YOSUA

YOSUA

¹ Di nopoddi napatai i Musa, i susuhuon do TUHAN diri, om boro-boros no o TUHAN dot id di Yosua, i tanak di Nun. I Yosua nopo nga’ i mongunguhup di Musa di gulu po. ² Om boros kad TUHAN, ’’Napatai noddi i Musa, i susuhuon ku. Iyo nopoddi, om sodia’ kou no, iya’ om koinsanai do tulun dot Israil do sumoborong do Bawang do Yordan; om mongoi kou i’ do hilo’d pomogunan di patahakon ku diyolo’. ³ Honggo nopo o kinoiyonon dot oongoi dokoyu om patahakon ku nori dot id diya’, oi Yosua, om id toinsanan o tulun ku. Tu’ iyo noddi o nokoboros mantad ku dot id di Musa. ⁴ Tana’ nopo dot aanu dokoyu om mantad pod hilo’d tana’ do kowotuan di ponong id salatan om korikot di Konuluhanan do Libanon, i ponong id utara; om mantad di Bawang dot Iprat dit agayo, i ponong id koulayon, om oinsanan o pomogunan do tulun do Hit, om gisom do korikot dot id Rahat do Tanga’, i ponong id kotonobon. ⁵ Iso’ pod tulun nga’ aiso’ i’ o kasaap diya’, oi Yosua, do solinaid nu do poimpasi. Tu’ manud-tanud oku i’ kasai’ diya’, do miagal di minananud oku di Musa. Om woyoon kasai’ tiya’ i’ om a’ ku iya’ tongkiadan. ⁶ Pogiroto’ no om pasangalo’ no o ginawo nu tu’ iya’ no o sumiliu do boyoon diti bansa’ do mongoi ponolod di pomogunan di nakabatos mantad ku dot id taki- aki dokoyu. ⁷ Pogiroto’ no om pasangalo’ no kopio o ginawo nu. Om tonudon no kopio o koinsanai di Tourat di pinatahak di Musa, i susuhuon ku’ddi, dot id diya’. Om kada’ no kopio sansala’ dot ongoiso’ piya do mantad id Tourat diri om koundar ko indo do honggo nopo o tongoyon nu. ⁸ Kada’ no kopio kolihuwai do mambasa’ i buuk do Tourat do pointikid-tikid do maso do sumambayang. Om soro-sorohon no om pinsingilaan no kopio iri do tadau om totuong. Om tonudon no o nunu nopo i nokotulis do hiri’d buuk diri. Tu’ ondung owonsoi nu o miagal diti om osimbayan indo om koundar o koposi-posion nu. ⁹ Soroho’ pogi’ nga’ nosuhu’ ku no moti’ iya’ do popogirot om papasangal kopio do ginawo. Om kada’ no kooris om kada’ poluhoyo’ o ginawo tu’ iyoho’ no i TUHAN, i Kinorohingan nu, o manud-tanud kasai’ diya’ do hinonggo nopo o pakayaan nu,’’ ka. ¹⁰ Om suhuo’ noddi di Yosua i piro-piro o boyoon di tulun dot Israil ¹¹ do tumongkop di kokiiman do poposunud do boros do poingkaa, ’’Posodia’ toko’ no do kokoriu, tu’ tolu po moti’ o tadau om sumoborong toko’ no di Bawang do Yordan do pakayaan do hilo’d pomogunan di patahakon do TUHAN, i Kinorohingan toko’ dot id dokoyu,’’ ka. ¹² Om boro-boros no i Yosua dot id payat do Rubin, om id payat do Gad, om id songintanga’ di payat do Manasi do poingkaa, ¹³ ’’Soroho’ no dokoyu i pinoboros di Musa, i susuhuon do TUHAN, dot id dokoyu, iri no tu’ iri nopo tana’ dot id soborong do Yordan, i ponong id koulayon om patahakon do TUHAN, i Kinorohingan dokoyu, dot id dokoyu, do pomogun-mogunan dokoyu. ¹⁴ Poundorongon nopo do hiti’d tana’ di pinatahak di Musa dokoyu o koinsanai’d sawo om tangaanak, om tayam-tayam dokoyu. Nga’ ilo’ ngai’ nopo soudor dokoyu om mositi’ no dot ongkirapo-rapo om sumodia’ do mongoi sangod. Tu’ iyolo’ no o mogulu do tulun dot Israil do sumoborong do Bawang do Yordan, om iyolo’ o monguhup diyolo’, ¹⁵ gisom dot aanu diyolo’ i pomogunan di patahakon do TUHAN, i Kinorohingan dokoyu, dot id diyolo’, iri no i tana’ do hiri’d sampaping ponong id kotonobon do mantad id Bawang do Yordan. Om oonuan pondo do TUHAN do kosimbayanan o koinsanai di payat dot Israil om pogulian nogindo dokoyu do hiti’d tana’ di nakatahak di Musa, i susuhuon do TUHAN dot id dokoyu; i hiti’d soborong do Bawang do Yordan, do ponong id koulayon,’’ ka dau. ¹⁶ Om boros ka di payat do Rubin om i payat do Gad, om i songintanga’ di payat do Manasi dot id di Yosua, ’’Nunu nopo o ponuhuan nu dahai om wonsoyon ngai’ i’ dahai, om hinonggo nopo o ponuhuan nu dahai do mongoi om ngoyon ngai’ i’ dahai. ¹⁷ Poingkuro nopo iyahai do minumboyo’ di boros di Musa om iyo noddi o pongungumboyo’ dahai do boros nu. Om TUHAN no i Kinorohingan nu o manud-tanud diya’ do miagal di minananud iyau di Musa. ¹⁸ Isai nopo o tulun do sumaap diya’ om it a’ tumanud do boros nu om hukuman no do kapatayon. Pogiroton no om pasangalon no o ginawo nu,’’ ka diyolo’.

¹ Om ponuhu’ noddi i Yosua do duwo o tulun do gomponoluku’ do mantad hilo’d kokiiman do Sitim do lumisok-lisok i’ do mongoi ponorisid do mogontong di pomogunan do Kanaan om okon-okon po om i bandar do Yorikou. Om ongoi no i duwo o tulun diri do hiri’d bandar diri, om rikot no iyolo’ do hiri’d walai do songulun o tondu’ do sundal, om odop no iyolo’ do hiri. Ngaran nopo di tondu’ddi nga’ i Rahab. ² Om haro’ddi o tulun do minongoi pomisunud di raja’ do Yorikou do haro o piro-piro tulun dot Israil do nokorikot do totuong diri do mongoi ponoluku’ do pomogunan diri. ³ Om ponuhu’ no i raja’ do tulun dau do mongoi pomisunud di Rahab do poingkaa, ’’Iri nopo tulun di minumbaya’ do hino’d walai nu om mongoi i’ ponoluku’ do pointongkop diti pomogunan. Posoliwano’ nogi’ kopio iyolo’!’’ ka. ⁴ - ⁶ Om boros ka di Rahab do suminimbar, ’’Otopot nogi’ do haro o piro-piro o tulun do nokorikot do hiti’d walai ku, nga’ a’ oku i’ koilo ondung hinonggo o tadon diyolo’. Om maha’ di totuong no, dit a’ po natabanan i wawayaan do bandar, om pamanau no iyolo’. Om a’ oku i’ minonguhot ondung honggo o pakayaan diyolo’. Nga’ ondung ngoyon dokoyu iyolo’ gusao’ om okosupan po dokoyu iyolo’,’’ kad i Rahab. (Nga’ nokolisok no ma di Rahab i duwo o tulun do gomponoluku’ddi do hiri’d sakai do taap di walai dau. Om tinakapan dau iyolo’ di bundusan di poinsidang do hiri.) ⁷ Om soliwan noddi di bandar i piro-piro o susuhuon di raja’ do mongoi pogihum di gomponoluku’. Om tabanai noddi i wawayaan di bandar. Om pingihumai noddi diyolo’ i gomponoluku’ddi do gisom do nokorikot iyolo’ do hiri’d sosoborongon do Bawang do Yordan. ⁸ Nga’ maha’ dit a’ po nokoodop i duwo o tulun do gomponoluku’ddi, om ongoi no i Rahab do hiri’d sakai di taap do walai dau. ⁹ Om boro-boros no iyau di duwo o tulun diri do poingkaa, ’’Oilaan ku no do nakatahak nod TUHAN dot id dokoyu o pomogunan diti. Om oinsanan nopo o tulun do hiti do moddosi dokoyu. Om pananggagaran ngai’ poo o tulun do hiti dot opopoddosian do tumimbaba’ dokoyu. ¹⁰ Tu’ nokorongou no iyahai do kinowoyo-woyoo’ do TUHAN do minamarasak di Rahat dot Aragang dot id toguang dokoyu, do tontok di minogidu’ kou do mantad id pomogunan do Masir. Om nokorongou ngai’ nogi’ iyahai do kinowoyo-woyoo’ dokoyu do minamatai di Sihon om i Og, i duwo o raja’ dot Amori, do hilo’d ponong id koulayon do mantad di Bawang do Yordan. ¹¹ Nongooris tomod diri iyahai do tontok di nokorongou iyahai’ddi. Om koluhoi ngai’ nopo o ginawo dahai do nokoilo do pasal dokoyu. Tu’ iri nopo TUHAN, i Kinorohingan dokoyu om Kinorohingan do hilo’d tawan om hiti’d pomogunan. ¹² Om sumpa’ kou no do dinondo dot id suang do ngaran do TUHAN do wonsoyon dokoyu dot id sompiiyon ku o miagal di winonsoi ku dot id dokoyu. Om onuwai oku no do tanda’ do pongilaan ku, om otumbayaan oku indo dokoyu. ¹³ Om pamatos kou no do posion dokoyu o tapa’ om tina’ ku, om tobpinai ku’d kusai om tondu’, om koinsanai do sompiiyon diyolo’. Om kada’ no kopio iyahai dokoyu pologoso’ dot apatai,’’ ka dau. ¹⁴ Om boros ka di duwo o gomponoluku’ do suminimbar di Rahab, ’’Uhang i’ dahai dot iyahai ot apatai ko’ mantad dot apatai ko iya’, ondung a’ nu no poboroson dot id tulun do suwai iti winonsoi dahai. Om atantu’ no dot osonong o wonsoyon dahai dot id diya’ do tontok do patahakon do TUHAN iti pomogunan diti dot id dahai,’’ ka diyolo’. ¹⁵ Iri nopo walai di Rahab nga’ pinawaal do hiri’d tolig di bandar. Om osonong iddi iyau do pinopoulu di duwo o tulun diri, do tali o pinakai dau do pinopoulu, do pinawaya’ di liligaon do ponong id soliwan di tolig di bandar. ¹⁶ Om boros ka di Rahab, ’’Pakayaai no dokoyu do hilo’d konulu-nuluan om a’ kou i’ osolowot di piro-piro o susuhuon di raja’. Om lumisok kou nod hilo’ do solinaid do tolu o tadau, do gisom id ongkoguli’ ngai’ i susuhuon di raja’ddi, om mamanau kou nogindo kawagu,’’ ka. ¹⁷ Om boros ka di duwo tulun diri dot id di Rahab, ’’Oo, om sinuhu’ nu iyahai’ddi do mamatos; om bayaanon i’ bo dahai i batos diri. ¹⁸ Om soira’ nopondo do ngoyon dahai songodo’ iti pomogunan dokoyu, om pokogoson no iti tali dot aragang do hiti’d liligaon do pouluhan nu dahai. Om angatan no i tapa’ om tina’ nu, om i tongotobpinai nu om koinsanai di koworisan do tapa’ nu do hiti’d walai nu. ¹⁹ Ondung haro o sumoliwan diyolo’ do mantad hiti’d walai nu, om apatai noo, om okon no ko’ iyahai o sosolon, tu’ diyolo’ nod sala’. Nga’ ondung haro ot orualan di hiti’d suang do walai, om iyahai no o monongkoilo. ²⁰ Nga’ ondung popinsunudon nu do tulun do suwai iti winonsoi dahai om a’ no iyahai akagasan di nakabatos dahai dot id diya’,’’ ka diyolo’. ²¹ Om kookunai nod i Rahab i pinibatasan diyolo’ddi om suhuo’ noddi dau iyolo’ do mamanau. Om kapamanau poddi iyolo’ om pokogoso’ no dau i tali dot aragang do hiri’d liligaon. ²² Om ongoi noddi lisok do hiri’d konulu-nuluan i duwo o tulun do gomponoluku’ddi. Om pingihumai no iyolo’ di piro-piro o susuhuon di raja’ do hiri’d pointongkop di watas do solinaid do tolu o tadau, nga’ a’ i’ diyolo’ nokito i gomponoluku’ddi. Om poguliai ngai’ noddi di susuhuon di raja’ do hilo’d Yorikou. ²³ Om ruhuk nogiddi i duwo o gomponoluku’ddi do mantad hiri’d konulu-nuluan. Om soborong no iyolo’ di bawang do pinogulian do hiri’d di Yosua. Om sunudai no diyolo’ i Yosua do koinsanai di nosiliu dot id diyolo’. ²⁴ Om boros kaddi diyolo’, ’’Oilaan no kopio dahai do tahakon do TUHAN dati’ o koinsanai di pomogunan diri. Tu’ oinsanan nopo i tulun do hilo’ do moddosi dati’,’’ ka.

¹ Om osuab poddi di kosuabon kawagu om tongkiadai no di Yosua om koinsanai di tulun dot Israil i kokiiman do hilo’d Sitim om ongoi no iyolo’ do hiri’d tisan di Bawang do Yordan. Om powonsoyo’ no diyolo’ o kiim diyolo’d hiri. Om hiri-hiri noddi iyolo’ do minomukiim do gisom do norikot o maso do kasabarangan diyolo’ di bawang. ² Om katalib poddi o tolu tadau, om pamanau ngai’ no i boyoon diyolo’ do tuminongkop di kokiiman diyolo’. ³ Om boros ka di tongoboyoon diri dot id tulun dot Israil, ’’Soira’ nopo dot okito dokoyu i piro-piro ot imam do manaan di Kaban do Tumpongo’d TUHAN, i Kinorohingan toko’, om mamanau ngai’ kou no do mantad id kinoiyonon dokoyu om tumanud nondo diyolo’. ⁴ Tu’ a’ kou po insan koongoi do hiti om iyolo’ no o momoyo’ dokoyu dot id tindalanon. Nga’ kada’ kou insomok kopio di Kaban do Tumpongo, nga’ mositi’ no do songkilomito o kosoduwo’ dokoyu do mantad diri do hiri’d tohuri,’’ ka diyolo’. ⁵ Om boro-boros no i Yosua dot id koinsanai di tulun dot Israil do poingkaa, ’’Lidangan no dokoyu o tinan dokoyu tu’ suab nopondo om momonsoi o TUHAN do koimayaan dot id pogialatan dokoyu,’’ ka. ⁶ Om suhuo’ noddi di Yosua i piro-piro ot imam do sumaan di Kaban do Tumpongo om mamanau dot id gulu di tulun dot ogumu’. Om wonsoyo’ no diyolo’ o miagal diri. ⁷ Om boros kad TUHAN dot id di Yosua, ’’Mantad nod baino’ do silihon ku iya’ do tulun dit abantug, gisom dot oinsanan nopondo o tulun dot Israil do momusou diya’. Om oilaan diyolo’ do moyo-woyo’ oku diya’ do miagal di minomoyo’ oku di Musa. ⁸ Soira’ nopod korikot do hiri’d bawang i piro-piro ot imam di kisinaan di Kaban do Tumpongo, om suhuon no iyolo’ do tumabung di waig om mingkakat nopondod hiri’d tisan di bawang,’’ ka. ⁹ Om boros ka di Yosua dot id tulun dit ogumu’ddi, ’’Kainou’d hiti, om mokinongou i’ do poboroson do TUHAN, i Kinorohingan toko’. ¹⁰ Om soira’ nopo do mongoi kou sangod om atantu’ no dot uyungon dau i tulun do Kanaan, om Hit, om Howi, om Poris, om Girgasi, om Amori om Yobus. Om oilaan indo dokoyu do hiti’d pogialatan dokoyu o Kinorohingan di poimpasi do kokito kou do koimayaan do wonsoyon dau, ¹¹ do posoborongon i Kaban do Tumpongo do TUHAN di Bawang do Yordan do mogulu dokoyu. ¹² Om pomili’ kou no do hopod om duwo o tulun — songulun o mantad id pointikid-tikid do payat dot Israil. ¹³ Soira’ nopondo do katabung do hiri’d waig o gakod di piro-piro ot imam di kisinaan di Kaban do Tumpongo’d TUHAN, i TUHAN do koinsanai’dti pomogunan, om owokok nondo i bawang. Om tumimung nondo i waig dot id iso’ o koiyonon,’’ ka dau. ¹⁴ - ¹⁵ Tontok nopoddi nga’ dongmongomot, om koubasanan no do lumuyud kasai’ i Bawang do Yordan. Om tontok noddi do tuminongkiad i tulun dot Israil do kinoiyonon di pinomukiiman diyolo’; tu’ sumoborong noddi iyolo’ di Bawang do Yordan. Om iri no i piro-piro ot imam di kisinaan di Kaban do Tumpongo o minogulu di tulun dot ogumu’ do minamanau. Om maha’ di nakatabung o gakod di piro-piro ot imam do hiri’d waig, ¹⁶ - ¹⁷ om kowokok no i bawang. Iri nopo waig nga’ notimung do ponong hiri’d sarayo do hilo’d Adam; it iso’ o bandar dot id sampaping do bandar do Sartan. Nga’ iri nopo bawang di hiri’d sawa’, i koluyung do hiri’d Rahat do Napatai om narasak no kopio. Om nokosoborong iddi i tulun dot Israil do hiri’d hapak do Yorikou. Om solinaid nopo diyolo’ do manau-panau do hiri’d kinarasakan di waig om songingkakat ngai’ po it imam di kisinaan di Kaban do Tumpongo do hiri’d tanga-tanga’ di bawang do narasak gisom do nokosoborong ngai’ i tulun dot Israil.

¹ Kosoborong ngai’ poddi di Bawang do Yordan o koinsanai di tulun dot Israil om boro-boros nogi’ o TUHAN dot id di Yosua do poingkaa, ² ’’Pomili’ no do hopod om duwo o tulun do mantad id bansa’ diti; do soroiso-iso’ o tulun do mantad id pointikid-tikid do payat. ³ Om suhuon nondo iyolo’ do manganu do hopod om duwo o watu do mantad hilo’d tanga’ do Bawang do Yordan, i hiri’d ningkokoton di piro-piro ot imam. Om suhuon no iyolo’ do manaan di watu om popoiliu’ddi do hiri’d pomukiiman dokoyu do totuong do baino’,’’ ka. ⁴ Om lohowo’ noddi di Yosua i hopod om duwo o tulun do nopili’ dau. ⁵ Boros ka di Yosua dot id diyolo’, ’’Ongoi kou no do hilo’d bawang. Om mogulu nopo di Kaban do Tumpongo’d TUHAN, i Kinorohingan toko’. Om tumikid kou no do sumaan do watu do soroisaan do watu o pointikid-tikid di payat. ⁶ Iri nopo watu’ddi nga’ poposorou do tulun dot Israil di winonsoi do TUHAN. Om koimbagu nopondo, di muhot o tangaanak dokoyu do komoyon di watu, ⁷ om sunudan no dokoyu iyolo’ dot a’ luminuyung i Bawang do Yordan do tontok di sinaan do suminoborong i Kaban do Tumpongo’d TUHAN. Om iri no watu o sumiliu do poposorou do tulun dot Israil di nosiliu’d hiti,’’ ka. ⁸ Om wonsoyo’ noddi di tongoulun diri i pinonuhuan di Yosua do tumanud di pinonuhuan do TUHAN dot id dau. Om panganu no iyolo’ do hopod om duwo o watu do mantad hiri’d tanga’ di Bawang do Yordan. Om soroisaan do watu o pointikid-tikid di payat dot Israil. Om igitai no diyolo’ i watu do hiri’d pinomukiiman diyolo’ om poiliho’ noddi diyolo’ do hiri. ⁹ Om pogitimpak-timpako’ noddi di Yosua o hopod om duwo o watu do hiri’d ningkokoton di piro-piro ot imam di kisinaan di Kaban do Tumpongo do hiri’d tanga’ di Bawang do Yordan. (Om hino po kasai’ i watu di pinogitimpak-timpak diri do gisom do baino’.) ¹⁰ Om songingkakat poddi kasai’ i piro-piro ot imam do hiri’d tanga’ di Bawang do Yordan do gisom do nongowonsoi ngai’ di tulun dot Israil i pinonuhuan do TUHAN dot id di Yosua. Om koinsanai’dti nga’ miontok ngai’ i’ di pinonuhuan di Musa dot id di Yosua. Om angarau-arau ngai’ nopoddi i tulun dot Israil do suminoborong di bawang. ¹¹ - ¹³ Om iri no payat do Rubin, om payat do Gad om i songintanga’ di payat do Manasi, i nongkosodia’ no do mongoi sangod, o minogulu di payat dot Israil do suwai do suminoborong di bawang, tu’ iyo noddi o pinonuhuan di Musa. Om woyoo’ nod TUHAN it apat nohopod noribu o tulun di nokosodia’ no do sumangod diri do suminoborong om minongoi’d hiri’d tana’ dot apatau do hilo’d somok do Yorikou. Om kosoborong ngai’ poddi i tulun dot Israil om pogulu no diyolo’ do mamanau i piro-piro ot imam di kisinaan di Kaban do Tumpongo’d TUHAN. ¹⁴ Iri nopo winonsoi’d TUHAN do tadau’ddi nga’ minongodsuur di tulun dot Israil do momusou kopio di Yosua do miagal do pomusou do tulun dot abantug. Om pusohon kasai’ iddi do tulun dot Israil i Yosua do solinaid dau do poimpasi, do miagal di pinomusou diyolo’ di Musa. ¹⁵ Om suhuo’ nod TUHAN i Yosua ¹⁶ do momisunud di piro-piro ot imam di kisinaan di Kaban do Tumpongo do tumindal do mantad hiri’d Bawang do Yordan. ¹⁷ Om wonsoyo’ no di Yosua o miagal di pinonuhuan do TUHAN dot id dau. ¹⁸ Om kotindal ngai’ poddi it imam di suminaan di Kaban do Tumpongo’d TUHAN om luyung no kawagu i bawang om luminuyud kawagu do miagal di timpuun i’. ¹⁹ Tontok di tadau’d kohopod do tulan do koiso’ om soborong no i tulun dot Israil di Bawang do Yordan. Om pomukiim no iyolo’ do hilo’d kinoiyonon di roitan do Gilgal, i ponong id koulayon do mantad id Yorikou. ²⁰ Om hilo’ no i Yosua do pinopogitimpak-timpak di hopod om duwo o watu di nanu do mantad hiri’d Bawang do Yordan. ²¹ Om boros ka di Yosua dot id tulun dot Israil, ’’Muhot nopondo i tangaanak dokoyu do sumonu’ do komoyon diti watu, ²² om sunudan no iyolo’ do minokok i Bawang do Yordan do tontok di suminoborong o tulun dot Israil di bawang, om otuu nopo i tana’ do winayaan diyolo’. ²³ Om sunudan no iyolo’ do rinasak do TUHAN, i Kinorohingan toko’, i Bawang do Yordan gisom do nokosoborong toko’ iddi; do miagal di minamarasak o TUHAN di Rahat dot Aragang om nokosoborong iddi iyahai. ²⁴ Om iri nondo i nongowonsoi’d TUHAN diri o koilo-ilo ngai’ do bansa’d tulun do hiti’d pomogunan do kogoyoo’ do sinundu’d TUHAN. Om momusou indo kasai’ iyolo’ do TUHAN, i Kinorohingan toko’ do gisom dot alaid,’’ ka dau.

