YUNUS

YUNUS

¹ Insan o tadau, om boro-boros no o TUHAN dot id di Yunus i tanak di Amitai: ² Boros ka dau, ’’Pamanau no do mongoi’d hilo’d Niniwi, i bandar dot agayo’ddi om pasalaon no iyolo’, tu’ noilaan ku no o karaato’ di tulun do hilo’,’’ ka dau. ³ Nga’ pasansala’ nogi’ o nongoi di Yunus tu’ mumbal daa iyau do mogidu’ do mantad id TUHAN. Pinakayaan nogi’ dau do hilo’d Yopa. Om hilo’ no o kinokitanan dau do kapal do rahat di kumaa do hilo’d Sepanyol. Om patahako’ no dau o tambang dau om sakai no di kapal do miwoyo’ di papapanau di kapal do kumaa do hilo’d Sepanyol; tu’ mogidu’ iyau do mantad id TUHAN. ⁴ Nga’ porikoto’ nod TUHAN o tongus dot opuhod kopio do hiri’d rahat, gisom dot motiraag no daa’ddi i kapal diri. ⁵ Om oinsanan nopo do norolosi i papamanau di kapal. Om sompori-pori nopoddi iyolo’ do mininggiak do mokitulung di ponokokinorohingan diyolo’. Om popintaamo’ no diyolo’ do hiri’d rahat i konunu-nunuan di hiri’d kapal do popoinggaan-gaan daa di kapal. Nga’ i Yunus nopo om nokolintuhun no do hiri’d tuwou di kapal. Om poillii diri iyau’d hiri dot oolong tomod do koodop. ⁶ Om lintuhun no i boyoon di papamanau di kapal do hiri’d tuwou di kapal om kabantalai no dau i Yunus do koodop do hiri. Om boros ka dau, ’’Nokuro ko iya’ tu’ oolong tomod do koodop? Tungag kopio om sumambayang i’ do mokitulung di ponokokinorohingan nu. Ulan toi’ daa om insianan toko’ dau, om posion toko’ indo dau,’’ ka. ⁷ Om kasalakoi poddi i Yunus om i boyoon diri do hiri’d sawat om pogiboro-boros noddi i papamanau di kapal. Boros ka diyolo’, ’’Undion toko’ nogi’ ondung isai kopio o nakasala’ di kobungou diti kosusaan toko’dti,’’ ka diyolo’. Om pongundi’ no iyolo’ om koontok no i Yunus. ⁸ Om boros kaddi diyolo’ dot id di Yunus, ’’Sunudai daa iyahai ondung iya’ kopio o kobungou diti kosusaan diti. Honggo o tadon nu? Nunu o bansa’ nu? Om nokuro tu’ hiti ko?’’ ka diyolo’. ⁹ Om boros ka di Yunus do suminimbar, ’’Iyoho’ nopodti om tulun dot Ibrani. Om sumambayang oku dot id TUHAN i Kinorohingan di hilo’d surga, i minomonsoi do rahat om katanaan,’’ ka dau. ¹⁰ Om ongooris tomod diri iyolo’ tu’ sinunudan i’ dau iyolo’ do minogidu’ iyau do mantad id TUHAN. Om boros kaddi di papamanau di kapal diri dot id di Yunus, ’’Dongkababasug no kopio dino winonsoi nu!’’ ka dau. ¹¹ Om muhod-puhod nopoddi i tongus om mayo-gayo i tumbak. Om uhoto’ noddi di piro-piro papamanau di kapal i Yunus, ’’Kukuroyon no ma dahai iya’dti om otingkod i’ iti tongus dot opuhod?’’ ka diyolo’. ¹² Om boros ka di Yunus do suminimbar, ’’Pataamo’ oku nopo dokoyu do hilo’d rahat, om otingkod i’ iti tongus dot opuhod tu’ oilaan ku noddi dot iyoho’ o kobungou diti tongus dot opuhod do nokoontok dokoyu,’’ ka dau. ¹³ Nga’ ponotos nogi’ daa iyolo’ do minangayu di kapal do papakaa do hiri’d tisan nga’ a’ no milo, tu’ rubaon nogi’ iyolo’ di tongus dot opuhod. ¹⁴ Om pomogiak noddi iyolo’ do luminohou’d TUHAN do poingkaa, ’’Oi TUHAN, kada’ iyahai hukumai do kapatayon, do patayon piya dahai iti tulun dit a’ nokowonsoi do kasalaan dot id dahai. Tu’ iya’ no oi TUHAN i pinoposiliu ngai’dti,’’ ka diyolo’. ¹⁵ Om pataamo’ noddi diyolo’ i Yunus do hiri’d rahat. Om diiri i’ om diiri do tuminingkod i tongus dot opuhod. ¹⁶ Om ongooris tomod diri do TUHAN, i tulun di papamanau di kapal, gisom do pinapatahak iyolo’ do porsombahan di sinumbali’ dot id TUHAN om minamatos do tumorodok dot id dau di nokotindal iyolo’. ¹⁷ Om suhuo’ nod TUHAN o songinan o sada’ dit agayo do minongoi ponolon di Yunus. Om id suang diri i Yunus do tian di sada’ddi do solinaid do tolu o tadau om tolu o totuong.

