YOIL

YOIL

¹ Iti no o boros do TUHAN dot id di Yoil, i tanak di Potuil. ² Pokinongou kou no, iyokoyu i komolohingan, mokinongou ngai’ nopo o koinsanai’d tulun do hiti’d Yohuda. Nokoumbal toi do haro o nosiliu do miagal kopio’dti do solinaid dokoyu do poimpasi ko’ i maso di poimpasi po i komolohingan dokoyu? ³ Sunudan no i tangaanak dokoyu do pasal diri; om osunudan i’ diyolo’ i diyolo’d tangaanak, i momisunud kawagu di sinakagon di sumusuhut. ⁴ Mogisowoli-woli nopo i katat dot ogumu’ do tumokop do hiri’d tanom; haro nopo it oolu-olu’ di katat dit id gulu tokop, om aayi’ nod aakan di sumusuhut do tumokop. ⁵ Posik kou no, om mihad i’, oi tulun di magagauk; ihad kou no, oi tulun di mogiginum do waig dot anggur; tu’ nangaraag no i tua’ dot anggur di wonsoyon mantad daa do waig dot anggur do wagu. ⁶ Sinangod do katat o pomogunan toko’; okoris iyolo’ om a’ no ointob-intob tu’ adalaan no kogumu’; nipon diyolo’ nga’ miagal pod nipon do singa katarom. ⁷ Rinaag diyolo’ i guas dot anggur toko’; om nakan diyolo’ i guas dot ara toko’. Nanit diyolo’ i kulit di kayu, gisom dot opurak ngai’ po i raan. ⁸ Ihad kou no, oi koinsanai’d tulun, do miagal di tondu’ do mogihad do kinapatayan di kusai di mangawin mantad daa dau. ⁹ Aiso’ no o gandum ko’ waig pod anggur do patahakon do maan do porsombahan do hilo’d Walai’d Sasambayangan dot Agayo; mingihad ngai’ po it imam tu’ aiso’ no o porsombahan diyolo’ dot id TUHAN. ¹⁰ Alana’ ngai’ nopo o tumo; om mihad po o tana’ tu’ naraag no i gandum om nongokoring i tua’ dot anggur, om nongoriou i guas do saitun. ¹¹ Tongob kou no, oi gompongumo; ihad kou no, iyokoyu i momogompi’ do kabun dot anggur, tu’ iri nopo gandum om i barli om koinsanai’d tanom-tanom nga’ nangaayi’ no. ¹² Nongoriou no i guas dot anggur om i guas dot ara; om i guas dot ipol om guas do kurma om guas do delima. Koinsanai nopo i kouwaan do nongoriou. Aiso’ no o kataadan do tulun. ¹³ Panampakai nod karung om mingihad i’; oi imam di maganu-anu do hilo’d pananaraban do porsombahan! Ongoi nod hilo’d Walai’d Sasambayangan dot Agayo om monuaban i’ do mihad! Tu’ aiso’ no o gandum ko’ waig pod anggur do patahakon dot id Kinorohingan dokoyu. ¹⁴ Suhuo’ no i tulun nu do puasa, papaharo nod iso’ o pitimungan dot agayo! Timungo’ ngai’ no i boyoon om i molohing-lohingon om koinsanai di tulun do Yohuda do hiri’d Walai’d Sasambayangan dot Agayo, i walai’d TUHAN, i Kinorohingan dokoyu, om sumambayang no om millohou no do mokitulung dau. ¹⁵ Oruhai nod orikot i tadau do TUHAN; i tadau do koporikatan dit Osundu Kopio do karaagan. Kotompurolosi no kopio o tadau’ddi tu’ porikot do kosusaan dot agayo om karaagan! ¹⁶ Poingontong toko’ po om aiso’ no o pokukurayan toko’ do tontok do pingraagon i tanom toko’. Aiso’ no o kaarapadan do hilo’d Walai’d Sasambayangan dot Agayo, i walai do Kinorohingan toko’. ¹⁷ Kumoring tomod nopo i linsou do hilo’d tana’ dit otuu. Aiso’ no o gandum do poopion, om songingraag poddi i sulap do poiyanan do gandum, tu’ aiso’ no o suang. ¹⁸ Songuni-uni ngai’ po i tayam-tayam, tu’ aiso’ no o sakot do kanon diyolo’; om iri baanan do dumba’ nga’ oinggorit po tomod. ¹⁹ Lumohou oku po do mokitulung diya’, oi TUHAN, tu’ nongoriou no i sakot om i kokoyuan, do miagal pod nosorob do tapui. ²⁰ Ilo’ piya nintorusan nga’ lumohou i’ diya’ do mokitulung tu’ nangarasak ngai’ no o bawang, om a’ no iyolo’ koinum.