¹ Koinsanai di raja’ do tulun dot Amori, i ponong id kotonobon do mantad di Bawang do Yordan, om koinsanai di raja’ do Kanaan do poingompus di Rahat do Tanga’, nga’ nongkorongou ngai’ no do winokok do TUHAN i Bawang do Yordan do gisom do nokosoborong ngai’ i tulun dot Israil. Om kongooris tomod noddi di tulun dot Israil i tongoraja’ddi. ² Om boro-boros noddi o TUHAN dot id di Yosua do poingkaa, ’’Manarom no do watu do maan do panakapais om sunatan no o tulun dot Israil,’’ ka. ³ Om wonsoyo’ no di Yosua i pinonuhuan do TUHAN dot id dau, om sunatai no dau i tulun dot Israil do hilo’d kinoiyonon di pinungaranan do Nunu-Nulu do Ponunatan. ⁴ - ⁶ Winonsoi pogi’ di Yosua o miagal diri nga’ tontok nopo di suminoliwan i’ i tulun dot Israil do mantad hilo’d Masir om nongosunatan ngai’ no i tongokusai diyolo’. Nga’ daamot nopo di minghombo iyolo’ do hilo’d tana’ do kowotuan do solinaid dot apat nohopod o toun, om aiso’ no o tangaanak diyolo’ do tongokusai do nosunatan. Om koinsanai di tongokusai di nosukup o tumur dot onuon do soudor di soliwan i’ iyolo’ do mantad hilo’d Masir nga’ nangapatai no di motingkaayi’ ot apat nohopod o toun, tu’ a’ iyolo’ tuminanud do boros do TUHAN. Om kawagu po nga’ nokosumpa’ mantad no o TUHAN dot a’ popokito diyolo’ di pomogunan dot osimbayan om it oluhub o tana’, i nakabatos mantad dau dot id taki-aki diyolo’. ⁷ Iri nopo tangaanak do tongokusai di tulun di nangapatai noddi om aiso’ i’ o nongosunatan di solinaid diyolo’ do minghombo do hiri’d tana’ do kowotuan. Om iyolo’ no, i sukodwagu o sinunatan di Yosua. ⁸ Kosunatai ngai’ poddi iyolo’, om undorong no iyolo’ do hiri’d kokiiman do gisom do nolingos i sinunatan. ⁹ Om boro-boros no o TUHAN dot id di Yosua, ’’Tadau nod baino’ do tinanus ku i tingayam dokoyu do nosiliu do turipon do hilo’d Masir,’’ ka dau. Iri no o kinopomungaranan do kinoiyonon diri do Gilgal do gisom do baino’. ¹⁰ Tontok nopo di poundorong iyolo’ do hilo’d Gilgal, i tana’ dot apatau dot id somok do Yorikou, om minamaramai iyolo’ do Paska di sosodopon do tadau’d kohopod om apat do tulan diri. ¹¹ Tadau noddi kawagu om pangakan no iyolo’ di taakanon do hilo’d Kanaan, iri no i gandum do ginowi om roti dit a’ rinalatan do pangambang. Om diri nogindo do minangakan iyolo’ do tua’ do totonomon do hiri’d pomogunan diri. ¹² Om tingkod noddi do rumikot o manna do mantad hilo’d tawan, om a’ noddi mangakan o tulun dot Israil di manna. Om mantad nod tadau’ddi dot i tua-ua’ di tanom-tanom do hiri’d pomogunan do Kanaan ot akanon diyolo’. ¹³ Tontok dit osomok no i Yosua do hilo’d Yorikou om sigog id kokito dau o songulun o kusai do poingkakat do hiri’d toguang do kiinigit do gayang. Om insomok no i Yosua do mikuwo’d minuhot do poingkaa, ’’Soudor ko dahai ko’ pisangod ko?’’ ka dau. ¹⁴ Om boros ka di tulun do suminimbar, ’’Okon oku i’ ko’ soudor dokoyu om okon oku ko’ pisangod. Iyoho’ nopodti om boyoon do soudor do TUHAN,’’ ka dau. Om otud noddi i Yosua do tuminuku’ dot id tulun diri. Om boro-boros no i Yosua do poingkaa, ’’Iyoho’ no o susuhuon nu, oi Tuan. Nunu o ponuhuan nu doho’, oi Tuan?’’ ka dau. ¹⁵ Om boros ka di boyoon do soudor do TUHAN dot id di Yosua, ’’Iduwo’ ino kasut nu tu’ iti nopo kinoingkokoton nu om tana’ dit olidang,’’ ka dau. Om iduwo’ noddi di Yosua i kasut dau.

¹ Iri nopo wawayaan do sumuang di bandar do Yorikou nga’ ogirot tomod o pinonobon om haro po o madtamong do hiri tu’ mada’ do haro o kosuang do tulun dot Israil. Om aiso’ no o songulun piya do kosuang ko’ kosoliwan po di bandar diri. ² Om boros kad TUHAN dot id di Yosua, ’’Patahakon ngai’ ku dot id diya’ o bandar do Yorikou om i raja’ do hilo’, om koinsanai di soudor diyolo’ di gunsiou. ³ Om mamanau kou no do tumutuk di bandar, dot iyokoyu ngai’ di soudor nu dot insan do sangadau, do solinaid dot onom o tadau. ⁴ Om mamanau nopo dot id gulu-gulu di Kaban do Tumpongo om turu’ ot imam dit otikid do torumpit. Om tadau nopod koturu’ om tumutuk kou no di bandar do miwoyo’ di piro-piro o soudor nu dot inturu’ kotutuk, om iri ngai’ no it imam om popinguni di torumpit do maso’ddi. ⁵ Om owonsoi nopondo o miagal diri om pounion nondo dit imam i torumpit dot oloyong o popouni. Om orongou po dokoyu o tuni’ddi om mamangkis ngai’ nogindo dot opuhod i tongokusai. Om humaba’ nondo i tolig do bandar diri. Om maso noddi do sumuang ngai’ di bandar i soudor nu,’’ ka dau. ⁶ Om lohowo’ ngai’ noddi di Yosua it imam om boro-boros no iyau diyolo’ do poingkaa, ’’Ongoyo’ dokoyu i Kaban do Tumpongo om mamanau i’ o turu’ dokoyu do hiri’d gulu-gulu di Kaban do Tumpongo do mikuwo’d popouni di torumpit,’’ ka. ⁷ Om boros kaddi di Yosua dot id tongosoudor dau, ’’Pamanau kou do mongoi tutuk dilo bandar. Om iri nopo i tongosoudor dit ongkirapo-rapo om mamanau dot id gulu-gulu di Kaban do Tumpongo do TUHAN,’’ ka. ⁸ - ⁹ Om pamanau ngai’ no i soudor di madtamong do hiri’d gulu dot id gulu- gulu di piro-piro ot imam di popouni di torumpit; om susuhut ngai’ nogiddi diyolo’ it imam di kisinaan di Kaban do Tumpongo, om susuhut no i tongosoudor di madtamong dot id tohuri. ¹⁰ Om sunudai ngai’ noddi di Yosua i soudor dau dot a’ mamangkis om a’ momoros dot ongoiso’ piya o boros dot a’ po dau iyolo’ suhuon do mamangkis. ¹¹ Om suhuo’ noddi di Yosua i piro-piro o tulun diri do tumutuk di bandar diri dot insan kotutuk do mikuwo’d saanon i Kaban do Tumpongo, om pogulian nondo diyolo’ do hiri’d kokiiman. Om hiri id kokiiman o todopon diyolo’ do dongotuong. ¹² - ¹³ Tadau noddi kawagu, om suab no i Yosua do tuminungag. Om ongoi ngai’ no i soudor om it imam tutuk di bandar diri do koinduwo no do miagal dit id gulu o koulud-uludo’ do mamanau: Id gulu nopo kopio om i tongosoudor di madtamong dot id gulu; om iri nogindo i turu’ ot imam di popinguni di torumpit; om sumusuhut nogindo i tongoimam di kisinaan di Kaban do Tumpongo, om hiri nopondod tohuri om i tongosoudor di madtamong dot id tohuri. Om solinaid nopo diyolo’ do manau-panau om popingunion nopo i torumpit. ¹⁴ Om tontok no di tadau’d koduwo’ddi do minongoi iyolo’ tutuk di bandar diri dot insan kotutuk om poguliai no diyolo’ do hiri’d kokiiman. Om iyo noddi o winonsoi diyolo’ do pointikid-tikid do tadau do solinaid dot onom o tadau. ¹⁵ Om korikot noddi i koturu’d tadau om tungag no iyolo’ dit osuab po, di mulai nogi’ o tadau. Om ongoi no iyolo’ tutuk di bandar do Yorikou. Om miagal kasai’ iddi o kowoyo-woyoo’ diyolo’ do tuminutuk, nga’ tadau nopoddi om inturu’ iyolo’ tutuk di bandar. ¹⁶ Om tontok nopo di kointuru’ diyolo’ do tuminutuk, di nokouni di piro-piro ot imam i torumpit, om boro-boros noddi i Yosua di soudor dau do poingkaa, ’’Pamangkis kou no! Tu’ nakatahak nod TUHAN iti bandar dot id dati’! ¹⁷ Raagon ngai’ nopo dokoyu o suang diti bandar. Om iti bandar nga’ raagon nogi’ do maan do porsombahan dot id TUHAN. I Rahab poo, i tondu’ do sundal diri, o posion dokoyu om koinsanai di sompiiyon dau, tu’ minongintirung i’ iyau di gomponoluku’ toko’. ¹⁸ Kada’ kou panganu do nunu nopo it apatut do raagon. Tu’ ondung manganu kou’ddi om poporikot kou no do kosusaan dot id kokiiman do tulun dot Israil. ¹⁹ Nga’ iri nopo i winonsoi do mantad id pirok, om tamas, om tambaga’ om basi’ om mositi’ no do posuwai-suwayon ngai’ om potobilangon do maan do don TUHAN. Om mositi’ nod posuangon ngai’ iri dot id poiiyanan do dapu’ di don TUHAN,’’ ka dau. ²⁰ Om pounio’ noddi di piro-piro ot imam i torumpit. Om korongou poddi di tulun dot Israil iri om pamangkis no iyolo’ dot opuhod tomod, om kahaba’ noddi i tolig di bandar do Yorikou. Om takad ngai’ noddi di nulu-nulu i soudor dot Israil om suang ngai’ no iyolo’ di bandar do Yorikou, om kosolod noddi diyolo’ i bandar diri. ²¹ Om patayo’ ngai’ noddi diyolo’ o koinsanai di hiri’d suang di bandar, dot i tongokusai om i tongoondu’, om i tongomulok po om i tongomolohing no, do gayang o pinamatai diyolo’. Om pinatai ngai’ nogi’ diyolo’ i sapi’, om i dumba’, om i kaladai. ²² Om boros kaddi di Yosua dot id duwo o gomponoluku’ di gulu poddi, ’’Ongoi kou no do hilo’d walai di tondu’ do sundal diri om angatan no iyau om i sompiiyon dau do sumoliwan do miagal di nakabatos mantad dokoyu dot id dau,’’ ka. ²³ Om ongoi noddi iyolo’ do hiri om angatai no diyolo’ i Rahab do sumoliwan do miwoyo’ di tina’, om tapa’, om tongotobpinai dau, om koinsanai di sompiiyon dau. Om angatai ngai’ no diyolo’ o koinsanai di sompiiyon di Rahab om iri ngai’ nogi’ i susuhuon dau do hiri’d kinoiyonon dit aiso’ o ligogon, it id somok do kokiiman do tulun dot Israil. ²⁴ Om tutudai no di piro-piro o soudor dot Israil i bandar diri do gisom do nouu. Iri po i tamas, om pirok, om tambaga’ om basi’, ot a’ diyolo’ rinaag. Om pinosuang diyolo’ iri do hiri’d poiiyanan di dapu’ do don TUHAN. ²⁵ Nga’ pinasi i’ di Yosua i Rahab, i tondu’ do sundal diri, om koinsanai di sompiiyon dau tu’ minongintirung i’ iyau di duwo o gomponoluku’, i sinuhu’ di Yosua do minongoi ponoluku’ di bandar do Yorikou. (Om iri nopo i sinakagon di Rahab nga’ hilo’ kasai’ pod Israil do gisom do baino’.) ²⁶ Om tontok noddi do minomopol i Yosua do poingkaa, ’’Isai nopo o mumbal do momonsoi kawagu do bandar do Yorikou om usungon no iyau do TUHAN. Isai nopo o popoiliu do watu do poimpahan di bandar diri om atagakan no do tanak dau dit id dotuo; isai nopo o momonsoi di wawayaan dot agayo di bandar diri om atagakan no do tanak dau dit id domulok,’’ ka. ²⁷ Om winoyo’ kasai’ id TUHAN i Yosua om abantug diri i Yosua dot id pointongkop do pomogunan diri.

¹ Nga’ a’ i’ o tulun dot Israil tuminanud di boros do TUHAN di minogodu do manganu do nunu nopo it apatut do raagon. Haro o songulun o kusai dot i Akan o ngaran dot a’ tuminanud do boros diri, gisom do tuminogod diri o TUHAN dot id tulun dot Israil. (Ngaran nopo do tapa’ di Akan om i Karmi, om taki no dau om i Sabdi, i mantad id pinuruan do sompiiyon di Sira, it id suang do payat di Yohuda.) ² Om suhuo’ no di Yosua o piro-piro o tulun do mantad hilo’d Yorikou do mongoi do hilo’d bandar dot Ai. Ai nopo om iso’ o bandar di ponong id koulayon do mantad id Baitol, it id somok do Bait-Awon. Om sinuhu’ dau iyolo’ do mongoi pogontong do pomogunan diri. Om kowonsoi poddi diyolo’ i pinonuhuan diri, ³ om uli’ no iyolo’ do minongoi solowot di Yosua, om boros ka diyolo’, ’’A’ i’ minog do mongoi ngai’ toko’ panangod di bandar diri. Duwo nopo ko’ tolu noribu o tulun nga’ ula’ no. A’ i’ minog do mongoi ngai’ sangod o soudor tu’ bandar nopod Ai om okooro’,’’ ka diyolo’. ⁴ Om tolu noddi noribu o tulun dot Israil do minongoi panangod di bandar diri. Nga’ naala’ iddi iyolo’. ⁵ Om gusao’ noddi di tulun dot Ai i tulun dot Israil do mantad hiri’d wawayaan di bandar dot Ai, gisom do hiri nod sodu’ kopio. Om haro i’ doti’ o tolu nohopod om onom o soudor do tulun dot Israil do pinatai do tulun dot Ai do hiri’d guas di nulu-nulu. Om moddosi diri om ongooris i tulun dot Israil. ⁶ Om hurako’ noddi di Yosua o rasuk dau do natatangaban. Om otud no iyau dot id toguang di Kaban do Tumpongo’d TUHAN. Om iri ngai’ nogi’ i boyoon do tulun dot Israil nga’ minotud i’ do hiri do gisom do nasadapan. Om naraban diyolo’ do pupuk o tulu diyolo’ do popointalang dot adalaan tomod iyolo’ do tumongob. ⁷ Om boros kaddi di Yosua dot id TUHAN, ’’Oi Kinorohingan, i TUHAN ku! Nokuro tu’ winoyo’ nu iyahai do gisom do nokosoborong di Bawang do Yordan? Patahakon nu tuu iyahai dot id longon do tulun dot Amori do gisom nondo dot angapatai iyahai? Nokuro tu’ a’ nu iyahai pinologos do momogun-mogun do hilo’d soborong do Bawang do Yordan? ⁸ Nunu poddi o milo ku’d poboroson do baino’ tu’ naala’ nod pisangod o tulun dot Israil, oi TUHAN? ⁹ Kongorongou nondo o tulun do Kanaan om koinsanai di tulun do hiti’d pomogunan di nosiliu’ddi om ngoyon nondo iyahai diyolo’ songodo’ om patayon ngai’ nondo iyahai diyolo’! Nunu pondo o wonsoyon nu om suahon kasai’ ko i’?’’ ka dau. ¹⁰ Om boros kad TUHAN dot id di Yosua, ’’Ingkakat no! Kada’ otud do hino’d tana’ dot iyo kopio’ndo! ¹¹ Nokowonsoi nod dusa o tulun dot Israil! Tu’ a’ iyolo’ tuminorodok dot id batos dahai diyolo’. Tu’ minanganu iyolo’ do wookon di dapu’ dit apatut daa do raagon. Om minanakau iyolo’ di dapu’ om minongudut po. Pinolisok diyolo’ iri dot id rolot di dapu’ diyolo’. ¹² Om iri no ot a’ nakasaap-saap di tulun dot Israil do pisangod diyolo’. Tu’ iyolo’ nga’ nohukuman no do kapatayon. Om a’ oku noddi mananud dokoyu ondung a’ no dokoyu raagon i dapu’ dit a’ daa apatut dot onuon diri. ¹³ Ingkakat no, oi Yosua! Om lidangan no o koinsanai dilo tulun dot Israil. Om suhuon no iyolo’ do tumimbaba’ doho’ do suab tu’ moro-boros oku, iyoho’ i TUHAN, i Kinorohingan dot Israil, dot id diyolo’ do poingkaa, ’Oi tulun dot Israil, haro dot id dokoyu o wookon di dapu’ dit apatut do raagon do tumanud di pinonuhuan ku! Om a’ kou i’ moti’ kaala’ do pisangod dokoyu ondung a’ po dokoyu kataam i dapu’ddi,’ kangku nondo. ¹⁴ Iyo nopoddi, om sunudan no iyolo’ do kosuabon nopod suab om sorisidon ku’d mongilo o pointikid-tikid do payat dot Israil. Ondung otuduk ku ot iso’ o payat om mositi’ no do tumimbaba’ doho’ o koinsanai di pinuruan do sompiiyon dot id suang do payat diri. Ondung otuduk ku ot iso’ o pinuruan do sompiiyon, om mositi’ no do tumimbaba’ doho’ o koinsanai di sompiiyon dot id suang do pinuruan diri. Ondung otuduk ku ot iso’ o sompiiyon om mositi’ no do tumimbaba’ doho’ o pointikid-tikid do tulun dot id suang do sompiiyon diri. ¹⁵ Om iri nopo tulun dit otuduk om oilaan no do pinopoopi’ di dapu’ di pogoduhan diri om mositi’ nod tutudan nopo do miyau do miwoyo’ di sompiiyon dau om koinsanai di dau’d songonuon tu’ iyau no o minongintingayam kopio do tulun dot Israil om tuminolibamban iyau di batos,’’ ka dau. ¹⁶ Om osuab poddi di kosuabon kawagu om ngoyo’ no di Yosua potimbabao’ do Kinorohingan i tulun dot Israil. Om potimbabao’ no dau o pointikid-tikid di payat dot Israil om koontok no o payat do Yohuda. ¹⁷ Om potimbabao’ no di Yosua o pointikid-tikid di pinuruan do sompiiyon di payat do Yohuda. Om koontok no o pinuruan do sompiiyon di Sira. Om potimbabao’ no dau o pointikid-tikid do sompiiyon dit id suang do pinuruan do sompiiyon di Sira om koontok no i sompiiyon di Sabdi. ¹⁸ Om ngoyo’ noddi di Yosua potimbabao’ o pointikid-tikid do tulun dit id suang do sompiiyon di Sabdi, om koontok no i Akan. Iyau nopo nga’ tanak di Karmi, om manangaki di Sabdi. ¹⁹ Om boros ka di Yosua dot id di Akan, ’’Oi tanak ku, posunudo’ ngai’ no do dinondo i nongowonsoi nu dot id toguang do TUHAN, i Kinorohingan dot Israil. Om kada’ no popolisok do nunu nopo dot id doho’,’’ ka dau. ²⁰ Om boros ka di Akan do suminimbar, ’’Otopot no do nokowonsoi oku do dusa dot id TUHAN, i Kinorohingan dot Israil. Iti no o winonsoi ku: ²¹ Nokokito oku dot iso’ o rasuk dit olumis kopio, i winonsoi do hilo’d Babilonia, do poirolot di dapu’ di nangaanu toko’. Om nokokito oku do pirok di duwo i’ doti’ o kilogram do kawagato’ om songwatang o tamas dit awagat i’ ko’ satanga’ kilogram. Om norohian tomod oku’ddi di dapu’ddi om onuo’ ku no. Om polobongo’ ngai’ ku nopori do hiri’d tana’ di pinomukiiman ku. Om iri nopo pirok om hiri’d saalom kopio,’’ ka dau. ²² Om arau-arau nopoddi i Yosua do minonuhu’ do piro-piro o tulun do minongoi do hiri’d kiim di Akan. Om kokito no diyolo’ do hiri kopio i’ o pinamalabangan di dapu’ di pinogoduhan do manganu’ddi om i pirok nga’ hiri kopio nogid saalom. ²³ Om igitai no diyolo’ i dapu’ do suminoliwan do mantad hiri’d kiim di Akan om patahako’ no diyolo’ dot id di Yosua om id koinsanai di tulun dot Israil. Om poiliho’ no diyolo’ iri dot id toguang do TUHAN. ²⁴ Om pootodo’ noddi di Yosua om koinsanai di tulun dot Israil do hiri’d rantai di roitan do Rantai do Kosusaan i Akan, om i pirok, om i rasuk om i tamas, om koinsanai di tangaanak dau do tondu’ om kusai, om koinsanai di sapi’, om i kaladai, om i dumba’ dau, om i kiim om koinsanai di dau’d songonuon. ²⁵ Om boros ka di Yosua dot id di Akan, ’’Nokuro tu’ pinoporikot ko do kosusaan dot id dati’! Om baino’ nodti om porikatan ko no iya’d TUHAN do kosusaan,’’ ka dau. Om oinsanan nopoddi i tulun dot Israil do minomodumpau di Akan do watu do gisom do napatai iyau. Om dinumpau diyolo’d watu om sinorob diyolo’ i sompiiyon dau om koinsanai di dau’d songonuon. ²⁶ Om pogitimpak-timpako’ noddi diyolo’ i watu dot ogumu’ do hiri’d kinoiyonon diri. Iri nopo watu di pinotimung diri nga’ hino kasai’ po do gisom do baino’. Iri no o kinopomungaranan do kinoiyonon diri do Rantai do Kosusaan. Om a’ noddi otogod o TUHAN.