¹ Om sambayang no i Yunus dot id TUHAN, i Kinorohingan dau, di maso dau do hiri’d suang do tian di sada’. Boros ka dau, ² ’’Luminohou oku diya’, oi TUHAN, di maso ku’d osusa’, om sinimbar oku i’ diya’. Minokitulung oku diya’ di hilo’ oku’d pomogunan do tulun do napatai, om norongou oku i’ diya’ om pinadul oku diya’. ³ Pinataam oku diya’ do hilo’d daralom, gisom do nolonsod oku do hilo’d nanad do rahat. Om hilo’ no do noolitan oku’d waig, om opingimpit oku di tumbak dit opuhod. ⁴ Om osorou ku nopo nga’ nouyung oku no kopio diya’ do mantad id toguang nu, oi TUHAN, om a’ oku no kokito kawagu di Walai’d Sasambayangan dot Agayo dit olidang. ⁵ Om alit no doho’ i waig di rahat, om a’ oku noddi kohobo; koolitai oku nopo kopio di rahat, om songinrilit pod tulu ku i sakot do hilo’d rahat. ⁶ Nakasaalom oku do hilo’d tuwou di nuluhon, i kinoiyonon di poontiil kasai’ o wawayaan do gisom dot alaid. Nga’ iya’ no, oi TUHAN, i Kinorohingan ku, o pinopoidu’ om minamasi doho’ do mantad id kapatayon. ⁷ Om soira’ di nopurimanan ku dot oruhai nod oputut o pinuhobo ku, om sambayang oku noddi dot id diya’ oi TUHAN, om norongou oku i’ diya’ do hilo’d walai nu. ⁸ Iri nopo tulun di tumuku’ dot id tingolig dit aiso’ o kootuk-otukon, om nokotingkod no do tumorodok dot id diya’. ⁹ Nga’ iyoho’ nopo om modsinding oku i’ do mamarayou diya’. Om papatahak oku do porsombahan di sumbolion dot id diya’ om wonsoyon ku i pinabatos ku. Iya’ no o TUHAN di mamasi,’’ ka dau. ¹⁰ Om suhuo’ noddi do TUHAN i sada’ do mongoi poilob di Yunus do hiri’d tindal, om wonsoyo’ no di sada’ o miagal diri.

¹ Om boro-boros po kawagu o TUHAN dot id di Yunus. ² Boros ka dau, ’’Pamanau no do mongoi do hilo’d Niniwi, i bandar dot agayo, om polombuson no dot id tulun do hilo’ iti boros ku do posunudon ku diya’,’’ ka dau. ³ Om pamanau no i Yunus do minongoi do hilo’d bandar do Niniwi do tuminanud di pinonuhuan do TUHAN dot id dau. Agayo no kopio o bandar do Niniwi, gisom do tolu o tadau do koloido’ do mamanau do dumarapas diri. ⁴ Om timpuun no i Yunus do minamanau do tuminongkop di bandar. Om kasangadahai po iyau do minamanau om popimboroso’ nogiddi dau o poingkaa, ’’Apat po moti’ nohopod o tadau om raagon no iti bandar do Niniwi!’’ ka dau. ⁵ Om kotumbayaai ngai’ no i tulun do Niniwi di boros do Kinorohingan diri, om popinsunudo’ noddi diyolo’ dot apatut do puasa ngai’ i tulun, om oinsanan o komolohingan om i tangaanak do manampakai do karung do pointalang do kumorologo iyolo’d dusa. ⁶ Om soira’ di nokorongou i raja’ do bandar do Niniwi do pasal diri om lintuhun nopo iyau do mantad hiri’d tirikohonon dau do don raja’ om iduwo’ no dau i pakayan dau do don raja’, om panampakai no iyau’d karung om irikau no do hiri’d pupuk. ⁷ Om ponuhu’ no iyau’d tulun do mongoi popimboros dot id tulun do Niniwi di boros do poingkaa, ’’Iti no o boros di raja’ om i piro-piro montiri’ dau: kada’ nod haro o makan om minum dot id pogialatan do tulun om sapi’ om dumba’ om i tayam-tayam do suwai. ⁸ Om koinsanai’d tulun om tayam-tayam nga’ manampakai ngai’ nopod karung do pointalang do kumorologo iyolo’. Om sompori-pori do tumorodok do sumambayang dot id Kinorohingan, do mikuwo’d rumologo di kowoyo-woyoon dot araat, om i wowonsoyon di poimponu’d dusa. ⁹ Tu’ nunu koilo-ilo nga’ wolihan nopo doti’d Kinorohingan o pomusarahan dau; om a’ indo dau potilombuson i kototogod dau, om iyati’ nga’ a’ i’ daa’ndo dau patayon!’’ ka. ¹⁰ Om kokito noddi do Kinorohingan i winonsoi diyolo’; om koilaai no dau do nokorologo iyolo’ di kowoyo-woyoon diyolo’ dit araat. Om a’ iddi dau pinotilombus i pomusarahan dau do momohukum diyolo’ do miagal di nokoboros mantad daa dau.

