KOIHADAN

KOIHADAN

¹ Oingou noddi o Yorusalim do baino’, i bandar di noponu’ daa’d tulun di gulu po. Abantug tomod daa iyau dot id pogialatan do bansa’, nga’ miagal poddi iyau do tondu’ di nopuadan do baino’. I bandar do poinggoyoon daa di gulu po, nga’ porintaon noddi do bansa’d suwai do baino’. ² Monuaban nopo iyau do mihad; lumuyung po o romou dau dot id pingas dau. Aiso’ no o tiso’ di tambalut kopio dau di gulu po do monginsasamod dau. Naakalan iyau di tongotambalut dau, om oinsanan nopoddi iyolo’ do sumaap dau do baino’. ³ Oinggorit tomod diri i tulun do Yohuda; sinansagan iyolo’ do tumongkiad do pomogunan diyolo’, om nosiliu diri iyolo’d turipon. Hilo’d pomogunan do suwai o tiyonon diyolo’, om aiso’ no o kinoiyonon di milo diyolo’d roitan do tiyonon kopio diyolo’. Om notutukan po iyolo’d pisangod, om aiso’ no o pokukurayan diyolo’. ⁴ Aiso’ noddi o mongoi do hilo’d Walai’d Sasambayangan dot Agayo do tontok do tadau dot agayo. Oinggorit po ngai’ i tongoondu’ di modsisinding do hilo’, om mingodoi ngai’ po i tulun dit imam. Aiso’ no o tulun do sampanau-panau do hilo’d wawayaan do bandar, om tumongob po tomod o Bandar do Sion. ⁵ Nakamanang i pisangod dau; tu’ nokosuang no iyau dot id kuasa’ diyolo’. Ninggorit iyau’d TUHAN tu’ ogumu’ no kopio i dusa dau. Nangatangkap i tulun do hilo’, om nangatanggayan do pisangod. ⁶ Susui-susui poo i kobontugo’ do bandar do Yorusalim. Om miagal pod paus di mogidu’ do mantad id magagasu, i piro-piro o boyoon diyolo’ di louson no om it a’ no kogoos. ⁷ Osorou do Yorusalim i maso di notoliban, tontok dit ogumu’ po o dapu’ dau nga’ karaag noddi iyau om oinggorit diri. Tontok di naratu’ iyau dot id longon do pisangod, om aiso’ i’ o tongoiso piya’d tulun do minongoi ponulung dau; om mingirak po i pisangod do kokito do naraag iyau. ⁸ Sinosomu’ do Yorusalim o tinan dau, tu’ minomonsoi i’ iyau do dusa dit araat kopio. Om poillabas poddi iyau do baino’ om intingayamon; nangatanus ngai’ no o kagayaan dau. Mingodoi po iyau, tu’ ointingayaman no kopio iyau. ⁹ Atalang tomod i kososomuo’ dau, nga’ a’ i’ iyau momusorou di kootuson dau. Om araat tomod diri i kinaraagan dau, nga’ iso’ pod tulun nga’ aiso’ i’ o monginsasamod dau. Nakamanang i pisangod dau, om mihad poddi iyau do mokiinsian do TUHAN. ¹⁰ Nahawan iyau di pisangod dau do koinsanai di dapu’ dau; om nokito dau iyolo’ do suminuang di Walai’d Sasambayangan dot Agayo; mulong piya daa do pogoduhan do TUHAN o tulun dot okon ko’ tulun do songonuon do TUHAN do sumuang do hiri. ¹¹ Mingodoi po i tulun dau do mogihum do kaakan-akanan; om poolonon nopo diyolo’ i dapu’ diyolo’ do taakanon, om a’ i’ iyolo’ apatai. Mihad poo