¹ Pounio’ no i torumpit; pounio’ i pouunion do popoinsan do tulun do haro o koligagaanan do hilo’d Sion, i nulu-nulu dot iyonon do Kinorohingan toko’. Pananggagarai no, oi tulun do Yohuda! Tu’ oruhai nod orikot i tadau’d TUHAN. ² Tadau nopondoddi om otuong om oluhung, om dondom om momihaun. Rumikot no i katat dot ogumu’ kopio gisom dot otuong poo o tawan do hilo’d konuluhanan. A’ i’ nokoumbal do haro o miagal diri, om aiso’ nondo kawagu ot osiliu do miagal diri do gisom dot alaid. ³ Miagal po iyolo’d tapui do monorob do koinsanai di totonomon. Id dosunsudan nopo di katat om miagal pod kabun dot Idon i tana’, nga’ hiri nopod dotolikudan di katat om miagal pod tana’ dit aiso’ o sumuni. Aiso’ no o milo do mogidu’ do mantad id diyolo’. ⁴ Koiyo-iyo iyolo’d kuda’; om iyo di kuda’ do don sumasangod o pananangkus diyolo’. ⁵ Tontok di minsimpod iyolo’ do hilo’d timpak do nuluhon, om angarak po o karangahan diyolo’ do miagal do korita’-kuda’; songkopit-kopit po iyolo’ do miagal do sakot di nokoring do tutudan. Abaris nopo iyolo’ do miagal do soudor dit ongokoris do posodia’ do mongoi sangod. ⁶ Soira’ di minsomok iyolo’, om oinsanan nopo o tulun do moddosi; mumposi’ ngai’ nopo o rabas do tulun. ⁷ Miagal po iyolo’ do gunsiou do sumangod; om miagal po iyolo’ do soudor do mindakod di tolig. Poburuan nopo diyolo’ do mamanau om a’ no iyolo’ sumala’ di ralan. ⁸ Om a’ iyolo’ mogisogulu-gulu, lumopuson nopo iyolo’ di tantob, om aiso’ no o milo do mangantob diyolo’. ⁹ Soruangon nopo diyolo’ i bandar, solokoyon nopo diyolo’ i tolig; indokodon ngai’ nopo diyolo’ i walai om maya’ do liligaon do sumuang do miagal pod mananakau. ¹⁰ Oguyu’ nopo iti tana’ do tontok di rumikot iyolo’; gumogor nopo ilo tawan. Tumuong ilo tadau om ilo tulan om rombituon po nga’ a’ no mogulinau. ¹¹ Miagal pod tinggoron o boros do TUHAN, do monuhu’ ngai’ di soudor dau. Iri nopo i soudor di winoyo’ dau om ogumu’ om ongokoris. Korolosi no kopio i tadau’d TUHAN! Om iso’ pod tulun nga’ aiso’ no ot apasi do tontok diri. ¹² Boros kad TUHAN, ’’Nga’ dinondo piya, nga’ rologo kou no do mikuwo’d aayi-ayi’ o ginawo om guli’ kou no dot id doho’, do mikuwo’d puasa om mihad. ¹³ Pologoso’ no do mantad id ginawo dokoyu o monosol om pointalang do katangaban dokoyu; okon i’ ko’ pakayan noo dokoyu o hurakon,’’ ka dau. Guli’ no dot id TUHAN, i Kinorohingan dokoyu. Obinglisiu i’ iyau om osianan kasai’, alanut i’ o ginawo dau om batos dau nga’ sulungon i’ dau; posodia’ kasai’ i’ iyau do mangampun om a’ i’ orohian do monginggorit. ¹⁴ Tu’ wolihan i’ doti’ do TUHAN, i Kinorohingan dokoyu o pomusarahan dau, om barakatan kou indo