¹ Om boro-boros no o TUHAN dot id di Yosua do poingkaa, ’’Potonudo’ ngai’ no diya’ ilo soudor nu om ngoyon no dokoyu songodo’ o bandar dot Ai. Om kada’ poluhoyo’ o ginawo om kada’ kooris. Tu’ pamanangon ku i’ iya’ do sumangod di raja’ dot Ai; om iri nondo i tulun dau, om i bandar dau, om i pomogunan dau nga’ aanu nu i’. ² Poingkuro nopo o winonsoi nu dot id bandar do Yorikou om i raja’ do hilo’, om miagal noddi o wonsoyon nu dot id bandar om id raja’ dot Ai. Nga’ baino’ nopo om koino-ino kou i’ do manganu do konunu-nunuan om tayam-tayam diyolo’. Om sumodia’ kou no do manangod do bandar diri om potigowoon no o pananangod do mantad id dotolikudan di bandar,’’ ka dau. ³ Om sodia’ noddi i Yosua do mongoi do hiri’d bandar dot Ai do miwoyo’ di soudor dau. Om pilio’ no dau o tolu nohopod noribu o soudor dit ongosiou om suhuo’ no dau iyolo’ do mamanau do dongotuong. ⁴ Om boros ka dau dot id diyolo’, ’’Lumisok kou no do hiri’d dotolikudan di bandar, nga’ kada’ kou insodu’ kopio, om mositi’ no do posodia’ kasai’ kou do sumangod. ⁵ Nga’ iyoho’ nopo om koinsanai diti tulun ku om minsomok i’ di bandar. Om soira’ nopondo do gusaon iyahai di tulun dot Ai om pogulian nondo dahai do mogidu’ do mantad hiri’d bandar, do miagal di winonsoi toko’ dit insan toko’ i’ ongoi sangod. ⁶ Om gusaon nondo iyahai diyolo’ do gisom do kosoliwan iyolo’ di bandar. Nga’ osorou nopo daa’ndo diyolo’ om a’ i’ iyahai kasaap do miagal dit id gulu. ⁷ Om diri nondo do sumoliwan kou do mantad hiri’d linisok dokoyu do mongoi ponolod di bandar diri. Om patahakon indo do TUHAN i Kinorohingan dokoyu, i bandar diri dot id dokoyu. ⁸ Aala’ pondo dokoyu i bandar diri om tutudan no do miagal di pinonuhuan do TUHAN. Iri no ot isuhu’ ku dokoyu,’’ ka dau. ⁹ Om suhuo’ noddi di Yosua iyolo’ do mamanau om mandad do hiri’d lisokon diyolo’, i ponong id kotonobon do mantad id bandar dot Ai, it id piolitan dot Ai om Baitol. Nga’ i Yosua nopo om minodop i’ do hiri’d kokiiman do tulun dot Israil. ¹⁰ Om osuab poddi di kosuabon, om ngoyo’ no di Yosua timungo’ i soudor dau. Om woyoo’ noddi dau iyolo’ om i piro-piro o boyoon dot Israil nga’ minomoyo’ nogi’ di piro-piro o soudor do minongoi do hilo’d Ai. ¹¹ Iri nopo soudor di minoyo’ di Yosua nga’ kuminaa ponong id wawayaan dot agayo di bandar dot Ai. Om pomukiim no iyolo’ do ponong id utara. Om iso’ po o kubong dot id piolitan diyolo’ di bandar dot Ai. ¹² Om suhuo’ no dau o limo doti’ noribu o soudor do mongoi lisok do ponong id kotonobon do mantad id bandar diri, i hiri’d piolitan dot Ai om Baitol. ¹³ Om pogitongkiad-kiado’ no dau i soudor diri: iri nopo soudor dit ogumu’ nga’ ponong id utara di bandar, om iri no suwai om ponong id kotonobon. Om i Yosua nopo om minodop i’ do hiri’d Rantai do Yordan. ¹⁴ Om soira’ddi do nokito di raja’ dot Ai i soudor di Yosua, om tilombus nopo iyau do suminodia’. Om ongoi no iyau om i piro-piro o soudor dau do hiri’d Rantai do Yordan, i niyon diyolo’ do suminangod do tulun dot Israil dit insan i’. Nga’ a’ i’ dau oilaan do songodon iyau do mantad id tohuri. ¹⁵ Om poggidu’ noddi i Yosua om i soudor dau do miningala-ala’ om pakayaai no do ponong id tana’ dit aiso’ o sumuni. ¹⁶ Om notimung ngai’ noddi i tongokusai do hiri’d bandar dot Ai do mongoi pomogusa’ di Yosua om i soudor dau. Om musa-gusa’ iyolo’ di Yosua nga’ modu-sodu’ iyolo’ di bandar. ¹⁷ Om koinsanai nopo i tongokusai di hiri’d bandar dot Ai do suminoliwan di bandar do minongoi pomogusa’ di tulun dot Israil do gisom do poingiwang tomod nopoddi i bandar om aiso’ no o tumamong. ¹⁸ Om boros kad TUHAN dot id di Yosua, ’’Potuduko’ ino tandus nu do hilo’d Ai tu’ patahakon ku no diya’ ilo bandar,’’ ka. Om wonsoyo’ nod i Yosua o miagal diri. ¹⁹ Om koinsawat poddi di Yosua o longon dau, om ingkakat ngai’ no i soudor dau di songillisok do minongoi panangod om minonolod do bandar diri, om tutudai nogiddi diyolo’ i bandar. ²⁰ - ²¹ Om soira’ddi kuminoili i tulun dot Ai om kokito no diyolo’ o lisun dot oitom tomod do mininsawat do hilo’d tawan. Om i Yosua om i soudor dau nga’ nokokito nogi’ di lisun diri om koilaai noddi diyolo’ do nosolod no di posukan do soudor do suwai i bandar dot Ai, om poguliai noddi diyolo’ om timpuunai no diyolo’ do minimpatai i tulun dot Ai. Om aiso’ noddi o ralan di tulun dot Ai do mogidu’. ²² Om i tulun dot Israil di hiri’d bandar dot Ai nga’ minongoi’ddi uhup do momogusa’ di tulun dot Ai, gisom do notutukan diyolo’ i tulun dot Ai om koinsanai nopoddi i tulun dot Ai do napatai. Om aiso’ no o tongoiso’ piya’d tulun do nokopoggidu’ om aiso’ o napasi, ²³ suwai ko’ iri po i raja’ dot Ai. Om tangkapo’ no diyolo’ i raja’ dot Ai om pootodo’ no do hiri’d di Yosua. ²⁴ Om patayo’ ngai’ nopo di tulun dot Israil i pisangod diyolo’ do hiri’d tana’ dit aiso’ o sumuni; i pinomogusaan diyolo’ di pisangod. Om poguliai no diyolo’ do hiri’d bandar dot Ai om patayo’ no diyolo’ o koinsanai di tulun do poingiyon do hiri’d bandar diri. ²⁵ - ²⁶ Om kapatai ngai’ nopo o tulun dot Ai do tadau’ddi — do hopod om duwo noribu o tongokusai om tongoondu’. Om pointuduk kasai’ nopoddi di Yosua i tandus dau do hilo’d Ai om a’ po dau pinoinsiriba’ o longon dau dit a’ po naayi’ do mamatai o tulun do hiri. ²⁷ Om igitai no di tulun dot Israil i tayam-tayam om i konunu-nunuan di naanu diyolo’ do mantad hiri’d bandar diri. Tu’ miagal noddi o pinonuhuan do TUHAN dot id di Yosua. ²⁸ Om tutudai no di Yosua i bandar dot Ai om pologoso’ nopoddi do poingraag kasai’. Om poingraag kasai’ po i bandar diri do gisom do baino’. ²⁹ Om pogiiso’ no dau i rata’ di raja’ dot Ai dot id iso’ o guas do kayu do gisom do nasadapan. Nga’ maha’ di notonob o tadau om ponuhu’ nogi’ i Yosua do popolintuhun di rata’ om papataam diri do hiri’d ralan di wayaan do sumuang di wawayaan dot agayo do bandar diri. Om rubpuwai nogiddi diyolo’d watu dot ogumu’ i rata’ddi. Om hino kasai’ pori do gisom do baino’. ³⁰ Om pomonsoi no i Yosua do pananaraban do porsombahan di don TUHAN, i Kinorohingan dot Israil, do hilo’d Nuluhon dot Ibal. ³¹ Om wonsoyo’ no di Yosua i pananaraban do porsombahan diri do tumanud di Tourat di Musa, i susuhuon do TUHAN, dot id tulun dot Israil, do miagal di nokotulis dot id Tourat di Musa do poingkaa, ’’Iri nopo pananaraban do porsombahan om watu dit a’ binabak do pakakas do basi’ o wonsoyon,’’ ka. Om papatahak noddi i tulun dot Israil dot id TUHAN do porsombahan di sorobon om porsombahan do piombolutan do hiri’d pananaraban do porsombahan diri. ³² Om hilo’ no i Yosua dot antang-antangan di tulun dot Israil do minanalin di Tourat di pinotulis dot id Buuk di Musa dot id piro-piro o watu diri. ³³ Om oinsanan nopoddi i tulun dot Israil om i boyoon diyolo’, om i gunsiou om i gompomutus, om iri nogi’ i tulun do bansa’d suwai di poingiyon dot id rolot diyolo’ do miningkakat do miampaping di Kaban do Tumpongo’d TUHAN om potoguang iyolo’ di tongoimam do mantad id payat do Liwi, i mananaan di Kaban do Tumpongo. Om songintanga’ nopo di tulun diri om potoguang di Nuluhon do Gorisim, om iri no songintanga’ kawagu om potoguang di Nuluhon dot Ibal. Tu’ iyo noddi o pinonuhuan di Musa, i susuhuon do TUHAN diri do wonsoyon diyolo’ dot orikot i maso do rumamit iyolo’ do barakat di pinabatos do TUHAN. ³⁴ Om basao’ noddi di Yosua dot opuhod o koinsanai di Tourat diri, do miagal di nongkotulis do hiri’d Buuk do Tourat, om kohompit ngai’ no i pamarakat om i pomopol. ³⁵ Om basao’ ngai’ nopo di Yosua o koinsanai di pinonuhuan di Musa di nongkotulis do hiri’d buuk dot oturan dot id toguang do koinsanai di tulun di songintimung do hiri do kohompit ngai’ i tongoondu’, om i tangaanak om koinsanai di tulun do bansa’d suwai di poingiyon dot id rolot diyolo’.

¹ Iri nopo kinamanangan dot Israil om nongorongou ngai’ no do koinsanai di raja’ do pointongkop di pomogunan dot id ponong id kotonobon do mantad id Bawang do Yordan, om i hiri’d konuluhanan, om i hiri’d guas do nuluhon, om hiri’d poingompus do tisan do Rahat do Tanga’, om gisom do hilo’d Nuluhon do Libanon, i ponong id utara. Om iyolo’ nopoddi nga’ i raja’ do Hit, om Amori, om Kanaan, om Poris, om Howi, om Yobus. ² Om oinsanan nopoddi i raja’ddi do minogiupakat do mogisosokodung do sumaap di Yosua om i tulun dot Israil. ³ Nga’ iri nopo tulun do hilo’d Gibion om i tulun do Howi, om nokorongou no di winonsoi di Yosua do hilo’d bandar do Yorikou om Ai. ⁴ Om pogipapakat no iyolo’ do magakal di Yosua. Om posodia’ no iyolo’ do kokoriu om posuango’ no dot id karung dit angaraat no, om kantung do kulit dit araat no o pinoiyanan do waig dot anggur om pagandaro’ noddi diyolo’ iri di kaladai. ⁵ Om pakayan do pinakai diyolo’ nga’ gansing no. Om kasut diyolo’ nga’ angaraat no om nompin-ompinan poo. Om iri roti do nigitan diyolo’ nga’ nokodou no om gorumon poo. ⁶ Om ongoi no iyolo’ solowot di Yosua do hiri’d kokiiman do hilo’d Gilgal. Om boros ka diyolo’ dot id di Yosua om id tulun dot Israil, ’’Iyahai nopodti om mantad id pomogunan dit osodu’. Om orohian iyahai do momonsoi’d pitoruan dot id dokoyu,’’ ka diyolo’. ⁷ Nga’ boros ka di tulun dot Israil, ’’Mantad kou i’ doti’ do hiti’d kasamakan. Om poingkuro’ddi iyahai do monokitaru’ dokoyu?’’ ka diyolo’. ⁸ Om boros ka diyolo’ dot id di Yosua, ’’Posodia’ i’ iyahai do momonsoi’d nunu nopo i korohian nu,’’ ka. Om uhoto’ no iyolo’ di Yosua, ’’Isai kopio kou’ndo, om honggo tadon dokoyu?’’ ka dau. ⁹ Om boros ka diyolo’ do suminimbar, ’’Iyahai nopodti om mantad id iso’ o pomogunan di hilo’d sodu’, nga’ nokorongou iyahai do pasal do TUHAN, i Kinorohingan, i tukuon dokoyu. Om norongou ngai’ no dahai i winonsoi dau do hilo’d Masir, ¹⁰ om i winonsoi dau dot id duwo o raja’ dot Amori, i hilo’d ponong id koulayon do mantad id Bawang do Yordan: i Sihon, i raja’ do Hisbon, om i Og, i raja’ do Basan, i poingiyon do hilo’d Astarot. ¹¹ Om suhuo’ noddi iyahai di tongoboyoon dahai om koinsanai di tulun do hilo’d pomogunan dahai do mongokoriu do mongoi solowot dokoyu. Sinuhu’ iyahai diyolo’ do momonsoi’d nunu nopo i korohian dokoyu om momonsoi’d pitoruan dot id dokoyu. ¹² Antangai pogi’ iti roti do kinokoriu dahai. Tu’ tontok nopo di minamanau i’ iyahai do mantad hilo’d walai dahai do mongoi solowot dokoyu om alasu’ po iti roti. Nga’ antangai pogi’ddi do baino’! Nga’ okodou po tomod om gorumon no. ¹³ Om iti kantung do poiyanan dahai’d waig dot anggur, nga’ wagu po kopio di sinuangan i’ dahai. Nga’ intangai pogi’! Nga’ nohurak no moti’ddi. Om iti pakayan om iti kasut dahai nga’ nagansing no, tu’ osodu’ kopio i’ o pinamanau dahai,’’ ka diyolo’. ¹⁴ Om romito’ no di tulun dot Israil i taakanon di tinahak di tulun do Gibion nga’ a’ i’ iyolo’ minuhot do TUHAN. ¹⁵ Om pomonsoi noddi i Yosua do pitoruan do mogiuulud dot id tulun do Gibion diri om pamatos no iyau dot a’ mamatai diyolo’. Om oinsanan nopoddi i boyoon do tulun dot Israil do suminumpa’ do tumanud di pinitoruan diri. ¹⁶ Om katalib poddi o tolu tadau do mantad di nokopitoruan diyolo’, om koilaai nogiddi di tulun dot Israil dot a’ i’ osodu’ o tadon di tongoulun diri. ¹⁷ Om pamanau no iyolo’ do solinaid do tolu o tadau om korikot no iyolo’ do hiri’d bandar di tadon di tulun diri. Tadon nopo di tulun diri nga’ hilo’d bandar do Gibion, om Kopira, om Biirot, om Kiriat Yiarim. ¹⁸ Nga’ a’ noddi milo i tulun dot Israil do mamatai diyolo’ tu’ nokosumpa’ ngai’ no i boyoon diyolo’ dot id tulun diri dot id suang do ngaran do TUHAN, i Kinorohingan dot Israil, dot a’ iyolo’ mamatai diyolo’. Om sosolon tomod daa’ddi di tulun dot Israil i tongoboyoon diyolo’. ¹⁹ Nga’ boros ka di tongoboyoon do suminimbar, ’’Kukuroyon poo. Tu’ nokosumpa’ no iyahai dot id diyolo’ dot id suang do ngaran do TUHAN, i Kinorohingan dot Israil. Om a’ toko’ noddi milo do momonsoi dot araat dot id diyolo’. ²⁰ Om pologoson toko’ nopo iyolo’ do poimpasi tu’ nokosumpa’ no iyahai. Tu’ a’ nopo nga’ hukuman toko’ nod Kinorohingan. ²¹ Pologoson nopo iyolo’ do poimpasi, nga’ sumiliu no ma iyolo’ do monginsiduwon om mananago’ dati’,’’ ka diyolo’. Om miagal noddi o nopogibara-barasan di tongoboyoon. ²² Om lohowo’ no di Yosua i tulun do Gibion do mongoi solowot dau. Om uhoto’ no dau iyolo’ do poingkaa, ’’Nokuro tu’ minagakal kou dahai? Hilo’d sodu’ o tadon dahai, ka dokoyu om mantad kou i’ do hiti’d somok. ²³ Iyo nopoddi, tu’ minongudut kou, om hukuman kou no moti’ do Kinorohingan. A’ kou no om i bansa’ dokoyu milo dot a’ sumiliu do turipon, om monginsiduwon kou nondo om mananago’ do hiri’d Walai’d Kinorohingan ku,’’ ka dau. ²⁴ Om boros ka diyolo’ do suminimbar, ’’Oi Tuan, minomonsoi pogi’ iyahai do miagal diri nga’ nokorongou no iyahai do nosunudan no kopio’d TUHAN, i Kinorohingan nu i Musa, i susuhuon dau’ddi, do patahakon do TUHAN o pomogunan diti dot id dokoyu, om patayon dau o koinsanai’d tulun do hiti do tontok do rumikot kou. Om kooris noddi kopio iyahai dokoyu; om moddosi iyahai. Om iri no o kinapamansayan dahai do miagal diri. ²⁵ Nga’ baino’ nopo om id suang no iyahai do kuasa’ nu. Om wonsoyo’ nopo dot id dahai it apatut dot osorou nu,’’ ka diyolo’. ²⁶ Om nintirungan iddi di Yosua iyolo’ om a’ dau pinologos i tulun dot Israil do mamatai diyolo’. ²⁷ Nga’ siniliu no maddi dau iyolo’ do turipon, do monginsiduwon om mananago’ di tulun dot Israil om paatod do waig do pakayon do hiri’d pananaraban do porsombahan di don TUHAN. Om gisom do baino’ nga’ iri kasai’ po o buruon diyolo’ do hiri’d tiyonon do sumambayang di natantu’ mantad do TUHAN.