o Yorusalim do moro-boros do poingkaa, ’’Oi TUHAN, antangai ngai’ no iti koinggoritan ku. ¹² Oi tongoulun di tumalib do hilo’d ralan, ontong no om antangan no kopio. Aiso’ po nokoumbal do kitoruol do miagal diti doho’, i toruol di pinorikot do TUHAN dot id doho’ do maso dit otogod iyau. ¹³ Pinoporikot iyau do tapui do mantad hilo’d tawan, i minonorob do tulang ku do gisom dot oruol no kopio. Pinapataan iyau do lawa’ dot id dabantalan ku i pinaparatu’ doho’. Om tongkiadai oku noddi dau do hiri dot a’ otingkod-tingkod dot oinggorit. ¹⁴ Nanu dau o koinsanai di dusa ku, om pogiwongkos-wongkoso’ noddi dau dot iso’ o kinawangkasan, om pokoroo’ no dau iri dot id liou ku, om olomok oku noddi dot awagatan. Pinatahak oku’d TUHAN dot id pisangod ku, om aiso’ no o milo ku’d pokukurayan do sumaap diyolo’. ¹⁵ Pinoinsiriba’ do TUHAN o koinsanai di gunsiou ku dit ongokoris. Pinoporikot iyau do soudor do mamatai di tangaanakwagu ku. Nulakan dau i tulun ku do gisom do nomumuk, do miagal di tua’ dot anggur do pagaon di tulun di mamamaga’. ¹⁶ Iri noddi o nokobungou do romou ku do moninuru’, aiso’ no o koinsasamod doho’, om aiso’ o mongodsuur doho’. Naala’ oku no di pisangod ku, om aiso’ no o nunu-nunu do noolu’ dot id tulun ku. ¹⁷ Poinsawato’ ku no o longon ku do mokiuhup, nga’ aiso’ i’ o monginsasamod doho’. Nolohou nod TUHAN o pisangod do sumaap doho’ do mantad id posorili’ ku; om iyoon oku pod rinomos, om i noutong no dot id pogialatan diyolo’. ¹⁸ Nga’ otopot i’ o TUHAN, tu’ a’ ku i’ numboyo’ i ponuhuan dau. Pokinongou no doho’, oi koinsanai’d bansa’! Ontong kou no doho’ dot id koinggoritan. Nangatangkap no om nangatanggayan do pisangod i tangaanakwagu ku om i kosumandakan ku. ¹⁹ Minomolohou oku di kongoombolutan ku nga’ minada’ i’ iyolo’ do monulung doho’. Minatai ngai’ do hilo’d karalan-ralanan do bandar i tulun dit imam om i boyoon do bansa’ do daamot diyolo’ do mingihum do takanon do pongoput daa do pinuhobo diyolo’. ²⁰ Antangai oku no, oi TUHAN, mihad oku po om tumongob oku, om norualan o ginawo ku do gama’ di dusa ku. Mogipapatai poo o hilo’d karalan-ralanan, om id suang piya do walai nga’ haro i’ o kapatayon. ²¹ Pokinongoho’ no iti todoi ku, oi TUHAN, aiso’ no o koinsasamod doho’. Otood tomod i piro-piro o pisangod ku tu’ pinorikatan oku i’ diya’ do kosusaan. Porikoto’ no i tadau di nakabatos nu; inggorito’ no i pisangod ku do miagal doho’. ²² Antangai ngai’ no i kararaat diyolo’, hukuman no iyolo’ do miagal di pinomohukum nu doho’, dot i dusa do winonsoi ku dot id diya’ o kinopomohukuman nu doho’. Mingodoi oku po dot id suang do koinggoritan, tumongob oku po om aiso’ o pokukurayan ku,’’ ka dau.