do gisom dot a’ aayi-ayi’. Om milo kou indo do papatahak do porsombahan do gandum om waig dot anggur dot id dau. ¹⁵ Pounio’ no i torumpit do hilo’d Sion, i nuluhon do Kinorohingan. Ponuhu’ no di tulun dot ogumu’ do puasa om papaharo do pitimungan! ¹⁶ Timungo’ ngai’ no i tulun; posodiawo’ no iyolo’ do rumapou do pitimungan dot agayo; angatan no i komolohingan no; timungon no i tangaanak om i nogi’ i ragang po. Iri piya wagu po kakawin nga’ mositi’ no do lumabus do mantad id bilik diyolo’ do mongoi rapou di pitimungan. ¹⁷ Iri nopo imam, i maganu-anu do hiri’d Walai’d Sasambayangan dot Agayo do hiri’d pialatan di pananaraban do porsombahan om i kakilima’ di ponong id wawayaan, nga’ mositi’ nod mihad om sumambayang do poingkaa: ’’Kosianai nod tulun nu, oi TUHAN. Kada’ pologoso’ o bansa’d suwai do pokoruol dahai om momohingi-hingi dahai do mimboros do poingkaa, ’Honggo no i Kinorohingan dokoyu?’ ka,’’ kanto. ¹⁸ Om pinadul iddi do TUHAN i tana’ dau; om ninsianan dau i tulun dau. ¹⁹ Sinimbar dau iyolo’ do poingkaa: ’’Onuan ku nondo iyokoyu do gandum om waig dot anggur om tumau do saitun, do maan dokoyu dot akanon om angayahan ngai’ kou indo. Om a’ kou nondo indaraaton om a’ irak-irakan do bansa’d suwai. ²⁰ Poinsoduwon ku nondo i katat dot ogumu’ do mantad hilo’d utara om uyungon ku o wookon diyolo’ do hilo’d tana’ do kowotuan. Iri nopo i borisan diyolo’ dit id gulu om ouyung do hilo’d Rahat do Napatai, om iri no i borisan dot id tohuri om kakaa do hilo’d Rahat do Tanga’. Om outong pondo i rata’ diyolo’. Patayon ku nondo iyolo’ tu’ minonginggorit i’ iyolo’ dokoyu. ²¹ Kada’ kooris, oi koumaan, suwai ko’ kooropod no om posonongon no o ginawo om sorohon no i kosonongo’ do TUHAN dot id dokoyu. ²² Kada’ kooris, oi nintorusan. Otomou no o sakot dot akanon dokoyu; mongua’ no i kouwaan, om osima’ nod tua’ dot ara om tua’ dot anggur. ²³ Kooropod kou no oi tulun do Sion, kotood no tu’ osonong i’ o TUHAN, i Kinorohingan dokoyu dot id dokoyu. Nonuan kou dau do rasam dit osuhatan no kopio do tontok di maso do lumahanggang o roun do kayu. Om pinorikot dau dot id dokoyu i rasam di maso dot osogit om pinorikot dau i rasam di maso di momuroun kawagu o kayu, do miagal di gulu. ²⁴ Opudsuan nopondo do gandum i kinoiyonon do momogomos do gandum; om oponu’ i kinoiyonon di pamagaan dot anggur om i pamagaan do tumau’d saitun. ²⁵ Pogulion ku indo kawagu i natagak do mantad id dokoyu do tontok di piro-piro o toun do nongoi di katat oiyo’ do minangakan i tanom-tanom dokoyu. Tu’ iyoho’ i’ o minonuhu’ddi do mongoi panangod dokoyu. ²⁶ Baino’ nopondo om osima’ kou no do kanon, om ayahan kou. Om