¹ Om korongou noddi i Adonisidik, i raja’ do Yorusalim, do naala’ no om naraag ngai’ di Yosua i suang di bandar dot Ai, om pinatai i raja’ dot Ai do miagal di winonsoi di Yosua dot id raja’ om id bandar do Yorikou. Om norongou nogi’ dau dot iri nopo tulun do Gibion nga’ nokopomonsoi no do pitoruan do monokiulud di tulun dot Israil, om poirolot no iyolo’ di tulun dot Israil do momogun-mogun. ² Om ooris tomod diri i tulun do hiri’d Yorusalim tu’ iri nopo bandar do Gibion om irad i’ di bandar do suwai dit ongkiraja’. Om agayo i’ ko’ i bandar dot Ai om i tulun do hiri nga’ gunsiou ngai’ i’. ³ Om ponuhu’ noddi i Adonisidik do tulun do mongoi pomisunud di Huham, i raja’ do Hibron, om i Piriam, i raja’ do Yarmut, om i Yapia, i raja’ do Lakis, om i Dobir, i raja’ do Iglon, do boros do poingkaa, ⁴ ’’Rikot kou no, do mongoi uhup doho’ do manangod do Gibion tu’ nokopomonsoi no i tulun do hilo’ do pitoruan do monokiulud di Yosua om i tulun dot Israil,’’ ka. ⁵ Om pogisosokodung noddi i limo o raja’ do tulun dot Amori do minongoi sangod om tutukai no diyolo’ o Gibion. Iri ngai’ nopo i raja’ddi om mantad do hilo’d Yorusalim om Hibron, om Yarmut, om Lakis, om Iglon. ⁶ Om ngoyo’ noddi di tulun do Gibion sunudai i Yosua do hilo’d kokiiman do Gilgal. Boros ka diyolo’, ’’Kada’ kopio iyahai tongkiadai! Rikot no do mongoi ponguhup dahai! Posion no iyahai! Tu’ koinsanai di raja’ do tulun dot Amori, i mantad hilo’d konulu-nuluan om nokopogisosokodung no do manangod dahai!’’ ka. ⁷ Om pamanau no i Yosua om koinsanai di soudor dit ongkirapo-rapo do mogiwoyo-woyo’ di piro-piro o gunsiou do mantad hilo’d Gilgal do mongoi sangod. ⁸ Om boro-boros no o TUHAN dot id di Yosua do poingkaa, ’’Kada’ kooris diyolo’. Tu’ noonuan ku no iya’ do kamanangan. Om aiso’ i’ o tiso’ diyolo’ do kasaap diya’,’’ ka. ⁹ Om kosuabai nopo i Yosua do minamanau do mantad hilo’d Gilgal do kuminaa do hilo’d Gibion. Om a’ i’ nokoinsan-insan i tulun dot Amori do tontok di sinangod iyolo’ di Yosua. ¹⁰ Om noris diri do TUHAN o koinsanai di tulun dot Amori do tontok di nokokito iyolo’ di soudor dot Israil. Om ogumu’ tomod diri o tulun dot Amori do nangapatai do hilo’d Gibion, om iri nopoddi it a’ napatai om ginusa’ diyolo’ do gisom do nokorikot do hiri’d ralan do rumuhuk di nuluhon do hilo’d Bait-Horon om gisom do hilo’d Asika om Makida, i ponong id salatan. ¹¹ Om soira’ di minogidu’ i tulun dot Amori do mantad id soudor dot Israil do hilo’d Bait-Horon om minaya’ iyolo’ do hiri’d rantai, it id piolitan do Bait-Horon om Asika. Om otungai no iyolo’d TUHAN do karambatu dit angagayo do mantad hilo’d tawan di solinaid diyolo’ do manau-panau do gisom do nokorikot iyolo’ do hilo’d Asika. Om ogumu’ nogiddi o napatai do nootungan di karambatu ko’ mantad di pinatai di tulun dot Israil. ¹² Om tontok nod tadau’ddi do nonuan do TUHAN i tulun dot Israil do kamanangan do suminangod di tulun dot Amori, om boro-boros noddi i Yosua dot id TUHAN. Om boros ka di Yosua dot id toguang di tulun dot Israil, ’’Oi tadau, undorong no dot id hapak do Gibion; Oi tulan, kada’ no undaliu dot id hapak do Rantai dot Ayalon,’’ ka. ¹³ Om undorong no i tadau, om i tulan nga’ a’ noddi minundaliu do gisom do naala’ do tulun dot Israil i pisangod diyolo’. Iti nopo nga’ notulis i’ dot id Buuk do Yasar. Om iyo no kopio’ddi o nosiliu tu’ minundorong i tadau do hilo’d piintangaan do tawan, om a’ tuminonob i tadau do nasangadahan piya. ¹⁴ Om a’ po insan do haro o miagal diri di gulu, om a’ nogi’ osiliu kawagu do koimbagu i nosiliu do tontok do tadau’ddi tu’ pinohubayaan kopio do TUHAN o pinokianu do tulun. Om minuhup o TUHAN dot Israil do suminangod! ¹⁵ Om katalib poddi i pinisangadan diri, om poguliai nogiddi di Yosua om i soudor dau do hilo’d kokiiman do Gilgal. ¹⁶ Nga’ iri nopo i limo o raja’ dot Amori om nokopoggidu’ i’ om luminisok dot id iso’ o luang do hiri’d nulu-nulu do hilo’d Makida. ¹⁷ Om soira’ di nabantalan iyolo’ do tulun om ngoyo’ noddi di tulun sunudai i Yosua di kinoiyonon do linisok diyolo’. ¹⁸ Om boros ka di Yosua, ’’Antaban no do watu dot agayo i kabang do luang diri, om suhuon no o piro-piro o soudor do tumamong do hiri. ¹⁹ Nga’ iyokoyu nopo om kada’ kou no undorong do hiri. Suwai ko’ gusaon no dokoyu i pisangod om songodon no iyolo’ do mantad hiri’d dohuri diyolo’. Kada’ dokoyu pologoso’ iyolo’ do sumuang di kabandaran diyolo’! Tu’ noonuan kou nod TUHAN, i Kinorohingan dokoyu do kamanangan do sumangod diyolo’,’’ ka dau. ²⁰ Om insanai nopoddi di Yosua om i tulun dot Israil i tulun dot Amori do mamatai, nga’ haro po o piro-piro tulun di nokosuang do hiri’d bandar om a’ iddi napatai. ²¹ Om poguliai ngai’ no di tulun dot Israil do hiri’d di Yosua do hilo’d kokiiman do Makida. Om ongosonong-sonong ngai’ i’ iyolo’. Om aiso’ no tiso’ do tulun do hiri’d pomogunan diri do mumbal do momoros do sumaap di tulun dot Israil. ²² Om boros kaddi di Yosua, ’’Ngoyo’ nondo ukabai i luang om pokoyoon do hiti i limo o raja’ diti,’’ ka dau. ²³ Om ukabai noddi i luang, om posoliwano’ no i raja’ do Yorusalim, om Hibron, om Yarmut, om Lakis, om Iglon. ²⁴ Om kaatod ngai’ poddi diyolo’ i raja’ dot id di Yosua, om lohowo’ nogiddi di Yosua o koinsanai di tulun dot Israil do mongoi rapou dau. Om suhuo’ no dau i boyoon do gunsiou di minoyo’ dau do minongoi sangod, do mongulok do liou do koinsanai di raja’ddi. ²⁵ Om boros ka di Yosua dot id boyoon do soudor dau, ’’Kada’ kou no kooris om kada’ dokoyu poluhoyo’ o ginawo. Pogiroton no dokoyu o ginawo om kumosiou kou no, tu’ miagal nodti o wonsoyon do TUHAN dot id koinsanai di pisangod dokoyu,’’ ka dau. ²⁶ Om patayo’ no di Yosua i limo o raja’ diri om pogiiso’ no o rata’ diyolo’ dot id limo o guas do kayu do gisom do nasadapan. ²⁷ Nga’ di nopoddi tumonob o tadau om ponuhu’ no i Yosua do popolintuhun di rata’ om pataamon indo do hiri’d luang di linisok di piro-piro o raja’ddi. Om antabai noddi do watu dit agayo o hiri’d kabang di luang diri om hilo’ po kasai’ i watu’ddi do gisom do baino’. ²⁸ Om songodo’ no di Yosua o Makida do tadau iddi do gisom do naala’ dau. Om pinatai nogi’ dau i raja’ om koinsanai di tulun do hiri’d bandar diri. Aiso’ no o tongoiso’ piya di tulun do napasi. Tu’ poingkuro nopo i winonsoi dau dot id raja’ do bandar do Yorikou om miagal noddi o winonsoi dau dot id raja’ do Makida. ²⁹ Om ongoi noddi i Yosua om i soudor dau do hilo’d Libna do mantad hilo’d Makida, om songodo’ no diyolo’ i bandar do Libna. ³⁰ Om nonuan i’ iyolo’d TUHAN do kamanangan do suminangod di bandar diri om i raja’ do hiri. A’ i’ diyolo’ pinologos do haro o tongoiso’ piya do tulun do nokopoggidu’. Om pinatai nogi’ diyolo’ o koinsanai di tulun do hiri. Om miagal i’ di winonsoi diyolo’ dot id raja’ do Yorikou o winonsoi diyolo’ dot id raja’ do hiri. ³¹ Om mantad no do hilo’d Libna, om pakayaai no di Yosua om i soudor dau do hilo’d Lakis. Om tutukai no diyolo’ i bandar diri do minanangod. ³² Tontok di koduwo nod tadau do misangod iyolo’ om onuwai no iyolo’d TUHAN do kamanangan do suminangod di hiri’d bandar do Lakis. Om iyo iddi winonsoi diyolo’ di hilo’d bandar do Libna o winonsoi diyolo’ do hilo’d Lakis tu’ a’ i’ diyolo’ pinologos do haro o tongoiso’ piya o tulun do kopoggidu’. Om patayo’ ngai’ nopo diyolo’ o koinsanai di tulun do hiri. ³³ Om rikot no i Horam, i raja’ do Gisir, do hilo’d bandar do Lakis do mongoi daa uhup do sumangod, nga’ naala’ i’ di Yosua iyau om i soudor di Horam. Songulun po nga’ aiso’ no o nokopoggidu’ tu’ patayo’ ngai’ nopo diyolo’ i tulun do hiri. ³⁴ Om mantad nod hilo’d Lakis, om pakayaai no di Yosua om i soudor dau do hilo’d Iglon. Om tutukai no diyolo’ i bandar diri do minanangod. ³⁵ Om tontok id tadau’ddi do naala’ om nosolod diyolo’ i bandar diri. Om patayo’ ngai’ nopo diyolo’ o tulun do hiri do miagal di winonsoi diyolo’ di hilo’d bandar do Lakis. ³⁶ Om mantad nod hilo’d Iglon, om takad no i Yosua om i soudor dau di konuluhanan do kuminaa do hilo’d bandar do Hibron do minongoi sangod, ³⁷ om nosolod iddi diyolo’ i bandar diri. Om patayo’ no diyolo’ i raja’ om koinsanai di tulun do hiri’d bandar diri, om id kabandaran do suwai di hiri’d posorili’. Om raago’ nopo kopio dau i bandar diri do miagal di winonsoi dau di hilo’d bandar dot Iglon. Om songulun po nga’ aiso’ no o napasi. ³⁸ Om poguliai noddi di Yosua om i soudor dau do minongoi panangod di bandar do Dobir. ³⁹ Om songodo’ no di Yosua do gisom do naala’ dau i raja’ om i bandar diri om koinsanai di kabandaran di hiri’d posorili’. Om pinatai nogi’ diyolo’ o koinsanai di tulun do hiri do miagal di winonsoi di Yosua di hilo’d bandar do Hibron om Libna, om id koinsanai di raja’ do hilo’, om id bandar do Dobir om i raja’ do hiri’d bandar diri. ⁴⁰ Om iyo noddi i Yosua do minangala’ do koinsanai di watas diri, om kohompit nogi’ o koinsanai di raja’ dot id watas do konulu-nuluan, om i hiri’d tidong di konulu-nuluan di ponong id koulayon, om it id guas do konulu-nuluan di ponong id kotonobon, om iri nogi’ i hiri’d tana’ dit aiso’ o sumuni di ponong id salatan. Iso’ pod tulun nga’ aiso’ no o pinologos dau do minogidu’ tu’ patayo’ ngai’ nopo dau, tu’ iyo noddi o pinonuhuan do TUHAN, i Kinorohingan dot Israil. ⁴¹ Om iri nopo pinisangadan do nongoi di Yosua, dot it iyau o boyoon, om mantad pod hilo’d Kadis Barnia do ponong id salatan om gisom do hilo’d Gasa, it id somok do tisan do rahat, om kohompit no ngai’ o koinsanai’d watas do Gusin om gisom do hilo’d Gibion, i ponong id utara. ⁴² Om kaala’ no di Yosua o koinsanai di raja’ om pomogunan di porintaon diyolo’ dot insan noo ongoi sangod tu’ nuhupan i’ do TUHAN, i Kinorohingan dot Israil, o tulun dot Israil do suminangod. ⁴³ Om katalib poddi iri, om poguliai no di Yosua om koinsanai di soudor dau do hilo’d kokiiman diyolo’ di hilo’d Gilgal.

¹ Om soira’ di nokorongou i Yabin, i raja’ do Hasor, di kinamanangan do tulun dot Israil, om ponuhu’ no iyau do tulun do minongoi pomisunud di Raja’ Yobab, i mantad id bandar do Madon, om koinsanai di raja’ do bandar do Simron om Aksap, ² om koinsanai di raja’ do mantad id bandar do ponong id konulu-nuluan di ponong id utara, om it id Rantai do Yordan, i ponong id salatan do mantad id Galilia, om i watas do hiri’d guas do konulu-nuluan, om i watas do hiri’d tisan do rahat dit id somok do Dor. ³ Om minonuhu’ nogi’ iyau do tulun do mongoi pomisunud di tulun do Kanaan di hilo’d ponong id koulayon om i hilo’d ponong id kotonobon do mantad di Bawang do Yordan; om i tulun dot Amori, om Hit, om Poris; om i tulun do Yobus, i hilo’d watas do konulu-nuluan, om i tulun do Howi, i tulun do hilo’d guas do Nuluhon do Hormon, it id watas do Mispa. ⁴ Om rikot ngai’ no i raja’ddi do miwoyo’ do toinsanan di soudor diyolo’. Om miagal pod togis do hilo’d tisan do rahat o kogumuo’ diyolo’; om kuda’ om korita’-kuda’ diyolo’ nga’ ogumu’ nogi’ tomod. ⁵ Om pogiuuhup ngai’ nopo i raja’ddi do suminangod do tulun dot Israil. Om timung no iyolo’ dot id somok do palu di roitan do Mirom. ⁶ Om boro-boros no o TUHAN dot id di Yosua do poingkaa, ’’Kada’ kooris diyolo’. Tu’ dongiyo’dti nopondod suab, om patayon ngai’ ku no iyolo’ do mongobi’ di tulun dot Israil. Om maso noddi do tipuan ngai’ dokoyu i kuda’, om tutudan ngai’ i korita’-kuda’ diyolo’,’’ ka dau. ⁷ Om rikot no i Yosua om koinsanai di soudor dau do minonigowo do minanangod diyolo’ do hilo’d palu do Mirom. ⁸ Om onuwai nod TUHAN i tulun dot Israil do kamanangan. Om gusao’ no diyolo’ i pisangod diri do gisom do nokorikot do hilo’d Misripot Maim, i ponong id utara, om hilo’d Sidon, om gisom do nokorikot do hilo’d Rantai do Mispa, i ponong id koulayon. Om songodo’ no di tulun dot Israil i pisangod diyolo’, do gisom do nangapatai i pisangod. ⁹ Om tinipuan ngai’ di Yosua i kuda’ om tinutudan ngai’ dau i korita’-kuda’ diyolo’, do tumanud di pinonuhuan do TUHAN do wonsoyon dau dot id diyolo’. ¹⁰ - ¹¹ Om poguliai noddi di Yosua, om ngoyo’ no dau solodo’ o bandar do Hasor, om patayo’ no dau i raja’ do hiri. Maso nopoddi om Hasor no it okoris kopio dot id pogialatan di pomorintaan do hilo’. Om pinatai diyolo’ o koinsanai di tulun dot id bandar diri om aiso’ no o songulun piya do pinasi. Om i bandar nga’ tinutudan i’ diyolo’. ¹² Om kosolod ngai’ no di Yosua i kabandaran, om katangkap dau o koinsanai di raja’, om patayo’ nogiddi dau do tumanud di pinonuhuan di Musa, i susuhuon do TUHAN diri. ¹³ Nga’ aiso’ i’ o tinutudan di tulun dot Israil di bandar dit id timpak di poinulu-nulu. Tinutudan nopo di Yosua om Hasor noo. ¹⁴ Om nanu ngai’ di tulun dot Israil o koinsanai di dapu’ om i tayam-tayam do hiri, nga’ pinatai ngai’ i’ diyolo’ i tulun do hiri’d bandar diri. Om aiso’ no o tongoiso’ piya di tulun do pinasi. ¹⁵ Koinsanai di pinonuhuan do TUHAN dot id di Musa, i susuhuon dau, nga’ pinoboros ngai’ nopo di Musa dot id di Yosua. Om wonsoyo’ ngai’ nopo di Yosua i pinonuhuan diri, om iso’ po nga’ aiso’ no ot a’ dau winonsoi. ¹⁶ Nosolod ngai’ noddi di Yosua i pomogunan — i watas do hiri’d konulu-nuluan, om i hiri’d guas do nulu-nulu, i ponong id utara om ponong id salatan, om koinsanai di watas do Gusin om tana’ dit aiso’ o sumuni di ponong id salatan, om kohompit po i Rantai do Yordan. ¹⁷ - ¹⁸ Kogoyoo’ nopo di watas diri nga’ mantad po di Nuluhon dit Aiso’ o Sumuni di ponong id salatan, it id somok dot Idom, om gisom do hilo’d Baal-Gad do ponong id utara, it id Rantai do Libanon, i ponong id salatan do mantad id Nuluhon do Hormon. Om alaid i’ kopio i Yosua do minanangod do koinsanai di raja’ dot id watas diri do gisom do naala’ om nangapatai ngai’ dau iyolo’. ¹⁹ Iso’ po di bandar diri nga’ aiso’ no o minomonsoi’d pitoruan do monokiulud di tulun dot Israil, suwai ko’ iri po i bandar do Gibion, i bandar do tulun do Howi. Iri nopo suwai om naala’ ngai’ nopo dot id pisangadan. ²⁰ Om pinologos iyolo’d TUHAN do sisaap di tulun dot Israil om angapatai ngai’ indo iyolo’ om a’ iyolo’ insianan. Tu’ miagal noddi o pinonuhuan do TUHAN dot id di Musa. ²¹ Om maso nogiddi do pinunso di Yosua i tulun dot Inak, it angagayo koulun, i songingiyon do hilo’d watas do konulu-nuluan — do hilo’d Hibron, om Dobir, om Anab, om id koinsanai do watas do konulu-nuluan do Yohuda om Israil. Om patayo’ ngai’ nopo di Yosua iyolo’ om rinaag ngai’ dau i bandar diyolo’. ²² Om aiso’ noddi ot ongoiso’ piya do tulun dot Inak do poimpasi do hilo’d pomogunan dot Israil. Nga’ haro po o piro-piro diyolo’ do hilo’d Gasa, om hilo’d Gat, om hilo’d Asdod. ²³ Om naanu ngai’ di Yosua o koinsanai di tana’, tu’ iyo noddi o pinonuhuan do TUHAN dot id di Musa. Om ongkibo’ no di Yosua i tana’ddi. Om tikidai no dau do tana’ o pointikid-tikid di payat do bansa’d Israil, do maan do diyolo’d tungkusan. Om tingkod noddi iyolo’ do sumangod.

¹ Nosolod noddi om nopomogun-mogunan di tulun dot Israil i tana’ di ponong id koulayon do mantad id Yordan; do mantad id Rantai dot Arnon om pointakad do hilo’d Rantai do Yordan om gisom do hilo’d Nuluhon do Hormon, i ponong id utara. Om naala’ nogi’ diyolo’ o duwo o raja’: ² iri nopo tiso’ om i Sihon, i raja’ do tulun dot Amori, i momorinta’ do hilo’d Hisbon. Kinoiyonon nopo do pinorinta’ dau om songintanga’ do watas do Giliad do mantad hilo’d Aroir (it id dompok do Rantai dot Arnon) om i bandar do hiri’d tanga-tanga’ di rantai, om gisom do hilo’d Bawang do Yabok, it id piwolitan do watas do tulun dot Amon; ³ om kosuang nogi’ o watas di ponong id koulayon do mantad id Yordan do mantad hilo’d Tasik Galilia do poingkaa ponong id salatan om gisom do korikot do hilo’d Bait-Yosimot, i ponong id koulayon do mantad id Rahat do Napatai, gisom do korikot do hilo’d guas do Nuluhon do Pisga. ⁴ Iri nopo tiso’ di raja’ di naala’ do tulun dot Israil, om i Og, i raja’ do pomogunan do Basan. Iyau po o noolu-olu’ dot id pogialatan di tulun do Ropaim. Iyau nopo om momorinta’ do hilo’d Astarot om hilo’d Idroi. ⁵ Kosuang nopod pomorintaan dau om Nuluhon do Hormon, om Salka, om oinsanan o Basan, do gisom do korikot do hilo’d watas do Gosur om Maaka, om kohompit nogi’ o songintanga’ di watas do Giliad, do gisom do hilo’d watas di porintaon di Raja’ Sihon, i mantad id bandar do Hisbon. ⁶ Iti nopo duwo o raja’ diti nga’ naala’ di Musa om i tulun dot Israil di gulu po. Om pinatahak di Musa, i susuhuon do TUHAN, i tana’ di piro-piro o raja’ddi dot id payat do Rubin, om Gad, om songintanga’ do payat do Manasi, do maan do diyolo’d songonuon. ⁷ Om naala’ di Yosua om i tulun dot Israil o koinsanai do raja’ di ponong id kotonobon do mantad id Bawang do Yordan; do mantad hilo’d Baal-Gad, it id Rantai do Libanon, om gisom do korikot do hilo’d Nuluhon dit Aiso’ o Sumuni, di ponong id salatan, it id somok dot Idom. Om bohogio’ no di Yosua i tana’ddi do pinoikid di payat dot Israil, do maan do diyolo’d songonuon. ⁸ Iri nopo tana’ do binahagi’ nga’ kohompit no i watas do konulu-nuluan om i watas do kotidangan do ponong id kotonobon, om i Rantai do Yordan, om i kotidangan di konulu-nuluan do hiri, om i kotidangan do ponong id koulayon, om i watas do tana’ do kowotuan di ponong id salatan. Iri ngai’ nopo watas diri om pinomogunan daa di tulun do Hit, om Amori, om Kanaan, om Poris, om Howi om Yobus. ⁹ - ²⁴ Kogumuon nopo do koinsanai di raja’ do naala’ om tolu nohopod om iso’ o tulun, i mantad id piro-piro o bandar diti: bandar do Yorikou, om Ai (it id toning do Baitol), Yorusalim, Hibron, Yarmut, Lakis, Iglon, Gisir, Dobir, Gidir, Horma, Arad, Libna, Adulam, Makida, Baitol, Tapua, Hipir, Apik, Lasaron, Madon, Hasor, Simron Miron, Aksap, Taanak, Mogido, Kidis, Yokniam (it id toning do Nuluhon do Karmol), Dor (it id tisan do rahat) Goyim (i hilo’d Galilia), om Tirsa.