¹ Kinuluputan do TUHAN do totuong o Sion, tu’ atatagadan no iyau. Pinataam dau do hiti’d pomogunan i kobontugo’ dot Israil dit iyo pod tawan kasawat. Om iri piya walai dau do hilo’d Sion nga’ a’ nod TUHAN pinusou do tontok dit otogod kopio iyau. ² Aiso’ no o kosianan do TUHAN do miningraag do kawalayan do hilo’d Yohuda. Om hinaba’ dau i kuta’ do pogintirungan di mongintirung daa di pomogunan diri do gisom do naraag. Pinaratu’ dau o pomorintaan om i piro-piro o boyoon do hiri do gisom do nointingayam iyolo’. ³ Nidu’ dau i kinoris dot Israil, tu’ atatagadan no kopio iyau. Om minada’ iyau do monulung dati’ do tontok di sinangod toko’ do pisangod. Tuminogod o TUHAN dati’ do miagal pod tapui, do mamaraag do koinsanai’d nunu nopo. ⁴ Pinotuduk dau i pana’ dau dot id dati’ do miagal po iyau’d pisangod; pinatai dau o koinsanai’d tulun di kasanangan kopio toko’. Om hiti nod Yorusalim do nopurimanan toko’ o kototogod dau di kosorob o kolosuo’. ⁵ Miagal pod pisangod o TUHAN; do minomobog dot Israil. Om rinaag ngai’ dau i kuta’ do pogintirungan om i walai do raja’, om pinorikatan dau i tulun do Yohuda do katangaban dit a’ opupus-pupusan. ⁶ Minumuk dau i Walai’d Sasambayangan dot Agayo i tiyonon toko’ do sumambayang dot id dau; pinolihu dau o tulun do tadau’d Sabat om i piro-piro o tadau dot agayo. Om a’ nod TUHAN pusohon ot imam om raja’ tu’ otogod no kopio iyau. ⁷ Niada’ do TUHAN i porsombahan do sinumbali’ do hiri’d pananaraban do porsombahan dit olidang, om tinongkiadan dau i Walai’d Sasambayangan dot Agayo. Om pinologos dau i pisangod do minamaraag di tolig. Om mimpangkis po i pisangod do nakamanang do hirid kinoiyonon toko’ do sumambayang do mikuwo’d osimbayan di gulu po. ⁸ Natantu’ mantad nod TUHAN do habaon nondo i tolig do Sion; om notipong no dau i tolig do mongilo kopio om aayi’ i’ iri do momoromumuk. Om nosiliu poddi do pogun i walai’d akawas om i tolig do baino’. ⁹ Nongoolitan ngai’ pod tana’ i totobon, om i salampad nga’ nongotipu’; om hilo’ noddid pomogunan do pisangod i raja’ om i tulun di kipangkat. A’ noddi potudukon i Tourat do TUHAN, om aiso’ o pinointalang do mantad id TUHAN dot aanu di piro-piro o nabi. ¹⁰ Aiso’ no komi di molohing-lohingon do hiri’d bandar do Yorusalim do songirikau do hiri’d tana’, om popingarab po iyolo’ do pupuk do hiri’d tulu diyolo’ om karung o pakayan diyolo’ do popointalang do tumongob iyolo’. Iri piya kosumandakan nga’ songintungub po do hiri’d tana’. ¹¹ Obongkung-bongkung po o mato ku dot ouru’d mihad dot aiso’ o kotingkadan, om tumongob tomod oku. Tumongob tomod oku po do kokito do kinaraagan di bansa’, sanghadan-hadan po o tangaanak om i ragang po do hilo’d karalan-ralanan do hilo’d bandar. ¹² Mingihad