royohon nondo dokoyu o TUHAN, i Kinorohingan dokoyu, i minomonsoi do koinsanai di koimayaan kopio dot id dokoyu. A’ nondo koumbal kawagu dot oindaraat o tulun ku. ²⁷ Om oilaan nogindo dokoyu oi tulun dot Israil, dot id pogialatan oku dokoyu, om oilaan dokoyu dot iyoho’ no, i TUHAN, o Kinorohingan dokoyu, om aiso’ no o suwai ko’ iyoho’. A’ nondo koumbal dot ointingayam o tulun ku,’’ ka dau. ²⁸ Boros kad TUHAN, ’’Koimbagu nopondo om potuntugon ku o Rusod ku dot id koinsanai’d tulun: popimboros nondo do boros ku i tangaanak dokoyu do tongokusai om tongoondu’; koipi nondo i komolohingan dokoyu, om kokito do pinointalang i tangaanakwagu om i kosumandakan. ²⁹ Tontok nopondo do maso’ddi om potuntugon ku nondo i Rusod ku dot id susuhuon piya dokoyu do tongokusai om tongoondu’. ³⁰ Manahak oku nondo do pogintutunan do hilo’d tawan om hiti’d pomogunan do rumikot i tadau’ddi. Haro nondo o mogipapatai, om tapui om lisun dot akapal. ³¹ Tumuong nondo ilo tadau, om rumagang do miagal do raha’ ilo tulan do tintod do korikatan di tadau’d TUHAN di korolosi kopio. ³² Nga’ apasi indo o koinsanai’d tulun di mokiuhup do TUHAN. Do miagal di nokoboros do TUHAN do poingkaa: ’Haro i’ o piro-piro di tulun do kalabus do mantad id Yorusalim; apasi indo i tulun di pilion ku,’ ka,’’ ka dau.

¹ Om boros kad TUHAN, ’’Tontok nopondo do maso’ddi om posimbayanon ku nondo kawagu o Yohuda om Yorusalim. ² Timungon ngai’ ku nondo o koinsanai di bansa’ om angatan ku iyolo’ do hilo’d Kubong do Pomutusan. Hilo’ nondo do butusan ku iyolo’ tu’ araat i’ o winonsoi diyolo’ dot id Israil, i tulun ku. Pinasasad diyolo’ i tulun dot Israil do hilo’d pomogunan do suwai om pinogibahagi-hagi’ diyolo’ do minanganu i tana’ dot Israil. ³ Nundi’ diyolo’ do mongilo ondung isai o kaanu di tulun di natangkap diri. Dinagang diyolo’ o tangaanak do tongokusai om tongoondu’ dot id ponguripanan, do maan do pambayar do sundal om waig dot anggur. ⁴ Nunu daa o wonsoyon dokoyu dot id doho’, oi Tirus, om Sidon, om koinsanai di watas do Pilistin? Mumbal kou daa do sumuli’ doho’? Ondung sumuli’ kou, om iyoho’ nga’ a’ i’ alaid do sumuli’ dokoyu. ⁵ Tinanggayan dokoyu i pirok om tamas ku, om nigitan dokoyu i dapu’ ku dot angagayo o gatang do hilo’d walai’d tingolig dokoyu. ⁶ Tinanggayan dokoyu i tulun do Yohuda om Yorusalim do mininsodu’ do pomogunan diyolo’ om nadagang dokoyu iyolo’ dot id bansa’ do Yunani. ⁷ Baino’ nondo om posoliwanon ku iyolo’ do mantad hilo’d piro-piro o kinoiyonon di pinadagangan dokoyu diyolo’. Om wonsoyon ku nondo dot id dokoyu o miagal di winonsoi dokoyu dot id diyolo’. ⁸ Pologoson ku nondo i tangaanak dokoyu