¹ Molohing noddi kopio i Yosua. Om boro-boros no o TUHAN dot id dau do poingkaa, ’’Molohing ko noddi nga’ ogumu’ po o watas di mositi’ do ngoyon solodo’. ² Koinsanai di watas do Pilistin om Gosur, ³ om oinsanan nogi’ i watas dot Awi, i poingkaa ponong id salatan. (Iri nopo tana’ do mantad id Bawang do Sihor, it id piwolitan do Masir om gisom dot id piwolitan dot Ikron do ponong id utara — om oinsanan nopo do poinsuang do pomogunan do tulun do Kanaan. Om momorinta’ nopodti nga’ i raja’ do Pilistin di hilo’d Gasa, om Asdod, om Askilon, om Gat om Ikron.) ⁴ Haro po it apatut do ngoyon solodo’: koinsanai do pomogunan do Kanaan om Miara (i pomogunan do tulun do Sidon) gisom do hilo’d Apik, it id piwolitan do watas do tulun dot Amori; ⁵ om iri nogi’ i watas do tulun do Gibal, om koinsanai do watas do Libanon om poingkaa ponong id koulayon do mantad hilo’d Baal-Gad, i ponong id salatan do Nuluhon do Hormon om gisom do korikot do hilo’d ralan di kumaa do hilo’d Hamat. ⁶ Om kosuang nogi’ o koinsanai di watas do tulun do Sidon, i momogun-mogun do hilo’d watas do konuluhanan, it id piolitan do konuluhanan do Libanon om bandar do Misripot Maim. Om uyungon ngai’ ku i’ iyolo’ do ngoyon iyolo’ songodo’ di tulun dot Israil. Om ongkibon no o tana’ddi om patahakon no di tulun dot Israil do maan do diyolo’d songonuon do miagal di pinonuhuan mantad ku diya’. ⁷ Om baino’ nodti om ongkibon no ilo tana’ do patahakon dot id siam o payat dot Israil di suwai, om id songintanga’ do payat do Manasi. Om patahakon no dot id diyolo’ do maan do diyolo’d songonuon,’’ ka dau. ⁸ Iri nopo payat do Rubin, om Gad om songintanga’ do payat do Manasi om nakaanu no do tana’ dit id ponong id koulayon, it id soborong do Bawang do Yordan, do pinatahak di Musa, i susuhuon do TUHAN dot id diyolo’. ⁹ Tana’ nopo do naanu diyolo’ nga’ oinsanan o hilo’d Aroir (it id dompok do Rantai dot Arnon), om i bandar di hiri’d tanga-tanga’ di rantai’ddi, om kosuang nogi’ i tana’ dot apatau do mantad hilo’d Modiba om korikot do hilo’d Dibon. ¹⁰ Om poirikot nogi’ dot id wolit do pomogunan dot Amon, om kosuang ngai’ i piro-piro o bandar dit id suang do pomorintaan di Sihon, i raja’ do tulun dot Amori, i nokoumbal do momorinta’ do hilo’d Hisbon di gulu po. ¹¹ Om kohompit po i watas do Giliad, om i tana’ di posorili’ do Gosur om Maaka, om koinsanai di Nuluhon do Hormon, om oinsanan nogi’ o watas do Basan do gisom do korikot do hilo’d Salka. ¹² Om kosuang po do watas diyolo’ i kinoiyonon di pinorinta’ daa di Og, i tulun do Ropaim di kopupuson no do minomorinta’ do hilo’d Astarot om hilo’d Idroi. Naala’ ngai’ no di Musa i piro-piro o bansa’ddi om nouyung dau iyolo’ do mantad id watas diyolo’. ¹³ Nga’ iri po tulun do hilo’d bandar do Gosur om Maaka ot a’ di tulun dot Israil nouyung; om poundorong kasai’ poddi iyolo’ do hilo’d Israil. ¹⁴ Nga’ iri nopo payat do Liwi om a’ no di Musa nonuan do tana’ tu’ kaanu i’ iyolo’ do bohogian di maan do diyolo’d songonuon do mantad id porsombahan di sorobon, do hiri’d pananaraban do porsombahan di don TUHAN, i Kinorohingan dot Israil. Tu’ iyo noddi o pinonuhuan do TUHAN dot id di Musa. ¹⁵ Nakatahak nod i Musa o wookon di tana’ di pinabatos do TUHAN dot id tulun dot Israil, dot id pinuruan do sompiiyon dit id suang do payat do Rubin, do maan do diyolo’d songonuon. ¹⁶ Iri nopo watas do naanu diyolo’ddi om kosuang no ot Aroir (it id dompok do Rantai dot Arnon) om i bandar do hiri’d tanga-tanga’ di rantai’ddi, om kosuang ngai’ nogi’ i tana’ dot apatau di posorili’ do Modiba. ¹⁷ Om kohompit nogi’ o Hisbon om koinsanai di bandar di hiri’d poimpatau: iri nopo kabandaran diri om Dibon, Bamot-Baal, Bait-Baal-Mion, ¹⁸ Yahas, Kidimot, Mopaat, ¹⁹ Kiriataim, Sibma, Sirit-Hasahar, it id timpak di nulu-nulu do hiri’d rantai, ²⁰ Bait-Pior, om i kotidangan do Nuluhon do Pisga, om Bait-Yosimot. ²¹ Om kosuang nogi’ i kabandaran dit id tana’ dot apatau, om koinsanai di watas di pinorinta’ di Sihon, i raja’ do tulun dot Amori, i nokoumbal do momorinta’ do hilo’d Hisbon. Nga’ naala’ i’ di Musa iyau om i pomorinta’ do tulun do Midian. Iyolo’ nopo nga’: i Owi, i Rikim, i Sur, i Hur, om i Riba. Om nokoumbal ngai’ o tulun diti do minomorinta’ do pomogunan diri dot id suang do kuasa’ di Raja’ Sihon. ²² Id pialatan nopo di tulun di pinatai do tulun dot Israil om i Biliam i tanak di Bior, i mogogontong diri. ²³ Wolit nopo do watas di payat do Rubin do ponong id kotonobon om i Bawang do Yordan. Om iri ngai’ no o bandar om kokompungan do pinatahak dot id koinsanai di pinuruan do sompiiyon do payat do Rubin do sumiliu do diyolo’d songonuon. ²⁴ Om pinatahak di Musa o wookon di tana’ di pinabatos do TUHAN dot id tulun dot Israil dot id koinsanai di pinuruan do sompiiyon do payat do Gad do maan do diyolo’d songonuon. ²⁵ Iri nopo watas do naanu diyolo’ddi om kosuang no o Yaisir, om koinsanai di bandar do hilo’d Giliad, om songintanga’ di watas do tulun dot Amon om gisom do korikot do hilo’d Aroir, i ponong id koulayon do mantad id Raba. ²⁶ Om kosuang nogi’ o Hisbon, om Ramat Mispa om Bitonim, om mantad do hilo’d Mahanaim om gisom do korikot do hilo’d wolit do Lodibar. Om kosuang ngai’ nopori do watas do payat do Gad. ²⁷ Om kosuang nopo do watas do Gad do ponong hiri’d Rantai do Yordan om Bait-Haram, om Bait-Nimra, om Sukot, om Sapon, i noolu-olu’ do watas di pinorinta’ di Raja’ Sihon, i mantad hilo’d Hisbon. Om wolit nopo do ponong id kotonobon di watas do Gad om i Bawang do Yordan om poinsulok do gisom do korikot di Tasik Galilia, do ponong id utara. ²⁸ Om iri ngai’ no o bandar om kampung do pinatahak dot id toinsanan di pinuruan do sompiiyon di payat do Gad, do maan do diyolo’d songonuon. ²⁹ Om pinatahak di Musa o wookon di tana’ di pinabatos do TUHAN dot id tulun dot Israil dot id pointikid-tikid do pinuruan do sompiiyon do songintanga’ di payat do Manasi do maan do diyolo’d songonuon. ³⁰ Iri nopo watas do naanu diyolo’ddi nga’ poirikot do hilo’d Mahanaim om kosuang ngai’ no o watas do Basan — koinsanai di watas di pinorinta’ daa di Og, i raja’ do Basan. Om kosuang nogi’ it onom nohopod o kampung do hilo’d Yair, it id watas do Basan. ³¹ Om kosuang nogi’ o songintanga’ do watas do Giliad, om Astarot, om Idroi, i duwo o bandar dot agayo dot id suang do pomorintaan di Raja’ Og dot id watas do Basan di gulu po. Koinsanai nopo o watas diri do pinatahak dot id songintanga’ di pinuruan do sompiiyon di sinakagon di Makir, i tanak di Manasi. ³² Om iyo noddi o pinangangkib di Musa di tana’ di ponong id koulayon do mantad id Yorikou om Bawang do Yordan di hilo’ po iyau id Rantai do Muab. ³³ Nga’ aiso’ i’ o tana’ do pinatahak dau dot id sinakagon do Liwi, tu’ sinunudan dau iyolo’ do bohogian nopo dot aanu diyolo’ om i bahagi’ di porsombahan dot id TUHAN, i Kinorohingan do tulun dot Israil. Om iri no o sumiliu do diyolo’d songonuon.

¹ Om poingkaa no o kinowoyo-woyoo’ do pinangangkib di tana’ do Kanaan di ponong id kotonobon do mantad di Bawang do Yordan dot id tulun dot Israil. Minangangkib nopo di tana’ nga’ i Iliasar it Imam, om i Yosua i tanak di Nun, om i boyoon do mantad id pointikid-tikid do pinuruan do sompiiyon do payat dot Israil. ² Iri nopo tana’ di ponong id kotonobon do mantad di Bawang do Yordan om nundi’ do minamahagi’ dot id siam om satanga’ di payat do tulun dot Israil, tu’ iyo noddi o pinonuhuan do TUHAN dot id di Musa. ³ - ⁴ Iri nopo duwo om satanga’ di payat dot Israil do suwai om noonuan no di Musa do tana’ do ponong id koulayon do mantad id Bawang do Yordan. (Iri nopo sinakagon di Yusup om nabahagi’ do duwo o payat: i payat do Manasi om payat dot Ipraim.) Om iri no payat do Liwi, om a’ no di Musa nonuan do bahagi di tana’. Nga’ nonuan no iyolo’ do piro-piro o bandar do maan do diyolo’d tiyonon om nonuan do kobuturan do paakan-akanan om poiyanan di baanan do sapi’ om dumba’ diyolo’. ⁵ Om iyo noddi o pinamahagi’ di tulun dot Israil di tana’ddi do tuminanud di pinonuhuan do TUHAN dot id di Musa. ⁶ Insan tadau om rikot no o piro-piro tulun do mantad id payat do Yohuda dot id di Yosua do hilo’d Gilgal. Iso’ nopo diyolo’ nga’ i Kalib, i tanak di Yopuni, i mantad id pinuruan do sompiiyon do Kinis. Om boros kad i Kalib dot id di Yosua, ’’Oilaan nu i’ i boros do TUHAN dot id di Musa, i susuhuon do TUHAN diri, di hilo’ pod Kadis Barnia dot iyato goduwo o komoyon. ⁷ Tontok di suhuo’ oku i’ di Musa, i susuhuon do TUHAN diri, do mongoi ponoluku’ do pomogunan diti do mantad hilo’d Kadis Barnia, om apat nogi’ nohopod o toun ku. Om pinoposunud oku i’ dit otopot di nokoguli’ oku. ⁸ Nga’ iri nopo koruhang ku’d suwai do minongoi ponoluku’ om minonompurolosi i’ iyolo’ di tulun dot Israil. Nga’ iyoho’ nopo om otorodok oku i’ do minumboyo’ do TUHAN, i Kinorohingan ku. ⁹ Om iri noddi o kinapabatasan di Musa dot id doho’ do honggo nopo i noulakan do lapap ku om iri no ot aanu ku om aanu di sinakagon ku. ¹⁰ Nga’ baino’ nopoddi om apat noddi nohopod o toun do mantad di poboroso’ id TUHAN iri dot id di Musa. Maso nopoddi om hilo’ pod tana’ do kowotuan o tulun dot Israil do minghombo, nga’ mantad nopoddi om ginompi’ oku id TUHAN do miagal di nakabatos dau. Om poimpasi oku poddi do gisom do baino’. Ontong pogi’! Nga’ walu’ noddi nohopod om limo o toun ku, ¹¹ nga’ okoris oku po do miagal di suhuo’ oku i’ di Musa. Okoris oku po do mongoi sangod om momonsoi do nunu nopo. ¹² Iyo nopoddi, om patahako’ no dot id doho’ i watas do hiri’d konulu-nuluan di nakabatos mantad do TUHAN dot id doho’ do tontok di tadau di pinoporongou oku om i koruhang ku’d suwai do habar di nongoi dahai. Tontok nopoddi om sinunudan dahai iya’ do momogun-mogun do hilo’ i bansa’ dot Inak, it angagayo koulun. Om bandar diyolo’ nga’ angagayo om ongkitolig. Nga’ woyoon oku i’ doti’ do TUHAN om ouyung ku indo iyolo’. Tu’ iyo noddi o nokoboros do TUHAN,’’ ka dau. ¹³ Om barakatai nod i Yosua i Kalib, i tanak di Yopuni. Om patahako’ no dau i bandar do Hibron dot id di Kalib, do maan do dau’d songonuon. ¹⁴ Om gisom piya’d baino’ nga’ iri kasai’ po i sinakagon di Kalib, i tanak di Yopuni, i tulun do Kinis diri, o sanganu do Hibron tu’ notumbayaan i’ iyau do TUHAN, i Kinorohingan do tulun dot Israil. ¹⁵ Nga’ di nopoddi gulu po om roitan do bandar dot Arba o Hibron. (I Arba nopo om osiou kopio dot id pogialatan do tulun do bansa’ dot Inak.) Om osimbayan noddi o pomogunan diri tu’ aiso’ no o pisangadan.

¹ Iri ngai’ i pinuruan do sompiiyon di payat do Yohuda nga’ nakaanu nogi’ do bahagi’ di tana’. Om poingkaa o pinogisaman di watas do naanu diyolo’: Pinogisaman nopo di tana’ do ponong id salatan om it id dompok no kopio do ponong id salatan di tana’ do kowotuan do Sin, i hilo’ nod piwolitan dot Idom; ² do pinoimpuun dot id dompok ponong id salatan di Rahat do Napatai, ³ om kawaya’ di kangkab do nuluhon do hilo’d Akrabim, om gisom do korikot do hilo’d Sin. Om kawaya’ do ponong id salatan do Kadis Barnia, om kawaya’ do hilo’d Hisron, om katakad do hilo’d Adar, om kahamad nogindo do poingkaa do hilo’d Karka. ⁴ Mantad nod hilo’ om poillombus po i wolit do hilo’d Asmon, om poinsusui di palu dit id piwolitan do Masir, om koompok do hilo’d Rahat do Tanga’. Om iyo noddi o wolit di watas do Yohuda do ponong id salatan. Om iri no wolit diri o wolit do koinsanai di pomogunan dot Israil do ponong id salatan. ⁵ Om kogisomon no do watas diri do ponong id koulayon om i Rahat do Napatai, om poillombus i wolit do poingkaa ponong id utara do gisom do korikot do hiri’d tolungan di Bawang do Yordan. Om wolit no do ponong id utara om mimpuun do hiri’d tolungan do Bawang do Yordan, ⁶ om patakadan do hilo’d Bait-Hogla, om poillombus do gisom do hiri’d tisan di Rantai do Yordan. Mantad nod hilo’ om poillombus po kawagu i wolit do ponong id utara do gisom do korikot do hilo’d Watu do Bohan (i Bohan nopo nga’ tanak di Rubin), ⁷ om poillombus po i wolit do hilo’d rantai di roitan do Rantai do Kosusaan om gisom do korikot do hilo’d Dobir, om kahamad po kawagu do ponong id utara do poingkaa do hilo’d Gilgal, it id kinoiyonon di potimbaba’ di kangkab do nuluhon dot Adumim di ponong id salatan do mantad id rantai’ddi. Om mantad nod hilo’ om poillombus po i wolit do gisom do korikot di tudan do waig di roitan dot In Simis, om poillombus po kawagu do hilo’d In Rogil, ⁸ om patakadan nogindo do kawaya’ di Rantai do Hinom do kumaa ponong id salatan di nulu-nulu, om i kinoiyonon do Yorusalim, i bandar do tulun do Yobus. Om mantad nod hilo’ om pointakad i wolit do poingkaa do hiri’d timpak di nulu-nulu’ddi, i ponong id kotonobon do mantad id Rantai do Hinom, it id dompok ponong id utara di Rantai do Ropaim, ⁹ om poillombus po kawagu do hilo’d tudan do waig di roitan do Mi-Niptua, om gisom do korikot do hiri’d kabandaran dit id toning di Nuluhon dot Ipron. Om mantad nod hilo’ om humamad no i wolit do poingkaa do hilo’d Baala (i roitan do Kiriat Yiarim), ¹⁰ om pointutuk do ponong id kotonobon do mantad id Baala, i ponong hiri’d Konuluhanan dot Idom, om poillombus po do hilo’d ponong id utara di Nuluhon do Yiarim (i roitan do Nuluhon do Kisalon), om poruhukan nondo do hilo’d Bait-Simis, om gisom do korikot do hilo’d Timna. ¹¹ Om mantad nod hilo’d Timna, om poillombus po i wolit do hilo’d ponong id utara dot Ikron, om humamad nogindo do kumaa ponong hilo’d Sikron do kawaya’ di Nuluhon do Baala, om poillombus do hilo’d Yabniil, om koompok do hilo’d Rahat do Tanga’. ¹² Om iyo noddi o pinogisaman di watas do Yohuda do ponong id kotonobon. Poiyonon nopo do hiri’d watas diri nga’ i pinuruan do sompiiyon di payat do Yohuda. ¹³ Iri nopo sombohogian di watas do Yohuda om pinatahak dot id di Kalib, i tanak di Yopuni, i mantad id payat do Yohuda, do tumanud di pinonuhuan do TUHAN dot id di Yosua. Om pinatahak po dot id di Kalib i bandar do Hibron, i bandar di Arba di gulu po. I Arba nopo om tapa’ di Inak. ¹⁴ Sinakagon nopo di Inak om tulun do: Sosai, Ahiman, om Talmai. Om nouyung ngai’ nod i Kalib iyolo’ddi do mantad hilo’d Hibron. ¹⁵ Om mantad nod hilo’ om tilombus po kawagu i Kalib do minongoi panangod di tulun di poingiyon do hilo’d Dobir. (Bandar nopodti di gulu po om roitan do Kiriat Sipir.) ¹⁶ Om boros ka di Kalib, ’’Isai nopo o kusai di kosolod do Kiriat Sipir om pokowinon ku no di Aksa, i tanak ku’d tondu’,’’ ka dau. ¹⁷ Om kosolod noddi di Otniol, i tanak di Kinas, i bandar diri. I Otniol nopo nga’ tanak di Kinas, i tobpinai di Kalib. Om pokowinai noddi di Kalib di Otniol, i Aksa, i tanak dau’d tondu’. ¹⁸ Tontok nopo di tadau do kinopikowinan diyolo’ om sansagai no di Otniol i Aksa do mokianu di tapa’ dau do songkoiyonon o tana’. Om lintuhun no i Aksa do mantad hiri’d kaladai dau. Om uhoto’ no iyau di tapa’ dau, ’’Nokuro’ri?’’ ka dau. ¹⁹ Om boros ka di Aksa do suminimbar, ’’Haro no daa i tana’ di nakatahak nu doho’ nga’ hilo’ id kinoiyonon dit aiso’ o waig. Om onuan oku po daa do piro-piro o tudan do waig,’’ ka dau. Om patahako’ no di Kalib di Aksa i tudan do waig di hiri’d sokid om i hiri’d siba’. ²⁰ Iti no ngai’ o bandar do naanu di pinuruan do sompiiyon do payat do Yohuda do maan do diyolo’d songonuon. ²¹ - ³² Iri nopo kabandaran dit id sodu’ kopio do ponong id salatan di naanu do payat do Yohuda, it id piwolitan dot Idom om duwo nohopod om siam o bandar do kohompit ngai’ i kokompungan di hiri’d posorili’. Iri nopo kabandaran diri om: Kabsiil, Idir, Yagur, Kina, Dimona, Adada, Kidis, Hasor, Itnan, Sip, Tilim, Bialot, Hasor-Hadata, Kiriot-Hisron (ko’ Hasor), Amam, Sima, Molada, Hasar-Gada, Hismon, Bait-Pilit, Hasar-Sual, Borsiba, Baala, Iyim, Isim, Iltolad, Kosil, Horma, Siklag, Madmana, Sansana, Libaot, Silhim, Ain, om Rimon. ³³ - ³⁶ Iri nopo kabandaran dit id guas di nulu-nulu do kosuang ngai’ i kokompungan do hiri’d posorili’, om hopod om apat o bandar dot oinsanan. Iri nopo kabandaran diri om: Istaol, Sora, Asna, Sanoa, In Ganim, Tapua, Onam, Yarmut, Adulam, Soko, Asika, Saaraim, Aditaim, Godira, om Godirotaim. ³⁷ - ⁴¹ Haro po kawagu o hopod om onom o bandar do naanu di payat do Yohuda, do kosuang ngai’ i kokompungan do hiri’d posorili’. Iri nopo kabandaran diri om: Sinan, Hadasa, Migdal-Gad, Dilian, Mispa, Yoktiil, Lakis, Boskat, Iglon, Kabon, Lamas, Kitlis, Gidirot, Bait-Dagon, Naama, om Makida. ⁴² - ⁴⁴ Om haro po kawagu o siam o bandar do poinsuang di watas do Yohuda, do kosuang ngai’ i kokompungan do hiri’d posorili’. Iri nopo kabandaran diri om: Libna, Itir, Asan, Yipta, Asna, Nosib, Kohila, Aksib om Marisa. ⁴⁵ Suwai no ko’ iri om kosuang po ot Ikron om i kokompungan om kawalayan do hiri’d posorili’, ⁴⁶ om koinsanai di bandar om i kampung di hiri’d somok dot Asdod, do mantad hilo’d Ikron om korikot do hilo’d Rahat do Tanga’. ⁴⁷ Om kosuang nogi’ i bandar dot Asdod om Gasa om i kokompungan om kawalayan di pointongkop nopo do gisom do hiri’d somok di palu dit id piwolitan do Masir om i tisan do Rahat do Tanga’. ⁴⁸ - ⁵¹ Ponong hiri nod watas do konulu-nuluan om naanu di payat do Yohuda o hopod om iso’ o bandar do kosuang ngai’ i kokompungan do hiri’d posorili’. Iri ngai’ nopo bandar diri om: Samir, Yatir, Soko, Dana, Kiriat Sana (ko’ Dobir), Anab, Istimoa, Anim, Gusin, Holon, om Gilon. ⁵² - ⁵⁴ Haro po o siam kawagu o bandar do naanu do payat do Yohuda, do kosuang ngai’ i kokompungan do hiri’d posorili’. Iri ngai’ nopo bandar diri om: Arab, Duma, Isan, Yanum, Bait-Tapua, Apika, Humta, Kiriat-Arba (ko’ Hibron), om Sior. ⁵⁵ - ⁵⁷ Om haro po kawagu o hopod o bandar do naanu diyolo’ do kosuang ngai’ i kokompungan di hiri’d posorili’. Iri ngai’ nopo bandar diri om: Maon, Karmol, Sip, Yuta, Yisriil, Yokdiam, Sanoa, Kain, Gibia, om Timna. ⁵⁸ - ⁵⁹ Om haro po ot onom o bandar do naanu diyolo’ do kosuang ngai’ i kokompungan di hiri’d posorili’. Iri ngai’ nopo bandar diri om: Halhul, Bait-Sur, Gidor, Maarat, Bait-Anot, om Iltikon. ⁶⁰ Om iti nogi’ duwo o bandar nga’ naanu i’ diyolo’ do kosuang ngai’ i kokompungan di hiri’d posorili’: i bandar do Kiriat Baal (ko’ Kiriat Yiarim) om bandar do Raba. ⁶¹ - ⁶² Ponong hiri nod tana’ do kowotuan om naanu di payat do Yohuda ot onom o bandar do kohompit ngai’ i kokompungan di hiri’d posorili’. Iri ngai’ nopo bandar diri om: Bait-Araba, Midin, Sokaka, Nibsan, Bandar do Silaon, om In-Gidi. ⁶³ Nga’ iri nopo tulun do Yobus, i poingiyon do hilo’d Yorusalim om a’ i’ di sinakagon di Yohuda nuyung. Om poinsugku’ poddi kasai’ iyolo’ do payat do Yohuda do hilo’d Yorusalim do gisom do baino’.