po iyolo’ do minglohou di tina’ diyolo’ do mokianu’d taakanon. Koiliu tomod nopo iyolo’ do hiri’d karalan-ralanan do miagal pod tulun di nosuhat; om monguyat indo do matai do poingkibit di tina’ diyolo’. ¹³ Oi Yorusalim, oi Yorusalim i koupusan ku, nunu po o milo ku’d poboroson? Poingkuro oku pod monginsasamod diya’? Aiso’ i’ o nokoumbal do noinggorit do miagal diti. Irad pod rahat kagayo o suhat nu, aiso’ no o soro-sorohon nu dot id dosunsudan. ¹⁴ Aiso’ no o poboroson di piro-piro o nabi do boros nu do suwai ko’ tudut; minonipu’ diya’ i ponunuduk diyolo’ tu’ a’ i’ popoimbulai do dusa nu. Sinuhu’ ko diyolo’ do momusorou dot a’ ko i’ minog do rumologo. ¹⁵ Mongirak-irak ngai’ po om momohingi-hingi diya’ i tulun di santalib-talib. Tu’ naraag no kopio o pointongkop do Yorusalim. Boros ka diyolo’, ’’Ilo’ toi i bandar dot olumis kopio’ddi? Ilo’ toi i bandar do kaandasan do pomogunan?’’ ka no diyolo’. ¹⁶ Momohingi-hingi ngai’ nopo diya’ i pisangod nu, om mulondou tomod o mato dot araatan diya’. Boros ka diyolo’, ’’Naraag noddi dahai i bandar! Nokorikot noddi i maso di piandad-andad dahai!’’ ka. ¹⁷ Nabayaan no kopio’d TUHAN i natantu’ mantad dau do wonsoyon dau i pinosunud dau dot id dati’ di gulu po. Aiso’ no o kosianan dau do minamaraag dati’, nonuan dau do kamanangan i pisangod toko’, om nonuan dau iyolo’d kaarapadan do nokokito di kinaalaan toko’. ¹⁸ Oi tolig do Yorusalim, pomolohou nod TUHAN! Poluyungon o romou nu do miagal do bawang di lumuyung do tadau om totuong. Pagayi-ayi’ nopo do mihad, kada’ tingkod do gisom dot ohuyan o tinan nu! ¹⁹ Pitungag-tungag no do lumohou’d TUHAN do mokiinsian dau do gisom dot osuaban; om poboroso’ ngai’ nopo ot id suang do ginawo nu, om pokionuo’ no kopio dau do monginsian di tangaanak nu di louson, tu’ pointikid nopod linsuk do ralan dot ahadan i tangaanak dot ololousanan! ²⁰ Oi TUHAN, antangai no it inggoriton nu! Kanon diri di tongoondu’ i tangaanak di kolisihan diyolo’! Om pimpatayan it imam om i piro-piro o nabi do hiri’d suang di Walai’d Sasambayangan dot Agayo. ²¹ Songingiliu poo i tongomulok po om i kongomolohingan do napatai do hiri’d karalan-ralanan, tangaanakwagu om tongoondu’ nga’ nangapatai di gayang do pisangod. Aiso’ no o kosianan nu do minonumbali’ diyolo’, do tontok di tadau do tuminogod ko. ²² Nalap nu i pisangod ku do papaharo do poginakanan di noponu’d kororongit, om aiso’ no tiso’ do kopoggidu’ do mantad id hukuman nu do tontok di tadau dot otogod ko. Pinatai diyolo’ i tangaanak ku di ginompi’ ku om kosianan ku.

