po o haro dot id diyolo’. Om toini-inion nondo i taakanon. Om aayi’ piya dokoyu i taakanon nga’ louson kasai’ kou po. ²⁷ Ondung sumaap kasai’ kou om a’ kou mumboyo’ doho’ do kopuriman kou piya do koinsanai’ddi, ²⁸ om tumogod oku nondo kopio om saapon ku iyokoyu. Om hukuman ku iyokoyu dot inturu’ kopiluap o kawagato’ ko’ mantad dit id gulu. ²⁹ Om adalaan kou nondo kopio’d louson gisom dot iri piya tangaanak dokoyu nga’ kanon i’ dokoyu. ³⁰ Om raagon ku nondo i tiyonon dokoyu’d modsubak di hilo’d timpak do konulu-nuluan, om habaon ngai’ ku i mija’ do podtutudan dokoyu’d kominyan, om pataamon ku nondo o rata’ dokoyu dot id tingolig dokoyu di nangahaba’ddi. Om araatan oku nondo kopio, ³¹ gisom do silihon ku’d pogun i kabandaran dokoyu, om raagon ku i tiyonon dokoyu’d modsubak, om a’ ku romiton i porsombahan dokoyu. ³² Om raagon ku nopondo kopio i pomogunan dokoyu, gisom dot ongkotigowo i pisangod di sumowoli’d miyon do hiri do kokito di kinaraagan. ³³ Porikatan ku nondod pisangadan o hiri’d pomogunan dokoyu, om potompiason ku iyokoyu dot id piro-piro o pomogunan do bansa’d suwai. Om kologos tomod nopondo i tumo dokoyu, om ongosiliu’d pogun i kabandaran dokoyu. ³⁴ - ³⁵ Om tontok nondoddi do koundorong kopio i tana’ dokoyu dit a’ daa dokoyu uhang do poundorong-dorongon do buaton. Om daamot nopondo dokoyu do hilo’d dombokon, i hilo’d pomogunan do pisangod dokoyu, om poillogos tomod nopondo i tana’ dokoyu. Om tontok nondo’ddi do koundorong do buaton i tana’ dokoyu. ³⁶ Om padalaan ku nondo iyokoyu do momorolosi, iyokoyu it atanggayan dot id pomogunan do bansa’d suwai, gisom dot iri piya kohus do roun dit awayaan do ribut nga’ papatangkus i’ dokoyu do mogidu’. Om manangkus kou nondod mogidu’ do miagal pod gusa-gusaon kou dot id suang do pisangadan. Om ohunduk kou indo do tontok piya dit aiso’ o pisangod dot id sorili’ dokoyu. ³⁷ Om kopogitatahub kou nopondo dot ouru’d manangkus do mogidu’, dot aiso’ piya o momogusa’. Om a’ kou no kogoos do sumaap dot isai nopo o pisangod. ³⁸ Om apatai kou nondo do hilo’d pomogunan di pinananggayan di pisangod dokoyu, om aakan kou di tana’ di pisangod dokoyu. ³⁹ Om iri nopondo it okuri’ no dokoyu, i noolu-olu’ do poingiyon do hilo’d pomogunan do pisangod dokoyu, om monorimo-rimo pod tumongob dot i dusa dokoyu om i dusa di komolohingan dokoyu o kobungou. ⁴⁰ Nga’ okunon indo di sinakagon dokoyu i dusa diyolo’ om i dusa di komolohingan diyolo’, i nokowonsoi’d dusa tu’ suminaap i’ doho’. Suminurilog iyolo’ doho’, ⁴¹ gisom dot a’ oku noddi milo dot a’ sumaap diyolo’ om moguyung diyolo’, om gowoi poddi om natanggayan iyolo’ di pisangod diyolo’ do hilo’d pomogunan di pisangod diyolo’. Om id tohuri nopondo, di koinsiriba’ om kopuriman do hukuman di dusa om i kosurilogo’ diyolo’ i sinakagon diyolo’, ⁴² om sorohon ku indo i tumpongo ku dot id di Yakub, om id di Isak, om id di Abraham. Om inwoguan ku indo i batos ku do papatahak di tana’ddi dot id tulun ku. ⁴³ Nga’ id gulu po kopio om mositi’ nod ongkopoggidu’ ngai’ po i tulun do mantad id pomogunan diri, om koundorong i’ kopio’d buaton i tana’. Om mositi’ nod opurimanan ngai’ di tulun ku o koinsanai di hukuman do porikoton ku dot id diyolo’, tu’ a’ i’ iyolo’ tuminanud dit oturan om i ponuhuan ku. ⁴⁴ Nga’ tontok nopo di poundorong iyolo’ do hilo’d pomogunan do pisangod diyolo’, om a’ ku i’ iyolo’ tongkiadan kopio, om a’ ku iyolo’ punsoon. Tu’ ondung punsoon ku iyolo’ nga’ iyoho’ no o kapamaraag di tumpongo ku dit ogirot dot id diyolo’, om TUHAN oku i’ om Kinorohingan oku diyolo’. ⁴⁵ Om inwoguan ku nondo i tumpongo ku dot id komolohingan diyolo’ do tontok di pinopointalang oku do kuasa’ ku dot id koinsanai’d bansa’ dot i pinoposoliwan oku di tulun ku do mantad hilo’d Masir o kinopointalangan ku; om osiliu oku indo, iyoho’ i TUHAN, do Kinorohingan diyolo’,’’ ka dau. ⁴⁶ Om iri no ngai’ ot oturan om ponuhuan di pinatahak do TUHAN dot id di Musa, di hilo’d Nuluhon do Sinai, do patahakon dot id tulun dot Israil.