¹ Pinogisaman nopo di tana’ di pinatahak dot id payat do Yusup om mantad hilo’d Bawang do Yordan, i hiri’d somok do Yorikou, i ponong id koulayon do mantad di piro-piro tudan do waig do hilo’d Yorikou om korikot do hilo’d tana’ do kowotuan. Mantad nod hilo’d Yorikou om pinatakad i wolit do gisom do korikot do hilo’d Baitol, i hiri’d watas do konulu-nuluan. ² Om mantad nod hilo’d Baitol om poillombus i wolit do hilo’d Lus om kawaya’ dot Atarot, i pomogun-mogunan do tulun dot Arki. ³ Om mantad nod hilo’ om pinakaa i wolit do ponong id kotonobon, i hilo’d watas do tulun do Yaplit, om poirikot do hilo’d Bait-Horon-dit-id-Sawa’. Om mantad nod hilo’ om poillombus po i wolit do hilo’d Gisir, om koompok do hilo’d Rahat do Tanga’. ⁴ Iri no o watas do pinatahak dot id payat do Manasi om Ipraim, i maan do sinakagon di Yusup do diyolo’d songonuon. ⁵ Iti no o kogisomon do tana’ di pinatahak dot id koinsanai di pinuruan do sompiiyon dot id suang do payat dot Ipraim. Wolit nopo do ponong id koulayon om mimpuun do hilo’d Atarot Adar om gisom do korikot do hilo’d Bait-Horon-dit-id-Sarayo. ⁶ Om mantad nod hilo’ om poingkaa i wolit do hilo’d Rahat do Tanga’. Om ponong id utara nopo om Mikmitat. Om ponong id koulayon no om poinghamad i wolit do poingkaa do hilo’d Taanat Silo. Om kawaya’ di bandar diri i wolit do ponong id koulayon do kumaa do hilo’d Yanua. ⁷ Om mantad nod hilo’ om pinoruhuk i wolit do hilo’d Atarot om hilo’d Naharat, gisom do korikot do hilo’d Yorikou om koompok nogindo do hilo’d Bawang do Yordan. ⁸ Om pinogisaman no di watas do ponong id kotonobon om mimpuun do hilo’d Tapua om gisom do korikot di palu do Kana om koompok do hilo’d Rahat do Tanga’. Iri no o tana’ do pinatahak dot id koinsanai do pinuruan do sompiiyon di payat dot Ipraim do sumiliu do diyolo’d songonuon. ⁹ Om kosuang ngai’ nogi’ i kokompungan dot agayo om okoro’ dit id watas do payat do Manasi. ¹⁰ Nga’ a’ i’ di payat dot Ipraim nouyung i tulun do Kanaan, i poingiyon do hilo’d Gisir. Om iri nopo tulun do Kanaan diri nga’ poirolot kasai’ i’ diti payat dot Ipraim, nga’ sinansagan no maddi iyolo’ do kumaraja’ dot id tulun dot Ipraim.

¹ Iri nopo songintanga’ di tana’ di ponong id kotonobon do mantad id Bawang do Yordan om pinatahak dot id songintanga’ di pinuruan do sompiiyon di sinakagon di Manasi, i tanak di Yusup do kotuahan. Tanak nopo di Manasi dot id dotuo om i Makir. I Makir nopo om tapa’ di Giliad. Om i Makir nopo nga’ sumasangod dit osiou kopio. Om iri noddi o kinapatahakan dot id di Makir do watas do Giliad om Basan, i ponong id koulayon do mantad id Bawang do Yordan. ² Iri nopo tana’ di ponong id kotonobon do mantad id Bawang do Yordan om pinatahak dot id pinuruan do sompiiyon di Abiosor, om i Hilik, om i Asriol, om i Sikim, om i Hipir om i Somida. Iyolo’ ngai’ nopo nga’ sinakagon di tangaanak do tongokusai di Manasi, i tanak di Yusup. Om iyolo’ no o nongosiliu do boyoon do pinuruan do sompiiyon. ³ I Hipir nopo om tanak di Giliad, om tapa’ nod i Giliad om i Makir, i tanak di Manasi. Tanak nopo di Hipir om i Silapihad; om tongoondu’ ngai’ nopo o tanak dau, om aiso’ i’ o tanak dau’d kusai. Ngaran nopo diyolo’ om: i Mala, i Noa, i Hogla, i Milka, om i Tirsa. ⁴ Om ongoi no i tangaanak di Silapihad do tongoondu’ solowot di Iliasar, it Imam, om i Yosua i tanak di Nun, om koinsanai di boyoon do tulun dot Israil. Om boros ka diyolo’, ’’Nosuhu’ id TUHAN i Musa do manahak dahai do tana’ do sumiliu do dahai’d songonuon do miagal do koobpinayan dahai di tongokusai tu’ onuan i’ do tana’ do sumiliu do diyolo’d songonuon,’’ ka. Om nonuan iddi iyolo’ do tana’ do miagal di koobpinayan diyolo’ di tongokusai do tumanud di ponuhuan do TUHAN. ⁵ Om iri noddi o nakaanu-anu di Manasi do hopod o bohogian do tana’ do suwai ko’ i hilo’d Giliad om i hilo’d Basan, i ponong id koulayon do mantad id Bawang do Yordan, ⁶ tu’ i tangaanak dau do tongokusai om tongoondu’ nga’ nakaanu ngai’ i’ do tana’. Nga’ iri nopo tana’ do hilo’d Giliad om pinatahak dot id sinakagon di Manasi do suwai. ⁷ Pinogisaman nopo do watas do payat do Manasi om mimpuun do hilo’d Asor gisom do korikot do hilo’d Mikmitat, i ponong id koulayon do mantad id Sikim. Om mantad nod hilo’ om pinoruhuk i wolit do kumaa ponong id salatan do gisom do korikot do hilo’d watas do tulun dot In Tapua. ⁸ Watas nopo do Tapua om di Manasi i’, nga’ iri nopo bandar do Tapua, it id wolit do pomogunan diri, om nasanganu no di sinakagon di Ipraim. ⁹ Om mantad nod hilo’ om poruhuko’ po kawagu i wolit do watas do payat do Manasi gisom do korikot do hiri’d palu do Kana. Iri ngai’ nopo i bandar di ponong id salatan di palu’ddi om di Ipraim i’, do mulong piya do hiri ngai’d watas di payat do Manasi i bandar diri. Om poillombus po i wolit do watas do Manasi do poinsusui di palu do poingkaa ponong id utara, om koompok do hilo’d Rahat do Tanga’. ¹⁰ Naanu nopo di payat dot Ipraim om ponong id salatan, om naanu no di payat do Manasi om ponong id utara. Om i Rahat do Tanga’ o wolit diyolo’ do ponong id kotonobon. Poinronit nopo do watas do Manasi dot id utara ponong id kotonobon om i watas dot Asor, om poinronit no dot id utara di ponong id koulayon om i watas dot Isakar. ¹¹ Id suang nopo do watas dot Isakar om watas dot Asor om haro po o piro-piro o kinoiyonon do tana’ do payat do Manasi o sanganu, iri no i hilo’d Bait-Sian om Yibliam om kohompit ngai’ i kokompungan dot id posorili’ di kinoiyonon diri. Om kosuang nogi’ o Dor (bandar dot id toning do tisan do rahat) om Indor, Taanak, Mogido, om koinsanai di kampung do hiri’d posorili’. ¹² Nga’ a’ i’ nokouyung di tulun mantad do hiri’d kabandaran diri i payat do Manasi. Om hilo’ poddi kasai’ i tulun do Kanaan. ¹³ Om mulong piya dot okoris daa’ddi i tulun dot Israil nga’ a’ kasai’ i’ diyolo’ nouyung i tulun do Kanaan nga’ nasansagan i’ ma diyolo’ i tulun do Kanaan do kumaraja’ dot id diyolo’. ¹⁴ Om boros kaddi di sinakagon di Yusup, dot id di Yosua, ’’Nokuro tu’ songkoiyonon no o tana’ do patahakon nu dahai? Ogumu’ tomod iyahai’dti tu’ binarakatan i’ iyahai’d TUHAN,’’ ka diyolo’. ¹⁵ Om boros ka di Yosua do suminimbar, ’’Ondung ogumu’ kopio kou gisom dot a’ orumpos do hilo’d konulu-nuluan dot Ipraim, om ongoi kou no do hilo’d gouton dot id watas do tulun do Poris om Ropaim. Om ngoyon no dokoyu riliko’ i hilo’d kopuruan do watas diyolo’,’’ ka dau. ¹⁶ Om boros ka diyolo’ do suminimbar, ’’A’ i’ dahai kabagal i hilo’d konulu-nuluan, nga’ iri nopo tulun do Kanaan di momogun-mogun do hilo’d rantai om ongkikorita’ do basi’, om miagal nogiddi i tulun do Kanaan do hilo’d Bait-Sian om i hilo’d piro-piro o kampung di posorili’, om i nogi’ i tulun do momogun-mogun do hilo’d Rantai do Yisriil,’’ ka. ¹⁷ Om boros ka di Yosua dot id payat dot Ipraim om id payat do Manasi di ponong id kotonobon, ’’Otopot nogi’ dot asapou kou om ongokoris kou koulun. Om kaanu kou i’ do lobi ko’ iso’ o koiyonon do tana’. ¹⁸ Ngoyon nopo dokoyu onuo’ i hilo’d watas do konulu-nuluan. Om mulong piya do pogouton po daa tomod ilo’, nga’ alanggaan indo dokoyu om asanganu ngai’ dokoyu. Om ouyung i’ dokoyu i tulun do Kanaan do mulong piya dot ongkikorita’ iyolo’ do basi’ om ongokoris koulun,’’ ka dau.

¹ Tontok di nosolod do tulun dot Israil i pomogunan di pinabatos do TUHAN, om timung no o koinsanai di tulun dot Israil do hilo’d Silo. Om powonsoyo’ no diyolo’ do hilo’ i Kiim do TUHAN. ² Nga’ haro po o turu’ o payat do bansa’ dot Israil dot a’ po nobohogian do tana’. ³ Om boros kaddi di Yosua dot id tulun dot Israil, ’’Songkuro po koloido’ om ngoyon nogi’ dokoyu pomogun-mogunai i tana’ do pinatahak do TUHAN, i Kinorohingan do taki-aki dokoyu, dot id dokoyu? ⁴ Pomili’ kou no do tolu o tulun do mantad id pointikid-tikid do payat. Om suhuon ku’ndo iyolo’ do mongoi hombo diti pomogunan do mikuwo’d monukat do pogisaman do watas di korohian diyolo’ do manganu. Om pogulian nogindo diyolo’ dot id doho’. ⁵ Iri nopo tana’ddi om bohogion do turu’ o bohogian do patahakon diyolo’. Di Yohuda nopo om iri kasai’ no i watas dau di ponong id salatan, om di Yusup nga’ iri kasai’ no i watas dau di ponong id utara. ⁶ Om tulison no dokoyu i pogisaman di turu’ o bohogian di tana’ddi om patahakon no dot id doho’. Om undion ku nogindo do mongilo do korohian do TUHAN, i Kinorohingan, do bagi dokoyu. ⁷ Iri nopo payat do Liwi om a’ i’ kaanu do tana’ do miagal dokoyu, tu’ bohogian nopo diyolo’ om sumiliu dot imam di momonsoi’d karaja’ do TUHAN. Iri no i payat do Gad, om payat do Rubin, om payat do Manasi di ponong id koulayon, om nakaanu no do bohogian do tana’ do ponong id koulayon do mantad id Bawang do Yordan; i tana’ do pinatahak di Musa, i susuhuon do TUHAN dot id diyolo’,’’ ka dau. ⁸ Om bilinai noddi di Yosua i tulun do poingkaa, ’’Tumongkop kou nodti pomogunan om sukaton no i tana’, om pogulian nogindo dokoyu dot id doho’. Om undion ku nogindo do hiti’d Silo do mongilo do korohian do TUHAN do bagi dokoyu,’’ ka. Om pamanau noddi iyolo’ do minongoi hombo di pomogunan do mongoi ponukat di tana’ di nobilinan iyolo’ di Yosua. ⁹ Om ongoi no tongkop di pomogunan i piro-piro o tulun diri. Om tuliso’ no diyolo’ i pinogisaman di turu’ o bohogian di tana’ om tinulis ngai’ nogi’ i piro-piro o bandar di nokosuang di tana’. Om poguliai noddi diyolo’ do hiri’d di Yosua do hilo’d Silo. ¹⁰ Om undio’ noddi di Yosua do mongilo do korohian do TUHAN do bagi diyolo’. Om patahako’ no di Yosua i tana’ dot id pointikid-tikid do payat dot Israil dit a’ po nakaanu do bohogian do tana’. ¹¹ Id gulu nopo do nakaanu do bohogian do tana’ om iri ngai’ i sompiiyon dot id suang do payat do Binyamin. Tana’ nopo diyolo’ nga’ id piolitan do tana’ di payat do Yohuda om i tana’ do payat di sinakagon di Yusup. ¹² Pinogisaman nopo do tana’ diyolo’ do ponong id utara om pinoimpuun do hiri’d Bawang do Yordan. Om pointakad di tidong di ponong id utara do Yorikou, om iri no wolit di tana’ di poingkaa ponong id kotonobon om kawaya’ di watas do konulu-nuluan do gisom do korikot do hilo’d tana’ do kowotuan do Bait-Awon. ¹³ Om poillombus po kawagu i wolit diri do hiri’d tidong di ponong id salatan do Lus (i roitan nogi’ do Baitol), om poiruhuk i wolit do hilo’d Atarot Adar, i hilo’d nuluhon di ponong id salatan do Bait-Horon-dit-id-Sawa’. ¹⁴ Mantad no do ponong id kotonobon do nuluhon diri, om pahamadon i wolit di tana’ do ponong id salatan do poingkaa do hilo’d Kiriat Baal (ko’ Kiriat Yiarim.) Kiriat Baal nopo nga’ payat do Yohuda o sanganu. Iri no o wolit di tana’ do ponong id kotonobon. ¹⁵ Wolit no di tana’ do ponong id salatan om tumimpuun do mantad hiri’d dompok do Kiriat Yiarim om gisom do hiri’d piro-piro o tudan do waig do Mi-Niptua. ¹⁶ Om poruhukon nondo i wolit do hiri’d guas do nuluhon di potimbaba’ di Rantai do Hinom, it id dompok ponong id utara di Rantai do Ripaim. Om pokoyoon no do ponong id salatan om pawayaon di Rantai do Hinom, i ponong id salatan di kangkab do konulu-nuluan do hilo’d pomogunan do Yobus, om poingkaa po do hilo’d In Rogil. ¹⁷ Mantad nod hilo’ om pahamadon i wolit do hilo’d ponong id utara do poingkaa do hilo’d Insimis, om poillombus do hilo’d Golilot, it id soborong do Takadon dot Adumim. Om poruhukon nogindo i wolit do hilo’d Watu do Bohan (i Bohan nopo nga’ tanak di Rubin), ¹⁸ om pawayaon i wolit do ponong id utara di guas do nuluhon di potimbaba’ do Rantai do Yordan. Om poruhukon i wolit do hiri’d rantai. ¹⁹ Om pawayaon i wolit do ponong id utara di guas do Nuluhon do Hogla, om koompok nondo do ponong id utara do piolungan do Rahat do Napatai om Bawang do Yordan. ²⁰ Wolit nopo do ponong id koulayon om i Bawang do Yordan. Om iri no o wolit do tana’ do naanu ngai’ di sompiiyon do payat do Binyamin do sumiliu do diyolo’d songonuon. ²¹ Iri nopo bandar do naanu ngai’ di sompiiyon dot id suang do payat do Binyamin, om Yorikou, Bait-Hogla, Imik-Kosis, ²² Bait-Araba, Somaraim, Baitol, ²³ Haawim, Para, Opra, ²⁴ Kipar-Haamonai, Opni om Giba. Hopod om duwo o bandar do toinsanan om kosuang po i kokompungan do hiri’d posorili’. ²⁵ Om kosuang po o bandar do Gibion, Rama, Biirot, ²⁶ Mispa, Kopira, Mosa, ²⁷ Rikim, Yirpiil, Tarala, ²⁸ Sila, Ilip om Yobus (ko’ Yorusalim), Gibia om Kiriat Yiarim. Hopod om apat o bandar dot oinsanan om kosuang po i kokompungan do hiri’d posorili’. Om iri no o pomogunan do naanu ngai’ di sompiiyon dot id suang do payat do Binyamin do maan do diyolo’d songonuon.