¹ Iyoho’ no o tulun di nokopuriman do koinggoritan. Tu’ hinukuman oku’d Kinorohingan. ² Modu-sodu’ nopo o ponguyungan dau doho’ dot id totuong dit odondom o kotuongo’. ³ Pinimbabagan oku dau, om aiso’ no o kosianan dau do tikoompus do tadau. ⁴ Nadalaan po tomod do suhat o tinan ku, om nongotipu’ o tulang ku. ⁵ Kinuluputan oku dau do katangaban om kosusaan. ⁶ Sinansagan oku dau do miyon do hiri’d totuong, do miagal poddi tulun di laid no kapatai. ⁷ Aiso’ no o ralan ku do lumabus, tu’ kinagasan oku dau’d rantai. ⁸ Mininglohou oku do mokitulung nga’ a’ i’ do Kinorohingan pinokinongou i sambayang ku. ⁹ Mikorobibi’ oku pod mamanau, tu’ kiwatu o wayaan ku, om hinonggo nopo o ngoyon ku nga’ hiri no o tolig do poingantob. ¹⁰ Miagal po iyau di bohuang do magawang doho’; om miagal iyau di singa do madtalob doho’. ¹¹ Ginusa’ oku dau om pinasala’ oku di ralan kopio, om pogitobilang-bilango’ oku nogiddi om iduwai oku no dau. ¹² Linanat dau i pana’ dau om iyoho’ o siniliu do papanaan di pana’ dau. ¹³ Kolopuson nopo di pana’ dau o tinan ku, om notobok o tundu-undu’ ku. ¹⁴ Monongodou-ngodou po o tulun do momohingi-hingi doho’; maan oku po diyolo’d tiirak-irak. ¹⁵ Iri poo it opoit o pinatahak dau doho’ do maan ku dot akanon om inumon. ¹⁶ Pinoisis dau o rabas ku do hilo’d tana’, om pinarangop oku dau dot id kowotuan gisom do notipu’ o nipon ku. ¹⁷ Alaid oku no dot a’ osimbayan; nolihuan ku no ondung okuro-kuro o kosimbayanan. ¹⁸ Aiso’ no o kobontugo’ ku; om natanus o pogogondos ku dot id TUHAN. ¹⁹ Kosorou oku nopo di toruol ku om it aiso’ o tulion ku; om miagal oku pod mangakan dot opoit di kawanit. ²⁰ Osorou kasai’ ku nopoti, om gisom do tumongob tomod oku po. ²¹ Nga’ koguli’ indo o pagandasan ku do kosorou oku do hal diti: ²² Iri nopo kosianan om kolisihan do TUHAN om mompus-ompus i’ kasai’. ²³ Tu’ wagu kasai’ nopori do monikid kosuabon, kotorodoko’ nopod TUHAN om miagal di tadau di mulai do dongkosuabon. ²⁴ TUHAN poo o haro dot id doho’, om iyau no o pagandasan ku. ²⁵ Osonong i’ o TUHAN dot id tulun di mogondos dau, om id tulun di mogihum dau. ²⁶ Om polonuto’ nopo o ginawo do magandad do gisom do korikot o TUHAN do mongoi ponguhup dati’. ²⁷ Om osonong no kopio do minsingilo do palanut do ginawo do maso pod omulok. ²⁸ Tontok dot onuan toko’d TUHAN do koinggoritan, om kumadada’ toko’ nopo do mirikau dot iyati-yati’ om polonuton toko’ o ginawo. ²⁹ Minsiriba’ toko’ nopo om mokisimoyo’ toko’, tu’ haro po doti’ o soro-sorohon toko’ dot id dosunsudan. ³⁰ Om mulong pod bobogon om indaraaton toko’ nga’ apatut nod romiton ngai’ toko’ nopori. ³¹ - ³² Mulong pod pologoson toko’d TUHAN dot oinggorit, nga’ a’ toko’ i’ dau iyadaan do gisom dot alaid. Tu’ TUHAN nopo om obinglisiu i’ om ogirot o kosianan dau om aiso’ o kopupuson. ³³ A’ i’ iyau asanangan do popologos dati’ dot oinggorit om tumongob. ³⁴ Oilaan id TUHAN dot