do kusai om tondu’ dot adagang dot id tulun do Yohuda om dagangon nondo diyolo’ iyolo’ dot id tulun do Siba, i pomogunan do hilo’d sodu’. Iyoho’ no, i TUHAN, o minomoros diti. ⁹ Poboroso’ no o kopoilaan diti dot id koinsanai’d bansa’: ’Sodia’ nod sumangod; lohowo’ ngai’ no i gunsiou dokoyu; timungo’ ngai’ no i soudor dokoyu om mamanau no! ¹⁰ Dunsulon no i lahis do radu dokoyu do maan do gayang om silihon do tandus i pisau di ponunutu’ dokoyu. Iri piya i tulun dot ongoluhoi nga’ mositi’ nod kaakun do mongoi sangod. ¹¹ Lomusai nod rumikot, koinsanai dokoyu i bansa’ dot id posorili’, om tumimung i’ do hilo’d rantai,’ ka dau. Polintuhuno’ ngai’ no i soudor nu do mongoi panangod diyolo’, oi TUHAN. ¹² Om boro-boros no kawagu o TUHAN do poingkaa, ’Mositi’ nod sumodia’ ngai’ i bansa’, om rumikot do hilo’d kubong di roitan do Kubong do Pomutusan. Om hilo’ oku nondo, iyoho’ i TUHAN, do mirikau do momutus do koinsanai’d bansa’ di posorili’ di tulun ku. ¹³ Angaraat tomod iyolo’; tataso’ no iyolo’ do miagal do gandum di dongmongomot; pagao’ no iyolo’ do miagal di pamaga’ do tua’ dot anggur dot id pamagaan di noponu’ no; om gisom do kalabai om koluyung i waig dot anggur. ¹⁴ Rinibuan po o tulun do hilo’d kubong di roitan do Kubong do Pomutusan. Tu’ hilo’ no do rumikot i tadau’d TUHAN om a’ no alaid do rumikot iri. ¹⁵ Tumuong no o tadau om tulan, om a’ mogulinau i rombituon,’ ka,’’ ka dau. ¹⁶ Mamagarom o TUHAN do mantad hilo’d Sion, i nuluhon dau; ongorod po i boros dau do mantad hilo’d Yorusalim; gumogor po o tawan om tana’. Nga’ obian id TUHAN i tulun dau. ¹⁷ ’’Om koilo kou nogindo oi Israil, dot iyoho’ no o TUHAN, i Kinorohingan dokoyu. Poingiyon oku do hilo’d Sion, i nulu-nulu ku dit olidang. Osiliu nondo do bandar dot olidang o Yorusalim; om a’ nondo kawagu iri aala’ do bansa’d suwai. ¹⁸ Tontok nopondo do maso’ddi om otongkop nopo do kabun dot anggur ilo konuluhanan, om haro ngai’ nopo o tayam-tayam dot abantalan dot id pointikid-tikid do nuluhon dit ongoluhub; om kiwaig kasai’ nopondo i bawang do hilo’d Yohuda. Om haro nondo o bawang do lumuyung do mantad hiri’d Walai’d Sasambayangan dot Agayo, om momoyopos nondo iri di Rantai dot Akasia. ¹⁹ Osiliu nondo do tana’ do kowotuan o Masir, om osiliu do pogun ot Idom, tu’ minanangod i’ iyolo’ di pomogunan do Yohuda om minamatai di tulun do hilo’ dit aiso’ o sala’. ²⁰ - ²¹ Obian ku indo do sumuli’ i tulun do nangapatai, a’ ku no olu-oluon i tulun do kisala’. Nga’ Yohuda nopondo om Yorusalim om iyonon kasai’ i’ do tulun do gisom dot alaid, om iyoho’ i TUHAN, nga’ miyon i’ do hilo’d Sion, i nuluhon ku dit olidang,’’ ka dau.