¹ Iri nopo koduwo do nakaanu do bahagi’ di tana’ om iri ngai’ i sompiiyon dot id suang do payat do Simion. Iti nopo tana’ diyolo’ om poiralad do hiri’d suang di watas do payat do Yohuda. ² Om bandar nopo do pinatahak dot id diyolo’ om Borsiba, Siba, Molada, ³ Hasar-Sual, Bala, Isim, ⁴ Iltolad, Bitul, Horma, ⁵ Siklag, Bait-Hamarkabot, Hasar-Susa, ⁶ Bait-Libaot, om Saruhon. Hopod om tolu o bandar dot oinsanan om kosuang po i kokompungan di hiri’d posorili’. ⁷ Om kosuang po o bandar dot Ain, Rimon, Itir, om Asan. Apat o bandar do toinsanan om kosuang po o kokompungan do hiri’d posorili’. ⁸ Om kosuang ngai’ nopo i kokompungan do hiri’d posorili’ di piro-piro o bandar diri, do gisom do korikot do hilo’d Baalat-Biir (ko’ Rama) i ponong id salatan. Iri no i tana’ do pinatahak dot id sompiiyon dit id suang do payat do Simion do maan do diyolo’d songonuon. ⁹ Iri nopo sombohogian di tana’ do payat do Simion diti nga’ nanu do mantad id tana’ do Yohuda. Tu’ nadalaan kopio kagayo o tana’ do naanu do Yohuda. Om iri noddi o kinapatahakan do sombohogian di tana’ do Yohuda dot id payat do Simion. ¹⁰ Iri no kotolu do nakaanu do tana’ om iri ngai’ i sompiiyon dot id suang do payat do Sibulon. Iri nopo tana’ do naanu diyolo’ om poirikot do hilo’d Sarid. ¹¹ Wolit nopo do ponong id kotonobon om poingkaa do hilo’d Marala, om koronit do Dabisit om i palu do ponong id koulayon do mantad id Yokniam. ¹² Wolit no do ponong id koulayon om mantad hilo’d Sarid om poingkaa do hilo’d wolit do Kislot Tabor, om poillombus po i wolit do hilo’d Dobrat om pointakad do hilo’d Yapia. ¹³ Om mantad nod hilo’ om poillombus po i wolit do ponong id koulayon do gisom do korikot do hilo’d Gat-Hipir om Itkasin, om poinghamad do poingkaa ponong id Nia, do poirikot do hilo’d Rimon. ¹⁴ Wolit no do ponong id utara om poinghamad do hilo’d Hanaton, om koompok do hilo’d Rantai do Yiptail. ¹⁵ Om kosuang nopo di tana’ om bandar do: Katat, Nahalal, Simron, Yidala, om Baitlahim. Hopod om duwo o bandar do toinsanan om kosuang po i kokompungan do hiri’d posorili’. ¹⁶ Iri nopo kabandaran om i kokompungan diri om id suang di watas di pinatahak dot id sompiiyon dit id suang do payat do Sibulon. ¹⁷ Iri no kaapat do nonuan do tana’ om iri ngai’ i sompiiyon dot id suang do payat dot Isakar. ¹⁸ Kosuang nopo di tana’ diyolo’ om bandar do: Yisriil, Kosulot, Sunim, ¹⁹ Hoparaim, Sion, Anaharat, ²⁰ Rabit, Kision, Ibis, ²¹ Rimit, In-Ganim, In-Hada, om Bait-Pasis. ²² Wolit nopo di tana’ diyolo’ om koronit do bandar do Tabor, Sahasima, om Bait-Simis, om koompok nondo do hilo’d Bawang do Yordan. Nokosuang nopo do watas diyolo’ om hopod om onom o bandar do toinsanan om kosuang po i kokompungan do hiri’d posorili’. ²³ Iri nopo kabandaran om i kokompungan diri om poinsuang do hiri’d watas di pinatahak dot id sompiiyon dit id suang do payat dot Isakar do maan do diyolo’d songonuon. ²⁴ Iri no kolimo do nonuan do tana’ om iri ngai’ i sompiiyon dot id suang do payat dot Asor. ²⁵ Kosuang nopo do tana’ diyolo’ om bandar do: Hilkat, Hali, Bitin, Aksap, ²⁶ Alamilik, Amad, om Misal. Wolit nopo do ponong id kotonobon om poinronit do Karmol om Bawang do Libnat. ²⁷ Mantad nod hilo’ om poinghamad i wolit do ponong id koulayon, do poingkaa do hilo’d Bait-Dagon, i poinronit do watas do Sibulon om Rantai do Yiptail, om poingkaa ponong id utara do poirikot do hilo’d Bait-Imik om Nohiol. Om potilombus po i wolit do ponong id utara do poingkaa do hilo’d Kabul, ²⁸ Ibron, Rihob, Hamon, om Kana do gisom do korikot do hilo’d Sidon. ²⁹ Mantad nod hilo’ om poinghamad po i wolit do poingkaa do hilo’d Rama, om poillombus do hilo’d bandar do Tirus, i bandar di kitolig; om poinghamad po kawagu i wolit do poingkaa do hilo’d Hosa, om koompok do hilo’d Rahat do Tanga’. Bandar nopo dot id suang do tana’ddi om Mahalab, Aksib, ³⁰ Uma, Apik, om Rihob. Kosuang nopo do watas diyolo’ nga’ duwo nohopod om duwo o bandar om kosuang ngai’ po i kokompungan di hiri’d posorili’. ³¹ Iri no ngai’ i kabandaran om i kokompungan di nokosuang di watas di pinatahak dot id toinsanan di sompiiyon dit id suang do payat dot Asor do maan do diyolo’d songonuon. ³² Iri no koonom do nonuan do bahagi’ di tana’ om iri ngai’ i sompiiyon dot id suang do payat do Naptali. ³³ Pinoimpuunan nopo do wolit di tana’ diyolo’ om hilo’d Ilip, do mantad di koguasan do kayu do hilo’d Saanaim, om poillombus i wolit do hilo’d Adami Nikib, om hilo’d Yabniil, om gisom do hilo’d Lakum, om koompok do hilo’d Bawang do Yordan. ³⁴ Mantad nod hilo’ om poinghamad i wolit do ponong id kotonobon do hilo’d Asnot Tabor; om mantad nod hilo’ om poingkaa i wolit do hilo’d Hukok, i poinronit do watas do Sibulon do ponong id salatan om poinronit dot Asor do ponong id kotonobon, om wolit no do ponong id kotonobon, om i Bawang do Yordan. ³⁵ Iri nopo bandar dot ongkitolig om Sidim, Sor, Hamat, Rakat, Kinirit, ³⁶ Adama, Rama, Hasor, ³⁷ Kidis, Idroi, In-Hasor, ³⁸ Yiron, Migdalil, Horim, Bait-Anat, om Bait-Simis. Hopod om siam o bandar do toinsanan om kosuang ngai’ po i kokompungan di hiri’d posorili’. ³⁹ Iri no ngai’ i kabandaran om i kokompungan di nokosuang do watas di pinatahak dot id sompiiyon dot id suang di payat do Naptali, do maan do diyolo’d songonuon. ⁴⁰ Iri nopo koturu’ do nonuan do bahagi’ di tana’ om iri ngai’ i sompiiyon dit id suang do payat do Dan. ⁴¹ Kosuang nopo di watas diyolo’ om bandar do Sora, Istaol, Irsimis, ⁴² Saalabin, Ayalon, Yitla, ⁴³ Ilon, Timna, Ikron, ⁴⁴ Iltiki, Gibiton, Baalat, ⁴⁵ Yohud, Binibirak, Gat-Rimon, ⁴⁶ Miyarkon, Rakon, om kosuang nogi’ i tana’ do hiri’d somok do Yopi. ⁴⁷ Iri nopo payat di Dan om a’ iddi nokopomogun-mogun do hiri’d sombohogian di watas diyolo’. Om ongoi no iyolo’ do hilo’d Lisim do minongoi panangod di bandar diri. Om nosolod iddi diyolo’ i bandar diri om napatai diyolo’ i tulun do poingiyon do hiri om pomogun-mogunai noddi diyolo’ i bandar. Om powoliho’ no diyolo’ o ngaran di bandar do Lisim om pungaranai no do Dan, do pinasangai di Dan, i taki-aki diyolo’. ⁴⁸ Om iri ngai’ no i bandar om kokompungan do nokosuang di watas do pinatahak dot id koinsanai di sompiiyon dit id suang do payat do Dan do maan do diyolo’d songonuon. ⁴⁹ Kopongo poddi i tulun dot Israil do mogibahagi-hagi’ di tana’ om onuwai no diyolo’ i Yosua, i tanak di Nun, do sombohogian di tana’ do maan do dau’d songonuon. ⁵⁰ Om patahako’ no diyolo’ di Yosua i bandar do pinokianu dau, iri no i bandar do Timnat Sira, i hilo’d konulu-nuluan dot Ipraim, tu’ iyo’ noddi o pinonuhuan do TUHAN. Om wonsoyo’ no kawagu di Yosua i bandar diri om iyon no iyau do hiri. ⁵¹ Om iyo noddi o pinamahagi’ di Iliasar, it Imam diri, om i Yosua i tanak di Nun, om i piro-piro o boyoon do sompiiyon do payat dot Israil, di tana’ do hiri’d pomogunan diri. Om nundi’ diyolo’ do minamahagi’ i tana’ddi do hilo’d Silo, do hiri’d wawayaan di Kiim do TUHAN, do mongilo do korohian do TUHAN do bagi’ diyolo’. Om kopongo noddi do mamahagi’ i tana’ddi.

¹ Om suhuo’ nod TUHAN i Yosua do momisunud do tulun dot Israil do poingkaa, ² ’’Nosuhu’ ku no i Musa do momisunud dokoyu do pasal di bandar do pogintirungan. Iti nopo nga’ bandar di ngoyon do tulun di mogidu’, om ointirungan i’ iyolo’. Om pilio’ no dokoyu i piro-piro bandar do silihon do bandar do pogintirungan. ³ Iri nopo tulun do nakapamatai do tulun do suwai dot a’ dau tinomod, om milo i’ do mongoi dot id bandar diri om a’ i’ apatai di tulun di sumuli’ daa dau. ⁴ Milo i’ iyau do mongoi do hiri’d bandar do pogintirungan om mongoi do hiri’d kinoiyonon do momutus, i hiri’d wawayaan di bandar. Om susuyon nondo dau dot id piro-piro o boyoon ondung poingkukuro o kinowoyo-woyoo’ di nowonsoi dau. Om pologoson indo iyau di piro-piro o boyoon do sumuang di bandar om onuan iyau do tiyonon dot undorongon dau. ⁵ Ondung mongoi i tulun di sumuli’ daa dau do hiri’d bandar diri om a’ indo di tulun do hiri’d bandar patahakon i tulun do nakapamatai’ddi dot id tulun di sumuli’. Om mositi’ no dot intirungan diyolo’ i tulun diri tu’ nakapamatai daa iyau do sompi’ ko’ tulun dot Israil nga’ a’ i’ dau tinomod, om okon i’ ko’ araatan iyau di tulun. ⁶ Pologoson nopo iyau do poundorong do hiri do gisom dot obutusan iyau dot id toguang do tulun dot ogumu’ om gisom dot apatai i tulun do nosiliu dot imam dot agayo do maso’ddi. Om pologoson nogindo iyau do muli’ do hiri’d kampung dau mantad, i tadon dau do minogidu’,’’ ka dau. ⁷ Om pilio’ noddi diyolo’ o piro-piro bandar do maan do bandar do pogintirungan. Om iti no ngai’ o nopili’ diyolo’: i bandar do Kidis, i hilo’d konulu-nuluan do Naptali, di hilo’d Galilia; om bandar do Sikim, i hilo’d konulu-nuluan dot Ipraim, om Hibron i hilo’d konuluhanan do Yohuda. ⁸ Ponong hilo’ nod koulayon do mantad id Bawang do Yordan, i hilo’d tana’ do kowotuan, i hiri’d poimpatau dot id konulu-nuluan, i ponong id koulayon do mantad id Yorikou, om pinili’ diyolo’ o bandar do Bisir, it id watas do Rubin, om bandar do Ramot, i hilo’d Giliad, it id watas do Gad; om bandar do Golan, i hilo’d Basan, it id watas do Manasi. ⁹ Iri no ngai’ o bandar do pogintirungan do nopili’ do maan do koinsanai di tulun dot Israil om koinsanai’d tulun di bansa’d suwai di poirolot diyolo’. Pointikid-tikid do tulun di kapamatai do tulun dot a’ tomodon, om ointirungan no do hiri’d piro-piro o bandar diri, do mantad id tulun di momogusa’ dau do mongoi suli’. Om a’ i’ iyau koino-ino do patayon dot a’ po obutusan dot id toguang do tulun dot ogumu’.

¹ - ² Insan o tadau om ongoi no i piro-piro o boyoon do sompiiyon do payat do Liwi do hilo’d Silo, i hilo’d pomogunan do Kanaan, do minongoi solowot di Iliasar it Imam, om i Yosua i tanak di Nun, om i piro-piro o boyoon do sompiiyon do koinsanai di payat dot Israil. Boros ka diyolo’, ’’Nokoponuhu’ no o TUHAN, do pinolombus di Musa, dot onuan iyahai do piro-piro o bandar do tiyonon dahai, om onuan iyahai do tana’ do kobuturan do hiri’d posorili’ di bandar do poiyanan di tayam-tayam dahai,’’ ka. ³ Om onuwai no di tulun dot Israil i payat do Liwi do piro-piro o bandar di kibutur o posorili’, do mantad di tana’ di nangaanu diyolo’, tu’ miagal noddi o pinonuhuan do TUHAN. ⁴ Id gulu nopo do nakaanu do piro-piro o bandar om i pinuruan do sompiiyon di Kohat. Iri nopo piro-piro sompiiyon di suminolusuk di Harun it Imam, om nakaanu do hopod om tolu o bandar do mantad id payat do Yohuda, om Simion om Binyamin. ⁵ Iri no piro-piro sompiiyon do suwai do mantad id pinuruan do sompiiyon di Kohat om nakaanu do hopod o bandar do mantad id payat dot Ipraim, om Dan, om Manasi di ponong id kotonobon do mantad di Bawang do Yordan. ⁶ Iri no pinuruan do sompiiyon di Girson om nakaanu do hopod om tolu o bandar do mantad id payat dot Isakar, Asor, Naptali, om Manasi di ponong id koulayon do mantad di Bawang do Yordan. ⁷ Iri no piro-piro sompiiyon do mantad id pinuruan do sompiiyon di Morari om nakaanu do hopod om duwo o bandar do mantad id payat do Rubin, om Gad om Sibulon. ⁸ Om undio’ no do minamahagi’ i piro-piro o bandar diri om i kobuturan di posorili’ di bandar do pinatahak dot id payat do Liwi. Tu’ iyo noddi o pinonuhuan do TUHAN do pinolombus di Musa. ⁹ - ⁴² Id suang nopo di tana’ do naanu do tulun dot Israil om apat nohopod om walu’ o bandar do kosuang ngai’ i kobuturan di hiri’d posorili’ do pointikid-tikid di bandar do pinatahak dot id payat do Liwi. ⁴³ Om patahako’ noddi do TUHAN dot id tulun dot Israil o koinsanai di tana’ di nakabatos mantad dau do mikuwo’d sumpa’ do patahakon dot id taki-aki diyolo’. Om kosolod poddi diyolo’ i tana’ddi om pomogun-mogun noddi iyolo’d hiri. ⁴⁴ Om onuwai nod TUHAN iyolo’ do kosimbayanan do pointongkop do pomogunan diri tu’ nintirungan dau iyolo’ do miagal di nakabatos mantad dau dot id taki- aki diyolo’. Aiso’ no tiso’ di pisangod do tulun dot Israil do nakaala’ diyolo’ tu’ nonuan i’ iyolo’d TUHAN do kamanangan do suminangod do koinsanai di pisangod diyolo’. ³⁴ - ⁴⁵ Nabayaan ngai’ id TUHAN do minomonsoi o koinsanai di nakabatos dau dot id tulun dot Israil, om aiso’ no o tiso’ dot a’ nowonsoi. ³³ Iri no tiso’ kawagu do pinuruan do sompiiyon dot id suang do payat do Liwi, i pinuruan do sompiiyon di Girson, om nonuan do hopod om tolu o bandar do mitonggoi di tana’ do kobuturan do hiri’d posorili’. Om mantad no dot id payat do Manasi di ponong id koulayon om nonuan iyolo’d duwo o bandar: Biistra om Golan. Golan nopo om bandar do pogintirungan do hilo’d Basan. Om mantad nod id payat dot Isakar om nonuan iyolo’ dot apat o bandar: Kision, Dobrat, Yarmut om In Ganim. Om mantad nod id payat dot Asor om nonuan iyolo’ dot apat o bandar: Misal, Abdon, Hilkat, om Rihob. Om mantad nod id payat do Naptali om nonuan iyolo’ do tolu o bandar: Hamatdor, Kartan om Kidis. Kidis nopo om bandar do pogintirungan do hilo’d Galilia. ⁴⁰ Iri no sinakagon di Liwi do suwai, i pinuruan do sompiiyon di Morari om nonuan do hopod om duwo o bandar do mitonggoi di tana’ do kobuturan do hiri’d posorili’. Mantad nopod id payat do Sibulon om nonuan iyolo’ dot apat o bandar: Yokniam, Karta, Dimna, om Nahalal. Om mantad nod id payat do Rubin om nonuan iyolo’ dot apat o bandar: Bisir, Yahas, Kidimot, om Mipaat. Om mantad nod id payat do Gad om nonuan iyolo’ dot apat o bandar: Mahanaim, Hisbon, Yaisor om Ramot. Ramot nopo om bandar do pogintirungan do hilo’d Giliad. ¹⁹ Id suang nopo di pinuruan do sompiiyon di Kohat, om iri ngai’ no it imam di suminolusuk di Harun ot id gulu kopio koonuwai do piro-piro o bandar; om nonuan iyolo’ do hopod om tolu o bandar do mitonggoi di tana’ do kobuturan do hiri’d posorili’. Naanu nopo diyolo’ do mantad id watas do payat do Yohuda om Simion om siam o bandar dot oinsanan: Libna, Yatir, Istimoa, Holon, Dobir, Ain, Yuta, om Bait-Simis, om Arba. Arba nopo om pinungaranan do pinasangai di tapa’ di Inak. Om iri nopo bandar diri, i pinungaranan diri do Hibron do baino’, om bandar do pogintirungan do hilo’d konuluhanan do Yohuda. Om iri nopo koumaan om i kokompungan do bandar diri om nakatahak no dot id di Kalib i tanak di Yopuni, do maan do dau’d songonuon. Om mantad no dot id watas do payat do Binyamin om nonuan iyolo’ dot apat o bandar: Gibion, Giba, Anatot om Almon. ²⁰ - ⁴¹ - ²⁶ Iri nopo piro-piro sompiiyon do suwai dot id suang di pinuruan do sompiiyon di Kohat om nonuan do hopod o bandar do mitonggoi di tana’ do kobuturan do hiri’d posorili’. Om mantad no dot id payat dot Ipraim om nonuan iyolo’ dot apat o bandar: Bait-Horon, Kibsaim, Gosir om Sikim. Sikim nopo om bandar do pogintirungan do hilo’d konulu-nuluan dot Ipraim. Mantad no dot id payat do Dan om nonuan iyolo’ dot apat o bandar: Iltiki, Gibiton, Ayalon, om Gat Rimon. Om mantad no dot id payat do Manasi di ponong id kotonobon om nonuan iyolo’ do duwo o bandar: Taanak om Gat Rimon. ²⁷ -