iyo dit oonsitan o ginawo toko’ dot id giil, ³⁵ om oilaan i’ dau dot a’ toko’ nonuan dit apatut toko’ dot aanu di patahakon daa’d TUHAN, ³⁶ om oilaan i’ dau do somputulon it otulid dot id kut, om mamadul i’ iyau dati’. ³⁷ Owonsoi kasai’ nopo om abayaan i korohian do TUHAN. ³⁸ Owonsoi goduwo nopo it osonong om it araat ondung ponuhuan do TUHAN dot owonsoi o miagal diri. ³⁹ Nokuro daa tu’ moguhang toko’, ondung i dusa toko’ o kinopomohukuman dati’? ⁴⁰ Sorisido’ toko’ no kopio o kowoyo-woyoo’ toko’ om gumuli’ i’ dot id TUHAN. ⁴¹ Poukabo’ toko’ no o ginawo toko’ dot id Kinorohingan di hilo’d surga, om sumambayang i’ do poingkaa, ⁴² ’’Nokowonsoi no iyahai’d dusa om suminaap iyahai diya’ oi TUHAN, om a’ po iyahai diya’ noompunan. ⁴³ Ginusa’ nu iyahai om pinatai nu iyahai; notirung di kototogod nu i kosianan nu. ⁴⁴ Iyo po di haun dit akapal kopio o kototogod nu gisom dot a’ no olopuson do sambayang dahai. ⁴⁵ Siniliu nu po iyahai do rinomos dot id pagantangan do toinsanan diti pomogunan. ⁴⁶ Nindaraat iyahai om hiningi-hingi di pisangod dahai. ⁴⁷ Noontok iyahai’d kosusaan om karaagan, om id koligagaanan po om kopoddosian o tiyonon dahai. ⁴⁸ Lumuyung po o romou ku, tu’ noontok i’ do karaagan o tulun ku. ⁴⁹ Mihad oku nopondo dot aiso’ o kotingkadan, ⁵⁰ gisom do podulon iyahai’d TUHAN di hilo’d surga. ⁵¹ Tumongob tomod oku do kokito di nosiliu dot id tongoondu’ dot id bandar dahai. ⁵² Ginusa’ oku di pisangod ku do miagal do tombolog, om aiso’ i’ o paantakan dau do rumaatan doho’. ⁵³ Pinataam oku diyolo’ do hiri’d torobong, om dumpaho’ oku nogiddi do watu. ⁵⁴ Om malit no daa’ddi doho’ o waig, om osorou ku nopo nga’ matai oku no. ⁵⁵ Nga’ luminohou oku dot id diya’ oi TUHAN, do mantad hiri’d nanad di torobong dot aralom. ⁵⁶ Om soira’ di pinokianu kopio ku do mokinongou ko do lolohou ku om minokinongou ko iddi. ⁵⁷ Sinimbar oku i’ diya’ om sinunudan oku diya’ dot a’ minog do moddosi. ⁵⁸ Ruminikot ko i’, om nongoi oku diya’ polobuso’, oi TUHAN, om napasi oku iddi diya’. ⁵⁹ - ⁶⁰ Nokito nu i’ i karaaton do winonsoi dot id doho’, i pomusarahan dot araat di pisangod ku dit araatan doho’. Iyo nopoddi om obiai no i hal ku, oi TUHAN. ⁶¹ Norongou nu i’ iyolo’ do minongindaraat doho’, oi TUHAN, oilaan ngai’ nu i’ i pakat diyolo’ dot araat. ⁶² Monongodou-ngodou nopo iyolo’ do mimboros do pasal doho’ om mogiupakat iyolo’ do pakat dit araat, do momungou doho’. ⁶³ Mantad pod kosuabon om gisom do totuong do maan oku do tiirak-irak. ⁶⁴ Hukumai no iyolo’ do miontok di nowonsoi diyolo’, oi TUHAN. ⁶⁵ Papalai no iyolo’, pologoso’ no iyolo’ dot aiso’ o pokukurayan. ⁶⁶ Gusao’ no iyolo’ om patayo’ ngai’ no iyolo’ do gisom dot atanus iyolo’ do hiti’d pomogunan!’’ kangku.