¹ Om patahako’ nod TUHAN dot id di Musa ² iti piro-piro ot oturan do patahakon dot id tulun dot Israil, ’’Soira’ nopod katahak dot id TUHAN ot iso’ o tulun do maan do pamayaan do batos, om milo i’ do polobuson o tulun diri ondung mambayar nod tusin dot irad diti, ³ - ⁷ do tumanud di gatang di natantu’ mantad: — Kusai nopo dit id piolitan do duwo nohopod o toun om onom nohopod o toun, om limo nohopod o tusin do pirok do pambayar. — tondu’ nopo di nosukod no om tolu nohopod o tusin do pirok do pambayar. — tanak nopod kusai dit id piolitan do limo o toun om duwo nohopod o toun, om duwo nohopod o tusin do pirok o pambayar. — tanak nopod tondu’ om hopod o tusin do pirok do pambayar. — tanak nopod kusai dit id siriba’ do limo o toun do tumur om limo o tusin do pirok do pambayar. — tanak nopod tondu’ dit okoro’ po om tolu o tusin do pirok do pambayar. — kusai nopo dit id sawat ko’ onom nohopod o toun do tumur om hopod om limo o tusin do pambayar. — tondu’ nopo dit id sawat ko’ onom nohopod o toun do tumur om hopod o tusin do pirok do pambayar. ⁸ Ondung adalaan kopio komosikin i tulun di minamatos diri gisom dot a’ iyau kabayar di gatang di natantu’ mantad, om mositi’ nod ngoyon dau pootodo’ i tulun di pinatahak dot id TUHAN diri dot id imam. Om tontuon nondo dit imam o gatang dit omura, do tumanud dit asaapan do tulun diri. ⁹ - ¹⁰ Ondung pasal do nintorusan dit a’ sosomu’, i koino-ino’d maan do porsombahan dot id TUHAN i pinabatos, om a’ no di tulun di minamatos koino-ino do tingalanan iri do nintorusan do suwai. Tu’ koinsanai di porsombahan do patahakon dot id TUHAN om olidang no. Nga’ ondung tingalanan daa dau iri, om don TUHAN goduwo no di nintorusan diri. ¹¹ Nga’ ondung pasal do nintorusan di sosomu’ i pinabatos, i nintorusan dit a’ milo’d romiton do maan do porsombahan dot id TUHAN, om mositi’ nod pootodon di tulun di minamatos o nintorusan diri dot id imam. ¹² Om tontuon nondo dit imam o gatang di nintorusan diri do tumanud do koinan-inano’ di nintorusan. Om a’ no koino-ino do pingkurangan i gatang di pinatantu’. ¹³ Ondung bolion kawagu di tulun i nintorusan diri, om mositi’ nod bayaran dau i gatang om ruhangan pod induwo i sompihopod. ¹⁴ Ondung haro o tulun do papatahak do walai dau dot id TUHAN, om tontuon nondo dit imam o gatang di walai do tumanud do kosonong-sonongo’ di walai. Om a’ no milo do pingkurangan i gatang di pinatantu’. ¹⁵ Ondung bolion kawagu di tulun di pinapatahak di walai, i walai’ddi, om mositi’ nod bayaran dau i gatang om ruhangan po dot induwo i sompihopod. ¹⁶ Ondung haro o tulun do papatahak do songkoiyonon di tana’ dau dot id TUHAN, om mositi’ nod tontuon i gatang do tumanud do kogumuon do tonomon di pananom do tana’ddi. Om gatang nopod pointikid-tikid do 20 kilogram do barli do tonomon om hopod o tusin do pirok. ¹⁷ Ondung patahakon dau i tana’ do dongkolimponusan do Toun di Kopogulian, om mositi’ nod bayaran ngai’ i gatang. ¹⁸ Ondung patahakon i tana’ do piro-piro toun dot id tohuri ko’ iri, om mositi’ nod tontuon dit imam o