¹ Om kotogod tomod no i Yunus tu’ a’ iyau orohian di winonsoi’d Kinorohingan diri. ² Om sambayang no iyau do poingkaa, ’’Oi TUHAN, okon toi ko’ nokoboros mantad ku no di maso ku pod hilo’d pomogunan ku do miagal diti o wonsoyon nu? Om iri no o kinopoggiduan kopio ku daa do hilo’d Sepanyol! Tu’ noilaan mantad ku no dot iya’ nopo om Kinorohingan dit obinsianan, om obinglisiu, om alanut o ginawo om a’ obintogod, om i posodia’ kasai’ do poposimban do pomusarahan, om gisom dot a’ indo abayaan do momohukum. ³ Onuo’ nopo iti ginawo ku do dinondo, oi TUHAN, tu’ osonong nogi’ dot apatai oku ko’ poimpasi!’’ ka dau. ⁴ Om boros kad TUHAN, ’’Aiso’ i’ o paantakan nu do tumogod dot iyo kopio’ndo!’’ ka dau. ⁵ Om soliwan no i Yunus do mantad id bandar diri do kuminaa ponong id koulayon do mantad id bandar diri. Om pomonsoi no iyau do maan do lungungon do daamot do magandad dit osiliu dot id bandar do Niniwi. Om irikau no iyau do hiri’d dolungungan diri. ⁶ Om posunio’ nod Kinorohingan ot iso’ o totonomon di rumoloi do pomolungung di Yunus om osonong-sonong i’ ot opurimanan dau. Om otood tomod diri i Yunus tu’ haro i’ o tanom diri. ⁷ Nga’ maha’ddi minnanawau no di tadau kawagu, om suhuo’ nod Kinorohingan ot iso’ o tataru do minongoi pangakan di guas di totonomon diri do gisom do noriou. ⁸ Om soira’ddi do nokoulai o tadau, om porikoto’ nod Kinorohingan o tongus dot alasu’ kopio do mantad id koulayon, om tinitiu do tadau dit alasu’ kopio, gisom dot oruhai nod ahadan i Yunus dot ololosuan di tadau. Om piontong no daa dau dot apatai iyau. Om boros ka dau, ’’Osonong nogi’ dot apatai oku ko’ poimpasi,’’ ka. ⁹ Nga’ boros kad Kinorohingan dot id dau, ’’A’ ko i’ apatut do tumongob dot iyo kopio’ndo dot iri no tanom diri o katangaban,’’ ka dau. Om boros ka di Yunus do suminimbar, ’’Nokuro daa tu’ amu’. Apatut oku i’ do tumogod do gisom piya dot apatai oku!’’ ka dau. ¹⁰ Nga’ boros kad TUHAN dot id dau, ’’Oupus ko no kopio di guas di tanom diri, tu’ okon i’ ko’ tunturu’ nu o minananom om okon ko’ iya’ o pinoposuni. It insan no o totuong om kosuni no om tadau po kawagu nga’ koriou no, om iyo piya’ddi nga’ oupus ko i’ daa’ddi do noriou iri. ¹¹ Om okuro-kuro nogi’ daa o koupuso’ ku iyoho’ do Niniwi, i bandar dot agayo’ddi. Tu’ suang nopoddi om ogumu’ i’ ko’ hatus om duwo nohopod noribu o tangaanak dit aiso’ o sala’, om ogumu’ o tayam-tayam,’’ ka dau.