¹ Nangatalup no i tamas di songkilou-kilou, om songinromos poo do hilo’d ralan i watu do pinomonsoi di Walai’d Sasambayangan dot Agayo. ² Miagal po daa do tamas dit agayo o gatang di tangaanakwagu do Sion di gulu po, nga’ baino’ nopoddi om iyoon po iyolo’d kuron di koubasanan. ³ Iri piya toni nga’ posusu i’ di tangaanak dau, nga’ tulun ku nopo om miagal pod tombolog dot unta do hilo’d kowotuan tu’ orongit dot id tangaanak dau. ⁴ Pologoson nopo diyolo’ dot apatai dot ololousanan om otutuuhanan i tangaanak diyolo’, om mingkianu po daa i tangaanak diyolo’ do takanon, nga’ aiso’ no o manahak diyolo’. ⁵ Iri piya tulun dit oubas do mangakan di taakanon dit osonong di gulu po, om it osimbayan o koposi-posion, nga’ mogihum poddi do taakanon do hiri’d kinotimungon do rinomos, om sampatai-patai poddi dot ololousanan do hilo’d karalan-ralanan. ⁶ Awaga-wagat po o nokoontok do hukuman dot id tulun ku ko’ mantad di tulun do hilo’d Sodom, tu’ nokirapan noo om karaag no iyolo’ di longon do Kinorohingan. ⁷ Iri nopo i piro-piro o boyoon dahai di gulu po om olidang i’ dot iyo poddi gapas dot opurak. Om okoris iyolo’ om osonong tomod o tinan. ⁸ Nga’ baino’ noddi om a’ no iyolo’ otutunan do songingiliu do hilo’d ralan, tu’ noitaman po o rabas diyolo’, om oitom po ko’ i tangud, om kulit diyolo’ nga’ miagal pod kayu kokoring om santaid-taid poo o kulit diyolo’. ⁹ Mogo-mogot nogi’ i nangapatai dot id pisangadan, ko’ i minatai dot ololousanan, tu’ alaid dot oinggorit tu’ aiso’ no kopio o takanon. ¹⁰ Awagat no kopio i kosusaan do nokoontok do tulun ku, tu’ iri ngai’ piya i tina’ dit obinsianan, nga’ minamalasu’ i’ di tangaanak diyolo’ do numaan kano’. ¹¹ Pinourabus ngai’ nod TUHAN i kototogod dau dot id Sion, i bandar dau, om sinorob dau do gisom do nouu do hiri’d tana’. ¹² Aiso’ i’ daa o tiso’d tulun do hiri’d pomogunan om aiso’ o raja’, di monongkuyaan do kosuang o pisangod do wawayaan do Yorusalim. ¹³ Nga’ nosiliu iddi o miagal diri tu’ nokowonsoi ngai’ id dusa i nabi om it imam. Minamatai iyolo’d tulun dit aiso’ o sala’. ¹⁴ Mininghombo do hiri’d karalan-ralanan i piro-piro o boyoon diyolo’, do miagal po di tulun do bolou, nga’ aiso’ no o tiso’ piya’d tulun do katama’ do mongoi kama’ diyolo’, tu’ naramasan po tomod do raha’ o pakayan diyolo’. ¹⁵ Boros ka di tongoulun, ’’Poggidu’ kou’d hiti, sosomu’ tomod kou! Kada’ kou kama’ dahai!’’ ka. Om minghombo nopoddi iyolo’ dot id piro-piro o bansa’, om aiso’ i’ o tiso’ di bansa’ dot orohian diyolo’. ¹⁶ A’ noddid TUHAN antangan piya i tulun dau, tu’ iyau i’ o pinopotompias diyolo’. Om a’ no pusohon i piro-piro ot imam, om a’ insianan i boyoon dahai. ¹⁷ Miontong daa iyahai, gisom dot opodi’ poo o mato dahai do miontong do monguhup dit a’ iddi ruminikot-rikot. Minogondos daa iyahai do ponguhup do mantad id iso’ o bansa’ dit a’ i’ milo’d monguhup. ¹⁸ Poingontong kasai’ nopo i pisangod, om a’ no iyahai milo do mimpanau do hiri’d ralan. Nokorikot noddi o kooyion do tumur dahai, nokorikot no i koompokon. ¹⁹ Osiau po i momogusa’ dahai ko’ mantad di kondiu do sumondot do mantad hilo’d tawan. Suhuton i’ iyahai diyolo’ do hilo’d konuluhanan om awangan iyahai do hilo’d tana’ do kowotuan. ²⁰ Tinangkap diyolo’ i raja’ do pinili’d TUHAN, i tulun di pinagandasan dahai do mongintirung dahai do mantad id koinsanai’d pisangod. Om i manahak dahai’d koposion. ²¹ Pingirak nopo, oi bansa’ dot Idom om Us; pokosonongo’ nopo o ginawo do dinondo poo. Tu’ rumikot i’ moti’ o dokoyu’d kosusaan; om iyokoyu nga’ mikorobibi’ pondo do poillabas om ointingayam tomod. ²² Noontok no o Sion do hukuman, dot i dusa di winonsoi dau o kinopomohukuman, nga’ baino’ noddi om a’ noddi iyahai’d TUHAN pologoson tomod, om a’ poongoyon dot id pomogunan do pisangod. Nga’ Idom nopo om hukuman indod TUHAN, om pointalangon dau o dusa dau.