gatang diri do tumanud do kogumuo’d toun di noolu’ do gisom dot orikot i Toun do Kopogulian dit id dosunsudan, om tontuon nondo dau o gatang di poimura-mura. ¹⁹ Ondung bolion kawagu di tulun di pinapatahak di tumo, i tumo’ddi, om mositi’ nod bayaran dau i gatang om ruhangan pod induwo i sompihopod. ²⁰ Om ondung pobolion dau i tumo’ddi dot a’ po dau abayaran dot id TUHAN, om a’ no iyau koino-ino do momoli kawagu di tana’ddi. ²¹ Om Toun nopondod Kopogulian dit id dabantalan, om asanganu kasai’ nondod TUHAN i tumo’ddi do gisom dot alaid, om patahakon nondo iri dot id tongoimam. ²² Ondung haro o tulun do papatahak dot id TUHAN do songkoiyonon o tumo di binoli dau, ²³ om tontuon nondo dit imam o gatang diri do tumanud do kogumuo’d toun di noolu’ do gisom dot orikot i Toun do Kopogulian dit id dosunsudan. Om mositi’ nod bayaran di tulun o gatang di natantu’ddi do tontok do tadau’ddi. Om TUHAN no o kasanganu di tusin diri. ²⁴ Om tontok nopondo di Toun do Kopogulian om mositi’ nod pogulion i tumo’ddi dot id tulun di sanganu mantad ko’ id sinakagon po dau. ²⁵ Om mositi’ nod tontuon i gatang do tumanud di pamagatang di natantu’ mantad. ²⁶ Iri nopo tayam-tayam dit id gulu kosusu om don TUHAN no, om iso’ pod tulun nga’ aiso’ no o koino-ino do papatahak diri dot id TUHAN do maan do porsombahan do tumanud do kagaanan do ginawo. Iri nopo tanak do sapi’, om i tanak do dumba’, ko’ i tanak do kambing dit id gulu kosusu om don TUHAN ngai’ no. ²⁷ Om iri nopo nintorusan do sosomu’ dit id gulu kosusu om milo i’ do bolion kawagu do tumanud di pamagatang di natantu’ mantad, nga’ ruhangan po dot induwo i sompihopod. Ondung a’ bolion kawagu, om koino-ino i’ do pobolion dot id tulun do suwai do tumanud di gatang di natantu’ mantad. ²⁸ Iso’ pod tulun nga’ aiso’ i’ o koino-ino do padagang ko’ momoli kawagu do nunu nopo i pinatahak dau dot id TUHAN dit aiso’ o pinaantakan, do tulun tuu iri ko’ nintorusan ko’ tana’. Tu’ TUHAN no o sanganu’ddi do gisom dot alaid. ²⁹ Tulun piya di pinatahak dot id TUHAN do maan patayo’ nga’ a’ no koino-ino do bolion kawagu, suwai ko’ mositi’ nod patayon. ³⁰ Sompihopod nopod nunu nopo o tua’ do totonomon, do gandum tuu ko’ tua-ua’, nga’ don TUHAN ngai’ no. ³¹ Ondung haro o tulun dot orohian do momoli kawagu’d wookon diri, om mositi’ nod bayaran dau i gatang di natantu’ mantad, om ruhangan pod induwo i sompihopod. ³² Iso’ nopod mantad do hopod o tayam-tayam om don TUHAN no. Ondung intobon i tayam-tayam, om pointikid-tikid di kohopod, om mositi’ nod don TUHAN noddi. ³³ Nga’ a’ i’ koino-ino do maan di sanganu sompipio’ i tayam-tayam gisom dot iri ngai’ pondo it angara-raat no ot opili’. Om a’ nogi’ koino-ino do poolonon dau i tayam-tayam di nopili’ddi. Ondung poolonon dau i tayam-tayam diri do tayam-tayam do suwai om mositi’ nod patahakon goduwo nopo i tayam-tayam diri dot id TUHAN, om a’ no koino-ino’d bolion kawagu,’’ ka dau. ³⁴ Om iri no ngai’ o boros do TUHAN do pinoboros dau dot id di Musa di hilo’d Nuluhon do Sinai do polombuson dot id tulun dot Israil.