¹ Om timungo’ no di Yosua i tulun do mantad id payat do Rubin, Gad om Manasi di ponong id koulayon do mantad id Bawang do Yordan. ² Om boros ka dau dot id diyolo’, ’’Nowonsoi ngai’ no dokoyu o koinsanai di pinonuhuan di Musa, i susuhuon do TUHAN diri. Om minumboyo’ kou nogi’ di pinonuhuan ku. ³ Om solinaid diti om a’ kou i’ insan koumbal do monongkiad do tulun dot Israil do suwai, om otorodok kou i’ do tuminanud do boros do TUHAN, i Kinorohingan dokoyu. ⁴ Om baino’ nodti, om noonuan nod TUHAN, i Kinorohingan dokoyu, do kosimbayanan o koobpinayan dokoyu di sompi’ ko’ tulun dot Israil do miagal di nakabatos mantad do TUHAN. Om songkoino kou noddi do gumuli’ do hilo’d watas dokoyu, i hilo’d ponong id koulayon do mantad id Bawang do Yordan; i tana’ do pinatahak mantad di Musa dot id dokoyu. ⁵ Om soro-sorohon no kopio dokoyu do tumanud dit Oturan di pinoboros di Musa do poingkaa: Kosianai nod TUHAN, i Kinorohingan dokoyu, om wonsoyon no o korohian dau, om tonudon no i ponuhuan dau, om tumorodok no dot id dau om sumambayang no kasai’ dot id dau do mikuwo’d aayi-ayi’ o ginawo om pomusarahan dokoyu,’’ ka dau. ⁶ - ⁹ Om suhuo’ no di Yosua i payat do Rubin, Gad om Manasi di ponong id koulayon do muli’ om barakatai no dau iyolo’ do mikuwo’d binilinan do poingkaa, ’’Uli’ kou no do mitonggoi do dapu’ om kakayaan om tayam-tayam dot ogumu’, om pirok om tamas, om tambaga’ om basi’, om pakayan dot ogumu’. Om bohogian no dokoyu i tongotobpinai dokoyu di sompi’ ko’ tulun dot Israil di dapu’ do naanu dokoyu do mantad id pisangod,’’ ka dau. Om uli’ noddi iyolo’. Om uli’ noddi i payat do Rubin, om i payat do Gad om i songintanga’ do payat do Manasi di ponong id koulayon do mantad id Bawang do Yordan. Om tongkiad no iyolo’ di tulun dot Israil do suwai do hilo’d Silo, i hilo’d pomogunan do Kanaan. Om ongoi no iyolo’ do hilo’d Giliad, i tana’ do nasanganu diyolo’, i naanu diyolo’ do tumanud di boros do TUHAN do pinolombus di Musa. (Noonuan no di Musa do tana’ o songintanga’ do payat do Manasi do hilo’d Basan, om i Yosua nga’ minanahak po kawagu di songintanga’ do payat do Manasi do tana’ di ponong id kotonobon do mantad di Bawang do Yordan, do pasagalai di tana’ do payat dot Israil do suwai.) ¹⁰ Om tontok di nokorikot i payat do Rubin, om Gad om Manasi di ponong id koulayon do mantad id Bawang do Yordan do hilo’d Golilot — it id ponong id kotonobon do mantad id Bawang do Yordan — om pomonsoi no iyolo’ dot iso’ o pananaraban do porsombahan dit agayo om olumis do hiri’d somok di bawang. ¹¹ Om kosunudai noddi i tulun dot Israil do suwai di winonsoi diyolo’, ’’Minomonsoi i payat do Rubin, Gad om Manasi di ponong id koulayon do mantad id Bawang do Yordan dot iso’ o pananaraban do porsombahan do hilo’d Golilot, i ponong id kotonobon do mantad id Bawang do Yordan!’’ ka. ¹² Om soira’ di nokorongou iyolo’ do miagal diri om timung no o koinsanai di tulun dot Israil do hilo’d Silo. Om sumaap daa’ddi iyolo’ di payat dot Israil di ponong id koulayon do mantad id Bawang do Yordan. ¹³ Om suhuo’ no diyolo’ i Pinihas i tanak di Iliasar, it Imam diri, do mongoi solowot di payat do Rubin, Gad om Manasi do ponong id koulayon di Bawang do Yordan, do hilo’d Giliad. ¹⁴ Om woyo’ no di Pinihas o hopod o boyoon di tulun dot Israil, — do songulun o mantad id pointikid-tikid do payat di hiri’d ponong id kotonobon do mantad id Bawang do Yordan; om boyoon ngai’ nopo iyolo’ do sompiiyon dot id suang do payat diyolo’. ¹⁵ Om ongoi ngai’ no i tulun di sinuhu’ddi do hilo’d watas do Giliad do minongoi solowot di payat do Rubin, Gad om Manasi di ponong id koulayon. ¹⁶ Om boro-boros no iyolo’ dot id tulun di mantad id payat do Rubin, Gad om Manasi, dot id suang do ngaran do koinsanai di tulun do songonuon do TUHAN do poingkaa, ’’Nokuro tu’ araat o winonsoi dokoyu dot id toguang do Kinorohingan dot Israil? Sumaap kou’d TUHAN tu’ minomonsoi kou i’ diti pananaraban do porsombahan. A’ kou noddi tumanud di ponuhuan dau! ¹⁷ A’ toi dokoyu osorou di nokowonsoi toko’ do dusa do hilo’d Pior do pinorikatan toko’d TUHAN do toruol dit araat kopio’ddi? Om oinggorit toko’ poddi kasai’ do gama’ di dusa’ddi. Om a’ po tuu kabagal iri? ¹⁸ Tumongkiad kou po daa kawagu do TUHAN? Ondung sumaap kou’d TUHAN do baino’ om suab nopondo om tumogod no iyau do koinsanai’d tulun dot Israil. ¹⁹ Ondung sosomu’ om a’ osorupai dot iyonon do sumambayang o hilo’d pomogunan dokoyu om mongoi kou nopo do hiti’d pomogunan di don TUHAN, i kinoiyonon di Kiim do TUHAN. Mokianu kou nopo dahai do tana’, nga’ kada’ kou po kopio saap do TUHAN om kada’ kou pominsuhu’ dahai do sumaap dot i momonsoi’d pananaraban do porsombahan do suwai o kasaap-saap do TUHAN. Tu’ haro no o pananaraban do porsombahan dot id TUHAN, i Kinorohingan toko’. ²⁰ Soroho’ pogi’ i Akan i tanak di Sira tu’ a’ tuminanud di boros do TUHAN, do pasal di konunu-nunuan dit apatut daa do raagon. Om kinootuson nopo nga’ kohompit ngai’ nopoddi o tulun dot Israil do nohukuman. I Akan no daa o kidusa, nga’ okon iddi ko’ i Akan noo o napatai,’’ ka diyolo’. ²¹ Om boro-boros no i payat do Rubin, Gad, om Manasi di ponong id koulayon dot id piro-piro o boyoon do sompiiyon do payat dot Israil di ponong id kotonobon do mantad id Bawang do Yordan do poingkaa, ²² ’’Kinorohingan no ot Agayo Kuasa’! Om iyau no o TUHAN! Kinorohingan no ot Agayo Kuasa’! Om iyau no o TUHAN! Oilaan i’ dau o nakapamansayan dahai’dti om orohian nogi’ iyahai do koilo kou iyokoyu! Ondung sumaap iyahai’d TUHAN om a’ otumbayaan dau, om patayo’ nopo iyahai do dinondo! ²³ Ondung a’ iyahai tumorodok dot id TUHAN om gisom do minomonsoi iyahai diti pananaraban do porsombahan dahai, do maan do panaraban do porsombahan di sorobon ko’ poiyanan po do porsombahan do gandum, ko’ porsombahan do piombolutan, om TUHAN nopo o momohukum dahai! ²⁴ Nga’ okon i’ ko’ iyo’ddi! Winonsoi pogi’ dahai iti pananaraban do porsombahan diti nga’ ooris iyahai do koimbagu nopondo om momoros dotindo o sinakagon dokoyu dot id sinakagon dahai do poingkaa, ’A’ kou i’ kouhup-uhup do TUHAN, i Kinorohingan dot Israil! ²⁵ Om winonsoi do TUHAN iti Bawang do Yordan do popotongkiad dahai do mantad id dokoyu, i payat do Rubin om Gad. A’ kou i’ iyokoyu kouhup-uhup do TUHAN!’ ka dotindo diyolo’. Om pakaus nondo do ginawo di sinakagon dahai i sinakagon dokoyu, gisom dot a’ nondo iyolo’ sumambayang dot id TUHAN. ²⁶ Om iri no o kinapamansayan dahai’dti pananaraban do porsombahan, tu’ okon i’ ko’ pananaraban do porsombahan di sumbolion, ko’ poiyanan po di piro-piro o porsombahan dahai. ²⁷ Nga’ sumiliu no dot iso’ o tanda’ dot id dati’ ngai’ om id sinakagon toko’ do koimbagu dot otopot i’ kopio do sumambayang ngai’ toko’ dot id TUHAN do hiri’d Kiim do TUHAN om papatahak do porsombahan di sorobon om i piro-piro o porsombahan do suwai om i porsombahan do piombolutan. Om a’ nondo milo i sinakagon dokoyu do momoros dot id sinakagon dahai dot a’ iyolo’ kouhup do TUHAN. ²⁸ Komoyon nopo dahai nga’ ondung osiliu o miagal diri om milo indo i sinakagon dahai do momoros do poingkaa, ’Intangai pogi’ i taki-aki dahai nga’ nokopomonsoi i’ do pananaraban do porsombahan do miagal di pananaraban do porsombahan di don TUHAN. Okon i’ ko’ pananaraban do porsombahan di sorobon iti ko’ poiyanan po do porsombahan, suwai ko’ tanda’ noo dot id piolitan toko’,’ ka nondo diyolo’. ²⁹ A’ i’ kopio iyahai sumaap do TUHAN, ko’ tumingkod po do sumambayang dot id dau o kinapamansayan dahai diti pananaraban do porsombahan do sorobon, ko’ porsombahan do gandum ko’ i piro-piro o porsombahan do suwai. A’ i’ kopio iyahai momonsoi do pananaraban do porsombahan do suwai ko’ i pananaraban do porsombahan do don TUHAN, i Kinorohingan toko’ di hilo’d dotimbabaan di Kiim do TUHAN,’’ ka diyolo’. ³⁰ Om korongou po i Pinihas, om i piro-piro o boyoon do tulun dot Israil di tuminanud dau, om i piro-piro o boyoon do sompiiyon dot Israil di pinoboros di payat do Rubin, Gad om Manasi di Ponong id Koulayon diri, om osonong nogiddi o ginawo diyolo’. ³¹ Om boros ka di Pinihas, i tanak di Iliasar it Imam diri, dot id payat do Rubin, Gad om Manasi di Ponong id Koulayon, ’’Baino’ nopoddi om oilaan no dahai do moyo-woyo’ o TUHAN dati’, tu’ a’ kou i’ sumaap dau. Om nokoidu’ i’ dokoyu o tulun dot Israil do mantad id hukuman do TUHAN,’’ ka dau. ³² Om tongkiadai no di Pinihas om i piro-piro o boyoon dot Israil i payat do Rubin om Gad do hilo’d Giliad. Om uli’ no iyolo’ do hilo’d Kanaan om posunudo’ no diyolo’ iri dot id tulun dot Israil. ³³ Om osonong ngai’ nogiddi o ginawo di tulun dot Israil. Om pamarayou no iyolo’d TUHAN! Om a’ noddi iyolo’ kosorou do manangod di payat do Rubin om Gad ko’ mamaraag po do pomogunan diyolo’. ³⁴ Om boros ka di payat do Rubin om Gad, ’’Iti nopo pananaraban do porsombahan diti om maan toko’ do sasi’ dot id dati’ ngai’ do TUHAN no o Kinorohingan,’’ ka diyolo’. Om pungaranai no diyolo’ i pananaraban do porsombahan diri do ’’Sasi’ ’’.

¹ Om onuwai nod TUHAN do kosimbayanan i tulun dot Israil, gisom dot a’ noddi iyolo’ rolosion do pisangod. Om alaid noddi do mantad diri om molohing noddi kopio i Yosua. ² Om timungo’ noddi dau o koinsanai di tulun dot Israil, om i boyoon, om i woyo-woyoon, om i gompomutus, om i pagawai diyolo’. Om boros ka dau dot id diyolo’, ’’Molohing oku noddi kopio. ³ Om nongkokito kou no di nongowonsoi’d TUHAN, i Kinorohingan dokoyu dot id toinsanan di bansa’d tulun do hiti do bagi’ dokoyu. Om TUHAN, i Kinorohingan dokoyu o suminangod do minongobi’ dokoyu. ⁴ Om nabahagi’ ku no iti tana’ dot id koinsanai’d payat dokoyu do maan do dokoyu’d songonuon. I tana’ do bansa’ di nangaala’ do mimpuun do mantad id soborong ponong id koulayon do mantad id Bawang do Yordan om gisom do korikot do hilo’d Rahat do Tanga’, do ponong id kotonobon. ⁵ Saapon i’ om uyungon do TUHAN, i Kinorohingan dokoyu i piro-piro o bansa’ddi do mongoi kou sangod diyolo’. Om asanganu i’ dokoyu i tana’ diyolo’ do miagal di nakabatos mantad do TUHAN, i Kinorohingan dokoyu, dot id dokoyu. ⁶ Iyo nopoddi, om tumorodok kou no kopio do tumanud di nongkotulis do hiri’d buuk do Tourat di Musa. Om kada’ nod haro o tongoiso’ piya dit oturan diri do toliban. ⁷ Kada’ kou no ponokiambalut di tulun di bansa’d suwai di poingiyon dot id rolot dokoyu, ko’ mamarait po do ngaran di tingolig diyolo’, ko’ rumait po do ngaran di tingolig diri do tontok do sumumpa’ kou. Kada’ kou no kopio tuku’ dot id tingolig diyolo’ ko’ motud po dot id toguang diyolo’. ⁸ Suwai ko’ tumorodok kou no do mumboyo’ do TUHAN do miagal di kotorodoko’ dokoyu dot id dau do gisom do baino’. ⁹ Nouyung nod TUHAN i bansa’ dit angagayo om it okoris do minogobi’ dokoyu. Om aiso’ i’ o tongoiso’ piya dot id pogialatan diyolo’ do kasaap dokoyu. ¹⁰ Iso’ nopo dokoyu om kaala’ i’ do soribu o pisangod tu’ tulungon kou i’ do TUHAN, i Kinorohingan dokoyu do sumangod diyolo’ do miagal di nakabatos mantad dau. ¹¹ Iyo nopoddi, om soro-sorohon no kopio dokoyu dot osianan do TUHAN, i Kinorohingan dokoyu. ¹² Ondung a’ kou tumorodok om tumanud kou nogindo dilo bansa’ do tulun di momogun-mogun do poirolot dokoyu om mangawin kou do tulun diyolo’, ¹³ om atantu’ no dot a’ i’ o TUHAN, i Kinorohingan dokoyu mogobi’ dokoyu do monguyung di bansa’ddi. Om iri nopo bansa’ddi nga’ sumiliu do koligagaanan dot id dokoyu, om osiliu nondo iyolo’ do lawa’ ko’ i kosulungon dokoyu. Om oinggorit kou nondo kopio dot iyolo’ o koinggorit do miagal po do bobogon o likud ko’ miagal do tinsukon do rugi o mato. Om oinggorit kou nondo kopio do gisom dot iso’ pod tulun nga’ aiso’ no o momogun-mogun do hiri’d pomogunan dot osonong di pinatahak do TUHAN, i Kinorohingan dokoyu, dot id dokoyu. ¹⁴ Baino’ nopoddi om oruhai noddi o kapatayan ku. Om opurimanan ngai’ i’ dokoyu do nakatahak ngai’ nod TUHAN, i Kinorohingan dokoyu o koinsanai dit osonong dot id dokoyu do miagal di nakabatos dau dot id dokoyu. Om koinsanai di nakabatos dau nga’ nangabayaan i’. ¹⁵ Nga’ poingkuro nopo o TUHAN do minamayaan di pinabatos dau dot id dokoyu, om atantu’ no dot iyo noddi iyau do poporikot do koinggoritan dot id dokoyu. ¹⁶ Ondung tumolibamban kou di tumpongo di pinonuhuan do TUHAN dokoyu’d tumanud, om mongoi kou no podsubak om mongoi kou tuku’ dot id tingolig om otogod nondo o TUHAN om hukuman kou nondo dau, gisom dot aiso’ no o tiso’ dokoyu’d momogun-mogun do hiti’d pomogunan dit osonong, i pinatahak do TUHAN dot id dokoyu,’’ ka dau.

¹ Om timungo’ noddi di Yosua o koinsanai di payat dot Israil do hilo’d Sikim. Om lohowo’ no dau o koinsanai di boyoon, om i woyo-woyoon, om i gompomutus, om i pagawai dot Israil, om timung noddi iyolo’ do minongoi timbaba’ do Kinorohingan. ² Om boro-boros noddi i Yosua dot id koinsanai di tulun dot Israil do poingkaa, ’’Pokinongou kou no do boros do poboroson do TUHAN, i Kinorohingan dot Israil, dot id dokoyu. Om poingkaa o boros do Kinorohingan, ’Di nopo di gulu po om poingiyon i taki-aki dokoyu do hilo’d soborong do Bawang dot Iprat. Om tumuku’ iyolo’ dot id ponokokinorohingan do suwai. Iso’ nopo diyolo’ om i Tira, i tapa’ di Abraham om i Nahor. ³ Om ngoyo’ ku no popinghomboo’ i Abraham, i taki-aki dokoyu, i poingiyon daa do hilo’d soborong do Bawang dot Iprat, do pinotongkop ku iyau do pomogunan do Kanaan. Om onuwai ku no iyau do sinakagon dot ogumu’. Om i Isak no o pinatahak ku dau, dit id gulu kopio. ⁴ Om onuwai ku no i Isak do duwo o tanak, do ngaran nopo om i Yakub om i Isau. Om onuwai ku no i Isau do tana’ di hilo’d konulu-nuluan dot Idom do maan do dau’d songonuon. Nga’ i Yakub noo, i taki-aki dokoyu om minongoi do hilo’d Masir do miwoyo’ di tangaanak dau. ⁵ Om lohowo’ ku no i Musa om i Harun, do pinoporikot do kosusaan dot agayo do hilo’d Masir. Nga’ iyokoyu nopo om pinosoliwan ku i’ do mantad do hilo’. ⁶ Om pinosoliwan ku do mantad hilo’d Masir i taki-aki dokoyu. Om gusao’ no iyolo’ di soudor do Masir dit ongkikorita’-kuda’ do dong sumasangod om it ongkikuda’. Nga’ soira’ di nokorikot i taki-aki dokoyu do hilo’d Rahat dot Aragang ⁷ om pokiuhup noddi iyolo’ doho’, om potuongo’ ku noddi ot id piolitan diyolo’ om i tulun do Masir. Om londodo’ ku no i soudor do Masir do hiri’d rahat gisom do nongolondod ngai’ iyolo’. Om nongoilaan ngai’ i’ dokoyu o koinsanai di winonsoi ku’ddi di hilo’d Masir. Om alaid kou po kopio do poundorong do hilo’d tana’ do kowotuan. ⁸ Om poongoyo’ ku no iyokoyu do hilo’d pomogunan do tulun dot Amori, i ponong id koulayon do mantad id Bawang do Yordan. Om suminaap i’ daa iyolo’ dokoyu nga’ pinamanang ku i’ iyokoyu do suminaap diyolo’. Om kosolod noddi dokoyu i pomogunan diyolo’ om patayo’ ku no iyolo’ di maso dokoyu do sumangod. ⁹ Om ongoi no saap do tulun dot Israil i raja’ do Muab, i roitan dot i Balak, i tanak di Sipor. Om minonuhu’ iyau do tulun do mongoi solowot di Biliam i tanak di Bior, do monuhu’ di Biliam do momopol dokoyu. ¹⁰ Nga’ a’ ku i’ winonsoi i pinokianu di Biliam, gisom do minamarakat nogiddi iyau dokoyu om nokoidu’ ku iddi iyokoyu do mantad id longon di Balak. ¹¹ Om kosoborong kou noddi di Bawang do Yordan om korikot kou no do hilo’d Yorikou. Om i tulun do Yorikou nga’ suminaap i’ daa dokoyu. Om i tulun dot Amori, om Poris, om Kanaan, om Hit, om Girgasi, om Howi, om Yobus nga’ suminaap nogi’ daa. Nga’ naala’ ngai’ ku i’ iyolo’ tu’ nobian ku i’ iyokoyu. ¹² Ginangau ku iyolo’ om rinolosi ku do tontok di sinangod dokoyu iyolo’. Gisom do minogidu’ goduwo i raja’ dot Amori do mantad id dokoyu. Om okon i’ ko’ i gayang ko’ i po pana’ o kinamanangan dokoyu. ¹³ Nakatahak ku no dot id dokoyu o tana’ dit okon ko’ iyokoyu o minorobuat, om piro-piro o bandar dit okon ko’ iyokoyu o minomonsoi. Om baino’ noddi om poingiyon kou no do hiti’d pomogunan diti, om mangakan kou di tua’ dot anggur om tua’ do saitun dit okon ko’ iyokoyu o minananom!’ ka,’’ ka dau. ¹⁴ Om boros kaddi kawagu di Yosua, ’’Iyo nopoddi om pusoho’ no dokoyu o TUHAN, om tumorodok kou no do sumambayang dot id dau do mikuwo dot aayi-ayi’ kopio o ginawo. Om pataamon no dokoyu i tingolig do tukuon di taki-aki dokoyu di gulu po di hilo’d Misopotamia om di hilo’d Masir. Sumambayang kou no dot id TUHAN om id dau noo. ¹⁵ Ondung mikoduwo o ginawo dokoyu do sumambayang dot id TUHAN, om ilaai no kopio dokoyu do dinondo ondung id disai o sambayangan dokoyu: i ponokokinorohingan di taki-aki dokoyu di hilo’d Misopotamia, ko’ iri po i ponokokinorohingan do tulun dot Amori do hiti’d pomogunan di pomogun-mogunan dokoyu do dinondo. Nga’ iyoho’ nopo om i sompiiyon ku, om sumambayang i’ dot id TUHAN, om id TUHAN noo,’’ ka dau. ¹⁶ Om boros ka di tulun dot Israil do suminimbar, ’’Aiso’ i’ kopio o ginawo dahai do tumongkiad do TUHAN om tumuku’ dot id ponokokinorohingan do suwai! ¹⁷ Tu’ TUHAN no, i Kinorohingan toko’, o pinoposoliwan di taki-aki toko’ do mantad id koudipanan do nosiliu do turipon do hilo’d Masir, om nongkokito toko’ nogi’ di piro-piro o koimayaan do winonsoi’d TUHAN. Om TUHAN nogi’ o minongintirung dati’ di hiri’d tindalanon toko’ do minaya’ do piro-piro o pomogunan do bansa’d suwai. ¹⁸ Om tontok di suminuang toko’ diti pomogunan om nuyung ngai’ i’ do TUHAN o koinsanai di tulun dot Amori, i momogun-mogun mantad do hiti. Iyo nopoddi, om iyahai nga’ orohian i’ do sumambayang dot id TUHAN. Tu’ iyau no o Kinorohingan toko’,’’ ka. ¹⁹ - ²⁰ Om boros ka di Yosua dot id tulun dot Israil, ’’A’ kou i’ milo do tumuku’ dot id TUHAN. Tu’ TUHAN nopo om Kinorohingan dit Olidang Kopio om a’ i’ iyau orohian do haro i mongoi iyo-iyo dau. Om a’ iyau mangampun do dusa om kasalaan dokoyu. Ondung tumongkiad kou dau om tumuku’ kou nondo dot id tingolig, om a’ no iyau mangampun do dusa dokoyu. Om hukuman kou nondo dau. Om raagon kou po dau do mulong piya daa dot osonong iyau dot id dokoyu di gulu po,’’ ka. ²¹ Om boros ka di tulun dot Israil do suminimbar, ’’Amu’! A’ no iyahai sumambayang dot id ponokokinorohingan do suwai. Sumambayang no iyahai kasai’ dot id TUHAN, om id dau noo,’’ ka diyolo’. ²² Om boros kaddi di Yosua dot id diyolo’, ’’Iyokoyu no o sumiliu do sasi’ dokoyu. Tu’ nopili’ no dokoyu do sumambayang kou dot id TUHAN,’’ ka. Om boros ka diyolo’ do suminimbar, ’’Oo, iyahai no o sumiliu do sasi’ dahai,’’ ka. ²³ Om boro-boros po kawagu i Yosua do poingkaa, ’’Ondung miagal diri, om taamai ngai’ no dokoyu i ponokokinorohingan do bansa’d suwai di poingigit dokoyu. Om pamatos kou no do tumorodok kasai’ kou dot id TUHAN, i Kinorohingan dot Israil,’’ ka. ²⁴ Om boros ka di tulun dot Israil dot id di Yosua, ’’Sumambayang i’ iyahai dot id TUHAN, i Kinorohingan toko’. Om mumboyo’ i’ iyahai do ponuhuan dau,’’ ka. ²⁵ Om pomonsoi noddi i Yosua do tumpongo do maan di tulun dot Israil do hilo’d Sikim do tontok do tadau’ddi. Om onuwai no dau iyolo’ do piro-piro ot oturan om ponuhuan dit apatut diyolo’d tonudon. ²⁶ Om tuliso’ ngai’ no di Yosua iri dot id Buuk do Tourat do Kinorohingan. Om anu no iyau dot iso’ o watu dit agayo, om poudongo’ no do hiri’d sahau di kayu dot agayo, i hiri’d kinoiyonon di nokotobilang do maan do don TUHAN. ²⁷ Om boro-boros nogiddi i Yosua di tulun dot Israil do poingkaa, ’’Iti nopo watu diti om sasi’ toko’, do koinsanai di boros do TUHAN di pinoboros dot id dati’ om nokoboros no do hiti’d toguang diti watu. Om iti no watu ot osiliu do sasi’ dokoyu ondung sumaap kou no do Kinorohingan dokoyu do koimbagu,’’ ka. ²⁸ Om kowonsoi poddi ngai’ iri om suhuo’ ngai’ no di Yosua i tulun diri do muli’. Om uli’ no iyolo’ do hiri’d watas diyolo’. ²⁹ Om kapatai noddi i Yosua, i tanak di Nun, i susuhuon do TUHAN, di hatus om hopod o toun do tumur dau. ³⁰ Om lobongo’ no diyolo’ i Yosua do hiri’d tana’ dau, i hilo’d Timnat Sira, it id konulu-nuluan dot Ipraim, i ponong id utara di Nuluhon do Gaas. ³¹ Solinaid nopo di poimpasi po i Yosua om sumambayang kasai’ i’ dot id TUHAN i tulun dot Israil. Om diri piya di napatai no i Yosua nga’ sumambayang kasai’ po dot id TUHAN i tulun dot Israil, do solinaid po do songimpasi i piro-piro o boyoon di nongkokito di winonsoi’d TUHAN dot id tulun dot Israil. ³² Iri nopo rata’ di Yusup, i nigitan do tulun dot Israil do mantad hilo’d Masir om linobong diyolo’ do hilo’d Sikim. Iti nopo nga’ tana’ do binoli di Yakub di gulu po, do mantad id tangaanak di Hamor, i tapa’ di Sikim, do hatus o tusin do pirok do pinomoli. Iri nopo tana’ddi om i sinakagon di Yusup o nokotungkus. ³³ Om i Iliasar, i tanak di Harun nga’ napatai nogi’. Om linobong iyau do hilo’d Gibia, i bandar do pinatahak dot id di Pinihas i tanak di Iliasar, i hilo’d watas do konulu-nuluan dot Ipraim.