¹ Soroho’ no, i nosiliu dot id dahai, oi TUHAN. Ontong no dahai, om antangai noti kointingayamo’ dahai. ² Nangaanu nod tulun do suwai i dapu’ di tungkusan dahai; om bansa’d suwai o poingiyon dot id walai dahai. ³ Nangapatai di pisangod i tapa’ dahai, om nongopuadan poddi o tina’ dahai, om aiso’ o tapa’ dahai. ⁴ Bolion i’ dahai o waig do tinumon dahai; om i kayu do maan dahai’d siduwon. ⁵ Iyo po iyahai do nintorusan, do sansagan do kumaraja’ dot awagat, ohuyan po tomod iyahai, nga’ a’ i’ onuan do maso’d mundorong. ⁶ Om minongoi’ddi iyahai pokianu-anu do takano’ do hilo’d Masir om hilo’d Asur, om a’ i’ iyahai louson. ⁷ Minomonsoi’d dusa i taki-aki dahai, nga’ a’ noddi iyolo’ hino do baino’, om iyahai’ddi ot oinggorit do gama’ di dusa diyolo’. ⁸ Tulun nopo di momorinta’ dahai’ nga’ a’ i’ poimogot ko’ i turipon, om aiso’ i’ o milo’d poidu’ dahai do mantad id kuasa’ diyolo’. ⁹ Gampamatai po o minghombo do hilo’d soliwan do bandar; om mongoi piya daa iyahai pogihum do taakanon nga’ haro i’ o koligagaanan dahai. ¹⁰ Sogiton po iyahai tu’ adalaan nod louson, om gisom do miagal pod sagang kalasu’ o tinan dahai. ¹¹ Nongoi kosoho’ i tongoondu’ do hilo’d Sion; om sinansagan i kongosumandakan do patahak do tinan diyolo’ do hilo’d kawalayan do Yohuda. ¹² Tinangkap om numaan giiso’ o koinsanai di boyoon dahai; om a’ noddi pusohon i kongomolohingan dahai. ¹³ Sinansagan i tangaanakwagu dahai do tumutu do gandum, om mikorobibi’ po i tangaanak do kusai dot angawagatan do kayu, om gisom dot ahadan. ¹⁴ A’ noddi tumimung do hilo’d wawayaan do bandar i kongomolohingan, om i kongomulakan nga’ a’ noddi popouni do tuunion. ¹⁵ Natagak no o kaarapadan dahai; katangaban po o suminowoli di pananari’ dahai. ¹⁶ Aiso’ no o noolu’ di kaandasan daa dahai. Nobungou iyahai tu’ minomonsoi i’ iyahai’d dusa. ¹⁷ Mihad po tomod o ginawo dahai, om osomok no dot a’ iyahai kokito dot otirung do romou dahai, ¹⁸ tu’ oingou no om nopogiiduan o Nuluhon do Sion, om tasu pod gouton o minghombo’d hilo’. ¹⁹ Nga’ iya’ nopo, oi TUHAN, om kikuasa’ i’ do gisom do poingompus, om momorinta’ do gisom dot alaid. ²⁰ Nokuro tu’ alaid kopio ko do potongkiad dahai? Olihuan nu nopo tuu iyahai do gisom dot alaid? ²¹ Pogulio’ no iyahai kawagu dot id diya’, oi TUHAN! Pogulio’ no iyahai kawagu! Tondulio’ no i koiyon-iyono’ dahai do miagal di gulu po. ²² Ko’ iyadaan nu tuu iyahai do gisom dot alaid? Aiso’ no kopio o koompokon do kototogod nu dahai?